꧒. ꦱꦺꦴꦩꦴꦱꦸꦠ꧀ꦠꦁ

꧑꧖꧓. ꦱꦴꦮꦠ꧀ꦡꦶꦤꦶꦢꦴꦤꦁ. ꦄꦡ ꦑꦺꦴ ꦱꦺꦴꦩꦴ ꦨꦶꦏ꧀ꦑꦸꦤꦷ ꦥꦸꦧ꧀ꦧꦟ꧀ꦲꦱꦩꦪꦁ ꦤꦶꦮꦴꦱꦺꦠ꧀ꦮꦴ ꦥꦠ꧀ꦠꦕꦷꦮꦫꦩꦴꦢꦴꦪ ꦱꦴꦮꦠ꧀ꦡꦶꦁ ꦥꦶꦟ꧀ꦝꦴꦪ ꦥꦴꦮꦶꦱꦶ. ꦱꦴꦮꦠ꧀ꦡꦶꦪꦁ ꦥꦶꦟ꧀ꦝꦴꦪ ꦕꦫꦶꦠ꧀ꦮꦴ ꦥꦕ꧀ꦖꦴꦨꦠ꧀ꦠꦁ ꦥꦶꦟ꧀ꦝꦥꦴꦠꦥꦛꦶꦏ꧀ꦏꦤ꧀ꦠꦴ ꦪꦺꦤ ꦄꦤ꧀ꦣꦮꦤꦁ ꦠꦺꦤꦸꦥꦱꦔ꧀ꦏꦩꦶ ꦢꦶꦮꦴꦮꦶꦲꦴꦫꦴꦪ. ꦄꦤ꧀ꦣꦮꦤꦁ ꦄꦗ꧀ꦙꦺꦴꦒꦴꦲꦺꦠ꧀ꦮꦴ ꦄꦚ꧀ꦚꦠꦫꦱ꧀ꦩꦶꦁ ꦫꦸꦏ꧀ꦑꦩꦹꦭꦺ ꦢꦶꦮꦴꦮꦶꦲꦴꦫꦁ ꦤꦶꦱꦷꦢꦶ. ꦄꦡ ꦑꦺꦴ ꦩꦴꦫꦺꦴ ꦥꦴꦥꦶꦩꦴ ꦱꦺꦴꦩꦴꦪ ꦨꦶꦏ꧀ꦑꦸꦤꦶꦪꦴ ꦨꦪꦁ ꦖꦩ꧀ꦨꦶꦠꦠ꧀ꦠꦁ ꦭꦺꦴꦩꦲꦁꦱꦁ ꦈꦥ꧀ꦥꦴꦢꦺꦠꦸꦏꦴꦩꦺꦴ ꦱꦩꦴꦣꦶꦩ꧀ꦲꦴ ꦕꦴꦮꦺꦠꦸꦏꦴꦩꦺꦴ ꦪꦺꦤ ꦱꦺꦴꦩꦴ ꦨꦶꦏ꧀ꦑꦸꦤꦷ ꦠꦺꦤꦸꦥꦱꦔ꧀ꦏꦩꦶ; ꦈꦥꦱꦔ꧀ꦏꦩꦶꦠ꧀ꦮꦴ ꦱꦺꦴꦩꦁ ꦨꦶꦏ꧀ꦑꦸꦤꦶꦁ ꦒꦴꦡꦴꦪ ꦄꦗ꧀ꦙꦨꦴꦱꦶ –

‘‘ꦪꦁ ꦠꦁ ꦆꦱꦷꦲꦶ ꦥꦠ꧀ꦠꦧ꧀ꦧꦁ, ꦜꦴꦤꦁ ꦢꦸꦫꦨꦶꦱꦩ꧀ꦨꦮꦁ;

ꦤ ꦠꦁ ꦢ꧀ꦮꦔ꧀ꦒꦸꦭꦥꦚ꧀ꦚꦴꦪ, ꦱꦏ꧀ꦏꦴ ꦥꦥ꧀ꦥꦺꦴꦠꦸꦩꦶꦠ꧀ꦡꦶꦪꦴ’’ꦠꦶ.

