꧒. ꦏꦴꦪꦱꦸꦠ꧀ꦠꦁ

꧑꧘꧓. ꦱꦴꦮꦠ꧀ꦡꦶꦤꦶꦢꦴꦤꦁ. ‘‘ꦱꦺꦪ꧀ꦪꦡꦴꦥꦶ, ꦨꦶꦏ꧀ꦑꦮꦺ, ꦄꦪꦁ ꦏꦴꦪꦺꦴ ꦄꦴꦲꦴꦫꦛ꧀ꦜꦶꦠꦶꦏꦺꦴ, ꦄꦴꦲꦴꦫꦁ ꦥꦛꦶꦕ꧀ꦕ ꦠꦶꦛ꧀ꦜꦠꦶ, ꦄꦤꦴꦲꦴꦫꦺꦴ ꦤꦺꦴ ꦠꦶꦛ꧀ꦜꦠꦶ; ꦌꦮꦩꦺꦮ ꦑꦺꦴ, ꦨꦶꦏ꧀ꦑꦮꦺ, ꦥꦚ꧀ꦕ ꦤꦷꦮꦫꦟꦴ ꦄꦴꦲꦴꦫꦛ꧀ꦜꦶꦠꦶꦏꦴ, ꦄꦴꦲꦴꦫꦁ ꦥꦛꦶꦕ꧀ꦕ ꦠꦶꦛ꧀ꦜꦤ꧀ꦠꦶ, ꦄꦤꦴꦲꦴꦫꦴ ꦤꦺꦴ ꦠꦶꦛ꧀ꦜꦤ꧀ꦠꦶ.

‘‘ꦏꦺꦴ ꦕ, ꦨꦶꦏ꧀ꦑꦮꦺ, ꦄꦴꦲꦴꦫꦺꦴ ꦄꦤꦸꦥ꧀ꦥꦤ꧀ꦤꦱ꧀ꦱ ꦮꦴ ꦏꦴꦩꦕ꧀ꦖꦤ꧀ꦢꦱ꧀ꦱ ꦈꦥ꧀ꦥꦴꦢꦴꦪ, ꦈꦥ꧀ꦥꦤ꧀ꦤꦱ꧀ꦱ ꦮꦴ ꦏꦴꦩꦕ꧀ꦖꦤ꧀ꦢꦱ꧀ꦱ ꦨꦶꦪ꧀ꦪꦺꦴꦨꦴꦮꦴꦪ ꦮꦺꦥꦸꦭ꧀ꦭꦴꦪ? ꦄꦠ꧀ꦡꦶ, ꦨꦶꦏ꧀ꦑꦮꦺ, ꦱꦸꦨꦤꦶꦩꦶꦠ꧀ꦠꦁ. ꦠꦠ꧀ꦡ ꦄꦪꦺꦴꦤꦶꦱꦺꦴꦩꦤꦱꦶꦏꦴꦫꦧꦲꦸꦭꦷꦏꦴꦫꦺꦴ – ꦄꦪꦩꦴꦲꦴꦫꦺꦴ ꦄꦤꦸꦥ꧀ꦥꦤ꧀ꦤꦱ꧀ꦱ ꦮꦴ ꦏꦴꦩꦕ꧀ꦖꦤ꧀ꦢꦱ꧀ꦱ ꦈꦥ꧀ꦥꦴꦢꦴꦪ, ꦈꦥ꧀ꦥꦤ꧀ꦤꦱ꧀ꦱ ꦮꦴ ꦏꦴꦩꦕ꧀ꦖꦤ꧀ꦢꦱ꧀ꦱ ꦨꦶꦪ꧀ꦪꦺꦴꦨꦴꦮꦴꦪ ꦮꦺꦥꦸꦭ꧀ꦭꦴꦪ.

