꧙. ꦧꦴꦭꦥꦟ꧀ꦝꦶꦠꦱꦸꦠ꧀ꦠꦁ

꧒꧔꧖. ꦌꦮꦁ ꦩꦺ ꦱꦸꦠꦁ – ꦌꦏꦁ ꦱꦩꦪꦁ ꦨꦒꦮꦴ ꦱꦴꦮꦠ꧀ꦡꦶꦪꦁ ꦮꦶꦲꦫꦠꦶ ꦗꦺꦠꦮꦤꦺ ꦄꦤꦴꦡꦥꦶꦟ꧀ꦝꦶꦏꦱ꧀ꦱ ꦄꦴꦫꦴꦩꦺ. ꦠꦠ꧀ꦫ ꦑꦺꦴ ꦨꦒꦮꦴ ꦨꦶꦏ꧀ꦑꦹ ꦄꦴꦩꦤ꧀ꦠꦺꦱꦶ – ‘‘ꦨꦶꦏ꧀ꦑꦮꦺꦴ’’ꦠꦶ. ‘‘ꦨꦢꦤ꧀ꦠꦺ’’ꦠꦶ ꦠꦺ ꦨꦶꦏ꧀ꦑꦹ ꦨꦒꦮꦠꦺꦴ ꦥꦕ꧀ꦕꦱ꧀ꦱꦺꦴꦱꦸꦁ. ꦨꦒꦮꦴ ꦌꦠꦢꦮꦺꦴꦕ –

‘‘ꦠꦷꦟꦶꦩꦴꦤꦶ, ꦨꦶꦏ꧀ꦑꦮꦺ, ꦧꦴꦭꦱ꧀ꦱ ꦧꦴꦭꦭꦏ꧀ꦑꦟꦴꦤꦶ ꦧꦴꦭꦤꦶꦩꦶꦠ꧀ꦠꦴꦤꦶ ꦧꦴꦭꦴꦥꦢꦴꦤꦴꦤꦶ. ꦏꦠꦩꦴꦤꦶ ꦠꦷꦟꦶ? ꦆꦣ, ꦨꦶꦏ꧀ꦑꦮꦺ, ꦧꦴꦭꦺꦴ ꦢꦸꦕ꧀ꦕꦶꦤ꧀ꦠꦶꦠꦕꦶꦤ꧀ꦠꦷ ꦕ ꦲꦺꦴꦠꦶ ꦢꦸꦧ꧀ꦨꦴꦱꦶꦠꦨꦴꦱꦷ ꦕ ꦢꦸꦏ꧀ꦏꦛꦏꦩ꧀ꦩꦏꦴꦫꦷ ꦕ. ꦤꦺꦴ ꦕꦺꦠꦁ [ꦤꦺꦴ ꦕꦺꦢꦁ (ꦱꦁ. ꦤꦶ. ꧓.꧒꧗-꧒꧘)], ꦨꦶꦏ꧀ꦑꦮꦺ, ꦧꦴꦭꦺꦴ ꦢꦸꦕ꧀ꦕꦶꦤ꧀ꦠꦶꦠꦕꦶꦤ꧀ꦠꦷ ꦕ ꦄꦨꦮꦶꦱ꧀ꦱ ꦢꦸꦧ꧀ꦨꦴꦱꦶꦠꦨꦴꦱꦷ ꦕ ꦢꦸꦏ꧀ꦏꦛꦏꦩ꧀ꦩꦏꦴꦫꦷ ꦕ ꦏꦺꦤ ꦤꦁ [ꦤ ꦠꦺꦤ ꦤꦁ (ꦏ.), ꦤ ꦤꦁ (?)] ꦥꦟ꧀ꦝꦶꦠꦴ ꦗꦴꦤꦺꦪ꧀ꦪꦸꦁ – ‘ꦧꦴꦭꦺꦴ ꦄꦪꦁ ꦨꦮꦁ ꦄꦱꦥ꧀ꦥꦸꦫꦶꦱꦺꦴ’ꦠꦶ? ꦪꦱ꧀ꦩꦴ ꦕ ꦑꦺꦴ, ꦨꦶꦏ꧀ꦑꦮꦺ, ꦧꦴꦭꦺꦴ ꦢꦸꦕ꧀ꦕꦶꦤ꧀ꦠꦶꦠꦕꦶꦤ꧀ꦠꦷ ꦕ ꦲꦺꦴꦠꦶ ꦢꦸꦧ꧀ꦨꦴꦱꦶꦠꦨꦴꦱꦷ ꦕ ꦢꦸꦏ꧀ꦏꦛꦏꦩ꧀ꦩꦏꦴꦫꦷ ꦕ ꦠꦱ꧀ꦩꦴ ꦤꦁ ꦥꦟ꧀ꦝꦶꦠꦴ ꦗꦴꦤꦤ꧀ꦠꦶ – ‘ꦧꦴꦭꦺꦴ ꦄꦪꦁ ꦨꦮꦁ ꦄꦱꦥ꧀ꦥꦸꦫꦶꦱꦺꦴ’ꦠꦶ. ꦱ ꦑꦺꦴ ꦱꦺꦴ, ꦨꦶꦏ꧀ꦑꦮꦺ, ꦧꦴꦭꦺꦴ ꦠꦶꦮꦶꦣꦁ ꦢꦶꦛ꧀ꦜꦺꦮ ꦣꦩ꧀ꦩꦺ ꦢꦸꦏ꧀ꦑꦁ ꦢꦺꦴꦩꦤꦱ꧀ꦱꦁ ꦥꦛꦶꦱꦁꦮꦺꦢꦺꦠꦶ. ꦱꦕꦺ, ꦨꦶꦏ꧀ꦑꦮꦺ, ꦧꦴꦭꦺꦴ ꦱꦨꦴꦪꦁ ꦮꦴ ꦤꦶꦱꦶꦤ꧀ꦤꦺꦴ ꦲꦺꦴꦠꦶ, ꦫꦡꦶꦏꦴꦪ [ꦫꦡꦶꦪꦴꦪ (ꦧꦲꦹꦱꦸ)] ꦮꦴ ꦤꦶꦱꦶꦤ꧀ꦤꦺꦴ ꦲꦺꦴꦠꦶ, ꦱꦶꦔ꧀ꦓꦴꦛꦏꦺ ꦮꦴ ꦤꦶꦱꦶꦤ꧀ꦤꦺꦴ ꦲꦺꦴꦠꦶ; ꦠꦠ꧀ꦫ ꦕꦺ ꦗꦤꦺꦴ ꦠꦗ꧀ꦗꦁ ꦠꦱ꧀ꦱꦴꦫꦸꦥ꧀ꦥꦁ ꦏꦡꦁ ꦩꦤ꧀ꦠꦺꦠꦶ. ꦱꦕꦺ, ꦨꦶꦏ꧀ꦑꦮꦺ, ꦧꦴꦭꦺꦴ ꦥꦴꦟꦴꦠꦶꦥꦴꦠꦷ ꦲꦺꦴꦠꦶ, ꦄꦢꦶꦤ꧀ꦤꦴꦢꦴꦪꦷ ꦲꦺꦴꦠꦶ, ꦏꦴꦩꦺꦱꦸꦩꦶꦕ꧀ꦖꦴꦕꦴꦫꦷ ꦲꦺꦴꦠꦶ, ꦩꦸꦱꦴꦮꦴꦢꦷ ꦲꦺꦴꦠꦶ, ꦱꦸꦫꦴꦩꦺꦫꦪꦩꦗ꧀ꦗꦥꦩꦴꦢꦛ꧀ꦜꦴꦪꦷ ꦲꦺꦴꦠꦶ, ꦠꦠ꧀ꦫ, ꦨꦶꦏ꧀ꦑꦮꦺ, ꦧꦴꦭꦱ꧀ꦱ ꦌꦮꦁ ꦲꦺꦴꦠꦶ – ‘ꦪꦁ ꦑꦺꦴ ꦗꦤꦺꦴ ꦠꦗ꧀ꦗꦁ ꦠꦱ꧀ꦱꦴꦫꦸꦥ꧀ꦥꦁ ꦏꦡꦁ ꦩꦤ꧀ꦠꦺꦠꦶ, ꦱꦁꦮꦶꦗ꧀ꦗꦤ꧀ꦠꦺꦮ ꦠꦺ [ꦱꦁꦮꦶꦗ꧀ꦗꦤ꧀ꦠꦺ ꦠꦺ ꦕ (ꦱꦷ. ꦱ꧀ꦪꦴ. ꦏꦁ. ꦥꦷ.)] ꦣꦩ꧀ꦩꦴ ꦩꦪꦶ, ꦄꦲꦚ꧀ꦕ ꦠꦺꦱꦸ ꦣꦩ꧀ꦩꦺꦱꦸ ꦱꦤ꧀ꦢꦶꦱ꧀ꦱꦴꦩꦷ’ꦠꦶ. ꦆꦢꦁ, ꦨꦶꦏ꧀ꦑꦮꦺ, ꦧꦴꦭꦺꦴ ꦥꦜꦩꦁ ꦢꦶꦛ꧀ꦜꦺꦮ ꦣꦩ꧀ꦩꦺ ꦢꦸꦏ꧀ꦑꦁ ꦢꦺꦴꦩꦤꦱ꧀ꦱꦁ ꦥꦛꦶꦱꦁꦮꦺꦢꦺꦠꦶ.

꧒꧔꧗. ‘‘ꦥꦸꦤ ꦕꦥꦫꦁ, ꦨꦶꦏ꧀ꦑꦮꦺ, ꦧꦴꦭꦺꦴ ꦥꦱ꧀ꦱꦠꦶ ꦫꦴꦗꦴꦤꦺꦴ ꦕꦺꦴꦫꦁ ꦄꦴꦒꦸꦕꦴꦫꦶꦁ ꦒꦲꦺꦠ꧀ꦮꦴ ꦮꦶꦮꦶꦣꦴ ꦏꦩ꧀ꦩꦏꦴꦫꦟꦴ ꦏꦴꦫꦺꦤ꧀ꦠꦺ – ꦏꦱꦴꦲꦶꦥꦶ ꦠꦴꦭ꦳ꦺꦤ꧀ꦠꦺ ꦮꦺꦠ꧀ꦠꦺꦲꦶꦥꦶ ꦠꦴꦭ꦳ꦺꦤ꧀ꦠꦺ ꦄꦢ꧀ꦣꦢꦟ꧀ꦝꦏꦺꦲꦶꦥꦶ ꦠꦴꦭ꦳ꦺꦤ꧀ꦠꦺ ꦲꦠ꧀ꦡꦩ꧀ꦥꦶ ꦖꦶꦤ꧀ꦢꦤ꧀ꦠꦺ ꦥꦴꦢꦩ꧀ꦥꦶ ꦖꦶꦤ꧀ꦢꦤ꧀ꦠꦺ ꦲꦠ꧀ꦡꦥꦴꦢꦩ꧀ꦥꦶ ꦖꦶꦤ꧀ꦢꦤ꧀ꦠꦺ ꦏꦟ꧀ꦟꦩ꧀ꦥꦶ ꦖꦶꦤ꧀ꦢꦤ꧀ꦠꦺ ꦤꦴꦱꦩ꧀ꦥꦶ ꦖꦶꦤ꧀ꦢꦤ꧀ꦠꦺ ꦏꦟ꧀ꦟꦤꦴꦱꦩ꧀ꦥꦶ ꦖꦶꦤ꧀ꦢꦤ꧀ꦠꦺ ꦧꦶꦭꦔ꧀ꦒꦡꦴꦭꦶꦏꦩ꧀ꦥꦶ ꦏꦫꦺꦴꦤ꧀ꦠꦺ ꦱꦔ꧀ꦑꦩꦸꦟ꧀ꦝꦶꦏꦩ꧀ꦥꦶ ꦏꦫꦺꦴꦤ꧀ꦠꦺ ꦫꦴꦲꦸꦩꦸꦑꦩ꧀ꦥꦶ ꦏꦫꦺꦴꦤ꧀ꦠꦺ ꦗꦺꦴꦠꦶꦩꦴꦭꦶꦏꦩ꧀ꦥꦶ ꦏꦫꦺꦴꦤ꧀ꦠꦺ ꦲꦠ꧀ꦡꦥꦗ꧀ꦗꦺꦴꦠꦶꦏꦩ꧀ꦥꦶ ꦏꦫꦺꦴꦤ꧀ꦠꦺ ꦌꦫꦏꦮꦠ꧀ꦠꦶꦏꦩ꧀ꦥꦶ ꦏꦫꦺꦴꦤ꧀ꦠꦺ ꦕꦷꦫꦏꦮꦴꦱꦶꦏꦩ꧀ꦥꦶ ꦏꦫꦺꦴꦤ꧀ꦠꦺ ꦌꦟꦺꦪ꧀ꦪꦏꦩ꧀ꦥꦶ ꦏꦫꦺꦴꦤ꧀ꦠꦺ ꦧꦭ꦳ꦶꦱꦩꦁꦱꦶꦏꦩ꧀ꦥꦶ ꦏꦫꦺꦴꦤ꧀ꦠꦺ ꦏꦲꦴꦥꦟꦶꦏꦩ꧀ꦥꦶ ꦏꦫꦺꦴꦤ꧀ꦠꦺ ꦑꦴꦫꦴꦥꦠꦕ꧀ꦖꦶꦏꦩ꧀ꦥꦶ [ꦑꦴꦫꦴꦥꦛꦶꦕ꧀ꦖꦏꦩ꧀ꦥꦶ (ꦏ.)] ꦏꦫꦺꦴꦤ꧀ꦠꦺ ꦥꦭꦶꦓꦥꦫꦶꦮꦠ꧀ꦠꦶꦏꦩ꧀ꦥꦶ ꦏꦫꦺꦴꦤ꧀ꦠꦺ ꦥꦭꦴꦭꦥꦷꦜꦏꦩ꧀ꦥꦶ [ꦥꦭꦴꦭꦥꦶꦛ꧀ꦜꦏꦩ꧀ꦥꦶ (ꦥꦷ.)] ꦏꦫꦺꦴꦤ꧀ꦠꦺ ꦠꦠ꧀ꦠꦺꦤꦥꦶ ꦠꦺꦭꦺꦤ ꦎꦱꦶꦚ꧀ꦕꦤ꧀ꦠꦺ ꦱꦸꦤꦑꦺꦲꦶꦥꦶ ꦑꦴꦢꦴꦥꦺꦤ꧀ꦠꦺ ꦗꦷꦮꦤ꧀ꦠꦩ꧀ꦥꦶ ꦱꦹꦭꦺ ꦈꦠ꧀ꦠꦴꦱꦺꦤ꧀ꦠꦺ ꦄꦱꦶꦤꦴꦥꦶ ꦱꦷꦱꦁ ꦖꦶꦤ꧀ꦢꦤ꧀ꦠꦺ. ꦠꦠ꧀ꦫ, ꦨꦶꦏ꧀ꦑꦮꦺ, ꦧꦴꦭꦱ꧀ꦱ ꦌꦮꦁ ꦲꦺꦴꦠꦶ – ‘ꦪꦡꦴꦫꦹꦥꦴꦤꦁ ꦑꦺꦴ ꦥꦴꦥꦏꦴꦤꦁ ꦏꦩ꧀ꦩꦴꦤꦁ ꦲꦺꦠꦸ ꦫꦴꦗꦴꦤꦺꦴ ꦕꦺꦴꦫꦁ ꦄꦴꦒꦸꦕꦴꦫꦶꦁ ꦒꦲꦺꦠ꧀ꦮꦴ ꦮꦶꦮꦶꦣꦴ ꦏꦩ꧀ꦩꦏꦴꦫꦟꦴ ꦏꦴꦫꦺꦤ꧀ꦠꦶ – ꦏꦱꦴꦲꦶꦥꦶ ꦠꦴꦭ꦳ꦺꦤ꧀ꦠꦶ…ꦥꦺ… ꦄꦱꦶꦤꦴꦥꦶ ꦱꦷꦱꦁ ꦖꦶꦤ꧀ꦢꦤ꧀ꦠꦶ; ꦱꦁꦮꦶꦗ꧀ꦗꦤ꧀ꦠꦺꦮ ꦠꦺ ꦣꦩ꧀ꦩꦴ ꦩꦪꦶ, ꦄꦲꦚ꧀ꦕ ꦠꦺꦱꦸ ꦣꦩ꧀ꦩꦺꦱꦸ ꦱꦤ꧀ꦢꦶꦱ꧀ꦱꦴꦩꦶ. ꦩꦁ ꦕꦺꦥꦶ ꦫꦴꦗꦴꦤꦺꦴ [ꦱꦕꦺ ꦩꦩ꧀ꦥꦶ (ꦏ.)] ꦗꦴꦤꦺꦪ꧀ꦪꦸꦁ, ꦩꦩ꧀ꦥꦶ ꦫꦴꦗꦴꦤꦺꦴ ꦒꦲꦺꦠ꧀ꦮꦴ ꦮꦶꦮꦶꦣꦴ ꦏꦩ꧀ꦩꦏꦴꦫꦟꦴ ꦏꦴꦫꦺꦪ꧀ꦪꦸꦁ – ꦏꦱꦴꦲꦶꦥꦶ ꦠꦴꦭ꦳ꦺꦪ꧀ꦪꦸꦁ…ꦥꦺ… ꦗꦷꦮꦤ꧀ꦠꦩ꧀ꦥꦶ ꦱꦹꦭꦺ ꦈꦠ꧀ꦠꦴꦱꦺꦪ꧀ꦪꦸꦁ, ꦄꦱꦶꦤꦴꦥꦶ ꦱꦷꦱꦁ ꦖꦶꦤ꧀ꦢꦺꦪ꧀ꦪꦸ’ꦤ꧀ꦠꦶ. ꦆꦢꦩ꧀ꦥꦶ, ꦨꦶꦏ꧀ꦑꦮꦺ, ꦧꦴꦭꦺꦴ ꦢꦸꦠꦶꦪꦁ ꦢꦶꦛ꧀ꦜꦺꦮ ꦣꦩ꧀ꦩꦺ ꦢꦸꦏ꧀ꦑꦁ ꦢꦺꦴꦩꦤꦱ꧀ꦱꦁ ꦥꦛꦶꦱꦁꦮꦺꦢꦺꦠꦶ.

꧒꧔꧘. ‘‘ꦥꦸꦤ ꦕꦥꦫꦁ, ꦨꦶꦏ꧀ꦑꦮꦺ, ꦧꦴꦭꦁ ꦥꦷꦜꦱꦩꦴꦫꦹꦭ꦳꧀ꦲꦁ ꦮꦴ ꦩꦚ꧀ꦕꦱꦩꦴꦫꦹꦭ꦳꧀ꦲꦁ ꦮꦴ ꦖꦩꦴꦪꦁ [ꦖꦩꦴꦪ (ꦱꦷ. ꦥꦷ.)] ꦮꦴ ꦱꦺꦩꦴꦤꦁ, ꦪꦴꦤꦶꦱ꧀ꦱ ꦥꦸꦧ꧀ꦧꦺ ꦥꦴꦥꦏꦴꦤꦶ ꦏꦩ꧀ꦩꦴꦤꦶ ꦏꦠꦴꦤꦶ ꦏꦴꦪꦺꦤ ꦢꦸꦕ꧀ꦕꦫꦶꦠꦴꦤꦶ ꦮꦴꦕꦴꦪ ꦢꦸꦕ꧀ꦕꦫꦶꦠꦴꦤꦶ ꦩꦤꦱꦴ ꦢꦸꦕ꧀ꦕꦫꦶꦠꦴꦤꦶ ꦠꦴꦤꦶꦱ꧀ꦱ ꦠꦩ꧀ꦲꦶ ꦱꦩꦪꦺ ꦎꦭꦩ꧀ꦧꦤ꧀ꦠꦶ ꦄꦗ꧀ꦙꦺꦴꦭꦩ꧀ꦧꦤ꧀ꦠꦶ ꦄꦨꦶꦥ꧀ꦥꦭꦩ꧀ꦧꦤ꧀ꦠꦶ. ꦱꦺꦪ꧀ꦪꦡꦴꦥꦶ, ꦨꦶꦏ꧀ꦑꦮꦺ, ꦩꦲꦠꦁ ꦥꦧ꧀ꦧꦠꦏꦹꦛꦴꦤꦁ ꦖꦴꦪꦴ ꦱꦴꦪꦤ꧀ꦲꦱꦩꦪꦁ ꦥꦡꦮꦶꦪꦴ ꦎꦭꦩ꧀ꦧꦤ꧀ꦠꦶ ꦄꦗ꧀ꦙꦺꦴꦭꦩ꧀ꦧꦤ꧀ꦠꦶ ꦄꦨꦶꦥ꧀ꦥꦭꦩ꧀ꦧꦤ꧀ꦠꦶ; ꦌꦮꦩꦺꦮ ꦑꦺꦴ, ꦨꦶꦏ꧀ꦑꦮꦺ, ꦧꦴꦭꦁ ꦥꦷꦜꦱꦩꦴꦫꦹꦭ꦳꧀ꦲꦁ ꦮꦴ ꦩꦚ꧀ꦕꦱꦩꦴꦫꦹꦭ꦳꧀ꦲꦁ ꦮꦴ ꦖꦩꦴꦪꦁ ꦮꦴ ꦱꦺꦩꦴꦤꦁ, ꦪꦴꦤꦶꦱ꧀ꦱ ꦥꦸꦧ꧀ꦧꦺ ꦥꦴꦥꦏꦴꦤꦶ ꦏꦩ꧀ꦩꦴꦤꦶ ꦏꦠꦴꦤꦶ ꦏꦴꦪꦺꦤ ꦢꦸꦕ꧀ꦕꦫꦶꦠꦴꦤꦶ ꦮꦴꦕꦴꦪ ꦢꦸꦕ꧀ꦕꦫꦶꦠꦴꦤꦶ ꦩꦤꦱꦴ ꦢꦸꦕ꧀ꦕꦫꦶꦠꦴꦤꦶ ꦠꦴꦤꦶꦱ꧀ꦱ ꦠꦩ꧀ꦲꦶ ꦱꦩꦪꦺ ꦎꦭꦩ꧀ꦧꦤ꧀ꦠꦶ ꦄꦗ꧀ꦙꦺꦴꦭꦩ꧀ꦧꦤ꧀ꦠꦶ ꦄꦨꦶꦥ꧀ꦥꦭꦩ꧀ꦧꦤ꧀ꦠꦶ. ꦠꦠ꧀ꦫ, ꦨꦶꦏ꧀ꦑꦮꦺ, ꦧꦴꦭꦱ꧀ꦱ ꦌꦮꦁ ꦲꦺꦴꦠꦶ – ‘ꦄꦏꦠꦁ ꦮꦠ ꦩꦺ ꦏꦭ꧀ꦪꦴꦟꦁ, ꦄꦏꦠꦁ ꦏꦸꦱꦭꦁ, ꦄꦏꦠꦁ ꦨꦷꦫꦸꦠ꧀ꦠꦴꦟꦁ; ꦏꦠꦁ ꦥꦴꦥꦁ, ꦏꦠꦁ ꦭꦸꦢ꧀ꦢꦁ, ꦏꦠꦁ ꦏꦶꦧ꧀ꦧꦶꦱꦁ. ꦪꦴꦮꦠꦴ, ꦨꦺꦴ, ꦄꦏꦠꦏꦭ꧀ꦪꦴꦟꦴꦤꦁ ꦄꦏꦠꦏꦸꦱꦭꦴꦤꦁ ꦄꦏꦠꦨꦷꦫꦸꦠ꧀ꦠꦴꦟꦴꦤꦁ ꦏꦠꦥꦴꦥꦴꦤꦁ ꦏꦠꦭꦸꦢ꧀ꦢꦴꦤꦁ ꦏꦠꦏꦶꦧ꧀ꦧꦶꦱꦴꦤꦁ ꦒꦠꦶ ꦠꦁ ꦒꦠꦶꦁ ꦥꦺꦕ꧀ꦕ ꦒꦕ꧀ꦖꦴꦩꦷ’ꦠꦶ. ꦱꦺꦴ ꦱꦺꦴꦕꦠꦶ ꦏꦶꦭꦩꦠꦶ ꦥꦫꦶꦢꦺꦮꦠꦶ ꦈꦫꦠ꧀ꦠꦴꦭ꦳ꦶꦁ ꦏꦤ꧀ꦢꦠꦶ ꦱꦩ꧀ꦩꦺꦴꦲꦁ ꦄꦴꦥꦗ꧀ꦗꦠꦶ. ꦆꦢꦩ꧀ꦥꦶ, ꦨꦶꦏ꧀ꦑꦮꦺ, ꦧꦴꦭꦺꦴ ꦠꦠꦶꦪꦁ ꦢꦶꦛ꧀ꦜꦺꦮ ꦣꦩ꧀ꦩꦺ ꦢꦸꦏ꧀ꦑꦁ ꦢꦺꦴꦩꦤꦱ꧀ꦱꦁ ꦥꦛꦶꦱꦁꦮꦺꦢꦺꦠꦶ.

