꧑꧐. ꦮꦺꦥꦸꦭ꧀ꦭꦥꦧ꧀ꦧꦠꦱꦸꦠ꧀ꦠꦁ

꧑꧔꧓. ꦌꦏꦁ ꦱꦩꦪꦁ ꦨꦒꦮꦴ ꦫꦴꦗꦒꦲꦺ ꦮꦶꦲꦫꦠꦶ ꦒꦶꦗ꧀ꦙꦏꦹꦛꦺ ꦥꦧ꧀ꦧꦠꦺ. ꦠꦠ꧀ꦫ ꦑꦺꦴ ꦨꦒꦮꦴ ꦨꦶꦏ꧀ꦑꦹ ꦄꦴꦩꦤ꧀ꦠꦺꦱꦶ – ‘‘ꦨꦶꦏ꧀ꦑꦮꦺꦴ’’ꦠꦶ. ‘‘ꦨꦢꦤ꧀ꦠꦺ’’ꦠꦶ ꦠꦺ ꦨꦶꦏ꧀ꦑꦹ ꦨꦒꦮꦠꦺꦴ ꦥꦕ꧀ꦕꦱ꧀ꦱꦺꦴꦱꦸꦁ. ꦨꦒꦮꦴ ꦌꦠꦢꦮꦺꦴꦕ –

