꧘. ꦎꦓꦮꦒ꧀ꦒꦺꦴ

꧑. ꦎꦓꦱꦸꦠ꧀ꦠꦁ

꧑꧗꧒. ꦱꦴꦮꦠ꧀ꦡꦶꦤꦶꦢꦴꦤꦁ. ‘‘ꦕꦠ꧀ꦠꦴꦫꦺꦴꦩꦺ, ꦨꦶꦏ꧀ꦑꦮꦺ, ꦎꦓꦴ. ꦏꦠꦩꦺ ꦕꦠ꧀ꦠꦴꦫꦺꦴ? ꦏꦴꦩꦺꦴꦓꦺꦴ, ꦨꦮꦺꦴꦓꦺꦴ, ꦢꦶꦛ꧀ꦜꦺꦴꦓꦺꦴ, ꦄꦮꦶꦗ꧀ꦗꦺꦴꦓꦺꦴ – ꦆꦩꦺ ꦑꦺꦴ, ꦨꦶꦏ꧀ꦑꦮꦺ, ꦕꦠ꧀ꦠꦴꦫꦺꦴ ꦎꦓꦴ. ꦆꦩꦺꦱꦁ ꦑꦺꦴ, ꦨꦶꦏ꧀ꦑꦮꦺ, ꦕꦠꦸꦤ꧀ꦤꦁ ꦎꦓꦴꦤꦁ ꦄꦨꦶꦚ꧀ꦚꦴꦪ ꦥꦫꦶꦚ꧀ꦚꦴꦪ ꦥꦫꦶꦏ꧀ꦑꦪꦴꦪ ꦥꦲꦴꦤꦴꦪ…ꦥꦺ… ꦄꦪꦁ ꦄꦫꦶꦪꦺꦴ ꦄꦛ꧀ꦜꦔ꧀ꦒꦶꦏꦺꦴ ꦩꦒ꧀ꦒꦺꦴ ꦨꦴꦮꦺꦠꦧ꧀ꦧꦺꦴ’’ꦠꦶ. (ꦪꦡꦴ ꦌꦱꦤꦴ, ꦌꦮꦁ ꦱꦧ꧀ꦧꦁ ꦮꦶꦠ꧀ꦡꦴꦫꦺꦠꦧ꧀ꦧꦁ.) ꦥꦜꦩꦁ.

꧒. ꦪꦺꦴꦒꦱꦸꦠ꧀ꦠꦁ

꧑꧗꧓. ‘‘ꦕꦠ꧀ꦠꦴꦫꦺꦴꦩꦺ, ꦨꦶꦏ꧀ꦑꦮꦺ, ꦪꦺꦴꦒꦴ. ꦏꦠꦩꦺ ꦕꦠ꧀ꦠꦴꦫꦺꦴ? ꦏꦴꦩꦪꦺꦴꦒꦺꦴ, ꦨꦮꦪꦺꦴꦒꦺꦴ, ꦢꦶꦛ꧀ꦜꦶꦪꦺꦴꦒꦺꦴ ꦄꦮꦶꦗ꧀ꦗꦴꦪꦺꦴꦒꦺꦴ – ꦆꦩꦺ ꦑꦺꦴ, ꦨꦶꦏ꧀ꦑꦮꦺ, ꦕꦠ꧀ꦠꦴꦫꦺꦴ ꦪꦺꦴꦒꦴ. ꦆꦩꦺꦱꦁ ꦑꦺꦴ, ꦨꦶꦏ꧀ꦑꦮꦺ, ꦕꦠꦸꦤ꧀ꦤꦁ ꦪꦺꦴꦒꦴꦤꦁ ꦄꦨꦶꦚ꧀ꦚꦴꦪ ꦥꦫꦶꦚ꧀ꦚꦴꦪ ꦥꦫꦶꦏ꧀ꦑꦪꦴꦪ ꦥꦲꦴꦤꦴꦪ…ꦥꦺ… ꦄꦪꦁ ꦄꦫꦶꦪꦺꦴ ꦄꦛ꧀ꦜꦔ꧀ꦒꦶꦏꦺꦴ ꦩꦒ꧀ꦒꦺꦴ ꦨꦴꦮꦺꦠꦧ꧀ꦧꦺꦴ’’ꦠꦶ. ꦢꦸꦠꦶꦪꦁ.