‘‘ꦱ ꦑꦺꦴ ꦱꦺꦴ, ꦨꦶꦏ꧀ꦑꦮꦺ, ꦧꦴꦭꦺꦴ ꦏꦴꦪꦺꦤ ꦢꦸꦕ꧀ꦕꦫꦶꦠꦁ ꦕꦫꦶꦠ꧀ꦮꦴ ꦮꦴꦕꦴꦪ ꦢꦸꦕ꧀ꦕꦫꦶꦠꦁ ꦕꦫꦶꦠ꧀ꦮꦴ ꦩꦤꦱꦴ ꦢꦸꦕ꧀ꦕꦫꦶꦠꦁ ꦕꦫꦶꦠ꧀ꦮꦴ ꦏꦴꦪꦱ꧀ꦱ ꦨꦺꦢꦴ ꦥꦫꦁ ꦩꦫꦟꦴ ꦄꦥꦴꦪꦁ ꦢꦸꦒ꧀ꦒꦠꦶꦁ ꦮꦶꦤꦶꦥꦴꦠꦁ ꦤꦶꦫꦪꦁ ꦈꦥꦥꦗ꧀ꦗꦠꦶ. ꦪꦁ ꦑꦺꦴ ꦠꦁ, ꦨꦶꦏ꧀ꦑꦮꦺ, ꦱꦩ꧀ꦩꦴ ꦮꦢꦩꦴꦤꦺꦴ ꦮꦢꦺꦪ꧀ꦪ – ‘ꦌꦏꦤ꧀ꦠꦁ ꦄꦤꦶꦛ꧀ꦜꦁ ꦌꦏꦤ꧀ꦠꦁ ꦄꦏꦤ꧀ꦠꦁ ꦌꦏꦤ꧀ꦠꦁ ꦄꦩꦤꦴꦥ’ꦤ꧀ꦠꦶ, ꦤꦶꦫꦪꦩꦺꦮ ꦠꦁ ꦱꦩ꧀ꦩꦴ ꦮꦢꦩꦴꦤꦺꦴ ꦮꦢꦺꦪ꧀ꦪ – ‘ꦌꦏꦤ꧀ꦠꦁ ꦄꦤꦶꦛ꧀ꦜꦁ ꦌꦏꦤ꧀ꦠꦁ ꦄꦏꦤ꧀ꦠꦁ ꦌꦏꦤ꧀ꦠꦁ ꦄꦩꦤꦴꦥ’ꦤ꧀ꦠꦶ. ꦪꦴꦮꦚ꧀ꦕꦶꦢꦁ, ꦨꦶꦏ꧀ꦑꦮꦺ, ꦈꦥꦩꦴꦥꦶ [ꦈꦥꦩꦴꦲꦶꦥꦶ (ꦱꦷ.)] ꦤ ꦱꦸꦏꦫꦴ ꦪꦴꦮ ꦢꦸꦏ꧀ꦑꦴ ꦤꦶꦫꦪꦴ’’ꦠꦶ.

꧒꧔꧙. ꦌꦮꦁ ꦮꦸꦠ꧀ꦠꦺ, ꦄꦚ꧀ꦚꦠꦫꦺꦴ ꦨꦶꦏ꧀ꦑꦸ ꦨꦒꦮꦤ꧀ꦠꦁ ꦌꦠꦢꦮꦺꦴꦕ – ‘‘ꦱꦏ꧀ꦏꦴ ꦥꦤ, ꦨꦤ꧀ꦠꦺ, ꦈꦥꦩꦁ ꦏꦴꦠꦸ’’ꦤ꧀ꦠꦶ? ‘‘ꦱꦏ꧀ꦏꦴ ꦨꦶꦏ꧀ꦑꦹ’’ꦠꦶ ꦨꦒꦮꦴ ꦄꦮꦺꦴꦕ. ꦱꦺꦪ꧀ꦪꦡꦴꦥꦶ, ꦨꦶꦏ꧀ꦑꦸ, ꦕꦺꦴꦫꦁ ꦄꦴꦒꦸꦕꦴꦫꦶꦁ ꦒꦲꦺꦠ꧀ꦮꦴ ꦫꦚ꧀ꦚꦺꦴ ꦢꦱ꧀ꦱꦺꦪ꧀ꦪꦸꦁ – ‘ꦄꦪꦁ ꦑꦺꦴ, ꦢꦺꦮ, ꦕꦺꦴꦫꦺꦴ ꦄꦴꦒꦸꦕꦴꦫꦷ, ꦆꦩꦱ꧀ꦱ ꦪꦁ ꦆꦕ꧀ꦖꦱꦶ ꦠꦁ ꦢꦟ꧀ꦝꦁ ꦥꦟꦺꦲꦷ’ꦠꦶ. ꦠꦩꦺꦤꦁ ꦫꦴꦗꦴ ꦌꦮꦁ ꦮꦢꦺꦪ꧀ꦪ – ‘ꦒꦕ꧀ꦖꦡ, ꦨꦺꦴ, ꦆꦩꦁ ꦥꦸꦫꦶꦱꦁ ꦥꦸꦧ꧀ꦧꦟ꧀ꦲꦱꦩꦪꦁ ꦱꦠ꧀ꦠꦶꦱꦠꦺꦤ ꦲꦤꦡꦴ’ꦠꦶ. ꦠꦩꦺꦤꦁ ꦥꦸꦧ꧀ꦧꦟ꧀ꦲꦱꦩꦪꦁ ꦱꦠ꧀ꦠꦶꦱꦠꦺꦤ ꦲꦤꦺꦪ꧀ꦪꦸꦁ. ꦄꦡ ꦫꦴꦗꦴ ꦩꦗ꧀ꦙꦤ꧀ꦲꦶꦏꦱꦩꦪꦁ [ꦩꦗ꧀ꦙꦤ꧀ꦠꦶꦏꦱꦩꦪꦁ (ꦱꦷ. ꦱ꧀ꦪꦴ. ꦏꦁ. ꦏ.), ꦩꦗ꧀ꦙꦤ꧀ꦠꦶꦏꦁ ꦱꦩꦪꦁ (ꦥꦷ.)] ꦌꦮꦁ ꦮꦢꦺꦪ꧀ꦪ – ‘ꦄꦩ꧀ꦨꦺꦴ, ꦏꦡꦁ ꦱꦺꦴ ꦥꦸꦫꦶꦱꦺꦴ’ꦠꦶ? ‘‘‘ꦠꦡꦺꦮ, ꦢꦺꦮ, ꦗꦷꦮꦠꦷ’ꦠꦶ. ꦠꦩꦺꦤꦁ ꦫꦴꦗꦴ ꦌꦮꦁ ꦮꦢꦺꦪ꧀ꦪ – ‘ꦒꦕ꧀ꦖꦡ, ꦨꦺꦴ, ꦠꦁ ꦥꦸꦫꦶꦱꦁ ꦩꦗ꧀ꦙꦤ꧀ꦲꦶꦏꦱꦩꦪꦁ ꦱꦠ꧀ꦠꦶꦱꦠꦺꦤ ꦲꦤꦡꦴ’ꦠꦶ. ꦠꦩꦺꦤꦁ ꦩꦗ꧀ꦙꦤ꧀ꦲꦶꦏꦱꦩꦪꦁ ꦱꦠ꧀ꦠꦶꦱꦠꦺꦤ ꦲꦤꦺꦪ꧀ꦪꦸꦁ. ꦄꦡ ꦫꦴꦗꦴ ꦱꦴꦪꦤ꧀ꦲꦱꦩꦪꦁ ꦌꦮꦁ ꦮꦢꦺꦪ꧀ꦪ – ‘ꦄꦩ꧀ꦨꦺꦴ, ꦏꦡꦁ ꦱꦺꦴ ꦥꦸꦫꦶꦱꦺꦴ’ꦠꦶ? ‘ꦠꦡꦺꦮ, ꦢꦺꦮ, ꦗꦷꦮꦠꦷ’ꦠꦶ. ꦠꦩꦺꦤꦁ ꦫꦴꦗꦴ ꦌꦮꦁ ꦮꦢꦺꦪ꧀ꦪ – ‘ꦒꦕ꧀ꦖꦡ, ꦨꦺꦴ, ꦠꦁ ꦥꦸꦫꦶꦱꦁ ꦱꦴꦪꦤ꧀ꦲꦱꦩꦪꦁ ꦱꦠ꧀ꦠꦶꦱꦠꦺꦤ ꦲꦤꦡꦴ’ꦠꦶ. ꦠꦩꦺꦤꦁ ꦱꦴꦪꦤ꧀ꦲꦱꦩꦪꦁ ꦱꦠ꧀ꦠꦶꦱꦠꦺꦤ ꦲꦤꦺꦪ꧀ꦪꦸꦁ. ꦠꦁ ꦏꦶꦁ ꦩꦚ꧀ꦚꦡ, ꦨꦶꦏ꧀ꦑꦮꦺ, ꦄꦥꦶ ꦤꦸ ꦱꦺꦴ ꦥꦸꦫꦶꦱꦺꦴ ꦠꦷꦲꦶ ꦱꦠ꧀ꦠꦶꦱꦠꦺꦲꦶ ꦲꦚ꧀ꦚꦩꦴꦤꦺꦴ ꦠꦠꦺꦴꦤꦶꦢꦴꦤꦁ ꦢꦸꦏ꧀ꦑꦁ ꦢꦺꦴꦩꦤꦱ꧀ꦱꦁ ꦥꦛꦶꦱꦁꦮꦺꦢꦶꦪꦺꦡꦴ’’ꦠꦶ? ‘‘ꦌꦏꦶꦱ꧀ꦱꦴꦥꦶ, ꦨꦤ꧀ꦠꦺ, ꦱꦠ꧀ꦠꦶꦪꦴ ꦲꦚ꧀ꦚꦩꦴꦤꦺꦴ ꦱꦺꦴ ꦥꦸꦫꦶꦱꦺꦴ ꦠꦠꦺꦴꦤꦶꦢꦴꦤꦁ ꦢꦸꦏ꧀ꦑꦁ ꦢꦺꦴꦩꦤꦱ꧀ꦱꦁ ꦥꦛꦶꦱꦁꦮꦺꦢꦶꦪꦺꦡ, ꦏꦺꦴ ꦥꦤ ꦮꦴꦢꦺꦴ ꦠꦷꦲꦶ ꦱꦠ꧀ꦠꦶꦱꦠꦺꦲꦷ’’ꦠꦶ?

꧒꧕꧐. ꦄꦡ ꦑꦺꦴ ꦨꦒꦮꦴ ꦥꦫꦶꦠ꧀ꦠꦁ ꦥꦴꦟꦶꦩꦠ꧀ꦠꦁ ꦥꦴꦱꦴꦟꦁ ꦒꦲꦺꦠ꧀ꦮꦴ ꦨꦶꦏ꧀ꦑꦹ ꦄꦴꦩꦤ꧀ꦠꦺꦱꦶ – ‘‘ꦠꦁ ꦏꦶꦁ ꦩꦚ꧀ꦚꦡ, ꦨꦶꦏ꧀ꦑꦮꦺ, ꦏꦠꦩꦺꦴ ꦤꦸ ꦑꦺꦴ ꦩꦲꦤ꧀ꦠꦠꦫꦺꦴ – ꦪꦺꦴ ꦕꦴꦪꦁ ꦩꦪꦴ ꦥꦫꦶꦠ꧀ꦠꦺꦴ ꦥꦴꦟꦶꦩꦠ꧀ꦠꦺꦴ ꦥꦴꦱꦴꦟꦺꦴ ꦒꦲꦶꦠꦺꦴ, ꦪꦺꦴ ꦕ ꦲꦶꦩꦮꦴ ꦥꦧ꧀ꦧꦠꦫꦴꦗꦴ’’ꦠꦶ? ‘‘ꦄꦥ꧀ꦥꦩꦠ꧀ꦠꦏꦺꦴ ꦄꦪꦁ, ꦨꦤ꧀ꦠꦺ, ꦨꦒꦮꦠꦴ ꦥꦫꦶꦠ꧀ꦠꦺꦴ ꦥꦴꦟꦶꦩꦠ꧀ꦠꦺꦴ ꦥꦴꦱꦴꦟꦺꦴ ꦒꦲꦶꦠꦺꦴ, ꦲꦶꦩꦮꦤ꧀ꦠꦁ ꦥꦧ꧀ꦧꦠꦫꦴꦗꦴꦤꦁ ꦈꦥꦤꦶꦣꦴꦪ ꦱꦔ꧀ꦑꦩ꧀ꦥꦶ ꦤ ꦈꦥꦺꦠꦶ, ꦏꦭꦨꦴꦒꦩ꧀ꦥꦶ ꦤ ꦈꦥꦺꦠꦶ, ꦈꦥꦤꦶꦣꦩ꧀ꦥꦶ [ꦈꦥꦤꦶꦣꦶꦩ꧀ꦥꦶ (ꦱꦷ. ꦥꦷ.)] ꦤ ꦈꦥꦺꦠꦶ’’. ‘‘ꦌꦮꦩꦺꦮ ꦑꦺꦴ, ꦨꦶꦏ꧀ꦑꦮꦺ, ꦪꦁ ꦱꦺꦴ ꦥꦸꦫꦶꦱꦺꦴ ꦠꦷꦲꦶ ꦱꦠ꧀ꦠꦶꦱꦠꦺꦲꦶ ꦲꦚ꧀ꦚꦩꦴꦤꦺꦴ ꦠꦠꦺꦴꦤꦶꦢꦴꦤꦁ ꦢꦸꦏ꧀ꦑꦁ ꦢꦺꦴꦩꦤꦱ꧀ꦱꦁ ꦥꦛꦶꦱꦁꦮꦺꦢꦺꦠꦶ ꦠꦁ ꦤꦶꦫꦪꦏꦱ꧀ꦱ ꦢꦸꦏ꧀ꦑꦱ꧀ꦱ ꦈꦥꦤꦶꦣꦴꦪ ꦱꦔ꧀ꦑꦩ꧀ꦥꦶ ꦤ ꦈꦥꦺꦠꦶ, ꦏꦭꦨꦴꦒꦩ꧀ꦥꦶ ꦤ ꦈꦥꦺꦠꦶ, ꦈꦥꦤꦶꦣꦩ꧀ꦥꦶ ꦤ ꦈꦥꦺꦠꦶ’’.

‘‘ꦠꦩꦺꦤꦁ, ꦨꦶꦏ꧀ꦑꦮꦺ, ꦤꦶꦫꦪꦥꦴꦭꦴ ꦥꦚ꧀ꦕꦮꦶꦣꦧꦤ꧀ꦣꦤꦁ ꦤꦴꦩ ꦏꦩ꧀ꦩꦏꦴꦫꦟꦁ ꦏꦫꦺꦴꦤ꧀ꦠꦶ – ꦠꦠ꧀ꦠꦁ ꦄꦪꦺꦴꦑꦶꦭꦁ [ꦄꦪꦺꦴꦑꦷꦭꦁ (ꦱꦷ. ꦱ꧀ꦪꦴ. ꦏꦁ. ꦥꦷ.)] ꦲꦠ꧀ꦡꦺ ꦒꦩꦺꦤ꧀ꦠꦶ, ꦠꦠ꧀ꦠꦁ ꦄꦪꦺꦴꦑꦶꦭꦁ ꦢꦸꦠꦶꦪꦺ ꦲꦠ꧀ꦡꦺ ꦒꦩꦺꦤ꧀ꦠꦶ, ꦠꦠ꧀ꦠꦁ ꦄꦪꦺꦴꦑꦶꦭꦁ ꦥꦴꦢꦺ ꦒꦩꦺꦤ꧀ꦠꦶ, ꦠꦠ꧀ꦠꦁ ꦄꦪꦺꦴꦑꦶꦭꦁ ꦢꦸꦠꦶꦪꦺ ꦥꦴꦢꦺ ꦒꦩꦺꦤ꧀ꦠꦶ, ꦠꦠ꧀ꦠꦁ ꦄꦪꦺꦴꦑꦶꦭꦁ ꦩꦗ꧀ꦙꦺ ꦈꦫꦱ꧀ꦩꦶꦁ ꦒꦩꦺꦤ꧀ꦠꦶ. ꦱꦺꦴ ꦠꦠ꧀ꦡ ꦢꦸꦏ꧀ꦑꦴ ꦠꦶꦧ꧀ꦧꦴ ꦑꦫꦴ ꦏꦛꦸꦏꦴ ꦮꦺꦢꦤꦴ ꦮꦺꦢꦺꦠꦶ, ꦤ ꦕ ꦠꦴꦮ ꦏꦴꦭꦁ ꦏꦫꦺꦴꦠꦶ ꦪꦴꦮ ꦤ ꦠꦁ ꦥꦴꦥꦏꦩ꧀ꦩꦁ ꦧ꧀ꦪꦤ꧀ꦠꦷꦲꦺꦴꦠꦶ [ꦧ꧀ꦪꦤ꧀ꦠꦶꦲꦺꦴꦠꦶ (ꦥꦷ. ꦏ.)]. ꦠꦩꦺꦤꦁ, ꦨꦶꦏ꧀ꦑꦮꦺ, ꦤꦶꦫꦪꦥꦴꦭꦴ ꦱꦁꦮꦺꦱꦺꦠ꧀ꦮꦴ ꦏꦸꦜꦴꦫꦷꦲꦶ [ꦏꦸꦣꦴꦫꦷꦲꦶ (ꦏ.)] ꦠꦕ꧀ꦖꦤ꧀ꦠꦶ. ꦱꦺꦴ ꦠꦠ꧀ꦡ ꦢꦸꦏ꧀ꦑꦴ ꦠꦶꦧ꧀ꦧꦴ…ꦥꦺ… ꦧ꧀ꦪꦤ꧀ꦠꦷꦲꦺꦴꦠꦶ. ꦠꦩꦺꦤꦁ, ꦨꦶꦏ꧀ꦑꦮꦺ, ꦤꦶꦫꦪꦥꦴꦭꦴ ꦈꦢ꧀ꦣꦁꦥꦴꦢꦁ ꦄꦣꦺꦴꦱꦶꦫꦁ ꦒꦲꦺꦠ꧀ꦮꦴ ꦮꦴꦱꦷꦲꦶ ꦠꦕ꧀ꦖꦤ꧀ꦠꦶ. ꦱꦺꦴ ꦠꦠ꧀ꦡ ꦢꦸꦏ꧀ꦑꦴ ꦠꦶꦧ꧀ꦧꦴ…ꦥꦺ… ꦧ꧀ꦪꦤ꧀ꦠꦷꦲꦺꦴꦠꦶ. ꦠꦩꦺꦤꦁ, ꦨꦶꦏ꧀ꦑꦮꦺ, ꦤꦶꦫꦪꦥꦴꦭꦴ ꦫꦡꦺ ꦪꦺꦴꦗꦺꦠ꧀ꦮꦴ ꦄꦴꦢꦶꦠ꧀ꦠꦴꦪ ꦥꦡꦮꦶꦪꦴ ꦱꦩ꧀ꦥꦗ꧀ꦗꦭꦶꦠꦴꦪ ꦱꦗꦺꦴꦠꦶꦨꦹꦠꦴꦪ [ꦱꦚ꧀ꦗꦺꦴꦠꦶꦨꦹꦠꦴꦪ (ꦱ꧀ꦪꦴ. ꦏꦁ. ꦥꦷ.)] ꦱꦴꦫꦺꦤ꧀ꦠꦶꦥꦶ ꦥꦕ꧀ꦕꦴꦱꦴꦫꦺꦤ꧀ꦠꦶꦥꦶ. ꦱꦺꦴ ꦠꦠ꧀ꦡ ꦢꦸꦏ꧀ꦑꦴ ꦠꦶꦧ꧀ꦧꦴ…ꦥꦺ… ꦧ꧀ꦪꦤ꧀ꦠꦷꦲꦺꦴꦠꦶ. ꦠꦩꦺꦤꦁ, ꦨꦶꦏ꧀ꦑꦮꦺ, ꦤꦶꦫꦪꦥꦴꦭꦴ ꦩꦲꦤ꧀ꦠꦁ ꦄꦔ꧀ꦒꦴꦫꦥꦧ꧀ꦧꦠꦁ ꦄꦴꦢꦶꦠ꧀ꦠꦁ ꦱꦩ꧀ꦥꦗ꧀ꦗꦭꦶꦠꦁ ꦱꦗꦺꦴꦠꦶꦨꦹꦠꦁ ꦄꦴꦫꦺꦴꦥꦺꦤ꧀ꦠꦶꦥꦶ ꦎꦫꦺꦴꦥꦺꦤ꧀ꦠꦶꦥꦶ. ꦱꦺꦴ ꦠꦠ꧀ꦡ ꦢꦸꦏ꧀ꦑꦴ ꦠꦶꦧ꧀ꦧꦴ ꦑꦫꦴ ꦏꦛꦸꦏꦴ ꦮꦺꦢꦤꦴ ꦮꦺꦢꦺꦠꦶ, ꦤ ꦕ ꦠꦴꦮ ꦏꦴꦭꦁ ꦏꦫꦺꦴꦠꦶ ꦪꦴꦮ ꦤ ꦠꦁ ꦥꦴꦥꦏꦩ꧀ꦩꦁ ꦧ꧀ꦪꦤ꧀ꦠꦷꦲꦺꦴꦠꦶ. ꦠꦩꦺꦤꦁ, ꦨꦶꦏ꧀ꦑꦮꦺ, ꦤꦶꦫꦪꦥꦴꦭꦴ ꦈꦢ꧀ꦣꦁꦥꦴꦢꦁ ꦄꦣꦺꦴꦱꦶꦫꦁ ꦒꦲꦺꦠ꧀ꦮꦴ ꦠꦠ꧀ꦠꦴꦪ ꦭꦺꦴꦲꦏꦸꦩ꧀ꦨꦶꦪꦴ ꦥꦏ꧀ꦑꦶꦥꦤ꧀ꦠꦶ ꦄꦴꦢꦶꦠ꧀ꦠꦴꦪ ꦱꦩ꧀ꦥꦗ꧀ꦗꦭꦶꦠꦴꦪ ꦱꦗꦺꦴꦠꦶꦨꦹꦠꦴꦪ. ꦱꦺꦴ ꦠꦠ꧀ꦡ ꦦꦺꦟꦸꦢ꧀ꦢꦺꦲꦏꦁ ꦥꦕ꧀ꦕꦠꦶ. ꦱꦺꦴ ꦠꦠ꧀ꦡ ꦦꦺꦟꦸꦢ꧀ꦢꦺꦲꦏꦁ ꦥꦕ꧀ꦕꦩꦴꦤꦺꦴ ꦱꦏꦶꦩ꧀ꦥꦶ ꦈꦢ꧀ꦣꦁ ꦒꦕ꧀ꦖꦠꦶ, ꦱꦏꦶꦩ꧀ꦥꦶ ꦄꦣꦺꦴ ꦒꦕ꧀ꦖꦠꦶ, ꦱꦏꦶꦩ꧀ꦥꦶ ꦠꦶꦫꦶꦪꦁ ꦒꦕ꧀ꦖꦠꦶ. ꦱꦺꦴ ꦠꦠ꧀ꦡ ꦢꦸꦏ꧀ꦑꦴ ꦠꦶꦧ꧀ꦧꦴ ꦑꦫꦴ ꦏꦛꦸꦏꦴ ꦮꦺꦢꦤꦴ ꦮꦺꦢꦺꦠꦶ, ꦤ ꦕ ꦠꦴꦮ ꦏꦴꦭꦔ꧀ꦏꦫꦺꦴꦠꦶ ꦪꦴꦮ ꦤ ꦠꦁ ꦥꦴꦥꦏꦩ꧀ꦩꦁ ꦧ꧀ꦪꦤ꧀ꦠꦷꦲꦺꦴꦠꦶ. ꦠꦩꦺꦤꦁ, ꦨꦶꦏ꧀ꦑꦮꦺ, ꦤꦶꦫꦪꦥꦴꦭꦴ [ꦤꦶꦫꦪꦥꦴꦭꦴ ꦥꦸꦤꦥ꧀ꦥꦸꦤꦁ (ꦏ.)] ꦩꦲꦴꦤꦶꦫꦪꦺ ꦥꦏ꧀ꦑꦶꦥꦤ꧀ꦠꦶ. ꦱꦺꦴ ꦑꦺꦴ ꦥꦤ, ꦨꦶꦏ꧀ꦑꦮꦺ, ꦩꦲꦴꦤꦶꦫꦪꦺꦴ –