‘‘ꦄꦤꦩꦠꦒ꧀ꦒꦺꦴꦪꦁ, ꦨꦶꦏ꧀ꦑꦮꦺ, ꦱꦁꦱꦴꦫꦺꦴ. ꦥꦸꦧ꧀ꦧꦴ ꦏꦺꦴꦛꦶ ꦤ ꦥꦚ꧀ꦚꦴꦪꦠꦶ ꦄꦮꦶꦗ꧀ꦗꦴꦤꦷꦮꦫꦟꦴꦤꦁ ꦱꦠ꧀ꦠꦴꦤꦁ ꦠꦟ꧀ꦲꦴꦱꦁꦪꦺꦴꦗꦤꦴꦤꦁ ꦱꦤ꧀ꦣꦴꦮꦠꦁ ꦱꦁꦱꦫꦠꦁ. ꦨꦹꦠꦥꦸꦧ꧀ꦧꦁ, ꦨꦶꦏ꧀ꦑꦮꦺ, ꦆꦩꦱ꧀ꦱ ꦮꦺꦥꦸꦭ꧀ꦭꦱ꧀ꦱ ꦥꦧ꧀ꦧꦠꦱ꧀ꦱ ‘ꦥꦴꦕꦷꦤꦮꦁꦱꦺꦴ’ꦠ꧀ꦮꦺꦮ ꦱꦩꦚ꧀ꦚꦴ ꦈꦢꦥꦴꦢꦶ. ꦠꦺꦤ ꦑꦺꦴ ꦥꦤ, ꦨꦶꦏ꧀ꦑꦮꦺ, ꦱꦩꦪꦺꦤ ꦩꦤꦸꦱ꧀ꦱꦴꦤꦁ ‘ꦠꦶꦮꦫꦴ’ꦠ꧀ꦮꦺꦮ ꦱꦩꦚ꧀ꦚꦴ ꦈꦢꦥꦴꦢꦶ. ꦠꦶꦮꦫꦴꦤꦁ, ꦨꦶꦏ꧀ꦑꦮꦺ, ꦩꦤꦸꦱ꧀ꦱꦴꦤꦁ ꦕꦠ꧀ꦠꦴꦫꦷꦱ ꦮꦱ꧀ꦱꦱꦲꦱ꧀ꦱꦴꦤꦶ ꦄꦴꦪꦸꦥ꧀ꦥꦩꦴꦟꦁ ꦄꦲꦺꦴꦱꦶ. ꦠꦶꦮꦫꦴ, ꦨꦶꦏ꧀ꦑꦮꦺ, ꦩꦤꦸꦱ꧀ꦱꦴ ꦥꦴꦕꦷꦤꦮꦁꦱꦁ ꦥꦧ꧀ꦧꦠꦁ ꦕꦠꦹꦲꦺꦤ ꦄꦴꦫꦺꦴꦲꦤ꧀ꦠꦶ, ꦕꦠꦹꦲꦺꦤ ꦎꦫꦺꦴꦲꦤ꧀ꦠꦶ. ꦠꦺꦤ ꦑꦺꦴ ꦥꦤ, ꦨꦶꦏ꧀ꦑꦮꦺ, ꦱꦩꦪꦺꦤ ꦏꦏꦸꦱꦤ꧀ꦣꦺꦴ ꦨꦒꦮꦴ ꦄꦫꦲꦁ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦴ ꦭꦺꦴꦏꦺ ꦈꦥ꧀ꦥꦤ꧀ꦤꦺꦴ ꦲꦺꦴꦠꦶ. ꦏꦏꦸꦱꦤ꧀ꦣꦱ꧀ꦱ, ꦨꦶꦏ꧀ꦑꦮꦺ, ꦨꦒꦮꦠꦺꦴ ꦄꦫꦲꦠꦺꦴ ꦱꦩ꧀ꦩꦴꦱꦩ꧀ꦧꦸꦢ꧀ꦣꦱ꧀ꦱ ꦮꦶꦣꦸꦫꦱꦚ꧀ꦗꦷꦮꦁ ꦤꦴꦩ ꦱꦴꦮꦏꦪꦸꦒꦁ ꦄꦲꦺꦴꦱꦶ ꦄꦒ꧀ꦒꦁ ꦨꦢ꧀ꦢꦪꦸꦒꦁ. ꦥꦱ꧀ꦱꦡ, ꦨꦶꦏ꧀ꦑꦮꦺ, ꦱꦴ ꦕꦺꦮꦶꦩꦱ꧀ꦱ ꦥꦧ꧀ꦧꦠꦱ꧀ꦱ ꦱꦩꦚ꧀ꦚꦴ ꦄꦤ꧀ꦠꦫꦲꦶꦠꦴ, ꦠꦺ ꦕ ꦩꦤꦸꦱ꧀ꦱꦴ ꦏꦴꦭꦔ꧀ꦏꦠꦴ, ꦱꦺꦴ ꦕ ꦨꦒꦮꦴ ꦥꦫꦶꦤꦶꦧ꧀ꦧꦸꦠꦺꦴ. ꦌꦮꦁ ꦄꦤꦶꦕ꧀ꦕꦴ, ꦨꦶꦏ꧀ꦑꦮꦺ, ꦱꦔ꧀ꦑꦴꦫꦴ; ꦌꦮꦁ ꦄꦢ꧀ꦣꦸꦮꦴ, ꦨꦶꦏ꧀ꦑꦮꦺ, ꦱꦔ꧀ꦑꦴꦫꦴ; ꦌꦮꦁ ꦄꦤꦱ꧀ꦱꦴꦱꦶꦏꦴ, ꦨꦶꦏ꧀ꦑꦮꦺ, ꦱꦔ꧀ꦑꦴꦫꦴ. ꦪꦴꦮꦚ꧀ꦕꦶꦢꦁ, ꦨꦶꦏ꧀ꦑꦮꦺ, ꦄꦭꦩꦺꦮ ꦱꦧ꧀ꦧꦱꦔ꧀ꦑꦴꦫꦺꦱꦸ ꦤꦶꦧ꧀ꦧꦶꦤ꧀ꦢꦶꦠꦸꦁ, ꦄꦭꦁ ꦮꦶꦫꦗ꧀ꦗꦶꦠꦸꦁ, ꦄꦭꦁ ꦮꦶꦩꦸꦕ꧀ꦕꦶꦠꦸꦁ.