‘‘ꦏꦺꦴ ꦕ, ꦨꦶꦏ꧀ꦑꦮꦺ, ꦄꦴꦲꦴꦫꦺꦴ ꦄꦤꦸꦥ꧀ꦥꦤ꧀ꦤꦱ꧀ꦱ ꦮꦴ ꦧ꧀ꦪꦴꦥꦴꦢꦱ꧀ꦱ ꦈꦥ꧀ꦥꦴꦢꦴꦪ, ꦈꦥ꧀ꦥꦤ꧀ꦤꦱ꧀ꦱ ꦮꦴ ꦧ꧀ꦪꦴꦥꦴꦢꦱ꧀ꦱ ꦨꦶꦪ꧀ꦪꦺꦴꦨꦴꦮꦴꦪ ꦮꦺꦥꦸꦭ꧀ꦭꦴꦪ? ꦄꦠ꧀ꦡꦶ, ꦨꦶꦏ꧀ꦑꦮꦺ, ꦥꦛꦶꦓꦤꦶꦩꦶꦠ꧀ꦠꦁ. ꦠꦠ꧀ꦡ ꦄꦪꦺꦴꦤꦶꦱꦺꦴꦩꦤꦱꦶꦏꦴꦫꦧꦲꦸꦭꦷꦏꦴꦫꦺꦴ – ꦄꦪꦩꦴꦲꦴꦫꦺꦴ ꦄꦤꦸꦥ꧀ꦥꦤ꧀ꦤꦱ꧀ꦱ ꦮꦴ ꦧ꧀ꦪꦴꦥꦴꦢꦱ꧀ꦱ ꦈꦥ꧀ꦥꦴꦢꦴꦪ, ꦈꦥ꧀ꦥꦤ꧀ꦤꦱ꧀ꦱ ꦮꦴ ꦧ꧀ꦪꦴꦥꦴꦢꦱ꧀ꦱ ꦨꦶꦪ꧀ꦪꦺꦴꦨꦴꦮꦴꦪ ꦮꦺꦥꦸꦭ꧀ꦭꦴꦪ.

‘‘ꦏꦺꦴ ꦕ, ꦨꦶꦏ꧀ꦑꦮꦺ, ꦄꦴꦲꦴꦫꦺꦴ ꦄꦤꦸꦥ꧀ꦥꦤ꧀ꦤꦱ꧀ꦱ ꦮꦴ ꦡꦶꦤꦩꦶꦢ꧀ꦣꦱ꧀ꦱ ꦈꦥ꧀ꦥꦴꦢꦴꦪ, ꦈꦥ꧀ꦥꦤ꧀ꦤꦱ꧀ꦱ ꦮꦴ ꦡꦶꦤꦩꦶꦢ꧀ꦣꦱ꧀ꦱ ꦨꦶꦪ꧀ꦪꦺꦴꦨꦴꦮꦴꦪ ꦮꦺꦥꦸꦭ꧀ꦭꦴꦪ? ꦄꦠ꧀ꦡꦶ, ꦨꦶꦏ꧀ꦑꦮꦺ, ꦄꦫꦠꦶ ꦠꦤ꧀ꦢꦶ ꦮꦶꦗꦩ꧀ꦨꦶꦠꦴ ꦨꦠ꧀ꦠꦱꦩ꧀ꦩꦢꦺꦴ ꦕꦺꦠꦱꦺꦴ ꦕ ꦭꦷꦤꦠ꧀ꦠꦁ. ꦠꦠ꧀ꦡ ꦄꦪꦺꦴꦤꦶꦱꦺꦴꦩꦤꦱꦶꦏꦴꦫꦧꦲꦸꦭꦷꦏꦴꦫꦺꦴ – ꦄꦪꦩꦴꦲꦴꦫꦺꦴ ꦄꦤꦸꦥ꧀ꦥꦤ꧀ꦤꦱ꧀ꦱ ꦮꦴ ꦡꦶꦤꦩꦶꦢ꧀ꦣꦱ꧀ꦱ ꦈꦥ꧀ꦥꦴꦢꦴꦪ, ꦈꦥ꧀ꦥꦤ꧀ꦤꦱ꧀ꦱ ꦮꦴ ꦡꦶꦤꦩꦶꦢ꧀ꦣꦱ꧀ꦱ ꦨꦶꦪ꧀ꦪꦺꦴꦨꦴꦮꦴꦪ ꦮꦺꦥꦸꦭ꧀ꦭꦴꦪ.

