꧘. ꦥꦢꦷꦥꦺꦴꦥꦩꦱꦸꦠ꧀ꦠꦁ

꧙꧘꧔. ‘‘ꦄꦴꦤꦴꦥꦴꦤꦱ꧀ꦱꦠꦶꦱꦩꦴꦣꦶ, ꦨꦶꦏ꧀ꦑꦮꦺ, ꦨꦴꦮꦶꦠꦺꦴ ꦧꦲꦸꦭꦷꦏꦠꦺꦴ ꦩꦲꦥ꧀ꦦꦭꦺꦴ ꦲꦺꦴꦠꦶ ꦩꦲꦴꦤꦶꦱꦁꦱꦺꦴ. ꦏꦡꦁ ꦨꦴꦮꦶꦠꦺꦴ ꦕ, ꦨꦶꦏ꧀ꦑꦮꦺ, ꦄꦴꦤꦴꦥꦴꦤꦱ꧀ꦱꦠꦶꦱꦩꦴꦣꦶ ꦏꦡꦁ ꦧꦲꦸꦭꦷꦏꦠꦺꦴ ꦩꦲꦥ꧀ꦦꦭꦺꦴ ꦲꦺꦴꦠꦶ ꦩꦲꦴꦤꦶꦱꦁꦱꦺꦴ?

‘‘ꦆꦣ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦄꦫꦚ꧀ꦚꦒꦠꦺꦴ ꦮꦴ ꦫꦸꦏ꧀ꦑꦩꦹꦭꦒꦠꦺꦴ ꦮꦴ ꦱꦸꦚ꧀ꦚꦴꦒꦴꦫꦒꦠꦺꦴ ꦮꦴ ꦤꦶꦱꦷꦢꦠꦶ ꦥꦭ꧀ꦭꦔ꧀ꦏꦁ ꦄꦴꦨꦸꦗꦶꦠ꧀ꦮꦴ ꦈꦗꦸꦁ ꦏꦴꦪꦁ ꦥꦟꦶꦣꦴꦪ ꦥꦫꦶꦩꦸꦑꦁ ꦱꦠꦶꦁ ꦈꦥꦛ꧀ꦜꦥꦺꦠ꧀ꦮꦴ. ꦱꦺꦴ ꦱꦠꦺꦴꦮ ꦄꦱ꧀ꦱꦱꦠꦶ, ꦱꦠꦺꦴꦮ ꦥꦱ꧀ꦱꦱꦠꦶ. ꦢꦷꦓꦁ ꦮꦴ ꦄꦱ꧀ꦱꦱꦤ꧀ꦠꦺꦴ ‘ꦢꦷꦓꦁ ꦄꦱ꧀ꦱꦱꦴꦩꦷ’ꦠꦶ ꦥꦗꦴꦤꦴꦠꦶ…ꦥꦺ… ‘ꦥꦛꦶꦤꦶꦱ꧀ꦱꦒ꧀ꦒꦴꦤꦸꦥꦱ꧀ꦱꦷ ꦄꦱ꧀ꦱꦱꦶꦱ꧀ꦱꦴꦩꦷ’ꦠꦶ ꦱꦶꦏ꧀ꦑꦠꦶ, ‘ꦥꦛꦶꦤꦶꦱ꧀ꦱꦒ꧀ꦒꦴꦤꦸꦥꦱ꧀ꦱꦷ ꦥꦱ꧀ꦱꦱꦶꦱ꧀ꦱꦴꦩꦷ’ꦠꦶ ꦱꦶꦏ꧀ꦑꦠꦶ. ꦌꦮꦁ ꦨꦴꦮꦶꦠꦺꦴ ꦑꦺꦴ, ꦨꦶꦏ꧀ꦑꦮꦺ, ꦄꦴꦤꦴꦥꦴꦤꦱ꧀ꦱꦠꦶꦱꦩꦴꦣꦶ ꦌꦮꦁ ꦧꦲꦸꦭꦷꦏꦠꦺꦴ ꦩꦲꦥ꧀ꦦꦭꦺꦴ ꦲꦺꦴꦠꦶ ꦩꦲꦴꦤꦶꦱꦁꦱꦺꦴ.

