꧑꧐. ꦮꦗꦶꦫꦴꦱꦸꦠ꧀ꦠꦁ

꧑꧗꧑. ꦱꦴꦮꦠ꧀ꦡꦶꦤꦶꦢꦴꦤꦁ. ꦄꦡ ꦑꦺꦴ ꦮꦗꦶꦫꦴ ꦨꦶꦏ꧀ꦑꦸꦤꦷ ꦥꦸꦧ꧀ꦧꦟ꧀ꦲꦱꦩꦪꦁ ꦤꦶꦮꦴꦱꦺꦠ꧀ꦮꦴ ꦥꦠ꧀ꦠꦕꦷꦮꦫꦩꦴꦢꦴꦪ ꦱꦴꦮꦠ꧀ꦡꦶꦁ ꦥꦶꦟ꧀ꦝꦴꦪ ꦥꦴꦮꦶꦱꦶ. ꦱꦴꦮꦠ꧀ꦡꦶꦪꦁ ꦥꦶꦟ꧀ꦝꦴꦪ ꦕꦫꦶꦠ꧀ꦮꦴ ꦥꦕ꧀ꦖꦴꦨꦠ꧀ꦠꦁ ꦥꦶꦟ꧀ꦝꦥꦴꦠꦥꦛꦶꦏ꧀ꦏꦤ꧀ꦠꦴ ꦪꦺꦤ ꦄꦤ꧀ꦣꦮꦤꦁ ꦠꦺꦤꦸꦥꦱꦔ꧀ꦏꦩꦶ ꦢꦶꦮꦴꦮꦶꦲꦴꦫꦴꦪ. ꦄꦤ꧀ꦣꦮꦤꦁ ꦄꦗ꧀ꦙꦺꦴꦒꦴꦲꦺꦠ꧀ꦮꦴ ꦄꦚ꧀ꦚꦠꦫꦱ꧀ꦩꦶꦁ ꦫꦸꦏ꧀ꦑꦩꦹꦭꦺ ꦢꦶꦮꦴꦮꦶꦲꦴꦫꦁ ꦤꦶꦱꦷꦢꦶ. ꦄꦡ ꦑꦺꦴ ꦩꦴꦫꦺꦴ ꦥꦴꦥꦶꦩꦴ ꦮꦗꦶꦫꦴꦪ ꦨꦶꦏ꧀ꦑꦸꦤꦶꦪꦴ ꦨꦪꦁ ꦖꦩ꧀ꦨꦶꦠꦠ꧀ꦠꦁ ꦭꦺꦴꦩꦲꦁꦱꦁ ꦈꦥ꧀ꦥꦴꦢꦺꦠꦸꦏꦴꦩꦺꦴ ꦱꦩꦴꦣꦶꦩ꧀ꦲꦴ ꦕꦴꦮꦺꦠꦸꦏꦴꦩꦺꦴ ꦪꦺꦤ ꦮꦗꦶꦫꦴ ꦨꦶꦏ꧀ꦑꦸꦤꦷ ꦠꦺꦤꦸꦥꦱꦔ꧀ꦏꦩꦶ; ꦈꦥꦱꦔ꧀ꦏꦩꦶꦠ꧀ꦮꦴ ꦮꦗꦶꦫꦁ ꦨꦶꦏ꧀ꦑꦸꦤꦶꦁ ꦒꦴꦡꦴꦪ ꦄꦗ꧀ꦙꦨꦴꦱꦶ –

‘‘ꦏꦺꦤꦴꦪꦁ ꦥꦏꦠꦺꦴ ꦱꦠ꧀ꦠꦺꦴ, ꦏꦸꦮꦁ ꦱꦠ꧀ꦠꦱ꧀ꦱ ꦏꦴꦫꦏꦺꦴ;

ꦏꦸꦮꦁ ꦱꦠ꧀ꦠꦺꦴ ꦱꦩꦸꦥ꧀ꦥꦤ꧀ꦤꦺꦴ, ꦏꦸꦮꦁ ꦱꦠ꧀ꦠꦺꦴ ꦤꦶꦫꦸꦗ꧀ꦙꦠꦷ’’ꦠꦶ.

