꧑. ꦱꦸꦮꦷꦫꦱꦸꦠ꧀ꦠꦁ

꧒꧔꧗. ꦌꦮꦁ ꦩꦺ ꦱꦸꦠꦁ – ꦌꦏꦁ ꦱꦩꦪꦁ ꦨꦒꦮꦴ ꦱꦴꦮꦠ꧀ꦡꦶꦪꦁ ꦮꦶꦲꦫꦠꦶ ꦗꦺꦠꦮꦤꦺ ꦄꦤꦴꦡꦥꦶꦟ꧀ꦝꦶꦏꦱ꧀ꦱ ꦄꦴꦫꦴꦩꦺ. ꦠꦠ꧀ꦫ ꦑꦺꦴ ꦨꦒꦮꦴ ꦨꦶꦏ꧀ꦑꦹ ꦄꦴꦩꦤ꧀ꦠꦺꦱꦶ – ‘‘ꦨꦶꦏ꧀ꦑꦮꦺꦴ’’ꦠꦶ. ‘‘ꦨꦢꦤ꧀ꦠꦺ’’ꦠꦶ ꦠꦺ ꦨꦶꦏ꧀ꦑꦹ ꦨꦒꦮꦠꦺꦴ ꦥꦕ꧀ꦕꦱ꧀ꦱꦺꦴꦱꦸꦁ. ꦨꦒꦮꦴ ꦌꦠꦢꦮꦺꦴꦕ –

