꧒. ꦩꦲꦴꦱꦸꦚ꧀ꦚꦠꦱꦸꦠ꧀ꦠꦁ

꧑꧘꧕. ꦌꦮꦁ ꦩꦺ ꦱꦸꦠꦁ – ꦌꦏꦁ ꦱꦩꦪꦁ ꦨꦒꦮꦴ ꦱꦏ꧀ꦏꦺꦱꦸ ꦮꦶꦲꦫꦠꦶ ꦏꦥꦶꦭꦮꦠ꧀ꦡꦸꦱ꧀ꦩꦶꦁ ꦤꦶꦒ꧀ꦫꦺꦴꦣꦴꦫꦴꦩꦺ. ꦄꦡ ꦑꦺꦴ ꦨꦒꦮꦴ ꦥꦸꦧ꧀ꦧꦟ꧀ꦲꦱꦩꦪꦁ ꦤꦶꦮꦴꦱꦺꦠ꧀ꦮꦴ ꦥꦠ꧀ꦠꦕꦷꦮꦫꦩꦴꦢꦴꦪ ꦏꦥꦶꦭꦮꦠ꧀ꦡꦸꦁ ꦥꦶꦟ꧀ꦝꦴꦪ ꦥꦴꦮꦶꦱꦶ. ꦏꦥꦶꦭꦮꦠ꧀ꦡꦸꦱ꧀ꦩꦶꦁ ꦥꦶꦟ꧀ꦝꦴꦪ ꦕꦫꦶꦠ꧀ꦮꦴ ꦥꦕ꧀ꦖꦴꦨꦠ꧀ꦠꦁ ꦥꦶꦟ꧀ꦝꦥꦴꦠꦥꦛꦶꦏ꧀ꦏꦤ꧀ꦠꦺꦴ ꦪꦺꦤ ꦏꦴꦭ꦳ꦑꦺꦩꦏꦱ꧀ꦱ ꦱꦏ꧀ꦏꦱ꧀ꦱ ꦮꦶꦲꦴꦫꦺꦴ ꦠꦺꦤꦸꦥꦱꦔ꧀ꦏꦩꦶ ꦢꦶꦮꦴꦮꦶꦲꦴꦫꦴꦪ. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦏꦴꦭ꦳ꦑꦺꦩꦏꦱ꧀ꦱ ꦱꦏ꧀ꦏꦱ꧀ꦱ ꦮꦶꦲꦴꦫꦺ ꦱꦩ꧀ꦧꦲꦸꦭꦴꦤꦶ ꦱꦺꦤꦴꦱꦤꦴꦤꦶ ꦥꦚ꧀ꦚꦠ꧀ꦠꦴꦤꦶ ꦲꦺꦴꦤ꧀ꦠꦶ. ꦄꦢ꧀ꦢꦱꦴ ꦑꦺꦴ ꦨꦒꦮꦴ ꦏꦴꦭ꦳ꦑꦺꦩꦏꦱ꧀ꦱ ꦱꦏ꧀ꦏꦱ꧀ꦱ ꦮꦶꦲꦴꦫꦺ ꦱꦩ꧀ꦧꦲꦸꦭꦴꦤꦶ ꦱꦺꦤꦴꦱꦤꦴꦤꦶ ꦥꦚ꧀ꦚꦠ꧀ꦠꦴꦤꦶ. ꦢꦶꦱ꧀ꦮꦴꦤ ꦨꦒꦮꦠꦺꦴ ꦌꦠꦢꦲꦺꦴꦱꦶ – ‘‘ꦱꦩ꧀ꦧꦲꦸꦭꦴꦤꦶ ꦑꦺꦴ ꦏꦴꦭ꦳ꦑꦺꦩꦏꦱ꧀ꦱ ꦱꦏ꧀ꦏꦱ꧀ꦱ ꦮꦶꦲꦴꦫꦺ ꦱꦺꦤꦴꦱꦤꦴꦤꦶ ꦥꦚ꧀ꦚꦠ꧀ꦠꦴꦤꦶ. ꦱꦩ꧀ꦧꦲꦸꦭꦴ ꦤꦸ ꦑꦺꦴ ꦆꦣ ꦨꦶꦏ꧀ꦑꦹ ꦮꦶꦲꦫꦤ꧀ꦠꦷ’’ꦠꦶ.

꧑꧘꧖. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦄꦴꦪꦱ꧀ꦩꦴ ꦄꦴꦤꦤ꧀ꦢꦺꦴ ꦱꦩ꧀ꦧꦲꦸꦭꦺꦲꦶ ꦨꦶꦏ꧀ꦑꦹꦲꦶ ꦱꦢ꧀ꦣꦶꦁ ꦓꦛꦴꦪ ꦱꦏ꧀ꦏꦱ꧀ꦱ ꦮꦶꦲꦴꦫꦺ ꦕꦷꦮꦫꦏꦩ꧀ꦩꦁ ꦏꦫꦺꦴꦠꦶ. ꦄꦡ ꦑꦺꦴ ꦨꦒꦮꦴ ꦱꦴꦪꦤ꧀ꦲꦱꦩꦪꦁ ꦥꦛꦶꦱꦭ꧀ꦭꦴꦤꦴ ꦮꦸꦛ꧀ꦜꦶꦠꦺꦴ ꦪꦺꦤ ꦓꦛꦴꦪ ꦱꦏ꧀ꦏꦱ꧀ꦱ ꦮꦶꦲꦴꦫꦺꦴ ꦠꦺꦤꦸꦥꦱꦔ꧀ꦏꦩꦶ; ꦈꦥꦱꦔ꧀ꦏꦩꦶꦠ꧀ꦮꦴ ꦥꦚ꧀ꦚꦠ꧀ꦠꦺ ꦄꦴꦱꦤꦺ ꦤꦶꦱꦷꦢꦶ. ꦤꦶꦱꦗ꧀ꦗ ꦑꦺꦴ ꦨꦒꦮꦴ ꦄꦴꦪꦱ꧀ꦩꦤ꧀ꦠꦁ ꦄꦴꦤꦤ꧀ꦢꦁ ꦄꦴꦩꦤ꧀ꦠꦺꦱꦶ – ‘‘ꦱꦩ꧀ꦧꦲꦸꦭꦴꦤꦶ ꦑꦺꦴ, ꦄꦴꦤꦤ꧀ꦢ, ꦏꦴꦭ꦳ꦑꦺꦩꦏꦱ꧀ꦱ ꦱꦏ꧀ꦏꦱ꧀ꦱ ꦮꦶꦲꦴꦫꦺ ꦱꦺꦤꦴꦱꦤꦴꦤꦶ ꦥꦚ꧀ꦚꦠ꧀ꦠꦴꦤꦶ. ꦱꦩ꧀ꦧꦲꦸꦭꦴ ꦤꦸ ꦑꦺꦴ ꦌꦠ꧀ꦡ ꦨꦶꦏ꧀ꦑꦹ ꦮꦶꦲꦫꦤ꧀ꦠꦷ’’ꦠꦶ? ‘‘ꦱꦩ꧀ꦧꦲꦸꦭꦴꦤꦶ, ꦨꦤ꧀ꦠꦺ, ꦏꦴꦭ꦳ꦑꦺꦩꦏꦱ꧀ꦱ ꦱꦏ꧀ꦏꦱ꧀ꦱ ꦮꦶꦲꦴꦫꦺ ꦱꦺꦤꦴꦱꦤꦴꦤꦶ ꦥꦚ꧀ꦚꦠ꧀ꦠꦴꦤꦶ. ꦱꦩ꧀ꦧꦲꦸꦭꦴ ꦨꦶꦏ꧀ꦑꦹ ꦌꦠ꧀ꦡ ꦮꦶꦲꦫꦤ꧀ꦠꦶ. ꦕꦷꦮꦫꦏꦴꦫꦱꦩꦪꦺꦴ ꦤꦺꦴ, ꦨꦤ꧀ꦠꦺ, ꦮꦠ꧀ꦠꦠꦷ’’ꦠꦶ.

‘‘ꦤ ꦑꦺꦴ, ꦄꦴꦤꦤ꧀ꦢ, ꦨꦶꦏ꧀ꦑꦸ ꦱꦺꦴꦨꦠꦶ ꦱꦔ꧀ꦒꦟꦶꦏꦴꦫꦴꦩꦺꦴ ꦱꦔ꧀ꦒꦟꦶꦏꦫꦠꦺꦴ ꦱꦔ꧀ꦒꦟꦶꦏꦴꦫꦴꦩꦠꦁ ꦄꦤꦸꦪꦸꦠ꧀ꦠꦺꦴ ꦒꦟꦴꦫꦴꦩꦺꦴ ꦒꦟꦫꦠꦺꦴ ꦒꦟꦱꦩ꧀ꦩꦸꦢꦶꦠꦺꦴ. ꦱꦺꦴ ꦮꦠꦴꦤꦤ꧀ꦢ, ꦨꦶꦏ꧀ꦑꦸ ꦱꦔ꧀ꦒꦟꦶꦏꦴꦫꦴꦩꦺꦴ ꦱꦔ꧀ꦒꦟꦶꦏꦫꦠꦺꦴ ꦱꦔ꧀ꦒꦟꦶꦏꦴꦫꦴꦩꦠꦁ ꦄꦤꦸꦪꦸꦠ꧀ꦠꦺꦴ ꦒꦟꦴꦫꦴꦩꦺꦴ ꦒꦟꦫꦠꦺꦴ ꦒꦟꦱꦩ꧀ꦩꦸꦢꦶꦠꦺꦴ ꦪꦁ ꦠꦁ ꦤꦺꦏ꧀ꦑꦩ꧀ꦩꦱꦸꦑꦁ ꦥꦮꦶꦮꦺꦏꦱꦸꦑꦁ ꦈꦥꦱꦩꦱꦸꦑꦁ ꦱꦩ꧀ꦧꦺꦴꦣꦶꦱꦸꦑꦁ [ꦱꦩ꧀ꦧꦺꦴꦣꦱꦸꦑꦁ (ꦱꦷ. ꦥꦷ.), ꦱꦩ꧀ꦧꦺꦴꦣꦱꦸꦑꦁ ꦕꦶꦠ꧀ꦠꦺꦏꦒ꧀ꦒꦠꦴꦱꦸꦑꦁ (ꦏ.) ꦈꦥꦫꦶ ꦄꦫꦟꦮꦶꦨꦔ꧀ꦒꦱꦸꦠ꧀ꦠꦺ ꦥꦤ ꦱꦩ꧀ꦧꦺꦴꦣꦶꦱꦸꦑꦤ꧀ꦠ꧀ꦮꦺꦮ ꦢꦶꦱ꧀ꦱꦠꦶ] ꦠꦱ꧀ꦱ ꦱꦸꦑꦱ꧀ꦱ ꦤꦶꦏꦴꦩꦭꦴꦨꦷ ꦨꦮꦶꦱ꧀ꦱꦠꦶ ꦄꦏꦶꦕ꧀ꦖꦭꦴꦨꦷ ꦄꦏꦱꦶꦫꦭꦴꦨꦷꦠꦶ – ꦤꦺꦠꦁ ꦜꦴꦤꦁ ꦮꦶꦗ꧀ꦗꦠꦶ. ꦪꦺꦴ ꦕ ꦑꦺꦴ ꦱꦺꦴ, ꦄꦴꦤꦤ꧀ꦢ, ꦨꦶꦏ꧀ꦑꦸ ꦌꦏꦺꦴ ꦒꦟꦱ꧀ꦩꦴ ꦮꦹꦥꦏꦛ꧀ꦜꦺꦴ ꦮꦶꦲꦫꦠꦶ ꦠꦱ꧀ꦱꦺꦠꦁ ꦨꦶꦏ꧀ꦑꦸꦤꦺꦴ ꦥꦴꦛꦶꦏꦔ꧀ꦑꦁ ꦪꦁ ꦠꦁ ꦤꦺꦏ꧀ꦑꦩ꧀ꦩꦱꦸꦑꦁ ꦥꦮꦶꦮꦺꦏꦱꦸꦑꦁ ꦈꦥꦱꦩꦱꦸꦑꦁ ꦱꦩ꧀ꦧꦺꦴꦣꦶꦱꦸꦑꦁ ꦠꦱ꧀ꦱ ꦱꦸꦑꦱ꧀ꦱ ꦤꦶꦏꦴꦩꦭꦴꦨꦷ ꦨꦮꦶꦱ꧀ꦱꦠꦶ ꦄꦏꦶꦕ꧀ꦖꦭꦴꦨꦷ ꦄꦏꦱꦶꦫꦭꦴꦨꦷꦠꦶ – ꦜꦴꦤꦩꦺꦠꦁ ꦮꦶꦗ꧀ꦗꦠꦶ.

