꧑꧒. ꦤꦶꦫꦺꦴꦣꦣꦩ꧀ꦩꦱꦸꦠ꧀ꦠꦁ

꧑꧙꧓. ꦱꦴꦮꦠ꧀ꦡꦶꦤꦶꦢꦴꦤꦁ. ꦌꦏꦩꦤ꧀ꦠꦁ ꦤꦶꦱꦶꦤ꧀ꦤꦺꦴ ꦑꦺꦴ ꦄꦴꦪꦱ꧀ꦩꦴ ꦫꦴꦣꦺꦴ ꦨꦒꦮꦤ꧀ꦠꦁ ꦌꦠꦢꦮꦺꦴꦕ – ‘‘ꦱꦴꦣꦸ ꦩꦺ, ꦨꦤ꧀ꦠꦺ, ꦨꦒꦮꦴ ꦱꦁꦑꦶꦠ꧀ꦠꦺꦤ ꦣꦩ꧀ꦩꦁ ꦢꦺꦱꦺꦠꦸ, ꦪꦩꦲꦁ ꦨꦒꦮꦠꦺꦴ ꦣꦩ꧀ꦩꦁ ꦱꦸꦠ꧀ꦮꦴ ꦌꦏꦺꦴ ꦮꦹꦥꦏꦛ꧀ꦜꦺꦴ ꦄꦥ꧀ꦥꦩꦠ꧀ꦠꦺꦴ ꦄꦴꦠꦴꦥꦷ ꦥꦲꦶꦠꦠ꧀ꦠꦺꦴ ꦮꦶꦲꦫꦺꦪ꧀ꦪ’’ꦤ꧀ꦠꦶ.

‘‘ꦪꦺꦴ ꦑꦺꦴ, ꦫꦴꦣ, ꦤꦶꦫꦺꦴꦣꦣꦩ꧀ꦩꦺꦴ; ꦠꦠ꧀ꦫ ꦠꦺ ꦖꦤ꧀ꦢꦺꦴ ꦥꦲꦴꦠꦧ꧀ꦧꦺꦴ, ꦫꦴꦒꦺꦴ ꦥꦲꦴꦠꦧ꧀ꦧꦺꦴ, ꦖꦤ꧀ꦢꦫꦴꦒꦺꦴ ꦥꦲꦴꦠꦧ꧀ꦧꦺꦴ. ꦏꦺꦴ ꦕ, ꦫꦴꦣ, ꦤꦶꦫꦺꦴꦣꦣꦩ꧀ꦩꦺꦴ? ꦫꦹꦥꦁ ꦑꦺꦴ, ꦫꦴꦣ, ꦤꦶꦫꦺꦴꦣꦣꦩ꧀ꦩꦺꦴ; ꦠꦠ꧀ꦫ ꦠꦺ ꦖꦤ꧀ꦢꦺꦴ ꦥꦲꦴꦠꦧ꧀ꦧꦺꦴ…ꦥꦺ… ꦮꦺꦢꦤꦴ ꦤꦶꦫꦺꦴꦣꦣꦩ꧀ꦩꦺꦴ; ꦠꦠ꧀ꦫ ꦠꦺ ꦖꦤ꧀ꦢꦺꦴ ꦥꦲꦴꦠꦧ꧀ꦧꦺꦴ…ꦥꦺ… ꦱꦚ꧀ꦚꦴ ꦤꦶꦫꦺꦴꦣꦣꦩ꧀ꦩꦺꦴ; ꦠꦠ꧀ꦫ ꦠꦺ ꦖꦤ꧀ꦢꦺꦴ ꦥꦲꦴꦠꦧ꧀ꦧꦺꦴ…ꦥꦺ… ꦱꦔ꧀ꦑꦴꦫꦴ ꦤꦶꦫꦺꦴꦣꦣꦩ꧀ꦩꦺꦴ; ꦠꦠ꧀ꦫ ꦠꦺ ꦖꦤ꧀ꦢꦺꦴ ꦥꦲꦴꦠꦧ꧀ꦧꦺꦴ…ꦥꦺ… ꦮꦶꦚ꧀ꦚꦴꦟꦁ ꦤꦶꦫꦺꦴꦣꦣꦩ꧀ꦩꦺꦴ; ꦠꦠ꧀ꦫ ꦠꦺ ꦖꦤ꧀ꦢꦺꦴ ꦥꦲꦴꦠꦧ꧀ꦧꦺꦴ…ꦥꦺ… ꦪꦺꦴ ꦑꦺꦴ, ꦫꦴꦣ, ꦤꦶꦫꦺꦴꦣꦣꦩ꧀ꦩꦺꦴ; ꦠꦠ꧀ꦫ ꦠꦺ ꦖꦤ꧀ꦢꦺꦴ ꦥꦲꦴꦠꦧ꧀ꦧꦺꦴ, ꦫꦴꦒꦺꦴ ꦥꦲꦴꦠꦧ꧀ꦧꦺꦴ, ꦖꦤ꧀ꦢꦫꦴꦒꦺꦴ ꦥꦲꦴꦠꦧ꧀ꦧꦺꦴ’’ꦠꦶ [ꦱꦷꦲꦭ꦳ꦥꦺꦴꦠ꧀ꦡꦏꦺ ꦥꦤ ꦆꦩꦱ꧀ꦩꦶꦁ ꦮꦒ꧀ꦒꦺ ꦖꦠ꧀ꦠꦶꦁꦱ ꦱꦸꦠ꧀ꦠꦴꦤꦶ ꦮꦶꦨꦠ꧀ꦠꦴꦤꦶ ꦌꦏꦺꦏꦁ ꦱꦸꦠ꧀ꦠꦁ ꦠꦷꦟꦶ ꦠꦷꦟꦶ ꦏꦠ꧀ꦮꦴ, ꦌꦮꦁ ꦕꦠꦸꦠ꧀ꦡꦮꦒ꧀ꦒꦺꦥꦶ].

ꦄꦴꦪꦴꦕꦤꦮꦒ꧀ꦒꦺꦴ ꦠꦠꦶꦪꦺꦴ.

ꦠꦱ꧀ꦱꦸꦢ꧀ꦢꦴꦤꦁ –

ꦩꦴꦫꦺꦴ ꦕ ꦩꦴꦫꦣꦩ꧀ꦩꦺꦴ ꦕ, ꦄꦤꦶꦕ꧀ꦕꦺꦤ ꦄꦥꦫꦺ ꦢꦸꦮꦺ;

ꦢꦸꦏ꧀ꦑꦺꦤ ꦕ ꦢꦸꦮꦺ ꦮꦸꦠ꧀ꦠꦴ, ꦄꦤꦠ꧀ꦠꦺꦤ ꦠꦡꦺꦮ ꦕ;

ꦑꦪꦮꦪꦱꦩꦸꦢꦪꦁ, ꦤꦶꦫꦺꦴꦣꦣꦩ꧀ꦩꦺꦤ ꦢ꧀ꦮꦴꦢꦱꦴꦠꦶ.