꧓. ꦥꦫꦶꦧ꧀ꦧꦴꦗꦏꦮꦒ꧀ꦒꦺꦴ

꧑. ꦠꦺꦮꦶꦗ꧀ꦗꦮꦕ꧀ꦖꦱꦸꦠ꧀ꦠꦁ

꧑꧘꧕. ꦌꦮꦁ ꦩꦺ ꦱꦸꦠꦁ – ꦌꦏꦁ ꦱꦩꦪꦁ ꦨꦒꦮꦴ ꦮꦺꦱꦴꦭꦶꦪꦁ ꦮꦶꦲꦫꦠꦶ ꦩꦲꦴꦮꦤꦺ ꦏꦹꦛꦴꦒꦴꦫꦱꦴꦭꦴꦪꦁ. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦮꦕ꧀ꦖꦒꦺꦴꦠ꧀ꦠꦺꦴ ꦥꦫꦶꦧ꧀ꦧꦴꦗꦏꦺꦴ ꦌꦏꦥꦸꦟ꧀ꦝꦫꦷꦏꦺ ꦥꦫꦶꦧ꧀ꦧꦴꦗꦏꦴꦫꦴꦩꦺ ꦥꦛꦶꦮꦱꦠꦶ. ꦄꦡ ꦑꦺꦴ ꦨꦒꦮꦴ ꦥꦸꦧ꧀ꦧꦟ꧀ꦲꦱꦩꦪꦁ ꦤꦶꦮꦴꦱꦺꦠ꧀ꦮꦴ ꦥꦠ꧀ꦠꦕꦷꦮꦫꦩꦴꦢꦴꦪ ꦮꦺꦱꦴꦭꦶꦁ ꦥꦶꦟ꧀ꦝꦴꦪ ꦥꦴꦮꦶꦱꦶ. ꦄꦡ ꦑꦺꦴ ꦨꦒꦮꦠꦺꦴ ꦌꦠꦢꦲꦺꦴꦱꦶ – ‘‘ꦄꦠꦶꦥ꧀ꦥꦒꦺꦴ ꦑꦺꦴ ꦠꦴꦮ ꦮꦺꦱꦴꦭꦶꦪꦁ ꦥꦶꦟ꧀ꦝꦴꦪ ꦕꦫꦶꦠꦸꦁ; ꦪꦁꦤꦹꦤꦴꦲꦁ ꦪꦺꦤ ꦌꦏꦥꦸꦟ꧀ꦝꦫꦷꦏꦺꦴ ꦥꦫꦶꦧ꧀ꦧꦴꦗꦏꦴꦫꦴꦩꦺꦴ ꦪꦺꦤ ꦮꦕ꧀ꦖꦒꦺꦴꦠ꧀ꦠꦺꦴ ꦥꦫꦶꦧ꧀ꦧꦴꦗꦏꦺꦴ ꦠꦺꦤꦸꦥꦱꦔ꧀ꦏꦩꦺꦪ꧀ꦪ’’ꦤ꧀ꦠꦶ. ꦄꦡ ꦑꦺꦴ ꦨꦒꦮꦴ ꦪꦺꦤ ꦌꦏꦥꦸꦟ꧀ꦝꦫꦷꦏꦺꦴ ꦥꦫꦶꦧ꧀ꦧꦴꦗꦏꦴꦫꦴꦩꦺꦴ ꦪꦺꦤ ꦮꦕ꧀ꦖꦒꦺꦴꦠ꧀ꦠꦺꦴ ꦥꦫꦶꦧ꧀ꦧꦴꦗꦏꦺꦴ ꦠꦺꦤꦸꦥꦱꦔ꧀ꦏꦩꦶ. ꦄꦢ꧀ꦢꦱꦴ ꦑꦺꦴ ꦮꦕ꧀ꦖꦒꦺꦴꦠ꧀ꦠꦺꦴ ꦥꦫꦶꦧ꧀ꦧꦴꦗꦏꦺꦴ ꦨꦒꦮꦤ꧀ꦠꦁ ꦢꦹꦫꦠꦺꦴꦮ ꦄꦴꦒꦕ꧀ꦖꦤ꧀ꦠꦁ. ꦢꦶꦱ꧀ꦮꦴꦤ ꦨꦒꦮꦤ꧀ꦠꦁ ꦌꦠꦢꦮꦺꦴꦕ – ‘‘ꦌꦠꦸ ꦑꦺꦴ, ꦨꦤ꧀ꦠꦺ, ꦨꦒꦮꦴ. ꦱ꧀ꦮꦴꦒꦠꦁ [ꦱꦴꦒꦠꦁ (ꦱꦷ. ꦥꦷ.)], ꦨꦤ꧀ꦠꦺ, ꦨꦒꦮꦠꦺꦴ. ꦕꦶꦫꦱ꧀ꦱꦁ ꦑꦺꦴ, ꦨꦤ꧀ꦠꦺ, ꦨꦒꦮꦴ ꦆꦩꦁ ꦥꦫꦶꦪꦴꦪꦩꦏꦴꦱꦶ ꦪꦢꦶꦢꦁ ꦆꦣꦴꦒꦩꦤꦴꦪ. ꦤꦶꦱꦷꦢꦠꦸ, ꦨꦤ꧀ꦠꦺ, ꦨꦒꦮꦴ ꦆꦢꦩꦴꦱꦤꦁ ꦥꦚ꧀ꦚꦠ꧀ꦠ’’ꦤ꧀ꦠꦶ. ꦤꦶꦱꦷꦢꦶ ꦨꦒꦮꦴ ꦥꦚ꧀ꦚꦠ꧀ꦠꦺ ꦄꦴꦱꦤꦺ. ꦮꦕ꧀ꦖꦒꦺꦴꦠ꧀ꦠꦺꦴꦥꦶ ꦑꦺꦴ ꦥꦫꦶꦧ꧀ꦧꦴꦗꦏꦺꦴ ꦄꦚ꧀ꦚꦠꦫꦁ ꦤꦷꦕꦁ ꦄꦴꦱꦤꦁ ꦒꦲꦺꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦷꦢꦶ. ꦌꦏꦩꦤ꧀ꦠꦁ ꦤꦶꦱꦶꦤ꧀ꦤꦺꦴ ꦑꦺꦴ ꦮꦕ꧀ꦖꦒꦺꦴꦠ꧀ꦠꦺꦴ ꦥꦫꦶꦧ꧀ꦧꦴꦗꦏꦺꦴ ꦨꦒꦮꦤ꧀ꦠꦁ ꦌꦠꦢꦮꦺꦴꦕ – ‘‘ꦱꦸꦠꦁ ꦩꦺꦠꦁ, ꦨꦤ꧀ꦠꦺ – ‘ꦱꦩꦟꦺꦴ ꦒꦺꦴꦠꦩꦺꦴ ꦱꦧ꧀ꦧꦚ꧀ꦚꦹ ꦱꦧ꧀ꦧꦢꦱ꧀ꦱꦴꦮꦷ, ꦄꦥꦫꦶꦱꦺ+ꦱꦁ ꦚꦴꦟꦢꦱ꧀ꦱꦤꦁ ꦥꦛꦶꦗꦴꦤꦴꦠꦶ, ꦕꦫꦠꦺꦴ ꦕ ꦩꦺ ꦠꦶꦛ꧀ꦜꦠꦺꦴ ꦕ ꦱꦸꦠ꧀ꦠꦱ꧀ꦱ ꦕ ꦗꦴꦒꦫꦱ꧀ꦱ ꦕ ꦱꦠꦠꦁ ꦱꦩꦶꦠꦁ ꦚꦴꦟꦢꦱ꧀ꦱꦤꦁ ꦥꦕ꧀ꦕꦸꦥꦛ꧀ꦜꦶꦠ’ꦤ꧀ꦠꦶ. ꦪꦺ ꦠꦺ, ꦨꦤ꧀ꦠꦺ, ꦌꦮꦩꦴꦲꦁꦱꦸ – ‘ꦱꦩꦟꦺꦴ ꦒꦺꦴꦠꦩꦺꦴ ꦱꦧ꧀ꦧꦚ꧀ꦚꦹ ꦱꦧ꧀ꦧꦢꦱ꧀ꦱꦴꦮꦷ, ꦄꦥꦫꦶꦱꦺꦱꦁ ꦚꦴꦟꦢꦱ꧀ꦱꦤꦁ ꦥꦛꦶꦗꦴꦤꦴꦠꦶ, ꦕꦫꦠꦺꦴ ꦕ ꦩꦺ ꦠꦶꦛ꧀ꦜꦠꦺꦴ ꦕ ꦱꦸꦠ꧀ꦠꦱ꧀ꦱ ꦕ ꦗꦴꦒꦫꦱ꧀ꦱ ꦕ ꦱꦠꦠꦁ ꦱꦩꦶꦠꦁ ꦚꦴꦟꦢꦱ꧀ꦱꦤꦁ ꦥꦕ꧀ꦕꦸꦥꦛ꧀ꦜꦶꦠ’ꦤ꧀ꦠꦶ, ꦏꦕ꧀ꦕꦶ ꦠꦺ, ꦨꦤ꧀ꦠꦺ, ꦨꦒꦮꦠꦺꦴ ꦮꦸꦠ꧀ꦠꦮꦴꦢꦶꦤꦺꦴ, ꦤ ꦕ ꦨꦒꦮꦤ꧀ꦠꦁ ꦄꦨꦹꦠꦺꦤ ꦄꦧ꧀ꦨꦴꦕꦶꦏ꧀ꦑꦤ꧀ꦠꦶ, ꦣꦩ꧀ꦩꦱ꧀ꦱ ꦕꦴꦤꦸꦣꦩ꧀ꦩꦁ ꦧ꧀ꦪꦴꦏꦫꦺꦴꦤ꧀ꦠꦶ, ꦤ ꦕ ꦏꦺꦴꦕꦶ ꦱꦲꦣꦩ꧀ꦩꦶꦏꦺꦴ ꦮꦴꦢꦴꦤꦸꦮꦴꦢꦺꦴ ꦒꦴꦫꦪ꧀ꦲꦁ ꦜꦴꦤꦁ ꦄꦴꦒꦕ꧀ꦖꦠꦷ’’ꦠꦶ? ‘‘ꦪꦺ ꦠꦺ, ꦮꦕ꧀ꦖ, ꦌꦮꦩꦴꦲꦁꦱꦸ – ‘ꦱꦩꦟꦺꦴ ꦒꦺꦴꦠꦩꦺꦴ ꦱꦧ꧀ꦧꦚ꧀ꦚꦹ ꦱꦧ꧀ꦧꦢꦱ꧀ꦱꦴꦮꦷ, ꦄꦥꦫꦶꦱꦺꦱꦁ ꦚꦴꦟꦢꦱ꧀ꦱꦤꦁ ꦥꦛꦶꦗꦴꦤꦴꦠꦶ, ꦕꦫꦠꦺꦴ ꦕ ꦩꦺ ꦠꦶꦛ꧀ꦜꦠꦺꦴ ꦕ ꦱꦸꦠ꧀ꦠꦱ꧀ꦱ ꦕ ꦗꦴꦒꦫꦱ꧀ꦱ ꦕ ꦱꦠꦠꦁ ꦱꦩꦶꦠꦁ ꦚꦴꦟꦢꦱ꧀ꦱꦤꦁ ꦥꦕ꧀ꦕꦸꦥꦛ꧀ꦜꦶꦠ’ꦤ꧀ꦠꦶ, ꦤ ꦩꦺ ꦠꦺ ꦮꦸꦠ꧀ꦠꦮꦴꦢꦶꦤꦺꦴ, ꦄꦧ꧀ꦨꦴꦕꦶꦏ꧀ꦑꦤ꧀ꦠꦶ ꦕ ꦥꦤ ꦩꦁ ꦄꦱꦠꦴ ꦄꦨꦹꦠꦺꦤꦴ’’ꦠꦶ.

꧑꧘꧖. ‘‘ꦏꦡꦁ ꦧ꧀ꦪꦴꦏꦫꦩꦴꦤꦴ ꦥꦤ ꦩꦪꦁ, ꦨꦤ꧀ꦠꦺ, ꦮꦸꦠ꧀ꦠꦮꦴꦢꦶꦤꦺꦴ ꦕꦺꦮ ꦨꦒꦮꦠꦺꦴ ꦄꦱ꧀ꦱꦴꦩ, ꦤ ꦕ ꦨꦒꦮꦤ꧀ꦠꦁ ꦄꦨꦹꦠꦺꦤ ꦄꦧ꧀ꦨꦴꦕꦶꦏ꧀ꦑꦺꦪ꧀ꦪꦴꦩ, ꦣꦩ꧀ꦩꦱ꧀ꦱ ꦕꦴꦤꦸꦣꦩ꧀ꦩꦁ ꦧ꧀ꦪꦴꦏꦫꦺꦪ꧀ꦪꦴꦩ, ꦤ ꦕ ꦏꦺꦴꦕꦶ ꦱꦲꦣꦩ꧀ꦩꦶꦏꦺꦴ ꦮꦴꦢꦴꦤꦸꦮꦴꦢꦺꦴ ꦒꦴꦫꦪ꧀ꦲꦁ ꦜꦴꦤꦁ ꦄꦴꦒꦕ꧀ꦖꦺꦪ꧀ꦪꦴ’’ꦠꦶ?

‘‘‘ꦠꦺꦮꦶꦗ꧀ꦗꦺꦴ ꦱꦩꦟꦺꦴ ꦒꦺꦴꦠꦩꦺꦴ’ꦠꦶ ꦑꦺꦴ, ꦮꦕ꧀ꦖ, ꦧ꧀ꦪꦴꦏꦫꦩꦴꦤꦺꦴ ꦮꦸꦠ꧀ꦠꦮꦴꦢꦷ ꦕꦺꦮ ꦩꦺ ꦄꦱ꧀ꦱ, ꦤ ꦕ ꦩꦁ ꦄꦨꦹꦠꦺꦤ ꦄꦧ꧀ꦨꦴꦕꦶꦏ꧀ꦑꦺꦪ꧀ꦪ, ꦣꦩ꧀ꦩꦱ꧀ꦱ ꦕꦴꦤꦸꦣꦩ꧀ꦩꦁ ꦧ꧀ꦪꦴꦏꦫꦺꦪ꧀ꦪ, ꦤ ꦕ ꦏꦺꦴꦕꦶ ꦱꦲꦣꦩ꧀ꦩꦶꦏꦺꦴ ꦮꦴꦢꦴꦤꦸꦮꦴꦢꦺꦴ ꦒꦴꦫꦪ꧀ꦲꦁ ꦜꦴꦤꦁ ꦄꦴꦒꦕ꧀ꦖꦺꦪ꧀ꦪ. ꦄꦲꦚ꧀ꦲꦶ, ꦮꦕ꧀ꦖ, ꦪꦴꦮꦢꦺꦮ ꦄꦴꦏꦔ꧀ꦑꦴꦩꦶ ꦄꦤꦺꦏꦮꦶꦲꦶꦠꦁ ꦥꦸꦧ꧀ꦧꦺꦤꦶꦮꦴꦱꦁ ꦄꦤꦸꦱ꧀ꦱꦫꦴꦩꦶ, ꦱꦺꦪ꧀ꦪꦡꦶꦢꦁ – ꦌꦏꦩ꧀ꦥꦶ ꦗꦴꦠꦶꦁ ꦢ꧀ꦮꦺꦥꦶ ꦗꦴꦠꦶꦪꦺꦴ…ꦥꦺ… ꦆꦠꦶ ꦱꦴꦏꦴꦫꦁ ꦱꦈꦢ꧀ꦢꦺꦱꦁ ꦄꦤꦺꦏꦮꦶꦲꦶꦠꦁ ꦥꦸꦧ꧀ꦧꦺꦤꦶꦮꦴꦱꦁ ꦄꦤꦸꦱ꧀ꦱꦫꦴꦩꦶ. ꦄꦲꦚ꧀ꦲꦶ, ꦮꦕ꧀ꦖ, ꦪꦴꦮꦢꦺꦮ ꦄꦴꦏꦔ꧀ꦑꦴꦩꦶ ꦢꦶꦧ꧀ꦧꦺꦤ ꦕꦏ꧀ꦑꦸꦤꦴ ꦮꦶꦱꦸꦢ꧀ꦣꦺꦤ ꦄꦠꦶꦏ꧀ꦏꦤ꧀ꦠꦩꦴꦤꦸꦱꦏꦺꦤ ꦱꦠ꧀ꦠꦺ ꦥꦱ꧀ꦱꦴꦩꦶ ꦕꦮꦩꦴꦤꦺ ꦈꦥꦥꦗ꧀ꦗꦩꦴꦤꦺ ꦲꦷꦤꦺ ꦥꦟꦷꦠꦺ ꦱꦸꦮꦟ꧀ꦟꦺ ꦢꦸꦧ꧀ꦧꦟ꧀ꦟꦺ ꦱꦸꦒꦠꦺ ꦢꦸꦒ꧀ꦒꦠꦺ…ꦥꦺ… ꦪꦡꦴꦏꦩ꧀ꦩꦹꦥꦒꦺ ꦱꦠ꧀ꦠꦺ ꦥꦗꦴꦤꦴꦩꦶ. ꦄꦲꦚ꧀ꦲꦶ, ꦮꦕ꧀ꦖ, ꦄꦴꦱꦮꦴꦤꦁ ꦑꦪꦴ ꦄꦤꦴꦱꦮꦁ ꦕꦺꦠꦺꦴꦮꦶꦩꦸꦠ꧀ꦠꦶꦁ ꦥꦚ꧀ꦚꦴꦮꦶꦩꦸꦠ꧀ꦠꦶꦁ ꦢꦶꦛ꧀ꦜꦺꦮ ꦣꦩ꧀ꦩꦺ ꦱꦪꦁ ꦄꦨꦶꦚ꧀ꦚꦴ ꦱꦕ꧀ꦖꦶꦏꦠ꧀ꦮꦴ ꦈꦥꦱꦩ꧀ꦥꦗ꧀ꦗ ꦮꦶꦲꦫꦴꦩꦶ.

‘‘‘ꦠꦺꦮꦶꦗ꧀ꦗꦺꦴ ꦱꦩꦟꦺꦴ ꦒꦺꦴꦠꦩꦺꦴ’ꦠꦶ ꦑꦺꦴ, ꦮꦕ꧀ꦖ, ꦧ꧀ꦪꦴꦏꦫꦩꦴꦤꦺꦴ ꦮꦸꦠ꧀ꦠꦮꦴꦢꦷ ꦕꦺꦮ ꦩꦺ ꦄꦱ꧀ꦱ, ꦤ ꦕ ꦩꦁ ꦄꦨꦹꦠꦺꦤ ꦄꦧ꧀ꦨꦴꦕꦶꦏ꧀ꦑꦺꦪ꧀ꦪ, ꦣꦩ꧀ꦩꦱ꧀ꦱ ꦕꦴꦤꦸꦣꦩ꧀ꦩꦁ ꦧ꧀ꦪꦴꦏꦫꦺꦪ꧀ꦪ, ꦤ ꦕ ꦏꦺꦴꦕꦶ ꦱꦲꦣꦩ꧀ꦩꦶꦏꦺꦴ ꦮꦴꦢꦴꦤꦸꦮꦴꦢꦺꦴ ꦒꦴꦫꦪ꧀ꦲꦁ ꦜꦴꦤꦁ ꦄꦴꦒꦕ꧀ꦖꦺꦪ꧀ꦪꦴ’’ꦠꦶ.

ꦌꦮꦁ ꦮꦸꦠ꧀ꦠꦺ, ꦮꦕ꧀ꦖꦒꦺꦴꦠ꧀ꦠꦺꦴ ꦥꦫꦶꦧ꧀ꦧꦴꦗꦏꦺꦴ ꦨꦒꦮꦤ꧀ꦠꦁ ꦌꦠꦢꦮꦺꦴꦕ – ‘‘ꦄꦠ꧀ꦡꦶ ꦤꦸ ꦑꦺꦴ, ꦨꦺꦴ ꦒꦺꦴꦠꦩ, ꦏꦺꦴꦕꦶ ꦒꦶꦲꦷ ꦒꦶꦲꦶꦱꦁꦪꦺꦴꦗꦤꦁ ꦄꦥ꧀ꦥꦲꦴꦪ ꦏꦴꦪꦱ꧀ꦱ ꦨꦺꦢꦴ ꦢꦸꦏ꧀ꦑꦱ꧀ꦱꦤ꧀ꦠꦏꦫꦺꦴ’’ꦠꦶ? ‘‘ꦤꦠ꧀ꦡꦶ ꦑꦺꦴ, ꦮꦕ꧀ꦖ, ꦏꦺꦴꦕꦶ ꦒꦶꦲꦷ ꦒꦶꦲꦶꦱꦁꦪꦺꦴꦗꦤꦁ ꦄꦥ꧀ꦥꦲꦴꦪ ꦏꦴꦪꦱ꧀ꦱ ꦨꦺꦢꦴ ꦢꦸꦏ꧀ꦑꦱ꧀ꦱꦤ꧀ꦠꦏꦫꦺꦴ’’ꦠꦶ.

‘‘ꦄꦠ꧀ꦡꦶ ꦥꦤ, ꦨꦺꦴ ꦒꦺꦴꦠꦩ, ꦏꦺꦴꦕꦶ ꦒꦶꦲꦷ ꦒꦶꦲꦶꦱꦁꦪꦺꦴꦗꦤꦁ ꦄꦥ꧀ꦥꦲꦴꦪ ꦏꦴꦪꦱ꧀ꦱ ꦨꦺꦢꦴ ꦱꦒ꧀ꦒꦹꦥꦒꦺꦴ’’ꦠꦶ? ‘‘ꦤ ꦑꦺꦴ, ꦮꦕ꧀ꦖ, ꦌꦏꦁꦪꦺꦮ ꦱꦠꦁ ꦤ ꦢ꧀ꦮꦺ ꦱꦠꦴꦤꦶ ꦤ ꦠꦷꦟꦶ ꦱꦠꦴꦤꦶ ꦤ ꦕꦠ꧀ꦠꦴꦫꦶ ꦱꦠꦴꦤꦶ ꦤ ꦥꦚ꧀ꦕ ꦱꦠꦴꦤꦶ, ꦄꦡ ꦑꦺꦴ ꦨꦶꦪ꧀ꦪꦺꦴꦮ ꦪꦺ ꦒꦶꦲꦷ ꦒꦶꦲꦶꦱꦁꦪꦺꦴꦗꦤꦁ ꦄꦥ꧀ꦥꦲꦴꦪ ꦏꦴꦪꦱ꧀ꦱ ꦨꦺꦢꦴ ꦱꦒ꧀ꦒꦹꦥꦒꦴ’’ꦠꦶ [‘‘ꦄꦠ꧀ꦡꦶ ꦑꦺꦴ ꦮꦕ꧀ꦖ ꦏꦺꦴꦕꦶ ꦒꦶꦲꦷ ꦒꦶꦲꦶꦱꦁꦪꦺꦴꦗꦤꦁ ꦄꦥ꧀ꦥꦲꦴꦪ ꦏꦴꦪꦱ꧀ꦱ ꦨꦺꦢꦴ ꦱꦒ꧀ꦒꦹꦥꦒꦺꦴꦠꦶ’’. (ꦏ.)].

‘‘ꦄꦠ꧀ꦡꦶ ꦤꦸ ꦑꦺꦴ, ꦨꦺꦴ ꦒꦺꦴꦠꦩ, ꦏꦺꦴꦕꦶ ꦄꦴꦗꦷꦮꦏꦺꦴ [ꦄꦴꦗꦷꦮꦶꦏꦺꦴ (ꦏ.)] ꦏꦴꦪꦱ꧀ꦱ ꦨꦺꦢꦴ ꦢꦸꦏ꧀ꦑꦱ꧀ꦱꦤ꧀ꦠꦏꦫꦺꦴ’’ꦠꦶ? ‘‘ꦤꦠ꧀ꦡꦶ ꦑꦺꦴ, ꦮꦕ꧀ꦖ, ꦏꦺꦴꦕꦶ ꦄꦴꦗꦷꦮꦏꦺꦴ ꦏꦴꦪꦱ꧀ꦱ ꦨꦺꦢꦴ ꦢꦸꦏ꧀ꦑꦱ꧀ꦱꦤ꧀ꦠꦏꦫꦺꦴ’’ꦠꦶ.

‘‘ꦄꦠ꧀ꦡꦶ ꦥꦤ, ꦨꦺꦴ ꦒꦺꦴꦠꦩ, ꦏꦺꦴꦕꦶ ꦄꦴꦗꦷꦮꦏꦺꦴ ꦏꦴꦪꦱ꧀ꦱ ꦨꦺꦢꦴ ꦱꦒ꧀ꦒꦹꦥꦒꦺꦴ’’ꦠꦶ? ‘‘ꦆꦠꦺꦴ ꦑꦺꦴ ꦱꦺꦴ, ꦮꦕ꧀ꦖ, ꦌꦏꦤꦮꦸꦠꦺꦴ ꦏꦥ꧀ꦥꦺꦴ [ꦆꦠꦺꦴ ꦏꦺꦴ ꦮꦕ꧀ꦖ ꦌꦏꦤꦮꦸꦠꦺ ꦏꦥ꧀ꦥꦺ (ꦏ.)] ꦪꦩꦲꦁ ꦄꦤꦸꦱ꧀ꦱꦫꦴꦩꦶ, ꦤꦴꦨꦶꦗꦴꦤꦴꦩꦶ ꦏꦚ꧀ꦕꦶ ꦄꦴꦗꦷꦮꦏꦁ ꦱꦒ꧀ꦒꦹꦥꦒꦁ ꦄꦚ꧀ꦚꦠ꧀ꦫ ꦌꦏꦺꦤ; ꦱꦺꦴꦥꦴꦱꦶ ꦏꦩ꧀ꦩꦮꦴꦢꦷ ꦏꦶꦫꦶꦪꦮꦴꦢꦷ’’ꦠꦶ. ‘‘ꦌꦮꦁ ꦱꦤ꧀ꦠꦺ, ꦨꦺꦴ ꦒꦺꦴꦠꦩ, ꦱꦸꦚ꧀ꦚꦁ ꦄꦢꦸꦁ ꦠꦶꦠ꧀ꦡꦴꦪꦠꦤꦁ ꦄꦤ꧀ꦠꦩꦱꦺꦴ ꦱꦒ꧀ꦒꦹꦥꦒꦺꦤꦥꦷ’’ꦠꦶ? ‘‘ꦌꦮꦁ, ꦮꦕ꧀ꦖ, ꦱꦸꦚ꧀ꦚꦁ ꦄꦢꦸꦁ ꦠꦶꦠ꧀ꦡꦴꦪꦠꦤꦁ ꦄꦤ꧀ꦠꦩꦱꦺꦴ ꦱꦒ꧀ꦒꦹꦥꦒꦺꦤꦥꦷ’’ꦠꦶ.

ꦆꦢꦩꦮꦺꦴꦕ ꦨꦒꦮꦴ. ꦄꦠ꧀ꦠꦩꦤꦺꦴ ꦮꦕ꧀ꦖꦒꦺꦴꦠ꧀ꦠꦺꦴ ꦥꦫꦶꦧ꧀ꦧꦴꦗꦏꦺꦴ ꦨꦒꦮꦠꦺꦴ ꦨꦴꦱꦶꦠꦁ ꦄꦨꦶꦤꦤ꧀ꦢꦷꦠꦶ.

ꦠꦺꦮꦶꦗ꧀ꦗꦮꦕ꧀ꦖꦱꦸꦠ꧀ꦠꦁ ꦤꦶꦛ꧀ꦜꦶꦠꦁ ꦥꦜꦩꦁ.

꧒. ꦄꦒ꧀ꦒꦶꦮꦕ꧀ꦖꦱꦸꦠ꧀ꦠꦁ

꧑꧘꧗. ꦌꦮꦁ ꦩꦺ ꦱꦸꦠꦁ – ꦌꦏꦁ ꦱꦩꦪꦁ ꦨꦒꦮꦴ ꦱꦴꦮꦠ꧀ꦡꦶꦪꦁ ꦮꦶꦲꦫꦠꦶ ꦗꦺꦠꦮꦤꦺ ꦄꦤꦴꦡꦥꦶꦟ꧀ꦝꦶꦏꦱ꧀ꦱ ꦄꦴꦫꦴꦩꦺ. ꦄꦡ ꦑꦺꦴ ꦮꦕ꧀ꦖꦒꦺꦴꦠ꧀ꦠꦺꦴ ꦥꦫꦶꦧ꧀ꦧꦴꦗꦏꦺꦴ ꦪꦺꦤ ꦨꦒꦮꦴ ꦠꦺꦤꦸꦥꦱꦔ꧀ꦏꦩꦶ; ꦈꦥꦱꦔ꧀ꦏꦩꦶꦠ꧀ꦮꦴ ꦨꦒꦮꦠꦴ ꦱꦢ꧀ꦣꦶꦁ ꦱꦩ꧀ꦩꦺꦴꦢꦶ. ꦱꦩ꧀ꦩꦺꦴꦢꦤꦷꦪꦁ ꦏꦡꦁ ꦱꦴꦫꦟꦷꦪꦁ ꦮꦷꦠꦶꦱꦴꦫꦺꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦷꦢꦶ. ꦌꦏꦩꦤ꧀ꦠꦁ ꦤꦶꦱꦶꦤ꧀ꦤꦺꦴ ꦑꦺꦴ ꦮꦕ꧀ꦖꦒꦺꦴꦠ꧀ꦠꦺꦴ ꦥꦫꦶꦧ꧀ꦧꦴꦗꦏꦺꦴ ꦨꦒꦮꦤ꧀ꦠꦁ ꦌꦠꦢꦮꦺꦴꦕ –

‘‘ꦏꦶꦁ ꦤꦸ ꦑꦺꦴ, ꦨꦺꦴ ꦒꦺꦴꦠꦩ, ‘ꦱꦱ꧀ꦱꦠꦺꦴ ꦭꦺꦴꦏꦺꦴ, ꦆꦢꦩꦺꦮ ꦱꦕ꧀ꦕꦁ ꦩꦺꦴꦓꦩꦚ꧀ꦚ’ꦤ꧀ꦠꦶ – ꦌꦮꦁꦢꦶꦛ꧀ꦜꦶ [ꦌꦮꦁꦢꦶꦛ꧀ꦜꦷ (ꦱꦷ. ꦱ꧀ꦪꦴ. ꦏꦁ. ꦏ.)] ꦨꦮꦁ ꦒꦺꦴꦠꦩꦺꦴ’’ꦠꦶ? ‘‘ꦤ ꦑꦺꦴ ꦄꦲꦁ, ꦮꦕ꧀ꦖ, ꦌꦮꦁꦢꦶꦛ꧀ꦜꦶ – ‘ꦱꦱ꧀ꦱꦠꦺꦴ ꦭꦺꦴꦏꦺꦴ, ꦆꦢꦩꦺꦮ ꦱꦕ꧀ꦕꦁ ꦩꦺꦴꦓꦩꦚ꧀ꦚ’’’ꦤ꧀ꦠꦶ.

‘‘ꦏꦶꦁ ꦥꦤ, ꦨꦺꦴ ꦒꦺꦴꦠꦩ, ‘ꦄꦱꦱ꧀ꦱꦠꦺꦴ ꦭꦺꦴꦏꦺꦴ, ꦆꦢꦩꦺꦮ ꦱꦕ꧀ꦕꦁ ꦩꦺꦴꦓꦩꦚ꧀ꦚ’ꦤ꧀ꦠꦶ – ꦌꦮꦁꦢꦶꦛ꧀ꦜꦶ ꦨꦮꦁ ꦒꦺꦴꦠꦩꦺꦴ’’ꦠꦶ? ‘‘ꦤ ꦑꦺꦴ ꦄꦲꦁ, ꦮꦕ꧀ꦖ, ꦌꦮꦁꦢꦶꦛ꧀ꦜꦶ – ‘ꦄꦱꦱ꧀ꦱꦠꦺꦴ ꦭꦺꦴꦏꦺꦴ, ꦆꦢꦩꦺꦮ ꦱꦕ꧀ꦕꦁ ꦩꦺꦴꦓꦩꦚ꧀ꦚ’’’ꦤ꧀ꦠꦶ.

‘‘ꦏꦶꦁ ꦤꦸ ꦑꦺꦴ, ꦨꦺꦴ ꦒꦺꦴꦠꦩ, ‘ꦄꦤ꧀ꦠꦮꦴ ꦭꦺꦴꦏꦺꦴ, ꦆꦢꦩꦺꦮ ꦱꦕ꧀ꦕꦁ ꦩꦺꦴꦓꦩꦚ꧀ꦚ’ꦤ꧀ꦠꦶ – ꦌꦮꦁꦢꦶꦛ꧀ꦜꦶ ꦨꦮꦁ ꦒꦺꦴꦠꦩꦺꦴ’’ꦠꦶ? ‘‘ꦤ ꦑꦺꦴ ꦄꦲꦁ, ꦮꦕ꧀ꦖ, ꦌꦮꦁꦢꦶꦛ꧀ꦜꦶ – ‘ꦄꦤ꧀ꦠꦮꦴ ꦭꦺꦴꦏꦺꦴ, ꦆꦢꦩꦺꦮ ꦱꦕ꧀ꦕꦁ ꦩꦺꦴꦓꦩꦚ꧀ꦚ’’’ꦤ꧀ꦠꦶ.

‘‘ꦏꦶꦁ ꦥꦤ, ꦨꦺꦴ ꦒꦺꦴꦠꦩ, ‘ꦄꦤꦤ꧀ꦠꦮꦴ ꦭꦺꦴꦏꦺꦴ, ꦆꦢꦩꦺꦮ ꦱꦕ꧀ꦕꦁ ꦩꦺꦴꦓꦩꦚ꧀ꦚ’ꦤ꧀ꦠꦶ – ꦌꦮꦁꦢꦶꦛ꧀ꦜꦶ ꦨꦮꦁ ꦒꦺꦴꦠꦩꦺꦴ’’ꦠꦶ? ‘‘ꦤ ꦑꦺꦴ ꦄꦲꦁ, ꦮꦕ꧀ꦖ, ꦌꦮꦁꦢꦶꦛ꧀ꦜꦶ – ‘ꦄꦤꦤ꧀ꦠꦮꦴ ꦭꦺꦴꦏꦺꦴ, ꦆꦢꦩꦺꦮ ꦱꦕ꧀ꦕꦁ ꦩꦺꦴꦓꦩꦚ꧀ꦚ’’’ꦤ꧀ꦠꦶ.

‘‘ꦏꦶꦁ ꦤꦸ ꦑꦺꦴ, ꦨꦺꦴ ꦒꦺꦴꦠꦩ, ‘ꦠꦁ ꦗꦷꦮꦁ ꦠꦁ ꦱꦫꦷꦫꦁ, ꦆꦢꦩꦺꦮ ꦱꦕ꧀ꦕꦁ ꦩꦺꦴꦓꦩꦚ꧀ꦚ’ꦤ꧀ꦠꦶ – ꦌꦮꦁꦢꦶꦛ꧀ꦜꦶ ꦨꦮꦁ ꦒꦺꦴꦠꦩꦺꦴ’’ꦠꦶ? ‘‘ꦤ ꦑꦺꦴ ꦄꦲꦁ, ꦮꦕ꧀ꦖ, ꦌꦮꦁꦢꦶꦛ꧀ꦜꦶ – ‘ꦠꦁ ꦗꦷꦮꦁ ꦠꦁ ꦱꦫꦷꦫꦁ, ꦆꦢꦩꦺꦮ ꦱꦕ꧀ꦕꦁ ꦩꦺꦴꦓꦩꦚ꧀ꦚ’’’ꦤ꧀ꦠꦶ.

‘‘ꦏꦶꦁ ꦥꦤ, ꦨꦺꦴ ꦒꦺꦴꦠꦩ, ‘ꦄꦚ꧀ꦚꦁ ꦗꦷꦮꦁ ꦄꦚ꧀ꦚꦁ ꦱꦫꦷꦫꦁ, ꦆꦢꦩꦺꦮ ꦱꦕ꧀ꦕꦁ ꦩꦺꦴꦓꦩꦚ꧀ꦚ’ꦤ꧀ꦠꦶ – ꦌꦮꦁꦢꦶꦛ꧀ꦜꦶ ꦨꦮꦁ ꦒꦺꦴꦠꦩꦺꦴ’’ꦠꦶ? ‘‘ꦤ ꦑꦺꦴ ꦄꦲꦁ, ꦮꦕ꧀ꦖ, ꦌꦮꦁꦢꦶꦛ꧀ꦜꦶ – ‘ꦄꦚ꧀ꦚꦁ ꦗꦷꦮꦁ ꦄꦚ꧀ꦚꦁ ꦱꦫꦷꦫꦁ, ꦆꦢꦩꦺꦮ ꦱꦕ꧀ꦕꦁ ꦩꦺꦴꦓꦩꦚ꧀ꦚ’’’ꦤ꧀ꦠꦶ.

‘‘ꦏꦶꦁ ꦤꦸ ꦑꦺꦴ, ꦨꦺꦴ ꦒꦺꦴꦠꦩ, ‘ꦲꦺꦴꦠꦶ ꦠꦡꦴꦒꦠꦺꦴ ꦥꦫꦁ ꦩꦫꦟꦴ, ꦆꦢꦩꦺꦮ ꦱꦕ꧀ꦕꦁ ꦩꦺꦴꦓꦩꦚ꧀ꦚ’ꦤ꧀ꦠꦶ – ꦌꦮꦁꦢꦶꦛ꧀ꦜꦶ ꦨꦮꦁ ꦒꦺꦴꦠꦩꦺꦴ’’ꦠꦶ? ‘‘ꦤ ꦑꦺꦴ ꦄꦲꦁ, ꦮꦕ꧀ꦖ, ꦌꦮꦁꦢꦶꦛ꧀ꦜꦶ – ‘ꦲꦺꦴꦠꦶ ꦠꦡꦴꦒꦠꦺꦴ ꦥꦫꦁ ꦩꦫꦟꦴ, ꦆꦢꦩꦺꦮ ꦱꦕ꧀ꦕꦁ ꦩꦺꦴꦓꦩꦚ꧀ꦚ’’’ꦤ꧀ꦠꦶ.

‘‘ꦏꦶꦁ ꦥꦤ, ꦨꦺꦴ ꦒꦺꦴꦠꦩ, ‘ꦤ ꦲꦺꦴꦠꦶ ꦠꦡꦴꦒꦠꦺꦴ ꦥꦫꦁ ꦩꦫꦟꦴ, ꦆꦢꦩꦺꦮ ꦱꦕ꧀ꦕꦁ ꦩꦺꦴꦓꦩꦚ꧀ꦚ’ꦤ꧀ꦠꦶ – ꦌꦮꦁꦢꦶꦛ꧀ꦜꦶ ꦨꦮꦁ ꦒꦺꦴꦠꦩꦺꦴ’’ꦠꦶ? ‘‘ꦤ ꦑꦺꦴ ꦄꦲꦁ, ꦮꦕ꧀ꦖ, ꦌꦮꦁꦢꦶꦛ꧀ꦜꦶ – ‘ꦤ ꦲꦺꦴꦠꦶ ꦠꦡꦴꦒꦠꦺꦴ ꦥꦫꦁ ꦩꦫꦟꦴ, ꦆꦢꦩꦺꦮ ꦱꦕ꧀ꦕꦁ ꦩꦺꦴꦓꦩꦚ꧀ꦚ’’’ꦤ꧀ꦠꦶ.

‘‘ꦏꦶꦁ ꦤꦸ ꦑꦺꦴ, ꦨꦺꦴ ꦒꦺꦴꦠꦩ, ‘ꦲꦺꦴꦠꦶ ꦕ ꦤ ꦕ ꦲꦺꦴꦠꦶ ꦠꦡꦴꦒꦠꦺꦴ ꦥꦫꦁ ꦩꦫꦟꦴ, ꦆꦢꦩꦺꦮ ꦱꦕ꧀ꦕꦁ ꦩꦺꦴꦓꦩꦚ꧀ꦚ’ꦤ꧀ꦠꦶ – ꦌꦮꦁꦢꦶꦛ꧀ꦜꦶ ꦨꦮꦁ ꦒꦺꦴꦠꦩꦺꦴ’’ꦠꦶ? ‘‘ꦤ ꦑꦺꦴ ꦄꦲꦁ, ꦮꦕ꧀ꦖ, ꦌꦮꦁꦢꦶꦛ꧀ꦜꦶ – ‘ꦲꦺꦴꦠꦶ ꦕ ꦤ ꦕ ꦲꦺꦴꦠꦶ ꦠꦡꦴꦒꦠꦺꦴ ꦥꦫꦁ ꦩꦫꦟꦴ, ꦆꦢꦩꦺꦮ ꦱꦕ꧀ꦕꦁ ꦩꦺꦴꦓꦩꦚ꧀ꦚ’’’ꦤ꧀ꦠꦶ.

‘‘ꦏꦶꦁ ꦥꦤ, ꦨꦺꦴ ꦒꦺꦴꦠꦩ, ‘ꦤꦺꦮ ꦲꦺꦴꦠꦶ ꦤ ꦤ ꦲꦺꦴꦠꦶ ꦠꦡꦴꦒꦠꦺꦴ ꦥꦫꦁ ꦩꦫꦟꦴ, ꦆꦢꦩꦺꦮ ꦱꦕ꧀ꦕꦁ ꦩꦺꦴꦓꦩꦚ꧀ꦚ’ꦤ꧀ꦠꦶ – ꦌꦮꦁꦢꦶꦛ꧀ꦜꦶ ꦨꦮꦁ ꦒꦺꦴꦠꦩꦺꦴ’’ꦠꦶ? ‘‘ꦤ ꦑꦺꦴ ꦄꦲꦁ, ꦮꦕ꧀ꦖ, ꦌꦮꦁꦢꦶꦛ꧀ꦜꦶ – ‘ꦤꦺꦮ ꦲꦺꦴꦠꦶ ꦤ ꦤ ꦲꦺꦴꦠꦶ ꦠꦡꦴꦒꦠꦺꦴ ꦥꦫꦁ ꦩꦫꦟꦴ, ꦆꦢꦩꦺꦮ ꦱꦕ꧀ꦕꦁ ꦩꦺꦴꦓꦩꦚ꧀ꦚ’’’ꦤ꧀ꦠꦶ.

꧑꧘꧘. ‘‘‘ꦏꦶꦁ ꦤꦸ ꦑꦺꦴ, ꦨꦺꦴ ꦒꦺꦴꦠꦩ, ꦱꦱ꧀ꦱꦠꦺꦴ ꦭꦺꦴꦏꦺꦴ, ꦆꦢꦩꦺꦮ ꦱꦕ꧀ꦕꦁ ꦩꦺꦴꦓꦩꦚ꧀ꦚꦤ꧀ꦠꦶ – ꦌꦮꦁꦢꦶꦛ꧀ꦜꦶ ꦨꦮꦁ ꦒꦺꦴꦠꦩꦺꦴ’ꦠꦶ ꦆꦠꦶ ꦥꦸꦛ꧀ꦜꦺꦴ ꦱꦩꦴꦤꦺꦴ ‘ꦤ ꦑꦺꦴ ꦄꦲꦁ, ꦮꦕ꧀ꦖ, ꦌꦮꦁꦢꦶꦛ꧀ꦜꦶ – ꦱꦱ꧀ꦱꦠꦺꦴ ꦭꦺꦴꦏꦺꦴ, ꦆꦢꦩꦺꦮ ꦱꦕ꧀ꦕꦁ ꦩꦺꦴꦓꦩꦚ꧀ꦚ’ꦤ꧀ꦠꦶ ꦮꦢꦺꦱꦶ [ꦩꦺꦴꦓꦩꦚ꧀ꦚꦤ꧀ꦠꦷꦠꦶ ꦮꦢꦺꦱꦶ (ꦱꦷ.), ꦩꦺꦴꦓꦩꦚ꧀ꦚꦤ꧀ꦠꦶ ꦆꦠꦶ ꦮꦢꦺꦱꦶ (?)]. ‘ꦏꦶꦁ ꦥꦤ, ꦨꦺꦴ ꦒꦺꦴꦠꦩ, ꦄꦱꦱ꧀ꦱꦠꦺꦴ ꦭꦺꦴꦏꦺꦴ, ꦆꦢꦩꦺꦮ ꦱꦕ꧀ꦕꦁ ꦩꦺꦴꦓꦩꦚ꧀ꦚꦤ꧀ꦠꦶ – ꦌꦮꦁꦢꦶꦛ꧀ꦜꦶ ꦨꦮꦁ ꦒꦺꦴꦠꦩꦺꦴ’ꦠꦶ ꦆꦠꦶ ꦥꦸꦛ꧀ꦜꦺꦴ ꦱꦩꦴꦤꦺꦴ ‘ꦤ ꦑꦺꦴ ꦄꦲꦁ, ꦮꦕ꧀ꦖ, ꦌꦮꦁꦢꦶꦛ꧀ꦜꦶ – ꦄꦱꦱ꧀ꦱꦠꦺꦴ ꦭꦺꦴꦏꦺꦴ, ꦆꦢꦩꦺꦮ ꦱꦕ꧀ꦕꦁ ꦩꦺꦴꦓꦩꦚ꧀ꦚ’ꦤ꧀ꦠꦶ ꦮꦢꦺꦱꦶ. ‘ꦏꦶꦁ ꦤꦸ ꦑꦺꦴ, ꦨꦺꦴ ꦒꦺꦴꦠꦩ, ꦄꦤ꧀ꦠꦮꦴ ꦭꦺꦴꦏꦺꦴ, ꦆꦢꦩꦺꦮ ꦱꦕ꧀ꦕꦁ ꦩꦺꦴꦓꦩꦚ꧀ꦚꦤ꧀ꦠꦶ – ꦌꦮꦁꦢꦶꦛ꧀ꦜꦶ ꦨꦮꦁ ꦒꦺꦴꦠꦩꦺꦴ’ꦠꦶ ꦆꦠꦶ ꦥꦸꦛ꧀ꦜꦺꦴ ꦱꦩꦴꦤꦺꦴ ‘ꦤ ꦑꦺꦴ ꦄꦲꦁ, ꦮꦕ꧀ꦖ, ꦌꦮꦁꦢꦶꦛ꧀ꦜꦶ – ꦄꦤ꧀ꦠꦮꦴ ꦭꦺꦴꦏꦺꦴ, ꦆꦢꦩꦺꦮ ꦱꦕ꧀ꦕꦁ ꦩꦺꦴꦓꦩꦚ꧀ꦚ’ꦤ꧀ꦠꦶ ꦮꦢꦺꦱꦶ. ‘ꦏꦶꦁ ꦥꦤ, ꦨꦺꦴ ꦒꦺꦴꦠꦩ, ꦄꦤꦤ꧀ꦠꦮꦴ ꦭꦺꦴꦏꦺꦴ, ꦆꦢꦩꦺꦮ ꦱꦕ꧀ꦕꦁ ꦩꦺꦴꦓꦩꦚ꧀ꦚꦤ꧀ꦠꦶ – ꦌꦮꦁꦢꦶꦛ꧀ꦜꦶ ꦨꦮꦁ ꦒꦺꦴꦠꦩꦺꦴ’ꦠꦶ ꦆꦠꦶ ꦥꦸꦛ꧀ꦜꦺꦴ ꦱꦩꦴꦤꦺꦴ ‘ꦤ ꦑꦺꦴ ꦄꦲꦁ, ꦮꦕ꧀ꦖ, ꦌꦮꦁꦢꦶꦛ꧀ꦜꦶ – ꦄꦤꦤ꧀ꦠꦮꦴ ꦭꦺꦴꦏꦺꦴ, ꦆꦢꦩꦺꦮ ꦱꦕ꧀ꦕꦁ ꦩꦺꦴꦓꦩꦚ꧀ꦚ’ꦤ꧀ꦠꦶ ꦮꦢꦺꦱꦶ. ‘ꦏꦶꦁ ꦤꦸ ꦑꦺꦴ, ꦨꦺꦴ ꦒꦺꦴꦠꦩ, ꦠꦁ ꦗꦷꦮꦁ ꦠꦁ ꦱꦫꦷꦫꦁ, ꦆꦢꦩꦺꦮ ꦱꦕ꧀ꦕꦁ ꦩꦺꦴꦓꦩꦚ꧀ꦚꦤ꧀ꦠꦶ – ꦌꦮꦁꦢꦶꦛ꧀ꦜꦶ ꦨꦮꦁ ꦒꦺꦴꦠꦩꦺꦴ’ꦠꦶ ꦆꦠꦶ ꦥꦸꦛ꧀ꦜꦺꦴ ꦱꦩꦴꦤꦺꦴ ‘ꦤ ꦑꦺꦴ ꦄꦲꦁ, ꦮꦕ꧀ꦖ, ꦌꦮꦁꦢꦶꦛ꧀ꦜꦶ – ꦠꦁ ꦗꦷꦮꦁ ꦠꦁ ꦱꦫꦷꦫꦁ, ꦆꦢꦩꦺꦮ ꦱꦕ꧀ꦕꦁ ꦩꦺꦴꦓꦩꦚ꧀ꦚ’ꦤ꧀ꦠꦶ ꦮꦢꦺꦱꦶ. ‘ꦏꦶꦁ ꦥꦤ, ꦨꦺꦴ ꦒꦺꦴꦠꦩ, ꦄꦚ꧀ꦚꦁ ꦗꦷꦮꦁ ꦄꦚ꧀ꦚꦁ ꦱꦫꦷꦫꦁ, ꦆꦢꦩꦺꦮ ꦱꦕ꧀ꦕꦁ ꦩꦺꦴꦓꦩꦚ꧀ꦚꦤ꧀ꦠꦶ – ꦌꦮꦁꦢꦶꦛ꧀ꦜꦶ ꦨꦮꦁ ꦒꦺꦴꦠꦩꦺꦴ’ꦠꦶ ꦆꦠꦶ ꦥꦸꦛ꧀ꦜꦺꦴ ꦱꦩꦴꦤꦺꦴ ‘ꦤ ꦑꦺꦴ ꦄꦲꦁ, ꦮꦕ꧀ꦖ, ꦌꦮꦁꦢꦶꦛ꧀ꦜꦶ – ꦄꦚ꧀ꦚꦁ ꦗꦷꦮꦁ ꦄꦚ꧀ꦚꦁ ꦱꦫꦷꦫꦁ, ꦆꦢꦩꦺꦮ ꦱꦕ꧀ꦕꦁ ꦩꦺꦴꦓꦩꦚ꧀ꦚ’ꦤ꧀ꦠꦶ ꦮꦢꦺꦱꦶ. ‘ꦏꦶꦁ ꦤꦸ ꦑꦺꦴ, ꦨꦺꦴ ꦒꦺꦴꦠꦩ, ꦲꦺꦴꦠꦶ ꦠꦡꦴꦒꦠꦺꦴ ꦥꦫꦁ ꦩꦫꦟꦴ, ꦆꦢꦩꦺꦮ ꦱꦕ꧀ꦕꦁ ꦩꦺꦴꦓꦩꦚ꧀ꦚꦤ꧀ꦠꦶ – ꦌꦮꦁꦢꦶꦛ꧀ꦜꦶ ꦨꦮꦁ ꦒꦺꦴꦠꦩꦺꦴ’ꦠꦶ ꦆꦠꦶ ꦥꦸꦛ꧀ꦜꦺꦴ ꦱꦩꦴꦤꦺꦴ ‘ꦤ ꦑꦺꦴ ꦄꦲꦁ, ꦮꦕ꧀ꦖ, ꦌꦮꦁꦢꦶꦛ꧀ꦜꦶ – ꦲꦺꦴꦠꦶ ꦠꦡꦴꦒꦠꦺꦴ ꦥꦫꦁ ꦩꦫꦟꦴ, ꦆꦢꦩꦺꦮ ꦱꦕ꧀ꦕꦁ ꦩꦺꦴꦓꦩꦚ꧀ꦚ’ꦤ꧀ꦠꦶ ꦮꦢꦺꦱꦶ.

‘‘‘ꦏꦶꦁ ꦥꦤ, ꦨꦺꦴ ꦒꦺꦴꦠꦩ, ꦤ ꦲꦺꦴꦠꦶ ꦠꦡꦴꦒꦠꦺꦴ ꦥꦫꦁ ꦩꦫꦟꦴ, ꦆꦢꦩꦺꦮ ꦱꦕ꧀ꦕꦁ ꦩꦺꦴꦓꦩꦚ꧀ꦚꦤ꧀ꦠꦶ – ꦌꦮꦁꦢꦶꦛ꧀ꦜꦶ ꦨꦮꦁ ꦒꦺꦴꦠꦩꦺꦴ’ꦠꦶ ꦆꦠꦶ ꦥꦸꦛ꧀ꦜꦺꦴ ꦱꦩꦴꦤꦺꦴ ‘ꦤ ꦑꦺꦴ ꦄꦲꦁ, ꦮꦕ꧀ꦖ, ꦌꦮꦁꦢꦶꦛ꧀ꦜꦶ – ꦤ ꦲꦺꦴꦠꦶ ꦠꦡꦴꦒꦠꦺꦴ ꦥꦫꦁ ꦩꦫꦟꦴ, ꦆꦢꦩꦺꦮ ꦱꦕ꧀ꦕꦁ ꦩꦺꦴꦓꦩꦚ꧀ꦚ’ꦤ꧀ꦠꦶ ꦮꦢꦺꦱꦶ. ‘ꦏꦶꦁ ꦤꦸ ꦑꦺꦴ, ꦨꦺꦴ ꦒꦺꦴꦠꦩ, ꦲꦺꦴꦠꦶ ꦕ ꦤ ꦕ ꦲꦺꦴꦠꦶ ꦠꦡꦴꦒꦠꦺꦴ ꦥꦫꦁ ꦩꦫꦟꦴ, ꦆꦢꦩꦺꦮ ꦱꦕ꧀ꦕꦁ ꦩꦺꦴꦓꦩꦚ꧀ꦚꦤ꧀ꦠꦶ – ꦌꦮꦁꦢꦶꦛ꧀ꦜꦶ ꦨꦮꦁ ꦒꦺꦴꦠꦩꦺꦴ’ꦠꦶ ꦆꦠꦶ ꦥꦸꦛ꧀ꦜꦺꦴ ꦱꦩꦴꦤꦺꦴ ‘ꦤ ꦑꦺꦴ ꦄꦲꦁ, ꦮꦕ꧀ꦖ, ꦌꦮꦁꦢꦶꦛ꧀ꦜꦶ – ꦲꦺꦴꦠꦶ ꦕ ꦤ ꦕ ꦲꦺꦴꦠꦶ ꦠꦡꦴꦒꦠꦺꦴ ꦥꦫꦁ ꦩꦫꦟꦴ, ꦆꦢꦩꦺꦮ ꦱꦕ꧀ꦕꦁ ꦩꦺꦴꦓꦩꦚ꧀ꦚ’ꦤ꧀ꦠꦶ ꦮꦢꦺꦱꦶ. ‘ꦏꦶꦁ ꦥꦤ, ꦨꦺꦴ ꦒꦺꦴꦠꦩ, ꦤꦺꦮ ꦲꦺꦴꦠꦶ ꦤ ꦤ ꦲꦺꦴꦠꦶ ꦠꦡꦴꦒꦠꦺꦴ ꦥꦫꦁ ꦩꦫꦟꦴ, ꦆꦢꦩꦺꦮ ꦱꦕ꧀ꦕꦁ ꦩꦺꦴꦓꦩꦚ꧀ꦚꦤ꧀ꦠꦶ – ꦌꦮꦁꦢꦶꦛ꧀ꦜꦶ ꦨꦮꦁ ꦒꦺꦴꦠꦩꦺꦴ’ꦠꦶ ꦆꦠꦶ ꦥꦸꦛ꧀ꦜꦺꦴ ꦱꦩꦴꦤꦺꦴ ‘ꦤ ꦑꦺꦴ ꦄꦲꦁ, ꦮꦕ꧀ꦖ, ꦌꦮꦁꦢꦶꦛ꧀ꦜꦶ – ꦤꦺꦮ ꦲꦺꦴꦠꦶ ꦤ ꦤ ꦲꦺꦴꦠꦶ ꦠꦡꦴꦒꦠꦺꦴ ꦥꦫꦁ ꦩꦫꦟꦴ, ꦆꦢꦩꦺꦮ ꦱꦕ꧀ꦕꦁ ꦩꦺꦴꦓꦩꦚ꧀ꦚ’ꦤ꧀ꦠꦶ ꦮꦢꦺꦱꦶ.

‘‘ꦏꦶꦁ ꦥꦤ ꦨꦺꦴ ꦒꦺꦴꦠꦩꦺꦴ ꦄꦴꦢꦷꦤꦮꦁ ꦱꦩ꧀ꦥꦱ꧀ꦱꦩꦴꦤꦺꦴ ꦌꦮꦁ ꦆꦩꦴꦤꦶ ꦱꦧ꧀ꦧꦱꦺꦴ ꦢꦶꦛ꧀ꦜꦶꦒꦠꦴꦤꦶ ꦄꦤꦸꦥꦒꦠꦺꦴ’’ꦠꦶ?

꧑꧘꧙. ‘‘‘ꦱꦱ꧀ꦱꦠꦺꦴ ꦭꦺꦴꦏꦺꦴ’ꦠꦶ ꦑꦺꦴ, ꦮꦕ꧀ꦖ, ꦢꦶꦛ꧀ꦜꦶꦒꦠꦩꦺꦠꦁ ꦢꦶꦛ꧀ꦜꦶꦒꦲꦤꦁ ꦢꦶꦛ꧀ꦜꦶꦏꦤ꧀ꦠꦴꦫꦺꦴ [ꦢꦶꦛ꧀ꦜꦶꦏꦤ꧀ꦠꦴꦫꦁ (ꦱꦷ. ꦥꦷ.)] ꦢꦶꦛ꧀ꦜꦶꦮꦶꦱꦹꦏꦁ ꦢꦶꦛ꧀ꦜꦶꦮꦶꦥ꧀ꦦꦤ꧀ꦢꦶꦠꦁ ꦢꦶꦛ꧀ꦜꦶꦱꦁꦪꦺꦴꦗꦤꦁ ꦱꦢꦸꦏ꧀ꦑꦁ ꦱꦮꦶꦓꦴꦠꦁ ꦱꦈꦥꦴꦪꦴꦱꦁ ꦱꦥꦫꦶꦭ꦳ꦴꦲꦁ, ꦤ ꦤꦶꦧ꧀ꦧꦶꦢꦴꦪ ꦤ ꦮꦶꦫꦴꦒꦴꦪ ꦤ ꦤꦶꦫꦺꦴꦣꦴꦪ ꦤ ꦈꦥꦱꦩꦴꦪ ꦤ ꦄꦨꦶꦚ꧀ꦚꦴꦪ ꦤ ꦱꦩ꧀ꦧꦺꦴꦣꦴꦪ ꦤ ꦤꦶꦧ꧀ꦧꦴꦤꦴꦪ ꦱꦁꦮꦠ꧀ꦠꦠꦶ. ‘ꦄꦱꦱ꧀ꦱꦠꦺꦴ ꦭꦺꦴꦏꦺꦴ’ꦠꦶ ꦑꦺꦴ, ꦮꦕ꧀ꦖ…ꦥꦺ… ‘ꦄꦤ꧀ꦠꦮꦴ ꦭꦺꦴꦏꦺꦴ’ꦠꦶ ꦑꦺꦴ, ꦮꦕ꧀ꦖ…ꦥꦺ… ‘ꦄꦤꦤ꧀ꦠꦮꦴ ꦭꦺꦴꦏꦺꦴ’ꦠꦶ ꦑꦺꦴ, ꦮꦕ꧀ꦖ…ꦥꦺ… ‘ꦠꦁ ꦗꦷꦮꦁ ꦠꦁ ꦱꦫꦷꦫ’ꦤ꧀ꦠꦶ ꦑꦺꦴ, ꦮꦕ꧀ꦖ…ꦥꦺ… ‘ꦄꦚ꧀ꦚꦁ ꦗꦷꦮꦁ ꦄꦚ꧀ꦚꦁ ꦱꦫꦷꦫ’ꦤ꧀ꦠꦶ ꦑꦺꦴ, ꦮꦕ꧀ꦖ…ꦥꦺ… ‘ꦲꦺꦴꦠꦶ ꦠꦡꦴꦒꦠꦺꦴ ꦥꦫꦁ ꦩꦫꦟꦴ’ꦠꦶ ꦑꦺꦴ, ꦮꦕ꧀ꦖ …ꦥꦺ… ‘ꦤ ꦲꦺꦴꦠꦶ ꦠꦡꦴꦒꦠꦺꦴ ꦥꦫꦁ ꦩꦫꦟꦴ’ꦠꦶ ꦑꦺꦴ, ꦮꦕ꧀ꦖ…ꦥꦺ… ‘ꦲꦺꦴꦠꦶ ꦕ ꦤ ꦕ ꦲꦺꦴꦠꦶ ꦠꦡꦴꦒꦠꦺꦴ ꦥꦫꦁ ꦩꦫꦟꦴ’ꦠꦶ ꦑꦺꦴ, ꦮꦕ꧀ꦖ…ꦥꦺ… ‘ꦤꦺꦮ ꦲꦺꦴꦠꦶ ꦤ ꦤ ꦲꦺꦴꦠꦶ ꦠꦡꦴꦒꦠꦺꦴ ꦥꦫꦁ ꦩꦫꦟꦴ’ꦠꦶ ꦑꦺꦴ, ꦮꦕ꧀ꦖ, ꦢꦶꦛ꧀ꦜꦶꦒꦠꦩꦺꦠꦁ ꦢꦶꦛ꧀ꦜꦶꦒꦲꦤꦁ ꦢꦶꦛ꧀ꦜꦶꦏꦤ꧀ꦠꦴꦫꦺꦴ ꦢꦶꦛ꧀ꦜꦶꦮꦶꦱꦹꦏꦁ ꦢꦶꦛ꧀ꦜꦶꦮꦶꦥ꧀ꦦꦤ꧀ꦢꦶꦠꦁ ꦢꦶꦛ꧀ꦜꦶꦱꦁꦪꦺꦴꦗꦤꦁ ꦱꦢꦸꦏ꧀ꦑꦁ ꦱꦮꦶꦓꦴꦠꦁ ꦱꦈꦥꦴꦪꦴꦱꦁ ꦱꦥꦫꦶꦭ꦳ꦴꦲꦁ, ꦤ ꦤꦶꦧ꧀ꦧꦶꦢꦴꦪ ꦤ ꦮꦶꦫꦴꦒꦴꦪ ꦤ ꦤꦶꦫꦺꦴꦣꦴꦪ ꦤ ꦈꦥꦱꦩꦴꦪ ꦤ ꦄꦨꦶꦚ꧀ꦚꦴꦪ ꦤ ꦱꦩ꧀ꦧꦺꦴꦣꦴꦪ ꦤ ꦤꦶꦧ꧀ꦧꦴꦤꦴꦪ ꦱꦁꦮꦠ꧀ꦠꦠꦶ. ꦆꦩꦁ ꦑꦺꦴ ꦄꦲꦁ, ꦮꦕ꧀ꦖ, ꦄꦴꦢꦷꦤꦮꦁ ꦱꦩ꧀ꦥꦱ꧀ꦱꦩꦴꦤꦺꦴ ꦌꦮꦁ ꦆꦩꦴꦤꦶ ꦱꦧ꧀ꦧꦱꦺꦴ ꦢꦶꦛ꧀ꦜꦶꦒꦠꦴꦤꦶ ꦄꦤꦸꦥꦒꦠꦺꦴ’’ꦠꦶ.

‘‘ꦄꦠ꧀ꦡꦶ ꦥꦤ ꦨꦺꦴꦠꦺꦴ ꦒꦺꦴꦠꦩꦱ꧀ꦱ ꦏꦶꦚ꧀ꦕꦶ ꦢꦶꦛ꧀ꦜꦶꦒꦠ’’ꦤ꧀ꦠꦶ? ‘‘ꦢꦶꦛ꧀ꦜꦶꦒꦠꦤ꧀ꦠꦶ ꦑꦺꦴ, ꦮꦕ꧀ꦖ, ꦄꦥꦤꦷꦠꦩꦺꦠꦁ ꦠꦡꦴꦒꦠꦱ꧀ꦱ. ꦢꦶꦛ꧀ꦜꦚ꧀ꦲꦺꦠꦁ, ꦮꦕ꧀ꦖ, ꦠꦡꦴꦒꦠꦺꦤ – ‘ꦆꦠꦶ ꦫꦹꦥꦁ, ꦆꦠꦶ ꦫꦹꦥꦱ꧀ꦱ ꦱꦩꦸꦢꦪꦺꦴ, ꦆꦠꦶ ꦫꦹꦥꦱ꧀ꦱ ꦄꦠ꧀ꦡꦔ꧀ꦒꦩꦺꦴ; ꦆꦠꦶ ꦮꦺꦢꦤꦴ, ꦆꦠꦶ ꦮꦺꦢꦤꦴꦪ ꦱꦩꦸꦢꦪꦺꦴ, ꦆꦠꦶ ꦮꦺꦢꦤꦴꦪ ꦄꦠ꧀ꦡꦔ꧀ꦒꦩꦺꦴ; ꦆꦠꦶ ꦱꦚ꧀ꦚꦴ, ꦆꦠꦶ ꦱꦚ꧀ꦚꦴꦪ ꦱꦩꦸꦢꦪꦺꦴ, ꦆꦠꦶ ꦱꦚ꧀ꦚꦴꦪ ꦄꦠ꧀ꦡꦔ꧀ꦒꦩꦺꦴ; ꦆꦠꦶ ꦱꦔ꧀ꦑꦴꦫꦴ, ꦆꦠꦶ ꦱꦔ꧀ꦑꦴꦫꦴꦤꦁ ꦱꦩꦸꦢꦪꦺꦴ, ꦆꦠꦶ ꦱꦔ꧀ꦑꦴꦫꦴꦤꦁ ꦄꦠ꧀ꦡꦔ꧀ꦒꦩꦺꦴ; ꦆꦠꦶ ꦮꦶꦚ꧀ꦚꦴꦟꦁ, ꦆꦠꦶ ꦮꦶꦚ꧀ꦚꦴꦟꦱ꧀ꦱ ꦱꦩꦸꦢꦪꦺꦴ, ꦆꦠꦶ ꦮꦶꦚ꧀ꦚꦴꦟꦱ꧀ꦱ ꦄꦠ꧀ꦡꦔ꧀ꦒꦩꦺꦴ’ꦠꦶ. ꦠꦱ꧀ꦩꦴ ꦠꦡꦴꦒꦠꦺꦴ ꦱꦧ꧀ꦧꦩꦚ꧀ꦚꦶꦠꦴꦤꦁ ꦱꦧ꧀ꦧꦩꦡꦶꦠꦴꦤꦁ ꦱꦧ꧀ꦧꦄꦲꦁꦏꦴꦫꦩꦩꦁꦏꦴꦫꦩꦴꦤꦴꦤꦸꦱꦪꦴꦤꦁ ꦑꦪꦴ ꦮꦶꦫꦴꦒꦴ ꦤꦶꦫꦺꦴꦣꦴ ꦕꦴꦒꦴ ꦥꦛꦶꦤꦶꦱ꧀ꦱꦒ꧀ꦒꦴ ꦄꦤꦸꦥꦴꦢꦴ ꦮꦶꦩꦸꦠ꧀ꦠꦺꦴꦠꦶ ꦮꦢꦴꦩꦷ’’ꦠꦶ.

꧑꧙꧐. ‘‘ꦌꦮꦁ ꦮꦶꦩꦸꦠ꧀ꦠꦕꦶꦠ꧀ꦠꦺꦴ ꦥꦤ, ꦨꦺꦴ ꦒꦺꦴꦠꦩ, ꦨꦶꦏ꧀ꦑꦸ ꦏꦸꦲꦶꦁ ꦈꦥꦥꦗ꧀ꦗꦠꦷ’’ꦠꦶ? ‘‘ꦈꦥꦥꦗ꧀ꦗꦠꦷꦠꦶ ꦑꦺꦴ, ꦮꦕ꧀ꦖ, ꦤ ꦈꦥꦺꦠꦶ’’. ‘‘ꦠꦺꦤ ꦲꦶ, ꦨꦺꦴ ꦒꦺꦴꦠꦩ, ꦤ ꦈꦥꦥꦗ꧀ꦗꦠꦷ’’ꦠꦶ? ‘‘ꦤ ꦈꦥꦥꦗ꧀ꦗꦠꦷꦠꦶ ꦑꦺꦴ, ꦮꦕ꧀ꦖ, ꦤ ꦈꦥꦺꦠꦶ’’. ‘‘ꦠꦺꦤ ꦲꦶ, ꦨꦺꦴ ꦒꦺꦴꦠꦩ, ꦈꦥꦥꦗ꧀ꦗꦠꦶ ꦕ ꦤ ꦕ ꦈꦥꦥꦗ꧀ꦗꦠꦷ’’ꦠꦶ? ‘‘ꦈꦥꦥꦗ꧀ꦗꦠꦶ ꦕ ꦤ ꦕ ꦈꦥꦥꦗ꧀ꦗꦠꦷꦠꦶ ꦑꦺꦴ, ꦮꦕ꧀ꦖ, ꦤ ꦈꦥꦺꦠꦶ’’. ‘‘ꦠꦺꦤ ꦲꦶ, ꦨꦺꦴ ꦒꦺꦴꦠꦩ, ꦤꦺꦮ ꦈꦥꦥꦗ꧀ꦗꦠꦶ ꦤ ꦤ ꦈꦥꦥꦗ꧀ꦗꦠꦷ’’ꦠꦶ? ‘‘ꦤꦺꦮ ꦈꦥꦥꦗ꧀ꦗꦠꦶ ꦤ ꦤ ꦈꦥꦥꦗ꧀ꦗꦠꦷꦠꦶ ꦑꦺꦴ, ꦮꦕ꧀ꦖ, ꦤ ꦈꦥꦺꦠꦶ’’.

‘‘‘ꦌꦮꦁ ꦮꦶꦩꦸꦠ꧀ꦠꦕꦶꦠ꧀ꦠꦺꦴ ꦥꦤ, ꦨꦺꦴ ꦒꦺꦴꦠꦩ, ꦨꦶꦏ꧀ꦑꦸ ꦏꦸꦲꦶꦁ ꦈꦥꦥꦗ꧀ꦗꦠꦷ’ꦠꦶ ꦆꦠꦶ ꦥꦸꦛ꧀ꦜꦺꦴ ꦱꦩꦴꦤꦺꦴ ‘ꦈꦥꦥꦗ꧀ꦗꦠꦷꦠꦶ ꦑꦺꦴ, ꦮꦕ꧀ꦖ, ꦤ ꦈꦥꦺꦠꦷ’ꦠꦶ ꦮꦢꦺꦱꦶ. ‘ꦠꦺꦤ ꦲꦶ, ꦨꦺꦴ ꦒꦺꦴꦠꦩ, ꦤ ꦈꦥꦥꦗ꧀ꦗꦠꦷ’ꦠꦶ ꦆꦠꦶ ꦥꦸꦛ꧀ꦜꦺꦴ ꦱꦩꦴꦤꦺꦴ ‘ꦤ ꦈꦥꦥꦗ꧀ꦗꦠꦷꦠꦶ ꦑꦺꦴ, ꦮꦕ꧀ꦖ, ꦤ ꦈꦥꦺꦠꦷ’ꦠꦶ ꦮꦢꦺꦱꦶ. ‘ꦠꦺꦤ ꦲꦶ, ꦨꦺꦴ ꦒꦺꦴꦠꦩ, ꦈꦥꦥꦗ꧀ꦗꦠꦶ ꦕ ꦤ ꦕ ꦈꦥꦥꦗ꧀ꦗꦠꦷ’ꦠꦶ ꦆꦠꦶ ꦥꦸꦛ꧀ꦜꦺꦴ ꦱꦩꦴꦤꦺꦴ ‘ꦈꦥꦥꦗ꧀ꦗꦠꦶ ꦕ ꦤ ꦕ ꦈꦥꦥꦗ꧀ꦗꦠꦷꦠꦶ ꦑꦺꦴ, ꦮꦕ꧀ꦖ, ꦤ ꦈꦥꦺꦠꦷ’ꦠꦶ ꦮꦢꦺꦱꦶ. ‘ꦠꦺꦤ ꦲꦶ, ꦨꦺꦴ ꦒꦺꦴꦠꦩ, ꦤꦺꦮ ꦈꦥꦥꦗ꧀ꦗꦠꦶ ꦤ ꦤ ꦈꦥꦥꦗ꧀ꦗꦠꦷ’ꦠꦶ ꦆꦠꦶ ꦥꦸꦛ꧀ꦜꦺꦴ ꦱꦩꦴꦤꦺꦴ ‘ꦤꦺꦮ ꦈꦥꦥꦗ꧀ꦗꦠꦶ ꦤ ꦤ ꦈꦥꦥꦗ꧀ꦗꦠꦷꦠꦶ ꦑꦺꦴ, ꦮꦕ꧀ꦖ, ꦤ ꦈꦥꦺꦠꦷ’ꦠꦶ ꦮꦢꦺꦱꦶ. ꦌꦠ꧀ꦡꦴꦲꦁ, ꦨꦺꦴ ꦒꦺꦴꦠꦩ, ꦄꦚ꧀ꦚꦴꦟꦩꦴꦥꦴꦢꦶꦁ, ꦌꦠ꧀ꦡ ꦱꦩ꧀ꦩꦺꦴꦲꦩꦴꦥꦴꦢꦶꦁ. ꦪꦴꦥꦶ ꦩꦺ ꦌꦱꦴ ꦨꦺꦴꦠꦺꦴ ꦒꦺꦴꦠꦩꦱ꧀ꦱ ꦥꦸꦫꦶꦩꦺꦤ ꦏꦡꦴꦱꦭ꧀ꦭꦴꦥꦺꦤ ꦄꦲꦸ ꦥꦱꦴꦢꦩꦠ꧀ꦠꦴ ꦱꦴꦥꦶ ꦩꦺ ꦌꦠꦫꦲꦶ ꦄꦤ꧀ꦠꦫꦲꦶꦠꦴ’’ꦠꦶ. ‘‘ꦄꦭꦚ꧀ꦲꦶ ꦠꦺ, ꦮꦕ꧀ꦖ, ꦄꦚ꧀ꦚꦴꦟꦴꦪ, ꦄꦭꦁ ꦱꦩ꧀ꦩꦺꦴꦲꦴꦪ. ꦒꦩ꧀ꦨꦷꦫꦺꦴ ꦲꦴꦪꦁ, ꦮꦕ꧀ꦖ, ꦣꦩ꧀ꦩꦺꦴ ꦢꦸꦢ꧀ꦢꦱꦺꦴ ꦢꦸꦫꦤꦸꦧꦺꦴꦣꦺꦴ ꦱꦤ꧀ꦠꦺꦴ ꦥꦟꦷꦠꦺꦴ ꦄꦠꦏ꧀ꦏꦴꦮꦕꦫꦺꦴ ꦤꦶꦥꦸꦟꦺꦴ ꦥꦟ꧀ꦝꦶꦠꦮꦺꦢꦤꦷꦪꦺꦴ. ꦱꦺꦴ ꦠꦪꦴ ꦢꦸꦗ꧀ꦗꦴꦤꦺꦴ ꦄꦚ꧀ꦚꦢꦶꦛ꧀ꦜꦶꦏꦺꦤ ꦄꦚ꧀ꦚꦑꦤ꧀ꦠꦶꦏꦺꦤ ꦄꦚ꧀ꦚꦫꦸꦕꦶꦏꦺꦤ ꦄꦚ꧀ꦚꦠ꧀ꦫꦪꦺꦴꦒꦺꦤ [ꦄꦚ꧀ꦚꦠ꧀ꦫꦴꦪꦺꦴꦒꦺꦤ (ꦢꦷ. ꦤꦶ. ꧑.꧔꧒꧐)] ꦄꦚ꧀ꦚꦠ꧀ꦫꦴꦕꦫꦶꦪꦏꦺꦤ’’ [ꦄꦚ꧀ꦚꦠ꧀ꦡꦴꦕꦫꦶꦪꦏꦺꦤ (ꦱꦷ. ꦱ꧀ꦪꦴ. ꦏꦁ. ꦥꦷ.)].

꧑꧙꧑. ‘‘ꦠꦺꦤ ꦲꦶ, ꦮꦕ꧀ꦖ, ꦠꦚ꧀ꦚꦺꦮꦺꦠ꧀ꦡ ꦥꦛꦶꦥꦸꦕ꧀ꦖꦶꦱ꧀ꦱꦴꦩꦶ; ꦪꦡꦴ ꦠꦺ ꦑꦩꦺꦪ꧀ꦪ ꦠꦡꦴ ꦤꦁ ꦧ꧀ꦪꦴꦏꦫꦺꦪ꧀ꦪꦴꦱꦶ. ꦠꦁ ꦏꦶꦁ ꦩꦚ꧀ꦚꦱꦶ, ꦮꦕ꧀ꦖ, ꦱꦕꦺ ꦠꦺ ꦥꦸꦫꦠꦺꦴ ꦄꦒ꧀ꦒꦶ ꦗꦭꦺꦪ꧀ꦪ, ꦗꦴꦤꦺꦪ꧀ꦪꦴꦱꦶ ꦠ꧀ꦮꦁ – ‘ꦄꦪꦁ ꦩꦺ ꦥꦸꦫꦠꦺꦴ ꦄꦒ꧀ꦒꦶ ꦗꦭꦠꦷ’’’ꦠꦶ? ‘‘ꦱꦕꦺ ꦩꦺ, ꦨꦺꦴ ꦒꦺꦴꦠꦩ, ꦥꦸꦫꦠꦺꦴ ꦄꦒ꧀ꦒꦶ ꦗꦭꦺꦪ꧀ꦪ, ꦗꦴꦤꦺꦪ꧀ꦪꦴꦲꦁ – ‘ꦄꦪꦁ ꦩꦺ ꦥꦸꦫꦠꦺꦴ ꦄꦒ꧀ꦒꦶ ꦗꦭꦠꦷ’’’ꦠꦶ.

‘‘ꦱꦕꦺ ꦥꦤ ꦠꦁ, ꦮꦕ꧀ꦖ, ꦌꦮꦁ ꦥꦸꦕ꧀ꦖꦺꦪ꧀ꦪ – ‘ꦪꦺꦴ ꦠꦺ ꦄꦪꦁ ꦥꦸꦫꦠꦺꦴ ꦄꦒ꧀ꦒꦶ ꦗꦭꦠꦶ ꦄꦪꦁ ꦄꦒ꧀ꦒꦶ ꦏꦶꦁ ꦥꦛꦶꦕ꧀ꦕ ꦗꦭꦠꦷ’ꦠꦶ, ꦌꦮꦁ ꦥꦸꦛ꧀ꦜꦺꦴ ꦠ꧀ꦮꦁ, ꦮꦕ꧀ꦖ, ꦏꦶꦤ꧀ꦠꦶ ꦧ꧀ꦪꦴꦏꦫꦺꦪ꧀ꦪꦴꦱꦷ’’ꦠꦶ? ‘‘ꦱꦕꦺ ꦩꦁ, ꦨꦺꦴ ꦒꦺꦴꦠꦩ, ꦌꦮꦁ ꦥꦸꦕ꧀ꦖꦺꦪ꧀ꦪ – ‘ꦪꦺꦴ ꦠꦺ ꦄꦪꦁ ꦥꦸꦫꦠꦺꦴ ꦄꦒ꧀ꦒꦶ ꦗꦭꦠꦶ ꦄꦪꦁ ꦄꦒ꧀ꦒꦶ ꦏꦶꦁ ꦥꦛꦶꦕ꧀ꦕ ꦗꦭꦠꦷ’ꦠꦶ, ꦌꦮꦁ ꦥꦸꦛ꧀ꦜꦺꦴ ꦄꦲꦁ, ꦨꦺꦴ ꦒꦺꦴꦠꦩ, ꦌꦮꦁ ꦧ꧀ꦪꦴꦏꦫꦺꦪ꧀ꦪꦁ – ‘ꦪꦺꦴ ꦩꦺ ꦄꦪꦁ ꦥꦸꦫꦠꦺꦴ ꦄꦒ꧀ꦒꦶ ꦗꦭꦠꦶ ꦄꦪꦁ ꦄꦒ꧀ꦒꦶ ꦠꦶꦟꦏꦛ꧀ꦜꦸꦥꦴꦢꦴꦤꦁ ꦥꦛꦶꦕ꧀ꦕ ꦗꦭꦠꦷ’’’ꦠꦶ.

