꧗. ꦮꦺꦭ꦳ꦸꦢ꧀ꦮꦴꦫꦺꦪ꧀ꦪꦱꦸꦠ꧀ꦠꦁ

꧑꧐꧐꧓. ꦌꦮꦁ ꦩꦺ ꦱꦸꦠꦁ – ꦌꦏꦁ ꦱꦩꦪꦁ ꦨꦒꦮꦴ ꦏꦺꦴꦱꦭꦺꦱꦸ ꦕꦴꦫꦶꦏꦁ ꦕꦫꦩꦴꦤꦺꦴ ꦩꦲꦠꦴ ꦨꦶꦏ꧀ꦑꦸꦱꦔ꧀ꦓꦺꦤ ꦱꦢ꧀ꦣꦶꦁ ꦪꦺꦤ ꦮꦺꦭ꦳ꦸꦢ꧀ꦮꦴꦫꦁ ꦤꦴꦩ ꦏꦺꦴꦱꦭꦴꦤꦁ ꦧ꧀ꦫꦴꦲ꧀ꦩꦟꦒꦴꦩꦺꦴ ꦠꦢꦮꦱꦫꦶ. ꦄꦱ꧀ꦱꦺꦴꦱꦸꦁ ꦑꦺꦴ ꦠꦺ ꦮꦺꦭ꦳ꦸꦢ꧀ꦮꦴꦫꦺꦪ꧀ꦪꦏꦴ ꦧ꧀ꦫꦴꦲ꧀ꦩꦟꦒꦲꦥꦠꦶꦏꦴ – ‘‘ꦱꦩꦟꦺꦴ ꦑꦭꦸ, ꦨꦺꦴ, ꦒꦺꦴꦠꦩꦺꦴ ꦱꦏ꧀ꦪꦥꦸꦠ꧀ꦠꦺꦴ ꦱꦏ꧀ꦪꦏꦸꦭꦴ ꦥꦧ꧀ꦧꦗꦶꦠꦺꦴ ꦏꦺꦴꦱꦭꦺꦱꦸ ꦕꦴꦫꦶꦏꦁ ꦕꦫꦩꦴꦤꦺꦴ ꦩꦲꦠꦴ ꦨꦶꦏ꧀ꦑꦸꦱꦔ꧀ꦓꦺꦤ ꦱꦢ꧀ꦣꦶꦁ ꦮꦺꦭ꦳ꦸꦢ꧀ꦮꦴꦫꦁ ꦄꦤꦸꦥ꧀ꦥꦠ꧀ꦠꦺꦴ. ꦠꦁ ꦑꦺꦴ ꦥꦤ ꦨꦮꦤ꧀ꦠꦁ ꦒꦺꦴꦠꦩꦁ ꦌꦮꦁ ꦏꦭ꧀ꦪꦴꦟꦺꦴ ꦏꦶꦠ꧀ꦠꦶꦱꦢ꧀ꦢꦺꦴ ꦄꦧ꧀ꦨꦸꦒ꧀ꦒꦠꦺꦴ – ‘ꦆꦠꦶꦥꦶ ꦱꦺꦴ ꦨꦒꦮꦴ ꦄꦫꦲꦁ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦴ ꦮꦶꦗ꧀ꦗꦴꦕꦫꦟꦱꦩ꧀ꦥꦤ꧀ꦤꦺꦴ ꦱꦸꦒꦠꦺꦴ ꦭꦺꦴꦏꦮꦶꦢꦹ ꦄꦤꦸꦠ꧀ꦠꦫꦺꦴ ꦥꦸꦫꦶꦱꦢꦩ꧀ꦩꦱꦴꦫꦡꦶ ꦱꦠ꧀ꦡꦴ ꦢꦺꦮꦩꦤꦸꦱ꧀ꦱꦴꦤꦁ ꦧꦸꦢ꧀ꦣꦺꦴ ꦨꦒꦮꦴ [ꦨꦒꦮꦴꦠꦶ (ꦱꦷ. ꦱ꧀ꦪꦴ. ꦏꦁ. ꦥꦷ.)]. ꦱꦺꦴ ꦆꦩꦁ ꦭꦺꦴꦏꦁ ꦱꦢꦺꦮꦏꦁ ꦱꦩꦴꦫꦏꦁ ꦱꦧ꧀ꦫꦲ꧀ꦩꦏꦁ ꦱꦱ꧀ꦱꦩꦟꦧ꧀ꦫꦴꦲ꧀ꦩꦟꦶꦁ ꦥꦗꦁ ꦱꦢꦺꦮꦩꦤꦸꦱ꧀ꦱꦁ ꦱꦪꦁ ꦄꦨꦶꦚ꧀ꦚꦴ ꦱꦕ꧀ꦖꦶꦏꦠ꧀ꦮꦴ ꦥꦮꦺꦢꦺꦠꦶ. ꦱꦺꦴ ꦣꦩ꧀ꦩꦁ ꦢꦺꦱꦺꦠꦶ ꦄꦴꦢꦶꦏꦭ꧀ꦪꦴꦟꦁ ꦩꦗ꧀ꦙꦺꦏꦭ꧀ꦪꦴꦟꦁ ꦥꦫꦶꦪꦺꦴꦱꦴꦤꦏꦭ꧀ꦪꦴꦟꦁ ꦱꦴꦠ꧀ꦡꦁ ꦱꦧ꧀ꦪꦚ꧀ꦗꦤꦁ, ꦏꦺꦮꦭꦥꦫꦶꦥꦸꦟ꧀ꦟꦁ ꦥꦫꦶꦱꦸꦢ꧀ꦣꦁ ꦧ꧀ꦫꦲ꧀ꦩꦕꦫꦶꦪꦁ ꦥꦏꦴꦱꦺꦠꦶ’. ꦱꦴꦣꦸ ꦑꦺꦴ ꦥꦤ ꦠꦡꦴꦫꦹꦥꦴꦤꦁ ꦄꦫꦲꦠꦁ ꦢꦱ꧀ꦱꦤꦁ ꦲꦺꦴꦠꦷ’’ꦠꦶ.

