꧙. ꦥꦜꦩꦄꦥꦸꦠ꧀ꦠꦏꦱꦸꦠ꧀ꦠꦁ

꧑꧓꧐. ꦱꦴꦮꦠ꧀ꦡꦶꦤꦶꦢꦴꦤꦁ. ꦄꦡ ꦑꦺꦴ ꦫꦴꦗꦴ ꦥꦱꦺꦤꦢꦶ ꦏꦺꦴꦱꦭꦺꦴ ꦢꦶꦮꦴ ꦢꦶꦮꦱ꧀ꦱ ꦪꦺꦤ ꦨꦒꦮꦴ ꦠꦺꦤꦸꦥꦱꦔ꧀ꦏꦩꦶ; ꦈꦥꦱꦔ꧀ꦏꦩꦶꦠ꧀ꦮꦴ ꦨꦒꦮꦤ꧀ꦠꦁ ꦄꦨꦶꦮꦴꦢꦺꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦷꦢꦶ. ꦌꦏꦩꦤ꧀ꦠꦁ ꦤꦶꦱꦶꦤ꧀ꦤꦁ ꦑꦺꦴ ꦫꦴꦗꦴꦤꦁ ꦥꦱꦺꦤꦢꦶꦁ ꦏꦺꦴꦱꦭꦁ ꦨꦒꦮꦴ ꦌꦠꦢꦮꦺꦴꦕ – ‘‘ꦲꦤ꧀ꦢ, ꦏꦸꦠꦺꦴ ꦤꦸ ꦠ꧀ꦮꦁ, ꦩꦲꦴꦫꦴꦗ, ꦄꦴꦒꦕ꧀ꦖꦱꦶ ꦢꦶꦮꦴ ꦢꦶꦮꦱ꧀ꦱꦴ’’ꦠꦶ?

‘‘ꦆꦣ, ꦨꦤ꧀ꦠꦺ, ꦱꦴꦮꦠ꧀ꦡꦶꦪꦁ ꦱꦺꦛ꧀ꦜꦶ ꦒꦲꦥꦠꦶ ꦏꦴꦭꦔ꧀ꦏꦠꦺꦴ. ꦠꦩꦲꦁ ꦄꦥꦸꦠ꧀ꦠꦏꦁ ꦱꦴꦥꦠꦺꦪ꧀ꦪꦁ ꦫꦴꦗꦤ꧀ꦠꦺꦥꦸꦫꦁ ꦄꦠꦶꦲꦫꦶꦠ꧀ꦮꦴ ꦄꦴꦒꦕ꧀ꦖꦴꦩꦶ. ꦄꦱꦷꦠꦶ, ꦨꦤ꧀ꦠꦺ, ꦱꦠꦱꦲꦱ꧀ꦱꦴꦤꦶ ꦲꦶꦫꦚ꧀ꦚꦱ꧀ꦱꦺꦮ, ꦏꦺꦴ ꦥꦤ ꦮꦴꦢꦺꦴ ꦫꦹꦥꦶꦪꦱ꧀ꦱ! ꦠꦱ꧀ꦱ ꦑꦺꦴ ꦥꦤ, ꦨꦤ꧀ꦠꦺ, ꦱꦺꦛ꧀ꦜꦶꦱ꧀ꦱ ꦒꦲꦥꦠꦶꦱ꧀ꦱ ꦌꦮꦫꦹꦥꦺꦴ ꦨꦠ꧀ꦠꦨꦺꦴꦒꦺꦴ ꦄꦲꦺꦴꦱꦶ – ꦏꦟꦴꦗꦏꦁ ꦨꦸꦚ꧀ꦗꦠꦶ ꦧꦶꦭꦔ꧀ꦒꦢꦸꦠꦶꦪꦁ. ꦌꦮꦫꦹꦥꦺꦴ ꦮꦠ꧀ꦡꦨꦺꦴꦒꦺꦴ ꦄꦲꦺꦴꦱꦶ – ꦱꦴꦟꦁ ꦣꦴꦫꦺꦠꦶ ꦠꦶꦥꦏ꧀ꦑꦮꦱꦤꦁ. ꦌꦮꦫꦹꦥꦺꦴ ꦪꦴꦤꦨꦺꦴꦒꦺꦴ ꦄꦲꦺꦴꦱꦶ – ꦗꦗ꧀ꦗꦫꦫꦡꦏꦺꦤ ꦪꦴꦠꦶ ꦥꦟ꧀ꦟꦖꦠ꧀ꦠꦏꦺꦤ ꦣꦴꦫꦶꦪꦩꦴꦤꦺꦤꦴ’’ꦠꦶ.