‘‘ꦱꦕꦺ ꦠꦺ, ꦮꦕ꧀ꦖ, ꦥꦸꦫꦠꦺꦴ ꦱꦺꦴ ꦄꦒ꧀ꦒꦶ ꦤꦶꦧ꧀ꦧꦴꦪꦺꦪ꧀ꦪ, ꦗꦴꦤꦺꦪ꧀ꦪꦴꦱꦶ ꦠ꧀ꦮꦁ – ‘ꦄꦪꦁ ꦩꦺ ꦥꦸꦫꦠꦺꦴ ꦄꦒ꧀ꦒꦶ ꦤꦶꦧ꧀ꦧꦸꦠꦺꦴ’’’ꦠꦶ? ‘‘ꦱꦕꦺ ꦩꦺ, ꦨꦺꦴ ꦒꦺꦴꦠꦩ, ꦥꦸꦫꦠꦺꦴ ꦱꦺꦴ ꦄꦒ꧀ꦒꦶ ꦤꦶꦧ꧀ꦧꦴꦪꦺꦪ꧀ꦪ, ꦗꦴꦤꦺꦪ꧀ꦪꦴꦲꦁ – ‘ꦄꦪꦁ ꦩꦺ ꦥꦸꦫꦠꦺꦴ ꦄꦒ꧀ꦒꦶ ꦤꦶꦧ꧀ꦧꦸꦠꦺꦴ’’’ꦠꦶ.

‘‘ꦱꦕꦺ ꦥꦤ ꦠꦁ, ꦮꦕ꧀ꦖ, ꦌꦮꦁ ꦥꦸꦕ꧀ꦖꦺꦪ꧀ꦪ – ‘ꦪꦺꦴ ꦠꦺ ꦄꦪꦁ ꦥꦸꦫꦠꦺꦴ ꦄꦒ꧀ꦒꦶ ꦤꦶꦧ꧀ꦧꦸꦠꦺꦴ ꦱꦺꦴ ꦄꦒ꧀ꦒꦶ ꦆꦠꦺꦴ ꦏꦠꦩꦁ ꦢꦶꦱꦁ ꦒꦠꦺꦴ – ꦥꦸꦫꦠ꧀ꦡꦶꦩꦁ ꦮꦴ ꦢꦏ꧀ꦑꦶꦟꦁ ꦮꦴ ꦥꦕ꧀ꦖꦶꦩꦁ ꦮꦴ ꦈꦠ꧀ꦠꦫꦁ ꦮꦴ’ꦠꦶ, ꦌꦮꦁ ꦥꦸꦛ꧀ꦜꦺꦴ ꦠ꧀ꦮꦁ, ꦮꦕ꧀ꦖ, ꦏꦶꦤ꧀ꦠꦶ ꦧ꧀ꦪꦴꦏꦫꦺꦪ꧀ꦪꦴꦱꦷ’’ꦠꦶ? ‘‘ꦤ ꦈꦥꦺꦠꦶ, ꦨꦺꦴ ꦒꦺꦴꦠꦩ, ꦪꦚ꧀ꦲꦶ ꦱꦺꦴ, ꦨꦺꦴ ꦒꦺꦴꦠꦩ, ꦄꦒ꧀ꦒꦶ ꦠꦶꦟꦏꦛ꧀ꦜꦸꦥꦴꦢꦴꦤꦁ ꦥꦛꦶꦕ꧀ꦕ ꦄꦗꦭꦶ [ꦗꦭꦠꦶ (ꦱ꧀ꦪꦴ. ꦏꦁ. ꦏ.)] ꦠꦱ꧀ꦱ ꦕ ꦥꦫꦶꦪꦴꦢꦴꦤꦴ ꦄꦚ꧀ꦚꦱ꧀ꦱ ꦕ ꦄꦤꦸꦥꦲꦴꦫꦴ ꦄꦤꦴꦲꦴꦫꦺꦴ ꦤꦶꦧ꧀ꦧꦸꦠꦺꦴ ꦠ꧀ꦮꦺꦮ ꦱꦔ꧀ꦑ꧀ꦪꦁ ꦒꦕ꧀ꦖꦠꦷ’’ꦠꦶ.

꧑꧙꧒. ‘‘ꦌꦮꦩꦺꦮ ꦑꦺꦴ, ꦮꦕ꧀ꦖ, ꦪꦺꦤ ꦫꦹꦥꦺꦤ ꦠꦡꦴꦒꦠꦁ ꦥꦚ꧀ꦚꦴꦥꦪꦩꦴꦤꦺꦴ ꦥꦚ꧀ꦚꦴꦥꦺꦪ꧀ꦪ ꦠꦁ ꦫꦹꦥꦁ ꦠꦡꦴꦒꦠꦱ꧀ꦱ ꦥꦲꦷꦤꦁ ꦈꦕ꧀ꦖꦶꦤ꧀ꦤꦩꦹꦭꦁ ꦠꦴꦭꦴꦮꦠ꧀ꦡꦸꦏꦠꦁ ꦄꦤꦨꦴꦮꦁꦏꦠꦁ ꦄꦴꦪꦠꦶꦁ ꦄꦤꦸꦥ꧀ꦥꦴꦢꦣꦩ꧀ꦩꦁ. ꦫꦹꦥꦱꦔ꧀ꦑꦪꦮꦶꦩꦸꦠ꧀ꦠꦺꦴ [ꦫꦹꦥꦱꦔ꧀ꦑꦴꦮꦶꦩꦸꦠ꧀ꦠꦺꦴ (ꦱꦷ. ꦱ꧀ꦪꦴ. ꦏꦁ. ꦥꦷ.) ꦌꦮꦁ ꦮꦺꦢꦤꦴꦱꦔ꧀ꦑꦪꦴꦢꦷꦱꦸꦥꦶ] ꦑꦺꦴ, ꦮꦕ꧀ꦖ, ꦠꦡꦴꦒꦠꦺꦴ ꦒꦩ꧀ꦨꦷꦫꦺꦴ ꦄꦥ꧀ꦥꦩꦺꦪ꧀ꦪꦺꦴ ꦢꦸꦥ꧀ꦥꦫꦶꦪꦺꦴꦒꦴꦭ꦳꧀ꦲꦺꦴ – ꦱꦺꦪ꧀ꦪꦡꦴꦥꦶ ꦩꦲꦴꦱꦩꦸꦢ꧀ꦢꦺꦴ. ꦈꦥꦥꦗ꧀ꦗꦠꦷꦠꦶ ꦤ ꦈꦥꦺꦠꦶ, ꦤ ꦈꦥꦥꦗ꧀ꦗꦠꦷꦠꦶ ꦤ ꦈꦥꦺꦠꦶ, ꦈꦥꦥꦗ꧀ꦗꦠꦶ ꦕ ꦤ ꦕ ꦈꦥꦥꦗ꧀ꦗꦠꦷꦠꦶ ꦤ ꦈꦥꦺꦠꦶ, ꦤꦺꦮ ꦈꦥꦥꦗ꧀ꦗꦠꦶ ꦤ ꦤ ꦈꦥꦥꦗ꧀ꦗꦠꦷꦠꦶ ꦤ ꦈꦥꦺꦠꦶ.

‘‘ꦪꦴꦪ ꦮꦺꦢꦤꦴꦪ ꦠꦡꦴꦒꦠꦁ ꦥꦚ꧀ꦚꦴꦥꦪꦩꦴꦤꦺꦴ ꦥꦚ꧀ꦚꦴꦥꦺꦪ꧀ꦪ ꦱꦴ ꦮꦺꦢꦤꦴ ꦠꦡꦴꦒꦠꦱ꧀ꦱ ꦥꦲꦷꦤꦴ ꦈꦕ꧀ꦖꦶꦤ꧀ꦤꦩꦹꦭꦴ ꦠꦴꦭꦴꦮꦠ꧀ꦡꦸꦏꦠꦴ ꦄꦤꦨꦴꦮꦁꦏꦠꦴ ꦄꦴꦪꦠꦶꦁ ꦄꦤꦸꦥ꧀ꦥꦴꦢꦣꦩ꧀ꦩꦴ. ꦮꦺꦢꦤꦴꦱꦔ꧀ꦑꦪꦮꦶꦩꦸꦠ꧀ꦠꦺꦴ ꦑꦺꦴ, ꦮꦕ꧀ꦖ, ꦠꦡꦴꦒꦠꦺꦴ ꦒꦩ꧀ꦨꦷꦫꦺꦴ ꦄꦥ꧀ꦥꦩꦺꦪ꧀ꦪꦺꦴ ꦢꦸꦥ꧀ꦥꦫꦶꦪꦺꦴꦒꦴꦭ꦳꧀ꦲꦺꦴ – ꦱꦺꦪ꧀ꦪꦡꦴꦥꦶ ꦩꦲꦴꦱꦩꦸꦢ꧀ꦢꦺꦴ. ꦈꦥꦥꦗ꧀ꦗꦠꦷꦠꦶ ꦤ ꦈꦥꦺꦠꦶ, ꦤ ꦈꦥꦥꦗ꧀ꦗꦠꦷꦠꦶ ꦤ ꦈꦥꦺꦠꦶ, ꦈꦥꦥꦗ꧀ꦗꦠꦶ ꦕ ꦤ ꦕ ꦈꦥꦥꦗ꧀ꦗꦠꦷꦠꦶ ꦤ ꦈꦥꦺꦠꦶ, ꦤꦺꦮ ꦈꦥꦥꦗ꧀ꦗꦠꦶ ꦤ ꦤ ꦈꦥꦥꦗ꧀ꦗꦠꦷꦠꦶ ꦤ ꦈꦥꦺꦠꦶ.

‘‘ꦪꦴꦪ ꦱꦚ꧀ꦚꦴꦪ ꦠꦡꦴꦒꦠꦁ ꦥꦚ꧀ꦚꦴꦥꦪꦩꦴꦤꦺꦴ ꦥꦚ꧀ꦚꦴꦥꦺꦪ꧀ꦪ ꦱꦴ ꦱꦚ꧀ꦚꦴ ꦠꦡꦴꦒꦠꦱ꧀ꦱ ꦥꦲꦷꦤꦴ ꦈꦕ꧀ꦖꦶꦤ꧀ꦤꦩꦹꦭꦴ ꦠꦴꦭꦴꦮꦠ꧀ꦡꦸꦏꦠꦴ ꦄꦤꦨꦴꦮꦁꦏꦠꦴ ꦄꦴꦪꦠꦶꦁ ꦄꦤꦸꦥ꧀ꦥꦴꦢꦣꦩ꧀ꦩꦴ. ꦱꦚ꧀ꦚꦴꦱꦔ꧀ꦑꦪꦮꦶꦩꦸꦠ꧀ꦠꦺꦴ ꦑꦺꦴ, ꦮꦕ꧀ꦖ, ꦠꦡꦴꦒꦠꦺꦴ ꦒꦩ꧀ꦨꦷꦫꦺꦴ ꦄꦥ꧀ꦥꦩꦺꦪ꧀ꦪꦺꦴ ꦢꦸꦥ꧀ꦥꦫꦶꦪꦺꦴꦒꦴꦭ꦳꧀ꦲꦺꦴ – ꦱꦺꦪ꧀ꦪꦡꦴꦥꦶ ꦩꦲꦴꦱꦩꦸꦢ꧀ꦢꦺꦴ. ꦈꦥꦥꦗ꧀ꦗꦠꦷꦠꦶ ꦤ ꦈꦥꦺꦠꦶ, ꦤ ꦈꦥꦥꦗ꧀ꦗꦠꦷꦠꦶ ꦤ ꦈꦥꦺꦠꦶ, ꦈꦥꦥꦗ꧀ꦗꦠꦶ ꦕ ꦤ ꦕ ꦈꦥꦥꦗ꧀ꦗꦠꦷꦠꦶ ꦤ ꦈꦥꦺꦠꦶ, ꦤꦺꦮ ꦈꦥꦥꦗ꧀ꦗꦠꦶ ꦤ ꦤ ꦈꦥꦥꦗ꧀ꦗꦠꦷꦠꦶ ꦤ ꦈꦥꦺꦠꦶ.

‘‘ꦪꦺꦲꦶ ꦱꦔ꧀ꦑꦴꦫꦺꦲꦶ ꦠꦡꦴꦒꦠꦁ ꦥꦚ꧀ꦚꦴꦥꦪꦩꦴꦤꦺꦴ ꦥꦚ꧀ꦚꦴꦥꦺꦪ꧀ꦪ ꦠꦺ ꦱꦔ꧀ꦑꦴꦫꦴ ꦠꦡꦴꦒꦠꦱ꧀ꦱ ꦥꦲꦷꦤꦴ ꦈꦕ꧀ꦖꦶꦤ꧀ꦤꦩꦹꦭꦴ ꦠꦴꦭꦴꦮꦠ꧀ꦡꦸꦏꦠꦴ ꦄꦤꦨꦴꦮꦁꦏꦠꦴ ꦄꦴꦪꦠꦶꦁ ꦄꦤꦸꦥ꧀ꦥꦴꦢꦣꦩ꧀ꦩꦴ. ꦱꦔ꧀ꦑꦴꦫꦱꦔ꧀ꦑꦪꦮꦶꦩꦸꦠ꧀ꦠꦺꦴ ꦑꦺꦴ, ꦮꦕ꧀ꦖ, ꦠꦡꦴꦒꦠꦺꦴ ꦒꦩ꧀ꦨꦷꦫꦺꦴ ꦄꦥ꧀ꦥꦩꦺꦪ꧀ꦪꦺꦴ ꦢꦸꦥ꧀ꦥꦫꦶꦪꦺꦴꦒꦴꦭ꦳꧀ꦲꦺꦴ – ꦱꦺꦪ꧀ꦪꦡꦴꦥꦶ ꦩꦲꦴꦱꦩꦸꦢ꧀ꦢꦺꦴ. ꦈꦥꦥꦗ꧀ꦗꦠꦷꦠꦶ ꦤ ꦈꦥꦺꦠꦶ, ꦤ ꦈꦥꦥꦗ꧀ꦗꦠꦷꦠꦶ ꦤ ꦈꦥꦺꦠꦶ, ꦈꦥꦥꦗ꧀ꦗꦠꦶ ꦕ ꦤ ꦕ ꦈꦥꦥꦗ꧀ꦗꦠꦷꦠꦶ ꦤ ꦈꦥꦺꦠꦶ, ꦤꦺꦮ ꦈꦥꦥꦗ꧀ꦗꦠꦶ ꦤ ꦤ ꦈꦥꦥꦗ꧀ꦗꦠꦷꦠꦶ ꦤ ꦈꦥꦺꦠꦶ.

‘‘ꦪꦺꦤ ꦮꦶꦚ꧀ꦚꦴꦟꦺꦤ ꦠꦡꦴꦒꦠꦁ ꦥꦚ꧀ꦚꦴꦥꦪꦩꦴꦤꦺꦴ ꦥꦚ꧀ꦚꦴꦥꦺꦪ꧀ꦪ ꦠꦁ ꦮꦶꦚ꧀ꦚꦴꦟꦁ ꦠꦡꦴꦒꦠꦱ꧀ꦱ ꦥꦲꦷꦤꦁ ꦈꦕ꧀ꦖꦶꦤ꧀ꦤꦩꦹꦭꦁ ꦠꦴꦭꦴꦮꦠ꧀ꦡꦸꦏꦠꦁ ꦄꦤꦨꦴꦮꦁꦏꦠꦁ ꦄꦴꦪꦠꦶꦁ ꦄꦤꦸꦥ꧀ꦥꦴꦢꦣꦩ꧀ꦩꦁ. ꦮꦶꦚ꧀ꦚꦴꦟꦱꦔ꧀ꦑꦪꦮꦶꦩꦸꦠ꧀ꦠꦺꦴ ꦑꦺꦴ, ꦮꦕ꧀ꦖ, ꦠꦡꦴꦒꦠꦺꦴ ꦒꦩ꧀ꦨꦷꦫꦺꦴ ꦄꦥ꧀ꦥꦩꦺꦪ꧀ꦪꦺꦴ ꦢꦸꦥ꧀ꦥꦫꦶꦪꦺꦴꦒꦴꦭ꦳꧀ꦲꦺꦴ – ꦱꦺꦪ꧀ꦪꦡꦴꦥꦶ ꦩꦲꦴꦱꦩꦸꦢ꧀ꦢꦺꦴ. ꦈꦥꦥꦗ꧀ꦗꦠꦷꦠꦶ ꦤ ꦈꦥꦺꦠꦶ, ꦤ ꦈꦥꦥꦗ꧀ꦗꦠꦷꦠꦶ ꦤ ꦈꦥꦺꦠꦶ, ꦈꦥꦥꦗ꧀ꦗꦠꦶ ꦕ ꦤ ꦕ ꦈꦥꦥꦗ꧀ꦗꦠꦷꦠꦶ ꦤ ꦈꦥꦺꦠꦶ, ꦤꦺꦮ ꦈꦥꦥꦗ꧀ꦗꦠꦶ ꦤ ꦤ ꦈꦥꦥꦗ꧀ꦗꦠꦷꦠꦶ ꦤ ꦈꦥꦺꦠꦶ’’.

ꦌꦮꦁ ꦮꦸꦠ꧀ꦠꦺ, ꦮꦕ꧀ꦖꦒꦺꦴꦠ꧀ꦠꦺꦴ ꦥꦫꦶꦧ꧀ꦧꦴꦗꦏꦺꦴ ꦨꦒꦮꦤ꧀ꦠꦁ ꦌꦠꦢꦮꦺꦴꦕ – ‘‘ꦱꦺꦪ꧀ꦪꦡꦴꦥꦶ, ꦨꦺꦴ ꦒꦺꦴꦠꦩ, ꦒꦴꦩꦱ꧀ꦱ ꦮꦴ ꦤꦶꦒꦩꦱ꧀ꦱ ꦮꦴ ꦄꦮꦶꦢꦹꦫꦺ ꦩꦲꦴꦱꦴꦭꦫꦸꦏ꧀ꦑꦺꦴ. ꦠꦱ꧀ꦱ ꦄꦤꦶꦕ꧀ꦕꦠꦴ ꦱꦴꦑꦴꦥꦭꦴꦱꦴ ꦥꦭꦸꦗ꧀ꦗꦺꦪ꧀ꦪꦸꦁ [ꦱꦴꦑꦴꦥꦭꦴꦱꦁ ꦥꦭꦸꦗ꧀ꦗꦺꦪ꧀ꦪ], ꦠꦕꦥꦥꦛꦶꦏꦴ ꦥꦭꦸꦗ꧀ꦗꦺꦪ꧀ꦪꦸꦁ, ꦦꦺꦒ꧀ꦒꦹ ꦥꦭꦸꦗ꧀ꦗꦺꦪ꧀ꦪꦸꦁ [ꦦꦺꦒ꧀ꦒꦸ ꦥꦭꦸꦗ꧀ꦗꦺꦪ꧀ꦪ (ꦱꦷ. ꦱ꧀ꦪꦴ. ꦏꦁ. ꦥꦷ.)]; ꦱꦺꦴ ꦄꦥꦫꦺꦤ ꦱꦩꦪꦺꦤ ꦄꦥꦒꦠꦱꦴꦑꦴꦥꦭꦴꦱꦺꦴ ꦄꦥꦒꦠꦠꦕꦥꦥꦛꦶꦏꦺꦴ ꦄꦥꦒꦠꦦꦺꦒ꧀ꦒꦸꦏꦺꦴ ꦱꦸꦢ꧀ꦣꦺꦴ ꦄꦱ꧀ꦱ, ꦱꦴꦫꦺ ꦥꦠꦶꦛ꧀ꦜꦶꦠꦺꦴ; ꦌꦮꦩꦺꦮ ꦨꦺꦴꦠꦺꦴ ꦒꦺꦴꦠꦩꦱ꧀ꦱ ꦥꦴꦮꦕꦤꦁ ꦄꦥꦒꦠꦱꦴꦑꦴꦥꦭꦴꦱꦁ ꦄꦥꦒꦠꦠꦕꦥꦥꦛꦶꦏꦁ ꦄꦥꦒꦠꦦꦺꦒ꧀ꦒꦸꦏꦁ ꦱꦸꦢ꧀ꦣꦁ, ꦱꦴꦫꦺ ꦥꦠꦶꦛ꧀ꦜꦶꦠꦁ. ꦄꦨꦶꦏ꧀ꦏꦤ꧀ꦠꦁ, ꦨꦺꦴ ꦒꦺꦴꦠꦩ…ꦥꦺ… ꦈꦥꦴꦱꦏꦁ ꦩꦁ ꦨꦮꦁ ꦒꦺꦴꦠꦩꦺꦴ ꦣꦴꦫꦺꦠꦸ ꦄꦗ꧀ꦗꦠꦒ꧀ꦒꦺ ꦥꦴꦟꦸꦥꦺꦠꦁ ꦱꦫꦟꦁ ꦒꦠ’’ꦤ꧀ꦠꦶ.

ꦄꦒ꧀ꦒꦶꦮꦕ꧀ꦖꦱꦸꦠ꧀ꦠꦁ ꦤꦶꦛ꧀ꦜꦶꦠꦁ ꦢꦸꦠꦶꦪꦁ.

꧓. ꦩꦲꦴꦮꦕ꧀ꦖꦱꦸꦠ꧀ꦠꦁ

꧑꧙꧓. ꦌꦮꦁ ꦩꦺ ꦱꦸꦠꦁ – ꦌꦏꦁ ꦱꦩꦪꦁ ꦨꦒꦮꦴ ꦫꦴꦗꦒꦲꦺ ꦮꦶꦲꦫꦠꦶ ꦮꦺꦭ꦳ꦸꦮꦤꦺ ꦏꦭꦤ꧀ꦢꦏꦤꦶꦮꦴꦥꦺ. ꦄꦡ ꦑꦺꦴ ꦮꦕ꧀ꦖꦒꦺꦴꦠ꧀ꦠꦺꦴ ꦥꦫꦶꦧ꧀ꦧꦴꦗꦏꦺꦴ ꦪꦺꦤ ꦨꦒꦮꦴ ꦠꦺꦤꦸꦥꦱꦔ꧀ꦏꦩꦶ; ꦈꦥꦱꦔ꧀ꦏꦩꦶꦠ꧀ꦮꦴ ꦨꦒꦮꦠꦴ ꦱꦢ꧀ꦣꦶꦁ ꦱꦩ꧀ꦩꦺꦴꦢꦶ. ꦱꦩ꧀ꦩꦺꦴꦢꦤꦷꦪꦁ ꦏꦡꦁ ꦱꦴꦫꦟꦷꦪꦁ ꦮꦷꦠꦶꦱꦴꦫꦺꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦷꦢꦶ. ꦌꦏꦩꦤ꧀ꦠꦁ ꦤꦶꦱꦶꦤ꧀ꦤꦺꦴ ꦑꦺꦴ ꦮꦕ꧀ꦖꦒꦺꦴꦠ꧀ꦠꦺꦴ ꦥꦫꦶꦧ꧀ꦧꦴꦗꦏꦺꦴ ꦨꦒꦮꦤ꧀ꦠꦁ ꦌꦠꦢꦮꦺꦴꦕ – ‘‘ꦢꦷꦓꦫꦠ꧀ꦠꦴꦲꦁ ꦨꦺꦴꦠꦴ ꦒꦺꦴꦠꦩꦺꦤ ꦱꦲꦏꦡꦷ. ꦱꦴꦣꦸ ꦩꦺ ꦨꦮꦁ ꦒꦺꦴꦠꦩꦺꦴ ꦱꦁꦑꦶꦠ꧀ꦠꦺꦤ ꦏꦸꦱꦭꦴꦏꦸꦱꦭꦁ ꦢꦺꦱꦺꦠꦹ’’ꦠꦶ. ‘‘ꦱꦁꦑꦶꦠ꧀ꦠꦺꦤꦥꦶ ꦑꦺꦴ ꦠꦺ ꦄꦲꦁ, ꦮꦕ꧀ꦖ, ꦏꦸꦱꦭꦴꦏꦸꦱꦭꦁ ꦢꦺꦱꦺꦪ꧀ꦪꦁ, ꦮꦶꦠ꧀ꦡꦴꦫꦺꦤꦥꦶ ꦑꦺꦴ ꦠꦺ ꦄꦲꦁ, ꦮꦕ꧀ꦖ, ꦏꦸꦱꦭꦴꦏꦸꦱꦭꦁ ꦢꦺꦱꦺꦪ꧀ꦪꦁ; ꦄꦥꦶ ꦕ ꦠꦺ ꦄꦲꦁ, ꦮꦕ꧀ꦖ, ꦱꦁꦑꦶꦠ꧀ꦠꦺꦤ ꦏꦸꦱꦭꦴꦏꦸꦱꦭꦁ ꦢꦺꦱꦺꦱ꧀ꦱꦴꦩꦶ. ꦠꦁ ꦱꦸꦟꦴꦲꦶ, ꦱꦴꦣꦸꦏꦁ ꦩꦤꦱꦶ ꦏꦫꦺꦴꦲꦶ, ꦨꦴꦱꦶꦱ꧀ꦱꦴꦩꦷ’’ꦠꦶ. ‘‘ꦌꦮꦁ, ꦨꦺꦴ’’ꦠꦶ ꦑꦺꦴ ꦮꦕ꧀ꦖꦒꦺꦴꦠ꧀ꦠꦺꦴ ꦥꦫꦶꦧ꧀ꦧꦴꦗꦏꦺꦴ ꦨꦒꦮꦠꦺꦴ ꦥꦕ꧀ꦕꦱ꧀ꦱꦺꦴꦱꦶ. ꦨꦒꦮꦴ ꦌꦠꦢꦮꦺꦴꦕ –

꧑꧙꧔. ‘‘ꦭꦺꦴꦨꦺꦴ ꦑꦺꦴ, ꦮꦕ꧀ꦖ, ꦄꦏꦸꦱꦭꦁ, ꦄꦭꦺꦴꦨꦺꦴ ꦏꦸꦱꦭꦁ; ꦢꦺꦴꦱꦺꦴ ꦑꦺꦴ, ꦮꦕ꧀ꦖ, ꦄꦏꦸꦱꦭꦁ, ꦄꦢꦺꦴꦱꦺꦴ ꦏꦸꦱꦭꦁ; ꦩꦺꦴꦲꦺꦴ ꦑꦺꦴ, ꦮꦕ꧀ꦖ, ꦄꦏꦸꦱꦭꦁ, ꦄꦩꦺꦴꦲꦺꦴ ꦏꦸꦱꦭꦁ. ꦆꦠꦶ ꦑꦺꦴ, ꦮꦕ꧀ꦖ, ꦆꦩꦺ ꦠꦪꦺꦴ ꦣꦩ꧀ꦩꦴ ꦄꦏꦸꦱꦭꦴ, ꦠꦪꦺꦴ ꦣꦩ꧀ꦩꦴ ꦏꦸꦱꦭꦴ.

‘‘ꦥꦴꦟꦴꦠꦶꦥꦴꦠꦺꦴ ꦑꦺꦴ, ꦮꦕ꧀ꦖ, ꦄꦏꦸꦱꦭꦁ, ꦥꦴꦟꦴꦠꦶꦥꦴꦠꦴ ꦮꦺꦫꦩꦟꦷ ꦏꦸꦱꦭꦁ; ꦄꦢꦶꦤ꧀ꦤꦴꦢꦴꦤꦁ ꦑꦺꦴ, ꦮꦕ꧀ꦖ, ꦄꦏꦸꦱꦭꦁ, ꦄꦢꦶꦤ꧀ꦤꦴꦢꦴꦤꦴ ꦮꦺꦫꦩꦟꦷ ꦏꦸꦱꦭꦁ; ꦏꦴꦩꦺꦱꦸꦩꦶꦕ꧀ꦖꦴꦕꦴꦫꦺꦴ ꦑꦺꦴ, ꦮꦕ꧀ꦖ, ꦄꦏꦸꦱꦭꦁ, ꦏꦴꦩꦺꦱꦸꦩꦶꦕ꧀ꦖꦴꦕꦴꦫꦴ ꦮꦺꦫꦩꦟꦷ ꦏꦸꦱꦭꦁ; ꦩꦸꦱꦴꦮꦴꦢꦺꦴ ꦑꦺꦴ, ꦮꦕ꧀ꦖ, ꦄꦏꦸꦱꦭꦁ, ꦩꦸꦱꦴꦮꦴꦢꦴ ꦮꦺꦫꦩꦟꦷ ꦏꦸꦱꦭꦁ; ꦥꦶꦱꦸꦟꦴ ꦮꦴꦕꦴ ꦑꦺꦴ, ꦮꦕ꧀ꦖ, ꦄꦏꦸꦱꦭꦁ, ꦥꦶꦱꦸꦟꦴꦪ ꦮꦴꦕꦴꦪ ꦮꦺꦫꦩꦟꦷ ꦏꦸꦱꦭꦁ; ꦦꦫꦸꦱꦴ ꦮꦴꦕꦴ ꦑꦺꦴ, ꦮꦕ꧀ꦖ, ꦄꦏꦸꦱꦭꦁ, ꦦꦫꦸꦱꦴꦪ ꦮꦴꦕꦴꦪ ꦮꦺꦫꦩꦟꦷ ꦏꦸꦱꦭꦁ; ꦱꦩ꧀ꦦꦥ꧀ꦥꦭꦴꦥꦺꦴ ꦑꦺꦴ, ꦮꦕ꧀ꦖ, ꦄꦏꦸꦱꦭꦁ, ꦱꦩ꧀ꦦꦥ꧀ꦥꦭꦴꦥꦴ ꦮꦺꦫꦩꦟꦷ ꦏꦸꦱꦭꦁ; ꦄꦨꦶꦗ꧀ꦙꦴ ꦑꦺꦴ, ꦮꦕ꧀ꦖ, ꦄꦏꦸꦱꦭꦁ, ꦄꦤꦨꦶꦗ꧀ꦙꦴ ꦏꦸꦱꦭꦁ; ꦧ꧀ꦪꦴꦥꦴꦢꦺꦴ ꦑꦺꦴ, ꦮꦕ꧀ꦖ, ꦄꦏꦸꦱꦭꦁ, ꦄꦧ꧀ꦪꦴꦥꦴꦢꦺꦴ ꦏꦸꦱꦭꦁ; ꦩꦶꦕ꧀ꦖꦴꦢꦶꦛ꧀ꦜꦶ ꦑꦺꦴ, ꦮꦕ꧀ꦖ, ꦄꦏꦸꦱꦭꦁ ꦱꦩ꧀ꦩꦴꦢꦶꦛ꧀ꦜꦶ ꦏꦸꦱꦭꦁ. ꦆꦠꦶ ꦑꦺꦴ, ꦮꦕ꧀ꦖ, ꦆꦩꦺ ꦢꦱ ꦣꦩ꧀ꦩꦴ ꦄꦏꦸꦱꦭꦴ, ꦢꦱ ꦣꦩ꧀ꦩꦴ ꦏꦸꦱꦭꦴ.

‘‘ꦪꦠꦺꦴ ꦑꦺꦴ, ꦮꦕ꧀ꦖ, ꦨꦶꦏ꧀ꦑꦸꦤꦺꦴ ꦠꦟ꧀ꦲꦴ ꦥꦲꦷꦤꦴ ꦲꦺꦴꦠꦶ ꦈꦕ꧀ꦖꦶꦤ꧀ꦤꦩꦹꦭꦴ ꦠꦴꦭꦴꦮꦠ꧀ꦡꦸꦏꦠꦴ ꦄꦤꦨꦴꦮꦁꦏꦠꦴ ꦄꦴꦪꦠꦶꦁ ꦄꦤꦸꦥ꧀ꦥꦴꦢꦣꦩ꧀ꦩꦴ, ꦱꦺꦴ ꦲꦺꦴꦠꦶ ꦨꦶꦏ꧀ꦑꦸ ꦄꦫꦲꦁ ꦑꦷꦟꦴꦱꦮꦺꦴ ꦮꦸꦱꦶꦠꦮꦴ ꦏꦠꦏꦫꦟꦷꦪꦺꦴ ꦎꦲꦶꦠꦨꦴꦫꦺꦴ ꦄꦤꦸꦥ꧀ꦥꦠ꧀ꦠꦱꦢꦠ꧀ꦡꦺꦴ ꦥꦫꦶꦏ꧀ꦑꦷꦟꦨꦮꦱꦁꦪꦺꦴꦗꦤꦺꦴ ꦱꦩ꧀ꦩꦢꦚ꧀ꦚꦴ ꦮꦶꦩꦸꦠ꧀ꦠꦺꦴ’’ꦠꦶ.

꧑꧙꧕. ‘‘ꦠꦶꦛ꧀ꦜꦠꦸ ꦨꦮꦁ ꦒꦺꦴꦠꦩꦺꦴ. ꦄꦠ꧀ꦡꦶ ꦥꦤ ꦠꦺ ꦨꦺꦴꦠꦺꦴ ꦒꦺꦴꦠꦩꦱ꧀ꦱ ꦌꦏꦨꦶꦏ꧀ꦑꦸꦥꦶ ꦱꦴꦮꦏꦺꦴ ꦪꦺꦴ ꦄꦴꦱꦮꦴꦤꦁ ꦑꦪꦴ [ꦱꦴꦮꦏꦺꦴ ꦄꦴꦱꦮꦴꦤꦁ ꦑꦪꦴ (ꦱꦷ. ꦱ꧀ꦪꦴ. ꦏꦁ. ꦥꦷ.) ꦌꦮꦩꦸꦥꦫꦶꦥꦶ] ꦄꦤꦴꦱꦮꦁ ꦕꦺꦠꦺꦴꦮꦶꦩꦸꦠ꧀ꦠꦶꦁ ꦥꦚ꧀ꦚꦴꦮꦶꦩꦸꦠ꧀ꦠꦶꦁ ꦢꦶꦛ꧀ꦜꦺꦮ ꦣꦩ꧀ꦩꦺ ꦱꦪꦁ ꦄꦨꦶꦚ꧀ꦚꦴ ꦱꦕ꧀ꦖꦶꦏꦠ꧀ꦮꦴ ꦈꦥꦱꦩ꧀ꦥꦗ꧀ꦗ ꦮꦶꦲꦫꦠꦷ’’ꦠꦶ? ‘‘ꦤ ꦑꦺꦴ, ꦮꦕ꧀ꦖ, ꦌꦏꦁꦪꦺꦮ ꦱꦠꦁ ꦤ ꦢ꧀ꦮꦺ ꦱꦠꦴꦤꦶ ꦤ ꦠꦷꦟꦶ ꦱꦠꦴꦤꦶ ꦤ ꦕꦠ꧀ꦠꦴꦫꦶ ꦱꦠꦴꦤꦶ ꦤ ꦥꦚ꧀ꦕ ꦱꦠꦴꦤꦶ, ꦄꦡ ꦑꦺꦴ ꦨꦶꦪ꧀ꦪꦺꦴꦮ ꦪꦺ ꦨꦶꦏ꧀ꦑꦹ ꦩꦩ ꦱꦴꦮꦏꦴ ꦄꦴꦱꦮꦴꦤꦁ ꦑꦪꦴ ꦄꦤꦴꦱꦮꦁ ꦕꦺꦠꦺꦴꦮꦶꦩꦸꦠ꧀ꦠꦶꦁ ꦥꦚ꧀ꦚꦴꦮꦶꦩꦸꦠ꧀ꦠꦶꦁ ꦢꦶꦛ꧀ꦜꦺꦮ ꦣꦩ꧀ꦩꦺ ꦱꦪꦁ ꦄꦨꦶꦚ꧀ꦚꦴ ꦱꦕ꧀ꦖꦶꦏꦠ꧀ꦮꦴ ꦈꦥꦱꦩ꧀ꦥꦗ꧀ꦗ ꦮꦶꦲꦫꦤ꧀ꦠꦷ’’ꦠꦶ.

‘‘ꦠꦶꦛ꧀ꦜꦠꦸ ꦨꦮꦁ ꦒꦺꦴꦠꦩꦺꦴ, ꦠꦶꦛ꧀ꦜꦤ꧀ꦠꦸ ꦨꦶꦏ꧀ꦑꦹ. ꦄꦠ꧀ꦡꦶ ꦥꦤ ꦨꦺꦴꦠꦺꦴ ꦒꦺꦴꦠꦩꦱ꧀ꦱ ꦌꦏꦴ ꦨꦶꦏ꧀ꦑꦸꦤꦷꦥꦶ ꦱꦴꦮꦶꦏꦴ ꦪꦴ ꦄꦴꦱꦮꦴꦤꦁ ꦑꦪꦴ ꦄꦤꦴꦱꦮꦁ ꦕꦺꦠꦺꦴꦮꦶꦩꦸꦠ꧀ꦠꦶꦁ ꦥꦚ꧀ꦚꦴꦮꦶꦩꦸꦠ꧀ꦠꦶꦁ ꦢꦶꦛ꧀ꦜꦺꦮ ꦣꦩ꧀ꦩꦺ ꦱꦪꦁ ꦄꦨꦶꦚ꧀ꦚꦴ ꦱꦕ꧀ꦖꦶꦏꦠ꧀ꦮꦴ ꦈꦥꦱꦩ꧀ꦥꦗ꧀ꦗ ꦮꦶꦲꦫꦠꦷ’’ꦠꦶ? ‘‘ꦤ ꦑꦺꦴ, ꦮꦕ꧀ꦖ, ꦌꦏꦁꦪꦺꦮ ꦱꦠꦁ ꦤ ꦢ꧀ꦮꦺ ꦱꦠꦴꦤꦶ ꦤ ꦠꦷꦟꦶ ꦱꦠꦴꦤꦶ ꦤ ꦕꦠ꧀ꦠꦴꦫꦶ ꦱꦠꦴꦤꦶ ꦤ ꦥꦚ꧀ꦕ ꦱꦠꦴꦤꦶ, ꦄꦡ ꦑꦺꦴ ꦨꦶꦪ꧀ꦪꦺꦴꦮ ꦪꦴ ꦨꦶꦏ꧀ꦑꦸꦤꦶꦪꦺꦴ ꦩꦩ ꦱꦴꦮꦶꦏꦴ ꦄꦴꦱꦮꦴꦤꦁ ꦑꦪꦴ ꦄꦤꦴꦱꦮꦁ ꦕꦺꦠꦺꦴꦮꦶꦩꦸꦠ꧀ꦠꦶꦁ ꦥꦚ꧀ꦚꦴꦮꦶꦩꦸꦠ꧀ꦠꦶꦁ ꦢꦶꦛ꧀ꦜꦺꦮ ꦣꦩ꧀ꦩꦺ ꦱꦪꦁ ꦄꦨꦶꦚ꧀ꦚꦴ ꦱꦕ꧀ꦖꦶꦏꦠ꧀ꦮꦴ ꦈꦥꦱꦩ꧀ꦥꦗ꧀ꦗ ꦮꦶꦲꦫꦤ꧀ꦠꦷ’’ꦠꦶ.

‘‘ꦠꦶꦛ꧀ꦜꦠꦸ ꦨꦮꦁ ꦒꦺꦴꦠꦩꦺꦴ, ꦠꦶꦛ꧀ꦜꦤ꧀ꦠꦸ ꦨꦶꦏ꧀ꦑꦹ, ꦠꦶꦛ꧀ꦜꦤ꧀ꦠꦸ ꦨꦶꦏ꧀ꦑꦸꦤꦶꦪꦺꦴ. ꦄꦠ꧀ꦡꦶ ꦥꦤ ꦨꦺꦴꦠꦺꦴ ꦒꦺꦴꦠꦩꦱ꧀ꦱ ꦌꦏꦸꦥꦴꦱꦏꦺꦴꦥꦶ ꦱꦴꦮꦏꦺꦴ ꦒꦶꦲꦷ ꦎꦢꦴꦠꦮꦱꦤꦺꦴ ꦧ꧀ꦫꦲ꧀ꦩꦕꦴꦫꦷ ꦪꦺꦴ ꦥꦚ꧀ꦕꦤ꧀ꦤꦁ ꦎꦫꦩ꧀ꦨꦴꦒꦶꦪꦴꦤꦁ ꦱꦁꦪꦺꦴꦗꦤꦴꦤꦁ ꦥꦫꦶꦏ꧀ꦑꦪꦴ ꦎꦥꦥꦴꦠꦶꦏꦺꦴ ꦠꦠ꧀ꦡ ꦥꦫꦶꦤꦶꦧ꧀ꦧꦴꦪꦷ ꦄꦤꦴꦮꦠ꧀ꦠꦶꦣꦩ꧀ꦩꦺꦴ ꦠꦱ꧀ꦩꦴ ꦭꦺꦴꦏꦴ’’ꦠꦶ? ‘‘ꦤ ꦑꦺꦴ, ꦮꦕ꧀ꦖ, ꦌꦏꦁꦪꦺꦮ ꦱꦠꦁ ꦤ ꦢ꧀ꦮꦺ ꦱꦠꦴꦤꦶ ꦤ ꦠꦷꦟꦶ ꦱꦠꦴꦤꦶ ꦤ ꦕꦠ꧀ꦠꦴꦫꦶ ꦱꦠꦴꦤꦶ ꦤ ꦥꦚ꧀ꦕ ꦱꦠꦴꦤꦶ, ꦄꦡ ꦑꦺꦴ ꦨꦶꦪ꧀ꦪꦺꦴꦮ ꦪꦺ ꦈꦥꦴꦱꦏꦴ ꦩꦩ ꦱꦴꦮꦏꦴ ꦒꦶꦲꦷ ꦎꦢꦴꦠꦮꦱꦤꦴ ꦧ꧀ꦫꦲ꧀ꦩꦕꦴꦫꦶꦤꦺꦴ ꦥꦚ꧀ꦕꦤ꧀ꦤꦁ ꦎꦫꦩ꧀ꦨꦴꦒꦶꦪꦴꦤꦁ ꦱꦁꦪꦺꦴꦗꦤꦴꦤꦁ ꦥꦫꦶꦏ꧀ꦑꦪꦴ ꦎꦥꦥꦴꦠꦶꦏꦴ ꦠꦠ꧀ꦡ ꦥꦫꦶꦤꦶꦧ꧀ꦧꦴꦪꦶꦤꦺꦴ ꦄꦤꦴꦮꦠ꧀ꦠꦶꦣꦩ꧀ꦩꦴ ꦠꦱ꧀ꦩꦴ ꦭꦺꦴꦏꦴ’’ꦠꦶ.

‘‘ꦠꦶꦛ꧀ꦜꦠꦸ ꦨꦮꦁ ꦒꦺꦴꦠꦩꦺꦴ, ꦠꦶꦛ꧀ꦜꦤ꧀ꦠꦸ ꦨꦶꦏ꧀ꦑꦹ, ꦠꦶꦛ꧀ꦜꦤ꧀ꦠꦸ ꦨꦶꦏ꧀ꦑꦸꦤꦶꦪꦺꦴ, ꦠꦶꦛ꧀ꦜꦤ꧀ꦠꦸ ꦈꦥꦴꦱꦏꦴ ꦒꦶꦲꦷ ꦎꦢꦴꦠꦮꦱꦤꦴ ꦧ꧀ꦫꦲ꧀ꦩꦕꦴꦫꦶꦤꦺꦴ. ꦄꦠ꧀ꦡꦶ ꦥꦤ ꦨꦺꦴꦠꦺꦴ ꦒꦺꦴꦠꦩꦱ꧀ꦱ ꦌꦏꦸꦥꦴꦱꦏꦺꦴꦥꦶ ꦱꦴꦮꦏꦺꦴ ꦒꦶꦲꦷ ꦎꦢꦴꦠꦮꦱꦤꦺꦴ ꦏꦴꦩꦨꦺꦴꦒꦷ ꦱꦴꦱꦤꦏꦫꦺꦴ ꦎꦮꦴꦢꦥ꧀ꦥꦛꦶꦏꦫꦺꦴ ꦪꦺꦴ ꦠꦶꦟ꧀ꦟꦮꦶꦕꦶꦏꦶꦕ꧀ꦖꦺꦴ ꦮꦶꦒꦠꦏꦡꦁꦏꦡꦺꦴ ꦮꦺꦱꦴꦫꦗ꧀ꦗꦥ꧀ꦥꦠ꧀ꦠꦺꦴ ꦄꦥꦫꦥ꧀ꦥꦕ꧀ꦕꦪꦺꦴ ꦱꦠ꧀ꦡꦸꦱꦴꦱꦤꦺ ꦮꦶꦲꦫꦠꦷ’’ꦠꦶ? ‘‘ꦤ ꦑꦺꦴ, ꦮꦕ꧀ꦖ, ꦌꦏꦁꦪꦺꦮ ꦱꦠꦁ ꦤ ꦢ꧀ꦮꦺ ꦱꦠꦴꦤꦶ ꦤ ꦠꦷꦟꦶ ꦱꦠꦴꦤꦶ ꦤ ꦕꦠ꧀ꦠꦴꦫꦶ ꦱꦠꦴꦤꦶ ꦤ ꦥꦚ꧀ꦕ ꦱꦠꦴꦤꦶ, ꦄꦡ ꦑꦺꦴ ꦨꦶꦪ꧀ꦪꦺꦴꦮ ꦪꦺ ꦈꦥꦴꦱꦏꦴ ꦩꦩ ꦱꦴꦮꦏꦴ ꦒꦶꦲꦷ ꦎꦢꦴꦠꦮꦱꦤꦴ ꦏꦴꦩꦨꦺꦴꦒꦶꦤꦺꦴ ꦱꦴꦱꦤꦏꦫꦴ ꦎꦮꦴꦢꦥ꧀ꦥꦛꦶꦏꦫꦴ ꦠꦶꦟ꧀ꦟꦮꦶꦕꦶꦏꦶꦕ꧀ꦖꦴ ꦮꦶꦒꦠꦏꦡꦁꦏꦡꦴ ꦮꦺꦱꦴꦫꦗ꧀ꦗꦥ꧀ꦥꦠ꧀ꦠꦴ ꦄꦥꦫꦥ꧀ꦥꦕ꧀ꦕꦪꦴ ꦱꦠ꧀ꦡꦸꦱꦴꦱꦤꦺ ꦮꦶꦲꦫꦤ꧀ꦠꦷ’’ꦠꦶ.

‘‘ꦠꦶꦛ꧀ꦜꦠꦸ ꦨꦮꦁ ꦒꦺꦴꦠꦩꦺꦴ, ꦠꦶꦛ꧀ꦜꦤ꧀ꦠꦸ ꦨꦶꦏ꧀ꦑꦹ, ꦠꦶꦛ꧀ꦜꦤ꧀ꦠꦸ ꦨꦶꦏ꧀ꦑꦸꦤꦶꦪꦺꦴ, ꦠꦶꦛ꧀ꦜꦤ꧀ꦠꦸ ꦈꦥꦴꦱꦏꦴ ꦒꦶꦲꦷ ꦎꦢꦴꦠꦮꦱꦤꦴ ꦧ꧀ꦫꦲ꧀ꦩꦕꦴꦫꦶꦤꦺꦴ, ꦠꦶꦛ꧀ꦜꦤ꧀ꦠꦸ ꦈꦥꦴꦱꦏꦴ ꦒꦶꦲꦷ ꦎꦢꦴꦠꦮꦱꦤꦴ ꦏꦴꦩꦨꦺꦴꦒꦶꦤꦺꦴ. ꦄꦠ꧀ꦡꦶ ꦥꦤ ꦨꦺꦴꦠꦺꦴ ꦒꦺꦴꦠꦩꦱ꧀ꦱ ꦌꦏꦸꦥꦴꦱꦶꦏꦴꦥꦶ ꦱꦴꦮꦶꦏꦴ ꦒꦶꦲꦶꦤꦷ ꦎꦢꦴꦠꦮꦱꦤꦴ ꦧ꧀ꦫꦲ꧀ꦩꦕꦴꦫꦶꦤꦷ ꦪꦴ ꦥꦚ꧀ꦕꦤ꧀ꦤꦁ ꦎꦫꦩ꧀ꦨꦴꦒꦶꦪꦴꦤꦁ ꦱꦁꦪꦺꦴꦗꦤꦴꦤꦁ ꦥꦫꦶꦏ꧀ꦑꦪꦴ ꦎꦥꦥꦴꦠꦶꦏꦴ ꦠꦠ꧀ꦡ ꦥꦫꦶꦤꦶꦧ꧀ꦧꦴꦪꦶꦤꦷ ꦄꦤꦴꦮꦠ꧀ꦠꦶꦣꦩ꧀ꦩꦴ ꦠꦱ꧀ꦩꦴ ꦭꦺꦴꦏꦴ’’ꦠꦶ? ‘‘ꦤ ꦑꦺꦴ, ꦮꦕ꧀ꦖ, ꦌꦏꦁꦪꦺꦮ ꦱꦠꦁ ꦤ ꦢ꧀ꦮꦺ ꦱꦠꦴꦤꦶ ꦤ ꦠꦷꦟꦶ ꦱꦠꦴꦤꦶ ꦤ ꦕꦠ꧀ꦠꦴꦫꦶ ꦱꦠꦴꦤꦶ ꦤ ꦥꦚ꧀ꦕ ꦱꦠꦴꦤꦶ, ꦄꦡ ꦑꦺꦴ ꦨꦶꦪ꧀ꦪꦺꦴꦮ ꦪꦴ ꦈꦥꦴꦱꦶꦏꦴ ꦩꦩ ꦱꦴꦮꦶꦏꦴ ꦒꦶꦲꦶꦤꦶꦪꦺꦴ ꦎꦢꦴꦠꦮꦱꦤꦴ ꦧ꧀ꦫꦲ꧀ꦩꦕꦴꦫꦶꦤꦶꦪꦺꦴ ꦥꦚ꧀ꦕꦤ꧀ꦤꦁ ꦎꦫꦩ꧀ꦨꦴꦒꦶꦪꦴꦤꦁ ꦱꦁꦪꦺꦴꦗꦤꦴꦤꦁ ꦥꦫꦶꦏ꧀ꦑꦪꦴ ꦎꦥꦥꦴꦠꦶꦏꦴ ꦠꦠ꧀ꦡ ꦥꦫꦶꦤꦶꦧ꧀ꦧꦴꦪꦶꦤꦶꦪꦺꦴ ꦄꦤꦴꦮꦠ꧀ꦠꦶꦣꦩ꧀ꦩꦴ ꦠꦱ꧀ꦩꦴ ꦭꦺꦴꦏꦴ’’ꦠꦶ.

‘‘ꦠꦶꦛ꧀ꦜꦠꦸ ꦨꦮꦁ ꦒꦺꦴꦠꦩꦺꦴ, ꦠꦶꦛ꧀ꦜꦤ꧀ꦠꦸ ꦨꦶꦏ꧀ꦑꦹ, ꦠꦶꦛ꧀ꦜꦤ꧀ꦠꦸ ꦨꦶꦏ꧀ꦑꦸꦤꦶꦪꦺꦴ, ꦠꦶꦛ꧀ꦜꦤ꧀ꦠꦸ ꦈꦥꦴꦱꦏꦴ ꦒꦶꦲꦷ ꦎꦢꦴꦠꦮꦱꦤꦴ ꦧ꧀ꦫꦲ꧀ꦩꦕꦴꦫꦶꦤꦺꦴ, ꦠꦶꦛ꧀ꦜꦤ꧀ꦠꦸ ꦈꦥꦴꦱꦏꦴ ꦒꦶꦲꦷ ꦎꦢꦴꦠꦮꦱꦤꦴ ꦏꦴꦩꦨꦺꦴꦒꦶꦤꦺꦴ, ꦠꦶꦛ꧀ꦜꦤ꧀ꦠꦸ ꦈꦥꦴꦱꦶꦏꦴ ꦒꦶꦲꦶꦤꦶꦪꦺꦴ ꦎꦢꦴꦠꦮꦱꦤꦴ ꦧ꧀ꦫꦲ꧀ꦩꦕꦴꦫꦶꦤꦶꦪꦺꦴ. ꦄꦠ꧀ꦡꦶ ꦥꦤ ꦨꦺꦴꦠꦺꦴ ꦒꦺꦴꦠꦩꦱ꧀ꦱ ꦌꦏꦸꦥꦴꦱꦶꦏꦴꦥꦶ ꦱꦴꦮꦶꦏꦴ ꦒꦶꦲꦶꦤꦷ ꦎꦢꦴꦠꦮꦱꦤꦴ ꦏꦴꦩꦨꦺꦴꦒꦶꦤꦷ ꦱꦴꦱꦤꦏꦫꦴ ꦎꦮꦴꦢꦥ꧀ꦥꦛꦶꦏꦫꦴ ꦪꦴ ꦠꦶꦟ꧀ꦟꦮꦶꦕꦶꦏꦶꦕ꧀ꦖꦴ ꦮꦶꦒꦠꦏꦡꦁꦏꦡꦴ ꦮꦺꦱꦴꦫꦗ꧀ꦗꦥ꧀ꦥꦠ꧀ꦠꦴ ꦄꦥꦫꦥ꧀ꦥꦕ꧀ꦕꦪꦴ ꦱꦠ꧀ꦡꦸꦱꦴꦱꦤꦺ ꦮꦶꦲꦫꦠꦷ’’ꦠꦶ? ‘‘ꦤ ꦑꦺꦴ, ꦮꦕ꧀ꦖ, ꦌꦏꦁꦪꦺꦮ ꦱꦠꦁ ꦤ ꦢ꧀ꦮꦺ ꦱꦠꦴꦤꦶ ꦤ ꦠꦷꦟꦶ ꦱꦠꦴꦤꦶ ꦤ ꦕꦠ꧀ꦠꦴꦫꦶ ꦱꦠꦴꦤꦶ ꦤ ꦥꦚ꧀ꦕ ꦱꦠꦴꦤꦶ, ꦄꦡ ꦑꦺꦴ ꦨꦶꦪ꧀ꦪꦺꦴꦮ ꦪꦴ ꦈꦥꦴꦱꦶꦏꦴ ꦩꦩ ꦱꦴꦮꦶꦏꦴ ꦒꦶꦲꦶꦤꦶꦪꦺꦴ ꦎꦢꦴꦠꦮꦱꦤꦴ ꦏꦴꦩꦨꦺꦴꦒꦶꦤꦶꦪꦺꦴ ꦱꦴꦱꦤꦏꦫꦴ ꦎꦮꦴꦢꦥ꧀ꦥꦛꦶꦏꦫꦴ ꦠꦶꦟ꧀ꦟꦮꦶꦕ꧀ꦖꦶꦏꦶꦕ꧀ꦖꦴ ꦮꦶꦒꦠꦏꦡꦁꦏꦡꦴ ꦮꦺꦱꦴꦫꦗ꧀ꦗꦥ꧀ꦥꦠ꧀ꦠꦴ ꦄꦥꦫꦥ꧀ꦥꦕ꧀ꦕꦪꦴ ꦱꦠ꧀ꦡꦸꦱꦴꦱꦤꦺ ꦮꦶꦲꦫꦤ꧀ꦠꦷ’’ꦠꦶ.

꧑꧙꧖. ‘‘ꦱꦕꦺ ꦲꦶ, ꦨꦺꦴ ꦒꦺꦴꦠꦩ, ꦆꦩꦁ ꦣꦩ꧀ꦩꦁ ꦨꦮꦁꦪꦺꦮ ꦒꦺꦴꦠꦩꦺꦴ ꦄꦴꦫꦴꦣꦏꦺꦴ ꦄꦨꦮꦶꦱ꧀ꦱ, ꦤꦺꦴ ꦕ ꦑꦺꦴ ꦨꦶꦏ꧀ꦑꦹ ꦄꦴꦫꦴꦣꦏꦴ ꦄꦨꦮꦶꦱ꧀ꦱꦁꦱꦸ; ꦌꦮꦩꦶꦢꦁ ꦧ꧀ꦫꦲ꧀ꦩꦕꦫꦶꦪꦁ ꦄꦥꦫꦶꦥꦹꦫꦁ ꦄꦨꦮꦶꦱ꧀ꦱ ꦠꦺꦤꦔ꧀ꦒꦺꦤ. ꦪꦱ꧀ꦩꦴ ꦕ ꦑꦺꦴ, ꦨꦺꦴ ꦒꦺꦴꦠꦩ, ꦆꦩꦁ ꦣꦩ꧀ꦩꦁ ꦨꦮꦚ꧀ꦕꦺꦮ ꦒꦺꦴꦠꦩꦺꦴ ꦄꦴꦫꦴꦣꦏꦺꦴ ꦨꦶꦏ꧀ꦑꦹ ꦕ ꦄꦴꦫꦴꦣꦏꦴ; ꦌꦮꦩꦶꦢꦁ ꦧ꧀ꦫꦲ꧀ꦩꦕꦫꦶꦪꦁ ꦥꦫꦶꦥꦹꦫꦁ ꦠꦺꦤꦔ꧀ꦒꦺꦤ.

‘‘ꦱꦕꦺ ꦲꦶ, ꦨꦺꦴ ꦒꦺꦴꦠꦩ, ꦆꦩꦁ ꦣꦩ꧀ꦩꦁ ꦨꦮꦚ꧀ꦕꦺꦮ ꦒꦺꦴꦠꦩꦺꦴ ꦄꦴꦫꦴꦣꦏꦺꦴ ꦄꦨꦮꦶꦱ꧀ꦱ, ꦨꦶꦏ꧀ꦑꦹ ꦕ ꦄꦴꦫꦴꦣꦏꦴ ꦄꦨꦮꦶꦱ꧀ꦱꦁꦱꦸ, ꦤꦺꦴ ꦕ ꦑꦺꦴ ꦨꦶꦏ꧀ꦑꦸꦤꦶꦪꦺꦴ ꦄꦴꦫꦴꦣꦶꦏꦴ ꦄꦨꦮꦶꦱ꧀ꦱꦁꦱꦸ; ꦌꦮꦩꦶꦢꦁ ꦧ꧀ꦫꦲ꧀ꦩꦕꦫꦶꦪꦁ ꦄꦥꦫꦶꦥꦹꦫꦁ ꦄꦨꦮꦶꦱ꧀ꦱ ꦠꦺꦤꦔ꧀ꦒꦺꦤ. ꦪꦱ꧀ꦩꦴ ꦕ ꦑꦺꦴ, ꦨꦺꦴ ꦒꦺꦴꦠꦩ, ꦆꦩꦁ ꦣꦩ꧀ꦩꦁ ꦨꦮꦚ꧀ꦕꦺꦮ ꦒꦺꦴꦠꦩꦺꦴ ꦄꦴꦫꦴꦣꦏꦺꦴ, ꦨꦶꦏ꧀ꦑꦹ ꦕ ꦄꦴꦫꦴꦣꦏꦴ, ꦨꦶꦏ꧀ꦑꦸꦤꦶꦪꦺꦴ ꦕ ꦄꦴꦫꦴꦣꦶꦏꦴ; ꦌꦮꦩꦶꦢꦁ ꦧ꧀ꦫꦲ꧀ꦩꦕꦫꦶꦪꦁ ꦥꦫꦶꦥꦹꦫꦁ ꦠꦺꦤꦔ꧀ꦒꦺꦤ.

‘‘ꦱꦕꦺ ꦲꦶ, ꦨꦺꦴ ꦒꦺꦴꦠꦩ, ꦆꦩꦁ ꦣꦩ꧀ꦩꦁ ꦨꦮꦚ꧀ꦕꦺꦮ ꦒꦺꦴꦠꦩꦺꦴ ꦄꦴꦫꦴꦣꦏꦺꦴ ꦄꦨꦮꦶꦱ꧀ꦱ, ꦨꦶꦏ꧀ꦑꦹ ꦕ ꦄꦴꦫꦴꦣꦏꦴ ꦄꦨꦮꦶꦱ꧀ꦱꦁꦱꦸ, ꦨꦶꦏ꧀ꦑꦸꦤꦶꦪꦺꦴ ꦕ ꦄꦴꦫꦴꦣꦶꦏꦴ ꦄꦨꦮꦶꦱ꧀ꦱꦁꦱꦸ, ꦤꦺꦴ ꦕ ꦑꦺꦴ ꦈꦥꦴꦱꦏꦴ ꦒꦶꦲꦷ ꦎꦢꦴꦠꦮꦱꦤꦴ ꦧ꧀ꦫꦲ꧀ꦩꦕꦴꦫꦶꦤꦺꦴ ꦄꦴꦫꦴꦣꦏꦴ ꦄꦨꦮꦶꦱ꧀ꦱꦁꦱꦸ; ꦌꦮꦩꦶꦢꦁ ꦧ꧀ꦫꦲ꧀ꦩꦕꦫꦶꦪꦁ ꦄꦥꦫꦶꦥꦹꦫꦁ ꦄꦨꦮꦶꦱ꧀ꦱ ꦠꦺꦤꦔ꧀ꦒꦺꦤ. ꦪꦱ꧀ꦩꦴ ꦕ ꦑꦺꦴ, ꦨꦺꦴ ꦒꦺꦴꦠꦩ, ꦆꦩꦁ ꦣꦩ꧀ꦩꦁ ꦨꦮꦚ꧀ꦕꦺꦮ ꦒꦺꦴꦠꦩꦺꦴ ꦄꦴꦫꦴꦣꦏꦺꦴ, ꦨꦶꦏ꧀ꦑꦹ ꦕ ꦄꦴꦫꦴꦣꦏꦴ, ꦨꦶꦏ꧀ꦑꦸꦤꦶꦪꦺꦴ ꦕ ꦄꦴꦫꦴꦣꦶꦏꦴ, ꦈꦥꦴꦱꦏꦴ ꦕ ꦒꦶꦲꦷ ꦎꦢꦴꦠꦮꦱꦤꦴ ꦧ꧀ꦫꦲ꧀ꦩꦕꦴꦫꦶꦤꦺꦴ ꦄꦴꦫꦴꦣꦏꦴ; ꦌꦮꦩꦶꦢꦁ ꦧ꧀ꦫꦲ꧀ꦩꦕꦫꦶꦪꦁ ꦥꦫꦶꦥꦹꦫꦁ ꦠꦺꦤꦔ꧀ꦒꦺꦤ.

‘‘ꦱꦕꦺ ꦲꦶ, ꦨꦺꦴ ꦒꦺꦴꦠꦩ, ꦆꦩꦁ ꦣꦩ꧀ꦩꦁ ꦨꦮꦚ꧀ꦕꦺꦮ ꦒꦺꦴꦠꦩꦺꦴ ꦄꦴꦫꦴꦣꦏꦺꦴ ꦄꦨꦮꦶꦱ꧀ꦱ, ꦨꦶꦏ꧀ꦑꦹ ꦕ ꦄꦴꦫꦴꦣꦏꦴ ꦄꦨꦮꦶꦱ꧀ꦱꦁꦱꦸ, ꦨꦶꦏ꧀ꦑꦸꦤꦶꦪꦺꦴ ꦕ ꦄꦴꦫꦴꦣꦶꦏꦴ ꦄꦨꦮꦶꦱ꧀ꦱꦁꦱꦸ, ꦈꦥꦴꦱꦏꦴ ꦕ ꦒꦶꦲꦷ ꦎꦢꦴꦠꦮꦱꦤꦴ ꦧ꧀ꦫꦲ꧀ꦩꦕꦴꦫꦶꦤꦺꦴ ꦄꦴꦫꦴꦣꦏꦴ ꦄꦨꦮꦶꦱ꧀ꦱꦁꦱꦸ, ꦤꦺꦴ ꦕ ꦑꦺꦴ ꦈꦥꦴꦱꦏꦴ ꦒꦶꦲꦷ ꦎꦢꦴꦠꦮꦱꦤꦴ ꦏꦴꦩꦨꦺꦴꦒꦶꦤꦺꦴ ꦄꦴꦫꦴꦣꦏꦴ ꦄꦨꦮꦶꦱ꧀ꦱꦁꦱꦸ; ꦌꦮꦩꦶꦢꦁ ꦧ꧀ꦫꦲ꧀ꦩꦕꦫꦶꦪꦁ ꦄꦥꦫꦶꦥꦹꦫꦁ ꦄꦨꦮꦶꦱ꧀ꦱ ꦠꦺꦤꦔ꧀ꦒꦺꦤ. ꦪꦱ꧀ꦩꦴ ꦕ ꦑꦺꦴ, ꦨꦺꦴ ꦒꦺꦴꦠꦩ, ꦆꦩꦁ ꦣꦩ꧀ꦩꦁ ꦨꦮꦚ꧀ꦕꦺꦮ ꦒꦺꦴꦠꦩꦺꦴ ꦄꦴꦫꦴꦣꦏꦺꦴ, ꦨꦶꦏ꧀ꦑꦹ ꦕ ꦄꦴꦫꦴꦣꦏꦴ, ꦨꦶꦏ꧀ꦑꦸꦤꦶꦪꦺꦴ ꦕ ꦄꦴꦫꦴꦣꦶꦏꦴ, ꦈꦥꦴꦱꦏꦴ ꦕ ꦒꦶꦲꦷ ꦎꦢꦴꦠꦮꦱꦤꦴ ꦧ꧀ꦫꦲ꧀ꦩꦕꦴꦫꦶꦤꦺꦴ ꦄꦴꦫꦴꦣꦏꦴ, ꦈꦥꦴꦱꦏꦴ ꦕ ꦒꦶꦲꦷ ꦎꦢꦴꦠꦮꦱꦤꦴ ꦏꦴꦩꦨꦺꦴꦒꦶꦤꦺꦴ ꦄꦴꦫꦴꦣꦏꦴ; ꦌꦮꦩꦶꦢꦁ ꦧ꧀ꦫꦲ꧀ꦩꦕꦫꦶꦪꦁ ꦥꦫꦶꦥꦹꦫꦁ ꦠꦺꦤꦔ꧀ꦒꦺꦤ.

‘‘ꦱꦕꦺ ꦲꦶ, ꦨꦺꦴ ꦒꦺꦴꦠꦩ, ꦆꦩꦁ ꦣꦩ꧀ꦩꦁ ꦨꦮꦚ꧀ꦕꦺꦮ ꦒꦺꦴꦠꦩꦺꦴ ꦄꦴꦫꦴꦣꦏꦺꦴ ꦄꦨꦮꦶꦱ꧀ꦱ, ꦨꦶꦏ꧀ꦑꦹ ꦕ ꦄꦴꦫꦴꦣꦏꦴ ꦄꦨꦮꦶꦱ꧀ꦱꦁꦱꦸ, ꦨꦶꦏ꧀ꦑꦸꦤꦶꦪꦺꦴ ꦕ ꦄꦴꦫꦴꦣꦶꦏꦴ ꦄꦨꦮꦶꦱ꧀ꦱꦁꦱꦸ, ꦈꦥꦴꦱꦏꦴ ꦕ ꦒꦶꦲꦷ ꦎꦢꦴꦠꦮꦱꦤꦴ ꦧ꧀ꦫꦲ꧀ꦩꦕꦴꦫꦶꦤꦺꦴ ꦄꦴꦫꦴꦣꦏꦴ ꦄꦨꦮꦶꦱ꧀ꦱꦁꦱꦸ, ꦈꦥꦴꦱꦏꦴ ꦕ ꦒꦶꦲꦷ ꦎꦢꦴꦠꦮꦱꦤꦴ ꦏꦴꦩꦨꦺꦴꦒꦶꦤꦺꦴ ꦄꦴꦫꦴꦣꦏꦴ ꦄꦨꦮꦶꦱ꧀ꦱꦁꦱꦸ, ꦤꦺꦴ ꦕ ꦑꦺꦴ ꦈꦥꦴꦱꦶꦏꦴ ꦒꦶꦲꦶꦤꦶꦪꦺꦴ ꦎꦢꦴꦠꦮꦱꦤꦴ ꦧ꧀ꦫꦲ꧀ꦩꦕꦴꦫꦶꦤꦶꦪꦺꦴ ꦄꦴꦫꦴꦣꦶꦏꦴ ꦄꦨꦮꦶꦱ꧀ꦱꦁꦱꦸ; ꦌꦮꦩꦶꦢꦁ ꦧ꧀ꦫꦲ꧀ꦩꦕꦫꦶꦪꦁ ꦄꦥꦫꦶꦥꦹꦫꦁ ꦄꦨꦮꦶꦱ꧀ꦱ ꦠꦺꦤꦔ꧀ꦒꦺꦤ. ꦪꦱ꧀ꦩꦴ ꦕ ꦑꦺꦴ, ꦨꦺꦴ ꦒꦺꦴꦠꦩ, ꦆꦩꦁ ꦣꦩ꧀ꦩꦁ ꦨꦮꦚ꧀ꦕꦺꦮ ꦒꦺꦴꦠꦩꦺꦴ ꦄꦴꦫꦴꦣꦏꦺꦴ, ꦨꦶꦏ꧀ꦑꦹ ꦕ ꦄꦴꦫꦴꦣꦏꦴ, ꦨꦶꦏ꧀ꦑꦸꦤꦶꦪꦺꦴ ꦕ ꦄꦴꦫꦴꦣꦶꦏꦴ, ꦈꦥꦴꦱꦏꦴ ꦕ ꦒꦶꦲꦷ ꦎꦢꦴꦠꦮꦱꦤꦴ ꦧ꧀ꦫꦲ꧀ꦩꦕꦴꦫꦶꦤꦺꦴ ꦄꦴꦫꦴꦣꦏꦴ, ꦈꦥꦴꦱꦏꦴ ꦕ ꦒꦶꦲꦷ ꦎꦢꦴꦠꦮꦱꦤꦴ ꦏꦴꦩꦨꦺꦴꦒꦶꦤꦺꦴ ꦄꦴꦫꦴꦣꦏꦴ, ꦈꦥꦴꦱꦶꦏꦴ ꦕ ꦒꦶꦲꦶꦤꦶꦪꦺꦴ ꦎꦢꦴꦠꦮꦱꦤꦴ ꦧ꧀ꦫꦲ꧀ꦩꦕꦴꦫꦶꦤꦶꦪꦺꦴ ꦄꦴꦫꦴꦣꦶꦏꦴ; ꦌꦮꦩꦶꦢꦁ ꦧ꧀ꦫꦲ꧀ꦩꦕꦫꦶꦪꦁ ꦥꦫꦶꦥꦹꦫꦁ ꦠꦺꦤꦔ꧀ꦒꦺꦤ.

‘‘ꦱꦕꦺ ꦲꦶ, ꦨꦺꦴ ꦒꦺꦴꦠꦩ, ꦆꦩꦁ ꦣꦩ꧀ꦩꦁ ꦨꦮꦚ꧀ꦕꦺꦮ ꦒꦺꦴꦠꦩꦺꦴ ꦄꦴꦫꦴꦣꦏꦺꦴ ꦄꦨꦮꦶꦱ꧀ꦱ, ꦨꦶꦏ꧀ꦑꦹ ꦕ ꦄꦴꦫꦴꦣꦏꦴ ꦄꦨꦮꦶꦱ꧀ꦱꦁꦱꦸ, ꦨꦶꦏ꧀ꦑꦸꦤꦶꦪꦺꦴ ꦕ ꦄꦴꦫꦴꦣꦶꦏꦴ ꦄꦨꦮꦶꦱ꧀ꦱꦁꦱꦸ, ꦈꦥꦴꦱꦏꦴ ꦕ ꦒꦶꦲꦷ ꦎꦢꦴꦠꦮꦱꦤꦴ ꦧ꧀ꦫꦲ꧀ꦩꦕꦴꦫꦶꦤꦺꦴ ꦄꦴꦫꦴꦣꦏꦴ ꦄꦨꦮꦶꦱ꧀ꦱꦁꦱꦸ, ꦈꦥꦴꦱꦏꦴ ꦕ ꦒꦶꦲꦷ ꦎꦢꦴꦠꦮꦱꦤꦴ ꦏꦴꦩꦨꦺꦴꦒꦶꦤꦺꦴ ꦄꦴꦫꦴꦣꦏꦴ ꦄꦨꦮꦶꦱ꧀ꦱꦁꦱꦸ, ꦈꦥꦴꦱꦶꦏꦴ ꦕ ꦒꦶꦲꦶꦤꦶꦪꦺꦴ ꦎꦢꦴꦠꦮꦱꦤꦴ ꦧ꧀ꦫꦲ꧀ꦩꦕꦴꦫꦶꦤꦶꦪꦺꦴ ꦄꦴꦫꦴꦣꦶꦏꦴ ꦄꦨꦮꦶꦱ꧀ꦱꦁꦱꦸ, ꦤꦺꦴ ꦕ ꦑꦺꦴ ꦈꦥꦴꦱꦶꦏꦴ ꦒꦶꦲꦶꦤꦶꦪꦺꦴ ꦎꦢꦴꦠꦮꦱꦤꦴ ꦏꦴꦩꦨꦺꦴꦒꦶꦤꦶꦪꦺꦴ ꦄꦴꦫꦴꦣꦶꦏꦴ ꦄꦨꦮꦶꦱ꧀ꦱꦁꦱꦸ; ꦌꦮꦩꦶꦢꦁ ꦧ꧀ꦫꦲ꧀ꦩꦕꦫꦶꦪꦁ ꦄꦥꦫꦶꦥꦹꦫꦁ ꦄꦨꦮꦶꦱ꧀ꦱ ꦠꦺꦤꦔ꧀ꦒꦺꦤ. ꦪꦱ꧀ꦩꦴ ꦕ ꦑꦺꦴ, ꦨꦺꦴ ꦒꦺꦴꦠꦩ, ꦆꦩꦁ ꦣꦩ꧀ꦩꦁ ꦨꦮꦚ꧀ꦕꦺꦮ ꦒꦺꦴꦠꦩꦺꦴ ꦄꦴꦫꦴꦣꦏꦺꦴ, ꦨꦶꦏ꧀ꦑꦹ ꦕ ꦄꦴꦫꦴꦣꦏꦴ, ꦨꦶꦏ꧀ꦑꦸꦤꦶꦪꦺꦴ ꦕ ꦄꦴꦫꦴꦣꦶꦏꦴ, ꦈꦥꦴꦱꦏꦴ ꦕ ꦒꦶꦲꦷ ꦎꦢꦴꦠꦮꦱꦤꦴ ꦧ꧀ꦫꦲ꧀ꦩꦕꦴꦫꦶꦤꦺꦴ ꦄꦴꦫꦴꦣꦏꦴ, ꦈꦥꦴꦱꦏꦴ ꦕ ꦒꦶꦲꦷ ꦎꦢꦴꦠꦮꦱꦤꦴ ꦏꦴꦩꦨꦺꦴꦒꦶꦤꦺꦴ ꦄꦴꦫꦴꦣꦏꦴ, ꦈꦥꦴꦱꦶꦏꦴ ꦕ ꦒꦶꦲꦶꦤꦶꦪꦺꦴ ꦎꦢꦴꦠꦮꦱꦤꦴ ꦧ꧀ꦫꦲ꧀ꦩꦕꦴꦫꦶꦤꦶꦪꦺꦴ ꦄꦴꦫꦴꦣꦶꦏꦴ, ꦈꦥꦴꦱꦶꦏꦴ ꦕ ꦒꦶꦲꦶꦤꦶꦪꦺꦴ ꦎꦢꦴꦠꦮꦱꦤꦴ ꦏꦴꦩꦨꦺꦴꦒꦶꦤꦶꦪꦺꦴ ꦄꦴꦫꦴꦣꦶꦏꦴ; ꦌꦮꦩꦶꦢꦁ ꦧ꧀ꦫꦲ꧀ꦩꦕꦫꦶꦪꦁ ꦥꦫꦶꦥꦹꦫꦁ ꦠꦺꦤꦔ꧀ꦒꦺꦤ.

꧑꧙꧗. ‘‘ꦱꦺꦪ꧀ꦪꦡꦴꦥꦶ, ꦨꦺꦴ ꦒꦺꦴꦠꦩ, ꦒꦔ꧀ꦒꦴ ꦤꦢꦷ ꦱꦩꦸꦢ꧀ꦢꦤꦶꦤ꧀ꦤꦴ ꦱꦩꦸꦢ꧀ꦢꦥꦺꦴꦟꦴ ꦱꦩꦸꦢ꧀ꦢꦥꦧ꧀ꦨꦴꦫꦴ ꦱꦩꦸꦢ꧀ꦢꦁ ꦄꦴꦲꦕ꧀ꦕ ꦠꦶꦛ꧀ꦜꦠꦶ, ꦌꦮꦩꦺꦮꦴꦪꦁ ꦨꦺꦴꦠꦺꦴ ꦒꦺꦴꦠꦩꦱ꧀ꦱ ꦥꦫꦶꦱꦴ ꦱꦒꦲꦛ꧀ꦜꦥꦧ꧀ꦧꦗꦶꦠꦴ ꦤꦶꦧ꧀ꦧꦴꦤꦤꦶꦤ꧀ꦤꦴ ꦤꦶꦧ꧀ꦧꦴꦤꦥꦺꦴꦟꦴ ꦤꦶꦧ꧀ꦧꦴꦤꦥꦧ꧀ꦨꦴꦫꦴ ꦤꦶꦧ꧀ꦧꦴꦤꦁ ꦄꦴꦲꦕ꧀ꦕ ꦠꦶꦛ꧀ꦜꦠꦶ. ꦄꦨꦶꦏ꧀ꦏꦤ꧀ꦠꦁ, ꦨꦺꦴ ꦒꦺꦴꦠꦩ…ꦥꦺ… ꦌꦱꦴꦲꦁ ꦨꦮꦤ꧀ꦠꦁ ꦒꦺꦴꦠꦩꦁ ꦱꦫꦟꦁ ꦒꦕ꧀ꦖꦴꦩꦶ ꦣꦩ꧀ꦩꦚ꧀ꦕ ꦨꦶꦏ꧀ꦑꦸꦱꦔ꧀ꦓꦚ꧀ꦕ. ꦭꦨꦺꦪ꧀ꦪꦴꦲꦁ ꦨꦺꦴꦠꦺꦴ ꦒꦺꦴꦠꦩꦱ꧀ꦱ ꦱꦤ꧀ꦠꦶꦏꦺ ꦥꦧ꧀ꦧꦗ꧀ꦗꦁ, ꦭꦨꦺꦪ꧀ꦪꦁ ꦈꦥꦱꦩ꧀ꦥꦢ’’ꦤ꧀ꦠꦶ. ‘‘ꦪꦺꦴ ꦑꦺꦴ, ꦮꦕ꧀ꦖ, ꦄꦚ꧀ꦚꦠꦶꦠ꧀ꦡꦶꦪꦥꦸꦧ꧀ꦧꦺꦴ ꦆꦩꦱ꧀ꦩꦶꦁ ꦣꦩ꧀ꦩꦮꦶꦤꦪꦺ ꦄꦴꦏꦔ꧀ꦑꦠꦶ ꦥꦧ꧀ꦧꦗ꧀ꦗꦁ, ꦄꦴꦏꦔ꧀ꦑꦠꦶ ꦈꦥꦱꦩ꧀ꦥꦢꦁ, ꦱꦺꦴ ꦕꦠ꧀ꦠꦴꦫꦺꦴ ꦩꦴꦱꦺ ꦥꦫꦶꦮꦱꦠꦶ. ꦕꦠꦸꦤ꧀ꦤꦁ ꦩꦴꦱꦴꦤꦁ ꦄꦕ꧀ꦕꦪꦺꦤ ꦄꦴꦫꦢ꧀ꦣꦕꦶꦠ꧀ꦠꦴ ꦨꦶꦏ꧀ꦑꦹ ꦥꦧ꧀ꦧꦴꦗꦺꦤ꧀ꦠꦶ ꦈꦥꦱꦩ꧀ꦥꦴꦢꦺꦤ꧀ꦠꦶ ꦨꦶꦏ꧀ꦑꦸꦨꦴꦮꦴꦪ; ꦄꦥꦶ ꦕ ꦩꦺꦠ꧀ꦡ ꦥꦸꦒ꧀ꦒꦭꦮꦺꦩꦠ꧀ꦠꦠꦴ ꦮꦶꦢꦶꦠꦴ’’ꦠꦶ. ‘‘ꦱꦕꦺ, ꦨꦤ꧀ꦠꦺ, ꦄꦚ꧀ꦚꦠꦶꦠ꧀ꦡꦶꦪꦥꦸꦧ꧀ꦧꦴ ꦆꦩꦱ꧀ꦩꦶꦁ ꦣꦩ꧀ꦩꦮꦶꦤꦪꦺ ꦄꦴꦏꦔ꧀ꦑꦤ꧀ꦠꦴ ꦥꦧ꧀ꦧꦗ꧀ꦗꦁ, ꦄꦴꦏꦔ꧀ꦑꦤ꧀ꦠꦴ ꦈꦥꦱꦩ꧀ꦥꦢꦁ ꦕꦠ꧀ꦠꦴꦫꦺꦴ ꦩꦴꦱꦺ ꦥꦫꦶꦮꦱꦤ꧀ꦠꦶ, ꦕꦠꦸꦤ꧀ꦤꦁ ꦩꦴꦱꦴꦤꦁ ꦄꦕ꧀ꦕꦪꦺꦤ ꦄꦴꦫꦢ꧀ꦣꦕꦶꦠ꧀ꦠꦴ ꦨꦶꦏ꧀ꦑꦹ ꦥꦧ꧀ꦧꦴꦗꦺꦤ꧀ꦠꦶ ꦈꦥꦱꦩ꧀ꦥꦴꦢꦺꦤ꧀ꦠꦶ ꦨꦶꦏ꧀ꦑꦸꦨꦴꦮꦴꦪ; ꦄꦲꦁ ꦕꦠ꧀ꦠꦴꦫꦶ ꦮꦱ꧀ꦱꦴꦤꦶ ꦥꦫꦶꦮꦱꦶꦱ꧀ꦱꦴꦩꦶ. ꦕꦠꦸꦤ꧀ꦤꦁ ꦮꦱ꧀ꦱꦴꦤꦁ ꦄꦕ꧀ꦕꦪꦺꦤ ꦄꦴꦫꦢ꧀ꦣꦕꦶꦠ꧀ꦠꦴ ꦨꦶꦏ꧀ꦑꦹ ꦥꦧ꧀ꦧꦴꦗꦺꦤ꧀ꦠꦸ ꦈꦥꦱꦩ꧀ꦥꦴꦢꦺꦤ꧀ꦠꦸ ꦨꦶꦏ꧀ꦑꦸꦨꦴꦮꦴꦪꦴ’’ꦠꦶ. ꦄꦭꦠ꧀ꦡ ꦑꦺꦴ ꦮꦕ꧀ꦖꦒꦺꦴꦠ꧀ꦠꦺꦴ ꦥꦫꦶꦧ꧀ꦧꦴꦗꦏꦺꦴ ꦨꦒꦮꦠꦺꦴ ꦱꦤ꧀ꦠꦶꦏꦺ ꦥꦧ꧀ꦧꦗ꧀ꦗꦁ ꦄꦭꦠ꧀ꦡ ꦈꦥꦱꦩ꧀ꦥꦢꦁ.

ꦄꦕꦶꦫꦹꦥꦱꦩ꧀ꦥꦤ꧀ꦤꦺꦴ ꦑꦺꦴ ꦥꦤꦴꦪꦱ꧀ꦩꦴ ꦮꦕ꧀ꦖꦒꦺꦴꦠ꧀ꦠꦺꦴ ꦄꦢ꧀ꦣꦩꦴꦱꦹꦥꦱꦩ꧀ꦥꦤ꧀ꦤꦺꦴ ꦪꦺꦤ ꦨꦒꦮꦴ ꦠꦺꦤꦸꦥꦱꦔ꧀ꦏꦩꦶ; ꦈꦥꦱꦔ꧀ꦏꦩꦶꦠ꧀ꦮꦴ ꦨꦒꦮꦤ꧀ꦠꦁ ꦄꦨꦶꦮꦴꦢꦺꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦷꦢꦶ. ꦌꦏꦩꦤ꧀ꦠꦁ ꦤꦶꦱꦶꦤ꧀ꦤꦺꦴ ꦑꦺꦴ ꦄꦴꦪꦱ꧀ꦩꦴ ꦮꦕ꧀ꦖꦒꦺꦴꦠ꧀ꦠꦺꦴ ꦨꦒꦮꦤ꧀ꦠꦁ ꦌꦠꦢꦮꦺꦴꦕ – ‘‘ꦪꦴꦮꦠꦏꦁ, ꦨꦤ꧀ꦠꦺ, ꦱꦺꦑꦺꦤ ꦚꦴꦟꦺꦤ ꦱꦺꦑꦴꦪ ꦮꦶꦗ꧀ꦗꦴꦪ ꦥꦠ꧀ꦠꦧ꧀ꦧꦁ, ꦄꦤꦸꦥ꧀ꦥꦠ꧀ꦠꦁ ꦠꦁ ꦩꦪꦴ; ꦈꦠ꧀ꦠꦫꦶ ꦕ ꦩꦺ [ꦈꦠ꧀ꦠꦫꦶꦁ ꦩꦺ (ꦱꦷ. ꦱ꧀ꦪꦴ. ꦏꦁ. ꦥꦷ.)] ꦨꦒꦮꦴ ꦣꦩ꧀ꦩꦁ ꦢꦺꦱꦺꦠꦹ’’ꦠꦶ. ‘‘ꦠꦺꦤ ꦲꦶ ꦠ꧀ꦮꦁ, ꦮꦕ꧀ꦖ, ꦢ꧀ꦮꦺ ꦣꦩ꧀ꦩꦺ ꦈꦠ꧀ꦠꦫꦶ ꦨꦴꦮꦺꦲꦶ – ꦱꦩꦡꦚ꧀ꦕ ꦮꦶꦥꦱ꧀ꦱꦤꦚ꧀ꦕ. ꦆꦩꦺ ꦑꦺꦴ ꦠꦺ, ꦮꦕ꧀ꦖ, ꦢ꧀ꦮꦺ ꦣꦩ꧀ꦩꦴ ꦈꦠ꧀ꦠꦫꦶ ꦨꦴꦮꦶꦠꦴ – ꦱꦩꦡꦺꦴ ꦕ ꦮꦶꦥꦱ꧀ꦱꦤꦴ ꦕ – ꦄꦤꦺꦏꦣꦴꦠꦸꦥꦛꦶꦮꦺꦣꦴꦪ ꦱꦁꦮꦠ꧀ꦠꦶꦱ꧀ꦱꦤ꧀ꦠꦶ.

꧑꧙꧘. ‘‘ꦱꦺꦴ ꦠ꧀ꦮꦁ, ꦮꦕ꧀ꦖ, ꦪꦴꦮꦢꦺꦮ [ꦪꦴꦮꦢꦺ (ꦥꦷ.)] ꦄꦴꦏꦔ꧀ꦑꦶꦱ꧀ꦱꦱꦶ – ‘ꦄꦤꦺꦏꦮꦶꦲꦶꦠꦁ ꦆꦢ꧀ꦣꦶꦮꦶꦣꦁ ꦥꦕ꧀ꦕꦤꦸꦨꦮꦺꦪ꧀ꦪꦁ – ꦌꦏꦺꦴꦥꦶ ꦲꦸꦠ꧀ꦮꦴ ꦧꦲꦸꦣꦴ ꦄꦱ꧀ꦱꦁ, ꦧꦲꦸꦣꦴꦥꦶ ꦲꦸꦠ꧀ꦮꦴ ꦌꦏꦺꦴ ꦄꦱ꧀ꦱꦁ; ꦄꦴꦮꦶꦨꦴꦮꦁ, ꦠꦶꦫꦺꦴꦨꦴꦮꦁ; ꦠꦶꦫꦺꦴꦏꦸꦛ꧀ꦛꦁ ꦠꦶꦫꦺꦴꦥꦴꦏꦴꦫꦁ ꦠꦶꦫꦺꦴꦥꦧ꧀ꦧꦠꦁ ꦄꦱꦗ꧀ꦗꦩꦴꦤꦺꦴ ꦒꦕ꧀ꦖꦺꦪ꧀ꦪꦁ, ꦱꦺꦪ꧀ꦪꦡꦴꦥꦶ ꦄꦴꦏꦴꦱꦺ; ꦥꦡꦮꦶꦪꦴꦥꦶ ꦈꦩ꧀ꦩꦸꦗ꧀ꦗꦤꦶꦩꦸꦗ꧀ꦗꦁ ꦏꦫꦺꦪ꧀ꦪꦁ, ꦱꦺꦪ꧀ꦪꦡꦴꦥꦶ ꦈꦢꦏꦺ; ꦈꦢꦏꦺꦥꦶ ꦄꦨꦶꦗ꧀ꦗꦩꦴꦤꦺ ꦒꦕ꧀ꦖꦺꦪ꧀ꦪꦁ, ꦱꦺꦪ꧀ꦪꦡꦴꦥꦶ ꦥꦡꦮꦶꦪꦁ; ꦄꦴꦏꦴꦱꦺꦥꦶ ꦥꦭ꧀ꦭꦔ꧀ꦏꦺꦤ ꦏꦩꦺꦪ꧀ꦪꦁ, ꦱꦺꦪ꧀ꦪꦡꦴꦥꦶ ꦥꦏ꧀ꦑꦷ ꦱꦏꦸꦟꦺꦴ; ꦆꦩꦺꦥꦶ ꦕꦤ꧀ꦢꦶꦩꦱꦹꦫꦶꦪꦺ ꦌꦮꦁꦩꦲꦶꦢ꧀ꦣꦶꦏꦺ ꦌꦮꦁꦩꦲꦴꦤꦸꦨꦴꦮꦺ ꦥꦴꦟꦶꦤꦴ ꦥꦫꦶꦩꦱꦺꦪ꧀ꦪꦁ, ꦥꦫꦶꦩꦗ꧀ꦗꦺꦪ꧀ꦪꦁ; ꦪꦴꦮꦧ꧀ꦫꦲ꧀ꦩꦭꦺꦴꦏꦴꦥꦶ ꦏꦴꦪꦺꦤ ꦮꦱꦁ ꦮꦠ꧀ꦠꦺꦪ꧀ꦪ’ꦤ꧀ꦠꦶ, ꦠꦠ꧀ꦫ ꦠꦠ꧀ꦫꦺꦮ ꦱꦏ꧀ꦑꦶꦨꦧ꧀ꦧꦠꦁ ꦥꦴꦥꦸꦟꦶꦱ꧀ꦱꦱꦶ, ꦱꦠꦶ ꦱꦠꦶꦄꦴꦪꦠꦤꦺ.

‘‘ꦱꦺꦴ ꦠ꧀ꦮꦁ, ꦮꦕ꧀ꦖ, ꦪꦴꦮꦢꦺꦮ ꦄꦴꦏꦔ꧀ꦑꦶꦱ꧀ꦱꦱꦶ – ‘ꦢꦶꦧ꧀ꦧꦴꦪ ꦱꦺꦴꦠꦣꦴꦠꦸꦪꦴ ꦮꦶꦱꦸꦢ꧀ꦣꦴꦪ ꦄꦠꦶꦏ꧀ꦏꦤ꧀ꦠꦩꦴꦤꦸꦱꦶꦏꦴꦪ ꦈꦨꦺꦴ ꦱꦢ꧀ꦢꦺ ꦱꦸꦟꦺꦪ꧀ꦪꦁ – ꦢꦶꦧ꧀ꦧꦺ ꦕ ꦩꦴꦤꦸꦱꦺ ꦕ, ꦪꦺ ꦢꦹꦫꦺ ꦱꦤ꧀ꦠꦶꦏꦺ ꦕꦴ’ꦠꦶ, ꦠꦠ꧀ꦫ ꦠꦠ꧀ꦫꦺꦮ ꦱꦏ꧀ꦑꦶꦨꦧ꧀ꦧꦠꦁ ꦥꦴꦥꦸꦟꦶꦱ꧀ꦱꦱꦶ, ꦱꦠꦶ ꦱꦠꦶꦄꦴꦪꦠꦤꦺ.

‘‘ꦱꦺꦴ ꦠ꧀ꦮꦁ, ꦮꦕ꧀ꦖ, ꦪꦴꦮꦢꦺꦮ ꦄꦴꦏꦔ꧀ꦑꦶꦱ꧀ꦱꦱꦶ – ‘ꦥꦫꦱꦠ꧀ꦠꦴꦤꦁ ꦥꦫꦥꦸꦒ꧀ꦒꦭꦴꦤꦁ ꦕꦺꦠꦱꦴ ꦕꦺꦠꦺꦴ ꦥꦫꦶꦕ꧀ꦕ ꦥꦗꦴꦤꦺꦪ꧀ꦪꦁ – ꦱꦫꦴꦒꦁ ꦮꦴ ꦕꦶꦠ꧀ꦠꦁ ꦱꦫꦴꦒꦁ ꦕꦶꦠ꧀ꦠꦤ꧀ꦠꦶ ꦥꦗꦴꦤꦺꦪ꧀ꦪꦁ, ꦮꦷꦠꦫꦴꦒꦁ ꦮꦴ ꦕꦶꦠ꧀ꦠꦁ ꦮꦷꦠꦫꦴꦒꦁ ꦕꦶꦠ꧀ꦠꦤ꧀ꦠꦶ ꦥꦗꦴꦤꦺꦪ꧀ꦪꦁ; ꦱꦢꦺꦴꦱꦁ ꦮꦴ ꦕꦶꦠ꧀ꦠꦁ ꦱꦢꦺꦴꦱꦁ ꦕꦶꦠ꧀ꦠꦤ꧀ꦠꦶ ꦥꦗꦴꦤꦺꦪ꧀ꦪꦁ, ꦮꦷꦠꦢꦺꦴꦱꦁ ꦮꦴ ꦕꦶꦠ꧀ꦠꦁ ꦮꦷꦠꦢꦺꦴꦱꦁ ꦕꦶꦠ꧀ꦠꦤ꧀ꦠꦶ ꦥꦗꦴꦤꦺꦪ꧀ꦪꦁ; ꦱꦩꦺꦴꦲꦁ ꦮꦴ ꦕꦶꦠ꧀ꦠꦁ ꦱꦩꦺꦴꦲꦁ ꦕꦶꦠ꧀ꦠꦤ꧀ꦠꦶ ꦥꦗꦴꦤꦺꦪ꧀ꦪꦁ, ꦮꦷꦠꦩꦺꦴꦲꦁ ꦮꦴ ꦕꦶꦠ꧀ꦠꦁ ꦮꦷꦠꦩꦺꦴꦲꦁ ꦕꦶꦠ꧀ꦠꦤ꧀ꦠꦶ ꦥꦗꦴꦤꦺꦪ꧀ꦪꦁ; ꦱꦁꦑꦶꦠ꧀ꦠꦁ ꦮꦴ ꦕꦶꦠ꧀ꦠꦁ ꦱꦁꦑꦶꦠ꧀ꦠꦁ ꦕꦶꦠ꧀ꦠꦤ꧀ꦠꦶ ꦥꦗꦴꦤꦺꦪ꧀ꦪꦁ, ꦮꦶꦏ꧀ꦑꦶꦠ꧀ꦠꦁ ꦮꦴ ꦕꦶꦠ꧀ꦠꦁ ꦮꦶꦏ꧀ꦑꦶꦠ꧀ꦠꦁ ꦕꦶꦠ꧀ꦠꦤ꧀ꦠꦶ ꦥꦗꦴꦤꦺꦪ꧀ꦪꦁ; ꦩꦲꦒ꧀ꦒꦠꦁ ꦮꦴ ꦕꦶꦠ꧀ꦠꦁ ꦩꦲꦒ꧀ꦒꦠꦁ ꦕꦶꦠ꧀ꦠꦤ꧀ꦠꦶ ꦥꦗꦴꦤꦺꦪ꧀ꦪꦁ, ꦄꦩꦲꦒ꧀ꦒꦠꦁ ꦮꦴ ꦕꦶꦠ꧀ꦠꦁ ꦄꦩꦲꦒ꧀ꦒꦠꦁ ꦕꦶꦠ꧀ꦠꦤ꧀ꦠꦶ ꦥꦗꦴꦤꦺꦪ꧀ꦪꦁ; ꦱꦈꦠ꧀ꦠꦫꦁ ꦮꦴ ꦕꦶꦠ꧀ꦠꦁ ꦱꦈꦠ꧀ꦠꦫꦁ ꦕꦶꦠ꧀ꦠꦤ꧀ꦠꦶ ꦥꦗꦴꦤꦺꦪ꧀ꦪꦁ, ꦄꦤꦸꦠ꧀ꦠꦫꦁ ꦮꦴ ꦕꦶꦠ꧀ꦠꦁ ꦄꦤꦸꦠ꧀ꦠꦫꦁ ꦕꦶꦠ꧀ꦠꦤ꧀ꦠꦶ ꦥꦗꦴꦤꦺꦪ꧀ꦪꦁ; ꦱꦩꦴꦲꦶꦠꦁ ꦮꦴ ꦕꦶꦠ꧀ꦠꦁ ꦱꦩꦴꦲꦶꦠꦁ ꦕꦶꦠ꧀ꦠꦤ꧀ꦠꦶ ꦥꦗꦴꦤꦺꦪ꧀ꦪꦁ, ꦄꦱꦩꦴꦲꦶꦠꦁ ꦮꦴ ꦕꦶꦠ꧀ꦠꦁ ꦄꦱꦩꦴꦲꦶꦠꦁ ꦕꦶꦠ꧀ꦠꦤ꧀ꦠꦶ ꦥꦗꦴꦤꦺꦪ꧀ꦪꦁ; ꦮꦶꦩꦸꦠ꧀ꦠꦁ ꦮꦴ ꦕꦶꦠ꧀ꦠꦁ ꦮꦶꦩꦸꦠ꧀ꦠꦁ ꦕꦶꦠ꧀ꦠꦤ꧀ꦠꦶ ꦥꦗꦴꦤꦺꦪ꧀ꦪꦁ, ꦄꦮꦶꦩꦸꦠ꧀ꦠꦁ ꦮꦴ ꦕꦶꦠ꧀ꦠꦁ ꦄꦮꦶꦩꦸꦠ꧀ꦠꦁ ꦕꦶꦠ꧀ꦠꦤ꧀ꦠꦶ ꦥꦗꦴꦤꦺꦪ꧀ꦪ’ꦤ꧀ꦠꦶ, ꦠꦠ꧀ꦫ ꦠꦠ꧀ꦫꦺꦮ ꦱꦏ꧀ꦑꦶꦨꦧ꧀ꦧꦠꦁ ꦥꦴꦥꦸꦟꦶꦱ꧀ꦱꦱꦶ, ꦱꦠꦶ ꦱꦠꦶꦄꦴꦪꦠꦤꦺ.

‘‘ꦱꦺꦴ ꦠ꧀ꦮꦁ, ꦮꦕ꧀ꦖ, ꦪꦴꦮꦢꦺꦮ ꦄꦴꦏꦔ꧀ꦑꦶꦱ꧀ꦱꦱꦶ – ‘ꦄꦤꦺꦏꦮꦶꦲꦶꦠꦁ ꦥꦸꦧ꧀ꦧꦺꦤꦶꦮꦴꦱꦁ ꦄꦤꦸꦱ꧀ꦱꦫꦺꦪ꧀ꦪꦁ, ꦱꦺꦪ꧀ꦪꦡꦶꦢꦁ – ꦌꦏꦩ꧀ꦥꦶ ꦗꦴꦠꦶꦁ ꦢ꧀ꦮꦺꦥꦶ ꦗꦴꦠꦶꦪꦺꦴ ꦠꦶꦱ꧀ꦱꦺꦴꦥꦶ ꦗꦴꦠꦶꦪꦺꦴ ꦕꦠꦱ꧀ꦱꦺꦴꦥꦶ ꦗꦴꦠꦶꦪꦺꦴ ꦥꦚ꧀ꦕꦥꦶ ꦗꦴꦠꦶꦪꦺꦴ ꦢꦱꦥꦶ ꦗꦴꦠꦶꦪꦺꦴ ꦮꦷꦱꦩ꧀ꦥꦶ ꦗꦴꦠꦶꦪꦺꦴ ꦠꦶꦁꦱꦩ꧀ꦥꦶ ꦗꦴꦠꦶꦪꦺꦴ ꦕꦠ꧀ꦠꦴꦭꦷꦱꦩ꧀ꦥꦶ ꦗꦴꦠꦶꦪꦺꦴ ꦥꦚ꧀ꦚꦴꦱꦩ꧀ꦥꦶ ꦗꦴꦠꦶꦪꦺꦴ ꦗꦴꦠꦶꦱꦠꦩ꧀ꦥꦶ ꦗꦴꦠꦶꦱꦲꦱ꧀ꦱꦩ꧀ꦥꦶ ꦗꦴꦠꦶꦱꦠꦱꦲꦱ꧀ꦱꦩ꧀ꦥꦶ; ꦄꦤꦺꦏꦺꦥꦶ ꦱꦁꦮꦛ꧀ꦛꦏꦥ꧀ꦥꦺ ꦄꦤꦺꦏꦺꦥꦶ ꦮꦶꦮꦛ꧀ꦛꦏꦥ꧀ꦥꦺ ꦄꦤꦺꦏꦺꦥꦶ ꦱꦁꦮꦛ꧀ꦛꦮꦶꦮꦛ꧀ꦛꦏꦥ꧀ꦥꦺ – ꦄꦩꦸꦠ꧀ꦫꦴꦱꦶꦁ ꦌꦮꦁꦤꦴꦩꦺꦴ ꦌꦮꦁꦒꦺꦴꦠ꧀ꦠꦺꦴ ꦌꦮꦁꦮꦟ꧀ꦟꦺꦴ ꦌꦮꦩꦴꦲꦴꦫꦺꦴ ꦌꦮꦁꦱꦸꦑꦢꦸꦏ꧀ꦑꦥ꧀ꦥꦛꦶꦱꦁꦮꦺꦢꦷ ꦌꦮꦩꦴꦪꦸꦥꦫꦶꦪꦤ꧀ꦠꦺꦴ, ꦱꦺꦴ ꦠꦠꦺꦴ ꦕꦸꦠꦺꦴ ꦄꦩꦸꦠ꧀ꦫ ꦈꦢꦥꦴꦢꦶꦁ; ꦠꦠ꧀ꦫꦴꦥꦴꦱꦶꦁ ꦌꦮꦁꦤꦴꦩꦺꦴ ꦌꦮꦁꦒꦺꦴꦠ꧀ꦠꦺꦴ ꦌꦮꦁꦮꦟ꧀ꦟꦺꦴ ꦌꦮꦩꦴꦲꦴꦫꦺꦴ ꦌꦮꦁꦱꦸꦑꦢꦸꦏ꧀ꦑꦥ꧀ꦥꦛꦶꦱꦁꦮꦺꦢꦷ ꦌꦮꦩꦴꦪꦸꦥꦫꦶꦪꦤ꧀ꦠꦺꦴ, ꦱꦺꦴ ꦠꦠꦺꦴ ꦕꦸꦠꦺꦴ ꦆꦣꦹꦥꦥꦤ꧀ꦤꦺꦴꦠꦶ; ꦆꦠꦶ ꦱꦴꦏꦴꦫꦁ ꦱꦈꦢ꧀ꦢꦺꦱꦁ ꦄꦤꦺꦏꦮꦶꦲꦶꦠꦁ ꦥꦸꦧ꧀ꦧꦺꦤꦶꦮꦴꦱꦁ ꦄꦤꦸꦱ꧀ꦱꦫꦺꦪ꧀ꦪ’ꦤ꧀ꦠꦶ, ꦠꦠ꧀ꦫ ꦠꦠ꧀ꦫꦺꦮ ꦱꦏ꧀ꦑꦶꦨꦧ꧀ꦧꦠꦁ ꦥꦴꦥꦸꦟꦶꦱ꧀ꦱꦱꦶ, ꦱꦠꦶ ꦱꦠꦶꦄꦴꦪꦠꦤꦺ.

‘‘ꦱꦺꦴ ꦠ꧀ꦮꦁ, ꦮꦕ꧀ꦖ, ꦪꦴꦮꦢꦺꦮ ꦄꦴꦏꦔ꧀ꦑꦶꦱ꧀ꦱꦱꦶ – ‘ꦢꦶꦧ꧀ꦧꦺꦤ ꦕꦏ꧀ꦑꦸꦤꦴ ꦮꦶꦱꦸꦢ꧀ꦣꦺꦤ ꦄꦠꦶꦏ꧀ꦏꦤ꧀ꦠꦩꦴꦤꦸꦱꦏꦺꦤ ꦱꦠ꧀ꦠꦺ ꦥꦱ꧀ꦱꦺꦪ꧀ꦪꦁ ꦕꦮꦩꦴꦤꦺ ꦈꦥꦥꦗ꧀ꦗꦩꦴꦤꦺ ꦲꦷꦤꦺ ꦥꦟꦷꦠꦺ ꦱꦸꦮꦟ꧀ꦟꦺ ꦢꦸꦧ꧀ꦧꦟ꧀ꦟꦺ ꦱꦸꦒꦠꦺ ꦢꦸꦒ꧀ꦒꦠꦺ ꦪꦡꦴꦏꦩ꧀ꦩꦹꦥꦒꦺ ꦱꦠ꧀ꦠꦺ ꦥꦗꦴꦤꦺꦪ꧀ꦪꦁ – ꦆꦩꦺ ꦮꦠ ꦨꦺꦴꦤ꧀ꦠꦺꦴ ꦱꦠ꧀ꦠꦴ ꦏꦴꦪꦢꦸꦕ꧀ꦕꦫꦶꦠꦺꦤ ꦱꦩꦤ꧀ꦤꦴꦒꦠꦴ ꦮꦕꦷꦢꦸꦕ꧀ꦕꦫꦶꦠꦺꦤ ꦱꦩꦤ꧀ꦤꦴꦒꦠꦴ ꦩꦤꦺꦴꦢꦸꦕ꧀ꦕꦫꦶꦠꦺꦤ ꦱꦩꦤ꧀ꦤꦴꦒꦠꦴ ꦄꦫꦶꦪꦴꦤꦁ ꦈꦥꦮꦴꦢꦏꦴ ꦩꦶꦕ꧀ꦖꦴꦢꦶꦛ꧀ꦜꦶꦏꦴ ꦩꦶꦕ꧀ꦖꦴꦢꦶꦛ꧀ꦜꦶꦏꦩ꧀ꦩꦱꦩꦴꦢꦴꦤꦴ, ꦠꦺ ꦏꦴꦪꦱ꧀ꦱ ꦨꦺꦢꦴ ꦥꦫꦁ ꦩꦫꦟꦴ ꦄꦥꦴꦪꦁ ꦢꦸꦒ꧀ꦒꦠꦶꦁ ꦮꦶꦤꦶꦥꦴꦠꦁ ꦤꦶꦫꦪꦁ ꦈꦥꦥꦤ꧀ꦤꦴ; ꦆꦩꦺ ꦮꦴ ꦥꦤ ꦨꦺꦴꦤ꧀ꦠꦺꦴ ꦱꦠ꧀ꦠꦴ ꦏꦴꦪꦱꦸꦕꦫꦶꦠꦺꦤ ꦱꦩꦤ꧀ꦤꦴꦒꦠꦴ ꦮꦕꦷꦱꦸꦕꦫꦶꦠꦺꦤ ꦱꦩꦤ꧀ꦤꦴꦒꦠꦴ ꦩꦤꦺꦴꦱꦸꦕꦫꦶꦠꦺꦤ ꦱꦩꦤ꧀ꦤꦴꦒꦠꦴ ꦄꦫꦶꦪꦴꦤꦁ ꦄꦤꦸꦥꦮꦴꦢꦏꦴ ꦱꦩ꧀ꦩꦴꦢꦶꦛ꧀ꦜꦶꦏꦴ ꦱꦩ꧀ꦩꦴꦢꦶꦛ꧀ꦜꦶꦏꦩ꧀ꦩꦱꦩꦴꦢꦴꦤꦴ, ꦠꦺ ꦏꦴꦪꦱ꧀ꦱ ꦨꦺꦢꦴ ꦥꦫꦁ ꦩꦫꦟꦴ ꦱꦸꦒꦠꦶꦁ ꦱꦒ꧀ꦒꦁ ꦭꦺꦴꦏꦁ ꦈꦥꦥꦤ꧀ꦤꦴꦠꦶ; ꦆꦠꦶ ꦢꦶꦧ꧀ꦧꦺꦤ ꦕꦏ꧀ꦑꦸꦤꦴ ꦮꦶꦱꦸꦢ꧀ꦣꦺꦤ ꦄꦠꦶꦏ꧀ꦏꦤ꧀ꦠꦩꦴꦤꦸꦱꦏꦺꦤ ꦱꦠ꧀ꦠꦺ ꦥꦱ꧀ꦱꦺꦪ꧀ꦪꦁ ꦕꦮꦩꦴꦤꦺ ꦈꦥꦥꦗ꧀ꦗꦩꦴꦤꦺ ꦲꦷꦤꦺ ꦥꦟꦷꦠꦺ ꦱꦸꦮꦟ꧀ꦟꦺ ꦢꦸꦧ꧀ꦧꦟ꧀ꦟꦺ ꦱꦸꦒꦠꦺ ꦢꦸꦒ꧀ꦒꦠꦺ ꦪꦡꦴꦏꦩ꧀ꦩꦹꦥꦒꦺ ꦱꦠ꧀ꦠꦺ ꦥꦗꦴꦤꦺꦪ꧀ꦪ’ꦤ꧀ꦠꦶ, ꦠꦠ꧀ꦫ ꦠꦠ꧀ꦫꦺꦮ ꦱꦏ꧀ꦑꦶꦨꦧ꧀ꦧꦠꦁ ꦥꦴꦥꦸꦟꦶꦱ꧀ꦱꦱꦶ, ꦱꦠꦶ ꦱꦠꦶꦄꦴꦪꦠꦤꦺ.

‘‘ꦱꦺꦴ ꦠ꧀ꦮꦁ, ꦮꦕ꧀ꦖ, ꦪꦴꦮꦢꦺꦮ ꦄꦴꦏꦔ꧀ꦑꦶꦱ꧀ꦱꦱꦶ – ‘ꦄꦴꦱꦮꦴꦤꦁ ꦑꦪꦴ ꦄꦤꦴꦱꦮꦁ ꦕꦺꦠꦺꦴꦮꦶꦩꦸꦠ꧀ꦠꦶꦁ ꦥꦚ꧀ꦚꦴꦮꦶꦩꦸꦠ꧀ꦠꦶꦁ ꦢꦶꦛ꧀ꦜꦺꦮ ꦣꦩ꧀ꦩꦺ ꦱꦪꦁ ꦄꦨꦶꦚ꧀ꦚꦴ ꦱꦕ꧀ꦖꦶꦏꦠ꧀ꦮꦴ ꦈꦥꦱꦩ꧀ꦥꦗ꧀ꦗ ꦮꦶꦲꦫꦺꦪ꧀ꦪ’ꦤ꧀ꦠꦶ, ꦠꦠ꧀ꦫ ꦠꦠ꧀ꦫꦺꦮ ꦱꦏ꧀ꦑꦶꦨꦧ꧀ꦧꦠꦁ ꦥꦴꦥꦸꦟꦶꦱ꧀ꦱꦱꦶ, ꦱꦠꦶ ꦱꦠꦶꦄꦴꦪꦠꦤꦺ’’ꦠꦶ.

꧑꧙꧙. ꦄꦡ ꦑꦺꦴ ꦄꦴꦪꦱ꧀ꦩꦴ ꦮꦕ꧀ꦖꦒꦺꦴꦠ꧀ꦠꦺꦴ ꦨꦒꦮꦠꦺꦴ ꦨꦴꦱꦶꦠꦁ ꦄꦨꦶꦤꦤ꧀ꦢꦶꦠ꧀ꦮꦴ ꦄꦤꦸꦩꦺꦴꦢꦶꦠ꧀ꦮꦴ ꦈꦛ꧀ꦜꦴꦪꦴꦱꦤꦴ ꦨꦒꦮꦤ꧀ꦠꦁ ꦄꦨꦶꦮꦴꦢꦺꦠ꧀ꦮꦴ ꦥꦢꦏ꧀ꦑꦶꦟꦁ ꦏꦠ꧀ꦮꦴ ꦥꦏ꧀ꦏꦴꦩꦶ. ꦄꦡ ꦑꦺꦴ ꦄꦴꦪꦱ꧀ꦩꦴ ꦮꦕ꧀ꦖꦒꦺꦴꦠ꧀ꦠꦺꦴ ꦌꦏꦺꦴ ꦮꦹꦥꦏꦛ꧀ꦜꦺꦴ ꦄꦥ꧀ꦥꦩꦠ꧀ꦠꦺꦴ ꦄꦴꦠꦴꦥꦷ ꦥꦲꦶꦠꦠ꧀ꦠꦺꦴ ꦮꦶꦲꦫꦤ꧀ꦠꦺꦴ ꦤꦕꦶꦫꦱ꧀ꦱꦺꦮ – ꦪꦱ꧀ꦱꦠ꧀ꦡꦴꦪ ꦏꦸꦭꦥꦸꦠ꧀ꦠꦴ ꦱꦩ꧀ꦩꦢꦺꦮ ꦄꦒꦴꦫꦱ꧀ꦩꦴ ꦄꦤꦒꦴꦫꦶꦪꦁ ꦥꦧ꧀ꦧꦗꦤ꧀ꦠꦶ ꦠꦢꦤꦸꦠ꧀ꦠꦫꦁ – ꦧ꧀ꦫꦲ꧀ꦩꦕꦫꦶꦪꦥꦫꦶꦪꦺꦴꦱꦴꦤꦁ ꦢꦶꦛ꧀ꦜꦺꦮ ꦣꦩ꧀ꦩꦺ ꦱꦪꦁ ꦄꦨꦶꦚ꧀ꦚꦴ ꦱꦕ꧀ꦖꦶꦏꦠ꧀ꦮꦴ ꦈꦥꦱꦩ꧀ꦥꦗ꧀ꦗ ꦮꦶꦲꦴꦱꦶ. ‘ꦑꦷꦟꦴ ꦗꦴꦠꦶ, ꦮꦸꦱꦶꦠꦁ ꦧ꧀ꦫꦲ꧀ꦩꦕꦫꦶꦪꦁ, ꦏꦠꦁ ꦏꦫꦟꦷꦪꦁ, ꦤꦴꦥꦫꦁ ꦆꦠ꧀ꦡꦠ꧀ꦠꦴꦪꦴ’ꦠꦶ ꦄꦧ꧀ꦨꦚ꧀ꦚꦴꦱꦶ. ꦄꦚ꧀ꦚꦠꦫꦺꦴ ꦑꦺꦴ ꦥꦤꦴꦪꦱ꧀ꦩꦴ ꦮꦕ꧀ꦖꦒꦺꦴꦠ꧀ꦠꦺꦴ ꦄꦫꦲꦠꦁ ꦄꦲꦺꦴꦱꦶ.

꧒꧐꧐. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦱꦩ꧀ꦧꦲꦸꦭꦴ ꦨꦶꦏ꧀ꦑꦹ ꦨꦒꦮꦤ꧀ꦠꦁ ꦢꦱ꧀ꦱꦤꦴꦪ ꦒꦕ꧀ꦖꦤ꧀ꦠꦶ. ꦄꦢ꧀ꦢꦱꦴ ꦑꦺꦴ ꦄꦴꦪꦱ꧀ꦩꦴ ꦮꦕ꧀ꦖꦒꦺꦴꦠ꧀ꦠꦺꦴ ꦠꦺ ꦨꦶꦏ꧀ꦑꦹ ꦢꦹꦫꦠꦺꦴꦮ ꦄꦴꦒꦕ꧀ꦖꦤ꧀ꦠꦺ. ꦢꦶꦱ꧀ꦮꦴꦤ ꦪꦺꦤ ꦠꦺ ꦨꦶꦏ꧀ꦑꦹ ꦠꦺꦤꦸꦥꦱꦔ꧀ꦏꦩꦶ; ꦈꦥꦱꦔ꧀ꦏꦩꦶꦠ꧀ꦮꦴ ꦠꦺ ꦨꦶꦏ꧀ꦑꦹ ꦌꦠꦢꦮꦺꦴꦕ – ‘‘ꦲꦤ꧀ꦢ! ꦏꦲꦁ ꦥꦤ ꦠꦸꦩ꧀ꦲꦺ ꦄꦴꦪꦱ꧀ꦩꦤ꧀ꦠꦺꦴ ꦒꦕ꧀ꦖꦡꦴ’’ꦠꦶ? ‘‘ꦨꦒꦮꦤ꧀ꦠꦁ ꦑꦺꦴ ꦩꦪꦁ, ꦄꦴꦮꦸꦱꦺꦴ, ꦢꦱ꧀ꦱꦤꦴꦪ ꦒꦕ꧀ꦖꦴꦩꦴ’’ꦠꦶ. ‘‘ꦠꦺꦤꦲꦴꦪꦱ꧀ꦩꦤ꧀ꦠꦺꦴ ꦩꦩ ꦮꦕꦤꦺꦤ ꦨꦒꦮꦠꦺꦴ ꦥꦴꦢꦺ ꦱꦶꦫꦱꦴ ꦮꦤ꧀ꦢꦡ, ꦌꦮꦚ꧀ꦕ ꦮꦢꦺꦡ – ‘ꦮꦕ꧀ꦖꦒꦺꦴꦠ꧀ꦠꦺꦴ, ꦨꦤ꧀ꦠꦺ, ꦨꦶꦏ꧀ꦑꦸ ꦨꦒꦮꦠꦺꦴ ꦥꦴꦢꦺ ꦱꦶꦫꦱꦴ ꦮꦤ꧀ꦢꦠꦶ, ꦌꦮꦚ꧀ꦕ ꦮꦢꦺꦠꦶ – ꦥꦫꦶꦕꦶꦟ꧀ꦟꦺꦴ ꦩꦺ ꦨꦒꦮꦴ, ꦥꦫꦶꦕꦶꦟ꧀ꦟꦺꦴ ꦩꦺ ꦱꦸꦒꦠꦺꦴ’’’ꦠꦶ. ‘‘ꦌꦮꦩꦴꦮꦸꦱꦺꦴ’’ꦠꦶ ꦑꦺꦴ ꦠꦺ ꦨꦶꦏ꧀ꦑꦹ ꦄꦴꦪꦱ꧀ꦩꦠꦺꦴ ꦮꦕ꧀ꦖꦒꦺꦴꦠ꧀ꦠꦱ꧀ꦱ ꦥꦕ꧀ꦕꦱ꧀ꦱꦺꦴꦱꦸꦁ. ꦄꦡ ꦑꦺꦴ ꦠꦺ ꦨꦶꦏ꧀ꦑꦹ ꦪꦺꦤ ꦨꦒꦮꦴ ꦠꦺꦤꦸꦥꦱꦔ꧀ꦏꦩꦶꦁꦱꦸ; ꦈꦥꦱꦔ꧀ꦏꦩꦶꦠ꧀ꦮꦴ ꦨꦒꦮꦤ꧀ꦠꦁ ꦄꦨꦶꦮꦴꦢꦺꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦷꦢꦶꦁꦱꦸ. ꦌꦏꦩꦤ꧀ꦠꦁ ꦤꦶꦱꦶꦤ꧀ꦤꦴ ꦑꦺꦴ ꦠꦺ ꦨꦶꦏ꧀ꦑꦹ ꦨꦒꦮꦤ꧀ꦠꦁ ꦌꦠꦢꦮꦺꦴꦕꦸꦁ – ‘‘ꦄꦴꦪꦱ꧀ꦩꦴ, ꦨꦤ꧀ꦠꦺ, ꦮꦕ꧀ꦖꦒꦺꦴꦠ꧀ꦠꦺꦴ ꦨꦒꦮꦠꦺꦴ ꦥꦴꦢꦺ ꦱꦶꦫꦱꦴ ꦮꦤ꧀ꦢꦠꦶ, ꦌꦮꦚ꧀ꦕ ꦮꦢꦺꦠꦶ – ‘ꦥꦫꦶꦕꦶꦟ꧀ꦟꦺꦴ ꦩꦺ ꦨꦒꦮꦴ, ꦥꦫꦶꦕꦶꦟ꧀ꦟꦺꦴ ꦩꦺ ꦱꦸꦒꦠꦺꦴ’’’ꦠꦶ. ‘‘ꦥꦸꦧ꧀ꦧꦺꦮ ꦩꦺ, ꦨꦶꦏ꧀ꦑꦮꦺ, ꦮꦕ꧀ꦖꦒꦺꦴꦠ꧀ꦠꦺꦴ ꦨꦶꦏ꧀ꦑꦸ ꦕꦺꦠꦱꦴ ꦕꦺꦠꦺꦴ ꦥꦫꦶꦕ꧀ꦕ ꦮꦶꦢꦶꦠꦺꦴ – ‘ꦠꦺꦮꦶꦗ꧀ꦗꦺꦴ ꦮꦕ꧀ꦖꦒꦺꦴꦠ꧀ꦠꦺꦴ ꦨꦶꦏ꧀ꦑꦸ ꦩꦲꦶꦢ꧀ꦣꦶꦏꦺꦴ ꦩꦲꦴꦤꦸꦨꦴꦮꦺꦴ’ꦠꦶ. ꦢꦺꦮꦠꦴꦥꦶ ꦩꦺ ꦌꦠꦩꦠ꧀ꦡꦁ ꦄꦴꦫꦺꦴꦕꦺꦱꦸꦁ – ‘ꦠꦺꦮꦶꦗ꧀ꦗꦺꦴ, ꦨꦤ꧀ꦠꦺ, ꦮꦕ꧀ꦖꦒꦺꦴꦠ꧀ꦠꦺꦴ ꦨꦶꦏ꧀ꦑꦸ ꦩꦲꦶꦢ꧀ꦣꦶꦏꦺꦴ ꦩꦲꦴꦤꦸꦨꦴꦮꦺꦴ’’’ꦠꦶ.

ꦆꦢꦩꦮꦺꦴꦕ ꦨꦒꦮꦴ. ꦄꦠ꧀ꦠꦩꦤꦴ ꦠꦺ ꦨꦶꦏ꧀ꦑꦹ ꦨꦒꦮꦠꦺꦴ ꦨꦴꦱꦶꦠꦁ ꦄꦨꦶꦤꦤ꧀ꦢꦸꦤ꧀ꦠꦶ.

ꦩꦲꦴꦮꦕ꧀ꦖꦱꦸꦠ꧀ꦠꦁ ꦤꦶꦛ꧀ꦜꦶꦠꦁ ꦠꦠꦶꦪꦁ.

꧔. ꦢꦷꦓꦤꦑꦱꦸꦠ꧀ꦠꦁ

꧒꧐꧑. ꦌꦮꦁ ꦩꦺ ꦱꦸꦠꦁ – ꦌꦏꦁ ꦱꦩꦪꦁ ꦨꦒꦮꦴ ꦫꦴꦗꦒꦲꦺ ꦮꦶꦲꦫꦠꦶ ꦒꦶꦗ꧀ꦙꦏꦹꦛꦺ ꦥꦧ꧀ꦧꦠꦺ ꦱꦹꦏꦫꦑꦠꦴꦪꦁ. ꦄꦡ ꦑꦺꦴ ꦢꦷꦓꦤꦑꦺꦴ ꦥꦫꦶꦧ꧀ꦧꦴꦗꦏꦺꦴ ꦪꦺꦤ ꦨꦒꦮꦴ ꦠꦺꦤꦸꦥꦱꦔ꧀ꦏꦩꦶ; ꦈꦥꦱꦔ꧀ꦏꦩꦶꦠ꧀ꦮꦴ ꦨꦒꦮꦠꦴ ꦱꦢ꧀ꦣꦶꦁ ꦱꦩ꧀ꦩꦺꦴꦢꦶ. ꦱꦩ꧀ꦩꦺꦴꦢꦤꦷꦪꦁ ꦏꦡꦁ ꦱꦴꦫꦟꦷꦪꦁ ꦮꦷꦠꦶꦱꦴꦫꦺꦠ꧀ꦮꦴ ꦌꦏꦩꦤ꧀ꦠꦁ ꦄꦛ꧀ꦜꦴꦱꦶ. ꦌꦏꦩꦤ꧀ꦠꦁ ꦜꦶꦠꦺꦴ ꦑꦺꦴ ꦢꦷꦓꦤꦑꦺꦴ ꦥꦫꦶꦧ꧀ꦧꦴꦗꦏꦺꦴ ꦨꦒꦮꦤ꧀ꦠꦁ ꦌꦠꦢꦮꦺꦴꦕ – ‘‘ꦄꦲꦚ꧀ꦲꦶ, ꦨꦺꦴ ꦒꦺꦴꦠꦩ, ꦌꦮꦁꦮꦴꦢꦷ ꦌꦮꦁꦢꦶꦛ꧀ꦜꦶ – ‘ꦱꦧ꧀ꦧꦁ ꦩꦺ ꦤꦏ꧀ꦑꦩꦠꦷ’’’ꦠꦶ. ‘‘ꦪꦴꦥꦶ ꦑꦺꦴ ꦠꦺ ꦌꦱꦴ, ꦄꦒ꧀ꦒꦶꦮꦺꦱ꧀ꦱꦤ, ꦢꦶꦛ꧀ꦜꦶ – ‘ꦱꦧ꧀ꦧꦁ ꦩꦺ ꦤꦏ꧀ꦑꦩꦠꦷ’ꦠꦶ, ꦌꦱꦴꦥꦶ ꦠꦺ ꦢꦶꦛ꧀ꦜꦶ ꦤꦏ꧀ꦑꦩꦠꦷ’’ꦠꦶ? ‘‘ꦌꦱꦴ ꦕꦺ [ꦌꦱꦴꦥꦶ (ꦏ.)] ꦩꦺ, ꦨꦺꦴ ꦒꦺꦴꦠꦩ, ꦢꦶꦛ꧀ꦜꦶ ꦑꦩꦺꦪ꧀ꦪ, ꦠꦁꦥꦱ꧀ꦱ ꦠꦴꦢꦶꦱꦩꦺꦮ, ꦠꦁꦥꦱ꧀ꦱ ꦠꦴꦢꦶꦱꦩꦺꦮꦴ’’ꦠꦶ. ‘‘ꦄꦠꦺꦴ ꦑꦺꦴ ꦠꦺ, ꦄꦒ꧀ꦒꦶꦮꦺꦱ꧀ꦱꦤ, ꦧꦲꦹ ꦲꦶ ꦧꦲꦸꦠꦫꦴ ꦭꦺꦴꦏꦱ꧀ꦩꦶꦁ ꦪꦺ ꦌꦮꦩꦴꦲꦁꦱꦸ – ‘ꦠꦁꦥꦱ꧀ꦱ ꦠꦴꦢꦶꦱꦩꦺꦮ, ꦠꦁꦥꦱ꧀ꦱ ꦠꦴꦢꦶꦱꦩꦺꦮꦴ’ꦠꦶ. ꦠꦺ ꦠꦚ꧀ꦕꦺꦮ ꦢꦶꦛ꧀ꦜꦶꦁ ꦤꦥ꧀ꦥꦗꦲꦤ꧀ꦠꦶ ꦄꦚ꧀ꦚꦚ꧀ꦕ ꦢꦶꦛ꧀ꦜꦶꦁ ꦈꦥꦴꦢꦶꦪꦤ꧀ꦠꦶ. ꦄꦠꦺꦴ ꦑꦺꦴ ꦠꦺ, ꦄꦒ꧀ꦒꦶꦮꦺꦱ꧀ꦱꦤ, ꦠꦤꦹ ꦲꦶ ꦠꦤꦸꦠꦫꦴ ꦭꦺꦴꦏꦱ꧀ꦩꦶꦁ ꦪꦺ ꦌꦮꦩꦴꦲꦁꦱꦸ – ‘ꦠꦁꦥꦱ꧀ꦱ ꦠꦴꦢꦶꦱꦩꦺꦮ, ꦠꦁꦥꦱ꧀ꦱ ꦠꦴꦢꦶꦱꦩꦺꦮꦴ’ꦠꦶ. ꦠꦺ ꦠꦚ꧀ꦕꦺꦮ ꦢꦶꦛ꧀ꦜꦶꦁ ꦥꦗꦲꦤ꧀ꦠꦶ ꦄꦚ꧀ꦚꦚ꧀ꦕ ꦢꦶꦛ꧀ꦜꦶꦁ ꦤ ꦈꦥꦴꦢꦶꦪꦤ꧀ꦠꦶ. ꦱꦤ꧀ꦠꦒ꧀ꦒꦶꦮꦺꦱ꧀ꦱꦤ, ꦌꦏꦺ ꦱꦩꦟꦧ꧀ꦫꦴꦲ꧀ꦩꦟꦴ ꦌꦮꦁꦮꦴꦢꦶꦤꦺꦴ ꦌꦮꦁꦢꦶꦛ꧀ꦜꦶꦤꦺꦴ – ‘ꦱꦧ꧀ꦧꦁ ꦩꦺ ꦑꦩꦠꦷ’ꦠꦶ; ꦱꦤ꧀ꦠꦒ꧀ꦒꦶꦮꦺꦱ꧀ꦱꦤ, ꦌꦏꦺ ꦱꦩꦟꦧ꧀ꦫꦴꦲ꧀ꦩꦟꦴ ꦌꦮꦁꦮꦴꦢꦶꦤꦺꦴ ꦌꦮꦁꦢꦶꦛ꧀ꦜꦶꦤꦺꦴ – ‘ꦱꦧ꧀ꦧꦁ ꦩꦺ ꦤꦏ꧀ꦑꦩꦠꦷ’ꦠꦶ; ꦱꦤ꧀ꦠꦒ꧀ꦒꦶꦮꦺꦱ꧀ꦱꦤ, ꦌꦏꦺ ꦱꦩꦟꦧ꧀ꦫꦴꦲ꧀ꦩꦟꦴ ꦌꦮꦁꦮꦴꦢꦶꦤꦺꦴ ꦌꦮꦁꦢꦶꦛ꧀ꦜꦶꦤꦺꦴ – ‘ꦌꦏꦕ꧀ꦕꦁ ꦩꦺ ꦑꦩꦠꦶ, ꦌꦏꦕ꧀ꦕꦁ ꦩꦺ ꦤꦏ꧀ꦑꦩꦠꦷ’ꦠꦶ. ꦠꦠ꧀ꦫꦒ꧀ꦒꦶꦮꦺꦱ꧀ꦱꦤ, ꦪꦺ ꦠꦺ ꦱꦩꦟꦧ꧀ꦫꦴꦲ꧀ꦩꦟꦴ ꦌꦮꦁꦮꦴꦢꦶꦤꦺꦴ ꦌꦮꦁꦢꦶꦛ꧀ꦜꦶꦤꦺꦴ – ‘ꦱꦧ꧀ꦧꦁ ꦩꦺ ꦑꦩꦠꦷ’ꦠꦶ ꦠꦺꦱꦩꦪꦁ ꦢꦶꦛ꧀ꦜꦶ ꦱꦴꦫꦴꦒꦴꦪ ꦱꦤ꧀ꦠꦶꦏꦺ, ꦱꦚ꧀ꦚꦺꦴꦒꦴꦪ ꦱꦤ꧀ꦠꦶꦏꦺ, ꦄꦨꦶꦤꦤ꧀ꦢꦤꦴꦪ ꦱꦤ꧀ꦠꦶꦏꦺ ꦄꦗ꧀ꦙꦺꦴꦱꦴꦤꦴꦪ ꦱꦤ꧀ꦠꦶꦏꦺ ꦈꦥꦴꦢꦴꦤꦴꦪ ꦱꦤ꧀ꦠꦶꦏꦺ; ꦠꦠ꧀ꦫꦒ꧀ꦒꦶꦮꦺꦱ꧀ꦱꦤ ꦪꦺ ꦠꦺ ꦱꦩꦟꦧ꧀ꦫꦴꦲ꧀ꦩꦟꦴ ꦌꦮꦁꦮꦴꦢꦶꦤꦺꦴ ꦌꦮꦁꦢꦶꦛ꧀ꦜꦶꦤꦺꦴ – ‘ꦱꦧ꧀ꦧꦁ ꦩꦺ ꦤꦏ꧀ꦑꦩꦠꦷ’ꦠꦶ ꦠꦺꦱꦩꦪꦁ ꦢꦶꦛ꧀ꦜꦶ ꦄꦱꦴꦫꦴꦒꦴꦪ ꦱꦤ꧀ꦠꦶꦏꦺ, ꦄꦱꦚ꧀ꦚꦺꦴꦒꦴꦪ ꦱꦤ꧀ꦠꦶꦏꦺ, ꦄꦤꦨꦶꦤꦤ꧀ꦢꦤꦴꦪ ꦱꦤ꧀ꦠꦶꦏꦺ, ꦄꦤꦗ꧀ꦙꦺꦴꦱꦴꦤꦴꦪ ꦱꦤ꧀ꦠꦶꦏꦺ, ꦄꦤꦸꦥꦴꦢꦴꦤꦴꦪ ꦱꦤ꧀ꦠꦶꦏꦺ’’ꦠꦶ.

꧒꧐꧒. ꦌꦮꦁ ꦮꦸꦠ꧀ꦠꦺ, ꦢꦷꦓꦤꦑꦺꦴ ꦥꦫꦶꦧ꧀ꦧꦴꦗꦏꦺꦴ ꦨꦒꦮꦤ꧀ꦠꦁ ꦌꦠꦢꦮꦺꦴꦕ – ‘‘ꦈꦏ꧀ꦏꦁꦱꦺꦠꦶ [ꦈꦏ꧀ꦏꦁꦱꦠꦶ (ꦱꦷ. ꦥꦷ. ꦏ.)] ꦩꦺ ꦨꦮꦁ ꦒꦺꦴꦠꦩꦺꦴ ꦢꦶꦛ꧀ꦜꦶꦒꦠꦁ, ꦱꦩꦸꦏ꧀ꦏꦁꦱꦺꦠꦶ [ꦱꦩ꧀ꦥꦲꦁꦱꦠꦶ (ꦏ.)] ꦩꦺ ꦨꦮꦁ ꦒꦺꦴꦠꦩꦺꦴ ꦢꦶꦛ꧀ꦜꦶꦒꦠ’’ꦤ꧀ꦠꦶ. ‘‘ꦠꦠ꧀ꦫꦒ꧀ꦒꦶꦮꦺꦱ꧀ꦱꦤ, ꦪꦺ ꦠꦺ ꦱꦩꦟꦧ꧀ꦫꦴꦲ꧀ꦩꦟꦴ ꦌꦮꦁꦮꦴꦢꦶꦤꦺꦴ ꦌꦮꦁꦢꦶꦛ꧀ꦜꦶꦤꦺꦴ – ‘ꦌꦏꦕ꧀ꦕꦁ ꦩꦺ ꦑꦩꦠꦶ, ꦌꦏꦕ꧀ꦕꦁ ꦩꦺ ꦤꦏ꧀ꦑꦩꦠꦷ’ꦠꦶ. ꦪꦴ ꦲꦶ ꦠꦺꦱꦁ ꦑꦩꦠꦶ ꦱꦴꦪꦁ ꦢꦶꦛ꧀ꦜꦶ ꦱꦴꦫꦴꦒꦴꦪ ꦱꦤ꧀ꦠꦶꦏꦺ, ꦱꦚ꧀ꦚꦺꦴꦒꦴꦪ ꦱꦤ꧀ꦠꦶꦏꦺ, ꦄꦨꦶꦤꦤ꧀ꦢꦤꦴꦪ ꦱꦤ꧀ꦠꦶꦏꦺ, ꦄꦗ꧀ꦙꦺꦴꦱꦴꦤꦴꦪ ꦱꦤ꧀ꦠꦶꦏꦺ, ꦈꦥꦴꦢꦴꦤꦴꦪ ꦱꦤ꧀ꦠꦶꦏꦺ; ꦪꦴ ꦲꦶ ꦠꦺꦱꦁ ꦤꦏ꧀ꦑꦩꦠꦶ ꦱꦴꦪꦁ ꦢꦶꦛ꧀ꦜꦶ ꦄꦱꦴꦫꦴꦒꦴꦪ ꦱꦤ꧀ꦠꦶꦏꦺ, ꦄꦱꦚ꧀ꦚꦺꦴꦒꦴꦪ ꦱꦤ꧀ꦠꦶꦏꦺ, ꦄꦤꦨꦶꦤꦤ꧀ꦢꦤꦴꦪ ꦱꦤ꧀ꦠꦶꦏꦺ, ꦄꦤꦗ꧀ꦙꦺꦴꦱꦴꦤꦴꦪ ꦱꦤ꧀ꦠꦶꦏꦺ, ꦄꦤꦸꦥꦴꦢꦴꦤꦴꦪ ꦱꦤ꧀ꦠꦶꦏꦺ. ꦠꦠ꧀ꦫꦒ꧀ꦒꦶꦮꦺꦱ꧀ꦱꦤ, ꦪꦺ ꦠꦺ ꦱꦩꦟꦧ꧀ꦫꦴꦲ꧀ꦩꦟꦴ ꦌꦮꦁꦮꦴꦢꦶꦤꦺꦴ ꦌꦮꦁꦢꦶꦛ꧀ꦜꦶꦤꦺꦴ – ‘ꦱꦧ꧀ꦧꦁ ꦩꦺ ꦑꦩꦠꦷ’ꦠꦶ ꦠꦠ꧀ꦡ ꦮꦶꦚ꧀ꦚꦹ ꦥꦸꦫꦶꦱꦺꦴ ꦆꦠꦶ ꦥꦛꦶꦱꦚ꧀ꦕꦶꦏ꧀ꦑꦠꦶ – ‘ꦪꦴ ꦑꦺꦴ ꦩꦺ ꦄꦪꦁ ꦢꦶꦛ꧀ꦜꦶ – ꦱꦧ꧀ꦧꦁ ꦩꦺ ꦑꦩꦠꦷꦠꦶ, ꦆꦩꦚ꧀ꦕꦺ ꦄꦲꦁ ꦢꦶꦛ꧀ꦜꦶꦁ ꦡꦴꦩꦱꦴ ꦥꦫꦴꦩꦴꦱꦴ ꦄꦨꦶꦤꦶꦮꦶꦱ꧀ꦱ ꦮꦺꦴꦲꦫꦺꦪ꧀ꦪꦁ – ꦆꦢꦩꦺꦮ ꦱꦕ꧀ꦕꦁ ꦩꦺꦴꦓꦩꦚ꧀ꦚꦤ꧀ꦠꦶ; ꦢ꧀ꦮꦷꦲꦶ ꦩꦺ ꦄꦱ꧀ꦱ ꦮꦶꦒ꧀ꦒꦲꦺꦴ – ꦪꦺꦴ ꦕꦴꦪꦁ ꦱꦩꦟꦺꦴ ꦮꦴ ꦧ꧀ꦫꦴꦲ꧀ꦩꦟꦺꦴ ꦮꦴ ꦌꦮꦁꦮꦴꦢꦷ ꦌꦮꦁꦢꦶꦛ꧀ꦜꦶ – ꦱꦧ꧀ꦧꦁ ꦩꦺ ꦤꦏ꧀ꦑꦩꦠꦷꦠꦶ, ꦪꦺꦴ ꦕꦴꦪꦁ ꦱꦩꦟꦺꦴ ꦮꦴ ꦧ꧀ꦫꦴꦲ꧀ꦩꦟꦺꦴ ꦮꦴ ꦌꦮꦁꦮꦴꦢꦷ ꦌꦮꦁꦢꦶꦛ꧀ꦜꦶ – ꦌꦏꦕ꧀ꦕꦁ ꦩꦺ ꦑꦩꦠꦶ, ꦌꦏꦕ꧀ꦕꦁ ꦩꦺ ꦤꦏ꧀ꦑꦩꦠꦷꦠꦶ – ꦆꦩꦺꦲꦶ ꦄꦱ꧀ꦱ ꦢ꧀ꦮꦷꦲꦶ ꦮꦶꦒ꧀ꦒꦲꦺꦴ. ꦆꦠꦶ ꦮꦶꦒ꧀ꦒꦲꦺ ꦱꦠꦶ ꦮꦶꦮꦴꦢꦺꦴ, ꦮꦶꦮꦴꦢꦺ ꦱꦠꦶ ꦮꦶꦓꦴꦠꦺꦴ, ꦮꦶꦓꦴꦠꦺ ꦱꦠꦶ ꦮꦶꦲꦺꦱꦴ’. ꦆꦠꦶ ꦱꦺꦴ ꦮꦶꦒ꧀ꦒꦲꦚ꧀ꦕ ꦮꦶꦮꦴꦢꦚ꧀ꦕ ꦮꦶꦓꦴꦠꦚ꧀ꦕ ꦮꦶꦲꦺꦱꦚ꧀ꦕ ꦄꦠ꧀ꦠꦤꦶ ꦱꦩ꧀ꦥꦱ꧀ꦱꦩꦴꦤꦺꦴ ꦠꦚ꧀ꦕꦺꦮ ꦢꦶꦛ꧀ꦜꦶꦁ ꦥꦗꦲꦠꦶ ꦄꦚ꧀ꦚꦚ꧀ꦕ ꦢꦶꦛ꧀ꦜꦶꦁ ꦤ ꦈꦥꦴꦢꦶꦪꦠꦶ. ꦌꦮꦩꦺꦠꦴꦱꦁ ꦢꦶꦛ꧀ꦜꦷꦤꦁ ꦥꦲꦴꦤꦁ ꦲꦺꦴꦠꦶ, ꦌꦮꦩꦺꦠꦴꦱꦁ ꦢꦶꦛ꧀ꦜꦷꦤꦁ ꦥꦛꦶꦤꦶꦱ꧀ꦱꦒ꧀ꦒꦺꦴ ꦲꦺꦴꦠꦶ.

꧒꧐꧓. ‘‘ꦠꦠ꧀ꦫꦒ꧀ꦒꦶꦮꦺꦱ꧀ꦱꦤ, ꦪꦺ ꦠꦺ ꦱꦩꦟꦧ꧀ꦫꦴꦲ꧀ꦩꦟꦴ ꦌꦮꦁꦮꦴꦢꦶꦤꦺꦴ ꦌꦮꦁꦢꦶꦛ꧀ꦜꦶꦤꦺꦴ – ‘ꦱꦧ꧀ꦧꦁ ꦩꦺ ꦤꦏ꧀ꦑꦩꦠꦷ’ꦠꦶ ꦠꦠ꧀ꦡ ꦮꦶꦚ꧀ꦚꦹ ꦥꦸꦫꦶꦱꦺꦴ ꦆꦠꦶ ꦥꦛꦶꦱꦚ꧀ꦕꦶꦏ꧀ꦑꦠꦶ – ‘ꦪꦴ ꦑꦺꦴ ꦩꦺ ꦄꦪꦁ ꦢꦶꦛ꧀ꦜꦶ – ꦱꦧ꧀ꦧꦁ ꦩꦺ ꦤꦏ꧀ꦑꦩꦠꦷ’ꦠꦶ, ꦆꦩꦚ꧀ꦕꦺ ꦄꦲꦁ ꦢꦶꦛ꧀ꦜꦶꦁ ꦡꦴꦩꦱꦴ ꦥꦫꦴꦩꦴꦱꦴ ꦄꦨꦶꦤꦶꦮꦶꦱ꧀ꦱ ꦮꦺꦴꦲꦫꦺꦪ꧀ꦪꦁ – ꦆꦢꦩꦺꦮ ꦱꦕ꧀ꦕꦁ ꦩꦺꦴꦓꦩꦚ꧀ꦚꦤ꧀ꦠꦶ; ꦢ꧀ꦮꦷꦲꦶ ꦩꦺ ꦄꦱ꧀ꦱ ꦮꦶꦒ꧀ꦒꦲꦺꦴ – ꦪꦺꦴ ꦕꦴꦪꦁ ꦱꦩꦟꦺꦴ ꦮꦴ ꦧ꧀ꦫꦴꦲ꧀ꦩꦟꦺꦴ ꦮꦴ ꦌꦮꦁꦮꦴꦢꦷ ꦌꦮꦁꦢꦶꦛ꧀ꦜꦶ – ꦱꦧ꧀ꦧꦁ ꦩꦺ ꦑꦩꦠꦷꦠꦶ, ꦪꦺꦴ ꦕꦴꦪꦁ ꦱꦩꦟꦺꦴ ꦮꦴ ꦧ꧀ꦫꦴꦲ꧀ꦩꦟꦺꦴ ꦮꦴ ꦌꦮꦁꦮꦴꦢꦷ ꦌꦮꦁꦢꦶꦛ꧀ꦜꦶ – ꦌꦏꦕ꧀ꦕꦁ ꦩꦺ ꦑꦩꦠꦶ ꦌꦏꦕ꧀ꦕꦁ ꦩꦺ ꦤꦏ꧀ꦑꦩꦠꦷꦠꦶ – ꦆꦩꦺꦲꦶ ꦄꦱ꧀ꦱ ꦢ꧀ꦮꦷꦲꦶ ꦮꦶꦒ꧀ꦒꦲꦺꦴ. ꦆꦠꦶ ꦮꦶꦒ꧀ꦒꦲꦺ ꦱꦠꦶ ꦮꦶꦮꦴꦢꦺꦴ, ꦮꦶꦮꦴꦢꦺ ꦱꦠꦶ ꦮꦶꦓꦴꦠꦺꦴ, ꦮꦶꦓꦴꦠꦺ ꦱꦠꦶ ꦮꦶꦲꦺꦱꦴ’. ꦆꦠꦶ ꦱꦺꦴ ꦮꦶꦒ꧀ꦒꦲꦚ꧀ꦕ ꦮꦶꦮꦴꦢꦚ꧀ꦕ ꦮꦶꦓꦴꦠꦚ꧀ꦕ ꦮꦶꦲꦺꦱꦚ꧀ꦕ ꦄꦠ꧀ꦠꦤꦶ ꦱꦩ꧀ꦥꦱ꧀ꦱꦩꦴꦤꦺꦴ ꦠꦚ꧀ꦕꦺꦮ ꦢꦶꦛ꧀ꦜꦶꦁ ꦥꦗꦲꦠꦶ ꦄꦚ꧀ꦚꦚ꧀ꦕ ꦢꦶꦛ꧀ꦜꦶꦁ ꦤ ꦈꦥꦴꦢꦶꦪꦠꦶ. ꦌꦮꦩꦺꦠꦴꦱꦁ ꦢꦶꦛ꧀ꦜꦷꦤꦁ ꦥꦲꦴꦤꦁ ꦲꦺꦴꦠꦶ, ꦌꦮꦩꦺꦠꦴꦱꦁ ꦢꦶꦛ꧀ꦜꦷꦤꦁ ꦥꦛꦶꦤꦶꦱ꧀ꦱꦒ꧀ꦒꦺꦴ ꦲꦺꦴꦠꦶ.

꧒꧐꧔. ‘‘ꦠꦠ꧀ꦫꦒ꧀ꦒꦶꦮꦺꦱ꧀ꦱꦤ, ꦪꦺ ꦠꦺ ꦱꦩꦟꦧ꧀ꦫꦴꦲ꧀ꦩꦟꦴ ꦌꦮꦁꦮꦴꦢꦶꦤꦺꦴ ꦌꦮꦁꦢꦶꦛ꧀ꦜꦶꦤꦺꦴ – ‘ꦌꦏꦕ꧀ꦕꦁ ꦩꦺ ꦑꦩꦠꦶ, ꦌꦏꦕ꧀ꦕꦁ ꦩꦺ ꦤꦏ꧀ꦑꦩꦠꦷ’ꦠꦶ ꦠꦠ꧀ꦡ ꦮꦶꦚ꧀ꦚꦹ ꦥꦸꦫꦶꦱꦺꦴ ꦆꦠꦶ ꦥꦛꦶꦱꦚ꧀ꦕꦶꦏ꧀ꦑꦠꦶ – ‘ꦪꦴ ꦑꦺꦴ ꦩꦺ ꦄꦪꦁ ꦢꦶꦛ꧀ꦜꦶ – ꦌꦏꦕ꧀ꦕꦁ ꦩꦺ ꦑꦩꦠꦶ, ꦌꦏꦕ꧀ꦕꦁ ꦩꦺ ꦤꦏ꧀ꦑꦩꦠꦷꦠꦶ, ꦆꦩꦚ꧀ꦕꦺ ꦄꦲꦁ ꦢꦶꦛ꧀ꦜꦶꦁ ꦡꦴꦩꦱꦴ ꦥꦫꦴꦩꦴꦱꦴ ꦄꦨꦶꦤꦶꦮꦶꦱ꧀ꦱ ꦮꦺꦴꦲꦫꦺꦪ꧀ꦪꦁ – ꦆꦢꦩꦺꦮ ꦱꦕ꧀ꦕꦁ ꦩꦺꦴꦓꦩꦚ꧀ꦚꦤ꧀ꦠꦶ; ꦢ꧀ꦮꦷꦲꦶ ꦩꦺ ꦄꦱ꧀ꦱ ꦮꦶꦒ꧀ꦒꦲꦺꦴ – ꦪꦺꦴ ꦕꦴꦪꦁ ꦱꦩꦟꦺꦴ ꦮꦴ ꦧ꧀ꦫꦴꦲ꧀ꦩꦟꦺꦴ ꦮꦴ ꦌꦮꦁꦮꦴꦢꦷ ꦌꦮꦁꦢꦶꦛ꧀ꦜꦶ – ꦱꦧ꧀ꦧꦁ ꦩꦺ ꦑꦩꦠꦷꦠꦶ, ꦪꦺꦴ ꦕꦴꦪꦁ ꦱꦩꦟꦺꦴ ꦮꦴ ꦧ꧀ꦫꦴꦲ꧀ꦩꦟꦺꦴ ꦮꦴ ꦌꦮꦁꦮꦴꦢꦷ ꦌꦮꦁꦢꦶꦛ꧀ꦜꦶ – ꦱꦧ꧀ꦧꦁ ꦩꦺ ꦤꦏ꧀ꦑꦩꦠꦷꦠꦶ – ꦆꦩꦺꦲꦶ ꦄꦱ꧀ꦱ ꦢ꧀ꦮꦷꦲꦶ ꦮꦶꦒ꧀ꦒꦲꦺꦴ. ꦆꦠꦶ ꦮꦶꦒ꧀ꦒꦲꦺ ꦱꦠꦶ ꦮꦶꦮꦴꦢꦺꦴ, ꦮꦶꦮꦴꦢꦺ ꦱꦠꦶ ꦮꦶꦓꦴꦠꦺꦴ, ꦮꦶꦓꦴꦠꦺ ꦱꦠꦶ ꦮꦶꦲꦺꦱꦴ’. ꦆꦠꦶ ꦱꦺꦴ ꦮꦶꦒ꧀ꦒꦲꦚ꧀ꦕ ꦮꦶꦮꦴꦢꦚ꧀ꦕ ꦮꦶꦓꦴꦠꦚ꧀ꦕ ꦮꦶꦲꦺꦱꦚ꧀ꦕ ꦄꦠ꧀ꦠꦤꦶ ꦱꦩ꧀ꦥꦱ꧀ꦱꦩꦴꦤꦺꦴ ꦠꦚ꧀ꦕꦺꦮ ꦢꦶꦛ꧀ꦜꦶꦁ ꦥꦗꦲꦠꦶ ꦄꦚ꧀ꦚꦚ꧀ꦕ ꦢꦶꦛ꧀ꦜꦶꦁ ꦤ ꦈꦥꦴꦢꦶꦪꦠꦶ. ꦌꦮꦩꦺꦠꦴꦱꦁ ꦢꦶꦛ꧀ꦜꦷꦤꦁ ꦥꦲꦴꦤꦁ ꦲꦺꦴꦠꦶ, ꦌꦮꦩꦺꦠꦴꦱꦁ ꦢꦶꦛ꧀ꦜꦷꦤꦁ ꦥꦛꦶꦤꦶꦱ꧀ꦱꦒ꧀ꦒꦺꦴ ꦲꦺꦴꦠꦶ.

꧒꧐꧕. ‘‘ꦄꦪꦁ ꦑꦺꦴ ꦥꦤꦒ꧀ꦒꦶꦮꦺꦱ꧀ꦱꦤ, ꦏꦴꦪꦺꦴ ꦫꦹꦥꦷ ꦕꦴꦠꦸꦩꦲꦴꦨꦹꦠꦶꦏꦺꦴ [ꦕꦴꦠꦸꦩ꧀ꦩꦲꦴꦨꦹꦠꦶꦏꦺꦴ (ꦱꦷ. ꦱ꧀ꦪꦴ.)] ꦩꦴꦠꦴꦥꦺꦠ꧀ꦠꦶꦏꦱꦩ꧀ꦨꦮꦺꦴ ꦎꦢꦤꦏꦸꦩ꧀ꦩꦴꦱꦸꦥꦕꦪꦺꦴ ꦄꦤꦶꦕ꧀ꦕꦸꦕ꧀ꦖꦴꦢꦤꦥꦫꦶꦩꦢ꧀ꦢꦤꦨꦺꦢꦤꦮꦶꦢ꧀ꦣꦁꦱꦤꦣꦩ꧀ꦩꦺꦴ, ꦄꦤꦶꦕ꧀ꦕꦠꦺꦴ ꦢꦸꦏ꧀ꦑꦠꦺꦴ ꦫꦺꦴꦒꦠꦺꦴ ꦒꦟ꧀ꦝꦠꦺꦴ ꦱꦭ꧀ꦭꦠꦺꦴ ꦄꦓꦠꦺꦴ ꦄꦴꦧꦴꦣꦠꦺꦴ ꦥꦫꦠꦺꦴ ꦥꦭꦺꦴꦏꦠꦺꦴ ꦱꦸꦚ꧀ꦚꦠꦺꦴ ꦄꦤꦠ꧀ꦠꦠꦺꦴ ꦱꦩꦤꦸꦥꦱ꧀ꦱꦶꦠꦧ꧀ꦧꦺꦴ. ꦠꦱ꧀ꦱꦶꦩꦁ ꦏꦴꦪꦁ ꦄꦤꦶꦕ꧀ꦕꦠꦺꦴ ꦢꦸꦏ꧀ꦑꦠꦺꦴ ꦫꦺꦴꦒꦠꦺꦴ ꦒꦟ꧀ꦝꦠꦺꦴ ꦱꦭ꧀ꦭꦠꦺꦴ ꦄꦓꦠꦺꦴ ꦄꦴꦧꦴꦣꦠꦺꦴ ꦥꦫꦠꦺꦴ ꦥꦭꦺꦴꦏꦠꦺꦴ ꦱꦸꦚ꧀ꦚꦠꦺꦴ ꦄꦤꦠ꧀ꦠꦠꦺꦴ ꦱꦩꦤꦸꦥꦱ꧀ꦱꦠꦺꦴ ꦪꦺꦴ ꦏꦴꦪꦱ꧀ꦩꦶꦁ ꦏꦴꦪꦖꦤ꧀ꦢꦺꦴ ꦏꦴꦪꦱ꧀ꦤꦺꦲꦺꦴ ꦏꦴꦪꦤ꧀ꦮꦪꦠꦴ ꦱꦴ ꦥꦲꦷꦪꦠꦶ.