‘‘ꦨꦹꦠꦥꦸꦧ꧀ꦧꦁ, ꦨꦶꦏ꧀ꦑꦮꦺ, ꦄꦱꦸꦫꦴ ꦢꦺꦮꦺ ꦄꦨꦶꦪꦁꦱꦸ. ꦄꦡ ꦑꦺꦴ, ꦨꦶꦏ꧀ꦑꦮꦺ, ꦱꦏ꧀ꦏꦺꦴ ꦢꦺꦮꦴꦤꦩꦶꦤ꧀ꦢꦺꦴ ꦱꦸꦮꦷꦫꦁ ꦢꦺꦮꦥꦸꦠ꧀ꦠꦁ ꦄꦴꦩꦤ꧀ꦠꦺꦱꦶ – ‘ꦌꦠꦺ, ꦠꦴꦠ ꦱꦸꦮꦷꦫ, ꦄꦱꦸꦫꦴ ꦢꦺꦮꦺ ꦄꦨꦶꦪꦤ꧀ꦠꦶ. ꦒꦕ꧀ꦖ, ꦠꦴꦠ ꦱꦸꦮꦷꦫ, ꦄꦱꦸꦫꦺ ꦥꦕ꧀ꦕꦸꦪ꧀ꦪꦴꦲꦷ’ꦠꦶ. ‘ꦌꦮꦁ ꦨꦢ꧀ꦢꦤ꧀ꦠꦮꦴ’ꦠꦶ ꦑꦺꦴ, ꦨꦶꦏ꧀ꦑꦮꦺ, ꦱꦸꦮꦷꦫꦺꦴ ꦢꦺꦮꦥꦸꦠ꧀ꦠꦺꦴ ꦱꦏ꧀ꦏꦱ꧀ꦱ ꦢꦺꦮꦴꦤꦩꦶꦤ꧀ꦢꦱ꧀ꦱ ꦥꦛꦶꦱ꧀ꦱꦸꦠ꧀ꦮꦴ ꦥꦩꦴꦢꦁ ꦄꦴꦥꦴꦢꦺꦱꦶ [ꦄꦴꦲꦫꦺꦱꦶ (ꦏꦠ꧀ꦡꦕꦶ) ꦤꦮꦔ꧀ꦒꦸꦠ꧀ꦠꦫꦺ ꦱꦷꦲꦤꦴꦢꦱꦸꦠ꧀ꦠꦺꦥꦶ]. ꦢꦸꦠꦶꦪꦩ꧀ꦥꦶ ꦑꦺꦴ, ꦨꦶꦏ꧀ꦑꦮꦺ, ꦱꦏ꧀ꦏꦺꦴ ꦢꦺꦮꦴꦤꦩꦶꦤ꧀ꦢꦺꦴ ꦱꦸꦮꦷꦫꦁ ꦢꦺꦮꦥꦸꦠ꧀ꦠꦁ ꦄꦴꦩꦤ꧀ꦠꦺꦱꦶ – ‘ꦌꦠꦺ, ꦠꦴꦠ ꦱꦸꦮꦷꦫ, ꦄꦱꦸꦫꦴ ꦢꦺꦮꦺ ꦄꦨꦶꦪꦤ꧀ꦠꦶ. ꦒꦕ꧀ꦖ, ꦠꦴꦠ ꦱꦸꦮꦷꦫ, ꦄꦱꦸꦫꦺ ꦥꦕ꧀ꦕꦸꦪ꧀ꦪꦴꦲꦷ’ꦠꦶ. ‘ꦌꦮꦁ ꦨꦢ꧀ꦢꦤ꧀ꦠꦮꦴ’ꦠꦶ ꦑꦺꦴ, ꦨꦶꦏ꧀ꦑꦮꦺ, ꦱꦸꦮꦷꦫꦺꦴ ꦢꦺꦮꦥꦸꦠ꧀ꦠꦺꦴ ꦱꦏ꧀ꦏꦱ꧀ꦱ ꦢꦺꦮꦴꦤꦩꦶꦤ꧀ꦢꦱ꧀ꦱ ꦥꦛꦶꦱ꧀ꦱꦸꦠ꧀ꦮꦴ ꦢꦸꦠꦶꦪꦩ꧀ꦥꦶ ꦥꦩꦴꦢꦁ ꦄꦴꦥꦴꦢꦺꦱꦶ. ꦠꦠꦶꦪꦩ꧀ꦥꦶ ꦑꦺꦴ, ꦨꦶꦏ꧀ꦑꦮꦺ, ꦱꦏ꧀ꦏꦺꦴ ꦢꦺꦮꦴꦤꦩꦶꦤ꧀ꦢꦺꦴ ꦱꦸꦮꦷꦫꦁ ꦢꦺꦮꦥꦸꦠ꧀ꦠꦁ ꦄꦴꦩꦤ꧀ꦠꦺꦱꦶ – ‘ꦌꦠꦺ, ꦠꦴꦠ ꦱꦸꦮꦷꦫ, ꦄꦱꦸꦫꦴ ꦢꦺꦮꦺ ꦄꦨꦶꦪꦤ꧀ꦠꦶ. ꦒꦕ꧀ꦖ, ꦠꦴꦠ ꦱꦸꦮꦷꦫ, ꦄꦱꦸꦫꦺ ꦥꦕ꧀ꦕꦸꦪ꧀ꦪꦴꦲꦷ’ꦠꦶ. ‘ꦌꦮꦁ ꦨꦢ꧀ꦢꦤ꧀ꦠꦮꦴ’ꦠꦶ ꦑꦺꦴ, ꦨꦶꦏ꧀ꦑꦮꦺ, ꦱꦸꦮꦷꦫꦺꦴ ꦢꦺꦮꦥꦸꦠ꧀ꦠꦺꦴ ꦱꦏ꧀ꦏꦱ꧀ꦱ ꦢꦺꦮꦴꦤꦩꦶꦤ꧀ꦢꦱ꧀ꦱ ꦥꦛꦶꦱ꧀ꦱꦸꦠ꧀ꦮꦴ ꦠꦠꦶꦪꦩ꧀ꦥꦶ ꦥꦩꦴꦢꦁ ꦄꦴꦥꦴꦢꦺꦱꦶ. ꦄꦡ ꦑꦺꦴ, ꦨꦶꦏ꧀ꦑꦮꦺ, ꦱꦏ꧀ꦏꦺꦴ ꦢꦺꦮꦴꦤꦩꦶꦤ꧀ꦢꦺꦴ ꦱꦸꦮꦷꦫꦁ ꦢꦺꦮꦥꦸꦠ꧀ꦠꦁ ꦒꦴꦡꦴꦪ ꦄꦗ꧀ꦙꦨꦴꦱꦶ –

‘‘ꦄꦤꦸꦛ꧀ꦜꦲꦁ ꦄꦮꦴꦪꦴꦩꦁ, ꦱꦸꦑꦁ ꦪꦠ꧀ꦫꦴꦣꦶꦒꦕ꧀ꦖꦠꦶ;

ꦱꦸꦮꦷꦫ ꦠꦠ꧀ꦡ ꦒꦕ꧀ꦖꦴꦲꦶ, ꦩꦚ꧀ꦕ ꦠꦠ꧀ꦡꦺꦮ ꦥꦴꦥꦪꦴ’’ꦠꦶ.

‘‘ꦄꦭꦱ꧀ꦮꦱ꧀ꦱ [ꦄꦭꦱ’ꦱ꧀ꦱ (ꦱꦷ. ꦥꦷ.), ꦄꦭꦱ꧀ꦮꦴꦪꦁ (ꦱ꧀ꦪꦴ. ꦏꦁ.)] ꦄꦤꦸꦛ꧀ꦜꦴꦠꦴ, ꦤ ꦕ ꦏꦶꦕ꧀ꦕꦴꦤꦶ ꦏꦴꦫꦪꦺ;

ꦱꦧ꧀ꦧꦏꦴꦩꦱꦩꦶꦢ꧀ꦣꦱ꧀ꦱ, ꦠꦁ ꦩꦺ ꦱꦏ꧀ꦏ ꦮꦫꦁ ꦢꦶꦱꦴ’’ꦠꦶ.