‘‘ꦱꦺꦴ ꦮꦠꦴꦤꦤ꧀ꦢ, ꦨꦶꦏ꧀ꦑꦸ ꦱꦔ꧀ꦒꦟꦶꦏꦴꦫꦴꦩꦺꦴ ꦱꦔ꧀ꦒꦟꦶꦏꦫꦠꦺꦴ ꦱꦔ꧀ꦒꦟꦶꦏꦴꦫꦴꦩꦠꦁ ꦄꦤꦸꦪꦸꦠ꧀ꦠꦺꦴ ꦒꦟꦴꦫꦴꦩꦺꦴ ꦒꦟꦫꦠꦺꦴ ꦒꦟꦱꦩ꧀ꦩꦸꦢꦶꦠꦺꦴ ꦱꦴꦩꦴꦪꦶꦏꦁ ꦮꦴ ꦏꦤ꧀ꦠꦁ ꦕꦺꦠꦺꦴꦮꦶꦩꦸꦠ꧀ꦠꦶꦁ ꦈꦥꦱꦩ꧀ꦥꦗ꧀ꦗ ꦮꦶꦲꦫꦶꦱ꧀ꦱꦠꦶ ꦄꦱꦴꦩꦴꦪꦶꦏꦁ ꦮꦴ ꦄꦏꦸꦥ꧀ꦥꦤ꧀ꦠꦶ – ꦤꦺꦠꦁ ꦜꦴꦤꦁ ꦮꦶꦗ꧀ꦗꦠꦶ. ꦪꦺꦴ ꦕ ꦑꦺꦴ ꦱꦺꦴ, ꦄꦴꦤꦤ꧀ꦢ, ꦨꦶꦏ꧀ꦑꦸ ꦌꦏꦺꦴ ꦒꦟꦱ꧀ꦩꦴ ꦮꦹꦥꦏꦛ꧀ꦜꦺꦴ ꦮꦶꦲꦫꦠꦶ ꦠꦱ꧀ꦱꦺꦠꦁ ꦨꦶꦏ꧀ꦑꦸꦤꦺꦴ ꦥꦴꦛꦶꦏꦔ꧀ꦑꦁ ꦱꦴꦩꦴꦪꦶꦏꦁ ꦮꦴ ꦏꦤ꧀ꦠꦁ ꦕꦺꦠꦺꦴꦮꦶꦩꦸꦠ꧀ꦠꦶꦁ ꦈꦥꦱꦩ꧀ꦥꦗ꧀ꦗ ꦮꦶꦲꦫꦶꦱ꧀ꦱꦠꦶ ꦄꦱꦴꦩꦴꦪꦶꦏꦁ ꦮꦴ ꦄꦏꦸꦥ꧀ꦥꦤ꧀ꦠꦶ – ꦜꦴꦤꦩꦺꦠꦁ ꦮꦶꦗ꧀ꦗꦠꦶ.

‘‘ꦤꦴꦲꦁ, ꦄꦴꦤꦤ꧀ꦢ, ꦌꦏꦁ ꦫꦹꦥꦩ꧀ꦥꦶ [ꦌꦏꦫꦹꦥꦩ꧀ꦥꦶ (ꦱꦷ.)] ꦱꦩꦤꦸꦥꦱ꧀ꦱꦴꦩꦶ ꦪꦠ꧀ꦡ ꦫꦠ꧀ꦠꦱ꧀ꦱ ꦪꦡꦴꦨꦶꦫꦠꦱ꧀ꦱ ꦫꦹꦥꦱ꧀ꦱ ꦮꦶꦥꦫꦶꦟꦴꦩꦚ꧀ꦚꦡꦴꦨꦴꦮꦴ ꦤ ꦈꦥ꧀ꦥꦗ꧀ꦗꦺꦪ꧀ꦪꦸꦁ ꦱꦺꦴꦏꦥꦫꦶꦢꦺꦮꦢꦸꦏ꧀ꦑꦢꦺꦴꦩꦤꦱ꧀ꦱꦹꦥꦴꦪꦴꦱꦴ.

꧑꧘꧗. ‘‘ꦄꦪꦁ ꦑꦺꦴ ꦥꦤꦴꦤꦤ꧀ꦢ, ꦮꦶꦲꦴꦫꦺꦴ ꦠꦡꦴꦒꦠꦺꦤ ꦄꦨꦶꦱꦩ꧀ꦧꦸꦢ꧀ꦣꦺꦴ ꦪꦢꦶꦢꦁ – ꦱꦧ꧀ꦧꦤꦶꦩꦶꦠ꧀ꦠꦴꦤꦁ ꦄꦩꦤꦱꦶꦏꦴꦫꦴ ꦄꦗ꧀ꦙꦠ꧀ꦠꦁ ꦱꦸꦚ꧀ꦚꦠꦁ ꦈꦥꦱꦩ꧀ꦥꦗ꧀ꦗ ꦮꦶꦲꦫꦶꦠꦸꦁ [ꦮꦶꦲꦫꦠꦁ (ꦏ. ꦱꦷ.), ꦮꦶꦲꦫꦠꦶ (ꦱ꧀ꦪꦴ. ꦏꦁ. ꦏ.)]. ꦠꦠ꧀ꦫ ꦕꦺ, ꦄꦴꦤꦤ꧀ꦢ, ꦠꦡꦴꦒꦠꦁ ꦆꦩꦶꦤꦴ ꦮꦶꦲꦴꦫꦺꦤ ꦮꦶꦲꦫꦤ꧀ꦠꦁ ꦨꦮꦤ꧀ꦠꦶ [ꦨꦒꦮꦤ꧀ꦠꦁ (ꦱꦷ. ꦱ꧀ꦪꦴ. ꦏꦁ. ꦏ.)] ꦈꦥꦱꦔ꧀ꦏꦩꦶꦠꦴꦫꦺꦴ ꦨꦶꦏ꧀ꦑꦹ ꦨꦶꦏ꧀ꦑꦸꦤꦶꦪꦺꦴ ꦈꦥꦴꦱꦏꦴ ꦈꦥꦴꦱꦶꦏꦴꦪꦺꦴ ꦫꦴꦗꦴꦤꦺꦴ ꦫꦴꦗꦩꦲꦴꦩꦠ꧀ꦠꦴ ꦠꦶꦠ꧀ꦡꦶꦪꦴ ꦠꦶꦠ꧀ꦡꦶꦪꦱꦴꦮꦏꦴ. ꦠꦠ꧀ꦫꦴꦤꦤ꧀ꦢ, ꦠꦡꦴꦒꦠꦺꦴ ꦮꦶꦮꦺꦏꦤꦶꦤ꧀ꦤꦺꦤꦺꦮ ꦕꦶꦠ꧀ꦠꦺꦤ ꦮꦶꦮꦺꦏꦥꦺꦴꦟꦺꦤ ꦮꦶꦮꦺꦏꦥꦧ꧀ꦨꦴꦫꦺꦤ ꦮꦹꦥꦏꦛ꧀ꦜꦺꦤ ꦤꦺꦏ꧀ꦑꦩ꧀ꦩꦴꦨꦶꦫꦠꦺꦤ ꦧ꧀ꦪꦤ꧀ꦠꦷꦨꦹꦠꦺꦤ ꦱꦧ꧀ꦧꦱꦺꦴ ꦄꦴꦱꦮꦛ꧀ꦜꦴꦤꦷꦪꦺꦲꦶ ꦣꦩ꧀ꦩꦺꦲꦶ ꦄꦚ꧀ꦚꦢꦠ꧀ꦡꦸ ꦈꦪ꧀ꦪꦺꦴꦗꦤꦶꦏꦥꦛꦶꦱꦁꦪꦸꦠ꧀ꦠꦁꦪꦺꦮ ꦏꦡꦁ ꦏꦠ꧀ꦠꦴ ꦲꦺꦴꦠꦶ. ꦠꦱ꧀ꦩꦴꦠꦶꦲꦴꦤꦤ꧀ꦢ, ꦨꦶꦏ꧀ꦑꦸ ꦕꦺꦥꦶ ꦄꦴꦏꦔ꧀ꦑꦺꦪ꧀ꦪ – ‘ꦄꦗ꧀ꦙꦠ꧀ꦠꦁ ꦱꦸꦚ꧀ꦚꦠꦁ ꦈꦥꦱꦩ꧀ꦥꦗ꧀ꦗ ꦮꦶꦲꦫꦺꦪ꧀ꦪ’ꦤ꧀ꦠꦶ, ꦠꦺꦤꦴꦤꦤ꧀ꦢ, ꦨꦶꦏ꧀ꦑꦸꦤꦴ ꦄꦗ꧀ꦙꦠ꧀ꦠꦩꦺꦮ ꦕꦶꦠ꧀ꦠꦁ ꦱꦟ꧀ꦜꦥꦺꦠꦧ꧀ꦧꦁ ꦱꦤ꧀ꦤꦶꦱꦴꦢꦺꦠꦧ꧀ꦧꦁ ꦌꦏꦺꦴꦢꦶ ꦏꦴꦠꦧ꧀ꦧꦁ ꦱꦩꦴꦢꦲꦴꦠꦧ꧀ꦧꦁ.

꧑꧘꧘. ‘‘ꦏꦡꦚ꧀ꦕꦴꦤꦤ꧀ꦢ, ꦨꦶꦏ꧀ꦑꦸ ꦄꦗ꧀ꦙꦠ꧀ꦠꦩꦺꦮ ꦕꦶꦠ꧀ꦠꦁ ꦱꦟ꧀ꦜꦥꦺꦠꦶ ꦱꦤ꧀ꦤꦶꦱꦴꦢꦺꦠꦶ ꦌꦏꦺꦴꦢꦶꦁ ꦏꦫꦺꦴꦠꦶ [ꦌꦏꦺꦴꦢꦶꦏꦫꦺꦴꦠꦶ (ꦱꦷ. ꦱ꧀ꦪꦴ. ꦏꦁ. ꦥꦷ.)] ꦱꦩꦴꦢꦲꦠꦶ? ꦆꦣꦴꦤꦤ꧀ꦢ, ꦨꦶꦏ꧀ꦑꦸ ꦮꦶꦮꦶꦕ꧀ꦕꦺꦮ ꦏꦴꦩꦺꦲꦶ ꦮꦶꦮꦶꦕ꧀ꦕ ꦄꦏꦸꦱꦭꦺꦲꦶ ꦣꦩ꧀ꦩꦺꦲꦶ…ꦥꦺ… ꦥꦜꦩꦁ ꦙꦴꦤꦁ ꦈꦥꦱꦩ꧀ꦥꦗ꧀ꦗ ꦮꦶꦲꦫꦠꦶ…ꦥꦺ… ꦢꦸꦠꦶꦪꦁ ꦙꦴꦤꦁ… ꦠꦠꦶꦪꦁ ꦙꦴꦤꦁ… ꦕꦠꦸꦠ꧀ꦡꦁ ꦙꦴꦤꦁ ꦈꦥꦱꦩ꧀ꦥꦗ꧀ꦗ ꦮꦶꦲꦫꦠꦶ. ꦌꦮꦁ ꦑꦺꦴ, ꦄꦴꦤꦤ꧀ꦢ, ꦨꦶꦏ꧀ꦑꦸ ꦄꦗ꧀ꦙꦠ꧀ꦠꦩꦺꦮ ꦕꦶꦠ꧀ꦠꦁ ꦱꦟ꧀ꦜꦥꦺꦠꦶ ꦱꦤ꧀ꦤꦶꦱꦴꦢꦺꦠꦶ ꦌꦏꦺꦴꦢꦶꦁ ꦏꦫꦺꦴꦠꦶ ꦱꦩꦴꦢꦲꦠꦶ. ꦱꦺꦴ ꦄꦗ꧀ꦙꦠ꧀ꦠꦁ ꦱꦸꦚ꧀ꦚꦠꦁ ꦩꦤꦱꦶ ꦏꦫꦺꦴꦠꦶ. ꦠꦱ꧀ꦱ ꦄꦗ꧀ꦙꦠ꧀ꦠꦁ ꦱꦸꦚ꧀ꦚꦠꦁ ꦩꦤꦱꦶꦏꦫꦺꦴꦠꦺꦴ ꦱꦸꦚ꧀ꦚꦠꦴꦪ ꦕꦶꦠ꧀ꦠꦁ ꦤ ꦥꦏ꧀ꦑꦤ꧀ꦢꦠꦶ ꦤꦥ꧀ꦥꦱꦷꦢꦠꦶ ꦤ ꦱꦤ꧀ꦠꦶꦛ꧀ꦜꦠꦶ ꦤ ꦮꦶꦩꦸꦕ꧀ꦕꦠꦶ. ꦌꦮꦁ ꦱꦤ꧀ꦠꦩꦺꦠꦁ, ꦄꦴꦤꦤ꧀ꦢ, ꦨꦶꦏ꧀ꦑꦸ ꦌꦮꦁ ꦥꦗꦴꦤꦴꦠꦶ – ‘ꦄꦗ꧀ꦙꦠ꧀ꦠꦁ ꦱꦸꦚ꧀ꦚꦠꦁ ꦑꦺꦴ ꦩꦺ ꦩꦤꦱꦶꦏꦫꦺꦴꦠꦺꦴ ꦄꦗ꧀ꦙꦠ꧀ꦠꦁ ꦱꦸꦚ꧀ꦚꦠꦴꦪ ꦕꦶꦠ꧀ꦠꦁ ꦤ ꦥꦏ꧀ꦑꦤ꧀ꦢꦠꦶ ꦤꦥ꧀ꦥꦱꦷꦢꦠꦶ ꦤ ꦱꦤ꧀ꦠꦶꦛ꧀ꦜꦠꦶ ꦤ ꦮꦶꦩꦸꦕ꧀ꦕꦠꦷ’ꦠꦶ. ꦆꦠꦶꦲ ꦠꦠ꧀ꦡ ꦱꦩ꧀ꦥꦗꦴꦤꦺꦴ ꦲꦺꦴꦠꦶ. ꦱꦺꦴ ꦧꦲꦶꦢ꧀ꦣꦴ ꦱꦸꦚ꧀ꦚꦠꦁ ꦩꦤꦱꦶ ꦏꦫꦺꦴꦠꦶ…ꦥꦺ… ꦱꦺꦴ ꦄꦗ꧀ꦙꦠ꧀ꦠꦧꦲꦶꦢ꧀ꦣꦴ ꦱꦸꦚ꧀ꦚꦠꦁ ꦩꦤꦱꦶ ꦏꦫꦺꦴꦠꦶ …ꦥꦺ… ꦱꦺꦴ ꦄꦴꦤꦺꦚ꧀ꦗꦁ ꦩꦤꦱꦶ ꦏꦫꦺꦴꦠꦶ. ꦠꦱ꧀ꦱ ꦄꦴꦤꦺꦚ꧀ꦗꦁ ꦩꦤꦱꦶꦏꦫꦺꦴꦠꦺꦴ ꦄꦴꦤꦺꦚ꧀ꦗꦴꦪ ꦕꦶꦠ꧀ꦠꦁ ꦤ ꦥꦏ꧀ꦑꦤ꧀ꦢꦠꦶ ꦤꦥ꧀ꦥꦱꦷꦢꦠꦶ ꦤ ꦱꦤ꧀ꦠꦶꦛ꧀ꦜꦠꦶ ꦤ ꦮꦶꦩꦸꦕ꧀ꦕꦠꦶ. ꦌꦮꦁ ꦱꦤ꧀ꦠꦩꦺꦠꦁ, ꦄꦴꦤꦤ꧀ꦢ, ꦨꦶꦏ꧀ꦑꦸ ꦌꦮꦁ ꦥꦗꦴꦤꦴꦠꦶ – ‘ꦄꦴꦤꦺꦚ꧀ꦗꦁ ꦑꦺꦴ ꦩꦺ ꦩꦤꦱꦶꦏꦫꦺꦴꦠꦺꦴ ꦄꦴꦤꦺꦚ꧀ꦗꦴꦪ ꦕꦶꦠ꧀ꦠꦁ ꦤ ꦥꦏ꧀ꦑꦤ꧀ꦢꦠꦶ ꦤꦥ꧀ꦥꦱꦷꦢꦠꦶ ꦤ ꦱꦤ꧀ꦠꦶꦛ꧀ꦜꦠꦶ ꦤ ꦮꦶꦩꦸꦕ꧀ꦕꦠꦷ’ꦠꦶ. ꦆꦠꦶꦲ ꦠꦠ꧀ꦡ ꦱꦩ꧀ꦥꦗꦴꦤꦺꦴ ꦲꦺꦴꦠꦶ.

‘‘ꦠꦺꦤꦴꦤꦤ꧀ꦢ, ꦨꦶꦏ꧀ꦑꦸꦤꦴ ꦠꦱ꧀ꦩꦶꦁꦪꦺꦮ ꦥꦸꦫꦶꦩꦱ꧀ꦩꦶꦁ ꦱꦩꦴꦣꦶꦤꦶꦩꦶꦠ꧀ꦠꦺ ꦄꦗ꧀ꦙꦠ꧀ꦠꦩꦺꦮ ꦕꦶꦠ꧀ꦠꦁ ꦱꦟ꧀ꦜꦥꦺꦠꦧ꧀ꦧꦁ ꦱꦤ꧀ꦤꦶꦱꦴꦢꦺꦠꦧ꧀ꦧꦁ ꦌꦏꦺꦴꦢꦶ ꦏꦴꦠꦧ꧀ꦧꦁ ꦱꦩꦴꦢꦲꦴꦠꦧ꧀ꦧꦁ. ꦱꦺꦴ ꦄꦗ꧀ꦙꦠ꧀ꦠꦁ ꦱꦸꦚ꧀ꦚꦠꦁ ꦩꦤꦱꦶ ꦏꦫꦺꦴꦠꦶ. ꦠꦱ꧀ꦱ ꦄꦗ꧀ꦙꦠ꧀ꦠꦁ ꦱꦸꦚ꧀ꦚꦠꦁ ꦩꦤꦱꦶꦏꦫꦺꦴꦠꦺꦴ ꦄꦗ꧀ꦙꦠ꧀ꦠꦁ ꦱꦸꦚ꧀ꦚꦠꦴꦪ ꦕꦶꦠ꧀ꦠꦁ ꦥꦏ꧀ꦑꦤ꧀ꦢꦠꦶ ꦥꦱꦷꦢꦠꦶ ꦱꦤ꧀ꦠꦶꦛ꧀ꦜꦠꦶ ꦮꦶꦩꦸꦕ꧀ꦕꦠꦶ. ꦌꦮꦁ ꦱꦤ꧀ꦠꦩꦺꦠꦁ, ꦄꦴꦤꦤ꧀ꦢ, ꦨꦶꦏ꧀ꦑꦸ ꦌꦮꦁ ꦥꦗꦴꦤꦴꦠꦶ – ‘ꦄꦗ꧀ꦙꦠ꧀ꦠꦁ ꦱꦸꦚ꧀ꦚꦠꦁ ꦑꦺꦴ ꦩꦺ ꦩꦤꦱꦶꦏꦫꦺꦴꦠꦺꦴ ꦄꦗ꧀ꦙꦠ꧀ꦠꦁ ꦱꦸꦚ꧀ꦚꦠꦴꦪ ꦕꦶꦠ꧀ꦠꦁ ꦥꦏ꧀ꦑꦤ꧀ꦢꦠꦶ ꦥꦱꦷꦢꦠꦶ ꦱꦤ꧀ꦠꦶꦛ꧀ꦜꦠꦶ ꦮꦶꦩꦸꦕ꧀ꦕꦠꦷ’ꦠꦶ. ꦆꦠꦶꦲ ꦠꦠ꧀ꦡ ꦱꦩ꧀ꦥꦗꦴꦤꦺꦴ ꦲꦺꦴꦠꦶ. ꦱꦺꦴ ꦧꦲꦶꦢ꧀ꦣꦴ ꦱꦸꦚ꧀ꦚꦠꦁ ꦩꦤꦱꦶ ꦏꦫꦺꦴꦠꦶ…ꦥꦺ… ꦱꦺꦴ ꦄꦗ꧀ꦙꦠ꧀ꦠꦧꦲꦶꦢ꧀ꦣꦴ ꦱꦸꦚ꧀ꦚꦠꦁ ꦩꦤꦱꦶ ꦏꦫꦺꦴꦠꦶ…ꦥꦺ… ꦱꦺꦴ ꦄꦴꦤꦺꦚ꧀ꦗꦁ ꦩꦤꦱꦶ ꦏꦫꦺꦴꦠꦶ. ꦠꦱ꧀ꦱ ꦄꦴꦤꦺꦚ꧀ꦗꦁ ꦩꦤꦱꦶꦏꦫꦺꦴꦠꦺꦴ ꦄꦴꦤꦺꦚ꧀ꦗꦴꦪ ꦕꦶꦠ꧀ꦠꦁ ꦥꦏ꧀ꦑꦤ꧀ꦢꦠꦶ ꦥꦱꦷꦢꦠꦶ ꦱꦤ꧀ꦠꦶꦛ꧀ꦜꦠꦶ ꦮꦶꦩꦸꦕ꧀ꦕꦠꦶ. ꦌꦮꦁ ꦱꦤ꧀ꦠꦩꦺꦠꦁ, ꦄꦴꦤꦤ꧀ꦢ, ꦨꦶꦏ꧀ꦑꦸ ꦌꦮꦁ ꦥꦗꦴꦤꦴꦠꦶ – ‘ꦄꦴꦤꦺꦚ꧀ꦗꦁ ꦑꦺꦴ ꦩꦺ ꦩꦤꦱꦶꦏꦫꦺꦴꦠꦺꦴ ꦄꦴꦤꦺꦚ꧀ꦗꦴꦪ ꦕꦶꦠ꧀ꦠꦁ ꦥꦏ꧀ꦑꦤ꧀ꦢꦠꦶ ꦥꦱꦷꦢꦠꦶ ꦱꦤ꧀ꦠꦶꦛ꧀ꦜꦠꦶ ꦮꦶꦩꦸꦕ꧀ꦕꦠꦷ’ꦠꦶ. ꦆꦠꦶꦲ ꦠꦠ꧀ꦡ ꦱꦩ꧀ꦥꦗꦴꦤꦺꦴ ꦲꦺꦴꦠꦶ.