꧓. ꦈꦥꦴꦢꦴꦤꦱꦸꦠ꧀ꦠꦁ

꧑꧗꧔. ‘‘ꦕꦠ꧀ꦠꦴꦫꦶꦩꦴꦤꦶ, ꦨꦶꦏ꧀ꦑꦮꦺ, ꦈꦥꦴꦢꦴꦤꦴꦤꦶ. ꦏꦠꦩꦴꦤꦶ ꦕꦠ꧀ꦠꦴꦫꦶ? ꦏꦴꦩꦸꦥꦴꦢꦴꦤꦁ, ꦢꦶꦛ꧀ꦜꦸꦥꦴꦢꦴꦤꦁ, ꦱꦷꦭꦧ꧀ꦧꦠꦸꦥꦴꦢꦴꦤꦁ, ꦄꦠ꧀ꦠꦮꦴꦢꦸꦥꦴꦢꦴꦤꦁ – ꦆꦩꦴꦤꦶ ꦑꦺꦴ, ꦨꦶꦏ꧀ꦑꦮꦺ, ꦕꦠ꧀ꦠꦴꦫꦶ ꦈꦥꦴꦢꦴꦤꦴꦤꦶ. ꦆꦩꦺꦱꦁ ꦑꦺꦴ, ꦨꦶꦏ꧀ꦑꦮꦺ, ꦕꦠꦸꦤ꧀ꦤꦁ ꦈꦥꦴꦢꦴꦤꦴꦤꦁ ꦄꦨꦶꦚ꧀ꦚꦴꦪ ꦥꦫꦶꦚ꧀ꦚꦴꦪ ꦥꦫꦶꦏ꧀ꦑꦪꦴꦪ ꦥꦲꦴꦤꦴꦪ…ꦥꦺ… ꦄꦪꦁ ꦄꦫꦶꦪꦺꦴ ꦄꦛ꧀ꦜꦔ꧀ꦒꦶꦏꦺꦴ ꦩꦒ꧀ꦒꦺꦴ ꦨꦴꦮꦺꦠꦧ꧀ꦧꦺꦴ’’ꦠꦶ. ꦠꦠꦶꦪꦁ.

꧔. ꦒꦤ꧀ꦡꦱꦸꦠ꧀ꦠꦁ

꧑꧗꧕. ‘‘ꦕꦠ꧀ꦠꦴꦫꦺꦴꦩꦺ, ꦨꦶꦏ꧀ꦑꦮꦺ, ꦒꦤ꧀ꦡꦴ. ꦏꦠꦩꦺ ꦕꦠ꧀ꦠꦴꦫꦺꦴ? ꦄꦨꦶꦗ꧀ꦙꦴ ꦏꦴꦪꦒꦤ꧀ꦡꦺꦴ, ꦧ꧀ꦪꦴꦥꦴꦢꦺꦴ ꦏꦴꦪꦒꦤ꧀ꦡꦺꦴ, ꦱꦷꦭꦧ꧀ꦧꦠꦥꦫꦴꦩꦴꦱꦺꦴ ꦏꦴꦪꦒꦤ꧀ꦡꦺꦴ, ꦆꦢꦁꦱꦕ꧀ꦕꦴꦨꦶꦤꦶꦮꦺꦱꦺꦴ ꦏꦴꦪꦒꦤ꧀ꦡꦺꦴ – ꦆꦩꦺ ꦑꦺꦴ, ꦨꦶꦏ꧀ꦑꦮꦺ, ꦕꦠ꧀ꦠꦴꦫꦺꦴ ꦒꦤ꧀ꦡꦴ. ꦆꦩꦺꦱꦁ ꦑꦺꦴ, ꦨꦶꦏ꧀ꦑꦮꦺ, ꦕꦠꦸꦤ꧀ꦤꦁ ꦒꦤ꧀ꦡꦴꦤꦁ ꦄꦨꦶꦚ꧀ꦚꦴꦪ ꦥꦫꦶꦚ꧀ꦚꦴꦪ ꦥꦫꦶꦏ꧀ꦑꦪꦴꦪ ꦥꦲꦴꦤꦴꦪ…ꦥꦺ… ꦄꦪꦁ ꦄꦫꦶꦪꦺꦴ ꦄꦛ꧀ꦜꦔ꧀ꦒꦶꦏꦺꦴ ꦩꦒ꧀ꦒꦺꦴ ꦨꦴꦮꦺꦠꦧ꧀ꦧꦺꦴ’’ꦠꦶ. ꦕꦠꦸꦠ꧀ꦡꦁ.