‘‘ꦠꦶꦱ꧀ꦱꦺꦴ ꦑꦺꦴ ꦆꦩꦴ, ꦄꦒ꧀ꦒꦶꦮꦺꦱ꧀ꦱꦤ, ꦮꦺꦢꦤꦴ – ꦱꦸꦑꦴ ꦮꦺꦢꦤꦴ, ꦢꦸꦏ꧀ꦑꦴ ꦮꦺꦢꦤꦴ, ꦄꦢꦸꦏ꧀ꦑꦩꦱꦸꦑꦴ ꦮꦺꦢꦤꦴ. ꦪꦱ꧀ꦩꦶꦁ, ꦄꦒ꧀ꦒꦶꦮꦺꦱ꧀ꦱꦤ, ꦱꦩꦪꦺ ꦱꦸꦑꦁ ꦮꦺꦢꦤꦁ ꦮꦺꦢꦺꦠꦶ, ꦤꦺꦮ ꦠꦱ꧀ꦩꦶꦁ ꦱꦩꦪꦺ ꦢꦸꦏ꧀ꦑꦁ ꦮꦺꦢꦤꦁ ꦮꦺꦢꦺꦠꦶ, ꦤ ꦄꦢꦸꦏ꧀ꦑꦩꦱꦸꦑꦁ ꦮꦺꦢꦤꦁ ꦮꦺꦢꦺꦠꦶ; ꦱꦸꦑꦁꦪꦺꦮ ꦠꦱ꧀ꦩꦶꦁ ꦱꦩꦪꦺ ꦮꦺꦢꦤꦁ ꦮꦺꦢꦺꦠꦶ. ꦪꦱ꧀ꦩꦶꦁ, ꦄꦒ꧀ꦒꦶꦮꦺꦱ꧀ꦱꦤ, ꦱꦩꦪꦺ ꦢꦸꦏ꧀ꦑꦁ ꦮꦺꦢꦤꦁ ꦮꦺꦢꦺꦠꦶ, ꦤꦺꦮ ꦠꦱ꧀ꦩꦶꦁ ꦱꦩꦪꦺ ꦱꦸꦑꦁ ꦮꦺꦢꦤꦁ ꦮꦺꦢꦺꦠꦶ, ꦤ ꦄꦢꦸꦏ꧀ꦑꦩꦱꦸꦑꦁ ꦮꦺꦢꦤꦁ ꦮꦺꦢꦺꦠꦶ; ꦢꦸꦏ꧀ꦑꦁꦪꦺꦮ ꦠꦱ꧀ꦩꦶꦁ ꦱꦩꦪꦺ ꦮꦺꦢꦤꦁ ꦮꦺꦢꦺꦠꦶ. ꦪꦱ꧀ꦩꦶꦁ, ꦄꦒ꧀ꦒꦶꦮꦺꦱ꧀ꦱꦤ, ꦱꦩꦪꦺ ꦄꦢꦸꦏ꧀ꦑꦩꦱꦸꦑꦁ ꦮꦺꦢꦤꦁ ꦮꦺꦢꦺꦠꦶ, ꦤꦺꦮ ꦠꦱ꧀ꦩꦶꦁ ꦱꦩꦪꦺ ꦱꦸꦑꦁ ꦮꦺꦢꦤꦁ ꦮꦺꦢꦺꦠꦶ, ꦤ ꦢꦸꦏ꧀ꦑꦁ ꦮꦺꦢꦤꦁ ꦮꦺꦢꦺꦠꦶ; ꦄꦢꦸꦏ꧀ꦑꦩꦱꦸꦑꦁꦪꦺꦮ ꦠꦱ꧀ꦩꦶꦁ ꦱꦩꦪꦺ ꦮꦺꦢꦤꦁ ꦮꦺꦢꦺꦠꦶ. ꦱꦸꦑꦴꦥꦶ ꦑꦺꦴ, ꦄꦒ꧀ꦒꦶꦮꦺꦱ꧀ꦱꦤ, ꦮꦺꦢꦤꦴ ꦄꦤꦶꦕ꧀ꦕꦴ ꦱꦔ꧀ꦑꦠꦴ ꦥꦛꦶꦕ꧀ꦕꦱꦩꦸꦥ꧀ꦥꦤ꧀ꦤꦴ ꦑꦪꦣꦩ꧀ꦩꦴ ꦮꦪꦣꦩ꧀ꦩꦴ ꦮꦶꦫꦴꦒꦣꦩ꧀ꦩꦴ ꦤꦶꦫꦺꦴꦣꦣꦩ꧀ꦩꦴ; ꦢꦸꦏ꧀ꦑꦴꦥꦶ ꦑꦺꦴ, ꦄꦒ꧀ꦒꦶꦮꦺꦱ꧀ꦱꦤ, ꦮꦺꦢꦤꦴ ꦄꦤꦶꦕ꧀ꦕꦴ ꦱꦔ꧀ꦑꦠꦴ ꦥꦛꦶꦕ꧀ꦕꦱꦩꦸꦥ꧀ꦥꦤ꧀ꦤꦴ ꦑꦪꦣꦩ꧀ꦩꦴ ꦮꦪꦣꦩ꧀ꦩꦴ ꦮꦶꦫꦴꦒꦣꦩ꧀ꦩꦴ ꦤꦶꦫꦺꦴꦣꦣꦩ꧀ꦩꦴ; ꦄꦢꦸꦏ꧀ꦑꦩꦱꦸꦑꦴꦥꦶ ꦑꦺꦴ, ꦄꦒ꧀ꦒꦶꦮꦺꦱ꧀ꦱꦤ, ꦮꦺꦢꦤꦴ ꦄꦤꦶꦕ꧀ꦕꦴ ꦱꦔ꧀ꦑꦠꦴ ꦥꦛꦶꦕ꧀ꦕꦱꦩꦸꦥ꧀ꦥꦤ꧀ꦤꦴ ꦑꦪꦣꦩ꧀ꦩꦴ ꦮꦪꦣꦩ꧀ꦩꦴ ꦮꦶꦫꦴꦒꦣꦩ꧀ꦩꦴ ꦤꦶꦫꦺꦴꦣꦣꦩ꧀ꦩꦴ. ꦌꦮꦁ ꦥꦱ꧀ꦱꦁ, ꦄꦒ꧀ꦒꦶꦮꦺꦱ꧀ꦱꦤ, ꦱꦸꦠꦮꦴ ꦄꦫꦶꦪꦱꦴꦮꦏꦺꦴ ꦱꦸꦑꦴꦪꦥꦶ ꦮꦺꦢꦤꦴꦪ ꦤꦶꦧ꧀ꦧꦶꦤ꧀ꦢꦠꦶ, ꦢꦸꦏ꧀ꦑꦴꦪꦥꦶ ꦮꦺꦢꦤꦴꦪ ꦤꦶꦧ꧀ꦧꦶꦤ꧀ꦢꦠꦶ, ꦄꦢꦸꦏ꧀ꦑꦩꦱꦸꦑꦴꦪꦥꦶ ꦮꦺꦢꦤꦴꦪ ꦤꦶꦧ꧀ꦧꦶꦤ꧀ꦢꦠꦶ; ꦤꦶꦧ꧀ꦧꦶꦤ꧀ꦢꦁ ꦮꦶꦫꦗ꧀ꦗꦠꦶ, ꦮꦶꦫꦴꦒꦴ ꦮꦶꦩꦸꦕ꧀ꦕꦠꦶ. ꦮꦶꦩꦸꦠ꧀ꦠꦱ꧀ꦩꦶꦁ, ꦮꦶꦩꦸꦠ꧀ꦠꦩꦶꦠꦶ ꦚꦴꦟꦁ ꦲꦺꦴꦠꦶ. ‘ꦑꦷꦟꦴ ꦗꦴꦠꦶ, ꦮꦸꦱꦶꦠꦁ ꦧ꧀ꦫꦲ꧀ꦩꦕꦫꦶꦪꦁ, ꦏꦠꦁ ꦏꦫꦟꦷꦪꦁ, ꦤꦴꦥꦫꦁ ꦆꦠ꧀ꦡꦠ꧀ꦠꦴꦪꦴ’ꦠꦶ ꦥꦗꦴꦤꦴꦠꦶ. ꦌꦮꦁ ꦮꦶꦩꦸꦠ꧀ꦠꦕꦶꦠ꧀ꦠꦺꦴ ꦑꦺꦴ, ꦄꦒ꧀ꦒꦶꦮꦺꦱ꧀ꦱꦤ, ꦨꦶꦏ꧀ꦑꦸ ꦤ ꦏꦺꦤꦕꦶ ꦱꦁꦮꦢꦠꦶ, ꦤ ꦏꦺꦤꦕꦶ ꦮꦶꦮꦢꦠꦶ, ꦪꦚ꧀ꦕ ꦭꦺꦴꦏꦺ ꦮꦸꦠ꧀ꦠꦁ ꦠꦺꦤ ꦮꦺꦴꦲꦫꦠꦶ, ꦄꦥꦫꦴꦩꦱ’’ꦤ꧀ꦠꦶ.

꧒꧐꧖. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦄꦴꦪꦱ꧀ꦩꦴ ꦱꦴꦫꦶꦥꦸꦠ꧀ꦠꦺꦴ ꦨꦒꦮꦠꦺꦴ ꦥꦶꦛ꧀ꦜꦶꦠꦺꦴ ꦜꦶꦠꦺꦴ ꦲꦺꦴꦠꦶ ꦨꦒꦮꦤ꧀ꦠꦁ ꦧꦷꦗꦪꦩꦴꦤꦺꦴ [ꦮꦷꦗꦪꦩꦴꦤꦺꦴ (ꦱꦷ. ꦥꦷ.)]. ꦄꦡ ꦑꦺꦴ ꦄꦴꦪꦱ꧀ꦩꦠꦺꦴ ꦱꦴꦫꦶꦥꦸꦠ꧀ꦠꦱ꧀ꦱ ꦌꦠꦢꦲꦺꦴꦱꦶ – ‘‘ꦠꦺꦱꦁ ꦠꦺꦱꦁ ꦏꦶꦫ ꦤꦺꦴ ꦨꦒꦮꦴ ꦣꦩ꧀ꦩꦴꦤꦁ ꦄꦨꦶꦚ꧀ꦚꦴ ꦥꦲꦴꦤꦩꦴꦲ, ꦠꦺꦱꦁ ꦠꦺꦱꦁ ꦏꦶꦫ ꦤꦺꦴ ꦱꦸꦒꦠꦺꦴ ꦣꦩ꧀ꦩꦴꦤꦁ ꦄꦨꦶꦚ꧀ꦚꦴ ꦥꦛꦶꦤꦶꦱ꧀ꦱꦒ꧀ꦒꦩꦴꦲꦴ’’ꦠꦶ. ꦆꦠꦶ ꦲꦶꦢꦁ ꦄꦴꦪꦱ꧀ꦩꦠꦺꦴ ꦱꦴꦫꦶꦥꦸꦠ꧀ꦠꦱ꧀ꦱ ꦥꦛꦶꦱꦚ꧀ꦕꦶꦏ꧀ꦑꦠꦺꦴ ꦄꦤꦸꦥꦴꦢꦴꦪ ꦄꦴꦱꦮꦺꦲꦶ ꦕꦶꦠ꧀ꦠꦁ ꦮꦶꦩꦸꦕ꧀ꦕꦶ. ꦢꦷꦓꦤꦑꦱ꧀ꦱ ꦥꦤ ꦥꦫꦶꦧ꧀ꦧꦴꦗꦏꦱ꧀ꦱ ꦮꦶꦫꦗꦁ ꦮꦷꦠꦩꦭꦁ ꦣꦩ꧀ꦩꦕꦏ꧀ꦑꦸꦁ ꦈꦢꦥꦴꦢꦶ – ‘‘ꦪꦁ ꦏꦶꦚ꧀ꦕꦶ ꦱꦩꦸꦢꦪꦣꦩ꧀ꦩꦁ ꦱꦧ꧀ꦧꦁ ꦠꦁ ꦤꦶꦫꦺꦴꦣꦣꦩ꧀ꦩ’’ꦤ꧀ꦠꦶ. ꦄꦡ ꦑꦺꦴ ꦢꦷꦓꦤꦑꦺꦴ ꦥꦫꦶꦧ꧀ꦧꦴꦗꦏꦺꦴ ꦢꦶꦛ꧀ꦜꦣꦩ꧀ꦩꦺꦴ ꦥꦠ꧀ꦠꦣꦩ꧀ꦩꦺꦴ ꦮꦶꦢꦶꦠꦣꦩ꧀ꦩꦺꦴ ꦥꦫꦶꦪꦺꦴꦒꦴꦭ꦳꧀ꦲꦣꦩ꧀ꦩꦺꦴ ꦠꦶꦟ꧀ꦟꦮꦶꦕꦶꦏꦶꦕ꧀ꦖꦺꦴ ꦮꦶꦒꦠꦏꦡꦁꦏꦡꦺꦴ ꦮꦺꦱꦴꦫꦗ꧀ꦗꦥ꧀ꦥꦠ꧀ꦠꦺꦴ ꦄꦥꦫꦥ꧀ꦥꦕ꧀ꦕꦪꦺꦴ ꦱꦠ꧀ꦡꦸꦱꦴꦱꦤꦺ ꦨꦒꦮꦤ꧀ꦠꦁ ꦌꦠꦢꦮꦺꦴꦕ – ‘‘ꦄꦨꦶꦏ꧀ꦏꦤ꧀ꦠꦁ, ꦨꦺꦴ ꦒꦺꦴꦠꦩ, ꦄꦨꦶꦏ꧀ꦏꦤ꧀ꦠꦁ, ꦨꦺꦴ ꦒꦺꦴꦠꦩ! ꦱꦺꦪ꧀ꦪꦡꦴꦥꦶ, ꦨꦺꦴ ꦒꦺꦴꦠꦩ, ꦤꦶꦏ꧀ꦏꦸꦗ꧀ꦗꦶꦠꦁ ꦮꦴ ꦈꦏ꧀ꦏꦸꦗ꧀ꦗꦺꦪ꧀ꦪ, ꦥꦛꦶꦕ꧀ꦖꦤ꧀ꦤꦁ ꦮꦴ ꦮꦶꦮꦫꦺꦪ꧀ꦪ, ꦩꦹꦭ꦳꧀ꦲꦱ꧀ꦱ ꦮꦴ ꦩꦒ꧀ꦒꦁ ꦄꦴꦕꦶꦏ꧀ꦑꦺꦪ꧀ꦪ, ꦄꦤ꧀ꦣꦏꦴꦫꦺ ꦮꦴ ꦠꦺꦭꦥꦗ꧀ꦗꦺꦴꦠꦁ ꦣꦴꦫꦺꦪ꧀ꦪ – ꦕꦏ꧀ꦑꦸꦩꦤ꧀ꦠꦺꦴ ꦫꦹꦥꦴꦤꦶ ꦢꦏ꧀ꦑꦤ꧀ꦠꦷꦠꦶ – ꦌꦮꦩꦺꦮ ꦑꦺꦴ ꦨꦺꦴꦠꦴ ꦒꦺꦴꦠꦩꦺꦤ ꦄꦤꦺꦏꦥꦫꦶꦪꦴꦪꦺꦤ ꦣꦩ꧀ꦩꦺꦴ ꦥꦏꦴꦱꦶꦠꦺꦴ. ꦌꦱꦴꦲꦁ ꦨꦮꦤ꧀ꦠꦁ ꦒꦺꦴꦠꦩꦁ ꦱꦫꦟꦁ ꦒꦕ꧀ꦖꦴꦩꦶ ꦣꦩ꧀ꦩꦚ꧀ꦕ ꦨꦶꦏ꧀ꦑꦸꦱꦔ꧀ꦓꦚ꧀ꦕ. ꦈꦥꦴꦱꦏꦁ ꦩꦁ ꦨꦮꦁ ꦒꦺꦴꦠꦩꦺꦴ ꦣꦴꦫꦺꦠꦸ ꦄꦗ꧀ꦗꦠꦒ꧀ꦒꦺ ꦥꦴꦟꦸꦥꦺꦠꦁ ꦱꦫꦟꦁ ꦒꦠ’’ꦤ꧀ꦠꦶ.

ꦢꦷꦓꦤꦑꦱꦸꦠ꧀ꦠꦁ ꦤꦶꦛ꧀ꦜꦶꦠꦁ ꦕꦠꦸꦠ꧀ꦡꦁ.

꧕. ꦩꦴꦒꦟ꧀ꦝꦶꦪꦱꦸꦠ꧀ꦠꦁ

꧒꧐꧗. ꦌꦮꦁ ꦩꦺ ꦱꦸꦠꦁ – ꦌꦏꦁ ꦱꦩꦪꦁ ꦨꦒꦮꦴ ꦏꦸꦫꦹꦱꦸ ꦮꦶꦲꦫꦠꦶ ꦏꦩ꧀ꦩꦴꦱꦣꦩ꧀ꦩꦁ ꦤꦴꦩ ꦏꦸꦫꦹꦤꦁ ꦤꦶꦒꦩꦺꦴ, ꦨꦴꦫꦢ꧀ꦮꦴꦗꦒꦺꦴꦠ꧀ꦠꦱ꧀ꦱ ꦧ꧀ꦫꦴꦲ꧀ꦩꦟꦱ꧀ꦱ ꦄꦒ꧀ꦪꦴꦒꦴꦫꦺ ꦠꦶꦟꦱꦤ꧀ꦡꦴꦫꦏꦺ [ꦠꦶꦟꦱꦤ꧀ꦡꦫꦏꦺ (ꦱꦷ. ꦱ꧀ꦪꦴ. ꦏꦁ. ꦥꦷ.)]. ꦄꦡ ꦑꦺꦴ ꦨꦒꦮꦴ ꦥꦸꦧ꧀ꦧꦟ꧀ꦲꦱꦩꦪꦁ ꦤꦶꦮꦴꦱꦺꦠ꧀ꦮꦴ ꦥꦠ꧀ꦠꦕꦷꦮꦫꦩꦴꦢꦴꦪ ꦏꦩ꧀ꦩꦴꦱꦣꦩ꧀ꦩꦁ ꦥꦶꦟ꧀ꦝꦴꦪ ꦥꦴꦮꦶꦱꦶ. ꦏꦩ꧀ꦩꦴꦱꦣꦩ꧀ꦩꦁ ꦥꦶꦟ꧀ꦝꦴꦪ ꦕꦫꦶꦠ꧀ꦮꦴ ꦥꦕ꧀ꦖꦴꦨꦠ꧀ꦠꦁ ꦥꦶꦟ꧀ꦝꦥꦴꦠꦥꦛꦶꦏ꧀ꦏꦤ꧀ꦠꦺꦴ ꦪꦺꦤ ꦄꦚ꧀ꦚꦠꦫꦺꦴ ꦮꦤꦱꦟ꧀ꦝꦺꦴ ꦠꦺꦤꦸꦥꦱꦔ꧀ꦏꦩꦶ ꦢꦶꦮꦴꦮꦶꦲꦴꦫꦴꦪ. ꦠꦁ ꦮꦤꦱꦟ꧀ꦝꦁ ꦄꦗ꧀ꦙꦺꦴꦒꦴꦲꦺꦠ꧀ꦮꦴ ꦄꦚ꧀ꦚꦠꦫꦱ꧀ꦩꦶꦁ ꦫꦸꦏ꧀ꦑꦩꦹꦭꦺ ꦢꦶꦮꦴꦮꦶꦲꦴꦫꦁ ꦤꦶꦱꦷꦢꦶ. ꦄꦡ ꦑꦺꦴ ꦩꦴꦒꦟ꧀ꦝꦶꦪꦺꦴ [ꦩꦴꦒꦤ꧀ꦢꦶꦪꦺꦴ (ꦱꦷ. ꦥꦷ.)] ꦥꦫꦶꦧ꧀ꦧꦴꦗꦏꦺꦴ ꦗꦔ꧀ꦓꦴꦮꦶꦲꦴꦫꦁ ꦄꦤꦸꦕꦔ꧀ꦏꦩꦩꦴꦤꦺꦴ ꦄꦤꦸꦮꦶꦕꦫꦩꦴꦤꦺꦴ ꦪꦺꦤ ꦨꦴꦫꦢ꧀ꦮꦴꦗꦒꦺꦴꦠ꧀ꦠꦱ꧀ꦱ ꦧ꧀ꦫꦴꦲ꧀ꦩꦟꦱ꧀ꦱ ꦄꦒ꧀ꦪꦴꦒꦴꦫꦁ ꦠꦺꦤꦸꦥꦱꦔ꧀ꦏꦩꦶ. ꦄꦢ꧀ꦢꦱꦴ ꦑꦺꦴ ꦩꦴꦒꦟ꧀ꦝꦶꦪꦺꦴ ꦥꦫꦶꦧ꧀ꦧꦴꦗꦏꦺꦴ ꦨꦴꦫꦢ꧀ꦮꦴꦗꦒꦺꦴꦠ꧀ꦠꦱ꧀ꦱ ꦧ꧀ꦫꦴꦲ꧀ꦩꦟꦱ꧀ꦱ ꦄꦒ꧀ꦪꦴꦒꦴꦫꦺ ꦠꦶꦟꦱꦤ꧀ꦡꦴꦫꦏꦁ ꦥꦚ꧀ꦚꦠ꧀ꦠꦁ. ꦢꦶꦱ꧀ꦮꦴꦤ ꦨꦴꦫꦢ꧀ꦮꦴꦗꦒꦺꦴꦠ꧀ꦠꦁ ꦧ꧀ꦫꦴꦲ꧀ꦩꦟꦁ ꦌꦠꦢꦮꦺꦴꦕ – ‘‘ꦏꦱ꧀ꦱ ꦤ꧀ꦮꦪꦁ ꦨꦺꦴꦠꦺꦴ ꦨꦴꦫꦢ꧀ꦮꦴꦗꦱ꧀ꦱ ꦄꦒ꧀ꦪꦴꦒꦴꦫꦺ ꦠꦶꦟꦱꦤ꧀ꦡꦴꦫꦏꦺꦴ ꦥꦚ꧀ꦚꦠ꧀ꦠꦺꦴ, ꦱꦩꦟꦱꦺꦪ꧀ꦪꦴꦤꦸꦫꦹꦥꦁ [ꦱꦩꦟꦱꦺꦪ꧀ꦪꦴꦫꦹꦥꦁ (ꦱꦷ. ꦥꦷ.)] ꦩꦚ꧀ꦚꦺ’’ꦠꦶ? ‘‘ꦄꦠ꧀ꦡꦶ, ꦨꦺꦴ ꦩꦴꦒꦟ꧀ꦝꦶꦪ, ꦱꦩꦟꦺꦴ ꦒꦺꦴꦠꦩꦺꦴ ꦱꦏ꧀ꦪꦥꦸꦠ꧀ꦠꦺꦴ ꦱꦏ꧀ꦪꦏꦸꦭꦴ ꦥꦧ꧀ꦧꦗꦶꦠꦺꦴ. ꦠꦁ ꦑꦺꦴ ꦥꦤ ꦨꦮꦤ꧀ꦠꦁ ꦒꦺꦴꦠꦩꦁ ꦌꦮꦁ ꦏꦭ꧀ꦪꦴꦟꦺꦴ ꦏꦶꦠ꧀ꦠꦶꦱꦢ꧀ꦢꦺꦴ ꦄꦧ꧀ꦨꦸꦒ꧀ꦒꦠꦺꦴ – ‘ꦆꦠꦶꦥꦶ ꦱꦺꦴ ꦨꦒꦮꦴ ꦄꦫꦲꦁ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦴ ꦮꦶꦗ꧀ꦗꦴꦕꦫꦟꦱꦩ꧀ꦥꦤ꧀ꦤꦺꦴ ꦱꦸꦒꦠꦺꦴ ꦭꦺꦴꦏꦮꦶꦢꦹ ꦄꦤꦸꦠ꧀ꦠꦫꦺꦴ ꦥꦸꦫꦶꦱꦢꦩ꧀ꦩꦱꦴꦫꦡꦶ ꦱꦠ꧀ꦡꦴ ꦢꦺꦮꦩꦤꦸꦱ꧀ꦱꦴꦤꦁ ꦧꦸꦢ꧀ꦣꦺꦴ ꦨꦒꦮꦴ’ꦠꦶ. ꦠꦱ꧀ꦱꦺꦱꦴ ꦨꦺꦴꦠꦺꦴ ꦒꦺꦴꦠꦩꦱ꧀ꦱ ꦱꦺꦪ꧀ꦪꦴ ꦥꦚ꧀ꦚꦠ꧀ꦠꦴ’’ꦠꦶ. ‘‘ꦢꦸꦢ꧀ꦢꦶꦛ꧀ꦜꦁ ꦮꦠ, ꦨꦺꦴ ꦨꦴꦫꦢ꧀ꦮꦴꦗ, ꦄꦢ꧀ꦢꦱꦴꦩ; ꦢꦸꦢ꧀ꦢꦶꦛ꧀ꦜꦁ ꦮꦠ, ꦨꦺꦴ ꦨꦴꦫꦢ꧀ꦮꦴꦗ, ꦄꦢ꧀ꦢꦱꦴꦩ! ꦪꦺ ꦩꦪꦁ ꦠꦱ꧀ꦱ ꦨꦺꦴꦠꦺꦴ ꦒꦺꦴꦠꦩꦱ꧀ꦱ ꦨꦹꦤꦲꦸꦤꦺꦴ [ꦨꦹꦤꦲꦤꦱ꧀ꦱ (ꦱ꧀ꦪꦴ. ꦏꦁ.)] ꦱꦺꦪ꧀ꦪꦁ ꦄꦢ꧀ꦢꦱꦴꦩꦴ’’ꦠꦶ. ‘‘ꦫꦏ꧀ꦑꦱ꧀ꦱꦺꦠꦁ, ꦩꦴꦒꦟ꧀ꦝꦶꦪ, ꦮꦴꦕꦁ; ꦫꦏ꧀ꦑꦱ꧀ꦱꦺꦠꦁ, ꦩꦴꦒꦟ꧀ꦝꦶꦪ, ꦮꦴꦕꦁ. ꦧꦲꦹ ꦲꦶ ꦠꦱ꧀ꦱ ꦨꦺꦴꦠꦺꦴ ꦒꦺꦴꦠꦩꦱ꧀ꦱ ꦑꦠ꧀ꦠꦶꦪꦥꦟ꧀ꦝꦶꦠꦴꦥꦶ ꦧ꧀ꦫꦴꦲ꧀ꦩꦟꦥꦟ꧀ꦝꦶꦠꦴꦥꦶ ꦒꦲꦥꦠꦶꦥꦟ꧀ꦝꦶꦠꦴꦥꦶ ꦱꦩꦟꦥꦟ꧀ꦝꦶꦠꦴꦥꦶ ꦄꦨꦶꦥ꧀ꦥꦱꦤ꧀ꦤꦴ ꦮꦶꦤꦷꦠꦴ ꦄꦫꦶꦪꦺ ꦚꦴꦪꦺ ꦣꦩ꧀ꦩꦺ ꦏꦸꦱꦭꦺ’’ꦠꦶ. ‘‘ꦱꦩ꧀ꦩꦸꦑꦴ ꦕꦺꦥꦶ ꦩꦪꦁ, ꦨꦺꦴ ꦨꦴꦫꦢ꧀ꦮꦴꦗ, ꦠꦁ ꦨꦮꦤ꧀ꦠꦁ ꦒꦺꦴꦠꦩꦁ ꦥꦱ꧀ꦱꦺꦪ꧀ꦪꦴꦩ, ꦱꦩ꧀ꦩꦸꦑꦴꦥꦶ ꦤꦁ ꦮꦢꦺꦪ꧀ꦪꦴꦩ – ‘ꦨꦹꦤꦲꦸ [ꦨꦹꦤꦲꦤꦺꦴ (ꦱ꧀ꦪꦴ. ꦏꦁ.)] ꦱꦩꦟꦺꦴ ꦒꦺꦴꦠꦩꦺꦴ’ꦠꦶ. ꦠꦁ ꦏꦶꦱ꧀ꦱ ꦲꦺꦠꦸ? ꦌꦮꦚ꧀ꦲꦶ ꦤꦺꦴ ꦱꦸꦠ꧀ꦠꦺ ꦎꦕꦫꦠꦷ’’ꦠꦶ. ‘‘ꦱꦕꦺ ꦠꦁ ꦨꦺꦴꦠꦺꦴ ꦩꦴꦒꦟ꧀ꦝꦶꦪꦱ꧀ꦱ ꦄꦒꦫꦸ ꦄꦴꦫꦺꦴꦕꦺꦪ꧀ꦪꦴꦩꦶ ꦠꦁ [ꦄꦴꦫꦺꦴꦕꦺꦪ꧀ꦪꦩꦺꦠꦁ (ꦱꦷ. ꦥꦷ.), ꦄꦴꦫꦺꦴꦕꦺꦱ꧀ꦱꦴꦩꦶ ꦠꦱ꧀ꦱ (ꦱ꧀ꦪꦴ. ꦏꦁ.)] ꦱꦩꦟꦱ꧀ꦱ ꦒꦺꦴꦠꦩꦱ꧀ꦱꦴ’’ꦠꦶ. ‘‘ꦄꦥ꧀ꦥꦺꦴꦱ꧀ꦱꦸꦏ꧀ꦏꦺꦴ ꦨꦮꦁ ꦨꦴꦫꦢ꧀ꦮꦴꦗꦺꦴ ꦮꦸꦠ꧀ꦠꦺꦴꦮ ꦤꦁ ꦮꦢꦺꦪ꧀ꦪꦴ’’ꦠꦶ.

꧒꧐꧘. ꦄꦱ꧀ꦱꦺꦴꦱꦶ ꦑꦺꦴ ꦨꦒꦮꦴ ꦢꦶꦧ꧀ꦧꦴꦪ ꦱꦺꦴꦠꦣꦴꦠꦸꦪꦴ ꦮꦶꦱꦸꦢ꧀ꦣꦴꦪ ꦄꦠꦶꦏ꧀ꦏꦤ꧀ꦠꦩꦴꦤꦸꦱꦶꦏꦴꦪ ꦨꦴꦫꦢ꧀ꦮꦴꦗꦒꦺꦴꦠ꧀ꦠꦱ꧀ꦱ ꦧ꧀ꦫꦴꦲ꧀ꦩꦟꦱ꧀ꦱ ꦩꦴꦒꦟ꧀ꦝꦶꦪꦺꦤ ꦥꦫꦶꦧ꧀ꦧꦴꦗꦏꦺꦤ ꦱꦢ꧀ꦣꦶꦁ ꦆꦩꦁ ꦏꦡꦴꦱꦭ꧀ꦭꦴꦥꦁ. ꦄꦡ ꦑꦺꦴ ꦨꦒꦮꦴ ꦱꦴꦪꦤ꧀ꦲꦱꦩꦪꦁ ꦥꦛꦶꦱꦭ꧀ꦭꦴꦤꦴ ꦮꦸꦛ꧀ꦜꦶꦠꦺꦴ ꦪꦺꦤ ꦨꦴꦫꦢ꧀ꦮꦴꦗꦒꦺꦴꦠ꧀ꦠꦱ꧀ꦱ ꦧ꧀ꦫꦴꦲ꧀ꦩꦟꦱ꧀ꦱ ꦄꦒ꧀ꦪꦴꦒꦴꦫꦁ ꦠꦺꦤꦸꦥꦱꦔ꧀ꦏꦩꦶ; ꦈꦥꦱꦔ꧀ꦏꦩꦶꦠ꧀ꦮꦴ ꦤꦶꦱꦷꦢꦶ ꦨꦒꦮꦴ ꦥꦚ꧀ꦚꦠ꧀ꦠꦺ ꦠꦶꦟꦱꦤ꧀ꦡꦴꦫꦏꦺ. ꦄꦡ ꦑꦺꦴ ꦨꦴꦫꦢ꧀ꦮꦴꦗꦒꦺꦴꦠ꧀ꦠꦺꦴ ꦧ꧀ꦫꦴꦲ꧀ꦩꦟꦺꦴ ꦪꦺꦤ ꦨꦒꦮꦴ ꦠꦺꦤꦸꦥꦱꦔ꧀ꦏꦩꦶ; ꦈꦥꦱꦔ꧀ꦏꦩꦶꦠ꧀ꦮꦴ ꦨꦒꦮꦠꦴ ꦱꦢ꧀ꦣꦶꦁ ꦱꦩ꧀ꦩꦺꦴꦢꦶ. ꦱꦩ꧀ꦩꦺꦴꦢꦤꦷꦪꦁ ꦏꦡꦁ ꦱꦴꦫꦟꦷꦪꦁ ꦮꦷꦠꦶꦱꦴꦫꦺꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦷꦢꦶ. ꦌꦏꦩꦤ꧀ꦠꦁ ꦤꦶꦱꦶꦤ꧀ꦤꦁ ꦑꦺꦴ ꦨꦴꦫꦢ꧀ꦮꦴꦗꦒꦺꦴꦠ꧀ꦠꦁ ꦧ꧀ꦫꦴꦲ꧀ꦩꦟꦁ ꦨꦒꦮꦴ ꦌꦠꦢꦮꦺꦴꦕ – ‘‘ꦄꦲꦸ ꦥꦤ ꦠꦺ, ꦨꦴꦫꦢ꧀ꦮꦴꦗ, ꦩꦴꦒꦟ꧀ꦝꦶꦪꦺꦤ ꦥꦫꦶꦧ꧀ꦧꦴꦗꦏꦺꦤ ꦱꦢ꧀ꦣꦶꦁ ꦆꦩꦁꦪꦺꦮ ꦠꦶꦟꦱꦤ꧀ꦡꦴꦫꦏꦁ ꦄꦴꦫꦧ꧀ꦨ ꦏꦺꦴꦕꦶꦢꦺꦮ ꦏꦡꦴꦱꦭ꧀ꦭꦴꦥꦺꦴ’’ꦠꦶ? ꦌꦮꦁ ꦮꦸꦠ꧀ꦠꦺ, ꦨꦴꦫꦢ꧀ꦮꦴꦗꦒꦺꦴꦠ꧀ꦠꦺꦴ ꦧ꧀ꦫꦴꦲ꧀ꦩꦟꦺꦴ ꦱꦁꦮꦶꦒ꧀ꦒꦺꦴ ꦭꦺꦴꦩꦲꦛ꧀ꦜꦗꦴꦠꦺꦴ ꦨꦒꦮꦤ꧀ꦠꦁ ꦌꦠꦢꦮꦺꦴꦕ – ‘‘ꦌꦠꦢꦺꦮ ꦑꦺꦴ ꦥꦤ ꦩꦪꦁ ꦨꦺꦴꦠꦺꦴ ꦒꦺꦴꦠꦩꦱ꧀ꦱ ꦄꦴꦫꦺꦴꦕꦺꦠꦸꦏꦴꦩꦴ. ꦄꦡ ꦕ ꦥꦤ ꦨꦮꦁ ꦒꦺꦴꦠꦩꦺꦴ ꦄꦤꦏ꧀ꦑꦴꦠꦁꦪꦺꦮ ꦄꦏ꧀ꦑꦴꦱꦷ’’ꦠꦶ. ꦄꦪꦚ꧀ꦕ ꦲꦶ [ꦄꦪꦚ꧀ꦕ ꦲꦶꦢꦁ (ꦱꦷ. ꦱ꧀ꦪꦴ. ꦏꦁ. ꦥꦷ.)] ꦨꦒꦮꦠꦺꦴ ꦨꦴꦫꦢ꧀ꦮꦴꦗꦒꦺꦴꦠ꧀ꦠꦺꦤ ꦧ꧀ꦫꦴꦲ꧀ꦩꦟꦺꦤ ꦱꦢ꧀ꦣꦶꦁ ꦄꦤ꧀ꦠꦫꦴꦏꦡꦴ ꦮꦶꦥ꧀ꦥꦏꦠꦴ ꦲꦺꦴꦠꦶ. ꦄꦡ ꦑꦺꦴ ꦩꦴꦒꦟ꧀ꦝꦶꦪꦺꦴ ꦥꦫꦶꦧ꧀ꦧꦴꦗꦏꦺꦴ ꦗꦔ꧀ꦓꦴꦮꦶꦲꦴꦫꦁ ꦄꦤꦸꦕꦔ꧀ꦏꦩꦩꦴꦤꦺꦴ ꦄꦤꦸꦮꦶꦕꦫꦩꦴꦤꦺꦴ ꦪꦺꦤ ꦨꦴꦫꦢ꧀ꦮꦴꦗꦒꦺꦴꦠ꧀ꦠꦱ꧀ꦱ ꦧ꧀ꦫꦴꦲ꧀ꦩꦟꦱ꧀ꦱ ꦄꦒ꧀ꦪꦴꦒꦴꦫꦁ ꦪꦺꦤ ꦨꦒꦮꦴ ꦠꦺꦤꦸꦥꦱꦔ꧀ꦏꦩꦶ; ꦈꦥꦱꦔ꧀ꦏꦩꦶꦠ꧀ꦮꦴ ꦨꦒꦮꦠꦴ ꦱꦢ꧀ꦣꦶꦁ ꦱꦩ꧀ꦩꦺꦴꦢꦶ. ꦱꦩ꧀ꦩꦺꦴꦢꦤꦷꦪꦁ ꦏꦡꦁ ꦱꦴꦫꦟꦷꦪꦁ ꦮꦷꦠꦶꦱꦴꦫꦺꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦷꦢꦶ. ꦌꦏꦩꦤ꧀ꦠꦁ ꦤꦶꦱꦶꦤ꧀ꦤꦁ ꦑꦺꦴ ꦩꦴꦒꦟ꧀ꦝꦶꦪꦁ ꦥꦫꦶꦧ꧀ꦧꦴꦗꦏꦁ ꦨꦒꦮꦴ ꦌꦠꦢꦮꦺꦴꦕ –

꧒꧐꧙. ‘‘ꦕꦏ꧀ꦑꦸꦁ ꦑꦺꦴ, ꦩꦴꦒꦟ꧀ꦝꦶꦪ, ꦫꦹꦥꦴꦫꦴꦩꦁ ꦫꦹꦥꦫꦠꦁ ꦫꦹꦥꦱꦩ꧀ꦩꦸꦢꦶꦠꦁ. ꦠꦁ ꦠꦡꦴꦒꦠꦱ꧀ꦱ ꦢꦤ꧀ꦠꦁ ꦒꦸꦠ꧀ꦠꦁ ꦫꦏ꧀ꦑꦶꦠꦁ ꦱꦁꦮꦸꦠꦁ, ꦠꦱ꧀ꦱ ꦕ ꦱꦁꦮꦫꦴꦪ ꦣꦩ꧀ꦩꦁ ꦢꦺꦱꦺꦠꦶ. ꦆꦢꦁ ꦤꦸ ꦠꦺ ꦌꦠꦁ, ꦩꦴꦒꦟ꧀ꦝꦶꦪ, ꦱꦤ꧀ꦣꦴꦪ ꦨꦴꦱꦶꦠꦁ – ‘ꦨꦹꦤꦲꦸ ꦱꦩꦟꦺꦴ ꦒꦺꦴꦠꦩꦺꦴ’’’ꦠꦶ? ‘‘ꦌꦠꦢꦺꦮ ꦑꦺꦴ ꦥꦤ ꦩꦺ, ꦨꦺꦴ ꦒꦺꦴꦠꦩ, ꦱꦤ꧀ꦣꦴꦪ ꦨꦴꦱꦶꦠꦁ – ‘ꦨꦹꦤꦲꦸ ꦱꦩꦟꦺꦴ ꦒꦺꦴꦠꦩꦺꦴ’ꦠꦶ. ꦠꦁ ꦏꦶꦱ꧀ꦱ ꦲꦺꦠꦸ? ꦌꦮꦚ꧀ꦲꦶ ꦤꦺꦴ ꦱꦸꦠ꧀ꦠꦺ ꦎꦕꦫꦠꦷ’’ꦠꦶ. ‘‘ꦱꦺꦴꦠꦁ ꦑꦺꦴ, ꦩꦴꦒꦟ꧀ꦝꦶꦪ, ꦱꦢ꧀ꦢꦴꦫꦴꦩꦁ…ꦥꦺ… ꦓꦴꦤꦁ ꦑꦺꦴ, ꦩꦴꦒꦟ꧀ꦝꦶꦪ ꦒꦤ꧀ꦣꦴꦫꦴꦩꦁ… ꦗꦶꦮ꧀ꦲꦴ ꦑꦺꦴ, ꦩꦴꦒꦟ꧀ꦝꦶꦪ, ꦫꦱꦴꦫꦴꦩꦴ ꦫꦱꦫꦠꦴ ꦫꦱꦱꦩ꧀ꦩꦸꦢꦶꦠꦴ. ꦱꦴ ꦠꦡꦴꦒꦠꦱ꧀ꦱ ꦢꦤ꧀ꦠꦴ ꦒꦸꦠ꧀ꦠꦴ ꦫꦏ꧀ꦑꦶꦠꦴ ꦱꦁꦮꦸꦠꦴ, ꦠꦱ꧀ꦱꦴ ꦕ ꦱꦁꦮꦫꦴꦪ ꦣꦩ꧀ꦩꦁ ꦢꦺꦱꦺꦠꦶ. ꦆꦢꦁ ꦤꦸ ꦠꦺ ꦌꦠꦁ, ꦩꦴꦒꦟ꧀ꦝꦶꦪ, ꦱꦤ꧀ꦣꦴꦪ ꦨꦴꦱꦶꦠꦁ – ‘ꦨꦹꦤꦲꦸ ꦱꦩꦟꦺꦴ ꦒꦺꦴꦠꦩꦺꦴ’’’ꦠꦶ? ‘‘ꦌꦠꦢꦺꦮ ꦑꦺꦴ ꦥꦤ ꦩꦺ, ꦨꦺꦴ ꦒꦺꦴꦠꦩ, ꦱꦤ꧀ꦣꦴꦪ ꦨꦴꦱꦶꦠꦁ – ‘ꦨꦹꦤꦲꦸ ꦱꦩꦟꦺꦴ ꦒꦺꦴꦠꦩꦺꦴ’ꦠꦶ. ꦠꦁ ꦏꦶꦱ꧀ꦱ ꦲꦺꦠꦸ? ꦌꦮꦚ꧀ꦲꦶ ꦤꦺꦴ ꦱꦸꦠ꧀ꦠꦺ ꦎꦕꦫꦠꦷ’’ꦠꦶ. ‘‘ꦏꦴꦪꦺꦴ ꦑꦺꦴ, ꦩꦴꦒꦟ꧀ꦝꦶꦪ, ꦦꦺꦴꦛ꧀ꦜꦧ꧀ꦧꦴꦫꦴꦩꦺꦴ ꦦꦺꦴꦛ꧀ꦜꦧ꧀ꦧꦫꦠꦺꦴ…ꦥꦺ… ꦩꦤꦺꦴ ꦑꦺꦴ, ꦩꦴꦒꦟ꧀ꦝꦶꦪ, ꦣꦩ꧀ꦩꦴꦫꦴꦩꦺꦴ ꦣꦩ꧀ꦩꦫꦠꦺꦴ ꦣꦩ꧀ꦩꦱꦩ꧀ꦩꦸꦢꦶꦠꦺꦴ. ꦱꦺꦴ ꦠꦡꦴꦒꦠꦱ꧀ꦱ ꦢꦤ꧀ꦠꦺꦴ ꦒꦸꦠ꧀ꦠꦺꦴ ꦫꦏ꧀ꦑꦶꦠꦺꦴ ꦱꦁꦮꦸꦠꦺꦴ, ꦠꦱ꧀ꦱ ꦕ ꦱꦁꦮꦫꦴꦪ ꦣꦩ꧀ꦩꦁ ꦢꦺꦱꦺꦠꦶ. ꦆꦢꦁ ꦤꦸ ꦠꦺ ꦌꦠꦁ, ꦩꦴꦒꦟ꧀ꦝꦶꦪ, ꦱꦤ꧀ꦣꦴꦪ ꦨꦴꦱꦶꦠꦁ – ‘ꦨꦹꦤꦲꦸ ꦱꦩꦟꦺꦴ ꦒꦺꦴꦠꦩꦺꦴ’’’ꦠꦶ? ‘‘ꦌꦠꦢꦺꦮ ꦑꦺꦴ ꦥꦤ ꦩꦺ, ꦨꦺꦴ ꦒꦺꦴꦠꦩ, ꦱꦤ꧀ꦣꦴꦪ ꦨꦴꦱꦶꦠꦁ – ‘ꦨꦹꦤꦲꦸ ꦱꦩꦟꦺꦴ ꦒꦺꦴꦠꦩꦺꦴ’ꦠꦶ. ꦠꦁ ꦏꦶꦱ꧀ꦱ ꦲꦺꦠꦸ? ꦌꦮꦚ꧀ꦲꦶ ꦤꦺꦴ ꦱꦸꦠ꧀ꦠꦺ ꦎꦕꦫꦠꦷ’’ꦠꦶ.

꧒꧑꧐. ‘‘ꦠꦁ ꦏꦶꦁ ꦩꦚ꧀ꦚꦱꦶ, ꦩꦴꦒꦟ꧀ꦝꦶꦪ – ‘ꦆꦣꦺꦏꦕ꧀ꦕꦺꦴ ꦕꦏ꧀ꦑꦸꦮꦶꦚ꧀ꦚꦺꦪ꧀ꦪꦺꦲꦶ ꦫꦹꦥꦺꦲꦶ ꦥꦫꦶꦕꦴꦫꦶꦠꦥꦸꦧ꧀ꦧꦺꦴ ꦄꦱ꧀ꦱ ꦆꦛ꧀ꦜꦺꦲꦶ ꦏꦤ꧀ꦠꦺꦲꦶ ꦩꦤꦴꦥꦺꦲꦶ ꦥꦶꦪꦫꦹꦥꦺꦲꦶ ꦏꦴꦩꦹꦥꦱꦁꦲꦶꦠꦺꦲꦶ ꦫꦗꦤꦷꦪꦺꦲꦶ, ꦱꦺꦴ ꦄꦥꦫꦺꦤ ꦱꦩꦪꦺꦤ ꦫꦹꦥꦴꦤꦁꦪꦺꦮ ꦱꦩꦸꦢꦪꦚ꧀ꦕ ꦄꦠ꧀ꦡꦔ꧀ꦒꦩꦚ꧀ꦕ ꦄꦱ꧀ꦱꦴꦢꦚ꧀ꦕ ꦄꦴꦢꦷꦤꦮꦚ꧀ꦕ ꦤꦶꦱ꧀ꦱꦫꦟꦚ꧀ꦕ ꦪꦡꦴꦨꦹꦠꦁ ꦮꦶꦢꦶꦠ꧀ꦮꦴ ꦫꦹꦥꦠꦟ꧀ꦲꦁ ꦥꦲꦴꦪ ꦫꦹꦥꦥꦫꦶꦭ꦳ꦴꦲꦁ ꦥꦛꦶꦮꦶꦤꦺꦴꦢꦺꦠ꧀ꦮꦴ ꦮꦶꦒꦠꦥꦶꦥꦴꦱꦺꦴ ꦄꦗ꧀ꦙꦠ꧀ꦠꦁ ꦮꦹꦥꦱꦤ꧀ꦠꦕꦶꦠ꧀ꦠꦺꦴ ꦮꦶꦲꦫꦺꦪ꧀ꦪ. ꦆꦩꦱ꧀ꦱ ꦥꦤ ꦠꦺ, ꦩꦴꦒꦟ꧀ꦝꦶꦪ, ꦏꦶꦩꦱ꧀ꦱ ꦮꦕꦤꦷꦪ’’’ꦤ꧀ꦠꦶ? ‘‘ꦤ ꦏꦶꦚ꧀ꦕꦶ, ꦨꦺꦴ ꦒꦺꦴꦠꦩ’’. ‘‘ꦠꦁ ꦏꦶꦁ ꦩꦚ꧀ꦚꦱꦶ, ꦩꦴꦒꦟ꧀ꦝꦶꦪ – ‘ꦆꦣꦺꦏꦕ꧀ꦕꦺꦴ ꦱꦺꦴꦠꦮꦶꦚ꧀ꦚꦺꦪ꧀ꦪꦺꦲꦶ ꦱꦢ꧀ꦢꦺꦲꦶ…ꦥꦺ… ꦓꦴꦤꦮꦶꦚ꧀ꦚꦺꦪ꧀ꦪꦺꦲꦶ ꦒꦤ꧀ꦣꦺꦲꦶ… ꦗꦶꦮ꧀ꦲꦴꦮꦶꦚ꧀ꦚꦺꦪ꧀ꦪꦺꦲꦶ ꦫꦱꦺꦲꦶ… ꦏꦴꦪꦮꦶꦚ꧀ꦚꦺꦪ꧀ꦪꦺꦲꦶ ꦦꦺꦴꦛ꧀ꦜꦧ꧀ꦧꦺꦲꦶ ꦥꦫꦶꦕꦴꦫꦶꦠꦥꦸꦧ꧀ꦧꦺꦴ ꦄꦱ꧀ꦱ ꦆꦛ꧀ꦜꦺꦲꦶ ꦏꦤ꧀ꦠꦺꦲꦶ ꦩꦤꦴꦥꦺꦲꦶ ꦥꦶꦪꦫꦹꦥꦺꦲꦶ ꦏꦴꦩꦹꦥꦱꦁꦲꦶꦠꦺꦲꦶ ꦫꦗꦤꦷꦪꦺꦲꦶ, ꦱꦺꦴ ꦄꦥꦫꦺꦤ ꦱꦩꦪꦺꦤ ꦦꦺꦴꦛ꧀ꦜꦧ꧀ꦧꦴꦤꦁꦪꦺꦮ ꦱꦩꦸꦢꦪꦚ꧀ꦕ ꦄꦠ꧀ꦡꦔ꧀ꦒꦩꦚ꧀ꦕ ꦄꦱ꧀ꦱꦴꦢꦚ꧀ꦕ ꦄꦴꦢꦷꦤꦮꦚ꧀ꦕ ꦤꦶꦱ꧀ꦱꦫꦟꦚ꧀ꦕ ꦪꦡꦴꦨꦹꦠꦁ ꦮꦶꦢꦶꦠ꧀ꦮꦴ ꦦꦺꦴꦛ꧀ꦜꦧ꧀ꦧꦠꦟ꧀ꦲꦁ ꦥꦲꦴꦪ ꦦꦺꦴꦛ꧀ꦜꦧ꧀ꦧꦥꦫꦶꦭ꦳ꦴꦲꦁ ꦥꦛꦶꦮꦶꦤꦺꦴꦢꦺꦠ꧀ꦮꦴ ꦮꦶꦒꦠꦥꦶꦥꦴꦱꦺꦴ ꦄꦗ꧀ꦙꦠ꧀ꦠꦁ ꦮꦹꦥꦱꦤ꧀ꦠꦕꦶꦠ꧀ꦠꦺꦴ ꦮꦶꦲꦫꦺꦪ꧀ꦪ. ꦆꦩꦱ꧀ꦱ ꦥꦤ ꦠꦺ, ꦩꦴꦒꦟ꧀ꦝꦶꦪ, ꦏꦶꦩꦱ꧀ꦱ ꦮꦕꦤꦷꦪ’’’ꦤ꧀ꦠꦶ? ‘‘ꦤ ꦏꦶꦚ꧀ꦕꦶ, ꦨꦺꦴ ꦒꦺꦴꦠꦩ’’.

꧒꧑꧑. ‘‘ꦄꦲꦁ ꦑꦺꦴ ꦥꦤ, ꦩꦴꦒꦟ꧀ꦝꦶꦪ, ꦥꦸꦧ꧀ꦧꦺ ꦄꦒꦴꦫꦶꦪꦨꦹꦠꦺꦴ ꦱꦩꦴꦤꦺꦴ ꦥꦚ꧀ꦕꦲꦶ ꦏꦴꦩꦒꦸꦟꦺꦲꦶ ꦱꦩꦥ꧀ꦥꦶꦠꦺꦴ ꦱꦩꦔ꧀ꦒꦷꦨꦹꦠꦺꦴ ꦥꦫꦶꦕꦴꦫꦺꦱꦶꦁ ꦕꦏ꧀ꦑꦸꦮꦶꦚ꧀ꦚꦺꦪ꧀ꦪꦺꦲꦶ ꦫꦹꦥꦺꦲꦶ ꦆꦛ꧀ꦜꦺꦲꦶ ꦏꦤ꧀ꦠꦺꦲꦶ ꦩꦤꦴꦥꦺꦲꦶ ꦥꦶꦪꦫꦹꦥꦺꦲꦶ ꦏꦴꦩꦹꦥꦱꦁꦲꦶꦠꦺꦲꦶ ꦫꦗꦤꦷꦪꦺꦲꦶ, ꦱꦺꦴꦠꦮꦶꦚ꧀ꦚꦺꦪ꧀ꦪꦺꦲꦶ ꦱꦢ꧀ꦢꦺꦲꦶ…ꦥꦺ… ꦓꦴꦤꦮꦶꦚ꧀ꦚꦺꦪ꧀ꦪꦺꦲꦶ ꦒꦤ꧀ꦣꦺꦲꦶ… ꦗꦶꦮ꧀ꦲꦴꦮꦶꦚ꧀ꦚꦺꦪ꧀ꦪꦺꦲꦶ ꦫꦱꦺꦲꦶ… ꦏꦴꦪꦮꦶꦚ꧀ꦚꦺꦪ꧀ꦪꦺꦲꦶ ꦦꦺꦴꦛ꧀ꦜꦧ꧀ꦧꦺꦲꦶ ꦆꦛ꧀ꦜꦺꦲꦶ ꦏꦤ꧀ꦠꦺꦲꦶ ꦩꦤꦴꦥꦺꦲꦶ ꦥꦶꦪꦫꦹꦥꦺꦲꦶ ꦏꦴꦩꦹꦥꦱꦁꦲꦶꦠꦺꦲꦶ ꦫꦗꦤꦷꦪꦺꦲꦶ. ꦠꦱ꧀ꦱ ꦩꦪ꧀ꦲꦁ, ꦩꦴꦒꦟ꧀ꦝꦶꦪ, ꦠꦪꦺꦴ ꦥꦴꦱꦴꦢꦴ ꦄꦲꦺꦱꦸꦁ – ꦌꦏꦺꦴ ꦮꦱ꧀ꦱꦶꦏꦺꦴ, ꦌꦏꦺꦴ ꦲꦺꦩꦤ꧀ꦠꦶꦏꦺꦴ, ꦌꦏꦺꦴ ꦒꦶꦩ꧀ꦲꦶꦏꦺꦴ. ꦱꦺꦴ ꦑꦺꦴ ꦄꦲꦁ, ꦩꦴꦒꦟ꧀ꦝꦶꦪ, ꦮꦱ꧀ꦱꦶꦏꦺ ꦥꦴꦱꦴꦢꦺ ꦮꦱ꧀ꦱꦶꦏꦺ ꦕꦠ꧀ꦠꦴꦫꦺꦴ [ꦮꦱ꧀ꦱꦶꦏꦺ ꦥꦴꦱꦴꦢꦺ ꦕꦠ꧀ꦠꦴꦫꦺꦴ (ꦱ꧀ꦪꦴ. ꦏꦁ.)] ꦩꦴꦱꦺ ꦤꦶꦥ꧀ꦥꦸꦫꦶꦱꦺꦲꦶ ꦠꦹꦫꦶꦪꦺꦲꦶ [ꦠꦸꦫꦶꦪꦺꦲꦶ (ꦱꦷ. ꦱ꧀ꦪꦴ. ꦏꦁ. ꦥꦷ.)] ꦥꦫꦶꦕꦴꦫꦪꦩꦴꦤꦺꦴ [ꦥꦫꦶꦕꦴꦫꦶꦪꦩꦴꦤꦺꦴ (ꦱꦧ꧀ꦧꦠ꧀ꦡ)] ꦤ ꦲꦺꦛ꧀ꦜꦴꦥꦴꦱꦴꦢꦁ ꦎꦫꦺꦴꦲꦴꦩꦶ. ꦱꦺꦴ ꦄꦥꦫꦺꦤ ꦱꦩꦪꦺꦤ ꦏꦴꦩꦴꦤꦁꦪꦺꦮ ꦱꦩꦸꦢꦪꦚ꧀ꦕ ꦄꦠ꧀ꦡꦔ꧀ꦒꦩꦚ꧀ꦕ ꦄꦱ꧀ꦱꦴꦢꦚ꧀ꦕ ꦄꦴꦢꦷꦤꦮꦚ꧀ꦕ ꦤꦶꦱ꧀ꦱꦫꦟꦚ꧀ꦕ ꦪꦡꦴꦨꦹꦠꦁ ꦮꦶꦢꦶꦠ꧀ꦮꦴ ꦏꦴꦩꦠꦟ꧀ꦲꦁ ꦥꦲꦴꦪ ꦏꦴꦩꦥꦫꦶꦭ꦳ꦴꦲꦁ ꦥꦛꦶꦮꦶꦤꦺꦴꦢꦺꦠ꧀ꦮꦴ ꦮꦶꦒꦠꦥꦶꦥꦴꦱꦺꦴ ꦄꦗ꧀ꦙꦠ꧀ꦠꦁ ꦮꦹꦥꦱꦤ꧀ꦠꦕꦶꦠ꧀ꦠꦺꦴ ꦮꦶꦲꦫꦴꦩꦶ. ꦱꦺꦴ ꦄꦚ꧀ꦚꦺ ꦱꦠ꧀ꦠꦺ ꦥꦱ꧀ꦱꦴꦩꦶ ꦏꦴꦩꦺꦱꦸ ꦄꦮꦷꦠꦫꦴꦒꦺ ꦏꦴꦩꦠꦟ꧀ꦲꦴꦲꦶ ꦑꦗ꧀ꦗꦩꦴꦤꦺ ꦏꦴꦩꦥꦫꦶꦭ꦳ꦴꦲꦺꦤ ꦥꦫꦶꦝꦪ꧀ꦲꦩꦴꦤꦺ ꦏꦴꦩꦺ ꦥꦛꦶꦱꦺꦮꦤ꧀ꦠꦺ. ꦱꦺꦴ ꦠꦺꦱꦁ ꦤ ꦥꦶꦲꦺꦩꦶ, ꦤ ꦠꦠ꧀ꦡ ꦄꦨꦶꦫꦩꦴꦩꦶ. ꦠꦁ ꦏꦶꦱ꧀ꦱ ꦲꦺꦠꦸ? ꦪꦴꦲꦪꦁ, ꦩꦴꦒꦟ꧀ꦝꦶꦪ, ꦫꦠꦶ, ꦄꦚ꧀ꦚꦠ꧀ꦫꦺꦮ ꦏꦴꦩꦺꦲꦶ ꦄꦚ꧀ꦚꦠ꧀ꦫ ꦄꦏꦸꦱꦭꦺꦲꦶ ꦣꦩ꧀ꦩꦺꦲꦶ – ꦄꦥꦶ ꦢꦶꦧ꧀ꦧꦁ ꦱꦸꦑꦁ ꦱꦩꦣꦶꦒꦪ꧀ꦲ ꦠꦶꦛ꧀ꦜꦠꦶ – ꦠꦴꦪ ꦫꦠꦶꦪꦴ ꦫꦩꦩꦴꦤꦺꦴ ꦲꦷꦤꦱ꧀ꦱ ꦤ ꦥꦶꦲꦺꦩꦶ, ꦤ ꦠꦠ꧀ꦡ ꦄꦨꦶꦫꦩꦴꦩꦶ.

꧒꧑꧒. ‘‘ꦱꦺꦪ꧀ꦪꦡꦴꦥꦶ, ꦩꦴꦒꦟ꧀ꦝꦶꦪ, ꦒꦲꦥꦠꦶ ꦮꦴ ꦒꦲꦥꦠꦶꦥꦸꦠ꧀ꦠꦺꦴ ꦮꦴ ꦄꦝ꧀ꦞꦺꦴ ꦩꦲꦢ꧀ꦣꦤꦺꦴ ꦩꦲꦴꦨꦺꦴꦒꦺꦴ ꦥꦚ꧀ꦕꦲꦶ ꦏꦴꦩꦒꦸꦟꦺꦲꦶ ꦱꦩꦥ꧀ꦥꦶꦠꦺꦴ ꦱꦩꦔ꧀ꦒꦷꦨꦹꦠꦺꦴ ꦥꦫꦶꦕꦴꦫꦺꦪ꧀ꦪ ꦕꦏ꧀ꦑꦸꦮꦶꦚ꧀ꦚꦺꦪ꧀ꦪꦺꦲꦶ ꦫꦹꦥꦺꦲꦶ…ꦥꦺ… ꦦꦺꦴꦛ꧀ꦜꦧ꧀ꦧꦺꦲꦶ ꦆꦛ꧀ꦜꦺꦲꦶ ꦏꦤ꧀ꦠꦺꦲꦶ ꦩꦤꦴꦥꦺꦲꦶ ꦥꦶꦪꦫꦹꦥꦺꦲꦶ ꦏꦴꦩꦹꦥꦱꦁꦲꦶꦠꦺꦲꦶ ꦫꦗꦤꦷꦪꦺꦲꦶ. ꦱꦺꦴ ꦏꦴꦪꦺꦤ ꦱꦸꦕꦫꦶꦠꦁ ꦕꦫꦶꦠ꧀ꦮꦴ ꦮꦴꦕꦴꦪ ꦱꦸꦕꦫꦶꦠꦁ ꦕꦫꦶꦠ꧀ꦮꦴ ꦩꦤꦱꦴ ꦱꦸꦕꦫꦶꦠꦁ ꦕꦫꦶꦠ꧀ꦮꦴ ꦏꦴꦪꦱ꧀ꦱ ꦨꦺꦢꦴ ꦥꦫꦁ ꦩꦫꦟꦴ ꦱꦸꦒꦠꦶꦁ ꦱꦒ꧀ꦒꦁ ꦭꦺꦴꦏꦁ ꦈꦥꦥꦗ꧀ꦗꦺꦪ꧀ꦪ ꦢꦺꦮꦴꦤꦁ ꦠꦴꦮꦠꦶꦁꦱꦴꦤꦁ ꦱꦲꦧ꧀ꦪꦠꦁ. ꦱꦺꦴ ꦠꦠ꧀ꦡ ꦤꦤ꧀ꦢꦤꦺ ꦮꦤꦺ ꦄꦕ꧀ꦖꦫꦴꦱꦔ꧀ꦓꦥꦫꦶꦮꦸꦠꦺꦴ ꦢꦶꦧ꧀ꦧꦺꦲꦶ ꦥꦚ꧀ꦕꦲꦶ ꦏꦴꦩꦒꦸꦟꦺꦲꦶ ꦱꦩꦥ꧀ꦥꦶꦠꦺꦴ ꦱꦩꦔ꧀ꦒꦷꦨꦹꦠꦺꦴ ꦥꦫꦶꦕꦴꦫꦺꦪ꧀ꦪ. ꦱꦺꦴ ꦥꦱ꧀ꦱꦺꦪ꧀ꦪ ꦒꦲꦥꦠꦶꦁ ꦮꦴ ꦒꦲꦥꦠꦶꦥꦸꦠ꧀ꦠꦁ ꦮꦴ ꦥꦚ꧀ꦕꦲꦶ ꦏꦴꦩꦒꦸꦟꦺꦲꦶ ꦱꦩꦥ꧀ꦥꦶꦠꦁ ꦱꦩꦔ꧀ꦒꦷꦨꦹꦠꦁ ꦥꦫꦶꦕꦴꦫꦪꦩꦴꦤꦁ.

‘‘ꦠꦁ ꦏꦶꦁ ꦩꦚ꧀ꦚꦱꦶ, ꦩꦴꦒꦟ꧀ꦝꦶꦪ, ꦄꦥꦶ ꦤꦸ ꦱꦺꦴ ꦢꦺꦮꦥꦸꦠ꧀ꦠꦺꦴ ꦤꦤ꧀ꦢꦤꦺ ꦮꦤꦺ ꦄꦕ꧀ꦖꦫꦴꦱꦔ꧀ꦓꦥꦫꦶꦮꦸꦠꦺꦴ ꦢꦶꦧ꧀ꦧꦺꦲꦶ ꦥꦚ꧀ꦕꦲꦶ ꦏꦴꦩꦒꦸꦟꦺꦲꦶ ꦱꦩꦥ꧀ꦥꦶꦠꦺꦴ ꦱꦩꦔ꧀ꦒꦷꦨꦹꦠꦺꦴ ꦥꦫꦶꦕꦴꦫꦪꦩꦴꦤꦺꦴ ꦄꦩꦸꦱ꧀ꦱ ꦒꦲꦥꦠꦶꦱ꧀ꦱ ꦮꦴ ꦒꦲꦥꦠꦶꦥꦸꦠ꧀ꦠꦱ꧀ꦱ ꦮꦴ ꦥꦶꦲꦺꦪ꧀ꦪ, ꦩꦴꦤꦸꦱꦏꦴꦤꦁ ꦮꦴ ꦥꦚ꧀ꦕꦤ꧀ꦤꦁ ꦏꦴꦩꦒꦸꦟꦴꦤꦁ ꦩꦴꦤꦸꦱꦏꦺꦲꦶ ꦮꦴ ꦏꦴꦩꦺꦲꦶ ꦄꦴꦮꦛ꧀ꦛꦺꦪ꧀ꦪꦴ’’ꦠꦶ? ‘‘ꦤꦺꦴ ꦲꦶꦢꦁ, ꦨꦺꦴ ꦒꦺꦴꦠꦩ’’. ꦠꦁ ꦏꦶꦱ꧀ꦱ ꦲꦺꦠꦸ? ꦩꦴꦤꦸꦱꦏꦺꦲꦶ, ꦨꦺꦴ ꦒꦺꦴꦠꦩ, ꦏꦴꦩꦺꦲꦶ ꦢꦶꦧ꧀ꦧꦏꦴꦩꦴ ꦄꦨꦶꦏ꧀ꦏꦤ꧀ꦠꦠꦫꦴ ꦕ ꦥꦟꦷꦠꦠꦫꦴ ꦕꦴ’’ꦠꦶ. ‘‘ꦌꦮꦩꦺꦮ ꦑꦺꦴ ꦄꦲꦁ, ꦩꦴꦒꦟ꧀ꦝꦶꦪ, ꦥꦸꦧ꧀ꦧꦺ ꦄꦒꦴꦫꦶꦪꦨꦹꦠꦺꦴ ꦱꦩꦴꦤꦺꦴ ꦥꦚ꧀ꦕꦲꦶ ꦏꦴꦩꦒꦸꦟꦺꦲꦶ ꦱꦩꦥ꧀ꦥꦶꦠꦺꦴ ꦱꦩꦔ꧀ꦒꦷꦨꦹꦠꦺꦴ ꦥꦫꦶꦕꦴꦫꦺꦱꦶꦁ ꦕꦏ꧀ꦑꦸꦮꦶꦚ꧀ꦚꦺꦪ꧀ꦪꦺꦲꦶ ꦫꦹꦥꦺꦲꦶ ꦆꦛ꧀ꦜꦺꦲꦶ ꦏꦤ꧀ꦠꦺꦲꦶ ꦩꦤꦴꦥꦺꦲꦶ ꦥꦶꦪꦫꦹꦥꦺꦲꦶ ꦏꦴꦩꦹꦥꦱꦁꦲꦶꦠꦺꦲꦶ ꦫꦗꦤꦷꦪꦺꦲꦶ, ꦱꦺꦴꦠꦮꦶꦚ꧀ꦚꦺꦪ꧀ꦪꦺꦲꦶ ꦱꦢ꧀ꦢꦺꦲꦶ…ꦥꦺ… ꦓꦴꦤꦮꦶꦚ꧀ꦚꦺꦪ꧀ꦪꦺꦲꦶ ꦒꦤ꧀ꦣꦺꦲꦶ… ꦗꦶꦮ꧀ꦲꦴꦮꦶꦚ꧀ꦚꦺꦪ꧀ꦪꦺꦲꦶ ꦫꦱꦺꦲꦶ… ꦏꦴꦪꦮꦶꦚ꧀ꦚꦺꦪ꧀ꦪꦺꦲꦶ ꦦꦺꦴꦛ꧀ꦜꦧ꧀ꦧꦺꦲꦶ ꦆꦛ꧀ꦜꦺꦲꦶ ꦏꦤ꧀ꦠꦺꦲꦶ ꦩꦤꦴꦥꦺꦲꦶ ꦥꦶꦪꦫꦹꦥꦺꦲꦶ ꦏꦴꦩꦹꦥꦱꦁꦲꦶꦠꦺꦲꦶ ꦫꦗꦤꦷꦪꦺꦲꦶ. ꦱꦺꦴ ꦄꦥꦫꦺꦤ ꦱꦩꦪꦺꦤ ꦏꦴꦩꦴꦤꦁꦪꦺꦮ ꦱꦩꦸꦢꦪꦚ꧀ꦕ ꦄꦠ꧀ꦡꦔ꧀ꦒꦩꦚ꧀ꦕ ꦄꦱ꧀ꦱꦴꦢꦚ꧀ꦕ ꦄꦴꦢꦷꦤꦮꦚ꧀ꦕ ꦤꦶꦱ꧀ꦱꦫꦟꦚ꧀ꦕ ꦪꦡꦴꦨꦹꦠꦁ ꦮꦶꦢꦶꦠ꧀ꦮꦴ ꦏꦴꦩꦠꦟ꧀ꦲꦁ ꦥꦲꦴꦪ ꦏꦴꦩꦥꦫꦶꦭ꦳ꦴꦲꦁ ꦥꦛꦶꦮꦶꦤꦺꦴꦢꦺꦠ꧀ꦮꦴ ꦮꦶꦒꦠꦥꦶꦥꦴꦱꦺꦴ ꦄꦗ꧀ꦙꦠ꧀ꦠꦁ ꦮꦹꦥꦱꦤ꧀ꦠꦕꦶꦠ꧀ꦠꦺꦴ ꦮꦶꦲꦫꦴꦩꦶ. ꦱꦺꦴ ꦄꦚ꧀ꦚꦺ ꦱꦠ꧀ꦠꦺ ꦥꦱ꧀ꦱꦴꦩꦶ ꦏꦴꦩꦺꦱꦸ ꦄꦮꦷꦠꦫꦴꦒꦺ ꦏꦴꦩꦠꦟ꧀ꦲꦴꦲꦶ ꦑꦗ꧀ꦗꦩꦴꦤꦺ ꦏꦴꦩꦥꦫꦶꦭ꦳ꦴꦲꦺꦤ ꦥꦫꦶꦝꦪ꧀ꦲꦩꦴꦤꦺ ꦏꦴꦩꦺ ꦥꦛꦶꦱꦺꦮꦤ꧀ꦠꦺ, ꦱꦺꦴ ꦠꦺꦱꦁ ꦤ ꦥꦶꦲꦺꦩꦶ, ꦤ ꦠꦠ꧀ꦡ ꦄꦨꦶꦫꦩꦴꦩꦶ. ꦠꦁ ꦏꦶꦱ꧀ꦱ ꦲꦺꦠꦸ? ꦪꦴꦲꦪꦁ, ꦩꦴꦒꦟ꧀ꦝꦶꦪ, ꦫꦠꦶ ꦄꦚ꧀ꦚꦠ꧀ꦫꦺꦮ ꦏꦴꦩꦺꦲꦶ ꦄꦚ꧀ꦚꦠ꧀ꦫ ꦄꦏꦸꦱꦭꦺꦲꦶ ꦣꦩ꧀ꦩꦺꦲꦶ – ꦄꦥꦶ ꦢꦶꦧ꧀ꦧꦁ ꦱꦸꦑꦁ ꦱꦩꦣꦶꦒꦪ꧀ꦲ ꦠꦶꦛ꧀ꦜꦠꦶ – ꦠꦴꦪ ꦫꦠꦶꦪꦴ ꦫꦩꦩꦴꦤꦺꦴ ꦲꦷꦤꦱ꧀ꦱ ꦤ ꦥꦶꦲꦺꦩꦶ, ꦤ ꦠꦠ꧀ꦡ ꦄꦨꦶꦫꦩꦴꦩꦶ.

꧒꧑꧓. ‘‘ꦱꦺꦪ꧀ꦪꦡꦴꦥꦶ, ꦩꦴꦒꦟ꧀ꦝꦶꦪ, ꦏꦸꦛ꧀ꦜꦷ ꦥꦸꦫꦶꦱꦺꦴ ꦄꦫꦸꦒꦠ꧀ꦠꦺꦴ ꦥꦏ꧀ꦏꦒꦠ꧀ꦠꦺꦴ ꦏꦶꦩꦷꦲꦶ ꦑꦗ꧀ꦗꦩꦴꦤꦺꦴ ꦤꦑꦺꦲꦶ ꦮꦟꦩꦸꦑꦴꦤꦶ ꦮꦶꦥ꧀ꦥꦠꦕ꧀ꦖꦩꦴꦤꦺꦴ ꦄꦔ꧀ꦒꦴꦫꦏꦴꦱꦸꦪꦴ ꦏꦴꦪꦁ ꦥꦫꦶꦠꦴꦥꦺꦪ꧀ꦪ. ꦠꦱ꧀ꦱ ꦩꦶꦠ꧀ꦠꦴꦩꦕ꧀ꦕꦴ ꦚꦴꦠꦶꦱꦴꦭꦺꦴꦲꦶꦠꦴ ꦨꦶꦱꦏ꧀ꦏꦁ ꦱꦭ꧀ꦭꦏꦠ꧀ꦠꦁ ꦈꦥꦛ꧀ꦜꦴꦥꦺꦪ꧀ꦪꦸꦁ. ꦠꦱ꧀ꦱ ꦱꦺꦴ ꦨꦶꦱꦏ꧀ꦏꦺꦴ ꦱꦭ꧀ꦭꦏꦠ꧀ꦠꦺꦴ ꦨꦺꦱꦗ꧀ꦗꦁ ꦏꦫꦺꦪ꧀ꦪ. ꦱꦺꦴ ꦠꦁ ꦨꦺꦱꦗ꧀ꦗꦁ ꦄꦴꦒꦩ꧀ꦩ ꦏꦸꦛ꧀ꦜꦺꦲꦶ ꦥꦫꦶꦩꦸꦕ꧀ꦕꦺꦪ꧀ꦪ, ꦄꦫꦺꦴꦒꦺꦴ ꦄꦱ꧀ꦱ ꦱꦸꦑꦷ ꦱꦺꦫꦷ ꦱꦪꦁꦮꦱꦷ ꦪꦺꦤ ꦏꦴꦩꦁ ꦒꦩꦺꦴ. ꦱꦺꦴ ꦄꦚ꧀ꦚꦁ ꦏꦸꦛ꧀ꦜꦶꦁ ꦥꦸꦫꦶꦱꦁ ꦥꦱ꧀ꦱꦺꦪ꧀ꦪ ꦄꦫꦸꦒꦠ꧀ꦠꦁ ꦥꦏ꧀ꦏꦒꦠ꧀ꦠꦁ ꦏꦶꦩꦷꦲꦶ ꦑꦗ꧀ꦗꦩꦴꦤꦁ ꦤꦑꦺꦲꦶ ꦮꦟꦩꦸꦑꦴꦤꦶ ꦮꦶꦥ꧀ꦥꦠꦕ꧀ꦖꦩꦴꦤꦁ ꦄꦔ꧀ꦒꦴꦫꦏꦴꦱꦸꦪꦴ ꦏꦴꦪꦁ ꦥꦫꦶꦠꦴꦥꦺꦤ꧀ꦠꦁ.

‘‘ꦠꦁ ꦏꦶꦁ ꦩꦚ꧀ꦚꦱꦶ, ꦩꦴꦒꦟ꧀ꦝꦶꦪ, ꦄꦥꦶ ꦤꦸ ꦱꦺꦴ ꦥꦸꦫꦶꦱꦺꦴ ꦄꦩꦸꦱ꧀ꦱ ꦏꦸꦛ꧀ꦜꦶꦱ꧀ꦱ ꦥꦸꦫꦶꦱꦱ꧀ꦱ ꦥꦶꦲꦺꦪ꧀ꦪ ꦄꦔ꧀ꦒꦴꦫꦏꦴꦱꦸꦪꦴ ꦮꦴ ꦨꦺꦱꦗ꧀ꦗꦁ ꦥꦛꦶꦱꦺꦮꦤꦴꦪ ꦮꦴ’’ꦠꦶ? ‘‘ꦤꦺꦴ ꦲꦶꦢꦁ, ꦨꦺꦴ ꦒꦺꦴꦠꦩ. ꦠꦁ ꦏꦶꦱ꧀ꦱ ꦲꦺꦠꦸ? ꦫꦺꦴꦒꦺ ꦲꦶ, ꦨꦺꦴ ꦒꦺꦴꦠꦩ, ꦱꦠꦶ ꦨꦺꦱꦗ꧀ꦗꦺꦤ ꦏꦫꦟꦷꦪꦁ ꦲꦺꦴꦠꦶ, ꦫꦺꦴꦒꦺ ꦄꦱꦠꦶ ꦤ ꦨꦺꦱꦗ꧀ꦗꦺꦤ ꦏꦫꦟꦷꦪꦁ ꦲꦺꦴꦠꦷ’’ꦠꦶ. ‘‘ꦌꦮꦩꦺꦮ ꦑꦺꦴ ꦄꦲꦁ, ꦩꦴꦒꦟ꧀ꦝꦶꦪ, ꦥꦸꦧ꧀ꦧꦺ ꦄꦒꦴꦫꦶꦪꦨꦹꦠꦺꦴ ꦱꦩꦴꦤꦺꦴ ꦥꦚ꧀ꦕꦲꦶ ꦏꦴꦩꦒꦸꦟꦺꦲꦶ ꦱꦩꦥ꧀ꦥꦶꦠꦺꦴ ꦱꦩꦔ꧀ꦒꦷꦨꦹꦠꦺꦴ ꦥꦫꦶꦕꦴꦫꦺꦱꦶꦁ, ꦕꦏ꧀ꦑꦸꦮꦶꦚ꧀ꦚꦺꦪ꧀ꦪꦺꦲꦶ ꦫꦹꦥꦺꦲꦶ ꦆꦛ꧀ꦜꦺꦲꦶ ꦏꦤ꧀ꦠꦺꦲꦶ ꦩꦤꦴꦥꦺꦲꦶ ꦥꦶꦪꦫꦹꦥꦺꦲꦶ ꦏꦴꦩꦹꦥꦱꦁꦲꦶꦠꦺꦲꦶ ꦫꦗꦤꦷꦪꦺꦲꦶ, ꦱꦺꦴꦠꦮꦶꦚ꧀ꦚꦺꦪ꧀ꦪꦺꦲꦶ ꦱꦢ꧀ꦢꦺꦲꦶ…ꦥꦺ… ꦓꦴꦤꦮꦶꦚ꧀ꦚꦺꦪ꧀ꦪꦺꦲꦶ ꦒꦤ꧀ꦣꦺꦲꦶ… ꦗꦶꦮ꧀ꦲꦴꦮꦶꦚ꧀ꦚꦺꦪ꧀ꦪꦺꦲꦶ ꦫꦱꦺꦲꦶ… ꦏꦴꦪꦮꦶꦚ꧀ꦚꦺꦪ꧀ꦪꦺꦲꦶ ꦦꦺꦴꦛ꧀ꦜꦧ꧀ꦧꦺꦲꦶ ꦆꦛ꧀ꦜꦺꦲꦶ ꦏꦤ꧀ꦠꦺꦲꦶ ꦩꦤꦴꦥꦺꦲꦶ ꦥꦶꦪꦫꦹꦥꦺꦲꦶ ꦏꦴꦩꦹꦥꦱꦁꦲꦶꦠꦺꦲꦶ ꦫꦗꦤꦷꦪꦺꦲꦶ. ꦱꦺꦴ ꦄꦥꦫꦺꦤ ꦱꦩꦪꦺꦤ ꦏꦴꦩꦴꦤꦁꦪꦺꦮ ꦱꦩꦸꦢꦪꦚ꧀ꦕ ꦄꦠ꧀ꦡꦔ꧀ꦒꦩꦚ꧀ꦕ ꦄꦱ꧀ꦱꦴꦢꦚ꧀ꦕ ꦄꦴꦢꦷꦤꦮꦚ꧀ꦕ ꦤꦶꦱ꧀ꦱꦫꦟꦚ꧀ꦕ ꦪꦡꦴꦨꦹꦠꦁ ꦮꦶꦢꦶꦠ꧀ꦮꦴ ꦏꦴꦩꦠꦟ꧀ꦲꦁ ꦥꦲꦴꦪ ꦏꦴꦩꦥꦫꦶꦭ꦳ꦴꦲꦁ ꦥꦛꦶꦮꦶꦤꦺꦴꦢꦺꦠ꧀ꦮꦴ ꦮꦶꦒꦠꦥꦶꦥꦴꦱꦺꦴ ꦄꦗ꧀ꦙꦠ꧀ꦠꦁ ꦮꦹꦥꦱꦤ꧀ꦠꦕꦶꦠ꧀ꦠꦺꦴ ꦮꦶꦲꦫꦴꦩꦶ. ꦱꦺꦴ ꦄꦚ꧀ꦚꦺ ꦱꦠ꧀ꦠꦺ ꦥꦱ꧀ꦱꦴꦩꦶ ꦏꦴꦩꦺꦱꦸ ꦄꦮꦷꦠꦫꦴꦒꦺ ꦏꦴꦩꦠꦟ꧀ꦲꦴꦲꦶ ꦑꦗ꧀ꦗꦩꦴꦤꦺ ꦏꦴꦩꦥꦫꦶꦭ꦳ꦴꦲꦺꦤ ꦥꦫꦶꦝꦪ꧀ꦲꦩꦴꦤꦺ ꦏꦴꦩꦺ ꦥꦛꦶꦱꦺꦮꦤ꧀ꦠꦺ. ꦱꦺꦴ ꦠꦺꦱꦁ ꦤ ꦥꦶꦲꦺꦩꦶ, ꦤ ꦠꦠ꧀ꦡ ꦄꦨꦶꦫꦩꦴꦩꦶ. ꦠꦁ ꦏꦶꦱ꧀ꦱ ꦲꦺꦠꦸ? ꦪꦴꦲꦪꦁ, ꦩꦴꦒꦟ꧀ꦝꦶꦪ, ꦫꦠꦶ, ꦄꦚ꧀ꦚꦠ꧀ꦫꦺꦮ ꦏꦴꦩꦺꦲꦶ ꦄꦚ꧀ꦚꦠ꧀ꦫ ꦄꦏꦸꦱꦭꦺꦲꦶ ꦣꦩ꧀ꦩꦺꦲꦶ – ꦄꦥꦶ ꦢꦶꦧ꧀ꦧꦁ ꦱꦸꦑꦁ ꦱꦩꦣꦶꦒꦪ꧀ꦲ ꦠꦶꦛ꧀ꦜꦠꦶ – ꦠꦴꦪ ꦫꦠꦶꦪꦴ ꦫꦩꦩꦴꦤꦺꦴ ꦲꦷꦤꦱ꧀ꦱ ꦤ ꦥꦶꦲꦺꦩꦶ, ꦤ ꦠꦠ꧀ꦡ ꦄꦨꦶꦫꦩꦴꦩꦶ.