‘‘ꦏꦺꦴ ꦕ, ꦨꦶꦏ꧀ꦑꦮꦺ, ꦄꦴꦲꦴꦫꦺꦴ ꦄꦤꦸꦥ꧀ꦥꦤ꧀ꦤꦱ꧀ꦱ ꦮꦴ ꦈꦢ꧀ꦣꦕ꧀ꦕꦏꦸꦏ꧀ꦏꦸꦕ꧀ꦕꦱ꧀ꦱ ꦈꦥ꧀ꦥꦴꦢꦴꦪ, ꦈꦥ꧀ꦥꦤ꧀ꦤꦱ꧀ꦱ ꦮꦴ ꦈꦢ꧀ꦣꦕ꧀ꦕꦏꦸꦏ꧀ꦏꦸꦕ꧀ꦕꦱ꧀ꦱ ꦨꦶꦪ꧀ꦪꦺꦴꦨꦴꦮꦴꦪ ꦮꦺꦥꦸꦭ꧀ꦭꦴꦪ? ꦄꦠ꧀ꦡꦶ, ꦨꦶꦏ꧀ꦑꦮꦺ, ꦕꦺꦠꦱꦺꦴ ꦄꦮꦹꦥꦱꦩꦺꦴ. ꦠꦠ꧀ꦡ ꦄꦪꦺꦴꦤꦶꦱꦺꦴꦩꦤꦱꦶꦏꦴꦫꦧꦲꦸꦭꦷꦏꦴꦫꦺꦴ – ꦄꦪꦩꦴꦲꦴꦫꦺꦴ ꦄꦤꦸꦥ꧀ꦥꦤ꧀ꦤꦱ꧀ꦱ ꦮꦴ ꦈꦢ꧀ꦣꦕ꧀ꦕꦏꦸꦏ꧀ꦏꦸꦕ꧀ꦕꦱ꧀ꦱ ꦈꦥ꧀ꦥꦴꦢꦴꦪ, ꦈꦥ꧀ꦥꦤ꧀ꦤꦱ꧀ꦱ ꦮꦴ ꦈꦢ꧀ꦣꦕ꧀ꦕꦏꦸꦏ꧀ꦏꦸꦕ꧀ꦕꦱ꧀ꦱ ꦨꦶꦪ꧀ꦪꦺꦴꦨꦴꦮꦴꦪ ꦮꦺꦥꦸꦭ꧀ꦭꦴꦪ.

‘‘ꦏꦺꦴ ꦕ, ꦨꦶꦏ꧀ꦑꦮꦺ, ꦄꦴꦲꦴꦫꦺꦴ ꦄꦤꦸꦥ꧀ꦥꦤ꧀ꦤꦴꦪ ꦮꦴ ꦮꦶꦕꦶꦏꦶꦕ꧀ꦖꦴꦪ ꦈꦥ꧀ꦥꦴꦢꦴꦪ, ꦈꦥ꧀ꦥꦤ꧀ꦤꦴꦪ ꦮꦴ ꦮꦶꦕꦶꦏꦶꦕ꧀ꦖꦴꦪ ꦨꦶꦪ꧀ꦪꦺꦴꦨꦴꦮꦴꦪ ꦮꦺꦥꦸꦭ꧀ꦭꦴꦪ? ꦄꦠ꧀ꦡꦶ, ꦨꦶꦏ꧀ꦑꦮꦺ, ꦮꦶꦕꦶꦏꦶꦕ꧀ꦖꦴꦛ꧀ꦜꦴꦤꦷꦪꦴ ꦣꦩ꧀ꦩꦴ. ꦠꦠ꧀ꦡ ꦄꦪꦺꦴꦤꦶꦱꦺꦴꦩꦤꦱꦶꦏꦴꦫꦧꦲꦸꦭꦷꦏꦴꦫꦺꦴ – ꦄꦪꦩꦴꦲꦴꦫꦺꦴ ꦄꦤꦸꦥ꧀ꦥꦤ꧀ꦤꦴꦪ ꦮꦴ ꦮꦶꦕꦶꦏꦶꦕ꧀ꦖꦴꦪ ꦈꦥ꧀ꦥꦴꦢꦴꦪ, ꦈꦥ꧀ꦥꦤ꧀ꦤꦴꦪ ꦮꦴ ꦮꦶꦕꦶꦏꦶꦕ꧀ꦖꦴꦪ ꦨꦶꦪ꧀ꦪꦺꦴꦨꦴꦮꦴꦪ ꦮꦺꦥꦸꦭ꧀ꦭꦴꦪ.