꧕. ꦄꦤꦸꦱꦪꦱꦸꦠ꧀ꦠꦁ

꧑꧗꧖. ‘‘ꦱꦠ꧀ꦠꦶꦩꦺ, ꦨꦶꦏ꧀ꦑꦮꦺ, ꦄꦤꦸꦱꦪꦴ. ꦏꦠꦩꦺ ꦱꦠ꧀ꦠ? ꦏꦴꦩꦫꦴꦒꦴꦤꦸꦱꦪꦺꦴ, ꦥꦛꦶꦓꦴꦤꦸꦱꦪꦺꦴ, ꦢꦶꦛ꧀ꦜꦴꦤꦸꦱꦪꦺꦴ, ꦮꦶꦕꦶꦏꦶꦕ꧀ꦖꦴꦤꦸꦱꦪꦺꦴ, ꦩꦴꦤꦴꦤꦸꦱꦪꦺꦴ, ꦨꦮꦫꦴꦒꦴꦤꦸꦱꦪꦺꦴ, ꦄꦮꦶꦗ꧀ꦗꦴꦤꦸꦱꦪꦺꦴ – ꦆꦩꦺ ꦑꦺꦴ, ꦨꦶꦏ꧀ꦑꦮꦺ, ꦱꦠ꧀ꦠꦴꦤꦸꦱꦪꦴ. ꦆꦩꦺꦱꦁ ꦑꦺꦴ, ꦨꦶꦏ꧀ꦑꦮꦺ, ꦱꦠ꧀ꦠꦤ꧀ꦤꦁ ꦄꦤꦸꦱꦪꦴꦤꦁ ꦄꦨꦶꦚ꧀ꦚꦴꦪ ꦥꦫꦶꦚ꧀ꦚꦴꦪ ꦥꦫꦶꦏ꧀ꦑꦪꦴꦪ ꦥꦲꦴꦤꦴꦪ…ꦥꦺ… ꦄꦪꦁ ꦄꦫꦶꦪꦺꦴ ꦄꦛ꧀ꦜꦔ꧀ꦒꦶꦏꦺꦴ ꦩꦒ꧀ꦒꦺꦴ ꦨꦴꦮꦺꦠꦧ꧀ꦧꦺꦴ’’ꦠꦶ. ꦥꦚ꧀ꦕꦩꦁ.

꧖. ꦏꦴꦩꦒꦸꦟꦱꦸꦠ꧀ꦠꦁ

꧑꧗꧗. ‘‘ꦥꦚ꧀ꦕꦶꦩꦺ, ꦨꦶꦏ꧀ꦑꦮꦺ, ꦏꦴꦩꦒꦸꦟꦴ. ꦏꦠꦩꦺ ꦥꦚ꧀ꦕ? ꦕꦏ꧀ꦑꦸꦮꦶꦚ꧀ꦚꦺꦪ꧀ꦪꦴ ꦫꦹꦥꦴ ꦆꦛ꧀ꦜꦴ ꦏꦤ꧀ꦠꦴ ꦩꦤꦴꦥꦴ ꦥꦶꦪꦫꦹꦥꦴ ꦏꦴꦩꦹꦥꦱꦁꦲꦶꦠꦴ ꦫꦗꦤꦷꦪꦴ, ꦱꦺꦴꦠꦮꦶꦚ꧀ꦚꦺꦪ꧀ꦪꦴ ꦱꦢ꧀ꦢꦴ…ꦥꦺ… ꦓꦴꦤꦮꦶꦚ꧀ꦚꦺꦪ꧀ꦪꦴ ꦒꦤ꧀ꦣꦴ…ꦥꦺ… ꦗꦶꦮ꧀ꦲꦴꦮꦶꦚ꧀ꦚꦺꦪ꧀ꦪꦴ ꦫꦱꦴ…ꦥꦺ… ꦏꦴꦪꦮꦶꦚ꧀ꦚꦺꦪ꧀ꦪꦴ ꦦꦺꦴꦛ꧀ꦜꦧ꧀ꦧꦴ ꦆꦛ꧀ꦜꦴ ꦏꦤ꧀ꦠꦴ ꦩꦤꦴꦥꦴ ꦥꦶꦪꦫꦹꦥꦴ ꦏꦴꦩꦹꦥꦱꦁꦲꦶꦠꦴ ꦫꦗꦤꦷꦪꦴ – ꦆꦩꦺ ꦑꦺꦴ, ꦨꦶꦏ꧀ꦑꦮꦺ, ꦥꦚ꧀ꦕ ꦏꦴꦩꦒꦸꦟꦴ. ꦆꦩꦺꦱꦁ ꦑꦺꦴ, ꦨꦶꦏ꧀ꦑꦮꦺ, ꦥꦚ꧀ꦕꦤ꧀ꦤꦁ ꦏꦴꦩꦒꦸꦟꦴꦤꦁ ꦄꦨꦶꦚ꧀ꦚꦴꦪ ꦥꦫꦶꦚ꧀ꦚꦴꦪ ꦥꦫꦶꦏ꧀ꦑꦪꦴꦪ ꦥꦲꦴꦤꦴꦪ…ꦥꦺ… ꦄꦪꦁ ꦄꦫꦶꦪꦺꦴ ꦄꦛ꧀ꦜꦔ꧀ꦒꦶꦏꦺꦴ ꦩꦒ꧀ꦒꦺꦴ ꦨꦴꦮꦺꦠꦧ꧀ꦧꦺꦴ’’ꦠꦶ. ꦖꦛ꧀ꦜꦁ.

꧗. ꦤꦷꦮꦫꦟꦱꦸꦠ꧀ꦠꦁ

꧑꧗꧘. ‘‘ꦥꦚ꧀ꦕꦶꦩꦴꦤꦶ, ꦨꦶꦏ꧀ꦑꦮꦺ, ꦤꦷꦮꦫꦟꦴꦤꦶ. ꦏꦠꦩꦴꦤꦶ ꦥꦚ꧀ꦕ? ꦏꦴꦩꦕ꧀ꦖꦤ꧀ꦢꦤꦷꦮꦫꦟꦁ, ꦧ꧀ꦪꦴꦥꦴꦢꦤꦷꦮꦫꦟꦁ, ꦡꦶꦤꦩꦶꦢ꧀ꦣꦤꦷꦮꦫꦟꦁ, ꦈꦢ꧀ꦣꦕ꧀ꦕꦏꦸꦏ꧀ꦏꦸꦕ꧀ꦕꦤꦷꦮꦫꦟꦁ, ꦮꦶꦕꦶꦏꦶꦕ꧀ꦖꦴꦤꦷꦮꦫꦟꦁ – ꦆꦩꦴꦤꦶ ꦑꦺꦴ, ꦨꦶꦏ꧀ꦑꦮꦺ, ꦥꦚ꧀ꦕ ꦤꦷꦮꦫꦟꦴꦤꦶ. ꦆꦩꦺꦱꦁ ꦑꦺꦴ, ꦨꦶꦏ꧀ꦑꦮꦺ, ꦥꦚ꧀ꦕꦤ꧀ꦤꦁ ꦤꦷꦮꦫꦟꦴꦤꦁ ꦄꦨꦶꦚ꧀ꦚꦴꦪ ꦥꦫꦶꦚ꧀ꦚꦴꦪ ꦥꦫꦶꦏ꧀ꦑꦪꦴꦪ ꦥꦲꦴꦤꦴꦪ…ꦥꦺ… ꦄꦪꦁ ꦄꦫꦶꦪꦺꦴ ꦄꦛ꧀ꦜꦔ꧀ꦒꦶꦏꦺꦴ ꦩꦒ꧀ꦒꦺꦴ ꦨꦴꦮꦺꦠꦧ꧀ꦧꦺꦴ’’ꦠꦶ. ꦱꦠ꧀ꦠꦩꦁ.