ꦄꦡ ꦑꦺꦴ ꦠꦺ ꦮꦺꦭ꦳ꦸꦢ꧀ꦮꦴꦫꦺꦪ꧀ꦪꦏꦴ ꦧ꧀ꦫꦴꦲ꧀ꦩꦟꦒꦲꦥꦠꦶꦏꦴ ꦪꦺꦤ ꦨꦒꦮꦴ ꦠꦺꦤꦸꦥꦱꦔ꧀ꦏꦩꦶꦁꦱꦸ; ꦈꦥꦱꦔ꧀ꦏꦩꦶꦠ꧀ꦮꦴ ꦄꦥ꧀ꦥꦺꦏꦕ꧀ꦕꦺ ꦨꦒꦮꦤ꧀ꦠꦁ ꦄꦨꦶꦮꦴꦢꦺꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦷꦢꦶꦁꦱꦸ. ꦄꦥ꧀ꦥꦺꦏꦕ꧀ꦕꦺ ꦨꦒꦮꦠꦴ ꦱꦢ꧀ꦣꦶꦁ ꦱꦩ꧀ꦩꦺꦴꦢꦶꦁꦱꦸ; ꦱꦩ꧀ꦩꦺꦴꦢꦤꦷꦪꦁ ꦏꦡꦁ ꦱꦴꦫꦟꦷꦪꦁ ꦮꦷꦠꦶꦱꦴꦫꦺꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦷꦢꦶꦁꦱꦸ. ꦄꦥ꧀ꦥꦺꦏꦕ꧀ꦕꦺ ꦪꦺꦤ ꦨꦒꦮꦴ ꦠꦺꦤꦚ꧀ꦗꦭꦶꦁ ꦥꦟꦴꦩꦺꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦷꦢꦶꦁꦱꦸ. ꦄꦥ꧀ꦥꦺꦏꦕ꧀ꦕꦺ ꦨꦒꦮꦠꦺꦴ ꦱꦤ꧀ꦠꦶꦏꦺ ꦤꦴꦩꦒꦺꦴꦠ꧀ꦠꦁ ꦱꦴꦮꦺꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦷꦢꦶꦁꦱꦸ. ꦄꦥ꧀ꦥꦺꦏꦕ꧀ꦕꦺ ꦠꦸꦟ꧀ꦲꦷꦨꦹꦠꦴ ꦌꦏꦩꦤ꧀ꦠꦁ ꦤꦶꦱꦷꦢꦶꦁꦱꦸ. ꦌꦏꦩꦤ꧀ꦠꦁ ꦤꦶꦱꦶꦤ꧀ꦤꦴ ꦑꦺꦴ ꦠꦺ ꦮꦺꦭ꦳ꦸꦢ꧀ꦮꦴꦫꦺꦪ꧀ꦪꦏꦴ ꦧ꧀ꦫꦴꦲ꧀ꦩꦟꦒꦲꦥꦠꦶꦏꦴ ꦨꦒꦮꦤ꧀ꦠꦁ ꦌꦠꦢꦮꦺꦴꦕꦸꦁ – ‘‘ꦩꦪꦁ, ꦨꦺꦴ ꦒꦺꦴꦠꦩ, ꦌꦮꦁꦏꦴꦩꦴ ꦌꦮꦁꦖꦤ꧀ꦢꦴ ꦌꦮꦁꦄꦣꦶꦥ꧀ꦥꦴꦪꦴ – ꦥꦸꦠ꧀ꦠꦱꦩ꧀ꦧꦴꦣꦱꦪꦤꦁ ꦄꦗ꧀ꦙꦴꦮꦱꦺꦪ꧀ꦪꦴꦩ, ꦏꦴꦱꦶꦏꦕꦤ꧀ꦢꦤꦁ ꦥꦕ꧀ꦕꦤꦸꦨꦮꦺꦪ꧀ꦪꦴꦩ, ꦩꦴꦭꦴꦒꦤ꧀ꦣꦮꦶꦭꦺꦥꦤꦁ ꦣꦴꦫꦺꦪ꧀ꦪꦴꦩ, ꦗꦴꦠꦫꦹꦥꦫꦗꦠꦁ ꦱꦴꦢꦶꦪꦺꦪ꧀ꦪꦴꦩ, ꦏꦴꦪꦱ꧀ꦱ ꦨꦺꦢꦴ ꦥꦫꦁ ꦩꦫꦟꦴ ꦱꦸꦒꦠꦶꦁ ꦱꦒ꧀ꦒꦁ ꦭꦺꦴꦏꦁ ꦈꦥꦥꦗ꧀ꦗꦺꦪ꧀ꦪꦴꦩ. ꦠꦺꦱꦁ ꦤꦺꦴ ꦨꦮꦁ ꦒꦺꦴꦠꦩꦺꦴ ꦄꦩ꧀ꦲꦴꦏꦁ ꦌꦮꦁꦏꦴꦩꦴꦤꦁ ꦌꦮꦁꦖꦤ꧀ꦢꦴꦤꦁ ꦌꦮꦁꦄꦣꦶꦥ꧀ꦥꦴꦪꦴꦤꦁ ꦠꦡꦴ ꦣꦩ꧀ꦩꦁ ꦢꦺꦱꦺꦠꦸ ꦪꦡꦴ ꦩꦪꦁ ꦥꦸꦠ꧀ꦠꦱꦩ꧀ꦧꦴꦣꦱꦪꦤꦁ ꦄꦗ꧀ꦙꦴꦮꦱꦺꦪ꧀ꦪꦴꦩ…ꦥꦺ… ꦱꦸꦒꦠꦶꦁ ꦱꦒ꧀ꦒꦁ ꦭꦺꦴꦏꦁ ꦈꦥꦥꦗ꧀ꦗꦺꦪ꧀ꦪꦴꦩꦴ’’ꦠꦶ.

