꧕. ꦢꦸꦠꦶꦪꦦꦭꦱꦸꦠ꧀ꦠꦁ

꧙꧘꧑. ‘‘ꦄꦴꦤꦴꦥꦴꦤꦱ꧀ꦱꦠꦶ, ꦨꦶꦏ꧀ꦑꦮꦺ, ꦨꦴꦮꦶꦠꦴ ꦧꦲꦸꦭꦷꦏꦠꦴ ꦩꦲꦥ꧀ꦦꦭꦴ ꦲꦺꦴꦠꦶ ꦩꦲꦴꦤꦶꦱꦁꦱꦴ. ꦏꦡꦁ ꦨꦴꦮꦶꦠꦴ ꦕ, ꦨꦶꦏ꧀ꦑꦮꦺ, ꦄꦴꦤꦴꦥꦴꦤꦱ꧀ꦱꦠꦶ ꦏꦡꦁ ꦧꦲꦸꦭꦷꦏꦠꦴ ꦩꦲꦥ꧀ꦦꦭꦴ ꦲꦺꦴꦠꦶ ꦩꦲꦴꦤꦶꦱꦁꦱꦴ? ꦆꦣ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦄꦫꦚ꧀ꦚꦒꦠꦺꦴ ꦮꦴ ꦫꦸꦏ꧀ꦑꦩꦹꦭꦒꦠꦺꦴ ꦮꦴ ꦱꦸꦚ꧀ꦚꦴꦒꦴꦫꦒꦠꦺꦴ ꦮꦴ ꦤꦶꦱꦷꦢꦠꦶ ꦥꦭ꧀ꦭꦔ꧀ꦏꦁ ꦄꦴꦨꦸꦗꦶꦠ꧀ꦮꦴ ꦈꦗꦸꦁ ꦏꦴꦪꦁ ꦥꦟꦶꦣꦴꦪ ꦥꦫꦶꦩꦸꦑꦁ ꦱꦠꦶꦁ ꦈꦥꦛ꧀ꦜꦥꦺꦠ꧀ꦮꦴ. ꦱꦺꦴ ꦱꦠꦺꦴꦮ ꦄꦱ꧀ꦱꦱꦠꦶ, ꦱꦠꦺꦴꦮ ꦥꦱ꧀ꦱꦱꦠꦶ…ꦥꦺ… ‘ꦥꦛꦶꦤꦶꦱ꧀ꦱꦒ꧀ꦒꦴꦤꦸꦥꦱ꧀ꦱꦷ ꦄꦱ꧀ꦱꦱꦶꦱ꧀ꦱꦴꦩꦷ’ꦠꦶ ꦱꦶꦏ꧀ꦑꦠꦶ, ‘ꦥꦛꦶꦤꦶꦱ꧀ꦱꦒ꧀ꦒꦴꦤꦸꦥꦱ꧀ꦱꦷ ꦥꦱ꧀ꦱꦱꦶꦱ꧀ꦱꦴꦩꦷ’ꦠꦶ ꦱꦶꦏ꧀ꦑꦠꦶ. ꦌꦮꦁ ꦨꦴꦮꦶꦠꦴ ꦑꦺꦴ, ꦨꦶꦏ꧀ꦑꦮꦺ, ꦄꦴꦤꦴꦥꦴꦤꦱ꧀ꦱꦠꦶ ꦌꦮꦁ ꦧꦲꦸꦭꦷꦏꦠꦴ ꦩꦲꦥ꧀ꦦꦭꦴ ꦲꦺꦴꦠꦶ ꦩꦲꦴꦤꦶꦱꦁꦱꦴ.