꧒꧑꧔. ‘‘ꦱꦺꦪ꧀ꦪꦡꦴꦥꦶ, ꦩꦴꦒꦟ꧀ꦝꦶꦪ, ꦏꦸꦛ꧀ꦜꦷ ꦥꦸꦫꦶꦱꦺꦴ ꦄꦫꦸꦒꦠ꧀ꦠꦺꦴ ꦥꦏ꧀ꦏꦒꦠ꧀ꦠꦺꦴ ꦏꦶꦩꦷꦲꦶ ꦑꦗ꧀ꦗꦩꦴꦤꦺꦴ ꦤꦑꦺꦲꦶ ꦮꦟꦩꦸꦑꦴꦤꦶ ꦮꦶꦥ꧀ꦥꦠꦕ꧀ꦖꦩꦴꦤꦺꦴ ꦄꦔ꧀ꦒꦴꦫꦏꦴꦱꦸꦪꦴ ꦏꦴꦪꦁ ꦥꦫꦶꦠꦴꦥꦺꦪ꧀ꦪ. ꦠꦱ꧀ꦱ ꦩꦶꦠ꧀ꦠꦴꦩꦕ꧀ꦕꦴ ꦚꦴꦠꦶꦱꦴꦭꦺꦴꦲꦶꦠꦴ ꦨꦶꦱꦏ꧀ꦏꦁ ꦱꦭ꧀ꦭꦏꦠ꧀ꦠꦁ ꦈꦥꦛ꧀ꦜꦴꦥꦺꦪ꧀ꦪꦸꦁ. ꦠꦱ꧀ꦱ ꦱꦺꦴ ꦨꦶꦱꦏ꧀ꦏꦺꦴ ꦱꦭ꧀ꦭꦏꦠ꧀ꦠꦺꦴ ꦨꦺꦱꦗ꧀ꦗꦁ ꦏꦫꦺꦪ꧀ꦪ. ꦱꦺꦴ ꦠꦁ ꦨꦺꦱꦗ꧀ꦗꦁ ꦄꦴꦒꦩ꧀ꦩ ꦏꦸꦛ꧀ꦜꦺꦲꦶ ꦥꦫꦶꦩꦸꦕ꧀ꦕꦺꦪ꧀ꦪ, ꦄꦫꦺꦴꦒꦺꦴ ꦄꦱ꧀ꦱ ꦱꦸꦑꦷ ꦱꦺꦫꦷ ꦱꦪꦁꦮꦱꦷ ꦪꦺꦤ ꦏꦴꦩꦁ ꦒꦩꦺꦴ. ꦠꦩꦺꦤꦁ ꦢ꧀ꦮꦺ ꦧꦭꦮꦤ꧀ꦠꦺꦴ ꦥꦸꦫꦶꦱꦴ ꦤꦴꦤꦴꦧꦴꦲꦴꦱꦸ ꦒꦲꦺꦠ꧀ꦮꦴ ꦄꦔ꧀ꦒꦴꦫꦏꦴꦱꦸꦁ ꦈꦥꦏꦝ꧀ꦞꦺꦪ꧀ꦪꦸꦁ.

‘‘ꦠꦁ ꦏꦶꦁ ꦩꦚ꧀ꦚꦱꦶ, ꦩꦴꦒꦟ꧀ꦝꦶꦪ, ꦄꦥꦶ ꦤꦸ ꦱꦺꦴ ꦥꦸꦫꦶꦱꦺꦴ ꦆꦠꦶ ꦕꦶꦠꦶꦕꦺꦮ ꦏꦴꦪꦁ ꦱꦤ꧀ꦤꦴꦩꦺꦪ꧀ꦪꦴ’’ꦠꦶ? ‘‘ꦌꦮꦁ, ꦨꦺꦴ ꦒꦺꦴꦠꦩ’’. ‘‘ꦠꦁ ꦏꦶꦱ꧀ꦱ ꦲꦺꦠꦸ’’? ‘‘ꦄꦱꦸ ꦲꦶ, ꦨꦺꦴ ꦒꦺꦴꦠꦩ, ꦄꦒ꧀ꦒꦶ ꦢꦸꦏ꧀ꦑꦱꦩ꧀ꦦꦱ꧀ꦱꦺꦴ ꦕꦺꦮ ꦩꦲꦴꦨꦶꦠꦴꦥꦺꦴ ꦕ ꦩꦲꦴꦥꦫꦶꦭ꦳ꦴꦲꦺꦴ ꦕꦴ’’ꦠꦶ. ‘‘ꦠꦁ ꦏꦶꦁ ꦩꦚ꧀ꦚꦱꦶ, ꦩꦴꦒꦟ꧀ꦝꦶꦪ, ꦆꦢꦴꦤꦺꦮ ꦤꦸ ꦑꦺꦴ ꦱꦺꦴ ꦄꦒ꧀ꦒꦶ ꦢꦸꦏ꧀ꦑꦱꦩ꧀ꦦꦱ꧀ꦱꦺꦴ ꦕꦺꦮ ꦩꦲꦴꦨꦶꦠꦴꦥꦺꦴ ꦕ ꦩꦲꦴꦥꦫꦶꦭ꦳ꦴꦲꦺꦴ ꦕ ꦈꦢꦴꦲꦸ ꦥꦸꦧ꧀ꦧꦺꦥꦶ ꦱꦺꦴ ꦄꦒ꧀ꦒꦶ ꦢꦸꦏ꧀ꦑꦱꦩ꧀ꦦꦱ꧀ꦱꦺꦴ ꦕꦺꦮ ꦩꦲꦴꦨꦶꦠꦴꦥꦺꦴ ꦕ ꦩꦲꦴꦥꦫꦶꦭ꦳ꦴꦲꦺꦴ ꦕꦴ’’ꦠꦶ? ‘‘ꦆꦢꦴꦤꦶ ꦕꦺꦮ, ꦨꦺꦴ ꦒꦺꦴꦠꦩ, ꦱꦺꦴ ꦄꦒ꧀ꦒꦶ ꦢꦸꦏ꧀ꦑꦱꦩ꧀ꦦꦱ꧀ꦱꦺꦴ ꦕꦺꦮ ꦩꦲꦴꦨꦶꦠꦴꦥꦺꦴ ꦕ ꦩꦲꦴꦥꦫꦶꦭ꦳ꦴꦲꦺꦴ ꦕ, ꦥꦸꦧ꧀ꦧꦺꦥꦶ ꦱꦺꦴ ꦄꦒ꧀ꦒꦶ ꦢꦸꦏ꧀ꦑꦱꦩ꧀ꦦꦱ꧀ꦱꦺꦴ ꦕꦺꦮ ꦩꦲꦴꦨꦶꦠꦴꦥꦺꦴ ꦕ ꦩꦲꦴꦥꦫꦶꦭ꦳ꦴꦲꦺꦴ ꦕ. ꦄꦱꦸ ꦕ [ꦄꦱꦸ ꦲꦶ ꦕ (ꦱꦷ. ꦥꦷ.)], ꦨꦺꦴ ꦒꦺꦴꦠꦩ, ꦏꦸꦛ꧀ꦜꦷ ꦥꦸꦫꦶꦱꦺꦴ ꦄꦫꦸꦒꦠ꧀ꦠꦺꦴ ꦥꦏ꧀ꦏꦒꦠ꧀ꦠꦺꦴ ꦏꦶꦩꦷꦲꦶ ꦑꦗ꧀ꦗꦩꦴꦤꦺꦴ ꦤꦑꦺꦲꦶ ꦮꦟꦩꦸꦑꦴꦤꦶ ꦮꦶꦥ꧀ꦥꦠꦕ꧀ꦖꦩꦴꦤꦺꦴ ꦈꦥꦲꦠꦶꦤ꧀ꦢ꧀ꦫꦶꦪꦺꦴ ꦢꦸꦏ꧀ꦑꦱꦩ꧀ꦦꦱ꧀ꦱꦺꦪꦺꦮ ꦄꦒ꧀ꦒꦶꦱ꧀ꦩꦶꦁ ꦱꦸꦑꦩꦶꦠꦶ ꦮꦶꦥꦫꦷꦠꦱꦚ꧀ꦚꦁ ꦥꦕ꧀ꦕꦭꦠ꧀ꦡꦴ’’ꦠꦶ. ‘‘ꦌꦮꦩꦺꦮ ꦑꦺꦴ, ꦩꦴꦒꦟ꧀ꦝꦶꦪ, ꦄꦠꦷꦠꦩ꧀ꦥꦶ ꦄꦢ꧀ꦣꦴꦤꦁ ꦏꦴꦩꦴ ꦢꦸꦏ꧀ꦑꦱꦩ꧀ꦦꦱ꧀ꦱꦴ ꦕꦺꦮ ꦩꦲꦴꦨꦶꦠꦴꦥꦴ ꦕ ꦩꦲꦴꦥꦫꦶꦭ꦳ꦴꦲꦴ ꦕ, ꦄꦤꦴꦒꦠꦩ꧀ꦥꦶ ꦄꦢ꧀ꦣꦴꦤꦁ ꦏꦴꦩꦴ ꦢꦸꦏ꧀ꦑꦱꦩ꧀ꦦꦱ꧀ꦱꦴ ꦕꦺꦮ ꦩꦲꦴꦨꦶꦠꦴꦥꦴ ꦕ ꦩꦲꦴꦥꦫꦶꦭ꦳ꦴꦲꦴ ꦕ, ꦌꦠꦫꦲꦶꦥꦶ ꦥꦕ꧀ꦕꦸꦥ꧀ꦥꦤ꧀ꦤꦁ ꦄꦢ꧀ꦣꦴꦤꦁ ꦏꦴꦩꦴ ꦢꦸꦏ꧀ꦑꦱꦩ꧀ꦦꦱ꧀ꦱꦴ ꦕꦺꦮ ꦩꦲꦴꦨꦶꦠꦴꦥꦴ ꦕ ꦩꦲꦴꦥꦫꦶꦭ꦳ꦴꦲꦴ ꦕ. ꦆꦩꦺ ꦕ, ꦩꦴꦒꦟ꧀ꦝꦶꦪ, ꦱꦠ꧀ꦠꦴ ꦏꦴꦩꦺꦱꦸ ꦄꦮꦷꦠꦫꦴꦒꦴ ꦏꦴꦩꦠꦟ꧀ꦲꦴꦲꦶ ꦑꦗ꧀ꦗꦩꦴꦤꦴ ꦏꦴꦩꦥꦫꦶꦭ꦳ꦴꦲꦺꦤ ꦥꦫꦶꦝꦪ꧀ꦲꦩꦴꦤꦴ ꦈꦥꦲꦠꦶꦤ꧀ꦢ꧀ꦫꦶꦪꦴ ꦢꦸꦏ꧀ꦑꦱꦩ꧀ꦦꦱ꧀ꦱꦺꦱꦸꦪꦺꦮ ꦏꦴꦩꦺꦱꦸ ꦱꦸꦑꦩꦶꦠꦶ ꦮꦶꦥꦫꦷꦠꦱꦚ꧀ꦚꦁ ꦥꦕ꧀ꦕꦭꦠ꧀ꦡꦸꦁ.

꧒꧑꧕. ‘‘ꦱꦺꦪ꧀ꦪꦡꦴꦥꦶ, ꦩꦴꦒꦟ꧀ꦝꦶꦪ, ꦏꦸꦛ꧀ꦜꦷ ꦥꦸꦫꦶꦱꦺꦴ ꦄꦫꦸꦒꦠ꧀ꦠꦺꦴ ꦥꦏ꧀ꦏꦒꦠ꧀ꦠꦺꦴ ꦏꦶꦩꦷꦲꦶ ꦑꦗ꧀ꦗꦩꦴꦤꦺꦴ ꦤꦑꦺꦲꦶ ꦮꦟꦩꦸꦑꦴꦤꦶ ꦮꦶꦥ꧀ꦥꦠꦕ꧀ꦖꦩꦴꦤꦺꦴ ꦄꦔ꧀ꦒꦴꦫꦏꦴꦱꦸꦪꦴ ꦏꦴꦪꦁ ꦥꦫꦶꦠꦴꦥꦺꦠꦶ. ꦪꦡꦴ ꦪꦡꦴ ꦑꦺꦴ, ꦩꦴꦒꦟ꧀ꦝꦶꦪ, ꦄꦱꦸ ꦏꦸꦛ꧀ꦜꦷ ꦥꦸꦫꦶꦱꦺꦴ ꦄꦫꦸꦒꦠ꧀ꦠꦺꦴ ꦥꦏ꧀ꦏꦒꦠ꧀ꦠꦺꦴ ꦏꦶꦩꦷꦲꦶ ꦑꦗ꧀ꦗꦩꦴꦤꦺꦴ ꦤꦑꦺꦲꦶ ꦮꦟꦩꦸꦑꦴꦤꦶ ꦮꦶꦥ꧀ꦥꦠꦕ꧀ꦖꦩꦴꦤꦺꦴ ꦄꦔ꧀ꦒꦴꦫꦏꦴꦱꦸꦪꦴ ꦏꦴꦪꦁ ꦥꦫꦶꦠꦴꦥꦺꦠꦶ ꦠꦡꦴ ꦠꦡꦴ’ꦱ꧀ꦱ [ꦠꦡꦴ ꦠꦡꦴ ꦠꦱ꧀ꦱꦺꦮ (ꦱ꧀ꦪꦴ. ꦏꦁ. ꦏ.)] ꦠꦴꦤꦶ ꦮꦟꦩꦸꦑꦴꦤꦶ ꦄꦱꦸꦕꦶꦠꦫꦴꦤꦶ ꦕꦺꦮ ꦲꦺꦴꦤ꧀ꦠꦶ ꦢꦸꦒ꧀ꦒꦤ꧀ꦣꦠꦫꦴꦤꦶ ꦕ ꦥꦹꦠꦶꦏꦠꦫꦴꦤꦶ ꦕ, ꦲꦺꦴꦠꦶ ꦕꦺꦮ ꦏꦴꦕꦶ ꦱꦴꦠꦩꦠ꧀ꦠꦴ ꦄꦱ꧀ꦱꦴꦢꦩꦠ꧀ꦠꦴ – ꦪꦢꦶꦢꦁ ꦮꦟꦩꦸꦑꦴꦤꦁ ꦏꦟ꧀ꦝꦹꦮꦤꦲꦺꦠꦸ; ꦌꦮꦩꦺꦮ ꦑꦺꦴ, ꦩꦴꦒꦟ꧀ꦝꦶꦪ, ꦱꦠ꧀ꦠꦴ ꦏꦴꦩꦺꦱꦸ ꦄꦮꦷꦠꦫꦴꦒꦴ ꦏꦴꦩꦠꦟ꧀ꦲꦴꦲꦶ ꦑꦗ꧀ꦗꦩꦴꦤꦴ ꦏꦴꦩꦥꦫꦶꦭ꦳ꦴꦲꦺꦤ ꦕ ꦥꦫꦶꦝꦪ꧀ꦲꦩꦴꦤꦴ ꦏꦴꦩꦺ ꦥꦛꦶꦱꦺꦮꦤ꧀ꦠꦶ. ꦪꦡꦴ ꦪꦡꦴ ꦑꦺꦴ, ꦩꦴꦒꦟ꧀ꦝꦶꦪ, ꦱꦠ꧀ꦠꦴ ꦏꦴꦩꦺꦱꦸ ꦄꦮꦷꦠꦫꦴꦒꦴ ꦏꦴꦩꦠꦟ꧀ꦲꦴꦲꦶ ꦑꦗ꧀ꦗꦩꦴꦤꦴ ꦏꦴꦩꦥꦫꦶꦭ꦳ꦴꦲꦺꦤ ꦕ ꦥꦫꦶꦝꦪ꧀ꦲꦩꦴꦤꦴ ꦏꦴꦩꦺ ꦥꦛꦶꦱꦺꦮꦤ꧀ꦠꦶ ꦠꦡꦴ ꦠꦡꦴ ꦠꦺꦱꦁ ꦠꦺꦱꦁ ꦱꦠ꧀ꦠꦴꦤꦁ ꦏꦴꦩꦠꦟ꧀ꦲꦴ ꦕꦺꦮ ꦥꦮꦝ꧀ꦞꦠꦶ, ꦏꦴꦩꦥꦫꦶꦭ꦳ꦴꦲꦺꦤ ꦕ ꦥꦫꦶꦝꦪ꧀ꦲꦤ꧀ꦠꦶ, ꦲꦺꦴꦠꦶ ꦕꦺꦮ ꦱꦴꦠꦩꦠ꧀ꦠꦴ ꦄꦱ꧀ꦱꦴꦢꦩꦠ꧀ꦠꦴ – ꦪꦢꦶꦢꦁ ꦥꦚ꧀ꦕꦏꦴꦩꦒꦸꦟꦺ ꦥꦛꦶꦕ꧀ꦕ.

‘‘ꦠꦁ ꦏꦶꦁ ꦩꦚ꧀ꦚꦱꦶ, ꦩꦴꦒꦟ꧀ꦝꦶꦪ, ꦄꦥꦶ ꦤꦸ ꦠꦺ ꦢꦶꦛ꧀ꦜꦺꦴ ꦮꦴ ꦱꦸꦠꦺꦴ ꦮꦴ ꦫꦴꦗꦴ ꦮꦴ ꦫꦴꦗꦩꦲꦴꦩꦠ꧀ꦠꦺꦴ ꦮꦴ ꦥꦚ꧀ꦕꦲꦶ ꦏꦴꦩꦒꦸꦟꦺꦲꦶ ꦱꦩꦥ꧀ꦥꦶꦠꦺꦴ ꦱꦩꦔ꧀ꦒꦷꦨꦹꦠꦺꦴ ꦥꦫꦶꦕꦴꦫꦪꦩꦴꦤꦺꦴ ꦏꦴꦩꦠꦟ꧀ꦲꦁ ꦄꦥ꧀ꦥꦲꦴꦪ ꦏꦴꦩꦥꦫꦶꦭ꦳ꦴꦲꦁ ꦄꦥ꧀ꦥꦛꦶꦮꦶꦤꦺꦴꦢꦺꦠ꧀ꦮꦴ ꦮꦶꦒꦠꦥꦶꦥꦴꦱꦺꦴ ꦄꦗ꧀ꦙꦠ꧀ꦠꦁ ꦮꦹꦥꦱꦤ꧀ꦠꦕꦶꦠ꧀ꦠꦺꦴ ꦮꦶꦲꦴꦱꦶ ꦮꦴ ꦮꦶꦲꦫꦠꦶ ꦮꦴ ꦮꦶꦲꦫꦶꦱ꧀ꦱꦠꦶ ꦮꦴ’’ꦠꦶ? ‘‘ꦤꦺꦴ ꦲꦶꦢꦁ, ꦨꦺꦴ ꦒꦺꦴꦠꦩ’’. ‘‘ꦱꦴꦣꦸ, ꦩꦴꦒꦟ꧀ꦝꦶꦪ! ꦩꦪꦴꦥꦶ ꦑꦺꦴ ꦌꦠꦁ, ꦩꦴꦒꦟ꧀ꦝꦶꦪ, ꦤꦺꦮ ꦢꦶꦛ꧀ꦜꦁ ꦤ ꦱꦸꦠꦁ ꦫꦴꦗꦴ ꦮꦴ ꦫꦴꦗꦩꦲꦴꦩꦠ꧀ꦠꦺꦴ ꦮꦴ ꦥꦚ꧀ꦕꦲꦶ ꦏꦴꦩꦒꦸꦟꦺꦲꦶ ꦱꦩꦥ꧀ꦥꦶꦠꦺꦴ ꦱꦩꦔ꧀ꦒꦷꦨꦹꦠꦺꦴ ꦥꦫꦶꦕꦴꦫꦪꦩꦴꦤꦺꦴ ꦏꦴꦩꦠꦟ꧀ꦲꦁ ꦄꦥ꧀ꦥꦲꦴꦪ ꦏꦴꦩꦥꦫꦶꦭ꦳ꦴꦲꦁ ꦄꦥ꧀ꦥꦛꦶꦮꦶꦤꦺꦴꦢꦺꦠ꧀ꦮꦴ ꦮꦶꦒꦠꦥꦶꦥꦴꦱꦺꦴ ꦄꦗ꧀ꦙꦠ꧀ꦠꦁ ꦮꦹꦥꦱꦤ꧀ꦠꦕꦶꦠ꧀ꦠꦺꦴ ꦮꦶꦲꦴꦱꦶ ꦮꦴ ꦮꦶꦲꦫꦠꦶ ꦮꦴ ꦮꦶꦲꦫꦶꦱ꧀ꦱꦠꦶ ꦮꦴ. ꦄꦡ ꦑꦺꦴ, ꦩꦴꦒꦟ꧀ꦝꦶꦪ, ꦪꦺ ꦲꦶ ꦏꦺꦕꦶ ꦱꦩꦟꦴ ꦮꦴ ꦧ꧀ꦫꦴꦲ꧀ꦩꦟꦴ ꦮꦴ ꦮꦶꦒꦠꦥꦶꦥꦴꦱꦴ ꦄꦗ꧀ꦙꦠ꧀ꦠꦁ ꦮꦹꦥꦱꦤ꧀ꦠꦕꦶꦠ꧀ꦠꦴ ꦮꦶꦲꦴꦱꦸꦁ ꦮꦴ ꦮꦶꦲꦫꦤ꧀ꦠꦶ ꦮꦴ ꦮꦶꦲꦫꦶꦱ꧀ꦱꦤ꧀ꦠꦶ ꦮꦴ ꦱꦧ꧀ꦧꦺ ꦠꦺ ꦏꦴꦩꦴꦤꦁꦪꦺꦮ ꦱꦩꦸꦢꦪꦚ꧀ꦕ ꦄꦠ꧀ꦡꦔ꧀ꦒꦩꦚ꧀ꦕ ꦄꦱ꧀ꦱꦴꦢꦚ꧀ꦕ ꦄꦴꦢꦷꦤꦮꦚ꧀ꦕ ꦤꦶꦱ꧀ꦱꦫꦟꦚ꧀ꦕ ꦪꦡꦴꦨꦹꦠꦁ ꦮꦶꦢꦶꦠ꧀ꦮꦴ ꦏꦴꦩꦠꦟ꧀ꦲꦁ ꦥꦲꦴꦪ ꦏꦴꦩꦥꦫꦶꦭ꦳ꦴꦲꦁ ꦥꦛꦶꦮꦶꦤꦺꦴꦢꦺꦠ꧀ꦮꦴ ꦮꦶꦒꦠꦥꦶꦥꦴꦱꦴ ꦄꦗ꧀ꦙꦠ꧀ꦠꦁ ꦮꦹꦥꦱꦤ꧀ꦠꦕꦶꦠ꧀ꦠꦴ ꦮꦶꦲꦴꦱꦸꦁ ꦮꦴ ꦮꦶꦲꦫꦤ꧀ꦠꦶ ꦮꦴ ꦮꦶꦲꦫꦶꦱ꧀ꦱꦤ꧀ꦠꦶ ꦮꦴ’’ꦠꦶ. ꦄꦡ ꦑꦺꦴ ꦨꦒꦮꦴ ꦠꦴꦪꦁ ꦮꦺꦭꦴꦪꦁ ꦆꦩꦁ ꦈꦢꦴꦤꦁ ꦈꦢꦴꦤꦺꦱꦶ –

‘‘ꦄꦴꦫꦺꦴꦒ꧀ꦪꦥꦫꦩꦴ ꦭꦴꦨꦴ, ꦤꦶꦧ꧀ꦧꦴꦤꦁ ꦥꦫꦩꦁ ꦱꦸꦑꦁ;

ꦄꦛ꧀ꦜꦔ꧀ꦒꦶꦏꦺꦴ ꦕ ꦩꦒ꧀ꦒꦴꦤꦁ, ꦑꦺꦩꦁ ꦄꦩꦠꦒꦴꦩꦶꦤ’’ꦤ꧀ꦠꦶ.

꧒꧑꧖. ꦌꦮꦁ ꦮꦸꦠ꧀ꦠꦺ, ꦩꦴꦒꦟ꧀ꦝꦶꦪꦺꦴ ꦥꦫꦶꦧ꧀ꦧꦴꦗꦏꦺꦴ ꦨꦒꦮꦤ꧀ꦠꦁ ꦌꦠꦢꦮꦺꦴꦕ – ‘‘ꦄꦕ꧀ꦖꦫꦶꦪꦁ, ꦨꦺꦴ ꦒꦺꦴꦠꦩ, ꦄꦧ꧀ꦨꦸꦠꦁ, ꦨꦺꦴ ꦒꦺꦴꦠꦩ! ꦪꦴꦮ ꦱꦸꦨꦴꦱꦶꦠꦁ ꦕꦶꦢꦁ ꦨꦺꦴꦠꦴ ꦒꦺꦴꦠꦩꦺꦤ – ‘ꦄꦴꦫꦺꦴꦒ꧀ꦪꦥꦫꦩꦴ ꦭꦴꦨꦴ, ꦤꦶꦧ꧀ꦧꦴꦤꦁ ꦥꦫꦩꦁ ꦱꦸꦑ’ꦤ꧀ꦠꦶ. ꦩꦪꦴꦥꦶ ꦑꦺꦴ ꦌꦠꦁ, ꦨꦺꦴ ꦒꦺꦴꦠꦩ, ꦱꦸꦠꦁ ꦥꦸꦧ꧀ꦧꦏꦴꦤꦁ ꦥꦫꦶꦧ꧀ꦧꦴꦗꦏꦴꦤꦁ ꦄꦴꦕꦫꦶꦪꦥꦴꦕꦫꦶꦪꦴꦤꦁ ꦨꦴꦱꦩꦴꦤꦴꦤꦁ – ‘ꦄꦴꦫꦺꦴꦒ꧀ꦪꦥꦫꦩꦴ ꦭꦴꦨꦴ, ꦤꦶꦧ꧀ꦧꦴꦤꦁ ꦥꦫꦩꦁ ꦱꦸꦑ’ꦤ꧀ꦠꦶ; ꦠꦪꦶꦢꦁ, ꦨꦺꦴ ꦒꦺꦴꦠꦩ, ꦱꦩꦺꦠꦷ’’ꦠꦶ. ‘‘ꦪꦁ ꦥꦤ ꦠꦺ ꦌꦠꦁ, ꦩꦴꦒꦟ꧀ꦝꦶꦪ, ꦱꦸꦠꦁ ꦥꦸꦧ꧀ꦧꦏꦴꦤꦁ ꦥꦫꦶꦧ꧀ꦧꦴꦗꦏꦴꦤꦁ ꦄꦴꦕꦫꦶꦪꦥꦴꦕꦫꦶꦪꦴꦤꦁ ꦨꦴꦱꦩꦴꦤꦴꦤꦁ – ‘ꦄꦴꦫꦺꦴꦒ꧀ꦪꦥꦫꦩꦴ ꦭꦴꦨꦴ, ꦤꦶꦧ꧀ꦧꦴꦤꦁ ꦥꦫꦩꦁ ꦱꦸꦑ’ꦤ꧀ꦠꦶ, ꦏꦠꦩꦁ ꦠꦁ ꦄꦴꦫꦺꦴꦒ꧀ꦪꦁ, ꦏꦠꦩꦁ ꦠꦁ ꦤꦶꦧ꧀ꦧꦴꦤ’’ꦤ꧀ꦠꦶ? ꦌꦮꦁ ꦮꦸꦠ꧀ꦠꦺ, ꦩꦴꦒꦟ꧀ꦝꦶꦪꦺꦴ ꦥꦫꦶꦧ꧀ꦧꦴꦗꦏꦺꦴ ꦱꦏꦴꦤꦺꦮ ꦱꦸꦢꦁ ꦒꦠ꧀ꦠꦴꦤꦶ ꦥꦴꦟꦶꦤꦴ ꦄꦤꦺꦴꦩꦗ꧀ꦗꦠꦶ – ‘‘ꦆꦢꦤ꧀ꦠꦁ, ꦨꦺꦴ ꦒꦺꦴꦠꦩ, ꦄꦴꦫꦺꦴꦒ꧀ꦪꦁ, ꦆꦢꦤ꧀ꦠꦁ ꦤꦶꦧ꧀ꦧꦴꦤꦁ. ꦄꦲꦚ꧀ꦲꦶ, ꦨꦺꦴ ꦒꦺꦴꦠꦩ, ꦌꦠꦫꦲꦶ ꦄꦫꦺꦴꦒꦺꦴ ꦱꦸꦑꦷ, ꦤ ꦩꦁ ꦏꦶꦚ꧀ꦕꦶ ꦄꦴꦧꦴꦣꦠꦷ’’ꦠꦶ.

꧒꧑꧗. ‘‘ꦱꦺꦪ꧀ꦪꦡꦴꦥꦶ, ꦩꦴꦒꦟ꧀ꦝꦶꦪ, ꦗꦕ꧀ꦕꦤ꧀ꦣꦺꦴ ꦥꦸꦫꦶꦱꦺꦴ; ꦱꦺꦴ ꦤ ꦥꦱ꧀ꦱꦺꦪ꧀ꦪ ꦏꦟ꧀ꦲꦱꦸꦏ꧀ꦏꦴꦤꦶ ꦫꦹꦥꦴꦤꦶ, ꦤ ꦥꦱ꧀ꦱꦺꦪ꧀ꦪ ꦤꦷꦭꦏꦴꦤꦶ ꦫꦹꦥꦴꦤꦶ, ꦤ ꦥꦱ꧀ꦱꦺꦪ꧀ꦪ ꦥꦷꦠꦏꦴꦤꦶ ꦫꦹꦥꦴꦤꦶ, ꦤ ꦥꦱ꧀ꦱꦺꦪ꧀ꦪ ꦭꦺꦴꦲꦶꦠꦏꦴꦤꦶ ꦫꦹꦥꦴꦤꦶ, ꦤ ꦥꦱ꧀ꦱꦺꦪ꧀ꦪ ꦩꦚ꧀ꦗꦶꦛ꧀ꦜꦏꦴꦤꦶ [ꦩꦚ꧀ꦗꦺꦛ꧀ꦜꦶꦏꦴꦤꦶ (ꦱꦷ. ꦱ꧀ꦪꦴ. ꦏꦁ. ꦥꦷ.), ꦩꦚ꧀ꦗꦺꦛ꧀ꦜꦏꦴꦤꦶ (ꦏ.)] ꦫꦹꦥꦴꦤꦶ, ꦤ ꦥꦱ꧀ꦱꦺꦪ꧀ꦪ ꦱꦩꦮꦶꦱꦩꦁ, ꦤ ꦥꦱ꧀ꦱꦺꦪ꧀ꦪ ꦠꦴꦫꦏꦫꦹꦥꦴꦤꦶ, ꦤ ꦥꦱ꧀ꦱꦺꦪ꧀ꦪ ꦕꦤ꧀ꦢꦶꦩꦱꦹꦫꦶꦪꦺ. ꦱꦺꦴ ꦱꦸꦟꦺꦪ꧀ꦪ ꦕꦏ꧀ꦑꦸꦩꦠꦺꦴ ꦨꦴꦱꦩꦴꦤꦱ꧀ꦱ – ‘ꦖꦺꦏꦁ ꦮꦠ, ꦨꦺꦴ, ꦎꦢꦴꦠꦁ ꦮꦠ꧀ꦡꦁ ꦄꦨꦶꦫꦹꦥꦁ ꦤꦶꦩ꧀ꦩꦭꦁ ꦱꦸꦕꦷ’ꦠꦶ! ꦱꦺꦴ ꦎꦢꦴꦠꦥꦫꦶꦪꦺꦱꦤꦁ ꦕꦫꦺꦪ꧀ꦪ. ꦠꦩꦺꦤꦁ ꦄꦚ꧀ꦚꦠꦫꦺꦴ ꦥꦸꦫꦶꦱꦺꦴ ꦠꦺꦭꦩꦭꦶꦏꦠꦺꦤ ꦱꦴꦲꦸꦭ꦳ꦶꦕꦷꦫꦺꦤ [ꦠꦺꦭꦩꦱꦶꦏꦠꦺꦤ ꦱꦴꦲꦸꦭ꦳ꦕꦷꦮꦫꦺꦤ (ꦱꦷ. ꦱ꧀ꦪꦴ. ꦏꦁ. ꦥꦷ.)] ꦮꦚ꧀ꦕꦺꦪ꧀ꦪ – ‘ꦆꦢꦁ ꦠꦺ, ꦄꦩ꧀ꦨꦺꦴ ꦥꦸꦫꦶꦱ, ꦎꦢꦴꦠꦁ ꦮꦠ꧀ꦡꦁ ꦄꦨꦶꦫꦹꦥꦁ ꦤꦶꦩ꧀ꦩꦭꦁ ꦱꦸꦕꦷ’ꦠꦶ. ꦱꦺꦴ ꦠꦁ ꦥꦛꦶꦒ꧀ꦒꦟ꧀ꦲꦺꦪ꧀ꦪ, ꦥꦛꦶꦒ꧀ꦒꦲꦺꦠ꧀ꦮꦴ ꦥꦴꦫꦸꦥꦺꦪ꧀ꦪ, ꦥꦴꦫꦸꦥꦺꦠ꧀ꦮꦴ ꦄꦠ꧀ꦠꦩꦤꦺꦴ ꦄꦠ꧀ꦠꦩꦤꦮꦴꦕꦁ ꦤꦶꦕ꧀ꦖꦴꦫꦺꦪ꧀ꦪ – ‘ꦖꦺꦏꦁ ꦮꦠ, ꦨꦺꦴ, ꦎꦢꦴꦠꦁ ꦮꦠ꧀ꦡꦁ ꦄꦨꦶꦫꦹꦥꦁ ꦤꦶꦩ꧀ꦩꦭꦁ ꦱꦸꦕꦷ’ꦠꦶ!

‘‘ꦠꦁ ꦏꦶꦁ ꦩꦚ꧀ꦚꦱꦶ, ꦩꦴꦒꦟ꧀ꦝꦶꦪ, ꦄꦥꦶ ꦤꦸ ꦱꦺꦴ ꦗꦕ꧀ꦕꦤ꧀ꦣꦺꦴ ꦥꦸꦫꦶꦱꦺꦴ ꦗꦴꦤꦤ꧀ꦠꦺꦴ ꦥꦱ꧀ꦱꦤ꧀ꦠꦺꦴ ꦄꦩꦸꦁ ꦠꦺꦭꦩꦭꦶꦏꦠꦁ ꦱꦴꦲꦸꦭ꦳ꦶꦕꦷꦫꦁ ꦥꦛꦶꦒ꧀ꦒꦟ꧀ꦲꦺꦪ꧀ꦪ, ꦥꦛꦶꦒ꧀ꦒꦲꦺꦠ꧀ꦮꦴ ꦥꦴꦫꦸꦥꦺꦪ꧀ꦪ, ꦥꦴꦫꦸꦥꦺꦠ꧀ꦮꦴ ꦄꦠ꧀ꦠꦩꦤꦺꦴ ꦄꦠ꧀ꦠꦩꦤꦮꦴꦕꦁ ꦤꦶꦕ꧀ꦖꦴꦫꦺꦪ꧀ꦪ – ‘ꦖꦺꦏꦁ ꦮꦠ, ꦨꦺꦴ, ꦎꦢꦴꦠꦁ ꦮꦠ꧀ꦡꦁ ꦄꦨꦶꦫꦹꦥꦁ ꦤꦶꦩ꧀ꦩꦭꦁ ꦱꦸꦕꦷ’ꦠꦶ ꦈꦢꦴꦲꦸ ꦕꦏ꧀ꦑꦸꦩꦠꦺꦴ ꦱꦢ꧀ꦣꦴꦪꦴ’’ꦠꦶ? ‘‘ꦄꦗꦴꦤꦤ꧀ꦠꦺꦴ ꦲꦶ, ꦨꦺꦴ ꦒꦺꦴꦠꦩ, ꦄꦥꦱ꧀ꦱꦤ꧀ꦠꦺꦴ ꦱꦺꦴ ꦗꦕ꧀ꦕꦤ꧀ꦣꦺꦴ ꦥꦸꦫꦶꦱꦺꦴ ꦄꦩꦸꦁ ꦠꦺꦭꦩꦭꦶꦏꦠꦁ ꦱꦴꦲꦸꦭ꦳ꦶꦕꦷꦫꦁ ꦥꦛꦶꦒ꧀ꦒꦟ꧀ꦲꦺꦪ꧀ꦪ, ꦥꦛꦶꦒ꧀ꦒꦲꦺꦠ꧀ꦮꦴ ꦥꦴꦫꦸꦥꦺꦪ꧀ꦪ, ꦥꦴꦫꦸꦥꦺꦠ꧀ꦮꦴ ꦄꦠ꧀ꦠꦩꦤꦺꦴ ꦄꦠ꧀ꦠꦩꦤꦮꦴꦕꦁ ꦤꦶꦕ꧀ꦖꦴꦫꦺꦪ꧀ꦪ – ‘ꦖꦺꦏꦁ ꦮꦠ, ꦨꦺꦴ, ꦎꦢꦴꦠꦁ ꦮꦠ꧀ꦡꦁ ꦄꦨꦶꦫꦹꦥꦁ ꦤꦶꦩ꧀ꦩꦭꦁ ꦱꦸꦕꦷ’ꦠꦶ, ꦕꦏ꧀ꦑꦸꦩꦠꦺꦴ ꦱꦢ꧀ꦣꦴꦪꦴ’’ꦠꦶ. ‘‘ꦌꦮꦩꦺꦮ ꦑꦺꦴ, ꦩꦴꦒꦟ꧀ꦝꦶꦪ, ꦄꦚ꧀ꦚꦠꦶꦠ꧀ꦡꦶꦪꦴ ꦥꦫꦶꦧ꧀ꦧꦴꦗꦏꦴ ꦄꦤ꧀ꦣꦴ ꦄꦕꦏ꧀ꦑꦸꦏꦴ ꦄꦗꦴꦤꦤ꧀ꦠꦴ ꦄꦴꦫꦺꦴꦒ꧀ꦪꦁ, ꦄꦥꦱ꧀ꦱꦤ꧀ꦠꦴ ꦤꦶꦧ꧀ꦧꦴꦤꦁ, ꦄꦡ ꦕ ꦥꦤꦶꦩꦁ ꦒꦴꦡꦁ ꦨꦴꦱꦤ꧀ꦠꦶ – ‘ꦄꦴꦫꦺꦴꦒ꧀ꦪꦥꦫꦩꦴ ꦭꦴꦨꦴ, ꦤꦶꦧ꧀ꦧꦴꦤꦁ ꦥꦫꦩꦁ ꦱꦸꦑ’ꦤ꧀ꦠꦶ. ꦥꦸꦧ꧀ꦧꦏꦺꦲꦺꦱꦴ, ꦩꦴꦒꦟ꧀ꦝꦶꦪ, ꦄꦫꦲꦤ꧀ꦠꦺꦲꦶ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦲꦶ ꦒꦴꦡꦴ ꦨꦴꦱꦶꦠꦴ –

‘ꦄꦴꦫꦺꦴꦒ꧀ꦪꦥꦫꦩꦴ ꦭꦴꦨꦴ, ꦤꦶꦧ꧀ꦧꦴꦤꦁ ꦥꦫꦩꦁ ꦱꦸꦑꦁ;

ꦄꦛ꧀ꦜꦔ꧀ꦒꦶꦏꦺꦴ ꦕ ꦩꦒ꧀ꦒꦴꦤꦁ, ꦑꦺꦩꦁ ꦄꦩꦠꦒꦴꦩꦶꦤ’ꦤ꧀ꦠꦶ.

꧒꧑꧘. ‘‘ꦱꦴ ꦌꦠꦫꦲꦶ ꦄꦤꦸꦥꦸꦧ꧀ꦧꦺꦤ ꦥꦸꦡꦸꦗ꧀ꦗꦤꦒꦴꦡꦴ [ꦥꦸꦡꦸꦗ꧀ꦗꦤꦒꦠꦴ (ꦱꦷ. ꦥꦷ.)]. ꦄꦪꦁ ꦑꦺꦴ ꦥꦤ, ꦩꦴꦒꦟ꧀ꦝꦶꦪ, ꦏꦴꦪꦺꦴ ꦫꦺꦴꦒꦨꦹꦠꦺꦴ ꦒꦟ꧀ꦝꦨꦹꦠꦺꦴ ꦱꦭ꧀ꦭꦨꦹꦠꦺꦴ ꦄꦓꦨꦹꦠꦺꦴ ꦄꦴꦧꦴꦣꦨꦹꦠꦺꦴ, ꦱꦺꦴ ꦠ꧀ꦮꦁ ꦆꦩꦁ ꦏꦴꦪꦁ ꦫꦺꦴꦒꦨꦹꦠꦁ ꦒꦟ꧀ꦝꦨꦹꦠꦁ ꦱꦭ꧀ꦭꦨꦹꦠꦁ ꦄꦓꦨꦹꦠꦁ ꦄꦴꦧꦴꦣꦨꦹꦠꦁ – ‘ꦆꦢꦤ꧀ꦠꦁ, ꦨꦺꦴ ꦒꦺꦴꦠꦩ, ꦄꦴꦫꦺꦴꦒ꧀ꦪꦁ, ꦆꦢꦤ꧀ꦠꦁ ꦤꦶꦧ꧀ꦧꦴꦤ’ꦤ꧀ꦠꦶ ꦮꦢꦺꦱꦶ. ꦠꦚ꧀ꦲꦶ ꦠꦺ, ꦩꦴꦒꦟ꧀ꦝꦶꦪ, ꦄꦫꦶꦪꦁ ꦕꦏ꧀ꦑꦸꦁ ꦤꦠ꧀ꦡꦶ ꦪꦺꦤ ꦠ꧀ꦮꦁ ꦄꦫꦶꦪꦺꦤ ꦕꦏ꧀ꦑꦸꦤꦴ ꦄꦴꦫꦺꦴꦒ꧀ꦪꦁ ꦗꦴꦤꦺꦪ꧀ꦪꦴꦱꦶ, ꦤꦶꦧ꧀ꦧꦴꦤꦁ ꦥꦱ꧀ꦱꦺꦪ꧀ꦪꦴꦱꦷ’’ꦠꦶ. ‘‘ꦌꦮꦁ ꦥꦱꦤ꧀ꦤꦺꦴ ꦄꦲꦁ ꦨꦺꦴꦠꦺꦴ ꦒꦺꦴꦠꦩꦱ꧀ꦱ! ꦥꦲꦺꦴꦠꦶ ꦩꦺ ꦨꦮꦁ ꦒꦺꦴꦠꦩꦺꦴ ꦠꦡꦴ ꦣꦩ꧀ꦩꦁ ꦢꦺꦱꦺꦠꦸꦁ ꦪꦡꦴꦲꦁ ꦄꦴꦫꦺꦴꦒ꧀ꦪꦁ ꦗꦴꦤꦺꦪ꧀ꦪꦁ, ꦤꦶꦧ꧀ꦧꦴꦤꦁ ꦥꦱ꧀ꦱꦺꦪ꧀ꦪ’’ꦤ꧀ꦠꦶ.

꧒꧑꧙. ‘‘ꦱꦺꦪ꧀ꦪꦡꦴꦥꦶ, ꦩꦴꦒꦟ꧀ꦝꦶꦪ, ꦗꦕ꧀ꦕꦤ꧀ꦣꦺꦴ ꦥꦸꦫꦶꦱꦺꦴ; ꦱꦺꦴ ꦤ ꦥꦱ꧀ꦱꦺꦪ꧀ꦪ ꦏꦟ꧀ꦲꦱꦸꦏ꧀ꦏꦴꦤꦶ ꦫꦹꦥꦴꦤꦶ, ꦤ ꦥꦱ꧀ꦱꦺꦪ꧀ꦪ ꦤꦷꦭꦏꦴꦤꦶ ꦫꦹꦥꦴꦤꦶ, ꦤ ꦥꦱ꧀ꦱꦺꦪ꧀ꦪ ꦥꦷꦠꦏꦴꦤꦶ ꦫꦹꦥꦴꦤꦶ, ꦤ ꦥꦱ꧀ꦱꦺꦪ꧀ꦪ ꦭꦺꦴꦲꦶꦠꦏꦴꦤꦶ ꦫꦹꦥꦴꦤꦶ, ꦤ ꦥꦱ꧀ꦱꦺꦪ꧀ꦪ ꦩꦚ꧀ꦗꦶꦛ꧀ꦜꦏꦴꦤꦶ ꦫꦹꦥꦴꦤꦶ, ꦤ ꦥꦱ꧀ꦱꦺꦪ꧀ꦪ ꦱꦩꦮꦶꦱꦩꦁ, ꦤ ꦥꦱ꧀ꦱꦺꦪ꧀ꦪ ꦠꦴꦫꦏꦫꦹꦥꦴꦤꦶ, ꦤ ꦥꦱ꧀ꦱꦺꦪ꧀ꦪ ꦕꦤ꧀ꦢꦶꦩꦱꦹꦫꦶꦪꦺ. ꦠꦱ꧀ꦱ ꦩꦶꦠ꧀ꦠꦴꦩꦕ꧀ꦕꦴ ꦚꦴꦠꦶꦱꦴꦭꦺꦴꦲꦶꦠꦴ ꦨꦶꦱꦏ꧀ꦏꦁ ꦱꦭ꧀ꦭꦏꦠ꧀ꦠꦁ ꦈꦥꦛ꧀ꦜꦴꦥꦺꦪ꧀ꦪꦸꦁ. ꦠꦱ꧀ꦱ ꦱꦺꦴ ꦨꦶꦱꦏ꧀ꦏꦺꦴ ꦱꦭ꧀ꦭꦏꦠ꧀ꦠꦺꦴ ꦨꦺꦱꦗ꧀ꦗꦁ ꦏꦫꦺꦪ꧀ꦪ. ꦱꦺꦴ ꦠꦁ ꦨꦺꦱꦗ꧀ꦗꦁ ꦄꦴꦒꦩ꧀ꦩ ꦤ ꦕꦏ꧀ꦑꦹꦤꦶ ꦈꦥ꧀ꦥꦴꦢꦺꦪ꧀ꦪ, ꦤ ꦕꦏ꧀ꦑꦹꦤꦶ ꦮꦶꦱꦺꦴꦣꦺꦪ꧀ꦪ. ꦠꦁ ꦏꦶꦁ ꦩꦚ꧀ꦚꦱꦶ, ꦩꦴꦒꦟ꧀ꦝꦶꦪ, ꦤꦤꦸ ꦱꦺꦴ ꦮꦺꦗ꧀ꦗꦺꦴ ꦪꦴꦮꦢꦺꦮ ꦏꦶꦭꦩꦡꦱ꧀ꦱ ꦮꦶꦓꦴꦠꦱ꧀ꦱ ꦨꦴꦒꦷ ꦄꦱ꧀ꦱꦴ’’ꦠꦶ? ‘‘ꦌꦮꦁ, ꦨꦺꦴ ꦒꦺꦴꦠꦩ’’. ‘‘ꦌꦮꦩꦺꦮ ꦑꦺꦴ, ꦩꦴꦒꦟ꧀ꦝꦶꦪ, ꦄꦲꦚ꧀ꦕꦺ ꦠꦺ ꦣꦩ꧀ꦩꦁ ꦢꦺꦱꦺꦪ꧀ꦪꦁ – ‘ꦆꦢꦤ꧀ꦠꦁ ꦄꦴꦫꦺꦴꦒ꧀ꦪꦁ, ꦆꦢꦤ꧀ꦠꦁ ꦤꦶꦧ꧀ꦧꦴꦤ’ꦤ꧀ꦠꦶ, ꦱꦺꦴ ꦠ꧀ꦮꦁ ꦄꦴꦫꦺꦴꦒ꧀ꦪꦁ ꦤ ꦗꦴꦤꦺꦪ꧀ꦪꦴꦱꦶ, ꦤꦶꦧ꧀ꦧꦴꦤꦁ ꦤ ꦥꦱ꧀ꦱꦺꦪ꧀ꦪꦴꦱꦶ. ꦱꦺꦴ ꦩꦩꦱ꧀ꦱ ꦏꦶꦭꦩꦡꦺꦴ, ꦱꦴ ꦩꦩꦱ꧀ꦱ ꦮꦶꦲꦺꦱꦴ’’ꦠꦶ. ‘‘ꦌꦮꦁ ꦥꦱꦤ꧀ꦤꦺꦴ ꦄꦲꦁ ꦨꦺꦴꦠꦺꦴ ꦒꦺꦴꦠꦩꦱ꧀ꦱ. ꦥꦲꦺꦴꦠꦶ ꦩꦺ ꦨꦮꦁ ꦒꦺꦴꦠꦩꦺꦴ ꦠꦡꦴ ꦣꦩ꧀ꦩꦁ ꦢꦺꦱꦺꦠꦸꦁ ꦪꦡꦴꦲꦁ ꦄꦴꦫꦺꦴꦒ꧀ꦪꦁ ꦗꦴꦤꦺꦪ꧀ꦪꦁ, ꦤꦶꦧ꧀ꦧꦴꦤꦁ ꦥꦱ꧀ꦱꦺꦪ꧀ꦪ’’ꦤ꧀ꦠꦶ.

꧒꧒꧐. ‘‘ꦱꦺꦪ꧀ꦪꦡꦴꦥꦶ, ꦩꦴꦒꦟ꧀ꦝꦶꦪ, ꦗꦕ꧀ꦕꦤ꧀ꦣꦺꦴ ꦥꦸꦫꦶꦱꦺꦴ; ꦱꦺꦴ ꦤ ꦥꦱ꧀ꦱꦺꦪ꧀ꦪ ꦏꦟ꧀ꦲꦱꦸꦏ꧀ꦏꦴꦤꦶ ꦫꦹꦥꦴꦤꦶ, ꦤ ꦥꦱ꧀ꦱꦺꦪ꧀ꦪ ꦤꦷꦭꦏꦴꦤꦶ ꦫꦹꦥꦴꦤꦶ, ꦤ ꦥꦱ꧀ꦱꦺꦪ꧀ꦪ ꦥꦷꦠꦏꦴꦤꦶ ꦫꦹꦥꦴꦤꦶ, ꦤ ꦥꦱ꧀ꦱꦺꦪ꧀ꦪ ꦭꦺꦴꦲꦶꦠꦏꦴꦤꦶ ꦫꦹꦥꦴꦤꦶ, ꦤ ꦥꦱ꧀ꦱꦺꦪ꧀ꦪ ꦩꦚ꧀ꦗꦶꦛ꧀ꦜꦏꦴꦤꦶ ꦫꦹꦥꦴꦤꦶ, ꦤ ꦥꦱ꧀ꦱꦺꦪ꧀ꦪ ꦱꦩꦮꦶꦱꦩꦁ, ꦤ ꦥꦱ꧀ꦱꦺꦪ꧀ꦪ ꦠꦴꦫꦏꦫꦹꦥꦴꦤꦶ, ꦤ ꦥꦱ꧀ꦱꦺꦪ꧀ꦪ ꦕꦤ꧀ꦢꦶꦩꦱꦹꦫꦶꦪꦺ. ꦱꦺꦴ ꦱꦸꦟꦺꦪ꧀ꦪ ꦕꦏ꧀ꦑꦸꦩꦠꦺꦴ ꦨꦴꦱꦩꦴꦤꦱ꧀ꦱ – ‘ꦖꦺꦏꦁ ꦮꦠ, ꦨꦺꦴ, ꦎꦢꦴꦠꦁ ꦮꦠ꧀ꦡꦁ ꦄꦨꦶꦫꦹꦥꦁ ꦤꦶꦩ꧀ꦩꦭꦁ ꦱꦸꦕꦷ’ꦠꦶ! ꦱꦺꦴ ꦎꦢꦴꦠꦥꦫꦶꦪꦺꦱꦤꦁ ꦕꦫꦺꦪ꧀ꦪ. ꦠꦩꦺꦤꦁ ꦄꦚ꧀ꦚꦠꦫꦺꦴ ꦥꦸꦫꦶꦱꦺꦴ ꦠꦺꦭꦩꦭꦶꦏꦠꦺꦤ ꦱꦴꦲꦸꦭ꦳ꦶꦕꦷꦫꦺꦤ ꦮꦚ꧀ꦕꦺꦪ꧀ꦪ – ‘ꦆꦢꦁ ꦠꦺ, ꦄꦩ꧀ꦨꦺꦴ ꦥꦸꦫꦶꦱ, ꦎꦢꦴꦠꦁ ꦮꦠ꧀ꦡꦁ ꦄꦨꦶꦫꦹꦥꦁ ꦤꦶꦩ꧀ꦩꦭꦁ ꦱꦸꦕꦷ’ꦠꦶ. ꦱꦺꦴ ꦠꦁ ꦥꦛꦶꦒ꧀ꦒꦟ꧀ꦲꦺꦪ꧀ꦪ, ꦥꦛꦶꦒ꧀ꦒꦲꦺꦠ꧀ꦮꦴ ꦥꦴꦫꦸꦥꦺꦪ꧀ꦪ. ꦠꦱ꧀ꦱ ꦩꦶꦠ꧀ꦠꦴꦩꦕ꧀ꦕꦴ ꦚꦴꦠꦶꦱꦴꦭꦺꦴꦲꦶꦠꦴ ꦨꦶꦱꦏ꧀ꦏꦁ ꦱꦭ꧀ꦭꦏꦠ꧀ꦠꦁ ꦈꦥꦛ꧀ꦜꦴꦥꦺꦪ꧀ꦪꦸꦁ. ꦠꦱ꧀ꦱ ꦱꦺꦴ ꦨꦶꦱꦏ꧀ꦏꦺꦴ ꦱꦭ꧀ꦭꦏꦠ꧀ꦠꦺꦴ ꦨꦺꦱꦗ꧀ꦗꦁ ꦏꦫꦺꦪ꧀ꦪ – ꦈꦢ꧀ꦣꦁꦮꦶꦫꦺꦕꦤꦁ ꦄꦣꦺꦴꦮꦶꦫꦺꦕꦤꦁ ꦄꦚ꧀ꦗꦤꦁ ꦥꦕ꧀ꦕꦚ꧀ꦗꦤꦁ ꦤꦠ꧀ꦡꦸꦏꦩ꧀ꦩꦁ. ꦱꦺꦴ ꦠꦁ ꦨꦺꦱꦗ꧀ꦗꦁ ꦄꦴꦒꦩ꧀ꦩ ꦕꦏ꧀ꦑꦹꦤꦶ ꦈꦥ꧀ꦥꦴꦢꦺꦪ꧀ꦪ, ꦕꦏ꧀ꦑꦹꦤꦶ ꦮꦶꦱꦺꦴꦣꦺꦪ꧀ꦪ. ꦠꦱ꧀ꦱ ꦱꦲ ꦕꦏ꧀ꦑꦸꦥ꧀ꦥꦴꦢꦴ ꦪꦺꦴ ꦄꦩꦸꦱ꧀ꦩꦶꦁ ꦠꦺꦭꦩꦭꦶꦏꦠꦺ ꦱꦴꦲꦸꦭ꦳ꦶꦕꦷꦫꦺ ꦖꦤ꧀ꦢꦫꦴꦒꦺꦴ ꦱꦺꦴ ꦥꦲꦷꦪꦺꦡ. ꦠꦚ꧀ꦕ ꦤꦁ ꦥꦸꦫꦶꦱꦁ ꦄꦩꦶꦠ꧀ꦠꦠꦺꦴꦥꦶ ꦢꦲꦺꦪ꧀ꦪ, ꦥꦕ꧀ꦕꦠ꧀ꦡꦶꦏꦠꦺꦴꦥꦶ ꦢꦲꦺꦪ꧀ꦪ, ꦄꦥꦶ ꦕ ꦗꦷꦮꦶꦠꦴ ꦮꦺꦴꦫꦺꦴꦥꦺꦠꦧ꧀ꦧꦁ ꦩꦚ꧀ꦚꦺꦪ꧀ꦪ – ‘ꦢꦷꦓꦫꦠ꧀ꦠꦁ ꦮꦠ, ꦨꦺꦴ, ꦄꦲꦁ ꦆꦩꦶꦤꦴ ꦥꦸꦫꦶꦱꦺꦤ ꦠꦺꦭꦩꦭꦶꦏꦠꦺꦤ ꦱꦴꦲꦸꦭ꦳ꦶꦕꦷꦫꦺꦤ ꦤꦶꦏꦠꦺꦴ ꦮꦚ꧀ꦕꦶꦠꦺꦴ ꦥꦭꦸꦢ꧀ꦣꦺꦴ – ꦆꦢꦁ ꦠꦺ, ꦄꦩ꧀ꦨꦺꦴ ꦥꦸꦫꦶꦱ, ꦎꦢꦴꦠꦁ ꦮꦠ꧀ꦡꦁ ꦄꦨꦶꦫꦹꦥꦁ ꦤꦶꦩ꧀ꦩꦭꦁ ꦱꦸꦕꦷ’ꦠꦶ. ꦌꦮꦩꦺꦮ ꦑꦺꦴ, ꦩꦴꦒꦟ꧀ꦝꦶꦪ, ꦄꦲꦚ꧀ꦕꦺ ꦠꦺ ꦣꦩ꧀ꦩꦁ ꦢꦺꦱꦺꦪ꧀ꦪꦁ – ‘ꦆꦢꦤ꧀ꦠꦁ ꦄꦴꦫꦺꦴꦒ꧀ꦪꦁ, ꦆꦢꦤ꧀ꦠꦁ ꦤꦶꦧ꧀ꦧꦴꦤ’ꦤ꧀ꦠꦶ. ꦱꦺꦴ ꦠ꧀ꦮꦁ ꦄꦴꦫꦺꦴꦒ꧀ꦪꦁ ꦗꦴꦤꦺꦪ꧀ꦪꦴꦱꦶ, ꦤꦶꦧ꧀ꦧꦴꦤꦁ ꦥꦱ꧀ꦱꦺꦪ꧀ꦪꦴꦱꦶ. ꦠꦱ꧀ꦱ ꦠꦺ ꦱꦲ ꦕꦏ꧀ꦑꦸꦥ꧀ꦥꦴꦢꦴ ꦪꦺꦴ ꦥꦚ꧀ꦕꦱꦸꦥꦴꦢꦴꦤꦏ꧀ꦑꦤ꧀ꦣꦺꦱꦸ ꦖꦤ꧀ꦢꦫꦴꦒꦺꦴ ꦱꦺꦴ ꦥꦲꦷꦪꦺꦡ; ꦄꦥꦶ ꦕ ꦠꦺ ꦌꦮꦩꦱ꧀ꦱ – ‘ꦢꦷꦓꦫꦠ꧀ꦠꦁ ꦮꦠ, ꦨꦺꦴ, ꦄꦲꦁ ꦆꦩꦶꦤꦴ ꦕꦶꦠ꧀ꦠꦺꦤ ꦤꦶꦏꦠꦺꦴ ꦮꦚ꧀ꦕꦶꦠꦺꦴ ꦥꦭꦸꦢ꧀ꦣꦺꦴ [ꦥꦭꦢ꧀ꦣꦺꦴ (ꦱꦷ. ꦥꦷ.)]. ꦄꦲꦚ꧀ꦲꦶ ꦫꦹꦥꦁꦪꦺꦮ ꦈꦥꦴꦢꦶꦪꦩꦴꦤꦺꦴ ꦈꦥꦴꦢꦶꦪꦶꦁ, ꦮꦺꦢꦤꦁꦪꦺꦮ ꦈꦥꦴꦢꦶꦪꦩꦴꦤꦺꦴ ꦈꦥꦴꦢꦶꦪꦶꦁ, ꦱꦚ꧀ꦚꦁꦪꦺꦮ ꦈꦥꦴꦢꦶꦪꦩꦴꦤꦺꦴ ꦈꦥꦴꦢꦶꦪꦶꦁ, ꦱꦔ꧀ꦑꦴꦫꦺꦪꦺꦮ ꦈꦥꦴꦢꦶꦪꦩꦴꦤꦺꦴ ꦈꦥꦴꦢꦶꦪꦶꦁ, ꦮꦶꦚ꧀ꦚꦴꦟꦁꦪꦺꦮ ꦈꦥꦴꦢꦶꦪꦩꦴꦤꦺꦴ ꦈꦥꦴꦢꦶꦪꦶꦁ. ꦠꦱ꧀ꦱ ꦩꦺ ꦈꦥꦴꦢꦴꦤꦥꦕ꧀ꦕꦪꦴ ꦨꦮꦺꦴ, ꦨꦮꦥꦕ꧀ꦕꦪꦴ ꦗꦴꦠꦶ, ꦗꦴꦠꦶꦥꦕ꧀ꦕꦪꦴ ꦗꦫꦴꦩꦫꦟꦁ ꦱꦺꦴꦏꦥꦫꦶꦢꦺꦮꦢꦸꦏ꧀ꦑꦢꦺꦴꦩꦤꦱ꧀ꦱꦸꦥꦴꦪꦴꦱꦴ ꦱꦩ꧀ꦨꦮꦤ꧀ꦠꦶ; ꦌꦮꦩꦺꦠꦱ꧀ꦱ ꦏꦺꦮꦭꦱ꧀ꦱ ꦢꦸꦏ꧀ꦑꦏ꧀ꦑꦤ꧀ꦣꦱ꧀ꦱ ꦱꦩꦸꦢꦪꦺꦴ ꦲꦺꦴꦠꦷ’’’ꦠꦶ. ‘‘ꦌꦮꦁ ꦥꦱꦤ꧀ꦤꦺꦴ ꦄꦲꦁ ꦨꦺꦴꦠꦺꦴ ꦒꦺꦴꦠꦩꦱ꧀ꦱ! ꦥꦲꦺꦴꦠꦶ ꦩꦺ ꦨꦮꦁ ꦒꦺꦴꦠꦩꦺꦴ ꦠꦡꦴ ꦣꦩ꧀ꦩꦁ ꦢꦺꦱꦺꦠꦸꦁ ꦪꦡꦴꦲꦁ ꦆꦩꦩ꧀ꦲꦴ ꦄꦴꦱꦤꦴ ꦄꦤꦤ꧀ꦣꦺꦴ ꦮꦸꦛ꧀ꦜꦲꦺꦪ꧀ꦪ’’ꦤ꧀ꦠꦶ.

꧒꧒꧑. ‘‘ꦠꦺꦤ ꦲꦶ ꦠ꧀ꦮꦁ, ꦩꦴꦒꦟ꧀ꦝꦶꦪ, ꦱꦥ꧀ꦥꦸꦫꦶꦱꦺ ꦨꦗꦺꦪ꧀ꦪꦴꦱꦶ. ꦪꦠꦺꦴ ꦑꦺꦴ ꦠ꧀ꦮꦁ, ꦩꦴꦒꦟ꧀ꦝꦶꦪ, ꦱꦥ꧀ꦥꦸꦫꦶꦱꦺ ꦨꦗꦶꦱ꧀ꦱꦱꦶ ꦠꦠꦺꦴ ꦠ꧀ꦮꦁ, ꦩꦴꦒꦟ꧀ꦝꦶꦪ, ꦱꦢ꧀ꦣꦩ꧀ꦩꦁ ꦱꦺꦴꦱ꧀ꦱꦱꦶ; ꦪꦠꦺꦴ ꦑꦺꦴ ꦠ꧀ꦮꦁ, ꦩꦴꦒꦟ꧀ꦝꦶꦪ, ꦱꦢ꧀ꦣꦩ꧀ꦩꦁ ꦱꦺꦴꦱ꧀ꦱꦱꦶ ꦠꦠꦺꦴ ꦠ꧀ꦮꦁ, ꦩꦴꦒꦟ꧀ꦝꦶꦪ, ꦣꦩ꧀ꦩꦴꦤꦸꦣꦩ꧀ꦩꦁ ꦥꦛꦶꦥꦗ꧀ꦗꦶꦱ꧀ꦱꦱꦶ; ꦪꦠꦺꦴ ꦑꦺꦴ ꦠ꧀ꦮꦁ, ꦩꦴꦒꦟ꧀ꦝꦶꦪ, ꦣꦩ꧀ꦩꦴꦤꦸꦣꦩ꧀ꦩꦁ ꦥꦛꦶꦥꦗ꧀ꦗꦶꦱ꧀ꦱꦱꦶ ꦠꦠꦺꦴ ꦠ꧀ꦮꦁ, ꦩꦴꦒꦟ꧀ꦝꦶꦪ, ꦱꦴꦩꦁꦪꦺꦮ ꦚꦱ꧀ꦱꦱꦶ, ꦱꦴꦩꦁ ꦢꦏ꧀ꦑꦶꦱ꧀ꦱꦱꦶ – ꦆꦩꦺ ꦫꦺꦴꦒꦴ ꦒꦟ꧀ꦝꦴ ꦱꦭ꧀ꦭꦴ; ꦆꦣ ꦫꦺꦴꦒꦴ ꦒꦟ꧀ꦝꦴ ꦱꦭ꧀ꦭꦴ ꦄꦥꦫꦶꦱꦺꦱꦴ ꦤꦶꦫꦸꦗ꧀ꦙꦤ꧀ꦠꦶ. ꦠꦱ꧀ꦱ ꦩꦺ ꦈꦥꦴꦢꦴꦤꦤꦶꦫꦺꦴꦣꦴ ꦨꦮꦤꦶꦫꦺꦴꦣꦺꦴ, ꦨꦮꦤꦶꦫꦺꦴꦣꦴ ꦗꦴꦠꦶꦤꦶꦫꦺꦴꦣꦺꦴ, ꦗꦴꦠꦶꦤꦶꦫꦺꦴꦣꦴ ꦗꦫꦴꦩꦫꦟꦁ ꦱꦺꦴꦏꦥꦫꦶꦢꦺꦮꦢꦸꦏ꧀ꦑꦢꦺꦴꦩꦤꦱ꧀ꦱꦸꦥꦴꦪꦴꦱꦴ ꦤꦶꦫꦸꦗ꧀ꦙꦤ꧀ꦠꦶ; ꦌꦮꦩꦺꦠꦱ꧀ꦱ ꦏꦺꦮꦭꦱ꧀ꦱ ꦢꦸꦏ꧀ꦑꦏ꧀ꦑꦤ꧀ꦣꦱ꧀ꦱ ꦤꦶꦫꦺꦴꦣꦺꦴ ꦲꦺꦴꦠꦷ’’ꦠꦶ.

꧒꧒꧒. ꦌꦮꦁ ꦮꦸꦠ꧀ꦠꦺ, ꦩꦴꦒꦟ꧀ꦝꦶꦪꦺꦴ ꦥꦫꦶꦧ꧀ꦧꦴꦗꦏꦺꦴ ꦨꦒꦮꦤ꧀ꦠꦁ ꦌꦠꦢꦮꦺꦴꦕ – ‘‘ꦄꦨꦶꦏ꧀ꦏꦤ꧀ꦠꦁ, ꦨꦺꦴ ꦒꦺꦴꦠꦩ, ꦄꦨꦶꦏ꧀ꦏꦤ꧀ꦠꦁ, ꦨꦺꦴ ꦒꦺꦴꦠꦩ! ꦱꦺꦪ꧀ꦪꦡꦴꦥꦶ, ꦨꦺꦴ ꦒꦺꦴꦠꦩ, ꦤꦶꦏ꧀ꦏꦸꦗ꧀ꦗꦶꦠꦁ ꦮꦴ ꦈꦏ꧀ꦏꦸꦗ꧀ꦗꦺꦪ꧀ꦪ, ꦥꦛꦶꦕ꧀ꦖꦤ꧀ꦤꦁ ꦮꦴ ꦮꦶꦮꦫꦺꦪ꧀ꦪ, ꦩꦹꦭ꦳꧀ꦲꦱ꧀ꦱ ꦮꦴ ꦩꦒ꧀ꦒꦁ ꦄꦴꦕꦶꦏ꧀ꦑꦺꦪ꧀ꦪ, ꦄꦤ꧀ꦣꦏꦴꦫꦺ ꦮꦴ ꦠꦺꦭꦥꦗ꧀ꦗꦺꦴꦠꦁ ꦣꦴꦫꦺꦪ꧀ꦪ – ꦕꦏ꧀ꦑꦸꦩꦤ꧀ꦠꦺꦴ ꦫꦹꦥꦴꦤꦶ ꦢꦏ꧀ꦑꦤ꧀ꦠꦷꦠꦶ; ꦌꦮꦩꦺꦮꦁ ꦨꦺꦴꦠꦴ ꦒꦺꦴꦠꦩꦺꦤ ꦄꦤꦺꦏꦥꦫꦶꦪꦴꦪꦺꦤ ꦣꦩ꧀ꦩꦺꦴ ꦥꦏꦴꦱꦶꦠꦺꦴ. ꦌꦱꦴꦲꦁ ꦨꦮꦤ꧀ꦠꦁ ꦒꦺꦴꦠꦩꦁ ꦱꦫꦟꦁ ꦒꦕ꧀ꦖꦴꦩꦶ ꦣꦩ꧀ꦩꦚ꧀ꦕ ꦨꦶꦏ꧀ꦑꦸꦱꦔ꧀ꦓꦚ꧀ꦕ. ꦭꦨꦺꦪ꧀ꦪꦴꦲꦁ ꦨꦺꦴꦠꦺꦴ ꦒꦺꦴꦠꦩꦱ꧀ꦱ ꦱꦤ꧀ꦠꦶꦏꦺ ꦥꦧ꧀ꦧꦗ꧀ꦗꦁ, ꦭꦨꦺꦪ꧀ꦪꦁ ꦈꦥꦱꦩ꧀ꦥꦢ’’ꦤ꧀ꦠꦶ. ‘‘ꦪꦺꦴ ꦑꦺꦴ, ꦩꦴꦒꦟ꧀ꦝꦶꦪ, ꦄꦚ꧀ꦚꦠꦶꦠ꧀ꦡꦶꦪꦥꦸꦧ꧀ꦧꦺꦴ ꦆꦩꦱ꧀ꦩꦶꦁ ꦣꦩ꧀ꦩꦮꦶꦤꦪꦺ ꦄꦴꦏꦔ꧀ꦑꦠꦶ ꦥꦧ꧀ꦧꦗ꧀ꦗꦁ, ꦄꦴꦏꦔ꧀ꦑꦠꦶ ꦈꦥꦱꦩ꧀ꦥꦢꦁ, ꦱꦺꦴ ꦕꦠ꧀ꦠꦴꦫꦺꦴ ꦩꦴꦱꦺ ꦥꦫꦶꦮꦱꦠꦶ; ꦕꦠꦸꦤ꧀ꦤꦁ ꦩꦴꦱꦴꦤꦁ ꦄꦕ꧀ꦕꦪꦺꦤ ꦄꦴꦫꦢ꧀ꦣꦕꦶꦠ꧀ꦠꦴ ꦨꦶꦏ꧀ꦑꦹ ꦥꦧ꧀ꦧꦴꦗꦺꦤ꧀ꦠꦶ, ꦈꦥꦱꦩ꧀ꦥꦴꦢꦺꦤ꧀ꦠꦶ ꦨꦶꦏ꧀ꦑꦸꦨꦴꦮꦴꦪ. ꦄꦥꦶ ꦕ ꦩꦺꦠ꧀ꦡ ꦥꦸꦒ꧀ꦒꦭꦮꦺꦩꦠ꧀ꦠꦠꦴ ꦮꦶꦢꦶꦠꦴ’’ꦠꦶ. ‘‘ꦱꦕꦺ, ꦨꦤ꧀ꦠꦺ, ꦄꦚ꧀ꦚꦠꦶꦠ꧀ꦡꦶꦪꦥꦸꦧ꧀ꦧꦴ ꦆꦩꦱ꧀ꦩꦶꦁ ꦣꦩ꧀ꦩꦮꦶꦤꦪꦺ ꦄꦴꦏꦔ꧀ꦑꦤ꧀ꦠꦴ ꦥꦧ꧀ꦧꦗ꧀ꦗꦁ, ꦄꦴꦏꦔ꧀ꦑꦤ꧀ꦠꦴ ꦈꦥꦱꦩ꧀ꦥꦢꦁ ꦕꦠ꧀ꦠꦴꦫꦺꦴ ꦩꦴꦱꦺ ꦥꦫꦶꦮꦱꦤ꧀ꦠꦶ, ꦕꦠꦸꦤ꧀ꦤꦁ ꦩꦴꦱꦴꦤꦁ ꦄꦕ꧀ꦕꦪꦺꦤ ꦄꦴꦫꦢ꧀ꦣꦕꦶꦠ꧀ꦠꦴ ꦨꦶꦏ꧀ꦑꦹ ꦥꦧ꧀ꦧꦴꦗꦺꦤ꧀ꦠꦶ ꦈꦥꦱꦩ꧀ꦥꦴꦢꦺꦤ꧀ꦠꦶ ꦨꦶꦏ꧀ꦑꦸꦨꦴꦮꦴꦪ; ꦄꦲꦁ ꦕꦠ꧀ꦠꦴꦫꦶ ꦮꦱ꧀ꦱꦴꦤꦶ ꦥꦫꦶꦮꦱꦶꦱ꧀ꦱꦴꦩꦶ, ꦕꦠꦸꦤ꧀ꦤꦁ ꦮꦱ꧀ꦱꦴꦤꦁ ꦄꦕ꧀ꦕꦪꦺꦤ ꦄꦴꦫꦢ꧀ꦣꦕꦶꦠ꧀ꦠꦴ ꦨꦶꦏ꧀ꦑꦹ ꦥꦧ꧀ꦧꦴꦗꦺꦤ꧀ꦠꦸ, ꦈꦥꦱꦩ꧀ꦥꦴꦢꦺꦤ꧀ꦠꦸ ꦨꦶꦏ꧀ꦑꦸꦨꦴꦮꦴꦪꦴ’’ꦠꦶ. ꦄꦭꦠ꧀ꦡ ꦑꦺꦴ ꦩꦴꦒꦟ꧀ꦝꦶꦪꦺꦴ ꦥꦫꦶꦧ꧀ꦧꦴꦗꦏꦺꦴ ꦨꦒꦮꦠꦺꦴ ꦱꦤ꧀ꦠꦶꦏꦺ ꦥꦧ꧀ꦧꦗ꧀ꦗꦁ, ꦄꦭꦠ꧀ꦡ ꦈꦥꦱꦩ꧀ꦥꦢꦁ. ꦄꦕꦶꦫꦹꦥꦱꦩ꧀ꦥꦤ꧀ꦤꦺꦴ ꦑꦺꦴ ꦥꦤꦴꦪꦱ꧀ꦩꦴ ꦩꦴꦒꦟ꧀ꦝꦶꦪꦺꦴ ꦌꦏꦺꦴ ꦮꦹꦥꦏꦛ꧀ꦜꦺꦴ ꦄꦥ꧀ꦥꦩꦠ꧀ꦠꦺꦴ ꦄꦴꦠꦴꦥꦷ ꦥꦲꦶꦠꦠ꧀ꦠꦺꦴ ꦮꦶꦲꦫꦤ꧀ꦠꦺꦴ ꦤꦕꦶꦫꦱ꧀ꦱꦺꦮ – ꦪꦱ꧀ꦱꦠ꧀ꦡꦴꦪ ꦏꦸꦭꦥꦸꦠ꧀ꦠꦴ ꦱꦩ꧀ꦩꦢꦺꦮ ꦄꦒꦴꦫꦱ꧀ꦩꦴ ꦄꦤꦒꦴꦫꦶꦪꦁ ꦥꦧ꧀ꦧꦗꦤ꧀ꦠꦶ ꦠꦢꦤꦸꦠ꧀ꦠꦫꦁ – ꦧ꧀ꦫꦲ꧀ꦩꦕꦫꦶꦪꦥꦫꦶꦪꦺꦴꦱꦴꦤꦁ ꦢꦶꦛ꧀ꦜꦺꦮ ꦣꦩ꧀ꦩꦺ ꦱꦪꦁ ꦄꦨꦶꦚ꧀ꦚꦴ ꦱꦕ꧀ꦖꦶꦏꦠ꧀ꦮꦴ ꦈꦥꦱꦩ꧀ꦥꦗ꧀ꦗ ꦮꦶꦲꦴꦱꦶ. ‘ꦑꦷꦟꦴ ꦗꦴꦠꦶ, ꦮꦸꦱꦶꦠꦁ ꦧ꧀ꦫꦲ꧀ꦩꦕꦫꦶꦪꦁ, ꦏꦠꦁ ꦏꦫꦟꦷꦪꦁ, ꦤꦴꦥꦫꦁ ꦆꦠ꧀ꦡꦠ꧀ꦠꦴꦪꦴ’ꦠꦶ ꦄꦧ꧀ꦨꦚ꧀ꦚꦴꦱꦶ. ꦄꦚ꧀ꦚꦠꦫꦺꦴ ꦑꦺꦴ ꦥꦤꦴꦪꦱ꧀ꦩꦴ ꦩꦴꦒꦟ꧀ꦝꦶꦪꦺꦴ ꦄꦫꦲꦠꦁ ꦄꦲꦺꦴꦱꦷꦠꦶ.

ꦩꦴꦒꦟ꧀ꦝꦶꦪꦱꦸꦠ꧀ꦠꦁ ꦤꦶꦛ꧀ꦜꦶꦠꦁ ꦥꦚ꧀ꦕꦩꦁ.

