꧘. ꦖꦺꦠ꧀ꦮꦴꦮꦒ꧀ꦒꦺꦴ

꧑. ꦖꦺꦠ꧀ꦮꦴꦱꦸꦠ꧀ꦠꦁ

꧗꧑. ꦱꦴꦮꦠ꧀ꦡꦶꦤꦶꦢꦴꦤꦁ. ꦌꦏꦩꦤ꧀ꦠꦁ ꦜꦶꦠꦴ ꦑꦺꦴ ꦱꦴ ꦢꦺꦮꦠꦴ ꦨꦒꦮꦤ꧀ꦠꦁ ꦒꦴꦡꦴꦪ ꦄꦗ꧀ꦙꦨꦴꦱꦶ –

‘‘ꦏꦶꦁꦱꦸ ꦖꦺꦠ꧀ꦮꦴ [ꦙꦠ꧀ꦮꦴ (ꦱꦷ.), ꦓꦠ꧀ꦮꦴ (ꦱ꧀ꦪꦴ. ꦏꦁ.) ꦌꦮꦩꦸꦥꦫꦶꦥꦶ] ꦱꦸꦑꦁ ꦱꦺꦠꦶ, ꦏꦶꦁꦱꦸ ꦖꦺꦠ꧀ꦮꦴ ꦤ ꦱꦺꦴꦕꦠꦶ;

ꦏꦶꦱ꧀ꦱꦱ꧀ꦱꦸ ꦌꦏꦣꦩ꧀ꦩꦱ꧀ꦱ, ꦮꦣꦁ ꦫꦺꦴꦕꦺꦱꦶ ꦒꦺꦴꦠꦩꦴ’’ꦠꦶ.

‘‘ꦏꦺꦴꦣꦁ ꦖꦺꦠ꧀ꦮꦴ ꦱꦸꦑꦁ ꦱꦺꦠꦶ, ꦏꦺꦴꦣꦁ ꦖꦺꦠ꧀ꦮꦴ ꦤ ꦱꦺꦴꦕꦠꦶ;

ꦏꦺꦴꦣꦱ꧀ꦱ ꦮꦶꦱꦩꦹꦭꦱ꧀ꦱ, ꦩꦣꦸꦫꦒ꧀ꦒꦱ꧀ꦱ ꦢꦺꦮꦠꦺ;

ꦮꦣꦁ ꦄꦫꦶꦪꦴ ꦥꦱꦁꦱꦤ꧀ꦠꦶ, ꦠꦚ꧀ꦲꦶ ꦖꦺꦠ꧀ꦮꦴ ꦤ ꦱꦺꦴꦕꦠꦷ’’ꦠꦶ.

꧒. ꦫꦡꦱꦸꦠ꧀ꦠꦁ

꧗꧒. ‘‘ꦏꦶꦁꦱꦸ ꦫꦡꦱ꧀ꦱ ꦥꦚ꧀ꦚꦴꦟꦁ, ꦏꦶꦁꦱꦸ ꦥꦚ꧀ꦚꦴꦟꦩꦒ꧀ꦒꦶꦤꦺꦴ;

ꦏꦶꦁꦱꦸ ꦫꦛ꧀ꦜꦱ꧀ꦱ ꦥꦚ꧀ꦚꦴꦟꦁ, ꦏꦶꦁꦱꦸ ꦥꦚ꧀ꦚꦴꦟꦩꦶꦠ꧀ꦡꦶꦪꦴ’’ꦠꦶ.

‘‘ꦣꦗꦺꦴ ꦫꦡꦱ꧀ꦱ ꦥꦚ꧀ꦚꦴꦟꦁ, ꦣꦹꦩꦺꦴ ꦥꦚ꧀ꦚꦴꦟꦩꦒ꧀ꦒꦶꦤꦺꦴ;

ꦫꦴꦗꦴ ꦫꦛ꧀ꦜꦱ꧀ꦱ ꦥꦚ꧀ꦚꦴꦟꦁ, ꦨꦠ꧀ꦠꦴ ꦥꦚ꧀ꦚꦴꦟꦩꦶꦠ꧀ꦡꦶꦪꦴ’’ꦠꦶ.