‘‘ꦄꦲꦩ꧀ꦥꦶ ꦱꦸꦢꦁ, ꦨꦶꦏ꧀ꦑꦮꦺ, ꦥꦸꦧ꧀ꦧꦺꦮ ꦱꦩ꧀ꦧꦺꦴꦣꦴ ꦄꦤꦨꦶꦱꦩ꧀ꦧꦸꦢ꧀ꦣꦺꦴ ꦧꦺꦴꦣꦶꦱꦠ꧀ꦠꦺꦴꦮ ꦱꦩꦴꦤꦺꦴ ꦆꦩꦶꦤꦴ ꦮꦶꦲꦴꦫꦺꦤ ꦧꦲꦸꦭꦁ ꦮꦶꦲꦫꦴꦩꦶ. ꦠꦱ꧀ꦱ ꦩꦪ꧀ꦲꦁ, ꦨꦶꦏ꧀ꦑꦮꦺ, ꦆꦩꦶꦤꦴ ꦮꦶꦲꦴꦫꦺꦤ ꦧꦲꦸꦭꦁ ꦮꦶꦲꦫꦠꦺꦴ ꦤꦺꦮ ꦏꦴꦪꦺꦴ ꦏꦶꦭꦩꦠꦶ ꦤ ꦕꦏ꧀ꦑꦹꦤꦶ; ꦄꦤꦸꦥꦴꦢꦴꦪ ꦕ ꦩꦺ ꦄꦴꦱꦮꦺꦲꦶ ꦕꦶꦠ꧀ꦠꦁ ꦮꦶꦩꦸꦕ꧀ꦕꦶ.

‘‘ꦠꦱ꧀ꦩꦴꦠꦶꦲ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦕꦺꦥꦶ ꦄꦴꦏꦔ꧀ꦑꦺꦪ꧀ꦪ – ‘ꦤꦺꦮ ꦩꦺ ꦏꦴꦪꦺꦴ ꦏꦶꦭꦩꦺꦪ꧀ꦪ ꦤ ꦕꦏ꧀ꦑꦹꦤꦶ, ꦄꦤꦸꦥꦴꦢꦴꦪ ꦕ ꦩꦺ ꦄꦴꦱꦮꦺꦲꦶ ꦕꦶꦠ꧀ꦠꦁ ꦮꦶꦩꦸꦕ꧀ꦕꦺꦪ꧀ꦪꦴ’ꦠꦶ, ꦄꦪꦩꦺꦮ ꦄꦴꦤꦴꦥꦴꦤꦱ꧀ꦱꦠꦶꦱꦩꦴꦣꦶ ꦱꦴꦣꦸꦏꦁ ꦩꦤꦱꦶ ꦏꦴꦠꦧ꧀ꦧꦺꦴ.

‘‘ꦠꦱ꧀ꦩꦴꦠꦶꦲ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦕꦺꦥꦶ ꦄꦴꦏꦔ꧀ꦑꦺꦪ꧀ꦪ – ‘ꦪꦺ ꦩꦺ ꦒꦺꦲꦱꦶꦠꦴ ꦱꦫꦱꦔ꧀ꦏꦥ꧀ꦥꦴ ꦠꦺ ꦥꦲꦷꦪꦺꦪ꧀ꦪꦸ’ꦤ꧀ꦠꦶ, ꦄꦪꦩꦺꦮ ꦄꦴꦤꦴꦥꦴꦤꦱ꧀ꦱꦠꦶꦱꦩꦴꦣꦶ ꦱꦴꦣꦸꦏꦁ ꦩꦤꦱꦶ ꦏꦴꦠꦧ꧀ꦧꦺꦴ.

‘‘ꦠꦱ꧀ꦩꦴꦠꦶꦲ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦕꦺꦥꦶ ꦄꦴꦏꦔ꧀ꦑꦺꦪ꧀ꦪ – ‘ꦄꦥ꧀ꦥꦛꦶꦏꦹꦭꦺ ꦥꦛꦶꦏꦹꦭꦱꦚ꧀ꦚꦷ ꦮꦶꦲꦫꦺꦪ꧀ꦪ’ꦤ꧀ꦠꦶ, ꦄꦪꦩꦺꦮ ꦄꦴꦤꦴꦥꦴꦤꦱ꧀ꦱꦠꦶꦱꦩꦴꦣꦶ ꦱꦴꦣꦸꦏꦁ ꦩꦤꦱꦶ ꦏꦴꦠꦧ꧀ꦧꦺꦴ.

