꧗. ꦄꦴꦏꦶꦚ꧀ꦕꦚ꧀ꦚꦴꦪꦠꦤꦥꦚ꧀ꦲꦴꦱꦸꦠ꧀ꦠꦁ

꧓꧓꧘. ‘‘‘ꦄꦴꦏꦶꦚ꧀ꦕꦚ꧀ꦚꦴꦪꦠꦤꦁ, ꦄꦴꦏꦶꦚ꧀ꦕꦚ꧀ꦚꦴꦪꦠꦤ’ꦤ꧀ꦠꦶ ꦮꦸꦕ꧀ꦕꦠꦶ. ꦏꦠꦩꦁ ꦤꦸ ꦑꦺꦴ ꦄꦴꦏꦶꦚ꧀ꦕꦚ꧀ꦚꦴꦪꦠꦤꦤ꧀ꦠꦶ? ꦠꦱ꧀ꦱ ꦩꦪ꧀ꦲꦁ, ꦄꦴꦮꦸꦱꦺꦴ, ꦌꦠꦢꦲꦺꦴꦱꦶ – ‘ꦆꦣ ꦨꦶꦏ꧀ꦑꦸ ꦱꦧ꧀ꦧꦱꦺꦴ ꦮꦶꦚ꧀ꦚꦴꦟꦚ꧀ꦕꦴꦪꦠꦤꦁ ꦱꦩꦠꦶꦏ꧀ꦏꦩ꧀ꦩ ꦤꦠ꧀ꦡꦶ ꦏꦶꦚ꧀ꦕꦷꦠꦶ ꦄꦴꦏꦶꦚ꧀ꦕꦚ꧀ꦚꦴꦪꦠꦤꦁ ꦈꦥꦱꦩ꧀ꦥꦗ꧀ꦗ ꦮꦶꦲꦫꦠꦶ. ꦆꦢꦁ ꦮꦸꦕ꧀ꦕꦠꦶ ꦄꦴꦏꦶꦚ꧀ꦕꦚ꧀ꦚꦴꦪꦠꦤ’ꦤ꧀ꦠꦶ. ꦱꦺꦴ ꦑ꧀ꦮꦴꦲꦁ, ꦄꦴꦮꦸꦱꦺꦴ, ꦱꦧ꧀ꦧꦱꦺꦴ ꦮꦶꦚ꧀ꦚꦴꦟꦚ꧀ꦕꦴꦪꦠꦤꦁ ꦱꦩꦠꦶꦏ꧀ꦏꦩ꧀ꦩ ꦤꦠ꧀ꦡꦶ ꦏꦶꦚ꧀ꦕꦷꦠꦶ ꦄꦴꦏꦶꦚ꧀ꦕꦚ꧀ꦚꦴꦪꦠꦤꦁ ꦈꦥꦱꦩ꧀ꦥꦗ꧀ꦗ ꦮꦶꦲꦫꦴꦩꦶ. ꦠꦱ꧀ꦱ ꦩꦪ꧀ꦲꦁ, ꦄꦴꦮꦸꦱꦺꦴ, ꦆꦩꦶꦤꦴ ꦮꦶꦲꦴꦫꦺꦤ ꦮꦶꦲꦫꦠꦺꦴ ꦮꦶꦚ꧀ꦚꦴꦟꦚ꧀ꦕꦴꦪꦠꦤꦱꦲꦒꦠꦴ ꦱꦚ꧀ꦚꦴꦩꦤꦱꦶꦏꦴꦫꦴ ꦱꦩꦸꦢꦴꦕꦫꦤ꧀ꦠꦶ.

‘‘ꦄꦡ ꦑꦺꦴ ꦩꦁ, ꦄꦴꦮꦸꦱꦺꦴ, ꦨꦒꦮꦴ ꦆꦢ꧀ꦣꦶꦪꦴ ꦈꦥꦱꦔ꧀ꦏꦩꦶꦠ꧀ꦮꦴ ꦌꦠꦢꦮꦺꦴꦕ – ‘ꦩꦺꦴꦒ꧀ꦒꦭ꧀ꦭꦴꦤ, ꦩꦺꦴꦒ꧀ꦒꦭ꧀ꦭꦴꦤ! ꦩꦴ, ꦧ꧀ꦫꦴꦲ꧀ꦩꦟ, ꦄꦴꦏꦶꦚ꧀ꦕꦚ꧀ꦚꦴꦪꦠꦤꦁ ꦥꦩꦴꦢꦺꦴ, ꦄꦴꦏꦶꦚ꧀ꦕꦚ꧀ꦚꦴꦪꦠꦤꦺ ꦕꦶꦠ꧀ꦠꦁ ꦱꦟ꧀ꦜꦥꦺꦲꦶ, ꦄꦴꦏꦶꦚ꧀ꦕꦚ꧀ꦚꦴꦪꦠꦤꦺ ꦕꦶꦠ꧀ꦠꦁ ꦌꦏꦺꦴꦢꦶꦁ ꦏꦫꦺꦴꦲꦶ, ꦄꦴꦏꦶꦚ꧀ꦕꦚ꧀ꦚꦴꦪꦠꦤꦺ ꦕꦶꦠ꧀ꦠꦁ ꦱꦩꦴꦢꦲꦴ’ꦠꦶ. ꦱꦺꦴ ꦑ꧀ꦮꦴꦲꦁ, ꦄꦴꦮꦸꦱꦺꦴ, ꦄꦥꦫꦺꦤ ꦱꦩꦪꦺꦤ ꦱꦧ꧀ꦧꦱꦺꦴ ꦮꦶꦚ꧀ꦚꦴꦟꦚ꧀ꦕꦴꦪꦠꦤꦁ ꦱꦩꦠꦶꦏ꧀ꦏꦩ꧀ꦩ ꦤꦠ꧀ꦡꦶ ꦏꦶꦚ꧀ꦕꦷꦠꦶ ꦄꦴꦏꦶꦚ꧀ꦕꦚ꧀ꦚꦴꦪꦠꦤꦁ ꦈꦥꦱꦩ꧀ꦥꦗ꧀ꦗ ꦮꦶꦲꦴꦱꦶꦁ. ꦪꦚ꧀ꦲꦶ ꦠꦁ, ꦄꦴꦮꦸꦱꦺꦴ, ꦱꦩ꧀ꦩꦴ ꦮꦢꦩꦴꦤꦺꦴ ꦮꦢꦺꦪ꧀ꦪ…ꦥꦺ… ꦩꦲꦴꦨꦶꦚ꧀ꦚꦠꦁ ꦥꦠ꧀ꦠꦺꦴ’’ꦠꦶ. ꦱꦠ꧀ꦠꦩꦁ.