‘‘ꦄꦠ꧀ꦠꦹꦥꦤꦴꦪꦶꦏꦁ ꦮꦺꦴ, ꦒꦲꦥꦠꦪꦺꦴ, ꦣꦩ꧀ꦩꦥꦫꦶꦪꦴꦪꦁ ꦢꦺꦱꦺꦱ꧀ꦱꦴꦩꦶ. ꦠꦁ ꦱꦸꦟꦴꦡ, ꦱꦴꦣꦸꦏꦁ ꦩꦤꦱꦶ ꦏꦫꦺꦴꦡ; ꦨꦴꦱꦶꦱ꧀ꦱꦴꦩꦷ’’ꦠꦶ. ‘‘ꦌꦮꦁ, ꦨꦺꦴ’’ꦠꦶ ꦑꦺꦴ ꦠꦺ ꦮꦺꦭ꦳ꦸꦢ꧀ꦮꦴꦫꦺꦪ꧀ꦪꦏꦴ ꦧ꧀ꦫꦴꦲ꧀ꦩꦟꦒꦲꦥꦠꦶꦏꦴ ꦨꦒꦮꦠꦺꦴ ꦥꦕ꧀ꦕꦱ꧀ꦱꦺꦴꦱꦸꦁ. ꦨꦒꦮꦴ ꦌꦠꦢꦮꦺꦴꦕ –

‘‘ꦏꦠꦩꦺꦴ ꦕ, ꦒꦲꦥꦠꦪꦺꦴ, ꦄꦠ꧀ꦠꦸꦥꦤꦴꦪꦶꦏꦺꦴ ꦣꦩ꧀ꦩꦥꦫꦶꦪꦴꦪꦺꦴ? ꦆꦣ, ꦒꦲꦥꦠꦪꦺꦴ, ꦄꦫꦶꦪꦱꦴꦮꦏꦺꦴ ꦆꦠꦶ ꦥꦛꦶꦱꦚ꧀ꦕꦶꦏ꧀ꦑꦠꦶ – ‘ꦄꦲꦁ ꦑꦺꦴꦱ꧀ꦩꦶ ꦗꦷꦮꦶꦠꦸꦏꦴꦩꦺꦴ ꦄꦩꦫꦶꦠꦸꦏꦴꦩꦺꦴ ꦱꦸꦑꦏꦴꦩꦺꦴ ꦢꦸꦏ꧀ꦑꦥ꧀ꦥꦛꦶꦏꦹꦭꦺꦴ. ꦪꦺꦴ ꦑꦺꦴ ꦩꦁ ꦗꦷꦮꦶꦠꦸꦏꦴꦩꦁ ꦄꦩꦫꦶꦠꦸꦏꦴꦩꦁ ꦱꦸꦑꦏꦴꦩꦁ ꦢꦸꦏ꧀ꦑꦥ꧀ꦥꦛꦶꦏꦹꦭꦁ ꦗꦷꦮꦶꦠꦴ ꦮꦺꦴꦫꦺꦴꦥꦺꦪ꧀ꦪ, ꦤ ꦩꦺꦠꦁ ꦄꦱ꧀ꦱ ꦥꦶꦪꦁ ꦩꦤꦴꦥꦁ. ꦄꦲꦚ꧀ꦕꦺꦮ ꦑꦺꦴ ꦥꦤ ꦥꦫꦁ ꦗꦷꦮꦶꦠꦸꦏꦴꦩꦁ ꦄꦩꦫꦶꦠꦸꦏꦴꦩꦁ ꦱꦸꦑꦏꦴꦩꦁ ꦢꦸꦏ꧀ꦑꦥ꧀ꦥꦛꦶꦏꦹꦭꦁ ꦗꦷꦮꦶꦠꦴ ꦮꦺꦴꦫꦺꦴꦥꦺꦪ꧀ꦪꦁ, ꦥꦫꦱ꧀ꦱꦥꦶ ꦠꦁ ꦄꦱ꧀ꦱ ꦄꦥ꧀ꦥꦶꦪꦁ ꦄꦩꦤꦴꦥꦁ. ꦪꦺꦴ ꦑꦺꦴ ꦩ꧀ꦪꦴꦪꦁ ꦣꦩ꧀ꦩꦺꦴ ꦄꦥ꧀ꦥꦶꦪꦺꦴ ꦄꦩꦤꦴꦥꦺꦴ, ꦥꦫꦱ꧀ꦱ ꦥꦺꦱꦺꦴ ꦣꦩ꧀ꦩꦺꦴ ꦄꦥ꧀ꦥꦶꦪꦺꦴ ꦄꦩꦤꦴꦥꦺꦴ. ꦪꦺꦴ ꦑꦺꦴ ꦩ꧀ꦪꦴꦪꦁ ꦣꦩ꧀ꦩꦺꦴ ꦄꦥ꧀ꦥꦶꦪꦺꦴ ꦄꦩꦤꦴꦥꦺꦴ, ꦏꦡꦴꦲꦁ ꦥꦫꦁ ꦠꦺꦤ ꦱꦁꦪꦺꦴꦗꦺꦪ꧀ꦪ’ꦤ꧀ꦠꦶ! ꦱꦺꦴ ꦆꦠꦶ ꦥꦛꦶꦱꦔ꧀ꦑꦴꦪ ꦄꦠ꧀ꦠꦤꦴ ꦕ ꦥꦴꦟꦴꦠꦶꦥꦴꦠꦴ ꦥꦛꦶꦮꦶꦫꦠꦺꦴ ꦲꦺꦴꦠꦶ, ꦥꦫꦚ꧀ꦕ ꦥꦴꦟꦴꦠꦶꦥꦴꦠꦴ ꦮꦺꦫꦩꦟꦶꦪꦴ ꦱꦩꦴꦢꦥꦺꦠꦶ, ꦥꦴꦟꦴꦠꦶꦥꦴꦠꦴ ꦮꦺꦫꦩꦟꦶꦪꦴ ꦕ ꦮꦟ꧀ꦟꦁ ꦨꦴꦱꦠꦶ. ꦌꦮꦩꦱ꧀ꦱꦴꦪꦁ ꦏꦴꦪꦱꦩꦴꦕꦴꦫꦺꦴ ꦠꦶꦏꦺꦴꦛꦶꦥꦫꦶꦱꦸꦢ꧀ꦣꦺꦴ ꦲꦺꦴꦠꦶ.

‘‘ꦥꦸꦤ ꦕꦥꦫꦁ, ꦒꦲꦥꦠꦪꦺꦴ, ꦄꦫꦶꦪꦱꦴꦮꦏꦺꦴ ꦆꦠꦶ ꦥꦛꦶꦱꦚ꧀ꦕꦶꦏ꧀ꦑꦠꦶ – ‘ꦪꦺꦴ ꦑꦺꦴ ꦩꦺ ꦄꦢꦶꦤ꧀ꦤꦁ ꦡꦺꦪ꧀ꦪꦱꦔ꧀ꦑꦴꦠꦁ ꦄꦴꦢꦶꦪꦺꦪ꧀ꦪ, ꦤ ꦩꦺꦠꦁ ꦄꦱ꧀ꦱ ꦥꦶꦪꦁ ꦩꦤꦴꦥꦁ. ꦄꦲꦚ꧀ꦕꦺꦮ ꦑꦺꦴ ꦥꦤ ꦥꦫꦱ꧀ꦱ ꦄꦢꦶꦤ꧀ꦤꦁ ꦡꦺꦪ꧀ꦪꦱꦔ꧀ꦑꦴꦠꦁ ꦄꦴꦢꦶꦪꦺꦪ꧀ꦪꦁ, ꦥꦫꦱ꧀ꦱꦥꦶ ꦠꦁ ꦄꦱ꧀ꦱ ꦄꦥ꧀ꦥꦶꦪꦁ ꦄꦩꦤꦴꦥꦁ. ꦪꦺꦴ ꦑꦺꦴ ꦩ꧀ꦪꦴꦪꦁ ꦣꦩ꧀ꦩꦺꦴ ꦄꦥ꧀ꦥꦶꦪꦺꦴ ꦄꦩꦤꦴꦥꦺꦴ, ꦥꦫꦱ꧀ꦱ ꦥꦺꦱꦺꦴ ꦣꦩ꧀ꦩꦺꦴ ꦄꦥ꧀ꦥꦶꦪꦺꦴ ꦄꦩꦤꦴꦥꦺꦴ. ꦪꦺꦴ ꦑꦺꦴ ꦩ꧀ꦪꦴꦪꦁ ꦣꦩ꧀ꦩꦺꦴ ꦄꦥ꧀ꦥꦶꦪꦺꦴ ꦄꦩꦤꦴꦥꦺꦴ, ꦏꦡꦴꦲꦁ ꦥꦫꦁ ꦠꦺꦤ ꦱꦁꦪꦺꦴꦗꦺꦪ꧀ꦪ’ꦤ꧀ꦠꦶ! ꦱꦺꦴ ꦆꦠꦶ ꦥꦛꦶꦱꦔ꧀ꦑꦴꦪ ꦄꦠ꧀ꦠꦤꦴ ꦕ ꦄꦢꦶꦤ꧀ꦤꦴꦢꦴꦤꦴ ꦥꦛꦶꦮꦶꦫꦠꦺꦴ ꦲꦺꦴꦠꦶ, ꦥꦫꦚ꧀ꦕ ꦄꦢꦶꦤ꧀ꦤꦴꦢꦴꦤꦴ ꦮꦺꦫꦩꦟꦶꦪꦴ ꦱꦩꦴꦢꦥꦺꦠꦶ, ꦄꦢꦶꦤ꧀ꦤꦴꦢꦴꦤꦴ ꦮꦺꦫꦩꦟꦶꦪꦴ ꦕ ꦮꦟ꧀ꦟꦁ ꦨꦴꦱꦠꦶ. ꦌꦮꦩꦱ꧀ꦱꦴꦪꦁ ꦏꦴꦪꦱꦩꦴꦕꦴꦫꦺꦴ ꦠꦶꦏꦺꦴꦛꦶꦥꦫꦶꦱꦸꦢ꧀ꦣꦺꦴ ꦲꦺꦴꦠꦶ.

