꧘. ꦤꦒꦫꦮꦶꦤ꧀ꦢꦺꦪ꧀ꦪꦱꦸꦠ꧀ꦠꦁ

꧔꧓꧔. ꦌꦮꦁ ꦩꦺ ꦱꦸꦠꦁ – ꦌꦏꦁ ꦱꦩꦪꦁ ꦨꦒꦮꦴ ꦏꦺꦴꦱꦭꦺꦱꦸ ꦕꦴꦫꦶꦏꦁ ꦕꦫꦩꦴꦤꦺꦴ ꦩꦲꦠꦴ ꦨꦶꦏ꧀ꦑꦸꦱꦔ꧀ꦓꦺꦤ ꦱꦢ꧀ꦣꦶꦁ ꦪꦺꦤ ꦤꦒꦫꦮꦶꦤ꧀ꦢꦁ ꦤꦴꦩ ꦏꦺꦴꦱꦭꦴꦤꦁ ꦧ꧀ꦫꦴꦲ꧀ꦩꦟꦴꦤꦁ ꦒꦴꦩꦺꦴ ꦠꦢꦮꦱꦫꦶ. ꦄꦱ꧀ꦱꦺꦴꦱꦸꦁ ꦑꦺꦴ ꦤꦒꦫꦮꦶꦤ꧀ꦢꦺꦪ꧀ꦪꦏꦴ [ꦤꦒꦫꦮꦶꦤ꧀ꦢꦺꦪ꧀ꦪꦴ (ꦏ.)] ꦧ꧀ꦫꦴꦲ꧀ꦩꦟꦒꦲꦥꦠꦶꦏꦴ – ‘‘ꦱꦩꦟꦺꦴ ꦑꦭꦸ, ꦨꦺꦴ, ꦒꦺꦴꦠꦩꦺꦴ ꦱꦏ꧀ꦪꦥꦸꦠ꧀ꦠꦺꦴ ꦱꦏ꧀ꦪꦏꦸꦭꦴ ꦥꦧ꧀ꦧꦗꦶꦠꦺꦴ ꦏꦺꦴꦱꦭꦺꦱꦸ ꦕꦴꦫꦶꦏꦁ ꦕꦫꦩꦴꦤꦺꦴ ꦩꦲꦠꦴ ꦨꦶꦏ꧀ꦑꦸꦱꦔ꧀ꦓꦺꦤ ꦱꦢ꧀ꦣꦶꦁ ꦤꦒꦫꦮꦶꦤ꧀ꦢꦁ ꦄꦤꦸꦥ꧀ꦥꦠ꧀ꦠꦺꦴ. ꦠꦁ ꦑꦺꦴ ꦥꦤ ꦨꦮꦤ꧀ꦠꦁ ꦒꦺꦴꦠꦩꦁ ꦌꦮꦁ ꦏꦭ꧀ꦪꦴꦟꦺꦴ ꦏꦶꦠ꧀ꦠꦶꦱꦢ꧀ꦢꦺꦴ ꦄꦧ꧀ꦨꦸꦒ꧀ꦒꦠꦺꦴ – ‘ꦆꦠꦶꦥꦶ ꦱꦺꦴ ꦨꦒꦮꦴ ꦄꦫꦲꦁ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦴ ꦮꦶꦗ꧀ꦗꦴꦕꦫꦟꦱꦩ꧀ꦥꦤ꧀ꦤꦺꦴ ꦱꦸꦒꦠꦺꦴ ꦭꦺꦴꦏꦮꦶꦢꦹ ꦄꦤꦸꦠ꧀ꦠꦫꦺꦴ ꦥꦸꦫꦶꦱꦢꦩ꧀ꦩꦱꦴꦫꦡꦶ ꦱꦠ꧀ꦡꦴ ꦢꦺꦮꦩꦤꦸꦱ꧀ꦱꦴꦤꦁ ꦧꦸꦢ꧀ꦣꦺꦴ ꦨꦒꦮꦴ’ꦠꦶ. ꦱꦺꦴ ꦆꦩꦁ ꦭꦺꦴꦏꦁ ꦱꦢꦺꦮꦏꦁ ꦱꦩꦴꦫꦏꦁ ꦱꦧ꧀ꦫꦲ꧀ꦩꦏꦁ ꦱꦱ꧀ꦱꦩꦟꦧ꧀ꦫꦴꦲ꧀ꦩꦟꦶꦁ ꦥꦗꦁ ꦱꦢꦺꦮꦩꦤꦸꦱ꧀ꦱꦁ ꦱꦪꦁ ꦄꦨꦶꦚ꧀ꦚꦴ ꦱꦕ꧀ꦖꦶꦏꦠ꧀ꦮꦴ ꦥꦮꦺꦢꦺꦠꦶ. ꦱꦺꦴ ꦣꦩ꧀ꦩꦁ ꦢꦺꦱꦺꦠꦶ ꦄꦴꦢꦶꦏꦭ꧀ꦪꦴꦟꦁ ꦩꦗ꧀ꦙꦺꦏꦭ꧀ꦪꦴꦟꦁ ꦥꦫꦶꦪꦺꦴꦱꦴꦤꦏꦭ꧀ꦪꦴꦟꦁ ꦱꦴꦠ꧀ꦡꦁ ꦱꦧ꧀ꦪꦚ꧀ꦗꦤꦁ, ꦏꦺꦮꦭꦥꦫꦶꦥꦸꦟ꧀ꦟꦁ ꦥꦫꦶꦱꦸꦢ꧀ꦣꦁ ꦧ꧀ꦫꦲ꧀ꦩꦕꦫꦶꦪꦁ ꦥꦏꦴꦱꦺꦠꦶ. ꦱꦴꦣꦸ ꦑꦺꦴ ꦥꦤ ꦠꦡꦴꦫꦹꦥꦴꦤꦁ ꦄꦫꦲꦠꦁ ꦢꦱ꧀ꦱꦤꦁ ꦲꦺꦴꦠꦷ’’ꦠꦶ.

