꧒. ꦄꦤꦶꦕ꧀ꦕꦮꦒ꧀ꦒꦺꦴ

꧑. ꦄꦤꦶꦕ꧀ꦕꦱꦸꦠ꧀ꦠꦁ

꧑꧒. ꦌꦮꦁ ꦩꦺ ꦱꦸꦠꦁ – ꦱꦴꦮꦠ꧀ꦡꦶꦪꦁ. ꦠꦠ꧀ꦫ ꦑꦺꦴ…ꦥꦺ… ‘‘ꦫꦹꦥꦁ, ꦨꦶꦏ꧀ꦑꦮꦺ, ꦄꦤꦶꦕ꧀ꦕꦁ, ꦮꦺꦢꦤꦴ ꦄꦤꦶꦕ꧀ꦕꦴ, ꦱꦚ꧀ꦚꦴ ꦄꦤꦶꦕ꧀ꦕꦴ, ꦱꦔ꧀ꦑꦴꦫꦴ ꦄꦤꦶꦕ꧀ꦕꦴ, ꦮꦶꦚ꧀ꦚꦴꦟꦁ ꦄꦤꦶꦕ꧀ꦕꦁ. ꦌꦮꦁ ꦥꦱ꧀ꦱꦁ, ꦨꦶꦏ꧀ꦑꦮꦺ, ꦱꦸꦠꦮꦴ ꦄꦫꦶꦪꦱꦴꦮꦏꦺꦴ ꦫꦹꦥꦱ꧀ꦩꦶꦩ꧀ꦥꦶ ꦤꦶꦧ꧀ꦧꦶꦤ꧀ꦢꦠꦶ, ꦮꦺꦢꦤꦴꦪꦥꦶ ꦤꦶꦧ꧀ꦧꦶꦤ꧀ꦢꦠꦶ, ꦱꦚ꧀ꦚꦴꦪꦥꦶ ꦤꦶꦧ꧀ꦧꦶꦤ꧀ꦢꦠꦶ, ꦱꦔ꧀ꦑꦴꦫꦺꦱꦸꦥꦶ ꦤꦶꦧ꧀ꦧꦶꦤ꧀ꦢꦠꦶ, ꦮꦶꦚ꧀ꦚꦴꦟꦱ꧀ꦩꦶꦩ꧀ꦥꦶ ꦤꦶꦧ꧀ꦧꦶꦤ꧀ꦢꦠꦶ. ꦤꦶꦧ꧀ꦧꦶꦤ꧀ꦢꦁ ꦮꦶꦫꦗ꧀ꦗꦠꦶ; ꦮꦶꦫꦴꦒꦴ ꦮꦶꦩꦸꦕ꧀ꦕꦠꦶ. ꦮꦶꦩꦸꦠ꧀ꦠꦱ꧀ꦩꦶꦁ ꦮꦶꦩꦸꦠ꧀ꦠꦩꦶꦠꦶ ꦚꦴꦟꦁ ꦲꦺꦴꦠꦶ. ‘ꦑꦷꦟꦴ ꦗꦴꦠꦶ, ꦮꦸꦱꦶꦠꦁ ꦧ꧀ꦫꦲ꧀ꦩꦕꦫꦶꦪꦁ, ꦏꦠꦁ ꦏꦫꦟꦷꦪꦁ, ꦤꦴꦥꦫꦁ ꦆꦠ꧀ꦡꦠ꧀ꦠꦴꦪꦴ’ꦠꦶ ꦥꦗꦴꦤꦴꦠꦷ’’ꦠꦶ. ꦥꦜꦩꦁ.

꧒. ꦢꦸꦏ꧀ꦑꦱꦸꦠ꧀ꦠꦁ

꧑꧓. ꦱꦴꦮꦠ꧀ꦡꦶꦤꦶꦢꦴꦤꦁ. ‘‘ꦫꦹꦥꦁ, ꦨꦶꦏ꧀ꦑꦮꦺ, ꦢꦸꦏ꧀ꦑꦁ, ꦮꦺꦢꦤꦴ ꦢꦸꦏ꧀ꦑꦴ, ꦱꦚ꧀ꦚꦴ ꦢꦸꦏ꧀ꦑꦴ, ꦱꦔ꧀ꦑꦴꦫꦴ ꦢꦸꦏ꧀ꦑꦴ, ꦮꦶꦚ꧀ꦚꦴꦟꦁ ꦢꦸꦏ꧀ꦑꦁ. ꦌꦮꦁ ꦥꦱ꧀ꦱꦁ…ꦥꦺ… ꦤꦴꦥꦫꦁ ꦆꦠ꧀ꦡꦠ꧀ꦠꦴꦪꦴꦠꦶ ꦥꦗꦴꦤꦴꦠꦷ’’ꦠꦶ. ꦢꦸꦠꦶꦪꦁ.