‘‘ꦱꦺꦪ꧀ꦪꦡꦴꦥꦶ, ꦨꦶꦏ꧀ꦑꦮꦺ, ꦄꦪꦁ ꦏꦴꦪꦺꦴ ꦄꦴꦲꦴꦫꦛ꧀ꦜꦶꦠꦶꦏꦺꦴ, ꦄꦴꦲꦴꦫꦁ ꦥꦛꦶꦕ꧀ꦕ ꦠꦶꦛ꧀ꦜꦠꦶ, ꦄꦤꦴꦲꦴꦫꦺꦴ ꦤꦺꦴ ꦠꦶꦛ꧀ꦜꦠꦶ; ꦌꦮꦩꦺꦮ ꦑꦺꦴ, ꦨꦶꦏ꧀ꦑꦮꦺ, ꦆꦩꦺ ꦥꦚ꧀ꦕ ꦤꦷꦮꦫꦟꦴ ꦄꦴꦲꦴꦫꦛ꧀ꦜꦶꦠꦶꦏꦴ, ꦄꦴꦲꦴꦫꦁ ꦥꦛꦶꦕ꧀ꦕ ꦠꦶꦛ꧀ꦜꦤ꧀ꦠꦶ, ꦄꦤꦴꦲꦴꦫꦴ ꦤꦺꦴ ꦠꦶꦛ꧀ꦜꦤ꧀ꦠꦶ.

‘‘ꦱꦺꦪ꧀ꦪꦡꦴꦥꦶ, ꦨꦶꦏ꧀ꦑꦮꦺ, ꦄꦪꦁ ꦏꦴꦪꦺꦴ ꦄꦴꦲꦴꦫꦛ꧀ꦜꦶꦠꦶꦏꦺꦴ, ꦄꦴꦲꦴꦫꦁ ꦥꦛꦶꦕ꧀ꦕ ꦠꦶꦛ꧀ꦜꦠꦶ, ꦄꦤꦴꦲꦴꦫꦺꦴ ꦤꦺꦴ ꦠꦶꦛ꧀ꦜꦠꦶ; ꦌꦮꦩꦺꦮ ꦑꦺꦴ, ꦨꦶꦏ꧀ꦑꦮꦺ, ꦱꦠ꧀ꦠ ꦧꦺꦴꦗ꧀ꦙꦔ꧀ꦒꦴ ꦄꦴꦲꦴꦫꦛ꧀ꦜꦶꦠꦶꦏꦴ, ꦄꦴꦲꦴꦫꦁ ꦥꦛꦶꦕ꧀ꦕ ꦠꦶꦛ꧀ꦜꦤ꧀ꦠꦶ, ꦄꦤꦴꦲꦴꦫꦴ ꦤꦺꦴ ꦠꦶꦛ꧀ꦜꦤ꧀ꦠꦶ.

‘‘ꦏꦺꦴ ꦕ, ꦨꦶꦏ꧀ꦑꦮꦺ, ꦄꦴꦲꦴꦫꦺꦴ ꦄꦤꦸꦥ꧀ꦥꦤ꧀ꦤꦱ꧀ꦱ ꦮꦴ ꦱꦠꦶꦱꦩ꧀ꦧꦺꦴꦗ꧀ꦙꦔ꧀ꦒꦱ꧀ꦱ ꦈꦥ꧀ꦥꦴꦢꦴꦪ, ꦈꦥ꧀ꦥꦤ꧀ꦤꦱ꧀ꦱ ꦮꦴ ꦱꦠꦶꦱꦩ꧀ꦧꦺꦴꦗ꧀ꦙꦔ꧀ꦒꦱ꧀ꦱ ꦨꦴꦮꦤꦴꦪ ꦥꦴꦫꦶꦥꦹꦫꦶꦪꦴ? ꦄꦠ꧀ꦡꦶ, ꦨꦶꦏ꧀ꦑꦮꦺ, ꦱꦠꦶꦱꦩ꧀ꦧꦺꦴꦗ꧀ꦙꦔ꧀ꦒꦛ꧀ꦜꦴꦤꦷꦪꦴ ꦣꦩ꧀ꦩꦴ. ꦠꦠ꧀ꦡ ꦪꦺꦴꦤꦶꦱꦺꦴꦩꦤꦱꦶꦏꦴꦫꦧꦲꦸꦭꦷꦏꦴꦫꦺꦴ – ꦄꦪꦩꦴꦲꦴꦫꦺꦴ ꦄꦤꦸꦥ꧀ꦥꦤ꧀ꦤꦱ꧀ꦱ ꦮꦴ ꦱꦠꦶꦱꦩ꧀ꦧꦺꦴꦗ꧀ꦙꦔ꧀ꦒꦱ꧀ꦱ ꦈꦥ꧀ꦥꦴꦢꦴꦪ, ꦈꦥ꧀ꦥꦤ꧀ꦤꦱ꧀ꦱ ꦮꦴ ꦱꦠꦶꦱꦩ꧀ꦧꦺꦴꦗ꧀ꦙꦔ꧀ꦒꦱ꧀ꦱ ꦨꦴꦮꦤꦴꦪ ꦥꦴꦫꦶꦥꦹꦫꦶꦪꦴ.