꧓. ꦮꦶꦠ꧀ꦠꦱꦸꦠ꧀ꦠꦁ

꧗꧓. ‘‘ꦏꦶꦁꦱꦹꦣ ꦮꦶꦠ꧀ꦠꦁ ꦥꦸꦫꦶꦱꦱ꧀ꦱ ꦱꦺꦛ꧀ꦜꦁ, ꦏꦶꦁꦱꦸ ꦱꦸꦕꦶꦟ꧀ꦟꦺꦴ ꦱꦸꦑꦩꦴꦮꦲꦠꦶ;

ꦏꦶꦁꦱꦸ ꦲꦮꦺ ꦱꦴꦢꦸꦠꦫꦁ [ꦱꦴꦣꦸꦠꦫꦁ (ꦏ.)] ꦫꦱꦴꦤꦁ, ꦏꦡꦁꦗꦷꦮꦶꦁ [ꦏꦶꦁꦱꦸꦗꦷꦮꦶꦁ (ꦏ.)] ꦗꦷꦮꦶꦠꦩꦴꦲꦸ ꦱꦺꦛ꧀ꦜ’’ꦤ꧀ꦠꦶ.

‘‘ꦱꦢ꧀ꦣꦷꦣ ꦮꦶꦠ꧀ꦠꦁ ꦥꦸꦫꦶꦱꦱ꧀ꦱ ꦱꦺꦛ꧀ꦜꦁ, ꦣꦩ꧀ꦩꦺꦴ ꦱꦸꦕꦶꦟ꧀ꦟꦺꦴ ꦱꦸꦑꦩꦴꦮꦲꦠꦶ;

ꦱꦕ꧀ꦕꦁ ꦲꦮꦺ ꦱꦴꦢꦸꦠꦫꦁ ꦫꦱꦴꦤꦁ, ꦥꦚ꧀ꦚꦴꦗꦷꦮꦶꦁ ꦗꦷꦮꦶꦠꦩꦴꦲꦸ ꦱꦺꦛ꧀ꦜ’’ꦤ꧀ꦠꦶ.

꧔. ꦮꦸꦛ꧀ꦜꦶꦱꦸꦠ꧀ꦠꦁ

꧗꧔. ‘‘ꦏꦶꦁꦱꦸ ꦈꦥ꧀ꦥꦠꦠꦁ ꦱꦺꦛ꧀ꦜꦁ, ꦏꦶꦁꦱꦸ ꦤꦶꦥꦠꦠꦁ ꦮꦫꦁ;

ꦏꦶꦁꦱꦸ ꦥꦮꦗꦩꦴꦤꦴꦤꦁ, ꦏꦶꦁꦱꦸ ꦥꦮꦢꦠꦁ ꦮꦫ’’ꦤ꧀ꦠꦶ.

‘‘ꦧꦷꦗꦁ ꦈꦥ꧀ꦥꦠꦠꦁ ꦱꦺꦛ꧀ꦜꦁ, ꦮꦸꦛ꧀ꦜꦶ ꦤꦶꦥꦠꦠꦁ ꦮꦫꦴ;

ꦒꦴꦮꦺꦴ ꦥꦮꦗꦩꦴꦤꦴꦤꦁ, ꦥꦸꦠ꧀ꦠꦺꦴ ꦥꦮꦢꦠꦁ ꦮꦫꦺꦴꦠꦶ.

‘‘ꦮꦶꦗ꧀ꦗꦴ ꦈꦥ꧀ꦥꦠꦠꦁ ꦱꦺꦛ꧀ꦜꦴ, ꦄꦮꦶꦗ꧀ꦗꦴ ꦤꦶꦥꦠꦠꦁ ꦮꦫꦴ;

ꦱꦔ꧀ꦓꦺꦴ ꦥꦮꦗꦩꦴꦤꦴꦤꦁ, ꦧꦸꦢ꧀ꦣꦺꦴ ꦥꦮꦢꦠꦁ ꦮꦫꦺꦴ’’ꦠꦶ.

꧕. ꦨꦷꦠꦴꦱꦸꦠ꧀ꦠꦁ

꧗꧕. ‘‘ꦏꦶꦁꦱꦹꦣ ꦨꦷꦠꦴ ꦗꦤꦠꦴ ꦄꦤꦺꦏꦴ,

ꦩꦒ꧀ꦒꦺꦴ ꦕꦤꦺꦏꦴꦪꦠꦤꦥ꧀ꦥꦮꦸꦠ꧀ꦠꦺꦴ;

ꦥꦸꦕ꧀ꦖꦴꦩꦶ ꦠꦁ ꦒꦺꦴꦠꦩ ꦨꦹꦫꦶꦥꦚ꧀ꦚ,

ꦏꦶꦱ꧀ꦩꦶꦁ ꦜꦶꦠꦺꦴ ꦥꦫꦭꦺꦴꦏꦁ ꦤ ꦨꦴꦪꦺ’’ꦠꦶ.

‘‘ꦮꦴꦕꦁ ꦩꦤꦚ꧀ꦕ ꦥꦟꦶꦣꦴꦪ ꦱꦩ꧀ꦩꦴ,

ꦏꦴꦪꦺꦤ ꦥꦴꦥꦴꦤꦶ ꦄꦏꦸꦧ꧀ꦧꦩꦴꦤꦺꦴ;

ꦧꦮ꧀ꦲꦤ꧀ꦤꦥꦴꦤꦁ ꦓꦫꦩꦴꦮꦱꦤ꧀ꦠꦺꦴ,

ꦱꦢ꧀ꦣꦺꦴ ꦩꦸꦢꦹ ꦱꦁꦮꦶꦨꦴꦒꦷ ꦮꦢꦚ꧀ꦚꦹ;

ꦌꦠꦺꦱꦸ ꦣꦩ꧀ꦩꦺꦱꦸ ꦜꦶꦠꦺꦴ ꦕꦠꦹꦱꦸ,

ꦣꦩ꧀ꦩꦺ ꦜꦶꦠꦺꦴ ꦥꦫꦭꦺꦴꦏꦁ ꦤ ꦨꦴꦪꦺ’’ꦠꦶ.

꧖. ꦤꦗꦷꦫꦠꦶꦱꦸꦠ꧀ꦠꦁ

꧗꧖. ‘‘ꦏꦶꦁ ꦗꦷꦫꦠꦶ ꦏꦶꦁ ꦤ ꦗꦷꦫꦠꦶ, ꦏꦶꦁꦱꦸ ꦈꦥ꧀ꦥꦡꦺꦴꦠꦶ ꦮꦸꦕ꧀ꦕꦠꦶ;

ꦏꦶꦁꦱꦸ ꦣꦩ꧀ꦩꦴꦤꦁ ꦥꦫꦶꦥꦤ꧀ꦡꦺꦴ, ꦏꦶꦁꦱꦸ ꦫꦠ꧀ꦠꦶꦤ꧀ꦢꦶꦮꦏ꧀ꦑꦪꦺꦴ;

ꦏꦶꦁ ꦩꦭꦁ ꦧ꧀ꦫꦲ꧀ꦩꦕꦫꦶꦪꦱ꧀ꦱ, ꦏꦶꦁ ꦱꦶꦤꦴꦤꦩꦤꦺꦴꦢꦏꦁ.

‘‘ꦏꦠꦶ ꦭꦺꦴꦏꦱ꧀ꦩꦶꦁ ꦖꦶꦢ꧀ꦢꦴꦤꦶ, ꦪꦠ꧀ꦡ ꦮꦶꦠ꧀ꦠꦁ [ꦕꦶꦠ꧀ꦠꦁ (ꦱꦷ. ꦱ꧀ꦪꦴ. ꦏꦁ. ꦥꦷ.)] ꦤ ꦠꦶꦛ꧀ꦜꦠꦶ;

ꦨꦒꦮꦤ꧀ꦠꦁ ꦥꦸꦛ꧀ꦜꦸꦩꦴꦒꦩ꧀ꦩ, ꦏꦡꦁ ꦗꦴꦤꦺꦩꦸ ꦠꦁ ꦩꦪ’’ꦤ꧀ꦠꦶ.