ꦄꦡ ꦑꦺꦴ ꦱꦺꦴꦩꦴꦪ ꦨꦶꦏ꧀ꦑꦸꦤꦶꦪꦴ ꦌꦠꦢꦲꦺꦴꦱꦶ – ‘‘ꦏꦺꦴ ꦤꦸ ꦑ꧀ꦮꦴꦪꦁ ꦩꦤꦸꦱ꧀ꦱꦺꦴ ꦮꦴ ꦄꦩꦤꦸꦱ꧀ꦱꦺꦴ ꦮꦴ ꦒꦴꦡꦁ ꦨꦴꦱꦠꦷ’’ꦠꦶ? ꦄꦡ ꦑꦺꦴ ꦱꦺꦴꦩꦴꦪ ꦨꦶꦏ꧀ꦑꦸꦤꦶꦪꦴ ꦌꦠꦢꦲꦺꦴꦱꦶ – ‘‘ꦩꦴꦫꦺꦴ ꦑꦺꦴ ꦄꦪꦁ ꦥꦴꦥꦶꦩꦴ ꦩꦩ ꦨꦪꦁ ꦖꦩ꧀ꦨꦶꦠꦠ꧀ꦠꦁ ꦭꦺꦴꦩꦲꦁꦱꦁ ꦈꦥ꧀ꦥꦴꦢꦺꦠꦸꦏꦴꦩꦺꦴ ꦱꦩꦴꦣꦶꦩ꧀ꦲꦴ ꦕꦴꦮꦺꦠꦸꦏꦴꦩꦺꦴ ꦒꦴꦡꦁ ꦨꦴꦱꦠꦷ’’ꦠꦶ. ꦄꦡ ꦑꦺꦴ ꦱꦺꦴꦩꦴ ꦨꦶꦏ꧀ꦑꦸꦤꦷ ‘‘ꦩꦴꦫꦺꦴ ꦄꦪꦁ ꦥꦴꦥꦶꦩꦴ’’ ꦆꦠꦶ ꦮꦶꦢꦶꦠ꧀ꦮꦴ ꦩꦴꦫꦁ ꦥꦴꦥꦶꦩꦤ꧀ꦠꦁ ꦒꦴꦡꦴꦲꦶ ꦥꦕ꧀ꦕꦨꦴꦱꦶ –

‘‘ꦆꦠ꧀ꦡꦶꦨꦴꦮꦺꦴ ꦏꦶꦁ ꦏꦪꦶꦫꦴ, ꦕꦶꦠ꧀ꦠꦩ꧀ꦲꦶ ꦱꦸꦱꦩꦴꦲꦶꦠꦺ;

ꦚꦴꦟꦩ꧀ꦲꦶ ꦮꦠ꧀ꦠꦩꦴꦤꦩ꧀ꦲꦶ, ꦱꦩ꧀ꦩꦴ ꦣꦩ꧀ꦩꦁ ꦮꦶꦥꦱ꧀ꦱꦠꦺꦴ.

‘‘ꦪꦱ꧀ꦱ ꦤꦹꦤ ꦱꦶꦪꦴ ꦌꦮꦁ, ꦆꦠ꧀ꦡꦴꦲꦁ ꦥꦸꦫꦶꦱꦺꦴꦠꦶ ꦮꦴ;

ꦏꦶꦚ꧀ꦕꦶ ꦮꦴ ꦥꦤ ꦄꦚ꧀ꦚꦱ꧀ꦩꦶ [ꦄꦱ꧀ꦩꦷꦠꦶ (ꦱ꧀ꦪꦴ. ꦏꦁ. ꦥꦷ.)], ꦠꦁ ꦩꦴꦫꦺꦴ ꦮꦠ꧀ꦠꦸꦩꦫꦲꦠꦷ’’ꦠꦶ.

ꦄꦡ ꦑꦺꦴ ꦩꦴꦫꦺꦴ ꦥꦴꦥꦶꦩꦴ ‘‘ꦗꦴꦤꦴꦠꦶ ꦩꦁ ꦱꦺꦴꦩꦴ ꦨꦶꦏ꧀ꦑꦸꦤꦷ’’ꦠꦶ ꦢꦸꦏ꧀ꦑꦷ ꦢꦸꦩ꧀ꦩꦤꦺꦴ ꦠꦠ꧀ꦡꦺꦮꦤ꧀ꦠꦫꦣꦴꦪꦷꦠꦶ.