꧒. ꦢꦸꦠꦶꦪꦢꦱꦧꦭꦱꦸꦠ꧀ꦠꦁ

꧒꧒. ꦱꦴꦮꦠ꧀ꦡꦶꦪꦁ ꦮꦶꦲꦫꦠꦶ…ꦥꦺ… ‘‘ꦢꦱꦧꦭꦱꦩꦤ꧀ꦤꦴꦒꦠꦺꦴ, ꦨꦶꦏ꧀ꦑꦮꦺ, ꦠꦡꦴꦒꦠꦺꦴ ꦕꦠꦹꦲꦶ ꦕ ꦮꦺꦱꦴꦫꦗ꧀ꦗꦺꦲꦶ ꦱꦩꦤ꧀ꦤꦴꦒꦠꦺꦴ ꦄꦴꦱꦨꦁ ꦜꦴꦤꦁ ꦥꦛꦶꦗꦴꦤꦴꦠꦶ, ꦥꦫꦶꦱꦴꦱꦸ ꦱꦷꦲꦤꦴꦢꦁ ꦤꦢꦠꦶ, ꦧ꧀ꦫꦲ꧀ꦩꦕꦏ꧀ꦏꦁ ꦥꦮꦠ꧀ꦠꦺꦠ꧀ꦠꦶ – ‘ꦆꦠꦶ ꦫꦹꦥꦁ ꦆꦠꦶ ꦫꦹꦥꦱ꧀ꦱ ꦱꦩꦸꦢꦪꦺꦴ ꦆꦠꦶ ꦫꦹꦥꦱ꧀ꦱ ꦄꦠ꧀ꦡꦔ꧀ꦒꦩꦺꦴ, ꦆꦠꦶ ꦮꦺꦢꦤꦴ ꦆꦠꦶ ꦮꦺꦢꦤꦴꦪ ꦱꦩꦸꦢꦪꦺꦴ ꦆꦠꦶ ꦮꦺꦢꦤꦴꦪ ꦄꦠ꧀ꦡꦔ꧀ꦒꦩꦺꦴ, ꦆꦠꦶ ꦱꦚ꧀ꦚꦴ ꦆꦠꦶ ꦱꦚ꧀ꦚꦴꦪ ꦱꦩꦸꦢꦪꦺꦴ ꦆꦠꦶ ꦱꦚ꧀ꦚꦴꦪ ꦄꦠ꧀ꦡꦔ꧀ꦒꦩꦺꦴ, ꦆꦠꦶ ꦱꦔ꧀ꦑꦴꦫꦴ ꦆꦠꦶ ꦱꦔ꧀ꦑꦴꦫꦴꦤꦁ ꦱꦩꦸꦢꦪꦺꦴ ꦆꦠꦶ ꦱꦔ꧀ꦑꦴꦫꦴꦤꦁ ꦄꦠ꧀ꦡꦔ꧀ꦒꦩꦺꦴ, ꦆꦠꦶ ꦮꦶꦚ꧀ꦚꦴꦟꦁ ꦆꦠꦶ ꦮꦶꦚ꧀ꦚꦴꦟꦱ꧀ꦱ ꦱꦩꦸꦢꦪꦺꦴ ꦆꦠꦶ ꦮꦶꦚ꧀ꦚꦴꦟꦱ꧀ꦱ ꦄꦠ꧀ꦡꦔ꧀ꦒꦩꦺꦴ. ꦆꦠꦶ ꦆꦩꦱ꧀ꦩꦶꦁ ꦱꦠꦶ ꦆꦢꦁ ꦲꦺꦴꦠꦶ, ꦆꦩꦱ꧀ꦱꦸꦥ꧀ꦥꦴꦢꦴ ꦆꦢꦁ ꦈꦥ꧀ꦥꦗ꧀ꦗꦠꦶ; ꦆꦩꦱ꧀ꦩꦶꦁ ꦄꦱꦠꦶ ꦆꦢꦁ ꦤ ꦲꦺꦴꦠꦶ ꦆꦩꦱ꧀ꦱ ꦤꦶꦫꦺꦴꦣꦴ ꦆꦢꦁ ꦤꦶꦫꦸꦗ꧀ꦙꦠꦶ. ꦪꦢꦶꦢꦁ ꦄꦮꦶꦗ꧀ꦗꦴꦥꦕ꧀ꦕꦪꦴ ꦱꦔ꧀ꦑꦴꦫꦴ; ꦱꦔ꧀ꦑꦴꦫꦥꦕ꧀ꦕꦪꦴ ꦮꦶꦚ꧀ꦚꦴꦟꦁ…ꦥꦺ… ꦌꦮꦩꦺꦠꦱ꧀ꦱ ꦏꦺꦮꦭꦱ꧀ꦱ ꦢꦸꦏ꧀ꦑꦏ꧀ꦑꦤ꧀ꦣꦱ꧀ꦱ ꦱꦩꦸꦢꦪꦺꦴ ꦲꦺꦴꦠꦶ. ꦄꦮꦶꦗ꧀ꦗꦴꦪ ꦠ꧀ꦮꦺꦮ ꦄꦱꦺꦱꦮꦶꦫꦴꦒꦤꦶꦫꦺꦴꦣꦴ ꦱꦔ꧀ꦑꦴꦫꦤꦶꦫꦺꦴꦣꦺꦴ; ꦱꦔ꧀ꦑꦴꦫꦤꦶꦫꦺꦴꦣꦴ ꦮꦶꦚ꧀ꦚꦴꦟꦤꦶꦫꦺꦴꦣꦺꦴ…ꦥꦺ… ꦌꦮꦩꦺꦠꦱ꧀ꦱ ꦏꦺꦮꦭꦱ꧀ꦱ ꦢꦸꦏ꧀ꦑꦏ꧀ꦑꦤ꧀ꦣꦱ꧀ꦱ ꦤꦶꦫꦺꦴꦣꦺꦴ ꦲꦺꦴꦠꦶ’’’.

‘‘ꦌꦮꦁ ꦱ꧀ꦮꦴꦏ꧀ꦑꦴꦠꦺꦴ, ꦨꦶꦏ꧀ꦑꦮꦺ, ꦩꦪꦴ ꦣꦩ꧀ꦩꦺꦴ ꦈꦠ꧀ꦠꦴꦤꦺꦴ ꦮꦶꦮꦛꦺꦴ ꦥꦏꦴꦱꦶꦠꦺꦴ ꦖꦶꦤ꧀ꦤꦥꦶꦭꦺꦴꦠꦶꦏꦺꦴ. ꦌꦮꦁ ꦱ꧀ꦮꦴꦏ꧀ꦑꦴꦠꦺ ꦑꦺꦴ, ꦨꦶꦏ꧀ꦑꦮꦺ, ꦩꦪꦴ ꦣꦩ꧀ꦩꦺ ꦈꦠ꧀ꦠꦴꦤꦺ ꦮꦶꦮꦛꦺ ꦥꦏꦴꦱꦶꦠꦺ ꦖꦶꦤ꧀ꦤꦥꦶꦭꦺꦴꦠꦶꦏꦺ ꦄꦭꦩꦺꦮ ꦱꦢ꧀ꦣꦴꦥꦧ꧀ꦧꦗꦶꦠꦺꦤ ꦏꦸꦭꦥꦸꦠ꧀ꦠꦺꦤ ꦮꦷꦫꦶꦪꦁ ꦄꦴꦫꦨꦶꦠꦸꦁ – ‘ꦏꦴꦩꦁ ꦠꦕꦺꦴ ꦕ ꦤ꧀ꦲꦴꦫꦸ [ꦤꦲꦴꦫꦸ (ꦱꦷ. ꦱ꧀ꦪꦴ. ꦏꦁ. ꦥꦷ.)] ꦕ ꦄꦛ꧀ꦜꦶ ꦕ ꦄꦮꦱꦶꦱ꧀ꦱꦠꦸ, ꦱꦫꦷꦫꦺ ꦈꦥꦱꦸꦱ꧀ꦱꦠꦸ [ꦄꦮꦱꦸꦱ꧀ꦱꦠꦸ ꦩ. ꦤꦶ. ꧒.