꧑. ꦱꦤꦔ꧀ꦏꦸꦩꦴꦫꦱꦸꦠ꧀ꦠꦁ

꧑꧘꧒. ꦌꦮꦁ ꦩꦺ ꦱꦸꦠꦁ – ꦌꦏꦁ ꦱꦩꦪꦁ ꦨꦒꦮꦴ ꦫꦴꦗꦒꦲꦺ ꦮꦶꦲꦫꦠꦶ ꦱꦥ꧀ꦥꦶꦤꦷꦠꦷꦫꦺ. ꦄꦡ ꦑꦺꦴ ꦧ꧀ꦫꦲ꧀ꦩꦴ ꦱꦤꦔ꧀ꦏꦸꦩꦴꦫꦺꦴ ꦄꦨꦶꦏ꧀ꦏꦤ꧀ꦠꦴꦪ ꦫꦠ꧀ꦠꦶꦪꦴ ꦄꦨꦶꦏ꧀ꦏꦤ꧀ꦠꦮꦟ꧀ꦟꦺꦴ ꦏꦺꦮꦭꦏꦥ꧀ꦥꦁ ꦱꦥ꧀ꦥꦶꦤꦷꦠꦷꦫꦁ ꦎꦨꦴꦱꦺꦠ꧀ꦮꦴ ꦪꦺꦤ ꦨꦒꦮꦴ ꦠꦺꦤꦸꦥꦱꦔ꧀ꦏꦩꦶ; ꦈꦥꦱꦔ꧀ꦏꦩꦶꦠ꧀ꦮꦴ ꦨꦒꦮꦤ꧀ꦠꦁ ꦄꦨꦶꦮꦴꦢꦺꦠ꧀ꦮꦴ ꦌꦏꦩꦤ꧀ꦠꦁ ꦄꦛ꧀ꦜꦴꦱꦶ. ꦌꦏꦩꦤ꧀ꦠꦁ ꦜꦶꦠꦺꦴ ꦑꦺꦴ ꦧ꧀ꦫꦲ꧀ꦩꦴ ꦱꦤꦔ꧀ꦏꦸꦩꦴꦫꦺꦴ ꦨꦒꦮꦠꦺꦴ ꦱꦤ꧀ꦠꦶꦏꦺ ꦆꦩꦁ ꦒꦴꦡꦁ ꦄꦨꦴꦱꦶ –

‘‘ꦑꦠ꧀ꦠꦶꦪꦺꦴ ꦱꦺꦛ꧀ꦜꦺꦴ ꦗꦤꦺꦠꦱ꧀ꦩꦶꦁ, ꦪꦺ ꦒꦺꦴꦠ꧀ꦠꦥꦛꦶꦱꦴꦫꦶꦤꦺꦴ;

ꦮꦶꦗ꧀ꦗꦴꦕꦫꦟꦱꦩ꧀ꦥꦤ꧀ꦤꦺꦴ, ꦱꦺꦴ ꦱꦺꦛ꧀ꦜꦺꦴ ꦢꦺꦮꦩꦴꦤꦸꦱꦺ’’ꦠꦶ.

ꦆꦢꦩꦮꦺꦴꦕ ꦧ꧀ꦫꦲ꧀ꦩꦴ ꦱꦤꦔ꧀ꦏꦸꦩꦴꦫꦺꦴ. ꦱꦩꦤꦸꦚ꧀ꦚꦺꦴ ꦱꦠ꧀ꦡꦴ ꦄꦲꦺꦴꦱꦶ. ꦄꦡ ꦑꦺꦴ ꦧ꧀ꦫꦲ꧀ꦩꦴ ꦱꦤꦔ꧀ꦏꦸꦩꦴꦫꦺꦴ ‘‘ꦱꦩꦤꦸꦚ꧀ꦚꦺꦴ ꦩꦺ ꦱꦠ꧀ꦡꦴ’’ꦠꦶ ꦨꦒꦮꦤ꧀ꦠꦁ ꦄꦨꦶꦮꦴꦢꦺꦠ꧀ꦮꦴ ꦥꦢꦏ꧀ꦑꦶꦟꦁ ꦏꦠ꧀ꦮꦴ ꦠꦠ꧀ꦡꦺꦮꦤ꧀ꦠꦫꦣꦴꦪꦷꦠꦶ.