‘‘ꦌꦮꦁ ꦨꦴꦮꦶꦠꦴꦪ ꦑꦺꦴ, ꦨꦶꦏ꧀ꦑꦮꦺ, ꦄꦴꦤꦴꦥꦴꦤꦱ꧀ꦱꦠꦶꦪꦴ ꦌꦮꦁ ꦧꦲꦸꦭꦷꦏꦠꦴꦪ ꦱꦠ꧀ꦠ ꦦꦭꦴ ꦱꦠ꧀ꦠꦴꦤꦶꦱꦁꦱꦴ ꦥꦴꦛꦶꦏꦔ꧀ꦑꦴ. ꦏꦠꦩꦺ ꦱꦠ꧀ꦠ ꦦꦭꦴ ꦱꦠ꧀ꦠꦴꦤꦶꦱꦁꦱꦴ? ꦢꦶꦛ꧀ꦜꦺꦮ ꦣꦩ꧀ꦩꦺ ꦥꦛꦶꦏꦕ꧀ꦕ ꦄꦚ꧀ꦚꦁ ꦄꦴꦫꦴꦣꦺꦠꦶ; ꦤꦺꦴ ꦕꦺ ꦢꦶꦛ꧀ꦜꦺꦮ ꦣꦩ꧀ꦩꦺ ꦥꦛꦶꦏꦕ꧀ꦕ ꦄꦚ꧀ꦚꦁ ꦄꦴꦫꦴꦣꦺꦠꦶ. ꦄꦡ ꦩꦫꦟꦏꦴꦭꦺ ꦄꦚ꧀ꦚꦁ ꦄꦴꦫꦴꦣꦺꦠꦶ; ꦤꦺꦴ ꦕꦺ ꦢꦶꦛ꧀ꦜꦺꦮ ꦣꦩ꧀ꦩꦺ ꦥꦛꦶꦏꦕ꧀ꦕ ꦄꦚ꧀ꦚꦁ ꦄꦴꦫꦴꦣꦺꦠꦶ, ꦤꦺꦴ ꦕꦺ ꦩꦫꦟꦏꦴꦭꦺ ꦄꦚ꧀ꦚꦁ ꦄꦴꦫꦴꦣꦺꦠꦶ. ꦄꦡ ꦥꦚ꧀ꦕꦤ꧀ꦤꦁ ꦎꦫꦩ꧀ꦨꦴꦒꦶꦪꦴꦤꦁ ꦱꦁꦪꦺꦴꦗꦤꦴꦤꦁ ꦥꦫꦶꦏ꧀ꦑꦪꦴ ꦄꦤ꧀ꦠꦫꦴꦥꦫꦶꦤꦶꦧ꧀ꦧꦴꦪꦷ ꦲꦺꦴꦠꦶ… ꦈꦥꦲꦕ꧀ꦕꦥꦫꦶꦤꦶꦧ꧀ꦧꦴꦪꦷ ꦲꦺꦴꦠꦶ… ꦄꦱꦔ꧀ꦑꦴꦫꦥꦫꦶꦤꦶꦧ꧀ꦧꦴꦪꦷ ꦲꦺꦴꦠꦶ… ꦱꦱꦔ꧀ꦑꦴꦫꦥꦫꦶꦤꦶꦧ꧀ꦧꦴꦪꦷ ꦲꦺꦴꦠꦶ… ꦈꦢ꧀ꦣꦁꦱꦺꦴꦠꦺꦴ ꦲꦺꦴꦠꦶ ꦄꦏꦤꦶꦛ꧀ꦜꦒꦴꦩꦷ – ꦌꦮꦁ ꦨꦴꦮꦶꦠꦴꦪ ꦑꦺꦴ, ꦨꦶꦏ꧀ꦑꦮꦺ, ꦄꦴꦤꦴꦥꦴꦤꦱ꧀ꦱꦠꦶꦪꦴ ꦌꦮꦁ ꦧꦲꦸꦭꦷꦏꦠꦴꦪ ꦆꦩꦺ ꦱꦠ꧀ꦠ ꦦꦭꦴ ꦱꦠ꧀ꦠꦴꦤꦶꦱꦁꦱꦴ ꦥꦴꦛꦶꦏꦔ꧀ꦑꦴ’’ꦠꦶ. ꦥꦚ꧀ꦕꦩꦁ.