‘‘ꦫꦹꦥꦁ ꦗꦷꦫꦠꦶ ꦩꦕ꧀ꦕꦴꦤꦁ, ꦤꦴꦩꦒꦺꦴꦠ꧀ꦠꦁ ꦤ ꦗꦷꦫꦠꦶ;

ꦫꦴꦒꦺꦴ ꦈꦥ꧀ꦥꦡꦺꦴꦠꦶ ꦮꦸꦕ꧀ꦕꦠꦶ.

‘‘ꦭꦺꦴꦨꦺꦴ ꦣꦩ꧀ꦩꦴꦤꦁ ꦥꦫꦶꦥꦤ꧀ꦡꦺꦴ, ꦮꦪꦺꦴ ꦫꦠ꧀ꦠꦶꦤ꧀ꦢꦶꦮꦏ꧀ꦑꦪꦺꦴ;

ꦆꦠ꧀ꦡꦷ ꦩꦭꦁ ꦧ꧀ꦫꦲ꧀ꦩꦕꦫꦶꦪꦱ꧀ꦱ, ꦌꦠ꧀ꦡꦴꦪꦁ ꦱꦗ꧀ꦗꦠꦺ ꦥꦗꦴ;

ꦠꦥꦺꦴ ꦕ ꦧ꧀ꦫꦲ꧀ꦩꦕꦫꦶꦪꦚ꧀ꦕ, ꦠꦁ ꦱꦶꦤꦴꦤꦩꦤꦺꦴꦢꦏꦁ.

‘‘ꦖ ꦭꦺꦴꦏꦱ꧀ꦩꦶꦁ ꦖꦶꦢ꧀ꦢꦴꦤꦶ, ꦪꦠ꧀ꦡ ꦮꦶꦠ꧀ꦠꦁ ꦤ ꦠꦶꦛ꧀ꦜꦠꦶ;

ꦄꦴꦭꦱ꧀ꦪꦚ꧀ꦕ [ꦄꦴꦭꦱ꧀ꦱꦚ꧀ꦕ (ꦱꦷ. ꦥꦷ.)] ꦥꦩꦴꦢꦺꦴ ꦕ, ꦄꦤꦸꦛ꧀ꦜꦴꦤꦁ ꦄꦱꦁꦪꦩꦺꦴ;

ꦤꦶꦢ꧀ꦢꦴ ꦠꦤ꧀ꦢꦷ [ꦠꦤ꧀ꦢꦶ (ꦱꦷ.)] ꦕ ꦠꦺ ꦖꦶꦢ꧀ꦢꦺ, ꦱꦧ꧀ꦧꦱꦺꦴ ꦠꦁ ꦮꦶꦮꦗ꧀ꦗꦪꦺ’’ꦠꦶ.

꧗. ꦆꦱ꧀ꦱꦫꦶꦪꦱꦸꦠ꧀ꦠꦁ

꧗꧗. ‘‘ꦏꦶꦁꦱꦸ ꦆꦱ꧀ꦱꦫꦶꦪꦁ ꦭꦺꦴꦏꦺ, ꦏꦶꦁꦱꦸ ꦨꦟ꧀ꦝꦴꦤꦩꦸꦠ꧀ꦠꦩꦁ;

ꦏꦶꦁꦱꦸ ꦱꦠ꧀ꦡꦩꦭꦁ ꦭꦺꦴꦏꦺ, ꦏꦶꦁꦱꦸ ꦭꦺꦴꦏꦱ꧀ꦩꦶꦩꦧ꧀ꦧꦸꦢꦁ.