‘‘ꦨꦹꦠꦥꦸꦧ꧀ꦧꦁ, ꦨꦶꦏ꧀ꦑꦮꦺ, ꦆꦩꦱ꧀ꦱ ꦮꦺꦥꦸꦭ꧀ꦭꦱ꧀ꦱ ꦥꦧ꧀ꦧꦠꦱ꧀ꦱ ‘ꦮꦔ꧀ꦏꦏꦺꦴ’ꦠ꧀ꦮꦺꦮ ꦱꦩꦚ꧀ꦚꦴ ꦈꦢꦥꦴꦢꦶ. ꦠꦺꦤ ꦑꦺꦴ ꦥꦤ, ꦨꦶꦏ꧀ꦑꦮꦺ, ꦱꦩꦪꦺꦤ ꦩꦤꦸꦱ꧀ꦱꦴꦤꦁ ‘ꦫꦺꦴꦲꦶꦠꦱ꧀ꦱꦴ’ꦠ꧀ꦮꦺꦮ ꦱꦩꦚ꧀ꦚꦴ ꦈꦢꦥꦴꦢꦶ. ꦫꦺꦴꦲꦶꦠꦱ꧀ꦱꦴꦤꦁ, ꦨꦶꦏ꧀ꦑꦮꦺ, ꦩꦤꦸꦱ꧀ꦱꦴꦤꦁ ꦠꦶꦁꦱꦮꦱ꧀ꦱꦱꦲꦱ꧀ꦱꦴꦤꦶ ꦄꦴꦪꦸꦥ꧀ꦥꦩꦴꦟꦁ ꦄꦲꦺꦴꦱꦶ. ꦫꦺꦴꦲꦶꦠꦱ꧀ꦱꦴ, ꦨꦶꦏ꧀ꦑꦮꦺ, ꦩꦤꦸꦱ꧀ꦱꦴ ꦮꦔ꧀ꦏꦏꦁ ꦥꦧ꧀ꦧꦠꦁ ꦠꦷꦲꦺꦤ ꦄꦴꦫꦺꦴꦲꦤ꧀ꦠꦶ, ꦠꦷꦲꦺꦤ ꦎꦫꦺꦴꦲꦤ꧀ꦠꦶ. ꦠꦺꦤ ꦑꦺꦴ ꦥꦤ, ꦨꦶꦏ꧀ꦑꦮꦺ, ꦱꦩꦪꦺꦤ ꦏꦺꦴꦟꦴꦒꦩꦤꦺꦴ ꦨꦒꦮꦴ ꦄꦫꦲꦁ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦴ ꦭꦺꦴꦏꦺ ꦈꦥ꧀ꦥꦤ꧀ꦤꦺꦴ ꦲꦺꦴꦠꦶ. ꦏꦺꦴꦟꦴꦒꦩꦤꦱ꧀ꦱ, ꦨꦶꦏ꧀ꦑꦮꦺ, ꦨꦒꦮꦠꦺꦴ ꦄꦫꦲꦠꦺꦴ ꦱꦩ꧀ꦩꦴꦱꦩ꧀ꦧꦸꦢ꧀ꦣꦱ꧀ꦱ ꦨꦶꦪ꧀ꦪꦺꦴꦱꦸꦠ꧀ꦠꦫꦁ ꦤꦴꦩ ꦱꦴꦮꦏꦪꦸꦒꦁ ꦄꦲꦺꦴꦱꦶ ꦄꦒ꧀ꦒꦁ ꦨꦢ꧀ꦢꦪꦸꦒꦁ. ꦥꦱ꧀ꦱꦡ, ꦨꦶꦏ꧀ꦑꦮꦺ, ꦱꦴ ꦕꦺꦮꦶꦩꦱ꧀ꦱ ꦥꦧ꧀ꦧꦠꦱ꧀ꦱ ꦱꦩꦚ꧀ꦚꦴ ꦄꦤ꧀ꦠꦫꦲꦶꦠꦴ, ꦠꦺ ꦕ ꦩꦤꦸꦱ꧀ꦱꦴ ꦏꦴꦭꦔ꧀ꦏꦠꦴ, ꦱꦺꦴ ꦕ ꦨꦒꦮꦴ ꦥꦫꦶꦤꦶꦧ꧀ꦧꦸꦠꦺꦴ. ꦌꦮꦁ ꦄꦤꦶꦕ꧀ꦕꦴ, ꦨꦶꦏ꧀ꦑꦮꦺ, ꦱꦔ꧀ꦑꦴꦫꦴ…ꦥꦺ… ꦄꦭꦁ ꦮꦶꦩꦸꦕ꧀ꦕꦶꦠꦸꦁ.