꧖. ꦱꦤ꧀ꦢꦏꦱꦸꦠ꧀ꦠꦁ

꧒꧒꧓. ꦌꦮꦁ ꦩꦺ ꦱꦸꦠꦁ – ꦌꦏꦁ ꦱꦩꦪꦁ ꦨꦒꦮꦴ ꦏꦺꦴꦱꦩ꧀ꦧꦶꦪꦁ ꦮꦶꦲꦫꦠꦶ ꦓꦺꦴꦱꦶꦠꦴꦫꦴꦩꦺ. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦱꦤ꧀ꦢꦏꦺꦴ ꦥꦫꦶꦧ꧀ꦧꦴꦗꦏꦺꦴ ꦥꦶꦭꦏ꧀ꦑꦒꦸꦲꦴꦪꦁ ꦥꦛꦶꦮꦱꦠꦶ ꦩꦲꦠꦶꦪꦴ ꦥꦫꦶꦧ꧀ꦧꦴꦗꦏꦥꦫꦶꦱꦴꦪ ꦱꦢ꧀ꦣꦶꦁ ꦥꦚ꧀ꦕꦩꦠ꧀ꦠꦺꦲꦶ ꦥꦫꦶꦧ꧀ꦧꦴꦗꦏꦱꦠꦺꦲꦶ. ꦄꦡ ꦑꦺꦴ ꦄꦴꦪꦱ꧀ꦩꦴ ꦄꦴꦤꦤ꧀ꦢꦺꦴ ꦱꦴꦪꦤ꧀ꦲꦱꦩꦪꦁ ꦥꦛꦶꦱꦭ꧀ꦭꦴꦤꦴ ꦮꦸꦛ꧀ꦜꦶꦠꦺꦴ ꦨꦶꦏ꧀ꦑꦹ ꦄꦴꦩꦤ꧀ꦠꦺꦱꦶ – ‘‘ꦄꦴꦪꦴꦩꦴꦮꦸꦱꦺꦴ, ꦪꦺꦤ ꦢꦺꦮꦏꦠꦱꦺꦴꦧ꧀ꦨꦺꦴ ꦠꦺꦤꦸꦥꦱꦔ꧀ꦏꦩꦶꦱ꧀ꦱꦴꦩ ꦒꦸꦲꦴꦢꦱ꧀ꦱꦤꦴꦪꦴ’’ꦠꦶ. ‘‘ꦌꦮꦩꦴꦮꦸꦱꦺꦴ’’ꦠꦶ ꦑꦺꦴ ꦠꦺ ꦨꦶꦏ꧀ꦑꦹ ꦄꦴꦪꦱ꧀ꦩꦠꦺꦴ ꦄꦴꦤꦤ꧀ꦢꦱ꧀ꦱ ꦥꦕ꧀ꦕꦱ꧀ꦱꦺꦴꦱꦸꦁ. ꦄꦡ ꦑꦺꦴ ꦄꦴꦪꦱ꧀ꦩꦴ ꦄꦴꦤꦤ꧀ꦢꦺꦴ ꦱꦩ꧀ꦧꦲꦸꦭꦺꦲꦶ ꦨꦶꦏ꧀ꦑꦹꦲꦶ ꦱꦢ꧀ꦣꦶꦁ ꦪꦺꦤ ꦢꦺꦮꦏꦠꦱꦺꦴꦧ꧀ꦨꦺꦴ ꦠꦺꦤꦸꦥꦱꦔ꧀ꦏꦩꦶ. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦱꦤ꧀ꦢꦏꦺꦴ ꦥꦫꦶꦧ꧀ꦧꦴꦗꦏꦺꦴ ꦩꦲꦠꦶꦪꦴ ꦥꦫꦶꦧ꧀ꦧꦴꦗꦏꦥꦫꦶꦱꦴꦪ ꦱꦢ꧀ꦣꦶꦁ ꦤꦶꦱꦶꦤ꧀ꦤꦺꦴ ꦲꦺꦴꦠꦶ ꦈꦤ꧀ꦤꦴꦢꦶꦤꦶꦪꦴ ꦈꦕ꧀ꦕꦴꦱꦢ꧀ꦢꦩꦲꦴꦱꦢ꧀ꦢꦴꦪ ꦄꦤꦺꦏꦮꦶꦲꦶꦠꦁ ꦠꦶꦫꦕ꧀ꦖꦴꦤꦏꦡꦁ ꦏꦡꦺꦤ꧀ꦠꦶꦪꦴ, ꦱꦺꦪ꧀ꦪꦡꦶꦢꦁ – ꦫꦴꦗꦏꦡꦁ ꦕꦺꦴꦫꦏꦡꦁ ꦩꦲꦴꦩꦠ꧀ꦠꦏꦡꦁ ꦱꦺꦤꦴꦏꦡꦁ ꦨꦪꦏꦡꦁ ꦪꦸꦢ꧀ꦣꦏꦡꦁ ꦄꦤ꧀ꦤꦏꦡꦁ ꦥꦴꦤꦏꦡꦁ ꦮꦠ꧀ꦡꦏꦡꦁ ꦱꦪꦤꦏꦡꦁ ꦩꦴꦭꦴꦏꦡꦁ ꦒꦤ꧀ꦣꦏꦡꦁ ꦚꦴꦠꦶꦏꦡꦁ ꦪꦴꦤꦏꦡꦁ ꦒꦴꦩꦏꦡꦁ ꦤꦶꦒꦩꦏꦡꦁ ꦤꦒꦫꦏꦡꦁ ꦗꦤꦥꦢꦏꦡꦁ ꦆꦠ꧀ꦡꦶꦏꦡꦁ ꦱꦹꦫꦏꦡꦁ ꦮꦶꦱꦶꦑꦴꦏꦡꦁ ꦏꦸꦩ꧀ꦨꦛ꧀ꦜꦴꦤꦏꦡꦁ ꦥꦸꦧ꧀ꦧꦥꦺꦠꦏꦡꦁ ꦤꦴꦤꦠ꧀ꦠꦏꦡꦁ ꦭꦺꦴꦏꦏ꧀ꦑꦴꦪꦶꦏꦁ ꦱꦩꦸꦢ꧀ꦢꦏ꧀ꦑꦴꦪꦶꦏꦁ ꦆꦠꦶꦨꦮꦴꦨꦮꦏꦡꦁ ꦆꦠꦶ ꦮꦴ. ꦄꦢ꧀ꦢꦱꦴ ꦑꦺꦴ ꦱꦤ꧀ꦢꦏꦺꦴ ꦥꦫꦶꦧ꧀ꦧꦴꦗꦏꦺꦴ ꦄꦴꦪꦱ꧀ꦩꦤ꧀ꦠꦁ ꦄꦴꦤꦤ꧀ꦢꦁ ꦢꦹꦫꦠꦺꦴꦮ ꦄꦴꦒꦕ꧀ꦖꦤ꧀ꦠꦁ. ꦢꦶꦱ꧀ꦮꦴꦤ ꦱꦏꦁ ꦥꦫꦶꦱꦁ ꦱꦟ꧀ꦜꦴꦥꦺꦱꦶ – ‘‘ꦄꦥ꧀ꦥꦱꦢ꧀ꦢꦴ ꦨꦺꦴꦤ꧀ꦠꦺꦴ ꦲꦺꦴꦤ꧀ꦠꦸ, ꦩꦴ ꦨꦺꦴꦤ꧀ꦠꦺꦴ ꦱꦢ꧀ꦢꦩꦏꦠ꧀ꦡ; ꦄꦪꦁ ꦱꦩꦟꦱ꧀ꦱ ꦒꦺꦴꦠꦩꦱ꧀ꦱ ꦱꦴꦮꦏꦺꦴ ꦄꦴꦒꦕ꧀ꦖꦠꦶ ꦱꦩꦟꦺꦴ ꦄꦴꦤꦤ꧀ꦢꦺꦴ. ꦪꦴꦮꦠꦴ ꦑꦺꦴ ꦥꦤ ꦱꦩꦟꦱ꧀ꦱ ꦒꦺꦴꦠꦩꦱ꧀ꦱ ꦱꦴꦮꦏꦴ ꦏꦺꦴꦱꦩ꧀ꦧꦶꦪꦁ ꦥꦛꦶꦮꦱꦤ꧀ꦠꦶ, ꦄꦪꦁ ꦠꦺꦱꦁ ꦄꦚ꧀ꦚꦠꦫꦺꦴ ꦱꦩꦟꦺꦴ ꦄꦴꦤꦤ꧀ꦢꦺꦴ. ꦄꦥ꧀ꦥꦱꦢ꧀ꦢꦏꦴꦩꦴ ꦑꦺꦴ ꦥꦤ ꦠꦺ ꦄꦴꦪꦱ꧀ꦩꦤ꧀ꦠꦺꦴ ꦄꦥ꧀ꦥꦱꦢ꧀ꦢꦮꦶꦤꦷꦠꦴ ꦄꦥ꧀ꦥꦱꦢ꧀ꦢꦱ꧀ꦱ ꦮꦟ꧀ꦟꦮꦴꦢꦶꦤꦺꦴ; ꦄꦥ꧀ꦥꦺꦮ ꦤꦴꦩ ꦄꦥ꧀ꦥꦱꦢ꧀ꦢꦁ ꦥꦫꦶꦱꦁ ꦮꦶꦢꦶꦠ꧀ꦮꦴ ꦈꦥꦱꦔ꧀ꦏꦩꦶꦠꦧ꧀ꦧꦁ ꦩꦚ꧀ꦚꦺꦪ꧀ꦪꦴ’’ꦠꦶ. ꦄꦡ ꦑꦺꦴ ꦠꦺ ꦥꦫꦶꦧ꧀ꦧꦴꦗꦏꦴ ꦠꦸꦟ꧀ꦲꦷ ꦄꦲꦺꦱꦸꦁ.

꧒꧒꧔. ꦄꦡ ꦑꦺꦴ ꦄꦴꦪꦱ꧀ꦩꦴ ꦄꦴꦤꦤ꧀ꦢꦺꦴ ꦪꦺꦤ ꦱꦤ꧀ꦢꦏꦺꦴ ꦥꦫꦶꦧ꧀ꦧꦴꦗꦏꦺꦴ ꦠꦺꦤꦸꦥꦱꦔ꧀ꦏꦩꦶ. ꦄꦡ ꦑꦺꦴ ꦱꦤ꧀ꦢꦏꦺꦴ ꦥꦫꦶꦧ꧀ꦧꦴꦗꦏꦺꦴ ꦄꦴꦪꦱ꧀ꦩꦤ꧀ꦠꦁ ꦄꦴꦤꦤ꧀ꦢꦁ ꦌꦠꦢꦮꦺꦴꦕ – ‘‘ꦌꦠꦸ ꦑꦺꦴ ꦨꦮꦁ ꦄꦴꦤꦤ꧀ꦢꦺꦴ, ꦱ꧀ꦮꦴꦒꦠꦁ ꦨꦺꦴꦠꦺꦴ ꦄꦴꦤꦤ꧀ꦢꦱ꧀ꦱ. ꦕꦶꦫꦱ꧀ꦱꦁ ꦑꦺꦴ ꦨꦮꦁ ꦄꦴꦤꦤ꧀ꦢꦺꦴ ꦆꦩꦁ ꦥꦫꦶꦪꦴꦪꦩꦏꦴꦱꦶ ꦪꦢꦶꦢꦁ ꦆꦣꦴꦒꦩꦤꦴꦪ. ꦤꦶꦱꦷꦢꦠꦸ ꦨꦮꦁ ꦄꦴꦤꦤ꧀ꦢꦺꦴ, ꦆꦢꦩꦴꦱꦤꦁ ꦥꦚ꧀ꦚꦠ꧀ꦠ’’ꦤ꧀ꦠꦶ. ꦤꦶꦱꦷꦢꦶ ꦑꦺꦴ ꦄꦴꦪꦱ꧀ꦩꦴ ꦄꦴꦤꦤ꧀ꦢꦺꦴ ꦥꦚ꧀ꦚꦠ꧀ꦠꦺ ꦄꦴꦱꦤꦺ. ꦱꦤ꧀ꦢꦏꦺꦴꦥꦶ ꦑꦺꦴ ꦥꦫꦶꦧ꧀ꦧꦴꦗꦏꦺꦴ ꦄꦚ꧀ꦚꦠꦫꦁ ꦤꦷꦕꦁ ꦄꦴꦱꦤꦁ ꦒꦲꦺꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦷꦢꦶ. ꦌꦏꦩꦤ꧀ꦠꦁ ꦤꦶꦱꦶꦤ꧀ꦤꦁ ꦑꦺꦴ ꦱꦤ꧀ꦢꦏꦁ ꦥꦫꦶꦧ꧀ꦧꦴꦗꦏꦁ ꦄꦴꦪꦱ꧀ꦩꦴ ꦄꦴꦤꦤ꧀ꦢꦺꦴ ꦌꦠꦢꦮꦺꦴꦕ – ‘‘ꦏꦴꦪꦤꦸꦠ꧀ꦡ, ꦱꦤ꧀ꦢꦏ, ꦌꦠꦫꦲꦶ ꦏꦡꦴꦪ ꦱꦤ꧀ꦤꦶꦱꦶꦤ꧀ꦤꦴ, ꦏꦴ ꦕ ꦥꦤ ꦮꦺꦴ ꦄꦤ꧀ꦠꦫꦴꦏꦡꦴ ꦮꦶꦥ꧀ꦥꦏꦠꦴ’’ꦠꦶ? ‘‘ꦠꦶꦛ꧀ꦜꦠꦺꦱꦴ, ꦨꦺꦴ ꦄꦴꦤꦤ꧀ꦢ, ꦏꦡꦴ ꦪꦴꦪ ꦩꦪꦁ ꦌꦠꦫꦲꦶ ꦏꦡꦴꦪ ꦱꦤ꧀ꦤꦶꦱꦶꦤ꧀ꦤꦴ. ꦤꦺꦱꦴ ꦨꦺꦴꦠꦺꦴ ꦄꦴꦤꦤ꧀ꦢꦱ꧀ꦱ ꦏꦡꦴ ꦢꦸꦭ꧀ꦭꦨꦴ ꦨꦮꦶꦱ꧀ꦱꦠꦶ ꦥꦕ꧀ꦖꦴꦥꦶ ꦱꦮꦤꦴꦪ. ꦱꦴꦣꦸ ꦮꦠ ꦨꦮꦤ꧀ꦠꦁꦪꦺꦮ ꦄꦴꦤꦤ꧀ꦢꦁ ꦥꦛꦶꦨꦴꦠꦸ ꦱꦏꦺ ꦄꦴꦕꦫꦶꦪꦏꦺ ꦣꦩ꧀ꦩꦷꦏꦡꦴ’’ꦠꦶ. ‘‘ꦠꦺꦤ ꦲꦶ, ꦱꦤ꧀ꦢꦏ, ꦱꦸꦟꦴꦲꦶ, ꦱꦴꦣꦸꦏꦁ ꦩꦤꦱꦶ ꦏꦫꦺꦴꦲꦶ, ꦨꦴꦱꦶꦱ꧀ꦱꦴꦩꦷ’’ꦠꦶ. ‘‘ꦌꦮꦁ ꦨꦺꦴ’’ꦠꦶ ꦑꦺꦴ ꦱꦤ꧀ꦢꦏꦺꦴ ꦥꦫꦶꦧ꧀ꦧꦴꦗꦏꦺꦴ ꦄꦴꦪꦱ꧀ꦩꦠꦺꦴ ꦄꦴꦤꦤ꧀ꦢꦱ꧀ꦱ ꦥꦕ꧀ꦕꦱ꧀ꦱꦺꦴꦱꦶ. ꦄꦴꦪꦱ꧀ꦩꦴ ꦄꦴꦤꦤ꧀ꦢꦺꦴ ꦌꦠꦢꦮꦺꦴꦕ – ‘‘ꦕꦠ꧀ꦠꦴꦫꦺꦴꦩꦺ, ꦱꦤ꧀ꦢꦏ, ꦠꦺꦤ ꦨꦒꦮꦠꦴ ꦗꦴꦤꦠꦴ ꦥꦱ꧀ꦱꦠꦴ ꦄꦫꦲꦠꦴ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦤ ꦄꦧ꧀ꦫꦲ꧀ꦩꦕꦫꦶꦪꦮꦴꦱꦴ ꦄꦏ꧀ꦑꦴꦠꦴ ꦕꦠ꧀ꦠꦴꦫꦶ ꦕ ꦄꦤꦱ꧀ꦱꦴꦱꦶꦏꦴꦤꦶ ꦧ꧀ꦫꦲ꧀ꦩꦕꦫꦶꦪꦴꦤꦶ ꦄꦏ꧀ꦑꦴꦠꦴꦤꦶ, ꦪꦠ꧀ꦡ ꦮꦶꦚ꧀ꦚꦹ ꦥꦸꦫꦶꦱꦺꦴ ꦱꦱꦏ꧀ꦏꦁ ꦧ꧀ꦫꦲ꧀ꦩꦕꦫꦶꦪꦁ ꦤ ꦮꦱꦺꦪ꧀ꦪ, ꦮꦱꦤ꧀ꦠꦺꦴ ꦕ [ꦮꦱꦤ꧀ꦠꦺꦴ ꦮꦴ (ꦱꦷ. ꦥꦷ.) ꦌꦮꦩꦸꦥꦫꦶꦥꦶ ꦄꦤꦴꦫꦴꦣꦤꦥꦏ꧀ꦑꦺ] ꦤꦴꦫꦴꦣꦺꦪ꧀ꦪ ꦚꦴꦪꦁ ꦣꦩ꧀ꦩꦁ ꦏꦸꦱꦭ’’ꦤ꧀ꦠꦶ. ‘‘ꦏꦠꦩꦺ ꦥꦤ ꦠꦺ, ꦨꦺꦴ ꦄꦴꦤꦤ꧀ꦢ, ꦠꦺꦤ ꦨꦒꦮꦠꦴ ꦗꦴꦤꦠꦴ ꦥꦱ꧀ꦱꦠꦴ ꦄꦫꦲꦠꦴ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦤ ꦕꦠ꧀ꦠꦴꦫꦺꦴ ꦄꦧ꧀ꦫꦲ꧀ꦩꦕꦫꦶꦪꦮꦴꦱꦴ ꦄꦏ꧀ꦑꦴꦠꦴ, ꦪꦠ꧀ꦡ ꦮꦶꦚ꧀ꦚꦹ ꦥꦸꦫꦶꦱꦺꦴ ꦱꦱꦏ꧀ꦏꦁ ꦧ꧀ꦫꦲ꧀ꦩꦕꦫꦶꦪꦁ ꦤ ꦮꦱꦺꦪ꧀ꦪ, ꦮꦱꦤ꧀ꦠꦺꦴ ꦕ ꦤꦴꦫꦴꦣꦺꦪ꧀ꦪ ꦚꦴꦪꦁ ꦣꦩ꧀ꦩꦁ ꦏꦸꦱꦭ’’ꦤ꧀ꦠꦶ?

꧒꧒꧕. ‘‘ꦆꦣ, ꦱꦤ꧀ꦢꦏ, ꦌꦏꦕ꧀ꦕꦺꦴ ꦱꦠ꧀ꦡꦴ ꦌꦮꦁꦮꦴꦢꦷ ꦲꦺꦴꦠꦶ ꦌꦮꦁꦢꦶꦛ꧀ꦜꦶ – ‘ꦤꦠ꧀ꦡꦶ ꦢꦶꦤ꧀ꦤꦁ, ꦤꦠ꧀ꦡꦶ ꦪꦶꦛ꧀ꦜꦁ, ꦤꦠ꧀ꦡꦶ ꦲꦸꦠꦁ, ꦤꦠ꧀ꦡꦶ ꦱꦸꦏꦠꦢꦸꦏ꧀ꦏꦛꦴꦤꦁ ꦏꦩ꧀ꦩꦴꦤꦁ ꦦꦭꦁ ꦮꦶꦥꦴꦏꦺꦴ, ꦤꦠ꧀ꦡꦶ ꦄꦪꦁ ꦭꦺꦴꦏꦺꦴ, ꦤꦠ꧀ꦡꦶ ꦥꦫꦺꦴꦭꦺꦴꦏꦺꦴ, ꦤꦠ꧀ꦡꦶ ꦩꦴꦠꦴ, ꦤꦠ꧀ꦡꦶ ꦥꦶꦠꦴ, ꦤꦠ꧀ꦡꦶ ꦱꦠ꧀ꦠꦴ ꦎꦥꦥꦴꦠꦶꦏꦴ, ꦤꦠ꧀ꦡꦶ ꦭꦺꦴꦏꦺ ꦱꦩꦟꦧ꧀ꦫꦴꦲ꧀ꦩꦟꦴ ꦱꦩ꧀ꦩꦒ꧀ꦒꦠꦴ ꦱꦩ꧀ꦩꦴꦥꦛꦶꦥꦤ꧀ꦤꦴ ꦪꦺ ꦆꦩꦚ꧀ꦕ ꦭꦺꦴꦏꦁ ꦥꦫꦚ꧀ꦕ ꦭꦺꦴꦏꦁ ꦱꦪꦁ ꦄꦨꦶꦚ꧀ꦚꦴ ꦱꦕ꧀ꦖꦶꦏꦠ꧀ꦮꦴ ꦥꦮꦺꦢꦺꦤ꧀ꦠꦶ. ꦕꦴꦠꦸꦩꦲꦴꦨꦹꦠꦶꦏꦺꦴ ꦄꦪꦁ ꦥꦸꦫꦶꦱꦺꦴ ꦪꦢꦴ ꦏꦴꦭꦔ꧀ꦏꦫꦺꦴꦠꦶ, ꦥꦡꦮꦷ ꦥꦡꦮꦷꦏꦴꦪꦁ ꦄꦤꦸꦥꦺꦠꦶ ꦄꦤꦸꦥꦒꦕ꧀ꦖꦠꦶ, ꦄꦴꦥꦺꦴ ꦄꦴꦥꦺꦴꦏꦴꦪꦁ ꦄꦤꦸꦥꦺꦠꦶ ꦄꦤꦸꦥꦒꦕ꧀ꦖꦠꦶ, ꦠꦺꦗꦺꦴ ꦠꦺꦗꦺꦴꦏꦴꦪꦁ ꦄꦤꦸꦥꦺꦠꦶ ꦄꦤꦸꦥꦒꦕ꧀ꦖꦠꦶ, ꦮꦴꦪꦺꦴ ꦮꦴꦪꦺꦴꦏꦴꦪꦁ ꦄꦤꦸꦥꦺꦠꦶ ꦄꦤꦸꦥꦒꦕ꧀ꦖꦠꦶ, ꦄꦴꦏꦴꦱꦁ ꦆꦤ꧀ꦢ꧀ꦫꦶꦪꦴꦤꦶ ꦱꦔ꧀ꦏꦩꦤ꧀ꦠꦶ. ꦄꦴꦱꦤ꧀ꦢꦶꦥꦚ꧀ꦕꦩꦴ ꦥꦸꦫꦶꦱꦴ ꦩꦠꦁ ꦄꦴꦢꦴꦪ ꦒꦕ꧀ꦖꦤ꧀ꦠꦶ, ꦪꦴꦮꦴꦭ꦳ꦴꦲꦤꦴ ꦥꦢꦴꦤꦶ ꦥꦚ꧀ꦚꦴꦪꦤ꧀ꦠꦶ. ꦏꦴꦥꦺꦴꦠꦏꦴꦤꦶ ꦄꦛ꧀ꦜꦷꦤꦶ ꦨꦮꦤ꧀ꦠꦶ. ꦨꦱ꧀ꦱꦤ꧀ꦠꦴ ꦄꦴꦲꦸꦠꦶꦪꦺꦴ; ꦢꦠ꧀ꦠꦸꦥꦚ꧀ꦚꦠ꧀ꦠꦁ ꦪꦢꦶꦢꦁ ꦢꦴꦤꦁ. ꦠꦺꦱꦁ ꦠꦸꦕ꧀ꦖꦴ ꦩꦸꦱꦴ ꦮꦶꦭꦴꦥꦺꦴ ꦪꦺ ꦏꦺꦕꦶ ꦄꦠ꧀ꦡꦶꦏꦮꦴꦢꦁ ꦮꦢꦤ꧀ꦠꦶ. ꦧꦴꦭꦺ ꦕ ꦥꦟ꧀ꦝꦶꦠꦺ ꦕ ꦏꦴꦪꦱ꧀ꦱ ꦨꦺꦢꦴ ꦈꦕ꧀ꦖꦶꦗ꧀ꦗꦤ꧀ꦠꦶ ꦮꦶꦤꦱ꧀ꦱꦤ꧀ꦠꦶ ꦤ ꦲꦺꦴꦤ꧀ꦠꦶ ꦥꦫꦁ ꦩꦫꦟꦴ’ꦠꦶ.

‘‘ꦠꦠ꧀ꦫ, ꦱꦤ꧀ꦢꦏ, ꦮꦶꦚ꧀ꦚꦹ ꦥꦸꦫꦶꦱꦺꦴ ꦆꦠꦶ ꦥꦛꦶꦱꦚ꧀ꦕꦶꦏ꧀ꦑꦠꦶ – ‘ꦄꦪꦁ ꦑꦺꦴ ꦨꦮꦁ ꦱꦠ꧀ꦡꦴ ꦌꦮꦁꦮꦴꦢꦷ ꦌꦮꦁꦢꦶꦛ꧀ꦜꦶ – ꦤꦠ꧀ꦡꦶ ꦢꦶꦤ꧀ꦤꦁ, ꦤꦠ꧀ꦡꦶ ꦪꦶꦛ꧀ꦜꦁ, ꦤꦠ꧀ꦡꦶ ꦲꦸꦠꦁ, ꦤꦠ꧀ꦡꦶ ꦱꦸꦏꦠꦢꦸꦏ꧀ꦏꦛꦴꦤꦁ ꦏꦩ꧀ꦩꦴꦤꦁ ꦦꦭꦁ ꦮꦶꦥꦴꦏꦺꦴ, ꦤꦠ꧀ꦡꦶ ꦄꦪꦁ ꦭꦺꦴꦏꦺꦴ, ꦤꦠ꧀ꦡꦶ ꦥꦫꦺꦴꦭꦺꦴꦏꦺꦴ, ꦤꦠ꧀ꦡꦶ ꦩꦴꦠꦴ, ꦤꦠ꧀ꦡꦶ ꦥꦶꦠꦴ, ꦤꦠ꧀ꦡꦶ ꦱꦠ꧀ꦠꦴ ꦎꦥꦥꦴꦠꦶꦏꦴ, ꦤꦠ꧀ꦡꦶ ꦭꦺꦴꦏꦺ ꦱꦩꦟꦧ꧀ꦫꦴꦲ꧀ꦩꦟꦴ ꦱꦩ꧀ꦩꦒ꧀ꦒꦠꦴ ꦱꦩ꧀ꦩꦴꦥꦛꦶꦥꦤ꧀ꦤꦴ ꦪꦺ ꦆꦩꦚ꧀ꦕ ꦭꦺꦴꦏꦁ ꦥꦫꦚ꧀ꦕ ꦭꦺꦴꦏꦁ ꦱꦪꦁ ꦄꦨꦶꦚ꧀ꦚꦴ ꦱꦕ꧀ꦖꦶꦏꦠ꧀ꦮꦴ ꦥꦮꦺꦢꦺꦤ꧀ꦠꦶ. ꦕꦴꦠꦸꦩꦲꦴꦨꦹꦠꦶꦏꦺꦴ ꦄꦪꦁ ꦥꦸꦫꦶꦱꦺꦴ ꦪꦢꦴ ꦏꦴꦭꦔ꧀ꦏꦫꦺꦴꦠꦶ, ꦥꦡꦮꦷ ꦥꦡꦮꦷꦏꦴꦪꦁ ꦄꦤꦸꦥꦺꦠꦶ ꦄꦤꦸꦥꦒꦕ꧀ꦖꦠꦶ, ꦄꦴꦥꦺꦴ ꦄꦴꦥꦺꦴꦏꦴꦪꦁ ꦄꦤꦸꦥꦺꦠꦶ ꦄꦤꦸꦥꦒꦕ꧀ꦖꦠꦶ, ꦠꦺꦗꦺꦴ ꦠꦺꦗꦺꦴꦏꦴꦪꦁ ꦄꦤꦸꦥꦺꦠꦶ ꦄꦤꦸꦥꦒꦕ꧀ꦖꦠꦶ, ꦮꦴꦪꦺꦴ ꦮꦴꦪꦺꦴꦏꦴꦪꦁ ꦄꦤꦸꦥꦺꦠꦶ ꦄꦤꦸꦥꦒꦕ꧀ꦖꦠꦶ, ꦄꦴꦏꦴꦱꦁ ꦆꦤ꧀ꦢ꧀ꦫꦶꦪꦴꦤꦶ ꦱꦔ꧀ꦏꦩꦤ꧀ꦠꦶ. ꦄꦴꦱꦤ꧀ꦢꦶꦥꦚ꧀ꦕꦩꦴ ꦥꦸꦫꦶꦱꦴ ꦩꦠꦁ ꦄꦴꦢꦴꦪ ꦒꦕ꧀ꦖꦤ꧀ꦠꦶ, ꦪꦴꦮꦴꦭ꦳ꦴꦲꦤꦴ ꦥꦢꦴꦤꦶ ꦥꦚ꧀ꦚꦴꦪꦤ꧀ꦠꦶ. ꦏꦴꦥꦺꦴꦠꦏꦴꦤꦶ ꦄꦛ꧀ꦜꦷꦤꦶ ꦨꦮꦤ꧀ꦠꦶ. ꦨꦱ꧀ꦱꦤ꧀ꦠꦴ ꦄꦴꦲꦸꦠꦶꦪꦺꦴ; ꦢꦠ꧀ꦠꦸꦥꦚ꧀ꦚꦠ꧀ꦠꦁ ꦪꦢꦶꦢꦁ ꦢꦴꦤꦁ. ꦠꦺꦱꦁ ꦠꦸꦕ꧀ꦖꦴ ꦩꦸꦱꦴ ꦮꦶꦭꦴꦥꦺꦴ ꦪꦺ ꦏꦺꦕꦶ ꦄꦠ꧀ꦡꦶꦏꦮꦴꦢꦁ ꦮꦢꦤ꧀ꦠꦶ. ꦧꦴꦭꦺ ꦕ ꦥꦟ꧀ꦝꦶꦠꦺ ꦕ ꦏꦴꦪꦱ꧀ꦱ ꦨꦺꦢꦴ ꦈꦕ꧀ꦖꦶꦗ꧀ꦗꦤ꧀ꦠꦶ ꦮꦶꦤꦱ꧀ꦱꦤ꧀ꦠꦶ ꦤ ꦲꦺꦴꦤ꧀ꦠꦶ ꦥꦫꦁ ꦩꦫꦟꦴ’ꦠꦶ. ꦱꦕꦺ ꦆꦩꦱ꧀ꦱ ꦨꦺꦴꦠꦺꦴ ꦱꦠ꧀ꦡꦸꦤꦺꦴ ꦱꦕ꧀ꦕꦁ ꦮꦕꦤꦁ, ꦄꦏꦠꦺꦤ ꦩꦺ ꦌꦠ꧀ꦡ ꦏꦠꦁ, ꦄꦮꦸꦱꦶꦠꦺꦤ ꦩꦺ ꦌꦠ꧀ꦡ ꦮꦸꦱꦶꦠꦁ. ꦈꦨꦺꦴꦥꦶ ꦩꦪꦁ ꦌꦠ꧀ꦡ ꦱꦩꦱꦩꦴ ꦱꦴꦩꦚ꧀ꦚꦁ ꦥꦠ꧀ꦠꦴ, ꦪꦺꦴ ꦕꦴꦲꦁ ꦤ ꦮꦢꦴꦩꦶ ‘ꦈꦨꦺꦴ ꦏꦴꦪꦱ꧀ꦱ ꦨꦺꦢꦴ ꦈꦕ꧀ꦖꦶꦗ꧀ꦗꦶꦱ꧀ꦱꦴꦩ, ꦮꦶꦤꦱ꧀ꦱꦶꦱ꧀ꦱꦴꦩ, ꦤ ꦨꦮꦶꦱ꧀ꦱꦴꦩ ꦥꦫꦁ ꦩꦫꦟꦴ’ꦠꦶ. ꦄꦠꦶꦫꦺꦏꦁ ꦑꦺꦴ ꦥꦤꦶꦩꦱ꧀ꦱ ꦨꦺꦴꦠꦺꦴ ꦱꦠ꧀ꦡꦸꦤꦺꦴ ꦤꦒ꧀ꦒꦶꦪꦁ ꦩꦸꦟ꧀ꦝꦶꦪꦁ ꦈꦏ꧀ꦏꦸꦛꦶꦏꦥ꧀ꦥꦣꦴꦤꦁ ꦏꦺꦱꦩꦱ꧀ꦱꦸꦭꦺꦴꦕꦤꦁ ꦪꦺꦴꦲꦁ ꦥꦸꦠ꧀ꦠꦱꦩ꧀ꦧꦴꦣꦱꦪꦤꦁ [ꦥꦸꦠ꧀ꦠꦱꦩ꧀ꦧꦴꦣꦮꦱꦤꦁ (ꦱꦷ.)] ꦄꦗ꧀ꦙꦴꦮꦱꦤ꧀ꦠꦺꦴ ꦏꦴꦱꦶꦏꦕꦤ꧀ꦢꦤꦁ ꦥꦕ꧀ꦕꦤꦸꦨꦺꦴꦤ꧀ꦠꦺꦴ ꦩꦴꦭꦴꦒꦤ꧀ꦣꦮꦶꦭꦺꦥꦤꦁ ꦣꦴꦫꦺꦤ꧀ꦠꦺꦴ ꦗꦴꦠꦫꦹꦥꦫꦗꦠꦁ ꦱꦴꦢꦶꦪꦤ꧀ꦠꦺꦴ ꦆꦩꦶꦤꦴ ꦨꦺꦴꦠꦴ ꦱꦠ꧀ꦡꦴꦫꦴ ꦱꦩꦱꦩꦒꦠꦶꦏꦺꦴ ꦨꦮꦶꦱ꧀ꦱꦴꦩꦶ. ꦄꦨꦶꦱꦩ꧀ꦥꦫꦴꦪꦁ ꦱꦺꦴꦲꦁ ꦏꦶꦁ ꦗꦴꦤꦤ꧀ꦠꦺꦴ ꦏꦶꦁ ꦥꦱ꧀ꦱꦤ꧀ꦠꦺꦴ ꦆꦩꦱ꧀ꦩꦶꦁ ꦱꦠ꧀ꦡꦫꦶ ꦧ꧀ꦫꦲ꧀ꦩꦕꦫꦶꦪꦁ ꦕꦫꦶꦱ꧀ꦱꦴꦩꦶ? ‘ꦱꦺꦴ ꦄꦧ꧀ꦫꦲ꧀ꦩꦕꦫꦶꦪꦮꦴꦱꦺꦴ ꦄꦪ’ꦤ꧀ꦠꦶ – ꦆꦠꦶ ꦮꦶꦢꦶꦠ꧀ꦮꦴ ꦠꦱ꧀ꦩꦴ ꦧ꧀ꦫꦲ꧀ꦩꦕꦫꦶꦪꦴ ꦤꦶꦧ꧀ꦧꦶꦗ꧀ꦗ ꦥꦏ꧀ꦏꦩꦠꦶ [ꦤꦶꦧ꧀ꦧꦶꦗ꧀ꦗꦴꦥꦏ꧀ꦏꦩꦠꦶ (ꦱꦷ.)]. ꦄꦪꦁ ꦑꦺꦴ, ꦱꦤ꧀ꦢꦏ, ꦠꦺꦤ ꦨꦒꦮꦠꦴ ꦗꦴꦤꦠꦴ ꦥꦱ꧀ꦱꦠꦴ ꦄꦫꦲꦠꦴ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦤ ꦥꦜꦩꦺꦴ ꦄꦧ꧀ꦫꦲ꧀ꦩꦕꦫꦶꦪꦮꦴꦱꦺꦴ ꦄꦏ꧀ꦑꦴꦠꦺꦴ ꦪꦠ꧀ꦡ ꦮꦶꦚ꧀ꦚꦹ ꦥꦸꦫꦶꦱꦺꦴ ꦱꦱꦏ꧀ꦏꦁ ꦧ꧀ꦫꦲ꧀ꦩꦕꦫꦶꦪꦁ ꦤ ꦮꦱꦺꦪ꧀ꦪ, ꦮꦱꦤ꧀ꦠꦺꦴ ꦕ ꦤꦴꦫꦴꦣꦺꦪ꧀ꦪ ꦚꦴꦪꦁ ꦣꦩ꧀ꦩꦁ ꦏꦸꦱꦭꦁ.

꧒꧒꧖. ‘‘ꦥꦸꦤ ꦕꦥꦫꦁ, ꦱꦤ꧀ꦢꦏ, ꦆꦣꦺꦏꦕ꧀ꦕꦺꦴ ꦱꦠ꧀ꦡꦴ ꦌꦮꦁꦮꦴꦢꦷ ꦲꦺꦴꦠꦶ ꦌꦮꦁꦢꦶꦛ꧀ꦜꦶ – ‘ꦏꦫꦺꦴꦠꦺꦴ ꦏꦴꦫꦪꦠꦺꦴ ꦖꦶꦤ꧀ꦢꦠꦺꦴ ꦖꦺꦢꦴꦥꦪꦠꦺꦴ ꦥꦕꦠꦺꦴ ꦥꦴꦕꦴꦥꦪꦠꦺꦴ ꦱꦺꦴꦕꦪꦠꦺꦴ ꦱꦺꦴꦕꦴꦥꦪꦠꦺꦴ ꦏꦶꦭꦩꦠꦺꦴ ꦏꦶꦭꦩꦴꦥꦪꦠꦺꦴ ꦦꦤ꧀ꦢꦠꦺꦴ ꦦꦤ꧀ꦢꦴꦥꦪꦠꦺꦴ ꦥꦴꦟꦩꦠꦶꦥꦴꦠꦪꦠꦺꦴ ꦄꦢꦶꦤ꧀ꦤꦁ ꦄꦴꦢꦶꦪꦠꦺꦴ ꦱꦤ꧀ꦣꦶꦁ ꦖꦶꦤ꧀ꦢꦠꦺꦴ ꦤꦶꦭ꧀ꦭꦺꦴꦥꦁ ꦲꦫꦠꦺꦴ ꦌꦏꦴꦒꦴꦫꦶꦏꦁ ꦏꦫꦺꦴꦠꦺꦴ ꦥꦫꦶꦥꦤ꧀ꦡꦺ ꦠꦶꦛ꧀ꦜꦠꦺꦴ ꦥꦫꦢꦴꦫꦁ ꦒꦕ꧀ꦖꦠꦺꦴ ꦩꦸꦱꦴ ꦨꦟꦠꦺꦴ ꦏꦫꦺꦴꦠꦺꦴ ꦤ ꦏꦫꦷꦪꦠꦶ ꦥꦴꦥꦁ. ꦑꦸꦫꦥꦫꦶꦪꦤ꧀ꦠꦺꦤ ꦕꦺꦥꦶ ꦕꦏ꧀ꦏꦺꦤ ꦪꦺꦴ ꦆꦩꦶꦱ꧀ꦱꦴ ꦥꦡꦮꦶꦪꦴ ꦥꦴꦟꦺ ꦌꦏꦁ ꦩꦁꦱꦑꦭꦁ ꦌꦏꦁ ꦩꦁꦱꦥꦸꦚ꧀ꦗꦁ ꦏꦫꦺꦪ꧀ꦪ, ꦤꦠ꧀ꦡꦶ ꦠꦠꦺꦴꦤꦶꦢꦴꦤꦁ ꦥꦴꦥꦁ, ꦤꦠ꧀ꦡꦶ ꦥꦴꦥꦱ꧀ꦱ ꦄꦴꦒꦩꦺꦴ. ꦢꦏ꧀ꦑꦶꦟꦚ꧀ꦕꦺꦥꦶ ꦒꦔ꧀ꦒꦴꦪ ꦠꦷꦫꦁ ꦒꦕ꧀ꦖꦺꦪ꧀ꦪ ꦲꦤꦤ꧀ꦠꦺꦴ ꦓꦴꦠꦺꦤ꧀ꦠꦺꦴ ꦖꦶꦤ꧀ꦢꦤ꧀ꦠꦺꦴ ꦖꦺꦢꦴꦥꦺꦤ꧀ꦠꦺꦴ ꦥꦕꦤ꧀ꦠꦺꦴ ꦥꦕꦴꦥꦺꦤ꧀ꦠꦺꦴ, ꦤꦠ꧀ꦡꦶ ꦠꦠꦺꦴꦤꦶꦢꦴꦤꦁ ꦥꦴꦥꦁ, ꦤꦠ꧀ꦡꦶ ꦥꦴꦥꦱ꧀ꦱ ꦄꦴꦒꦩꦺꦴ. ꦈꦠ꧀ꦠꦫꦚ꧀ꦕꦺꦥꦶ ꦒꦔ꧀ꦒꦴꦪ ꦠꦷꦫꦁ ꦒꦕ꧀ꦖꦺꦪ꧀ꦪ ꦢꦢꦤ꧀ꦠꦺꦴ ꦢꦴꦥꦺꦤ꧀ꦠꦺꦴ ꦪꦗꦤ꧀ꦠꦺꦴ ꦪꦗꦴꦥꦺꦤ꧀ꦠꦺꦴ, ꦤꦠ꧀ꦡꦶ ꦠꦠꦺꦴꦤꦶꦢꦴꦤꦁ ꦥꦸꦚ꧀ꦚꦁ, ꦤꦠ꧀ꦡꦶ ꦥꦸꦚ꧀ꦚꦱ꧀ꦱ ꦄꦴꦒꦩꦺꦴ. ꦢꦴꦤꦺꦤ ꦢꦩꦺꦤ ꦱꦁꦪꦩꦺꦤ ꦱꦕ꧀ꦕꦮꦗ꧀ꦗꦺꦤ ꦤꦠ꧀ꦡꦶ ꦥꦸꦚ꧀ꦚꦁ, ꦤꦠ꧀ꦡꦶ ꦥꦸꦚ꧀ꦚꦱ꧀ꦱ ꦄꦴꦒꦩꦺꦴ’ꦠꦶ.

‘‘ꦠꦠ꧀ꦫ, ꦱꦤ꧀ꦢꦏ, ꦮꦶꦚ꧀ꦚꦹ ꦥꦸꦫꦶꦱꦺꦴ ꦆꦠꦶ ꦥꦛꦶꦱꦚ꧀ꦕꦶꦏ꧀ꦑꦠꦶ – ‘ꦄꦪꦁ ꦑꦺꦴ ꦨꦮꦁ ꦱꦠ꧀ꦡꦴ ꦌꦮꦁꦮꦴꦢꦷ ꦌꦮꦁꦢꦶꦛ꧀ꦜꦶ – ꦏꦫꦺꦴꦠꦺꦴ ꦏꦴꦫꦪꦠꦺꦴ ꦖꦶꦤ꧀ꦢꦠꦺꦴ ꦖꦺꦢꦴꦥꦪꦠꦺꦴ ꦥꦕꦠꦺꦴ ꦥꦴꦕꦴꦥꦪꦠꦺꦴ ꦱꦺꦴꦕꦠꦺꦴ ꦱꦺꦴꦕꦴꦥꦪꦠꦺꦴ ꦏꦶꦭꦩꦠꦺꦴ ꦏꦶꦭꦩꦴꦥꦪꦠꦺꦴ ꦦꦤ꧀ꦢꦠꦺꦴ ꦦꦤ꧀ꦢꦴꦥꦪꦠꦺꦴ ꦥꦴꦟꦩꦠꦶꦥꦴꦠꦪꦠꦺꦴ ꦄꦢꦶꦤ꧀ꦤꦁ ꦄꦴꦢꦶꦪꦠꦺꦴ ꦱꦤ꧀ꦣꦶꦁ ꦖꦶꦤ꧀ꦢꦠꦺꦴ ꦤꦶꦭ꧀ꦭꦺꦴꦥꦁ ꦲꦫꦠꦺꦴ ꦌꦏꦴꦒꦴꦫꦶꦏꦁ ꦏꦫꦺꦴꦠꦺꦴ ꦥꦫꦶꦥꦤ꧀ꦡꦺ ꦠꦶꦛ꧀ꦜꦠꦺꦴ ꦥꦫꦢꦴꦫꦁ ꦒꦕ꧀ꦖꦠꦺꦴ ꦩꦸꦱꦴ ꦨꦟꦠꦺꦴ ꦏꦫꦺꦴꦠꦺꦴ ꦤ ꦏꦫꦷꦪꦠꦶ ꦥꦴꦥꦁ ꦑꦸꦫꦥꦫꦶꦪꦤ꧀ꦠꦺꦤ ꦕꦺꦥꦶ ꦕꦏ꧀ꦏꦺꦤ ꦪꦺꦴ ꦆꦩꦶꦱ꧀ꦱꦴ ꦥꦡꦮꦶꦪꦴ ꦥꦴꦟꦺ ꦌꦏꦁ ꦩꦁꦱꦑꦭꦁ ꦌꦏꦁ ꦩꦁꦱꦥꦸꦚ꧀ꦗꦁ ꦏꦫꦺꦪ꧀ꦪ, ꦤꦠ꧀ꦡꦶ ꦠꦠꦺꦴꦤꦶꦢꦴꦤꦁ ꦥꦴꦥꦁ, ꦤꦠ꧀ꦡꦶ ꦥꦴꦥꦱ꧀ꦱ ꦄꦴꦒꦩꦺꦴ. ꦢꦏ꧀ꦑꦶꦟꦚ꧀ꦕꦺꦥꦶ ꦒꦔ꧀ꦒꦴꦪ ꦠꦷꦫꦁ ꦒꦕ꧀ꦖꦺꦪ꧀ꦪ ꦲꦤꦤ꧀ꦠꦺꦴ ꦓꦴꦠꦺꦤ꧀ꦠꦺꦴ ꦖꦶꦤ꧀ꦢꦤ꧀ꦠꦺꦴ ꦖꦺꦢꦴꦥꦺꦤ꧀ꦠꦺꦴ ꦥꦕꦤ꧀ꦠꦺꦴ ꦥꦕꦴꦥꦺꦤ꧀ꦠꦺꦴ, ꦤꦠ꧀ꦡꦶ ꦠꦠꦺꦴꦤꦶꦢꦴꦤꦁ ꦥꦴꦥꦁ, ꦤꦠ꧀ꦡꦶ ꦥꦴꦥꦱ꧀ꦱ ꦄꦴꦒꦩꦺꦴ. ꦈꦠ꧀ꦠꦫꦚ꧀ꦕꦺꦥꦶ ꦒꦔ꧀ꦒꦴꦪ ꦠꦷꦫꦁ ꦒꦕ꧀ꦖꦺꦪ꧀ꦪ ꦢꦢꦤ꧀ꦠꦺꦴ ꦢꦴꦥꦺꦤ꧀ꦠꦺꦴ ꦪꦗꦤ꧀ꦠꦺꦴ ꦪꦗꦴꦥꦺꦤ꧀ꦠꦺꦴ, ꦤꦠ꧀ꦡꦶ ꦠꦠꦺꦴꦤꦶꦢꦴꦤꦁ ꦥꦸꦚ꧀ꦚꦁ, ꦤꦠ꧀ꦡꦶ ꦥꦸꦚ꧀ꦚꦱ꧀ꦱ ꦄꦴꦒꦩꦺꦴ. ꦢꦴꦤꦺꦤ ꦢꦩꦺꦤ ꦱꦁꦪꦩꦺꦤ ꦱꦕ꧀ꦕꦮꦗ꧀ꦗꦺꦤ ꦤꦠ꧀ꦡꦶ ꦥꦸꦚ꧀ꦚꦁ, ꦤꦠ꧀ꦡꦶ ꦥꦸꦚ꧀ꦚꦱ꧀ꦱ ꦄꦴꦒꦩꦺꦴ’ꦠꦶ. ꦱꦕꦺ ꦆꦩꦱ꧀ꦱ ꦨꦺꦴꦠꦺꦴ ꦱꦠ꧀ꦡꦸꦤꦺꦴ ꦱꦕ꧀ꦕꦁ ꦮꦕꦤꦁ, ꦄꦏꦠꦺꦤ ꦩꦺ ꦌꦠ꧀ꦡ ꦏꦠꦁ, ꦄꦮꦸꦱꦶꦠꦺꦤ ꦩꦺ ꦌꦠ꧀ꦡ ꦮꦸꦱꦶꦠꦁ. ꦈꦨꦺꦴꦥꦶ ꦩꦪꦁ ꦌꦠ꧀ꦡ ꦱꦩꦱꦩꦴ ꦱꦴꦩꦚ꧀ꦚꦁ ꦥꦠ꧀ꦠꦴ, ꦪꦺꦴ ꦕꦴꦲꦁ ꦤ ꦮꦢꦴꦩꦶ ‘ꦈꦨꦶꦤ꧀ꦤꦁ ꦏꦸꦫꦸꦠꦁ ꦤ ꦏꦫꦷꦪꦠꦶ ꦥꦴꦥ’ꦤ꧀ꦠꦶ. ꦄꦠꦶꦫꦺꦏꦁ ꦑꦺꦴ ꦥꦤꦶꦩꦱ꧀ꦱ ꦨꦺꦴꦠꦺꦴ ꦱꦠ꧀ꦡꦸꦤꦺꦴ ꦤꦒ꧀ꦒꦶꦪꦁ ꦩꦸꦟ꧀ꦝꦶꦪꦁ ꦈꦏ꧀ꦏꦸꦛꦶꦏꦥ꧀ꦥꦣꦴꦤꦁ ꦏꦺꦱꦩꦱ꧀ꦱꦸꦭꦺꦴꦕꦤꦁ ꦪꦺꦴꦲꦁ ꦥꦸꦠ꧀ꦠꦱꦩ꧀ꦧꦴꦣꦱꦪꦤꦁ ꦄꦗ꧀ꦙꦴꦮꦱꦤ꧀ꦠꦺꦴ ꦏꦴꦱꦶꦏꦕꦤ꧀ꦢꦤꦁ ꦥꦕ꧀ꦕꦤꦸꦨꦺꦴꦤ꧀ꦠꦺꦴ ꦩꦴꦭꦴꦒꦤ꧀ꦣꦮꦶꦭꦺꦥꦤꦁ ꦣꦴꦫꦺꦤ꧀ꦠꦺꦴ ꦗꦴꦠꦫꦹꦥꦫꦗꦠꦁ ꦱꦴꦢꦶꦪꦤ꧀ꦠꦺꦴ ꦆꦩꦶꦤꦴ ꦨꦺꦴꦠꦴ ꦱꦠ꧀ꦡꦴꦫꦴ ꦱꦩꦱꦩꦒꦠꦶꦏꦺꦴ ꦨꦮꦶꦱ꧀ꦱꦴꦩꦶ. ꦄꦨꦶꦱꦩ꧀ꦥꦫꦴꦪꦁ ꦱꦺꦴꦲꦁ ꦏꦶꦁ ꦗꦴꦤꦤ꧀ꦠꦺꦴ ꦏꦶꦁ ꦥꦱ꧀ꦱꦤ꧀ꦠꦺꦴ ꦆꦩꦱ꧀ꦩꦶꦁ ꦱꦠ꧀ꦡꦫꦶ ꦧ꧀ꦫꦲ꧀ꦩꦕꦫꦶꦪꦁ ꦕꦫꦶꦱ꧀ꦱꦴꦩꦶ? ‘ꦱꦺꦴ ꦄꦧ꧀ꦫꦲ꧀ꦩꦕꦫꦶꦪꦮꦴꦱꦺꦴ ꦄꦪ’ꦤ꧀ꦠꦶ ꦆꦠꦶ ꦮꦶꦢꦶꦠ꧀ꦮꦴ ꦠꦱ꧀ꦩꦴ ꦧ꧀ꦫꦲ꧀ꦩꦕꦫꦶꦪꦴ ꦤꦶꦧ꧀ꦧꦶꦗ꧀ꦗ ꦥꦏ꧀ꦏꦩꦠꦶ. ꦄꦪꦁ ꦑꦺꦴ, ꦱꦤ꧀ꦢꦏ, ꦠꦺꦤ ꦨꦒꦮꦠꦴ ꦗꦴꦤꦠꦴ ꦥꦱ꧀ꦱꦠꦴ ꦄꦫꦲꦠꦴ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦤ ꦢꦸꦠꦶꦪꦺꦴ ꦄꦧ꧀ꦫꦲ꧀ꦩꦕꦫꦶꦪꦮꦴꦱꦺꦴ ꦄꦏ꧀ꦑꦴꦠꦺꦴ ꦪꦠ꧀ꦡ ꦮꦶꦚ꧀ꦚꦹ ꦥꦸꦫꦶꦱꦺꦴ ꦱꦱꦏ꧀ꦏꦁ ꦧ꧀ꦫꦲ꧀ꦩꦕꦫꦶꦪꦁ ꦤ ꦮꦱꦺꦪ꧀ꦪ, ꦮꦱꦤ꧀ꦠꦺꦴ ꦕ ꦤꦴꦫꦴꦣꦺꦪ꧀ꦪ ꦚꦴꦪꦁ ꦣꦩ꧀ꦩꦁ ꦏꦸꦱꦭꦁ.

꧒꧒꧗. ‘‘ꦥꦸꦤ ꦕꦥꦫꦁ, ꦱꦤ꧀ꦢꦏ, ꦆꦣꦺꦏꦕ꧀ꦕꦺꦴ ꦱꦠ꧀ꦡꦴ ꦌꦮꦁꦮꦴꦢꦷ ꦲꦺꦴꦠꦶ ꦌꦮꦁꦢꦶꦛ꧀ꦜꦶ – ‘ꦤꦠ꧀ꦡꦶ ꦲꦺꦠꦸ, ꦤꦠ꧀ꦡꦶ ꦥꦕ꧀ꦕꦪꦺꦴ ꦱꦠ꧀ꦠꦴꦤꦁ ꦱꦁꦏꦶꦭꦺꦱꦴꦪ; ꦄꦲꦺꦠꦹ ꦄꦥ꧀ꦥꦕ꧀ꦕꦪꦴ ꦱꦠ꧀ꦠꦴ ꦱꦁꦏꦶꦭꦶꦱ꧀ꦱꦤ꧀ꦠꦶ; ꦤꦠ꧀ꦡꦶ ꦲꦺꦠꦸ, ꦤꦠ꧀ꦡꦶ ꦥꦕ꧀ꦕꦪꦺꦴ ꦱꦠ꧀ꦠꦴꦤꦁ ꦮꦶꦱꦸꦢ꧀ꦣꦶꦪꦴ; ꦄꦲꦺꦠꦹ ꦄꦥ꧀ꦥꦕ꧀ꦕꦪꦴ ꦱꦠ꧀ꦠꦴ ꦮꦶꦱꦸꦗ꧀ꦙꦤ꧀ꦠꦶ; ꦤꦠ꧀ꦡꦶ ꦧꦭꦁ, ꦤꦠ꧀ꦡꦶ ꦮꦷꦫꦶꦪꦁ, ꦤꦠ꧀ꦡꦶ ꦥꦸꦫꦶꦱꦡꦴꦩꦺꦴ, ꦤꦠ꧀ꦡꦶ ꦥꦸꦫꦶꦱꦥꦫꦏ꧀ꦏꦩꦺꦴ; ꦱꦧ꧀ꦧꦺ ꦱꦠ꧀ꦠꦴ ꦱꦧ꧀ꦧꦺ ꦥꦴꦟꦴ ꦱꦧ꧀ꦧꦺ ꦨꦹꦠꦴ ꦱꦧ꧀ꦧꦺ ꦗꦷꦮꦴ ꦄꦮꦱꦴ ꦄꦧꦭꦴ ꦄꦮꦷꦫꦶꦪꦴ ꦤꦶꦪꦠꦶꦱꦔ꧀ꦒꦠꦶꦨꦴꦮꦥꦫꦶꦟꦠꦴ ꦖꦱ꧀ꦮꦺꦮꦴꦨꦶꦗꦴꦠꦷꦱꦸ ꦱꦸꦑꦢꦸꦏ꧀ꦑꦁ ꦥꦛꦶꦱꦁꦮꦺꦢꦺꦤ꧀ꦠꦷ’ꦠꦶ.

‘‘ꦠꦠ꧀ꦫ, ꦱꦤ꧀ꦢꦏ, ꦮꦶꦚ꧀ꦚꦹ ꦥꦸꦫꦶꦱꦺꦴ ꦆꦠꦶ ꦥꦛꦶꦱꦚ꧀ꦕꦶꦏ꧀ꦑꦠꦶ – ‘ꦄꦪꦁ ꦑꦺꦴ ꦨꦮꦁ ꦱꦠ꧀ꦡꦴ ꦌꦮꦁꦮꦴꦢꦷ ꦌꦮꦁꦢꦶꦛ꧀ꦜꦶ – ꦤꦠ꧀ꦡꦶ ꦲꦺꦠꦸ, ꦤꦠ꧀ꦡꦶ ꦥꦕ꧀ꦕꦪꦺꦴ ꦱꦠ꧀ꦠꦴꦤꦁ ꦱꦁꦏꦶꦭꦺꦱꦴꦪ, ꦄꦲꦺꦠꦹ ꦄꦥ꧀ꦥꦕ꧀ꦕꦪꦴ ꦱꦠ꧀ꦠꦴ ꦱꦁꦏꦶꦭꦶꦱ꧀ꦱꦤ꧀ꦠꦶ. ꦤꦠ꧀ꦡꦶ ꦲꦺꦠꦸ ꦤꦠ꧀ꦡꦶ ꦥꦕ꧀ꦕꦪꦺꦴ ꦱꦠ꧀ꦠꦴꦤꦁ ꦮꦶꦱꦸꦢ꧀ꦣꦶꦪꦴ, ꦄꦲꦺꦠꦹ ꦄꦥ꧀ꦥꦕ꧀ꦕꦪꦴ ꦱꦠ꧀ꦠꦴ ꦮꦶꦱꦸꦗ꧀ꦙꦤ꧀ꦠꦶ. ꦤꦠ꧀ꦡꦶ ꦧꦭꦁ, ꦤꦠ꧀ꦡꦶ ꦮꦷꦫꦶꦪꦁ, ꦤꦠ꧀ꦡꦶ ꦥꦸꦫꦶꦱꦡꦴꦩꦺꦴ, ꦤꦠ꧀ꦡꦶ ꦥꦸꦫꦶꦱꦥꦫꦏ꧀ꦏꦩꦺꦴ, ꦱꦧ꧀ꦧꦺ ꦱꦠ꧀ꦠꦴ ꦱꦧ꧀ꦧꦺ ꦥꦴꦟꦴ ꦱꦧ꧀ꦧꦺ ꦨꦹꦠꦴ ꦱꦧ꧀ꦧꦺ ꦗꦷꦮꦴ ꦄꦮꦱꦴ ꦄꦧꦭꦴ ꦄꦮꦷꦫꦶꦪꦴ ꦤꦶꦪꦠꦶꦱꦔ꧀ꦒꦠꦶꦨꦴꦮꦥꦫꦶꦟꦠꦴ ꦖꦱ꧀ꦮꦺꦮꦴꦨꦶꦗꦴꦠꦷꦱꦸ ꦱꦸꦑꦢꦸꦏ꧀ꦑꦁ ꦥꦛꦶꦱꦁꦮꦺꦢꦺꦤ꧀ꦠꦷ’ꦠꦶ. ꦱꦕꦺ ꦆꦩꦱ꧀ꦱ ꦨꦺꦴꦠꦺꦴ ꦱꦠ꧀ꦡꦸꦤꦺꦴ ꦱꦕ꧀ꦕꦁ ꦮꦕꦤꦁ, ꦄꦏꦠꦺꦤ ꦩꦺ ꦌꦠ꧀ꦡ ꦏꦠꦁ, ꦄꦮꦸꦱꦶꦠꦺꦤ ꦩꦺ ꦌꦠ꧀ꦡ ꦮꦸꦱꦶꦠꦁ. ꦈꦨꦺꦴꦥꦶ ꦩꦪꦁ ꦌꦠ꧀ꦡ ꦱꦩꦱꦩꦴ ꦱꦴꦩꦚ꧀ꦚꦁ ꦥꦠ꧀ꦠꦴ, ꦪꦺꦴ ꦕꦴꦲꦁ ꦤ ꦮꦢꦴꦩꦶ ‘ꦈꦨꦺꦴ ꦄꦲꦺꦠꦹ ꦄꦥ꧀ꦥꦕ꧀ꦕꦪꦴ ꦮꦶꦱꦸꦗ꧀ꦙꦶꦱ꧀ꦱꦴꦩꦴ’ꦠꦶ. ꦄꦠꦶꦫꦺꦏꦁ ꦑꦺꦴ ꦥꦤꦶꦩꦱ꧀ꦱ ꦨꦺꦴꦠꦺꦴ ꦱꦠ꧀ꦡꦸꦤꦺꦴ ꦤꦒ꧀ꦒꦶꦪꦁ ꦩꦸꦟ꧀ꦝꦶꦪꦁ ꦈꦏ꧀ꦏꦸꦛꦶꦏꦥ꧀ꦥꦣꦴꦤꦁ ꦏꦺꦱꦩꦱ꧀ꦱꦸꦭꦺꦴꦕꦤꦁ ꦪꦺꦴꦲꦁ ꦥꦸꦠ꧀ꦠꦱꦩ꧀ꦧꦴꦣꦱꦪꦤꦁ ꦄꦗ꧀ꦙꦴꦮꦱꦤ꧀ꦠꦺꦴ ꦏꦴꦱꦶꦏꦕꦤ꧀ꦢꦤꦁ ꦥꦕ꧀ꦕꦤꦸꦨꦺꦴꦤ꧀ꦠꦺꦴ ꦩꦴꦭꦴꦒꦤ꧀ꦣꦮꦶꦭꦺꦥꦤꦁ ꦣꦴꦫꦺꦤ꧀ꦠꦺꦴ ꦗꦴꦠꦫꦹꦥꦫꦗꦠꦁ ꦱꦴꦢꦶꦪꦤ꧀ꦠꦺꦴ ꦆꦩꦶꦤꦴ ꦨꦺꦴꦠꦴ ꦱꦠ꧀ꦡꦴꦫꦴ ꦱꦩꦱꦩꦒꦠꦶꦏꦺꦴ ꦨꦮꦶꦱ꧀ꦱꦴꦩꦶ. ꦄꦨꦶꦱꦩ꧀ꦥꦫꦴꦪꦁ ꦱꦺꦴꦲꦁ ꦏꦶꦁ ꦗꦴꦤꦤ꧀ꦠꦺꦴ ꦏꦶꦁ ꦥꦱ꧀ꦱꦤ꧀ꦠꦺꦴ ꦆꦩꦱ꧀ꦩꦶꦁ ꦱꦠ꧀ꦡꦫꦶ ꦧ꧀ꦫꦲ꧀ꦩꦕꦫꦶꦪꦁ ꦕꦫꦶꦱ꧀ꦱꦴꦩꦶ? ‘ꦱꦺꦴ ꦄꦧ꧀ꦫꦲ꧀ꦩꦕꦫꦶꦪꦮꦴꦱꦺꦴ ꦄꦪ’ꦤ꧀ꦠꦶ – ꦆꦠꦶ ꦮꦶꦢꦶꦠ꧀ꦮꦴ ꦠꦱ꧀ꦩꦴ ꦧ꧀ꦫꦲ꧀ꦩꦕꦫꦶꦪꦴ ꦤꦶꦧ꧀ꦧꦶꦗ꧀ꦗ ꦥꦏ꧀ꦏꦩꦠꦶ. ꦄꦪꦁ ꦑꦺꦴ, ꦱꦤ꧀ꦢꦏ, ꦠꦺꦤ ꦨꦒꦮꦠꦴ ꦗꦴꦤꦠꦴ ꦥꦱ꧀ꦱꦠꦴ ꦄꦫꦲꦠꦴ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦤ ꦠꦠꦶꦪꦺꦴ ꦄꦧ꧀ꦫꦲ꧀ꦩꦕꦫꦶꦪꦮꦴꦱꦺꦴ ꦄꦏ꧀ꦑꦴꦠꦺꦴ ꦪꦠ꧀ꦡ ꦮꦶꦚ꧀ꦚꦹ ꦥꦸꦫꦶꦱꦺꦴ ꦱꦱꦏ꧀ꦏꦁ ꦧ꧀ꦫꦲ꧀ꦩꦕꦫꦶꦪꦁ ꦤ ꦮꦱꦺꦪ꧀ꦪ, ꦮꦱꦤ꧀ꦠꦺꦴ ꦕ ꦤꦴꦫꦴꦣꦺꦪ꧀ꦪ ꦚꦴꦪꦁ ꦣꦩ꧀ꦩꦁ ꦏꦸꦱꦭꦁ.

꧒꧒꧘. ‘‘ꦥꦸꦤ ꦕꦥꦫꦁ, ꦱꦤ꧀ꦢꦏ, ꦆꦣꦺꦏꦕ꧀ꦕꦺꦴ ꦱꦠ꧀ꦡꦴ ꦌꦮꦁꦮꦴꦢꦷ ꦲꦺꦴꦠꦶ ꦌꦮꦁꦢꦶꦛ꧀ꦜꦶ – ‘ꦱꦠ꧀ꦠꦶꦩꦺ ꦏꦴꦪꦴ ꦄꦏꦛꦴ ꦄꦏꦛꦮꦶꦣꦴ ꦄꦤꦶꦩ꧀ꦩꦶꦠꦴ ꦄꦤꦶꦩ꧀ꦩꦴꦠꦴ ꦮꦚ꧀ꦙꦴ ꦏꦹꦛꦛ꧀ꦜꦴ ꦌꦱꦶꦏꦛ꧀ꦜꦴꦪꦶꦛ꧀ꦜꦶꦠꦴ, ꦠꦺ ꦤ ꦆꦚ꧀ꦗꦤ꧀ꦠꦶ ꦤ ꦮꦶꦥꦫꦶꦟꦩꦤ꧀ꦠꦶ ꦤ ꦄꦚ꧀ꦚꦩꦚ꧀ꦚꦁ ꦧ꧀ꦪꦴꦧꦴꦣꦺꦤ꧀ꦠꦶ ꦤꦴꦭꦁ ꦄꦚ꧀ꦚꦩꦚ꧀ꦚꦱ꧀ꦱ ꦱꦸꦑꦴꦪ ꦮꦴ ꦢꦸꦏ꧀ꦑꦴꦪ ꦮꦴ ꦱꦸꦑꦢꦸꦏ꧀ꦑꦴꦪ ꦮꦴ. ꦏꦠꦩꦺ ꦱꦠ꧀ꦠ? ꦥꦡꦮꦷꦏꦴꦪꦺꦴ ꦄꦴꦥꦺꦴꦏꦴꦪꦺꦴ ꦠꦺꦗꦺꦴꦏꦴꦪꦺꦴ ꦮꦴꦪꦺꦴꦏꦴꦪꦺꦴ ꦱꦸꦑꦺ ꦢꦸꦏ꧀ꦑꦺ ꦗꦷꦮꦺ ꦱꦠ꧀ꦠꦩꦺ – ꦆꦩꦺ ꦱꦠ꧀ꦠꦏꦴꦪꦴ ꦄꦏꦛꦴ ꦄꦏꦛꦮꦶꦣꦴ ꦄꦤꦶꦩ꧀ꦩꦶꦠꦴ ꦄꦤꦶꦩ꧀ꦩꦴꦠꦴ ꦮꦚ꧀ꦙꦴ ꦏꦹꦛꦛ꧀ꦜꦴ ꦌꦱꦶꦏꦛ꧀ꦜꦴꦪꦶꦛ꧀ꦜꦶꦠꦴ. ꦠꦺ ꦤ ꦆꦚ꧀ꦗꦤ꧀ꦠꦶ ꦤ ꦮꦶꦥꦫꦶꦟꦩꦤ꧀ꦠꦶ ꦤ ꦄꦚ꧀ꦚꦩꦚ꧀ꦚꦁ ꦧ꧀ꦪꦴꦧꦴꦣꦺꦤ꧀ꦠꦶ. ꦤꦴꦭꦁ ꦄꦚ꧀ꦚꦩꦚ꧀ꦚꦱ꧀ꦱ ꦱꦸꦑꦴꦪ ꦮꦴ ꦢꦸꦏ꧀ꦑꦴꦪ ꦮꦴ ꦱꦸꦑꦢꦸꦏ꧀ꦑꦴꦪ ꦮꦴ. ꦠꦠ꧀ꦡ ꦤꦠ꧀ꦡꦶ ꦲꦤ꧀ꦠꦴ ꦮꦴ ꦓꦴꦠꦺꦠꦴ ꦮꦴ ꦱꦺꦴꦠꦴ ꦮꦴ ꦱꦴꦮꦺꦠꦴ ꦮꦴ ꦮꦶꦚ꧀ꦚꦴꦠꦴ ꦮꦴ ꦮꦶꦚ꧀ꦚꦴꦥꦺꦠꦴ ꦮꦴ. ꦪꦺꦴꦥꦶ ꦠꦶꦟ꧀ꦲꦺꦤ ꦱꦠ꧀ꦡꦺꦤ ꦱꦷꦱꦁ ꦖꦶꦤ꧀ꦢꦠꦶ, ꦤ ꦏꦺꦴꦕꦶ ꦏꦚ꧀ꦕꦶ [ꦏꦶꦚ꧀ꦕꦶ (ꦏ.)] ꦗꦷꦮꦶꦠꦴ ꦮꦺꦴꦫꦺꦴꦥꦺꦠꦶ. ꦱꦠ꧀ꦠꦤ꧀ꦤꦁꦠ꧀ꦮꦺꦮ ꦏꦴꦪꦴꦤꦩꦤ꧀ꦠꦫꦺꦤ ꦱꦠ꧀ꦡꦁ ꦮꦶꦮꦫꦩꦤꦸꦥꦠꦠꦶ. ꦕꦸꦢ꧀ꦢꦱ ꦑꦺꦴ ꦥꦤꦶꦩꦴꦤꦶ ꦪꦺꦴꦤꦶꦥꦩꦸꦑꦱꦠꦱꦲꦱ꧀ꦱꦴꦤꦶ ꦱꦛ꧀ꦜꦶ ꦕ ꦱꦠꦴꦤꦶ ꦖ ꦕ ꦱꦠꦴꦤꦶ ꦥꦚ꧀ꦕ ꦕ ꦏꦩ꧀ꦩꦸꦤꦺꦴ ꦱꦠꦴꦤꦶ ꦥꦚ꧀ꦕ ꦕ ꦏꦩ꧀ꦩꦴꦤꦶ ꦠꦷꦟꦶ ꦕ ꦏꦩ꧀ꦩꦴꦤꦶ, ꦏꦩ꧀ꦩꦺ ꦕ ꦄꦝ꧀ꦞꦏꦩ꧀ꦩꦺ ꦕ, ꦢ꧀ꦮꦛ꧀ꦜꦶꦥꦛꦶꦥꦢꦴ, ꦢ꧀ꦮꦛ꧀ꦜꦤ꧀ꦠꦫꦏꦥ꧀ꦥꦴ, ꦖꦭ꦳ꦴꦨꦶꦗꦴꦠꦶꦪꦺꦴ, ꦄꦛ꧀ꦜ ꦥꦸꦫꦶꦱꦨꦹꦩꦶꦪꦺꦴ, ꦌꦏꦹꦤꦥꦚ꧀ꦚꦴꦱ ꦄꦴꦗꦷꦮꦏꦱꦠꦺ, ꦌꦏꦹꦤꦥꦚ꧀ꦚꦴꦱ ꦥꦫꦶꦧ꧀ꦧꦴꦗꦏꦱꦠꦺ, ꦌꦏꦹꦤꦥꦚ꧀ꦚꦴꦱ ꦤꦴꦒꦴꦮꦴꦱꦱꦠꦺ, ꦮꦷꦱꦺ ꦆꦤ꧀ꦢ꧀ꦫꦶꦪꦱꦠꦺ, ꦠꦶꦁꦱꦺ ꦤꦶꦫꦪꦱꦠꦺ, ꦖꦠ꧀ꦠꦶꦁꦱ ꦫꦗꦺꦴꦣꦴꦠꦸꦪꦺꦴ, ꦱꦠ꧀ꦠ ꦱꦚ꧀ꦚꦷꦒꦧ꧀ꦨꦴ, ꦱꦠ꧀ꦠ ꦄꦱꦚ꧀ꦚꦷꦒꦧ꧀ꦨꦴ, ꦱꦠ꧀ꦠ ꦤꦶꦒꦟ꧀ꦜꦶꦒꦧ꧀ꦨꦴ, ꦱꦠ꧀ꦠ ꦢꦺꦮꦴ, ꦱꦠ꧀ꦠ ꦩꦴꦤꦸꦱꦴ, ꦱꦠ꧀ꦠ ꦥꦺꦱꦴꦕꦴ, ꦱꦠ꧀ꦠ ꦱꦫꦴ, ꦱꦠ꧀ꦠ ꦥꦮꦸꦛꦴ, ꦱꦠ꧀ꦠ ꦥꦥꦴꦠꦴ, ꦱꦠ꧀ꦠ ꦥꦥꦴꦠꦱꦠꦴꦤꦶ, ꦱꦠ꧀ꦠ ꦱꦸꦥꦶꦤꦴ, ꦱꦠ꧀ꦠ ꦱꦸꦥꦶꦤꦱꦠꦴꦤꦶ, ꦕꦸꦭ꧀ꦭꦴꦱꦷꦠꦶ [ꦕꦹꦭ꦳ꦴꦱꦷꦠꦶ (ꦱꦷ. ꦱ꧀ꦪꦴ. ꦏꦁ. ꦥꦷ.)] ꦩꦲꦴꦏꦥ꧀ꦥꦶꦤꦺꦴ [ꦩꦲꦴꦏꦥ꧀ꦥꦸꦤꦺꦴ (ꦱꦷ. ꦥꦷ.)] ꦱꦠꦱꦲꦱ꧀ꦱꦴꦤꦶ, ꦪꦴꦤꦶ ꦧꦴꦭꦺ ꦕ ꦥꦟ꧀ꦝꦶꦠꦺ ꦕ ꦱꦤ꧀ꦣꦴꦮꦶꦠ꧀ꦮꦴ ꦱꦁꦱꦫꦶꦠ꧀ꦮꦴ ꦢꦸꦏ꧀ꦑꦱ꧀ꦱꦤ꧀ꦠꦁ ꦏꦫꦶꦱ꧀ꦱꦤ꧀ꦠꦶ. ꦠꦠ꧀ꦡ ꦤꦠ꧀ꦡꦶ ꦆꦩꦶꦤꦴꦲꦁ ꦱꦷꦭꦺꦤ ꦮꦴ ꦮꦠꦺꦤ ꦮꦴ ꦠꦥꦺꦤ ꦮꦴ ꦧ꧀ꦫꦲ꧀ꦩꦕꦫꦶꦪꦺꦤ ꦮꦴ ꦄꦥꦫꦶꦥꦏ꧀ꦏꦁ ꦮꦴ ꦏꦩ꧀ꦩꦁ ꦥꦫꦶꦥꦴꦕꦺꦱ꧀ꦱꦴꦩꦶ, ꦥꦫꦶꦥꦏ꧀ꦏꦁ ꦮꦴ ꦏꦩ꧀ꦩꦁ ꦦꦸꦱ꧀ꦱ ꦦꦸꦱ꧀ꦱ ꦧ꧀ꦪꦤ꧀ꦠꦶꦁ ꦏꦫꦶꦱ꧀ꦱꦴꦩꦷꦠꦶ. ꦲꦺꦮꦁ ꦤꦠ꧀ꦡꦶ ꦢꦺꦴꦟꦩꦶꦠꦺ ꦱꦸꦑꦢꦸꦏ꧀ꦑꦺ ꦥꦫꦶꦪꦤ꧀ꦠꦏꦠꦺ ꦱꦁꦱꦴꦫꦺ, ꦤꦠ꧀ꦡꦶ ꦲꦴꦪꦤꦮꦝ꧀ꦞꦤꦺ, ꦤꦠ꧀ꦡꦶ ꦈꦏ꧀ꦏꦁꦱꦴꦮꦏꦁꦱꦺ. ꦱꦺꦪ꧀ꦪꦡꦴꦥꦶ ꦤꦴꦩ ꦱꦸꦠ꧀ꦠꦒꦸꦭ꦳ꦺ ꦑꦶꦠ꧀ꦠꦺ ꦤꦶꦧ꧀ꦧꦺꦜꦶꦪꦩꦴꦤꦩꦺꦮ ꦥꦭꦺꦠꦶ, ꦌꦮꦩꦺꦮ ꦧꦴꦭꦺ ꦕ ꦥꦟ꧀ꦝꦶꦠꦺ ꦕ ꦱꦤ꧀ꦣꦴꦮꦶꦠ꧀ꦮꦴ ꦱꦁꦱꦫꦶꦠ꧀ꦮꦴ ꦢꦸꦏ꧀ꦑꦱ꧀ꦱꦤ꧀ꦠꦁ ꦏꦫꦶꦱ꧀ꦱꦤ꧀ꦠꦷ’ꦠꦶ.