‘‘ꦕꦠꦸꦏ꧀ꦏꦟ꧀ꦟꦺꦴ ꦕꦠꦸꦢ꧀ꦮꦴꦫꦺꦴ, ꦮꦶꦨꦠ꧀ꦠꦺꦴ ꦨꦴꦒꦱꦺꦴ ꦩꦶꦠꦺꦴ;

ꦄꦪꦺꦴꦥꦴꦏꦴꦫꦥꦫꦶꦪꦤ꧀ꦠꦺꦴ, ꦄꦪꦱꦴ ꦥꦛꦶꦏꦸꦗ꧀ꦗꦶꦠꦺꦴ.

‘‘ꦠꦱ꧀ꦱ ꦄꦪꦺꦴꦩꦪꦴ ꦨꦹꦩꦶ, ꦗꦭꦶꦠꦴ ꦠꦺꦗꦱꦴ ꦪꦸꦠꦴ;

ꦱꦩꦤ꧀ꦠꦴ ꦪꦺꦴꦗꦤꦱꦠꦁ, ꦦꦫꦶꦠ꧀ꦮꦴ ꦠꦶꦛ꧀ꦜꦠꦶ ꦱꦧ꧀ꦧꦢꦴ’’.

‘‘ꦄꦤꦺꦏꦥꦫꦶꦪꦴꦪꦺꦤꦥꦶ ꦑꦺꦴ ꦄꦲꦁ, ꦨꦶꦏ꧀ꦑꦮꦺ, ꦤꦶꦫꦪꦏꦡꦁ ꦏꦡꦺꦪ꧀ꦪꦁ; ꦪꦴꦮꦚ꧀ꦕꦶꦢꦁ, ꦨꦶꦏ꧀ꦑꦮꦺ, ꦤ ꦱꦸꦏꦫꦴ ꦄꦏ꧀ꦑꦴꦤꦺꦤ ꦥꦴꦥꦸꦟꦶꦠꦸꦁ ꦪꦴꦮ ꦢꦸꦏ꧀ꦑꦴ ꦤꦶꦫꦪꦴ.

꧒꧕꧑. ‘‘ꦱꦤ꧀ꦠꦶ, ꦨꦶꦏ꧀ꦑꦮꦺ, ꦠꦶꦫꦕ꧀ꦖꦴꦤꦒꦠꦴ ꦥꦴꦟꦴ ꦠꦶꦟꦨꦏ꧀ꦑꦴ. ꦠꦺ ꦄꦭ꧀ꦭꦴꦤꦶꦥꦶ ꦠꦶꦟꦴꦤꦶ ꦱꦸꦏ꧀ꦑꦴꦤꦶꦥꦶ ꦠꦶꦟꦴꦤꦶ ꦢꦤ꧀ꦠꦸꦭ꧀ꦭꦺꦲꦏꦁ ꦑꦴꦢꦤ꧀ꦠꦶ. ꦏꦠꦩꦺ ꦕ, ꦨꦶꦏ꧀ꦑꦮꦺ, ꦠꦶꦫꦕ꧀ꦖꦴꦤꦒꦠꦴ ꦥꦴꦟꦴ ꦠꦶꦟꦨꦏ꧀ꦑꦴ? ꦲꦠ꧀ꦡꦷ ꦄꦱ꧀ꦱꦴ ꦒꦺꦴꦟꦴ ꦒꦢ꧀ꦫꦨꦴ ꦄꦗꦴ ꦩꦶꦒꦴ, ꦪꦺ ꦮꦴ ꦥꦤꦚ꧀ꦚꦺꦥꦶ ꦏꦺꦕꦶ ꦠꦶꦫꦕ꧀ꦖꦴꦤꦒꦠꦴ ꦥꦴꦟꦴ ꦠꦶꦟꦨꦏ꧀ꦑꦴ. ꦱ ꦑꦺꦴ ꦱꦺꦴ, ꦨꦶꦏ꧀ꦑꦮꦺ, ꦧꦴꦭꦺꦴ ꦆꦣ ꦥꦸꦧ꧀ꦧꦺ ꦫꦱꦴꦢꦺꦴ ꦆꦣ ꦥꦴꦥꦴꦤꦶ ꦏꦩ꧀ꦩꦴꦤꦶ ꦏꦫꦶꦠ꧀ꦮꦴ ꦏꦴꦪꦱ꧀ꦱ ꦨꦺꦢꦴ ꦥꦫꦁ ꦩꦫꦟꦴ ꦠꦺꦱꦁ ꦱꦠ꧀ꦠꦴꦤꦁ ꦱꦲꦧ꧀ꦪꦠꦁ ꦈꦥꦥꦗ꧀ꦗꦠꦶ ꦪꦺ ꦠꦺ ꦱꦠ꧀ꦠꦴ ꦠꦶꦟꦨꦏ꧀ꦑꦴ.

‘‘ꦱꦤ꧀ꦠꦶ, ꦨꦶꦏ꧀ꦑꦮꦺ, ꦠꦶꦫꦕ꧀ꦖꦴꦤꦒꦠꦴ ꦥꦴꦟꦴ ꦒꦹꦡꦨꦏ꧀ꦑꦴ. ꦠꦺ ꦢꦹꦫꦠꦺꦴꦮ ꦒꦹꦡꦒꦤ꧀ꦣꦁ ꦓꦴꦪꦶꦠ꧀ꦮꦴ ꦣꦴꦮꦤ꧀ꦠꦶ – ‘ꦌꦠ꧀ꦡ ꦨꦸꦚ꧀ꦗꦶꦱ꧀ꦱꦴꦩ, ꦌꦠ꧀ꦡ ꦨꦸꦚ꧀ꦗꦶꦱ꧀ꦱꦴꦩꦴ’ꦠꦶ. ꦱꦺꦪ꧀ꦪꦡꦴꦥꦶ ꦤꦴꦩ ꦧ꧀ꦫꦴꦲ꧀ꦩꦟꦴ ꦄꦴꦲꦸꦠꦶꦒꦤ꧀ꦣꦺꦤ ꦣꦴꦮꦤ꧀ꦠꦶ – ‘ꦌꦠ꧀ꦡ ꦨꦸꦚ꧀ꦗꦶꦱ꧀ꦱꦴꦩ, ꦌꦠ꧀ꦡ ꦨꦸꦚ꧀ꦗꦶꦱ꧀ꦱꦴꦩꦴ’ꦠꦶ; ꦌꦮꦩꦺꦮ ꦑꦺꦴ, ꦨꦶꦏ꧀ꦑꦮꦺ, ꦱꦤ꧀ꦠꦶ ꦠꦶꦫꦕ꧀ꦖꦴꦤꦒꦠꦴ ꦥꦴꦟꦴ ꦒꦹꦡꦨꦏ꧀ꦑꦴ, ꦠꦺ ꦢꦹꦫꦠꦺꦴꦮ ꦒꦹꦡꦒꦤ꧀ꦣꦁ ꦓꦴꦪꦶꦠ꧀ꦮꦴ ꦣꦴꦮꦤ꧀ꦠꦶ – ‘ꦌꦠ꧀ꦡ ꦨꦸꦚ꧀ꦗꦶꦱ꧀ꦱꦴꦩ, ꦌꦠ꧀ꦡ ꦨꦸꦚ꧀ꦗꦶꦱ꧀ꦱꦴꦩꦴ’ꦠꦶ. ꦏꦠꦩꦺ ꦕ, ꦨꦶꦏ꧀ꦑꦮꦺ, ꦠꦶꦫꦕ꧀ꦖꦴꦤꦒꦠꦴ ꦥꦴꦟꦴ ꦒꦹꦡꦨꦏ꧀ꦑꦴ? ꦏꦸꦏ꧀ꦏꦸꦛꦴ ꦱꦹꦏꦫꦴ ꦱꦺꦴꦟꦴ ꦱꦶꦔ꧀ꦒꦴꦭꦴ, ꦪꦺ ꦮꦴ ꦥꦤꦚ꧀ꦚꦺꦥꦶ ꦏꦺꦕꦶ ꦠꦶꦫꦕ꧀ꦖꦴꦤꦒꦠꦴ ꦥꦴꦟꦴ ꦒꦹꦡꦨꦏ꧀ꦑꦴ. ꦱ ꦑꦺꦴ ꦱꦺꦴ, ꦨꦶꦏ꧀ꦑꦮꦺ, ꦧꦴꦭꦺꦴ ꦆꦣ ꦥꦸꦧ꧀ꦧꦺ ꦫꦱꦴꦢꦺꦴ ꦆꦣ ꦥꦴꦥꦴꦤꦶ ꦏꦩ꧀ꦩꦴꦤꦶ ꦏꦫꦶꦠ꧀ꦮꦴ ꦏꦴꦪꦱ꧀ꦱ ꦨꦺꦢꦴ ꦥꦫꦁ ꦩꦫꦟꦴ ꦠꦺꦱꦁ ꦱꦠ꧀ꦠꦴꦤꦁ ꦱꦲꦧ꧀ꦪꦠꦁ ꦈꦥꦥꦗ꧀ꦗꦠꦶ ꦪꦺ ꦠꦺ ꦱꦠ꧀ꦠꦴ ꦒꦹꦡꦨꦏ꧀ꦑꦴ.

‘‘ꦱꦤ꧀ꦠꦶ, ꦨꦶꦏ꧀ꦑꦮꦺ, ꦠꦶꦫꦕ꧀ꦖꦴꦤꦒꦠꦴ ꦥꦴꦟꦴ ꦄꦤ꧀ꦣꦏꦴꦫꦺ ꦗꦴꦪꦤ꧀ꦠꦶ ꦄꦤ꧀ꦣꦏꦴꦫꦺ ꦗꦷꦪꦤ꧀ꦠꦶ [ꦗꦶꦪ꧀ꦪꦤ꧀ꦠꦶ (ꦏ.)] ꦄꦤ꧀ꦣꦏꦴꦫꦺ ꦩꦷꦪꦤ꧀ꦠꦶ [ꦩꦶꦪ꧀ꦪꦤ꧀ꦠꦶ (ꦏ.)]. ꦏꦠꦩꦺ ꦕ, ꦨꦶꦏ꧀ꦑꦮꦺ, ꦠꦶꦫꦕ꧀ꦖꦴꦤꦒꦠꦴ ꦥꦴꦟꦴ ꦄꦤ꧀ꦣꦏꦴꦫꦺ ꦗꦴꦪꦤ꧀ꦠꦶ ꦄꦤ꧀ꦣꦏꦴꦫꦺ ꦗꦷꦪꦤ꧀ꦠꦶ ꦄꦤ꧀ꦣꦏꦴꦫꦺ ꦩꦷꦪꦤ꧀ꦠꦶ? ꦏꦷꦛꦴ ꦥꦸꦭ꦳ꦮꦴ [ꦥꦛꦔ꧀ꦒꦴ (ꦱ꧀ꦪꦴ. ꦏꦁ. ꦏ.)] ꦒꦟ꧀ꦝꦸꦥ꧀ꦥꦴꦢꦴ, ꦪꦺ ꦮꦴ ꦥꦤꦚ꧀ꦚꦺꦥꦶ ꦏꦺꦕꦶ ꦠꦶꦫꦕ꧀ꦖꦴꦤꦒꦠꦴ ꦥꦴꦟꦴ ꦄꦤ꧀ꦣꦏꦴꦫꦺ ꦗꦴꦪꦤ꧀ꦠꦶ ꦄꦤ꧀ꦣꦏꦴꦫꦺ ꦗꦷꦪꦤ꧀ꦠꦶ ꦄꦤ꧀ꦣꦏꦴꦫꦺ ꦩꦷꦪꦤ꧀ꦠꦶ. ꦱ ꦑꦺꦴ ꦱꦺꦴ, ꦨꦶꦏ꧀ꦑꦮꦺ, ꦧꦴꦭꦺꦴ ꦆꦣ ꦥꦸꦧ꧀ꦧꦺ ꦫꦱꦴꦢꦺꦴ, ꦆꦣ ꦥꦴꦥꦴꦤꦶ ꦏꦩ꧀ꦩꦴꦤꦶ ꦏꦫꦶꦠ꧀ꦮꦴ ꦏꦴꦪꦱ꧀ꦱ ꦨꦺꦢꦴ ꦥꦫꦁ ꦩꦫꦟꦴ ꦠꦺꦱꦁ ꦱꦠ꧀ꦠꦴꦤꦁ ꦱꦲꦧ꧀ꦪꦠꦁ ꦈꦥꦥꦗ꧀ꦗꦠꦶ ꦪꦺ ꦠꦺ ꦱꦠ꧀ꦠꦴ ꦄꦤ꧀ꦣꦏꦴꦫꦺ ꦗꦴꦪꦤ꧀ꦠꦶ ꦄꦤ꧀ꦣꦏꦴꦫꦺ ꦗꦷꦪꦤ꧀ꦠꦶ ꦄꦤ꧀ꦣꦏꦴꦫꦺ ꦩꦷꦪꦤ꧀ꦠꦶ.

‘‘ꦱꦤ꧀ꦠꦶ, ꦨꦶꦏ꧀ꦑꦮꦺ, ꦠꦶꦫꦕ꧀ꦖꦴꦤꦒꦠꦴ ꦥꦴꦟꦴ ꦈꦢꦏꦱ꧀ꦩꦶꦁ ꦗꦴꦪꦤ꧀ꦠꦶ ꦈꦢꦏꦱ꧀ꦩꦶꦁ ꦗꦷꦪꦤ꧀ꦠꦶ ꦈꦢꦏꦱ꧀ꦩꦶꦁ ꦩꦷꦪꦤ꧀ꦠꦶ. ꦏꦠꦩꦺ ꦕ, ꦨꦶꦏ꧀ꦑꦮꦺ, ꦠꦶꦫꦕ꧀ꦖꦴꦤꦒꦠꦴ ꦥꦴꦟꦴ ꦈꦢꦏꦱ꧀ꦩꦶꦁ ꦗꦴꦪꦤ꧀ꦠꦶ ꦈꦢꦏꦱ꧀ꦩꦶꦁ ꦗꦷꦪꦤ꧀ꦠꦶ ꦈꦢꦏꦱ꧀ꦩꦶꦁ ꦩꦷꦪꦤ꧀ꦠꦶ? ꦩꦕ꧀ꦖꦴ ꦏꦕ꧀ꦖꦥꦴ ꦱꦸꦱꦸꦩꦴꦫꦴ, ꦪꦺ ꦮꦴ ꦥꦤꦚ꧀ꦚꦺꦥꦶ ꦏꦺꦕꦶ ꦠꦶꦫꦕ꧀ꦖꦴꦤꦒꦠꦴ ꦥꦴꦟꦴ ꦈꦢꦏꦱ꧀ꦩꦶꦁ ꦗꦴꦪꦤ꧀ꦠꦶ ꦈꦢꦏꦱ꧀ꦩꦶꦁ ꦗꦷꦪꦤ꧀ꦠꦶ ꦈꦢꦏꦱ꧀ꦩꦶꦁ ꦩꦷꦪꦤ꧀ꦠꦶ. ꦱ ꦑꦺꦴ ꦱꦺꦴ, ꦨꦶꦏ꧀ꦑꦮꦺ, ꦧꦴꦭꦺꦴ ꦆꦣ ꦥꦸꦧ꧀ꦧꦺ ꦫꦱꦴꦢꦺꦴ ꦆꦣ ꦥꦴꦥꦴꦤꦶ ꦏꦩ꧀ꦩꦴꦤꦶ ꦏꦫꦶꦠ꧀ꦮꦴ ꦏꦴꦪꦱ꧀ꦱ ꦨꦺꦢꦴ ꦥꦫꦁ ꦩꦫꦟꦴ ꦠꦺꦱꦁ ꦱꦠ꧀ꦠꦴꦤꦁ ꦱꦲꦧ꧀ꦪꦠꦁ ꦈꦥꦥꦗ꧀ꦗꦠꦶ ꦪꦺ ꦠꦺ ꦱꦠ꧀ꦠꦴ ꦈꦢꦏꦱ꧀ꦩꦶꦁ ꦗꦴꦪꦤ꧀ꦠꦶ ꦈꦢꦏꦱ꧀ꦩꦶꦁ ꦗꦷꦪꦤ꧀ꦠꦶ ꦈꦢꦏꦱ꧀ꦩꦶꦁ ꦩꦷꦪꦤ꧀ꦠꦶ.

‘‘ꦱꦤ꧀ꦠꦶ, ꦨꦶꦏ꧀ꦑꦮꦺ, ꦠꦶꦫꦕ꧀ꦖꦴꦤꦒꦠꦴ ꦥꦴꦟꦴ ꦄꦱꦸꦕꦶꦱ꧀ꦩꦶꦁ ꦗꦴꦪꦤ꧀ꦠꦶ ꦄꦱꦸꦕꦶꦱ꧀ꦩꦶꦁ ꦗꦷꦪꦤ꧀ꦠꦶ ꦄꦱꦸꦕꦶꦱ꧀ꦩꦶꦁ ꦩꦷꦪꦤ꧀ꦠꦶ. ꦏꦠꦩꦺ ꦕ, ꦨꦶꦏ꧀ꦑꦮꦺ, ꦠꦶꦫꦕ꧀ꦖꦴꦤꦒꦠꦴ ꦥꦴꦟꦴ ꦄꦱꦸꦕꦶꦱ꧀ꦩꦶꦁ ꦗꦴꦪꦤ꧀ꦠꦶ ꦄꦱꦸꦕꦶꦱ꧀ꦩꦶꦁ ꦗꦷꦪꦤ꧀ꦠꦶ ꦄꦱꦸꦕꦶꦱ꧀ꦩꦶꦁ ꦩꦷꦪꦤ꧀ꦠꦶ? ꦪꦺ ꦠꦺ, ꦨꦶꦏ꧀ꦑꦮꦺ, ꦱꦠ꧀ꦠꦴ ꦥꦹꦠꦶꦩꦕ꧀ꦖꦺ ꦮꦴ ꦗꦴꦪꦤ꧀ꦠꦶ ꦥꦹꦠꦶꦩꦕ꧀ꦖꦺ ꦮꦴ ꦗꦷꦪꦤ꧀ꦠꦶ ꦥꦹꦠꦶꦩꦕ꧀ꦖꦺ ꦮꦴ ꦩꦷꦪꦤ꧀ꦠꦶ ꦥꦹꦠꦶꦏꦸꦟꦥꦺ ꦮꦴ…ꦥꦺ… ꦥꦹꦠꦶꦏꦸꦩ꧀ꦩꦴꦱꦺ ꦮꦴ… ꦕꦤ꧀ꦢꦤꦶꦏꦴꦪ ꦮꦴ… ꦎꦭꦶꦒꦭ꧀ꦭꦺ ꦮꦴ ꦗꦴꦪꦤ꧀ꦠꦶ, (ꦪꦺ ꦮꦴ ꦥꦤꦚ꧀ꦚꦺꦥꦶ ꦏꦺꦕꦶ ꦠꦶꦫꦕ꧀ꦖꦴꦤꦒꦠꦴ ꦥꦴꦟꦴ ꦄꦱꦸꦕꦶꦱ꧀ꦩꦶꦁ ꦗꦴꦪꦤ꧀ꦠꦶ ꦄꦱꦸꦕꦶꦱ꧀ꦩꦶꦁ ꦗꦷꦪꦤ꧀ꦠꦶ ꦄꦱꦸꦕꦶꦱ꧀ꦩꦶꦁ ꦩꦷꦪꦤ꧀ꦠꦶ.) [( ) ꦤꦠ꧀ꦡꦶ ꦱꦷ. ꦱ꧀ꦪꦴ. ꦏꦁ. ꦥꦷ. ꦥꦺꦴꦠ꧀ꦡꦏꦺꦱꦸ] ꦱ ꦑꦺꦴ ꦱꦺꦴ, ꦨꦶꦏ꧀ꦑꦮꦺ, ꦧꦴꦭꦺꦴ ꦆꦣ ꦥꦸꦧ꧀ꦧꦺ ꦫꦱꦴꦢꦺꦴ ꦆꦣ ꦥꦴꦥꦴꦤꦶ ꦏꦩ꧀ꦩꦴꦤꦶ ꦏꦫꦶꦠ꧀ꦮꦴ ꦏꦴꦪꦱ꧀ꦱ ꦨꦺꦢꦴ ꦥꦫꦁ ꦩꦫꦟꦴ ꦠꦺꦱꦁ ꦱꦠ꧀ꦠꦴꦤꦁ ꦱꦲꦧ꧀ꦪꦠꦁ ꦈꦥꦥꦗ꧀ꦗꦠꦶ ꦪꦺ ꦠꦺ ꦱꦠ꧀ꦠꦴ ꦄꦱꦸꦕꦶꦱ꧀ꦩꦶꦁ ꦗꦴꦪꦤ꧀ꦠꦶ ꦄꦱꦸꦕꦶꦱ꧀ꦩꦶꦁ ꦗꦷꦪꦤ꧀ꦠꦶ ꦄꦱꦸꦕꦶꦱ꧀ꦩꦶꦁ ꦩꦷꦪꦤ꧀ꦠꦶ.