‘‘ꦠꦱ꧀ꦩꦴꦠꦶꦲ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦕꦺꦥꦶ ꦄꦴꦏꦔ꧀ꦑꦺꦪ꧀ꦪ – ‘ꦥꦛꦶꦏꦹꦭꦺ ꦄꦥ꧀ꦥꦛꦶꦏꦹꦭꦱꦚ꧀ꦚꦷ ꦮꦶꦲꦫꦺꦪ꧀ꦪ’ꦤ꧀ꦠꦶ, ꦄꦪꦩꦺꦮ ꦄꦴꦤꦴꦥꦴꦤꦱ꧀ꦱꦠꦶꦱꦩꦴꦣꦶ ꦱꦴꦣꦸꦏꦁ ꦩꦤꦱꦶ ꦏꦴꦠꦧ꧀ꦧꦺꦴ.

‘‘ꦠꦱ꧀ꦩꦴꦠꦶꦲ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦕꦺꦥꦶ ꦄꦴꦏꦔ꧀ꦑꦺꦪ꧀ꦪ – ‘ꦥꦛꦶꦏꦹꦭꦺ ꦕ ꦄꦥ꧀ꦥꦛꦶꦏꦹꦭꦺ ꦕ ꦥꦛꦶꦏꦹꦭꦱꦚ꧀ꦚꦷ ꦮꦶꦲꦫꦺꦪ꧀ꦪ’ꦤ꧀ꦠꦶ, ꦄꦪꦩꦺꦮ ꦄꦴꦤꦴꦥꦴꦤꦱ꧀ꦱꦠꦶꦱꦩꦴꦣꦶ ꦱꦴꦣꦸꦏꦁ ꦩꦤꦱꦶ ꦏꦴꦠꦧ꧀ꦧꦺꦴ.

‘‘ꦠꦱ꧀ꦩꦴꦠꦶꦲ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦕꦺꦥꦶ ꦄꦴꦏꦔ꧀ꦑꦺꦪ꧀ꦪ – ‘ꦥꦛꦶꦏꦹꦭꦺ ꦕ ꦄꦥ꧀ꦥꦛꦶꦏꦹꦭꦺ ꦕ ꦄꦥ꧀ꦥꦛꦶꦏꦹꦭꦱꦚ꧀ꦚꦷ ꦮꦶꦲꦫꦺꦪ꧀ꦪ’ꦤ꧀ꦠꦶ, ꦄꦪꦩꦺꦮ ꦄꦴꦤꦴꦥꦴꦤꦱ꧀ꦱꦠꦶꦱꦩꦴꦣꦶ ꦱꦴꦣꦸꦏꦁ ꦩꦤꦱꦶ ꦏꦴꦠꦧ꧀ꦧꦺꦴ.

‘‘ꦠꦱ꧀ꦩꦴꦠꦶꦲ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦕꦺꦥꦶ ꦄꦴꦏꦔ꧀ꦑꦺꦪ꧀ꦪ – ‘ꦄꦥ꧀ꦥꦛꦶꦏꦹꦭꦚ꧀ꦕ ꦥꦛꦶꦏꦹꦭꦚ꧀ꦕ ꦠꦢꦸꦨꦪꦁ ꦄꦨꦶꦤꦶꦮꦗ꧀ꦗꦺꦠ꧀ꦮꦴ ꦈꦥꦺꦏ꧀ꦑꦏꦺꦴ ꦮꦶꦲꦫꦺꦪ꧀ꦪꦁ ꦱꦠꦺꦴ ꦱꦩ꧀ꦥꦗꦴꦤꦺꦴ’ꦠꦶ, ꦄꦪꦩꦺꦮ ꦄꦴꦤꦴꦥꦴꦤꦱ꧀ꦱꦠꦶꦱꦩꦴꦣꦶ ꦱꦴꦣꦸꦏꦁ ꦩꦤꦱꦶ ꦏꦴꦠꦧ꧀ꦧꦺꦴ.