꧑꧘꧙. ‘‘ꦠꦱ꧀ꦱ ꦕꦺ, ꦄꦴꦤꦤ꧀ꦢ, ꦨꦶꦏ꧀ꦑꦸꦤꦺꦴ ꦆꦩꦶꦤꦴ ꦮꦶꦲꦴꦫꦺꦤ ꦮꦶꦲꦫꦠꦺꦴ ꦕꦔ꧀ꦏꦩꦴꦪ ꦕꦶꦠ꧀ꦠꦁ ꦤꦩꦠꦶ, ꦱꦺꦴ ꦕꦔ꧀ꦏꦩꦠꦶ – ‘ꦌꦮꦁ ꦩꦁ ꦕꦔ꧀ꦏꦩꦤ꧀ꦠꦁ ꦤꦴꦨꦶꦗ꧀ꦙꦴꦢꦺꦴꦩꦤꦱ꧀ꦱꦴ ꦥꦴꦥꦏꦴ ꦄꦏꦸꦱꦭꦴ ꦣꦩ꧀ꦩꦴ ꦄꦤ꧀ꦮꦴꦱ꧀ꦱꦮꦶꦱ꧀ꦱꦤ꧀ꦠꦷ’ꦠꦶ. ꦆꦠꦶꦲ ꦠꦠ꧀ꦡ ꦱꦩ꧀ꦥꦗꦴꦤꦺꦴ ꦲꦺꦴꦠꦶ. ꦠꦱ꧀ꦱ ꦕꦺ, ꦄꦴꦤꦤ꧀ꦢ, ꦨꦶꦏ꧀ꦑꦸꦤꦺꦴ ꦆꦩꦶꦤꦴ ꦮꦶꦲꦴꦫꦺꦤ ꦮꦶꦲꦫꦠꦺꦴ ꦜꦴꦤꦴꦪ ꦕꦶꦠ꧀ꦠꦁ ꦤꦩꦠꦶ, ꦱꦺꦴ ꦠꦶꦛ꧀ꦜꦠꦶ – ‘ꦌꦮꦁ ꦩꦁ ꦜꦶꦠꦁ ꦤꦴꦨꦶꦗ꧀ꦙꦴꦢꦺꦴꦩꦤꦱ꧀ꦱꦴ ꦥꦴꦥꦏꦴ ꦄꦏꦸꦱꦭꦴ ꦣꦩ꧀ꦩꦴ ꦄꦤ꧀ꦮꦴꦱ꧀ꦱꦮꦶꦱ꧀ꦱꦤ꧀ꦠꦷ’ꦠꦶ. ꦆꦠꦶꦲ ꦠꦠ꧀ꦡ ꦱꦩ꧀ꦥꦗꦴꦤꦺꦴ ꦲꦺꦴꦠꦶ. ꦠꦱ꧀ꦱ ꦕꦺ, ꦄꦴꦤꦤ꧀ꦢ, ꦨꦶꦏ꧀ꦑꦸꦤꦺꦴ ꦆꦩꦶꦤꦴ ꦮꦶꦲꦴꦫꦺꦤ ꦮꦶꦲꦫꦠꦺꦴ ꦤꦶꦱꦗ꧀ꦗꦴꦪ ꦕꦶꦠ꧀ꦠꦁ ꦤꦩꦠꦶ, ꦱꦺꦴ ꦤꦶꦱꦷꦢꦠꦶ – ‘ꦌꦮꦁ ꦩꦁ ꦤꦶꦱꦶꦤ꧀ꦤꦁ ꦤꦴꦨꦶꦗ꧀ꦙꦴꦢꦺꦴꦩꦤꦱ꧀ꦱꦴ ꦥꦴꦥꦏꦴ ꦄꦏꦸꦱꦭꦴ ꦣꦩ꧀ꦩꦴ ꦄꦤ꧀ꦮꦴꦱ꧀ꦱꦮꦶꦱ꧀ꦱꦤ꧀ꦠꦷ’ꦠꦶ. ꦆꦠꦶꦲ ꦠꦠ꧀ꦡ ꦱꦩ꧀ꦥꦗꦴꦤꦺꦴ ꦲꦺꦴꦠꦶ. ꦠꦱ꧀ꦱ ꦕꦺ, ꦄꦴꦤꦤ꧀ꦢ, ꦨꦶꦏ꧀ꦑꦸꦤꦺꦴ ꦆꦩꦶꦤꦴ ꦮꦶꦲꦴꦫꦺꦤ ꦮꦶꦲꦫꦠꦺꦴ ꦱꦪꦤꦴꦪ ꦕꦶꦠ꧀ꦠꦁ ꦤꦩꦠꦶ, ꦱꦺꦴ ꦱꦪꦠꦶ – ‘ꦌꦮꦁ ꦩꦁ ꦱꦪꦤ꧀ꦠꦁ ꦤꦴꦨꦶꦗ꧀ꦙꦴꦢꦺꦴꦩꦤꦱ꧀ꦱꦴ ꦥꦴꦥꦏꦴ ꦄꦏꦸꦱꦭꦴ ꦣꦩ꧀ꦩꦴ ꦄꦤ꧀ꦮꦴꦱ꧀ꦱꦮꦶꦱ꧀ꦱꦤ꧀ꦠꦷ’ꦠꦶ. ꦆꦠꦶꦲ ꦠꦠ꧀ꦡ ꦱꦩ꧀ꦥꦗꦴꦤꦺꦴ ꦲꦺꦴꦠꦶ.

‘‘ꦠꦱ꧀ꦱ ꦕꦺ, ꦄꦴꦤꦤ꧀ꦢ, ꦨꦶꦏ꧀ꦑꦸꦤꦺꦴ ꦆꦩꦶꦤꦴ ꦮꦶꦲꦴꦫꦺꦤ ꦮꦶꦲꦫꦠꦺꦴ ꦏꦡꦴꦪ [ꦨꦱ꧀ꦱꦴꦪ (ꦱꦷ.), ꦨꦴꦱꦴꦪ (ꦱ꧀ꦪꦴ. ꦏꦁ. ꦥꦷ.)] ꦕꦶꦠ꧀ꦠꦁ ꦤꦩꦠꦶ, ꦱꦺꦴ – ‘ꦪꦴꦪꦁ ꦏꦡꦴ ꦲꦷꦤꦴ ꦒꦩ꧀ꦩꦴ ꦥꦺꦴꦡꦸꦗ꧀ꦗꦤꦶꦏꦴ ꦄꦤꦫꦶꦪꦴ ꦄꦤꦠ꧀ꦡꦱꦁꦲꦶꦠꦴ ꦤ ꦤꦶꦧ꧀ꦧꦶꦢꦴꦪ ꦤ ꦮꦶꦫꦴꦒꦴꦪ ꦤ ꦤꦶꦫꦺꦴꦣꦴꦪ ꦤ ꦈꦥꦱꦩꦴꦪ ꦤ ꦄꦨꦶꦚ꧀ꦚꦴꦪ ꦤ ꦱꦩ꧀ꦧꦺꦴꦣꦴꦪ ꦤ ꦤꦶꦧ꧀ꦧꦴꦤꦴꦪ ꦱꦁꦮꦠ꧀ꦠꦠꦶ, ꦱꦺꦪ꧀ꦪꦡꦶꦢꦁ – ꦫꦴꦗꦏꦡꦴ ꦕꦺꦴꦫꦏꦡꦴ ꦩꦲꦴꦩꦠ꧀ꦠꦏꦡꦴ ꦱꦺꦤꦴꦏꦡꦴ ꦨꦪꦏꦡꦴ ꦪꦸꦢ꧀ꦣꦏꦡꦴ ꦄꦤ꧀ꦤꦏꦡꦴ ꦥꦴꦤꦏꦡꦴ ꦮꦠ꧀ꦡꦏꦡꦴ ꦱꦪꦤꦏꦡꦴ ꦩꦴꦭꦴꦏꦡꦴ ꦒꦤ꧀ꦣꦏꦡꦴ ꦚꦴꦠꦶꦏꦡꦴ ꦪꦴꦤꦏꦡꦴ ꦒꦴꦩꦏꦡꦴ ꦤꦶꦒꦩꦏꦡꦴ ꦤꦒꦫꦏꦡꦴ ꦗꦤꦥꦢꦏꦡꦴ ꦆꦠ꧀ꦡꦶꦏꦡꦴ ꦱꦸꦫꦴꦏꦡꦴ ꦮꦶꦱꦶꦑꦴꦏꦡꦴ ꦏꦸꦩ꧀ꦨꦛ꧀ꦜꦴꦤꦏꦡꦴ ꦥꦸꦧ꧀ꦧꦥꦺꦠꦏꦡꦴ ꦤꦴꦤꦠ꧀ꦠꦏꦡꦴ ꦭꦺꦴꦏꦏ꧀ꦑꦴꦪꦶꦏꦴ ꦱꦩꦸꦢ꧀ꦢꦏ꧀ꦑꦴꦪꦶꦏꦴ ꦆꦠꦶꦨꦮꦴꦨꦮꦏꦡꦴ ꦆꦠꦶ ꦮꦴ ꦆꦠꦶ – ꦌꦮꦫꦹꦥꦶꦁ ꦏꦡꦁ ꦤ ꦏꦡꦺꦱ꧀ꦱꦴꦩꦷ’ꦠꦶ. ꦆꦠꦶꦲ ꦠꦠ꧀ꦡ ꦱꦩ꧀ꦥꦗꦴꦤꦺꦴ ꦲꦺꦴꦠꦶ. ꦪꦴ ꦕ ꦑꦺꦴ ꦄꦪꦁ, ꦄꦴꦤꦤ꧀ꦢ, ꦏꦡꦴ ꦄꦨꦶꦱꦭ꧀ꦭꦺꦑꦶꦏꦴ ꦕꦺꦠꦺꦴꦮꦶꦤꦷꦮꦫꦟꦱꦥ꧀ꦥꦴꦪꦴ [ꦕꦺꦠꦺꦴꦮꦶꦕꦴꦫꦟꦱꦥ꧀ꦥꦴꦪꦴ (ꦱꦷ. ꦱ꧀ꦪꦴ. ꦏꦁ.), ꦕꦺꦠꦺꦴꦮꦶꦮꦫꦟꦱꦥ꧀ꦥꦴꦪꦴ (ꦥꦷ.)] ꦌꦏꦤ꧀ꦠꦤꦶꦧ꧀ꦧꦶꦢꦴꦪ ꦮꦶꦫꦴꦒꦴꦪ ꦤꦶꦫꦺꦴꦣꦴꦪ ꦈꦥꦱꦩꦴꦪ ꦄꦨꦶꦚ꧀ꦚꦴꦪ ꦱꦩ꧀ꦧꦺꦴꦣꦴꦪ ꦤꦶꦧ꧀ꦧꦴꦤꦴꦪ ꦱꦁꦮꦠ꧀ꦠꦠꦶ, ꦱꦺꦪ꧀ꦪꦡꦶꦢꦁ – ꦄꦥ꧀ꦥꦶꦕ꧀ꦖꦏꦡꦴ ꦱꦤ꧀ꦠꦸꦛ꧀ꦜꦶꦏꦡꦴ ꦥꦮꦶꦮꦺꦏꦏꦡꦴ ꦄꦱꦁꦱꦒ꧀ꦒꦏꦡꦴ ꦮꦷꦫꦶꦪꦴꦫꦩ꧀ꦨꦏꦡꦴ ꦱꦷꦭꦏꦡꦴ ꦱꦩꦴꦣꦶꦏꦡꦴ ꦥꦚ꧀ꦚꦴꦏꦡꦴ ꦮꦶꦩꦸꦠ꧀ꦠꦶꦏꦡꦴ ꦮꦶꦩꦸꦠ꧀ꦠꦶꦚꦴꦟꦢꦱ꧀ꦱꦤꦏꦡꦴ ꦆꦠꦶ – ‘ꦌꦮꦫꦹꦥꦶꦁ ꦏꦡꦁ ꦏꦡꦺꦱ꧀ꦱꦴꦩꦷ’ꦠꦶ. ꦆꦠꦶꦲ ꦠꦠ꧀ꦡ ꦱꦩ꧀ꦥꦗꦴꦤꦺꦴ ꦲꦺꦴꦠꦶ.

‘‘ꦠꦱ꧀ꦱ ꦕꦺ, ꦄꦴꦤꦤ꧀ꦢ, ꦨꦶꦏ꧀ꦑꦸꦤꦺꦴ ꦆꦩꦶꦤꦴ ꦮꦶꦲꦴꦫꦺꦤ ꦮꦶꦲꦫꦠꦺꦴ ꦮꦶꦠꦏ꧀ꦏꦴꦪ ꦕꦶꦠ꧀ꦠꦁ ꦤꦩꦠꦶ, ꦱꦺꦴ – ‘ꦪꦺ ꦠꦺ ꦮꦶꦠꦏ꧀ꦏꦴ ꦲꦷꦤꦴ ꦒꦩ꧀ꦩꦴ ꦥꦺꦴꦡꦸꦗ꧀ꦗꦤꦶꦏꦴ ꦄꦤꦫꦶꦪꦴ ꦄꦤꦠ꧀ꦡꦱꦁꦲꦶꦠꦴ ꦤ ꦤꦶꦧ꧀ꦧꦶꦢꦴꦪ ꦤ ꦮꦶꦫꦴꦒꦴꦪ ꦤ ꦤꦶꦫꦺꦴꦣꦴꦪ ꦤ ꦈꦥꦱꦩꦴꦪ ꦤ ꦄꦨꦶꦚ꧀ꦚꦴꦪ ꦤ ꦱꦩ꧀ꦧꦺꦴꦣꦴꦪ ꦤ ꦤꦶꦧ꧀ꦧꦴꦤꦴꦪ ꦱꦁꦮꦠ꧀ꦠꦤ꧀ꦠꦶ, ꦱꦺꦪ꧀ꦪꦡꦶꦢꦁ – ꦏꦴꦩꦮꦶꦠꦏ꧀ꦏꦺꦴ ꦧ꧀ꦪꦴꦥꦴꦢꦮꦶꦠꦏ꧀ꦏꦺꦴ ꦮꦶꦲꦶꦁꦱꦴꦮꦶꦠꦏ꧀ꦏꦺꦴ ꦆꦠꦶ ꦌꦮꦫꦹꦥꦺ ꦮꦶꦠꦏ꧀ꦏꦺ [ꦌꦮꦫꦹꦥꦺꦤ ꦮꦶꦠꦏ꧀ꦏꦺꦤ (ꦱꦷ. ꦱ꧀ꦪꦴ. ꦏꦁ. ꦏ.)] ꦤ ꦮꦶꦠꦏ꧀ꦏꦺꦱ꧀ꦱꦴꦩꦷ’ꦠꦶ. ꦆꦠꦶꦲ ꦠꦠ꧀ꦡ ꦱꦩ꧀ꦥꦗꦴꦤꦺꦴ ꦲꦺꦴꦠꦶ. ꦪꦺ ꦕ ꦑꦺꦴ ꦆꦩꦺ, ꦄꦴꦤꦤ꧀ꦢ, ꦮꦶꦠꦏ꧀ꦏꦴ ꦄꦫꦶꦪꦴ ꦤꦶꦪ꧀ꦪꦴꦤꦶꦏꦴ ꦤꦶꦪ꧀ꦪꦤ꧀ꦠꦶ ꦠꦏ꧀ꦏꦫꦱ꧀ꦱ ꦱꦩ꧀ꦩꦴꦢꦸꦏ꧀ꦑꦏ꧀ꦑꦪꦴꦪ, ꦱꦺꦪ꧀ꦪꦡꦶꦢꦁ – ꦤꦺꦏ꧀ꦑꦩ꧀ꦩꦮꦶꦠꦏ꧀ꦏꦺꦴ ꦄꦧ꧀ꦪꦴꦥꦴꦢꦮꦶꦠꦏ꧀ꦏꦺꦴ ꦄꦮꦶꦲꦶꦁꦱꦴꦮꦶꦠꦏ꧀ꦏꦺꦴ ꦆꦠꦶ – ‘ꦌꦮꦫꦹꦥꦺ ꦮꦶꦠꦏ꧀ꦏꦺ [ꦌꦮꦫꦹꦥꦺꦤ ꦮꦶꦠꦏ꧀ꦏꦺꦤ (ꦏ.)] ꦮꦶꦠꦏ꧀ꦏꦺꦱ꧀ꦱꦴꦩꦷ’ꦠꦶ. ꦆꦠꦶꦲ ꦠꦠ꧀ꦡ ꦱꦩ꧀ꦥꦗꦴꦤꦺꦴ ꦲꦺꦴꦠꦶ.

꧑꧙꧐. ‘‘ꦥꦚ꧀ꦕ ꦑꦺꦴ ꦆꦩꦺ, ꦄꦴꦤꦤ꧀ꦢ, ꦏꦴꦩꦒꦸꦟꦴ. ꦏꦠꦩꦺ ꦥꦚ꧀ꦕ? ꦕꦏ꧀ꦑꦸꦮꦶꦚ꧀ꦚꦺꦪ꧀ꦪꦴ ꦫꦹꦥꦴ ꦆꦛ꧀ꦜꦴ ꦏꦤ꧀ꦠꦴ ꦩꦤꦴꦥꦴ ꦥꦶꦪꦫꦹꦥꦴ ꦏꦴꦩꦹꦥꦱꦁꦲꦶꦠꦴ ꦫꦗꦤꦷꦪꦴ, ꦱꦺꦴꦠꦮꦶꦚ꧀ꦚꦺꦪ꧀ꦪꦴ ꦱꦢ꧀ꦢꦴ… ꦓꦴꦤꦮꦶꦚ꧀ꦚꦺꦪ꧀ꦪꦴ ꦒꦤ꧀ꦣꦴ… ꦗꦶꦮ꧀ꦲꦴꦮꦶꦚ꧀ꦚꦺꦪ꧀ꦪꦴ ꦫꦱꦴ… ꦏꦴꦪꦮꦶꦚ꧀ꦚꦺꦪ꧀ꦪꦴ ꦦꦺꦴꦛ꧀ꦜꦧ꧀ꦧꦴ ꦆꦛ꧀ꦜꦴ ꦏꦤ꧀ꦠꦴ ꦩꦤꦴꦥꦴ ꦥꦶꦪꦫꦹꦥꦴ ꦏꦴꦩꦹꦥꦱꦁꦲꦶꦠꦴ ꦫꦗꦤꦷꦪꦴ – ꦆꦩꦺ ꦑꦺꦴ, ꦄꦴꦤꦤ꧀ꦢ, ꦥꦚ꧀ꦕ ꦏꦴꦩꦒꦸꦟꦴ ꦪꦠ꧀ꦡ ꦨꦶꦏ꧀ꦑꦸꦤꦴ ꦄꦨꦶꦏ꧀ꦑꦟꦁ ꦱꦏꦁ ꦕꦶꦠ꧀ꦠꦁ ꦥꦕ꧀ꦕꦮꦺꦏ꧀ꦑꦶꦠꦧ꧀ꦧꦁ – ‘ꦄꦠ꧀ꦡꦶ ꦤꦸ ꦑꦺꦴ ꦩꦺ ꦆꦩꦺꦱꦸ ꦥꦚ꧀ꦕꦱꦸ ꦏꦴꦩꦒꦸꦟꦺꦱꦸ ꦄꦚ꧀ꦚꦠꦫꦱ꧀ꦩꦶꦁ ꦮꦴ ꦄꦚ꧀ꦚꦠꦫꦱ꧀ꦩꦶꦁ ꦮꦴ ꦄꦴꦪꦠꦤꦺ ꦈꦥ꧀ꦥꦗ꧀ꦗꦠꦶ ꦕꦺꦠꦱꦺꦴ ꦱꦩꦸꦢꦴꦕꦴꦫꦺꦴ’ꦠꦶ? ꦱꦕꦺ, ꦄꦴꦤꦤ꧀ꦢ, ꦨꦶꦏ꧀ꦑꦸ ꦥꦕ꧀ꦕꦮꦺꦏ꧀ꦑꦩꦴꦤꦺꦴ ꦌꦮꦁ ꦥꦗꦴꦤꦴꦠꦶ – ‘ꦄꦠ꧀ꦡꦶ ꦑꦺꦴ ꦩꦺ ꦆꦩꦺꦱꦸ ꦥꦚ꧀ꦕꦱꦸ ꦏꦴꦩꦒꦸꦟꦺꦱꦸ ꦄꦚ꧀ꦚꦠꦫꦱ꧀ꦩꦶꦁ ꦮꦴ ꦄꦚ꧀ꦚꦠꦫꦱ꧀ꦩꦶꦁ ꦮꦴ ꦄꦴꦪꦠꦤꦺ ꦈꦥ꧀ꦥꦗ꧀ꦗꦠꦶ ꦕꦺꦠꦱꦺꦴ ꦱꦩꦸꦢꦴꦕꦴꦫꦺꦴ’ꦠꦶ, ꦌꦮꦁ ꦱꦤ꧀ꦠꦩꦺꦠꦁ [ꦌꦮꦁ ꦱꦤ꧀ꦠꦁ (ꦄꦛ꧀ꦜ.)], ꦄꦴꦤꦤ꧀ꦢ, ꦨꦶꦏ꧀ꦑꦸ ꦌꦮꦁ ꦥꦗꦴꦤꦴꦠꦶ – ‘ꦪꦺꦴ ꦑꦺꦴ ꦆꦩꦺꦱꦸ ꦥꦚ꧀ꦕꦱꦸ ꦏꦴꦩꦒꦸꦟꦺꦱꦸ ꦖꦤ꧀ꦢꦫꦴꦒꦺꦴ ꦱꦺꦴ ꦩꦺ ꦤꦥ꧀ꦥꦲꦷꦤꦺꦴ’ꦠꦶ. ꦆꦠꦶꦲ ꦠꦠ꧀ꦡ ꦱꦩ꧀ꦥꦗꦴꦤꦺꦴ ꦲꦺꦴꦠꦶ. ꦱꦕꦺ ꦥꦤꦴꦤꦤ꧀ꦢ, ꦨꦶꦏ꧀ꦑꦸ ꦥꦕ꧀ꦕꦮꦺꦏ꧀ꦑꦩꦴꦤꦺꦴ ꦌꦮꦁ ꦥꦗꦴꦤꦴꦠꦶ – ‘ꦤꦠ꧀ꦡꦶ ꦑꦺꦴ ꦩꦺ ꦆꦩꦺꦱꦸ ꦥꦚ꧀ꦕꦱꦸ ꦏꦴꦩꦒꦸꦟꦺꦱꦸ ꦄꦚ꧀ꦚꦠꦫꦱ꧀ꦩꦶꦁ ꦮꦴ ꦄꦚ꧀ꦚꦠꦫꦱ꧀ꦩꦶꦁ ꦮꦴ ꦄꦴꦪꦠꦤꦺ ꦈꦥ꧀ꦥꦗ꧀ꦗꦠꦶ ꦕꦺꦠꦱꦺꦴ ꦱꦩꦸꦢꦴꦕꦴꦫꦺꦴ’ꦠꦶ, ꦌꦮꦁ ꦱꦤ꧀ꦠꦩꦺꦠꦁ, ꦄꦴꦤꦤ꧀ꦢ, ꦨꦶꦏ꧀ꦑꦸ ꦌꦮꦁ ꦥꦗꦴꦤꦴꦠꦶ – ‘ꦪꦺꦴ ꦑꦺꦴ ꦆꦩꦺꦱꦸ ꦥꦚ꧀ꦕꦱꦸ ꦏꦴꦩꦒꦸꦟꦺꦱꦸ ꦖꦤ꧀ꦢꦫꦴꦒꦺꦴ ꦱꦺꦴ ꦩꦺ ꦥꦲꦷꦤꦺꦴ’ꦠꦶ. ꦆꦠꦶꦲ ꦠꦠ꧀ꦡ ꦱꦩ꧀ꦥꦗꦴꦤꦺꦴ ꦲꦺꦴꦠꦶ.