‘‘ꦄꦤꦺꦏꦥꦫꦶꦪꦴꦪꦺꦤꦥꦶ ꦑꦺꦴ ꦄꦲꦁ, ꦨꦶꦏ꧀ꦑꦮꦺ, ꦠꦶꦫꦕ꧀ꦖꦴꦤꦪꦺꦴꦤꦶꦏꦡꦁ ꦏꦡꦺꦪ꧀ꦪꦁ; ꦪꦴꦮꦚ꧀ꦕꦶꦢꦁ, ꦨꦶꦏ꧀ꦑꦮꦺ, ꦤ ꦱꦸꦏꦫꦁ ꦄꦏ꧀ꦑꦴꦤꦺꦤ ꦥꦴꦥꦸꦟꦶꦠꦸꦁ ꦪꦴꦮ ꦢꦸꦏ꧀ꦑꦴ ꦠꦶꦫꦕ꧀ꦖꦴꦤꦪꦺꦴꦤꦶ.

꧒꧕꧒. ‘‘ꦱꦺꦪ꧀ꦪꦡꦴꦥꦶ, ꦨꦶꦏ꧀ꦑꦮꦺ, ꦥꦸꦫꦶꦱꦺꦴ ꦌꦏꦕ꧀ꦖꦶꦒ꧀ꦒꦭꦁ ꦪꦸꦒꦁ ꦩꦲꦴꦱꦩꦸꦢ꧀ꦢꦺ ꦥꦏ꧀ꦑꦶꦥꦺꦪ꧀ꦪ. ꦠꦩꦺꦤꦁ ꦥꦸꦫꦠ꧀ꦡꦶꦩꦺꦴ ꦮꦴꦠꦺꦴ ꦥꦕ꧀ꦖꦶꦩꦺꦤ ꦱꦁꦲꦫꦺꦪ꧀ꦪ, ꦥꦕ꧀ꦖꦶꦩꦺꦴ ꦮꦴꦠꦺꦴ ꦥꦸꦫꦠ꧀ꦡꦶꦩꦺꦤ ꦱꦁꦲꦫꦺꦪ꧀ꦪ, ꦈꦠ꧀ꦠꦫꦺꦴ ꦮꦴꦠꦺꦴ ꦢꦏ꧀ꦑꦶꦟꦺꦤ ꦱꦁꦲꦫꦺꦪ꧀ꦪ, ꦢꦏ꧀ꦑꦶꦟꦺꦴ ꦮꦴꦠꦺꦴ ꦈꦠ꧀ꦠꦫꦺꦤ ꦱꦁꦲꦫꦺꦪ꧀ꦪ. ꦠꦠ꧀ꦫꦴꦱ꧀ꦱ ꦏꦴꦟꦺꦴ ꦏꦕ꧀ꦖꦥꦺꦴ, ꦱꦺꦴ ꦮꦱ꧀ꦱꦱꦠꦱ꧀ꦱ ꦮꦱ꧀ꦱꦱꦠꦱ꧀ꦱ [ꦮꦱ꧀ꦱꦱꦠꦱ꧀ꦱ ꦮꦱ꧀ꦱꦱꦲꦱ꧀ꦱꦱ꧀ꦱ ꦮꦱ꧀ꦱꦱꦠꦱꦲꦱ꧀ꦱꦱ꧀ꦱ (ꦱꦷ.), ꦮꦱ꧀ꦱꦱꦠꦱ꧀ꦱ (ꦱ꧀ꦪꦴ. ꦏꦁ. ꦥꦷ.)] ꦄꦕ꧀ꦕꦪꦺꦤ ꦱꦏꦶꦁ ꦈꦩ꧀ꦩꦸꦗ꧀ꦗꦺꦪ꧀ꦪ. ꦠꦁ ꦏꦶꦁ ꦩꦚ꧀ꦚꦡ, ꦨꦶꦏ꧀ꦑꦮꦺ, ꦄꦥꦶ ꦤꦸ ꦱꦺꦴ ꦏꦴꦟꦺꦴ ꦏꦕ꧀ꦖꦥꦺꦴ ꦄꦩꦸꦱ꧀ꦩꦶꦁ ꦌꦏꦕ꧀ꦖꦶꦒ꧀ꦒꦭꦺ ꦪꦸꦒꦺ ꦒꦷꦮꦁ ꦥꦮꦺꦱꦺꦪ꧀ꦪꦴ’’ꦠꦶ? (‘‘ꦤꦺꦴ ꦲꦺꦠꦁ, ꦨꦤ꧀ꦠꦺ’’.) [( ) ꦤꦠ꧀ꦡꦶ ꦱꦷ. ꦥꦷ. ꦥꦺꦴꦠ꧀ꦡꦏꦺꦱꦸ] ‘‘ꦪꦢꦶ ꦥꦤ [ꦪꦢꦶ ꦤꦹꦤ (ꦱꦷ. ꦱ꧀ꦪꦴ. ꦏꦁ. ꦥꦷ.)], ꦨꦤ꧀ꦠꦺ, ꦏꦢꦴꦕꦶ ꦏꦫꦲꦕꦶ ꦢꦷꦓꦱ꧀ꦱ ꦄꦢ꧀ꦣꦸꦤꦺꦴ ꦄꦕ꧀ꦕꦪꦺꦤꦴ’’ꦠꦶ. ‘‘ꦑꦶꦥ꧀ꦥꦠꦫꦁ ꦑꦺꦴ ꦱꦺꦴ, ꦨꦶꦏ꧀ꦑꦮꦺ, ꦏꦴꦟꦺꦴ ꦏꦕ꧀ꦖꦥꦺꦴ ꦄꦩꦸꦱ꧀ꦩꦶꦁ ꦌꦏꦕ꧀ꦖꦶꦒ꧀ꦒꦭꦺ ꦪꦸꦒꦺ ꦒꦷꦮꦁ ꦥꦮꦺꦱꦺꦪ꧀ꦪ, ꦄꦠꦺꦴ ꦢꦸꦭ꧀ꦭꦨꦠꦫꦴꦲꦁ, ꦨꦶꦏ꧀ꦑꦮꦺ, ꦩꦤꦸꦱ꧀ꦱꦠ꧀ꦠꦁ ꦮꦢꦴꦩꦶ ꦱꦏꦶꦁ ꦮꦶꦤꦶꦥꦴꦠꦒꦠꦺꦤ ꦧꦴꦭꦺꦤ. ꦠꦁ ꦏꦶꦱ꧀ꦱ ꦲꦺꦠꦸ? ꦤ ꦲꦺꦠ꧀ꦡ, ꦨꦶꦏ꧀ꦑꦮꦺ, ꦄꦠ꧀ꦡꦶ ꦣꦩ꧀ꦩꦕꦫꦶꦪꦴ ꦱꦩꦕꦫꦶꦪꦴ ꦏꦸꦱꦭꦏꦶꦫꦶꦪꦴ ꦥꦸꦚ꧀ꦚꦏꦶꦫꦶꦪꦴ. ꦄꦚ꧀ꦚꦩꦚ꧀ꦚꦑꦴꦢꦶꦏꦴ ꦌꦠ꧀ꦡ, ꦨꦶꦏ꧀ꦑꦮꦺ, ꦮꦠ꧀ꦠꦠꦶ ꦢꦸꦧ꧀ꦧꦭꦑꦴꦢꦶꦏꦴ’’.

‘‘ꦱ ꦑꦺꦴ ꦱꦺꦴ, ꦨꦶꦏ꧀ꦑꦮꦺ, ꦧꦴꦭꦺꦴ ꦱꦕꦺ ꦏꦢꦴꦕꦶ ꦏꦫꦲꦕꦶ ꦢꦷꦓꦱ꧀ꦱ ꦄꦢ꧀ꦣꦸꦤꦺꦴ ꦄꦕ꧀ꦕꦪꦺꦤ ꦩꦤꦸꦱ꧀ꦱꦠ꧀ꦠꦁ ꦄꦴꦒꦕ꧀ꦖꦠꦶ, ꦪꦴꦤꦶ ꦠꦴꦤꦶ ꦤꦷꦕꦏꦸꦭꦴꦤꦶ – ꦕꦟ꧀ꦝꦴꦭꦏꦸꦭꦁ ꦮꦴ ꦤꦺꦱꦴꦢꦏꦸꦭꦁ ꦮꦴ ꦮꦺꦤꦏꦸꦭꦁ [ꦮꦺꦟꦏꦸꦭꦁ (ꦱꦷ. ꦥꦷ.)] ꦮꦴ ꦫꦡꦏꦴꦫꦏꦸꦭꦁ ꦮꦴ ꦥꦸꦏ꧀ꦏꦸꦱꦏꦸꦭꦁ ꦮꦴ. ꦠꦡꦴꦫꦹꦥꦺ ꦏꦸꦭꦺ ꦥꦕ꧀ꦕꦴꦗꦴꦪꦠꦶ ꦢꦭꦶꦢ꧀ꦢꦺ ꦄꦥ꧀ꦥꦤ꧀ꦤꦥꦴꦤꦨꦺꦴꦗꦤꦺ ꦏꦱꦶꦫꦮꦸꦠ꧀ꦠꦶꦏꦺ, ꦪꦠ꧀ꦡ ꦏꦱꦶꦫꦺꦤ ꦓꦴꦱꦕ꧀ꦖꦴꦢꦺꦴ ꦭꦧ꧀ꦨꦠꦶ. ꦱꦺꦴ ꦕ ꦲꦺꦴꦠꦶ ꦢꦸꦧ꧀ꦧꦟ꧀ꦟꦺꦴ ꦢꦸꦢ꧀ꦢꦱꦶꦏꦺꦴ ꦎꦏꦺꦴꦛꦶꦩꦏꦺꦴ ꦧꦮ꧀ꦲꦴꦧꦴꦣꦺꦴ [ꦧꦲ꧀ꦮꦴꦧꦴꦣꦺꦴ (ꦏ.)] ꦏꦴꦟꦺꦴ ꦮꦴ ꦏꦸꦟꦷ ꦮꦴ ꦑꦸꦗ꧀ꦗꦺꦴ ꦮꦴ ꦥꦏ꧀ꦑꦲꦠꦺꦴ ꦮꦴ ꦤ ꦭꦴꦨꦷ ꦄꦤ꧀ꦤꦱ꧀ꦱ ꦥꦴꦤꦱ꧀ꦱ ꦮꦠ꧀ꦡꦱ꧀ꦱ ꦪꦴꦤꦱ꧀ꦱ ꦩꦴꦭꦴꦒꦤ꧀ꦣꦮꦶꦭꦺꦥꦤꦱ꧀ꦱ ꦱꦺꦪ꧀ꦪꦴꦮꦱꦡꦥꦢꦷꦥꦺꦪ꧀ꦪꦱ꧀ꦱ. ꦱꦺꦴ ꦏꦴꦪꦺꦤ ꦢꦸꦕ꧀ꦕꦫꦶꦠꦁ ꦕꦫꦠꦶ ꦮꦴꦕꦴꦪ ꦢꦸꦕ꧀ꦕꦫꦶꦠꦁ ꦕꦫꦠꦶ ꦩꦤꦱꦴ ꦢꦸꦕ꧀ꦕꦫꦶꦠꦁ ꦕꦫꦠꦶ. ꦱꦺꦴ ꦏꦴꦪꦺꦤ ꦢꦸꦕ꧀ꦕꦫꦶꦠꦁ ꦕꦫꦶꦠ꧀ꦮꦴ ꦮꦴꦕꦴꦪ ꦢꦸꦕ꧀ꦕꦫꦶꦠꦁ ꦕꦫꦶꦠ꧀ꦮꦴ ꦩꦤꦱꦴ ꦢꦸꦕ꧀ꦕꦫꦶꦠꦁ ꦕꦫꦶꦠ꧀ꦮꦴ ꦏꦴꦪꦱ꧀ꦱ ꦨꦺꦢꦴ ꦥꦫꦁ ꦩꦫꦟꦴ ꦄꦥꦴꦪꦁ ꦢꦸꦒ꧀ꦒꦠꦶꦁ ꦮꦶꦤꦶꦥꦴꦠꦁ ꦤꦶꦫꦪꦁ ꦈꦥꦥꦗ꧀ꦗꦠꦶ.

‘‘ꦱꦺꦪ꧀ꦪꦡꦴꦥꦶ, ꦨꦶꦏ꧀ꦑꦮꦺ, ꦄꦏ꧀ꦑꦣꦸꦠ꧀ꦠꦺꦴ ꦥꦜꦩꦺꦤꦺꦮ ꦏꦭꦶꦒ꧀ꦒꦲꦺꦤ ꦥꦸꦠ꧀ꦠꦩ꧀ꦥꦶ ꦗꦷꦪꦺꦡ, ꦢꦴꦫꦩ꧀ꦥꦶ ꦗꦷꦪꦺꦡ, ꦱꦧ꧀ꦧꦁ ꦱꦴꦥꦠꦺꦪ꧀ꦪꦩ꧀ꦥꦶ ꦗꦷꦪꦺꦡ, ꦈꦠ꧀ꦠꦫꦶꦥꦶ ꦄꦣꦶꦧꦤ꧀ꦣꦁ [ꦄꦤꦸꦧꦤ꧀ꦣꦁ (ꦱꦷ. ꦥꦷ.), ꦄꦢ꧀ꦣꦸꦧꦤ꧀ꦣꦁ (ꦱ꧀ꦪꦴ. ꦏꦁ.)] ꦤꦶꦒꦕ꧀ꦖꦺꦪ꧀ꦪ. ꦄꦥ꧀ꦥꦩꦠ꧀ꦠꦏꦺꦴ ꦱꦺꦴ, ꦨꦶꦏ꧀ꦑꦮꦺ, ꦏꦭꦶꦒ꧀ꦒꦲꦺꦴ ꦪꦁ ꦱꦺꦴ ꦄꦏ꧀ꦑꦣꦸꦠ꧀ꦠꦺꦴ ꦥꦜꦩꦺꦤꦺꦮ ꦏꦭꦶꦒ꧀ꦒꦲꦺꦤ ꦥꦸꦠ꧀ꦠꦩ꧀ꦥꦶ ꦗꦷꦪꦺꦡ, ꦢꦴꦫꦩ꧀ꦥꦶ ꦗꦷꦪꦺꦡ, ꦱꦧ꧀ꦧꦁ ꦱꦴꦥꦠꦺꦪ꧀ꦪꦩ꧀ꦥꦶ ꦗꦷꦪꦺꦡ, ꦈꦠ꧀ꦠꦫꦶꦥꦶ ꦄꦣꦶꦧꦤ꧀ꦣꦁ ꦤꦶꦒꦕ꧀ꦖꦺꦪ꧀ꦪ. ꦄꦡ ꦑꦺꦴ ꦄꦪꦩꦺꦮ ꦠꦠꦺꦴ ꦩꦲꦤ꧀ꦠꦠꦫꦺꦴ ꦏꦭꦶꦒ꧀ꦒꦲꦺꦴ ꦪꦁ ꦱꦺꦴ ꦧꦴꦭꦺꦴ ꦏꦴꦪꦺꦤ ꦢꦸꦕ꧀ꦕꦫꦶꦠꦁ ꦕꦫꦶꦠ꧀ꦮꦴ ꦮꦴꦕꦴꦪ ꦢꦸꦕ꧀ꦕꦫꦶꦠꦁ ꦕꦫꦶꦠ꧀ꦮꦴ ꦩꦤꦱꦴ ꦢꦸꦕ꧀ꦕꦫꦶꦠꦁ ꦕꦫꦶꦠ꧀ꦮꦴ ꦏꦴꦪꦱ꧀ꦱ ꦨꦺꦢꦴ ꦥꦫꦁ ꦩꦫꦟꦴ ꦄꦥꦴꦪꦁ ꦢꦸꦒ꧀ꦒꦠꦶꦁ ꦮꦶꦤꦶꦥꦴꦠꦁ ꦤꦶꦫꦪꦁ ꦈꦥꦥꦗ꧀ꦗꦠꦶ. ꦄꦪꦁ, ꦨꦶꦏ꧀ꦑꦮꦺ, ꦏꦺꦮꦭꦴ ꦥꦫꦶꦥꦹꦫꦴ [ꦏꦺꦮꦭꦥꦫꦶꦥꦹꦫꦴ (ꦱꦷ. ꦥꦷ.) ꦩ. ꦤꦶ. ꧑.꧒꧔꧔ ꦥꦴꦭ꦳ꦶꦪꦴ ꦱꦁꦱꦤ꧀ꦢꦺꦠꦧ꧀ꦧꦴ] ꦧꦴꦭꦨꦹꦩꦷ’’ꦠꦶ.

꧒꧕꧓. ‘‘ꦠꦷꦟꦶꦩꦴꦤꦶ, ꦨꦶꦏ꧀ꦑꦮꦺ, ꦥꦟ꧀ꦝꦶꦠꦱ꧀ꦱ ꦥꦟ꧀ꦝꦶꦠꦭꦏ꧀ꦑꦟꦴꦤꦶ ꦥꦟ꧀ꦝꦶꦠꦤꦶꦩꦶꦠ꧀ꦠꦴꦤꦶ ꦥꦟ꧀ꦝꦶꦠꦴꦥꦢꦴꦤꦴꦤꦶ. ꦏꦠꦩꦴꦤꦶ ꦠꦷꦟꦶ? ꦆꦣ, ꦨꦶꦏ꧀ꦑꦮꦺ, ꦥꦟ꧀ꦝꦶꦠꦺꦴ ꦱꦸꦕꦶꦤ꧀ꦠꦶꦠꦕꦶꦤ꧀ꦠꦷ ꦕ ꦲꦺꦴꦠꦶ ꦱꦸꦨꦴꦱꦶꦠꦨꦴꦱꦷ ꦕ ꦱꦸꦏꦠꦏꦩ꧀ꦩꦏꦴꦫꦷ ꦕ. ꦤꦺꦴ ꦕꦺꦠꦁ, ꦨꦶꦏ꧀ꦑꦮꦺ, ꦥꦟ꧀ꦝꦶꦠꦺꦴ ꦱꦸꦕꦶꦤ꧀ꦠꦶꦠꦕꦶꦤ꧀ꦠꦷ ꦕ ꦄꦨꦮꦶꦱ꧀ꦱ ꦱꦸꦨꦴꦱꦶꦠꦨꦴꦱꦷ ꦕ ꦱꦸꦏꦠꦏꦩ꧀ꦩꦏꦴꦫꦷ ꦕ, ꦏꦺꦤ ꦤꦁ [ꦤ ꦠꦺꦤ ꦤꦁ (ꦏ.), ꦤ ꦤꦁ (?)] ꦥꦟ꧀ꦝꦶꦠꦴ ꦗꦴꦤꦺꦪ꧀ꦪꦸꦁ – ‘ꦥꦟ꧀ꦝꦶꦠꦺꦴ ꦄꦪꦁ ꦨꦮꦁ ꦱꦥ꧀ꦥꦸꦫꦶꦱꦺꦴ’ꦠꦶ? ꦪꦱ꧀ꦩꦴ ꦕ ꦑꦺꦴ, ꦨꦶꦏ꧀ꦑꦮꦺ, ꦥꦟ꧀ꦝꦶꦠꦺꦴ ꦱꦸꦕꦶꦤ꧀ꦠꦶꦠꦕꦶꦤ꧀ꦠꦷ ꦕ ꦲꦺꦴꦠꦶ ꦱꦸꦨꦴꦱꦶꦠꦨꦴꦱꦷ ꦕ ꦱꦸꦏꦠꦏꦩ꧀ꦩꦏꦴꦫꦷ ꦕ ꦠꦱ꧀ꦩꦴ ꦤꦁ ꦥꦟ꧀ꦝꦶꦠꦴ ꦗꦴꦤꦤ꧀ꦠꦶ – ‘ꦥꦟ꧀ꦝꦶꦠꦺꦴ ꦄꦪꦁ ꦨꦮꦁ ꦱꦥ꧀ꦥꦸꦫꦶꦱꦺꦴ’ꦠꦶ. ꦱ ꦑꦺꦴ ꦱꦺꦴ, ꦨꦶꦏ꧀ꦑꦮꦺ, ꦥꦟ꧀ꦝꦶꦠꦺꦴ ꦠꦶꦮꦶꦣꦁ ꦢꦶꦛ꧀ꦜꦺꦮ ꦣꦩ꧀ꦩꦺ ꦱꦸꦑꦁ ꦱꦺꦴꦩꦤꦱ꧀ꦱꦁ ꦥꦛꦶꦱꦁꦮꦺꦢꦺꦠꦶ. ꦱꦕꦺ, ꦨꦶꦏ꧀ꦑꦮꦺ, ꦥꦟ꧀ꦝꦶꦠꦺꦴ ꦱꦨꦴꦪꦁ ꦮꦴ ꦤꦶꦱꦶꦤ꧀ꦤꦺꦴ ꦲꦺꦴꦠꦶ, ꦫꦡꦶꦏꦴꦪ ꦮꦴ ꦤꦶꦱꦶꦤ꧀ꦤꦺꦴ ꦲꦺꦴꦠꦶ, ꦱꦶꦔ꧀ꦓꦴꦛꦏꦺ ꦮꦴ ꦤꦶꦱꦶꦤ꧀ꦤꦺꦴ ꦲꦺꦴꦠꦶ; ꦠꦠ꧀ꦫ ꦕꦺ ꦗꦤꦺꦴ ꦠꦗ꧀ꦗꦁ ꦠꦱ꧀ꦱꦴꦫꦸꦥ꧀ꦥꦁ ꦏꦡꦁ ꦩꦤ꧀ꦠꦺꦠꦶ. ꦱꦕꦺ, ꦨꦶꦏ꧀ꦑꦮꦺ, ꦥꦟ꧀ꦝꦶꦠꦺꦴ ꦥꦴꦟꦴꦠꦶꦥꦴꦠꦴ ꦥꦛꦶꦮꦶꦫꦠꦺꦴ ꦲꦺꦴꦠꦶ, ꦄꦢꦶꦤ꧀ꦤꦴꦢꦴꦤꦴ ꦥꦛꦶꦮꦶꦫꦠꦺꦴ ꦲꦺꦴꦠꦶ, ꦏꦴꦩꦺꦱꦸꦩꦶꦕ꧀ꦖꦴꦕꦴꦫꦴ ꦥꦛꦶꦮꦶꦫꦠꦺꦴ ꦲꦺꦴꦠꦶ, ꦩꦸꦱꦴꦮꦴꦢꦴ ꦥꦛꦶꦮꦶꦫꦠꦺꦴ ꦲꦺꦴꦠꦶ, ꦱꦸꦫꦴꦩꦺꦫꦪꦩꦗ꧀ꦗꦥ꧀ꦥꦩꦴꦢꦛ꧀ꦜꦴꦤꦴ ꦥꦛꦶꦮꦶꦫꦠꦺꦴ ꦲꦺꦴꦠꦶ; ꦠꦠ꧀ꦫ, ꦨꦶꦏ꧀ꦑꦮꦺ, ꦥꦟ꧀ꦝꦶꦠꦱ꧀ꦱ ꦌꦮꦁ ꦲꦺꦴꦠꦶ – ‘ꦪꦁ ꦑꦺꦴ ꦗꦤꦺꦴ ꦠꦗ꧀ꦗꦁ ꦠꦱ꧀ꦱꦴꦫꦸꦥ꧀ꦥꦁ ꦏꦡꦁ ꦩꦤ꧀ꦠꦺꦠꦶ; ꦱꦁꦮꦶꦗ꧀ꦗꦤ꧀ꦠꦺꦮ ꦠꦺ ꦣꦩ꧀ꦩꦴ ꦩꦪꦶ, ꦄꦲꦚ꧀ꦕ ꦠꦺꦱꦸ ꦣꦩ꧀ꦩꦺꦱꦸ ꦱꦤ꧀ꦢꦶꦱ꧀ꦱꦴꦩꦷ’ꦠꦶ. ꦆꦢꦁ, ꦨꦶꦏ꧀ꦑꦮꦺ, ꦥꦟ꧀ꦝꦶꦠꦺꦴ ꦥꦜꦩꦁ ꦢꦶꦛ꧀ꦜꦺꦮ ꦣꦩ꧀ꦩꦺ ꦱꦸꦑꦁ ꦱꦺꦴꦩꦤꦱ꧀ꦱꦁ ꦥꦛꦶꦱꦁꦮꦺꦢꦺꦠꦶ.