‘‘ꦠꦠ꧀ꦫ, ꦱꦤ꧀ꦢꦏ, ꦮꦶꦚ꧀ꦚꦹ ꦥꦸꦫꦶꦱꦺꦴ ꦆꦠꦶ ꦥꦛꦶꦱꦚ꧀ꦕꦶꦏ꧀ꦑꦠꦶ – ‘ꦄꦪꦁ ꦑꦺꦴ ꦨꦮꦁ ꦱꦠ꧀ꦡꦴ ꦌꦮꦁꦮꦴꦢꦷ ꦌꦮꦁꦢꦶꦛ꧀ꦜꦶ – ꦱꦠ꧀ꦠꦶꦩꦺ ꦏꦴꦪꦴ ꦄꦏꦛꦴ ꦄꦏꦛꦮꦶꦣꦴ ꦄꦤꦶꦩ꧀ꦩꦶꦠꦴ ꦄꦤꦶꦩ꧀ꦩꦴꦠꦴ ꦮꦚ꧀ꦙꦴ ꦏꦹꦛꦛ꧀ꦜꦴ ꦌꦱꦶꦏꦛ꧀ꦜꦴꦪꦶꦛ꧀ꦜꦶꦠꦴ. ꦠꦺ ꦤ ꦆꦚ꧀ꦗꦤ꧀ꦠꦶ ꦤ ꦮꦶꦥꦫꦶꦟꦩꦤ꧀ꦠꦶ ꦤ ꦄꦚ꧀ꦚꦩꦚ꧀ꦚꦁ ꦧ꧀ꦪꦴꦧꦴꦣꦺꦤ꧀ꦠꦶ. ꦤꦴꦭꦁ ꦄꦚ꧀ꦚꦩꦚ꧀ꦚꦱ꧀ꦱ ꦱꦸꦑꦴꦪ ꦮꦴ ꦢꦸꦏ꧀ꦑꦴꦪ ꦮꦴ ꦱꦸꦑꦢꦸꦏ꧀ꦑꦴꦪ ꦮꦴ. ꦏꦠꦩꦺ ꦱꦠ꧀ꦠ? ꦥꦡꦮꦷꦏꦴꦪꦺꦴ ꦄꦴꦥꦺꦴꦏꦴꦪꦺꦴ ꦠꦺꦗꦺꦴꦏꦴꦪꦺꦴ ꦮꦴꦪꦺꦴꦏꦴꦪꦺꦴ ꦱꦸꦑꦺ ꦢꦸꦏ꧀ꦑꦺ ꦗꦷꦮꦺ ꦱꦠ꧀ꦠꦩꦺ – ꦆꦩꦺ ꦱꦠ꧀ꦠ ꦏꦴꦪꦴ ꦄꦏꦛꦴ ꦄꦏꦛꦮꦶꦣꦴ ꦄꦤꦶꦩ꧀ꦩꦶꦠꦴ ꦄꦤꦶꦩ꧀ꦩꦴꦠꦴ ꦮꦚ꧀ꦙꦴ ꦏꦹꦛꦛ꧀ꦜꦴ ꦌꦱꦶꦏꦛ꧀ꦜꦴꦪꦶꦛ꧀ꦜꦶꦠꦴ. ꦠꦺ ꦤ ꦆꦚ꧀ꦗꦤ꧀ꦠꦶ ꦤ ꦮꦶꦥꦫꦶꦟꦩꦤ꧀ꦠꦶ ꦤ ꦄꦚ꧀ꦚꦩꦚ꧀ꦚꦁ ꦧ꧀ꦪꦴꦧꦴꦣꦺꦤ꧀ꦠꦶ. ꦤꦴꦭꦁ ꦄꦚ꧀ꦚꦩꦚ꧀ꦚꦱ꧀ꦱ ꦱꦸꦑꦴꦪ ꦮꦴ ꦢꦸꦏ꧀ꦑꦴꦪ ꦮꦴ ꦱꦸꦑꦢꦸꦏ꧀ꦑꦴꦪ ꦮꦴ. ꦠꦠ꧀ꦡ ꦤꦠ꧀ꦡꦶ ꦲꦤ꧀ꦠꦴ ꦮꦴ ꦓꦴꦠꦺꦠꦴ ꦮꦴ ꦱꦺꦴꦠꦴ ꦮꦴ ꦱꦴꦮꦺꦠꦴ ꦮꦴ ꦮꦶꦚ꧀ꦚꦴꦠꦴ ꦮꦴ ꦮꦶꦚ꧀ꦚꦴꦥꦺꦠꦴ ꦮꦴ. ꦪꦺꦴꦥꦶ ꦠꦶꦟ꧀ꦲꦺꦤ ꦱꦠ꧀ꦡꦺꦤ ꦱꦷꦱꦁ ꦖꦶꦤ꧀ꦢꦠꦶ, ꦤ ꦏꦺꦴꦕꦶ ꦏꦚ꧀ꦕꦶ ꦗꦷꦮꦶꦠꦴ ꦮꦺꦴꦫꦺꦴꦥꦺꦠꦶ. ꦱꦠ꧀ꦠꦤ꧀ꦤꦁꦠ꧀ꦮꦺꦮ ꦏꦴꦪꦴꦤꦩꦤ꧀ꦠꦫꦺꦤ ꦱꦠ꧀ꦡꦁ ꦮꦶꦮꦫꦩꦤꦸꦥꦠꦠꦶ. ꦕꦸꦢ꧀ꦢꦱ ꦑꦺꦴ ꦥꦤꦶꦩꦴꦤꦶ ꦪꦺꦴꦤꦶꦥꦩꦸꦑꦱꦠꦱꦲꦱ꧀ꦱꦴꦤꦶ ꦱꦛ꧀ꦜꦶ ꦕ ꦱꦠꦴꦤꦶ ꦖ ꦕ ꦱꦠꦴꦤꦶ ꦥꦚ꧀ꦕ ꦕ ꦏꦩ꧀ꦩꦸꦤꦺꦴ ꦱꦠꦴꦤꦶ ꦥꦚ꧀ꦕ ꦕ ꦏꦩ꧀ꦩꦴꦤꦶ ꦠꦷꦟꦶ ꦕ ꦏꦩ꧀ꦩꦴꦤꦶ, ꦏꦩ꧀ꦩꦺ ꦕ ꦄꦝ꧀ꦞꦏꦩ꧀ꦩꦺ ꦕ, ꦢ꧀ꦮꦛ꧀ꦜꦶꦥꦛꦶꦥꦢꦴ, ꦢ꧀ꦮꦛ꧀ꦜꦤ꧀ꦠꦫꦏꦥ꧀ꦥꦴ, ꦖꦭ꦳ꦴꦨꦶꦗꦴꦠꦶꦪꦺꦴ, ꦄꦛ꧀ꦜ ꦥꦸꦫꦶꦱꦨꦹꦩꦶꦪꦺꦴ, ꦌꦏꦹꦤꦥꦚ꧀ꦚꦴꦱ ꦄꦴꦗꦷꦮꦏꦱꦠꦺ, ꦌꦏꦹꦤꦥꦚ꧀ꦚꦴꦱ ꦥꦫꦶꦧ꧀ꦧꦴꦗꦏꦱꦠꦺ, ꦌꦏꦹꦤꦥꦚ꧀ꦚꦴꦱ ꦤꦴꦒꦴꦮꦴꦱꦱꦠꦺ, ꦮꦷꦱꦺ ꦆꦤ꧀ꦢ꧀ꦫꦶꦪꦱꦠꦺ, ꦠꦶꦁꦱꦺ ꦤꦶꦫꦪꦱꦠꦺ, ꦖꦠ꧀ꦠꦶꦁꦱ ꦫꦗꦺꦴꦣꦴꦠꦸꦪꦺꦴ, ꦱꦠ꧀ꦠ ꦱꦚ꧀ꦚꦷꦒꦧ꧀ꦨꦴ, ꦱꦠ꧀ꦠ ꦄꦱꦚ꧀ꦚꦷꦒꦧ꧀ꦨꦴ, ꦱꦠ꧀ꦠ ꦤꦶꦒꦟ꧀ꦜꦶꦒꦧ꧀ꦨꦴ, ꦱꦠ꧀ꦠ ꦢꦺꦮꦴ, ꦱꦠ꧀ꦠ ꦩꦴꦤꦸꦱꦴ, ꦱꦠ꧀ꦠ ꦥꦺꦱꦴꦕꦴ, ꦱꦠ꧀ꦠ ꦱꦫꦴ, ꦱꦠ꧀ꦠ ꦥꦮꦸꦛꦴ, ꦱꦠ꧀ꦠ ꦥꦥꦴꦠꦴ, ꦱꦠ꧀ꦠ ꦥꦥꦴꦠꦱꦠꦴꦤꦶ, ꦱꦠ꧀ꦠ ꦱꦸꦥꦶꦤꦴ, ꦱꦠ꧀ꦠ ꦱꦸꦥꦶꦤꦱꦠꦴꦤꦶ, ꦕꦸꦭ꧀ꦭꦴꦱꦷꦠꦶ ꦩꦲꦴꦏꦥ꧀ꦥꦶꦤꦺꦴ ꦱꦠꦱꦲꦱ꧀ꦱꦴꦤꦶ, ꦪꦴꦤꦶ ꦧꦴꦭꦺ ꦕ ꦥꦟ꧀ꦝꦶꦠꦺ ꦕ ꦱꦤ꧀ꦣꦴꦮꦶꦠ꧀ꦮꦴ ꦱꦁꦱꦫꦶꦠ꧀ꦮꦴ ꦢꦸꦏ꧀ꦑꦱ꧀ꦱꦤ꧀ꦠꦁ ꦏꦫꦶꦱ꧀ꦱꦤ꧀ꦠꦶ. ꦠꦠ꧀ꦡ ꦤꦠ꧀ꦡꦶ ꦆꦩꦶꦤꦴꦲꦁ ꦱꦷꦭꦺꦤ ꦮꦴ ꦮꦠꦺꦤ ꦮꦴ ꦠꦥꦺꦤ ꦮꦴ ꦧ꧀ꦫꦲ꧀ꦩꦕꦫꦶꦪꦺꦤ ꦮꦴ ꦄꦥꦫꦶꦥꦏ꧀ꦏꦁ ꦮꦴ ꦏꦩ꧀ꦩꦁ ꦥꦫꦶꦥꦴꦕꦺꦱ꧀ꦱꦴꦩꦶ, ꦥꦫꦶꦥꦏ꧀ꦏꦁ ꦮꦴ ꦏꦩ꧀ꦩꦁ ꦦꦸꦱ꧀ꦱ ꦦꦸꦱ꧀ꦱ ꦧ꧀ꦪꦤ꧀ꦠꦶꦁ ꦏꦫꦶꦱ꧀ꦱꦴꦩꦷꦠꦶ, ꦲꦺꦮꦁ ꦤꦠ꧀ꦡꦶ ꦢꦺꦴꦟꦩꦶꦠꦺ ꦱꦸꦑꦢꦸꦏ꧀ꦑꦺ ꦥꦫꦶꦪꦤ꧀ꦠꦏꦠꦺ ꦱꦁꦱꦴꦫꦺ, ꦤꦠ꧀ꦡꦶ ꦲꦴꦪꦤꦮꦝ꧀ꦞꦤꦺ, ꦤꦠ꧀ꦡꦶ ꦈꦏ꧀ꦏꦁꦱꦴꦮꦏꦁꦱꦺ. ꦱꦺꦪ꧀ꦪꦡꦴꦥꦶ ꦤꦴꦩ ꦱꦸꦠ꧀ꦠꦒꦸꦭ꦳ꦺ ꦑꦶꦠ꧀ꦠꦺ ꦤꦶꦧ꧀ꦧꦺꦜꦶꦪꦩꦴꦤꦩꦺꦮ ꦥꦭꦺꦠꦶ, ꦌꦮꦩꦺꦮ ꦧꦴꦭꦺ ꦕ ꦥꦟ꧀ꦝꦶꦠꦺ ꦕ ꦱꦤ꧀ꦣꦴꦮꦶꦠ꧀ꦮꦴ ꦱꦁꦱꦫꦶꦠ꧀ꦮꦴ ꦢꦸꦏ꧀ꦑꦱ꧀ꦱꦤ꧀ꦠꦁ ꦏꦫꦶꦱ꧀ꦱꦤ꧀ꦠꦷ’ꦠꦶ. ꦱꦕꦺ ꦥꦤ ꦆꦩꦱ꧀ꦱ ꦨꦺꦴꦠꦺꦴ ꦱꦠ꧀ꦡꦸꦤꦺꦴ ꦱꦕ꧀ꦕꦁ ꦮꦕꦤꦁ, ꦄꦏꦠꦺꦤ ꦩꦺ ꦌꦠ꧀ꦡ ꦏꦠꦁ, ꦄꦮꦸꦱꦶꦠꦺꦤ ꦩꦺ ꦌꦠ꧀ꦡ ꦮꦸꦱꦶꦠꦁ. ꦈꦨꦺꦴꦥꦶ ꦩꦪꦁ ꦌꦠ꧀ꦡ ꦱꦩꦱꦩꦴ ꦱꦴꦩꦚ꧀ꦚꦁ ꦥꦠ꧀ꦠꦴ, ꦪꦺꦴ ꦕꦴꦲꦁ ꦤ ꦮꦢꦴꦩꦶ. ‘ꦈꦨꦺꦴ ꦱꦤ꧀ꦣꦴꦮꦶꦠ꧀ꦮꦴ ꦱꦁꦱꦫꦶꦠ꧀ꦮꦴ ꦢꦸꦏ꧀ꦑꦱ꧀ꦱꦤ꧀ꦠꦁ ꦏꦫꦶꦱ꧀ꦱꦴꦩꦴ’ꦠꦶ. ꦄꦠꦶꦫꦺꦏꦁ ꦑꦺꦴ ꦥꦤꦶꦩꦱ꧀ꦱ ꦨꦺꦴꦠꦺꦴ ꦱꦠ꧀ꦡꦸꦤꦺꦴ ꦤꦒ꧀ꦒꦶꦪꦁ ꦩꦸꦟ꧀ꦝꦶꦪꦁ ꦈꦏ꧀ꦏꦸꦛꦶꦏꦥ꧀ꦥꦣꦴꦤꦁ ꦏꦺꦱꦩꦱ꧀ꦱꦸꦭꦺꦴꦕꦤꦁ ꦪꦺꦴꦲꦁ ꦥꦸꦠ꧀ꦠꦱꦩ꧀ꦧꦴꦣꦱꦪꦤꦁ ꦄꦗ꧀ꦙꦴꦮꦱꦤ꧀ꦠꦺꦴ ꦏꦴꦱꦶꦏꦕꦤ꧀ꦢꦤꦁ ꦥꦕ꧀ꦕꦤꦸꦨꦺꦴꦤ꧀ꦠꦺꦴ ꦩꦴꦭꦴꦒꦤ꧀ꦣꦮꦶꦭꦺꦥꦤꦁ ꦣꦴꦫꦺꦤ꧀ꦠꦺꦴ ꦗꦴꦠꦫꦹꦥꦫꦗꦠꦁ ꦱꦴꦢꦶꦪꦤ꧀ꦠꦺꦴ ꦆꦩꦶꦤꦴ ꦨꦺꦴꦠꦴ ꦱꦠ꧀ꦡꦴꦫꦴ ꦱꦩꦱꦩꦒꦠꦶꦏꦺꦴ ꦨꦮꦶꦱ꧀ꦱꦴꦩꦶ. ꦄꦨꦶꦱꦩ꧀ꦥꦫꦴꦪꦁ ꦱꦺꦴꦲꦁ ꦏꦶꦁ ꦗꦴꦤꦤ꧀ꦠꦺꦴ ꦏꦶꦁ ꦥꦱ꧀ꦱꦤ꧀ꦠꦺꦴ ꦆꦩꦱ꧀ꦩꦶꦁ ꦱꦠ꧀ꦡꦫꦶ ꦧ꧀ꦫꦲ꧀ꦩꦕꦫꦶꦪꦁ ꦕꦫꦶꦱ꧀ꦱꦴꦩꦶ? ‘ꦱꦺꦴ ꦄꦧ꧀ꦫꦲ꧀ꦩꦕꦫꦶꦪꦮꦴꦱꦺꦴ ꦄꦪ’ꦤ꧀ꦠꦶ – ꦆꦠꦶ ꦮꦶꦢꦶꦠ꧀ꦮꦴ ꦠꦱ꧀ꦩꦴ ꦧ꧀ꦫꦲ꧀ꦩꦕꦫꦶꦪꦴ ꦤꦶꦧ꧀ꦧꦶꦗ꧀ꦗ ꦥꦏ꧀ꦏꦩꦠꦶ. ꦄꦪꦁ ꦑꦺꦴ, ꦱꦤ꧀ꦢꦏ, ꦠꦺꦤ ꦨꦒꦮꦠꦴ ꦗꦴꦤꦠꦴ ꦥꦱ꧀ꦱꦠꦴ ꦄꦫꦲꦠꦴ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦤ ꦕꦠꦸꦠ꧀ꦡꦺꦴ ꦄꦧ꧀ꦫꦲ꧀ꦩꦕꦫꦶꦪꦮꦴꦱꦺꦴ ꦄꦏ꧀ꦑꦴꦠꦺꦴ ꦪꦠ꧀ꦡ ꦮꦶꦚ꧀ꦚꦹ ꦥꦸꦫꦶꦱꦺꦴ ꦱꦱꦏ꧀ꦏꦁ ꦧ꧀ꦫꦲ꧀ꦩꦕꦫꦶꦪꦁ ꦤ ꦮꦱꦺꦪ꧀ꦪ, ꦮꦱꦤ꧀ꦠꦺꦴ ꦕ ꦤꦴꦫꦴꦣꦺꦪ꧀ꦪ ꦚꦴꦪꦁ ꦣꦩ꧀ꦩꦁ ꦏꦸꦱꦭꦁ.

‘‘ꦆꦩꦺ ꦑꦺꦴ ꦠꦺ, ꦱꦤ꧀ꦢꦏ, ꦠꦺꦤ ꦨꦒꦮꦠꦴ ꦗꦴꦤꦠꦴ ꦥꦱ꧀ꦱꦠꦴ ꦄꦫꦲꦠꦴ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦤ ꦕꦠ꧀ꦠꦴꦫꦺꦴ ꦄꦧ꧀ꦫꦲ꧀ꦩꦕꦫꦶꦪꦮꦴꦱꦴ ꦄꦏ꧀ꦑꦴꦠꦴ ꦪꦠ꧀ꦡ ꦮꦶꦚ꧀ꦚꦹ ꦥꦸꦫꦶꦱꦺꦴ ꦱꦱꦏ꧀ꦏꦁ ꦧ꧀ꦫꦲ꧀ꦩꦕꦫꦶꦪꦁ ꦤ ꦮꦱꦺꦪ꧀ꦪ, ꦮꦱꦤ꧀ꦠꦺꦴ ꦕ ꦤꦴꦫꦴꦣꦺꦪ꧀ꦪ ꦚꦴꦪꦁ ꦣꦩ꧀ꦩꦁ ꦏꦸꦱꦭ’’ꦤ꧀ꦠꦶ.

‘‘ꦄꦕ꧀ꦖꦫꦶꦪꦁ, ꦨꦺꦴ ꦄꦴꦤꦤ꧀ꦢ, ꦄꦧ꧀ꦨꦸꦠꦁ, ꦨꦺꦴ ꦄꦴꦤꦤ꧀ꦢ! ꦪꦴꦮꦚ꧀ꦕꦶꦢꦁ ꦠꦺꦤ ꦨꦒꦮꦠꦴ ꦗꦴꦤꦠꦴ ꦥꦱ꧀ꦱꦠꦴ ꦄꦫꦲꦠꦴ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦤ ꦕꦠ꧀ꦠꦴꦫꦺꦴ ꦄꦧ꧀ꦫꦲ꧀ꦩꦕꦫꦶꦪꦮꦴꦱꦴꦮ ꦱꦩꦴꦤꦴ ‘ꦄꦧ꧀ꦫꦲ꧀ꦩꦕꦫꦶꦪꦮꦴꦱꦴ’ꦠꦶ ꦄꦏ꧀ꦑꦴꦠꦴ ꦪꦠ꧀ꦡ ꦮꦶꦚ꧀ꦚꦹ ꦥꦸꦫꦶꦱꦺꦴ ꦱꦱꦏ꧀ꦏꦁ ꦧ꧀ꦫꦲ꧀ꦩꦕꦫꦶꦪꦁ ꦤ ꦮꦱꦺꦪ꧀ꦪ, ꦮꦱꦤ꧀ꦠꦺꦴ ꦕ ꦤꦴꦫꦴꦣꦺꦪ꧀ꦪ ꦚꦴꦪꦁ ꦣꦩ꧀ꦩꦁ ꦏꦸꦱꦭꦤ꧀ꦠꦶ. ꦏꦠꦩꦴꦤꦶ ꦥꦤ ꦠꦴꦤꦶ, ꦨꦺꦴ ꦄꦴꦤꦤ꧀ꦢ, ꦠꦺꦤ ꦨꦒꦮꦠꦴ ꦗꦴꦤꦠꦴ ꦥꦱ꧀ꦱꦠꦴ ꦄꦫꦲꦠꦴ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦤ ꦕꦠ꧀ꦠꦴꦫꦶ ꦄꦤꦱ꧀ꦱꦴꦱꦶꦏꦴꦤꦶ ꦧ꧀ꦫꦲ꧀ꦩꦕꦫꦶꦪꦴꦤꦶ ꦄꦏ꧀ꦑꦴꦠꦴꦤꦶ ꦪꦠ꧀ꦡ ꦮꦶꦚ꧀ꦚꦹ ꦥꦸꦫꦶꦱꦺꦴ ꦱꦱꦏ꧀ꦏꦁ ꦧ꧀ꦫꦲ꧀ꦩꦕꦫꦶꦪꦁ ꦤ ꦮꦱꦺꦪ꧀ꦪ, ꦮꦱꦤ꧀ꦠꦺꦴ ꦕ ꦤꦴꦫꦴꦣꦺꦪ꧀ꦪ ꦚꦴꦪꦁ ꦣꦩ꧀ꦩꦁ ꦏꦸꦱꦭ’’ꦤ꧀ꦠꦶ?

꧒꧒꧙. ‘‘ꦆꦣ, ꦱꦤ꧀ꦢꦏ, ꦌꦏꦕ꧀ꦕꦺꦴ ꦱꦠ꧀ꦡꦴ ꦱꦧ꧀ꦧꦚ꧀ꦚꦹ ꦱꦧ꧀ꦧꦢꦱ꧀ꦱꦴꦮꦷ ꦄꦥꦫꦶꦱꦺꦱꦁ ꦚꦴꦟꦢꦱ꧀ꦱꦤꦁ ꦥꦛꦶꦗꦴꦤꦴꦠꦶ – ‘ꦕꦫꦠꦺꦴ ꦕ ꦩꦺ ꦠꦶꦛ꧀ꦜꦠꦺꦴ ꦕ ꦱꦸꦠ꧀ꦠꦱ꧀ꦱ ꦕ ꦗꦴꦒꦫꦱ꧀ꦱ ꦕ ꦱꦠꦠꦁ ꦱꦩꦶꦠꦁ ꦚꦴꦟꦢꦱ꧀ꦱꦤꦁ ꦥꦕ꧀ꦕꦸꦥꦛ꧀ꦜꦶꦠ’ꦤ꧀ꦠꦶ. ꦱꦺꦴ ꦱꦸꦚ꧀ꦚꦩ꧀ꦥꦶ ꦄꦒꦴꦫꦁ ꦥꦮꦶꦱꦠꦶ, ꦥꦶꦟ꧀ꦝꦩ꧀ꦥꦶ ꦤ ꦭꦨꦠꦶ, ꦏꦸꦏ꧀ꦏꦸꦫꦺꦴꦥꦶ ꦝꦁꦱꦠꦶ, ꦕꦟ꧀ꦝꦺꦤꦥꦶ ꦲꦠ꧀ꦡꦶꦤꦴ ꦱꦩꦴꦒꦕ꧀ꦖꦠꦶ, ꦕꦟ꧀ꦝꦺꦤꦥꦶ ꦄꦱ꧀ꦱꦺꦤ ꦱꦩꦴꦒꦕ꧀ꦖꦠꦶ, ꦕꦟ꧀ꦝꦺꦤꦥꦶ ꦒꦺꦴꦟꦺꦤ ꦱꦩꦴꦒꦕ꧀ꦖꦠꦶ, ꦆꦠ꧀ꦡꦶꦪꦴꦥꦶ ꦥꦸꦫꦶꦱꦱ꧀ꦱꦥꦶ ꦤꦴꦩꦩ꧀ꦥꦶ ꦒꦺꦴꦠ꧀ꦠꦩ꧀ꦥꦶ ꦥꦸꦕ꧀ꦖꦠꦶ, ꦒꦴꦩꦱ꧀ꦱꦥꦶ ꦤꦶꦒꦩꦱ꧀ꦱꦥꦶ ꦤꦴꦩꦩ꧀ꦥꦶ ꦩꦒ꧀ꦒꦩ꧀ꦥꦶ ꦥꦸꦕ꧀ꦖꦠꦶ. ꦱꦺꦴ ‘ꦏꦶꦩꦶꦢ’ꦤ꧀ꦠꦶ ꦥꦸꦛ꧀ꦜꦺꦴ ꦱꦩꦴꦤꦺꦴ ‘ꦱꦸꦚ꧀ꦚꦁ ꦩꦺ ꦄꦒꦴꦫꦁ ꦥꦮꦶꦱꦶꦠꦧ꧀ꦧꦁ ꦄꦲꦺꦴꦱꦶ’, ꦠꦺꦤ ꦥꦴꦮꦶꦱꦶꦁ; ‘ꦥꦶꦟ꧀ꦝꦩ꧀ꦥꦶ ꦄꦭꦢ꧀ꦣꦧ꧀ꦧꦁ ꦄꦲꦺꦴꦱꦶ’, ꦠꦺꦤ ꦤꦴꦭꦠ꧀ꦡꦁ; ‘ꦏꦸꦏ꧀ꦏꦸꦫꦺꦤ ꦝꦁꦱꦶꦠꦧ꧀ꦧꦁ ꦄꦲꦺꦴꦱꦶ’, ꦠꦺꦤꦩ꧀ꦲꦶ [ꦠꦺꦤ (ꦏ.), ꦠꦺꦤꦴꦱꦶꦁ (?)] ꦢꦛ꧀ꦜꦺꦴ; ‘ꦕꦟ꧀ꦝꦺꦤ ꦲꦠ꧀ꦡꦶꦤꦴ ꦱꦩꦴꦒꦤ꧀ꦠꦧ꧀ꦧꦁ ꦄꦲꦺꦴꦱꦶ’, ꦠꦺꦤ ꦱꦩꦴꦒꦩꦶꦁ; ‘ꦕꦟ꧀ꦝꦺꦤ ꦄꦱ꧀ꦱꦺꦤ ꦱꦩꦴꦒꦤ꧀ꦠꦧ꧀ꦧꦁ ꦄꦲꦺꦴꦱꦶ’, ꦠꦺꦤ ꦱꦩꦴꦒꦩꦶꦁ; ‘ꦕꦟ꧀ꦝꦺꦤ ꦒꦺꦴꦟꦺꦤ ꦱꦩꦴꦒꦤ꧀ꦠꦧ꧀ꦧꦁ ꦄꦲꦺꦴꦱꦶ’, ꦠꦺꦤ ꦱꦩꦴꦒꦩꦶꦁ; ‘ꦆꦠ꧀ꦡꦶꦪꦴꦥꦶ ꦥꦸꦫꦶꦱꦱ꧀ꦱꦥꦶ ꦤꦴꦩꦩ꧀ꦥꦶ ꦒꦺꦴꦠ꧀ꦠꦩ꧀ꦥꦶ ꦥꦸꦕ꧀ꦖꦶꦠꦧ꧀ꦧꦁ ꦄꦲꦺꦴꦱꦶ’, ꦠꦺꦤ ꦥꦸꦕ꧀ꦖꦶꦁ; ‘ꦒꦴꦩꦱ꧀ꦱꦥꦶ ꦤꦶꦒꦩꦱ꧀ꦱꦥꦶ ꦤꦴꦩꦩ꧀ꦥꦶ ꦩꦒ꧀ꦒꦩ꧀ꦥꦶ ꦥꦸꦕ꧀ꦖꦶꦠꦧ꧀ꦧꦁ ꦄꦲꦺꦴꦱꦶ’, ꦠꦺꦤ ꦥꦸꦕ꧀ꦖꦶꦤ꧀ꦠꦶ. ꦠꦠ꧀ꦫ, ꦱꦤ꧀ꦢꦏ, ꦮꦶꦚ꧀ꦚꦹ ꦥꦸꦫꦶꦱꦺꦴ ꦆꦠꦶ ꦥꦛꦶꦱꦚ꧀ꦕꦶꦏ꧀ꦑꦠꦶ – ‘ꦄꦪꦁ ꦑꦺꦴ ꦨꦮꦁ ꦱꦠ꧀ꦡꦴ ꦱꦧ꧀ꦧꦚ꧀ꦚꦹ ꦱꦧ꧀ꦧꦢꦱ꧀ꦱꦴꦮꦷ ꦄꦥꦫꦶꦱꦺꦱꦁ ꦚꦴꦟꦢꦱ꧀ꦱꦤꦁ ꦥꦛꦶꦗꦴꦤꦴꦠꦶ…ꦥꦺ… ‘ꦒꦴꦩꦱ꧀ꦱꦥꦶ ꦤꦶꦒꦩꦱ꧀ꦱꦥꦶ ꦤꦴꦩꦩ꧀ꦥꦶ ꦩꦒ꧀ꦒꦩ꧀ꦥꦶ ꦥꦸꦕ꧀ꦖꦶꦠꦧ꧀ꦧꦁ ꦄꦲꦺꦴꦱꦶ, ꦠꦺꦤ ꦥꦸꦕ꧀ꦖꦶ’ꦤ꧀ꦠꦶ. ꦱꦺꦴ ‘ꦄꦤꦱ꧀ꦱꦴꦱꦶꦏꦁ ꦆꦢꦁ ꦧ꧀ꦫꦲ꧀ꦩꦕꦫꦶꦪ’ꦤ꧀ꦠꦶ – ꦆꦠꦶ ꦮꦶꦢꦶꦠ꧀ꦮꦴ ꦠꦱ꧀ꦩꦴ ꦧ꧀ꦫꦲ꧀ꦩꦕꦫꦶꦪꦴ ꦤꦶꦧ꧀ꦧꦶꦗ꧀ꦗ ꦥꦏ꧀ꦏꦩꦠꦶ. ꦆꦢꦁ ꦑꦺꦴ, ꦱꦤ꧀ꦢꦏ, ꦠꦺꦤ ꦨꦒꦮꦠꦴ ꦗꦴꦤꦠꦴ ꦥꦱ꧀ꦱꦠꦴ ꦄꦫꦲꦠꦴ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦤ ꦥꦜꦩꦁ ꦄꦤꦱ꧀ꦱꦴꦱꦶꦏꦁ ꦧ꧀ꦫꦲ꧀ꦩꦕꦫꦶꦪꦁ ꦄꦏ꧀ꦑꦴꦠꦁ ꦪꦠ꧀ꦡ ꦮꦶꦚ꧀ꦚꦹ ꦥꦸꦫꦶꦱꦺꦴ ꦱꦱꦏ꧀ꦏꦁ ꦧ꧀ꦫꦲ꧀ꦩꦕꦫꦶꦪꦁ ꦤ ꦮꦱꦺꦪ꧀ꦪ, ꦮꦱꦤ꧀ꦠꦺꦴ ꦕ ꦤꦴꦫꦴꦣꦺꦪ꧀ꦪ ꦚꦴꦪꦁ ꦣꦩ꧀ꦩꦁ ꦏꦸꦱꦭꦁ.

꧒꧓꧐. ‘‘ꦥꦸꦤ ꦕꦥꦫꦁ, ꦱꦤ꧀ꦢꦏ, ꦆꦣꦺꦏꦕ꧀ꦕꦺꦴ ꦱꦠ꧀ꦡꦴ ꦄꦤꦸꦱ꧀ꦱꦮꦶꦏꦺꦴ ꦲꦺꦴꦠꦶ ꦄꦤꦸꦱ꧀ꦱꦮꦱꦕ꧀ꦕꦺꦴ. ꦱꦺꦴ ꦄꦤꦸꦱ꧀ꦱꦮꦺꦤ ꦆꦠꦶꦲꦶꦠꦶꦲꦥꦫꦩ꧀ꦥꦫꦴꦪ ꦥꦶꦛꦏꦱꦩ꧀ꦥꦢꦴꦪ ꦣꦩ꧀ꦩꦁ ꦢꦺꦱꦺꦠꦶ. ꦄꦤꦸꦱ꧀ꦱꦮꦶꦏꦱ꧀ꦱ ꦑꦺꦴ ꦥꦤ, ꦱꦤ꧀ꦢꦏ, ꦱꦠ꧀ꦡꦸꦤꦺꦴ ꦄꦤꦸꦱ꧀ꦱꦮꦱꦕ꧀ꦕꦱ꧀ꦱ ꦱꦸꦱ꧀ꦱꦸꦠꦩ꧀ꦥꦶ ꦲꦺꦴꦠꦶ ꦢꦸꦱ꧀ꦱꦸꦠꦩ꧀ꦥꦶ ꦲꦺꦴꦠꦶ ꦠꦡꦴꦥꦶ ꦲꦺꦴꦠꦶ ꦄꦚ꧀ꦚꦡꦴꦥꦶ ꦲꦺꦴꦠꦶ. ꦠꦠ꧀ꦫ, ꦱꦤ꧀ꦢꦏ, ꦮꦶꦚ꧀ꦚꦹ ꦥꦸꦫꦶꦱꦺꦴ ꦆꦠꦶ ꦥꦛꦶꦱꦚ꧀ꦕꦶꦏ꧀ꦑꦠꦶ – ‘ꦄꦪꦁ ꦑꦺꦴ ꦨꦮꦁ ꦱꦠ꧀ꦡꦴ ꦄꦤꦸꦱ꧀ꦱꦮꦶꦏꦺꦴ ꦄꦤꦸꦱ꧀ꦱꦮꦱꦕ꧀ꦕꦺꦴ ꦱꦺꦴ ꦄꦤꦸꦱ꧀ꦱꦮꦺꦤ ꦆꦠꦶꦲꦶꦠꦶꦲꦥꦫꦩ꧀ꦥꦫꦴꦪ ꦥꦶꦛꦏꦱꦩ꧀ꦥꦢꦴꦪ ꦣꦩ꧀ꦩꦁ ꦢꦺꦱꦺꦠꦶ. ꦄꦤꦸꦱ꧀ꦱꦮꦶꦏꦱ꧀ꦱ ꦑꦺꦴ ꦥꦤ ꦱꦠ꧀ꦡꦸꦤꦺꦴ ꦄꦤꦸꦱ꧀ꦱꦮꦱꦕ꧀ꦕꦱ꧀ꦱ ꦱꦸꦱ꧀ꦱꦸꦠꦩ꧀ꦥꦶ ꦲꦺꦴꦠꦶ ꦢꦸꦱ꧀ꦱꦸꦠꦩ꧀ꦥꦶ ꦲꦺꦴꦠꦶ ꦠꦡꦴꦥꦶ ꦲꦺꦴꦠꦶ ꦄꦚ꧀ꦚꦡꦴꦥꦶ ꦲꦺꦴꦠꦶ’. ꦱꦺꦴ ‘ꦄꦤꦱ꧀ꦱꦴꦱꦶꦏꦁ ꦆꦢꦁ ꦧ꧀ꦫꦲ꧀ꦩꦕꦫꦶꦪ’ꦤ꧀ꦠꦶ – ꦆꦠꦶ ꦮꦶꦢꦶꦠ꧀ꦮꦴ ꦠꦱ꧀ꦩꦴ ꦧ꧀ꦫꦲ꧀ꦩꦕꦫꦶꦪꦴ ꦤꦶꦧ꧀ꦧꦶꦗ꧀ꦗ ꦥꦏ꧀ꦏꦩꦠꦶ. ꦆꦢꦁ ꦑꦺꦴ, ꦱꦤ꧀ꦢꦏ, ꦠꦺꦤ ꦨꦒꦮꦠꦴ ꦗꦴꦤꦠꦴ ꦥꦱ꧀ꦱꦠꦴ ꦄꦫꦲꦠꦴ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦤ ꦢꦸꦠꦶꦪꦁ ꦄꦤꦱ꧀ꦱꦴꦱꦶꦏꦁ ꦧ꧀ꦫꦲ꧀ꦩꦕꦫꦶꦪꦁ ꦄꦏ꧀ꦑꦴꦠꦁ ꦪꦠ꧀ꦡ ꦮꦶꦚ꧀ꦚꦹ ꦥꦸꦫꦶꦱꦺꦴ ꦱꦱꦏ꧀ꦏꦁ ꦧ꧀ꦫꦲ꧀ꦩꦕꦫꦶꦪꦁ ꦤ ꦮꦱꦺꦪ꧀ꦪ, ꦮꦱꦤ꧀ꦠꦺꦴ ꦕ ꦤꦴꦫꦴꦣꦺꦪ꧀ꦪ ꦚꦴꦪꦁ ꦣꦩ꧀ꦩꦁ ꦏꦸꦱꦭꦁ.

꧒꧓꧑. ‘‘ꦥꦸꦤ ꦕꦥꦫꦁ, ꦱꦤ꧀ꦢꦏ, ꦆꦣꦺꦏꦕ꧀ꦕꦺꦴ ꦱꦠ꧀ꦡꦴ ꦠꦏ꧀ꦏꦷ ꦲꦺꦴꦠꦶ ꦮꦷꦩꦁꦱꦷ. ꦱꦺꦴ ꦠꦏ꧀ꦏꦥꦫꦶꦪꦴꦲꦠꦁ ꦮꦷꦩꦁꦱꦴꦤꦸꦕꦫꦶꦠꦁ ꦱꦪꦁꦥꦛꦶꦨꦴꦤꦁ ꦣꦩ꧀ꦩꦁ ꦢꦺꦱꦺꦠꦶ. ꦠꦏ꧀ꦏꦶꦱ꧀ꦱ ꦑꦺꦴ ꦥꦤ, ꦱꦤ꧀ꦢꦏ, ꦱꦠ꧀ꦡꦸꦤꦺꦴ ꦮꦷꦩꦁꦱꦶꦱ꧀ꦱ ꦱꦸꦠꦏ꧀ꦏꦶꦠꦩ꧀ꦥꦶ ꦲꦺꦴꦠꦶ ꦢꦸꦠ꧀ꦠꦏ꧀ꦏꦶꦠꦩ꧀ꦥꦶ ꦲꦺꦴꦠꦶ ꦠꦡꦴꦥꦶ ꦲꦺꦴꦠꦶ ꦄꦚ꧀ꦚꦡꦴꦥꦶ ꦲꦺꦴꦠꦶ. ꦠꦠ꧀ꦫ, ꦱꦤ꧀ꦢꦏ, ꦮꦶꦚ꧀ꦚꦹ ꦥꦸꦫꦶꦱꦺꦴ ꦆꦠꦶ ꦥꦛꦶꦱꦚ꧀ꦕꦶꦏ꧀ꦑꦠꦶ – ‘ꦄꦪꦁ ꦑꦺꦴ ꦨꦮꦁ ꦱꦠ꧀ꦡꦴ ꦠꦏ꧀ꦏꦷ ꦮꦷꦩꦁꦱꦷ. ꦱꦺꦴ ꦠꦏ꧀ꦏꦥꦫꦶꦪꦴꦲꦠꦁ ꦮꦷꦩꦁꦱꦴꦤꦸꦕꦫꦶꦠꦁ ꦱꦪꦁꦥꦛꦶꦨꦴꦤꦁ ꦣꦩ꧀ꦩꦁ ꦢꦺꦱꦺꦠꦶ. ꦠꦏ꧀ꦏꦶꦱ꧀ꦱ ꦑꦺꦴ ꦥꦤ ꦱꦠ꧀ꦡꦸꦤꦺꦴ ꦮꦷꦩꦁꦱꦶꦱ꧀ꦱ ꦱꦸꦠꦏ꧀ꦏꦶꦠꦩ꧀ꦥꦶ ꦲꦺꦴꦠꦶ ꦢꦸꦠ꧀ꦠꦏ꧀ꦏꦶꦠꦩ꧀ꦥꦶ ꦲꦺꦴꦠꦶ ꦠꦡꦴꦥꦶ ꦲꦺꦴꦠꦶ ꦄꦚ꧀ꦚꦡꦴꦥꦶ ꦲꦺꦴꦠꦶ’. ꦱꦺꦴ ‘ꦄꦤꦱ꧀ꦱꦴꦱꦶꦏꦁ ꦆꦢꦁ ꦧ꧀ꦫꦲ꧀ꦩꦕꦫꦶꦪ’ꦤ꧀ꦠꦶ – ꦆꦠꦶ ꦮꦶꦢꦶꦠ꧀ꦮꦴ ꦠꦱ꧀ꦩꦴ ꦧ꧀ꦫꦲ꧀ꦩꦕꦫꦶꦪꦴ ꦤꦶꦧ꧀ꦧꦶꦗ꧀ꦗ ꦥꦏ꧀ꦏꦩꦠꦶ. ꦆꦢꦁ ꦑꦺꦴ, ꦱꦤ꧀ꦢꦏ, ꦠꦺꦤ ꦨꦒꦮꦠꦴ ꦗꦴꦤꦠꦴ ꦥꦱ꧀ꦱꦠꦴ ꦄꦫꦲꦠꦴ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦤ ꦠꦠꦶꦪꦁ ꦄꦤꦱ꧀ꦱꦴꦱꦶꦏꦁ ꦧ꧀ꦫꦲ꧀ꦩꦕꦫꦶꦪꦁ ꦄꦏ꧀ꦑꦴꦠꦁ ꦪꦠ꧀ꦡ ꦮꦶꦚ꧀ꦚꦹ ꦥꦸꦫꦶꦱꦺꦴ ꦱꦱꦏ꧀ꦏꦁ ꦧ꧀ꦫꦲ꧀ꦩꦕꦫꦶꦪꦁ ꦤ ꦮꦱꦺꦪ꧀ꦪ, ꦮꦱꦤ꧀ꦠꦺꦴ ꦕ ꦤꦴꦫꦴꦣꦺꦪ꧀ꦪ ꦚꦴꦪꦁ ꦣꦩ꧀ꦩꦁ ꦏꦸꦱꦭꦁ.

꧒꧓꧒. ‘‘ꦥꦸꦤ ꦕꦥꦫꦁ, ꦱꦤ꧀ꦢꦏ, ꦆꦣꦺꦏꦕ꧀ꦕꦺꦴ ꦱꦠ꧀ꦡꦴ ꦩꦤ꧀ꦢꦺꦴ ꦲꦺꦴꦠꦶ ꦩꦺꦴꦩꦹꦲꦺꦴ. ꦱꦺꦴ ꦩꦤ꧀ꦢꦠ꧀ꦠꦴ ꦩꦺꦴꦩꦹꦲꦠ꧀ꦠꦴ ꦠꦠ꧀ꦡ ꦠꦠ꧀ꦡ [ꦠꦡꦴ ꦠꦡꦴ (ꦱꦷ. ꦱ꧀ꦪꦴ. ꦏꦁ. ꦥꦷ.)] ꦥꦚ꧀ꦲꦁ ꦥꦸꦛ꧀ꦜꦺꦴ ꦱꦩꦴꦤꦺꦴ ꦮꦴꦕꦴꦮꦶꦏ꧀ꦑꦺꦥꦁ ꦄꦴꦥꦗ꧀ꦗꦠꦶ ꦄꦩꦫꦴꦮꦶꦏ꧀ꦑꦺꦥꦁ – ‘ꦌꦮꦤ꧀ꦠꦶꦥꦶ [ꦌꦮꦩ꧀ꦥꦶ (ꦱꦷ. ꦥꦷ.)] ꦩꦺ ꦤꦺꦴ, ꦠꦡꦴꦠꦶꦥꦶ [ꦠꦡꦴꦥꦶ (ꦱꦷ. ꦥꦷ.)] ꦩꦺ ꦤꦺꦴ, ꦄꦚ꧀ꦚꦡꦴꦠꦶꦥꦶ [ꦄꦚ꧀ꦚꦡꦴꦥꦶ (ꦱꦷ. ꦥꦷ.) ( ) ꦱꦧ꧀ꦧꦠ꧀ꦡ ꦤꦠ꧀ꦡꦶ] ꦩꦺ ꦤꦺꦴ, ꦤꦺꦴꦠꦶꦥꦶ ꦩꦺ ꦤꦺꦴ, ꦤꦺꦴ ꦤꦺꦴꦠꦶꦥꦶ ꦩꦺ ꦤꦺꦴ’ꦠꦶ. ꦠꦠ꧀ꦫ, ꦱꦤ꧀ꦢꦏ, ꦮꦶꦚ꧀ꦚꦹ ꦥꦸꦫꦶꦱꦺꦴ ꦆꦠꦶ ꦥꦛꦶꦱꦚ꧀ꦕꦶꦏ꧀ꦑꦠꦶ – ‘ꦄꦪꦁ ꦑꦺꦴ ꦨꦮꦁ ꦱꦠ꧀ꦡꦴ ꦩꦤ꧀ꦢꦺꦴ ꦩꦺꦴꦩꦹꦲꦺꦴ. ꦱꦺꦴ ꦩꦤ꧀ꦢꦠ꧀ꦠꦴ ꦩꦺꦴꦩꦹꦲꦠ꧀ꦠꦴ ꦠꦠ꧀ꦡ ꦠꦠ꧀ꦡ ꦥꦚ꧀ꦲꦁ ꦥꦸꦛ꧀ꦜꦺꦴ ꦱꦩꦴꦤꦺꦴ ꦮꦴꦕꦴꦮꦶꦏ꧀ꦑꦺꦥꦁ ꦄꦴꦥꦗ꧀ꦗꦠꦶ ꦄꦩꦫꦴꦮꦶꦏ꧀ꦑꦺꦥꦁ – ꦌꦮꦤ꧀ꦠꦶꦥꦶ ꦩꦺ ꦤꦺꦴ, ꦠꦡꦴꦠꦶꦥꦶ ꦩꦺ ꦤꦺꦴ, ꦄꦚ꧀ꦚꦡꦴꦠꦶꦥꦶ ꦩꦺ ꦤꦺꦴ, ꦤꦺꦴꦠꦶꦥꦶ ꦩꦺ ꦤꦺꦴ, ꦤꦺꦴ ꦤꦺꦴꦠꦶꦥꦶ ꦩꦺ ꦤꦺꦴ’ꦠꦶ. ꦱꦺꦴ ‘ꦄꦤꦱ꧀ꦱꦴꦱꦶꦏꦁ ꦆꦢꦁ ꦧ꧀ꦫꦲ꧀ꦩꦕꦫꦶꦪ’ꦤ꧀ꦠꦶ – ꦆꦠꦶ ꦮꦶꦢꦶꦠ꧀ꦮꦴ ꦠꦱ꧀ꦩꦴ ꦧ꧀ꦫꦲ꧀ꦩꦕꦫꦶꦪꦴ ꦤꦶꦧ꧀ꦧꦶꦗ꧀ꦗ ꦥꦏ꧀ꦏꦩꦠꦶ. ꦆꦢꦁ ꦑꦺꦴ, ꦱꦤ꧀ꦢꦏ, ꦠꦺꦤ ꦨꦒꦮꦠꦴ ꦗꦴꦤꦠꦴ ꦥꦱ꧀ꦱꦠꦴ ꦄꦫꦲꦠꦴ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦤ ꦕꦠꦸꦠ꧀ꦡꦁ ꦄꦤꦱ꧀ꦱꦴꦱꦶꦏꦁ ꦧ꧀ꦫꦲ꧀ꦩꦕꦫꦶꦪꦁ ꦄꦏ꧀ꦑꦴꦠꦁ ꦪꦠ꧀ꦡ ꦮꦶꦚ꧀ꦚꦹ ꦥꦸꦫꦶꦱꦺꦴ ꦱꦱꦏ꧀ꦏꦁ ꦧ꧀ꦫꦲ꧀ꦩꦕꦫꦶꦪꦁ ꦤ ꦮꦱꦺꦪ꧀ꦪ, ꦮꦱꦤ꧀ꦠꦺꦴ ꦕ ꦤꦴꦫꦴꦣꦺꦪ꧀ꦪ ꦚꦴꦪꦁ ꦣꦩ꧀ꦩꦁ ꦏꦸꦱꦭꦁ.

‘‘ꦆꦩꦴꦤꦶ ꦑꦺꦴ, (ꦠꦴꦤꦶ ꦱꦤ꧀ꦢꦏ, ꦠꦺꦤ ꦨꦒꦮꦠꦴ ꦗꦴꦤꦠꦴ ꦥꦱ꧀ꦱꦠꦴ ꦄꦫꦲꦠꦴ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦤ ꦕꦠ꧀ꦠꦴꦫꦶ ꦄꦤꦱ꧀ꦱꦴꦱꦶꦏꦴꦤꦶ ꦧ꧀ꦫꦲ꧀ꦩꦕꦫꦶꦪꦴꦤꦶ ꦄꦏ꧀ꦑꦴꦠꦴꦤꦶ ꦪꦠ꧀ꦡ ꦮꦶꦚ꧀ꦚꦹ ꦥꦸꦫꦶꦱꦺꦴ ꦱꦱꦏ꧀ꦏꦁ ꦧ꧀ꦫꦲ꧀ꦩꦕꦫꦶꦪꦁ ꦤ ꦮꦱꦺꦪ꧀ꦪ, ꦮꦱꦤ꧀ꦠꦺꦴ ꦕ ꦤꦴꦫꦴꦣꦺꦪ꧀ꦪ ꦚꦴꦪꦁ ꦣꦩ꧀ꦩꦁ ꦏꦸꦱꦭ’’ꦤ꧀ꦠꦶ.

‘‘ꦄꦕ꧀ꦖꦫꦶꦪꦁ, ꦨꦺꦴ ꦄꦴꦤꦤ꧀ꦢ, ꦄꦧ꧀ꦨꦸꦠꦁ, ꦨꦺꦴ ꦄꦴꦤꦤ꧀ꦢ! ꦪꦴꦮꦚ꧀ꦕꦶꦢꦁ ꦠꦺꦤ ꦨꦒꦮꦠꦴ ꦗꦴꦤꦠꦴ ꦥꦱ꧀ꦱꦠꦴ ꦄꦫꦲꦠꦴ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦤ ꦕꦠ꧀ꦠꦴꦫꦶ ꦄꦤꦱ꧀ꦱꦴꦱꦶꦏꦴꦤꦺꦮ ꦧ꧀ꦫꦲ꧀ꦩꦕꦫꦶꦪꦴꦤꦶ ꦄꦤꦱ꧀ꦱꦴꦱꦶꦏꦴꦤꦶ ꦧ꧀ꦫꦲ꧀ꦩꦕꦫꦶꦪꦴꦤꦷꦠꦶ ꦄꦏ꧀ꦑꦴꦠꦴꦤꦶ ꦪꦠ꧀ꦡ ꦮꦶꦚ꧀ꦚꦹ ꦥꦸꦫꦶꦱꦺꦴ ꦱꦱꦏ꧀ꦏꦁ ꦧ꧀ꦫꦲ꧀ꦩꦕꦫꦶꦪꦁ ꦤ ꦮꦱꦺꦪ꧀ꦪ, ꦮꦱꦤ꧀ꦠꦺꦴ ꦕ ꦤꦴꦫꦴꦣꦺꦪ꧀ꦪ ꦚꦴꦪꦁ ꦣꦩ꧀ꦩꦁ ꦏꦸꦱꦭꦁ. ꦱꦺꦴ ꦥꦤ, ꦨꦺꦴ ꦄꦴꦤꦤ꧀ꦢ, ꦱꦠ꧀ꦡꦴ ꦏꦶꦁ ꦮꦴꦢꦷ ꦏꦶꦁ ꦄꦏ꧀ꦑꦴꦪꦷ ꦪꦠ꧀ꦡ ꦮꦶꦚ꧀ꦚꦹ ꦥꦸꦫꦶꦱꦺꦴ ꦱꦱꦏ꧀ꦏꦁ ꦧ꧀ꦫꦲ꧀ꦩꦕꦫꦶꦪꦁ ꦮꦱꦺꦪ꧀ꦪ, ꦮꦱꦤ꧀ꦠꦺꦴ ꦕ ꦄꦴꦫꦴꦣꦺꦪ꧀ꦪ ꦚꦴꦪꦁ ꦣꦩ꧀ꦩꦁ ꦏꦸꦱꦭ’’ꦤ꧀ꦠꦶ.

꧒꧓꧓. ‘‘ꦆꦣ, ꦱꦤ꧀ꦢꦏ, ꦠꦡꦴꦒꦠꦺꦴ ꦭꦺꦴꦏꦺ ꦈꦥ꧀ꦥꦗ꧀ꦗꦠꦶ ꦄꦫꦲꦁ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦴ ꦮꦶꦗ꧀ꦗꦴꦕꦫꦟꦱꦩ꧀ꦥꦤ꧀ꦤꦺꦴ ꦱꦸꦒꦠꦺꦴ ꦭꦺꦴꦏꦮꦶꦢꦹ ꦄꦤꦸꦠ꧀ꦠꦫꦺꦴ ꦥꦸꦫꦶꦱꦢꦩ꧀ꦩꦱꦴꦫꦡꦶ ꦱꦠ꧀ꦡꦴ ꦢꦺꦮꦩꦤꦸꦱ꧀ꦱꦴꦤꦁ ꦧꦸꦢ꧀ꦣꦺꦴ ꦨꦒꦮꦴ…ꦥꦺ… [ꦮꦶꦠ꧀ꦡꦴꦫꦺꦴ ꦩ. ꦤꦶ. ꧒.꧙-꧑꧐ ꦏꦤ꧀ꦢꦫꦏꦱꦸꦠ꧀ꦠꦺ] ꦱꦺꦴ ꦆꦩꦺ ꦥꦚ꧀ꦕ ꦤꦷꦮꦫꦟꦺ ꦥꦲꦴꦪ ꦕꦺꦠꦱꦺꦴ ꦈꦥꦏ꧀ꦏꦶꦭꦺꦱꦺ ꦥꦚ꧀ꦚꦴꦪ ꦢꦸꦧ꧀ꦧꦭꦷꦏꦫꦟꦺ ꦮꦶꦮꦶꦕ꧀ꦕꦺꦮ ꦏꦴꦩꦺꦲꦶ ꦮꦶꦮꦶꦕ꧀ꦕ ꦄꦏꦸꦱꦭꦺꦲꦶ ꦣꦩ꧀ꦩꦺꦲꦶ ꦱꦮꦶꦠꦏ꧀ꦏꦁ ꦱꦮꦶꦕꦴꦫꦁ ꦮꦶꦮꦺꦏꦗꦁ ꦥꦷꦠꦶꦱꦸꦑꦁ ꦥꦜꦩꦁ ꦙꦴꦤꦁ ꦈꦥꦱꦩ꧀ꦥꦗ꧀ꦗ ꦮꦶꦲꦫꦠꦶ. ꦪꦱ꧀ꦩꦶꦁ ꦑꦺꦴ [ꦪꦱ꧀ꦩꦶꦁ ꦑꦺꦴ ꦥꦤ (ꦱ꧀ꦪꦴ. ꦏꦁ. ꦏ.)], ꦱꦤ꧀ꦢꦏ, ꦱꦠ꧀ꦡꦫꦶ ꦱꦴꦮꦏꦺꦴ ꦌꦮꦫꦹꦥꦁ ꦈꦭ꦳ꦴꦫꦮꦶꦱꦺꦱꦁ ꦄꦣꦶꦒꦕ꧀ꦖꦠꦶ ꦠꦠ꧀ꦡ ꦮꦶꦚ꧀ꦚꦹ ꦥꦸꦫꦶꦱꦺꦴ ꦱꦱꦏ꧀ꦏꦁ ꦧ꧀ꦫꦲ꧀ꦩꦕꦫꦶꦪꦁ ꦮꦱꦺꦪ꧀ꦪ, ꦮꦱꦤ꧀ꦠꦺꦴ ꦕ ꦄꦴꦫꦴꦣꦺꦪ꧀ꦪ ꦚꦴꦪꦁ ꦣꦩ꧀ꦩꦁ ꦏꦸꦱꦭꦁ.

‘‘ꦥꦸꦤ ꦕꦥꦫꦁ, ꦱꦤ꧀ꦢꦏ, ꦨꦶꦏ꧀ꦑꦸ ꦮꦶꦠꦏ꧀ꦏꦮꦶꦕꦴꦫꦴꦤꦁ ꦮꦹꦥꦱꦩꦴ…ꦥꦺ... ꦢꦸꦠꦶꦪꦁ ꦙꦴꦤꦁ ꦈꦥꦱꦩ꧀ꦥꦗ꧀ꦗ ꦮꦶꦲꦫꦠꦶ. ꦪꦱ꧀ꦩꦶꦁ ꦑꦺꦴ, ꦱꦤ꧀ꦢꦏ, ꦱꦠ꧀ꦡꦫꦶ ꦱꦴꦮꦏꦺꦴ ꦌꦮꦫꦹꦥꦁ ꦈꦭ꦳ꦴꦫꦮꦶꦱꦺꦱꦁ ꦄꦣꦶꦒꦕ꧀ꦖꦠꦶ ꦠꦠ꧀ꦡ ꦮꦶꦚ꧀ꦚꦹ ꦥꦸꦫꦶꦱꦺꦴ ꦱꦱꦏ꧀ꦏꦁ ꦧ꧀ꦫꦲ꧀ꦩꦕꦫꦶꦪꦁ ꦮꦱꦺꦪ꧀ꦪ, ꦮꦱꦤ꧀ꦠꦺꦴ ꦕ ꦄꦴꦫꦴꦣꦺꦪ꧀ꦪ ꦚꦴꦪꦁ ꦣꦩ꧀ꦩꦁ ꦏꦸꦱꦭꦁ.

‘‘ꦥꦸꦤ ꦕꦥꦫꦁ, ꦱꦤ꧀ꦢꦏ, ꦨꦶꦏ꧀ꦑꦸ ꦥꦷꦠꦶꦪꦴ ꦕ ꦮꦶꦫꦴꦒꦴ ꦈꦥꦺꦏ꧀ꦑꦏꦺꦴ ꦕ ꦮꦶꦲꦫꦠꦶ…ꦥꦺ… ꦠꦠꦶꦪꦁ ꦙꦴꦤꦁ ꦈꦥꦱꦩ꧀ꦥꦗ꧀ꦗ ꦮꦶꦲꦫꦠꦶ. ꦪꦱ꧀ꦩꦶꦁ ꦑꦺꦴ, ꦱꦤ꧀ꦢꦏ, ꦱꦠ꧀ꦡꦫꦶ ꦱꦴꦮꦏꦺꦴ ꦌꦮꦫꦹꦥꦁ ꦈꦭ꦳ꦴꦫꦮꦶꦱꦺꦱꦁ ꦄꦣꦶꦒꦕ꧀ꦖꦠꦶ ꦠꦠ꧀ꦡ ꦮꦶꦚ꧀ꦚꦹ ꦥꦸꦫꦶꦱꦺꦴ ꦱꦱꦏ꧀ꦏꦁ ꦧ꧀ꦫꦲ꧀ꦩꦕꦫꦶꦪꦁ ꦮꦱꦺꦪ꧀ꦪ, ꦮꦱꦤ꧀ꦠꦺꦴ ꦕ ꦄꦴꦫꦴꦣꦺꦪ꧀ꦪ ꦚꦴꦪꦁ ꦣꦩ꧀ꦩꦁ ꦏꦸꦱꦭꦁ.

‘‘ꦥꦸꦤ ꦕꦥꦫꦁ, ꦱꦤ꧀ꦢꦏ, ꦨꦶꦏ꧀ꦑꦸ ꦱꦸꦑꦱ꧀ꦱ ꦕ ꦥꦲꦴꦤꦴ…ꦥꦺ… ꦕꦠꦸꦠ꧀ꦡꦁ ꦙꦴꦤꦁ ꦈꦥꦱꦩ꧀ꦥꦗ꧀ꦗ ꦮꦶꦲꦫꦠꦶ. ꦪꦱ꧀ꦩꦶꦁ ꦑꦺꦴ, ꦱꦤ꧀ꦢꦏ, ꦱꦠ꧀ꦡꦫꦶ ꦱꦴꦮꦏꦺꦴ ꦌꦮꦫꦹꦥꦁ ꦈꦭ꦳ꦴꦫꦮꦶꦱꦺꦱꦁ ꦄꦣꦶꦒꦕ꧀ꦖꦠꦶ ꦠꦠ꧀ꦡ ꦮꦶꦚ꧀ꦚꦹ ꦥꦸꦫꦶꦱꦺꦴ ꦱꦱꦏ꧀ꦏꦁ ꦧ꧀ꦫꦲ꧀ꦩꦕꦫꦶꦪꦁ ꦮꦱꦺꦪ꧀ꦪ, ꦮꦱꦤ꧀ꦠꦺꦴ ꦕ ꦄꦴꦫꦴꦣꦺꦪ꧀ꦪ ꦚꦴꦪꦁ ꦣꦩ꧀ꦩꦁ ꦏꦸꦱꦭꦁ.

‘‘ꦱꦺꦴ ꦌꦮꦁ ꦱꦩꦴꦲꦶꦠꦺ ꦕꦶꦠ꧀ꦠꦺ ꦥꦫꦶꦱꦸꦢ꧀ꦣꦺ ꦥꦫꦶꦪꦺꦴꦢꦴꦠꦺ ꦄꦤꦔ꧀ꦒꦟꦺ ꦮꦶꦒꦠꦹꦥꦏ꧀ꦏꦶꦭꦺꦱꦺ ꦩꦸꦢꦸꦨꦹꦠꦺ ꦏꦩ꧀ꦩꦤꦶꦪꦺ ꦜꦶꦠꦺ ꦄꦴꦤꦺꦚ꧀ꦗꦥ꧀ꦥꦠ꧀ꦠꦺ ꦥꦸꦧ꧀ꦧꦺꦤꦶꦮꦴꦱꦴꦤꦸꦱ꧀ꦱꦠꦶꦚꦴꦟꦴꦪ ꦕꦶꦠ꧀ꦠꦁ ꦄꦨꦶꦤꦶꦤ꧀ꦤꦴꦩꦺꦠꦶ. ꦱꦺꦴ ꦄꦤꦺꦏꦮꦶꦲꦶꦠꦁ ꦥꦸꦧ꧀ꦧꦺꦤꦶꦮꦴꦱꦁ ꦄꦤꦸꦱ꧀ꦱꦫꦠꦶ, ꦱꦺꦪ꧀ꦪꦡꦶꦢꦁ – ꦌꦏꦩ꧀ꦥꦶ ꦗꦴꦠꦶꦁ ꦢ꧀ꦮꦺꦥꦶ ꦗꦴꦠꦶꦪꦺꦴ…ꦥꦺ… ꦆꦠꦶ ꦱꦴꦏꦴꦫꦁ ꦱꦈꦢ꧀ꦢꦺꦱꦁ ꦄꦤꦺꦏꦮꦶꦲꦶꦠꦁ ꦥꦸꦧ꧀ꦧꦺꦤꦶꦮꦴꦱꦁ ꦄꦤꦸꦱ꧀ꦱꦫꦠꦶ. ꦪꦱ꧀ꦩꦶꦁ ꦑꦺꦴ, ꦱꦤ꧀ꦢꦏ, ꦱꦠ꧀ꦡꦫꦶ ꦱꦴꦮꦏꦺꦴ ꦌꦮꦫꦹꦥꦁ ꦈꦭ꦳ꦴꦫꦮꦶꦱꦺꦱꦁ ꦄꦣꦶꦒꦕ꧀ꦖꦠꦶ ꦠꦠ꧀ꦡ ꦮꦶꦚ꧀ꦚꦹ ꦥꦸꦫꦶꦱꦺꦴ ꦱꦱꦏ꧀ꦏꦁ ꦧ꧀ꦫꦲ꧀ꦩꦕꦫꦶꦪꦁ ꦮꦱꦺꦪ꧀ꦪ, ꦮꦱꦤ꧀ꦠꦺꦴ ꦕ ꦄꦴꦫꦴꦣꦺꦪ꧀ꦪ ꦚꦴꦪꦁ ꦣꦩ꧀ꦩꦁ ꦏꦸꦱꦭꦁ.

‘‘ꦱꦺꦴ ꦌꦮꦁ ꦱꦩꦴꦲꦶꦠꦺ ꦕꦶꦠ꧀ꦠꦺ ꦥꦫꦶꦱꦸꦢ꧀ꦣꦺ ꦥꦫꦶꦪꦺꦴꦢꦴꦠꦺ ꦄꦤꦔ꧀ꦒꦟꦺ ꦮꦶꦒꦠꦹꦥꦏ꧀ꦏꦶꦭꦺꦱꦺ ꦩꦸꦢꦸꦨꦹꦠꦺ ꦏꦩ꧀ꦩꦤꦶꦪꦺ ꦜꦶꦠꦺ ꦄꦴꦤꦺꦚ꧀ꦗꦥ꧀ꦥꦠ꧀ꦠꦺ ꦱꦠ꧀ꦠꦴꦤꦁ ꦕꦸꦠꦹꦥꦥꦴꦠꦚꦴꦟꦴꦪ ꦕꦶꦠ꧀ꦠꦁ ꦄꦨꦶꦤꦶꦤ꧀ꦤꦴꦩꦺꦠꦶ. ꦱꦺꦴ ꦢꦶꦧ꧀ꦧꦺꦤ ꦕꦏ꧀ꦑꦸꦤꦴ ꦮꦶꦱꦸꦢ꧀ꦣꦺꦤ ꦄꦠꦶꦏ꧀ꦏꦤ꧀ꦠꦩꦴꦤꦸꦱꦏꦺꦤ ꦱꦠ꧀ꦠꦺ ꦥꦱ꧀ꦱꦠꦶ ꦕꦮꦩꦴꦤꦺ ꦈꦥꦥꦗ꧀ꦗꦩꦴꦤꦺ ꦲꦷꦤꦺ ꦥꦟꦷꦠꦺ ꦱꦸꦮꦟ꧀ꦟꦺ ꦢꦸꦧ꧀ꦧꦟ꧀ꦟꦺ ꦱꦸꦒꦠꦺ ꦢꦸꦒ꧀ꦒꦠꦺ…ꦥꦺ… ꦪꦡꦴꦏꦩ꧀ꦩꦹꦥꦒꦺ ꦱꦠ꧀ꦠꦺ ꦥꦗꦴꦤꦴꦠꦶ. ꦪꦱ꧀ꦩꦶꦁ ꦑꦺꦴ, ꦱꦤ꧀ꦢꦏ, ꦱꦠ꧀ꦡꦫꦶ ꦱꦴꦮꦏꦺꦴ ꦌꦮꦫꦹꦥꦁ ꦈꦭ꦳ꦴꦫꦮꦶꦱꦺꦱꦁ ꦄꦣꦶꦒꦕ꧀ꦖꦠꦶ ꦠꦠ꧀ꦡ ꦮꦶꦚ꧀ꦚꦹ ꦥꦸꦫꦶꦱꦺꦴ ꦱꦱꦏ꧀ꦏꦁ ꦧ꧀ꦫꦲ꧀ꦩꦕꦫꦶꦪꦁ ꦮꦱꦺꦪ꧀ꦪ, ꦮꦱꦤ꧀ꦠꦺꦴ ꦕ ꦄꦴꦫꦴꦣꦺꦪ꧀ꦪ ꦚꦴꦪꦁ ꦣꦩ꧀ꦩꦁ ꦏꦸꦱꦭꦁ.

‘‘ꦱꦺꦴ ꦌꦮꦁ ꦱꦩꦴꦲꦶꦠꦺ ꦕꦶꦠ꧀ꦠꦺ ꦥꦫꦶꦱꦸꦢ꧀ꦣꦺ ꦥꦫꦶꦪꦺꦴꦢꦴꦠꦺ ꦄꦤꦔ꧀ꦒꦟꦺ ꦮꦶꦒꦠꦹꦥꦏ꧀ꦏꦶꦭꦺꦱꦺ ꦩꦸꦢꦸꦨꦹꦠꦺ ꦏꦩ꧀ꦩꦤꦶꦪꦺ ꦜꦶꦠꦺ ꦄꦴꦤꦺꦚ꧀ꦗꦥ꧀ꦥꦠ꧀ꦠꦺ ꦄꦴꦱꦮꦴꦤꦁ ꦑꦪꦚꦴꦟꦴꦪ ꦕꦶꦠ꧀ꦠꦁ ꦄꦨꦶꦤꦶꦤ꧀ꦤꦴꦩꦺꦠꦶ. ꦱꦺꦴ ‘ꦆꦢꦁ ꦢꦸꦏ꧀ꦑ’ꦤ꧀ꦠꦶ ꦪꦡꦴꦨꦹꦠꦁ ꦥꦗꦴꦤꦴꦠꦶ, ‘ꦄꦪꦁ ꦢꦸꦏ꧀ꦑꦱꦩꦸꦢꦪꦺꦴ’ꦠꦶ ꦪꦡꦴꦨꦹꦠꦁ ꦥꦗꦴꦤꦴꦠꦶ, ‘ꦄꦪꦁ ꦢꦸꦏ꧀ꦑꦤꦶꦫꦺꦴꦣꦺꦴ’ꦠꦶ ꦪꦡꦴꦨꦹꦠꦁ ꦥꦗꦴꦤꦴꦠꦶ, ‘ꦄꦪꦁ ꦢꦸꦏ꧀ꦑꦤꦶꦫꦺꦴꦣꦒꦴꦩꦶꦤꦷ ꦥꦛꦶꦥꦢꦴ’ꦠꦶ ꦪꦡꦴꦨꦹꦠꦁ ꦥꦗꦴꦤꦴꦠꦶ; ‘ꦆꦩꦺ ꦄꦴꦱꦮꦴ’ꦠꦶ ꦪꦡꦴꦨꦹꦠꦁ ꦥꦗꦴꦤꦴꦠꦶ, ‘ꦄꦪꦁ ꦄꦴꦱꦮꦱꦩꦸꦢꦪꦺꦴ’ꦠꦶ ꦪꦡꦴꦨꦹꦠꦁ ꦥꦗꦴꦤꦴꦠꦶ, ‘ꦄꦪꦁ ꦄꦴꦱꦮꦤꦶꦫꦺꦴꦣꦺꦴ’ꦠꦶ ꦪꦡꦴꦨꦹꦠꦁ ꦥꦗꦴꦤꦴꦠꦶ, ‘ꦄꦪꦁ ꦄꦴꦱꦮꦤꦶꦫꦺꦴꦣꦒꦴꦩꦶꦤꦷ ꦥꦛꦶꦥꦢꦴ’ꦠꦶ ꦪꦡꦴꦨꦹꦠꦁ ꦥꦗꦴꦤꦴꦠꦶ. ꦠꦱ꧀ꦱ ꦌꦮꦁ ꦗꦴꦤꦠꦺꦴ ꦌꦮꦁ ꦥꦱ꧀ꦱꦠꦺꦴ ꦏꦴꦩꦴꦱꦮꦴꦥꦶ ꦕꦶꦠ꧀ꦠꦁ ꦮꦶꦩꦸꦕ꧀ꦕꦠꦶ, ꦨꦮꦴꦱꦮꦴꦥꦶ ꦕꦶꦠ꧀ꦠꦁ ꦮꦶꦩꦸꦕ꧀ꦕꦠꦶ, ꦄꦮꦶꦗ꧀ꦗꦴꦱꦮꦴꦥꦶ ꦕꦶꦠ꧀ꦠꦁ ꦮꦶꦩꦸꦕ꧀ꦕꦠꦶ. ꦮꦶꦩꦸꦠ꧀ꦠꦱ꧀ꦩꦶꦁ ꦮꦶꦩꦸꦠ꧀ꦠꦩꦶꦠꦶ ꦚꦴꦟꦁ ꦲꦺꦴꦠꦶ. ‘ꦑꦷꦟꦴ ꦗꦴꦠꦶ, ꦮꦸꦱꦶꦠꦁ ꦧ꧀ꦫꦲ꧀ꦩꦕꦫꦶꦪꦁ, ꦏꦠꦁ ꦏꦫꦟꦷꦪꦁ, ꦤꦴꦥꦫꦁ ꦆꦠ꧀ꦡꦠ꧀ꦠꦴꦪꦴ’ꦠꦶ ꦥꦗꦴꦤꦴꦠꦶ. ꦪꦱ꧀ꦩꦶꦁ ꦑꦺꦴ, ꦱꦤ꧀ꦢꦏ, ꦱꦠ꧀ꦡꦫꦶ ꦱꦴꦮꦏꦺꦴ ꦌꦮꦫꦹꦥꦁ ꦈꦭ꦳ꦴꦫꦮꦶꦱꦺꦱꦁ ꦄꦣꦶꦒꦕ꧀ꦖꦠꦶ ꦠꦠ꧀ꦡ ꦮꦶꦚ꧀ꦚꦹ ꦥꦸꦫꦶꦱꦺꦴ ꦱꦱꦏ꧀ꦏꦁ ꦧ꧀ꦫꦲ꧀ꦩꦕꦫꦶꦪꦁ ꦮꦱꦺꦪ꧀ꦪ, ꦮꦱꦤ꧀ꦠꦺꦴ ꦕ ꦄꦴꦫꦴꦣꦺꦪ꧀ꦪ ꦚꦴꦪꦁ ꦣꦩ꧀ꦩꦁ ꦏꦸꦱꦭ’’ꦤ꧀ꦠꦶ.

꧒꧓꧔. ‘‘ꦪꦺꦴ ꦥꦤ ꦱꦺꦴ, ꦨꦺꦴ ꦄꦴꦤꦤ꧀ꦢ, ꦨꦶꦏ꧀ꦑꦸ ꦄꦫꦲꦁ ꦑꦷꦟꦴꦱꦮꦺꦴ ꦮꦸꦱꦶꦠꦮꦴ ꦏꦠꦏꦫꦟꦷꦪꦺꦴ ꦎꦲꦶꦠꦨꦴꦫꦺꦴ ꦄꦤꦸꦥ꧀ꦥꦠ꧀ꦠꦱꦢꦠ꧀ꦡꦺꦴ ꦥꦫꦶꦏ꧀ꦑꦷꦟꦨꦮꦱꦁꦪꦺꦴꦗꦤꦺꦴ ꦱꦩ꧀ꦩꦢꦚ꧀ꦚꦴ ꦮꦶꦩꦸꦠ꧀ꦠꦺꦴ ꦥꦫꦶꦨꦸꦚ꧀ꦗꦺꦪ꧀ꦪ ꦱꦺꦴ ꦏꦴꦩꦺ’’ꦠꦶ? ‘‘ꦪꦺꦴ ꦱꦺꦴ, ꦱꦤ꧀ꦢꦏ, ꦨꦶꦏ꧀ꦑꦸ ꦄꦫꦲꦁ ꦑꦷꦟꦴꦱꦮꦺꦴ ꦮꦸꦱꦶꦠꦮꦴ ꦏꦠꦏꦫꦟꦷꦪꦺꦴ ꦎꦲꦶꦠꦨꦴꦫꦺꦴ ꦄꦤꦸꦥ꧀ꦥꦠ꧀ꦠꦱꦢꦠ꧀ꦡꦺꦴ ꦥꦫꦶꦏ꧀ꦑꦷꦟꦨꦮꦱꦁꦪꦺꦴꦗꦤꦺꦴ ꦱꦩ꧀ꦩꦢꦚ꧀ꦚꦴ ꦮꦶꦩꦸꦠ꧀ꦠꦺꦴ ꦄꦨꦧ꧀ꦧꦺꦴ ꦱꦺꦴ ꦥꦚ꧀ꦕꦛ꧀ꦜꦴꦤꦴꦤꦶ ꦄꦗ꧀ꦙꦴꦕꦫꦶꦠꦸꦁ. ꦄꦨꦧ꧀ꦧꦺꦴ ꦑꦷꦟꦴꦱꦮꦺꦴ ꦨꦶꦏ꧀ꦑꦸ ꦱꦚ꧀ꦕꦶꦕ꧀ꦕ ꦥꦴꦟꦁ ꦗꦷꦮꦶꦠꦴ ꦮꦺꦴꦫꦺꦴꦥꦺꦠꦸꦁ, ꦄꦨꦧ꧀ꦧꦺꦴ ꦑꦷꦟꦴꦱꦮꦺꦴ ꦨꦶꦏ꧀ꦑꦸ ꦄꦢꦶꦤ꧀ꦤꦁ ꦡꦺꦪ꧀ꦪꦱꦔ꧀ꦑꦴꦠꦁ ꦄꦴꦢꦴꦠꦸꦁ, ꦄꦨꦧ꧀ꦧꦺꦴ ꦑꦷꦟꦴꦱꦮꦺꦴ ꦨꦶꦏ꧀ꦑꦸ ꦩꦺꦡꦸꦤꦁ ꦣꦩ꧀ꦩꦁ ꦥꦛꦶꦱꦺꦮꦺꦠꦸꦁ, ꦄꦨꦧ꧀ꦧꦺꦴ ꦑꦷꦟꦴꦱꦮꦺꦴ ꦨꦶꦏ꧀ꦑꦸ ꦱꦩ꧀ꦥꦗꦴꦤꦩꦸꦱꦴ ꦨꦴꦱꦶꦠꦸꦁ, ꦄꦨꦧ꧀ꦧꦺꦴ ꦑꦷꦟꦴꦱꦮꦺꦴ ꦨꦶꦏ꧀ꦑꦸ ꦱꦤ꧀ꦤꦶꦣꦶꦏꦴꦫꦏꦁ ꦏꦴꦩꦺ ꦥꦫꦶꦨꦸꦚ꧀ꦗꦶꦠꦸꦁ, ꦱꦺꦪ꧀ꦪꦡꦴꦥꦶ ꦥꦸꦧ꧀ꦧꦺ ꦄꦒꦴꦫꦶꦪꦨꦹꦠꦺꦴ. ꦪꦺꦴ ꦱꦺꦴ, ꦱꦤ꧀ꦢꦏ, ꦨꦶꦏ꧀ꦑꦸ ꦄꦫꦲꦁ ꦑꦷꦟꦴꦱꦮꦺꦴ ꦮꦸꦱꦶꦠꦮꦴ ꦏꦠꦏꦫꦟꦷꦪꦺꦴ ꦎꦲꦶꦠꦨꦴꦫꦺꦴ ꦄꦤꦸꦥ꧀ꦥꦠ꧀ꦠꦱꦢꦠ꧀ꦡꦺꦴ ꦥꦫꦶꦏ꧀ꦑꦷꦟꦨꦮꦱꦁꦪꦺꦴꦗꦤꦺꦴ ꦱꦩ꧀ꦩꦢꦚ꧀ꦚꦴ ꦮꦶꦩꦸꦠ꧀ꦠꦺꦴ ꦄꦨꦧ꧀ꦧꦺꦴ ꦱꦺꦴ ꦆꦩꦴꦤꦶ ꦥꦚ꧀ꦕꦛ꧀ꦜꦴꦤꦴꦤꦶ ꦄꦗ꧀ꦙꦴꦕꦫꦶꦠꦸ’’ꦤ꧀ꦠꦶ.

꧒꧓꧕. ‘‘ꦪꦺꦴ ꦥꦤ ꦱꦺꦴ, ꦨꦺꦴ ꦄꦴꦤꦤ꧀ꦢ, ꦨꦶꦏ꧀ꦑꦸ ꦄꦫꦲꦁ ꦑꦷꦟꦴꦱꦮꦺꦴ ꦮꦸꦱꦶꦠꦮꦴ ꦏꦠꦏꦫꦟꦷꦪꦺꦴ ꦎꦲꦶꦠꦨꦴꦫꦺꦴ ꦄꦤꦸꦥ꧀ꦥꦠ꧀ꦠꦱꦢꦠ꧀ꦡꦺꦴ ꦥꦫꦶꦏ꧀ꦑꦷꦟꦨꦮꦱꦁꦪꦺꦴꦗꦤꦺꦴ ꦱꦩ꧀ꦩꦢꦚ꧀ꦚꦴ ꦮꦶꦩꦸꦠ꧀ꦠꦺꦴ ꦠꦱ꧀ꦱ ꦕꦫꦠꦺꦴ ꦕꦺꦮ ꦠꦶꦛ꧀ꦜꦠꦺꦴ ꦕ ꦱꦸꦠ꧀ꦠꦱ꧀ꦱ ꦕ ꦗꦴꦒꦫꦱ꧀ꦱ ꦕ ꦱꦠꦠꦁ ꦱꦩꦶꦠꦁ ꦚꦴꦟꦢꦱ꧀ꦱꦤꦁ ꦥꦕ꧀ꦕꦸꦥꦛ꧀ꦜꦶꦠꦁ – ‘ꦑꦷꦟꦴ ꦩꦺ ꦄꦴꦱꦮꦴ’’’ꦠꦶ? ‘‘ꦠꦺꦤ ꦲꦶ, ꦱꦤ꧀ꦢꦏ, ꦈꦥꦩꦁ ꦠꦺ ꦏꦫꦶꦱ꧀ꦱꦴꦩꦶ; ꦈꦥꦩꦴꦪꦥꦶꦣꦺꦏꦕ꧀ꦕꦺ ꦮꦶꦚ꧀ꦚꦹ ꦥꦸꦫꦶꦱꦴ ꦨꦴꦱꦶꦠꦱ꧀ꦱ ꦄꦠ꧀ꦡꦁ ꦄꦴꦗꦴꦤꦤ꧀ꦠꦶ. ꦱꦺꦪ꧀ꦪꦡꦴꦥꦶ, ꦱꦤ꧀ꦢꦏ, ꦥꦸꦫꦶꦱꦱ꧀ꦱ ꦲꦠ꧀ꦡꦥꦴꦢꦴ ꦖꦶꦤ꧀ꦤꦴ; ꦠꦱ꧀ꦱ ꦕꦫꦠꦺꦴ ꦕꦺꦮ ꦠꦶꦛ꧀ꦜꦠꦺꦴ ꦕ ꦱꦸꦠ꧀ꦠꦱ꧀ꦱ ꦕ ꦗꦴꦒꦫꦱ꧀ꦱ ꦕ ꦱꦠꦠꦁ ꦱꦩꦶꦠꦁ (ꦗꦴꦤꦴꦠꦶ – ‘ꦖꦶꦤ꧀ꦤꦴ ꦩꦺ ꦲꦠ꧀ꦡꦥꦴꦢꦴ’ꦠꦶ, ꦈꦢꦴꦲꦸ ꦥꦕ꧀ꦕꦮꦺꦏ꧀ꦑꦩꦴꦤꦺꦴ ꦗꦴꦤꦴꦠꦶ – ‘ꦖꦶꦤ꧀ꦤꦴ ꦩꦺ ꦲꦠ꧀ꦡꦥꦴꦢꦴ’’’ꦠꦶ? ‘‘ꦤ ꦑꦺꦴ, ꦨꦺꦴ ꦄꦴꦤꦤ꧀ꦢ, ꦱꦺꦴ ꦥꦸꦫꦶꦱꦺꦴ ꦱꦠꦠꦁ ꦱꦩꦶꦠꦁ ꦗꦴꦤꦴꦠꦶ – ‘ꦖꦶꦤ꧀ꦤꦴ ꦩꦺ ꦲꦠ꧀ꦡꦥꦴꦢꦴ’ ꦠꦶ.) [(ꦖꦶꦤ꧀ꦤꦴꦮ ꦲꦠ꧀ꦡꦥꦴꦢꦴ,) (ꦱꦷ. ꦱ꧀ꦪꦴ. ꦏꦁ. ꦥꦷ.)] ꦄꦥꦶ ꦕ ꦑꦺꦴ ꦥꦤ ꦤꦁ ꦥꦕ꧀ꦕꦮꦺꦏ꧀ꦑꦩꦴꦤꦺꦴ ꦗꦴꦤꦴꦠꦶ – ‘ꦖꦶꦤ꧀ꦤꦴ ꦩꦺ ꦲꦠ꧀ꦡꦥꦴꦢꦴ’’’ꦠꦶ. ‘‘ꦌꦮꦩꦺꦮ ꦑꦺꦴ, ꦱꦤ꧀ꦢꦏ, ꦪꦺꦴ ꦱꦺꦴ ꦨꦶꦏ꧀ꦑꦸ ꦄꦫꦲꦁ ꦑꦷꦟꦴꦱꦮꦺꦴ ꦮꦸꦱꦶꦠꦮꦴ ꦏꦠꦏꦫꦟꦷꦪꦺꦴ ꦎꦲꦶꦠꦨꦴꦫꦺꦴ ꦄꦤꦸꦥ꧀ꦥꦠ꧀ꦠꦱꦢꦠ꧀ꦡꦺꦴ ꦥꦫꦶꦏ꧀ꦑꦷꦟꦨꦮꦱꦁꦪꦺꦴꦗꦤꦺꦴ ꦱꦩ꧀ꦩꦢꦚ꧀ꦚꦴ ꦮꦶꦩꦸꦠ꧀ꦠꦺꦴ ꦠꦱ꧀ꦱ ꦕꦫꦠꦺꦴ ꦕꦺꦮ ꦠꦶꦛ꧀ꦜꦠꦺꦴ ꦕ ꦱꦸꦠ꧀ꦠꦱ꧀ꦱ ꦕ ꦗꦴꦒꦫꦱ꧀ꦱ ꦕ ꦱꦠꦠꦁ ꦱꦩꦶꦠꦁ (ꦚꦴꦟꦢꦱ꧀ꦱꦤꦁ ꦤ ꦥꦕ꧀ꦕꦸꦥꦛ꧀ꦜꦶꦠꦁ – ‘ꦑꦷꦟꦴ ꦩꦺ ꦄꦴꦱꦮꦴ’ꦠꦶ;) [(ꦑꦷꦟꦴꦮ ꦄꦴꦱꦮꦴ,) (ꦱꦷ. ꦱ꧀ꦪꦴ. ꦏꦁ. ꦥꦷ.)] ꦄꦥꦶ ꦕ ꦑꦺꦴ ꦥꦤ ꦤꦁ ꦥꦕ꧀ꦕꦮꦺꦏ꧀ꦑꦩꦴꦤꦺꦴ ꦗꦴꦤꦴꦠꦶ – ‘ꦑꦷꦟꦴ ꦩꦺ ꦄꦴꦱꦮꦴ’’’ꦠꦶ.