꧓. ꦄꦤꦠ꧀ꦠꦱꦸꦠ꧀ꦠꦁ

꧑꧔. ꦱꦴꦮꦠ꧀ꦡꦶꦤꦶꦢꦴꦤꦁ. ‘‘ꦫꦹꦥꦁ, ꦨꦶꦏ꧀ꦑꦮꦺ, ꦄꦤꦠ꧀ꦠꦴ, ꦮꦺꦢꦤꦴ ꦄꦤꦠ꧀ꦠꦴ, ꦱꦚ꧀ꦚꦴ ꦄꦤꦠ꧀ꦠꦴ, ꦱꦔ꧀ꦑꦴꦫꦴ ꦄꦤꦠ꧀ꦠꦴ, ꦮꦶꦚ꧀ꦚꦴꦟꦁ ꦄꦤꦠ꧀ꦠꦴ. ꦌꦮꦁ ꦥꦱ꧀ꦱꦁ, ꦨꦶꦏ꧀ꦑꦮꦺ, ꦱꦸꦠꦮꦴ ꦄꦫꦶꦪꦱꦴꦮꦏꦺꦴ ꦫꦹꦥꦱ꧀ꦩꦶꦩ꧀ꦥꦶ ꦤꦶꦧ꧀ꦧꦶꦤ꧀ꦢꦠꦶ, ꦮꦺꦢꦤꦴꦪꦥꦶ ꦤꦶꦧ꧀ꦧꦶꦤ꧀ꦢꦠꦶ, ꦱꦚ꧀ꦚꦴꦪꦥꦶ ꦤꦶꦧ꧀ꦧꦶꦤ꧀ꦢꦠꦶ, ꦱꦔ꧀ꦑꦴꦫꦺꦱꦸꦥꦶ ꦤꦶꦧ꧀ꦧꦶꦤ꧀ꦢꦠꦶ, ꦮꦶꦚ꧀ꦚꦴꦟꦱ꧀ꦩꦶꦩ꧀ꦥꦶ ꦤꦶꦧ꧀ꦧꦶꦤ꧀ꦢꦠꦶ. ꦤꦶꦧ꧀ꦧꦶꦤ꧀ꦢꦁ ꦮꦶꦫꦗ꧀ꦗꦠꦶ; ꦮꦶꦫꦴꦒꦴ ꦮꦶꦩꦸꦕ꧀ꦕꦠꦶ. ꦮꦶꦩꦸꦠ꧀ꦠꦱ꧀ꦩꦶꦁ ꦮꦶꦩꦸꦠ꧀ꦠꦩꦶꦠꦶ ꦚꦴꦟꦁ ꦲꦺꦴꦠꦶ. ‘ꦑꦷꦟꦴ ꦗꦴꦠꦶ, ꦮꦸꦱꦶꦠꦁ ꦧ꧀ꦫꦲ꧀ꦩꦕꦫꦶꦪꦁ, ꦏꦠꦁ ꦏꦫꦟꦷꦪꦁ, ꦤꦴꦥꦫꦁ ꦆꦠ꧀ꦡꦠ꧀ꦠꦴꦪꦴ’ꦠꦶ ꦥꦗꦴꦤꦴꦠꦷ’’ꦠꦶ. ꦠꦠꦶꦪꦁ.