‘‘ꦏꦶꦁꦱꦸ ꦲꦫꦤ꧀ꦠꦁ ꦮꦴꦫꦺꦤ꧀ꦠꦶ, ꦲꦫꦤ꧀ꦠꦺꦴ ꦥꦤ ꦏꦺꦴ ꦥꦶꦪꦺꦴ;

ꦏꦶꦁꦱꦸ ꦥꦸꦤꦥ꧀ꦥꦸꦤꦴꦪꦤ꧀ꦠꦁ, ꦄꦨꦶꦤꦤ꧀ꦢꦤ꧀ꦠꦶ ꦥꦟ꧀ꦝꦶꦠꦴ’’ꦠꦶ.

‘‘ꦮꦱꦺꦴ ꦆꦱ꧀ꦱꦫꦶꦪꦁ ꦭꦺꦴꦏꦺ, ꦆꦠ꧀ꦡꦷ ꦨꦟ꧀ꦝꦴꦤꦩꦸꦠ꧀ꦠꦩꦁ;

ꦏꦺꦴꦣꦺꦴ ꦱꦠ꧀ꦡꦩꦭꦁ ꦭꦺꦴꦏꦺ, ꦕꦺꦴꦫꦴ ꦭꦺꦴꦏꦱ꧀ꦩꦶꦩꦧ꧀ꦧꦸꦢꦴ.

‘‘ꦕꦺꦴꦫꦁ ꦲꦫꦤ꧀ꦠꦁ ꦮꦴꦫꦺꦤ꧀ꦠꦶ, ꦲꦫꦤ꧀ꦠꦺꦴ ꦱꦩꦟꦺꦴ ꦥꦶꦪꦺꦴ;

ꦱꦩꦟꦁ ꦥꦸꦤꦥ꧀ꦥꦸꦤꦴꦪꦤ꧀ꦠꦁ, ꦄꦨꦶꦤꦤ꧀ꦢꦤ꧀ꦠꦶ ꦥꦟ꧀ꦝꦶꦠꦴ’’ꦠꦶ.

꧘. ꦏꦴꦩꦱꦸꦠ꧀ꦠꦁ

꧗꧘. ‘‘ꦏꦶꦩꦠ꧀ꦡꦏꦴꦩꦺꦴ ꦤ ꦢꦢꦺ, ꦏꦶꦁ ꦩꦕ꧀ꦕꦺꦴ ꦤ ꦥꦫꦶꦕ꧀ꦕꦗꦺ;

ꦏꦶꦁꦱꦸ ꦩꦸꦚ꧀ꦕꦺꦪ꧀ꦪ ꦏꦭ꧀ꦪꦴꦟꦁ, ꦥꦴꦥꦶꦏꦁ ꦤ ꦕ ꦩꦺꦴꦕꦪꦺ’’ꦠꦶ.

‘‘ꦄꦠ꧀ꦠꦴꦤꦁ ꦤ ꦢꦢꦺ ꦥꦺꦴꦱꦺꦴ, ꦄꦠ꧀ꦠꦴꦤꦁ ꦤ ꦥꦫꦶꦕ꧀ꦕꦗꦺ;

ꦮꦴꦕꦁ ꦩꦸꦚ꧀ꦕꦺꦪ꧀ꦪ ꦏꦭ꧀ꦪꦴꦟꦁ, ꦥꦴꦥꦶꦏꦚ꧀ꦕ ꦤ ꦩꦺꦴꦕꦪꦺ’’ꦠꦶ.

꧙. ꦥꦴꦡꦺꦪ꧀ꦪꦱꦸꦠ꧀ꦠꦁ

꧗꧙. ‘‘ꦏꦶꦁꦱꦸ ꦧꦤ꧀ꦣꦠꦶ ꦥꦴꦡꦺꦪ꧀ꦪꦁ, ꦏꦶꦁꦱꦸ ꦨꦺꦴꦒꦴꦤꦩꦴꦱꦪꦺꦴ;

ꦏꦶꦁꦱꦸ ꦤꦫꦁ ꦥꦫꦶꦏꦱ꧀ꦱꦠꦶ, ꦏꦶꦁꦱꦸ ꦭꦺꦴꦏꦱ꧀ꦩꦶ ꦢꦸꦗ꧀ꦗꦲꦁ;

ꦏꦶꦱ꧀ꦩꦶꦁ ꦧꦢ꧀ꦣꦴ ꦥꦸꦡꦹ ꦱꦠ꧀ꦠꦴ, ꦥꦴꦱꦺꦤ ꦱꦏꦸꦟꦷ ꦪꦡꦴ’’ꦠꦶ.