‘‘ꦌꦮꦩꦺꦠꦁ, ꦩꦲꦴꦫꦴꦗ, ꦌꦮꦩꦺꦠꦁ, ꦩꦲꦴꦫꦴꦗ! ꦄꦱꦥ꧀ꦥꦸꦫꦶꦱꦺꦴ ꦑꦺꦴ, ꦩꦲꦴꦫꦴꦗ, ꦈꦭ꦳ꦴꦫꦺ ꦨꦺꦴꦒꦺ ꦭꦨꦶꦠ꧀ꦮꦴ ꦤꦺꦮꦠ꧀ꦠꦴꦤꦁ ꦱꦸꦑꦺꦠꦶ ꦥꦷꦟꦺꦠꦶ, ꦤ ꦩꦴꦠꦴꦥꦶꦠꦫꦺꦴ ꦱꦸꦑꦺꦠꦶ ꦥꦷꦟꦺꦠꦶ, ꦤ ꦥꦸꦠ꧀ꦠꦢꦴꦫꦁ ꦱꦸꦑꦺꦠꦶ ꦥꦷꦟꦺꦠꦶ, ꦤ ꦢꦴꦱꦏꦩ꧀ꦩꦏꦫꦥꦺꦴꦫꦶꦱꦺ ꦱꦸꦑꦺꦠꦶ ꦥꦷꦟꦺꦠꦶ, ꦤ ꦩꦶꦠ꧀ꦠꦴꦩꦕ꧀ꦕꦺ ꦱꦸꦑꦺꦠꦶ ꦥꦷꦟꦺꦠꦶ, ꦤ ꦱꦩꦟꦧ꧀ꦫꦴꦲ꧀ꦩꦟꦺꦱꦸ ꦈꦢ꧀ꦣꦒ꧀ꦒꦶꦏꦁ ꦢꦏ꧀ꦑꦶꦟꦁ ꦥꦠꦶꦛ꧀ꦜꦴꦥꦺꦠꦶ ꦱꦺꦴꦮꦒ꧀ꦒꦶꦏꦁ ꦱꦸꦑꦮꦶꦥꦴꦏꦁ ꦱꦒ꧀ꦒꦱꦁꦮꦠ꧀ꦠꦤꦶꦏꦁ. ꦠꦱ꧀ꦱ ꦠꦺ ꦨꦺꦴꦒꦺ ꦌꦮꦁ ꦱꦩ꧀ꦩꦴ ꦄꦥꦫꦶꦨꦸꦚ꧀ꦗꦶꦪꦩꦴꦤꦺ [ꦄꦥꦫꦶꦨꦸꦚ꧀ꦗꦩꦴꦤꦺꦴ (ꦱꦧ꧀ꦧꦠ꧀ꦡ)] ꦫꦴꦗꦴꦤꦺꦴ ꦮꦴ ꦲꦫꦤ꧀ꦠꦶ ꦕꦺꦴꦫꦴ ꦮꦴ ꦲꦫꦤ꧀ꦠꦶ ꦄꦒ꧀ꦒꦶ ꦮꦴ ꦝꦲꦠꦶ ꦈꦢꦏꦁ ꦮꦴ ꦮꦲꦠꦶ ꦄꦥ꧀ꦥꦶꦪꦴ ꦮꦴ ꦢꦴꦪꦴꦢꦴ ꦲꦫꦤ꧀ꦠꦶ. ꦌꦮꦁꦱ ꦠꦺ [ꦌꦮꦁ ꦱꦤ꧀ꦠꦺ (ꦱꦷ. ꦥꦷ.)], ꦩꦲꦴꦫꦴꦗ, ꦨꦺꦴꦒꦴ ꦱꦩ꧀ꦩꦴ ꦄꦥꦫꦶꦨꦸꦚ꧀ꦗꦶꦪꦩꦴꦤꦴ ꦥꦫꦶꦏ꧀ꦑꦪꦁ ꦒꦕ꧀ꦖꦤ꧀ꦠꦶ, ꦤꦺꦴ ꦥꦫꦶꦨꦺꦴꦒꦁ.