ꦄꦡ ꦑꦺꦴ ꦤꦒꦫꦮꦶꦤ꧀ꦢꦺꦪ꧀ꦪꦏꦴ ꦧ꧀ꦫꦴꦲ꧀ꦩꦟꦒꦲꦥꦠꦶꦏꦴ ꦪꦺꦤ ꦨꦒꦮꦴ ꦠꦺꦤꦸꦥꦱꦔ꧀ꦏꦩꦶꦁꦱꦸ; ꦈꦥꦱꦔ꧀ꦏꦩꦶꦠ꧀ꦮꦴ ꦄꦥ꧀ꦥꦺꦏꦕ꧀ꦕꦺ ꦨꦒꦮꦤ꧀ꦠꦁ ꦄꦨꦶꦮꦴꦢꦺꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦷꦢꦶꦁꦱꦸ. ꦄꦥ꧀ꦥꦺꦏꦕ꧀ꦕꦺ ꦨꦒꦮꦠꦴ ꦱꦢ꧀ꦣꦶꦁ ꦱꦩ꧀ꦩꦺꦴꦢꦶꦁꦱꦸ; ꦱꦩ꧀ꦩꦺꦴꦢꦤꦷꦪꦁ ꦏꦡꦁ ꦱꦴꦫꦟꦷꦪꦁ ꦮꦷꦠꦶꦱꦴꦫꦺꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦷꦢꦶꦁꦱꦸ. ꦄꦥ꧀ꦥꦺꦏꦕ꧀ꦕꦺ ꦪꦺꦤ ꦨꦒꦮꦴ ꦠꦺꦤꦚ꧀ꦗꦭꦶꦁ ꦥꦟꦴꦩꦺꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦷꦢꦶꦁꦱꦸ. ꦄꦥ꧀ꦥꦺꦏꦕ꧀ꦕꦺ ꦨꦒꦮꦠꦺꦴ ꦱꦤ꧀ꦠꦶꦏꦺ ꦤꦴꦩꦒꦺꦴꦠ꧀ꦠꦁ ꦱꦴꦮꦺꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦷꦢꦶꦁꦱꦸ. ꦄꦥ꧀ꦥꦺꦏꦕ꧀ꦕꦺ ꦠꦸꦟ꧀ꦲꦷꦨꦹꦠꦴ ꦌꦏꦩꦤ꧀ꦠꦁ ꦤꦶꦱꦷꦢꦶꦁꦱꦸ. ꦌꦏꦩꦤ꧀ꦠꦁ ꦤꦶꦱꦶꦤ꧀ꦤꦺ ꦑꦺꦴ ꦤꦒꦫꦮꦶꦤ꧀ꦢꦺꦪ꧀ꦪꦏꦺ ꦧ꧀ꦫꦴꦲ꧀ꦩꦟꦒꦲꦥꦠꦶꦏꦺ ꦨꦒꦮꦴ ꦌꦠꦢꦮꦺꦴꦕ –

꧔꧓꧕. ‘‘ꦱꦕꦺ ꦮꦺꦴ, ꦒꦲꦥꦠꦪꦺꦴ, ꦄꦚ꧀ꦚꦠꦶꦠ꧀ꦡꦶꦪꦴ ꦥꦫꦶꦧ꧀ꦧꦴꦗꦏꦴ ꦌꦮꦁ ꦥꦸꦕ꧀ꦖꦺꦪ꧀ꦪꦸꦁ – ‘ꦏꦡꦁꦨꦹꦠꦴ, ꦒꦲꦥꦠꦪꦺꦴ, ꦱꦩꦟꦧ꧀ꦫꦴꦲ꧀ꦩꦟꦴ ꦤ ꦱꦏ꧀ꦏꦴꦠꦧ꧀ꦧꦴ ꦤ ꦒꦫꦸꦏꦴꦠꦧ꧀ꦧꦴ ꦤ ꦩꦴꦤꦺꦠꦧ꧀ꦧꦴ ꦤ ꦥꦹꦗꦺꦠꦧ꧀ꦧꦴ’ꦠꦶ? ꦌꦮꦁ ꦥꦸꦛ꧀ꦜꦴ ꦠꦸꦩ꧀ꦲꦺ, ꦒꦲꦥꦠꦪꦺꦴ, ꦠꦺꦱꦁ ꦄꦚ꧀ꦚꦠꦶꦠ꧀ꦡꦶꦪꦴꦤꦁ ꦥꦫꦶꦧ꧀ꦧꦴꦗꦏꦴꦤꦁ ꦌꦮꦁ ꦧ꧀ꦪꦴꦏꦫꦺꦪ꧀ꦪꦴꦡ – ‘ꦪꦺ ꦠꦺ ꦱꦩꦟꦧ꧀ꦫꦴꦲ꧀ꦩꦟꦴ ꦕꦏ꧀ꦑꦸꦮꦶꦚ꧀ꦚꦺꦪ꧀ꦪꦺꦱꦸ ꦫꦹꦥꦺꦱꦸ ꦄꦮꦷꦠꦫꦴꦒꦴ ꦄꦮꦷꦠꦢꦺꦴꦱꦴ ꦄꦮꦷꦠꦩꦺꦴꦲꦴ, ꦄꦗ꧀ꦙꦠ꧀ꦠꦁ ꦄꦮꦹꦥꦱꦤ꧀ꦠꦕꦶꦠ꧀ꦠꦴ, ꦱꦩꦮꦶꦱꦩꦁ ꦕꦫꦤ꧀ꦠꦶ ꦏꦴꦪꦺꦤ ꦮꦴꦕꦴꦪ ꦩꦤꦱꦴ, ꦌꦮꦫꦹꦥꦴ ꦱꦩꦟꦧ꧀ꦫꦴꦲ꧀ꦩꦟꦴ ꦤ ꦱꦏ꧀ꦏꦴꦠꦧ꧀ꦧꦴ ꦤ ꦒꦫꦸꦏꦴꦠꦧ꧀ꦧꦴ ꦤ ꦩꦴꦤꦺꦠꦧ꧀ꦧꦴ ꦤ ꦥꦹꦗꦺꦠꦧ꧀ꦧꦴ. ꦠꦁ ꦏꦶꦱ꧀ꦱ ꦲꦺꦠꦸ? ꦩꦪꦩ꧀ꦥꦶ ꦲꦶ ꦕꦏ꧀ꦑꦸꦮꦶꦚ꧀ꦚꦺꦪ꧀ꦪꦺꦱꦸ ꦫꦹꦥꦺꦱꦸ ꦄꦮꦷꦠꦫꦴꦒꦴ ꦄꦮꦷꦠꦢꦺꦴꦱꦴ ꦄꦮꦷꦠꦩꦺꦴꦲꦴ, ꦄꦗ꧀ꦙꦠ꧀ꦠꦁ ꦄꦮꦹꦥꦱꦤ꧀ꦠꦕꦶꦠ꧀ꦠꦴ, ꦱꦩꦮꦶꦱꦩꦁ ꦕꦫꦴꦩ ꦏꦴꦪꦺꦤ ꦮꦴꦕꦴꦪ ꦩꦤꦱꦴ, ꦠꦺꦱꦁ ꦤꦺꦴ ꦱꦩꦕꦫꦶꦪꦩ꧀ꦥꦶ ꦲꦺꦠꦁ ꦈꦠ꧀ꦠꦫꦶ ꦄꦥꦱ꧀ꦱꦠꦁ. ꦠꦱ꧀ꦩꦴ ꦠꦺ ꦨꦺꦴꦤ꧀ꦠꦺꦴ ꦱꦩꦟꦧ꧀ꦫꦴꦲ꧀ꦩꦟꦴ ꦤ ꦱꦏ꧀ꦏꦴꦠꦧ꧀ꦧꦴ ꦤ ꦒꦫꦸꦏꦴꦠꦧ꧀ꦧꦴ ꦤ ꦩꦴꦤꦺꦠꦧ꧀ꦧꦴ ꦤ ꦥꦹꦗꦺꦠꦧ꧀ꦧꦴ. ꦪꦺ ꦠꦺ ꦱꦩꦟꦧ꧀ꦫꦴꦲ꧀ꦩꦟꦴ ꦱꦺꦴꦠꦮꦶꦚ꧀ꦚꦺꦪ꧀ꦪꦺꦱꦸ ꦱꦢ꧀ꦢꦺꦱꦸ… ꦓꦴꦤꦮꦶꦚ꧀ꦚꦺꦪ꧀ꦪꦺꦱꦸ ꦒꦤ꧀ꦣꦺꦱꦸ… ꦗꦶꦮ꧀ꦲꦴꦮꦶꦚ꧀ꦚꦺꦪ꧀ꦪꦺꦱꦸ ꦫꦱꦺꦱꦸ… ꦏꦴꦪꦮꦶꦚ꧀ꦚꦺꦪ꧀ꦪꦺꦱꦸ ꦦꦺꦴꦛ꧀ꦜꦧ꧀ꦧꦺꦱꦸ… ꦩꦤꦺꦴꦮꦶꦚ꧀ꦚꦺꦪ꧀ꦪꦺꦱꦸ ꦣꦩ꧀ꦩꦺꦱꦸ ꦄꦮꦷꦠꦫꦴꦒꦴ ꦄꦮꦷꦠꦢꦺꦴꦱꦴ ꦄꦮꦷꦠꦩꦺꦴꦲꦴ, ꦄꦗ꧀ꦙꦠ꧀ꦠꦁ ꦄꦮꦹꦥꦱꦤ꧀ꦠꦕꦶꦠ꧀ꦠꦴ, ꦱꦩꦮꦶꦱꦩꦁ ꦕꦫꦤ꧀ꦠꦶ ꦏꦴꦪꦺꦤ ꦮꦴꦕꦴꦪ ꦩꦤꦱꦴ, ꦌꦮꦫꦹꦥꦴ ꦱꦩꦟꦧ꧀ꦫꦴꦲ꧀ꦩꦟꦴ ꦤ ꦱꦏ꧀ꦏꦴꦠꦧ꧀ꦧꦴ ꦤ ꦒꦫꦸꦏꦴꦠꦧ꧀ꦧꦴ ꦤ ꦩꦴꦤꦺꦠꦧ꧀ꦧꦴ ꦤ ꦥꦹꦗꦺꦠꦧ꧀ꦧꦴ. ꦠꦁ ꦏꦶꦱ꧀ꦱ ꦲꦺꦠꦸ? ꦩꦪꦩ꧀ꦥꦶ ꦲꦶ ꦩꦤꦺꦴꦮꦶꦚ꧀ꦚꦺꦪ꧀ꦪꦺꦱꦸ ꦣꦩ꧀ꦩꦺꦱꦸ ꦄꦮꦷꦠꦫꦴꦒꦴ ꦄꦮꦷꦠꦢꦺꦴꦱꦴ ꦄꦮꦷꦠꦩꦺꦴꦲꦴ, ꦄꦗ꧀ꦙꦠ꧀ꦠꦁ ꦄꦮꦹꦥꦱꦤ꧀ꦠꦕꦶꦠ꧀ꦠꦴ, ꦱꦩꦮꦶꦱꦩꦁ ꦕꦫꦴꦩ ꦏꦴꦪꦺꦤ ꦮꦴꦕꦴꦪ ꦩꦤꦱꦴ, ꦠꦺꦱꦁ ꦤꦺꦴ ꦱꦩꦕꦫꦶꦪꦩ꧀ꦥꦶ ꦲꦺꦠꦁ ꦈꦠ꧀ꦠꦫꦶ ꦄꦥꦱ꧀ꦱꦠꦁ. ꦠꦱ꧀ꦩꦴ ꦠꦺ ꦨꦺꦴꦤ꧀ꦠꦺꦴ ꦱꦩꦟꦧ꧀ꦫꦴꦲ꧀ꦩꦟꦴ ꦤ ꦱꦏ꧀ꦏꦴꦠꦧ꧀ꦧꦴ ꦤ ꦒꦫꦸꦏꦴꦠꦧ꧀ꦧꦴ ꦤ ꦩꦴꦤꦺꦠꦧ꧀ꦧꦴ ꦤ ꦥꦹꦗꦺꦠꦧ꧀ꦧꦴ’ꦠꦶ. ꦌꦮꦁ ꦥꦸꦛ꧀ꦜꦴ ꦠꦸꦩ꧀ꦲꦺ, ꦒꦲꦥꦠꦪꦺꦴ, ꦠꦺꦱꦁ ꦄꦚ꧀ꦚꦠꦶꦠ꧀ꦡꦶꦪꦴꦤꦁ ꦥꦫꦶꦧ꧀ꦧꦴꦗꦏꦴꦤꦁ ꦌꦮꦁ ꦧ꧀ꦪꦴꦏꦫꦺꦪ꧀ꦪꦴꦡ.

꧔꧓꧖. ‘‘ꦱꦕꦺ ꦥꦤ ꦮꦺꦴ, ꦒꦲꦥꦠꦪꦺꦴ, ꦄꦚ꧀ꦚꦠꦶꦠ꧀ꦡꦶꦪꦴ ꦥꦫꦶꦧ꧀ꦧꦴꦗꦏꦴ ꦌꦮꦁ ꦥꦸꦕ꧀ꦖꦺꦪ꧀ꦪꦸꦁ – ‘ꦏꦡꦁꦨꦹꦠꦴ, ꦒꦲꦥꦠꦪꦺꦴ, ꦱꦩꦟꦧ꧀ꦫꦴꦲ꧀ꦩꦟꦴ ꦱꦏ꧀ꦏꦴꦠꦧ꧀ꦧꦴ ꦒꦫꦸꦏꦴꦠꦧ꧀ꦧꦴ ꦩꦴꦤꦺꦠꦧ꧀ꦧꦴ ꦥꦹꦗꦺꦠꦧ꧀ꦧꦴ’ꦠꦶ? ꦌꦮꦁ ꦥꦸꦛ꧀ꦜꦴ ꦠꦸꦩ꧀ꦲꦺ, ꦒꦲꦥꦠꦪꦺꦴ, ꦠꦺꦱꦁ ꦄꦚ꧀ꦚꦠꦶꦠ꧀ꦡꦶꦪꦴꦤꦁ ꦥꦫꦶꦧ꧀ꦧꦴꦗꦏꦴꦤꦁ ꦌꦮꦁ ꦧ꧀ꦪꦴꦏꦫꦺꦪ꧀ꦪꦴꦡ – ‘ꦪꦺ ꦠꦺ ꦱꦩꦟꦧ꧀ꦫꦴꦲ꧀ꦩꦟꦴ ꦕꦏ꧀ꦑꦸꦮꦶꦚ꧀ꦚꦺꦪ꧀ꦪꦺꦱꦸ ꦫꦹꦥꦺꦱꦸ ꦮꦷꦠꦫꦴꦒꦴ ꦮꦷꦠꦢꦺꦴꦱꦴ ꦮꦷꦠꦩꦺꦴꦲꦴ, ꦄꦗ꧀ꦙꦠ꧀ꦠꦁ ꦮꦹꦥꦱꦤ꧀ꦠꦕꦶꦠ꧀ꦠꦴ, ꦱꦩꦕꦫꦶꦪꦁ ꦕꦫꦤ꧀ꦠꦶ ꦏꦴꦪꦺꦤ ꦮꦴꦕꦴꦪ ꦩꦤꦱꦴ, ꦌꦮꦫꦹꦥꦴ ꦱꦩꦟꦧ꧀ꦫꦴꦲ꧀ꦩꦟꦴ ꦱꦏ꧀ꦏꦴꦠꦧ꧀ꦧꦴ ꦒꦫꦸꦏꦴꦠꦧ꧀ꦧꦴ ꦩꦴꦤꦺꦠꦧ꧀ꦧꦴ ꦥꦹꦗꦺꦠꦧ꧀ꦧꦴ. ꦠꦁ ꦏꦶꦱ꧀ꦱ ꦲꦺꦠꦸ? ꦩꦪꦩ꧀ꦥꦶ ꦲꦶ [ꦩꦪꦁ ꦲꦶ (?)] ꦕꦏ꧀ꦑꦸꦮꦶꦚ꧀ꦚꦺꦪ꧀ꦪꦺꦱꦸ ꦫꦹꦥꦺꦱꦸ ꦄꦮꦷꦠꦫꦴꦒꦴ ꦄꦮꦷꦠꦢꦺꦴꦱꦴ ꦄꦮꦷꦠꦩꦺꦴꦲꦴ, ꦄꦗ꧀ꦙꦠ꧀ꦠꦁ ꦄꦮꦹꦥꦱꦤ꧀ꦠꦕꦶꦠ꧀ꦠꦴ, ꦱꦩꦮꦶꦱꦩꦁ ꦕꦫꦴꦩ ꦏꦴꦪꦺꦤ ꦮꦴꦕꦴꦪ ꦩꦤꦱꦴ, ꦠꦺꦱꦁ ꦤꦺꦴ ꦱꦩꦕꦫꦶꦪꦩ꧀ꦥꦶ ꦲꦺꦠꦁ ꦈꦠ꧀ꦠꦫꦶ ꦥꦱ꧀ꦱꦠꦁ. ꦠꦱ꧀ꦩꦴ ꦠꦺ ꦨꦺꦴꦤ꧀ꦠꦺꦴ ꦱꦩꦟꦧ꧀ꦫꦴꦲ꧀ꦩꦟꦴ ꦱꦏ꧀ꦏꦴꦠꦧ꧀ꦧꦴ ꦒꦫꦸꦏꦴꦠꦧ꧀ꦧꦴ ꦩꦴꦤꦺꦠꦧ꧀ꦧꦴ ꦥꦹꦗꦺꦠꦧ꧀ꦧꦴ. ꦪꦺ ꦠꦺ ꦱꦩꦟꦧ꧀ꦫꦴꦲ꧀ꦩꦟꦴ ꦱꦺꦴꦠꦮꦶꦚ꧀ꦚꦺꦪ꧀ꦪꦺꦱꦸ ꦱꦢ꧀ꦢꦺꦱꦸ… ꦓꦴꦤꦮꦶꦚ꧀ꦚꦺꦪ꧀ꦪꦺꦱꦸ ꦒꦤ꧀ꦣꦺꦱꦸ… ꦗꦶꦮ꧀ꦲꦴꦮꦶꦚ꧀ꦚꦺꦪ꧀ꦪꦺꦱꦸ ꦫꦱꦺꦱꦸ… ꦏꦴꦪꦮꦶꦚ꧀ꦚꦺꦪ꧀ꦪꦺꦱꦸ ꦦꦺꦴꦛ꧀ꦜꦧ꧀ꦧꦺꦱꦸ… ꦩꦤꦺꦴꦮꦶꦚ꧀ꦚꦺꦪ꧀ꦪꦺꦱꦸ ꦣꦩ꧀ꦩꦺꦱꦸ ꦮꦷꦠꦫꦴꦒꦴ ꦮꦷꦠꦢꦺꦴꦱꦴ ꦮꦷꦠꦩꦺꦴꦲꦴ, ꦄꦗ꧀ꦙꦠ꧀ꦠꦁ ꦮꦹꦥꦱꦤ꧀ꦠꦕꦶꦠ꧀ꦠꦴ, ꦱꦩꦕꦫꦶꦪꦁ ꦕꦫꦤ꧀ꦠꦶ ꦏꦴꦪꦺꦤ ꦮꦴꦕꦴꦪ ꦩꦤꦱꦴ, ꦌꦮꦫꦹꦥꦴ ꦱꦩꦟꦧ꧀ꦫꦴꦲ꧀ꦩꦟꦴ ꦱꦏ꧀ꦏꦴꦠꦧ꧀ꦧꦴ ꦒꦫꦸꦏꦴꦠꦧ꧀ꦧꦴ ꦩꦴꦤꦺꦠꦧ꧀ꦧꦴ ꦥꦹꦗꦺꦠꦧ꧀ꦧꦴ. ꦠꦁ ꦏꦶꦱ꧀ꦱ ꦲꦺꦠꦸ? ꦩꦪꦩ꧀ꦥꦶ ꦲꦶ ꦩꦤꦺꦴꦮꦶꦚ꧀ꦚꦺꦪ꧀ꦪꦺꦱꦸ ꦣꦩ꧀ꦩꦺꦱꦸ ꦄꦮꦷꦠꦫꦴꦒꦴ ꦄꦮꦷꦠꦢꦺꦴꦱꦴ ꦄꦮꦷꦠꦩꦺꦴꦲꦴ ꦄꦗ꧀ꦙꦠ꧀ꦠꦁ ꦄꦮꦹꦥꦱꦤ꧀ꦠꦕꦶꦠ꧀ꦠꦴ, ꦱꦩꦮꦶꦱꦩꦁ ꦕꦫꦴꦩ ꦏꦴꦪꦺꦤ ꦮꦴꦕꦴꦪ ꦩꦤꦱꦴ, ꦠꦺꦱꦁ ꦤꦺꦴ ꦱꦩꦕꦫꦶꦪꦩ꧀ꦥꦶ ꦲꦺꦠꦁ ꦈꦠ꧀ꦠꦫꦶ ꦥꦱ꧀ꦱꦠꦁ. ꦠꦱ꧀ꦩꦴ ꦠꦺ ꦨꦺꦴꦤ꧀ꦠꦺꦴ ꦱꦩꦟꦧ꧀ꦫꦴꦲ꧀ꦩꦟꦴ ꦱꦏ꧀ꦏꦴꦠꦧ꧀ꦧꦴ ꦒꦫꦸꦏꦴꦠꦧ꧀ꦧꦴ ꦩꦴꦤꦺꦠꦧ꧀ꦧꦴ ꦥꦹꦗꦺꦠꦧ꧀ꦧꦴ’ꦠꦶ. ꦌꦮꦁ ꦥꦸꦛ꧀ꦜꦴ ꦠꦸꦩ꧀ꦲꦺ, ꦒꦲꦥꦠꦪꦺꦴ, ꦠꦺꦱꦁ ꦄꦚ꧀ꦚꦠꦶꦠ꧀ꦡꦶꦪꦴꦤꦁ ꦥꦫꦶꦧ꧀ꦧꦴꦗꦏꦴꦤꦁ ꦌꦮꦁ ꦧ꧀ꦪꦴꦏꦫꦺꦪ꧀ꦪꦴꦡ.

꧔꧓꧗. ‘‘ꦱꦕꦺ ꦥꦤ ꦮꦺꦴ [ꦱꦕꦺ ꦠꦺ (ꦱ꧀ꦪꦴ. ꦏꦁ. ꦥꦷ. ꦏ.)], ꦒꦲꦥꦠꦪꦺꦴ, ꦄꦚ꧀ꦚꦠꦶꦠ꧀ꦡꦶꦪꦴ ꦥꦫꦶꦧ꧀ꦧꦴꦗꦏꦴ ꦌꦮꦁ ꦥꦸꦕ꧀ꦖꦺꦪ꧀ꦪꦸꦁ – ‘ꦏꦺ ꦥꦤꦴꦪꦱ꧀ꦩꦤ꧀ꦠꦴꦤꦁ ꦄꦴꦏꦴꦫꦴ, ꦏꦺ ꦄꦤ꧀ꦮꦪꦴ, ꦪꦺꦤ ꦠꦸꦩ꧀ꦲꦺ ꦄꦴꦪꦱ꧀ꦩꦤ꧀ꦠꦺꦴ ꦌꦮꦁ ꦮꦢꦺꦡ? ꦄꦢ꧀ꦣꦴ ꦠꦺ ꦄꦴꦪꦱ꧀ꦩꦤ꧀ꦠꦺꦴ ꦮꦷꦠꦫꦴꦒꦴ ꦮꦴ ꦫꦴꦒꦮꦶꦤꦪꦴꦪ ꦮꦴ ꦥꦛꦶꦥꦤ꧀ꦤꦴ, ꦮꦷꦠꦢꦺꦴꦱꦴ ꦮꦴ ꦢꦺꦴꦱꦮꦶꦤꦪꦴꦪ ꦮꦴ ꦥꦛꦶꦥꦤ꧀ꦤꦴ, ꦮꦷꦠꦩꦺꦴꦲꦴ ꦮꦴ ꦩꦺꦴꦲꦮꦶꦤꦪꦴꦪ ꦮꦴ ꦥꦛꦶꦥꦤ꧀ꦤꦴ’ꦠꦶ? ꦌꦮꦁ ꦥꦸꦛ꧀ꦜꦴ ꦠꦸꦩ꧀ꦲꦺ, ꦒꦲꦥꦠꦪꦺꦴ, ꦠꦺꦱꦁ ꦄꦚ꧀ꦚꦠꦶꦠ꧀ꦡꦶꦪꦴꦤꦁ ꦥꦫꦶꦧ꧀ꦧꦴꦗꦏꦴꦤꦁ ꦌꦮꦁ ꦧ꧀ꦪꦴꦏꦫꦺꦪ꧀ꦪꦴꦡ – ‘ꦠꦡꦴ ꦲꦶ ꦠꦺ ꦄꦴꦪꦱ꧀ꦩꦤ꧀ꦠꦺꦴ ꦄꦫꦚ꧀ꦚꦮꦤꦥꦠ꧀ꦡꦴꦤꦶ ꦥꦤ꧀ꦠꦴꦤꦶ ꦱꦺꦤꦴꦱꦤꦴꦤꦶ ꦥꦛꦶꦱꦺꦮꦤ꧀ꦠꦶ. ꦤꦠ꧀ꦡꦶ ꦑꦺꦴ ꦥꦤ ꦠꦠ꧀ꦡ ꦠꦡꦴꦫꦹꦥꦴ ꦕꦏ꧀ꦑꦸꦮꦶꦚ꧀ꦚꦺꦪ꧀ꦪꦴ ꦫꦹꦥꦴ ꦪꦺ ꦢꦶꦱ꧀ꦮꦴ ꦢꦶꦱ꧀ꦮꦴ ꦄꦨꦶꦫꦩꦺꦪ꧀ꦪꦸꦁ, ꦤꦠ꧀ꦡꦶ ꦑꦺꦴ ꦥꦤ ꦠꦠ꧀ꦡ ꦠꦡꦴꦫꦹꦥꦴ ꦱꦺꦴꦠꦮꦶꦚ꧀ꦚꦺꦪ꧀ꦪꦴ ꦱꦢ꧀ꦢꦴ ꦪꦺ ꦱꦸꦠ꧀ꦮꦴ ꦱꦸꦠ꧀ꦮꦴ ꦄꦨꦶꦫꦩꦺꦪ꧀ꦪꦸꦁ, ꦤꦠ꧀ꦡꦶ ꦑꦺꦴ ꦥꦤ ꦠꦠ꧀ꦡ ꦠꦡꦴꦫꦹꦥꦴ ꦓꦴꦤꦮꦶꦚ꧀ꦚꦺꦪ꧀ꦪꦴ ꦒꦤ꧀ꦣꦴ ꦪꦺ ꦓꦴꦪꦶꦠ꧀ꦮꦴ ꦓꦴꦪꦶꦠ꧀ꦮꦴ ꦄꦨꦶꦫꦩꦺꦪ꧀ꦪꦸꦁ, ꦤꦠ꧀ꦡꦶ ꦑꦺꦴ ꦥꦤ ꦠꦠ꧀ꦡ ꦠꦡꦴꦫꦹꦥꦴ ꦗꦶꦮ꧀ꦲꦴꦮꦶꦚ꧀ꦚꦺꦪ꧀ꦪꦴ ꦫꦱꦴ ꦪꦺ ꦱꦴꦪꦶꦠ꧀ꦮꦴ ꦱꦴꦪꦶꦠ꧀ꦮꦴ ꦄꦨꦶꦫꦩꦺꦪ꧀ꦪꦸꦁ, ꦤꦠ꧀ꦡꦶ ꦑꦺꦴ ꦥꦤ ꦠꦠ꧀ꦡ ꦠꦡꦴꦫꦹꦥꦴ ꦏꦴꦪꦮꦶꦚ꧀ꦚꦺꦪ꧀ꦪꦴ ꦦꦺꦴꦛ꧀ꦜꦧ꧀ꦧꦴ ꦪꦺ ꦦꦸꦱꦶꦠ꧀ꦮꦴ ꦦꦸꦱꦶꦠ꧀ꦮꦴ ꦄꦨꦶꦫꦩꦺꦪ꧀ꦪꦸꦁ. ꦆꦩꦺ ꦑꦺꦴ ꦤꦺꦴ, ꦄꦴꦮꦸꦱꦺꦴ, ꦄꦴꦏꦴꦫꦴ, ꦆꦩꦺ ꦄꦤ꧀ꦮꦪꦴ, ꦪꦺꦤ ꦩꦪꦁ [ꦪꦺꦤ ꦩꦪꦁ ꦄꦴꦪꦱ꧀ꦩꦤ꧀ꦠꦺꦴ (ꦱꦷ. ꦥꦷ.), ꦪꦺꦤ ꦩꦪꦁ ꦄꦴꦪꦱ꧀ꦩꦤ꧀ꦠꦺ (ꦱ꧀ꦪꦴ. ꦏꦁ.)] ꦌꦮꦁ ꦮꦢꦺꦩ – ꦄꦢ꧀ꦣꦴ ꦠꦺ ꦄꦴꦪꦱ꧀ꦩꦤ꧀ꦠꦺꦴ ꦮꦷꦠꦫꦴꦒꦴ ꦮꦴ ꦫꦴꦒꦮꦶꦤꦪꦴꦪ ꦮꦴ ꦥꦛꦶꦥꦤ꧀ꦤꦴ, ꦮꦷꦠꦢꦺꦴꦱꦴ ꦮꦴ ꦢꦺꦴꦱꦮꦶꦤꦪꦴꦪ ꦮꦴ ꦥꦛꦶꦥꦤ꧀ꦤꦴ, ꦮꦷꦠꦩꦺꦴꦲꦴ ꦮꦴ ꦩꦺꦴꦲꦮꦶꦤꦪꦴꦪ ꦮꦴ ꦥꦛꦶꦥꦤ꧀ꦤꦴ’ꦠꦶ. ꦌꦮꦁ ꦥꦸꦛ꧀ꦜꦴ ꦠꦸꦩ꧀ꦲꦺ, ꦒꦲꦥꦠꦪꦺꦴ, ꦠꦺꦱꦁ ꦄꦚ꧀ꦚꦠꦶꦠ꧀ꦡꦶꦪꦴꦤꦁ ꦥꦫꦶꦧ꧀ꦧꦴꦗꦏꦴꦤꦁ ꦌꦮꦁ ꦧ꧀ꦪꦴꦏꦫꦺꦪ꧀ꦪꦴꦡꦴ’’ꦠꦶ.

