꧑. ꦤꦶꦏ꧀ꦑꦤ꧀ꦠꦱꦸꦠ꧀ꦠꦁ

꧒꧐꧙. ꦌꦮꦁ ꦩꦺ ꦱꦸꦠꦁ – ꦌꦏꦁ ꦱꦩꦪꦁ ꦄꦴꦪꦱ꧀ꦩꦴ ꦮꦔ꧀ꦒꦷꦱꦺꦴ ꦄꦴꦭ꦳ꦮꦶꦪꦁ ꦮꦶꦲꦫꦠꦶ ꦄꦒ꧀ꦒꦴꦭ꦳ꦮꦺ ꦕꦺꦠꦶꦪꦺ ꦄꦴꦪꦱ꧀ꦩꦠꦴ ꦤꦶꦒ꧀ꦫꦺꦴꦣꦏꦥ꧀ꦥꦺꦤ ꦈꦥꦗ꧀ꦙꦴꦪꦺꦤ ꦱꦢ꧀ꦣꦶꦁ. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦄꦴꦪꦱ꧀ꦩꦴ ꦮꦔ꧀ꦒꦷꦱꦺꦴ ꦤꦮꦏꦺꦴ ꦲꦺꦴꦠꦶ ꦄꦕꦶꦫꦥꦧ꧀ꦧꦗꦶꦠꦺꦴ ꦎꦲꦶꦪ꧀ꦪꦏꦺꦴ ꦮꦶꦲꦴꦫꦥꦴꦭꦺꦴ. ꦄꦡ ꦑꦺꦴ ꦱꦩ꧀ꦧꦲꦸꦭꦴ ꦆꦠ꧀ꦡꦶꦪꦺꦴ ꦱꦩꦭꦔ꧀ꦏꦫꦶꦠ꧀ꦮꦴ ꦪꦺꦤ ꦄꦒ꧀ꦒꦴꦭ꦳ꦮꦏꦺꦴ ꦄꦴꦫꦴꦩꦺꦴ ꦠꦺꦤꦸꦥꦱꦔ꧀ꦏꦩꦶꦁꦱꦸ ꦮꦶꦲꦴꦫꦥꦺꦏ꧀ꦑꦶꦏꦴꦪꦺꦴ. ꦄꦡ ꦑꦺꦴ ꦄꦴꦪꦱ꧀ꦩꦠꦺꦴ ꦮꦔ꧀ꦒꦷꦱꦱ꧀ꦱ ꦠꦴ ꦆꦠ꧀ꦡꦶꦪꦺꦴ ꦢꦶꦱ꧀ꦮꦴ ꦄꦤꦨꦶꦫꦠꦶ ꦈꦥ꧀ꦥꦗ꧀ꦗꦠꦶ, ꦫꦴꦒꦺꦴ ꦕꦶꦠ꧀ꦠꦁ ꦄꦤꦸꦢ꧀ꦣꦁꦱꦺꦠꦶ. ꦄꦡ ꦑꦺꦴ ꦄꦴꦪꦱ꧀ꦩꦠꦺꦴ ꦮꦔ꧀ꦒꦷꦱꦱ꧀ꦱ ꦌꦠꦢꦲꦺꦴꦱꦶ – ‘‘ꦄꦭꦴꦨꦴ ꦮꦠ ꦩꦺ, ꦤ ꦮꦠ ꦩꦺ ꦭꦴꦨꦴ; ꦢꦸꦭ꧀ꦭꦢ꧀ꦣꦁ ꦮꦠ ꦩꦺ, ꦤ ꦮꦠ ꦩꦺ ꦱꦸꦭꦢ꧀ꦣꦁ; ꦪꦱ꧀ꦱ ꦩꦺ ꦄꦤꦨꦶꦫꦠꦶ ꦈꦥ꧀ꦥꦤ꧀ꦤꦴ, ꦫꦴꦒꦺꦴ ꦕꦶꦠ꧀ꦠꦁ ꦄꦤꦸꦢ꧀ꦣꦁꦱꦺꦠꦶ, ꦠꦁ ꦏꦸꦠꦺꦠ꧀ꦡ ꦭꦧ꧀ꦨꦴ, ꦪꦁ ꦩꦺ ꦥꦫꦺꦴ ꦄꦤꦨꦶꦫꦠꦶꦁ ꦮꦶꦤꦺꦴꦢꦺꦠ꧀ꦮꦴ ꦄꦨꦶꦫꦠꦶꦁ ꦈꦥ꧀ꦥꦴꦢꦺꦪ꧀ꦪ. ꦪꦁꦤꦹꦤꦴꦲꦁ ꦄꦠ꧀ꦠꦤꦴꦮ ꦄꦠ꧀ꦠꦤꦺꦴ ꦄꦤꦨꦶꦫꦠꦶꦁ ꦮꦶꦤꦺꦴꦢꦺꦠ꧀ꦮꦴ ꦄꦨꦶꦫꦠꦶꦁ ꦈꦥ꧀ꦥꦴꦢꦺꦪ꧀ꦪ’’ꦤ꧀ꦠꦶ. ꦄꦡ ꦑꦺꦴ ꦄꦴꦪꦱ꧀ꦩꦴ ꦮꦔ꧀ꦒꦷꦱꦺꦴ ꦄꦠ꧀ꦠꦤꦴꦮ ꦄꦠ꧀ꦠꦤꦺꦴ ꦄꦤꦨꦶꦫꦠꦶꦁ ꦮꦶꦤꦺꦴꦢꦺꦠ꧀ꦮꦴ ꦄꦨꦶꦫꦠꦶꦁ ꦈꦥ꧀ꦥꦴꦢꦺꦠ꧀ꦮꦴ ꦠꦴꦪꦁ ꦮꦺꦭꦴꦪꦁ ꦆꦩꦴ ꦒꦴꦡꦴꦪꦺꦴ ꦄꦨꦴꦱꦶ –

