꧙. ꦄꦫꦚ꧀ꦚꦴꦪꦠꦤꦆꦱꦶꦱꦸꦠ꧀ꦠꦁ

꧒꧕꧕. ꦱꦴꦮꦠ꧀ꦡꦶꦪꦁ. ‘‘ꦨꦹꦠꦥꦸꦧ꧀ꦧꦁ, ꦨꦶꦏ꧀ꦑꦮꦺ, ꦱꦩ꧀ꦧꦲꦸꦭꦴ ꦆꦱꦪꦺꦴ ꦱꦷꦭꦮꦤ꧀ꦠꦺꦴ ꦏꦭ꧀ꦪꦴꦟꦣꦩ꧀ꦩꦴ ꦄꦫꦚ꧀ꦚꦴꦪꦠꦤꦺ ꦥꦟ꧀ꦟꦏꦸꦛꦷꦱꦸ ꦱꦩ꧀ꦩꦤ꧀ꦠꦶ. ꦄꦡ ꦑꦺꦴ, ꦨꦶꦏ꧀ꦑꦮꦺ, ꦱꦏ꧀ꦏꦺꦴ ꦕ ꦢꦺꦮꦴꦤꦩꦶꦤ꧀ꦢꦺꦴ ꦮꦺꦥꦕꦶꦠ꧀ꦠꦶ ꦕ ꦄꦱꦸꦫꦶꦤ꧀ꦢꦺꦴ ꦪꦺꦤ ꦠꦺ ꦆꦱꦪꦺꦴ ꦱꦷꦭꦮꦤ꧀ꦠꦺꦴ ꦏꦭ꧀ꦪꦴꦟꦣꦩ꧀ꦩꦴ ꦠꦺꦤꦸꦥꦱꦔ꧀ꦏꦩꦶꦁꦱꦸ. ꦄꦡ ꦑꦺꦴ, ꦨꦶꦏ꧀ꦑꦮꦺ, ꦮꦺꦥꦕꦶꦠ꧀ꦠꦶ ꦄꦱꦸꦫꦶꦤ꧀ꦢꦺꦴ ꦥꦛꦭꦶꦪꦺꦴ [ꦄꦛꦭꦶꦪꦺꦴ (ꦱꦷ. ꦱ꧀ꦪꦴ. ꦏꦁ. ꦥꦷ.), ꦄꦴꦛꦭꦶꦪꦺꦴ (ꦏ.) ꦩ. ꦤꦶ. ꧒.꧔꧑꧐] ꦈꦥꦴꦲꦤꦴ ꦄꦴꦫꦺꦴꦲꦶꦠ꧀ꦮꦴ ꦑꦒ꧀ꦒꦁ ꦎꦭꦒ꧀ꦒꦺꦠ꧀ꦮꦴ ꦖꦠ꧀ꦠꦺꦤ ꦣꦴꦫꦶꦪꦩꦴꦤꦺꦤ ꦄꦒ꧀ꦒꦢ꧀ꦮꦴꦫꦺꦤ ꦄꦱ꧀ꦱꦩꦁ ꦥꦮꦶꦱꦶꦠ꧀ꦮꦴ ꦠꦺ ꦆꦱꦪꦺꦴ ꦱꦷꦭꦮꦤ꧀ꦠꦺ ꦏꦭ꧀ꦪꦴꦟꦣꦩ꧀ꦩꦺ ꦄꦥꦧ꧀ꦪꦴꦩꦠꦺꦴ ꦏꦫꦶꦠ꧀ꦮꦴ ꦄꦠꦶꦏ꧀ꦏꦩꦶ. ꦄꦡ ꦑꦺꦴ, ꦨꦶꦏ꧀ꦑꦮꦺ, ꦱꦏ꧀ꦏꦺꦴ ꦢꦺꦮꦴꦤꦩꦶꦤ꧀ꦢꦺꦴ ꦥꦛꦭꦶꦪꦺꦴ ꦈꦥꦴꦲꦤꦴ ꦎꦫꦺꦴꦲꦶꦠ꧀ꦮꦴ ꦑꦒ꧀ꦒꦁ ꦄꦚ꧀ꦚꦺꦱꦁ ꦢꦠ꧀ꦮꦴ ꦖꦠ꧀ꦠꦁ ꦄꦥꦤꦴꦩꦺꦠ꧀ꦮꦴ ꦢ꧀ꦮꦴꦫꦺꦤꦺꦮ ꦄꦱ꧀ꦱꦩꦁ ꦥꦮꦶꦱꦶꦠ꧀ꦮꦴ ꦠꦺ ꦆꦱꦪꦺꦴ ꦱꦷꦭꦮꦤ꧀ꦠꦺ ꦏꦭ꧀ꦪꦴꦟꦣꦩ꧀ꦩꦺ ꦄꦤꦸꦮꦴꦠꦁ ꦥꦚ꧀ꦗꦭꦶꦏꦺꦴ ꦤꦩꦱ꧀ꦱꦩꦴꦤꦺꦴ ꦄꦛ꧀ꦜꦴꦱꦶ’’. ꦄꦡ ꦑꦺꦴ, ꦨꦶꦏ꧀ꦑꦮꦺ, ꦠꦺ ꦆꦱꦪꦺꦴ ꦱꦷꦭꦮꦤ꧀ꦠꦺꦴ ꦏꦭ꧀ꦪꦴꦟꦣꦩ꧀ꦩꦴ ꦱꦏ꧀ꦏꦁ ꦢꦺꦮꦴꦤꦩꦶꦤ꧀ꦢꦁ ꦒꦴꦡꦴꦪ ꦄꦗ꧀ꦙꦨꦴꦱꦶꦁꦱꦸ –

