꧙. ꦱꦩ꧀ꦩꦴꦢꦶꦛ꧀ꦜꦶꦱꦸꦠ꧀ꦠꦁ

꧘꧙. ꦌꦮꦁ ꦩꦺ ꦱꦸꦠꦁ – ꦌꦏꦁ ꦱꦩꦪꦁ ꦨꦒꦮꦴ ꦱꦴꦮꦠ꧀ꦡꦶꦪꦁ ꦮꦶꦲꦫꦠꦶ ꦗꦺꦠꦮꦤꦺ ꦄꦤꦴꦡꦥꦶꦟ꧀ꦝꦶꦏꦱ꧀ꦱ ꦄꦴꦫꦴꦩꦺ. ꦠꦠ꧀ꦫ ꦑꦺꦴ ꦄꦴꦪꦱ꧀ꦩꦴ ꦱꦴꦫꦶꦥꦸꦠ꧀ꦠꦺꦴ ꦨꦶꦏ꧀ꦑꦹ ꦄꦴꦩꦤ꧀ꦠꦺꦱꦶ – ‘‘ꦄꦴꦮꦸꦱꦺꦴ ꦨꦶꦏ꧀ꦑꦮꦺ’’ꦠꦶ. ‘‘ꦄꦴꦮꦸꦱꦺꦴ’’ꦠꦶ ꦑꦺꦴ ꦠꦺ ꦨꦶꦏ꧀ꦑꦹ ꦄꦴꦪꦱ꧀ꦩꦠꦺꦴ ꦱꦴꦫꦶꦥꦸꦠ꧀ꦠꦱ꧀ꦱ ꦥꦕ꧀ꦕꦱ꧀ꦱꦺꦴꦱꦸꦁ. ꦄꦴꦪꦱ꧀ꦩꦴ ꦱꦴꦫꦶꦥꦸꦠ꧀ꦠꦺꦴ ꦌꦠꦢꦮꦺꦴꦕ –

‘‘‘ꦱꦩ꧀ꦩꦴꦢꦶꦛ꧀ꦜꦶ [ꦱꦩ꧀ꦩꦴꦢꦶꦛ꧀ꦜꦷ (ꦱꦷ. ꦱ꧀ꦪꦴ.)] ꦱꦩ꧀ꦩꦴꦢꦶꦛ꧀ꦜꦷ’ꦠꦶ, ꦄꦴꦮꦸꦱꦺꦴ, ꦮꦸꦕ꧀ꦕꦠꦶ. ꦏꦶꦠ꧀ꦠꦴꦮꦠꦴ ꦤꦸ ꦑꦺꦴ, ꦄꦴꦮꦸꦱꦺꦴ, ꦄꦫꦶꦪꦱꦴꦮꦏꦺꦴ ꦱꦩ꧀ꦩꦴꦢꦶꦛ꧀ꦜꦶ ꦲꦺꦴꦠꦶ, ꦈꦗꦸꦒꦠꦴꦱ꧀ꦱ ꦢꦶꦛ꧀ꦜꦶ, ꦣꦩ꧀ꦩꦺ ꦄꦮꦺꦕ꧀ꦕꦥ꧀ꦥꦱꦴꦢꦺꦤ ꦱꦩꦤ꧀ꦤꦴꦒꦠꦺꦴ, ꦄꦴꦒꦠꦺꦴ ꦆꦩꦁ ꦱꦢ꧀ꦣꦩ꧀ꦩ’’ꦤ꧀ꦠꦶ?