꧘. ꦈꦥꦴꦢꦴꦤꦏ꧀ꦑꦤ꧀ꦣꦱꦸꦠ꧀ꦠꦁ

꧑꧗꧙. ‘‘ꦥꦚ꧀ꦕꦶꦩꦺ, ꦨꦶꦏ꧀ꦑꦮꦺ, ꦈꦥꦴꦢꦴꦤꦏ꧀ꦑꦤ꧀ꦣꦴ. ꦏꦠꦩꦺ ꦥꦚ꧀ꦕ? ꦱꦺꦪ꧀ꦪꦡꦶꦢꦁ – ꦫꦹꦥꦸꦥꦴꦢꦴꦤꦏ꧀ꦑꦤ꧀ꦣꦺꦴ, ꦮꦺꦢꦤꦸꦥꦴꦢꦴꦤꦏ꧀ꦑꦤ꧀ꦣꦺꦴ, ꦱꦚ꧀ꦚꦸꦥꦴꦢꦴꦤꦏ꧀ꦑꦤ꧀ꦣꦺꦴ, ꦱꦔ꧀ꦑꦴꦫꦸꦥꦴꦢꦴꦤꦏ꧀ꦑꦤ꧀ꦣꦺꦴ, ꦮꦶꦚ꧀ꦚꦴꦟꦸꦥꦴꦢꦴꦤꦏ꧀ꦑꦤ꧀ꦣꦺꦴ. ꦆꦩꦺ ꦑꦺꦴ, ꦨꦶꦏ꧀ꦑꦮꦺ, ꦥꦚ꧀ꦕꦸꦥꦴꦢꦴꦤꦏ꧀ꦑꦤ꧀ꦣꦴ. ꦆꦩꦺꦱꦁ ꦑꦺꦴ, ꦨꦶꦏ꧀ꦑꦮꦺ, ꦥꦚ꧀ꦕꦤ꧀ꦤꦁ ꦈꦥꦴꦢꦴꦤꦏ꧀ꦑꦤ꧀ꦣꦴꦤꦁ ꦄꦨꦶꦚ꧀ꦚꦴꦪ ꦥꦫꦶꦚ꧀ꦚꦴꦪ ꦥꦫꦶꦏ꧀ꦑꦪꦴꦪ ꦥꦲꦴꦤꦴꦪ…ꦥꦺ… ꦄꦪꦁ ꦄꦫꦶꦪꦺꦴ ꦄꦛ꧀ꦜꦔ꧀ꦒꦶꦏꦺꦴ ꦩꦒ꧀ꦒꦺꦴ ꦨꦴꦮꦺꦠꦧ꧀ꦧꦺꦴ’’ꦠꦶ. ꦄꦛ꧀ꦜꦩꦁ.

꧙. ꦎꦫꦩ꧀ꦨꦴꦒꦶꦪꦱꦸꦠ꧀ꦠꦁ

꧑꧘꧐. ‘‘ꦥꦚ꧀ꦕꦶꦩꦴꦤꦶ, ꦨꦶꦏ꧀ꦑꦮꦺ, ꦎꦫꦩ꧀ꦨꦴꦒꦶꦪꦴꦤꦶ ꦱꦁꦪꦺꦴꦗꦤꦴꦤꦶ. ꦏꦠꦩꦴꦤꦶ ꦥꦚ꧀ꦕ? ꦱꦏ꧀ꦏꦴꦪꦢꦶꦛ꧀ꦜꦶ, ꦮꦶꦕꦶꦏꦶꦕ꧀ꦖꦴ, ꦱꦷꦭꦧ꧀ꦧꦠꦥꦫꦴꦩꦴꦱꦺꦴ, ꦏꦴꦩꦕ꧀ꦖꦤ꧀ꦢꦺꦴ, ꦧ꧀ꦪꦴꦥꦴꦢꦺꦴ – ꦆꦩꦴꦤꦶ ꦑꦺꦴ, ꦨꦶꦏ꧀ꦑꦮꦺ, ꦥꦚ꧀ꦕꦺꦴꦫꦩ꧀ꦨꦴꦒꦶꦪꦴꦤꦶ ꦱꦁꦪꦺꦴꦗꦤꦴꦤꦶ. ꦆꦩꦺꦱꦁ ꦑꦺꦴ ꦨꦶꦏ꧀ꦑꦮꦺ, ꦥꦚ꧀ꦕꦤ꧀ꦤꦁ ꦎꦫꦩ꧀ꦨꦴꦒꦶꦪꦴꦤꦁ ꦱꦁꦪꦺꦴꦗꦤꦴꦤꦁ ꦄꦨꦶꦚ꧀ꦚꦴꦪ ꦥꦫꦶꦚ꧀ꦚꦴꦪ ꦥꦫꦶꦏ꧀ꦑꦪꦴꦪ ꦥꦲꦴꦤꦴꦪ…ꦥꦺ… ꦄꦪꦁ ꦄꦫꦶꦪꦺꦴ ꦄꦛ꧀ꦜꦔ꧀ꦒꦶꦏꦺꦴ ꦩꦒ꧀ꦒꦺꦴ ꦨꦴꦮꦺꦠꦧ꧀ꦧꦺꦴ’’ꦠꦶ. ꦤꦮꦩꦁ.