‘‘ꦏꦺꦴ ꦕ, ꦨꦶꦏ꧀ꦑꦮꦺ, ꦄꦴꦲꦴꦫꦺꦴ ꦄꦤꦸꦥ꧀ꦥꦤ꧀ꦤꦱ꧀ꦱ ꦮꦴ ꦣꦩ꧀ꦩꦮꦶꦕꦪꦱꦩ꧀ꦧꦺꦴꦗ꧀ꦙꦔ꧀ꦒꦱ꧀ꦱ ꦈꦥ꧀ꦥꦴꦢꦴꦪ, ꦈꦥ꧀ꦥꦤ꧀ꦤꦱ꧀ꦱ ꦮꦴ ꦣꦩ꧀ꦩꦮꦶꦕꦪꦱꦩ꧀ꦧꦺꦴꦗ꧀ꦙꦔ꧀ꦒꦱ꧀ꦱ ꦨꦴꦮꦤꦴꦪ ꦥꦴꦫꦶꦥꦹꦫꦶꦪꦴ? ꦄꦠ꧀ꦡꦶ, ꦨꦶꦏ꧀ꦑꦮꦺ, ꦏꦸꦱꦭꦴꦏꦸꦱꦭꦴ ꦣꦩ꧀ꦩꦴ, ꦱꦴꦮꦗ꧀ꦗꦴꦤꦮꦗ꧀ꦗꦴ ꦣꦩ꧀ꦩꦴ, ꦲꦷꦤꦥꦟꦷꦠꦴ ꦣꦩ꧀ꦩꦴ, ꦏꦟ꧀ꦲꦱꦸꦏ꧀ꦏꦱꦥ꧀ꦥꦛꦶꦨꦴꦒꦴ ꦣꦩ꧀ꦩꦴ. ꦠꦠ꧀ꦡ ꦪꦺꦴꦤꦶꦱꦺꦴꦩꦤꦱꦶꦏꦴꦫꦧꦲꦸꦭꦷꦏꦴꦫꦺꦴ – ꦄꦪꦩꦴꦲꦴꦫꦺꦴ ꦄꦤꦸꦥ꧀ꦥꦤ꧀ꦤꦱ꧀ꦱ ꦮꦴ ꦣꦩ꧀ꦩꦮꦶꦕꦪꦱꦩ꧀ꦧꦺꦴꦗ꧀ꦙꦔ꧀ꦒꦱ꧀ꦱ ꦈꦥ꧀ꦥꦴꦢꦴꦪ, ꦈꦥ꧀ꦥꦤ꧀ꦤꦱ꧀ꦱ ꦮꦴ ꦣꦩ꧀ꦩꦮꦶꦕꦪꦱꦩ꧀ꦧꦺꦴꦗ꧀ꦙꦔ꧀ꦒꦱ꧀ꦱ ꦨꦴꦮꦤꦴꦪ ꦥꦴꦫꦶꦥꦹꦫꦶꦪꦴ.

‘‘ꦏꦺꦴ ꦕ, ꦨꦶꦏ꧀ꦑꦮꦺ, ꦄꦴꦲꦴꦫꦺꦴ ꦄꦤꦸꦥ꧀ꦥꦤ꧀ꦤꦱ꧀ꦱ ꦮꦴ ꦮꦷꦫꦶꦪꦱꦩ꧀ꦧꦺꦴꦗ꧀ꦙꦔ꧀ꦒꦱ꧀ꦱ ꦈꦥ꧀ꦥꦴꦢꦴꦪ, ꦈꦥ꧀ꦥꦤ꧀ꦤꦱ꧀ꦱ ꦮꦴ ꦮꦷꦫꦶꦪꦱꦩ꧀ꦧꦺꦴꦗ꧀ꦙꦔ꧀ꦒꦱ꧀ꦱ ꦨꦴꦮꦤꦴꦪ ꦥꦴꦫꦶꦥꦹꦫꦶꦪꦴ? ꦄꦠ꧀ꦡꦶ, ꦨꦶꦏ꧀ꦑꦮꦺ, ꦄꦴꦫꦩ꧀ꦨꦣꦴꦠꦸ [ꦄꦴꦫꦧ꧀ꦨꦣꦴꦠꦸ (ꦱ꧀ꦪꦴ. ꦏ.)] ꦤꦶꦏ꧀ꦏꦩꦣꦴꦠꦸ ꦥꦫꦏ꧀ꦏꦩꦣꦴꦠꦸ. ꦠꦠ꧀ꦡ ꦪꦺꦴꦤꦶꦱꦺꦴꦩꦤꦱꦶꦏꦴꦫꦧꦲꦸꦭꦷꦏꦴꦫꦺꦴ – ꦄꦪꦩꦴꦲꦴꦫꦺꦴ ꦄꦤꦸꦥ꧀ꦥꦤ꧀ꦤꦱ꧀ꦱ ꦮꦴ ꦮꦷꦫꦶꦪꦱꦩ꧀ꦧꦺꦴꦗ꧀ꦙꦔ꧀ꦒꦱ꧀ꦱ ꦈꦥ꧀ꦥꦴꦢꦴꦪ, ꦈꦥ꧀ꦥꦤ꧀ꦤꦱ꧀ꦱ ꦮꦴ ꦮꦷꦫꦶꦪꦱꦩ꧀ꦧꦺꦴꦗ꧀ꦙꦔ꧀ꦒꦱ꧀ꦱ ꦨꦴꦮꦤꦴꦪ ꦥꦴꦫꦶꦥꦹꦫꦶꦪꦴ.

‘‘ꦏꦺꦴ ꦕ, ꦨꦶꦏ꧀ꦑꦮꦺ, ꦄꦴꦲꦴꦫꦺꦴ ꦄꦤꦸꦥ꧀ꦥꦤ꧀ꦤꦱ꧀ꦱ ꦮꦴ ꦥꦷꦠꦶꦱꦩ꧀ꦧꦺꦴꦗ꧀ꦙꦔ꧀ꦒꦱ꧀ꦱ ꦈꦥ꧀ꦥꦴꦢꦴꦪ, ꦈꦥ꧀ꦥꦤ꧀ꦤꦱ꧀ꦱ ꦮꦴ ꦥꦷꦠꦶꦱꦩ꧀ꦧꦺꦴꦗ꧀ꦙꦔ꧀ꦒꦱ꧀ꦱ ꦨꦴꦮꦤꦴꦪ ꦥꦴꦫꦶꦥꦹꦫꦶꦪꦴ? ꦄꦠ꧀ꦡꦶ, ꦨꦶꦏ꧀ꦑꦮꦺ, ꦥꦷꦠꦶꦱꦩ꧀ꦧꦺꦴꦗ꧀ꦙꦔ꧀ꦒꦛ꧀ꦜꦴꦤꦷꦪꦴ ꦣꦩ꧀ꦩꦴ. ꦠꦠ꧀ꦡ ꦪꦺꦴꦤꦶꦱꦺꦴꦩꦤꦱꦶꦏꦴꦫꦧꦲꦸꦭꦷꦏꦴꦫꦺꦴ – ꦄꦪꦩꦴꦲꦴꦫꦺꦴ ꦄꦤꦸꦥ꧀ꦥꦤ꧀ꦤꦱ꧀ꦱ ꦮꦴ ꦥꦷꦠꦶꦱꦩ꧀ꦧꦺꦴꦗ꧀ꦙꦔ꧀ꦒꦱ꧀ꦱ ꦈꦥ꧀ꦥꦴꦢꦴꦪ, ꦈꦥ꧀ꦥꦤ꧀ꦤꦱ꧀ꦱ ꦮꦴ ꦥꦷꦠꦶꦱꦩ꧀ꦧꦺꦴꦗ꧀ꦙꦔ꧀ꦒꦱ꧀ꦱ ꦨꦴꦮꦤꦴꦪ ꦥꦴꦫꦶꦥꦹꦫꦶꦪꦴ.