‘‘ꦢꦹꦫꦠꦺꦴꦥꦶ ꦑꦺꦴ ꦩꦪꦁ, ꦄꦴꦮꦸꦱꦺꦴ, ꦄꦴꦒꦕ꧀ꦖꦺꦪ꧀ꦪꦴꦩ ꦄꦴꦪꦱ꧀ꦩꦠꦺꦴ ꦱꦴꦫꦶꦥꦸꦠ꧀ꦠꦱ꧀ꦱ ꦱꦤ꧀ꦠꦶꦏꦺ ꦌꦠꦱ꧀ꦱ ꦨꦴꦱꦶꦠꦱ꧀ꦱ ꦄꦠ꧀ꦡꦩꦚ꧀ꦚꦴꦠꦸꦁ. ꦱꦴꦣꦸ ꦮꦠꦴꦪꦱ꧀ꦩꦤ꧀ꦠꦁꦪꦺꦮ ꦱꦴꦫꦶꦥꦸꦠ꧀ꦠꦁ ꦥꦛꦶꦨꦴꦠꦸ ꦌꦠꦱ꧀ꦱ ꦨꦴꦱꦶꦠꦱ꧀ꦱ ꦄꦠ꧀ꦡꦺꦴ. ꦄꦴꦪꦱ꧀ꦩꦠꦺꦴ ꦱꦴꦫꦶꦥꦸꦠ꧀ꦠꦱ꧀ꦱ ꦱꦸꦠ꧀ꦮꦴ ꦨꦶꦏ꧀ꦑꦹ ꦣꦴꦫꦺꦱ꧀ꦱꦤ꧀ꦠꦷ’’ꦠꦶ. ‘‘ꦠꦺꦤ ꦲꦶ, ꦄꦴꦮꦸꦱꦺꦴ, ꦱꦸꦟꦴꦡ, ꦱꦴꦣꦸꦏꦁ ꦩꦤꦱꦶ ꦏꦫꦺꦴꦡ, ꦨꦴꦱꦶꦱ꧀ꦱꦴꦩꦷ’’ꦠꦶ. ‘‘ꦌꦮꦩꦴꦮꦸꦱꦺꦴ’’ꦠꦶ ꦑꦺꦴ ꦠꦺ ꦨꦶꦏ꧀ꦑꦹ ꦄꦴꦪꦱ꧀ꦩꦠꦺꦴ ꦱꦴꦫꦶꦥꦸꦠ꧀ꦠꦱ꧀ꦱ ꦥꦕ꧀ꦕꦱ꧀ꦱꦺꦴꦱꦸꦁ. ꦄꦴꦪꦱ꧀ꦩꦴ ꦱꦴꦫꦶꦥꦸꦠ꧀ꦠꦺꦴ ꦌꦠꦢꦮꦺꦴꦕ –

‘‘ꦪꦠꦺꦴ ꦑꦺꦴ, ꦄꦴꦮꦸꦱꦺꦴ, ꦄꦫꦶꦪꦱꦴꦮꦏꦺꦴ ꦄꦏꦸꦱꦭꦚ꧀ꦕ ꦥꦗꦴꦤꦴꦠꦶ, ꦄꦏꦸꦱꦭꦩꦹꦭꦚ꧀ꦕ ꦥꦗꦴꦤꦴꦠꦶ, ꦏꦸꦱꦭꦚ꧀ꦕ ꦥꦗꦴꦤꦴꦠꦶ, ꦏꦸꦱꦭꦩꦹꦭꦚ꧀ꦕ ꦥꦗꦴꦤꦴꦠꦶ – ꦌꦠ꧀ꦠꦴꦮꦠꦴꦥꦶ ꦑꦺꦴ, ꦄꦴꦮꦸꦱꦺꦴ, ꦄꦫꦶꦪꦱꦴꦮꦏꦺꦴ ꦱꦩ꧀ꦩꦴꦢꦶꦛ꧀ꦜꦶ ꦲꦺꦴꦠꦶ, ꦈꦗꦸꦒꦠꦴꦱ꧀ꦱ ꦢꦶꦛ꧀ꦜꦶ, ꦣꦩ꧀ꦩꦺ ꦄꦮꦺꦕ꧀ꦕꦥ꧀ꦥꦱꦴꦢꦺꦤ ꦱꦩꦤ꧀ꦤꦴꦒꦠꦺꦴ, ꦄꦴꦒꦠꦺꦴ ꦆꦩꦁ ꦱꦢ꧀ꦣꦩ꧀ꦩꦁ. ꦏꦠꦩꦁ ꦥꦤꦴꦮꦸꦱꦺꦴ, ꦄꦏꦸꦱꦭꦁ, ꦏꦠꦩꦁ ꦄꦏꦸꦱꦭꦩꦹꦭꦁ, ꦏꦠꦩꦁ ꦏꦸꦱꦭꦁ, ꦏꦠꦩꦁ ꦏꦸꦱꦭꦩꦹꦭꦁ? ꦥꦴꦟꦴꦠꦶꦥꦴꦠꦺꦴ ꦑꦺꦴ, ꦄꦴꦮꦸꦱꦺꦴ, ꦄꦏꦸꦱꦭꦁ, ꦄꦢꦶꦤ꧀ꦤꦴꦢꦴꦤꦁ ꦄꦏꦸꦱꦭꦁ, ꦏꦴꦩꦺꦱꦸꦩꦶꦕ꧀ꦖꦴꦕꦴꦫꦺꦴ ꦄꦏꦸꦱꦭꦁ, ꦩꦸꦱꦴꦮꦴꦢꦺꦴ ꦄꦏꦸꦱꦭꦁ, ꦥꦶꦱꦸꦟꦴ ꦮꦴꦕꦴ [ꦥꦶꦱꦸꦟꦮꦴꦕꦴ (ꦏ.)] ꦄꦏꦸꦱꦭꦁ, ꦦꦫꦸꦱꦴ ꦮꦴꦕꦴ [ꦦꦫꦸꦱꦮꦴꦕꦴ (ꦏ.)] ꦄꦏꦸꦱꦭꦁ, ꦱꦩ꧀ꦦꦥ꧀ꦥꦭꦴꦥꦺꦴ ꦄꦏꦸꦱꦭꦁ, ꦄꦨꦶꦗ꧀ꦙꦴ ꦄꦏꦸꦱꦭꦁ, ꦧ꧀ꦪꦴꦥꦴꦢꦺꦴ ꦄꦏꦸꦱꦭꦁ, ꦩꦶꦕ꧀ꦖꦴꦢꦶꦛ꧀ꦜꦶ ꦄꦏꦸꦱꦭꦁ – ꦆꦢꦁ ꦮꦸꦕ꧀ꦕꦠꦴꦮꦸꦱꦺꦴ ꦄꦏꦸꦱꦭꦁ. ꦏꦠꦩꦚ꧀ꦕꦴꦮꦸꦱꦺꦴ, ꦄꦏꦸꦱꦭꦩꦹꦭꦁ? ꦭꦺꦴꦨꦺꦴ ꦄꦏꦸꦱꦭꦩꦹꦭꦁ, ꦢꦺꦴꦱꦺꦴ ꦄꦏꦸꦱꦭꦩꦹꦭꦁ, ꦩꦺꦴꦲꦺꦴ ꦄꦏꦸꦱꦭꦩꦹꦭꦁ – ꦆꦢꦁ ꦮꦸꦕ꧀ꦕꦠꦴꦮꦸꦱꦺꦴ, ꦄꦏꦸꦱꦭꦩꦹꦭꦁ.

‘‘ꦏꦠꦩꦚ꧀ꦕꦴꦮꦸꦱꦺꦴ, ꦏꦸꦱꦭꦁ? ꦥꦴꦟꦴꦠꦶꦥꦴꦠꦴ ꦮꦺꦫꦩꦟꦷ ꦏꦸꦱꦭꦁ, ꦄꦢꦶꦤ꧀ꦤꦴꦢꦴꦤꦴ ꦮꦺꦫꦩꦟꦷ ꦏꦸꦱꦭꦁ, ꦏꦴꦩꦺꦱꦸꦩꦶꦕ꧀ꦖꦴꦕꦴꦫꦴ ꦮꦺꦫꦩꦟꦷ ꦏꦸꦱꦭꦁ, ꦩꦸꦱꦴꦮꦴꦢꦴ ꦮꦺꦫꦩꦟꦷ ꦏꦸꦱꦭꦁ, ꦥꦶꦱꦸꦟꦴꦪ ꦮꦴꦕꦴꦪ ꦮꦺꦫꦩꦟꦷ ꦏꦸꦱꦭꦁ, ꦦꦫꦸꦱꦴꦪ ꦮꦴꦕꦴꦪ ꦮꦺꦫꦩꦟꦷ ꦏꦸꦱꦭꦁ, ꦱꦩ꧀ꦦꦥ꧀ꦥꦭꦴꦥꦴ ꦮꦺꦫꦩꦟꦷ ꦏꦸꦱꦭꦁ, ꦄꦤꦨꦶꦗ꧀ꦙꦴ ꦏꦸꦱꦭꦁ, ꦄꦧ꧀ꦪꦴꦥꦴꦢꦺꦴ ꦏꦸꦱꦭꦁ, ꦱꦩ꧀ꦩꦴꦢꦶꦛ꧀ꦜꦶ ꦏꦸꦱꦭꦁ – ꦆꦢꦁ ꦮꦸꦕ꧀ꦕꦠꦴꦮꦸꦱꦺꦴ, ꦏꦸꦱꦭꦁ. ꦏꦠꦩꦚ꧀ꦕꦴꦮꦸꦱꦺꦴ, ꦏꦸꦱꦭꦩꦹꦭꦁ? ꦄꦭꦺꦴꦨꦺꦴ ꦏꦸꦱꦭꦩꦹꦭꦁ, ꦄꦢꦺꦴꦱꦺꦴ ꦏꦸꦱꦭꦩꦹꦭꦁ, ꦄꦩꦺꦴꦲꦺꦴ ꦏꦸꦱꦭꦩꦹꦭꦁ – ꦆꦢꦁ ꦮꦸꦕ꧀ꦕꦠꦴꦮꦸꦱꦺꦴ, ꦏꦸꦱꦭꦩꦹꦭꦁ.