‘‘ꦥꦸꦤ ꦕꦥꦫꦁ, ꦒꦲꦥꦠꦪꦺꦴ, ꦄꦫꦶꦪꦱꦴꦮꦏꦺꦴ ꦆꦠꦶ ꦥꦛꦶꦱꦚ꧀ꦕꦶꦏ꧀ꦑꦠꦶ – ‘ꦪꦺꦴ ꦑꦺꦴ ꦩꦺ ꦢꦴꦫꦺꦱꦸ ꦕꦴꦫꦶꦠ꧀ꦠꦁ ꦄꦴꦥꦗ꧀ꦗꦺꦪ꧀ꦪ, ꦤ ꦩꦺꦠꦁ ꦄꦱ꧀ꦱ ꦥꦶꦪꦁ ꦩꦤꦴꦥꦁ. ꦄꦲꦚ꧀ꦕꦺꦮ ꦑꦺꦴ ꦥꦤ ꦥꦫꦱ꧀ꦱ ꦢꦴꦫꦺꦱꦸ ꦕꦴꦫꦶꦠ꧀ꦠꦁ ꦄꦴꦥꦗ꧀ꦗꦺꦪ꧀ꦪꦁ, ꦥꦫꦱ꧀ꦱꦥꦶ ꦠꦁ ꦄꦱ꧀ꦱ ꦄꦥ꧀ꦥꦶꦪꦁ ꦄꦩꦤꦴꦥꦁ. ꦪꦺꦴ ꦑꦺꦴ ꦩ꧀ꦪꦴꦪꦁ ꦣꦩ꧀ꦩꦺꦴ ꦄꦥ꧀ꦥꦶꦪꦺꦴ ꦄꦩꦤꦴꦥꦺꦴ, ꦥꦫꦱ꧀ꦱ ꦥꦺꦱꦺꦴ ꦣꦩ꧀ꦩꦺꦴ ꦄꦥ꧀ꦥꦶꦪꦺꦴ ꦄꦩꦤꦴꦥꦺꦴ. ꦪꦺꦴ ꦑꦺꦴ ꦩ꧀ꦪꦴꦪꦁ ꦣꦩ꧀ꦩꦺꦴ ꦄꦥ꧀ꦥꦶꦪꦺꦴ ꦄꦩꦤꦴꦥꦺꦴ, ꦏꦡꦴꦲꦁ ꦥꦫꦁ ꦠꦺꦤ ꦱꦁꦪꦺꦴꦗꦺꦪ꧀ꦪ’ꦤ꧀ꦠꦶ! ꦱꦺꦴ ꦆꦠꦶ ꦥꦛꦶꦱꦔ꧀ꦑꦴꦪ ꦄꦠ꧀ꦠꦤꦴ ꦕ ꦏꦴꦩꦺꦱꦸꦩꦶꦕ꧀ꦖꦴꦕꦴꦫꦴ ꦥꦛꦶꦮꦶꦫꦠꦺꦴ ꦲꦺꦴꦠꦶ, ꦥꦫꦚ꧀ꦕ ꦏꦴꦩꦺꦱꦸꦩꦶꦕ꧀ꦖꦴꦕꦴꦫꦴ ꦮꦺꦫꦩꦟꦶꦪꦴ ꦱꦩꦴꦢꦥꦺꦠꦶ, ꦏꦴꦩꦺꦱꦸꦩꦶꦕ꧀ꦖꦴꦕꦴꦫꦴ ꦮꦺꦫꦩꦟꦶꦪꦴ ꦕ ꦮꦟ꧀ꦟꦁ ꦨꦴꦱꦠꦶ. ꦌꦮꦩꦱ꧀ꦱꦴꦪꦁ ꦏꦴꦪꦱꦩꦴꦕꦴꦫꦺꦴ ꦠꦶꦏꦺꦴꦛꦶꦥꦫꦶꦱꦸꦢ꧀ꦣꦺꦴ ꦲꦺꦴꦠꦶ.