꧒꧕꧔. ‘‘ꦥꦸꦤ ꦕꦥꦫꦁ, ꦨꦶꦏ꧀ꦑꦮꦺ, ꦥꦟ꧀ꦝꦶꦠꦺꦴ ꦥꦱ꧀ꦱꦠꦶ ꦫꦴꦗꦴꦤꦺꦴ ꦕꦺꦴꦫꦁ ꦄꦴꦒꦸꦕꦴꦫꦶꦁ ꦒꦲꦺꦠ꧀ꦮꦴ ꦮꦶꦮꦶꦣꦴ ꦏꦩ꧀ꦩꦏꦴꦫꦟꦴ ꦏꦴꦫꦺꦤ꧀ꦠꦺ – ꦏꦱꦴꦲꦶꦥꦶ ꦠꦴꦭ꦳ꦺꦤ꧀ꦠꦺ ꦮꦺꦠ꧀ꦠꦺꦲꦶꦥꦶ ꦠꦴꦭ꦳ꦺꦤ꧀ꦠꦺ ꦄꦢ꧀ꦣꦢꦟ꧀ꦝꦏꦺꦲꦶꦥꦶ ꦠꦴꦭ꦳ꦺꦤ꧀ꦠꦺ ꦲꦠ꧀ꦡꦩ꧀ꦥꦶ ꦖꦶꦤ꧀ꦢꦤ꧀ꦠꦺ ꦥꦴꦢꦩ꧀ꦥꦶ ꦖꦶꦤ꧀ꦢꦤ꧀ꦠꦺ ꦲꦠ꧀ꦡꦥꦴꦢꦩ꧀ꦥꦶ ꦖꦶꦤ꧀ꦢꦤ꧀ꦠꦺ ꦏꦟ꧀ꦟꦩ꧀ꦥꦶ ꦖꦶꦤ꧀ꦢꦤ꧀ꦠꦺ ꦤꦴꦱꦩ꧀ꦥꦶ ꦖꦶꦤ꧀ꦢꦤ꧀ꦠꦺ ꦏꦟ꧀ꦟꦤꦴꦱꦩ꧀ꦥꦶ ꦖꦶꦤ꧀ꦢꦤ꧀ꦠꦺ ꦧꦶꦭꦔ꧀ꦒꦡꦴꦭꦶꦏꦩ꧀ꦥꦶ ꦏꦫꦺꦴꦤ꧀ꦠꦺ ꦱꦔ꧀ꦑꦩꦸꦟ꧀ꦝꦶꦏꦩ꧀ꦥꦶ ꦏꦫꦺꦴꦤ꧀ꦠꦺ ꦫꦴꦲꦸꦩꦸꦑꦩ꧀ꦥꦶ ꦏꦫꦺꦴꦤ꧀ꦠꦺ ꦗꦺꦴꦠꦶꦩꦴꦭꦶꦏꦩ꧀ꦥꦶ ꦏꦫꦺꦴꦤ꧀ꦠꦺ ꦲꦠ꧀ꦡꦥꦗ꧀ꦗꦺꦴꦠꦶꦏꦩ꧀ꦥꦶ ꦏꦫꦺꦴꦤ꧀ꦠꦺ ꦌꦫꦏꦮꦠ꧀ꦠꦶꦏꦩ꧀ꦥꦶ ꦏꦫꦺꦴꦤ꧀ꦠꦺ ꦕꦷꦫꦏꦮꦴꦱꦶꦏꦩ꧀ꦥꦶ ꦏꦫꦺꦴꦤ꧀ꦠꦺ ꦌꦟꦺꦪ꧀ꦪꦏꦩ꧀ꦥꦶ ꦏꦫꦺꦴꦤ꧀ꦠꦺ ꦧꦭꦶꦱꦩꦁꦱꦶꦏꦩ꧀ꦥꦶ ꦏꦫꦺꦴꦤ꧀ꦠꦺ ꦏꦲꦴꦥꦟꦶꦏꦩ꧀ꦥꦶ ꦏꦫꦺꦴꦤ꧀ꦠꦺ ꦑꦴꦫꦴꦥꦠꦕ꧀ꦖꦶꦏꦩ꧀ꦥꦶ ꦏꦫꦺꦴꦤ꧀ꦠꦺ ꦥꦭꦶꦓꦥꦫꦶꦮꦠ꧀ꦠꦶꦏꦩ꧀ꦥꦶ ꦏꦫꦺꦴꦤ꧀ꦠꦺ ꦥꦭꦴꦭꦥꦷꦜꦏꦩ꧀ꦥꦶ ꦏꦫꦺꦴꦤ꧀ꦠꦺ ꦠꦠ꧀ꦠꦺꦤꦥꦶ ꦠꦺꦭꦺꦤ ꦎꦱꦶꦚ꧀ꦕꦤ꧀ꦠꦺ ꦱꦸꦤꦑꦺꦲꦶꦥꦶ ꦑꦴꦢꦴꦥꦺꦤ꧀ꦠꦺ ꦗꦷꦮꦤ꧀ꦠꦩ꧀ꦥꦶ ꦱꦹꦭꦺ ꦈꦠ꧀ꦠꦴꦱꦺꦤ꧀ꦠꦺ ꦄꦱꦶꦤꦴꦥꦶ ꦱꦷꦱꦁ ꦖꦶꦤ꧀ꦢꦤ꧀ꦠꦺ. ꦠꦠ꧀ꦫ, ꦨꦶꦏ꧀ꦑꦮꦺ, ꦥꦟ꧀ꦝꦶꦠꦱ꧀ꦱ ꦌꦮꦁ ꦲꦺꦴꦠꦶ – ‘ꦪꦡꦴꦫꦹꦥꦴꦤꦁ ꦑꦺꦴ ꦥꦴꦥꦏꦴꦤꦁ ꦏꦩ꧀ꦩꦴꦤꦁ ꦲꦺꦠꦸ ꦫꦴꦗꦴꦤꦺꦴ ꦕꦺꦴꦫꦁ ꦄꦴꦒꦸꦕꦴꦫꦶꦁ ꦒꦲꦺꦠ꧀ꦮꦴ ꦮꦶꦮꦶꦣꦴ ꦏꦩ꧀ꦩꦏꦴꦫꦟꦴ ꦏꦴꦫꦺꦤ꧀ꦠꦶ ꦏꦱꦴꦲꦶꦥꦶ ꦠꦴꦭ꦳ꦺꦤ꧀ꦠꦶ, ꦮꦺꦠ꧀ꦠꦺꦲꦶꦥꦶ ꦠꦴꦭ꦳ꦺꦤ꧀ꦠꦶ, ꦄꦢ꧀ꦣꦢꦟ꧀ꦝꦏꦺꦲꦶꦥꦶ ꦠꦴꦭ꦳ꦺꦤ꧀ꦠꦶ, ꦲꦠ꧀ꦡꦩ꧀ꦥꦶ ꦖꦶꦤ꧀ꦢꦤ꧀ꦠꦶ, ꦥꦴꦢꦩ꧀ꦥꦶ ꦖꦶꦤ꧀ꦢꦤ꧀ꦠꦶ, ꦲꦠ꧀ꦡꦥꦴꦢꦩ꧀ꦥꦶ ꦖꦶꦤ꧀ꦢꦤ꧀ꦠꦶ, ꦏꦟ꧀ꦟꦩ꧀ꦥꦶ ꦖꦶꦤ꧀ꦢꦤ꧀ꦠꦶ, ꦤꦴꦱꦩ꧀ꦥꦶ ꦖꦶꦤ꧀ꦢꦤ꧀ꦠꦶ, ꦏꦟ꧀ꦟꦤꦴꦱꦩ꧀ꦥꦶ ꦖꦶꦤ꧀ꦢꦤ꧀ꦠꦶ, ꦧꦶꦭꦔ꧀ꦒꦡꦴꦭꦶꦏꦩ꧀ꦥꦶ ꦏꦫꦺꦴꦤ꧀ꦠꦶ, ꦱꦔ꧀ꦑꦩꦸꦟ꧀ꦝꦶꦏꦩ꧀ꦥꦶ ꦏꦫꦺꦴꦤ꧀ꦠꦶ, ꦫꦴꦲꦸꦩꦸꦑꦩ꧀ꦥꦶ ꦏꦫꦺꦴꦤ꧀ꦠꦶ, ꦗꦺꦴꦠꦶꦩꦴꦭꦶꦏꦩ꧀ꦥꦶ ꦏꦫꦺꦴꦤ꧀ꦠꦶ, ꦲꦠ꧀ꦡꦥꦗ꧀ꦗꦺꦴꦠꦶꦏꦩ꧀ꦥꦶ ꦏꦫꦺꦴꦤ꧀ꦠꦶ, ꦌꦫꦏꦮꦠ꧀ꦠꦶꦏꦩ꧀ꦥꦶ ꦏꦫꦺꦴꦤ꧀ꦠꦶ, ꦕꦷꦫꦏꦮꦴꦱꦶꦏꦩ꧀ꦥꦶ ꦏꦫꦺꦴꦤ꧀ꦠꦶ, ꦌꦟꦺꦪ꧀ꦪꦏꦩ꧀ꦥꦶ ꦏꦫꦺꦴꦤ꧀ꦠꦶ, ꦧꦭꦶꦱꦩꦁꦱꦶꦏꦩ꧀ꦥꦶ ꦏꦫꦺꦴꦤ꧀ꦠꦶ, ꦏꦲꦴꦥꦟꦶꦏꦩ꧀ꦥꦶ ꦏꦫꦺꦴꦤ꧀ꦠꦶ, ꦑꦴꦫꦴꦥꦠꦕ꧀ꦖꦶꦏꦩ꧀ꦥꦶ ꦏꦫꦺꦴꦤ꧀ꦠꦶ, ꦥꦭꦶꦓꦥꦫꦶꦮꦠ꧀ꦠꦶꦏꦩ꧀ꦥꦶ ꦏꦫꦺꦴꦤ꧀ꦠꦶ, ꦥꦭꦴꦭꦥꦷꦜꦏꦩ꧀ꦥꦶ ꦏꦫꦺꦴꦤ꧀ꦠꦶ, ꦠꦠ꧀ꦠꦺꦤꦥꦶ ꦠꦺꦭꦺꦤ ꦎꦱꦶꦚ꧀ꦕꦤ꧀ꦠꦶ, ꦱꦸꦤꦑꦺꦲꦶꦥꦶ ꦑꦴꦢꦴꦥꦺꦤ꧀ꦠꦶ, ꦗꦷꦮꦤ꧀ꦠꦩ꧀ꦥꦶ ꦱꦹꦭꦺ ꦈꦠ꧀ꦠꦴꦱꦺꦤ꧀ꦠꦶ, ꦄꦱꦶꦤꦴꦥꦶ ꦱꦷꦱꦁ ꦖꦶꦤ꧀ꦢꦤ꧀ꦠꦶ, ꦤ ꦠꦺ ꦣꦩ꧀ꦩꦴ ꦩꦪꦶ ꦱꦁꦮꦶꦗ꧀ꦗꦤ꧀ꦠꦶ, ꦄꦲꦚ꧀ꦕ ꦤ ꦠꦺꦱꦸ ꦣꦩ꧀ꦩꦺꦱꦸ ꦱꦤ꧀ꦢꦶꦱ꧀ꦱꦴꦩꦷ’ꦠꦶ. ꦆꦢꦩ꧀ꦥꦶ, ꦨꦶꦏ꧀ꦑꦮꦺ, ꦥꦟ꧀ꦝꦶꦠꦺꦴ ꦢꦸꦠꦶꦪꦁ ꦢꦶꦛ꧀ꦜꦺꦮ ꦣꦩ꧀ꦩꦺ ꦱꦸꦑꦁ ꦱꦺꦴꦩꦤꦱ꧀ꦱꦁ ꦥꦛꦶꦱꦁꦮꦺꦢꦺꦠꦶ.

꧒꧕꧕. ‘‘ꦥꦸꦤ ꦕꦥꦫꦁ, ꦨꦶꦏ꧀ꦑꦮꦺ, ꦥꦟ꧀ꦝꦶꦠꦁ ꦥꦷꦜꦱꦩꦴꦫꦹꦭ꦳꧀ꦲꦁ ꦮꦴ ꦩꦚ꧀ꦕꦱꦩꦴꦫꦹꦭ꦳꧀ꦲꦁ ꦮꦴ ꦖꦩꦴꦪꦁ ꦮꦴ ꦱꦺꦩꦴꦤꦁ, ꦪꦴꦤꦶꦱ꧀ꦱ ꦥꦸꦧ꧀ꦧꦺ ꦏꦭ꧀ꦪꦴꦟꦴꦤꦶ ꦏꦩ꧀ꦩꦴꦤꦶ ꦏꦠꦴꦤꦶ ꦏꦴꦪꦺꦤ ꦱꦸꦕꦫꦶꦠꦴꦤꦶ ꦮꦴꦕꦴꦪ ꦱꦸꦕꦫꦶꦠꦴꦤꦶ ꦩꦤꦱꦴ ꦱꦸꦕꦫꦶꦠꦴꦤꦶ ꦠꦴꦤꦶꦱ꧀ꦱ ꦠꦩ꧀ꦲꦶ ꦱꦩꦪꦺ ꦎꦭꦩ꧀ꦧꦤ꧀ꦠꦶ…ꦥꦺ… ꦱꦺꦪ꧀ꦪꦡꦴꦥꦶ, ꦨꦶꦏ꧀ꦑꦮꦺ, ꦩꦲꦠꦁ ꦥꦧ꧀ꦧꦠꦏꦹꦛꦴꦤꦁ ꦖꦴꦪꦴ ꦱꦴꦪꦤ꧀ꦲꦱꦩꦪꦁ ꦥꦡꦮꦶꦪꦴ ꦎꦭꦩ꧀ꦧꦤ꧀ꦠꦶ ꦄꦗ꧀ꦙꦺꦴꦭꦩ꧀ꦧꦤ꧀ꦠꦶ ꦄꦨꦶꦥ꧀ꦥꦭꦩ꧀ꦧꦤ꧀ꦠꦶ; ꦌꦮꦩꦺꦮ ꦑꦺꦴ, ꦨꦶꦏ꧀ꦑꦮꦺ, ꦥꦟ꧀ꦝꦶꦠꦁ ꦥꦷꦜꦱꦩꦴꦫꦹꦭ꦳꧀ꦲꦁ ꦮꦴ ꦩꦚ꧀ꦕꦱꦩꦴꦫꦹꦭ꦳꧀ꦲꦁ ꦮꦴ ꦖꦩꦴꦪꦁ ꦮꦴ ꦱꦺꦩꦴꦤꦁ ꦪꦴꦤꦶꦱ꧀ꦱ ꦥꦸꦧ꧀ꦧꦺ ꦏꦭ꧀ꦪꦴꦟꦴꦤꦶ ꦏꦩ꧀ꦩꦴꦤꦶ ꦏꦠꦴꦤꦶ ꦏꦴꦪꦺꦤ ꦱꦸꦕꦫꦶꦠꦴꦤꦶ ꦮꦴꦕꦴꦪ ꦱꦸꦕꦫꦶꦠꦴꦤꦶ ꦩꦤꦱꦴ ꦱꦸꦕꦫꦶꦠꦴꦤꦶ ꦠꦴꦤꦶꦱ꧀ꦱ ꦠꦩ꧀ꦲꦶ ꦱꦩꦪꦺ ꦎꦭꦩ꧀ꦧꦤ꧀ꦠꦶ ꦄꦗ꧀ꦙꦺꦴꦭꦩ꧀ꦧꦤ꧀ꦠꦶ ꦄꦨꦶꦥ꧀ꦥꦭꦩ꧀ꦧꦤ꧀ꦠꦶ. ꦠꦠ꧀ꦫ, ꦨꦶꦏ꧀ꦑꦮꦺ, ꦥꦟ꧀ꦝꦶꦠꦱ꧀ꦱ ꦌꦮꦁ ꦲꦺꦴꦠꦶ – ‘ꦄꦏꦠꦁ ꦮꦠ ꦩꦺ ꦥꦴꦥꦁ, ꦄꦏꦠꦁ ꦭꦸꦢ꧀ꦢꦁ, ꦄꦏꦠꦁ ꦏꦶꦧ꧀ꦧꦶꦱꦁ; ꦏꦠꦁ ꦏꦭ꧀ꦪꦴꦟꦁ, ꦏꦠꦁ ꦏꦸꦱꦭꦁ, ꦏꦠꦁ ꦨꦷꦫꦸꦠ꧀ꦠꦴꦟꦁ. ꦪꦴꦮꦠꦴ, ꦨꦺꦴ, ꦄꦏꦠꦥꦴꦥꦴꦤꦁ ꦄꦏꦠꦭꦸꦢ꧀ꦢꦴꦤꦁ ꦄꦏꦠꦏꦶꦧ꧀ꦧꦶꦱꦴꦤꦁ ꦏꦠꦏꦭ꧀ꦪꦴꦟꦴꦤꦁ ꦏꦠꦏꦸꦱꦭꦴꦤꦁ ꦏꦠꦨꦷꦫꦸꦠ꧀ꦠꦴꦟꦴꦤꦁ ꦒꦠꦶ ꦠꦁ ꦒꦠꦶꦁ ꦥꦺꦕ꧀ꦕ ꦒꦕ꧀ꦖꦴꦩꦷ’ꦠꦶ. ꦱꦺꦴ ꦤ ꦱꦺꦴꦕꦠꦶ, ꦤ ꦏꦶꦭꦩꦠꦶ, ꦤ ꦥꦫꦶꦢꦺꦮꦠꦶ, ꦤ ꦈꦫꦠ꧀ꦠꦴꦭ꦳ꦶꦁ ꦏꦤ꧀ꦢꦠꦶ, ꦤ ꦱꦩ꧀ꦩꦺꦴꦲꦁ ꦄꦴꦥꦗ꧀ꦗꦠꦶ. ꦆꦢꦩ꧀ꦥꦶ, ꦨꦶꦏ꧀ꦑꦮꦺ, ꦥꦟ꧀ꦝꦶꦠꦺꦴ ꦠꦠꦶꦪꦁ ꦢꦶꦛ꧀ꦜꦺꦮ ꦣꦩ꧀ꦩꦺ ꦱꦸꦑꦁ ꦱꦺꦴꦩꦤꦱ꧀ꦱꦁ ꦥꦛꦶꦱꦁꦮꦺꦢꦺꦠꦶ.

‘‘ꦱ ꦑꦺꦴ ꦱꦺꦴ, ꦨꦶꦏ꧀ꦑꦮꦺ, ꦥꦟ꧀ꦝꦶꦠꦺꦴ ꦏꦴꦪꦺꦤ ꦱꦸꦕꦫꦶꦠꦁ ꦕꦫꦶꦠ꧀ꦮꦴ ꦮꦴꦕꦴꦪ ꦱꦸꦕꦫꦶꦠꦁ ꦕꦫꦶꦠ꧀ꦮꦴ ꦩꦤꦱꦴ ꦱꦸꦕꦫꦶꦠꦁ ꦕꦫꦶꦠ꧀ꦮꦴ ꦏꦴꦪꦱ꧀ꦱ ꦨꦺꦢꦴ ꦥꦫꦁ ꦩꦫꦟꦴ ꦱꦸꦒꦠꦶꦁ ꦱꦒ꧀ꦒꦁ ꦭꦺꦴꦏꦁ ꦈꦥꦥꦗ꧀ꦗꦠꦶ. ꦪꦁ ꦑꦺꦴ ꦠꦁ, ꦨꦶꦏ꧀ꦑꦮꦺ, ꦱꦩ꧀ꦩꦴ ꦮꦢꦩꦴꦤꦺꦴ ꦮꦢꦺꦪ꧀ꦪ – ‘ꦌꦏꦤ꧀ꦠꦁ ꦆꦛ꧀ꦜꦁ ꦌꦏꦤ꧀ꦠꦁ ꦏꦤ꧀ꦠꦁ ꦌꦏꦤ꧀ꦠꦁ ꦩꦤꦴꦥ’ꦤ꧀ꦠꦶ, ꦱꦒ꧀ꦒꦩꦺꦮ ꦠꦁ ꦱꦩ꧀ꦩꦴ ꦮꦢꦩꦴꦤꦺꦴ ꦮꦢꦺꦪ꧀ꦪ – ‘ꦌꦏꦤ꧀ꦠꦁ ꦆꦛ꧀ꦜꦁ ꦌꦏꦤ꧀ꦠꦁ ꦏꦤ꧀ꦠꦁ ꦌꦏꦤ꧀ꦠꦁ ꦩꦤꦴꦥ’ꦤ꧀ꦠꦶ. ꦪꦴꦮꦚ꧀ꦕꦶꦢꦁ, ꦨꦶꦏ꧀ꦑꦮꦺ, ꦈꦥꦩꦴꦥꦶ ꦤ ꦱꦸꦏꦫꦴ ꦪꦴꦮ ꦱꦸꦑꦴ ꦱꦒ꧀ꦒꦴ’’ꦠꦶ.