‘‘ꦪꦠꦺꦴ ꦑꦺꦴ, ꦄꦴꦮꦸꦱꦺꦴ, ꦄꦫꦶꦪꦱꦴꦮꦏꦺꦴ ꦌꦮꦁ ꦄꦏꦸꦱꦭꦁ ꦥꦗꦴꦤꦴꦠꦶ, ꦌꦮꦁ ꦄꦏꦸꦱꦭꦩꦹꦭꦁ ꦥꦗꦴꦤꦴꦠꦶ, ꦌꦮꦁ ꦏꦸꦱꦭꦁ ꦥꦗꦴꦤꦴꦠꦶ, ꦌꦮꦁ ꦏꦸꦱꦭꦩꦹꦭꦁ ꦥꦗꦴꦤꦴꦠꦶ, ꦱꦺꦴ ꦱꦧ꧀ꦧꦱꦺꦴ ꦫꦴꦒꦴꦤꦸꦱꦪꦁ ꦥꦲꦴꦪ, ꦥꦛꦶꦓꦴꦤꦸꦱꦪꦁ ꦥꦛꦶꦮꦶꦤꦺꦴꦢꦺꦠ꧀ꦮꦴ, ‘ꦄꦱ꧀ꦩꦷ’ꦠꦶ ꦢꦶꦛ꧀ꦜꦶꦩꦴꦤꦴꦤꦸꦱꦪꦁ ꦱꦩꦹꦲꦤꦶꦠ꧀ꦮꦴ, ꦄꦮꦶꦗ꧀ꦗꦁ ꦥꦲꦴꦪ ꦮꦶꦗ꧀ꦗꦁ ꦈꦥ꧀ꦥꦴꦢꦺꦠ꧀ꦮꦴ, ꦢꦶꦛ꧀ꦜꦺꦮꦣꦩ꧀ꦩꦺ ꦢꦸꦏ꧀ꦑꦱ꧀ꦱꦤ꧀ꦠꦏꦫꦺꦴ ꦲꦺꦴꦠꦶ – ꦌꦠ꧀ꦠꦴꦮꦠꦴꦥꦶ ꦑꦺꦴ, ꦄꦴꦮꦸꦱꦺꦴ, ꦄꦫꦶꦪꦱꦴꦮꦏꦺꦴ ꦱꦩ꧀ꦩꦴꦢꦶꦛ꧀ꦜꦶ ꦲꦺꦴꦠꦶ, ꦈꦗꦸꦒꦠꦴꦱ꧀ꦱ ꦢꦶꦛ꧀ꦜꦶ, ꦣꦩ꧀ꦩꦺ ꦄꦮꦺꦕ꧀ꦕꦥ꧀ꦥꦱꦴꦢꦺꦤ ꦱꦩꦤ꧀ꦤꦴꦒꦠꦺꦴ, ꦄꦴꦒꦠꦺꦴ ꦆꦩꦁ ꦱꦢ꧀ꦣꦩ꧀ꦩ’’ꦤ꧀ꦠꦶ.