‘‘ꦨꦹꦠꦥꦸꦧ꧀ꦧꦁ, ꦨꦶꦏ꧀ꦑꦮꦺ, ꦆꦩꦱ꧀ꦱ ꦮꦺꦥꦸꦭ꧀ꦭꦱ꧀ꦱ ꦥꦧ꧀ꦧꦠꦱ꧀ꦱ ‘ꦱꦸꦥꦱ꧀ꦱꦺꦴ’ꦠ꧀ꦮꦺꦮ [ꦱꦸꦦꦱ꧀ꦱꦺꦴꦠ꧀ꦮꦺꦮ (ꦱꦷ.)] ꦱꦩꦚ꧀ꦚꦴ ꦈꦢꦥꦴꦢꦶ. ꦠꦺꦤ ꦑꦺꦴ ꦥꦤ, ꦨꦶꦏ꧀ꦑꦮꦺ, ꦱꦩꦪꦺꦤ ꦩꦤꦸꦱ꧀ꦱꦴꦤꦁ ‘ꦱꦸꦥ꧀ꦥꦶꦪꦴ’ꦠ꧀ꦮꦺꦮ [ꦄꦥ꧀ꦥꦶꦪꦴꦠ꧀ꦮꦺꦮ (ꦱꦷ.)] ꦱꦩꦚ꧀ꦚꦴ ꦈꦢꦥꦴꦢꦶ. ꦱꦸꦥ꧀ꦥꦶꦪꦴꦤꦁ, ꦨꦶꦏ꧀ꦑꦮꦺ, ꦩꦤꦸꦱ꧀ꦱꦴꦤꦁ ꦮꦷꦱꦠꦶꦮꦱ꧀ꦱꦱꦲꦱ꧀ꦱꦴꦤꦶ ꦄꦴꦪꦸꦥ꧀ꦥꦩꦴꦟꦁ ꦄꦲꦺꦴꦱꦶ. ꦱꦸꦥ꧀ꦥꦶꦪꦴ, ꦨꦶꦏ꧀ꦑꦮꦺ, ꦩꦤꦸꦱ꧀ꦱꦴ ꦱꦸꦥꦱ꧀ꦱꦁ ꦥꦧ꧀ꦧꦠꦁ ꦢ꧀ꦮꦷꦲꦺꦤ ꦄꦴꦫꦺꦴꦲꦤ꧀ꦠꦶ, ꦢ꧀ꦮꦷꦲꦺꦤ ꦎꦫꦺꦴꦲꦤ꧀ꦠꦶ. ꦠꦺꦤ ꦑꦺꦴ ꦥꦤ, ꦨꦶꦏ꧀ꦑꦮꦺ, ꦱꦩꦪꦺꦤ ꦏꦱ꧀ꦱꦥꦺꦴ ꦨꦒꦮꦴ ꦄꦫꦲꦁ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦴ ꦭꦺꦴꦏꦺ ꦈꦥ꧀ꦥꦤ꧀ꦤꦺꦴ ꦲꦺꦴꦠꦶ. ꦏꦱ꧀ꦱꦥꦱ꧀ꦱ, ꦨꦶꦏ꧀ꦑꦮꦺ, ꦨꦒꦮꦠꦺꦴ ꦄꦫꦲꦠꦺꦴ ꦱꦩ꧀ꦩꦴꦱꦩ꧀ꦧꦸꦢ꧀ꦣꦱ꧀ꦱ ꦠꦶꦱ꧀ꦱꦨꦴꦫꦢ꧀ꦮꦴꦗꦁ ꦤꦴꦩ ꦱꦴꦮꦏꦪꦸꦒꦁ ꦄꦲꦺꦴꦱꦶ ꦄꦒ꧀ꦒꦁ ꦨꦢ꧀ꦢꦪꦸꦒꦁ. ꦥꦱ꧀ꦱꦡ, ꦨꦶꦏ꧀ꦑꦮꦺ, ꦱꦴ ꦕꦺꦮꦶꦩꦱ꧀ꦱ ꦥꦧ꧀ꦧꦠꦱ꧀ꦱ ꦱꦩꦚ꧀ꦚꦴ ꦄꦤ꧀ꦠꦫꦲꦶꦠꦴ, ꦠꦺ ꦕ ꦩꦤꦸꦱ꧀ꦱꦴ ꦏꦴꦭꦔ꧀ꦏꦠꦴ, ꦱꦺꦴ ꦕ ꦨꦒꦮꦴ ꦥꦫꦶꦤꦶꦧ꧀ꦧꦸꦠꦺꦴ. ꦌꦮꦁ ꦄꦤꦶꦕ꧀ꦕꦴ, ꦨꦶꦏ꧀ꦑꦮꦺ, ꦱꦔ꧀ꦑꦴꦫꦴ; ꦌꦮꦁ ꦄꦢ꧀ꦣꦸꦮꦴ, ꦨꦶꦏ꧀ꦑꦮꦺ, ꦱꦔ꧀ꦑꦴꦫꦴ…ꦥꦺ… ꦄꦭꦁ ꦮꦶꦩꦸꦕ꧀ꦕꦶꦠꦸꦁ.

