꧑. ꦱꦷꦱꦥꦴꦮꦤꦱꦸꦠ꧀ꦠꦁ

꧑꧑꧐꧑. ꦌꦏꦁ ꦱꦩꦪꦁ ꦨꦒꦮꦴ ꦏꦺꦴꦱꦩ꧀ꦧꦶꦪꦁ ꦮꦶꦲꦫꦠꦶ ꦱꦷꦱꦥꦴꦮꦤꦺ [ꦱꦶꦁꦱꦥꦴꦮꦤꦺ (ꦱꦷ. ꦥꦷ.)]. ꦄꦡ ꦑꦺꦴ ꦨꦒꦮꦴ ꦥꦫꦶꦠ꧀ꦠꦴꦤꦶ ꦱꦷꦱꦥꦴꦥꦟ꧀ꦟꦴꦤꦶ ꦥꦴꦟꦶꦤꦴ ꦒꦲꦺꦠ꧀ꦮꦴ ꦨꦶꦏ꧀ꦑꦹ ꦄꦴꦩꦤ꧀ꦠꦺꦱꦶ – ‘‘ꦠꦁ ꦏꦶꦁ ꦩꦚ꧀ꦚꦡ, ꦨꦶꦏ꧀ꦑꦮꦺ, ꦏꦠꦩꦁ ꦤꦸ ꦑꦺꦴ ꦧꦲꦸꦠꦫꦁ – ꦪꦴꦤꦶ ꦮꦴ ꦩꦪꦴ ꦥꦫꦶꦠ꧀ꦠꦴꦤꦶ ꦱꦷꦱꦥꦴꦥꦟ꧀ꦟꦴꦤꦶ ꦥꦴꦟꦶꦤꦴ ꦒꦲꦶꦠꦴꦤꦶ ꦪꦢꦶꦢꦁ ꦈꦥꦫꦶ ꦱꦷꦱꦥꦴꦮꦤꦺ’’ꦠꦶ? ‘‘ꦄꦥ꧀ꦥꦩꦠ꧀ꦠꦏꦴꦤꦶ, ꦨꦤ꧀ꦠꦺ, ꦨꦒꦮꦠꦴ ꦥꦫꦶꦠ꧀ꦠꦴꦤꦶ ꦱꦷꦱꦥꦴꦥꦟ꧀ꦟꦴꦤꦶ ꦥꦴꦟꦶꦤꦴ ꦒꦲꦶꦠꦴꦤꦶ; ꦄꦡ ꦑꦺꦴ ꦌꦠꦴꦤꦺꦮ ꦧꦲꦸꦠꦫꦴꦤꦶ ꦪꦢꦶꦢꦁ ꦈꦥꦫꦶ ꦱꦷꦱꦥꦴꦮꦤꦺ’’ꦠꦶ. ‘‘ꦌꦮꦩꦺꦮ ꦑꦺꦴ, ꦨꦶꦏ꧀ꦑꦮꦺ, ꦌꦠꦢꦺꦮ ꦧꦲꦸꦠꦫꦁ ꦪꦁ ꦮꦺꦴ ꦩꦪꦴ ꦄꦨꦶꦚ꧀ꦚꦴꦪ ꦄꦤꦏ꧀ꦑꦴꦠꦁ. ꦏꦱ꧀ꦩꦴ ꦕꦺꦠꦁ, ꦨꦶꦏ꧀ꦑꦮꦺ, ꦩꦪꦴ ꦄꦤꦏ꧀ꦑꦴꦠꦁ? ꦤ ꦲꦺꦠꦁ, ꦨꦶꦏ꧀ꦑꦮꦺ, ꦄꦠ꧀ꦡꦱꦁꦲꦶꦠꦁ ꦤꦴꦢꦶꦧ꧀ꦫꦲ꧀ꦩꦕꦫꦶꦪꦏꦁ ꦤ ꦤꦶꦧ꧀ꦧꦶꦢꦴꦪ ꦤ ꦮꦶꦫꦴꦒꦴꦪ ꦤ ꦤꦶꦫꦺꦴꦣꦴꦪ ꦤ ꦈꦥꦱꦩꦴꦪ ꦤ ꦄꦨꦶꦚ꧀ꦚꦴꦪ ꦤ ꦱꦩ꧀ꦧꦺꦴꦣꦴꦪ ꦤ ꦤꦶꦧ꧀ꦧꦴꦤꦴꦪ ꦱꦁꦮꦠ꧀ꦠꦠꦶ; ꦠꦱ꧀ꦩꦴ ꦠꦁ ꦩꦪꦴ ꦄꦤꦏ꧀ꦑꦴꦠꦁ’’.