꧒꧓꧖. ‘‘ꦏꦷꦮꦧꦲꦸꦏꦴ ꦥꦤ, ꦨꦺꦴ ꦄꦴꦤꦤ꧀ꦢ, ꦆꦩꦱ꧀ꦩꦶꦁ ꦣꦩ꧀ꦩꦮꦶꦤꦪꦺ ꦤꦶꦪ꧀ꦪꦴꦠꦴꦫꦺꦴ’’ꦠꦶ? ‘‘ꦤ ꦑꦺꦴ, ꦱꦤ꧀ꦢꦏ, ꦌꦏꦁꦪꦺꦮ ꦱꦠꦁ ꦤ ꦢ꧀ꦮꦺ ꦱꦠꦴꦤꦶ ꦤ ꦠꦷꦟꦶ ꦱꦠꦴꦤꦶ ꦤ ꦕꦠ꧀ꦠꦴꦫꦶ ꦱꦠꦴꦤꦶ ꦤ ꦥꦚ꧀ꦕ ꦱꦠꦴꦤꦶ, ꦄꦡ ꦑꦺꦴ ꦨꦶꦪ꧀ꦪꦺꦴꦮ ꦪꦺ ꦆꦩꦱ꧀ꦩꦶꦁ ꦣꦩ꧀ꦩꦮꦶꦤꦪꦺ ꦤꦶꦪ꧀ꦪꦴꦠꦴꦫꦺꦴ’’ꦠꦶ. ‘‘ꦄꦕ꧀ꦖꦫꦶꦪꦁ, ꦨꦺꦴ ꦄꦴꦤꦤ꧀ꦢ, ꦄꦧ꧀ꦨꦸꦠꦁ, ꦨꦺꦴ ꦄꦴꦤꦤ꧀ꦢ! ꦤ ꦕ ꦤꦴꦩ ꦱꦣꦩ꧀ꦩꦺꦴꦏ꧀ꦏꦁꦱꦤꦴ ꦨꦮꦶꦱ꧀ꦱꦠꦶ, ꦤ ꦥꦫꦣꦩ꧀ꦩꦮꦩ꧀ꦨꦤꦴ, ꦄꦴꦪꦠꦤꦺ ꦕ ꦣꦩ꧀ꦩꦢꦺꦱꦤꦴ ꦠꦴꦮ ꦧꦲꦸꦏꦴ ꦕ ꦤꦶꦪ꧀ꦪꦴꦠꦴꦫꦺꦴ ꦥꦚ꧀ꦚꦴꦪꦶꦱ꧀ꦱꦤ꧀ꦠꦶ. ꦆꦩꦺ ꦥꦤꦴꦗꦷꦮꦏꦴ ꦥꦸꦠ꧀ꦠꦩꦠꦴꦪ ꦥꦸꦠ꧀ꦠꦴ ꦄꦠ꧀ꦠꦴꦤꦚ꧀ꦕꦺꦮ ꦈꦏ꧀ꦏꦁꦱꦺꦤ꧀ꦠꦶ, ꦥꦫꦺ ꦕ ꦮꦩ꧀ꦨꦺꦤ꧀ꦠꦶ ꦠꦪꦺꦴ ꦕꦺꦮ ꦤꦶꦪ꧀ꦪꦴꦠꦴꦫꦺꦴ ꦥꦚ꧀ꦚꦥꦺꦤ꧀ꦠꦶ, ꦱꦺꦪ꧀ꦪꦡꦶꦢꦁ – ꦤꦤ꧀ꦢꦁ ꦮꦕ꧀ꦖꦁ, ꦏꦶꦱꦁ ꦱꦁꦏꦶꦕ꧀ꦕꦁ, ꦩꦏ꧀ꦑꦭꦶꦁ ꦒꦺꦴꦱꦴꦭ’’ꦤ꧀ꦠꦶ. ꦄꦡ ꦑꦺꦴ ꦱꦤ꧀ꦢꦏꦺꦴ ꦥꦫꦶꦧ꧀ꦧꦴꦗꦏꦺꦴ ꦱꦏꦁ ꦥꦫꦶꦱꦁ ꦄꦴꦩꦤ꧀ꦠꦺꦱꦶ – ‘‘ꦕꦫꦤ꧀ꦠꦸ ꦨꦺꦴꦤ꧀ꦠꦺꦴ ꦱꦩꦟꦺ ꦒꦺꦴꦠꦩꦺ ꦧ꧀ꦫꦲ꧀ꦩꦕꦫꦶꦪꦮꦴꦱꦺꦴ. ꦤ ꦢꦴꦤꦶ ꦱꦸꦏꦫꦁ ꦄꦩ꧀ꦲꦺꦲꦶ ꦭꦴꦨꦱꦏ꧀ꦏꦴꦫꦱꦶꦭꦺꦴꦏꦺ ꦥꦫꦶꦕ꧀ꦕꦗꦶꦠꦸ’’ꦤ꧀ꦠꦶ. ꦆꦠꦶ ꦲꦶꦢꦁ ꦱꦤ꧀ꦢꦏꦺꦴ ꦥꦫꦶꦧ꧀ꦧꦴꦗꦏꦺꦴ ꦱꦏꦁ ꦥꦫꦶꦱꦁ ꦈꦪ꧀ꦪꦺꦴꦗꦺꦱꦶ ꦨꦒꦮꦠꦶ ꦧ꧀ꦫꦲ꧀ꦩꦕꦫꦶꦪꦺꦠꦶ.

ꦱꦤ꧀ꦢꦏꦱꦸꦠ꧀ꦠꦁ ꦤꦶꦛ꧀ꦜꦶꦠꦁ ꦖꦛ꧀ꦜꦁ.

꧗. ꦩꦲꦴꦱꦏꦸꦭꦸꦢꦴꦪꦶꦱꦸꦠ꧀ꦠꦁ

꧒꧓꧗. ꦌꦮꦁ ꦩꦺ ꦱꦸꦠꦁ – ꦌꦏꦁ ꦱꦩꦪꦁ ꦨꦒꦮꦴ ꦫꦴꦗꦒꦲꦺ ꦮꦶꦲꦫꦠꦶ ꦮꦺꦭ꦳ꦸꦮꦤꦺ ꦏꦭꦤ꧀ꦢꦏꦤꦶꦮꦴꦥꦺ. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦱꦩ꧀ꦧꦲꦸꦭꦴ ꦄꦨꦶꦚ꧀ꦚꦴꦠꦴ ꦄꦨꦶꦚ꧀ꦚꦴꦠꦴ ꦥꦫꦶꦧ꧀ꦧꦴꦗꦏꦴ ꦩꦺꦴꦫꦤꦶꦮꦴꦥꦺ ꦥꦫꦶꦧ꧀ꦧꦴꦗꦏꦴꦫꦴꦩꦺ ꦥꦛꦶꦮꦱꦤ꧀ꦠꦶ, ꦱꦺꦪ꧀ꦪꦡꦶꦢꦁ – ꦄꦤ꧀ꦤꦨꦴꦫꦺꦴ ꦮꦫꦣꦫꦺꦴ ꦱꦏꦸꦭꦸꦢꦴꦪꦷ ꦕ ꦥꦫꦶꦧ꧀ꦧꦴꦗꦏꦺꦴ ꦄꦚ꧀ꦚꦺ ꦕ ꦄꦨꦶꦚ꧀ꦚꦴꦠꦴ ꦄꦨꦶꦚ꧀ꦚꦴꦠꦴ ꦥꦫꦶꦧ꧀ꦧꦴꦗꦏꦴ. ꦄꦡ ꦑꦺꦴ ꦨꦒꦮꦴ ꦥꦸꦧ꧀ꦧꦟ꧀ꦲꦱꦩꦪꦁ ꦤꦶꦮꦴꦱꦺꦠ꧀ꦮꦴ ꦥꦠ꧀ꦠꦕꦷꦮꦫꦩꦴꦢꦴꦪ ꦫꦴꦗꦒꦲꦁ ꦥꦶꦟ꧀ꦝꦴꦪ ꦥꦴꦮꦶꦱꦶ. ꦄꦡ ꦑꦺꦴ ꦨꦒꦮꦠꦺꦴ ꦌꦠꦢꦲꦺꦴꦱꦶ – ‘‘ꦄꦠꦶꦥ꧀ꦥꦒꦺꦴ ꦑꦺꦴ ꦠꦴꦮ ꦫꦴꦗꦒꦲꦺ ꦥꦶꦟ꧀ꦝꦴꦪ ꦕꦫꦶꦠꦸꦁ. ꦪꦁꦤꦹꦤꦴꦲꦁ ꦪꦺꦤ ꦩꦺꦴꦫꦤꦶꦮꦴꦥꦺꦴ ꦥꦫꦶꦧ꧀ꦧꦴꦗꦏꦴꦫꦴꦩꦺꦴ ꦪꦺꦤ ꦱꦏꦸꦭꦸꦢꦴꦪꦷ ꦥꦫꦶꦧ꧀ꦧꦴꦗꦏꦺꦴ ꦠꦺꦤꦸꦥꦱꦔ꧀ꦏꦩꦺꦪ꧀ꦪ’’ꦤ꧀ꦠꦶ. ꦄꦡ ꦑꦺꦴ ꦨꦒꦮꦴ ꦪꦺꦤ ꦩꦺꦴꦫꦤꦶꦮꦴꦥꦺꦴ ꦥꦫꦶꦧ꧀ꦧꦴꦗꦏꦴꦫꦴꦩꦺꦴ ꦠꦺꦤꦸꦥꦱꦔ꧀ꦏꦩꦶ. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦱꦏꦸꦭꦸꦢꦴꦪꦷ ꦥꦫꦶꦧ꧀ꦧꦴꦗꦏꦺꦴ ꦩꦲꦠꦶꦪꦴ ꦥꦫꦶꦧ꧀ꦧꦴꦗꦏꦥꦫꦶꦱꦴꦪ ꦱꦢ꧀ꦣꦶꦁ ꦤꦶꦱꦶꦤ꧀ꦤꦺꦴ ꦲꦺꦴꦠꦶ ꦈꦤ꧀ꦤꦴꦢꦶꦤꦶꦪꦴ ꦈꦕ꧀ꦕꦴꦱꦢ꧀ꦢꦩꦲꦴꦱꦢ꧀ꦢꦴꦪ ꦄꦤꦺꦏꦮꦶꦲꦶꦠꦁ ꦠꦶꦫꦕ꧀ꦖꦴꦤꦏꦡꦁ ꦏꦡꦺꦤ꧀ꦠꦶꦪꦴ, ꦱꦺꦪ꧀ꦪꦡꦶꦢꦁ – ꦫꦴꦗꦏꦡꦁ ꦕꦺꦴꦫꦏꦡꦁ ꦩꦲꦴꦩꦠ꧀ꦠꦏꦡꦁ ꦱꦺꦤꦴꦏꦡꦁ ꦨꦪꦏꦡꦁ ꦪꦸꦢ꧀ꦣꦏꦡꦁ ꦄꦤ꧀ꦤꦏꦡꦁ ꦥꦴꦤꦏꦡꦁ ꦮꦠ꧀ꦡꦏꦡꦁ ꦱꦪꦤꦏꦡꦁ ꦩꦴꦭꦴꦏꦡꦁ ꦒꦤ꧀ꦣꦏꦡꦁ ꦚꦴꦠꦶꦏꦡꦁ ꦪꦴꦤꦏꦡꦁ ꦒꦴꦩꦏꦡꦁ ꦤꦶꦒꦩꦏꦡꦁ ꦤꦒꦫꦏꦡꦁ ꦗꦤꦥꦢꦏꦡꦁ ꦆꦠ꧀ꦡꦶꦏꦡꦁ ꦱꦹꦫꦏꦡꦁ ꦮꦶꦱꦶꦑꦴꦏꦡꦁ ꦏꦸꦩ꧀ꦨꦛ꧀ꦜꦴꦤꦏꦡꦁ ꦥꦸꦧ꧀ꦧꦥꦺꦠꦏꦡꦁ ꦤꦴꦤꦠ꧀ꦠꦏꦡꦁ ꦭꦺꦴꦏꦏ꧀ꦑꦴꦪꦶꦏꦁ ꦱꦩꦸꦢ꧀ꦢꦏ꧀ꦑꦴꦪꦶꦏꦁ ꦆꦠꦶꦨꦮꦴꦨꦮꦏꦡꦁ ꦆꦠꦶ ꦮꦴ. ꦄꦢ꧀ꦢꦱꦴ ꦑꦺꦴ ꦱꦏꦸꦭꦸꦢꦴꦪꦷ ꦥꦫꦶꦧ꧀ꦧꦴꦗꦏꦺꦴ ꦨꦒꦮꦤ꧀ꦠꦁ ꦢꦹꦫꦠꦺꦴꦮ ꦄꦴꦒꦕ꧀ꦖꦤ꧀ꦠꦁ. ꦢꦶꦱ꧀ꦮꦴꦤ ꦱꦏꦁ ꦥꦫꦶꦱꦁ ꦱꦟ꧀ꦜꦴꦥꦺꦠꦶ – ‘‘ꦄꦥ꧀ꦥꦱꦢ꧀ꦢꦴ ꦨꦺꦴꦤ꧀ꦠꦺꦴ ꦲꦺꦴꦤ꧀ꦠꦸ; ꦩꦴ ꦨꦺꦴꦤ꧀ꦠꦺꦴ ꦱꦢ꧀ꦢꦩꦏꦠ꧀ꦡ. ꦄꦪꦁ ꦱꦩꦟꦺꦴ ꦒꦺꦴꦠꦩꦺꦴ ꦄꦴꦒꦕ꧀ꦖꦠꦶ; ꦄꦥ꧀ꦥꦱꦢ꧀ꦢꦏꦴꦩꦺꦴ ꦑꦺꦴ ꦥꦤ ꦱꦺꦴ ꦄꦴꦪꦱ꧀ꦩꦴ ꦄꦥ꧀ꦥꦱꦢ꧀ꦢꦱ꧀ꦱ ꦮꦟ꧀ꦟꦮꦴꦢꦷ. ꦄꦥ꧀ꦥꦺꦮ ꦤꦴꦩ ꦄꦥ꧀ꦥꦱꦢ꧀ꦢꦁ ꦥꦫꦶꦱꦁ ꦮꦶꦢꦶꦠ꧀ꦮꦴ ꦈꦥꦱꦔ꧀ꦏꦩꦶꦠꦧ꧀ꦧꦁ ꦩꦚ꧀ꦚꦺꦪ꧀ꦪꦴ’’ꦠꦶ. ꦄꦡ ꦑꦺꦴ ꦠꦺ ꦥꦫꦶꦧ꧀ꦧꦴꦗꦏꦴ ꦠꦸꦟ꧀ꦲꦷ ꦄꦲꦺꦱꦸꦁ. ꦄꦡ ꦑꦺꦴ ꦨꦒꦮꦴ ꦪꦺꦤ ꦱꦏꦸꦭꦸꦢꦴꦪꦷ ꦥꦫꦶꦧ꧀ꦧꦴꦗꦏꦺꦴ ꦠꦺꦤꦸꦥꦱꦔ꧀ꦏꦩꦶ. ꦄꦡ ꦑꦺꦴ ꦱꦏꦸꦭꦸꦢꦴꦪꦷ ꦥꦫꦶꦧ꧀ꦧꦴꦗꦏꦺꦴ ꦨꦒꦮꦤ꧀ꦠꦁ ꦌꦠꦢꦮꦺꦴꦕ – ‘‘ꦌꦠꦸ ꦑꦺꦴ, ꦨꦤ꧀ꦠꦺ, ꦨꦒꦮꦴ. ꦱ꧀ꦮꦴꦒꦠꦁ, ꦨꦤ꧀ꦠꦺ, ꦨꦒꦮꦠꦺꦴ. ꦕꦶꦫꦱ꧀ꦱꦁ ꦑꦺꦴ, ꦨꦤ꧀ꦠꦺ, ꦨꦒꦮꦴ ꦆꦩꦁ ꦥꦫꦶꦪꦴꦪꦩꦏꦴꦱꦶ ꦪꦢꦶꦢꦁ ꦆꦣꦴꦒꦩꦤꦴꦪ. ꦤꦶꦱꦷꦢꦠꦸ, ꦨꦤ꧀ꦠꦺ, ꦨꦒꦮꦴ; ꦆꦢꦩꦴꦱꦤꦁ ꦥꦚ꧀ꦚꦠ꧀ꦠ’’ꦤ꧀ꦠꦶ. ꦤꦶꦱꦷꦢꦶ ꦨꦒꦮꦴ ꦥꦚ꧀ꦚꦠ꧀ꦠꦺ ꦄꦴꦱꦤꦺ. ꦱꦏꦸꦭꦸꦢꦴꦪꦷꦥꦶ ꦑꦺꦴ ꦥꦫꦶꦧ꧀ꦧꦴꦗꦏꦺꦴ ꦄꦚ꧀ꦚꦠꦫꦁ ꦤꦷꦕꦁ ꦄꦴꦱꦤꦁ ꦒꦲꦺꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦷꦢꦶ. ꦌꦏꦩꦤ꧀ꦠꦁ ꦤꦶꦱꦶꦤ꧀ꦤꦁ ꦑꦺꦴ ꦱꦏꦸꦭꦸꦢꦴꦪꦶꦁ ꦥꦫꦶꦧ꧀ꦧꦴꦗꦏꦁ ꦨꦒꦮꦴ ꦌꦠꦢꦮꦺꦴꦕ –

꧒꧓꧘. ‘‘ꦏꦴꦪꦤꦸꦠ꧀ꦡ, ꦈꦢꦴꦪꦶ, ꦌꦠꦫꦲꦶ ꦏꦡꦴꦪ ꦱꦤ꧀ꦤꦶꦱꦶꦤ꧀ꦤꦴ, ꦏꦴ ꦕ ꦥꦤ ꦮꦺꦴ ꦄꦤ꧀ꦠꦫꦴꦏꦡꦴ ꦮꦶꦥ꧀ꦥꦏꦠꦴ’’ꦠꦶ? ‘‘ꦠꦶꦛ꧀ꦜꦠꦺꦱꦴ, ꦨꦤ꧀ꦠꦺ, ꦏꦡꦴ ꦪꦴꦪ ꦩꦪꦁ ꦌꦠꦫꦲꦶ ꦏꦡꦴꦪ ꦱꦤ꧀ꦤꦶꦱꦶꦤ꧀ꦤꦴ. ꦤꦺꦱꦴ, ꦨꦤ꧀ꦠꦺ, ꦏꦡꦴ ꦨꦒꦮꦠꦺꦴ ꦢꦸꦭ꧀ꦭꦨꦴ ꦨꦮꦶꦱ꧀ꦱꦠꦶ ꦥꦕ꧀ꦖꦴꦥꦶ ꦱꦮꦤꦴꦪ. ꦥꦸꦫꦶꦩꦴꦤꦶ, ꦨꦤ꧀ꦠꦺ, ꦢꦶꦮꦱꦴꦤꦶ ꦥꦸꦫꦶꦩꦠꦫꦴꦤꦶ ꦤꦴꦤꦴꦠꦶꦠ꧀ꦡꦶꦪꦴꦤꦁ ꦱꦩꦟꦧ꧀ꦫꦴꦲ꧀ꦩꦟꦴꦤꦁ ꦏꦸꦠꦹꦲꦭꦱꦴꦭꦴꦪꦁ ꦱꦤ꧀ꦤꦶꦱꦶꦤ꧀ꦤꦴꦤꦁ ꦱꦤ꧀ꦤꦶꦥꦠꦶꦠꦴꦤꦁ ꦄꦪꦩꦤ꧀ꦠꦫꦴꦏꦡꦴ ꦈꦢꦥꦴꦢꦶ – ‘ꦭꦴꦨꦴ ꦮꦠ, ꦨꦺꦴ, ꦄꦔ꧀ꦒꦩꦒꦣꦴꦤꦁ, ꦱꦸꦭꦢ꧀ꦣꦭꦴꦨꦴ ꦮꦠ, ꦨꦺꦴ, ꦄꦔ꧀ꦒꦩꦒꦣꦴꦤꦁ! ꦠꦠ꧀ꦫꦶꦩꦺ [ꦪꦠ꧀ꦡꦶꦩꦺ (ꦱꦷ.)] ꦱꦩꦟꦧ꧀ꦫꦴꦲ꧀ꦩꦟꦴ ꦱꦔ꧀ꦓꦶꦤꦺꦴ ꦒꦟꦶꦤꦺꦴ ꦒꦟꦴꦕꦫꦶꦪꦴ ꦚꦴꦠꦴ ꦪꦱꦱ꧀ꦱꦶꦤꦺꦴ ꦠꦶꦠ꧀ꦡꦏꦫꦴ ꦱꦴꦣꦸꦱꦩ꧀ꦩꦠꦴ ꦧꦲꦸꦗꦤꦱ꧀ꦱ ꦫꦴꦗꦒꦲꦁ ꦮꦱ꧀ꦱꦴꦮꦴꦱꦁ ꦎꦱꦛꦴ. ꦄꦪꦩ꧀ꦥꦶ ꦑꦺꦴ ꦥꦹꦫꦟꦺꦴ ꦏꦱ꧀ꦱꦥꦺꦴ ꦱꦔ꧀ꦓꦷ ꦕꦺꦮ ꦒꦟꦷ ꦕ ꦒꦟꦴꦕꦫꦶꦪꦺꦴ ꦕ ꦚꦴꦠꦺꦴ ꦪꦱꦱ꧀ꦱꦷ ꦠꦶꦠ꧀ꦡꦏꦫꦺꦴ ꦱꦴꦣꦸꦱꦩ꧀ꦩꦠꦺꦴ ꦧꦲꦸꦗꦤꦱ꧀ꦱ; ꦱꦺꦴꦥꦶ ꦫꦴꦗꦒꦲꦁ ꦮꦱ꧀ꦱꦴꦮꦴꦱꦁ ꦎꦱꦛꦺꦴ. ꦄꦪꦩ꧀ꦥꦶ ꦑꦺꦴ ꦩꦏ꧀ꦑꦭꦶ ꦒꦺꦴꦱꦴꦭꦺꦴ…ꦥꦺ… ꦄꦗꦶꦠꦺꦴ ꦏꦺꦱꦏꦩ꧀ꦧꦭꦺꦴ… ꦥꦏꦸꦣꦺꦴ ꦏꦕ꧀ꦕꦴꦪꦤꦺꦴ… ꦱꦚ꧀ꦗꦪꦺꦴ ꦧꦺꦭꦛ꧀ꦜꦥꦸꦠ꧀ꦠꦺꦴ… ꦤꦶꦒꦟ꧀ꦜꦺꦴ ꦤꦴꦛꦥꦸꦠ꧀ꦠꦺꦴ ꦱꦔ꧀ꦓꦷ ꦕꦺꦮ ꦒꦟꦷ ꦕ ꦒꦟꦴꦕꦫꦶꦪꦺꦴ ꦕ ꦚꦴꦠꦺꦴ ꦪꦱꦱ꧀ꦱꦷ ꦠꦶꦠ꧀ꦡꦏꦫꦺꦴ ꦱꦴꦣꦸꦱꦩ꧀ꦩꦠꦺꦴ ꦧꦲꦸꦗꦤꦱ꧀ꦱ; ꦱꦺꦴꦥꦶ ꦫꦴꦗꦒꦲꦁ ꦮꦱ꧀ꦱꦴꦮꦴꦱꦁ ꦎꦱꦛꦺꦴ. ꦄꦪꦩ꧀ꦥꦶ ꦑꦺꦴ ꦱꦩꦟꦺꦴ ꦒꦺꦴꦠꦩꦺꦴ ꦱꦔ꧀ꦓꦷ ꦕꦺꦮ ꦒꦟꦷ ꦕ ꦒꦟꦴꦕꦫꦶꦪꦺꦴ ꦕ ꦚꦴꦠꦺꦴ ꦪꦱꦱ꧀ꦱꦷ ꦠꦶꦠ꧀ꦡꦏꦫꦺꦴ ꦱꦴꦣꦸꦱꦩ꧀ꦩꦠꦺꦴ ꦧꦲꦸꦗꦤꦱ꧀ꦱ; ꦱꦺꦴꦥꦶ ꦫꦴꦗꦒꦲꦁ ꦮꦱ꧀ꦱꦴꦮꦴꦱꦁ ꦎꦱꦛꦺꦴ. ꦏꦺꦴ ꦤꦸ ꦑꦺꦴ ꦆꦩꦺꦱꦁ ꦨꦮꦠꦁ ꦱꦩꦟꦧ꧀ꦫꦴꦲ꧀ꦩꦟꦴꦤꦁ ꦱꦔ꧀ꦓꦷꦤꦁ ꦒꦟꦷꦤꦁ ꦒꦟꦴꦕꦫꦶꦪꦴꦤꦁ ꦚꦴꦠꦴꦤꦁ ꦪꦱꦱ꧀ꦱꦷꦤꦁ ꦠꦶꦠ꧀ꦡꦏꦫꦴꦤꦁ ꦱꦴꦣꦸꦱꦩ꧀ꦩꦠꦴꦤꦁ ꦧꦲꦸꦗꦤꦱ꧀ꦱ ꦱꦴꦮꦏꦴꦤꦁ ꦱꦏ꧀ꦏꦠꦺꦴ ꦒꦫꦸꦏꦠꦺꦴ ꦩꦴꦤꦶꦠꦺꦴ ꦥꦹꦗꦶꦠꦺꦴ, ꦏꦚ꧀ꦕ ꦥꦤ ꦱꦴꦮꦏꦴ ꦱꦏ꧀ꦏꦠ꧀ꦮꦴ ꦒꦫꦸꦁ ꦏꦠ꧀ꦮꦴ [ꦒꦫꦸꦏꦠ꧀ꦮꦴ (ꦱꦷ. ꦱ꧀ꦪꦴ. ꦏꦁ. ꦥꦷ.)] ꦈꦥꦤꦶꦱ꧀ꦱꦴꦪ ꦮꦶꦲꦫꦤ꧀ꦠꦷ’’’ꦠꦶ?

꧒꧓꧙. ‘‘ꦠꦠ꧀ꦫꦺꦏꦕ꧀ꦕꦺ ꦌꦮꦩꦴꦲꦁꦱꦸ – ‘ꦄꦪꦁ ꦑꦺꦴ ꦥꦹꦫꦟꦺꦴ ꦏꦱ꧀ꦱꦥꦺꦴ ꦱꦔ꧀ꦓꦷ ꦕꦺꦮ ꦒꦟꦷ ꦕ ꦒꦟꦴꦕꦫꦶꦪꦺꦴ ꦕ ꦚꦴꦠꦺꦴ ꦪꦱꦱ꧀ꦱꦷ ꦠꦶꦠ꧀ꦡꦏꦫꦺꦴ ꦱꦴꦣꦸꦱꦩ꧀ꦩꦠꦺꦴ ꦧꦲꦸꦗꦤꦱ꧀ꦱ; ꦱꦺꦴ ꦕ ꦑꦺꦴ ꦱꦴꦮꦏꦴꦤꦁ ꦤ ꦱꦏ꧀ꦏꦠꦺꦴ ꦤ ꦒꦫꦸꦏꦠꦺꦴ ꦤ ꦩꦴꦤꦶꦠꦺꦴ ꦤ ꦥꦹꦗꦶꦠꦺꦴ, ꦤ ꦕ ꦥꦤ ꦥꦹꦫꦟꦁ ꦏꦱ꧀ꦱꦥꦁ ꦱꦴꦮꦏꦴ ꦱꦏ꧀ꦏꦠ꧀ꦮꦴ ꦒꦫꦸꦁ ꦏꦠ꧀ꦮꦴ ꦈꦥꦤꦶꦱ꧀ꦱꦴꦪ ꦮꦶꦲꦫꦤ꧀ꦠꦶ. ꦨꦹꦠꦥꦸꦧ꧀ꦧꦁ ꦥꦹꦫꦟꦺꦴ ꦏꦱ꧀ꦱꦥꦺꦴ ꦄꦤꦺꦏꦱꦠꦴꦪ ꦥꦫꦶꦱꦴꦪ ꦣꦩ꧀ꦩꦁ ꦢꦺꦱꦺꦠꦶ. ꦠꦠ꧀ꦫꦚ꧀ꦚꦠꦫꦺꦴ ꦥꦹꦫꦟꦱ꧀ꦱ ꦏꦱ꧀ꦱꦥꦱ꧀ꦱ ꦱꦴꦮꦏꦺꦴ ꦱꦢ꧀ꦢꦩꦏꦴꦱꦶ – ‘‘ꦩꦴ ꦨꦺꦴꦤ꧀ꦠꦺꦴ ꦥꦹꦫꦟꦁ ꦏꦱ꧀ꦱꦥꦁ ꦌꦠꦩꦠ꧀ꦡꦁ ꦥꦸꦕ꧀ꦖꦶꦠ꧀ꦡ; ꦤꦺꦱꦺꦴ ꦌꦠꦁ ꦗꦴꦤꦴꦠꦶ; ꦩꦪꦩꦺꦠꦁ ꦗꦴꦤꦴꦩ, ꦄꦩ꧀ꦲꦺ ꦌꦠꦩꦠ꧀ꦡꦁ ꦥꦸꦕ꧀ꦖꦡ; ꦩꦪꦩꦺꦠꦁ ꦨꦮꦤ꧀ꦠꦴꦤꦁ ꦧ꧀ꦪꦴꦏꦫꦶꦱ꧀ꦱꦴꦩꦴ’’ꦠꦶ. ꦨꦹꦠꦥꦸꦧ꧀ꦧꦁ ꦥꦹꦫꦟꦺꦴ ꦏꦱ꧀ꦱꦥꦺꦴ ꦧꦴꦲꦴ ꦥꦒ꧀ꦒꦪ꧀ꦲ ꦏꦤ꧀ꦢꦤ꧀ꦠꦺꦴ ꦤ ꦭꦨꦠꦶ – ‘‘ꦄꦥ꧀ꦥꦱꦢ꧀ꦢꦴ ꦨꦺꦴꦤ꧀ꦠꦺꦴ ꦲꦺꦴꦤ꧀ꦠꦸ, ꦩꦴ ꦨꦺꦴꦤ꧀ꦠꦺꦴ ꦱꦢ꧀ꦢꦩꦏꦠ꧀ꦡ. ꦤꦺꦠꦺ, ꦨꦮꦤ꧀ꦠꦺ, ꦥꦸꦕ꧀ꦖꦤ꧀ꦠꦶ, ꦄꦩ꧀ꦲꦺ ꦌꦠꦺ ꦥꦸꦕ꧀ꦖꦤ꧀ꦠꦶ; ꦩꦪꦩꦺꦠꦺꦱꦁ ꦧ꧀ꦪꦴꦏꦫꦶꦱ꧀ꦱꦴꦩꦴ’’ꦠꦶ. ꦧꦲꦹ ꦑꦺꦴ ꦥꦤ ꦥꦹꦫꦟꦱ꧀ꦱ ꦏꦱ꧀ꦱꦥꦱ꧀ꦱ ꦱꦴꦮꦏꦴ ꦮꦴꦢꦁ ꦄꦴꦫꦺꦴꦥꦺꦠ꧀ꦮꦴ ꦄꦥꦏ꧀ꦏꦤ꧀ꦠꦴ – ‘‘ꦤ ꦠ꧀ꦮꦁ ꦆꦩꦁ ꦣꦩ꧀ꦩꦮꦶꦤꦪꦁ ꦄꦴꦗꦴꦤꦴꦱꦶ, ꦄꦲꦁ ꦆꦩꦁ ꦣꦩ꧀ꦩꦮꦶꦤꦪꦁ ꦄꦴꦗꦴꦤꦴꦩꦶ, ꦏꦶꦁ ꦠ꧀ꦮꦁ ꦆꦩꦁ ꦣꦩ꧀ꦩꦮꦶꦤꦪꦁ ꦄꦴꦗꦴꦤꦶꦱ꧀ꦱꦱꦶ? ꦩꦶꦕ꧀ꦖꦴꦥꦛꦶꦥꦤ꧀ꦤꦺꦴ ꦠ꧀ꦮꦩꦱꦶ, ꦄꦲꦩꦱ꧀ꦩꦶ ꦱꦩ꧀ꦩꦴꦥꦛꦶꦥꦤ꧀ꦤꦺꦴ, ꦱꦲꦶꦠꦁ ꦩꦺ, ꦄꦱꦲꦶꦠꦁ ꦠꦺ, ꦥꦸꦫꦺꦮꦕꦤꦷꦪꦁ ꦥꦕ꧀ꦖꦴ ꦄꦮꦕ, ꦥꦕ꧀ꦖꦴꦮꦕꦤꦷꦪꦁ ꦥꦸꦫꦺ ꦄꦮꦕ, ꦄꦣꦶꦕꦶꦟ꧀ꦟꦁ ꦠꦺ ꦮꦶꦥꦫꦴꦮꦠ꧀ꦠꦁ, ꦄꦴꦫꦺꦴꦥꦶꦠꦺꦴ ꦠꦺ ꦮꦴꦢꦺꦴ, ꦤꦶꦒ꧀ꦒꦲꦶꦠꦺꦴꦱꦶ, ꦕꦫ ꦮꦴꦢꦥ꧀ꦥꦩꦺꦴꦏ꧀ꦑꦴꦪ, ꦤꦶꦧ꧀ꦧꦺꦜꦺꦲꦶ ꦮꦴ ꦱꦕꦺ ꦥꦲꦺꦴꦱꦷ’’ꦠꦶ. ꦆꦠꦶ ꦥꦹꦫꦟꦺꦴ ꦏꦱ꧀ꦱꦥꦺꦴ ꦱꦴꦮꦏꦴꦤꦁ ꦤ ꦱꦏ꧀ꦏꦠꦺꦴ ꦤ ꦒꦫꦸꦏꦠꦺꦴ ꦤ ꦩꦴꦤꦶꦠꦺꦴ ꦤ ꦥꦹꦗꦶꦠꦺꦴ, ꦤ ꦕ ꦥꦤ ꦥꦹꦫꦟꦁ ꦏꦱ꧀ꦱꦥꦁ ꦱꦴꦮꦏꦴ ꦱꦏ꧀ꦏꦠ꧀ꦮꦴ ꦒꦫꦸꦁ ꦏꦠ꧀ꦮꦴ ꦈꦥꦤꦶꦱ꧀ꦱꦴꦪ ꦮꦶꦲꦫꦤ꧀ꦠꦶ. ꦄꦏ꧀ꦏꦸꦛ꧀ꦜꦺꦴ ꦕ ꦥꦤ ꦥꦹꦫꦟꦺꦴ ꦏꦱ꧀ꦱꦥꦺꦴ ꦣꦩ꧀ꦩꦏ꧀ꦏꦺꦴꦱꦺꦤꦴ’’’ꦠꦶ.

‘‘ꦌꦏꦕ꧀ꦕꦺ ꦌꦮꦩꦴꦲꦁꦱꦸ – ‘ꦄꦪꦩ꧀ꦥꦶ ꦑꦺꦴ ꦩꦏ꧀ꦑꦭꦶ ꦒꦺꦴꦱꦴꦭꦺꦴ…ꦥꦺ… ꦄꦗꦶꦠꦺꦴ ꦏꦺꦱꦏꦩ꧀ꦧꦭꦺꦴ… ꦥꦏꦸꦣꦺꦴ ꦏꦕ꧀ꦕꦴꦪꦤꦺꦴ… ꦱꦚ꧀ꦗꦪꦺꦴ ꦧꦺꦭꦛ꧀ꦜꦥꦸꦠ꧀ꦠꦺꦴ… ꦤꦶꦒꦟ꧀ꦜꦺꦴ ꦤꦴꦛꦥꦸꦠ꧀ꦠꦺꦴ ꦱꦔ꧀ꦓꦷ ꦕꦺꦮ ꦒꦟꦷ ꦕ ꦒꦟꦴꦕꦫꦶꦪꦺꦴ ꦕ ꦚꦴꦠꦺꦴ ꦪꦱꦱ꧀ꦱꦷ ꦠꦶꦠ꧀ꦡꦏꦫꦺꦴ ꦱꦴꦣꦸꦱꦩ꧀ꦩꦠꦺꦴ ꦧꦲꦸꦗꦤꦱ꧀ꦱ; ꦱꦺꦴ ꦕ ꦑꦺꦴ ꦱꦴꦮꦏꦴꦤꦁ ꦤ ꦱꦏ꧀ꦏꦠꦺꦴ ꦤ ꦒꦫꦸꦏꦠꦺꦴ ꦤ ꦩꦴꦤꦶꦠꦺꦴ ꦤ ꦥꦹꦗꦶꦠꦺꦴ, ꦤ ꦕ ꦥꦤ ꦤꦶꦒꦟ꧀ꦜꦁ ꦤꦴꦛꦥꦸꦠ꧀ꦠꦁ ꦱꦴꦮꦏꦴ ꦱꦏ꧀ꦏꦠ꧀ꦮꦴ ꦒꦫꦸꦁ ꦏꦠ꧀ꦮꦴ ꦈꦥꦤꦶꦱ꧀ꦱꦴꦪ ꦮꦶꦲꦫꦤ꧀ꦠꦶ. ꦨꦹꦠꦥꦸꦧ꧀ꦧꦁ ꦤꦶꦒꦟ꧀ꦜꦺꦴ ꦤꦴꦛꦥꦸꦠ꧀ꦠꦺꦴ ꦄꦤꦺꦏꦱꦠꦴꦪ ꦥꦫꦶꦱꦴꦪ ꦣꦩ꧀ꦩꦁ ꦢꦺꦱꦺꦠꦶ. ꦠꦠ꧀ꦫꦚ꧀ꦚꦠꦫꦺꦴ ꦤꦶꦒꦟ꧀ꦜꦱ꧀ꦱ ꦤꦴꦛꦥꦸꦠ꧀ꦠꦱ꧀ꦱ ꦱꦴꦮꦏꦺꦴ ꦱꦢ꧀ꦢꦩꦏꦴꦱꦶ – ꦩꦴ ꦨꦺꦴꦤ꧀ꦠꦺꦴ ꦤꦶꦒꦟ꧀ꦜꦁ ꦤꦴꦛꦥꦸꦠ꧀ꦠꦁ ꦌꦠꦩꦠ꧀ꦡꦁ ꦥꦸꦕ꧀ꦖꦶꦠ꧀ꦡ; ꦤꦺꦱꦺꦴ ꦌꦠꦁ ꦗꦴꦤꦴꦠꦶ; ꦩꦪꦩꦺꦠꦁ ꦗꦴꦤꦴꦩ, ꦄꦩ꧀ꦲꦺ ꦌꦠꦩꦠ꧀ꦡꦁ ꦥꦸꦕ꧀ꦖꦡ; ꦩꦪꦩꦺꦠꦁ ꦨꦮꦤ꧀ꦠꦴꦤꦁ ꦧ꧀ꦪꦴꦏꦫꦶꦱ꧀ꦱꦴꦩꦴꦠꦶ. ꦨꦹꦠꦥꦸꦧ꧀ꦧꦁ ꦤꦶꦒꦟ꧀ꦜꦺꦴ ꦤꦴꦛꦥꦸꦠ꧀ꦠꦺꦴ ꦧꦴꦲꦴ ꦥꦒ꧀ꦒꦪ꧀ꦲ ꦏꦤ꧀ꦢꦤ꧀ꦠꦺꦴ ꦤ ꦭꦨꦠꦶ – ‘‘ꦄꦥ꧀ꦥꦱꦢ꧀ꦢꦴ ꦨꦺꦴꦤ꧀ꦠꦺꦴ ꦲꦺꦴꦤ꧀ꦠꦸ, ꦩꦴ ꦨꦺꦴꦤ꧀ꦠꦺꦴ ꦱꦢ꧀ꦢꦩꦏꦠ꧀ꦡ. ꦤꦺꦠꦺ ꦨꦮꦤ꧀ꦠꦺ ꦥꦸꦕ꧀ꦖꦤ꧀ꦠꦶ, ꦄꦩ꧀ꦲꦺ ꦌꦠꦺ ꦥꦸꦕ꧀ꦖꦤ꧀ꦠꦶ; ꦩꦪꦩꦺꦠꦺꦱꦁ ꦧ꧀ꦪꦴꦏꦫꦶꦱ꧀ꦱꦴꦩꦴ’’ꦠꦶ. ꦧꦲꦹ ꦑꦺꦴ ꦥꦤ ꦤꦶꦒꦟ꧀ꦜꦱ꧀ꦱ ꦤꦴꦛꦥꦸꦠ꧀ꦠꦱ꧀ꦱ ꦱꦴꦮꦏꦴ ꦮꦴꦢꦁ ꦄꦴꦫꦺꦴꦥꦺꦠ꧀ꦮꦴ ꦄꦥꦏ꧀ꦏꦤ꧀ꦠꦴ – ‘‘ꦤ ꦠ꧀ꦮꦁ ꦆꦩꦁ ꦣꦩ꧀ꦩꦮꦶꦤꦪꦁ ꦄꦴꦗꦴꦤꦴꦱꦶ, ꦄꦲꦁ ꦆꦩꦁ ꦣꦩ꧀ꦩꦮꦶꦤꦪꦁ ꦄꦴꦗꦴꦤꦴꦩꦶ. ꦏꦶꦁ ꦠ꧀ꦮꦁ ꦆꦩꦁ ꦣꦩ꧀ꦩꦮꦶꦤꦪꦁ ꦄꦴꦗꦴꦤꦶꦱ꧀ꦱꦱꦶ? ꦩꦶꦕ꧀ꦖꦴꦥꦛꦶꦥꦤ꧀ꦤꦺꦴ ꦠ꧀ꦮꦩꦱꦶ. ꦄꦲꦩꦱ꧀ꦩꦶ ꦱꦩ꧀ꦩꦴꦥꦛꦶꦥꦤ꧀ꦤꦺꦴ. ꦱꦲꦶꦠꦁ ꦩꦺ ꦄꦱꦲꦶꦠꦁ ꦠꦺ, ꦥꦸꦫꦺꦮꦕꦤꦷꦪꦁ ꦥꦕ꧀ꦖꦴ ꦄꦮꦕ, ꦥꦕ꧀ꦖꦴꦮꦕꦤꦷꦪꦁ ꦥꦸꦫꦺ ꦄꦮꦕ, ꦄꦣꦶꦕꦶꦟ꧀ꦟꦁ ꦠꦺ ꦮꦶꦥꦫꦴꦮꦠ꧀ꦠꦁ, ꦄꦴꦫꦺꦴꦥꦶꦠꦺꦴ ꦠꦺ ꦮꦴꦢꦺꦴ, ꦤꦶꦒ꧀ꦒꦲꦶꦠꦺꦴꦱꦶ, ꦕꦫ ꦮꦴꦢꦥ꧀ꦥꦩꦺꦴꦏ꧀ꦑꦴꦪ, ꦤꦶꦧ꧀ꦧꦺꦜꦺꦲꦶ ꦮꦴ ꦱꦕꦺ ꦥꦲꦺꦴꦱꦷ’’ꦠꦶ. ꦆꦠꦶ ꦤꦶꦒꦟ꧀ꦜꦺꦴ ꦤꦴꦛꦥꦸꦠ꧀ꦠꦺꦴ ꦱꦴꦮꦏꦴꦤꦁ ꦤ ꦱꦏ꧀ꦏꦠꦺꦴ ꦤ ꦒꦫꦸꦏꦠꦺꦴ ꦤ ꦩꦴꦤꦶꦠꦺꦴ ꦤ ꦥꦹꦗꦶꦠꦺꦴ, ꦤ ꦕ ꦥꦤ ꦤꦶꦒꦟ꧀ꦜꦁ ꦤꦴꦛꦥꦸꦠ꧀ꦠꦁ ꦱꦴꦮꦏꦴ ꦱꦏ꧀ꦏꦠ꧀ꦮꦴ ꦒꦫꦸꦁ ꦏꦠ꧀ꦮꦴ ꦈꦥꦤꦶꦱ꧀ꦱꦴꦪ ꦮꦶꦲꦫꦤ꧀ꦠꦶ. ꦄꦏ꧀ꦏꦸꦛ꧀ꦜꦺꦴ ꦕ ꦥꦤ ꦤꦶꦒꦟ꧀ꦜꦺꦴ ꦤꦴꦛꦥꦸꦠ꧀ꦠꦺꦴ ꦣꦩ꧀ꦩꦏ꧀ꦏꦺꦴꦱꦺꦤꦴ’’’ꦠꦶ.

꧒꧔꧐. ‘‘ꦌꦏꦕ꧀ꦕꦺ ꦌꦮꦩꦴꦲꦁꦱꦸ – ‘ꦄꦪꦩ꧀ꦥꦶ ꦑꦺꦴ ꦱꦩꦟꦺꦴ ꦒꦺꦴꦠꦩꦺꦴ ꦱꦔ꧀ꦓꦷ ꦕꦺꦮ ꦒꦟꦷ ꦕ ꦒꦟꦴꦕꦫꦶꦪꦺꦴ ꦕ ꦚꦴꦠꦺꦴ ꦪꦱꦱ꧀ꦱꦷ ꦠꦶꦠ꧀ꦡꦏꦫꦺꦴ ꦱꦴꦣꦸꦱꦩ꧀ꦩꦠꦺꦴ ꦧꦲꦸꦗꦤꦱ꧀ꦱ; ꦱꦺꦴ ꦕ ꦑꦺꦴ ꦱꦴꦮꦏꦴꦤꦁ ꦱꦏ꧀ꦏꦠꦺꦴ ꦒꦫꦸꦏꦠꦺꦴ ꦩꦴꦤꦶꦠꦺꦴ ꦥꦹꦗꦶꦠꦺꦴ, ꦱꦩꦟꦚ꧀ꦕ ꦥꦤ ꦒꦺꦴꦠꦩꦁ ꦱꦴꦮꦏꦴ ꦱꦏ꧀ꦏꦠ꧀ꦮꦴ ꦒꦫꦸꦁ ꦏꦠ꧀ꦮꦴ ꦈꦥꦤꦶꦱ꧀ꦱꦴꦪ ꦮꦶꦲꦫꦤ꧀ꦠꦶ. ꦨꦹꦠꦥꦸꦧ꧀ꦧꦁ ꦱꦩꦟꦺꦴ ꦒꦺꦴꦠꦩꦺꦴ ꦄꦤꦺꦏꦱꦠꦴꦪ ꦥꦫꦶꦱꦴꦪ ꦣꦩ꧀ꦩꦁ ꦢꦺꦱꦺꦱꦶ. ꦠꦠ꧀ꦫꦚ꧀ꦚꦠꦫꦺꦴ ꦱꦩꦟꦱ꧀ꦱ ꦒꦺꦴꦠꦩꦱ꧀ꦱ ꦱꦴꦮꦏꦺꦴ ꦈꦏ꧀ꦏꦴꦱꦶ. ꦠꦩꦺꦤꦴꦚ꧀ꦚꦠꦫꦺꦴ ꦱꦧ꧀ꦫꦲ꧀ꦩꦕꦴꦫꦷ ꦗꦟ꧀ꦟꦸꦏꦺꦤ [ꦗꦟ꧀ꦟꦸꦏꦺ (ꦱꦷ.)] ꦓꦛ꧀ꦛꦺꦱꦶ – ‘‘ꦄꦥ꧀ꦥꦱꦢ꧀ꦢꦺꦴ ꦄꦴꦪꦱ꧀ꦩꦴ ꦲꦺꦴꦠꦸ, ꦩꦴꦪꦱ꧀ꦩꦴ ꦱꦢ꧀ꦢꦩꦏꦴꦱꦶ, ꦱꦠ꧀ꦡꦴ ꦤꦺꦴ ꦨꦒꦮꦴ ꦣꦩ꧀ꦩꦁ ꦢꦺꦱꦺꦱꦷ’’ꦠꦶ. ꦪꦱ꧀ꦩꦶꦁ ꦱꦩꦪꦺ ꦱꦩꦟꦺꦴ ꦒꦺꦴꦠꦩꦺꦴ ꦄꦤꦺꦏꦱꦠꦴꦪ ꦥꦫꦶꦱꦴꦪ ꦣꦩ꧀ꦩꦁ ꦢꦺꦱꦺꦠꦶ, ꦤꦺꦮ ꦠꦱ꧀ꦩꦶꦁ ꦱꦩꦪꦺ ꦱꦩꦟꦱ꧀ꦱ ꦒꦺꦴꦠꦩꦱ꧀ꦱ ꦱꦴꦮꦏꦴꦤꦁ ꦑꦶꦥꦶꦠꦱꦢ꧀ꦢꦺꦴ ꦮꦴ ꦲꦺꦴꦠꦶ ꦈꦏ꧀ꦏꦴꦱꦶꦠꦱꦢ꧀ꦢꦺꦴ ꦮꦴ. ꦠꦩꦺꦤꦁ ꦩꦲꦴꦗꦤꦏꦴꦪꦺꦴ ꦥꦕ꧀ꦕꦴꦱꦷꦱꦩꦴꦤꦫꦹꦥꦺꦴ [ꦥꦕ꧀ꦕꦴꦱꦶꦁ ꦱꦩꦴꦤꦫꦹꦥꦺꦴ (ꦱꦷ. ꦱ꧀ꦪꦴ. ꦏꦁ. ꦥꦷ.)] ꦥꦕ꧀ꦕꦸꦥꦛ꧀ꦜꦶꦠꦺꦴ ꦲꦺꦴꦠꦶ – ‘‘ꦪꦁ ꦤꦺꦴ ꦨꦒꦮꦴ ꦣꦩ꧀ꦩꦁ ꦨꦴꦱꦶꦱ꧀ꦱꦠꦶ ꦠꦁ ꦤꦺꦴ ꦱꦺꦴꦱ꧀ꦱꦴꦩꦴ’’ꦠꦶ. ꦱꦺꦪ꧀ꦪꦡꦴꦥꦶ ꦤꦴꦩ ꦥꦸꦫꦶꦱꦺꦴ ꦕꦴꦠꦸꦩ꧀ꦩꦲꦴꦥꦡꦺ ꦑꦸꦢ꧀ꦢꦩꦣꦸꦁ [ꦑꦸꦢ꧀ꦢꦁ ꦩꦣꦸꦁ (ꦱꦷ. ꦱ꧀ꦪꦴ. ꦏꦁ. ꦥꦷ.)] ꦄꦤꦺꦭꦏꦁ ꦥꦷꦭ꦳ꦺꦪ꧀ꦪ [ꦈꦥ꧀ꦥꦷꦭ꦳ꦺꦪ꧀ꦪ (ꦱꦷ.)]. ꦠꦩꦺꦤꦁ ꦩꦲꦴꦗꦤꦏꦴꦪꦺꦴ ꦥꦕ꧀ꦕꦴꦱꦷꦱꦩꦴꦤꦫꦹꦥꦺꦴ ꦥꦕ꧀ꦕꦸꦥꦛ꧀ꦜꦶꦠꦺꦴ ꦄꦱ꧀ꦱ. ꦌꦮꦩꦺꦮ ꦪꦱ꧀ꦩꦶꦁ ꦱꦩꦪꦺ ꦱꦩꦟꦺꦴ ꦒꦺꦴꦠꦩꦺꦴ ꦄꦤꦺꦏꦱꦠꦴꦪ ꦥꦫꦶꦱꦴꦪ ꦣꦩ꧀ꦩꦁ ꦢꦺꦱꦺꦠꦶ, ꦤꦺꦮ ꦠꦱ꧀ꦩꦶꦁ ꦱꦩꦪꦺ ꦱꦩꦟꦱ꧀ꦱ ꦒꦺꦴꦠꦩꦱ꧀ꦱ ꦱꦴꦮꦏꦴꦤꦁ ꦑꦶꦥꦶꦠꦱꦢ꧀ꦢꦺꦴ ꦮꦴ ꦲꦺꦴꦠꦶ ꦈꦏ꧀ꦏꦴꦱꦶꦠꦱꦢ꧀ꦢꦺꦴ ꦮꦴ. ꦠꦩꦺꦤꦁ ꦩꦲꦴꦗꦤꦏꦴꦪꦺꦴ ꦥꦕ꧀ꦕꦴꦱꦷꦱꦩꦴꦤꦫꦹꦥꦺꦴ ꦥꦕ꧀ꦕꦸꦥꦛ꧀ꦜꦶꦠꦺꦴ ꦲꦺꦴꦠꦶ – ‘‘ꦪꦁ ꦤꦺꦴ ꦨꦒꦮꦴ ꦣꦩ꧀ꦩꦁ ꦨꦴꦱꦶꦱ꧀ꦱꦠꦶ ꦠꦁ ꦤꦺꦴ ꦱꦺꦴꦱ꧀ꦱꦴꦩꦴ’’ꦠꦶ. ꦪꦺꦥꦶ ꦱꦩꦟꦱ꧀ꦱ ꦒꦺꦴꦠꦩꦱ꧀ꦱ ꦱꦴꦮꦏꦴ ꦱꦧ꧀ꦫꦲ꧀ꦩꦕꦴꦫꦷꦲꦶ ꦱꦩ꧀ꦥꦪꦺꦴꦗꦺꦠ꧀ꦮꦴ ꦱꦶꦏ꧀ꦑꦁ ꦥꦕ꧀ꦕꦏ꧀ꦑꦴꦪ ꦲꦷꦤꦴꦪꦴꦮꦠ꧀ꦠꦤ꧀ꦠꦶ ꦠꦺꦥꦶ ꦱꦠ꧀ꦡꦸ ꦕꦺꦮ ꦮꦟ꧀ꦟꦮꦴꦢꦶꦤꦺꦴ ꦲꦺꦴꦤ꧀ꦠꦶ, ꦣꦩ꧀ꦩꦱ꧀ꦱ ꦕ ꦮꦟ꧀ꦟꦮꦴꦢꦶꦤꦺꦴ ꦲꦺꦴꦤ꧀ꦠꦶ, ꦱꦔ꧀ꦓꦱ꧀ꦱ ꦕ ꦮꦟ꧀ꦟꦮꦴꦢꦶꦤꦺꦴ ꦲꦺꦴꦤ꧀ꦠꦶ, ꦄꦠ꧀ꦠꦒꦫꦲꦶꦤꦺꦴꦪꦺꦮ ꦲꦺꦴꦤ꧀ꦠꦶ ꦄꦤꦚ꧀ꦚꦒꦫꦲꦶꦤꦺꦴ, ‘‘ꦩꦪꦩꦺꦮꦩ꧀ꦲꦴ ꦄꦭꦏ꧀ꦑꦶꦏꦴ ꦩꦪꦁ ꦄꦥ꧀ꦥꦥꦸꦚ꧀ꦚꦴ ꦠꦺ ꦩꦪꦁ ꦌꦮꦁ ꦱ꧀ꦮꦴꦏ꧀ꦑꦴꦠꦺ ꦣꦩ꧀ꦩꦮꦶꦤꦪꦺ ꦥꦧ꧀ꦧꦗꦶꦠ꧀ꦮꦴ ꦤꦴꦱꦏ꧀ꦑꦶꦩ꧀ꦲꦴ ꦪꦴꦮꦗꦷꦮꦁ ꦥꦫꦶꦥꦸꦟ꧀ꦟꦁ ꦥꦫꦶꦱꦸꦢ꧀ꦣꦁ ꦧ꧀ꦫꦲ꧀ꦩꦕꦫꦶꦪꦁ ꦕꦫꦶꦠꦸ’’ꦤ꧀ꦠꦶ. ꦠꦺ ꦄꦴꦫꦴꦩꦶꦏꦨꦹꦠꦴ ꦮꦴ ꦈꦥꦴꦱꦏꦨꦹꦠꦴ ꦮꦴ ꦥꦚ꧀ꦕꦱꦶꦏ꧀ꦑꦴꦥꦢꦺ ꦱꦩꦴꦢꦴꦪ ꦮꦠ꧀ꦠꦤ꧀ꦠꦶ. ꦆꦠꦶ ꦱꦩꦟꦺꦴ ꦒꦺꦴꦠꦩꦺꦴ ꦱꦴꦮꦏꦴꦤꦁ ꦱꦏ꧀ꦏꦠꦺꦴ ꦒꦫꦸꦏꦠꦺꦴ ꦩꦴꦤꦶꦠꦺꦴ ꦥꦹꦗꦶꦠꦺꦴ, ꦱꦩꦟꦚ꧀ꦕ ꦥꦤ ꦒꦺꦴꦠꦩꦁ ꦱꦴꦮꦏꦴ ꦱꦏ꧀ꦏꦠ꧀ꦮꦴ ꦒꦫꦸꦁ ꦏꦠ꧀ꦮꦴ ꦈꦥꦤꦶꦱ꧀ꦱꦴꦪ ꦮꦶꦲꦫꦤ꧀ꦠꦷ’’’ꦠꦶ.

꧒꧔꧑. ‘‘ꦏꦠꦶ ꦥꦤ ꦠ꧀ꦮꦁ, ꦈꦢꦴꦪꦶ, ꦩꦪꦶ ꦣꦩ꧀ꦩꦺ ꦱꦩꦤꦸꦥꦱ꧀ꦱꦱꦶ, ꦪꦺꦲꦶ ꦩꦩꦁ [ꦩꦩ (ꦱꦧ꧀ꦧꦠ꧀ꦡ)] ꦱꦴꦮꦏꦴ ꦱꦏ꧀ꦏꦫꦺꦴꦤ꧀ꦠꦶ ꦒꦫꦸꦁ ꦏꦫꦺꦴꦤ꧀ꦠꦶ [ꦒꦫꦸꦏꦫꦺꦴꦤ꧀ꦠꦶ (ꦱꦷ. ꦱ꧀ꦪꦴ. ꦏꦁ. ꦥꦷ.)] ꦩꦴꦤꦺꦤ꧀ꦠꦶ ꦥꦹꦗꦺꦤ꧀ꦠꦶ, ꦱꦏ꧀ꦏꦠ꧀ꦮꦴ ꦒꦫꦸꦁ ꦏꦠ꧀ꦮꦴ ꦈꦥꦤꦶꦱ꧀ꦱꦴꦪ ꦮꦶꦲꦫꦤ꧀ꦠꦷ’’ꦠꦶ? ‘‘ꦥꦚ꧀ꦕ ꦑꦺꦴ ꦄꦲꦁ, ꦨꦤ꧀ꦠꦺ, ꦨꦒꦮꦠꦶ ꦣꦩ꧀ꦩꦺ ꦱꦩꦤꦸꦥꦱ꧀ꦱꦴꦩꦶ ꦪꦺꦲꦶ ꦨꦒꦮꦤ꧀ꦠꦁ ꦱꦴꦮꦏꦴ ꦱꦏ꧀ꦏꦫꦺꦴꦤ꧀ꦠꦶ ꦒꦫꦸꦁ ꦏꦫꦺꦴꦤ꧀ꦠꦶ ꦩꦴꦤꦺꦤ꧀ꦠꦶ ꦥꦹꦗꦺꦤ꧀ꦠꦶ, ꦱꦏ꧀ꦏꦠ꧀ꦮꦴ ꦒꦫꦸꦁ ꦏꦠ꧀ꦮꦴ ꦈꦥꦤꦶꦱ꧀ꦱꦴꦪ ꦮꦶꦲꦫꦤ꧀ꦠꦶ. ꦏꦠꦩꦺ ꦥꦚ꧀ꦕ? ꦨꦒꦮꦴ ꦲꦶ, ꦨꦤ꧀ꦠꦺ, ꦄꦥ꧀ꦥꦴꦲꦴꦫꦺꦴ, ꦄꦥ꧀ꦥꦴꦲꦴꦫꦠꦴꦪ ꦕ ꦮꦟ꧀ꦟꦮꦴꦢꦷ. ꦪꦩ꧀ꦥꦶ, ꦨꦤ꧀ꦠꦺ, ꦨꦒꦮꦴ ꦄꦥ꧀ꦥꦴꦲꦴꦫꦺꦴ, ꦄꦥ꧀ꦥꦴꦲꦴꦫꦠꦴꦪ ꦕ ꦮꦟ꧀ꦟꦮꦴꦢꦷ ꦆꦩꦁ ꦑꦺꦴ ꦄꦲꦁ, ꦨꦤ꧀ꦠꦺ, ꦨꦒꦮꦠꦶ ꦥꦜꦩꦁ ꦣꦩ꧀ꦩꦁ ꦱꦩꦤꦸꦥꦱ꧀ꦱꦴꦩꦶ ꦪꦺꦤ ꦨꦒꦮꦤ꧀ꦠꦁ ꦱꦴꦮꦏꦴ ꦱꦏ꧀ꦏꦫꦺꦴꦤ꧀ꦠꦶ ꦒꦫꦸꦁ ꦏꦫꦺꦴꦤ꧀ꦠꦶ ꦩꦴꦤꦺꦤ꧀ꦠꦶ ꦥꦹꦗꦺꦤ꧀ꦠꦶ, ꦱꦏ꧀ꦏꦠ꧀ꦮꦴ ꦒꦫꦸꦁ ꦏꦠ꧀ꦮꦴ ꦈꦥꦤꦶꦱ꧀ꦱꦴꦪ ꦮꦶꦲꦫꦤ꧀ꦠꦶ.

‘‘ꦥꦸꦤ ꦕꦥꦫꦁ, ꦨꦤ꧀ꦠꦺ, ꦨꦒꦮꦴ ꦱꦤ꧀ꦠꦸꦛ꧀ꦜꦺꦴ ꦆꦠꦫꦷꦠꦫꦺꦤ ꦕꦷꦮꦫꦺꦤ, ꦆꦠꦫꦷꦠꦫꦕꦷꦮꦫꦱꦤ꧀ꦠꦸꦛ꧀ꦜꦶꦪꦴ ꦕ ꦮꦟ꧀ꦟꦮꦴꦢꦷ. ꦪꦩ꧀ꦥꦶ, ꦨꦤ꧀ꦠꦺ, ꦨꦒꦮꦴ ꦱꦤ꧀ꦠꦸꦛ꧀ꦜꦺꦴ ꦆꦠꦫꦷꦠꦫꦺꦤ ꦕꦷꦮꦫꦺꦤ, ꦆꦠꦫꦷꦠꦫꦕꦷꦮꦫꦱꦤ꧀ꦠꦸꦛ꧀ꦜꦶꦪꦴ ꦕ ꦮꦟ꧀ꦟꦮꦴꦢꦷ, ꦆꦩꦁ ꦑꦺꦴ ꦄꦲꦁ, ꦨꦤ꧀ꦠꦺ, ꦨꦒꦮꦠꦶ ꦢꦸꦠꦶꦪꦁ ꦣꦩ꧀ꦩꦁ ꦱꦩꦤꦸꦥꦱ꧀ꦱꦴꦩꦶ ꦪꦺꦤ ꦨꦒꦮꦤ꧀ꦠꦁ ꦱꦴꦮꦏꦴ ꦱꦏ꧀ꦏꦫꦺꦴꦤ꧀ꦠꦶ ꦒꦫꦸꦁ ꦏꦫꦺꦴꦤ꧀ꦠꦶ ꦩꦴꦤꦺꦤ꧀ꦠꦶ ꦥꦹꦗꦺꦤ꧀ꦠꦶ, ꦱꦏ꧀ꦏꦠ꧀ꦮꦴ ꦒꦫꦸꦁ ꦏꦠ꧀ꦮꦴ ꦈꦥꦤꦶꦱ꧀ꦱꦴꦪ ꦮꦶꦲꦫꦤ꧀ꦠꦶ.

‘‘ꦥꦸꦤ ꦕꦥꦫꦁ, ꦨꦤ꧀ꦠꦺ, ꦨꦒꦮꦴ ꦱꦤ꧀ꦠꦸꦛ꧀ꦜꦺꦴ ꦆꦠꦫꦷꦠꦫꦺꦤ ꦥꦶꦟ꧀ꦝꦥꦴꦠꦺꦤ, ꦆꦠꦫꦷꦠꦫꦥꦶꦟ꧀ꦝꦥꦴꦠꦱꦤ꧀ꦠꦸꦛ꧀ꦜꦶꦪꦴ ꦕ ꦮꦟ꧀ꦟꦮꦴꦢꦷ. ꦪꦩ꧀ꦥꦶ, ꦨꦤ꧀ꦠꦺ, ꦨꦒꦮꦴ ꦱꦤ꧀ꦠꦸꦛ꧀ꦜꦺꦴ ꦆꦠꦫꦷꦠꦫꦺꦤ ꦥꦶꦟ꧀ꦝꦥꦴꦠꦺꦤ, ꦆꦠꦫꦷꦠꦫꦥꦶꦟ꧀ꦝꦥꦴꦠꦱꦤ꧀ꦠꦸꦛ꧀ꦜꦶꦪꦴ ꦕ ꦮꦟ꧀ꦟꦮꦴꦢꦷ, ꦆꦩꦁ ꦑꦺꦴ ꦄꦲꦁ, ꦨꦤ꧀ꦠꦺ, ꦨꦒꦮꦠꦶ ꦠꦠꦶꦪꦁ ꦣꦩ꧀ꦩꦁ ꦱꦩꦤꦸꦥꦱ꧀ꦱꦴꦩꦶ ꦪꦺꦤ ꦨꦒꦮꦤ꧀ꦠꦁ ꦱꦴꦮꦏꦴ ꦱꦏ꧀ꦏꦫꦺꦴꦤ꧀ꦠꦶ ꦒꦫꦸꦁ ꦏꦫꦺꦴꦤ꧀ꦠꦶ ꦩꦴꦤꦺꦤ꧀ꦠꦶ ꦥꦹꦗꦺꦤ꧀ꦠꦶ, ꦱꦏ꧀ꦏꦠ꧀ꦮꦴ ꦒꦫꦸꦁ ꦏꦠ꧀ꦮꦴ ꦈꦥꦤꦶꦱ꧀ꦱꦴꦪ ꦮꦶꦲꦫꦤ꧀ꦠꦶ.

‘‘ꦥꦸꦤ ꦕꦥꦫꦁ, ꦨꦤ꧀ꦠꦺ, ꦨꦒꦮꦴ ꦱꦤ꧀ꦠꦸꦛ꧀ꦜꦺꦴ ꦆꦠꦫꦷꦠꦫꦺꦤ ꦱꦺꦤꦴꦱꦤꦺꦤ, ꦆꦠꦫꦷꦠꦫꦱꦺꦤꦴꦱꦤꦱꦤ꧀ꦠꦸꦛ꧀ꦜꦶꦪꦴ ꦕ ꦮꦟ꧀ꦟꦮꦴꦢꦷ. ꦪꦩ꧀ꦥꦶ, ꦨꦤ꧀ꦠꦺ, ꦨꦒꦮꦴ ꦱꦤ꧀ꦠꦸꦛ꧀ꦜꦺꦴ ꦆꦠꦫꦷꦠꦫꦺꦤ ꦱꦺꦤꦴꦱꦤꦺꦤ, ꦆꦠꦫꦷꦠꦫꦱꦺꦤꦴꦱꦤꦱꦤ꧀ꦠꦸꦛ꧀ꦜꦶꦪꦴ ꦕ ꦮꦟ꧀ꦟꦮꦴꦢꦷ, ꦆꦩꦁ ꦑꦺꦴ ꦄꦲꦁ, ꦨꦤ꧀ꦠꦺ, ꦨꦒꦮꦠꦶ ꦕꦠꦸꦠ꧀ꦡꦁ ꦣꦩ꧀ꦩꦁ ꦱꦩꦤꦸꦥꦱ꧀ꦱꦴꦩꦶ ꦪꦺꦤ ꦨꦒꦮꦤ꧀ꦠꦁ ꦱꦴꦮꦏꦴ ꦱꦏ꧀ꦏꦫꦺꦴꦤ꧀ꦠꦶ ꦒꦫꦸꦁ ꦏꦫꦺꦴꦤ꧀ꦠꦶ ꦩꦴꦤꦺꦤ꧀ꦠꦶ ꦥꦹꦗꦺꦤ꧀ꦠꦶ, ꦱꦏ꧀ꦏꦠ꧀ꦮꦴ ꦒꦫꦸꦁ ꦏꦠ꧀ꦮꦴ ꦈꦥꦤꦶꦱ꧀ꦱꦴꦪ ꦮꦶꦲꦫꦤ꧀ꦠꦶ.

‘‘ꦥꦸꦤ ꦕꦥꦫꦁ, ꦨꦤ꧀ꦠꦺ, ꦨꦒꦮꦴ ꦥꦮꦶꦮꦶꦠ꧀ꦠꦺꦴ, ꦥꦮꦶꦮꦺꦏꦱ꧀ꦱ ꦕ ꦮꦟ꧀ꦟꦮꦴꦢꦷ. ꦪꦩ꧀ꦥꦶ, ꦨꦤ꧀ꦠꦺ, ꦨꦒꦮꦴ ꦥꦮꦶꦮꦶꦠ꧀ꦠꦺꦴ, ꦥꦮꦶꦮꦺꦏꦱ꧀ꦱ ꦕ ꦮꦟ꧀ꦟꦮꦴꦢꦷ, ꦆꦩꦁ ꦑꦺꦴ ꦄꦲꦁ, ꦨꦤ꧀ꦠꦺ, ꦨꦒꦮꦠꦶ ꦥꦚ꧀ꦕꦩꦁ ꦣꦩ꧀ꦩꦁ ꦱꦩꦤꦸꦥꦱ꧀ꦱꦴꦩꦶ ꦪꦺꦤ ꦨꦒꦮꦤ꧀ꦠꦁ ꦱꦴꦮꦏꦴ ꦱꦏ꧀ꦏꦫꦺꦴꦤ꧀ꦠꦶ ꦒꦫꦸꦁ ꦏꦫꦺꦴꦤ꧀ꦠꦶ ꦩꦴꦤꦺꦤ꧀ꦠꦶ ꦥꦹꦗꦺꦤ꧀ꦠꦶ, ꦱꦏ꧀ꦏꦠ꧀ꦮꦴ ꦒꦫꦸꦁ ꦏꦠ꧀ꦮꦴ ꦈꦥꦤꦶꦱ꧀ꦱꦴꦪ ꦮꦶꦲꦫꦤ꧀ꦠꦶ.

‘‘ꦆꦩꦺ ꦑꦺꦴ ꦄꦲꦁ, ꦨꦤ꧀ꦠꦺ, ꦨꦒꦮꦠꦶ ꦥꦚ꧀ꦕ ꦣꦩ꧀ꦩꦺ ꦱꦩꦤꦸꦥꦱ꧀ꦱꦴꦩꦶ ꦪꦺꦲꦶ ꦨꦒꦮꦤ꧀ꦠꦁ ꦱꦴꦮꦏꦴ ꦱꦏ꧀ꦏꦫꦺꦴꦤ꧀ꦠꦶ ꦒꦫꦸꦁ ꦏꦫꦺꦴꦤ꧀ꦠꦶ ꦩꦴꦤꦺꦤ꧀ꦠꦶ ꦥꦹꦗꦺꦤ꧀ꦠꦶ, ꦱꦏ꧀ꦏꦠ꧀ꦮꦴ ꦒꦫꦸꦁ ꦏꦠ꧀ꦮꦴ ꦈꦥꦤꦶꦱ꧀ꦱꦴꦪ ꦮꦶꦲꦫꦤ꧀ꦠꦷ’’ꦠꦶ.

꧒꧔꧒. ‘‘‘ꦄꦥ꧀ꦥꦴꦲꦴꦫꦺꦴ ꦱꦩꦟꦺꦴ ꦒꦺꦴꦠꦩꦺꦴ, ꦄꦥ꧀ꦥꦴꦲꦴꦫꦠꦴꦪ ꦕ ꦮꦟ꧀ꦟꦮꦴꦢꦷ’ꦠꦶ, ꦆꦠꦶ ꦕꦺ ꦩꦁ, ꦈꦢꦴꦪꦶ, ꦱꦴꦮꦏꦴ ꦱꦏ꧀ꦏꦫꦺꦪ꧀ꦪꦸꦁ ꦒꦫꦸꦁ ꦏꦫꦺꦪ꧀ꦪꦸꦁ ꦩꦴꦤꦺꦪ꧀ꦪꦸꦁ ꦥꦹꦗꦺꦪ꧀ꦪꦸꦁ, ꦱꦏ꧀ꦏꦠ꧀ꦮꦴ ꦒꦫꦸꦁ ꦏꦠ꧀ꦮꦴ ꦈꦥꦤꦶꦱ꧀ꦱꦴꦪ ꦮꦶꦲꦫꦺꦪ꧀ꦪꦸꦁ, ꦱꦤ꧀ꦠꦶ ꦑꦺꦴ ꦥꦤ ꦩꦺ, ꦈꦢꦴꦪꦶ, ꦱꦴꦮꦏꦴ ꦏꦺꦴꦱꦏꦴꦲꦴꦫꦴꦥꦶ ꦄꦝ꧀ꦞꦏꦺꦴꦱꦏꦴꦲꦴꦫꦴꦥꦶ ꦧꦺꦭꦸꦮꦴꦲꦴꦫꦴꦥꦶ ꦄꦝ꧀ꦞꦧꦺꦭꦸꦮꦴꦲꦴꦫꦴꦥꦶ. ꦄꦲꦁ ꦑꦺꦴ ꦥꦤ, ꦈꦢꦴꦪꦶ, ꦄꦥ꧀ꦥꦺꦏꦢꦴ ꦆꦩꦶꦤꦴ ꦥꦠ꧀ꦠꦺꦤ ꦱꦩꦠꦶꦠ꧀ꦠꦶꦏꦩ꧀ꦥꦶ ꦨꦸꦚ꧀ꦗꦴꦩꦶ ꦨꦶꦪ꧀ꦪꦺꦴꦥꦶ ꦨꦸꦚ꧀ꦗꦴꦩꦶ. ‘ꦄꦥ꧀ꦥꦴꦲꦴꦫꦺꦴ ꦱꦩꦟꦺꦴ ꦒꦺꦴꦠꦩꦺꦴ, ꦄꦥ꧀ꦥꦴꦲꦴꦫꦠꦴꦪ ꦕ ꦮꦟ꧀ꦟꦮꦴꦢꦷ’ꦠꦶ, ꦆꦠꦶ ꦕꦺ ꦩꦁ, ꦈꦢꦴꦪꦶ, ꦱꦴꦮꦏꦴ ꦱꦏ꧀ꦏꦫꦺꦪ꧀ꦪꦸꦁ ꦒꦫꦸꦁ ꦏꦫꦺꦪ꧀ꦪꦸꦁ ꦩꦴꦤꦺꦪ꧀ꦪꦸꦁ ꦥꦹꦗꦺꦪ꧀ꦪꦸꦁ, ꦱꦏ꧀ꦏꦠ꧀ꦮꦴ ꦒꦫꦸꦁ ꦏꦠ꧀ꦮꦴ ꦈꦥꦤꦶꦱ꧀ꦱꦴꦪ ꦮꦶꦲꦫꦺꦪ꧀ꦪꦸꦁ, ꦪꦺ ꦠꦺ, ꦈꦢꦴꦪꦶ, ꦩꦩ ꦱꦴꦮꦏꦴ ꦏꦺꦴꦱꦏꦴꦲꦴꦫꦴꦥꦶ ꦄꦝ꧀ꦞꦏꦺꦴꦱꦏꦴꦲꦴꦫꦴꦥꦶ ꦧꦺꦭꦸꦮꦴꦲꦴꦫꦴꦥꦶ ꦄꦝ꧀ꦞꦧꦺꦭꦸꦮꦴꦲꦴꦫꦴꦥꦶ ꦤ ꦩꦁ ꦠꦺ ꦆꦩꦶꦤꦴ ꦣꦩ꧀ꦩꦺꦤ ꦱꦏ꧀ꦏꦫꦺꦪ꧀ꦪꦸꦁ ꦒꦫꦸꦁ ꦏꦫꦺꦪ꧀ꦪꦸꦁ ꦩꦴꦤꦺꦪ꧀ꦪꦸꦁ ꦥꦹꦗꦺꦪ꧀ꦪꦸꦁ, ꦱꦏ꧀ꦏꦠ꧀ꦮꦴ ꦒꦫꦸꦁ ꦏꦠ꧀ꦮꦴ ꦈꦥꦤꦶꦱ꧀ꦱꦴꦪ ꦮꦶꦲꦫꦺꦪ꧀ꦪꦸꦁ.