꧑꧐. ꦈꦢ꧀ꦣꦩ꧀ꦨꦴꦒꦶꦪꦱꦸꦠ꧀ꦠꦁ

꧑꧘꧑. ‘‘ꦥꦚ꧀ꦕꦶꦩꦴꦤꦶ, ꦨꦶꦏ꧀ꦑꦮꦺ, ꦈꦢ꧀ꦣꦩ꧀ꦨꦴꦒꦶꦪꦴꦤꦶ ꦱꦁꦪꦺꦴꦗꦤꦴꦤꦶ. ꦏꦠꦩꦴꦤꦶ ꦥꦚ꧀ꦕ? ꦫꦹꦥꦫꦴꦒꦺꦴ, ꦄꦫꦹꦥꦫꦴꦒꦺꦴ, ꦩꦴꦤꦺꦴ, ꦈꦢ꧀ꦣꦕ꧀ꦕꦁ, ꦄꦮꦶꦗ꧀ꦗꦴ – ꦆꦩꦴꦤꦶ ꦑꦺꦴ, ꦨꦶꦏ꧀ꦑꦮꦺ, ꦥꦚ꧀ꦕꦸꦢ꧀ꦣꦩ꧀ꦨꦴꦒꦶꦪꦴꦤꦶ ꦱꦁꦪꦺꦴꦗꦤꦴꦤꦶ. ꦆꦩꦺꦱꦁ ꦑꦺꦴ, ꦨꦶꦏ꧀ꦑꦮꦺ, ꦥꦚ꧀ꦕꦤ꧀ꦤꦁ ꦈꦢ꧀ꦣꦩ꧀ꦨꦴꦒꦶꦪꦴꦤꦁ ꦱꦁꦪꦺꦴꦗꦤꦴꦤꦁ ꦄꦨꦶꦚ꧀ꦚꦴꦪ ꦥꦫꦶꦚ꧀ꦚꦴꦪ ꦥꦫꦶꦏ꧀ꦑꦪꦴꦪ ꦥꦲꦴꦤꦴꦪ ꦄꦫꦶꦪꦺꦴ ꦄꦛ꧀ꦜꦔ꧀ꦒꦶꦏꦺꦴ ꦩꦒ꧀ꦒꦺꦴ ꦨꦴꦮꦺꦠꦧ꧀ꦧꦺꦴ. ꦏꦠꦩꦺꦴ ꦄꦫꦶꦪꦺꦴ ꦄꦛ꧀ꦜꦔ꧀ꦒꦶꦏꦺꦴ ꦩꦒ꧀ꦒꦺꦴ? ꦆꦣ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦱꦩ꧀ꦩꦴꦢꦶꦛ꧀ꦜꦶꦁ ꦨꦴꦮꦺꦠꦶ ꦮꦶꦮꦺꦏꦤꦶꦱ꧀ꦱꦶꦠꦁ…ꦥꦺ… ꦱꦩ꧀ꦩꦴꦱꦩꦴꦣꦶꦁ ꦨꦴꦮꦺꦠꦶ ꦮꦶꦮꦺꦏꦤꦶꦱ꧀ꦱꦶꦠꦁ ꦮꦶꦫꦴꦒꦤꦶꦱ꧀ꦱꦶꦠꦁ ꦤꦶꦫꦺꦴꦣꦤꦶꦱ꧀ꦱꦶꦠꦁ ꦮꦺꦴꦱ꧀ꦱꦒ꧀ꦒꦥꦫꦶꦟꦴꦩꦶꦁ. ꦆꦩꦺꦱꦁ ꦑꦺꦴ, ꦨꦶꦏ꧀ꦑꦮꦺ, ꦥꦚ꧀ꦕꦤ꧀ꦤꦁ ꦈꦢ꧀ꦣꦩ꧀ꦨꦴꦒꦶꦪꦴꦤꦁ ꦱꦁꦪꦺꦴꦗꦤꦴꦤꦁ ꦄꦨꦶꦚ꧀ꦚꦴꦪ ꦥꦫꦶꦚ꧀ꦚꦴꦪ ꦥꦫꦶꦏ꧀ꦑꦪꦴꦪ ꦥꦲꦴꦤꦴꦪ ꦄꦪꦁ ꦄꦫꦶꦪꦺꦴ ꦄꦛ꧀ꦜꦔ꧀ꦒꦶꦏꦺꦴ ꦩꦒ꧀ꦒꦺꦴ ꦨꦴꦮꦺꦠꦧ꧀ꦧꦺꦴ’’ꦠꦶ.