‘‘ꦠꦱ꧀ꦩꦴꦠꦶꦲ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦕꦺꦥꦶ ꦄꦴꦏꦔ꧀ꦑꦺꦪ꧀ꦪ – ‘ꦮꦶꦮꦶꦕ꧀ꦕꦺꦮ ꦏꦴꦩꦺꦲꦶ ꦮꦶꦮꦶꦕ꧀ꦕ ꦄꦏꦸꦱꦭꦺꦲꦶ ꦣꦩ꧀ꦩꦺꦲꦶ ꦱꦮꦶꦠꦏ꧀ꦏꦁ ꦱꦮꦶꦕꦴꦫꦁ ꦮꦶꦮꦺꦏꦗꦁ ꦥꦷꦠꦶꦱꦸꦑꦁ ꦥꦜꦩꦁ ꦙꦴꦤꦁ ꦈꦥꦱꦩ꧀ꦥꦗ꧀ꦗ ꦮꦶꦲꦫꦺꦪ꧀ꦪ’ꦤ꧀ꦠꦶ, ꦄꦪꦩꦺꦮ ꦄꦴꦤꦴꦥꦴꦤꦱ꧀ꦱꦠꦶꦱꦩꦴꦣꦶ ꦱꦴꦣꦸꦏꦁ ꦩꦤꦱꦶ ꦏꦴꦠꦧ꧀ꦧꦺꦴ.

‘‘ꦠꦱ꧀ꦩꦴꦠꦶꦲ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦕꦺꦥꦶ ꦄꦴꦏꦔ꧀ꦑꦺꦪ꧀ꦪ – ‘ꦮꦶꦠꦏ꧀ꦏꦮꦶꦕꦴꦫꦴꦤꦁ ꦮꦹꦥꦱꦩꦴ ꦄꦗ꧀ꦙꦠ꧀ꦠꦁ ꦱꦩ꧀ꦥꦱꦴꦢꦤꦁ ꦕꦺꦠꦱꦺꦴ ꦌꦏꦺꦴꦢꦶꦨꦴꦮꦁ ꦄꦮꦶꦠꦏ꧀ꦏꦁ ꦄꦮꦶꦕꦴꦫꦁ ꦱꦩꦴꦣꦶꦗꦁ ꦥꦷꦠꦶꦱꦸꦑꦁ ꦢꦸꦠꦶꦪꦁ ꦙꦴꦤꦁ ꦈꦥꦱꦩ꧀ꦥꦗ꧀ꦗ ꦮꦶꦲꦫꦺꦪ꧀ꦪ’ꦤ꧀ꦠꦶ, ꦄꦪꦩꦺꦮ ꦄꦴꦤꦴꦥꦴꦤꦱ꧀ꦱꦠꦶꦱꦩꦴꦣꦶ ꦱꦴꦣꦸꦏꦁ ꦩꦤꦱꦶ ꦏꦴꦠꦧ꧀ꦧꦺꦴ.

‘‘ꦠꦱ꧀ꦩꦴꦠꦶꦲ ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦕꦺꦥꦶ ꦄꦴꦏꦔ꧀ꦑꦺꦪ꧀ꦪ – ‘ꦥꦷꦠꦶꦪꦴ ꦕ ꦮꦶꦫꦴꦒꦴ ꦈꦥꦺꦏ꧀ꦑꦏꦺꦴ ꦕ ꦮꦶꦲꦫꦺꦪ꧀ꦪꦁ ꦱꦠꦺꦴ ꦕ ꦱꦩ꧀ꦥꦗꦴꦤꦺꦴ, ꦱꦸꦑꦚ꧀ꦕ ꦏꦴꦪꦺꦤ ꦥꦛꦶꦱꦁꦮꦺꦢꦺꦪ꧀ꦪꦁ, ꦪꦁ ꦠꦁ ꦄꦫꦶꦪꦴ ꦄꦴꦕꦶꦏ꧀ꦑꦤ꧀ꦠꦶ – ꦈꦥꦺꦏ꧀ꦑꦏꦺꦴ ꦱꦠꦶꦩꦴ ꦱꦸꦑꦮꦶꦲꦴꦫꦷꦠꦶ ꦠꦠꦶꦪꦁ ꦙꦴꦤꦁ ꦈꦥꦱꦩ꧀ꦥꦗ꧀ꦗ ꦮꦶꦲꦫꦺꦪ꧀ꦪ’ꦤ꧀ꦠꦶ, ꦄꦪꦩꦺꦮ ꦄꦴꦤꦴꦥꦴꦤꦱ꧀ꦱꦠꦶꦱꦩꦴꦣꦶ ꦱꦴꦣꦸꦏꦁ ꦩꦤꦱꦶ ꦏꦴꦠꦧ꧀ꦧꦺꦴ.

‘‘ꦠꦱ꧀ꦩꦴꦠꦶꦲ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦕꦺꦥꦶ ꦄꦴꦏꦔ꧀ꦑꦺꦪ꧀ꦪ – ‘ꦱꦸꦑꦱ꧀ꦱ ꦕ ꦥꦲꦴꦤꦴ ꦢꦸꦏ꧀ꦑꦱ꧀ꦱ ꦕ ꦥꦲꦴꦤꦴ ꦥꦸꦧ꧀ꦧꦺꦮ ꦱꦺꦴꦩꦤꦱ꧀ꦱꦢꦺꦴꦩꦤꦱ꧀ꦱꦴꦤꦁ ꦄꦠ꧀ꦡꦔ꧀ꦒꦩꦴ ꦄꦢꦸꦏ꧀ꦑꦩꦱꦸꦑꦁ ꦈꦥꦺꦏ꧀ꦑꦴꦱꦠꦶꦥꦴꦫꦶꦱꦸꦢ꧀ꦣꦶꦁ ꦕꦠꦸꦠ꧀ꦡꦁ ꦙꦴꦤꦁ ꦈꦥꦱꦩ꧀ꦥꦗ꧀ꦗ ꦮꦶꦲꦫꦺꦪ꧀ꦪ’ꦤ꧀ꦠꦶ, ꦄꦪꦩꦺꦮ ꦄꦴꦤꦴꦥꦴꦤꦱ꧀ꦱꦠꦶꦱꦩꦴꦣꦶ ꦱꦴꦣꦸꦏꦁ ꦩꦤꦱꦶ ꦏꦴꦠꦧ꧀ꦧꦺꦴ.

‘‘ꦠꦱ꧀ꦩꦴꦠꦶꦲ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦕꦺꦥꦶ ꦄꦴꦏꦔ꧀ꦑꦺꦪ꧀ꦪ – ‘ꦱꦧ꧀ꦧꦱꦺꦴ ꦫꦹꦥꦱꦚ꧀ꦚꦴꦤꦁ ꦱꦩꦠꦶꦏ꧀ꦏꦩꦴ ꦥꦛꦶꦓꦱꦚ꧀ꦚꦴꦤꦁ ꦄꦠ꧀ꦡꦔ꧀ꦒꦩꦴ ꦤꦴꦤꦠ꧀ꦠꦱꦚ꧀ꦚꦴꦤꦁ ꦄꦩꦤꦱꦶꦏꦴꦫꦴ ꦄꦤꦤ꧀ꦠꦺꦴ ꦄꦴꦏꦴꦱꦺꦴꦠꦶ ꦄꦴꦏꦴꦱꦴꦤꦚ꧀ꦕꦴꦪꦠꦤꦁ ꦈꦥꦱꦩ꧀ꦥꦗ꧀ꦗ ꦮꦶꦲꦫꦺꦪ꧀ꦪ’ꦤ꧀ꦠꦶ, ꦄꦪꦩꦺꦮ ꦄꦴꦤꦴꦥꦴꦤꦱ꧀ꦱꦠꦶꦱꦩꦴꦣꦶ ꦱꦴꦣꦸꦏꦁ ꦩꦤꦱꦶ ꦏꦴꦠꦧ꧀ꦧꦺꦴ.

‘‘ꦠꦱ꧀ꦩꦴꦠꦶꦲ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦕꦺꦥꦶ ꦄꦴꦏꦔ꧀ꦑꦺꦪ꧀ꦪ – ‘ꦱꦧ꧀ꦧꦱꦺꦴ ꦄꦴꦏꦴꦱꦴꦤꦚ꧀ꦕꦴꦪꦠꦤꦁ ꦱꦩꦠꦶꦏ꧀ꦏꦩ꧀ꦩ ꦄꦤꦤ꧀ꦠꦁ ꦮꦶꦚ꧀ꦚꦴꦟꦤ꧀ꦠꦶ ꦮꦶꦚ꧀ꦚꦴꦟꦚ꧀ꦕꦴꦪꦠꦤꦁ ꦈꦥꦱꦩ꧀ꦥꦗ꧀ꦗ ꦮꦶꦲꦫꦺꦪ꧀ꦪ’ꦤ꧀ꦠꦶ, ꦄꦪꦩꦺꦮ ꦄꦴꦤꦴꦥꦴꦤꦱ꧀ꦱꦠꦶꦱꦩꦴꦣꦶ ꦱꦴꦣꦸꦏꦁ ꦩꦤꦱꦶ ꦏꦴꦠꦧ꧀ꦧꦺꦴ.