‘‘ꦱꦺꦪ꧀ꦪꦡꦴꦥꦶ, ꦩꦲꦴꦫꦴꦗ, ꦄꦩꦤꦸꦱ꧀ꦱꦛ꧀ꦜꦴꦤꦺ ꦥꦺꦴꦏ꧀ꦑꦫꦟꦷ ꦄꦕ꧀ꦖꦺꦴꦢꦏꦴ ꦱꦷꦠꦺꦴꦢꦏꦴ ꦱꦴꦠꦺꦴꦢꦏꦴ ꦱꦺꦠꦺꦴꦢꦏꦴ ꦱꦸꦥꦠꦶꦠ꧀ꦡꦴ ꦫꦩꦟꦷꦪꦴ. ꦠꦁ ꦗꦤꦺꦴ ꦤꦺꦮ ꦲꦫꦺꦪ꧀ꦪ ꦤ ꦥꦶꦮꦺꦪ꧀ꦪ ꦤ ꦤꦲꦴꦪꦺꦪ꧀ꦪ ꦤ ꦪꦡꦴꦥꦕ꧀ꦕꦪꦁ ꦮꦴ ꦏꦫꦺꦪ꧀ꦪ. ꦌꦮꦚ꧀ꦲꦶ ꦠꦁ, ꦩꦲꦴꦫꦴꦗ, ꦈꦢꦏꦁ ꦱꦩ꧀ꦩꦴ ꦄꦥꦫꦶꦨꦸꦚ꧀ꦗꦶꦪꦩꦴꦤꦁ [ꦄꦥꦫꦶꦨꦸꦚ꧀ꦗꦩꦴꦤꦁ (ꦱ꧀ꦪꦴ. ꦏꦁ.)] ꦥꦫꦶꦏ꧀ꦑꦪꦁ ꦒꦕ꧀ꦖꦺꦪ꧀ꦪ, ꦤꦺꦴ ꦥꦫꦶꦨꦺꦴꦒꦁ. ꦌꦮꦩꦺꦮ ꦑꦺꦴ, ꦩꦲꦴꦫꦴꦗ, ꦄꦱꦥ꧀ꦥꦸꦫꦶꦱꦺꦴ ꦈꦭ꦳ꦴꦫꦺ ꦨꦺꦴꦒꦺ ꦭꦨꦶꦠ꧀ꦮꦴ ꦤꦺꦮꦠ꧀ꦠꦴꦤꦁ ꦱꦸꦑꦺꦠꦶ ꦥꦷꦟꦺꦠꦶ, ꦤ ꦩꦴꦠꦴꦥꦶꦠꦫꦺꦴ ꦱꦸꦑꦺꦠꦶ ꦥꦷꦟꦺꦠꦶ, ꦤ ꦥꦸꦠ꧀ꦠꦢꦴꦫꦁ ꦱꦸꦑꦺꦠꦶ ꦥꦷꦟꦺꦠꦶ, ꦤ ꦢꦴꦱꦏꦩ꧀ꦩꦏꦫꦥꦺꦴꦫꦶꦱꦺ ꦱꦸꦑꦺꦠꦶ ꦥꦷꦟꦺꦠꦶ, ꦤ ꦩꦶꦠ꧀ꦠꦴꦩꦕ꧀ꦕꦺ ꦱꦸꦑꦺꦠꦶ ꦥꦷꦟꦺꦠꦶ, ꦤ ꦱꦩꦟꦧ꧀ꦫꦴꦲ꧀ꦩꦟꦺꦱꦸ ꦈꦢ꧀ꦣꦒ꧀ꦒꦶꦏꦁ ꦢꦏ꧀ꦑꦶꦟꦁ ꦥꦠꦶꦛ꧀ꦜꦴꦥꦺꦠꦶ ꦱꦺꦴꦮꦒ꧀ꦒꦶꦏꦁ ꦱꦸꦑꦮꦶꦥꦴꦏꦁ ꦱꦒ꧀ꦒꦱꦁꦮꦠ꧀ꦠꦤꦶꦏꦁ. ꦠꦱ꧀ꦱ ꦠꦺ ꦨꦺꦴꦒꦺ ꦌꦮꦁ ꦱꦩ꧀ꦩꦴ ꦄꦥꦫꦶꦨꦸꦚ꧀ꦗꦶꦪꦩꦴꦤꦺ ꦫꦴꦗꦴꦤꦺꦴ ꦮꦴ ꦲꦫꦤ꧀ꦠꦶ ꦕꦺꦴꦫꦴ ꦮꦴ ꦲꦫꦤ꧀ꦠꦶ ꦄꦒ꧀ꦒꦶ ꦮꦴ ꦝꦲꦠꦶ ꦈꦢꦏꦁ ꦮꦴ ꦮꦲꦠꦶ ꦄꦥ꧀ꦥꦶꦪꦴ ꦮꦴ ꦢꦴꦪꦴꦢꦴ ꦲꦫꦤ꧀ꦠꦶ. ꦌꦮꦁꦱ ꦠꦺ [ꦌꦮꦁ ꦱꦤ꧀ꦠꦺ (ꦱꦷ. ꦥꦷ.)], ꦩꦲꦴꦫꦴꦗ, ꦨꦺꦴꦒꦴ ꦱꦩ꧀ꦩꦴ ꦄꦥꦫꦶꦨꦸꦚ꧀ꦗꦶꦪꦩꦴꦤꦴ ꦥꦫꦶꦏ꧀ꦑꦪꦁ ꦒꦕ꧀ꦖꦤ꧀ꦠꦶ, ꦤꦺꦴ ꦥꦫꦶꦨꦺꦴꦒꦁ.

