꧓. ꦄꦛ꧀ꦜꦱꦠꦥꦫꦶꦪꦴꦪꦮꦒ꧀ꦒꦺꦴ

꧑. ꦱꦷꦮꦏꦱꦸꦠ꧀ꦠꦁ

꧒꧖꧙. ꦌꦏꦁ ꦱꦩꦪꦁ ꦨꦒꦮꦴ ꦫꦴꦗꦒꦲꦺ ꦮꦶꦲꦫꦠꦶ ꦮꦺꦭ꦳ꦸꦮꦤꦺ ꦏꦭꦤ꧀ꦢꦏꦤꦶꦮꦴꦥꦺ. ꦄꦡ ꦑꦺꦴ ꦩꦺꦴꦭ꦳ꦶꦪꦱꦷꦮꦏꦺꦴ ꦥꦫꦶꦧ꧀ꦧꦴꦗꦏꦺꦴ ꦪꦺꦤ ꦨꦒꦮꦴ ꦠꦺꦤꦸꦥꦱꦔ꧀ꦏꦩꦶ; ꦈꦥꦱꦔ꧀ꦏꦩꦶꦠ꧀ꦮꦴ ꦨꦒꦮꦠꦴ ꦱꦢ꧀ꦣꦶꦁ ꦱꦩ꧀ꦩꦺꦴꦢꦶ. ꦱꦩ꧀ꦩꦺꦴꦢꦤꦷꦪꦁ ꦏꦡꦁ ꦱꦴꦫꦟꦷꦪꦁ ꦮꦷꦠꦶꦱꦴꦫꦺꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦷꦢꦶ. ꦌꦏꦩꦤ꧀ꦠꦁ ꦤꦶꦱꦶꦤ꧀ꦤꦺꦴ ꦑꦺꦴ ꦩꦺꦴꦭ꦳ꦶꦪꦱꦷꦮꦏꦺꦴ ꦥꦫꦶꦧ꧀ꦧꦴꦗꦏꦺꦴ ꦨꦒꦮꦤ꧀ꦠꦁ ꦌꦠꦢꦮꦺꦴꦕ – ‘‘ꦱꦤ꧀ꦠꦶ, ꦨꦺꦴ ꦒꦺꦴꦠꦩ, ꦌꦏꦺ ꦱꦩꦟꦧ꧀ꦫꦴꦲ꧀ꦩꦟꦴ ꦌꦮꦁꦮꦴꦢꦶꦤꦺꦴ ꦌꦮꦁꦢꦶꦛ꧀ꦜꦶꦤꦺꦴ – ‘ꦪꦁ ꦏꦶꦚ꧀ꦕꦴꦪꦁ ꦥꦸꦫꦶꦱꦥꦸꦒ꧀ꦒꦭꦺꦴ ꦥꦛꦶꦱꦁꦮꦺꦢꦺꦠꦶ ꦱꦸꦑꦁ ꦮꦴ ꦢꦸꦏ꧀ꦑꦁ ꦮꦴ ꦄꦢꦸꦏ꧀ꦑꦩꦱꦸꦑꦁ ꦮꦴ ꦱꦧ꧀ꦧꦁ ꦠꦁ ꦥꦸꦧ꧀ꦧꦺꦏꦠꦲꦺꦠꦹ’ꦠꦶ. ꦆꦣ [ꦆꦣ ꦥꦤ (ꦱ꧀ꦪꦴ. ꦏꦁ. ꦥꦷ. ꦏ.)] ꦨꦮꦁ ꦒꦺꦴꦠꦩꦺꦴ ꦏꦶꦩꦴꦲꦴ’’ꦠꦶ?

‘‘ꦥꦶꦠ꧀ꦠꦱꦩꦸꦛ꧀ꦜꦴꦤꦴꦤꦶꦥꦶ ꦑꦺꦴ, ꦱꦷꦮꦏ, ꦆꦣꦺꦏꦕ꧀ꦕꦴꦤꦶ ꦮꦺꦢꦪꦶꦠꦴꦤꦶ ꦈꦥ꧀ꦥꦗ꧀ꦗꦤ꧀ꦠꦶ. ꦱꦴꦩꦩ꧀ꦥꦶ ꦑꦺꦴ ꦌꦠꦁ, ꦱꦷꦮꦏ, ꦮꦺꦢꦶꦠꦧ꧀ꦧꦁ [ꦌꦮꦁ ꦮꦺꦢꦶꦠꦧ꧀ꦧꦁ (ꦱ꧀ꦪꦴ. ꦏꦁ. ꦏ.)] ꦪꦡꦴ ꦥꦶꦠ꧀ꦠꦱꦩꦸꦛ꧀ꦜꦴꦤꦴꦤꦶꦥꦶ ꦆꦣꦺꦏꦕ꧀ꦕꦴꦤꦶ ꦮꦺꦢꦪꦶꦠꦴꦤꦶ ꦈꦥ꧀ꦥꦗ꧀ꦗꦤ꧀ꦠꦶ; ꦭꦺꦴꦏꦱ꧀ꦱꦥꦶ ꦑꦺꦴ ꦌꦠꦁ, ꦱꦷꦮꦏ, ꦱꦕ꧀ꦕꦱꦩ꧀ꦩꦠꦁ ꦪꦡꦴ ꦥꦶꦠ꧀ꦠꦱꦩꦸꦛ꧀ꦜꦴꦤꦴꦤꦶꦥꦶ ꦆꦣꦺꦏꦕ꧀ꦕꦴꦤꦶ ꦮꦺꦢꦪꦶꦠꦴꦤꦶ ꦈꦥ꧀ꦥꦗ꧀ꦗꦤ꧀ꦠꦶ. ꦠꦠ꧀ꦫ, ꦱꦷꦮꦏ, ꦪꦺ ꦠꦺ ꦱꦩꦟꦧ꧀ꦫꦴꦲ꧀ꦩꦟꦴ ꦌꦮꦁꦮꦴꦢꦶꦤꦺꦴ ꦌꦮꦁꦢꦶꦛ꧀ꦜꦶꦤꦺꦴ – ‘ꦪꦁ ꦏꦶꦚ꧀ꦕꦴꦪꦁ ꦥꦸꦫꦶꦱꦥꦸꦒ꧀ꦒꦭꦺꦴ ꦥꦛꦶꦱꦁꦮꦺꦢꦺꦠꦶ ꦱꦸꦑꦁ ꦮꦴ ꦢꦸꦏ꧀ꦑꦁ ꦮꦴ ꦄꦢꦸꦏ꧀ꦑꦩꦱꦸꦑꦁ ꦮꦴ ꦱꦧ꧀ꦧꦁ ꦠꦁ ꦥꦸꦧ꧀ꦧꦺꦏꦠꦲꦺꦠꦹ’ꦠꦶ. ꦪꦚ꧀ꦕ ꦱꦴꦩꦁ ꦚꦴꦠꦁ ꦠꦚ꧀ꦕ ꦄꦠꦶꦣꦴꦮꦤ꧀ꦠꦶ, ꦪꦚ꧀ꦕ ꦭꦺꦴꦏꦺ ꦱꦕ꧀ꦕꦱꦩ꧀ꦩꦠꦁ ꦠꦚ꧀ꦕ ꦄꦠꦶꦣꦴꦮꦤ꧀ꦠꦶ. ꦠꦱ꧀ꦩꦴ ꦠꦺꦱꦁ ꦱꦩꦟꦧ꧀ꦫꦴꦲ꧀ꦩꦟꦴꦤꦁ ꦩꦶꦕ꧀ꦖꦴꦠꦶ ꦮꦢꦴꦩꦶ.