‘‘ꦌꦠꦫꦲꦶ ꦑꦺꦴ ꦥꦤ, ꦨꦶꦏ꧀ꦑꦮꦺ, ꦆꦩꦱ꧀ꦱ ꦮꦺꦥꦸꦭ꧀ꦭꦱ꧀ꦱ ꦥꦧ꧀ꦧꦠꦱ꧀ꦱ ‘ꦮꦺꦥꦸꦭ꧀ꦭꦺꦴ’ꦠ꧀ꦮꦺꦮ ꦱꦩꦚ꧀ꦚꦴ ꦈꦢꦥꦴꦢꦶ. ꦌꦠꦫꦲꦶ ꦑꦺꦴ ꦥꦤ, ꦨꦶꦏ꧀ꦑꦮꦺ, ꦆꦩꦺꦱꦁ ꦩꦤꦸꦱ꧀ꦱꦴꦤꦁ ‘ꦩꦴꦒꦣꦏꦴ’ꦠ꧀ꦮꦺꦮ ꦱꦩꦚ꧀ꦚꦴ ꦈꦢꦥꦴꦢꦶ. ꦩꦴꦒꦣꦏꦴꦤꦁ, ꦨꦶꦏ꧀ꦑꦮꦺ, ꦩꦤꦸꦱ꧀ꦱꦴꦤꦁ ꦄꦥ꧀ꦥꦏꦁ ꦄꦴꦪꦸꦥ꧀ꦥꦩꦴꦟꦁ ꦥꦫꦶꦠ꧀ꦠꦁ ꦭꦲꦸꦏꦁ [ꦭꦲꦸꦱꦁ (ꦱꦷ.)]; ꦪꦺꦴ ꦕꦶꦫꦁ ꦗꦷꦮꦠꦶ ꦱꦺꦴ ꦮꦱ꧀ꦱꦱꦠꦁ ꦄꦥ꧀ꦥꦁ ꦮꦴ ꦨꦶꦪ꧀ꦪꦺꦴ. ꦩꦴꦒꦣꦏꦴ, ꦨꦶꦏ꧀ꦑꦮꦺ, ꦩꦤꦸꦱ꧀ꦱꦴ ꦮꦺꦥꦸꦭ꧀ꦭꦁ ꦥꦧ꧀ꦧꦠꦁ ꦩꦸꦲꦸꦠ꧀ꦠꦺꦤ ꦄꦴꦫꦺꦴꦲꦤ꧀ꦠꦶ ꦩꦸꦲꦸꦠ꧀ꦠꦺꦤ ꦎꦫꦺꦴꦲꦤ꧀ꦠꦶ. ꦌꦠꦫꦲꦶ ꦑꦺꦴ ꦥꦤꦴꦲꦁ, ꦨꦶꦏ꧀ꦑꦮꦺ, ꦄꦫꦲꦁ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦴ ꦭꦺꦴꦏꦺ ꦈꦥ꧀ꦥꦤ꧀ꦤꦺꦴ. ꦩꦪ꧀ꦲꦁ ꦑꦺꦴ ꦥꦤ, ꦨꦶꦏ꧀ꦑꦮꦺ, ꦱꦴꦫꦶꦥꦸꦠ꧀ꦠꦩꦺꦴꦒ꧀ꦒꦭ꧀ꦭꦴꦤꦁ ꦤꦴꦩ ꦱꦴꦮꦏꦪꦸꦒꦁ ꦄꦒ꧀ꦒꦁ ꦨꦢ꧀ꦢꦪꦸꦒꦁ. ꦨꦮꦶꦱ꧀ꦱꦠꦶ, ꦨꦶꦏ꧀ꦑꦮꦺ, ꦱꦺꦴ ꦱꦩꦪꦺꦴ ꦪꦴ ꦄꦪꦚ꧀ꦕꦺꦮꦶꦩꦱ꧀ꦱ ꦥꦧ꧀ꦧꦠꦱ꧀ꦱ ꦱꦩꦚ꧀ꦚꦴ ꦄꦤ꧀ꦠꦫꦣꦴꦪꦶꦱ꧀ꦱꦠꦶ, ꦆꦩꦺ ꦕ ꦩꦤꦸꦱ꧀ꦱꦴ ꦏꦴꦭꦁ ꦏꦫꦶꦱ꧀ꦱꦤ꧀ꦠꦶ, ꦄꦲꦚ꧀ꦕ ꦥꦫꦶꦤꦶꦧ꧀ꦧꦴꦪꦶꦱ꧀ꦱꦴꦩꦶ. ꦌꦮꦁ ꦄꦤꦶꦕ꧀ꦕꦴ, ꦨꦶꦏ꧀ꦑꦮꦺ, ꦱꦔ꧀ꦑꦴꦫꦴ; ꦌꦮꦁ ꦄꦢ꧀ꦣꦸꦮꦴ, ꦨꦶꦏ꧀ꦑꦮꦺ, ꦱꦔ꧀ꦑꦴꦫꦴ; ꦌꦮꦁ ꦄꦤꦱ꧀ꦱꦴꦱꦶꦏꦴ, ꦨꦶꦏ꧀ꦑꦮꦺ, ꦱꦔ꧀ꦑꦴꦫꦴ. ꦪꦴꦮꦚ꧀ꦕꦶꦢꦁ, ꦨꦶꦏ꧀ꦑꦮꦺ, ꦄꦭꦩꦺꦮ ꦱꦧ꧀ꦧꦱꦔ꧀ꦑꦴꦫꦺꦱꦸ ꦤꦶꦧ꧀ꦧꦶꦤ꧀ꦢꦶꦠꦸꦁ, ꦄꦭꦁ ꦮꦶꦫꦗ꧀ꦗꦶꦠꦸꦁ, ꦄꦭꦁ ꦮꦶꦩꦸꦕ꧀ꦕꦶꦠꦸ’’ꦤ꧀ꦠꦶ.