‘‘ꦱꦥ꧀ꦥꦸꦫꦶꦱꦺꦴ ꦕ ꦑꦺꦴ, ꦩꦲꦴꦫꦴꦗ, ꦈꦭ꦳ꦴꦫꦺ ꦨꦺꦴꦒꦺ ꦭꦨꦶꦠ꧀ꦮꦴ ꦄꦠ꧀ꦠꦴꦤꦁ ꦱꦸꦑꦺꦠꦶ ꦥꦷꦟꦺꦠꦶ, ꦩꦴꦠꦴꦥꦶꦠꦫꦺꦴ ꦱꦸꦑꦺꦠꦶ ꦥꦷꦟꦺꦠꦶ, ꦥꦸꦠ꧀ꦠꦢꦴꦫꦁ ꦱꦸꦑꦺꦠꦶ ꦥꦷꦟꦺꦠꦶ, ꦢꦴꦱꦏꦩ꧀ꦩꦏꦫꦥꦺꦴꦫꦶꦱꦺ ꦱꦸꦑꦺꦠꦶ ꦥꦷꦟꦺꦠꦶ, ꦩꦶꦠ꧀ꦠꦴꦩꦕ꧀ꦕꦺ ꦱꦸꦑꦺꦠꦶ ꦥꦷꦟꦺꦠꦶ, ꦱꦩꦟꦧ꧀ꦫꦴꦲ꧀ꦩꦟꦺꦱꦸ ꦈꦢ꧀ꦣꦒ꧀ꦒꦶꦏꦁ ꦢꦏ꧀ꦑꦶꦟꦁ ꦥꦠꦶꦛ꧀ꦜꦴꦥꦺꦠꦶ ꦱꦺꦴꦮꦒ꧀ꦒꦶꦏꦁ ꦱꦸꦑꦮꦶꦥꦴꦏꦁ ꦱꦒ꧀ꦒꦱꦁꦮꦠ꧀ꦠꦤꦶꦏꦁ. ꦠꦱ꧀ꦱ ꦠꦺ ꦨꦺꦴꦒꦺ ꦌꦮꦁ ꦱꦩ꧀ꦩꦴ ꦥꦫꦶꦨꦸꦚ꧀ꦗꦶꦪꦩꦴꦤꦺ ꦤꦺꦮ ꦫꦴꦗꦴꦤꦺꦴ ꦲꦫꦤ꧀ꦠꦶ, ꦤ ꦕꦺꦴꦫꦴ ꦲꦫꦤ꧀ꦠꦶ, ꦤ ꦄꦒ꧀ꦒꦶ ꦝꦲꦠꦶ, ꦤ ꦈꦢꦏꦁ ꦮꦲꦠꦶ, ꦤ ꦄꦥ꧀ꦥꦶꦪꦴ ꦢꦴꦪꦴꦢꦴ ꦲꦫꦤ꧀ꦠꦶ. ꦌꦮꦁꦱ ꦠꦺ, ꦩꦲꦴꦫꦴꦗ, ꦨꦺꦴꦒꦴ ꦱꦩ꧀ꦩꦴ ꦥꦫꦶꦨꦸꦚ꧀ꦗꦶꦪꦩꦴꦤꦴ ꦥꦫꦶꦨꦺꦴꦒꦁ ꦒꦕ꧀ꦖꦤ꧀ꦠꦶ, ꦤꦺꦴ ꦥꦫꦶꦏ꧀ꦑꦪꦁ.