‘‘ꦏꦺꦴ ꦕ, ꦨꦶꦏ꧀ꦑꦮꦺ, ꦄꦴꦲꦴꦫꦺꦴ ꦄꦤꦸꦥ꧀ꦥꦤ꧀ꦤꦱ꧀ꦱ ꦮꦴ ꦥꦱ꧀ꦱꦢ꧀ꦣꦶꦱꦩ꧀ꦧꦺꦴꦗ꧀ꦙꦔ꧀ꦒꦱ꧀ꦱ ꦈꦥ꧀ꦥꦴꦢꦴꦪ, ꦈꦥ꧀ꦥꦤ꧀ꦤꦱ꧀ꦱ ꦮꦴ ꦥꦱ꧀ꦱꦢ꧀ꦣꦶꦱꦩ꧀ꦧꦺꦴꦗ꧀ꦙꦔ꧀ꦒꦱ꧀ꦱ ꦨꦴꦮꦤꦴꦪ ꦥꦴꦫꦶꦥꦹꦫꦶꦪꦴ? ꦄꦠ꧀ꦡꦶ, ꦨꦶꦏ꧀ꦑꦮꦺ, ꦏꦴꦪꦥꦱ꧀ꦱꦢ꧀ꦣꦶ, ꦕꦶꦠ꧀ꦠꦥꦱ꧀ꦱꦢ꧀ꦣꦶ. ꦠꦠ꧀ꦡ ꦪꦺꦴꦤꦶꦱꦺꦴꦩꦤꦱꦶꦏꦴꦫꦧꦲꦸꦭꦷꦏꦴꦫꦺꦴ – ꦄꦪꦩꦴꦲꦴꦫꦺꦴ ꦄꦤꦸꦥ꧀ꦥꦤ꧀ꦤꦱ꧀ꦱ ꦮꦴ ꦥꦱ꧀ꦱꦢ꧀ꦣꦶꦱꦩ꧀ꦧꦺꦴꦗ꧀ꦙꦔ꧀ꦒꦱ꧀ꦱ ꦈꦥ꧀ꦥꦴꦢꦴꦪ, ꦈꦥ꧀ꦥꦤ꧀ꦤꦱ꧀ꦱ ꦮꦴ ꦥꦱ꧀ꦱꦢ꧀ꦣꦶꦱꦩ꧀ꦧꦺꦴꦗ꧀ꦙꦔ꧀ꦒꦱ꧀ꦱ ꦨꦴꦮꦤꦴꦪ ꦥꦴꦫꦶꦥꦹꦫꦶꦪꦴ.

‘‘ꦏꦺꦴ ꦕ, ꦨꦶꦏ꧀ꦑꦮꦺ, ꦄꦴꦲꦴꦫꦺꦴ ꦄꦤꦸꦥ꧀ꦥꦤ꧀ꦤꦱ꧀ꦱ ꦮꦴ ꦱꦩꦴꦣꦶꦱꦩ꧀ꦧꦺꦴꦗ꧀ꦙꦔ꧀ꦒꦱ꧀ꦱ ꦈꦥ꧀ꦥꦴꦢꦴꦪ, ꦈꦥ꧀ꦥꦤ꧀ꦤꦱ꧀ꦱ ꦮꦴ ꦱꦩꦴꦣꦶꦱꦩ꧀ꦧꦺꦴꦗ꧀ꦙꦔ꧀ꦒꦱ꧀ꦱ ꦨꦴꦮꦤꦴꦪ ꦥꦴꦫꦶꦥꦹꦫꦶꦪꦴ? ꦄꦠ꧀ꦡꦶ, ꦨꦶꦏ꧀ꦑꦮꦺ, ꦱꦩꦡꦤꦶꦩꦶꦠ꧀ꦠꦁ [ꦱꦩꦴꦣꦶꦤꦶꦩꦶꦠ꧀ꦠꦁ (ꦱ꧀ꦪꦴ.)] ꦄꦧ꧀ꦪꦒ꧀ꦒꦤꦶꦩꦶꦠ꧀ꦠꦁ. ꦠꦠ꧀ꦡ ꦪꦺꦴꦤꦶꦱꦺꦴꦩꦤꦱꦶꦏꦴꦫꦧꦲꦸꦭꦷꦏꦴꦫꦺꦴ – ꦄꦪꦩꦴꦲꦴꦫꦺꦴ ꦄꦤꦸꦥ꧀ꦥꦤ꧀ꦤꦱ꧀ꦱ ꦮꦴ ꦱꦩꦴꦣꦶꦱꦩ꧀ꦧꦺꦴꦗ꧀ꦙꦔ꧀ꦒꦱ꧀ꦱ ꦈꦥ꧀ꦥꦴꦢꦴꦪ, ꦈꦥ꧀ꦥꦤ꧀ꦤꦱ꧀ꦱ ꦮꦴ ꦱꦩꦴꦣꦶꦱꦩ꧀ꦧꦺꦴꦗ꧀ꦙꦔ꧀ꦒꦱ꧀ꦱ ꦨꦴꦮꦤꦴꦪ ꦥꦴꦫꦶꦥꦹꦫꦶꦪꦴ.