ꦌꦮꦁ ꦮꦸꦠ꧀ꦠꦺ, ꦤꦒꦫꦮꦶꦤ꧀ꦢꦺꦪ꧀ꦪꦏꦴ ꦧ꧀ꦫꦴꦲ꧀ꦩꦟꦒꦲꦥꦠꦶꦏꦴ ꦨꦒꦮꦤ꧀ꦠꦁ ꦌꦠꦢꦮꦺꦴꦕꦸꦁ – ‘‘ꦄꦨꦶꦏ꧀ꦏꦤ꧀ꦠꦁ, ꦨꦺꦴ ꦒꦺꦴꦠꦩ, ꦄꦨꦶꦏ꧀ꦏꦤ꧀ꦠꦁ, ꦨꦺꦴ ꦒꦺꦴꦠꦩ! ꦱꦺꦪ꧀ꦪꦡꦴꦥꦶ, ꦨꦺꦴ ꦒꦺꦴꦠꦩ, ꦤꦶꦏ꧀ꦏꦸꦗ꧀ꦗꦶꦠꦁ ꦮꦴ ꦈꦏ꧀ꦏꦸꦗ꧀ꦗꦺꦪ꧀ꦪ, ꦥꦛꦶꦕ꧀ꦖꦤ꧀ꦤꦁ ꦮꦴ ꦮꦶꦮꦫꦺꦪ꧀ꦪ, ꦩꦹꦭ꦳꧀ꦲꦱ꧀ꦱ ꦮꦴ ꦩꦒ꧀ꦒꦁ ꦄꦴꦕꦶꦏ꧀ꦑꦺꦪ꧀ꦪ, ꦄꦤ꧀ꦣꦏꦴꦫꦺ ꦮꦴ ꦠꦺꦭꦥꦗ꧀ꦗꦺꦴꦠꦁ ꦣꦴꦫꦺꦪ꧀ꦪ – ‘ꦕꦏ꧀ꦑꦸꦩꦤ꧀ꦠꦺꦴ ꦫꦹꦥꦴꦤꦶ ꦢꦏ꧀ꦑꦤ꧀ꦠꦷ’ꦠꦶ; ꦌꦮꦩꦺꦮꦁ ꦨꦺꦴꦠꦴ ꦒꦺꦴꦠꦩꦺꦤ ꦄꦤꦺꦏꦥꦫꦶꦪꦴꦪꦺꦤ ꦣꦩ꧀ꦩꦺꦴ ꦥꦏꦴꦱꦶꦠꦺꦴ. ꦌꦠꦺ ꦩꦪꦁ ꦨꦮꦤ꧀ꦠꦁ ꦒꦺꦴꦠꦩꦁ ꦱꦫꦟꦁ ꦒꦕ꧀ꦖꦴꦩ ꦣꦩ꧀ꦩꦚ꧀ꦕ ꦨꦶꦏ꧀ꦑꦸꦱꦔ꧀ꦓꦚ꧀ꦕ. ꦈꦥꦴꦱꦏꦺ ꦤꦺꦴ ꦨꦮꦁ ꦒꦺꦴꦠꦩꦺꦴ ꦣꦴꦫꦺꦠꦸ ꦄꦗ꧀ꦗꦠꦒ꧀ꦒꦺ ꦥꦴꦟꦸꦥꦺꦠꦺ ꦱꦫꦟꦁ ꦒꦠꦺ’’ꦠꦶ.

ꦤꦒꦫꦮꦶꦤ꧀ꦢꦺꦪ꧀ꦪꦱꦸꦠ꧀ꦠꦁ ꦤꦶꦛ꧀ꦜꦶꦠꦁ ꦄꦛ꧀ꦜꦩꦁ.