‘‘ꦒꦤ꧀ꦣꦺꦴ ꦆꦱꦷꦤꦁ ꦕꦶꦫꦢꦶꦏ꧀ꦑꦶꦠꦴꦤꦁ,

ꦏꦴꦪꦴ ꦕꦸꦠꦺꦴ ꦒꦕ꧀ꦖꦠꦶ ꦩꦴꦭꦸꦠꦺꦤ;

ꦆꦠꦺꦴ ꦥꦛꦶꦏ꧀ꦏꦩ꧀ꦩ ꦱꦲꦱ꧀ꦱꦤꦺꦠ꧀ꦠ,

ꦒꦤ꧀ꦣꦺꦴ ꦆꦱꦷꦤꦁ ꦄꦱꦸꦕꦶ ꦢꦺꦮꦫꦴꦗꦴ’’ꦠꦶ.

‘‘ꦒꦤ꧀ꦣꦺꦴ ꦆꦱꦷꦤꦁ ꦕꦶꦫꦢꦶꦏ꧀ꦑꦶꦠꦴꦤꦁ,

ꦏꦴꦪꦴ ꦕꦸꦠꦺꦴ ꦒꦕ꧀ꦖꦠꦸ [ꦒꦕ꧀ꦖꦠꦶ (ꦱꦷ. ꦱ꧀ꦪꦴ. ꦏꦁ.)] ꦩꦴꦭꦸꦠꦺꦤ,

ꦱꦸꦕꦶꦠ꧀ꦫꦥꦸꦥ꧀ꦦꦁ ꦱꦶꦫꦱ꧀ꦩꦶꦁꦮ ꦩꦴꦭꦁ;

ꦒꦤ꧀ꦣꦁ ꦌꦠꦁ ꦥꦛꦶꦏꦔ꧀ꦑꦴꦩ ꦨꦤ꧀ꦠꦺ,

ꦤ ꦲꦺꦠ꧀ꦡ ꦢꦺꦮꦴ ꦥꦛꦶꦏꦹꦭꦱꦚ꧀ꦚꦶꦤꦺꦴ’’ꦠꦶ.