‘‘ꦏꦺꦴ ꦕ, ꦨꦶꦏ꧀ꦑꦮꦺ, ꦄꦴꦲꦴꦫꦺꦴ ꦄꦤꦸꦥ꧀ꦥꦤ꧀ꦤꦱ꧀ꦱ ꦮꦴ ꦈꦥꦺꦏ꧀ꦑꦴꦱꦩ꧀ꦧꦺꦴꦗ꧀ꦙꦔ꧀ꦒꦱ꧀ꦱ ꦈꦥ꧀ꦥꦴꦢꦴꦪ, ꦈꦥ꧀ꦥꦤ꧀ꦤꦱ꧀ꦱ ꦮꦴ ꦈꦥꦺꦏ꧀ꦑꦴꦱꦩ꧀ꦧꦺꦴꦗ꧀ꦙꦔ꧀ꦒꦱ꧀ꦱ ꦨꦴꦮꦤꦴꦪ ꦥꦴꦫꦶꦥꦹꦫꦶꦪꦴ? ꦄꦠ꧀ꦡꦶ, ꦨꦶꦏ꧀ꦑꦮꦺ, ꦈꦥꦺꦏ꧀ꦑꦴꦱꦩ꧀ꦧꦺꦴꦗ꧀ꦙꦔ꧀ꦒꦛ꧀ꦜꦴꦤꦷꦪꦴ ꦣꦩ꧀ꦩꦴ. ꦠꦠ꧀ꦡ ꦪꦺꦴꦤꦶꦱꦺꦴꦩꦤꦱꦶꦏꦴꦫꦧꦲꦸꦭꦷꦏꦴꦫꦺꦴ – ꦄꦪꦩꦴꦲꦴꦫꦺꦴ ꦄꦤꦸꦥ꧀ꦥꦤ꧀ꦤꦱ꧀ꦱ ꦮꦴ ꦈꦥꦺꦏ꧀ꦑꦴꦱꦩ꧀ꦧꦺꦴꦗ꧀ꦙꦔ꧀ꦒꦱ꧀ꦱ ꦈꦥ꧀ꦥꦴꦢꦴꦪ, ꦈꦥ꧀ꦥꦤ꧀ꦤꦱ꧀ꦱ ꦮꦴ ꦈꦥꦺꦏ꧀ꦑꦴꦱꦩ꧀ꦧꦺꦴꦗ꧀ꦙꦔ꧀ꦒꦱ꧀ꦱ ꦨꦴꦮꦤꦴꦪ ꦥꦴꦫꦶꦥꦹꦫꦶꦪꦴ.

‘‘ꦱꦺꦪ꧀ꦪꦡꦴꦥꦶ, ꦨꦶꦏ꧀ꦑꦮꦺ, ꦄꦪꦁ ꦏꦴꦪꦺꦴ ꦄꦴꦲꦴꦫꦛ꧀ꦜꦶꦠꦶꦏꦺꦴ, ꦄꦴꦲꦴꦫꦁ ꦥꦛꦶꦕ꧀ꦕ ꦠꦶꦛ꧀ꦜꦠꦶ, ꦄꦤꦴꦲꦴꦫꦺꦴ ꦤꦺꦴ ꦠꦶꦛ꧀ꦜꦠꦶ; ꦌꦮꦩꦺꦮ ꦑꦺꦴ, ꦨꦶꦏ꧀ꦑꦮꦺ, ꦆꦩꦺ ꦱꦠ꧀ꦠ ꦧꦺꦴꦗ꧀ꦙꦔ꧀ꦒꦴ ꦄꦴꦲꦴꦫꦛ꧀ꦜꦶꦠꦶꦏꦴ, ꦄꦴꦲꦴꦫꦁ ꦥꦛꦶꦕ꧀ꦕ ꦠꦶꦛ꧀ꦜꦤ꧀ꦠꦶ, ꦄꦤꦴꦲꦴꦫꦴ ꦤꦺꦴ ꦠꦶꦛ꧀ꦜꦤ꧀ꦠꦷ’’ꦠꦶ. ꦢꦸꦠꦶꦪꦁ.