‘‘ꦱꦺꦩ꧀ꦲꦱꦩꦸꦛ꧀ꦜꦴꦤꦴꦤꦶꦥꦶ ꦑꦺꦴ, ꦱꦷꦮꦏ…ꦥꦺ… ꦮꦴꦠꦱꦩꦸꦛ꧀ꦜꦴꦤꦴꦤꦶꦥꦶ ꦑꦺꦴ, ꦱꦷꦮꦏ…ꦥꦺ… ꦱꦤ꧀ꦤꦶꦥꦴꦠꦶꦏꦴꦤꦶꦥꦶ ꦑꦺꦴ, ꦱꦷꦮꦏ…ꦥꦺ… ꦈꦠꦸꦥꦫꦶꦟꦴꦩꦗꦴꦤꦶꦥꦶ ꦑꦺꦴ, ꦱꦷꦮꦏ…ꦥꦺ… ꦮꦶꦱꦩꦥꦫꦶꦲꦴꦫꦗꦴꦤꦶꦥꦶ ꦑꦺꦴ, ꦱꦷꦮꦏ…ꦥꦺ… ꦎꦥꦏ꧀ꦏꦩꦶꦏꦴꦤꦶꦥꦶ ꦑꦺꦴ, ꦱꦷꦮꦏ…ꦥꦺ… ꦏꦩ꧀ꦩꦮꦶꦥꦴꦏꦗꦴꦤꦶꦥꦶ ꦑꦺꦴ, ꦱꦷꦮꦏ, ꦆꦣꦺꦏꦕ꧀ꦕꦴꦤꦶ ꦮꦺꦢꦪꦶꦠꦴꦤꦶ ꦈꦥ꧀ꦥꦗ꧀ꦗꦤ꧀ꦠꦶ. ꦱꦴꦩꦩ꧀ꦥꦶ ꦑꦺꦴ ꦌꦠꦁ, ꦱꦷꦮꦏ, ꦮꦺꦢꦶꦠꦧ꧀ꦧꦁ. ꦪꦡꦴ ꦏꦩ꧀ꦩꦮꦶꦥꦴꦏꦗꦴꦤꦶꦥꦶ ꦆꦣꦺꦏꦕ꧀ꦕꦴꦤꦶ ꦮꦺꦢꦪꦶꦠꦴꦤꦶ ꦈꦥ꧀ꦥꦗ꧀ꦗꦤ꧀ꦠꦶ; ꦭꦺꦴꦏꦱ꧀ꦱꦥꦶ ꦑꦺꦴ ꦌꦠꦁ, ꦱꦷꦮꦏ, ꦱꦕ꧀ꦕꦱꦩ꧀ꦩꦠꦁ. ꦪꦡꦴ ꦏꦩ꧀ꦩꦮꦶꦥꦴꦏꦗꦴꦤꦶꦥꦶ ꦆꦣꦺꦏꦕ꧀ꦕꦴꦤꦶ ꦮꦺꦢꦪꦶꦠꦴꦤꦶ ꦈꦥ꧀ꦥꦗ꧀ꦗꦤ꧀ꦠꦶ; ꦠꦠ꧀ꦫ, ꦱꦷꦮꦏ, ꦪꦺ ꦠꦺ ꦱꦩꦟꦧ꧀ꦫꦴꦲ꧀ꦩꦟꦴ ꦌꦮꦁꦮꦴꦢꦶꦤꦺꦴ ꦌꦮꦁꦢꦶꦛ꧀ꦜꦶꦤꦺꦴ – ‘ꦪꦁ ꦏꦶꦚ꧀ꦕꦴꦪꦁ ꦥꦸꦫꦶꦱꦥꦸꦒ꧀ꦒꦭꦺꦴ ꦥꦛꦶꦱꦁꦮꦺꦢꦺꦠꦶ ꦱꦸꦑꦁ ꦮꦴ ꦢꦸꦏ꧀ꦑꦁ ꦮꦴ ꦄꦢꦸꦏ꧀ꦑꦩꦱꦸꦑꦁ ꦮꦴ ꦱꦧ꧀ꦧꦁ ꦠꦁ ꦥꦸꦧ꧀ꦧꦺꦏꦠꦲꦺꦠꦹ’ꦠꦶ. ꦪꦚ꧀ꦕ ꦱꦴꦩꦁ ꦚꦴꦠꦁ ꦠꦚ꧀ꦕ ꦄꦠꦶꦣꦴꦮꦤ꧀ꦠꦶ ꦪꦚ꧀ꦕ ꦭꦺꦴꦏꦺ ꦱꦕ꧀ꦕꦱꦩ꧀ꦩꦠꦁ ꦠꦚ꧀ꦕ ꦄꦠꦶꦣꦴꦮꦤ꧀ꦠꦶ. ꦠꦱ꧀ꦩꦴ ꦠꦺꦱꦁ ꦱꦩꦟꦧ꧀ꦫꦴꦲ꧀ꦩꦟꦴꦤꦁ ꦩꦶꦕ꧀ꦖꦴꦠꦶ ꦮꦢꦴꦩꦷꦠꦶ. ꦌꦮꦁ ꦮꦸꦠ꧀ꦠꦺ, ꦩꦺꦴꦭ꦳ꦶꦪꦱꦷꦮꦏꦺꦴ ꦥꦫꦶꦧ꧀ꦧꦴꦗꦏꦺꦴ ꦨꦒꦮꦤ꧀ꦠꦁ ꦌꦠꦢꦮꦺꦴꦕ – ‘ꦄꦨꦶꦏ꧀ꦏꦤ꧀ꦠꦁ, ꦨꦺꦴ ꦒꦺꦴꦠꦩ, ꦄꦨꦶꦏ꧀ꦏꦤ꧀ꦠꦁ, ꦨꦺꦴ ꦒꦺꦴꦠꦩ …ꦥꦺ… ꦈꦥꦴꦱꦏꦁ ꦩꦁ ꦨꦮꦁ ꦒꦺꦴꦠꦩꦺꦴ ꦣꦴꦫꦺꦠꦸ ꦄꦗ꧀ꦗꦠꦒ꧀ꦒꦺ ꦥꦴꦟꦸꦥꦺꦠꦁ ꦱꦫꦟꦁ ꦒꦠ’’’ꦤ꧀ꦠꦶ.

‘‘ꦥꦶꦠ꧀ꦠꦁ ꦱꦺꦩ꧀ꦲꦚ꧀ꦕ ꦮꦴꦠꦺꦴ ꦕ, ꦱꦤ꧀ꦤꦶꦥꦴꦠꦴ ꦈꦠꦹꦤꦶ ꦕ;

ꦮꦶꦱꦩꦁ ꦎꦥꦏ꧀ꦏꦩꦶꦏꦁ, ꦏꦩ꧀ꦩꦮꦶꦥꦴꦏꦺꦤ ꦄꦛ꧀ꦜꦩꦷ’’ꦠꦶ. ꦥꦜꦩꦁ;

꧒. ꦄꦛ꧀ꦜꦱꦠꦱꦸꦠ꧀ꦠꦁ

꧒꧗꧐. ‘‘ꦄꦛ꧀ꦜꦱꦠꦥꦫꦶꦪꦴꦪꦁ ꦮꦺꦴ, ꦨꦶꦏ꧀ꦑꦮꦺ, ꦣꦩ꧀ꦩꦥꦫꦶꦪꦴꦪꦁ ꦢꦺꦱꦺꦱ꧀ꦱꦴꦩꦶ. ꦠꦁ ꦱꦸꦟꦴꦡ. ꦏꦠꦩꦺꦴ ꦕ, ꦨꦶꦏ꧀ꦑꦮꦺ, ꦄꦛ꧀ꦜꦱꦠꦥꦫꦶꦪꦴꦪꦺꦴ, ꦣꦩ꧀ꦩꦥꦫꦶꦪꦴꦪꦺꦴ? ꦢ꧀ꦮꦺꦥꦶ ꦩꦪꦴ, ꦨꦶꦏ꧀ꦑꦮꦺ, ꦮꦺꦢꦤꦴ ꦮꦸꦠ꧀ꦠꦴ ꦥꦫꦶꦪꦴꦪꦺꦤ; ꦠꦶꦱ꧀ꦱꦺꦴꦥꦶ ꦩꦪꦴ ꦮꦺꦢꦤꦴ ꦮꦸꦠ꧀ꦠꦴ ꦥꦫꦶꦪꦴꦪꦺꦤ; ꦥꦚ꧀ꦕꦥꦶ ꦩꦪꦴ ꦮꦺꦢꦤꦴ ꦮꦸꦠ꧀ꦠꦴ ꦥꦫꦶꦪꦴꦪꦺꦤ; ꦖꦥꦶ ꦩꦪꦴ ꦮꦺꦢꦤꦴ ꦮꦸꦠ꧀ꦠꦴ ꦥꦫꦶꦪꦴꦪꦺꦤ; ꦄꦛ꧀ꦜꦴꦫꦱꦴꦥꦶ ꦩꦪꦴ ꦮꦺꦢꦤꦴ ꦮꦸꦠ꧀ꦠꦴ ꦥꦫꦶꦪꦴꦪꦺꦤ; ꦖꦠ꧀ꦠꦶꦁꦱꦴꦥꦶ ꦩꦪꦴ ꦮꦺꦢꦤꦴ ꦮꦸꦠ꧀ꦠꦴ ꦥꦫꦶꦪꦴꦪꦺꦤ; ꦄꦛ꧀ꦜꦱꦠꦩ꧀ꦥꦶ ꦩꦪꦴ ꦮꦺꦢꦤꦴ ꦮꦸꦠ꧀ꦠꦴ ꦥꦫꦶꦪꦴꦪꦺꦤ. ‘‘ꦏꦠꦩꦴ ꦕ, ꦨꦶꦏ꧀ꦑꦮꦺ, ꦢ꧀ꦮꦺ ꦮꦺꦢꦤꦴ? ꦏꦴꦪꦶꦏꦴ ꦕ ꦕꦺꦠꦱꦶꦏꦴ ꦕ – ꦆꦩꦴ ꦮꦸꦕ꧀ꦕꦤ꧀ꦠꦶ, ꦨꦶꦏ꧀ꦑꦮꦺ, ꦢ꧀ꦮꦺ ꦮꦺꦢꦤꦴ. ꦏꦠꦩꦴ ꦕ, ꦨꦶꦏ꧀ꦑꦮꦺ, ꦠꦶꦱ꧀ꦱꦺꦴ ꦮꦺꦢꦤꦴ? ꦱꦸꦑꦴ ꦮꦺꦢꦤꦴ, ꦢꦸꦏ꧀ꦑꦴ ꦮꦺꦢꦤꦴ, ꦄꦢꦸꦏ꧀ꦑꦩꦱꦸꦑꦴ ꦮꦺꦢꦤꦴ – ꦆꦩꦴ ꦮꦸꦕ꧀ꦕꦤ꧀ꦠꦶ, ꦨꦶꦏ꧀ꦑꦮꦺ, ꦠꦶꦱ꧀ꦱꦺꦴ ꦮꦺꦢꦤꦴ. ꦏꦠꦩꦴ ꦕ, ꦨꦶꦏ꧀ꦑꦮꦺ, ꦥꦚ꧀ꦕ ꦮꦺꦢꦤꦴ? ꦱꦸꦑꦶꦤ꧀ꦢ꧀ꦫꦶꦪꦁ, ꦢꦸꦏ꧀ꦑꦶꦤ꧀ꦢ꧀ꦫꦶꦪꦁ, ꦱꦺꦴꦩꦤꦱ꧀ꦱꦶꦤ꧀ꦢ꧀ꦫꦶꦪꦁ, ꦢꦺꦴꦩꦤꦱ꧀ꦱꦶꦤ꧀ꦢ꧀ꦫꦶꦪꦁ, ꦈꦥꦺꦏ꧀ꦑꦶꦤ꧀ꦢ꧀ꦫꦶꦪꦁ – ꦆꦩꦴ ꦮꦸꦕ꧀ꦕꦤ꧀ꦠꦶ, ꦨꦶꦏ꧀ꦑꦮꦺ, ꦥꦚ꧀ꦕ ꦮꦺꦢꦤꦴ. ꦏꦠꦩꦴ ꦕ, ꦨꦶꦏ꧀ꦑꦮꦺ, ꦖ ꦮꦺꦢꦤꦴ? ꦕꦏ꧀ꦑꦸꦱꦩ꧀ꦦꦱ꧀ꦱꦗꦴ ꦮꦺꦢꦤꦴ…ꦥꦺ… ꦩꦤꦺꦴꦱꦩ꧀ꦦꦱ꧀ꦱꦗꦴ ꦮꦺꦢꦤꦴ – ꦆꦩꦴ ꦮꦸꦕ꧀ꦕꦤ꧀ꦠꦶ, ꦨꦶꦏ꧀ꦑꦮꦺ, ꦖ ꦮꦺꦢꦤꦴ. ꦏꦠꦩꦴ ꦕ, ꦨꦶꦏ꧀ꦑꦮꦺ, ꦄꦛ꧀ꦜꦴꦫꦱ ꦮꦺꦢꦤꦴ? ꦖ ꦱꦺꦴꦩꦤꦱ꧀ꦱꦹꦥꦮꦶꦕꦴꦫꦴ, ꦖ ꦢꦺꦴꦩꦤꦱ꧀ꦱꦹꦥꦮꦶꦕꦴꦫꦴ, ꦖ ꦈꦥꦺꦏ꧀ꦑꦹꦥꦮꦶꦕꦴꦫꦴ – ꦆꦩꦴ ꦮꦸꦕ꧀ꦕꦤ꧀ꦠꦶ, ꦨꦶꦏ꧀ꦑꦮꦺ, ꦄꦛ꧀ꦜꦴꦫꦱ ꦮꦺꦢꦤꦴ. ꦏꦠꦩꦴ ꦕ, ꦨꦶꦏ꧀ꦑꦮꦺ, ꦖꦠ꧀ꦠꦶꦁꦱ ꦮꦺꦢꦤꦴ? ꦖ ꦒꦺꦲꦱꦶꦠꦴꦤꦶ [ꦒꦺꦲꦱ꧀ꦱꦶꦠꦴꦤꦶ (ꦄꦛ꧀ꦜ.)] ꦱꦺꦴꦩꦤꦱ꧀ꦱꦴꦤꦶ, ꦖ ꦤꦺꦏ꧀ꦑꦩ꧀ꦩꦱꦶꦠꦴꦤꦶ [ꦤꦺꦏ꧀ꦑꦩ꧀ꦩꦱ꧀ꦱꦶꦠꦴꦤꦶ (ꦄꦛ꧀ꦜ.)] ꦱꦺꦴꦩꦤꦱ꧀ꦱꦴꦤꦶ, ꦖ ꦒꦺꦲꦱꦶꦠꦴꦤꦶ ꦢꦺꦴꦩꦤꦱ꧀ꦱꦴꦤꦶ, ꦖ ꦤꦺꦏ꧀ꦑꦩ꧀ꦩꦱꦶꦠꦴꦤꦶ ꦢꦺꦴꦩꦤꦱ꧀ꦱꦴꦤꦶ, ꦖ ꦒꦺꦲꦱꦶꦠꦴ ꦈꦥꦺꦏ꧀ꦑꦴ, ꦖ ꦤꦺꦏ꧀ꦑꦩ꧀ꦩꦱꦶꦠꦴ ꦈꦥꦺꦏ꧀ꦑꦴ – ꦆꦩꦴ ꦮꦸꦕ꧀ꦕꦤ꧀ꦠꦶ, ꦨꦶꦏ꧀ꦑꦮꦺ, ꦖꦠ꧀ꦠꦶꦁꦱ ꦮꦺꦢꦤꦴ. ꦏꦠꦩꦚ꧀ꦕ, ꦨꦶꦏ꧀ꦑꦮꦺ, ꦄꦛ꧀ꦜꦱꦠꦁ ꦮꦺꦢꦤꦴ? ꦄꦠꦷꦠꦴ ꦖꦠ꧀ꦠꦶꦁꦱ ꦮꦺꦢꦤꦴ, ꦄꦤꦴꦒꦠꦴ ꦖꦠ꧀ꦠꦶꦁꦱ ꦮꦺꦢꦤꦴ, ꦥꦕ꧀ꦕꦸꦥ꧀ꦥꦤ꧀ꦤꦴ ꦖꦠ꧀ꦠꦶꦁꦱ ꦮꦺꦢꦤꦴ – ꦆꦩꦴ ꦮꦸꦕ꧀ꦕꦤ꧀ꦠꦶ, ꦨꦶꦏ꧀ꦑꦮꦺ, ꦄꦛ꧀ꦜꦱꦠꦁ ꦮꦺꦢꦤꦴ. ꦄꦪꦁ, ꦨꦶꦏ꧀ꦑꦮꦺ, ꦄꦛ꧀ꦜꦱꦠꦥꦫꦶꦪꦴꦪꦺꦴ ꦣꦩ꧀ꦩꦥꦫꦶꦪꦴꦪꦺꦴ’’ꦠꦶ. ꦢꦸꦠꦶꦪꦁ.