‘‘ꦱꦢ꧀ꦣꦴ ꦧꦤ꧀ꦣꦠꦶ ꦥꦴꦡꦺꦪ꧀ꦪꦁ, ꦱꦶꦫꦷ ꦨꦺꦴꦒꦴꦤꦩꦴꦱꦪꦺꦴ;

ꦆꦕ꧀ꦖꦴ ꦤꦫꦁ ꦥꦫꦶꦏꦱ꧀ꦱꦠꦶ, ꦆꦕ꧀ꦖꦴ ꦭꦺꦴꦏꦱ꧀ꦩꦶ ꦢꦸꦗ꧀ꦗꦲꦴ;

ꦆꦕ꧀ꦖꦴꦧꦢ꧀ꦣꦴ ꦥꦸꦡꦹ ꦱꦠ꧀ꦠꦴ, ꦥꦴꦱꦺꦤ ꦱꦏꦸꦟꦷ ꦪꦡꦴ’’ꦠꦶ.

꧑꧐. ꦥꦗ꧀ꦗꦺꦴꦠꦱꦸꦠ꧀ꦠꦁ

꧘꧐. ‘‘ꦏꦶꦁꦱꦸ ꦭꦺꦴꦏꦱ꧀ꦩꦶ ꦥꦗ꧀ꦗꦺꦴꦠꦺꦴ, ꦏꦶꦁꦱꦸ ꦭꦺꦴꦏꦱ꧀ꦩꦶ ꦗꦴꦒꦫꦺꦴ;

ꦏꦶꦁꦱꦸ ꦏꦩ꧀ꦩꦺ ꦱꦗꦷꦮꦴꦤꦁ, ꦏꦶꦩꦱ꧀ꦱ ꦆꦫꦶꦪꦴꦥꦡꦺꦴ.

‘‘ꦏꦶꦁꦱꦸ ꦄꦭꦱꦁ ꦄꦤꦭꦱꦚ꧀ꦕ [ꦏꦶꦁ ꦄꦴꦭꦱ꧀ꦪꦴꦤꦴꦭꦱ꧀ꦪꦚ꧀ꦕ (ꦏ.)], ꦩꦴꦠꦴ ꦥꦸꦠ꧀ꦠꦁꦮ ꦥꦺꦴꦱꦠꦶ;

ꦏꦶꦁ ꦨꦹꦠꦴ ꦈꦥꦗꦷꦮꦤ꧀ꦠꦶ, ꦪꦺ ꦥꦴꦟꦴ ꦥꦡꦮꦶꦱ꧀ꦱꦶꦠꦴ’’ꦠꦶ.

‘‘ꦥꦚ꧀ꦚꦴ ꦭꦺꦴꦏꦱ꧀ꦩꦶ ꦥꦗ꧀ꦗꦺꦴꦠꦺꦴ, ꦱꦠꦶ ꦭꦺꦴꦏꦱ꧀ꦩꦶ ꦗꦴꦒꦫꦺꦴ;

ꦒꦴꦮꦺꦴ ꦏꦩ꧀ꦩꦺ ꦱꦗꦷꦮꦴꦤꦁ, ꦱꦷꦠꦱ꧀ꦱ ꦆꦫꦶꦪꦴꦥꦡꦺꦴ.

‘‘ꦮꦸꦛ꧀ꦜꦶ ꦄꦭꦱꦁ ꦄꦤꦭꦱꦚ꧀ꦕ, ꦩꦴꦠꦴ ꦥꦸꦠ꧀ꦠꦁꦮ ꦥꦺꦴꦱꦠꦶ;

ꦮꦸꦛ꧀ꦜꦶꦁ ꦨꦹꦠꦴ ꦈꦥꦗꦷꦮꦤ꧀ꦠꦶ, ꦪꦺ ꦥꦴꦟꦴ ꦥꦡꦮꦶꦱ꧀ꦱꦶꦠꦴ’’ꦠꦶ.

