꧓. ꦄꦤꦶꦕ꧀ꦕꦱꦸꦠ꧀ꦠꦁ

꧔꧕. ꦱꦴꦮꦠ꧀ꦡꦶꦤꦶꦢꦴꦤꦁ. ‘‘ꦫꦹꦥꦁ, ꦨꦶꦏ꧀ꦑꦮꦺ, ꦄꦤꦶꦕ꧀ꦕꦁ. ꦪꦢꦤꦶꦕ꧀ꦕꦁ ꦠꦁ ꦢꦸꦏ꧀ꦑꦁ; ꦪꦁ ꦢꦸꦏ꧀ꦑꦁ ꦠꦢꦤꦠ꧀ꦠꦴ; ꦪꦢꦤꦠ꧀ꦠꦴ ꦠꦁ ‘ꦤꦺꦠꦁ ꦩꦩ, ꦤꦺꦱꦺꦴꦲꦩꦱ꧀ꦩꦶ, ꦤ ꦩꦺꦱꦺꦴ ꦄꦠ꧀ꦠꦴ’ꦠꦶ ꦌꦮꦩꦺꦠꦁ ꦪꦡꦴꦨꦹꦠꦁ ꦱꦩ꧀ꦩꦥ꧀ꦥꦚ꧀ꦚꦴꦪ ꦢꦛ꧀ꦜꦧ꧀ꦧꦁ. ꦌꦮꦩꦺꦠꦁ ꦪꦡꦴꦨꦹꦠꦁ ꦱꦩ꧀ꦩꦥ꧀ꦥꦚ꧀ꦚꦴꦪ ꦥꦱ꧀ꦱꦠꦺꦴ ꦕꦶꦠ꧀ꦠꦁ ꦮꦶꦫꦗ꧀ꦗꦠꦶ ꦮꦶꦩꦸꦕ꧀ꦕꦠꦶ ꦄꦤꦸꦥꦴꦢꦴꦪ ꦄꦴꦱꦮꦺꦲꦶ. ꦮꦺꦢꦤꦴ ꦄꦤꦶꦕ꧀ꦕꦴ… ꦱꦚ꧀ꦚꦴ… ꦱꦔ꧀ꦑꦴꦫꦴ… ꦮꦶꦚ꧀ꦚꦴꦟꦁ ꦄꦤꦶꦕ꧀ꦕꦁ. ꦪꦢꦤꦶꦕ꧀ꦕꦁ ꦠꦁ ꦢꦸꦏ꧀ꦑꦁ; ꦪꦁ ꦢꦸꦏ꧀ꦑꦁ ꦠꦢꦤꦠ꧀ꦠꦴ; ꦪꦢꦤꦠ꧀ꦠꦴ ꦠꦁ ‘ꦤꦺꦠꦁ ꦩꦩ, ꦤꦺꦱꦺꦴꦲꦩꦱ꧀ꦩꦶ, ꦤ ꦩꦺꦱꦺꦴ ꦄꦠ꧀ꦠꦴ’ꦠꦶ ꦌꦮꦩꦺꦠꦁ ꦪꦡꦴꦨꦹꦠꦁ ꦱꦩ꧀ꦩꦥ꧀ꦥꦚ꧀ꦚꦴꦪ ꦢꦛ꧀ꦜꦧ꧀ꦧꦁ. ꦌꦮꦩꦺꦠꦁ ꦪꦡꦴꦨꦹꦠꦁ ꦱꦩ꧀ꦩꦥ꧀ꦥꦚ꧀ꦚꦴꦪ ꦥꦱ꧀ꦱꦠꦺꦴ ꦕꦶꦠ꧀ꦠꦁ ꦮꦶꦫꦗ꧀ꦗꦠꦶ ꦮꦶꦩꦸꦕ꧀ꦕꦠꦶ ꦄꦤꦸꦥꦴꦢꦴꦪ ꦄꦴꦱꦮꦺꦲꦶ. ꦫꦹꦥꦣꦴꦠꦸꦪꦴ ꦕꦺ, ꦨꦶꦏ꧀ꦑꦮꦺ, ꦨꦶꦏ꧀ꦑꦸꦤꦺꦴ ꦕꦶꦠ꧀ꦠꦁ ꦮꦶꦫꦠ꧀ꦠꦁ ꦮꦶꦩꦸꦠ꧀ꦠꦁ ꦲꦺꦴꦠꦶ ꦄꦤꦸꦥꦴꦢꦴꦪ ꦄꦴꦱꦮꦺꦲꦶ, ꦮꦺꦢꦤꦴꦣꦴꦠꦸꦪꦴ…ꦥꦺ… ꦱꦚ꧀ꦚꦴꦣꦴꦠꦸꦪꦴ… ꦱꦔ꧀ꦑꦴꦫꦣꦴꦠꦸꦪꦴ… ꦮꦶꦚ꧀ꦚꦴꦟꦣꦴꦠꦸꦪꦴ ꦕꦺ, ꦨꦶꦏ꧀ꦑꦮꦺ, ꦨꦶꦏ꧀ꦑꦸꦤꦺꦴ ꦕꦶꦠ꧀ꦠꦁ ꦮꦶꦫꦠ꧀ꦠꦁ ꦮꦶꦩꦸꦠ꧀ꦠꦁ ꦲꦺꦴꦠꦶ ꦄꦤꦸꦥꦴꦢꦴꦪ ꦄꦴꦱꦮꦺꦲꦶ. ꦮꦶꦩꦸꦠ꧀ꦠꦠ꧀ꦠꦴ ꦜꦶꦠꦁ. ꦜꦶꦠꦠ꧀ꦠꦴ ꦱꦤ꧀ꦠꦸꦱꦶꦠꦁ [ꦱꦤ꧀ꦠꦸꦱ꧀ꦱꦶꦠꦁ (ꦏ. ꦱꦷ. ꦥꦷ. ꦏ.)]. ꦱꦤ꧀ꦠꦸꦱꦶꦠꦠ꧀ꦠꦴ ꦤ ꦥꦫꦶꦠꦱ꧀ꦱꦠꦶ. ꦄꦥꦫꦶꦠꦱ꧀ꦱꦁ ꦥꦕ꧀ꦕꦠ꧀ꦠꦚ꧀ꦚꦺꦮ ꦥꦫꦶꦤꦶꦧ꧀ꦧꦴꦪꦠꦶ. ‘ꦑꦷꦟꦴ ꦗꦴꦠꦶ, ꦮꦸꦱꦶꦠꦁ ꦧ꧀ꦫꦲ꧀ꦩꦕꦫꦶꦪꦁ, ꦏꦠꦁ ꦏꦫꦟꦷꦪꦁ, ꦤꦴꦥꦫꦁ ꦆꦠ꧀ꦡꦠ꧀ꦠꦴꦪꦴ’ꦠꦶ ꦥꦗꦴꦤꦴꦠꦷ’’ꦠꦶ. ꦠꦠꦶꦪꦁ.