꧒꧕꧖. ꦌꦮꦁ ꦮꦸꦠ꧀ꦠꦺ, ꦄꦚ꧀ꦚꦠꦫꦺꦴ ꦨꦶꦏ꧀ꦑꦸ ꦨꦒꦮꦤ꧀ꦠꦁ ꦌꦠꦢꦮꦺꦴꦕ – ‘‘ꦱꦏ꧀ꦏꦴ ꦥꦤ, ꦨꦤ꧀ꦠꦺ, ꦈꦥꦩꦁ ꦏꦴꦠꦸ’’ꦤ꧀ꦠꦶ? ‘‘ꦱꦏ꧀ꦏꦴ ꦨꦶꦏ꧀ꦑꦹ’’ꦠꦶ ꦨꦒꦮꦴ ꦄꦮꦺꦴꦕ. ‘‘ꦱꦺꦪ꧀ꦪꦡꦴꦥꦶ, ꦨꦶꦏ꧀ꦑꦮꦺ, ꦫꦴꦗꦴ ꦕꦏ꧀ꦏꦮꦠ꧀ꦠꦷ ꦱꦠ꧀ꦠꦲꦶ ꦫꦠꦤꦺꦲꦶ ꦱꦩꦤ꧀ꦤꦴꦒꦠꦺꦴ ꦕꦠꦹꦲꦶ ꦕ ꦆꦢ꧀ꦣꦷꦲꦶ ꦠꦠꦺꦴꦤꦶꦢꦴꦤꦁ ꦱꦸꦑꦁ ꦱꦺꦴꦩꦤꦱ꧀ꦱꦁ ꦥꦛꦶꦱꦁꦮꦺꦢꦺꦠꦶ. ꦏꦠꦩꦺꦲꦶ ꦱꦠ꧀ꦠꦲꦶ? ꦆꦣ, ꦨꦶꦏ꧀ꦑꦮꦺ, ꦫꦚ꧀ꦚꦺꦴ ꦑꦠ꧀ꦠꦶꦪꦱ꧀ꦱ ꦩꦸꦢ꧀ꦣꦴꦮꦱꦶꦠ꧀ꦠꦱ꧀ꦱ ꦠꦢꦲꦸꦥꦺꦴꦱꦡꦺ ꦥꦤ꧀ꦤꦫꦱꦺ ꦱꦷꦱꦁꦤ꧀ꦲꦴꦠꦱ꧀ꦱ ꦈꦥꦺꦴꦱꦡꦶꦏꦱ꧀ꦱ ꦈꦥꦫꦶꦥꦴꦱꦴꦢꦮꦫꦒꦠꦱ꧀ꦱ ꦢꦶꦧ꧀ꦧꦁ ꦕꦏ꧀ꦏꦫꦠꦤꦁ ꦥꦴꦠꦸꦨꦮꦠꦶ ꦱꦲꦱ꧀ꦱꦴꦫꦁ ꦱꦤꦺꦩꦶꦏꦁ ꦱꦤꦴꦨꦶꦏꦁ ꦱꦧ꧀ꦧꦴꦏꦴꦫꦥꦫꦶꦥꦹꦫꦁ. ꦠꦁ ꦢꦶꦱ꧀ꦮꦴꦤ ꦫꦚ꧀ꦚꦺꦴ ꦑꦠ꧀ꦠꦶꦪꦱ꧀ꦱ ꦩꦸꦢ꧀ꦣꦴꦮꦱꦶꦠ꧀ꦠꦱ꧀ꦱ ꦌꦮꦁ ꦲꦺꦴꦠꦶ [ꦌꦠꦢꦲꦺꦴꦱꦶ (ꦱ꧀ꦪꦴ. ꦏꦁ. ꦏ.)] – ‘ꦱꦸꦠꦁ ꦑꦺꦴ ꦥꦤ ꦩꦺꦠꦁ ꦪꦱ꧀ꦱ ꦫꦚ꧀ꦚꦺꦴ ꦑꦠ꧀ꦠꦶꦪꦱ꧀ꦱ ꦩꦸꦢ꧀ꦣꦴꦮꦱꦶꦠ꧀ꦠꦱ꧀ꦱ ꦠꦢꦲꦸꦥꦺꦴꦱꦡꦺ ꦥꦤ꧀ꦤꦫꦱꦺ ꦱꦷꦱꦁꦤ꧀ꦲꦴꦠꦱ꧀ꦱ ꦈꦥꦺꦴꦱꦡꦶꦏꦱ꧀ꦱ ꦈꦥꦫꦶꦥꦴꦱꦴꦢꦮꦫꦒꦠꦱ꧀ꦱ ꦢꦶꦧ꧀ꦧꦁ ꦕꦏ꧀ꦏꦫꦠꦤꦁ ꦥꦴꦠꦸꦨꦮꦠꦶ ꦱꦲꦱ꧀ꦱꦴꦫꦁ ꦱꦤꦺꦩꦶꦏꦁ ꦱꦤꦴꦨꦶꦏꦁ ꦱꦧ꧀ꦧꦴꦏꦴꦫꦥꦫꦶꦥꦹꦫꦁ, ꦱꦺꦴ ꦲꦺꦴꦠꦶ ꦫꦴꦗꦴ ꦕꦏ꧀ꦏꦮꦠ꧀ꦠꦷꦠꦶ. ꦄꦱ꧀ꦱꦁ ꦤꦸ ꦑꦺꦴ ꦄꦲꦁ ꦫꦴꦗꦴ ꦕꦏ꧀ꦏꦮꦠ꧀ꦠꦷ’’’ꦠꦶ?

‘‘ꦄꦡ ꦑꦺꦴ, ꦨꦶꦏ꧀ꦑꦮꦺ, ꦫꦴꦗꦴ ꦑꦠ꧀ꦠꦶꦪꦺꦴ ꦩꦸꦢ꧀ꦣꦴꦮꦱꦶꦠ꧀ꦠꦺꦴ ꦮꦴꦩꦺꦤ ꦲꦠ꧀ꦡꦺꦤ ꦨꦶꦔ꧀ꦏꦴꦫꦁ ꦒꦲꦺꦠ꧀ꦮꦴ ꦢꦏ꧀ꦑꦶꦟꦺꦤ ꦲꦠ꧀ꦡꦺꦤ ꦕꦏ꧀ꦏꦫꦠꦤꦁ ꦄꦧ꧀ꦨꦸꦏ꧀ꦏꦶꦫꦠꦶ – ‘ꦥꦮꦠ꧀ꦠꦠꦸ ꦨꦮꦁ ꦕꦏ꧀ꦏꦫꦠꦤꦁ, ꦄꦨꦶꦮꦶꦗꦶꦤꦴꦠꦸ ꦨꦮꦁ ꦕꦏ꧀ꦏꦫꦠꦤ’ꦤ꧀ꦠꦶ. ꦄꦡ ꦑꦺꦴ ꦠꦁ, ꦨꦶꦏ꧀ꦑꦮꦺ, ꦕꦏ꧀ꦏꦫꦠꦤꦁ ꦥꦸꦫꦠ꧀ꦡꦶꦩꦁ ꦢꦶꦱꦁ ꦥꦮꦠ꧀ꦠꦠꦶ. ꦄꦤ꧀ꦮꦢꦺꦮ ꦫꦴꦗꦴ ꦕꦏ꧀ꦏꦮꦠ꧀ꦠꦷ ꦱꦢ꧀ꦣꦶꦁ ꦕꦠꦸꦫꦔ꧀ꦒꦶꦤꦶꦪꦴ ꦱꦺꦤꦴꦪ. ꦪꦱ꧀ꦩꦶꦁ ꦑꦺꦴ ꦥꦤ, ꦨꦶꦏ꧀ꦑꦮꦺ, ꦥꦢꦺꦱꦺ ꦕꦏ꧀ꦏꦫꦠꦤꦁ ꦥꦠꦶꦛ꧀ꦜꦴꦠꦶ ꦠꦠ꧀ꦡ ꦫꦴꦗꦴ ꦕꦏ꧀ꦏꦮꦠ꧀ꦠꦷ ꦮꦴꦱꦁ ꦈꦥꦺꦠꦶ ꦱꦢ꧀ꦣꦶꦁ ꦕꦠꦸꦫꦔ꧀ꦒꦶꦤꦶꦪꦴ ꦱꦺꦤꦴꦪ. ꦪꦺ ꦑꦺꦴ ꦥꦤ, ꦨꦶꦏ꧀ꦑꦮꦺ, ꦥꦸꦫꦠ꧀ꦡꦶꦩꦴꦪ ꦢꦶꦱꦴꦪ ꦥꦛꦶꦫꦴꦗꦴꦤꦺꦴ ꦠꦺ ꦫꦴꦗꦴꦤꦁ ꦕꦏ꧀ꦏꦮꦠ꧀ꦠꦶꦁ ꦈꦥꦱꦔ꧀ꦏꦩꦶꦠ꧀ꦮꦴ ꦌꦮꦩꦴꦲꦁꦱꦸ – ‘ꦌꦲꦶ ꦑꦺꦴ, ꦩꦲꦴꦫꦴꦗ! ꦱ꧀ꦮꦴꦒꦠꦁ ꦠꦺ, ꦩꦲꦴꦫꦴꦗ [ꦱ꧀ꦮꦴꦒꦠꦁ ꦩꦲꦴꦫꦴꦗ (ꦱꦷ. ꦱ꧀ꦪꦴ. ꦏꦁ. ꦥꦷ.)]! ꦱꦏꦁ ꦠꦺ, ꦩꦲꦴꦫꦴꦗ! ꦄꦤꦸꦱꦴꦱ, ꦩꦲꦴꦫꦴꦗꦴ’ꦠꦶ. ꦫꦴꦗꦴ ꦕꦏ꧀ꦏꦮꦠ꧀ꦠꦷ ꦌꦮꦩꦴꦲ – ‘ꦥꦴꦟꦺꦴ ꦤ ꦲꦤ꧀ꦠꦧ꧀ꦧꦺꦴ, ꦄꦢꦶꦤ꧀ꦤꦁ ꦤꦴꦢꦴꦠꦧ꧀ꦧꦁ, ꦏꦴꦩꦺꦱꦸꦩꦶꦕ꧀ꦖꦴ ꦤ ꦕꦫꦶꦠꦧ꧀ꦧꦴ, ꦩꦸꦱꦴ ꦤ ꦨꦴꦱꦶꦠꦧ꧀ꦧꦴ, ꦩꦗ꧀ꦗꦁ ꦤ ꦥꦴꦠꦧ꧀ꦧꦁ, ꦪꦡꦴꦨꦸꦠ꧀ꦠꦚ꧀ꦕ ꦨꦸꦚ꧀ꦗꦡꦴ’ꦠꦶ. ꦪꦺ ꦑꦺꦴ ꦥꦤ, ꦨꦶꦏ꧀ꦑꦮꦺ, ꦥꦸꦫꦠ꧀ꦡꦶꦩꦴꦪ ꦢꦶꦱꦴꦪ ꦥꦛꦶꦫꦴꦗꦴꦤꦺꦴ ꦠꦺ ꦫꦚ꧀ꦚꦺꦴ ꦕꦏ꧀ꦏꦮꦠ꧀ꦠꦶꦱ꧀ꦱ ꦄꦤꦸꦪꦤ꧀ꦠꦴ [ꦄꦤꦸꦪꦸꦠ꧀ꦠꦴ (ꦱꦷ. ꦱ꧀ꦪꦴ. ꦏꦁ. ꦥꦷ.)] ꦨꦮꦤ꧀ꦠꦶ [ꦄꦲꦺꦱꦸꦁ (ꦱ꧀ꦪꦴ. ꦏꦁ. ꦏ.)].

꧒꧕꧗. ‘‘ꦄꦡ ꦑꦺꦴ ꦠꦁ, ꦨꦶꦏ꧀ꦑꦮꦺ, ꦕꦏ꧀ꦏꦫꦠꦤꦁ ꦥꦸꦫꦠ꧀ꦡꦶꦩꦁ ꦱꦩꦸꦢ꧀ꦢꦁ ꦄꦗ꧀ꦙꦺꦴꦒꦴꦲꦺꦠ꧀ꦮꦴ [ꦄꦗ꧀ꦙꦺꦴꦒꦲꦺꦠ꧀ꦮꦴ (ꦱꦷ. ꦱ꧀ꦪꦴ. ꦏꦁ. ꦥꦷ.)] ꦥꦕ꧀ꦕꦸꦠ꧀ꦠꦫꦶꦠ꧀ꦮꦴ ꦢꦏ꧀ꦑꦶꦟꦁ ꦢꦶꦱꦁ ꦥꦮꦠ꧀ꦠꦠꦶ…ꦥꦺ… ꦢꦏ꧀ꦑꦶꦟꦁ ꦱꦩꦸꦢ꧀ꦢꦁ ꦄꦗ꧀ꦙꦺꦴꦒꦴꦲꦺꦠ꧀ꦮꦴ ꦥꦕ꧀ꦕꦸꦠ꧀ꦠꦫꦶꦠ꧀ꦮꦴ ꦥꦕ꧀ꦖꦶꦩꦁ ꦢꦶꦱꦁ ꦥꦮꦠ꧀ꦠꦠꦶ… ꦥꦕ꧀ꦖꦶꦩꦁ ꦱꦩꦸꦢ꧀ꦢꦁ ꦄꦗ꧀ꦙꦺꦴꦒꦴꦲꦺꦠ꧀ꦮꦴ ꦥꦕ꧀ꦕꦸꦠ꧀ꦠꦫꦶꦠ꧀ꦮꦴ ꦈꦠ꧀ꦠꦫꦁ ꦢꦶꦱꦁ ꦥꦮꦠ꧀ꦠꦠꦶ ꦄꦤ꧀ꦮꦢꦺꦮ ꦫꦴꦗꦴ ꦕꦏ꧀ꦏꦮꦠ꧀ꦠꦷ ꦱꦢ꧀ꦣꦶꦁ ꦕꦠꦸꦫꦔ꧀ꦒꦶꦤꦶꦪꦴ ꦱꦺꦤꦴꦪ. ꦪꦱ꧀ꦩꦶꦁ ꦑꦺꦴ ꦥꦤ, ꦨꦶꦏ꧀ꦑꦮꦺ, ꦥꦢꦺꦱꦺ ꦕꦏ꧀ꦏꦫꦠꦤꦁ ꦥꦠꦶꦛ꧀ꦜꦴꦠꦶ ꦠꦠ꧀ꦡ ꦫꦴꦗꦴ ꦕꦏ꧀ꦏꦮꦠ꧀ꦠꦷ ꦮꦴꦱꦁ ꦈꦥꦺꦠꦶ ꦱꦢ꧀ꦣꦶꦁ ꦕꦠꦸꦫꦔ꧀ꦒꦶꦤꦶꦪꦴ ꦱꦺꦤꦴꦪ.

‘‘ꦪꦺ ꦑꦺꦴ ꦥꦤ, ꦨꦶꦏ꧀ꦑꦮꦺ, ꦈꦠ꧀ꦠꦫꦴꦪ ꦢꦶꦱꦴꦪ ꦥꦛꦶꦫꦴꦗꦴꦤꦺꦴ ꦠꦺ ꦫꦴꦗꦴꦤꦁ ꦕꦏ꧀ꦏꦮꦠ꧀ꦠꦶꦁ ꦈꦥꦱꦔ꧀ꦏꦩꦶꦠ꧀ꦮꦴ ꦌꦮꦩꦴꦲꦁꦱꦸ – ‘ꦌꦲꦶ ꦑꦺꦴ, ꦩꦲꦴꦫꦴꦗ! ꦱ꧀ꦮꦴꦒꦠꦁ ꦠꦺ, ꦩꦲꦴꦫꦴꦗ! ꦱꦏꦁ ꦠꦺ, ꦩꦲꦴꦫꦴꦗ! ꦄꦤꦸꦱꦴꦱ, ꦩꦲꦴꦫꦴꦗꦴ’ꦠꦶ. ꦫꦴꦗꦴ ꦕꦏ꧀ꦏꦮꦠ꧀ꦠꦷ ꦌꦮꦩꦴꦲ – ‘ꦥꦴꦟꦺꦴ ꦤ ꦲꦤ꧀ꦠꦧ꧀ꦧꦺꦴ, ꦄꦢꦶꦤ꧀ꦤꦁ ꦤꦴꦢꦴꦠꦧ꧀ꦧꦁ, ꦏꦴꦩꦺꦱꦸꦩꦶꦕ꧀ꦖꦴ ꦤ ꦕꦫꦶꦠꦧ꧀ꦧꦴ, ꦩꦸꦱꦴ ꦤ ꦨꦴꦱꦶꦠꦧ꧀ꦧꦴ, ꦩꦗ꧀ꦗꦁ ꦤ ꦥꦴꦠꦧ꧀ꦧꦁ; ꦪꦡꦴꦨꦸꦠ꧀ꦠꦚ꧀ꦕ ꦨꦸꦚ꧀ꦗꦡꦴ’ꦠꦶ. ꦪꦺ ꦑꦺꦴ ꦥꦤ, ꦨꦶꦏ꧀ꦑꦮꦺ, ꦈꦠ꧀ꦠꦫꦴꦪ ꦢꦶꦱꦴꦪ ꦥꦛꦶꦫꦴꦗꦴꦤꦺꦴ ꦠꦺ ꦫꦚ꧀ꦚꦺꦴ ꦕꦏ꧀ꦏꦮꦠ꧀ꦠꦶꦱ꧀ꦱ ꦄꦤꦸꦪꦤ꧀ꦠꦴ ꦨꦮꦤ꧀ꦠꦶ.

‘‘ꦄꦡ ꦑꦺꦴ ꦠꦁ, ꦨꦶꦏ꧀ꦑꦮꦺ, ꦕꦏ꧀ꦏꦫꦠꦤꦁ ꦱꦩꦸꦢ꧀ꦢꦥꦫꦶꦪꦤ꧀ꦠꦁ ꦥꦡꦮꦶꦁ ꦄꦨꦶꦮꦶꦗꦶꦤꦶꦠ꧀ꦮꦴ ꦠꦩꦺꦮ ꦫꦴꦗꦣꦴꦤꦶꦁ ꦥꦕ꧀ꦕꦴꦒꦤ꧀ꦠ꧀ꦮꦴ ꦫꦚ꧀ꦚꦺꦴ ꦕꦏ꧀ꦏꦮꦠ꧀ꦠꦶꦱ꧀ꦱ ꦄꦤ꧀ꦠꦺꦥꦸꦫꦢ꧀ꦮꦴꦫꦺ ꦄꦏ꧀ꦑꦴꦲꦠꦁ ꦩꦚ꧀ꦚꦺ ꦠꦶꦛ꧀ꦜꦠꦶ ꦫꦚ꧀ꦚꦺꦴ ꦕꦏ꧀ꦏꦮꦠ꧀ꦠꦶꦱ꧀ꦱ ꦄꦤ꧀ꦠꦺꦥꦸꦫꦢ꧀ꦮꦴꦫꦁ ꦈꦥꦱꦺꦴꦨꦪꦩꦴꦤꦁ. ꦫꦚ꧀ꦚꦺꦴ, ꦨꦶꦏ꧀ꦑꦮꦺ, ꦕꦏ꧀ꦏꦮꦠ꧀ꦠꦶꦱ꧀ꦱ ꦌꦮꦫꦹꦥꦁ ꦕꦏ꧀ꦏꦫꦠꦤꦁ ꦥꦴꦠꦸꦨꦮꦠꦶ.

꧒꧕꧘. ‘‘ꦥꦸꦤ ꦕꦥꦫꦁ, ꦨꦶꦏ꧀ꦑꦮꦺ, ꦫꦚ꧀ꦚꦺꦴ ꦕꦏ꧀ꦏꦮꦠ꧀ꦠꦶꦱ꧀ꦱ ꦲꦠ꧀ꦡꦶꦫꦠꦤꦁ ꦥꦴꦠꦸꦨꦮꦠꦶ – ꦱꦧ꧀ꦧꦱꦺꦠꦺꦴ ꦱꦠ꧀ꦠꦥ꧀ꦥꦠꦶꦛ꧀ꦜꦺꦴ ꦆꦢ꧀ꦣꦶꦩꦴ ꦮꦺꦲꦴꦱꦔ꧀ꦒꦩꦺꦴ ꦈꦥꦺꦴꦱꦡꦺꦴ ꦤꦴꦩ ꦤꦴꦒꦫꦴꦗꦴ. ꦠꦁ ꦢꦶꦱ꧀ꦮꦴꦤ ꦫꦚ꧀ꦚꦺꦴ ꦕꦏ꧀ꦏꦮꦠ꧀ꦠꦶꦱ꧀ꦱ ꦕꦶꦠ꧀ꦠꦁ ꦥꦱꦷꦢꦠꦶ – ‘ꦨꦢ꧀ꦢꦏꦁ ꦮꦠ, ꦨꦺꦴ, ꦲꦠ꧀ꦡꦶꦪꦴꦤꦁ, ꦱꦕꦺ ꦢꦩꦡꦁ ꦈꦥꦺꦪ꧀ꦪꦴ’ꦠꦶ. ꦄꦡ ꦑꦺꦴ ꦠꦁ, ꦨꦶꦏ꧀ꦑꦮꦺ, ꦲꦠ꧀ꦡꦶꦫꦠꦤꦁ ꦱꦺꦪ꧀ꦪꦡꦴꦥꦶ ꦤꦴꦩ ꦨꦢ꧀ꦢꦺꦴ ꦲꦠ꧀ꦡꦴꦗꦴꦤꦷꦪꦺꦴ ꦢꦷꦓꦫꦠ꧀ꦠꦁ ꦱꦸꦥꦫꦶꦢꦤ꧀ꦠꦺꦴ ꦌꦮꦩꦺꦮ ꦢꦩꦡꦁ ꦈꦥꦺꦠꦶ. ꦨꦹꦠꦥꦸꦧ꧀ꦧꦁ, ꦨꦶꦏ꧀ꦑꦮꦺ, ꦫꦴꦗꦴ ꦕꦏ꧀ꦏꦮꦠ꧀ꦠꦷ ꦠꦩꦺꦮ ꦲꦠ꧀ꦡꦶꦫꦠꦤꦁ ꦮꦷꦩꦁꦱꦩꦴꦤꦺꦴ ꦥꦸꦧ꧀ꦧꦟ꧀ꦲꦱꦩꦪꦁ ꦄꦨꦶꦫꦸꦲꦶꦠ꧀ꦮꦴ ꦱꦩꦸꦢ꧀ꦢꦥꦫꦶꦪꦤ꧀ꦠꦁ ꦥꦡꦮꦶꦁ ꦄꦤꦸꦱꦁꦪꦴꦪꦶꦠ꧀ꦮꦴ ꦠꦩꦺꦮ ꦫꦴꦗꦣꦴꦤꦶꦁ ꦥꦕ꧀ꦕꦴꦒꦤ꧀ꦠ꧀ꦮꦴ ꦥꦴꦠꦫꦴꦱꦩꦏꦴꦱꦶ. ꦫꦚ꧀ꦚꦺꦴ, ꦨꦶꦏ꧀ꦑꦮꦺ, ꦕꦏ꧀ꦏꦮꦠ꧀ꦠꦶꦱ꧀ꦱ ꦌꦮꦫꦹꦥꦁ ꦲꦠ꧀ꦡꦶꦫꦠꦤꦁ ꦥꦴꦠꦸꦨꦮꦠꦶ.

