꧒. ꦠꦶꦱ꧀ꦱꦱꦸꦠ꧀ꦠꦁ

꧘꧔. ꦱꦴꦮꦠ꧀ꦡꦶꦤꦶꦢꦴꦤꦁ. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦄꦴꦪꦱ꧀ꦩꦴ ꦠꦶꦱ꧀ꦱꦺꦴ ꦨꦒꦮꦠꦺꦴ ꦥꦶꦠꦸꦕ꧀ꦖꦴꦥꦸꦠ꧀ꦠꦺꦴ ꦱꦩ꧀ꦧꦲꦸꦭꦴꦤꦁ ꦨꦶꦏ꧀ꦑꦹꦤꦁ ꦌꦮꦩꦴꦫꦺꦴꦕꦺꦠꦶ – ‘‘ꦄꦥꦶ ꦩꦺ, ꦄꦴꦮꦸꦱꦺꦴ, ꦩꦣꦸꦫꦏꦗꦴꦠꦺꦴ ꦮꦶꦪ ꦏꦴꦪꦺꦴ; ꦢꦶꦱꦴꦥꦶ ꦩꦺ ꦤ ꦥꦏ꧀ꦑꦴꦪꦤ꧀ꦠꦶ; ꦣꦩ꧀ꦩꦴꦥꦶ ꦩꦁ ꦤ ꦥꦛꦶꦨꦤ꧀ꦠꦶ; ꦡꦶꦤꦩꦶꦢ꧀ꦣꦚ꧀ꦕ [ꦡꦷꦤꦩꦶꦢ꧀ꦣꦚ꧀ꦕ (ꦱꦷ. ꦱ꧀ꦪꦴ. ꦏꦁ. ꦥꦷ.)] ꦩꦺ ꦕꦶꦠ꧀ꦠꦁ ꦥꦫꦶꦪꦴꦢꦴꦪ ꦠꦶꦛ꧀ꦜꦠꦶ; ꦄꦤꦨꦶꦫꦠꦺꦴ ꦕ ꦧ꧀ꦫꦲ꧀ꦩꦕꦫꦶꦪꦁ ꦕꦫꦴꦩꦶ; ꦲꦺꦴꦠꦶ ꦕ ꦩꦺ ꦣꦩ꧀ꦩꦺꦱꦸ ꦮꦶꦕꦶꦏꦶꦕ꧀ꦖꦴ’’ꦠꦶ.

ꦄꦡ ꦑꦺꦴ ꦱꦩ꧀ꦧꦲꦸꦭꦴ ꦨꦶꦏ꧀ꦑꦹ ꦪꦺꦤ ꦨꦒꦮꦴ ꦠꦺꦤꦸꦥꦱꦔ꧀ꦏꦩꦶꦁꦱꦸ; ꦈꦥꦱꦔ꧀ꦏꦩꦶꦠ꧀ꦮꦴ ꦨꦒꦮꦤ꧀ꦠꦁ ꦄꦨꦶꦮꦴꦢꦺꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦷꦢꦶꦁꦱꦸ. ꦌꦏꦩꦤ꧀ꦠꦁ ꦤꦶꦱꦶꦤ꧀ꦤꦴ ꦑꦺꦴ ꦠꦺ ꦨꦶꦏ꧀ꦑꦹ ꦨꦒꦮꦤ꧀ꦠꦁ ꦌꦠꦢꦮꦺꦴꦕꦸꦁ – ‘‘ꦄꦴꦪꦱ꧀ꦩꦴ, ꦨꦤ꧀ꦠꦺ, ꦠꦶꦱ꧀ꦱꦺꦴ ꦨꦒꦮꦠꦺꦴ ꦥꦶꦠꦸꦕ꧀ꦖꦴꦥꦸꦠ꧀ꦠꦺꦴ ꦱꦩ꧀ꦧꦲꦸꦭꦴꦤꦁ ꦨꦶꦏ꧀ꦑꦹꦤꦁ ꦌꦮꦩꦴꦫꦺꦴꦕꦺꦠꦶ – ‘ꦄꦥꦶ ꦩꦺ, ꦄꦴꦮꦸꦱꦺꦴ, ꦩꦣꦸꦫꦏꦗꦴꦠꦺꦴ ꦮꦶꦪ ꦏꦴꦪꦺꦴ; ꦢꦶꦱꦴꦥꦶ ꦩꦺ ꦤ ꦥꦏ꧀ꦑꦴꦪꦤ꧀ꦠꦶ; ꦣꦩ꧀ꦩꦴꦥꦶ ꦩꦁ ꦤ ꦥꦛꦶꦨꦤ꧀ꦠꦶ; ꦡꦶꦤꦩꦶꦢ꧀ꦣꦚ꧀ꦕ ꦩꦺ ꦕꦶꦠ꧀ꦠꦁ ꦥꦫꦶꦪꦴꦢꦴꦪ ꦠꦶꦛ꧀ꦜꦠꦶ; ꦄꦤꦨꦶꦫꦠꦺꦴ ꦕ ꦧ꧀ꦫꦲ꧀ꦩꦕꦫꦶꦪꦁ ꦕꦫꦴꦩꦶ; ꦲꦺꦴꦠꦶ ꦕ ꦩꦺ ꦣꦩ꧀ꦩꦺꦱꦸ ꦮꦶꦕꦶꦏꦶꦕ꧀ꦖꦴ’’’ꦠꦶ.

ꦄꦡ ꦑꦺꦴ ꦨꦒꦮꦴ ꦄꦚ꧀ꦚꦠꦫꦁ ꦨꦶꦏ꧀ꦑꦸꦁ ꦄꦴꦩꦤ꧀ꦠꦺꦱꦶ – ‘‘ꦌꦲꦶ ꦠ꧀ꦮꦁ, ꦨꦶꦏ꧀ꦑꦸ, ꦩꦩ ꦮꦕꦤꦺꦤ ꦠꦶꦱ꧀ꦱꦁ ꦨꦶꦏ꧀ꦑꦸꦁ ꦄꦴꦩꦤ꧀ꦠꦺꦲꦷ’’ꦠꦶ. ‘‘ꦌꦮꦁ, ꦨꦤ꧀ꦠꦺ’’ꦠꦶ ꦑꦺꦴ ꦱꦺꦴ ꦨꦶꦏ꧀ꦑꦸ ꦨꦒꦮꦠꦺꦴ ꦥꦛꦶꦱ꧀ꦱꦸꦠ꧀ꦮꦴ ꦪꦺꦤꦴꦪꦱ꧀ꦩꦴ ꦠꦶꦱ꧀ꦱꦺꦴ ꦠꦺꦤꦸꦥꦱꦔ꧀ꦏꦩꦶ; ꦈꦥꦱꦔ꧀ꦏꦩꦶꦠ꧀ꦮꦴ ꦄꦴꦪꦱ꧀ꦩꦤ꧀ꦠꦁ ꦠꦶꦱ꧀ꦱꦁ ꦌꦠꦢꦮꦺꦴꦕ – ‘‘ꦱꦠ꧀ꦡꦴ ꦠꦁ, ꦄꦴꦮꦸꦱꦺꦴ ꦠꦶꦱ꧀ꦱ, ꦄꦴꦩꦤ꧀ꦠꦺꦠꦷ’’ꦠꦶ. ‘‘ꦌꦮꦩꦴꦮꦸꦱꦺꦴ’’ꦠꦶ ꦑꦺꦴ ꦄꦴꦪꦱ꧀ꦩꦴ ꦠꦶꦱ꧀ꦱꦺꦴ ꦠꦱ꧀ꦱ ꦨꦶꦏ꧀ꦑꦸꦤꦺꦴ ꦥꦛꦶꦱ꧀ꦱꦸꦠ꧀ꦮꦴ ꦪꦺꦤ ꦨꦒꦮꦴ ꦠꦺꦤꦸꦥꦱꦔ꧀ꦏꦩꦶ; ꦈꦥꦱꦔ꧀ꦏꦩꦶꦠ꧀ꦮꦴ ꦨꦒꦮꦤ꧀ꦠꦁ ꦄꦨꦶꦮꦴꦢꦺꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦷꦢꦶ. ꦌꦏꦩꦤ꧀ꦠꦁ ꦤꦶꦱꦶꦤ꧀ꦤꦁ ꦑꦺꦴ ꦄꦴꦪꦱ꧀ꦩꦤ꧀ꦠꦁ ꦠꦶꦱ꧀ꦱꦁ ꦨꦒꦮꦴ ꦌꦠꦢꦮꦺꦴꦕ – ‘‘ꦱꦕ꧀ꦕꦁ ꦏꦶꦫ ꦠ꧀ꦮꦁ, ꦠꦶꦱ꧀ꦱ, ꦱꦩ꧀ꦧꦲꦸꦭꦴꦤꦁ ꦨꦶꦏ꧀ꦑꦹꦤꦁ ꦌꦮꦩꦴꦫꦺꦴꦕꦺꦱꦶ – ‘ꦄꦥꦶ ꦩꦺ, ꦄꦴꦮꦸꦱꦺꦴ, ꦩꦣꦸꦫꦏꦗꦴꦠꦺꦴ ꦮꦶꦪ ꦏꦴꦪꦺꦴ…ꦥꦺ… ꦲꦺꦴꦠꦶ ꦕ ꦩꦺ ꦣꦩ꧀ꦩꦺꦱꦸ ꦮꦶꦕꦶꦏꦶꦕ꧀ꦖꦴ’’’ꦠꦶ? ‘‘ꦌꦮꦁ, ꦨꦤ꧀ꦠꦺ’’. ‘‘ꦠꦁ ꦏꦶꦁ ꦩꦚ꧀ꦚꦱꦶ, ꦠꦶꦱ꧀ꦱ, ꦫꦹꦥꦺ ꦄꦮꦶꦒꦠꦫꦴꦒꦱ꧀ꦱ ꦄꦮꦶꦒꦠꦕ꧀ꦖꦤ꧀ꦢꦱ꧀ꦱ ꦄꦮꦶꦒꦠꦥꦺꦩꦱ꧀ꦱ ꦄꦮꦶꦒꦠꦥꦶꦥꦴꦱꦱ꧀ꦱ ꦄꦮꦶꦒꦠꦥꦫꦶꦭ꦳ꦴꦲꦱ꧀ꦱ ꦄꦮꦶꦒꦠꦠꦟ꧀ꦲꦱ꧀ꦱ, ꦠꦱ꧀ꦱ ꦫꦹꦥꦱ꧀ꦱ ꦮꦶꦥꦫꦶꦟꦴꦩꦚ꧀ꦚꦡꦴꦨꦴꦮꦴ ꦈꦥ꧀ꦥꦗ꧀ꦗꦤ꧀ꦠꦶ ꦱꦺꦴꦏꦥꦫꦶꦢꦺꦮꦢꦸꦏ꧀ꦑꦢꦺꦴꦩꦤꦱ꧀ꦱꦸꦥꦴꦪꦴꦱꦴ’’ꦠꦶ? ‘‘ꦌꦮꦁ, ꦨꦤ꧀ꦠꦺ’’.