‘‘ꦥꦸꦤ ꦕꦥꦫꦁ, ꦒꦲꦥꦠꦪꦺꦴ, ꦄꦫꦶꦪꦱꦴꦮꦏꦺꦴ ꦆꦠꦶ ꦥꦛꦶꦱꦚ꧀ꦕꦶꦏ꧀ꦑꦠꦶ – ‘ꦪꦺꦴ ꦑꦺꦴ ꦩꦺ ꦩꦸꦱꦴꦮꦴꦢꦺꦤ ꦄꦠ꧀ꦡꦁ ꦨꦚ꧀ꦗꦺꦪ꧀ꦪ, ꦤ ꦩꦺꦠꦁ ꦄꦱ꧀ꦱ ꦥꦶꦪꦁ ꦩꦤꦴꦥꦁ. ꦄꦲꦚ꧀ꦕꦺꦮ ꦑꦺꦴ ꦥꦤ ꦥꦫꦱ꧀ꦱ ꦩꦸꦱꦴꦮꦴꦢꦺꦤ ꦄꦠ꧀ꦡꦁ ꦨꦚ꧀ꦗꦺꦪ꧀ꦪꦁ, ꦥꦫꦱ꧀ꦱꦥꦶ ꦠꦁ ꦄꦱ꧀ꦱ ꦄꦥ꧀ꦥꦶꦪꦁ ꦄꦩꦤꦴꦥꦁ. ꦪꦺꦴ ꦑꦺꦴ ꦩ꧀ꦪꦴꦪꦁ ꦣꦩ꧀ꦩꦺꦴ ꦄꦥ꧀ꦥꦶꦪꦺꦴ ꦄꦩꦤꦴꦥꦺꦴ, ꦥꦫꦱ꧀ꦱ ꦥꦺꦱꦺꦴ ꦣꦩ꧀ꦩꦺꦴ ꦄꦥ꧀ꦥꦶꦪꦺꦴ ꦄꦩꦤꦴꦥꦺꦴ. ꦪꦺꦴ ꦑꦺꦴ ꦩ꧀ꦪꦴꦪꦁ ꦣꦩ꧀ꦩꦺꦴ ꦄꦥ꧀ꦥꦶꦪꦺꦴ ꦄꦩꦤꦴꦥꦺꦴ, ꦏꦡꦴꦲꦁ ꦥꦫꦁ ꦠꦺꦤ ꦱꦁꦪꦺꦴꦗꦺꦪ꧀ꦪ’ꦤ꧀ꦠꦶ! ꦱꦺꦴ ꦆꦠꦶ ꦥꦛꦶꦱꦔ꧀ꦑꦴꦪ ꦄꦠ꧀ꦠꦤꦴ ꦕ ꦩꦸꦱꦴꦮꦴꦢꦴ ꦥꦛꦶꦮꦶꦫꦠꦺꦴ ꦲꦺꦴꦠꦶ, ꦥꦫꦚ꧀ꦕ ꦩꦸꦱꦴꦮꦴꦢꦴ ꦮꦺꦫꦩꦟꦶꦪꦴ ꦱꦩꦴꦢꦥꦺꦠꦶ, ꦩꦸꦱꦴꦮꦴꦢꦴ ꦮꦺꦫꦩꦟꦶꦪꦴ ꦕ ꦮꦟ꧀ꦟꦁ ꦨꦴꦱꦠꦶ. ꦌꦮꦩꦱ꧀ꦱꦴꦪꦁ ꦮꦕꦷꦱꦩꦴꦕꦴꦫꦺꦴ ꦠꦶꦏꦺꦴꦛꦶꦥꦫꦶꦱꦸꦢ꧀ꦣꦺꦴ ꦲꦺꦴꦠꦶ.

‘‘ꦥꦸꦤ ꦕꦥꦫꦁ, ꦒꦲꦥꦠꦪꦺꦴ, ꦄꦫꦶꦪꦱꦴꦮꦏꦺꦴ ꦆꦠꦶ ꦥꦛꦶꦱꦚ꧀ꦕꦶꦏ꧀ꦑꦠꦶ – ꦪꦺꦴ ꦑꦺꦴ ꦩꦁ ꦥꦶꦱꦸꦟꦴꦪ ꦮꦴꦕꦴꦪ ꦩꦶꦠ꧀ꦠꦺ ꦨꦶꦤ꧀ꦢꦺꦪ꧀ꦪ [ꦩꦶꦠ꧀ꦠꦺꦲꦶ ꦨꦺꦢꦺꦪ꧀ꦪ (ꦱ꧀ꦪꦴ. ꦏꦁ. ꦥꦷ. ꦏ.)], ꦤ ꦩꦺꦠꦁ ꦄꦱ꧀ꦱ ꦥꦶꦪꦁ ꦩꦤꦴꦥꦁ. ꦄꦲꦚ꧀ꦕꦺꦮ ꦑꦺꦴ ꦥꦤ ꦥꦫꦁ ꦥꦶꦱꦸꦟꦴꦪ ꦮꦴꦕꦴꦪ ꦩꦶꦠ꧀ꦠꦺ ꦨꦶꦤ꧀ꦢꦺꦪ꧀ꦪꦁ, ꦥꦫꦱ꧀ꦱꦥꦶ ꦠꦁ ꦄꦱ꧀ꦱ ꦄꦥ꧀ꦥꦶꦪꦁ ꦄꦩꦤꦴꦥꦁ…ꦥꦺ… ꦌꦮꦩꦱ꧀ꦱꦴꦪꦁ ꦮꦕꦷꦱꦩꦴꦕꦴꦫꦺꦴ ꦠꦶꦏꦺꦴꦛꦶꦥꦫꦶꦱꦸꦢ꧀ꦣꦺꦴ ꦲꦺꦴꦠꦶ.

‘‘ꦥꦸꦤ ꦕꦥꦫꦁ, ꦒꦲꦥꦠꦪꦺꦴ, ꦄꦫꦶꦪꦱꦴꦮꦏꦺꦴ ꦆꦠꦶ ꦥꦛꦶꦱꦚ꧀ꦕꦶꦏ꧀ꦑꦠꦶ – ꦪꦺꦴ ꦑꦺꦴ ꦩꦁ ꦦꦫꦸꦱꦴꦪ ꦮꦴꦕꦴꦪ ꦱꦩꦸꦢꦴꦕꦫꦺꦪ꧀ꦪ, ꦤ ꦩꦺꦠꦁ ꦄꦱ꧀ꦱ ꦥꦶꦪꦁ ꦩꦤꦴꦥꦁ. ꦄꦲꦚ꧀ꦕꦺꦮ ꦑꦺꦴ ꦥꦤ ꦥꦫꦁ ꦦꦫꦸꦱꦴꦪ ꦮꦴꦕꦴꦪ ꦱꦩꦸꦢꦴꦕꦫꦺꦪ꧀ꦪꦁ, ꦥꦫꦱ꧀ꦱꦥꦶ ꦠꦁ ꦄꦱ꧀ꦱ ꦄꦥ꧀ꦥꦶꦪꦁ ꦄꦩꦤꦴꦥꦁ. ꦪꦺꦴ ꦑꦺꦴ ꦩ꧀ꦪꦴꦪꦁ ꦣꦩ꧀ꦩꦺꦴ…ꦥꦺ… ꦌꦮꦩꦱ꧀ꦱꦴꦪꦁ ꦮꦕꦷꦱꦩꦴꦕꦴꦫꦺꦴ ꦠꦶꦏꦺꦴꦛꦶꦥꦫꦶꦱꦸꦢ꧀ꦣꦺꦴ ꦲꦺꦴꦠꦶ.