‘‘ꦤꦶꦏ꧀ꦑꦤ꧀ꦠꦁ ꦮꦠ ꦩꦁ ꦱꦤ꧀ꦠꦁ, ꦄꦒꦴꦫꦱ꧀ꦩꦴꦤꦒꦴꦫꦶꦪꦁ;

ꦮꦶꦠꦏ꧀ꦏꦴ ꦈꦥꦣꦴꦮꦤ꧀ꦠꦶ, ꦥꦒꦧ꧀ꦨꦴ ꦏꦟ꧀ꦲꦠꦺꦴ ꦆꦩꦺ.

‘‘ꦈꦒ꧀ꦒꦥꦸꦠ꧀ꦠꦴ ꦩꦲꦶꦱ꧀ꦱꦴꦱꦴ, ꦱꦶꦏ꧀ꦑꦶꦠꦴ ꦢꦭ꦳꧀ꦲꦣꦩ꧀ꦩꦶꦤꦺꦴ;

ꦱꦩꦤ꧀ꦠꦴ ꦥꦫꦶꦏꦶꦫꦺꦪ꧀ꦪꦸꦁ, ꦱꦲꦱ꧀ꦱꦁ ꦄꦥꦭꦴꦪꦶꦤꦁ.

‘‘ꦱꦕꦺꦥꦶ ꦌꦠꦠꦺꦴ [ꦌꦠ꧀ꦠꦠꦺꦴ (ꦱꦷ. ꦥꦷ. ꦏ.), ꦌꦠ꧀ꦠꦏꦴ (ꦱ꧀ꦪꦴ. ꦏꦁ.)] ꦨꦶꦪ꧀ꦪꦺꦴ, ꦄꦴꦒꦩꦶꦱ꧀ꦱꦤ꧀ꦠꦶ ꦆꦠ꧀ꦡꦶꦪꦺꦴ;

ꦤꦺꦮ ꦩꦁ ꦧ꧀ꦪꦴꦣꦪꦶꦱ꧀ꦱꦤ꧀ꦠꦶ [ꦧ꧀ꦪꦴꦡꦪꦶꦱ꧀ꦱꦤ꧀ꦠꦶ (?)], ꦣꦩ꧀ꦩꦺ ꦱꦩ꧀ꦲꦶ ꦥꦠꦶꦛ꧀ꦜꦶꦠꦁ.

‘‘ꦱꦏ꧀ꦑꦷ ꦲꦶ ꦩꦺ ꦱꦸꦠꦁ ꦌꦠꦁ, ꦧꦸꦢ꧀ꦣꦱ꧀ꦱꦴꦢꦶꦕ꧀ꦕꦧꦤ꧀ꦣꦸꦤꦺꦴ;

ꦤꦶꦧ꧀ꦧꦴꦤꦒꦩꦤꦁ ꦩꦒ꧀ꦒꦁ, ꦠꦠ꧀ꦡ ꦩꦺ ꦤꦶꦫꦠꦺꦴ ꦩꦤꦺꦴ.

‘‘ꦌꦮꦚ꧀ꦕꦺ ꦩꦁ ꦮꦶꦲꦫꦤ꧀ꦠꦁ, ꦥꦴꦥꦶꦩ ꦈꦥꦒꦕ꧀ꦖꦱꦶ;

ꦠꦡꦴ ꦩꦕ꧀ꦕꦸ ꦏꦫꦶꦱ꧀ꦱꦴꦩꦶ, ꦤ ꦩꦺ ꦩꦒ꧀ꦒꦩ꧀ꦥꦶ ꦢꦏ꧀ꦑꦱꦷ’’ꦠꦶ.