‘‘ꦏꦶꦚ꧀ꦕ, ꦨꦶꦏ꧀ꦑꦮꦺ, ꦩꦪꦴ ꦄꦏ꧀ꦑꦴꦠꦁ? ‘ꦆꦢꦁ ꦢꦸꦏ꧀ꦑ’ꦤ꧀ꦠꦶ, ꦨꦶꦏ꧀ꦑꦮꦺ, ꦩꦪꦴ ꦄꦏ꧀ꦑꦴꦠꦁ, ‘ꦄꦪꦁ ꦢꦸꦏ꧀ꦑꦱꦩꦸꦢꦪꦺꦴ’ꦠꦶ ꦩꦪꦴ ꦄꦏ꧀ꦑꦴꦠꦁ, ‘ꦄꦪꦁ ꦢꦸꦏ꧀ꦑꦤꦶꦫꦺꦴꦣꦺꦴ’ꦠꦶ ꦩꦪꦴ ꦄꦏ꧀ꦑꦴꦠꦁ, ‘ꦄꦪꦁ ꦢꦸꦏ꧀ꦑꦤꦶꦫꦺꦴꦣꦒꦴꦩꦶꦤꦷ ꦥꦛꦶꦥꦢꦴ’ꦠꦶ ꦩꦪꦴ ꦄꦏ꧀ꦑꦴꦠꦁ’’.

‘‘ꦏꦱ꧀ꦩꦴ ꦕꦺꦠꦁ, ꦨꦶꦏ꧀ꦑꦮꦺ, ꦩꦪꦴ ꦄꦏ꧀ꦑꦴꦠꦁ? ꦌꦠꦚ꧀ꦲꦶ, ꦨꦶꦏ꧀ꦑꦮꦺ, ꦄꦠ꧀ꦡꦱꦁꦲꦶꦠꦁ ꦌꦠꦁ ꦄꦴꦢꦶꦧ꧀ꦫꦲ꧀ꦩꦕꦫꦶꦪꦏꦁ ꦌꦠꦁ ꦤꦶꦧ꧀ꦧꦶꦢꦴꦪ ꦮꦶꦫꦴꦒꦴꦪ ꦤꦶꦫꦺꦴꦣꦴꦪ ꦈꦥꦱꦩꦴꦪ ꦄꦨꦶꦚ꧀ꦚꦴꦪ ꦱꦩ꧀ꦧꦺꦴꦣꦴꦪ ꦤꦶꦧ꧀ꦧꦴꦤꦴꦪ ꦱꦁꦮꦠ꧀ꦠꦠꦶ; ꦠꦱ꧀ꦩꦴ ꦠꦁ ꦩꦪꦴ ꦄꦏ꧀ꦑꦴꦠꦁ.

‘‘ꦠꦱ꧀ꦩꦴꦠꦶꦲ, ꦨꦶꦏ꧀ꦑꦮꦺ, ‘ꦆꦢꦁ ꦢꦸꦏ꧀ꦑ’ꦤ꧀ꦠꦶ ꦪꦺꦴꦒꦺꦴ ꦏꦫꦟꦷꦪꦺꦴ…ꦥꦺ… ‘ꦄꦪꦁ ꦢꦸꦏ꧀ꦑꦤꦶꦫꦺꦴꦣꦒꦴꦩꦶꦤꦷ ꦥꦛꦶꦥꦢꦴ’ꦠꦶ ꦪꦺꦴꦒꦺꦴ ꦏꦫꦟꦷꦪꦺꦴ’’ꦠꦶ. ꦥꦜꦩꦁ.