꧓. ꦄꦚ꧀ꦚꦠꦫꦨꦶꦏ꧀ꦑꦸꦱꦸꦠ꧀ꦠꦁ

꧒꧗꧑. ꦄꦡ ꦑꦺꦴ ꦄꦚ꧀ꦚꦠꦫꦺꦴ ꦨꦶꦏ꧀ꦑꦸ ꦪꦺꦤ ꦨꦒꦮꦴ ꦠꦺꦤꦸꦥꦱꦔ꧀ꦏꦩꦶ; ꦈꦥꦱꦔ꧀ꦏꦩꦶꦠ꧀ꦮꦴ ꦨꦒꦮꦤ꧀ꦠꦁ ꦄꦨꦶꦮꦴꦢꦺꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦷꦢꦶ. ꦌꦏꦩꦤ꧀ꦠꦁ ꦤꦶꦱꦶꦤ꧀ꦤꦺꦴ ꦑꦺꦴ ꦱꦺꦴ ꦨꦶꦏ꧀ꦑꦸ ꦨꦒꦮꦤ꧀ꦠꦁ ꦌꦠꦢꦮꦺꦴꦕ – ‘‘ꦏꦠꦩꦴ ꦤꦸ ꦑꦺꦴ, ꦨꦤ꧀ꦠꦺ, ꦮꦺꦢꦤꦴ, ꦏꦠꦩꦺꦴ ꦮꦺꦢꦤꦴꦱꦩꦸꦢꦪꦺꦴ, ꦏꦠꦩꦴ ꦮꦺꦢꦤꦴꦱꦩꦸꦢꦪꦒꦴꦩꦶꦤꦷ ꦥꦛꦶꦥꦢꦴ? ꦏꦠꦩꦺꦴ ꦮꦺꦢꦤꦴꦤꦶꦫꦺꦴꦣꦺꦴ, ꦏꦠꦩꦴ ꦮꦺꦢꦤꦴꦤꦶꦫꦺꦴꦣꦒꦴꦩꦶꦤꦷ ꦥꦛꦶꦥꦢꦴ? ꦏꦺꦴ ꦮꦺꦢꦤꦴꦪ ꦄꦱ꧀ꦱꦴꦢꦺꦴ, ꦏꦺꦴ ꦄꦴꦢꦷꦤꦮꦺꦴ, ꦏꦶꦁ ꦤꦶꦱ꧀ꦱꦫꦟ’’ꦤ꧀ꦠꦶ?

‘‘ꦠꦶꦱ꧀ꦱꦺꦴ ꦆꦩꦴ, ꦨꦶꦏ꧀ꦑꦸ, ꦮꦺꦢꦤꦴ – ꦱꦸꦑꦴ ꦮꦺꦢꦤꦴ, ꦢꦸꦏ꧀ꦑꦴ ꦮꦺꦢꦤꦴ, ꦄꦢꦸꦏ꧀ꦑꦩꦱꦸꦑꦴ ꦮꦺꦢꦤꦴ. ꦆꦩꦴ ꦮꦸꦕ꧀ꦕꦤ꧀ꦠꦶ, ꦨꦶꦏ꧀ꦑꦸ, ꦮꦺꦢꦤꦴ. ꦦꦱ꧀ꦱꦱꦩꦸꦢꦪꦴ ꦮꦺꦢꦤꦴꦱꦩꦸꦢꦪꦺꦴ. ꦠꦟ꧀ꦲꦴ ꦮꦺꦢꦤꦴꦱꦩꦸꦢꦪꦒꦴꦩꦶꦤꦷ ꦥꦛꦶꦥꦢꦴ. ꦦꦱ꧀ꦱꦤꦶꦫꦺꦴꦣꦴ ꦮꦺꦢꦤꦴꦤꦶꦫꦺꦴꦣꦺꦴ. ꦄꦪꦩꦺꦮ ꦄꦫꦶꦪꦺꦴ ꦄꦛ꧀ꦜꦔ꧀ꦒꦶꦏꦺꦴ ꦩꦒ꧀ꦒꦺꦴ ꦮꦺꦢꦤꦴꦤꦶꦫꦺꦴꦣꦒꦴꦩꦶꦤꦷ ꦥꦛꦶꦥꦢꦴ, ꦱꦺꦪ꧀ꦪꦡꦶꦢꦁ – ꦱꦩ꧀ꦩꦴꦢꦶꦛ꧀ꦜꦶ…ꦥꦺ… ꦱꦩ꧀ꦩꦴꦱꦩꦴꦣꦶ. ꦪꦁ ꦮꦺꦢꦤꦁ ꦥꦛꦶꦕ꧀ꦕ ꦈꦥ꧀ꦥꦗ꧀ꦗꦠꦶ ꦱꦸꦑꦁ ꦱꦺꦴꦩꦤꦱ꧀ꦱꦁ, ꦄꦪꦁ ꦮꦺꦢꦤꦴꦪ ꦄꦱ꧀ꦱꦴꦢꦺꦴ; ꦪꦴ ꦮꦺꦢꦤꦴ ꦄꦤꦶꦕ꧀ꦕꦴ ꦢꦸꦏ꧀ꦑꦴ ꦮꦶꦥꦫꦶꦟꦴꦩꦣꦩ꧀ꦩꦴ, ꦄꦪꦁ ꦮꦺꦢꦤꦴꦪ ꦄꦴꦢꦷꦤꦮꦺꦴ; ꦪꦺꦴ ꦮꦺꦢꦤꦴꦪ ꦖꦤ꧀ꦢꦫꦴꦒꦮꦶꦤꦪꦺꦴ ꦖꦤ꧀ꦢꦫꦴꦒꦥ꧀ꦥꦲꦴꦤꦁ, ꦆꦢꦁ ꦮꦺꦢꦤꦴꦪ ꦤꦶꦱ꧀ꦱꦫꦟ’’ꦤ꧀ꦠꦶ. ꦠꦠꦶꦪꦁ.

꧔. ꦥꦸꦧ꧀ꦧꦱꦸꦠ꧀ꦠꦁ

꧒꧗꧒. ‘‘ꦥꦸꦧ꧀ꦧꦺꦮ ꦩꦺ, ꦨꦶꦏ꧀ꦑꦮꦺ, ꦱꦩ꧀ꦧꦺꦴꦣꦴ ꦄꦤꦨꦶꦱꦩ꧀ꦧꦸꦢ꧀ꦣꦱ꧀ꦱ ꦧꦺꦴꦣꦶꦱꦠ꧀ꦠꦱ꧀ꦱꦺꦮ ꦱꦠꦺꦴ ꦌꦠꦢꦲꦺꦴꦱꦶ – ‘ꦏꦠꦩꦴ ꦤꦸ ꦑꦺꦴ ꦮꦺꦢꦤꦴ, ꦏꦠꦩꦺꦴ ꦮꦺꦢꦤꦴꦱꦩꦸꦢꦪꦺꦴ, ꦏꦠꦩꦴ ꦮꦺꦢꦤꦴꦱꦩꦸꦢꦪꦒꦴꦩꦶꦤꦷ ꦥꦛꦶꦥꦢꦴ, ꦏꦠꦩꦺꦴ ꦮꦺꦢꦤꦴꦤꦶꦫꦺꦴꦣꦺꦴ, ꦏꦠꦩꦴ ꦮꦺꦢꦤꦴꦤꦶꦫꦺꦴꦣꦒꦴꦩꦶꦤꦷ ꦥꦛꦶꦥꦢꦴ? ꦏꦺꦴ ꦮꦺꦢꦤꦴꦪ ꦄꦱ꧀ꦱꦴꦢꦺꦴ, ꦏꦺꦴ ꦄꦴꦢꦷꦤꦮꦺꦴ, ꦏꦶꦁ ꦤꦶꦱ꧀ꦱꦫꦟ’ꦤ꧀ꦠꦶ? ꦠꦱ꧀ꦱ ꦩꦪ꧀ꦲꦁ, ꦨꦶꦏ꧀ꦑꦮꦺ, ꦌꦠꦢꦲꦺꦴꦱꦶ – ‘ꦠꦶꦱ꧀ꦱꦺꦴ ꦆꦩꦴ ꦮꦺꦢꦤꦴ – ꦱꦸꦑꦴ ꦮꦺꦢꦤꦴ, ꦢꦸꦏ꧀ꦑꦴ ꦮꦺꦢꦤꦴ, ꦄꦢꦸꦏ꧀ꦑꦩꦱꦸꦑꦴ ꦮꦺꦢꦤꦴ. ꦆꦩꦴ ꦮꦸꦕ꧀ꦕꦤ꧀ꦠꦶ ꦮꦺꦢꦤꦴ. ꦦꦱ꧀ꦱꦱꦩꦸꦢꦪꦴ ꦮꦺꦢꦤꦴꦱꦩꦸꦢꦪꦺꦴ. ꦠꦟ꧀ꦲꦴ ꦮꦺꦢꦤꦴꦱꦩꦸꦢꦪꦒꦴꦩꦶꦤꦷ ꦥꦛꦶꦥꦢꦴ…ꦥꦺ… ꦪꦺꦴ ꦮꦺꦢꦤꦴꦪ ꦖꦤ꧀ꦢꦫꦴꦒꦮꦶꦤꦪꦺꦴ ꦖꦤ꧀ꦢꦫꦴꦒꦥ꧀ꦥꦲꦴꦤꦁ. ꦆꦢꦁ ꦮꦺꦢꦤꦴꦪ ꦤꦶꦱ꧀ꦱꦫꦟ’’’ꦤ꧀ꦠꦶ. ꦕꦠꦸꦠ꧀ꦡꦁ.

꧕. ꦚꦴꦟꦱꦸꦠ꧀ꦠꦁ

꧒꧗꧓. ‘‘‘ꦆꦩꦴ ꦮꦺꦢꦤꦴ’ꦠꦶ ꦩꦺ, ꦨꦶꦏ꧀ꦑꦮꦺ, ꦥꦸꦧ꧀ꦧꦺ ꦄꦤꦤꦸꦱ꧀ꦱꦸꦠꦺꦱꦸ ꦣꦩ꧀ꦩꦺꦱꦸ ꦕꦏ꧀ꦑꦸꦁ ꦈꦢꦥꦴꦢꦶ, ꦚꦴꦟꦁ ꦈꦢꦥꦴꦢꦶ, ꦥꦚ꧀ꦚꦴ ꦈꦢꦥꦴꦢꦶ, ꦮꦶꦗ꧀ꦗꦴ ꦈꦢꦥꦴꦢꦶ, ꦄꦴꦭꦺꦴꦏꦺꦴ ꦈꦢꦥꦴꦢꦶ. ‘ꦄꦪꦁ ꦮꦺꦢꦤꦴꦱꦩꦸꦢꦪꦺꦴ’ꦠꦶ ꦩꦺ, ꦨꦶꦏ꧀ꦑꦮꦺ, ꦥꦸꦧ꧀ꦧꦺ ꦄꦤꦤꦸꦱ꧀ꦱꦸꦠꦺꦱꦸ ꦣꦩ꧀ꦩꦺꦱꦸ ꦕꦏ꧀ꦑꦸꦁ ꦈꦢꦥꦴꦢꦶ…ꦥꦺ… ꦄꦴꦭꦺꦴꦏꦺꦴ ꦈꦢꦥꦴꦢꦶ. ‘ꦄꦪꦁ ꦮꦺꦢꦤꦴꦱꦩꦸꦢꦪꦒꦴꦩꦶꦤꦷ ꦥꦛꦶꦥꦢꦴ’ꦠꦶ ꦩꦺ, ꦨꦶꦏ꧀ꦑꦮꦺ, ꦥꦸꦧ꧀ꦧꦺ ꦄꦤꦤꦸꦱ꧀ꦱꦸꦠꦺꦱꦸ ꦣꦩ꧀ꦩꦺꦱꦸ ꦕꦏ꧀ꦑꦸꦁ ꦈꦢꦥꦴꦢꦶ…ꦥꦺ… ‘ꦄꦪꦁ ꦮꦺꦢꦤꦴꦤꦶꦫꦺꦴꦣꦺꦴ’ꦠꦶ ꦩꦺ, ꦨꦶꦏ꧀ꦑꦮꦺ, ꦥꦸꦧ꧀ꦧꦺ ꦄꦤꦤꦸꦱ꧀ꦱꦸꦠꦺꦱꦸ ꦣꦩ꧀ꦩꦺꦱꦸ ꦕꦏ꧀ꦑꦸꦁ ꦈꦢꦥꦴꦢꦶ …ꦥꦺ… ‘ꦄꦪꦁ ꦮꦺꦢꦤꦴꦤꦶꦫꦺꦴꦣꦒꦴꦩꦶꦤꦷ ꦥꦛꦶꦥꦢꦴ’ꦠꦶ ꦩꦺ, ꦨꦶꦏ꧀ꦑꦮꦺ, ꦥꦸꦧ꧀ꦧꦺ ꦄꦤꦤꦸꦱ꧀ꦱꦸꦠꦺꦱꦸ ꦣꦩ꧀ꦩꦺꦱꦸ ꦕꦏ꧀ꦑꦸꦁ ꦈꦢꦥꦴꦢꦶ…ꦥꦺ… ‘ꦄꦪꦁ ꦮꦺꦢꦤꦴꦪ ꦄꦱ꧀ꦱꦴꦢꦺꦴ’ꦠꦶ ꦩꦺ, ꦨꦶꦏ꧀ꦑꦮꦺ, ꦥꦸꦧ꧀ꦧꦺ ꦄꦤꦤꦸꦱ꧀ꦱꦸꦠꦺꦱꦸ ꦣꦩ꧀ꦩꦺꦱꦸ…ꦥꦺ… ‘ꦄꦪꦁ ꦮꦺꦢꦤꦴꦪ ꦄꦴꦢꦷꦤꦮꦺꦴ’ꦠꦶ ꦩꦺ, ꦨꦶꦏ꧀ꦑꦮꦺ, ꦥꦸꦧ꧀ꦧꦺ ꦄꦤꦤꦸꦱ꧀ꦱꦸꦠꦺꦱꦸ ꦣꦩ꧀ꦩꦺꦱꦸ…ꦥꦺ… ‘ꦆꦢꦁ ꦑꦺꦴ ꦤꦶꦱ꧀ꦱꦫꦟ’ꦤ꧀ꦠꦶ ꦩꦺ, ꦨꦶꦏ꧀ꦑꦮꦺ, ꦥꦸꦧ꧀ꦧꦺ ꦄꦤꦤꦸꦱ꧀ꦱꦸꦠꦺꦱꦸ ꦣꦩ꧀ꦩꦺꦱꦸ ꦕꦏ꧀ꦑꦸꦁ ꦈꦢꦥꦴꦢꦶ, ꦚꦴꦟꦁ ꦈꦢꦥꦴꦢꦶ, ꦥꦚ꧀ꦚꦴ ꦈꦢꦥꦴꦢꦶ, ꦮꦶꦗ꧀ꦗꦴ ꦈꦢꦥꦴꦢꦶ, ꦄꦴꦭꦺꦴꦏꦺꦴ ꦈꦢꦥꦴꦢꦷ’’ꦠꦶ. ꦥꦚ꧀ꦕꦩꦁ.