‘‘ꦱꦴꦣꦸ ꦱꦴꦣꦸ, ꦠꦶꦱ꧀ꦱ! ꦌꦮꦚ꧀ꦲꦺꦠꦁ, ꦠꦶꦱ꧀ꦱ, ꦲꦺꦴꦠꦶ. ꦪꦡꦴ ꦠꦁ ꦫꦹꦥꦺ ꦄꦮꦶꦒꦠꦫꦴꦒꦱ꧀ꦱ… ꦮꦺꦢꦤꦴꦪ… ꦱꦚ꧀ꦚꦴꦪ… ꦱꦔ꧀ꦑꦴꦫꦺꦱꦸ ꦄꦮꦶꦒꦠꦫꦴꦒꦱ꧀ꦱ…ꦥꦺ… ꦠꦺꦱꦁ ꦱꦔ꧀ꦑꦴꦫꦴꦤꦁ ꦮꦶꦥꦫꦶꦟꦴꦩꦚ꧀ꦚꦡꦴꦨꦴꦮꦴ ꦈꦥ꧀ꦥꦗ꧀ꦗꦤ꧀ꦠꦶ ꦱꦺꦴꦏꦥꦫꦶꦢꦺꦮꦢꦸꦏ꧀ꦑꦢꦺꦴꦩꦤꦱ꧀ꦱꦸꦥꦴꦪꦴꦱꦴ’’ꦠꦶ? ‘‘ꦌꦮꦁ, ꦨꦤ꧀ꦠꦺ’’.

‘‘ꦱꦴꦣꦸ ꦱꦴꦣꦸ, ꦠꦶꦱ꧀ꦱ! ꦌꦮꦚ꧀ꦲꦺꦠꦁ, ꦠꦶꦱ꧀ꦱ, ꦲꦺꦴꦠꦶ. ꦪꦡꦴ ꦠꦁ ꦮꦶꦚ꧀ꦚꦴꦟꦺ ꦄꦮꦶꦒꦠꦫꦴꦒꦱ꧀ꦱ ꦄꦮꦶꦒꦠꦕ꧀ꦖꦤ꧀ꦢꦱ꧀ꦱ ꦄꦮꦶꦒꦠꦥꦺꦩꦱ꧀ꦱ ꦄꦮꦶꦒꦠꦥꦶꦥꦴꦱꦱ꧀ꦱ ꦄꦮꦶꦒꦠꦥꦫꦶꦭ꦳ꦴꦲꦱ꧀ꦱ ꦄꦮꦶꦒꦠꦠꦟ꧀ꦲꦱ꧀ꦱ, ꦠꦱ꧀ꦱ ꦮꦶꦚ꧀ꦚꦴꦟꦱ꧀ꦱ ꦮꦶꦥꦫꦶꦟꦴꦩꦚ꧀ꦚꦡꦴꦨꦴꦮꦴ ꦈꦥ꧀ꦥꦗ꧀ꦗꦤ꧀ꦠꦶ ꦱꦺꦴꦏꦥꦫꦶꦢꦺꦮꦢꦸꦏ꧀ꦑꦢꦺꦴꦩꦤꦱ꧀ꦱꦸꦥꦴꦪꦴꦱꦴ’’ꦠꦶ? ‘‘ꦌꦮꦁ, ꦨꦤ꧀ꦠꦺ’’.

‘‘ꦱꦴꦣꦸ ꦱꦴꦣꦸ, ꦠꦶꦱ꧀ꦱ! ꦌꦮꦚ꧀ꦲꦺꦠꦁ, ꦠꦶꦱ꧀ꦱ, ꦲꦺꦴꦠꦶ. ꦪꦡꦴ ꦠꦁ ꦮꦶꦚ꧀ꦚꦴꦟꦺ ꦄꦮꦶꦒꦠꦫꦴꦒꦱ꧀ꦱ. ꦠꦁ ꦏꦶꦁ ꦩꦚ꧀ꦚꦱꦶ, ꦠꦶꦱ꧀ꦱ, ꦫꦹꦥꦺ ꦮꦶꦒꦠꦫꦴꦒꦱ꧀ꦱ ꦮꦶꦒꦠꦕ꧀ꦖꦤ꧀ꦢꦱ꧀ꦱ ꦮꦶꦒꦠꦥꦺꦩꦱ꧀ꦱ ꦮꦶꦒꦠꦥꦶꦥꦴꦱꦱ꧀ꦱ ꦮꦶꦒꦠꦥꦫꦶꦭ꦳ꦴꦲꦱ꧀ꦱ ꦮꦶꦒꦠꦠꦟ꧀ꦲꦱ꧀ꦱ, ꦠꦱ꧀ꦱ ꦫꦹꦥꦱ꧀ꦱ ꦮꦶꦥꦫꦶꦟꦴꦩꦚ꧀ꦚꦡꦴꦨꦴꦮꦴ ꦈꦥ꧀ꦥꦗ꧀ꦗꦤ꧀ꦠꦶ ꦱꦺꦴꦏꦥꦫꦶꦢꦺꦮꦢꦸꦏ꧀ꦑꦢꦺꦴꦩꦤꦱ꧀ꦱꦸꦥꦴꦪꦴꦱꦴ’’ꦠꦶ? ‘‘ꦤꦺꦴ ꦲꦺꦠꦁ, ꦨꦤ꧀ꦠꦺ’’.