‘‘ꦱꦺꦪ꧀ꦪꦡꦴꦥꦶ, ꦩꦲꦴꦫꦴꦗ, ꦒꦴꦩꦱ꧀ꦱ ꦮꦴ ꦤꦶꦒꦩꦱ꧀ꦱ ꦮꦴ ꦄꦮꦶꦢꦹꦫꦺ ꦥꦺꦴꦏ꧀ꦑꦫꦟꦷ ꦄꦕ꧀ꦖꦺꦴꦢꦏꦴ ꦱꦷꦠꦺꦴꦢꦏꦴ ꦱꦴꦠꦺꦴꦢꦏꦴ ꦱꦺꦠꦺꦴꦢꦏꦴ ꦱꦸꦥꦠꦶꦠ꧀ꦡꦴ ꦫꦩꦟꦷꦪꦴ. ꦠꦚ꧀ꦕ ꦈꦢꦏꦁ ꦗꦤꦺꦴ ꦲꦫꦺꦪ꧀ꦪꦥꦶ ꦥꦶꦮꦺꦪ꧀ꦪꦥꦶ ꦤꦲꦴꦪꦺꦪ꧀ꦪꦥꦶ ꦪꦡꦴꦥꦕ꧀ꦕꦪꦩ꧀ꦥꦶ ꦏꦫꦺꦪ꧀ꦪ. ꦌꦮꦚ꧀ꦲꦶ ꦠꦁ, ꦩꦲꦴꦫꦴꦗ, ꦈꦢꦏꦁ ꦱꦩ꧀ꦩꦴ ꦥꦫꦶꦨꦸꦚ꧀ꦗꦶꦪꦩꦴꦤꦁ ꦥꦫꦶꦨꦺꦴꦒꦁ ꦒꦕ꧀ꦖꦺꦪ꧀ꦪ, ꦤꦺꦴ ꦥꦫꦶꦏ꧀ꦑꦪꦁ. ꦌꦮꦩꦺꦮ ꦑꦺꦴ, ꦩꦲꦴꦫꦴꦗ, ꦱꦥ꧀ꦥꦸꦫꦶꦱꦺꦴ ꦈꦭ꦳ꦴꦫꦺ ꦨꦺꦴꦒꦺ ꦭꦨꦶꦠ꧀ꦮꦴ ꦄꦠ꧀ꦠꦴꦤꦁ ꦱꦸꦑꦺꦠꦶ ꦥꦷꦟꦺꦠꦶ, ꦩꦴꦠꦴꦥꦶꦠꦫꦺꦴ ꦱꦸꦑꦺꦠꦶ ꦥꦷꦟꦺꦠꦶ, ꦥꦸꦠ꧀ꦠꦢꦴꦫꦁ ꦱꦸꦑꦺꦠꦶ ꦥꦷꦟꦺꦠꦶ, ꦢꦴꦱꦏꦩ꧀ꦩꦏꦫꦥꦺꦴꦫꦶꦱꦺ ꦱꦸꦑꦺꦠꦶ ꦥꦷꦟꦺꦠꦶ, ꦩꦶꦠ꧀ꦠꦴꦩꦕ꧀ꦕꦺ ꦱꦸꦑꦺꦠꦶ ꦥꦷꦟꦺꦠꦶ, ꦱꦩꦟꦧ꧀ꦫꦴꦲ꧀ꦩꦟꦺꦱꦸ ꦈꦢ꧀ꦣꦒ꧀ꦒꦶꦏꦁ ꦢꦏ꧀ꦑꦶꦟꦁ ꦥꦠꦶꦛ꧀ꦜꦴꦥꦺꦠꦶ ꦱꦺꦴꦮꦒ꧀ꦒꦶꦏꦁ ꦱꦸꦑꦮꦶꦥꦴꦏꦁ ꦱꦒ꧀ꦒꦱꦁꦮꦠ꧀ꦠꦤꦶꦏꦁ. ꦠꦱ꧀ꦱ ꦠꦺ ꦨꦺꦴꦒꦺ ꦌꦮꦁ ꦱꦩ꧀ꦩꦴ ꦥꦫꦶꦨꦸꦚ꧀ꦗꦶꦪꦩꦴꦤꦺ ꦤꦺꦮ ꦫꦴꦗꦴꦤꦺꦴ ꦲꦫꦤ꧀ꦠꦶ, ꦤ ꦕꦺꦴꦫꦴ ꦲꦫꦤ꧀ꦠꦶ, ꦤ ꦄꦒ꧀ꦒꦶ ꦝꦲꦠꦶ, ꦤ ꦈꦢꦏꦁ ꦮꦲꦠꦶ, ꦤ ꦄꦥ꧀ꦥꦶꦪꦴ ꦢꦴꦪꦴꦢꦴ ꦲꦫꦤ꧀ꦠꦶ. ꦌꦮꦁꦱ ꦠꦺ, ꦩꦲꦴꦫꦴꦗ, ꦨꦺꦴꦒꦴ ꦱꦩ꧀ꦩꦴ ꦥꦫꦶꦨꦸꦚ꧀ꦗꦶꦪꦩꦴꦤꦴ ꦥꦫꦶꦨꦺꦴꦒꦁ ꦒꦕ꧀ꦖꦤ꧀ꦠꦶ, ꦤꦺꦴ ꦥꦫꦶꦏ꧀ꦑꦪ’’ꦤ꧀ꦠꦶ.