꧑꧑. ꦄꦫꦟꦱꦸꦠ꧀ꦠꦁ

꧘꧑. ‘‘ꦏꦺꦱꦹꦣ ꦄꦫꦟꦴ ꦭꦺꦴꦏꦺ, ꦏꦺꦱꦁ ꦮꦸꦱꦶꦠꦁ ꦤ ꦤꦱ꧀ꦱꦠꦶ;

ꦏꦺꦣ ꦆꦕ꧀ꦖꦁ ꦥꦫꦶꦗꦴꦤꦤ꧀ꦠꦶ, ꦏꦺꦱꦁ ꦨꦺꦴꦗꦶꦱ꧀ꦱꦶꦪꦁ ꦱꦢꦴ.

‘‘ꦏꦶꦁꦱꦸ ꦩꦴꦠꦴ ꦥꦶꦠꦴ ꦨꦴꦠꦴ, ꦮꦤ꧀ꦢꦤ꧀ꦠꦶ ꦤꦁ ꦥꦠꦶꦛ꧀ꦜꦶꦠꦁ;

ꦏꦶꦁꦱꦸ ꦆꦣ ꦗꦴꦠꦶꦲꦷꦤꦁ, ꦄꦨꦶꦮꦴꦢꦺꦤ꧀ꦠꦶ ꦑꦠ꧀ꦠꦶꦪꦴ’’ꦠꦶ.

‘‘ꦱꦩꦟꦷꦣ ꦄꦫꦟꦴ ꦭꦺꦴꦏꦺ, ꦱꦩꦟꦴꦤꦁ ꦮꦸꦱꦶꦠꦁ ꦤ ꦤꦱ꧀ꦱꦠꦶ;

ꦱꦩꦟꦴ ꦆꦕ꧀ꦖꦁ ꦥꦫꦶꦗꦴꦤꦤ꧀ꦠꦶ, ꦱꦩꦟꦴꦤꦁ ꦨꦺꦴꦗꦶꦱ꧀ꦱꦶꦪꦁ ꦱꦢꦴ.

‘‘ꦱꦩꦟꦁ ꦩꦴꦠꦴ ꦥꦶꦠꦴ ꦨꦴꦠꦴ, ꦮꦤ꧀ꦢꦤ꧀ꦠꦶ ꦤꦁ ꦥꦠꦶꦛ꧀ꦜꦶꦠꦁ;

ꦱꦩꦟꦷꦣ ꦗꦴꦠꦶꦲꦷꦤꦁ, ꦄꦨꦶꦮꦴꦢꦺꦤ꧀ꦠꦶ ꦑꦠ꧀ꦠꦶꦪꦴ’’ꦠꦶ.

ꦖꦺꦠ꧀ꦮꦴꦮꦒ꧀ꦒꦺꦴ ꦄꦛ꧀ꦜꦩꦺꦴ.

ꦠꦱ꧀ꦱꦸꦢ꧀ꦢꦴꦤꦁ –

ꦖꦺꦠ꧀ꦮꦴ ꦫꦡꦚ꧀ꦕ ꦕꦶꦠ꧀ꦠꦚ꧀ꦕ, ꦮꦸꦛ꧀ꦜꦶ ꦨꦷꦠꦴ ꦤꦗꦷꦫꦠꦶ;

ꦆꦱ꧀ꦱꦫꦁ ꦏꦴꦩꦁ ꦥꦴꦡꦺꦪ꧀ꦪꦁ, ꦥꦗ꧀ꦗꦺꦴꦠꦺꦴ ꦄꦫꦟꦺꦤ ꦕꦴꦠꦶ.

ꦢꦺꦮꦠꦴꦱꦁꦪꦸꦠ꧀ꦠꦁ ꦱꦩꦠ꧀ꦠꦁ.