꧑. ꦱꦠ꧀ꦠꦣꦴꦠꦸꦱꦸꦠ꧀ꦠꦁ

꧙꧕. ꦱꦴꦮꦠ꧀ꦡꦶꦪꦁ ꦮꦶꦲꦫꦠꦶ…ꦥꦺ… ‘‘ꦱꦠ꧀ꦠꦶꦩꦴ, ꦨꦶꦏ꧀ꦑꦮꦺ, ꦣꦴꦠꦸꦪꦺꦴ. ꦏꦠꦩꦴ ꦱꦠ꧀ꦠ? ꦄꦴꦨꦴꦣꦴꦠꦸ, ꦱꦸꦨꦣꦴꦠꦸ, ꦄꦴꦏꦴꦱꦴꦤꦚ꧀ꦕꦴꦪꦠꦤꦣꦴꦠꦸ, ꦮꦶꦚ꧀ꦚꦴꦟꦚ꧀ꦕꦴꦪꦠꦤꦣꦴꦠꦸ, ꦄꦴꦏꦶꦚ꧀ꦕꦚ꧀ꦚꦴꦪꦠꦤꦣꦴꦠꦸ, ꦤꦺꦮꦱꦚ꧀ꦚꦴꦤꦴꦱꦚ꧀ꦚꦴꦪꦠꦤꦣꦴꦠꦸ, ꦱꦚ꧀ꦚꦴꦮꦺꦢꦪꦶꦠꦤꦶꦫꦺꦴꦣꦣꦴꦠꦸ – ꦆꦩꦴ ꦑꦺꦴ, ꦨꦶꦏ꧀ꦑꦮꦺ, ꦱꦠ꧀ꦠ ꦣꦴꦠꦸꦪꦺꦴ’’ꦠꦶ.

ꦌꦮꦁ ꦮꦸꦠ꧀ꦠꦺ, ꦄꦚ꧀ꦚꦠꦫꦺꦴ ꦨꦶꦏ꧀ꦑꦸ ꦨꦒꦮꦤ꧀ꦠꦁ ꦌꦠꦢꦮꦺꦴꦕ – ‘‘ꦪꦴ ꦕꦴꦪꦁ, ꦨꦤ꧀ꦠꦺ, ꦄꦴꦨꦴꦣꦴꦠꦸ ꦪꦴ ꦕ ꦱꦸꦨꦣꦴꦠꦸ ꦪꦴ ꦕ ꦄꦴꦏꦴꦱꦴꦤꦚ꧀ꦕꦴꦪꦠꦤꦣꦴꦠꦸ ꦪꦴ ꦕ ꦮꦶꦚ꧀ꦚꦴꦟꦚ꧀ꦕꦴꦪꦠꦤꦣꦴꦠꦸ ꦪꦴ ꦕ ꦄꦴꦏꦶꦚ꧀ꦕꦚ꧀ꦚꦴꦪꦠꦤꦣꦴꦠꦸ ꦪꦴ ꦕ ꦤꦺꦮꦱꦚ꧀ꦚꦴꦤꦴꦱꦚ꧀ꦚꦴꦪꦠꦤꦣꦴꦠꦸ ꦪꦴ ꦕ ꦱꦚ꧀ꦚꦴꦮꦺꦢꦪꦶꦠꦤꦶꦫꦺꦴꦣꦣꦴꦠꦸ – ꦆꦩꦴ ꦤꦸ ꦑꦺꦴ, ꦨꦤ꧀ꦠꦺ, ꦣꦴꦠꦸꦪꦺꦴ ꦏꦶꦁ ꦥꦛꦶꦕ꧀ꦕ ꦥꦚ꧀ꦚꦴꦪꦤ꧀ꦠꦷ’’ꦠꦶ?

‘‘ꦪꦴꦪꦁ, ꦨꦶꦏ꧀ꦑꦸ, ꦄꦴꦨꦴꦣꦴꦠꦸ – ꦄꦪꦁ ꦣꦴꦠꦸ ꦄꦤ꧀ꦣꦏꦴꦫꦁ ꦥꦛꦶꦕ꧀ꦕ ꦥꦚ꧀ꦚꦴꦪꦠꦶ. ꦪꦴꦪꦁ, ꦨꦶꦏ꧀ꦑꦸ, ꦱꦸꦨꦣꦴꦠꦸ – ꦄꦪꦁ ꦣꦴꦠꦸ ꦄꦱꦸꦨꦁ ꦥꦛꦶꦕ꧀ꦕ ꦥꦚ꧀ꦚꦴꦪꦠꦶ. ꦪꦴꦪꦁ, ꦨꦶꦏ꧀ꦑꦸ, ꦄꦴꦏꦴꦱꦴꦤꦚ꧀ꦕꦴꦪꦠꦤꦣꦴꦠꦸ – ꦄꦪꦁ ꦣꦴꦠꦸ ꦫꦹꦥꦁ ꦥꦛꦶꦕ꧀ꦕ ꦥꦚ꧀ꦚꦴꦪꦠꦶ. ꦪꦴꦪꦁ, ꦨꦶꦏ꧀ꦑꦸ, ꦮꦶꦚ꧀ꦚꦴꦟꦚ꧀ꦕꦴꦪꦠꦤꦣꦴꦠꦸ – ꦄꦪꦁ ꦣꦴꦠꦸ ꦄꦴꦏꦴꦱꦴꦤꦚ꧀ꦕꦴꦪꦠꦤꦁ ꦥꦛꦶꦕ꧀ꦕ ꦥꦚ꧀ꦚꦴꦪꦠꦶ. ꦪꦴꦪꦁ, ꦨꦶꦏ꧀ꦑꦸ, ꦄꦴꦏꦶꦚ꧀ꦕꦚ꧀ꦚꦴꦪꦠꦤꦣꦴꦠꦸ – ꦄꦪꦁ ꦣꦴꦠꦸ ꦮꦶꦚ꧀ꦚꦴꦟꦚ꧀ꦕꦴꦪꦠꦤꦁ ꦥꦛꦶꦕ꧀ꦕ ꦥꦚ꧀ꦚꦴꦪꦠꦶ. ꦪꦴꦪꦁ, ꦨꦶꦏ꧀ꦑꦸ, ꦤꦺꦮꦱꦚ꧀ꦚꦴꦤꦴꦱꦚ꧀ꦚꦴꦪꦠꦤꦣꦴꦠꦸ – ꦄꦪꦁ ꦣꦴꦠꦸ ꦄꦴꦏꦶꦚ꧀ꦕꦚ꧀ꦚꦴꦪꦠꦤꦁ ꦥꦛꦶꦕ꧀ꦕ ꦥꦚ꧀ꦚꦴꦪꦠꦶ. ꦪꦴꦪꦁ, ꦨꦶꦏ꧀ꦑꦸ, ꦱꦚ꧀ꦚꦴꦮꦺꦢꦪꦶꦠꦤꦶꦫꦺꦴꦣꦣꦴꦠꦸ – ꦄꦪꦁ ꦣꦴꦠꦸ ꦤꦶꦫꦺꦴꦣꦁ ꦥꦛꦶꦕ꧀ꦕ ꦥꦚ꧀ꦚꦴꦪꦠꦷ’’ꦠꦶ.