‘‘ꦪꦠ꧀ꦡꦴꦭꦱꦺꦴ ꦄꦤꦸꦛ꧀ꦜꦴꦠꦴ, ꦄꦕ꧀ꦕꦤ꧀ꦠꦁ ꦱꦸꦑꦩꦺꦣꦠꦶ;

ꦱꦸꦮꦷꦫ ꦠꦠ꧀ꦡ ꦒꦕ꧀ꦖꦴꦲꦶ, ꦩꦚ꧀ꦕ ꦠꦠ꧀ꦡꦺꦮ ꦥꦴꦥꦪꦴ’’ꦠꦶ.

‘‘ꦄꦏꦩ꧀ꦩꦸꦤꦴ [ꦄꦏꦩ꧀ꦩꦤꦴ (ꦱꦷ. ꦥꦷ.)] ꦢꦺꦮꦱꦺꦛ꧀ꦜ, ꦱꦏ꧀ꦏ ꦮꦶꦤ꧀ꦢꦺꦩꦸ ꦪꦁ ꦱꦸꦑꦁ;

ꦄꦱꦺꦴꦏꦁ ꦄꦤꦸꦥꦴꦪꦴꦱꦁ, ꦠꦁ ꦩꦺ ꦱꦏ꧀ꦏ ꦮꦫꦁ ꦢꦶꦱꦴ’’ꦠꦶ.

‘‘ꦱꦕꦺ ꦄꦠ꧀ꦡꦶ ꦄꦏꦩ꧀ꦩꦺꦤ, ꦏꦺꦴꦕꦶ ꦏ꧀ꦮꦕꦶ ꦤ ꦗꦷꦮꦠꦶ;

ꦤꦶꦧ꧀ꦧꦴꦤꦱ꧀ꦱ ꦲꦶ ꦱꦺꦴ ꦩꦒ꧀ꦒꦺꦴ, ꦱꦸꦮꦷꦫ ꦠꦠ꧀ꦡ ꦒꦕ꧀ꦖꦴꦲꦶ;

ꦩꦚ꧀ꦕ ꦠꦠ꧀ꦡꦺꦮ ꦥꦴꦥꦪꦴ’’ꦠꦶ.

‘‘ꦱꦺꦴ ꦲꦶ ꦤꦴꦩ, ꦨꦶꦏ꧀ꦑꦮꦺ, ꦱꦏ꧀ꦏꦺꦴ ꦢꦺꦮꦴꦤꦩꦶꦤ꧀ꦢꦺꦴ ꦱꦏꦁ ꦥꦸꦚ꧀ꦚꦦꦭꦁ ꦈꦥꦗꦷꦮꦩꦴꦤꦺꦴ ꦢꦺꦮꦴꦤꦁ ꦠꦴꦮꦠꦶꦁꦱꦴꦤꦁ ꦆꦱ꧀ꦱꦫꦶꦪꦴꦣꦶꦥꦕ꧀ꦕꦁ ꦫꦗ꧀ꦗꦁ ꦏꦴꦫꦺꦤ꧀ꦠꦺꦴ ꦈꦛ꧀ꦜꦴꦤꦮꦷꦫꦶꦪꦱ꧀ꦱ ꦮꦟ꧀ꦟꦮꦴꦢꦷ ꦨꦮꦶꦱ꧀ꦱꦠꦶ. ꦆꦣ ꦑꦺꦴ ꦠꦁ, ꦨꦶꦏ꧀ꦑꦮꦺ, ꦱꦺꦴꦨꦺꦡ, ꦪꦁ ꦠꦸꦩ꧀ꦲꦺ ꦌꦮꦁ ꦱ꧀ꦮꦴꦏ꧀ꦑꦴꦠꦺ ꦣꦩ꧀ꦩꦮꦶꦤꦪꦺ ꦥꦧ꧀ꦧꦗꦶꦠꦴ ꦱꦩꦴꦤꦴ ꦈꦛ꧀ꦜꦲꦺꦪ꧀ꦪꦴꦡ ꦓꦛꦺꦪ꧀ꦪꦴꦡ ꦮꦴꦪꦩꦺꦪ꧀ꦪꦴꦡ ꦄꦥ꧀ꦥꦠ꧀ꦠꦱ꧀ꦱ ꦥꦠ꧀ꦠꦶꦪꦴ ꦄꦤꦣꦶꦒꦠꦱ꧀ꦱ ꦄꦣꦶꦒꦩꦴꦪ, ꦄꦱꦕ꧀ꦖꦶꦏꦠꦱ꧀ꦱ ꦱꦕ꧀ꦖꦶꦏꦶꦫꦶꦪꦴꦪꦴ’’ꦠꦶ.