‘‘ꦥꦸꦤ ꦕꦥꦫꦁ, ꦒꦲꦥꦠꦪꦺꦴ, ꦄꦫꦶꦪꦱꦴꦮꦏꦺꦴ ꦆꦠꦶ ꦥꦛꦶꦱꦚ꧀ꦕꦶꦏ꧀ꦑꦠꦶ – ‘ꦪꦺꦴ ꦑꦺꦴ ꦩꦁ ꦱꦩ꧀ꦦꦨꦴꦱꦺꦤ ꦱꦩ꧀ꦦꦥ꧀ꦥꦭꦴꦥꦨꦴꦱꦺꦤ ꦱꦩꦸꦢꦴꦕꦫꦺꦪ꧀ꦪ, ꦤ ꦩꦺꦠꦁ ꦄꦱ꧀ꦱ ꦥꦶꦪꦁ ꦩꦤꦴꦥꦁ. ꦄꦲꦚ꧀ꦕꦺꦮ ꦑꦺꦴ ꦥꦤ ꦥꦫꦁ ꦱꦩ꧀ꦦꦨꦴꦱꦺꦤ ꦱꦩ꧀ꦦꦥ꧀ꦥꦭꦴꦥꦨꦴꦱꦺꦤ ꦱꦩꦸꦢꦴꦕꦫꦺꦪ꧀ꦪꦁ, ꦥꦫꦱ꧀ꦱꦥꦶ ꦠꦁ ꦄꦱ꧀ꦱ ꦄꦥ꧀ꦥꦶꦪꦁ ꦄꦩꦤꦴꦥꦁ. ꦪꦺꦴ ꦑꦺꦴ ꦩ꧀ꦪꦴꦪꦁ ꦣꦩ꧀ꦩꦺꦴ ꦄꦥ꧀ꦥꦶꦪꦺꦴ ꦄꦩꦤꦴꦥꦺꦴ, ꦥꦫꦱ꧀ꦱ ꦥꦺꦱꦺꦴ ꦣꦩ꧀ꦩꦺꦴ ꦄꦥ꧀ꦥꦶꦪꦺꦴ ꦄꦩꦤꦴꦥꦺꦴ. ꦪꦺꦴ ꦑꦺꦴ ꦩ꧀ꦪꦴꦪꦁ ꦣꦩ꧀ꦩꦺꦴ ꦄꦥ꧀ꦥꦶꦪꦺꦴ ꦄꦩꦤꦴꦥꦺꦴ, ꦏꦡꦴꦲꦁ ꦥꦫꦁ ꦠꦺꦤ ꦱꦁꦪꦺꦴꦗꦺꦪ꧀ꦪ’ꦤ꧀ꦠꦶ! ꦱꦺꦴ ꦆꦠꦶ ꦥꦛꦶꦱꦔ꧀ꦑꦴꦪ ꦄꦠ꧀ꦠꦤꦴ ꦕ ꦱꦩ꧀ꦦꦥ꧀ꦥꦭꦴꦥꦴ ꦥꦛꦶꦮꦶꦫꦠꦺꦴ ꦲꦺꦴꦠꦶ, ꦥꦫꦚ꧀ꦕ ꦱꦩ꧀ꦦꦥ꧀ꦥꦭꦴꦥꦴ ꦮꦺꦫꦩꦟꦶꦪꦴ ꦱꦩꦴꦢꦥꦺꦠꦶ, ꦱꦩ꧀ꦦꦥ꧀ꦥꦭꦴꦥꦴ ꦮꦺꦫꦩꦟꦶꦪꦴ ꦕ ꦮꦟ꧀ꦟꦁ ꦨꦴꦱꦠꦶ. ꦌꦮꦩꦱ꧀ꦱꦴꦪꦁ ꦮꦕꦷꦱꦩꦴꦕꦴꦫꦺꦴ ꦠꦶꦏꦺꦴꦛꦶꦥꦫꦶꦱꦸꦢ꧀ꦣꦺꦴ ꦲꦺꦴꦠꦶ.