꧑꧙꧑. ‘‘ꦥꦚ꧀ꦕ ꦑꦺꦴ ꦆꦩꦺ, ꦄꦴꦤꦤ꧀ꦢ, ꦈꦥꦴꦢꦴꦤꦏ꧀ꦑꦤ꧀ꦣꦴ ꦪꦠ꧀ꦡ ꦨꦶꦏ꧀ꦑꦸꦤꦴ ꦈꦢꦪꦧ꧀ꦧꦪꦴꦤꦸꦥꦱ꧀ꦱꦶꦤꦴ ꦮꦶꦲꦴꦠꦧ꧀ꦧꦁ – ‘ꦆꦠꦶ ꦫꦹꦥꦁ ꦆꦠꦶ ꦫꦹꦥꦱ꧀ꦱ ꦱꦩꦸꦢꦪꦺꦴ ꦆꦠꦶ ꦫꦹꦥꦱ꧀ꦱ ꦄꦠ꧀ꦡꦔ꧀ꦒꦩꦺꦴ, ꦆꦠꦶ ꦮꦺꦢꦤꦴ… ꦆꦠꦶ ꦱꦚ꧀ꦚꦴ… ꦆꦠꦶ ꦱꦔ꧀ꦑꦴꦫꦴ… ꦆꦠꦶ ꦮꦶꦚ꧀ꦚꦴꦟꦁ ꦆꦠꦶ ꦮꦶꦚ꧀ꦚꦴꦟꦱ꧀ꦱ ꦱꦩꦸꦢꦪꦺꦴ ꦆꦠꦶ ꦮꦶꦚ꧀ꦚꦴꦟꦱ꧀ꦱ ꦄꦠ꧀ꦡꦔ꧀ꦒꦩꦺꦴ’ꦠꦶ. ꦠꦱ꧀ꦱ ꦆꦩꦺꦱꦸ ꦥꦚ꧀ꦕꦱꦸ ꦈꦥꦴꦢꦴꦤꦏ꧀ꦑꦤ꧀ꦣꦺꦱꦸ ꦈꦢꦪꦧ꧀ꦧꦪꦴꦤꦸꦥꦱ꧀ꦱꦶꦤꦺꦴ ꦮꦶꦲꦫꦠꦺꦴ ꦪꦺꦴ ꦥꦚ꧀ꦕꦱꦸ ꦈꦥꦴꦢꦴꦤꦏ꧀ꦑꦤ꧀ꦣꦺꦱꦸ ꦄꦱ꧀ꦩꦶꦩꦴꦤꦺꦴ ꦱꦺꦴ ꦥꦲꦷꦪꦠꦶ. ꦌꦮꦁ ꦱꦤ꧀ꦠꦩꦺꦠꦁ, ꦄꦴꦤꦤ꧀ꦢ, ꦨꦶꦏ꧀ꦑꦸ ꦌꦮꦁ ꦥꦗꦴꦤꦴꦠꦶ – ‘ꦪꦺꦴ ꦑꦺꦴ ꦆꦩꦺꦱꦸ ꦥꦚ꧀ꦕꦱꦸ ꦈꦥꦴꦢꦴꦤꦏ꧀ꦑꦤ꧀ꦣꦺꦱꦸ ꦄꦱ꧀ꦩꦶꦩꦴꦤꦺꦴ ꦱꦺꦴ ꦩꦺ ꦥꦲꦷꦤꦺꦴ’ꦠꦶ. ꦆꦠꦶꦲ ꦠꦠ꧀ꦡ ꦱꦩ꧀ꦥꦗꦴꦤꦺꦴ ꦲꦺꦴꦠꦶ. ꦆꦩꦺ ꦑꦺꦴ ꦠꦺ, ꦄꦴꦤꦤ꧀ꦢ, ꦣꦩ꧀ꦩꦴ ꦌꦏꦤ꧀ꦠꦏꦸꦱꦭꦴ ꦏꦸꦱꦭꦴꦪꦴꦠꦶꦏꦴ [ꦣꦩ꧀ꦩꦴ ꦌꦏꦤ꧀ꦠꦏꦸꦱꦭꦴꦪꦠꦶꦏꦴ (ꦱꦧ꧀ꦧꦠ꧀ꦡ) ꦄꦛ꧀ꦜꦏꦡꦴꦛꦷꦏꦴ ꦎꦭꦺꦴꦏꦺꦠꦧ꧀ꦧꦴ] ꦄꦫꦶꦪꦴ ꦭꦺꦴꦏꦸꦠ꧀ꦠꦫꦴ ꦄꦤꦮꦏ꧀ꦏꦤ꧀ꦠꦴ ꦥꦴꦥꦶꦩꦠꦴ. ꦠꦁ ꦏꦶꦁ ꦩꦚ꧀ꦚꦱꦶ, ꦄꦴꦤꦤ꧀ꦢ, ꦏꦁ ꦄꦠ꧀ꦡꦮꦱꦁ ꦱꦩ꧀ꦥꦱ꧀ꦱꦩꦴꦤꦺꦴ ꦄꦫꦲꦠꦶ ꦱꦴꦮꦏꦺꦴ ꦱꦠ꧀ꦡꦴꦫꦁ ꦄꦤꦸꦧꦤ꧀ꦣꦶꦠꦸꦁ ꦄꦥꦶ ꦥꦟꦸꦗ꧀ꦗꦩꦴꦤꦺꦴ’’ꦠꦶ [ꦄꦥꦶ ꦥꦤꦸꦗ꧀ꦗꦩꦴꦤꦺꦴꦥꦷꦠꦶ (ꦏ. ꦱꦷ.), ꦄꦥꦶ ꦥꦪꦸꦗ꧀ꦗꦩꦴꦤꦺꦴꦠꦶ (ꦱ꧀ꦪꦴ. ꦏꦁ. ꦥꦷ.)]? ‘‘ꦨꦒꦮꦁꦩꦹꦭꦏꦴ ꦤꦺꦴ, ꦨꦤ꧀ꦠꦺ, ꦣꦩ꧀ꦩꦴ ꦨꦒꦮꦁꦤꦺꦠ꧀ꦠꦶꦏꦴ ꦨꦒꦮꦁꦥꦛꦶꦱꦫꦟꦴ. ꦱꦴꦣꦸ ꦮꦠ, ꦨꦤ꧀ꦠꦺ, ꦨꦒꦮꦤ꧀ꦠꦁꦪꦺꦮ ꦥꦛꦶꦨꦴꦠꦸ ꦌꦠꦱ꧀ꦱ ꦨꦴꦱꦶꦠꦱ꧀ꦱ ꦄꦠ꧀ꦡꦺꦴ. ꦨꦒꦮꦠꦺꦴ ꦱꦸꦠ꧀ꦮꦴ ꦨꦶꦏ꧀ꦑꦹ ꦣꦴꦫꦺꦱ꧀ꦱꦤ꧀ꦠꦷ’’ꦠꦶ.

꧑꧙꧒. ‘‘ꦤ ꦑꦺꦴ, ꦄꦴꦤꦤ꧀ꦢ, ꦄꦫꦲꦠꦶ ꦱꦴꦮꦏꦺꦴ ꦱꦠ꧀ꦡꦴꦫꦁ ꦄꦤꦸꦧꦤ꧀ꦣꦶꦠꦸꦁ, ꦪꦢꦶꦢꦁ ꦱꦸꦠ꧀ꦠꦁ ꦒꦺꦪ꧀ꦪꦁ ꦮꦺꦪ꧀ꦪꦴꦏꦫꦟꦁ ꦠꦱ꧀ꦱ ꦲꦺꦠꦸ [ꦮꦺꦪ꧀ꦪꦴꦏꦫꦟꦱ꧀ꦱ ꦲꦺꦠꦸ (ꦏ.)]. ꦠꦁ ꦏꦶꦱ꧀ꦱ ꦲꦺꦠꦸ? ꦢꦷꦓꦫꦠ꧀ꦠꦱ꧀ꦱ [ꦢꦷꦓꦫꦠ꧀ꦠꦁ + ꦄꦱ꧀ꦱꦴꦠꦶ ꦥꦢꦕ꧀ꦖꦺꦢꦺꦴ] ꦲꦶ ꦠꦺ, ꦄꦴꦤꦤ꧀ꦢ, ꦣꦩ꧀ꦩꦴ ꦱꦸꦠꦴ ꦣꦴꦠꦴ ꦮꦕꦱꦴ ꦥꦫꦶꦕꦶꦠꦴ ꦩꦤꦱꦴꦤꦸꦥꦺꦏ꧀ꦑꦶꦠꦴ ꦢꦶꦛ꧀ꦜꦶꦪꦴ ꦱꦸꦥ꧀ꦥꦛꦶꦮꦶꦢ꧀ꦣꦴ. ꦪꦴ ꦕ ꦑꦺꦴ ꦄꦪꦁ, ꦄꦴꦤꦤ꧀ꦢ, ꦏꦡꦴ ꦄꦨꦶꦱꦭ꧀ꦭꦺꦑꦶꦏꦴ ꦕꦺꦠꦺꦴꦮꦶꦤꦷꦮꦫꦟꦱꦥ꧀ꦥꦴꦪꦴ ꦌꦏꦤ꧀ꦠꦤꦶꦧ꧀ꦧꦶꦢꦴꦪ ꦮꦶꦫꦴꦒꦴꦪ ꦤꦶꦫꦺꦴꦣꦴꦪ ꦈꦥꦱꦩꦴ ꦄꦨꦶꦚ꧀ꦚꦴꦪ ꦱꦩ꧀ꦧꦺꦴꦣꦴꦪ ꦤꦶꦧ꧀ꦧꦴꦤꦴꦪ ꦱꦁꦮꦠ꧀ꦠꦠꦶ, ꦱꦺꦪ꧀ꦪꦡꦶꦢꦁ – ꦄꦥ꧀ꦥꦶꦕ꧀ꦖꦏꦡꦴ ꦱꦤ꧀ꦠꦸꦛ꧀ꦜꦶꦏꦡꦴ ꦥꦮꦶꦮꦺꦏꦏꦡꦴ ꦄꦱꦁꦱꦒ꧀ꦒꦏꦡꦴ ꦮꦷꦫꦶꦪꦴꦫꦩ꧀ꦨꦏꦡꦴ ꦱꦷꦭꦏꦡꦴ ꦱꦩꦴꦣꦶꦏꦡꦴ ꦥꦚ꧀ꦚꦴꦏꦡꦴ ꦮꦶꦩꦸꦠ꧀ꦠꦶꦏꦡꦴ ꦮꦶꦩꦸꦠ꧀ꦠꦶꦚꦴꦟꦢꦱ꧀ꦱꦤꦏꦡꦴ – ꦌꦮꦫꦹꦥꦶꦪꦴ ꦑꦺꦴ, ꦄꦴꦤꦤ꧀ꦢ, ꦏꦡꦴꦪ ꦲꦺꦠꦸ ꦄꦫꦲꦠꦶ ꦱꦴꦮꦏꦺꦴ ꦱꦠ꧀ꦡꦴꦫꦁ ꦄꦤꦸꦧꦤ꧀ꦣꦶꦠꦸꦁ ꦄꦥꦶ ꦥꦟꦸꦗ꧀ꦗꦩꦴꦤꦺꦴ.

‘‘ꦌꦮꦁ ꦱꦤ꧀ꦠꦺ ꦑꦺꦴ, ꦄꦴꦤꦤ꧀ꦢ, ꦄꦴꦕꦫꦶꦪꦹꦥꦢ꧀ꦢꦮꦺꦴ ꦲꦺꦴꦠꦶ, ꦌꦮꦁ ꦱꦤ꧀ꦠꦺ ꦄꦤ꧀ꦠꦺꦮꦴꦱꦹꦥꦢ꧀ꦢꦮꦺꦴ ꦲꦺꦴꦠꦶ, ꦌꦮꦁ ꦱꦤ꧀ꦠꦺ ꦧ꧀ꦫꦲ꧀ꦩꦕꦴꦫꦹꦥꦢ꧀ꦢꦮꦺꦴ ꦲꦺꦴꦠꦶ.