꧖. ꦱꦩ꧀ꦧꦲꦸꦭꦨꦶꦏ꧀ꦑꦸꦱꦸꦠ꧀ꦠꦁ

꧒꧗꧔. ꦄꦡ ꦑꦺꦴ ꦱꦩ꧀ꦧꦲꦸꦭꦴ ꦨꦶꦏ꧀ꦑꦹ ꦪꦺꦤ ꦨꦒꦮꦴ ꦠꦺꦤꦸꦥꦱꦔ꧀ꦏꦩꦶꦁꦱꦸ; ꦈꦥꦱꦔ꧀ꦏꦩꦶꦠ꧀ꦮꦴ…ꦥꦺ… ꦌꦏꦩꦤ꧀ꦠꦁ ꦤꦶꦱꦶꦤ꧀ꦤꦴ ꦑꦺꦴ ꦠꦺ ꦨꦶꦏ꧀ꦑꦹ ꦨꦒꦮꦤ꧀ꦠꦁ ꦌꦠꦢꦮꦺꦴꦕꦸꦁ – ‘‘ꦏꦠꦩꦴ ꦤꦸ ꦑꦺꦴ, ꦨꦤ꧀ꦠꦺ, ꦮꦺꦢꦤꦴ, ꦏꦠꦩꦺꦴ ꦮꦺꦢꦤꦴꦱꦩꦸꦢꦪꦺꦴ, ꦏꦠꦩꦴ ꦮꦺꦢꦤꦴꦱꦩꦸꦢꦪꦒꦴꦩꦶꦤꦷ ꦥꦛꦶꦥꦢꦴ? ꦏꦠꦩꦺꦴ ꦮꦺꦢꦤꦴꦤꦶꦫꦺꦴꦣꦺꦴ, ꦏꦠꦩꦴ ꦮꦺꦢꦤꦴꦤꦶꦫꦺꦴꦣꦒꦴꦩꦶꦤꦷ ꦥꦛꦶꦥꦢꦴ? ꦏꦺꦴ ꦮꦺꦢꦤꦴꦪ ꦄꦱ꧀ꦱꦴꦢꦺꦴ, ꦏꦺꦴ ꦄꦴꦢꦷꦤꦮꦺꦴ, ꦏꦶꦁ ꦤꦶꦱ꧀ꦱꦫꦟ’’ꦤ꧀ꦠꦶ? ‘‘ꦠꦶꦱ꧀ꦱꦺꦴ ꦆꦩꦴ, ꦨꦶꦏ꧀ꦑꦮꦺ, ꦮꦺꦢꦤꦴ – ꦱꦸꦑꦴ ꦮꦺꦢꦤꦴ, ꦢꦸꦏ꧀ꦑꦴ ꦮꦺꦢꦤꦴ, ꦄꦢꦸꦏ꧀ꦑꦩꦱꦸꦑꦴ ꦮꦺꦢꦤꦴ. ꦆꦩꦴ ꦮꦸꦕ꧀ꦕꦤ꧀ꦠꦶ, ꦨꦶꦏ꧀ꦑꦮꦺ, ꦮꦺꦢꦤꦴ. ꦦꦱ꧀ꦱꦱꦩꦸꦢꦪꦴ ꦮꦺꦢꦤꦴꦱꦩꦸꦢꦪꦺꦴ. ꦠꦟ꧀ꦲꦴ ꦮꦺꦢꦤꦴꦱꦩꦸꦢꦪꦒꦴꦩꦶꦤꦷ ꦥꦛꦶꦥꦢꦴ. ꦦꦱ꧀ꦱꦤꦶꦫꦺꦴꦣꦴ…ꦥꦺ… ꦪꦺꦴ ꦮꦺꦢꦤꦴꦪ ꦖꦤ꧀ꦢꦫꦴꦒꦮꦶꦤꦪꦺꦴ ꦖꦤ꧀ꦢꦫꦴꦒꦥ꧀ꦥꦲꦴꦤꦁ. ꦆꦢꦁ ꦮꦺꦢꦤꦴꦪ ꦤꦶꦱ꧀ꦱꦫꦟ’’ꦤ꧀ꦠꦶ. ꦖꦛ꧀ꦜꦁ.

꧗. ꦥꦜꦩꦱꦩꦟꦧ꧀ꦫꦴꦲ꧀ꦩꦟꦱꦸꦠ꧀ꦠꦁ

꧒꧗꧕. ‘‘ꦠꦶꦱ꧀ꦱꦺꦴ ꦆꦩꦴ, ꦨꦶꦏ꧀ꦑꦮꦺ, ꦮꦺꦢꦤꦴ. ꦏꦠꦩꦴ ꦠꦶꦱ꧀ꦱꦺꦴ? ꦱꦸꦑꦴ ꦮꦺꦢꦤꦴ, ꦢꦸꦏ꧀ꦑꦴ ꦮꦺꦢꦤꦴ, ꦄꦢꦸꦏ꧀ꦑꦩꦱꦸꦑꦴ ꦮꦺꦢꦤꦴ. ꦪꦺ ꦲꦶ ꦏꦺꦕꦶ, ꦨꦶꦏ꧀ꦑꦮꦺ, ꦱꦩꦟꦴ ꦮꦴ ꦧ꧀ꦫꦴꦲ꧀ꦩꦟꦴ ꦮꦴ ꦆꦩꦴꦱꦁ ꦠꦶꦱ꧀ꦱꦤ꧀ꦤꦁ ꦮꦺꦢꦤꦴꦤꦁ ꦱꦩꦸꦢꦪꦚ꧀ꦕ ꦄꦠ꧀ꦡꦔ꧀ꦒꦩꦚ꧀ꦕ ꦄꦱ꧀ꦱꦴꦢꦚ꧀ꦕ ꦄꦴꦢꦷꦤꦮꦚ꧀ꦕ ꦤꦶꦱ꧀ꦱꦫꦟꦚ꧀ꦕ ꦪꦡꦴꦨꦹꦠꦁ ꦤꦥ꧀ꦥꦗꦴꦤꦤ꧀ꦠꦶ. ꦤ ꦩꦺ ꦠꦺ, ꦨꦶꦏ꧀ꦑꦮꦺ, ꦱꦩꦟꦴ ꦮꦴ ꦧ꧀ꦫꦴꦲ꧀ꦩꦟꦴ ꦮꦴ ꦱꦩꦟꦺꦱꦸ ꦮꦴ ꦱꦩꦟꦱꦩ꧀ꦩꦠꦴ ꦧ꧀ꦫꦴꦲ꧀ꦩꦟꦺꦱꦸ ꦮꦴ ꦧ꧀ꦫꦴꦲ꧀ꦩꦟꦱꦩ꧀ꦩꦠꦴ, ꦤ ꦕ ꦥꦤ ꦠꦺ ꦄꦴꦪꦱ꧀ꦩꦤ꧀ꦠꦺꦴ ꦱꦴꦩꦚ꧀ꦚꦠ꧀ꦡꦁ ꦮꦴ ꦧ꧀ꦫꦲ꧀ꦩꦚ꧀ꦚꦠ꧀ꦡꦁ ꦮꦴ ꦢꦶꦛ꧀ꦜꦺꦮ ꦣꦩ꧀ꦩꦺ ꦱꦪꦁ ꦄꦨꦶꦚ꧀ꦚꦴ ꦱꦕ꧀ꦖꦶꦏꦠ꧀ꦮꦴ ꦈꦥꦱꦩ꧀ꦥꦗ꧀ꦗ ꦮꦶꦲꦫꦤ꧀ꦠꦶ. ꦪꦺ ꦕ ꦑꦺꦴ ꦏꦺꦕꦶ, ꦨꦶꦏ꧀ꦑꦮꦺ, ꦱꦩꦟꦴ ꦮꦴ ꦧ꧀ꦫꦴꦲ꧀ꦩꦟꦴ ꦮꦴ ꦆꦩꦴꦱꦁ ꦠꦶꦱ꧀ꦱꦤ꧀ꦤꦁ ꦮꦺꦢꦤꦴꦤꦁ ꦱꦩꦸꦢꦪꦚ꧀ꦕ ꦄꦠ꧀ꦡꦔ꧀ꦒꦩꦚ꧀ꦕ ꦄꦱ꧀ꦱꦴꦢꦚ꧀ꦕ ꦄꦴꦢꦷꦤꦮꦁ ꦕ ꦤꦶꦱ꧀ꦱꦫꦟꦚ꧀ꦕ ꦪꦡꦴꦨꦹꦠꦁ ꦥꦗꦴꦤꦤ꧀ꦠꦶ. ꦠꦺ ꦑꦺꦴ ꦩꦺ, ꦨꦶꦏ꧀ꦑꦮꦺ, ꦱꦩꦟꦴ ꦮꦴ ꦧ꧀ꦫꦴꦲ꧀ꦩꦟꦴ ꦮꦴ ꦱꦩꦟꦺꦱꦸ ꦕꦺꦮ ꦱꦩꦟꦱꦩ꧀ꦩꦠꦴ ꦧ꧀ꦫꦴꦲ꧀ꦩꦟꦺꦱꦸ ꦕ ꦧ꧀ꦫꦴꦲ꧀ꦩꦟꦱꦩ꧀ꦩꦠꦴ. ꦠꦺ ꦕ ꦥꦤꦴꦪꦱ꧀ꦩꦤ꧀ꦠꦺꦴ ꦱꦴꦩꦚ꧀ꦚꦠ꧀ꦡꦚ꧀ꦕ ꦧ꧀ꦫꦲ꧀ꦩꦚ꧀ꦚꦠ꧀ꦡꦚ꧀ꦕ, ꦢꦶꦛ꧀ꦜꦺꦮ ꦣꦩ꧀ꦩꦺ ꦱꦪꦁ ꦄꦨꦶꦚ꧀ꦚꦴ ꦱꦕ꧀ꦖꦶꦏꦠ꧀ꦮꦴ ꦈꦥꦱꦩ꧀ꦥꦗ꧀ꦗ ꦮꦶꦲꦫꦤ꧀ꦠꦷ’’ꦠꦶ. ꦱꦠ꧀ꦠꦩꦁ.

꧘. ꦢꦸꦠꦶꦪꦱꦩꦟꦧ꧀ꦫꦴꦲ꧀ꦩꦟꦱꦸꦠ꧀ꦠꦁ

꧒꧗꧖. ‘‘ꦠꦶꦱ꧀ꦱꦺꦴ ꦆꦩꦴ, ꦨꦶꦏ꧀ꦑꦮꦺ, ꦮꦺꦢꦤꦴ. ꦏꦠꦩꦴ ꦠꦶꦱ꧀ꦱꦺꦴ? ꦱꦸꦑꦴ ꦮꦺꦢꦤꦴ, ꦢꦸꦏ꧀ꦑꦴ ꦮꦺꦢꦤꦴ, ꦄꦢꦸꦏ꧀ꦑꦩꦱꦸꦑꦴ ꦮꦺꦢꦤꦴ. ꦪꦺ ꦲꦶ ꦏꦺꦕꦶ, ꦨꦶꦏ꧀ꦑꦮꦺ, ꦱꦩꦟꦴ ꦮꦴ ꦧ꧀ꦫꦴꦲ꧀ꦩꦟꦴ ꦮꦴ ꦆꦩꦴꦱꦁ ꦠꦶꦱ꧀ꦱꦤ꧀ꦤꦁ ꦮꦺꦢꦤꦴꦤꦁ ꦱꦩꦸꦢꦪꦚ꧀ꦕ ꦄꦠ꧀ꦡꦔ꧀ꦒꦩꦚ꧀ꦕ ꦄꦱ꧀ꦱꦴꦢꦚ꧀ꦕ ꦄꦴꦢꦷꦤꦮꦚ꧀ꦕ ꦤꦶꦱ꧀ꦱꦫꦟꦚ꧀ꦕ ꦪꦡꦴꦨꦹꦠꦁ ꦤꦥ꧀ꦥꦗꦴꦤꦤ꧀ꦠꦶ…ꦥꦺ… ꦥꦗꦴꦤꦤ꧀ꦠꦶ…ꦥꦺ… ꦱꦪꦁ ꦄꦨꦶꦚ꧀ꦚꦴ ꦱꦕ꧀ꦖꦶꦏꦠ꧀ꦮꦴ ꦈꦥꦱꦩ꧀ꦥꦗ꧀ꦗ ꦮꦶꦲꦫꦤ꧀ꦠꦷ’’ꦠꦶ. ꦄꦛ꧀ꦜꦩꦁ.

꧙. ꦠꦠꦶꦪꦱꦩꦟꦧ꧀ꦫꦴꦲ꧀ꦩꦟꦱꦸꦠ꧀ꦠꦁ

꧒꧗꧗. ‘‘ꦪꦺ ꦲꦶ ꦏꦺꦕꦶ, ꦨꦶꦏ꧀ꦑꦮꦺ, ꦱꦩꦟꦴ ꦮꦴ ꦧ꧀ꦫꦴꦲ꧀ꦩꦟꦴ ꦮꦴ ꦮꦺꦢꦤꦁ ꦤꦥ꧀ꦥꦗꦴꦤꦤ꧀ꦠꦶ, ꦮꦺꦢꦤꦴꦱꦩꦸꦢꦪꦁ ꦤꦥ꧀ꦥꦗꦴꦤꦤ꧀ꦠꦶ, ꦮꦺꦢꦤꦴꦤꦶꦫꦺꦴꦣꦁ ꦤꦥ꧀ꦥꦗꦴꦤꦤ꧀ꦠꦶ, ꦮꦺꦢꦤꦴꦤꦶꦫꦺꦴꦣꦒꦴꦩꦶꦤꦶꦁ ꦥꦛꦶꦥꦢꦁ ꦤꦥ꧀ꦥꦗꦴꦤꦤ꧀ꦠꦶ…ꦥꦺ… ꦥꦗꦴꦤꦤ꧀ꦠꦶ…ꦥꦺ… ꦱꦪꦁ ꦄꦨꦶꦚ꧀ꦚꦴ ꦱꦕ꧀ꦖꦶꦏꦠ꧀ꦮꦴ ꦈꦥꦱꦩ꧀ꦥꦗ꧀ꦗ ꦮꦶꦲꦫꦤ꧀ꦠꦷ’’ꦠꦶ. ꦤꦮꦩꦁ.

꧑꧐. ꦱꦸꦢ꧀ꦣꦶꦏꦱꦸꦠ꧀ꦠꦁ

꧒꧗꧘. ‘‘ꦠꦶꦱ꧀ꦱꦺꦴ ꦆꦩꦴ, ꦨꦶꦏ꧀ꦑꦮꦺ, ꦮꦺꦢꦤꦴ. ꦏꦠꦩꦴ ꦠꦶꦱ꧀ꦱꦺꦴ? ꦱꦸꦑꦴ ꦮꦺꦢꦤꦴ, ꦢꦸꦏ꧀ꦑꦴ ꦮꦺꦢꦤꦴ, ꦄꦢꦸꦏ꧀ꦑꦩꦱꦸꦑꦴ ꦮꦺꦢꦤꦴ – ꦆꦩꦴ ꦑꦺꦴ, ꦨꦶꦏ꧀ꦑꦮꦺ, ꦠꦶꦱ꧀ꦱꦺꦴ ꦮꦺꦢꦤꦴ’’ꦠꦶ. ꦢꦱꦩꦁ.

꧑꧑. ꦤꦶꦫꦴꦩꦶꦱꦱꦸꦠ꧀ꦠꦁ

꧒꧗꧙. ‘‘ꦄꦠ꧀ꦡꦶ, ꦨꦶꦏ꧀ꦑꦮꦺ, ꦱꦴꦩꦶꦱꦴ ꦥꦷꦠꦶ, ꦄꦠ꧀ꦡꦶ ꦤꦶꦫꦴꦩꦶꦱꦴ ꦥꦷꦠꦶ, ꦄꦠ꧀ꦡꦶ ꦤꦶꦫꦴꦩꦶꦱꦴ ꦤꦶꦫꦴꦩꦶꦱꦠꦫꦴ ꦥꦷꦠꦶ; ꦄꦠ꧀ꦡꦶ ꦱꦴꦩꦶꦱꦁ ꦱꦸꦑꦁ, ꦄꦠ꧀ꦡꦶ ꦤꦶꦫꦴꦩꦶꦱꦁ ꦱꦸꦑꦁ, ꦄꦠ꧀ꦡꦶ ꦤꦶꦫꦴꦩꦶꦱꦴ ꦤꦶꦫꦴꦩꦶꦱꦠꦫꦁ ꦱꦸꦑꦁ; ꦄꦠ꧀ꦡꦶ ꦱꦴꦩꦶꦱꦴ ꦈꦥꦺꦏ꧀ꦑꦴ, ꦄꦠ꧀ꦡꦶ ꦤꦶꦫꦴꦩꦶꦱꦴ ꦈꦥꦺꦏ꧀ꦑꦴ, ꦄꦠ꧀ꦡꦶ ꦤꦶꦫꦴꦩꦶꦱꦴ ꦤꦶꦫꦴꦩꦶꦱꦠꦫꦴ ꦈꦥꦺꦏ꧀ꦑꦴ; ꦄꦠ꧀ꦡꦶ ꦱꦴꦩꦶꦱꦺꦴ ꦮꦶꦩꦺꦴꦏ꧀ꦑꦺꦴ, ꦄꦠ꧀ꦡꦶ ꦤꦶꦫꦴꦩꦶꦱꦺꦴ ꦮꦶꦩꦺꦴꦏ꧀ꦑꦺꦴ, ꦄꦠ꧀ꦡꦶ ꦤꦶꦫꦴꦩꦶꦱꦴ ꦤꦶꦫꦴꦩꦶꦱꦠꦫꦺꦴ ꦮꦶꦩꦺꦴꦏ꧀ꦑꦺꦴ. ꦏꦠꦩꦴ ꦕ, ꦨꦶꦏ꧀ꦑꦮꦺ, ꦱꦴꦩꦶꦱꦴ ꦥꦷꦠꦶ? ꦥꦚ꧀ꦕꦶꦩꦺ, ꦨꦶꦏ꧀ꦑꦮꦺ, ꦏꦴꦩꦒꦸꦟꦴ. ꦏꦠꦩꦺ ꦥꦚ꧀ꦕ? ꦕꦏ꧀ꦑꦸꦮꦶꦚ꧀ꦚꦺꦪ꧀ꦪꦴ ꦫꦹꦥꦴ ꦆꦛ꧀ꦜꦴ ꦏꦤ꧀ꦠꦴ ꦩꦤꦴꦥꦴ ꦥꦶꦪꦫꦹꦥꦴ ꦏꦴꦩꦹꦥꦱꦁꦲꦶꦠꦴ ꦫꦗꦤꦷꦪꦴ…ꦥꦺ… ꦏꦴꦪꦮꦶꦚ꧀ꦚꦺꦪ꧀ꦪꦴ ꦦꦺꦴꦛ꧀ꦜꦧ꧀ꦧꦴ ꦆꦛ꧀ꦜꦴ ꦏꦤ꧀ꦠꦴ ꦩꦤꦴꦥꦴ ꦥꦶꦪꦫꦹꦥꦴ ꦏꦴꦩꦹꦥꦱꦁꦲꦶꦠꦴ ꦫꦗꦤꦷꦪꦴ. ꦆꦩꦺ ꦑꦺꦴ, ꦨꦶꦏ꧀ꦑꦮꦺ, ꦥꦚ꧀ꦕ ꦏꦴꦩꦒꦸꦟꦴ. ꦪꦴ ꦑꦺꦴ, ꦨꦶꦏ꧀ꦑꦮꦺ, ꦆꦩꦺ ꦥꦚ꧀ꦕ ꦏꦴꦩꦒꦸꦟꦺ ꦥꦛꦶꦕ꧀ꦕ ꦈꦥ꧀ꦥꦗ꧀ꦗꦠꦶ ꦥꦷꦠꦶ, ꦄꦪꦁ ꦮꦸꦕ꧀ꦕꦠꦶ, ꦨꦶꦏ꧀ꦑꦮꦺ, ꦱꦴꦩꦶꦱꦴ ꦥꦷꦠꦶ.

‘‘ꦏꦠꦩꦴ ꦕ, ꦨꦶꦏ꧀ꦑꦮꦺ, ꦤꦶꦫꦴꦩꦶꦱꦴ ꦥꦷꦠꦶ? ꦆꦣ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦮꦶꦮꦶꦕ꧀ꦕꦺꦮ ꦏꦴꦩꦺꦲꦶ ꦮꦶꦮꦶꦕ꧀ꦕ ꦄꦏꦸꦱꦭꦺꦲꦶ ꦣꦩ꧀ꦩꦺꦲꦶ ꦱꦮꦶꦠꦏ꧀ꦏꦁ ꦱꦮꦶꦕꦴꦫꦁ ꦮꦶꦮꦺꦏꦗꦁ ꦥꦷꦠꦶꦱꦸꦑꦁ ꦥꦜꦩꦁ ꦙꦴꦤꦁ ꦈꦥꦱꦩ꧀ꦥꦗ꧀ꦗ ꦮꦶꦲꦫꦠꦶ. ꦮꦶꦠꦏ꧀ꦏꦮꦶꦕꦴꦫꦴꦤꦁ ꦮꦹꦥꦱꦩꦴ ꦄꦗ꧀ꦙꦠ꧀ꦠꦁ ꦱꦩ꧀ꦥꦱꦴꦢꦤꦁ ꦕꦺꦠꦱꦺꦴ ꦌꦏꦺꦴꦢꦶꦨꦴꦮꦁ ꦄꦮꦶꦠꦏ꧀ꦏꦁ ꦄꦮꦶꦕꦴꦫꦁ ꦱꦩꦴꦣꦶꦗꦁ ꦥꦷꦠꦶꦱꦸꦑꦁ ꦢꦸꦠꦶꦪꦁ ꦙꦴꦤꦁ ꦈꦥꦱꦩ꧀ꦥꦗ꧀ꦗ ꦮꦶꦲꦫꦠꦶ. ꦄꦪꦁ ꦮꦸꦕ꧀ꦕꦠꦶ, ꦨꦶꦏ꧀ꦑꦮꦺ, ꦤꦶꦫꦴꦩꦶꦱꦴ ꦥꦷꦠꦶ.