‘‘ꦱꦴꦣꦸ ꦱꦴꦣꦸ, ꦠꦶꦱ꧀ꦱ! ꦌꦮꦚ꧀ꦲꦺꦠꦁ, ꦠꦶꦱ꧀ꦱ, ꦲꦺꦴꦠꦶ. ꦪꦡꦴ ꦠꦁ ꦫꦹꦥꦺ ꦮꦶꦒꦠꦫꦴꦒꦱ꧀ꦱ… ꦮꦺꦢꦤꦴꦪ… ꦱꦚ꧀ꦚꦴꦪ… ꦱꦔ꧀ꦑꦴꦫꦺꦱꦸ ꦮꦶꦒꦠꦫꦴꦒꦱ꧀ꦱ… ꦮꦶꦚ꧀ꦚꦴꦟꦺ ꦮꦶꦒꦠꦫꦴꦒꦱ꧀ꦱ ꦮꦶꦒꦠꦕ꧀ꦖꦤ꧀ꦢꦱ꧀ꦱ ꦮꦶꦒꦠꦥꦺꦩꦱ꧀ꦱ ꦮꦶꦒꦠꦥꦶꦥꦴꦱꦱ꧀ꦱ ꦮꦶꦒꦠꦥꦫꦶꦭ꦳ꦴꦲꦱ꧀ꦱ ꦮꦶꦒꦠꦠꦟ꧀ꦲꦱ꧀ꦱ ꦠꦱ꧀ꦱ ꦮꦶꦚ꧀ꦚꦴꦟꦱ꧀ꦱ ꦮꦶꦥꦫꦶꦟꦴꦩꦚ꧀ꦚꦡꦴꦨꦴꦮꦴ ꦈꦥ꧀ꦥꦗ꧀ꦗꦤ꧀ꦠꦶ ꦱꦺꦴꦏꦥꦫꦶꦢꦺꦮꦢꦸꦏ꧀ꦑꦢꦺꦴꦩꦤꦱ꧀ꦱꦸꦥꦴꦪꦴꦱꦴ’’ꦠꦶ? ‘‘ꦤꦺꦴ ꦲꦺꦠꦁ, ꦨꦤ꧀ꦠꦺ’’.

‘‘ꦱꦴꦣꦸ ꦱꦴꦣꦸ, ꦠꦶꦱ꧀ꦱ! ꦌꦮꦚ꧀ꦲꦺꦠꦁ, ꦠꦶꦱ꧀ꦱ, ꦲꦺꦴꦠꦶ. ꦪꦡꦴ ꦠꦁ ꦮꦶꦚ꧀ꦚꦴꦟꦺ ꦮꦶꦒꦠꦫꦴꦒꦱ꧀ꦱ. ꦠꦁ ꦏꦶꦁ ꦩꦚ꧀ꦚꦱꦶ, ꦠꦶꦱ꧀ꦱ, ꦫꦹꦥꦁ ꦤꦶꦕ꧀ꦕꦁ ꦮꦴ ꦄꦤꦶꦕ꧀ꦕꦁ ꦮꦴ’’ꦠꦶ? ‘‘ꦄꦤꦶꦕ꧀ꦕꦁ, ꦨꦤ꧀ꦠꦺ’’. ‘‘ꦮꦺꦢꦤꦴ … ꦱꦚ꧀ꦚꦴ… ꦱꦔ꧀ꦑꦴꦫꦴ… ꦮꦶꦚ꧀ꦚꦴꦟꦁ ꦤꦶꦕ꧀ꦕꦁ ꦮꦴ ꦄꦤꦶꦕ꧀ꦕꦁ ꦮꦴ’’ꦠꦶ? ‘‘ꦄꦤꦶꦕ꧀ꦕꦁ, ꦨꦤ꧀ꦠꦺ’’. ꦠꦱ꧀ꦩꦴꦠꦶꦲ…ꦥꦺ… ꦌꦮꦁ ꦥꦱ꧀ꦱꦁ…ꦥꦺ… ꦤꦴꦥꦫꦁ ꦆꦠ꧀ꦡꦠ꧀ꦠꦴꦪꦴꦠꦶ ꦥꦗꦴꦤꦴꦠꦷ’’ꦠꦶ.