‘‘ꦠꦱ꧀ꦩꦴꦠꦶꦲ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦕꦺꦥꦶ ꦄꦴꦏꦔ꧀ꦑꦺꦪ꧀ꦪ – ‘ꦱꦧ꧀ꦧꦱꦺꦴ ꦮꦶꦚ꧀ꦚꦴꦟꦚ꧀ꦕꦴꦪꦠꦤꦁ ꦱꦩꦠꦶꦏ꧀ꦏꦩ꧀ꦩ ꦤꦠ꧀ꦡꦶ ꦏꦶꦚ꧀ꦕꦷꦠꦶ ꦄꦴꦏꦶꦚ꧀ꦕꦚ꧀ꦚꦴꦪꦠꦤꦁ ꦈꦥꦱꦩ꧀ꦥꦗ꧀ꦗ ꦮꦶꦲꦫꦺꦪ꧀ꦪ’ꦤ꧀ꦠꦶ, ꦄꦪꦩꦺꦮ ꦄꦴꦤꦴꦥꦴꦤꦱ꧀ꦱꦠꦶꦱꦩꦴꦣꦶ ꦱꦴꦣꦸꦏꦁ ꦩꦤꦱꦶ ꦏꦴꦠꦧ꧀ꦧꦺꦴ.

‘‘ꦠꦱ꧀ꦩꦴꦠꦶꦲ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦕꦺꦥꦶ ꦄꦴꦏꦔ꧀ꦑꦺꦪ꧀ꦪ – ‘ꦱꦧ꧀ꦧꦱꦺꦴ ꦄꦴꦏꦶꦚ꧀ꦕꦚ꧀ꦚꦴꦪꦠꦤꦁ ꦱꦩꦠꦶꦏ꧀ꦏꦩ꧀ꦩ ꦤꦺꦮꦱꦚ꧀ꦚꦴꦤꦴꦱꦚ꧀ꦚꦴꦪꦠꦤꦁ ꦈꦥꦱꦩ꧀ꦥꦗ꧀ꦗ ꦮꦶꦲꦫꦺꦪ꧀ꦪ’ꦤ꧀ꦠꦶ, ꦄꦪꦩꦺꦮ ꦄꦴꦤꦴꦥꦴꦤꦱ꧀ꦱꦠꦶꦱꦩꦴꦣꦶ ꦱꦴꦣꦸꦏꦁ ꦩꦤꦱꦶ ꦏꦴꦠꦧ꧀ꦧꦺꦴ.

‘‘ꦠꦱ꧀ꦩꦴꦠꦶꦲ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦕꦺꦥꦶ ꦄꦴꦏꦔ꧀ꦑꦺꦪ꧀ꦪ – ‘ꦱꦧ꧀ꦧꦱꦺꦴ ꦤꦺꦮꦱꦚ꧀ꦚꦴꦤꦴꦱꦚ꧀ꦚꦴꦪꦠꦤꦁ ꦱꦩꦠꦶꦏ꧀ꦏꦩ꧀ꦩ ꦱꦚ꧀ꦚꦴꦮꦺꦢꦪꦶꦠꦤꦶꦫꦺꦴꦣꦁ ꦈꦥꦱꦩ꧀ꦥꦗ꧀ꦗ ꦮꦶꦲꦫꦺꦪ꧀ꦪ’ꦤ꧀ꦠꦶ, ꦄꦪꦩꦺꦮ ꦄꦴꦤꦴꦥꦴꦤꦱ꧀ꦱꦠꦶꦱꦩꦴꦣꦶ ꦱꦴꦣꦸꦏꦁ ꦩꦤꦱꦶ ꦏꦴꦠꦧ꧀ꦧꦺꦴ.