‘‘ꦥꦚ꧀ꦕꦶꦩꦴꦤꦶ, ꦨꦶꦏ꧀ꦑꦮꦺ, ꦈꦢ꧀ꦣꦩ꧀ꦨꦴꦒꦶꦪꦴꦤꦶ ꦱꦁꦪꦺꦴꦗꦤꦴꦤꦶ. ꦏꦠꦩꦴꦤꦶ ꦥꦚ꧀ꦕ? ꦫꦹꦥꦫꦴꦒꦺꦴ, ꦄꦫꦹꦥꦫꦴꦒꦺꦴ, ꦩꦴꦤꦺꦴ, ꦈꦢ꧀ꦣꦕ꧀ꦕꦁ, ꦄꦮꦶꦗ꧀ꦗꦴ – ꦆꦩꦴꦤꦶ ꦑꦺꦴ, ꦨꦶꦏ꧀ꦑꦮꦺ, ꦥꦚ꧀ꦕꦸꦢ꧀ꦣꦩ꧀ꦨꦴꦒꦶꦪꦴꦤꦶ ꦱꦁꦪꦺꦴꦗꦤꦴꦤꦶ. ꦆꦩꦺꦱꦁ ꦑꦺꦴ, ꦨꦶꦏ꧀ꦑꦮꦺ, ꦥꦚ꧀ꦕꦤ꧀ꦤꦁ ꦈꦢ꧀ꦣꦩ꧀ꦨꦴꦒꦶꦪꦴꦤꦁ ꦱꦁꦪꦺꦴꦗꦤꦴꦤꦁ ꦄꦨꦶꦚ꧀ꦚꦴꦪ ꦥꦫꦶꦚ꧀ꦚꦴꦪ ꦥꦫꦶꦏ꧀ꦑꦪꦴꦪ ꦥꦲꦴꦤꦴꦪ ꦄꦫꦶꦪꦺꦴ ꦄꦛ꧀ꦜꦔ꧀ꦒꦶꦏꦺꦴ ꦩꦒ꧀ꦒꦺꦴ ꦨꦴꦮꦺꦠꦧ꧀ꦧꦺꦴ. ꦏꦠꦩꦺꦴ ꦄꦫꦶꦪꦺꦴ ꦄꦛ꧀ꦜꦔ꧀ꦒꦶꦏꦺꦴ ꦩꦒ꧀ꦒꦺꦴ? ꦆꦣ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦱꦩ꧀ꦩꦴꦢꦶꦛ꧀ꦜꦶꦁ ꦨꦴꦮꦺꦠꦶ…ꦥꦺ… ꦱꦩ꧀ꦩꦴꦱꦩꦴꦣꦶꦁ ꦨꦴꦮꦺꦠꦶ ꦫꦴꦒꦮꦶꦤꦪꦥꦫꦶꦪꦺꦴꦱꦴꦤꦁ ꦢꦺꦴꦱꦮꦶꦤꦪꦥꦫꦶꦪꦺꦴꦱꦴꦤꦁ ꦩꦺꦴꦲꦮꦶꦤꦪꦥꦫꦶꦪꦺꦴꦱꦴꦤꦁ… ꦄꦩꦠꦺꦴꦒꦣꦁ ꦄꦩꦠꦥꦫꦴꦪꦤꦁ ꦄꦩꦠꦥꦫꦶꦪꦺꦴꦱꦴꦤꦁ… ꦤꦶꦧ꧀ꦧꦴꦤꦤꦶꦤ꧀ꦤꦁ ꦤꦶꦧ꧀ꦧꦴꦤꦥꦺꦴꦟꦁ ꦤꦶꦧ꧀ꦧꦴꦤꦥꦧ꧀ꦨꦴꦫꦁ. ꦆꦩꦺꦱꦁ ꦑꦺꦴ, ꦨꦶꦏ꧀ꦑꦮꦺ, ꦥꦚ꧀ꦕꦤ꧀ꦤꦁ ꦈꦢ꧀ꦣꦩ꧀ꦨꦴꦒꦶꦪꦴꦤꦁ ꦱꦁꦪꦺꦴꦗꦤꦴꦤꦁ ꦄꦨꦶꦚ꧀ꦚꦴꦪ ꦥꦫꦶꦚ꧀ꦚꦴꦪ ꦥꦫꦶꦏ꧀ꦑꦪꦴꦪ ꦥꦲꦴꦤꦴꦪ ꦄꦪꦁ ꦄꦫꦶꦪꦺꦴ ꦄꦛ꧀ꦜꦔ꧀ꦒꦶꦏꦺꦴ ꦩꦒ꧀ꦒꦺꦴ ꦨꦴꦮꦺꦠꦧ꧀ꦧꦺꦴ’’ꦠꦶ. ꦢꦱꦩꦁ.