‘‘ꦱꦺꦪ꧀ꦪꦡꦴꦥꦶ, ꦠꦶꦱ꧀ꦱ, ꦢ꧀ꦮꦺ ꦥꦸꦫꦶꦱꦴ – ꦌꦏꦺꦴ ꦥꦸꦫꦶꦱꦺꦴ ꦄꦩꦒ꧀ꦒꦏꦸꦱꦭꦺꦴ, ꦌꦏꦺꦴ ꦥꦸꦫꦶꦱꦺꦴ ꦩꦒ꧀ꦒꦏꦸꦱꦭꦺꦴ. ꦠꦩꦺꦤꦁ ꦱꦺꦴ ꦄꦩꦒ꧀ꦒꦏꦸꦱꦭꦺꦴ ꦥꦸꦫꦶꦱꦺꦴ ꦄꦩꦸꦁ ꦩꦒ꧀ꦒꦏꦸꦱꦭꦁ ꦥꦸꦫꦶꦱꦁ ꦩꦒ꧀ꦒꦁ ꦥꦸꦕ꧀ꦖꦺꦪ꧀ꦪ. ꦱꦺꦴ ꦌꦮꦁ ꦮꦢꦺꦪ꧀ꦪ – ‘ꦌꦲꦶ, ꦨꦺꦴ ꦥꦸꦫꦶꦱ, ꦄꦪꦁ ꦩꦒ꧀ꦒꦺꦴ. ꦠꦺꦤ ꦩꦸꦲꦸꦠ꧀ꦠꦁ ꦒꦕ꧀ꦖ. ꦠꦺꦤ ꦩꦸꦲꦸꦠ꧀ꦠꦁ ꦒꦤ꧀ꦠ꧀ꦮꦴ ꦢꦏ꧀ꦑꦶꦱ꧀ꦱꦱꦶ ꦢ꧀ꦮꦺꦣꦴꦥꦡꦁ, ꦠꦠ꧀ꦡ ꦮꦴꦩꦁ ꦩꦸꦚ꧀ꦕꦶꦠ꧀ꦮꦴ ꦢꦏ꧀ꦑꦶꦟꦁ ꦒꦟ꧀ꦲꦴꦲꦶ. ꦠꦺꦤ ꦩꦸꦲꦸꦠ꧀ꦠꦁ ꦒꦕ꧀ꦖ. ꦠꦺꦤ ꦩꦸꦲꦸꦠ꧀ꦠꦁ ꦒꦤ꧀ꦠ꧀ꦮꦴ ꦢꦏ꧀ꦑꦶꦱ꧀ꦱꦱꦶ ꦠꦶꦧ꧀ꦧꦁ ꦮꦤꦱꦟ꧀ꦝꦁ. ꦠꦺꦤ ꦩꦸꦲꦸꦠ꧀ꦠꦁ ꦒꦕ꧀ꦖ. ꦠꦺꦤ ꦩꦸꦲꦸꦠ꧀ꦠꦁ ꦒꦤ꧀ꦠ꧀ꦮꦴ ꦢꦏ꧀ꦑꦶꦱ꧀ꦱꦱꦶ ꦩꦲꦤ꧀ꦠꦁ ꦤꦶꦤ꧀ꦤꦁ ꦥꦭ꧀ꦭꦭꦁ. ꦠꦺꦤ ꦩꦸꦲꦸꦠ꧀ꦠꦁ ꦒꦕ꧀ꦖ. ꦠꦺꦤ ꦩꦸꦲꦸꦠ꧀ꦠꦁ ꦒꦤ꧀ꦠ꧀ꦮꦴ ꦢꦏ꧀ꦑꦶꦱ꧀ꦱꦱꦶ ꦱꦺꦴꦧ꧀ꦨꦁ ꦥꦥꦴꦠꦁ. ꦠꦺꦤ ꦩꦸꦲꦸꦠ꧀ꦠꦁ ꦒꦕ꧀ꦖ. ꦠꦺꦤ ꦩꦸꦲꦸꦠ꧀ꦠꦁ ꦒꦤ꧀ꦠ꧀ꦮꦴ ꦢꦏ꧀ꦑꦶꦱ꧀ꦱꦱꦶ ꦱꦩꦁ ꦨꦹꦩꦶꦨꦴꦒꦁ ꦫꦩꦟꦷꦪ’’’ꦤ꧀ꦠꦶ.

‘‘ꦈꦥꦩꦴ ꦑꦺꦴ ꦩ꧀ꦪꦴꦪꦁ, ꦠꦶꦱ꧀ꦱ, ꦏꦠꦴ ꦄꦠ꧀ꦡꦱ꧀ꦱ ꦮꦶꦚ꧀ꦚꦴꦥꦤꦴꦪ. ꦄꦪꦁ ꦕꦺꦮꦺꦠ꧀ꦡ ꦄꦠ꧀ꦡꦺꦴ – ‘ꦥꦸꦫꦶꦱꦺꦴ ꦄꦩꦒ꧀ꦒꦏꦸꦱꦭꦺꦴ’ꦠꦶ ꦑꦺꦴ, ꦠꦶꦱ꧀ꦱ, ꦥꦸꦡꦸꦗ꧀ꦗꦤꦱ꧀ꦱꦺꦠꦁ ꦄꦣꦶꦮꦕꦤꦁ. ‘ꦥꦸꦫꦶꦱꦺꦴ ꦩꦒ꧀ꦒꦏꦸꦱꦭꦺꦴ’ꦠꦶ ꦑꦺꦴ, ꦠꦶꦱ꧀ꦱ, ꦠꦡꦴꦒꦠꦱ꧀ꦱꦺꦠꦁ ꦄꦣꦶꦮꦕꦤꦁ ꦄꦫꦲꦠꦺꦴ ꦱꦩ꧀ꦩꦴꦱꦩ꧀ꦧꦸꦢ꧀ꦣꦱ꧀ꦱ. ‘ꦢ꧀ꦮꦺꦣꦴꦥꦡꦺꦴ’ꦠꦶ ꦑꦺꦴ, ꦠꦶꦱ꧀ꦱ, ꦮꦶꦕꦶꦏꦶꦕ꧀ꦖꦴꦪꦺꦠꦁ ꦄꦣꦶꦮꦕꦤꦁ. ‘ꦮꦴꦩꦺꦴ ꦩꦒ꧀ꦒꦺꦴ’ꦠꦶ ꦑꦺꦴ, ꦠꦶꦱ꧀ꦱ, ꦄꦛ꧀ꦜꦔ꧀ꦒꦶꦏꦱ꧀ꦱꦺꦠꦁ ꦩꦶꦕ꧀ꦖꦴꦩꦒ꧀ꦒꦱ꧀ꦱ ꦄꦣꦶꦮꦕꦤꦁ, ꦱꦺꦪ꧀ꦪꦡꦶꦢꦁ – ꦩꦶꦕ꧀ꦖꦴꦢꦶꦛ꧀ꦜꦶꦪꦴ…ꦥꦺ… ꦩꦶꦕ꧀ꦖꦴꦱꦩꦴꦣꦶꦱ꧀ꦱ. ‘ꦢꦏ꧀ꦑꦶꦟꦺꦴ ꦩꦒ꧀ꦒꦺꦴ’ꦠꦶ ꦑꦺꦴ, ꦠꦶꦱ꧀ꦱ, ꦄꦫꦶꦪꦱ꧀ꦱꦺꦠꦁ ꦄꦛ꧀ꦜꦔ꧀ꦒꦶꦏꦱ꧀ꦱ ꦩꦒ꧀ꦒꦱ꧀ꦱ ꦄꦣꦶꦮꦕꦤꦁ, ꦱꦺꦪ꧀ꦪꦡꦶꦢꦁ – ꦱꦩ꧀ꦩꦴꦢꦶꦛ꧀ꦜꦶꦪꦴ…ꦥꦺ… ꦱꦩ꧀ꦩꦴꦱꦩꦴꦣꦶꦱ꧀ꦱ. ‘ꦠꦶꦧ꧀ꦧꦺꦴ ꦮꦤꦱꦟ꧀ꦝꦺꦴ’ꦠꦶ ꦑꦺꦴ, ꦠꦶꦱ꧀ꦱ, ꦄꦮꦶꦗ꧀ꦗꦴꦪꦺꦠꦁ ꦄꦣꦶꦮꦕꦤꦁ. ‘ꦩꦲꦤ꧀ꦠꦁ ꦤꦶꦤ꧀ꦤꦁ ꦥꦭ꧀ꦭꦭ’ꦤ꧀ꦠꦶ ꦑꦺꦴ, ꦠꦶꦱ꧀ꦱ, ꦏꦴꦩꦴꦤꦩꦺꦠꦁ ꦄꦣꦶꦮꦕꦤꦁ. ‘ꦱꦺꦴꦧ꧀ꦨꦺꦴ ꦥꦥꦴꦠꦺꦴ’ꦠꦶ ꦑꦺꦴ, ꦠꦶꦱ꧀ꦱ, ꦏꦺꦴꦣꦹꦥꦴꦪꦴꦱꦱ꧀ꦱꦺꦠꦁ ꦄꦣꦶꦮꦕꦤꦁ. ‘ꦱꦩꦺꦴ ꦨꦹꦩꦶꦨꦴꦒꦺꦴ ꦫꦩꦟꦷꦪꦺꦴ’ꦠꦶ ꦑꦺꦴ, ꦠꦶꦱ꧀ꦱ, ꦤꦶꦧ꧀ꦧꦴꦤꦱ꧀ꦱꦺꦠꦁ ꦄꦣꦶꦮꦕꦤꦁ. ꦄꦨꦶꦫꦩ, ꦠꦶꦱ꧀ꦱ, ꦄꦨꦶꦫꦩ, ꦠꦶꦱ꧀ꦱ! ꦄꦲꦩꦺꦴꦮꦴꦢꦺꦤ ꦄꦲꦩꦤꦸꦒ꧀ꦒꦲꦺꦤ ꦄꦲꦩꦤꦸꦱꦴꦱꦤꦶꦪꦴ’’ꦠꦶ [ꦄꦲꦩꦴꦩꦶꦱꦣꦩ꧀ꦩꦴꦤꦸꦒ꧀ꦒꦲꦺꦤ ꦩꦩꦺꦴꦮꦴꦢꦺꦤ ꦩꦩꦴꦤꦸꦱꦴꦱꦤꦶꦪꦴꦠꦶ (ꦏ.)].

ꦆꦢꦩꦮꦺꦴꦕ ꦨꦒꦮꦴ. ꦄꦠ꧀ꦠꦩꦤꦺꦴ ꦄꦴꦪꦱ꧀ꦩꦴ ꦠꦶꦱ꧀ꦱꦺꦴ ꦨꦒꦮꦠꦺꦴ ꦨꦴꦱꦶꦠꦁ ꦄꦨꦶꦤꦤ꧀ꦢꦷꦠꦶ. ꦢꦸꦠꦶꦪꦁ.