‘‘ꦌꦮꦁ ꦨꦴꦮꦶꦠꦺ ꦑꦺꦴ, ꦨꦶꦏ꧀ꦑꦮꦺ, ꦄꦴꦤꦴꦥꦴꦤꦱ꧀ꦱꦠꦶꦱꦩꦴꦣꦶꦩ꧀ꦲꦶ ꦌꦮꦁ ꦧꦲꦸꦭꦷꦏꦠꦺ, ꦱꦸꦑꦁ ꦕꦺ ꦮꦺꦢꦤꦁ ꦮꦺꦢꦪꦠꦶ, ꦱꦴ ‘ꦄꦤꦶꦕ꧀ꦕꦴ’ꦠꦶ ꦥꦗꦴꦤꦴꦠꦶ, ‘ꦄꦤꦗ꧀ꦙꦺꦴꦱꦶꦠꦴ’ꦠꦶ ꦥꦗꦴꦤꦴꦠꦶ, ‘ꦄꦤꦨꦶꦤꦤ꧀ꦢꦶꦠꦴ’ꦠꦶ ꦥꦗꦴꦤꦴꦠꦶ; ꦢꦸꦏ꧀ꦑꦁ ꦕꦺ ꦮꦺꦢꦤꦁ ꦮꦺꦢꦪꦠꦶ, ‘ꦱꦴ ꦄꦤꦶꦕ꧀ꦕꦴ’ꦠꦶ ꦥꦗꦴꦤꦴꦠꦶ, ‘ꦄꦤꦗ꧀ꦙꦺꦴꦱꦶꦠꦴ’ꦠꦶ ꦥꦗꦴꦤꦴꦠꦶ, ‘ꦄꦤꦨꦶꦤꦤ꧀ꦢꦶꦠꦴ’ꦠꦶ ꦥꦗꦴꦤꦴꦠꦶ; ꦄꦢꦸꦏ꧀ꦑꦩꦱꦸꦑꦁ ꦕꦺ ꦮꦺꦢꦤꦁ ꦮꦺꦢꦪꦠꦶ, ‘ꦱꦴ ꦄꦤꦶꦕ꧀ꦕꦴ’ꦠꦶ ꦥꦗꦴꦤꦴꦠꦶ, ‘ꦄꦤꦗ꧀ꦙꦺꦴꦱꦶꦠꦴ’ꦠꦶ ꦥꦗꦴꦤꦴꦠꦶ, ‘ꦄꦤꦨꦶꦤꦤ꧀ꦢꦶꦠꦴ’ꦠꦶ ꦥꦗꦴꦤꦴꦠꦶ’’.

‘‘ꦱꦸꦑꦁ [ꦱꦺꦴ ꦱꦸꦑꦁ (ꦱꦷ. ꦱ꧀ꦪꦴ. ꦏꦁ. ꦥꦷ.) ꦩ. ꦤꦶ. ꧓.꧓꧖꧔ ꦄꦛ꧀ꦜꦏꦡꦴꦛꦷꦏꦴ ꦎꦭꦺꦴꦏꦺꦠꦧ꧀ꦧꦴ] ꦕꦺ ꦮꦺꦢꦤꦁ ꦮꦺꦢꦪꦠꦶ, ꦮꦶꦱꦁꦪꦸꦠ꧀ꦠꦺꦴ ꦤꦁ ꦮꦺꦢꦪꦠꦶ; ꦢꦸꦏ꧀ꦑꦁ ꦕꦺ ꦮꦺꦢꦤꦁ ꦮꦺꦢꦪꦠꦶ, ꦮꦶꦱꦁꦪꦸꦠ꧀ꦠꦺꦴ ꦤꦁ ꦮꦺꦢꦪꦠꦶ; ꦄꦢꦸꦏ꧀ꦑꦩꦱꦸꦑꦁ ꦕꦺ ꦮꦺꦢꦤꦁ ꦮꦺꦢꦪꦠꦶ, ꦮꦶꦱꦁꦪꦸꦠ꧀ꦠꦺꦴ ꦤꦁ ꦮꦺꦢꦪꦠꦶ. ꦱꦺꦴ ꦏꦴꦪꦥꦫꦶꦪꦤ꧀ꦠꦶꦏꦁ ꦮꦺꦢꦤꦁ ꦮꦺꦢꦪꦩꦴꦤꦺꦴ ‘ꦏꦴꦪꦥꦫꦶꦪꦤ꧀ꦠꦶꦏꦁ ꦮꦺꦢꦤꦁ ꦮꦺꦢꦪꦴꦩꦷ’ꦠꦶ ꦥꦗꦴꦤꦴꦠꦶ, ꦗꦷꦮꦶꦠꦥꦫꦶꦪꦤ꧀ꦠꦶꦏꦁ ꦮꦺꦢꦤꦁ ꦮꦺꦢꦪꦩꦴꦤꦺꦴ ‘ꦗꦷꦮꦶꦠꦥꦫꦶꦪꦤ꧀ꦠꦶꦏꦁ ꦮꦺꦢꦤꦁ ꦮꦺꦢꦪꦴꦩꦷ’ꦠꦶ ꦥꦗꦴꦤꦴꦠꦶ, ‘ꦏꦴꦪꦱ꧀ꦱ ꦨꦺꦢꦴ ꦈꦢ꧀ꦣꦁ ꦗꦷꦮꦶꦠꦥꦫꦶꦪꦴꦢꦴꦤꦴ ꦆꦣꦺꦮ ꦱꦧ꧀ꦧꦮꦺꦢꦪꦶꦠꦴꦤꦶ ꦄꦤꦨꦶꦤꦤ꧀ꦢꦶꦠꦴꦤꦶ ꦱꦷꦠꦷꦨꦮꦶꦱ꧀ꦱꦤ꧀ꦠꦷ’ꦠꦶ ꦥꦗꦴꦤꦴꦠꦶ’’.