‘‘ꦄꦩꦤꦸꦱ꧀ꦱꦛ꧀ꦜꦴꦤꦺ ꦈꦢꦏꦁꦮ ꦱꦷꦠꦁ,

ꦠꦢꦥꦺꦪ꧀ꦪꦩꦴꦤꦁ ꦥꦫꦶꦱꦺꦴꦱꦩꦺꦠꦶ;

ꦌꦮꦁ ꦣꦤꦁ ꦏꦴꦥꦸꦫꦶꦱꦺꦴ ꦭꦨꦶꦠ꧀ꦮꦴ,

ꦤꦺꦮꦠ꧀ꦠꦤꦴ ꦨꦸꦚ꧀ꦗꦠꦶ ꦤꦺꦴ ꦢꦢꦴꦠꦶ.

ꦣꦷꦫꦺꦴ ꦕ ꦮꦶꦚ꧀ꦚꦹ ꦄꦣꦶꦒꦩ꧀ꦩ ꦨꦺꦴꦒꦺ,

ꦱꦺꦴ ꦨꦸꦚ꧀ꦗꦠꦶ ꦏꦶꦕ꧀ꦕꦏꦫꦺꦴ ꦕ ꦲꦺꦴꦠꦶ;

ꦱꦺꦴ ꦚꦴꦠꦶꦱꦔ꧀ꦓꦁ ꦤꦶꦱꦨꦺꦴ ꦨꦫꦶꦠ꧀ꦮꦴ,

ꦄꦤꦶꦤ꧀ꦢꦶꦠꦺꦴ ꦱꦒ꧀ꦒꦩꦸꦥꦺꦠꦶ ꦜꦴꦤ’’ꦤ꧀ꦠꦶ.