꧑꧘꧔] ꦩꦁꦱꦭꦺꦴꦲꦶꦠꦁ. ꦪꦁ ꦠꦁ ꦥꦸꦫꦶꦱꦡꦴꦩꦺꦤ ꦥꦸꦫꦶꦱꦮꦷꦫꦶꦪꦺꦤ ꦥꦸꦫꦶꦱꦥꦫꦏ꧀ꦏꦩꦺꦤ ꦥꦠ꧀ꦠꦧ꧀ꦧꦁ, ꦤ ꦠꦁ ꦄꦥꦴꦥꦸꦟꦶꦠ꧀ꦮꦴ ꦮꦷꦫꦶꦪꦱ꧀ꦱ ꦱꦟ꧀ꦜꦴꦤꦁ ꦨꦮꦶꦱ꧀ꦱꦠꦷ’’’ꦠꦶ.

‘‘ꦢꦸꦏ꧀ꦑꦁ, ꦨꦶꦏ꧀ꦑꦮꦺ, ꦏꦸꦱꦷꦠꦺꦴ ꦮꦶꦲꦫꦠꦶ ꦮꦺꦴꦏꦶꦟ꧀ꦟꦺꦴ ꦥꦴꦥꦏꦺꦲꦶ ꦄꦏꦸꦱꦭꦺꦲꦶ ꦣꦩ꧀ꦩꦺꦲꦶ, ꦩꦲꦤ꧀ꦠꦚ꧀ꦕ ꦱꦢꦠ꧀ꦡꦁ ꦥꦫꦶꦲꦴꦥꦺꦠꦶ. ꦄꦴꦫꦢ꧀ꦣꦮꦷꦫꦶꦪꦺꦴ ꦕ ꦑꦺꦴ, ꦨꦶꦏ꧀ꦑꦮꦺ, ꦱꦸꦑꦁ ꦮꦶꦲꦫꦠꦶ ꦥꦮꦶꦮꦶꦠ꧀ꦠꦺꦴ ꦥꦴꦥꦏꦺꦲꦶ ꦄꦏꦸꦱꦭꦺꦲꦶ ꦣꦩ꧀ꦩꦺꦲꦶ, ꦩꦲꦤ꧀ꦠꦚ꧀ꦕ ꦱꦢꦠ꧀ꦡꦁ ꦥꦫꦶꦥꦹꦫꦺꦠꦶ. ꦤ, ꦨꦶꦏ꧀ꦑꦮꦺ, ꦲꦷꦤꦺꦤ ꦄꦒ꧀ꦒꦱ꧀ꦱ ꦥꦠ꧀ꦠꦶ ꦲꦺꦴꦠꦶ. ꦄꦒ꧀ꦒꦺꦤ ꦕ ꦑꦺꦴ, ꦨꦶꦏ꧀ꦑꦮꦺ, ꦄꦒ꧀ꦒꦱ꧀ꦱ ꦥꦠ꧀ꦠꦶ ꦲꦺꦴꦠꦶ. ꦩꦟ꧀ꦝꦥꦺꦪ꧀ꦪꦩꦶꦢꦁ, ꦨꦶꦏ꧀ꦑꦮꦺ, ꦧ꧀ꦫꦲ꧀ꦩꦕꦫꦶꦪꦁ, ꦱꦠ꧀ꦡꦴ ꦱꦩ꧀ꦩꦸꦑꦷꦨꦹꦠꦺꦴ. ꦠꦱ꧀ꦩꦴꦠꦶꦲ, ꦨꦶꦏ꧀ꦑꦮꦺ, ꦮꦷꦫꦶꦪꦁ ꦄꦴꦫꦨꦡ ꦄꦥ꧀ꦥꦠ꧀ꦠꦱ꧀ꦱ ꦥꦠ꧀ꦠꦶꦪꦴ, ꦄꦤꦣꦶꦒꦠꦱ꧀ꦱ ꦄꦣꦶꦒꦩꦴꦪ, ꦄꦱꦕ꧀ꦖꦶꦏꦠꦱ꧀ꦱ ꦱꦕ꧀ꦖꦶꦏꦶꦫꦶꦪꦴꦪ. ‘ꦌꦮꦁ ꦤꦺꦴ ꦄꦪꦁ ꦄꦩ꧀ꦲꦴꦏꦁ ꦥꦧ꧀ꦧꦗ꧀ꦗꦴ ꦄꦮꦚ꧀ꦙꦴ ꦨꦮꦶꦱ꧀ꦱꦠꦶ ꦱꦦꦭꦴ ꦱꦈꦢ꧀ꦫꦪꦴ. ꦪꦺꦱꦚ꧀ꦕ [ꦪꦺꦱꦁ (ꦱꦷ. ꦱ꧀ꦪꦴ. ꦏꦁ.), ꦪꦺꦱꦁ ꦲꦶ (ꦥꦷ. ꦏ.)] ꦩꦪꦁ ꦥꦫꦶꦨꦸꦚ꧀ꦗꦴꦩ ꦕꦷꦮꦫ-ꦥꦶꦟ꧀ꦝꦥꦴꦠꦱꦺꦤꦴꦱꦤ-ꦒꦶꦭꦴꦤꦥ꧀ꦥꦕ꧀ꦕꦪꦨꦺꦱꦗ꧀ꦗꦥꦫꦶꦏ꧀ꦑꦴꦫꦁ ꦠꦺꦱꦁ ꦠꦺ ꦏꦴꦫꦴ ꦄꦩ꧀ꦲꦺꦱꦸ ꦩꦲꦥ꧀ꦦꦭꦴ ꦨꦮꦶꦱ꧀ꦱꦤ꧀ꦠꦶ ꦩꦲꦴꦤꦶꦱꦁꦱꦴ’ꦠꦶ – ꦌꦮꦚ꧀ꦲꦶ ꦮꦺꦴ, ꦨꦶꦏ꧀ꦑꦮꦺ, ꦱꦶꦏ꧀ꦑꦶꦠꦧ꧀ꦧꦁ. ꦄꦠ꧀ꦠꦠ꧀ꦡꦁ ꦮꦴ ꦲꦶ, ꦨꦶꦏ꧀ꦑꦮꦺ, ꦱꦩ꧀ꦥꦱ꧀ꦱꦩꦴꦤꦺꦤ ꦄꦭꦩꦺꦮ ꦄꦥ꧀ꦥꦩꦴꦢꦺꦤ ꦱꦩ꧀ꦥꦴꦢꦺꦠꦸꦁ; ꦥꦫꦠ꧀ꦡꦁ ꦮꦴ ꦲꦶ, ꦨꦶꦏ꧀ꦑꦮꦺ, ꦱꦩ꧀ꦥꦱ꧀ꦱꦩꦴꦤꦺꦤ ꦄꦭꦩꦺꦮ ꦄꦥ꧀ꦥꦩꦴꦢꦺꦤ ꦱꦩ꧀ꦥꦴꦢꦺꦠꦸꦁ; ꦈꦨꦪꦠ꧀ꦡꦁ ꦮꦴ ꦲꦶ, ꦨꦶꦏ꧀ꦑꦮꦺ, ꦱꦩ꧀ꦥꦱ꧀ꦱꦩꦴꦤꦺꦤ ꦄꦭꦩꦺꦮ ꦄꦥ꧀ꦥꦩꦴꦢꦺꦤ ꦱꦩ꧀ꦥꦴꦢꦺꦠꦸ’’ꦤ꧀ꦠꦶ. ꦢꦸꦠꦶꦪꦁ.