‘‘ꦱꦺꦪ꧀ꦪꦡꦴꦥꦶ, ꦨꦶꦏ꧀ꦑꦮꦺ, ꦠꦺꦭꦚ꧀ꦕ ꦥꦛꦶꦕ꧀ꦕ, ꦮꦛ꧀ꦛꦶꦚ꧀ꦕ ꦥꦛꦶꦕ꧀ꦕ ꦠꦺꦭꦥ꧀ꦥꦢꦷꦥꦺꦴ ꦙꦴꦪꦺꦪ꧀ꦪ, ꦠꦱ꧀ꦱꦺꦮ ꦠꦺꦭꦱ꧀ꦱ ꦕ ꦮꦛ꧀ꦛꦶꦪꦴ ꦕ ꦥꦫꦶꦪꦴꦢꦴꦤꦴ ꦄꦤꦴꦲꦴꦫꦺꦴ ꦤꦶꦧ꧀ꦧꦴꦪꦺꦪ꧀ꦪ; ꦌꦮꦩꦺꦮ ꦑꦺꦴ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦏꦴꦪꦥꦫꦶꦪꦤ꧀ꦠꦶꦏꦁ ꦮꦺꦢꦤꦁ ꦮꦺꦢꦪꦩꦴꦤꦺꦴ ‘ꦏꦴꦪꦥꦫꦶꦪꦤ꧀ꦠꦶꦏꦁ ꦮꦺꦢꦤꦁ ꦮꦺꦢꦪꦴꦩꦷ’ꦠꦶ ꦥꦗꦴꦤꦴꦠꦶ, ꦗꦷꦮꦶꦠꦥꦫꦶꦪꦤ꧀ꦠꦶꦏꦁ ꦮꦺꦢꦤꦁ ꦮꦺꦢꦪꦩꦴꦤꦺꦴ ‘ꦗꦷꦮꦶꦠꦥꦫꦶꦪꦤ꧀ꦠꦶꦏꦁ ꦮꦺꦢꦤꦁ ꦮꦺꦢꦪꦴꦩꦷ’ꦠꦶ ꦥꦗꦴꦤꦴꦠꦶ, ‘ꦏꦴꦪꦱ꧀ꦱ ꦨꦺꦢꦴ ꦈꦢ꧀ꦣꦁ ꦗꦷꦮꦶꦠꦥꦫꦶꦪꦴꦢꦴꦤꦴ ꦆꦣꦺꦮ ꦱꦧ꧀ꦧꦮꦺꦢꦪꦶꦠꦴꦤꦶ ꦄꦤꦨꦶꦤꦤ꧀ꦢꦶꦠꦴꦤꦶ ꦱꦷꦠꦷꦨꦮꦶꦱ꧀ꦱꦤ꧀ꦠꦷ’ꦠꦶ ꦥꦗꦴꦤꦴꦠꦷ’’ꦠꦶ. ꦄꦛ꧀ꦜꦩꦁ.