‘‘ꦪꦴ ꦕꦴꦪꦁ, ꦨꦤ꧀ꦠꦺ, ꦄꦴꦨꦴꦣꦴꦠꦸ ꦪꦴ ꦕ ꦱꦸꦨꦣꦴꦠꦸ ꦪꦴ ꦕ ꦄꦴꦏꦴꦱꦴꦤꦚ꧀ꦕꦴꦪꦠꦤꦣꦴꦠꦸ ꦪꦴ ꦕ ꦮꦶꦚ꧀ꦚꦴꦟꦚ꧀ꦕꦴꦪꦠꦤꦣꦴꦠꦸ ꦪꦴ ꦕ ꦄꦴꦏꦶꦚ꧀ꦕꦚ꧀ꦚꦴꦪꦠꦤꦣꦴꦠꦸ ꦪꦴ ꦕ ꦤꦺꦮꦱꦚ꧀ꦚꦴꦤꦴꦱꦚ꧀ꦚꦴꦪꦠꦤꦣꦴꦠꦸ ꦪꦴ ꦕ ꦱꦚ꧀ꦚꦴꦮꦺꦢꦪꦶꦠꦤꦶꦫꦺꦴꦣꦣꦴꦠꦸ – ꦆꦩꦴ ꦤꦸ ꦑꦺꦴ, ꦨꦤ꧀ꦠꦺ, ꦣꦴꦠꦸꦪꦺꦴ ꦏꦡꦁ ꦱꦩꦴꦥꦠ꧀ꦠꦶ ꦥꦠ꧀ꦠꦧ꧀ꦧꦴ’’ꦠꦶ?

‘‘ꦪꦴ ꦕꦴꦪꦁ, ꦨꦶꦏ꧀ꦑꦸ, ꦄꦴꦨꦴꦣꦴꦠꦸ ꦪꦴ ꦕ ꦱꦸꦨꦣꦴꦠꦸ ꦪꦴ ꦕ ꦄꦴꦏꦴꦱꦴꦤꦚ꧀ꦕꦴꦪꦠꦤꦣꦴꦠꦸ ꦪꦴ ꦕ ꦮꦶꦚ꧀ꦚꦴꦟꦚ꧀ꦕꦴꦪꦠꦤꦣꦴꦠꦸ ꦪꦴ ꦕ ꦄꦴꦏꦶꦚ꧀ꦕꦚ꧀ꦚꦴꦪꦠꦤꦣꦴꦠꦸ – ꦆꦩꦴ ꦣꦴꦠꦸꦪꦺꦴ ꦱꦚ꧀ꦚꦴꦱꦩꦴꦥꦠ꧀ꦠꦶ ꦥꦠ꧀ꦠꦧ꧀ꦧꦴ. ꦪꦴꦪꦁ, ꦨꦶꦏ꧀ꦑꦸ, ꦤꦺꦮꦱꦚ꧀ꦚꦴꦤꦴꦱꦚ꧀ꦚꦴꦪꦠꦤꦣꦴꦠꦸ – ꦄꦪꦁ ꦣꦴꦠꦸ ꦱꦔ꧀ꦑꦴꦫꦴꦮꦱꦺꦱꦱꦩꦴꦥꦠ꧀ꦠꦶ ꦥꦠ꧀ꦠꦧ꧀ꦧꦴ. ꦪꦴꦪꦁ, ꦨꦶꦏ꧀ꦑꦸ, ꦱꦚ꧀ꦚꦴꦮꦺꦢꦪꦶꦠꦤꦶꦫꦺꦴꦣꦣꦴꦠꦸ – ꦄꦪꦁ ꦣꦴꦠꦸ ꦤꦶꦫꦺꦴꦣꦱꦩꦴꦥꦠ꧀ꦠꦶ ꦥꦠ꧀ꦠꦧ꧀ꦧꦴ’’ꦠꦶ. ꦥꦜꦩꦁ.