꧔. ꦪꦢꦤꦶꦕ꧀ꦕꦱꦸꦠ꧀ꦠꦁ

꧑꧕. ꦱꦴꦮꦠ꧀ꦡꦶꦤꦶꦢꦴꦤꦁ. ‘‘ꦫꦹꦥꦁ, ꦨꦶꦏ꧀ꦑꦮꦺ, ꦄꦤꦶꦕ꧀ꦕꦁ. ꦪꦢꦤꦶꦕ꧀ꦕꦁ ꦠꦁ ꦢꦸꦏ꧀ꦑꦁ; ꦪꦁ ꦢꦸꦏ꧀ꦑꦁ ꦠꦢꦤꦠ꧀ꦠꦴ; ꦪꦢꦤꦠ꧀ꦠꦴ ꦠꦁ ‘ꦤꦺꦠꦁ ꦩꦩ, ꦤꦺꦱꦺꦴꦲꦩꦱ꧀ꦩꦶ, ꦤ ꦩꦺꦱꦺꦴ ꦄꦠ꧀ꦠꦴ’ꦠꦶ ꦌꦮꦩꦺꦠꦁ ꦪꦡꦴꦨꦹꦠꦁ ꦱꦩ꧀ꦩꦥ꧀ꦥꦚ꧀ꦚꦴꦪ ꦢꦛ꧀ꦜꦧ꧀ꦧꦁ. ꦮꦺꦢꦤꦴ ꦄꦤꦶꦕ꧀ꦕꦴ. ꦪꦢꦤꦶꦕ꧀ꦕꦁ ꦠꦁ ꦢꦸꦏ꧀ꦑꦁ; ꦪꦁ ꦢꦸꦏ꧀ꦑꦁ ꦠꦢꦤꦠ꧀ꦠꦴ; ꦪꦢꦤꦠ꧀ꦠꦴ ꦠꦁ ‘ꦤꦺꦠꦁ ꦩꦩ, ꦤꦺꦱꦺꦴꦲꦩꦱ꧀ꦩꦶ, ꦤ ꦩꦺꦱꦺꦴ ꦄꦠ꧀ꦠꦴ’ꦠꦶ ꦌꦮꦩꦺꦠꦁ ꦪꦡꦴꦨꦹꦠꦁ ꦱꦩ꧀ꦩꦥ꧀ꦥꦚ꧀ꦚꦴꦪ ꦢꦛ꧀ꦜꦧ꧀ꦧꦁ. ꦱꦚ꧀ꦚꦴ ꦄꦤꦶꦕ꧀ꦕꦴ…ꦥꦺ… ꦱꦔ꧀ꦑꦴꦫꦴ ꦄꦤꦶꦕ꧀ꦕꦴ… ꦮꦶꦚ꧀ꦚꦴꦟꦁ ꦄꦤꦶꦕ꧀ꦕꦁ. ꦪꦢꦤꦶꦕ꧀ꦕꦁ ꦠꦁ ꦢꦸꦏ꧀ꦑꦁ; ꦪꦁ ꦢꦸꦏ꧀ꦑꦁ ꦠꦢꦤꦠ꧀ꦠꦴ; ꦪꦢꦤꦠ꧀ꦠꦴ ꦠꦁ ‘ꦤꦺꦠꦁ ꦩꦩ, ꦤꦺꦱꦺꦴꦲꦩꦱ꧀ꦩꦶ, ꦤ ꦩꦺꦱꦺꦴ ꦄꦠ꧀ꦠꦴ’ꦠꦶ ꦌꦮꦩꦺꦠꦁ ꦪꦡꦴꦨꦹꦠꦁ ꦱꦩ꧀ꦩꦥ꧀ꦥꦚ꧀ꦚꦴꦪ ꦢꦛ꧀ꦜꦧ꧀ꦧꦁ. ꦌꦮꦁ ꦥꦱ꧀ꦱꦁ…ꦥꦺ… ꦤꦴꦥꦫꦁ ꦆꦠ꧀ꦡꦠ꧀ꦠꦴꦪꦴꦠꦶ ꦥꦗꦴꦤꦴꦠꦷ’’ꦠꦶ. ꦕꦠꦸꦠ꧀ꦡꦁ.

꧕. ꦪꦁꦢꦸꦏ꧀ꦑꦱꦸꦠ꧀ꦠꦁ

꧑꧖. ꦱꦴꦮꦠ꧀ꦡꦶꦤꦶꦢꦴꦤꦁ. ‘‘ꦫꦹꦥꦁ, ꦨꦶꦏ꧀ꦑꦮꦺ, ꦢꦸꦏ꧀ꦑꦁ. ꦪꦁ ꦢꦸꦏ꧀ꦑꦁ ꦠꦢꦤꦠ꧀ꦠꦴ; ꦪꦢꦤꦠ꧀ꦠꦴ ꦠꦁ ‘ꦤꦺꦠꦁ ꦩꦩ, ꦤꦺꦱꦺꦴꦲꦩꦱ꧀ꦩꦶ, ꦤ ꦩꦺꦱꦺꦴ ꦄꦠ꧀ꦠꦴ’ꦠꦶ ꦌꦮꦩꦺꦠꦁ ꦪꦡꦴꦨꦹꦠꦁ ꦱꦩ꧀ꦩꦥ꧀ꦥꦚ꧀ꦚꦴꦪ ꦢꦛ꧀ꦜꦧ꧀ꦧꦁ. ꦮꦺꦢꦤꦴ ꦢꦸꦏ꧀ꦑꦴ… ꦱꦚ꧀ꦚꦴ ꦢꦸꦏ꧀ꦑꦴ… ꦱꦔ꧀ꦑꦴꦫꦴ ꦢꦸꦏ꧀ꦑꦴ… ꦮꦶꦚ꧀ꦚꦴꦟꦁ ꦢꦸꦏ꧀ꦑꦁ. ꦪꦁ ꦢꦸꦏ꧀ꦑꦁ ꦠꦢꦤꦠ꧀ꦠꦴ; ꦪꦢꦤꦠ꧀ꦠꦴ ꦠꦁ ‘ꦤꦺꦠꦁ ꦩꦩ, ꦤꦺꦱꦺꦴꦲꦩꦱ꧀ꦩꦶ, ꦤ ꦩꦺꦱꦺꦴ ꦄꦠ꧀ꦠꦴ’ꦠꦶ ꦌꦮꦩꦺꦠꦁ ꦪꦡꦴꦨꦹꦠꦁ ꦱꦩ꧀ꦩꦥ꧀ꦥꦚ꧀ꦚꦴꦪ ꦢꦛ꧀ꦜꦧ꧀ꦧꦁ. ꦌꦮꦁ ꦥꦱ꧀ꦱꦁ…ꦥꦺ… ꦤꦴꦥꦫꦁ ꦆꦠ꧀ꦡꦠ꧀ꦠꦴꦪꦴꦠꦶ ꦥꦗꦴꦤꦴꦠꦷ’’ꦠꦶ. ꦥꦚ꧀ꦕꦩꦁ.

꧖. ꦪꦢꦤꦠ꧀ꦠꦴꦱꦸꦠ꧀ꦠꦁ

꧑꧗. ꦱꦴꦮꦠ꧀ꦡꦶꦤꦶꦢꦴꦤꦁ. ‘‘ꦫꦹꦥꦁ, ꦨꦶꦏ꧀ꦑꦮꦺ, ꦄꦤꦠ꧀ꦠꦴ. ꦪꦢꦤꦠ꧀ꦠꦴ ꦠꦁ ‘ꦤꦺꦠꦁ ꦩꦩ, ꦤꦺꦱꦺꦴꦲꦩꦱ꧀ꦩꦶ, ꦤ ꦩꦺꦱꦺꦴ ꦄꦠ꧀ꦠꦴ’ꦠꦶ ꦌꦮꦩꦺꦠꦁ ꦪꦡꦴꦨꦹꦠꦁ ꦱꦩ꧀ꦩꦥ꧀ꦥꦚ꧀ꦚꦴꦪ ꦢꦛ꧀ꦜꦧ꧀ꦧꦁ. ꦮꦺꦢꦤꦴ ꦄꦤꦠ꧀ꦠꦴ… ꦱꦚ꧀ꦚꦴ ꦄꦤꦠ꧀ꦠꦴ… ꦱꦔ꧀ꦑꦴꦫꦴ ꦄꦤꦠ꧀ꦠꦴ… ꦮꦶꦚ꧀ꦚꦴꦟꦁ ꦄꦤꦠ꧀ꦠꦴ. ꦪꦢꦤꦠ꧀ꦠꦴ ꦠꦁ ‘ꦤꦺꦠꦁ ꦩꦩ, ꦤꦺꦱꦺꦴꦲꦩꦱ꧀ꦩꦶ, ꦤ ꦩꦺꦱꦺꦴ ꦄꦠ꧀ꦠꦴ’ꦠꦶ ꦌꦮꦩꦺꦠꦁ ꦪꦡꦴꦨꦹꦠꦁ ꦱꦩ꧀ꦩꦥ꧀ꦥꦚ꧀ꦚꦴꦪ ꦢꦛ꧀ꦜꦧ꧀ꦧꦁ. ꦌꦮꦁ ꦥꦱ꧀ꦱꦁ…ꦥꦺ… ꦤꦴꦥꦫꦁ ꦆꦠ꧀ꦡꦠ꧀ꦠꦴꦪꦴꦠꦶ ꦥꦗꦴꦤꦴꦠꦷ’’ꦠꦶ. ꦖꦛ꧀ꦜꦁ.

꧗. ꦱꦲꦺꦠꦸꦄꦤꦶꦕ꧀ꦕꦱꦸꦠ꧀ꦠꦁ

꧑꧘. ꦱꦴꦮꦠ꧀ꦡꦶꦤꦶꦢꦴꦤꦁ. ‘‘ꦫꦹꦥꦁ, ꦨꦶꦏ꧀ꦑꦮꦺ, ꦄꦤꦶꦕ꧀ꦕꦁ. ꦪꦺꦴꦥꦶ ꦲꦺꦠꦸ, ꦪꦺꦴꦥꦶ ꦥꦕ꧀ꦕꦪꦺꦴ ꦫꦹꦥꦱ꧀ꦱ ꦈꦥ꧀ꦥꦴꦢꦴꦪ, ꦱꦺꦴꦥꦶ ꦄꦤꦶꦕ꧀ꦕꦺꦴ. ꦄꦤꦶꦕ꧀ꦕꦱꦩ꧀ꦨꦹꦠꦁ, ꦨꦶꦏ꧀ꦑꦮꦺ, ꦫꦹꦥꦁ ꦏꦸꦠꦺꦴ ꦤꦶꦕ꧀ꦕꦁ ꦨꦮꦶꦱ꧀ꦱꦠꦶ! ꦮꦺꦢꦤꦴ ꦄꦤꦶꦕ꧀ꦕꦴ. ꦪꦺꦴꦥꦶ ꦲꦺꦠꦸ, ꦪꦺꦴꦥꦶ ꦥꦕ꧀ꦕꦪꦺꦴ ꦮꦺꦢꦤꦴꦪ ꦈꦥ꧀ꦥꦴꦢꦴꦪ, ꦱꦺꦴꦥꦶ ꦄꦤꦶꦕ꧀ꦕꦺꦴ. ꦄꦤꦶꦕ꧀ꦕꦱꦩ꧀ꦨꦹꦠꦴ, ꦨꦶꦏ꧀ꦑꦮꦺ, ꦮꦺꦢꦤꦴ ꦏꦸꦠꦺꦴ ꦤꦶꦕ꧀ꦕꦴ ꦨꦮꦶꦱ꧀ꦱꦠꦶ! ꦱꦚ꧀ꦚꦴ ꦄꦤꦶꦕ꧀ꦕꦴ… ꦱꦔ꧀ꦑꦴꦫꦴ ꦄꦤꦶꦕ꧀ꦕꦴ. ꦪꦺꦴꦥꦶ ꦲꦺꦠꦸ ꦪꦺꦴꦥꦶ ꦥꦕ꧀ꦕꦪꦺꦴ ꦱꦔ꧀ꦑꦴꦫꦴꦤꦁ ꦈꦥ꧀ꦥꦴꦢꦴꦪ, ꦱꦺꦴꦥꦶ ꦄꦤꦶꦕ꧀ꦕꦺꦴ. ꦄꦤꦶꦕ꧀ꦕꦱꦩ꧀ꦨꦹꦠꦴ, ꦨꦶꦏ꧀ꦑꦮꦺ, ꦱꦔ꧀ꦑꦴꦫꦴ ꦏꦸꦠꦺꦴ ꦤꦶꦕ꧀ꦕꦴ ꦨꦮꦶꦱ꧀ꦱꦤ꧀ꦠꦶ! ꦮꦶꦚ꧀ꦚꦴꦟꦁ ꦄꦤꦶꦕ꧀ꦕꦁ. ꦪꦺꦴꦥꦶ ꦲꦺꦠꦸ ꦪꦺꦴꦥꦶ ꦥꦕ꧀ꦕꦪꦺꦴ ꦮꦶꦚ꧀ꦚꦴꦟꦱ꧀ꦱ ꦈꦥ꧀ꦥꦴꦢꦴꦪ, ꦱꦺꦴꦥꦶ ꦄꦤꦶꦕ꧀ꦕꦺꦴ. ꦄꦤꦶꦕ꧀ꦕꦱꦩ꧀ꦨꦹꦠꦁ, ꦨꦶꦏ꧀ꦑꦮꦺ, ꦮꦶꦚ꧀ꦚꦴꦟꦁ ꦏꦸꦠꦺꦴ ꦤꦶꦕ꧀ꦕꦁ ꦨꦮꦶꦱ꧀ꦱꦠꦶ! ꦌꦮꦁ ꦥꦱ꧀ꦱꦁ…ꦥꦺ… ꦤꦴꦥꦫꦁ ꦆꦠ꧀ꦡꦠ꧀ꦠꦴꦪꦴꦠꦶ ꦥꦗꦴꦤꦴꦠꦷ’’ꦠꦶ. ꦱꦠ꧀ꦠꦩꦁ.