‘‘ꦏꦠꦩꦴ ꦕ, ꦨꦶꦏ꧀ꦑꦮꦺ, ꦤꦶꦫꦴꦩꦶꦱꦴ ꦤꦶꦫꦴꦩꦶꦱꦠꦫꦴ ꦥꦷꦠꦶ? ꦪꦴ ꦑꦺꦴ, ꦨꦶꦏ꧀ꦑꦮꦺ, ꦑꦷꦟꦴꦱꦮꦱ꧀ꦱ ꦨꦶꦏ꧀ꦑꦸꦤꦺꦴ ꦫꦴꦒꦴ ꦕꦶꦠ꧀ꦠꦁ ꦮꦶꦩꦸꦠ꧀ꦠꦁ ꦥꦕ꧀ꦕꦮꦺꦏ꧀ꦑꦠꦺꦴ, ꦢꦺꦴꦱꦴ ꦕꦶꦠ꧀ꦠꦁ ꦮꦶꦩꦸꦠ꧀ꦠꦁ ꦥꦕ꧀ꦕꦮꦺꦏ꧀ꦑꦠꦺꦴ, ꦩꦺꦴꦲꦴ ꦕꦶꦠ꧀ꦠꦁ ꦮꦶꦩꦸꦠ꧀ꦠꦁ ꦥꦕ꧀ꦕꦮꦺꦏ꧀ꦑꦠꦺꦴ ꦈꦥ꧀ꦥꦗ꧀ꦗꦠꦶ ꦥꦷꦠꦶ, ꦄꦪꦁ ꦮꦸꦕ꧀ꦕꦠꦶ, ꦨꦶꦏ꧀ꦑꦮꦺ, ꦤꦶꦫꦴꦩꦶꦱꦴ ꦤꦶꦫꦴꦩꦶꦱꦠꦫꦴ ꦥꦷꦠꦶ.

‘‘ꦏꦠꦩꦚ꧀ꦕ, ꦨꦶꦏ꧀ꦑꦮꦺ, ꦱꦴꦩꦶꦱꦁ ꦱꦸꦑꦁ? ꦥꦚ꧀ꦕꦶꦩꦺ, ꦨꦶꦏ꧀ꦑꦮꦺ, ꦏꦴꦩꦒꦸꦟꦴ. ꦏꦠꦩꦺ ꦥꦚ꧀ꦕ? ꦕꦏ꧀ꦑꦸꦮꦶꦚ꧀ꦚꦺꦪ꧀ꦪꦴ ꦫꦹꦥꦴ ꦆꦛ꧀ꦜꦴ ꦏꦤ꧀ꦠꦴ ꦩꦤꦴꦥꦴ ꦥꦶꦪꦫꦹꦥꦴ ꦏꦴꦩꦹꦥꦱꦁꦲꦶꦠꦴ ꦫꦗꦤꦷꦪꦴ…ꦥꦺ… ꦏꦴꦪꦮꦶꦚ꧀ꦚꦺꦪ꧀ꦪꦴ ꦦꦺꦴꦛ꧀ꦜꦧ꧀ꦧꦴ ꦆꦛ꧀ꦜꦴ ꦏꦤ꧀ꦠꦴ ꦩꦤꦴꦥꦴ ꦥꦶꦪꦫꦹꦥꦴ ꦏꦴꦩꦹꦥꦱꦁꦲꦶꦠꦴ ꦫꦗꦤꦷꦪꦴ. ꦆꦩꦺ ꦑꦺꦴ, ꦨꦶꦏ꧀ꦑꦮꦺ, ꦥꦚ꧀ꦕ ꦏꦴꦩꦒꦸꦟꦴ. ꦪꦁ ꦑꦺꦴ, ꦨꦶꦏ꧀ꦑꦮꦺ, ꦆꦩꦺ ꦥꦚ꧀ꦕ ꦏꦴꦩꦒꦸꦟꦺ ꦥꦛꦶꦕ꧀ꦕ ꦈꦥ꧀ꦥꦗ꧀ꦗꦠꦶ ꦱꦸꦑꦁ ꦱꦺꦴꦩꦤꦱ꧀ꦱꦁ, ꦆꦢꦁ ꦮꦸꦕ꧀ꦕꦠꦶ, ꦨꦶꦏ꧀ꦑꦮꦺ, ꦱꦴꦩꦶꦱꦁ ꦱꦸꦑꦁ.

‘‘ꦏꦠꦩꦚ꧀ꦕ, ꦨꦶꦏ꧀ꦑꦮꦺ, ꦤꦶꦫꦴꦩꦶꦱꦁ ꦱꦸꦑꦁ? ꦆꦣ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦮꦶꦮꦶꦕ꧀ꦕꦺꦮ ꦏꦴꦩꦺꦲꦶ ꦮꦶꦮꦶꦕ꧀ꦕ ꦄꦏꦸꦱꦭꦺꦲꦶ ꦣꦩ꧀ꦩꦺꦲꦶ ꦱꦮꦶꦠꦏ꧀ꦏꦁ ꦱꦮꦶꦕꦴꦫꦁ ꦮꦶꦮꦺꦏꦗꦁ ꦥꦷꦠꦶꦱꦸꦑꦁ ꦥꦜꦩꦁ ꦙꦴꦤꦁ ꦈꦥꦱꦩ꧀ꦥꦗ꧀ꦗ ꦮꦶꦲꦫꦠꦶ. ꦮꦶꦠꦏ꧀ꦏꦮꦶꦕꦴꦫꦴꦤꦁ ꦮꦹꦥꦱꦩꦴ ꦄꦗ꧀ꦙꦠ꧀ꦠꦁ ꦱꦩ꧀ꦥꦱꦴꦢꦤꦁ ꦕꦺꦠꦱꦺꦴ ꦌꦏꦺꦴꦢꦶꦨꦴꦮꦁ ꦄꦮꦶꦠꦏ꧀ꦏꦁ ꦄꦮꦶꦕꦴꦫꦁ ꦱꦩꦴꦣꦶꦗꦁ ꦥꦷꦠꦶꦱꦸꦑꦁ ꦢꦸꦠꦶꦪꦁ ꦙꦴꦤꦁ ꦈꦥꦱꦩ꧀ꦥꦗ꧀ꦗ ꦮꦶꦲꦫꦠꦶ. ꦥꦷꦠꦶꦪꦴ ꦕ ꦮꦶꦫꦴꦒꦴ ꦈꦥꦺꦏ꧀ꦑꦏꦺꦴ ꦕ ꦮꦶꦲꦫꦠꦶ ꦱꦠꦺꦴ ꦕ ꦱꦩ꧀ꦥꦗꦴꦤꦺꦴ ꦱꦸꦑꦚ꧀ꦕ ꦏꦴꦪꦺꦤ ꦥꦛꦶꦱꦁꦮꦺꦢꦺꦠꦶ, ꦪꦁ ꦠꦁ ꦄꦫꦶꦪꦴ ꦄꦴꦕꦶꦏ꧀ꦑꦤ꧀ꦠꦶ – ‘ꦈꦥꦺꦏ꧀ꦑꦏꦺꦴ ꦱꦠꦶꦩꦴ ꦱꦸꦑꦮꦶꦲꦴꦫꦷ’ꦠꦶ ꦠꦠꦶꦪꦁ ꦙꦴꦤꦁ ꦈꦥꦱꦩ꧀ꦥꦗ꧀ꦗ ꦮꦶꦲꦫꦠꦶ. ꦆꦢꦁ ꦮꦸꦕ꧀ꦕꦠꦶ, ꦨꦶꦏ꧀ꦑꦮꦺ, ꦤꦶꦫꦴꦩꦶꦱꦁ ꦱꦸꦑꦁ.

‘‘ꦏꦠꦩꦚ꧀ꦕ, ꦨꦶꦏ꧀ꦑꦮꦺ, ꦤꦶꦫꦴꦩꦶꦱꦴ ꦤꦶꦫꦴꦩꦶꦱꦠꦫꦁ ꦱꦸꦑꦁ? ꦪꦁ ꦑꦺꦴ, ꦨꦶꦏ꧀ꦑꦮꦺ, ꦑꦷꦟꦴꦱꦮꦱ꧀ꦱ ꦨꦶꦏ꧀ꦑꦸꦤꦺꦴ ꦫꦴꦒꦴ ꦕꦶꦠ꧀ꦠꦁ ꦮꦶꦩꦸꦠ꧀ꦠꦁ ꦥꦕ꧀ꦕꦮꦺꦏ꧀ꦑꦠꦺꦴ, ꦢꦺꦴꦱꦴ ꦕꦶꦠ꧀ꦠꦁ ꦮꦶꦩꦸꦠ꧀ꦠꦁ ꦥꦕ꧀ꦕꦮꦺꦏ꧀ꦑꦠꦺꦴ, ꦩꦺꦴꦲꦴ ꦕꦶꦠ꧀ꦠꦁ ꦮꦶꦩꦸꦠ꧀ꦠꦁ ꦥꦕ꧀ꦕꦮꦺꦏ꧀ꦑꦠꦺꦴ ꦈꦥ꧀ꦥꦗ꧀ꦗꦠꦶ ꦱꦸꦑꦁ ꦱꦺꦴꦩꦤꦱ꧀ꦱꦁ, ꦆꦢꦁ ꦮꦸꦕ꧀ꦕꦠꦶ, ꦨꦶꦏ꧀ꦑꦮꦺ, ꦤꦶꦫꦴꦩꦶꦱꦴ ꦤꦶꦫꦴꦩꦶꦱꦠꦫꦁ ꦱꦸꦑꦁ.

‘‘ꦏꦠꦩꦴ ꦕ, ꦨꦶꦏ꧀ꦑꦮꦺ, ꦱꦴꦩꦶꦱꦴ ꦈꦥꦺꦏ꧀ꦑꦴ? ꦥꦚ꧀ꦕꦶꦩꦺ, ꦨꦶꦏ꧀ꦑꦮꦺ, ꦏꦴꦩꦒꦸꦟꦴ. ꦏꦠꦩꦺ ꦥꦚ꧀ꦕ? ꦕꦏ꧀ꦑꦸꦮꦶꦚ꧀ꦚꦺꦪ꧀ꦪꦴ ꦫꦹꦥꦴ ꦆꦛ꧀ꦜꦴ ꦏꦤ꧀ꦠꦴ ꦩꦤꦴꦥꦴ ꦥꦶꦪꦫꦹꦥꦴ ꦏꦴꦩꦹꦥꦱꦁꦲꦶꦠꦴ ꦫꦗꦤꦷꦪꦴ…ꦥꦺ… ꦏꦴꦪꦮꦶꦚ꧀ꦚꦺꦪ꧀ꦪꦴ ꦦꦺꦴꦛ꧀ꦜꦧ꧀ꦧꦴ ꦆꦛ꧀ꦜꦴ ꦏꦤ꧀ꦠꦴ ꦩꦤꦴꦥꦴ ꦥꦶꦪꦫꦹꦥꦴ ꦏꦴꦩꦹꦥꦱꦁꦲꦶꦠꦴ ꦫꦗꦤꦷꦪꦴ. ꦆꦩꦺ ꦑꦺꦴ, ꦨꦶꦏ꧀ꦑꦮꦺ, ꦥꦚ꧀ꦕ ꦏꦴꦩꦒꦸꦟꦴ. ꦪꦴ ꦑꦺꦴ, ꦨꦶꦏ꧀ꦑꦮꦺ, ꦆꦩꦺ ꦥꦚ꧀ꦕ ꦏꦴꦩꦒꦸꦟꦺ ꦥꦛꦶꦕ꧀ꦕ ꦈꦥ꧀ꦥꦗ꧀ꦗꦠꦶ ꦈꦥꦺꦏ꧀ꦑꦴ, ꦄꦪꦁ ꦮꦸꦕ꧀ꦕꦠꦶ, ꦨꦶꦏ꧀ꦑꦮꦺ, ꦱꦴꦩꦶꦱꦴ ꦈꦥꦺꦏ꧀ꦑꦴ.

‘‘ꦏꦠꦩꦴ ꦕ, ꦨꦶꦏ꧀ꦑꦮꦺ, ꦤꦶꦫꦴꦩꦶꦱꦴ ꦈꦥꦺꦏ꧀ꦑꦴ? ꦆꦣ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦱꦸꦑꦱ꧀ꦱ ꦕ ꦥꦲꦴꦤꦴ, ꦢꦸꦏ꧀ꦑꦱ꧀ꦱ ꦕ ꦥꦲꦴꦤꦴ, ꦥꦸꦧ꧀ꦧꦺꦮ ꦱꦺꦴꦩꦤꦱ꧀ꦱꦢꦺꦴꦩꦤꦱ꧀ꦱꦴꦤꦁ ꦄꦠ꧀ꦡꦔ꧀ꦒꦩꦴ, ꦄꦢꦸꦏ꧀ꦑꦩꦱꦸꦑꦁ ꦈꦥꦺꦏ꧀ꦑꦴꦱꦠꦶꦥꦴꦫꦶꦱꦸꦢ꧀ꦣꦶꦁ ꦕꦠꦸꦠ꧀ꦡꦁ ꦙꦴꦤꦁ ꦈꦥꦱꦩ꧀ꦥꦗ꧀ꦗ ꦮꦶꦲꦫꦠꦶ. ꦄꦪꦁ ꦮꦸꦕ꧀ꦕꦠꦶ, ꦨꦶꦏ꧀ꦑꦮꦺ, ꦤꦶꦫꦴꦩꦶꦱꦴ ꦈꦥꦺꦏ꧀ꦑꦴ.

‘‘ꦏꦠꦩꦴ ꦕ, ꦨꦶꦏ꧀ꦑꦮꦺ, ꦤꦶꦫꦴꦩꦶꦱꦴ ꦤꦶꦫꦴꦩꦶꦱꦠꦫꦴ ꦈꦥꦺꦏ꧀ꦑꦴ? ꦪꦴ ꦑꦺꦴ, ꦨꦶꦏ꧀ꦑꦮꦺ, ꦑꦷꦟꦴꦱꦮꦱ꧀ꦱ ꦨꦶꦏ꧀ꦑꦸꦤꦺꦴ ꦫꦴꦒꦴ ꦕꦶꦠ꧀ꦠꦁ ꦮꦶꦩꦸꦠ꧀ꦠꦁ ꦥꦕ꧀ꦕꦮꦺꦏ꧀ꦑꦠꦺꦴ, ꦢꦺꦴꦱꦴ ꦕꦶꦠ꧀ꦠꦁ ꦮꦶꦩꦸꦠ꧀ꦠꦁ ꦥꦕ꧀ꦕꦮꦺꦏ꧀ꦑꦠꦺꦴ, ꦩꦺꦴꦲꦴ ꦕꦶꦠ꧀ꦠꦁ ꦮꦶꦩꦸꦠ꧀ꦠꦁ ꦥꦕ꧀ꦕꦮꦺꦏ꧀ꦑꦠꦺꦴ ꦈꦥ꧀ꦥꦗ꧀ꦗꦠꦶ ꦈꦥꦺꦏ꧀ꦑꦴ, ꦄꦪꦁ ꦮꦸꦕ꧀ꦕꦠꦶ, ꦨꦶꦏ꧀ꦑꦮꦺ, ꦤꦶꦫꦴꦩꦶꦱꦴ ꦤꦶꦫꦴꦩꦶꦱꦠꦫꦴ ꦈꦥꦺꦏ꧀ꦑꦴ.

‘‘ꦏꦠꦩꦺꦴ ꦕ, ꦨꦶꦏ꧀ꦑꦮꦺ, ꦱꦴꦩꦶꦱꦺꦴ ꦮꦶꦩꦺꦴꦏ꧀ꦑꦺꦴ? ꦫꦹꦥꦥ꧀ꦥꦛꦶꦱꦁꦪꦸꦠ꧀ꦠꦺꦴ ꦮꦶꦩꦺꦴꦏ꧀ꦑꦺꦴ ꦱꦴꦩꦶꦱꦺꦴ ꦮꦶꦩꦺꦴꦏ꧀ꦑꦺꦴ.

‘‘ꦏꦠꦩꦺꦴ ꦕ, ꦨꦶꦏ꧀ꦑꦮꦺ, ꦤꦶꦫꦴꦩꦶꦱꦺꦴ ꦮꦶꦩꦺꦴꦏ꧀ꦑꦺꦴ? ꦄꦫꦹꦥꦥ꧀ꦥꦛꦶꦱꦁꦪꦸꦠ꧀ꦠꦺꦴ ꦮꦶꦩꦺꦴꦏ꧀ꦑꦺꦴ ꦤꦶꦫꦴꦩꦶꦱꦺꦴ ꦮꦶꦩꦺꦴꦏ꧀ꦑꦺꦴ.

‘‘ꦏꦠꦩꦺꦴ ꦕ, ꦨꦶꦏ꧀ꦑꦮꦺ, ꦤꦶꦫꦴꦩꦶꦱꦴ ꦤꦶꦫꦴꦩꦶꦱꦠꦫꦺꦴ ꦮꦶꦩꦺꦴꦏ꧀ꦑꦺꦴ? ꦪꦺꦴ ꦑꦺꦴ, ꦨꦶꦏ꧀ꦑꦮꦺ, ꦑꦷꦟꦴꦱꦮꦱ꧀ꦱ ꦨꦶꦏ꧀ꦑꦸꦤꦺꦴ ꦫꦴꦒꦴ ꦕꦶꦠ꧀ꦠꦁ ꦮꦶꦩꦸꦠ꧀ꦠꦁ ꦥꦕ꧀ꦕꦮꦺꦏ꧀ꦑꦠꦺꦴ, ꦢꦺꦴꦱꦴ ꦕꦶꦠ꧀ꦠꦁ ꦮꦶꦩꦸꦠ꧀ꦠꦁ ꦥꦕ꧀ꦕꦮꦺꦏ꧀ꦑꦠꦺꦴ, ꦩꦺꦴꦲꦴ ꦕꦶꦠ꧀ꦠꦁ ꦮꦶꦩꦸꦠ꧀ꦠꦁ ꦥꦕ꧀ꦕꦮꦺꦏ꧀ꦑꦠꦺꦴ ꦈꦥ꧀ꦥꦗ꧀ꦗꦠꦶ ꦮꦶꦩꦺꦴꦏ꧀ꦑꦺꦴ, ꦄꦪꦁ ꦮꦸꦕ꧀ꦕꦠꦶ, ꦨꦶꦏ꧀ꦑꦮꦺ, ꦤꦶꦫꦴꦩꦶꦱꦴ ꦤꦶꦫꦴꦩꦶꦱꦠꦫꦺꦴ ꦮꦶꦩꦺꦴꦏ꧀ꦑꦺꦴ’’ꦠꦶ. ꦌꦏꦴꦢꦱꦩꦁ.

ꦄꦛ꧀ꦜꦱꦠꦥꦫꦶꦪꦴꦪꦮꦒ꧀ꦒꦺꦴ ꦠꦠꦶꦪꦺꦴ.

ꦠꦱ꧀ꦱꦸꦢ꧀ꦢꦴꦤꦁ –

ꦱꦷꦮꦏꦄꦛ꧀ꦜꦱꦠꦁ ꦨꦶꦏ꧀ꦑꦸ, ꦥꦸꦧ꧀ꦧꦺ ꦚꦴꦟꦚ꧀ꦕ ꦨꦶꦏ꧀ꦑꦸꦤꦴ;

ꦱꦩꦟꦧ꧀ꦫꦴꦲ꧀ꦩꦟꦴ ꦠꦷꦟꦶ, ꦱꦸꦢ꧀ꦣꦶꦏꦚ꧀ꦕ ꦤꦶꦫꦴꦩꦶꦱꦤ꧀ꦠꦶ.

ꦮꦺꦢꦤꦴꦱꦁꦪꦸꦠ꧀ꦠꦁ ꦱꦩꦠ꧀ꦠꦁ.