‘‘ꦱꦺꦴ ꦧꦸꦢ꧀ꦣꦺ ꦄꦮꦺꦕ꧀ꦕꦥ꧀ꦥꦱꦴꦢꦺꦤ ꦱꦩꦤ꧀ꦤꦴꦒꦠꦺꦴ ꦲꦺꦴꦠꦶ – ꦆꦠꦶꦥꦶ ꦱꦺꦴ ꦨꦒꦮꦴ…ꦥꦺ… ꦱꦠ꧀ꦡꦴ ꦢꦺꦮꦩꦤꦸꦱ꧀ꦱꦴꦤꦁ ꦧꦸꦢ꧀ꦣꦺꦴ ꦨꦒꦮꦴꦠꦶ; ꦣꦩ꧀ꦩꦺ …ꦥꦺ… ꦱꦔ꧀ꦓꦺ ꦄꦮꦺꦕ꧀ꦕꦥ꧀ꦥꦱꦴꦢꦺꦤ ꦱꦩꦤ꧀ꦤꦴꦒꦠꦺꦴ ꦲꦺꦴꦠꦶ ꦱꦸꦥ꧀ꦥꦛꦶꦥꦤ꧀ꦤꦺꦴ ꦨꦒꦮꦠꦺꦴ ꦱꦴꦮꦏꦱꦔ꧀ꦓꦺꦴ…ꦥꦺ… ꦄꦤꦸꦠ꧀ꦠꦫꦁ ꦥꦸꦚ꧀ꦚꦏ꧀ꦑꦺꦠ꧀ꦠꦁ ꦭꦺꦴꦏꦱ꧀ꦱꦴꦠꦶ. ꦄꦫꦶꦪꦏꦤ꧀ꦠꦺꦲꦶ ꦱꦷꦭꦺꦲꦶ ꦱꦩꦤ꧀ꦤꦴꦒꦠꦺꦴ ꦲꦺꦴꦠꦶ ꦄꦑꦟ꧀ꦝꦺꦲꦶ…ꦥꦺ… ꦱꦩꦴꦣꦶꦱꦁꦮꦠ꧀ꦠꦤꦶꦏꦺꦲꦶ. ꦪꦠꦺꦴ ꦑꦺꦴ, ꦒꦲꦥꦠꦪꦺꦴ, ꦄꦫꦶꦪꦱꦴꦮꦏꦺꦴ ꦆꦩꦺꦲꦶ ꦱꦠ꧀ꦠꦲꦶ ꦱꦢ꧀ꦣꦩ꧀ꦩꦺꦲꦶ [ꦣꦩ꧀ꦩꦺꦲꦶ (ꦱꦷ.)] ꦱꦩꦤ꧀ꦤꦴꦒꦠꦺꦴ ꦲꦺꦴꦠꦶ ꦆꦩꦺꦲꦶ ꦕꦠꦹꦲꦶ ꦄꦴꦏꦔ꧀ꦑꦶꦪꦺꦲꦶ ꦜꦴꦤꦺꦲꦶ, ꦱꦺꦴ ꦄꦴꦏꦔ꧀ꦑꦩꦴꦤꦺꦴ ꦄꦠ꧀ꦠꦤꦴꦮ ꦄꦠ꧀ꦠꦴꦤꦁ ꦧ꧀ꦪꦴꦏꦫꦺꦪ꧀ꦪ – ‘ꦑꦷꦟꦤꦶꦫꦪꦺꦴꦩ꧀ꦲꦶ ꦑꦷꦟꦠꦶꦫꦕ꧀ꦖꦴꦤꦪꦺꦴꦤꦶ [ꦑꦷꦟꦠꦶꦫꦕ꧀ꦖꦴꦤꦪꦺꦴꦤꦶꦪꦺꦴ (ꦱꦷ. ꦱ꧀ꦪꦴ. ꦏꦁ. ꦥꦷ.), ꦑꦷꦟꦠꦶꦫꦕ꧀ꦖꦴꦤꦪꦺꦴꦤꦶꦏꦺꦴ (ꦏ.)] ꦑꦷꦟꦥꦺꦠ꧀ꦠꦶꦮꦶꦱꦪꦺꦴ ꦑꦷꦟꦴꦥꦴꦪꦢꦸꦒ꧀ꦒꦠꦶꦮꦶꦤꦶꦥꦴꦠꦺꦴ, ꦱꦺꦴꦠꦴꦥꦤ꧀ꦤꦺꦴꦲꦩꦱ꧀ꦩꦶ ꦄꦮꦶꦤꦶꦥꦴꦠꦣꦩ꧀ꦩꦺꦴ ꦤꦶꦪꦠꦺꦴ ꦱꦩ꧀ꦧꦺꦴꦣꦶꦥꦫꦴꦪꦟꦺꦴ’’’ꦠꦶ.

ꦌꦮꦁ ꦮꦸꦠ꧀ꦠꦺ ꦮꦺꦭ꦳ꦸꦢ꧀ꦮꦴꦫꦺꦪ꧀ꦪꦏꦴ ꦧ꧀ꦫꦴꦲ꧀ꦩꦟꦒꦲꦥꦠꦶꦏꦴ ꦨꦒꦮꦤ꧀ꦠꦁ ꦌꦠꦢꦮꦺꦴꦕꦸꦁ – ‘‘ꦄꦨꦶꦏ꧀ꦏꦤ꧀ꦠꦁ, ꦨꦺꦴ ꦒꦺꦴꦠꦩ…ꦥꦺ… ꦌꦠꦺ ꦩꦪꦁ ꦨꦮꦤ꧀ꦠꦁ ꦒꦺꦴꦠꦩꦁ ꦱꦫꦟꦁ ꦒꦕ꧀ꦖꦴꦩ ꦣꦩ꧀ꦩꦚ꧀ꦕ ꦨꦶꦏ꧀ꦑꦸꦱꦔ꧀ꦓꦚ꧀ꦕ. ꦈꦥꦴꦱꦏꦺ ꦤꦺꦴ ꦨꦮꦁ ꦒꦺꦴꦠꦩꦺꦴ ꦣꦴꦫꦺꦠꦸ ꦄꦗ꧀ꦗꦠꦒ꧀ꦒꦺ ꦥꦴꦟꦸꦥꦺꦠꦺ [ꦥꦴꦟꦸꦥꦺꦠꦁ (ꦏ.)] ꦱꦫꦟꦁ ꦒꦠꦺ’’ꦠꦶ. ꦱꦠ꧀ꦠꦩꦁ.