꧘. ꦱꦲꦺꦠꦸꦢꦸꦏ꧀ꦑꦱꦸꦠ꧀ꦠꦁ

꧑꧙. ꦱꦴꦮꦠ꧀ꦡꦶꦤꦶꦢꦴꦤꦁ. ‘‘ꦫꦹꦥꦁ, ꦨꦶꦏ꧀ꦑꦮꦺ, ꦢꦸꦏ꧀ꦑꦁ. ꦪꦺꦴꦥꦶ ꦲꦺꦠꦸ ꦪꦺꦴꦥꦶ ꦥꦕ꧀ꦕꦪꦺꦴ ꦫꦹꦥꦱ꧀ꦱ ꦈꦥ꧀ꦥꦴꦢꦴꦪ, ꦱꦺꦴꦥꦶ ꦢꦸꦏ꧀ꦑꦺꦴ. ꦢꦸꦏ꧀ꦑꦱꦩ꧀ꦨꦹꦠꦁ, ꦨꦶꦏ꧀ꦑꦮꦺ, ꦫꦹꦥꦁ ꦏꦸꦠꦺꦴ ꦱꦸꦑꦁ ꦨꦮꦶꦱ꧀ꦱꦠꦶ! ꦮꦺꦢꦤꦴ ꦢꦸꦏ꧀ꦑꦴ… ꦱꦚ꧀ꦚꦴ ꦢꦸꦏ꧀ꦑꦴ… ꦱꦔ꧀ꦑꦴꦫꦴ ꦢꦸꦏ꧀ꦑꦴ… ꦮꦶꦚ꧀ꦚꦴꦟꦁ ꦢꦸꦏ꧀ꦑꦁ. ꦪꦺꦴꦥꦶ ꦲꦺꦠꦸ ꦪꦺꦴꦥꦶ ꦥꦕ꧀ꦕꦪꦺꦴ ꦮꦶꦚ꧀ꦚꦴꦟꦱ꧀ꦱ ꦈꦥ꧀ꦥꦴꦢꦴꦪ, ꦱꦺꦴꦥꦶ ꦢꦸꦏ꧀ꦑꦺꦴ. ꦢꦸꦏ꧀ꦑꦱꦩ꧀ꦨꦹꦠꦁ, ꦨꦶꦏ꧀ꦑꦮꦺ, ꦮꦶꦚ꧀ꦚꦴꦟꦁ ꦏꦸꦠꦺꦴ ꦱꦸꦑꦁ ꦨꦮꦶꦱ꧀ꦱꦠꦶ! ꦌꦮꦁ ꦥꦱ꧀ꦱꦁ…ꦥꦺ… ꦤꦴꦥꦫꦁ ꦆꦠ꧀ꦡꦠ꧀ꦠꦴꦪꦴꦠꦶ ꦥꦗꦴꦤꦴꦠꦷ’’ꦠꦶ. ꦄꦛ꧀ꦜꦩꦁ.