ꦄꦡ ꦑꦺꦴ ꦮꦗꦶꦫꦴꦪ ꦨꦶꦏ꧀ꦑꦸꦤꦶꦪꦴ ꦌꦠꦢꦲꦺꦴꦱꦶ – ‘‘ꦏꦺꦴ ꦤꦸ ꦑ꧀ꦮꦴꦪꦁ ꦩꦤꦸꦱ꧀ꦱꦺꦴ ꦮꦴ ꦄꦩꦤꦸꦱ꧀ꦱꦺꦴ ꦮꦴ ꦒꦴꦡꦁ ꦨꦴꦱꦠꦷ’’ꦠꦶ? ꦄꦡ ꦑꦺꦴ ꦮꦗꦶꦫꦴꦪ ꦨꦶꦏ꧀ꦑꦸꦤꦶꦪꦴ ꦌꦠꦢꦲꦺꦴꦱꦶ – ‘‘ꦩꦴꦫꦺꦴ ꦑꦺꦴ ꦄꦪꦁ ꦥꦴꦥꦶꦩꦴ ꦩꦩ ꦨꦪꦁ ꦖꦩ꧀ꦨꦶꦠꦠ꧀ꦠꦁ ꦭꦺꦴꦩꦲꦁꦱꦁ ꦈꦥ꧀ꦥꦴꦢꦺꦠꦸꦏꦴꦩꦺꦴ ꦱꦩꦴꦣꦶꦩ꧀ꦲꦴ ꦕꦴꦮꦺꦠꦸꦏꦴꦩꦺꦴ ꦒꦴꦡꦁ ꦨꦴꦱꦠꦷ’’ꦠꦶ. ꦄꦡ ꦑꦺꦴ ꦮꦗꦶꦫꦴ ꦨꦶꦏ꧀ꦑꦸꦤꦷ ‘‘ꦩꦴꦫꦺꦴ ꦄꦪꦁ ꦥꦴꦥꦶꦩꦴ’’ ꦆꦠꦶ ꦮꦶꦢꦶꦠ꧀ꦮꦴ, ꦩꦴꦫꦁ ꦥꦴꦥꦶꦩꦤ꧀ꦠꦁ ꦒꦴꦡꦴꦲꦶ ꦥꦕ꧀ꦕꦨꦴꦱꦶ –

‘‘ꦏꦶꦁ ꦤꦸ ꦱꦠ꧀ꦠꦺꦴꦠꦶ ꦥꦕ꧀ꦕꦺꦱꦶ, ꦩꦴꦫ ꦢꦶꦛ꧀ꦜꦶꦒꦠꦁ ꦤꦸ ꦠꦺ;

ꦱꦸꦢ꧀ꦣꦱꦔ꧀ꦑꦴꦫꦥꦸꦚ꧀ꦗꦺꦴꦪꦁ, ꦤꦪꦶꦣ ꦱꦠ꧀ꦠꦸꦥꦭꦧ꧀ꦨꦠꦶ.

‘‘ꦪꦡꦴ ꦲꦶ ꦄꦔ꧀ꦒꦱꦩ꧀ꦨꦴꦫꦴ, ꦲꦺꦴꦠꦶ ꦱꦢ꧀ꦢꦺꦴ ꦫꦡꦺꦴ ꦆꦠꦶ;

ꦌꦮꦁ ꦑꦤ꧀ꦣꦺꦱꦸ ꦱꦤ꧀ꦠꦺꦱꦸ, ꦲꦺꦴꦠꦶ ꦱꦠ꧀ꦠꦺꦴꦠꦶ ꦱꦩ꧀ꦩꦸꦠꦶ [ꦱꦩ꧀ꦩꦠꦶ (ꦱ꧀ꦪꦴ. ꦏꦁ.)].

‘‘ꦢꦸꦏ꧀ꦑꦩꦺꦮ ꦲꦶ ꦱꦩ꧀ꦨꦺꦴꦠꦶ, ꦢꦸꦏ꧀ꦑꦁ ꦠꦶꦛ꧀ꦜꦠꦶ ꦮꦺꦠꦶ ꦕ;

ꦤꦴꦚ꧀ꦚꦠ꧀ꦫ ꦢꦸꦏ꧀ꦑꦴ ꦱꦩ꧀ꦨꦺꦴꦠꦶ, ꦤꦴꦚ꧀ꦚꦁ ꦢꦸꦏ꧀ꦑꦴ ꦤꦶꦫꦸꦗ꧀ꦙꦠꦷ’’ꦠꦶ.

ꦄꦡ ꦑꦺꦴ ꦩꦴꦫꦺꦴ ꦥꦴꦥꦶꦩꦴ ‘‘ꦗꦴꦤꦴꦠꦶ ꦩꦁ ꦮꦗꦶꦫꦴ ꦨꦶꦏ꧀ꦑꦸꦤꦷ’’ꦠꦶ ꦢꦸꦏ꧀ꦑꦷ ꦢꦸꦩ꧀ꦩꦤꦺꦴ ꦠꦠ꧀ꦡꦺꦮꦤ꧀ꦠꦫꦣꦴꦪꦷꦠꦶ.

ꦨꦶꦏ꧀ꦑꦸꦤꦷꦱꦁꦪꦸꦠ꧀ꦠꦁ ꦱꦩꦠ꧀ꦠꦁ.