꧑꧐. ꦒꦶꦭꦴꦤꦢꦱ꧀ꦱꦤꦱꦸꦠ꧀ꦠꦁ

꧓꧕꧒. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦕꦶꦠ꧀ꦠꦺꦴ ꦒꦲꦥꦠꦶ ꦄꦴꦧꦴꦣꦶꦏꦺꦴ ꦲꦺꦴꦠꦶ ꦢꦸꦏ꧀ꦑꦶꦠꦺꦴ ꦧꦴꦭ꦳꧀ꦲꦒꦶꦭꦴꦤꦺꦴ. ꦄꦡ ꦑꦺꦴ ꦱꦩ꧀ꦧꦲꦸꦭꦴ ꦄꦴꦫꦴꦩꦢꦺꦮꦠꦴ ꦮꦤꦢꦺꦮꦠꦴ ꦫꦸꦏ꧀ꦑꦢꦺꦮꦠꦴ ꦎꦱꦣꦶꦠꦶꦟꦮꦤꦥ꧀ꦥꦠꦷꦱꦸ ꦄꦣꦶꦮꦠ꧀ꦡꦴ ꦢꦺꦮꦠꦴ ꦱꦔ꧀ꦒꦩ꧀ꦩ ꦱꦩꦴꦒꦩ꧀ꦩ ꦕꦶꦠ꧀ꦠꦁ ꦒꦲꦥꦠꦶꦁ ꦌꦠꦢꦮꦺꦴꦕꦸꦁ – ‘‘ꦥꦟꦶꦣꦺꦲꦶ, ꦒꦲꦥꦠꦶ, ꦄꦤꦴꦒꦠꦩꦢ꧀ꦣꦴꦤꦁ ꦫꦴꦗꦴ ꦄꦱ꧀ꦱꦁ ꦕꦏ꧀ꦏꦮꦠ꧀ꦠꦷ’’ꦠꦶ.

ꦌꦮꦁ ꦮꦸꦠ꧀ꦠꦺ, ꦕꦶꦠ꧀ꦠꦺꦴ ꦒꦲꦥꦠꦶ ꦠꦴ ꦄꦴꦫꦴꦩꦢꦺꦮꦠꦴ ꦮꦤꦢꦺꦮꦠꦴ ꦫꦸꦏ꧀ꦑꦢꦺꦮꦠꦴ ꦎꦱꦣꦶꦠꦶꦟꦮꦤꦥ꧀ꦥꦠꦷꦱꦸ ꦄꦣꦶꦮꦠ꧀ꦡꦴ ꦢꦺꦮꦠꦴ ꦌꦠꦢꦮꦺꦴꦕ – ‘‘ꦠꦩ꧀ꦥꦶ ꦄꦤꦶꦕ꧀ꦕꦁ, ꦠꦩ꧀ꦥꦶ ꦄꦢ꧀ꦣꦸꦮꦁ, ꦠꦩ꧀ꦥꦶ ꦥꦲꦴꦪ ꦒꦩꦤꦷꦪ’’ꦤ꧀ꦠꦶ. ꦌꦮꦁ ꦮꦸꦠ꧀ꦠꦺ, ꦕꦶꦠ꧀ꦠꦱ꧀ꦱ ꦒꦲꦥꦠꦶꦤꦺꦴ ꦩꦶꦠ꧀ꦠꦴꦩꦕ꧀ꦕꦴ ꦚꦴꦠꦶꦱꦴꦭꦺꦴꦲꦶꦠꦴ ꦕꦶꦠ꧀ꦠꦁ ꦒꦲꦥꦠꦶꦁ ꦌꦠꦢꦮꦺꦴꦕꦸꦁ – ‘‘ꦱꦠꦶꦁ, ꦄꦪ꧀ꦪꦥꦸꦠ꧀ꦠ, ꦈꦥꦛ꧀ꦜꦥꦺꦲꦶ, ꦩꦴ ꦮꦶꦥ꧀ꦥꦭꦥꦷ’’ꦠꦶ. ‘‘ꦏꦶꦁ ꦠꦴꦲꦁ ꦮꦢꦴꦩꦶ ꦪꦁ ꦩꦁ ꦠꦸꦩ꧀ꦲꦺ ꦌꦮꦁ ꦮꦢꦺꦡ – ‘ꦱꦠꦶꦁ, ꦄꦪ꧀ꦪꦥꦸꦠ꧀ꦠ, ꦈꦥꦛ꧀ꦜꦥꦺꦲꦶ, ꦩꦴ ꦮꦶꦥ꧀ꦥꦭꦥꦷ’’’ꦠꦶ? ‘‘ꦌꦮꦁ ꦑꦺꦴ ꦠ꧀ꦮꦁ, ꦄꦪ꧀ꦪꦥꦸꦠ꧀ꦠ, ꦮꦢꦺꦱꦶ – ‘ꦠꦩ꧀ꦥꦶ ꦄꦤꦶꦕ꧀ꦕꦁ, ꦠꦩ꧀ꦥꦶ ꦄꦢ꧀ꦣꦸꦮꦁ, ꦠꦩ꧀ꦥꦶ ꦥꦲꦴꦪ ꦒꦩꦤꦷꦪ’’’ꦤ꧀ꦠꦶ. ‘‘ꦠꦡꦴ ꦲꦶ ꦥꦤ ꦩꦁ ꦄꦴꦫꦴꦩꦢꦺꦮꦠꦴ ꦮꦤꦢꦺꦮꦠꦴ ꦫꦸꦏ꧀ꦑꦢꦺꦮꦠꦴ ꦎꦱꦣꦶꦠꦶꦟꦮꦤꦥ꧀ꦥꦠꦷꦱꦸ ꦄꦣꦶꦮꦠ꧀ꦡꦴ ꦢꦺꦮꦠꦴ ꦌꦮꦩꦴꦲꦁꦱꦸ – ‘ꦥꦟꦶꦣꦺꦲꦶ, ꦒꦲꦥꦠꦶ, ꦄꦤꦴꦒꦠꦩꦢ꧀ꦣꦴꦤꦁ ꦫꦴꦗꦴ ꦄꦱ꧀ꦱꦁ ꦕꦏ꧀ꦏꦮꦠ꧀ꦠꦷ’ꦠꦶ. ꦠꦴꦲꦁ ꦌꦮꦁ ꦮꦢꦴꦩꦶ – ‘ꦠꦩ꧀ꦥꦶ ꦄꦤꦶꦕ꧀ꦕꦁ…ꦥꦺ… ꦠꦩ꧀ꦥꦶ ꦥꦲꦴꦪ ꦒꦩꦤꦷꦪ’’’ꦤ꧀ꦠꦶ. ‘‘ꦏꦶꦁ ꦥꦤ ꦠꦴ, ꦄꦪ꧀ꦪꦥꦸꦠ꧀ꦠ, ꦄꦴꦫꦴꦩꦢꦺꦮꦠꦴ ꦮꦤꦢꦺꦮꦠꦴ ꦫꦸꦏ꧀ꦑꦢꦺꦮꦠꦴ ꦎꦱꦣꦶꦠꦶꦟꦮꦤꦥ꧀ꦥꦠꦷꦱꦸ ꦄꦣꦶꦮꦠ꧀ꦡꦴ ꦢꦺꦮꦠꦴ ꦄꦠ꧀ꦡꦮꦱꦁ ꦱꦩ꧀ꦥꦱ꧀ꦱꦩꦴꦤꦴ ꦌꦮꦩꦴꦲꦁꦱꦸ – ‘ꦥꦟꦶꦣꦺꦲꦶ, ꦒꦲꦥꦠꦶ, ꦄꦤꦴꦒꦠꦩꦢ꧀ꦣꦴꦤꦁ ꦫꦴꦗꦴ ꦄꦱ꧀ꦱꦁ ꦕꦏ꧀ꦏꦮꦠ꧀ꦠꦷ’’’ꦠꦶ? ‘‘ꦠꦴꦱꦁ ꦑꦺꦴ ꦄꦴꦫꦴꦩꦢꦺꦮꦠꦴꦤꦁ ꦮꦤꦢꦺꦮꦠꦴꦤꦁ ꦫꦸꦏ꧀ꦑꦢꦺꦮꦠꦴꦤꦁ ꦎꦱꦣꦶꦠꦶꦟꦮꦤꦥ꧀ꦥꦠꦷꦱꦸ ꦄꦣꦶꦮꦠ꧀ꦡꦴꦤꦁ ꦢꦺꦮꦠꦴꦤꦁ ꦌꦮꦁ ꦲꦺꦴꦠꦶ – ‘ꦄꦪꦁ ꦑꦺꦴ ꦕꦶꦠ꧀ꦠꦺꦴ ꦒꦲꦥꦠꦶ, ꦱꦷꦭꦮꦴ [ꦱꦷꦭꦮꦤ꧀ꦠꦺꦴ (ꦏ.)] ꦏꦭ꧀ꦪꦴꦟꦣꦩ꧀ꦩꦺꦴ. ꦱꦕꦺ ꦥꦟꦶꦢꦲꦶꦱ꧀ꦱꦠꦶ – ꦄꦤꦴꦒꦠꦩꦢ꧀ꦣꦴꦤꦁ ꦫꦴꦗꦴ ꦄꦱ꧀ꦱꦁ ꦕꦏ꧀ꦏꦮꦠ꧀ꦠꦷ’ꦠꦶ, ‘ꦠꦱ꧀ꦱ ꦑꦺꦴ ꦄꦪꦁ ꦆꦗ꧀ꦙꦶꦱ꧀ꦱꦠꦶ, ꦱꦷꦭꦮꦠꦺꦴ ꦕꦺꦠꦺꦴꦥꦟꦶꦣꦶ ꦮꦶꦱꦸꦢ꧀ꦣꦠ꧀ꦠꦴ ꦣꦩ꧀ꦩꦶꦏꦺꦴ ꦣꦩ꧀ꦩꦶꦏꦁ ꦦꦭꦁ ꦄꦤꦸꦥꦱ꧀ꦱꦠꦷ’ꦠꦶ. ꦆꦩꦁ ꦑꦺꦴ ꦠꦴ ꦄꦴꦫꦴꦩꦢꦺꦮꦠꦴ ꦮꦤꦢꦺꦮꦠꦴ ꦫꦸꦏ꧀ꦑꦢꦺꦮꦠꦴ ꦎꦱꦣꦶꦠꦶꦟꦮꦤꦥ꧀ꦥꦠꦷꦱꦸ ꦄꦣꦶꦮꦠ꧀ꦡꦴ ꦢꦺꦮꦠꦴ ꦄꦠ꧀ꦡꦮꦱꦁ ꦱꦩ꧀ꦥꦱ꧀ꦱꦩꦴꦤꦴ ꦌꦮꦩꦴꦲꦁꦱꦸ – ‘ꦥꦟꦶꦣꦺꦲꦶ, ꦒꦲꦥꦠꦶ, ꦄꦤꦴꦒꦠꦩꦢ꧀ꦣꦴꦤꦁ ꦫꦴꦗꦴ ꦄꦱ꧀ꦱꦁ ꦕꦏ꧀ꦏꦮꦠ꧀ꦠꦷ’ꦠꦶ. ꦠꦴꦲꦁ ꦌꦮꦁ ꦮꦢꦴꦩꦶ – ‘ꦠꦩ꧀ꦥꦶ ꦄꦤꦶꦕ꧀ꦕꦁ, ꦠꦩ꧀ꦥꦶ ꦄꦢ꧀ꦣꦸꦮꦁ, ꦠꦩ꧀ꦥꦶ ꦥꦲꦴꦪ ꦒꦩꦤꦷꦪ’’’ꦤ꧀ꦠꦶ.

‘‘ꦠꦺꦤ ꦲꦶ, ꦄꦪ꧀ꦪꦥꦸꦠ꧀ꦠ, ꦄꦩ꧀ꦲꦺꦥꦶ ꦎꦮꦢꦴꦲꦷ’’ꦠꦶ. ‘‘ꦠꦱ꧀ꦩꦴ ꦲꦶ ꦮꦺꦴ ꦌꦮꦁ ꦱꦶꦏ꧀ꦑꦶꦠꦧ꧀ꦧꦁ – ꦧꦸꦢ꧀ꦣꦺ ꦄꦮꦺꦕ꧀ꦕꦥ꧀ꦥꦱꦴꦢꦺꦤ ꦱꦩꦤ꧀ꦤꦴꦒꦠꦴ ꦨꦮꦶꦱ꧀ꦱꦴꦩ – ‘ꦆꦠꦶꦥꦶ ꦱꦺꦴ ꦨꦒꦮꦴ ꦄꦫꦲꦁ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦴ ꦮꦶꦗ꧀ꦗꦴꦕꦫꦟꦱꦩ꧀ꦥꦤ꧀ꦤꦺꦴ ꦱꦸꦒꦠꦺꦴ ꦭꦺꦴꦏꦮꦶꦢꦹ ꦄꦤꦸꦠ꧀ꦠꦫꦺꦴ ꦥꦸꦫꦶꦱꦢꦩ꧀ꦩꦱꦴꦫꦡꦶ ꦱꦠ꧀ꦡꦴ ꦢꦺꦮꦩꦤꦸꦱ꧀ꦱꦴꦤꦁ ꦧꦸꦢ꧀ꦣꦺꦴ ꦨꦒꦮꦴ’ꦠꦶ. ꦣꦩ꧀ꦩꦺ ꦄꦮꦺꦕ꧀ꦕꦥ꧀ꦥꦱꦴꦢꦺꦤ ꦱꦩꦤ꧀ꦤꦴꦒꦠꦴ ꦨꦮꦶꦱ꧀ꦱꦴꦩ – ‘ꦱ꧀ꦮꦴꦏ꧀ꦑꦴꦠꦺꦴ ꦨꦒꦮꦠꦴ ꦣꦩ꧀ꦩꦺꦴ ꦱꦤ꧀ꦢꦶꦛ꧀ꦜꦶꦏꦺꦴ ꦄꦏꦴꦭꦶꦏꦺꦴ ꦌꦲꦶꦥꦱ꧀ꦱꦶꦏꦺꦴ ꦎꦥꦤꦺꦪ꧀ꦪꦶꦏꦺꦴ ꦥꦕ꧀ꦕꦠ꧀ꦠꦁ ꦮꦺꦢꦶꦠꦧ꧀ꦧꦺꦴ ꦮꦶꦚ꧀ꦚꦹꦲꦷ’ꦠꦶ. ꦱꦔ꧀ꦓꦺ ꦄꦮꦺꦕ꧀ꦕꦥ꧀ꦥꦱꦴꦢꦺꦤ ꦱꦩꦤ꧀ꦤꦴꦒꦠꦴ ꦨꦮꦶꦱ꧀ꦱꦴꦩ – ‘ꦱꦸꦥ꧀ꦥꦛꦶꦥꦤ꧀ꦤꦺꦴ ꦨꦒꦮꦠꦺꦴ ꦱꦴꦮꦏꦱꦔ꧀ꦓꦺꦴ, ꦈꦗꦸꦥ꧀ꦥꦛꦶꦥꦤ꧀ꦤꦺꦴ ꦨꦒꦮꦠꦺꦴ ꦱꦴꦮꦏꦱꦔ꧀ꦓꦺꦴ, ꦚꦴꦪꦥ꧀ꦥꦛꦶꦥꦤ꧀ꦤꦺꦴ ꦨꦒꦮꦠꦺꦴ ꦱꦴꦮꦏꦱꦔ꧀ꦓꦺꦴ, ꦱꦴꦩꦷꦕꦶꦥ꧀ꦥꦛꦶꦥꦤ꧀ꦤꦺꦴ ꦨꦒꦮꦠꦺꦴ ꦱꦴꦮꦏꦱꦔ꧀ꦓꦺꦴ, ꦪꦢꦶꦢꦁ ꦕꦠ꧀ꦠꦴꦫꦶ ꦥꦸꦫꦶꦱꦪꦸꦒꦴꦤꦶ ꦄꦛ꧀ꦜ ꦥꦸꦫꦶꦱꦥꦸꦒ꧀ꦒꦭꦴ ꦌꦱ ꦨꦒꦮꦠꦺꦴ ꦱꦴꦮꦏꦱꦔ꧀ꦓꦺꦴ ꦄꦴꦲꦸꦤꦺꦪ꧀ꦪꦺꦴ ꦥꦴꦲꦸꦤꦺꦪ꧀ꦪꦺꦴ ꦢꦏ꧀ꦑꦶꦟꦺꦪ꧀ꦪꦺꦴ ꦄꦚ꧀ꦗꦭꦶꦏꦫꦟꦷꦪꦺꦴ ꦄꦤꦸꦠ꧀ꦠꦫꦁ ꦥꦸꦚ꧀ꦚꦏ꧀ꦑꦺꦠ꧀ꦠꦁ ꦭꦺꦴꦏꦱ꧀ꦱꦴ’ꦠꦶ. ꦪꦁ ꦑꦺꦴ ꦥꦤ ꦏꦶꦚ꧀ꦕꦶ ꦏꦸꦭꦺ ꦢꦺꦪ꧀ꦪꦣꦩ꧀ꦩꦁ ꦱꦧ꧀ꦧꦁ ꦠꦁ ꦄꦥ꧀ꦥꦛꦶꦮꦶꦨꦠ꧀ꦠꦁ ꦨꦮꦶꦱ꧀ꦱꦠꦶ ꦱꦷꦭꦮꦤ꧀ꦠꦺꦲꦶ ꦏꦭ꧀ꦪꦴꦟꦣꦩ꧀ꦩꦺꦲꦷꦠꦶ ꦌꦮꦚ꧀ꦲꦶ ꦮꦺꦴ ꦱꦶꦏ꧀ꦑꦶꦠꦧ꧀ꦧ’’ꦤ꧀ꦠꦶ. ꦄꦡ ꦑꦺꦴ ꦕꦶꦠ꧀ꦠꦺꦴ ꦒꦲꦥꦠꦶ ꦩꦶꦠ꧀ꦠꦴꦩꦕ꧀ꦕꦺ ꦚꦴꦠꦶꦱꦴꦭꦺꦴꦲꦶꦠꦺ ꦧꦸꦢ꧀ꦣꦺ ꦕ ꦣꦩ꧀ꦩꦺ ꦕ ꦱꦔ꧀ꦓꦺ ꦕ ꦕꦴꦒꦺ ꦕ ꦱꦩꦴꦢꦥꦺꦠ꧀ꦮꦴ ꦏꦴꦭꦩꦏꦴꦱꦷꦠꦶ. ꦢꦱꦩꦁ.

ꦕꦶꦠ꧀ꦠꦱꦁꦪꦸꦠ꧀ꦠꦁ ꦱꦩꦠ꧀ꦠꦁ.