꧙. ꦱꦲꦺꦠꦸꦄꦤꦠ꧀ꦠꦱꦸꦠ꧀ꦠꦁ

꧒꧐. ꦱꦴꦮꦠ꧀ꦡꦶꦤꦶꦢꦴꦤꦁ. ‘‘ꦫꦹꦥꦁ, ꦨꦶꦏ꧀ꦑꦮꦺ, ꦄꦤꦠ꧀ꦠꦴ. ꦪꦺꦴꦥꦶ ꦲꦺꦠꦸ ꦪꦺꦴꦥꦶ ꦥꦕ꧀ꦕꦪꦺꦴ ꦫꦹꦥꦱ꧀ꦱ ꦈꦥ꧀ꦥꦴꦢꦴꦪ, ꦱꦺꦴꦥꦶ ꦄꦤꦠ꧀ꦠꦴ. ꦄꦤꦠ꧀ꦠꦱꦩ꧀ꦨꦹꦠꦁ, ꦨꦶꦏ꧀ꦑꦮꦺ, ꦫꦹꦥꦁ ꦏꦸꦠꦺꦴ ꦄꦠ꧀ꦠꦴ ꦨꦮꦶꦱ꧀ꦱꦠꦶ! ꦮꦺꦢꦤꦴ ꦄꦤꦠ꧀ꦠꦴ… ꦱꦚ꧀ꦚꦴ ꦄꦤꦠ꧀ꦠꦴ… ꦱꦔ꧀ꦑꦴꦫꦴ ꦄꦤꦠ꧀ꦠꦴ… ꦮꦶꦚ꧀ꦚꦴꦟꦁ ꦄꦤꦠ꧀ꦠꦴ. ꦪꦺꦴꦥꦶ ꦲꦺꦠꦸ ꦪꦺꦴꦥꦶ ꦥꦕ꧀ꦕꦪꦺꦴ ꦮꦶꦚ꧀ꦚꦴꦟꦱ꧀ꦱ ꦈꦥ꧀ꦥꦴꦢꦴꦪ, ꦱꦺꦴꦥꦶ ꦄꦤꦠ꧀ꦠꦴ. ꦄꦤꦠ꧀ꦠꦱꦩ꧀ꦨꦹꦠꦁ, ꦨꦶꦏ꧀ꦑꦮꦺ, ꦮꦶꦚ꧀ꦚꦴꦟꦁ ꦏꦸꦠꦺꦴ ꦄꦠ꧀ꦠꦴ ꦨꦮꦶꦱ꧀ꦱꦠꦶ! ꦌꦮꦁ ꦥꦱ꧀ꦱꦁ…ꦥꦺ… ꦤꦴꦥꦫꦁ ꦆꦠ꧀ꦡꦠ꧀ꦠꦴꦪꦴꦠꦶ ꦥꦗꦴꦤꦴꦠꦷ’’ꦠꦶ. ꦤꦮꦩꦁ.