꧑꧙꧓. ‘‘ꦏꦡꦚ꧀ꦕꦴꦤꦤ꧀ꦢ, ꦄꦴꦕꦫꦶꦪꦹꦥꦢ꧀ꦢꦮꦺꦴ ꦲꦺꦴꦠꦶ? ꦆꦣꦴꦤꦤ꧀ꦢ, ꦌꦏꦕ꧀ꦕꦺꦴ ꦱꦠ꧀ꦡꦴ ꦮꦶꦮꦶꦠ꧀ꦠꦁ ꦱꦺꦤꦴꦱꦤꦁ ꦨꦗꦠꦶ ꦄꦫꦚ꧀ꦚꦁ ꦫꦸꦏ꧀ꦑꦩꦹꦭꦁ ꦥꦧ꧀ꦧꦠꦁ ꦏꦤ꧀ꦢꦫꦁ ꦒꦶꦫꦶꦒꦸꦲꦁ ꦱꦸꦱꦴꦤꦁ ꦮꦤꦥꦠ꧀ꦡꦁ ꦄꦧ꧀ꦨꦺꦴꦏꦴꦱꦁ ꦥꦭꦴꦭꦥꦸꦚ꧀ꦗꦁ. ꦠꦱ꧀ꦱ ꦠꦡꦴꦮꦹꦥꦏꦛ꧀ꦜꦱ꧀ꦱ ꦮꦶꦲꦫꦠꦺꦴ ꦄꦤ꧀ꦮꦴꦮꦠ꧀ꦠꦤ꧀ꦠꦶ [ꦄꦤ꧀ꦮꦴꦮꦛ꧀ꦛꦤ꧀ꦠꦶ (ꦱꦷ. ꦱ꧀ꦪꦴ. ꦏꦁ. ꦥꦷ.)] ꦧ꧀ꦫꦴꦲ꧀ꦩꦟꦒꦲꦥꦠꦶꦏꦴ ꦤꦺꦒꦩꦴ ꦕꦺꦮ ꦗꦴꦤꦥꦢꦴ ꦕ. ꦱꦺꦴ ꦄꦤ꧀ꦮꦴꦮꦠ꧀ꦠꦤ꧀ꦠꦺꦱꦸ ꦧ꧀ꦫꦴꦲ꧀ꦩꦟꦒꦲꦥꦠꦶꦏꦺꦱꦸ ꦤꦺꦒꦩꦺꦱꦸ ꦕꦺꦮ ꦗꦴꦤꦥꦢꦺꦱꦸ ꦕ ꦩꦸꦕ꧀ꦖꦁ ꦤꦶꦏꦴꦩꦪꦠꦶ [ꦩꦸꦕ꧀ꦖꦠꦶ ꦏꦴꦩꦪꦠꦶ (ꦱꦷ. ꦥꦷ.) ꦄꦛ꧀ꦜꦏꦡꦴꦪꦁ ꦥꦤ ꦤ ꦠꦡꦴ ꦢꦶꦱ꧀ꦱꦠꦶ], ꦒꦺꦣꦁ ꦄꦴꦥꦗ꧀ꦗꦠꦶ, ꦄꦴꦮꦠ꧀ꦠꦠꦶ ꦧꦴꦲꦸꦭ꧀ꦭꦴꦪ. ꦄꦪꦁ ꦮꦸꦕ꧀ꦕꦠꦴꦤꦤ꧀ꦢ, ꦈꦥꦢ꧀ꦢꦮꦺꦴ [ꦈꦥꦢ꧀ꦢꦸꦠꦺꦴ (ꦱꦷ. ꦥꦷ.)] ꦄꦴꦕꦫꦶꦪꦺꦴ. ꦄꦴꦕꦫꦶꦪꦹꦥꦢ꧀ꦢꦮꦺꦤ ꦄꦮꦣꦶꦁꦱꦸ ꦤꦁ ꦥꦴꦥꦏꦴ ꦄꦏꦸꦱꦭꦴ ꦣꦩ꧀ꦩꦴ ꦱꦁꦏꦶꦭꦺꦱꦶꦏꦴ ꦥꦺꦴꦤꦺꦴꦧ꧀ꦨꦮꦶꦏꦴ [ꦥꦺꦴꦤꦺꦴꦨꦮꦶꦏꦴ (ꦱꦷ. ꦥꦷ.)] ꦱꦢꦫꦴ ꦢꦸꦏ꧀ꦑꦮꦶꦥꦴꦏꦴ ꦄꦴꦪꦠꦶꦁ ꦗꦴꦠꦶꦗꦫꦴꦩꦫꦟꦶꦪꦴ. ꦌꦮꦁ ꦑꦺꦴ, ꦄꦴꦤꦤ꧀ꦢ, ꦄꦴꦕꦫꦶꦪꦹꦥꦢ꧀ꦢꦮꦺꦴ ꦲꦺꦴꦠꦶ.

꧑꧙꧔. ‘‘ꦏꦡꦚ꧀ꦕꦴꦤꦤ꧀ꦢ, ꦄꦤ꧀ꦠꦺꦮꦴꦱꦹꦥꦢ꧀ꦢꦮꦺꦴ ꦲꦺꦴꦠꦶ? ꦠꦱ꧀ꦱꦺꦮ ꦑꦺꦴ ꦥꦤꦴꦤꦤ꧀ꦢ, ꦱꦠ꧀ꦡꦸ ꦱꦴꦮꦏꦺꦴ ꦠꦱ꧀ꦱ ꦱꦠ꧀ꦡꦸ ꦮꦶꦮꦺꦏꦩꦤꦸꦧ꧀ꦫꦹꦲꦪꦩꦴꦤꦺꦴ ꦮꦶꦮꦶꦠ꧀ꦠꦁ ꦱꦺꦤꦴꦱꦤꦁ ꦨꦗꦠꦶ ꦄꦫꦚ꧀ꦚꦁ ꦫꦸꦏ꧀ꦑꦩꦹꦭꦁ ꦥꦧ꧀ꦧꦠꦁ ꦏꦤ꧀ꦢꦫꦁ ꦒꦶꦫꦶꦒꦸꦲꦁ ꦱꦸꦱꦴꦤꦁ ꦮꦤꦥꦠ꧀ꦡꦁ ꦄꦧ꧀ꦨꦺꦴꦏꦴꦱꦁ ꦥꦭꦴꦭꦥꦸꦚ꧀ꦗꦁ. ꦠꦱ꧀ꦱ ꦠꦡꦴꦮꦹꦥꦏꦛ꧀ꦜꦱ꧀ꦱ ꦮꦶꦲꦫꦠꦺꦴ ꦄꦤ꧀ꦮꦴꦮꦠ꧀ꦠꦤ꧀ꦠꦶ ꦧ꧀ꦫꦴꦲ꧀ꦩꦟꦒꦲꦥꦠꦶꦏꦴ ꦤꦺꦒꦩꦴ ꦕꦺꦮ ꦗꦴꦤꦥꦢꦴ ꦕ. ꦱꦺꦴ ꦄꦤ꧀ꦮꦴꦮꦠ꧀ꦠꦤ꧀ꦠꦺꦱꦸ ꦧ꧀ꦫꦴꦲ꧀ꦩꦟꦒꦲꦥꦠꦶꦏꦺꦱꦸ ꦤꦺꦒꦩꦺꦱꦸ ꦕꦺꦮ ꦗꦴꦤꦥꦢꦺꦱꦸ ꦕ ꦩꦸꦕ꧀ꦖꦁ ꦤꦶꦏꦴꦩꦪꦠꦶ, ꦒꦺꦣꦁ ꦄꦴꦥꦗ꧀ꦗꦠꦶ, ꦄꦴꦮꦠ꧀ꦠꦠꦶ ꦧꦴꦲꦸꦭ꧀ꦭꦴꦪ. ꦄꦪꦁ ꦮꦸꦕ꧀ꦕꦠꦴꦤꦤ꧀ꦢ, ꦈꦥꦢ꧀ꦢꦮꦺꦴ ꦄꦤ꧀ꦠꦺꦮꦴꦱꦷ. ꦄꦤ꧀ꦠꦺꦮꦴꦱꦹꦥꦢ꧀ꦢꦮꦺꦤ ꦄꦮꦣꦶꦁꦱꦸ ꦤꦁ ꦥꦴꦥꦏꦴ ꦄꦏꦸꦱꦭꦴ ꦣꦩ꧀ꦩꦴ ꦱꦁꦏꦶꦭꦺꦱꦶꦏꦴ ꦥꦺꦴꦤꦺꦴꦧ꧀ꦨꦮꦶꦏꦴ ꦱꦢꦫꦴ ꦢꦸꦏ꧀ꦑꦮꦶꦥꦴꦏꦴ ꦄꦴꦪꦠꦶꦁ ꦗꦴꦠꦶꦗꦫꦴꦩꦫꦟꦶꦪꦴ. ꦌꦮꦁ ꦑꦺꦴ, ꦄꦴꦤꦤ꧀ꦢ, ꦄꦤ꧀ꦠꦺꦮꦴꦱꦹꦥꦢ꧀ꦢꦮꦺꦴ ꦲꦺꦴꦠꦶ.

꧑꧙꧕. ‘‘ꦏꦡꦚ꧀ꦕꦴꦤꦤ꧀ꦢ, ꦧ꧀ꦫꦲ꧀ꦩꦕꦴꦫꦹꦥꦢ꧀ꦢꦮꦺꦴ ꦲꦺꦴꦠꦶ? ꦆꦣꦴꦤꦤ꧀ꦢ, ꦠꦡꦴꦒꦠꦺꦴ ꦭꦺꦴꦏꦺ ꦈꦥ꧀ꦥꦗ꧀ꦗꦠꦶ ꦄꦫꦲꦁ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦴ ꦮꦶꦗ꧀ꦗꦴꦕꦫꦟꦱꦩ꧀ꦥꦤ꧀ꦤꦺꦴ ꦱꦸꦒꦠꦺꦴ ꦭꦺꦴꦏꦮꦶꦢꦹ ꦄꦤꦸꦠ꧀ꦠꦫꦺꦴ ꦥꦸꦫꦶꦱꦢꦩ꧀ꦩꦱꦴꦫꦡꦶ ꦱꦠ꧀ꦡꦴ ꦢꦺꦮꦩꦤꦸꦱ꧀ꦱꦴꦤꦁ ꦧꦸꦢ꧀ꦣꦺꦴ ꦨꦒꦮꦴ. ꦱꦺꦴ ꦮꦶꦮꦶꦠ꧀ꦠꦁ ꦱꦺꦤꦴꦱꦤꦁ ꦨꦗꦠꦶ ꦄꦫꦚ꧀ꦚꦁ ꦫꦸꦏ꧀ꦑꦩꦹꦭꦁ ꦥꦧ꧀ꦧꦠꦁ ꦏꦤ꧀ꦢꦫꦁ ꦒꦶꦫꦶꦒꦸꦲꦁ ꦱꦸꦱꦴꦤꦁ ꦮꦤꦥꦠ꧀ꦡꦁ ꦄꦧ꧀ꦨꦺꦴꦏꦴꦱꦁ ꦥꦭꦴꦭꦥꦸꦚ꧀ꦗꦁ. ꦠꦱ꧀ꦱ ꦠꦡꦴꦮꦹꦥꦏꦛ꧀ꦜꦱ꧀ꦱ ꦮꦶꦲꦫꦠꦺꦴ ꦄꦤ꧀ꦮꦴꦮꦠ꧀ꦠꦤ꧀ꦠꦶ ꦧ꧀ꦫꦴꦲ꧀ꦩꦟꦒꦲꦥꦠꦶꦏꦴ ꦤꦺꦒꦩꦴ ꦕꦺꦮ ꦗꦴꦤꦥꦢꦴ ꦕ. ꦱꦺꦴ ꦄꦤ꧀ꦮꦴꦮꦠ꧀ꦠꦤ꧀ꦠꦺꦱꦸ ꦧ꧀ꦫꦴꦲ꧀ꦩꦟꦒꦲꦥꦠꦶꦏꦺꦱꦸ ꦤꦺꦒꦩꦺꦱꦸ ꦕꦺꦮ ꦗꦴꦤꦥꦢꦺꦱꦸ ꦕ ꦤ ꦩꦸꦕ꧀ꦖꦁ ꦤꦶꦏꦴꦩꦪꦠꦶ, ꦤ ꦒꦺꦣꦁ ꦄꦴꦥꦗ꧀ꦗꦠꦶ, ꦤ ꦄꦴꦮꦠ꧀ꦠꦠꦶ ꦧꦴꦲꦸꦭ꧀ꦭꦴꦪ. ꦠꦱ꧀ꦱꦺꦮ ꦑꦺꦴ ꦥꦤꦴꦤꦤ꧀ꦢ, ꦱꦠ꧀ꦡꦸ ꦱꦴꦮꦏꦺꦴ ꦠꦱ꧀ꦱ ꦱꦠ꧀ꦡꦸ ꦮꦶꦮꦺꦏꦩꦤꦸꦧ꧀ꦫꦹꦲꦪꦩꦴꦤꦺꦴ ꦮꦶꦮꦶꦠ꧀ꦠꦁ ꦱꦺꦤꦴꦱꦤꦁ ꦨꦗꦠꦶ ꦄꦫꦚ꧀ꦚꦁ ꦫꦸꦏ꧀ꦑꦩꦹꦭꦁ ꦥꦧ꧀ꦧꦠꦁ ꦏꦤ꧀ꦢꦫꦁ ꦒꦶꦫꦶꦒꦸꦲꦁ ꦱꦸꦱꦴꦤꦁ ꦮꦤꦥꦠ꧀ꦡꦁ ꦄꦧ꧀ꦨꦺꦴꦏꦴꦱꦁ ꦥꦭꦴꦭꦥꦸꦚ꧀ꦗꦁ. ꦠꦱ꧀ꦱ ꦠꦡꦴꦮꦹꦥꦏꦛ꧀ꦜꦱ꧀ꦱ ꦮꦶꦲꦫꦠꦺꦴ ꦄꦤ꧀ꦮꦴꦮꦠ꧀ꦠꦤ꧀ꦠꦶ ꦧ꧀ꦫꦴꦲ꧀ꦩꦟꦒꦲꦥꦠꦶꦏꦴ ꦤꦺꦒꦩꦴ ꦕꦺꦮ ꦗꦴꦤꦥꦢꦴ ꦕ. ꦱꦺꦴ ꦄꦤ꧀ꦮꦴꦮꦠ꧀ꦠꦤ꧀ꦠꦺꦱꦸ ꦧ꧀ꦫꦴꦲ꧀ꦩꦟꦒꦲꦥꦠꦶꦏꦺꦱꦸ ꦤꦺꦒꦩꦺꦱꦸ ꦕꦺꦮ ꦗꦴꦤꦥꦢꦺꦱꦸ ꦕ ꦩꦸꦕ꧀ꦖꦁ ꦤꦶꦏꦴꦩꦪꦠꦶ, ꦒꦺꦣꦁ ꦄꦴꦥꦗ꧀ꦗꦠꦶ, ꦄꦴꦮꦠ꧀ꦠꦠꦶ ꦧꦴꦲꦸꦭ꧀ꦭꦴꦪ. ꦄꦪꦁ ꦮꦸꦕ꧀ꦕꦠꦴꦤꦤ꧀ꦢ, ꦈꦥꦢ꧀ꦢꦮꦺꦴ ꦧ꧀ꦫꦲ꧀ꦩꦕꦴꦫꦷ. ꦧ꧀ꦫꦲ꧀ꦩꦕꦴꦫꦹꦥꦢ꧀ꦢꦮꦺꦤ ꦄꦮꦣꦶꦁꦱꦸ ꦤꦁ ꦥꦴꦥꦏꦴ ꦄꦏꦸꦱꦭꦴ ꦣꦩ꧀ꦩꦴ ꦱꦁꦏꦶꦭꦺꦱꦶꦏꦴ ꦥꦺꦴꦤꦺꦴꦧ꧀ꦨꦮꦶꦏꦴ ꦱꦢꦫꦴ ꦢꦸꦏ꧀ꦑꦮꦶꦥꦴꦏꦴ ꦄꦴꦪꦠꦶꦁ ꦗꦴꦠꦶꦗꦫꦴꦩꦫꦟꦶꦪꦴ. ꦌꦮꦁ ꦑꦺꦴ, ꦄꦴꦤꦤ꧀ꦢ, ꦧ꧀ꦫꦲ꧀ꦩꦕꦴꦫꦹꦥꦢ꧀ꦢꦮꦺꦴ ꦲꦺꦴꦠꦶ.