‘‘ꦥꦸꦤ ꦕꦥꦫꦁ, ꦨꦶꦏ꧀ꦑꦮꦺ, ꦫꦚ꧀ꦚꦺꦴ ꦕꦏ꧀ꦏꦮꦠ꧀ꦠꦶꦱ꧀ꦱ ꦄꦱ꧀ꦱꦫꦠꦤꦁ ꦥꦴꦠꦸꦨꦮꦠꦶ – ꦱꦧ꧀ꦧꦱꦺꦠꦺꦴ ꦏꦴꦭ꦳ꦱꦷꦱꦺꦴ ꦩꦸꦚ꧀ꦗꦏꦺꦱꦺꦴ ꦆꦢ꧀ꦣꦶꦩꦴ ꦮꦺꦲꦴꦱꦔ꧀ꦒꦩꦺꦴ ꦮꦭꦴꦲꦏꦺꦴ ꦤꦴꦩ ꦄꦱ꧀ꦱꦫꦴꦗꦴ. ꦠꦁ ꦢꦶꦱ꧀ꦮꦴꦤ ꦫꦚ꧀ꦚꦺꦴ ꦕꦏ꧀ꦏꦮꦠ꧀ꦠꦶꦱ꧀ꦱ ꦕꦶꦠ꧀ꦠꦁ ꦥꦱꦷꦢꦠꦶ – ‘ꦨꦢ꧀ꦢꦏꦁ ꦮꦠ, ꦨꦺꦴ, ꦄꦱ꧀ꦱꦪꦴꦤꦁ, ꦱꦕꦺ ꦢꦩꦡꦁ ꦈꦥꦺꦪ꧀ꦪꦴ’ꦠꦶ. ꦄꦡ ꦑꦺꦴ ꦠꦁ, ꦨꦶꦏ꧀ꦑꦮꦺ, ꦄꦱ꧀ꦱꦫꦠꦤꦁ ꦱꦺꦪ꧀ꦪꦡꦴꦥꦶ ꦤꦴꦩ ꦨꦢ꧀ꦢꦺꦴ ꦄꦱ꧀ꦱꦴꦗꦴꦤꦷꦪꦺꦴ ꦢꦷꦓꦫꦠ꧀ꦠꦁ ꦱꦸꦥꦫꦶꦢꦤ꧀ꦠꦺꦴ ꦌꦮꦩꦺꦮ ꦢꦩꦡꦁ ꦈꦥꦺꦠꦶ. ꦨꦹꦠꦥꦸꦧ꧀ꦧꦁ, ꦨꦶꦏ꧀ꦑꦮꦺ, ꦫꦴꦗꦴ ꦕꦏ꧀ꦏꦮꦠ꧀ꦠꦷ ꦠꦩꦺꦮ ꦄꦱ꧀ꦱꦫꦠꦤꦁ ꦮꦷꦩꦁꦱꦩꦴꦤꦺꦴ ꦥꦸꦧ꧀ꦧꦟ꧀ꦲꦱꦩꦪꦁ ꦄꦨꦶꦫꦸꦲꦶꦠ꧀ꦮꦴ ꦱꦩꦸꦢ꧀ꦢꦥꦫꦶꦪꦤ꧀ꦠꦁ ꦥꦡꦮꦶꦁ ꦄꦤꦸꦱꦁꦪꦴꦪꦶꦠ꧀ꦮꦴ ꦠꦩꦺꦮ ꦫꦴꦗꦣꦴꦤꦶꦁ ꦥꦕ꧀ꦕꦴꦒꦤ꧀ꦠ꧀ꦮꦴ ꦥꦴꦠꦫꦴꦱꦩꦏꦴꦱꦶ. ꦫꦚ꧀ꦚꦺꦴ, ꦨꦶꦏ꧀ꦑꦮꦺ, ꦕꦏ꧀ꦏꦮꦠ꧀ꦠꦶꦱ꧀ꦱ ꦌꦮꦫꦹꦥꦁ ꦄꦱ꧀ꦱꦫꦠꦤꦁ ꦥꦴꦠꦸꦨꦮꦠꦶ.

‘‘ꦥꦸꦤ ꦕꦥꦫꦁ, ꦨꦶꦏ꧀ꦑꦮꦺ, ꦫꦚ꧀ꦚꦺꦴ ꦕꦏ꧀ꦏꦮꦠ꧀ꦠꦶꦱ꧀ꦱ ꦩꦟꦶꦫꦠꦤꦁ ꦥꦴꦠꦸꦨꦮꦠꦶ. ꦱꦺꦴ ꦲꦺꦴꦠꦶ ꦩꦟꦶ ꦮꦺꦭ꦳ꦸꦫꦶꦪꦺꦴ ꦱꦸꦨꦺꦴ ꦗꦴꦠꦶꦩꦴ ꦄꦛ꧀ꦜꦁꦱꦺꦴ ꦱꦸꦥꦫꦶꦏꦩ꧀ꦩꦏꦠꦺꦴ. ꦠꦱ꧀ꦱ ꦑꦺꦴ ꦥꦤ, ꦨꦶꦏ꧀ꦑꦮꦺ, ꦩꦟꦶꦫꦠꦤꦱ꧀ꦱ ꦄꦴꦨꦴ ꦱꦩꦤ꧀ꦠꦴ ꦪꦺꦴꦗꦤꦁ ꦦꦸꦛꦴ ꦲꦺꦴꦠꦶ. ꦨꦹꦠꦥꦸꦧ꧀ꦧꦁ, ꦨꦶꦏ꧀ꦑꦮꦺ, ꦫꦴꦗꦴ ꦕꦏ꧀ꦏꦮꦠ꧀ꦠꦷ ꦠꦩꦺꦮ ꦩꦟꦶꦫꦠꦤꦁ ꦮꦷꦩꦁꦱꦩꦴꦤꦺꦴ ꦕꦠꦸꦫꦔ꧀ꦒꦶꦤꦶꦁ ꦱꦺꦤꦁ ꦱꦤ꧀ꦤꦪ꧀ꦲꦶꦠ꧀ꦮꦴ ꦩꦟꦶꦁ ꦣꦗꦒ꧀ꦒꦁ ꦄꦴꦫꦺꦴꦥꦺꦠ꧀ꦮꦴ ꦫꦠ꧀ꦠꦤ꧀ꦣꦏꦴꦫꦠꦶꦩꦶꦱꦴꦪ ꦥꦴꦪꦴꦱꦶ. ꦪꦺ ꦑꦺꦴ ꦥꦤ, ꦨꦶꦏ꧀ꦑꦮꦺ, ꦱꦩꦤ꧀ꦠꦴ ꦒꦴꦩꦴ ꦄꦲꦺꦱꦸꦁ ꦠꦺ ꦠꦺꦤꦺꦴꦨꦴꦱꦺꦤ ꦏꦩ꧀ꦩꦤ꧀ꦠꦺ ꦥꦪꦺꦴꦗꦺꦱꦸꦁ ‘ꦢꦶꦮꦴ’ꦠꦶ ꦩꦚ꧀ꦚꦩꦴꦤꦴ. ꦫꦚ꧀ꦚꦺꦴ, ꦨꦶꦏ꧀ꦑꦮꦺ, ꦕꦏ꧀ꦏꦮꦠ꧀ꦠꦶꦱ꧀ꦱ ꦌꦮꦫꦹꦥꦁ ꦩꦟꦶꦫꦠꦤꦁ ꦥꦴꦠꦸꦨꦮꦠꦶ.

‘‘ꦥꦸꦤ ꦕꦥꦫꦁ, ꦨꦶꦏ꧀ꦑꦮꦺ, ꦫꦚ꧀ꦚꦺꦴ ꦕꦏ꧀ꦏꦮꦠ꧀ꦠꦶꦱ꧀ꦱ ꦆꦠ꧀ꦡꦶꦫꦠꦤꦁ ꦥꦴꦠꦸꦨꦮꦠꦶ. ꦱꦴ ꦄꦨꦶꦫꦹꦥꦴ ꦢꦱ꧀ꦱꦤꦷꦪꦴ ꦥꦴꦱꦴꦢꦶꦏꦴ ꦥꦫꦩꦴꦪ ꦮꦟ꧀ꦟꦥꦺꦴꦏ꧀ꦑꦫꦠꦴꦪ ꦱꦩꦤ꧀ꦤꦴꦒꦠꦴ ꦤꦴꦠꦶꦢꦷꦓꦴ ꦤꦴꦠꦶꦫꦱ꧀ꦱꦴ ꦤꦴꦠꦶꦏꦶꦱꦴ ꦤꦴꦠꦶꦡꦹꦭꦴ ꦤꦴꦠꦶꦏꦴꦭ꦳ꦶꦏꦴ [ꦤꦴꦠꦶꦏꦴꦭ꦳ꦷ (ꦱꦷ. ꦥꦷ.)] ꦤꦴꦕ꧀ꦕꦺꦴꦢꦴꦠꦴ, ꦄꦠꦶꦏ꧀ꦏꦤ꧀ꦠꦴ ꦩꦴꦤꦸꦱꦁ ꦮꦟ꧀ꦟꦁ, ꦄꦥ꧀ꦥꦠ꧀ꦠꦴ ꦢꦶꦧ꧀ꦧꦁ ꦮꦟ꧀ꦟꦁ. ꦠꦱ꧀ꦱ ꦑꦺꦴ ꦥꦤ, ꦨꦶꦏ꧀ꦑꦮꦺ, ꦆꦠ꧀ꦡꦶꦫꦠꦤꦱ꧀ꦱ ꦌꦮꦫꦹꦥꦺꦴ ꦏꦴꦪꦱꦩ꧀ꦦꦱ꧀ꦱꦺꦴ ꦲꦺꦴꦠꦶ ꦱꦺꦪ꧀ꦪꦡꦴꦥꦶ ꦤꦴꦩ ꦠꦹꦭꦥꦶꦕꦸꦤꦺꦴ ꦮꦴ ꦏꦥ꧀ꦥꦴꦱꦥꦶꦕꦸꦤꦺꦴ ꦮꦴ. ꦠꦱ꧀ꦱ ꦑꦺꦴ ꦥꦤ, ꦨꦶꦏ꧀ꦑꦮꦺ, ꦆꦠ꧀ꦡꦶꦫꦠꦤꦱ꧀ꦱ ꦱꦷꦠꦺ ꦈꦟ꧀ꦲꦴꦤꦶ ꦒꦠ꧀ꦠꦴꦤꦶ ꦲꦺꦴꦤ꧀ꦠꦶ, ꦈꦟ꧀ꦲꦺ ꦱꦷꦠꦴꦤꦶ ꦒꦠ꧀ꦠꦴꦤꦶ ꦲꦺꦴꦤ꧀ꦠꦶ. ꦠꦱ꧀ꦱ ꦑꦺꦴ ꦥꦤ, ꦨꦶꦏ꧀ꦑꦮꦺ, ꦆꦠ꧀ꦡꦶꦫꦠꦤꦱ꧀ꦱ ꦏꦴꦪꦠꦺꦴ ꦕꦤ꧀ꦢꦤꦒꦤ꧀ꦣꦺꦴ ꦮꦴꦪꦠꦶ, ꦩꦸꦑꦠꦺꦴ ꦈꦥ꧀ꦥꦭꦒꦤ꧀ꦣꦺꦴ ꦮꦴꦪꦠꦶ. ꦠꦁ ꦑꦺꦴ ꦥꦤ, ꦨꦶꦏ꧀ꦑꦮꦺ, ꦆꦠ꧀ꦡꦶꦫꦠꦤꦁ ꦫꦚ꧀ꦚꦺꦴ ꦕꦏ꧀ꦏꦮꦠ꧀ꦠꦶꦱ꧀ꦱ ꦥꦸꦧ꧀ꦧꦸꦛ꧀ꦜꦴꦪꦶꦤꦷ ꦲꦺꦴꦠꦶ ꦥꦕ꧀ꦖꦴꦤꦶꦥꦴꦠꦶꦤꦷ ꦏꦶꦁꦏꦴꦫꦥꦛꦶꦱ꧀ꦱꦴꦮꦶꦤꦷ ꦩꦤꦴꦥꦕꦴꦫꦶꦤꦷ ꦥꦶꦪꦮꦴꦢꦶꦤꦷ. ꦠꦁ ꦑꦺꦴ ꦥꦤ, ꦨꦶꦏ꧀ꦑꦮꦺ, ꦆꦠ꧀ꦡꦶꦫꦠꦤꦁ ꦫꦴꦗꦴꦤꦁ ꦕꦏ꧀ꦏꦮꦠ꧀ꦠꦶꦁ ꦩꦤꦱꦴꦥꦶ ꦤꦺꦴ ꦄꦠꦶꦕꦫꦠꦶ, ꦏꦸꦠꦺꦴ ꦥꦤ ꦏꦴꦪꦺꦤ? ꦫꦚ꧀ꦚꦺꦴ, ꦨꦶꦏ꧀ꦑꦮꦺ, ꦕꦏ꧀ꦏꦮꦠ꧀ꦠꦶꦱ꧀ꦱ ꦌꦮꦫꦹꦥꦁ ꦆꦠ꧀ꦡꦶꦫꦠꦤꦁ ꦥꦴꦠꦸꦨꦮꦠꦶ.

‘‘ꦥꦸꦤ ꦕꦥꦫꦁ, ꦨꦶꦏ꧀ꦑꦮꦺ, ꦫꦚ꧀ꦚꦺꦴ ꦕꦏ꧀ꦏꦮꦠ꧀ꦠꦶꦱ꧀ꦱ ꦒꦲꦥꦠꦶꦫꦠꦤꦁ ꦥꦴꦠꦸꦨꦮꦠꦶ. ꦠꦱ꧀ꦱ ꦏꦩ꧀ꦩꦮꦶꦥꦴꦏꦗꦁ ꦢꦶꦧ꧀ꦧꦕꦏ꧀ꦑꦸ ꦥꦴꦠꦸꦨꦮꦠꦶ, ꦪꦺꦤ ꦤꦶꦣꦶꦁ ꦥꦱ꧀ꦱꦠꦶ ꦱꦱ꧀ꦱꦴꦩꦶꦏꦩ꧀ꦥꦶ ꦄꦱ꧀ꦱꦴꦩꦶꦏꦩ꧀ꦥꦶ. ꦱꦺꦴ ꦫꦴꦗꦴꦤꦁ ꦕꦏ꧀ꦏꦮꦠ꧀ꦠꦶꦁ ꦈꦥꦱꦔ꧀ꦏꦩꦶꦠ꧀ꦮꦴ ꦌꦮꦩꦴꦲ – ‘ꦄꦥ꧀ꦥꦺꦴꦱ꧀ꦱꦸꦏ꧀ꦏꦺꦴ ꦠ꧀ꦮꦁ, ꦢꦺꦮ, ꦲꦺꦴꦲꦶ. ꦄꦲꦁ ꦠꦺ ꦣꦤꦺꦤ ꦣꦤꦏꦫꦟꦷꦪꦁ [ꦣꦤꦺꦤ ꦏꦫꦟꦷꦪꦁ (ꦏ.)] ꦏꦫꦶꦱ꧀ꦱꦴꦩꦷ’ꦠꦶ. ꦨꦹꦠꦥꦸꦧ꧀ꦧꦁ, ꦨꦶꦏ꧀ꦑꦮꦺ, ꦫꦴꦗꦴ ꦕꦏ꧀ꦏꦮꦠ꧀ꦠꦷ ꦠꦩꦺꦮ ꦒꦲꦥꦠꦶꦫꦠꦤꦁ ꦮꦷꦩꦁꦱꦩꦴꦤꦺꦴ ꦤꦴꦮꦁ ꦄꦨꦶꦫꦸꦲꦶꦠ꧀ꦮꦴ ꦩꦗ꧀ꦙꦺ ꦒꦔ꧀ꦒꦴꦪ ꦤꦢꦶꦪꦴ ꦱꦺꦴꦠꦁ ꦎꦒꦴꦲꦶꦠ꧀ꦮꦴ [ꦎꦒꦲꦺꦠ꧀ꦮꦴ (ꦱꦷ. ꦥꦷ.)] ꦒꦲꦥꦠꦶꦫꦠꦤꦁ ꦌꦠꦢꦮꦺꦴꦕ – ‘ꦄꦠ꧀ꦡꦺꦴ ꦩꦺ, ꦒꦲꦥꦠꦶ, ꦲꦶꦫꦚ꧀ꦚꦱꦸꦮꦟ꧀ꦟꦺꦤꦴ’ꦠꦶ. ‘ꦠꦺꦤ ꦲꦶ, ꦩꦲꦴꦫꦴꦗ, ꦌꦏꦁ ꦠꦷꦫꦁ ꦤꦴꦮꦴ ꦈꦥꦺꦠꦹ’ꦠꦶ. ‘ꦆꦣꦺꦮ ꦩꦺ, ꦒꦲꦥꦠꦶ, ꦄꦠ꧀ꦡꦺꦴ ꦲꦶꦫꦚ꧀ꦚꦱꦸꦮꦟ꧀ꦟꦺꦤꦴ’ꦠꦶ. ꦄꦡ ꦑꦺꦴ ꦠꦁ, ꦨꦶꦏ꧀ꦑꦮꦺ, ꦒꦲꦥꦠꦶꦫꦠꦤꦁ ꦈꦨꦺꦴꦲꦶ ꦲꦠ꧀ꦡꦺꦲꦶ ꦈꦢꦏꦺ ꦎꦩꦱꦶꦠ꧀ꦮꦴ ꦥꦹꦫꦁ ꦲꦶꦫꦚ꧀ꦚꦱꦸꦮꦟ꧀ꦟꦱ꧀ꦱ ꦏꦸꦩ꧀ꦨꦶꦁ ꦈꦢ꧀ꦣꦫꦶꦠ꧀ꦮꦴ ꦫꦴꦗꦴꦤꦁ ꦕꦏ꧀ꦏꦮꦠ꧀ꦠꦶꦁ ꦌꦠꦢꦮꦺꦴꦕ – ‘ꦄꦭꦩꦺꦠ꧀ꦠꦴꦮꦠꦴ, ꦩꦲꦴꦫꦴꦗ! ꦏꦠꦩꦺꦠ꧀ꦠꦴꦮꦠꦴ, ꦩꦲꦴꦫꦴꦗ! ꦥꦹꦗꦶꦠꦩꦺꦠ꧀ꦠꦴꦮꦠꦴ, ꦩꦲꦴꦫꦴꦗꦴ’ꦠꦶ. ꦫꦴꦗꦴ ꦕꦏ꧀ꦏꦮꦠ꧀ꦠꦷ ꦌꦮꦩꦴꦲ – ‘ꦄꦭꦩꦺꦠ꧀ꦠꦴꦮꦠꦴ, ꦒꦲꦥꦠꦶ! ꦏꦠꦩꦺꦠ꧀ꦠꦴꦮꦠꦴ, ꦒꦲꦥꦠꦶ! ꦥꦹꦗꦶꦠꦩꦺꦠ꧀ꦠꦴꦮꦠꦴ, ꦒꦲꦥꦠꦷ’ꦠꦶ. ꦫꦚ꧀ꦚꦺꦴ, ꦨꦶꦏ꧀ꦑꦮꦺ, ꦕꦏ꧀ꦏꦮꦠ꧀ꦠꦶꦱ꧀ꦱ ꦌꦮꦫꦹꦥꦁ ꦒꦲꦥꦠꦶꦫꦠꦤꦁ ꦥꦴꦠꦸꦨꦮꦠꦶ.

‘‘ꦥꦸꦤ ꦕꦥꦫꦁ, ꦨꦶꦏ꧀ꦑꦮꦺ, ꦫꦚ꧀ꦚꦺꦴ ꦕꦏ꧀ꦏꦮꦠ꧀ꦠꦶꦱ꧀ꦱ ꦥꦫꦶꦟꦴꦪꦏꦫꦠꦤꦁ ꦥꦴꦠꦸꦨꦮꦠꦶ – ꦥꦟ꧀ꦝꦶꦠꦺꦴ ꦧ꧀ꦪꦠ꧀ꦠꦺꦴ ꦩꦺꦣꦴꦮꦷ ꦥꦛꦶꦧꦭꦺꦴ ꦫꦴꦗꦴꦤꦁ ꦕꦏ꧀ꦏꦮꦠ꧀ꦠꦶꦁ ꦈꦥꦪꦴꦥꦺꦠꦧ꧀ꦧꦁ ꦈꦥꦪꦴꦥꦺꦠꦸꦁ [ꦈꦥꦛ꧀ꦜꦥꦺꦠꦧ꧀ꦧꦁ ꦈꦥꦛ꧀ꦜꦥꦺꦠꦸꦁ (ꦱꦷ. ꦱ꧀ꦪꦴ. ꦏꦁ. ꦥꦷ.)] ꦄꦥꦪꦴꦥꦺꦠꦧ꧀ꦧꦁ ꦄꦥꦪꦴꦥꦺꦠꦸꦁ ꦜꦥꦺꦠꦧ꧀ꦧꦁ ꦜꦥꦺꦠꦸꦁ. ꦱꦺꦴ ꦫꦴꦗꦴꦤꦁ ꦕꦏ꧀ꦏꦮꦠ꧀ꦠꦶꦁ ꦈꦥꦱꦔ꧀ꦏꦩꦶꦠ꧀ꦮꦴ ꦌꦮꦩꦴꦲ – ‘ꦄꦥ꧀ꦥꦺꦴꦱ꧀ꦱꦸꦏ꧀ꦏꦺꦴ ꦠ꧀ꦮꦁ, ꦢꦺꦮ, ꦲꦺꦴꦲꦶ. ꦄꦲꦩꦤꦸꦱꦴꦱꦶꦱ꧀ꦱꦴꦩꦷ’ꦠꦶ. ꦫꦚ꧀ꦚꦺꦴ, ꦨꦶꦏ꧀ꦑꦮꦺ, ꦕꦏ꧀ꦏꦮꦠ꧀ꦠꦶꦱ꧀ꦱ ꦌꦮꦫꦹꦥꦁ ꦥꦫꦶꦟꦴꦪꦏꦫꦠꦤꦁ ꦥꦴꦠꦸꦨꦮꦠꦶ. ꦫꦴꦗꦴ, ꦨꦶꦏ꧀ꦑꦮꦺ, ꦕꦏ꧀ꦏꦮꦠ꧀ꦠꦷ ꦆꦩꦺꦲꦶ ꦱꦠ꧀ꦠꦲꦶ ꦫꦠꦤꦺꦲꦶ ꦱꦩꦤ꧀ꦤꦴꦒꦠꦺꦴ ꦲꦺꦴꦠꦶ.

꧒꧕꧙. ‘‘ꦏꦠꦩꦴꦲꦶ ꦕꦠꦹꦲꦶ ꦆꦢ꧀ꦣꦷꦲꦶ? ꦆꦣ, ꦨꦶꦏ꧀ꦑꦮꦺ, ꦫꦴꦗꦴ ꦕꦏ꧀ꦏꦮꦠ꧀ꦠꦷ ꦄꦨꦶꦫꦹꦥꦺꦴ ꦲꦺꦴꦠꦶ ꦢꦱ꧀ꦱꦤꦷꦪꦺꦴ ꦥꦴꦱꦴꦢꦶꦏꦺꦴ ꦥꦫꦩꦴꦪ ꦮꦟ꧀ꦟꦥꦺꦴꦏ꧀ꦑꦫꦠꦴꦪ ꦱꦩꦤ꧀ꦤꦴꦒꦠꦺꦴ ꦄꦠꦶꦮꦶꦪ ꦄꦚ꧀ꦚꦺꦲꦶ ꦩꦤꦸꦱ꧀ꦱꦺꦲꦶ. ꦫꦴꦗꦴ, ꦨꦶꦏ꧀ꦑꦮꦺ, ꦕꦏ꧀ꦏꦮꦠ꧀ꦠꦷ ꦆꦩꦴꦪ ꦥꦜꦩꦴꦪ ꦆꦢ꧀ꦣꦶꦪꦴ ꦱꦩꦤ꧀ꦤꦴꦒꦠꦺꦴ ꦲꦺꦴꦠꦶ.