꧑꧐. ꦄꦴꦤꦤ꧀ꦢꦱꦸꦠ꧀ꦠꦁ

꧒꧑. ꦱꦴꦮꦠ꧀ꦡꦶꦪꦁ … ꦄꦴꦫꦴꦩꦺ. ꦄꦡ ꦑꦺꦴ ꦄꦴꦪꦱ꧀ꦩꦴ ꦄꦴꦤꦤ꧀ꦢꦺꦴ ꦪꦺꦤ ꦨꦒꦮꦴ ꦠꦺꦤꦸꦥꦱꦔ꧀ꦏꦩꦶ; ꦈꦥꦱꦔ꧀ꦏꦩꦶꦠ꧀ꦮꦴ ꦨꦒꦮꦤ꧀ꦠꦁ ꦄꦨꦶꦮꦴꦢꦺꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦷꦢꦶ. ꦌꦏꦩꦤ꧀ꦠꦁ ꦤꦶꦱꦶꦤ꧀ꦤꦺꦴ ꦑꦺꦴ ꦄꦴꦪꦱ꧀ꦩꦴ ꦄꦴꦤꦤ꧀ꦢꦺꦴ ꦨꦒꦮꦤ꧀ꦠꦁ ꦌꦠꦢꦮꦺꦴꦕ – ‘‘‘ꦤꦶꦫꦺꦴꦣꦺꦴ ꦤꦶꦫꦺꦴꦣꦺꦴ’ꦠꦶ, ꦨꦤ꧀ꦠꦺ, ꦮꦸꦕ꧀ꦕꦠꦶ. ꦏꦠꦩꦺꦱꦴꦤꦁ ꦑꦺꦴ, ꦨꦤ꧀ꦠꦺ, ꦣꦩ꧀ꦩꦴꦤꦁ ꦤꦶꦫꦺꦴꦣꦺꦴ [ꦤꦶꦫꦺꦴꦣꦴ (ꦱꦷ. ꦥꦷ.)] ‘ꦤꦶꦫꦺꦴꦣꦺꦴ’ꦠꦶ ꦮꦸꦕ꧀ꦕꦠꦷ’’ꦠꦶ? ‘‘ꦫꦹꦥꦁ ꦑꦺꦴ, ꦄꦴꦤꦤ꧀ꦢ, ꦄꦤꦶꦕ꧀ꦕꦁ ꦱꦔ꧀ꦑꦠꦁ ꦥꦛꦶꦕ꧀ꦕꦱꦩꦸꦥ꧀ꦥꦤ꧀ꦤꦁ ꦑꦪꦣꦩ꧀ꦩꦁ ꦮꦪꦣꦩ꧀ꦩꦁ ꦮꦶꦫꦴꦒꦣꦩ꧀ꦩꦁ ꦤꦶꦫꦺꦴꦣꦣꦩ꧀ꦩꦁ. ꦠꦱ꧀ꦱ ꦤꦶꦫꦺꦴꦣꦺꦴ [ꦤꦶꦫꦺꦴꦣꦴ (ꦱꦷ. ꦥꦷ.)] ‘ꦤꦶꦫꦺꦴꦣꦺꦴ’ꦠꦶ ꦮꦸꦕ꧀ꦕꦠꦶ. ꦮꦺꦢꦤꦴ ꦄꦤꦶꦕ꧀ꦕꦴ ꦱꦔ꧀ꦑꦠꦴ ꦥꦛꦶꦕ꧀ꦕꦱꦩꦸꦥ꧀ꦥꦤ꧀ꦤꦴ ꦑꦪꦣꦩ꧀ꦩꦴ ꦮꦪꦣꦩ꧀ꦩꦴ ꦮꦶꦫꦴꦒꦣꦩ꧀ꦩꦴ ꦤꦶꦫꦺꦴꦣꦣꦩ꧀ꦩꦴ. ꦠꦱ꧀ꦱꦴ ꦤꦶꦫꦺꦴꦣꦺꦴ ‘ꦤꦶꦫꦺꦴꦣꦺꦴ’ꦠꦶ ꦮꦸꦕ꧀ꦕꦠꦶ. ꦱꦚ꧀ꦚꦴ… ꦱꦔ꧀ꦑꦴꦫꦴ ꦄꦤꦶꦕ꧀ꦕꦴ ꦱꦔ꧀ꦑꦠꦴ ꦥꦛꦶꦕ꧀ꦕꦱꦩꦸꦥ꧀ꦥꦤ꧀ꦤꦴ ꦑꦪꦣꦩ꧀ꦩꦴ ꦮꦪꦣꦩ꧀ꦩꦴ ꦮꦶꦫꦴꦒꦣꦩ꧀ꦩꦴ ꦤꦶꦫꦺꦴꦣꦣꦩ꧀ꦩꦴ. ꦠꦺꦱꦁ ꦤꦶꦫꦺꦴꦣꦺꦴ ‘ꦤꦶꦫꦺꦴꦣꦺꦴ’ꦠꦶ ꦮꦸꦕ꧀ꦕꦠꦶ. ꦮꦶꦚ꧀ꦚꦴꦟꦁ ꦄꦤꦶꦕ꧀ꦕꦁ ꦱꦔ꧀ꦑꦠꦁ ꦥꦛꦶꦕ꧀ꦕꦱꦩꦸꦥ꧀ꦥꦤ꧀ꦤꦁ ꦑꦪꦣꦩ꧀ꦩꦁ ꦮꦪꦣꦩ꧀ꦩꦁ ꦮꦶꦫꦴꦒꦣꦩ꧀ꦩꦁ ꦤꦶꦫꦺꦴꦣꦣꦩ꧀ꦩꦁ. ꦠꦱ꧀ꦱ ꦤꦶꦫꦺꦴꦣꦺꦴ ‘ꦤꦶꦫꦺꦴꦣꦺꦴ’ꦠꦶ ꦮꦸꦕ꧀ꦕꦠꦶ. ꦆꦩꦺꦱꦁ ꦑꦺꦴ, ꦄꦴꦤꦤ꧀ꦢ, ꦣꦩ꧀ꦩꦴꦤꦁ ꦤꦶꦫꦺꦴꦣꦺꦴ ‘ꦤꦶꦫꦺꦴꦣꦺꦴ’ꦠꦶ ꦮꦸꦕ꧀ꦕꦠꦷ’’ꦠꦶ. ꦢꦱꦩꦁ.

ꦄꦤꦶꦕ꧀ꦕꦮꦒ꧀ꦒꦺꦴ ꦢꦸꦠꦶꦪꦺꦴ.

ꦠꦱ꧀ꦱꦸꦢ꧀ꦢꦴꦤꦁ –

ꦄꦤꦶꦕ꧀ꦕꦁ ꦢꦸꦏ꧀ꦑꦁ ꦄꦤꦠ꧀ꦠꦴ, ꦪꦢꦤꦶꦕ꧀ꦕꦴꦥꦫꦺ ꦠꦪꦺꦴ;

ꦲꦺꦠꦸꦤꦴꦥꦶ ꦠꦪꦺꦴ ꦮꦸꦠ꧀ꦠꦴ, ꦄꦴꦤꦤ꧀ꦢꦺꦤ ꦕ ꦠꦺ ꦢꦱꦴꦠꦶ.