ꦎꦓꦮꦒ꧀ꦒꦺꦴ ꦄꦛ꧀ꦜꦩꦺꦴ.

ꦠꦱ꧀ꦱꦸꦢ꧀ꦢꦴꦤꦁ –

ꦎꦓꦺꦴ ꦪꦺꦴꦒꦺꦴ ꦈꦥꦴꦢꦴꦤꦁ, ꦒꦤ꧀ꦡꦁ ꦄꦤꦸꦱꦪꦺꦤ ꦕ;

ꦏꦴꦩꦒꦸꦟꦴ ꦤꦷꦮꦫꦟꦁ, ꦑꦤ꧀ꦣꦴ ꦎꦫꦸꦢ꧀ꦣꦩ꧀ꦨꦴꦒꦶꦪꦴꦠꦶ.

ꦮꦒ꧀ꦒꦸꦢ꧀ꦢꦴꦤꦁ –

ꦄꦮꦶꦗ꧀ꦗꦴꦮꦒ꧀ꦒꦺꦴ ꦥꦜꦩꦺꦴ, ꦢꦸꦠꦶꦪꦁ ꦮꦶꦲꦴꦫꦁ ꦮꦸꦕ꧀ꦕꦠꦶ;

ꦩꦶꦕ꧀ꦖꦠ꧀ꦠꦁ ꦠꦠꦶꦪꦺꦴ ꦮꦒ꧀ꦒꦺꦴ, ꦕꦠꦸꦠ꧀ꦡꦁ ꦥꦛꦶꦥꦤ꧀ꦤꦺꦤꦺꦮ.

ꦠꦶꦠ꧀ꦡꦶꦪꦁ ꦥꦚ꧀ꦕꦩꦺꦴ ꦮꦒ꧀ꦒꦺꦴ, ꦖꦛ꧀ꦜꦺꦴ ꦱꦹꦫꦶꦪꦺꦤ ꦕ;

ꦧꦲꦸꦏꦠꦺ ꦱꦠ꧀ꦠꦩꦺꦴ ꦮꦒ꧀ꦒꦺꦴ, ꦈꦥ꧀ꦥꦴꦢꦺꦴ ꦄꦛ꧀ꦜꦩꦺꦤ ꦕ.

ꦢꦶꦮꦱꦮꦒ꧀ꦒꦺꦴ ꦤꦮꦩꦺꦴ, ꦢꦱꦩꦺꦴ ꦄꦥ꧀ꦥꦩꦴꦢꦺꦤ ꦕ;

ꦌꦏꦴꦢꦱꦧꦭꦮꦒ꧀ꦒꦺꦴ, ꦢ꧀ꦮꦴꦢꦱ ꦌꦱꦤꦴ ꦥꦴꦭ꦳ꦶꦪꦁ;

ꦎꦓꦮꦒ꧀ꦒꦺꦴ ꦨꦮꦠꦶ ꦠꦺꦫꦱꦴꦠꦶ.

ꦩꦒ꧀ꦒꦱꦁꦪꦸꦠ꧀ꦠꦁ ꦥꦜꦩꦁ.