‘‘ꦥꦸꦤ ꦕꦥꦫꦁ, ꦨꦶꦏ꧀ꦑꦮꦺ, ꦫꦴꦗꦴ ꦕꦏ꧀ꦏꦮꦠ꧀ꦠꦷ ꦢꦷꦓꦴꦪꦸꦏꦺꦴ ꦲꦺꦴꦠꦶ ꦕꦶꦫꦛ꧀ꦜꦶꦠꦶꦏꦺꦴ ꦄꦠꦶꦮꦶꦪ ꦄꦚ꧀ꦚꦺꦲꦶ ꦩꦤꦸꦱ꧀ꦱꦺꦲꦶ. ꦫꦴꦗꦴ, ꦨꦶꦏ꧀ꦑꦮꦺ, ꦕꦏ꧀ꦏꦮꦠ꧀ꦠꦷ ꦆꦩꦴꦪ ꦢꦸꦠꦶꦪꦴꦪ ꦆꦢ꧀ꦣꦶꦪꦴ ꦱꦩꦤ꧀ꦤꦴꦒꦠꦺꦴ ꦲꦺꦴꦠꦶ.

‘‘ꦥꦸꦤ ꦕꦥꦫꦁ, ꦨꦶꦏ꧀ꦑꦮꦺ, ꦫꦴꦗꦴ ꦕꦏ꧀ꦏꦮꦠ꧀ꦠꦷ ꦄꦥ꧀ꦥꦴꦧꦴꦣꦺꦴ ꦲꦺꦴꦠꦶ ꦄꦥ꧀ꦥꦴꦠꦔ꧀ꦏꦺꦴ ꦱꦩꦮꦺꦥꦴꦏꦶꦤꦶꦪꦴ ꦒꦲꦟꦶꦪꦴ ꦱꦩꦤ꧀ꦤꦴꦒꦠꦺꦴ ꦤꦴꦠꦶꦱꦷꦠꦴꦪ ꦤꦴꦕ꧀ꦕꦸꦟ꧀ꦲꦴꦪ ꦄꦠꦶꦮꦶꦪ ꦄꦚ꧀ꦚꦺꦲꦶ ꦩꦤꦸꦱ꧀ꦱꦺꦲꦶ. ꦫꦴꦗꦴ, ꦨꦶꦏ꧀ꦑꦮꦺ, ꦕꦏ꧀ꦏꦮꦠ꧀ꦠꦷ ꦆꦩꦴꦪ ꦠꦠꦶꦪꦴꦪ ꦆꦢ꧀ꦣꦶꦪꦴ ꦱꦩꦤ꧀ꦤꦴꦒꦠꦺꦴ ꦲꦺꦴꦠꦶ.

‘‘ꦥꦸꦤ ꦕꦥꦫꦁ, ꦨꦶꦏ꧀ꦑꦮꦺ, ꦫꦴꦗꦴ ꦕꦏ꧀ꦏꦮꦠ꧀ꦠꦷ ꦧ꧀ꦫꦴꦲ꧀ꦩꦟꦒꦲꦥꦠꦶꦏꦴꦤꦁ ꦥꦶꦪꦺꦴ ꦲꦺꦴꦠꦶ ꦩꦤꦴꦥꦺꦴ. ꦱꦺꦪ꧀ꦪꦡꦴꦥꦶ, ꦨꦶꦏ꧀ꦑꦮꦺ, ꦥꦶꦠꦴ ꦥꦸꦠ꧀ꦠꦴꦤꦁ ꦥꦶꦪꦺꦴ ꦲꦺꦴꦠꦶ ꦩꦤꦴꦥꦺꦴ, ꦌꦮꦩꦺꦮ ꦑꦺꦴ, ꦨꦶꦏ꧀ꦑꦮꦺ, ꦫꦴꦗꦴ ꦕꦏ꧀ꦏꦮꦠ꧀ꦠꦷ ꦧ꧀ꦫꦴꦲ꧀ꦩꦟꦒꦲꦥꦠꦶꦏꦴꦤꦁ ꦥꦶꦪꦺꦴ ꦲꦺꦴꦠꦶ ꦩꦤꦴꦥꦺꦴ. ꦫꦚ꧀ꦚꦺꦴꦥꦶ, ꦨꦶꦏ꧀ꦑꦮꦺ, ꦕꦏ꧀ꦏꦮꦠ꧀ꦠꦶꦱ꧀ꦱ ꦧ꧀ꦫꦴꦲ꧀ꦩꦟꦒꦲꦥꦠꦶꦏꦴ ꦥꦶꦪꦴ ꦲꦺꦴꦤ꧀ꦠꦶ ꦩꦤꦴꦥꦴ. ꦱꦺꦪ꧀ꦪꦡꦴꦥꦶ, ꦨꦶꦏ꧀ꦑꦮꦺ, ꦥꦶꦠꦸ ꦥꦸꦠ꧀ꦠꦴ ꦥꦶꦪꦴ ꦲꦺꦴꦤ꧀ꦠꦶ ꦩꦤꦴꦥꦴ, ꦌꦮꦩꦺꦮ ꦑꦺꦴ, ꦨꦶꦏ꧀ꦑꦮꦺ, ꦫꦚ꧀ꦚꦺꦴꦥꦶ ꦕꦏ꧀ꦏꦮꦠ꧀ꦠꦶꦱ꧀ꦱ ꦧ꧀ꦫꦴꦲ꧀ꦩꦟꦒꦲꦥꦠꦶꦏꦴ ꦥꦶꦪꦴ ꦲꦺꦴꦤ꧀ꦠꦶ ꦩꦤꦴꦥꦴ.

‘‘ꦨꦹꦠꦥꦸꦧ꧀ꦧꦁ, ꦨꦶꦏ꧀ꦑꦮꦺ, ꦫꦴꦗꦴ ꦕꦏ꧀ꦏꦮꦠ꧀ꦠꦷ ꦕꦠꦸꦫꦔ꧀ꦒꦶꦤꦶꦪꦴ ꦱꦺꦤꦴꦪ ꦈꦪ꧀ꦪꦴꦤꦨꦹꦩꦶꦁ ꦤꦶꦪ꧀ꦪꦴꦱꦶ. ꦄꦡ ꦑꦺꦴ, ꦨꦶꦏ꧀ꦑꦮꦺ, ꦧ꧀ꦫꦴꦲ꧀ꦩꦟꦒꦲꦥꦠꦶꦏꦴ ꦫꦴꦗꦴꦤꦁ ꦕꦏ꧀ꦏꦮꦠ꧀ꦠꦶꦁ ꦈꦥꦱꦔ꧀ꦏꦩꦶꦠ꧀ꦮꦴ ꦌꦮꦩꦴꦲꦁꦱꦸ – ‘ꦄꦠꦫꦩꦴꦤꦺꦴ, ꦢꦺꦮ, ꦪꦴꦲꦶ ꦪꦡꦴ ꦠꦁ ꦩꦪꦁ ꦕꦶꦫꦠꦫꦁ ꦥꦱ꧀ꦱꦺꦪ꧀ꦪꦴꦩꦴ’ꦠꦶ. ꦫꦴꦗꦴꦥꦶ, ꦨꦶꦏ꧀ꦑꦮꦺ, ꦕꦏ꧀ꦏꦮꦠ꧀ꦠꦷ ꦱꦴꦫꦡꦶꦁ ꦄꦴꦩꦤ꧀ꦠꦺꦱꦶ – ‘ꦄꦠꦫꦩꦴꦤꦺꦴ, ꦱꦴꦫꦡꦶ, ꦥꦺꦱꦺꦲꦶ ꦪꦡꦴ ꦩꦁ ꦧ꧀ꦫꦴꦲ꧀ꦩꦟꦒꦲꦥꦠꦶꦏꦴ ꦕꦶꦫꦠꦫꦁ ꦥꦱ꧀ꦱꦺꦪ꧀ꦪꦸ’ꦤ꧀ꦠꦶ. ꦫꦴꦗꦴ, ꦨꦶꦏ꧀ꦑꦮꦺ, ꦕꦏ꧀ꦏꦮꦠ꧀ꦠꦷ ꦆꦩꦴꦪ ꦕꦠꦸꦠ꧀ꦡꦴꦪ ꦆꦢ꧀ꦣꦶꦪꦴ ꦱꦩꦤ꧀ꦤꦴꦒꦠꦺꦴ ꦲꦺꦴꦠꦶ. ꦫꦴꦗꦴ, ꦨꦶꦏ꧀ꦑꦮꦺ, ꦕꦏ꧀ꦏꦮꦠ꧀ꦠꦷ ꦆꦩꦴꦲꦶ ꦕꦠꦹꦲꦶ ꦆꦢ꧀ꦣꦷꦲꦶ ꦱꦩꦤ꧀ꦤꦴꦒꦠꦺꦴ ꦲꦺꦴꦠꦶ.

‘‘ꦠꦁ ꦏꦶꦁ ꦩꦚ꧀ꦚꦡ, ꦨꦶꦏ꧀ꦑꦮꦺ, ꦄꦥꦶ ꦤꦸ ꦑꦺꦴ ꦫꦴꦗꦴ ꦕꦏ꧀ꦏꦮꦠ꧀ꦠꦷ ꦆꦩꦺꦲꦶ ꦱꦠ꧀ꦠꦲꦶ ꦫꦠꦤꦺꦲꦶ ꦱꦩꦤ꧀ꦤꦴꦒꦠꦺꦴ ꦆꦩꦴꦲꦶ ꦕꦠꦹꦲꦶ ꦕ ꦆꦢ꧀ꦣꦷꦲꦶ ꦠꦠꦺꦴꦤꦶꦢꦴꦤꦁ ꦱꦸꦑꦁ ꦱꦺꦴꦩꦤꦱ꧀ꦱꦁ ꦥꦛꦶꦱꦁꦮꦺꦢꦶꦪꦺꦡꦴ’’ꦠꦶ? ‘‘ꦌꦏꦩꦺꦏꦺꦤꦥꦶ, ꦨꦤ꧀ꦠꦺ, ꦫꦠꦤꦺꦤ [ꦠꦺꦤ ꦫꦠꦤꦺꦤ (ꦱꦷ.)] ꦱꦩꦤ꧀ꦤꦴꦒꦠꦺꦴ ꦫꦴꦗꦴ ꦕꦏ꧀ꦏꦮꦠ꧀ꦠꦷ ꦠꦠꦺꦴꦤꦶꦢꦴꦤꦁ ꦱꦸꦑꦁ ꦱꦺꦴꦩꦤꦱ꧀ꦱꦁ ꦥꦛꦶꦱꦁꦮꦺꦢꦶꦪꦺꦡ, ꦏꦺꦴ ꦥꦤ ꦮꦴꦢꦺꦴ ꦱꦠ꧀ꦠꦲꦶ ꦫꦠꦤꦺꦲꦶ ꦕꦠꦹꦲꦶ ꦕ ꦆꦢ꧀ꦣꦷꦲꦷ’’ꦠꦶ?

꧒꧖꧐. ꦄꦡ ꦑꦺꦴ ꦨꦒꦮꦴ ꦥꦫꦶꦠ꧀ꦠꦁ ꦥꦴꦟꦶꦩꦠ꧀ꦠꦁ ꦥꦴꦱꦴꦟꦁ ꦒꦲꦺꦠ꧀ꦮꦴ ꦨꦶꦏ꧀ꦑꦹ ꦄꦴꦩꦤ꧀ꦠꦺꦱꦶ – ‘‘ꦠꦁ ꦏꦶꦁ ꦩꦚ꧀ꦚꦡ, ꦨꦶꦏ꧀ꦑꦮꦺ, ꦏꦠꦩꦺꦴ ꦤꦸ ꦑꦺꦴ ꦩꦲꦤ꧀ꦠꦠꦫꦺꦴ – ꦪꦺꦴ ꦕꦴꦪꦁ ꦩꦪꦴ ꦥꦫꦶꦠ꧀ꦠꦺꦴ ꦥꦴꦟꦶꦩꦠ꧀ꦠꦺꦴ ꦥꦴꦱꦴꦟꦺꦴ ꦒꦲꦶꦠꦺꦴ ꦪꦺꦴ ꦕ ꦲꦶꦩꦮꦴ ꦥꦧ꧀ꦧꦠꦫꦴꦗꦴ’’ꦠꦶ? ‘‘ꦄꦥ꧀ꦥꦩꦠ꧀ꦠꦏꦺꦴ ꦄꦪꦁ, ꦨꦤ꧀ꦠꦺ, ꦨꦒꦮꦠꦴ ꦥꦫꦶꦠ꧀ꦠꦺꦴ ꦥꦴꦟꦶꦩꦠ꧀ꦠꦺꦴ ꦥꦴꦱꦴꦟꦺꦴ ꦒꦲꦶꦠꦺꦴ; ꦲꦶꦩꦮꦤ꧀ꦠꦁ ꦥꦧ꧀ꦧꦠꦫꦴꦗꦴꦤꦁ ꦈꦥꦤꦶꦣꦴꦪ ꦱꦔ꧀ꦑꦩ꧀ꦥꦶ ꦤ ꦈꦥꦺꦠꦶ; ꦏꦭꦨꦴꦒꦩ꧀ꦥꦶ ꦤ ꦈꦥꦺꦠꦶ; ꦈꦥꦤꦶꦣꦩ꧀ꦥꦶ ꦤ ꦈꦥꦺꦠꦷ’’ꦠꦶ. ‘‘ꦌꦮꦩꦺꦮ ꦑꦺꦴ, ꦨꦶꦏ꧀ꦑꦮꦺ, ꦪꦁ ꦫꦴꦗꦴ ꦕꦏ꧀ꦏꦮꦠ꧀ꦠꦷ ꦱꦠ꧀ꦠꦲꦶ ꦫꦠꦤꦺꦲꦶ ꦱꦩꦤ꧀ꦤꦴꦒꦠꦺꦴ ꦕꦠꦹꦲꦶ ꦕ ꦆꦢ꧀ꦣꦷꦲꦶ ꦠꦠꦺꦴꦤꦶꦢꦴꦤꦁ ꦱꦸꦑꦁ ꦱꦺꦴꦩꦤꦱ꧀ꦱꦁ ꦥꦛꦶꦱꦁꦮꦺꦢꦺꦠꦶ ꦠꦁ ꦢꦶꦧ꧀ꦧꦱ꧀ꦱ ꦱꦸꦑꦱ꧀ꦱ ꦈꦥꦤꦶꦣꦴꦪ ꦱꦔ꧀ꦑꦩ꧀ꦥꦶ ꦤ ꦈꦥꦺꦠꦶ; ꦏꦭꦨꦴꦒꦩ꧀ꦥꦶ ꦤ ꦈꦥꦺꦠꦶ; ꦈꦥꦤꦶꦣꦩ꧀ꦥꦶ ꦤ ꦈꦥꦺꦠꦶ’’.

‘‘ꦱ ꦑꦺꦴ ꦱꦺꦴ, ꦨꦶꦏ꧀ꦑꦮꦺ, ꦥꦟ꧀ꦝꦶꦠꦺꦴ ꦱꦕꦺ ꦏꦢꦴꦕꦶ ꦏꦫꦲꦕꦶ ꦢꦷꦓꦱ꧀ꦱ ꦄꦢ꧀ꦣꦸꦤꦺꦴ ꦄꦕ꧀ꦕꦪꦺꦤ ꦩꦤꦸꦱ꧀ꦱꦠ꧀ꦠꦁ ꦄꦴꦒꦕ꧀ꦖꦠꦶ, ꦪꦴꦤꦶ ꦠꦴꦤꦶ ꦈꦕ꧀ꦕꦴꦏꦸꦭꦴꦤꦶ – ꦑꦠ꧀ꦠꦶꦪꦩꦲꦴꦱꦴꦭꦏꦸꦭꦁ ꦮꦴ ꦧ꧀ꦫꦴꦲ꧀ꦩꦟꦩꦲꦴꦱꦴꦭꦏꦸꦭꦁ ꦮꦴ ꦒꦲꦥꦠꦶꦩꦲꦴꦱꦴꦭꦏꦸꦭꦁ ꦮꦴ ꦠꦡꦴꦫꦹꦥꦺ ꦏꦸꦭꦺ ꦥꦕ꧀ꦕꦴꦗꦴꦪꦠꦶ ꦄꦝ꧀ꦞꦺ ꦩꦲꦢ꧀ꦣꦤꦺ ꦩꦲꦴꦨꦺꦴꦒꦺ ꦥꦲꦹꦠꦗꦴꦠꦫꦹꦥꦫꦗꦠꦺ ꦥꦲꦹꦠꦮꦶꦠ꧀ꦠꦹꦥꦏꦫꦟꦺ ꦥꦲꦹꦠꦣꦤꦣꦚ꧀ꦚꦺ. ꦱꦺꦴ ꦕ ꦲꦺꦴꦠꦶ ꦄꦨꦶꦫꦹꦥꦺꦴ ꦢꦱ꧀ꦱꦤꦷꦪꦺꦴ ꦥꦴꦱꦴꦢꦶꦏꦺꦴ ꦥꦫꦩꦴꦪ ꦮꦟ꧀ꦟꦥꦺꦴꦏ꧀ꦑꦫꦠꦴꦪ ꦱꦩꦤ꧀ꦤꦴꦒꦠꦺꦴ, ꦭꦴꦨꦷ ꦄꦤ꧀ꦤꦱ꧀ꦱ ꦥꦴꦤꦱ꧀ꦱ ꦮꦠ꧀ꦡꦱ꧀ꦱ ꦪꦴꦤꦱ꧀ꦱ ꦩꦴꦭꦴꦒꦤ꧀ꦣꦮꦶꦭꦺꦥꦤꦱ꧀ꦱ ꦱꦺꦪ꧀ꦪꦴꦮꦱꦡꦥꦢꦷꦥꦺꦪ꧀ꦪꦱ꧀ꦱ. ꦱꦺꦴ ꦏꦴꦪꦺꦤ ꦱꦸꦕꦫꦶꦠꦁ ꦕꦫꦠꦶ, ꦮꦴꦕꦴꦪ ꦱꦸꦕꦫꦶꦠꦁ ꦕꦫꦠꦶ, ꦩꦤꦱꦴ ꦱꦸꦕꦫꦶꦠꦁ ꦕꦫꦠꦶ. ꦱꦺꦴ ꦏꦴꦪꦺꦤ ꦱꦸꦕꦫꦶꦠꦁ ꦕꦫꦶꦠ꧀ꦮꦴ, ꦮꦴꦕꦴꦪ ꦱꦸꦕꦫꦶꦠꦁ ꦕꦫꦶꦠ꧀ꦮꦴ, ꦩꦤꦱꦴ ꦱꦸꦕꦫꦶꦠꦁ ꦕꦫꦶꦠ꧀ꦮꦴ, ꦏꦴꦪꦱ꧀ꦱ ꦨꦺꦢꦴ ꦥꦫꦁ ꦩꦫꦟꦴ ꦱꦸꦒꦠꦶꦁ ꦱꦒ꧀ꦒꦁ ꦭꦺꦴꦏꦁ ꦈꦥꦥꦗ꧀ꦗꦠꦶ. ꦱꦺꦪ꧀ꦪꦡꦴꦥꦶ, ꦨꦶꦏ꧀ꦑꦮꦺ, ꦄꦏ꧀ꦑꦣꦸꦠ꧀ꦠꦺꦴ ꦥꦜꦩꦺꦤꦺꦮ ꦏꦛꦒ꧀ꦒꦲꦺꦤ ꦩꦲꦤ꧀ꦠꦁ ꦨꦺꦴꦒꦏ꧀ꦑꦤ꧀ꦣꦁ ꦄꦣꦶꦒꦕ꧀ꦖꦺꦪ꧀ꦪ; ꦄꦥ꧀ꦥꦩꦠ꧀ꦠꦏꦺꦴ ꦱꦺꦴ, ꦨꦶꦏ꧀ꦑꦮꦺ, ꦏꦛꦒ꧀ꦒꦲꦺꦴ ꦪꦁ ꦱꦺꦴ ꦄꦏ꧀ꦑꦣꦸꦠ꧀ꦠꦺꦴ ꦥꦜꦩꦺꦤꦺꦮ ꦏꦛꦒ꧀ꦒꦲꦺꦤ ꦩꦲꦤ꧀ꦠꦁ ꦨꦺꦴꦒꦏ꧀ꦑꦤ꧀ꦣꦁ ꦄꦣꦶꦒꦕ꧀ꦖꦺꦪ꧀ꦪ. ꦄꦡ ꦑꦺꦴ ꦄꦪꦩꦺꦮ ꦠꦠꦺꦴ ꦩꦲꦤ꧀ꦠꦠꦫꦺꦴ ꦏꦛꦒ꧀ꦒꦲꦺꦴ ꦪꦁ ꦱꦺꦴ ꦥꦟ꧀ꦝꦶꦠꦺꦴ ꦏꦴꦪꦺꦤ ꦱꦸꦕꦫꦶꦠꦁ ꦕꦫꦶꦠ꧀ꦮꦴ, ꦮꦴꦕꦴꦪ ꦱꦸꦕꦫꦶꦠꦁ ꦕꦫꦶꦠ꧀ꦮꦴ, ꦩꦤꦱꦴ ꦱꦸꦕꦫꦶꦠꦁ ꦕꦫꦶꦠ꧀ꦮꦴ ꦏꦴꦪꦱ꧀ꦱ ꦨꦺꦢꦴ ꦥꦫꦁ ꦩꦫꦟꦴ ꦱꦸꦒꦠꦶꦁ ꦱꦒ꧀ꦒꦁ ꦭꦺꦴꦏꦁ ꦈꦥꦥꦗ꧀ꦗꦠꦶ. ꦄꦪꦁ, ꦨꦶꦏ꧀ꦑꦮꦺ, ꦏꦺꦮꦭꦴ ꦥꦫꦶꦥꦹꦫꦴ ꦥꦟ꧀ꦝꦶꦠꦨꦹꦩꦷ’’ꦠꦶ.

ꦆꦢꦩꦮꦺꦴꦕ ꦨꦒꦮꦴ. ꦄꦠ꧀ꦠꦩꦤꦴ ꦠꦺ ꦨꦶꦏ꧀ꦑꦹ ꦨꦒꦮꦠꦺꦴ ꦨꦴꦱꦶꦠꦁ ꦄꦨꦶꦤꦤ꧀ꦢꦸꦤ꧀ꦠꦶ.

ꦧꦴꦭꦥꦟ꧀ꦝꦶꦠꦱꦸꦠ꧀ꦠꦁ ꦤꦶꦛ꧀ꦜꦶꦠꦁ ꦤꦮꦩꦁ.