‘‘ꦠꦠ꧀ꦫꦴꦤꦤ꧀ꦢ, ꦪꦺꦴ ꦕꦺꦮꦴꦪꦁ ꦄꦴꦕꦫꦶꦪꦹꦥꦢ꧀ꦢꦮꦺꦴ, ꦪꦺꦴ ꦕ ꦄꦤ꧀ꦠꦺꦮꦴꦱꦹꦥꦢ꧀ꦢꦮꦺꦴ ꦄꦪꦁ ꦠꦺꦲꦶ ꦧ꧀ꦫꦲ꧀ꦩꦕꦴꦫꦹꦥꦢ꧀ꦢꦮꦺꦴ ꦢꦸꦏ꧀ꦑꦮꦶꦥꦴꦏꦠꦫꦺꦴ ꦕꦺꦮ ꦏꦛꦸꦏꦮꦶꦥꦴꦏꦠꦫꦺꦴ ꦕ, ꦄꦥꦶ ꦕ ꦮꦶꦤꦶꦥꦴꦠꦴꦪ ꦱꦁꦮꦠ꧀ꦠꦠꦶ.

꧑꧙꧖. ‘‘ꦠꦱ꧀ꦩꦴꦠꦶꦲ ꦩꦁ, ꦄꦴꦤꦤ꧀ꦢ, ꦩꦶꦠ꧀ꦠꦮꦠꦴꦪ ꦱꦩꦸꦢꦴꦕꦫꦡ, ꦩꦴ ꦱꦥꦠ꧀ꦠꦮꦠꦴꦪ. ꦠꦁ ꦮꦺꦴ ꦨꦮꦶꦱ꧀ꦱꦠꦶ ꦢꦷꦓꦫꦠ꧀ꦠꦁ ꦲꦶꦠꦴꦪ ꦱꦸꦑꦴꦪ.

‘‘ꦏꦡꦚ꧀ꦕꦴꦤꦤ꧀ꦢ, ꦱꦠ꧀ꦡꦴꦫꦁ ꦱꦴꦮꦏꦴ ꦱꦥꦠ꧀ꦠꦮꦠꦴꦪ ꦱꦩꦸꦢꦴꦕꦫꦤ꧀ꦠꦶ, ꦤꦺꦴ ꦩꦶꦠ꧀ꦠꦮꦠꦴꦪ? ꦆꦣꦴꦤꦤ꧀ꦢ, ꦱꦠ꧀ꦡꦴ ꦱꦴꦮꦏꦴꦤꦁ ꦣꦩ꧀ꦩꦁ ꦢꦺꦱꦺꦠꦶ ꦄꦤꦸꦏꦩ꧀ꦥꦏꦺꦴ ꦲꦶꦠꦺꦱꦷ ꦄꦤꦸꦏꦩ꧀ꦥꦁ ꦈꦥꦴꦢꦴꦪ – ‘ꦆꦢꦁ ꦮꦺꦴ ꦲꦶꦠꦴꦪ, ꦆꦢꦁ ꦮꦺꦴ ꦱꦸꦑꦴꦪꦴ’ꦠꦶ. ꦠꦱ꧀ꦱ ꦱꦴꦮꦏꦴ ꦤ ꦱꦸꦱ꧀ꦱꦹꦱꦤ꧀ꦠꦶ, ꦤ ꦱꦺꦴꦠꦁ ꦎꦢꦲꦤ꧀ꦠꦶ, ꦤ ꦄꦚ꧀ꦚꦴ ꦕꦶꦠ꧀ꦠꦁ ꦈꦥꦛ꧀ꦜꦥꦺꦤ꧀ꦠꦶ, ꦮꦺꦴꦏ꧀ꦏꦩ꧀ꦩ ꦕ ꦱꦠ꧀ꦡꦸꦱꦴꦱꦤꦴ ꦮꦠ꧀ꦠꦤ꧀ꦠꦶ. ꦌꦮꦁ ꦑꦺꦴ, ꦄꦴꦤꦤ꧀ꦢ, ꦱꦠ꧀ꦡꦴꦫꦁ ꦱꦴꦮꦏꦴ ꦱꦥꦠ꧀ꦠꦮꦠꦴꦪ ꦱꦩꦸꦢꦴꦕꦫꦤ꧀ꦠꦶ, ꦤꦺꦴ ꦩꦶꦠ꧀ꦠꦮꦠꦴꦪ.

‘‘ꦏꦡꦚ꧀ꦕꦴꦤꦤ꧀ꦢ, ꦱꦠ꧀ꦡꦴꦫꦁ ꦱꦴꦮꦏꦴ ꦩꦶꦠ꧀ꦠꦮꦠꦴꦪ ꦱꦩꦸꦢꦴꦕꦫꦤ꧀ꦠꦶ, ꦤꦺꦴ ꦱꦥꦠ꧀ꦠꦮꦠꦴꦪ? ꦆꦣꦴꦤꦤ꧀ꦢ, ꦱꦠ꧀ꦡꦴ ꦱꦴꦮꦏꦴꦤꦁ ꦣꦩ꧀ꦩꦁ ꦢꦺꦱꦺꦠꦶ ꦄꦤꦸꦏꦩ꧀ꦥꦏꦺꦴ ꦲꦶꦠꦺꦱꦷ ꦄꦤꦸꦏꦩ꧀ꦥꦁ ꦈꦥꦴꦢꦴꦪ – ‘ꦆꦢꦁ ꦮꦺꦴ ꦲꦶꦠꦴꦪ, ꦆꦢꦁ ꦮꦺꦴ ꦱꦸꦑꦴꦪꦴ’ꦠꦶ. ꦠꦱ꧀ꦱ ꦱꦴꦮꦏꦴ ꦱꦸꦱ꧀ꦱꦹꦱꦤ꧀ꦠꦶ, ꦱꦺꦴꦠꦁ ꦎꦢꦲꦤ꧀ꦠꦶ, ꦄꦚ꧀ꦚꦴ ꦕꦶꦠ꧀ꦠꦁ ꦈꦥꦛ꧀ꦜꦥꦺꦤ꧀ꦠꦶ, ꦤ ꦕ ꦮꦺꦴꦏ꧀ꦏꦩ ꦱꦠ꧀ꦡꦸꦱꦴꦱꦤꦴ ꦮꦠ꧀ꦠꦤ꧀ꦠꦶ. ꦌꦮꦁ ꦑꦺꦴ, ꦄꦴꦤꦤ꧀ꦢ, ꦱꦠ꧀ꦡꦴꦫꦁ ꦱꦴꦮꦏꦴ ꦩꦶꦠ꧀ꦠꦮꦠꦴꦪ ꦱꦩꦸꦢꦴꦕꦫꦤ꧀ꦠꦶ, ꦤꦺꦴ ꦱꦥꦠ꧀ꦠꦮꦠꦴꦪ.

‘‘ꦠꦱ꧀ꦩꦴꦠꦶꦲ ꦩꦁ, ꦄꦴꦤꦤ꧀ꦢ, ꦩꦶꦠ꧀ꦠꦮꦠꦴꦪ ꦱꦩꦸꦢꦴꦕꦫꦡ, ꦩꦴ ꦱꦥꦠ꧀ꦠꦮꦠꦴꦪ. ꦠꦁ ꦮꦺꦴ ꦨꦮꦶꦱ꧀ꦱꦠꦶ ꦢꦷꦓꦫꦠ꧀ꦠꦁ ꦲꦶꦠꦴꦪ ꦱꦸꦑꦴꦪ. ꦤ ꦮꦺꦴ ꦄꦲꦁ, ꦄꦴꦤꦤ꧀ꦢ, ꦠꦡꦴ ꦥꦫꦏ꧀ꦏꦩꦶꦱ꧀ꦱꦴꦩꦶ ꦪꦡꦴ ꦏꦸꦩ꧀ꦨꦏꦴꦫꦺꦴ ꦄꦴꦩꦏꦺ ꦄꦴꦩꦏꦩꦠ꧀ꦠꦺ. ꦤꦶꦒ꧀ꦒꦪ꧀ꦲ ꦤꦶꦒ꧀ꦒꦪ꧀ꦲꦴꦲꦁ, ꦄꦴꦤꦤ꧀ꦢ, ꦮꦏ꧀ꦑꦴꦩꦶ; ꦥꦮꦪ꧀ꦲ ꦥꦮꦪ꧀ꦲ, ꦄꦴꦤꦤ꧀ꦢ, ꦮꦏ꧀ꦑꦴꦩꦶ [ꦥꦮꦪ꧀ꦲ ꦥꦮꦪ꧀ꦲ (ꦱꦷ. ꦥꦷ.), ꦥꦒ꧀ꦒꦪ꧀ꦲ ꦥꦒ꧀ꦒꦪ꧀ꦲ ꦄꦴꦤꦤ꧀ꦢ ꦮꦏ꧀ꦑꦴꦩꦶ (ꦏ.)]. ꦪꦺꦴ ꦱꦴꦫꦺꦴ ꦱꦺꦴ ꦜꦱ꧀ꦱꦠꦷ’’ꦠꦶ.

ꦆꦢꦩꦮꦺꦴꦕ ꦨꦒꦮꦴ. ꦄꦠ꧀ꦠꦩꦤꦺꦴ ꦄꦴꦪꦱ꧀ꦩꦴ ꦄꦴꦤꦤ꧀ꦢꦺꦴ ꦨꦒꦮꦠꦺꦴ ꦨꦴꦱꦶꦠꦁ ꦄꦨꦶꦤꦤ꧀ꦢꦷꦠꦶ.

ꦩꦲꦴꦱꦸꦚ꧀ꦚꦠꦱꦸꦠ꧀ꦠꦁ ꦤꦶꦛ꧀ꦜꦶꦠꦁ ꦢꦸꦠꦶꦪꦁ.