ꦆꦢꦩꦮꦺꦴꦕ ꦨꦒꦮꦴ. ꦆꦢꦁ ꦮꦠ꧀ꦮꦴꦤ ꦱꦸꦒꦠꦺꦴ ꦄꦡꦴꦥꦫꦁ ꦌꦠꦢꦮꦺꦴꦕ ꦱꦠ꧀ꦡꦴ –

‘‘ꦥꦴꦕꦷꦤꦮꦁꦱꦺꦴ ꦠꦶꦮꦫꦴꦤꦁ, ꦫꦺꦴꦲꦶꦠꦱ꧀ꦱꦴꦤ ꦮꦔ꧀ꦏꦏꦺꦴ;

ꦱꦸꦥ꧀ꦥꦶꦪꦴꦤꦁ ꦱꦸꦥꦱ꧀ꦱꦺꦴꦠꦶ, ꦩꦴꦒꦣꦴꦤꦚ꧀ꦕ ꦮꦺꦥꦸꦭ꧀ꦭꦺꦴ.

‘‘ꦄꦤꦶꦕ꧀ꦕꦴ ꦮꦠ ꦱꦔ꧀ꦑꦴꦫꦴ, ꦈꦥ꧀ꦥꦴꦢꦮꦪꦣꦩ꧀ꦩꦶꦤꦺꦴ;

ꦈꦥ꧀ꦥꦗ꧀ꦗꦶꦠ꧀ꦮꦴ ꦤꦶꦫꦸꦗ꧀ꦙꦤ꧀ꦠꦶ, ꦠꦺꦱꦁ ꦮꦹꦥꦱꦩꦺꦴ ꦱꦸꦑꦺꦴ’’ꦠꦶ. ꦢꦱꦩꦁ;

ꦢꦸꦠꦶꦪꦺꦴ ꦮꦒ꧀ꦒꦺꦴ.

ꦠꦱ꧀ꦱꦸꦢ꧀ꦢꦴꦤꦁ –

ꦢꦸꦒ꧀ꦒꦠꦁ ꦱꦸꦑꦶꦠꦚ꧀ꦕꦺꦮ, ꦠꦶꦁꦱ ꦩꦴꦠꦴꦥꦶꦠꦺꦤ ꦕ;

ꦨꦴꦠꦴ ꦨꦒꦶꦤꦷ ꦥꦸꦠ꧀ꦠꦺꦴ ꦕ, ꦣꦷꦠꦴ ꦮꦺꦥꦸꦭ꧀ꦭꦥꦧ꧀ꦧꦠꦁ.

ꦄꦤꦩꦠꦒ꧀ꦒꦱꦁꦪꦸꦠ꧀ꦠꦁ ꦱꦩꦠ꧀ꦠꦁ.