꧙꧐. ‘‘ꦱꦴꦣꦴꦮꦸꦱꦺꦴ’’ꦠꦶ ꦑꦺꦴ ꦠꦺ ꦨꦶꦏ꧀ꦑꦹ ꦄꦴꦪꦱ꧀ꦩꦠꦺꦴ ꦱꦴꦫꦶꦥꦸꦠ꧀ꦠꦱ꧀ꦱ ꦨꦴꦱꦶꦠꦁ ꦄꦨꦶꦤꦤ꧀ꦢꦶꦠ꧀ꦮꦴ ꦄꦤꦸꦩꦺꦴꦢꦶꦠ꧀ꦮꦴ ꦄꦴꦪꦱ꧀ꦩꦤ꧀ꦠꦁ ꦱꦴꦫꦶꦥꦸꦠ꧀ꦠꦁ ꦈꦠ꧀ꦠꦫꦶ [ꦈꦠ꧀ꦠꦫꦶꦁ (ꦱꦷ. ꦱ꧀ꦪꦴ. ꦥꦷ.)] ꦥꦚ꧀ꦲꦁ ꦄꦥꦸꦕ꧀ꦖꦸꦁ [ꦄꦥꦸꦕ꧀ꦖꦶꦁꦱꦸ (ꦱ꧀ꦪꦴ.)] – ‘‘ꦱꦶꦪꦴ ꦥꦤꦴꦮꦸꦱꦺꦴ, ꦄꦚ꧀ꦚꦺꦴꦥꦶ ꦥꦫꦶꦪꦴꦪꦺꦴ ꦪꦡꦴ ꦄꦫꦶꦪꦱꦴꦮꦏꦺꦴ ꦱꦩ꧀ꦩꦴꦢꦶꦛ꧀ꦜꦶ ꦲꦺꦴꦠꦶ, ꦈꦗꦸꦒꦠꦴꦱ꧀ꦱ ꦢꦶꦛ꧀ꦜꦶ, ꦣꦩ꧀ꦩꦺ ꦄꦮꦺꦕ꧀ꦕꦥ꧀ꦥꦱꦴꦢꦺꦤ ꦱꦩꦤ꧀ꦤꦴꦒꦠꦺꦴ, ꦄꦴꦒꦠꦺꦴ ꦆꦩꦁ ꦱꦢ꧀ꦣꦩ꧀ꦩ’’ꦤ꧀ꦠꦶ?

‘‘ꦱꦶꦪꦴ, ꦄꦴꦮꦸꦱꦺꦴ. ꦪꦠꦺꦴ ꦑꦺꦴ, ꦄꦴꦮꦸꦱꦺꦴ, ꦄꦫꦶꦪꦱꦴꦮꦏꦺꦴ ꦄꦴꦲꦴꦫꦚ꧀ꦕ ꦥꦗꦴꦤꦴꦠꦶ, ꦄꦴꦲꦴꦫꦱꦩꦸꦢꦪꦚ꧀ꦕ ꦥꦗꦴꦤꦴꦠꦶ, ꦄꦴꦲꦴꦫꦤꦶꦫꦺꦴꦣꦚ꧀ꦕ ꦥꦗꦴꦤꦴꦠꦶ, ꦄꦴꦲꦴꦫꦤꦶꦫꦺꦴꦣꦒꦴꦩꦶꦤꦶꦁ ꦥꦛꦶꦥꦢꦚ꧀ꦕ ꦥꦗꦴꦤꦴꦠꦶ – ꦌꦠ꧀ꦠꦴꦮꦠꦴꦥꦶ ꦑꦺꦴ, ꦄꦴꦮꦸꦱꦺꦴ, ꦄꦫꦶꦪꦱꦴꦮꦏꦺꦴ ꦱꦩ꧀ꦩꦴꦢꦶꦛ꧀ꦜꦶ ꦲꦺꦴꦠꦶ, ꦈꦗꦸꦒꦠꦴꦱ꧀ꦱ ꦢꦶꦛ꧀ꦜꦶ, ꦣꦩ꧀ꦩꦺ ꦄꦮꦺꦕ꧀ꦕꦥ꧀ꦥꦱꦴꦢꦺꦤ ꦱꦩꦤ꧀ꦤꦴꦒꦠꦺꦴ, ꦄꦴꦒꦠꦺꦴ ꦆꦩꦁ ꦱꦢ꧀ꦣꦩ꧀ꦩꦁ. ꦏꦠꦩꦺꦴ ꦥꦤꦴꦮꦸꦱꦺꦴ, ꦄꦴꦲꦴꦫꦺꦴ, ꦏꦠꦩꦺꦴ ꦄꦴꦲꦴꦫꦱꦩꦸꦢꦪꦺꦴ, ꦏꦠꦩꦺꦴ ꦄꦴꦲꦴꦫꦤꦶꦫꦺꦴꦣꦺꦴ, ꦏꦠꦩꦴ ꦄꦴꦲꦴꦫꦤꦶꦫꦺꦴꦣꦒꦴꦩꦶꦤꦷ ꦥꦛꦶꦥꦢꦴ? ꦕꦠ꧀ꦠꦴꦫꦺꦴꦩꦺ, ꦄꦴꦮꦸꦱꦺꦴ, ꦄꦴꦲꦴꦫꦴ ꦨꦹꦠꦴꦤꦁ ꦮꦴ ꦱꦠ꧀ꦠꦴꦤꦁ ꦜꦶꦠꦶꦪꦴ, ꦱꦩ꧀ꦨꦮꦺꦱꦷꦤꦁ ꦮꦴ ꦄꦤꦸꦒ꧀ꦒꦲꦴꦪ. ꦏꦠꦩꦺ ꦕꦠ꧀ꦠꦴꦫꦺꦴ? ꦏꦧꦭ꦳ꦷꦏꦴꦫꦺꦴ ꦄꦴꦲꦴꦫꦺꦴ ꦎꦭ꦳ꦴꦫꦶꦏꦺꦴ ꦮꦴ ꦱꦸꦑꦸꦩꦺꦴ ꦮꦴ, ꦦꦱ꧀ꦱꦺꦴ ꦢꦸꦠꦶꦪꦺꦴ, ꦩꦤꦺꦴꦱꦚ꧀ꦕꦺꦠꦤꦴ ꦠꦠꦶꦪꦴ, ꦮꦶꦚ꧀ꦚꦴꦟꦁ ꦕꦠꦸꦠ꧀ꦡꦁ. ꦠꦟ꧀ꦲꦴꦱꦩꦸꦢꦪꦴ ꦄꦴꦲꦴꦫꦱꦩꦸꦢꦪꦺꦴ, ꦠꦟ꧀ꦲꦴꦤꦶꦫꦺꦴꦣꦴ ꦄꦴꦲꦴꦫꦤꦶꦫꦺꦴꦣꦺꦴ, ꦄꦪꦩꦺꦮ ꦄꦫꦶꦪꦺꦴ ꦄꦛ꧀ꦜꦔ꧀ꦒꦶꦏꦺꦴ ꦩꦒ꧀ꦒꦺꦴ ꦄꦴꦲꦴꦫꦤꦶꦫꦺꦴꦣꦒꦴꦩꦶꦤꦷ ꦥꦛꦶꦥꦢꦴ, ꦱꦺꦪ꧀ꦪꦡꦶꦢꦁ – ꦱꦩ꧀ꦩꦴꦢꦶꦛ꧀ꦜꦶ ꦱꦩ꧀ꦩꦴꦱꦔ꧀ꦏꦥ꧀ꦥꦺꦴ ꦱꦩ꧀ꦩꦴꦮꦴꦕꦴ ꦱꦩ꧀ꦩꦴꦏꦩ꧀ꦩꦤ꧀ꦠꦺꦴ, ꦱꦩ꧀ꦩꦴꦄꦴꦗꦷꦮꦺꦴ ꦱꦩ꧀ꦩꦴꦮꦴꦪꦴꦩꦺꦴ ꦱꦩ꧀ꦩꦴꦱꦠꦶ ꦱꦩ꧀ꦩꦴꦱꦩꦴꦣꦶ’.

‘‘ꦪꦠꦺꦴ ꦑꦺꦴ, ꦄꦴꦮꦸꦱꦺꦴ, ꦄꦫꦶꦪꦱꦴꦮꦏꦺꦴ ꦌꦮꦁ ꦄꦴꦲꦴꦫꦁ ꦥꦗꦴꦤꦴꦠꦶ, ꦌꦮꦁ ꦄꦴꦲꦴꦫꦱꦩꦸꦢꦪꦁ ꦥꦗꦴꦤꦴꦠꦶ, ꦌꦮꦁ ꦄꦴꦲꦴꦫꦤꦶꦫꦺꦴꦣꦁ ꦥꦗꦴꦤꦴꦠꦶ, ꦌꦮꦁ ꦄꦴꦲꦴꦫꦤꦶꦫꦺꦴꦣꦒꦴꦩꦶꦤꦶꦁ ꦥꦛꦶꦥꦢꦁ ꦥꦗꦴꦤꦴꦠꦶ, ꦱꦺꦴ ꦱꦧ꧀ꦧꦱꦺꦴ ꦫꦴꦒꦴꦤꦸꦱꦪꦁ ꦥꦲꦴꦪ, ꦥꦛꦶꦓꦴꦤꦸꦱꦪꦁ ꦥꦛꦶꦮꦶꦤꦺꦴꦢꦺꦠ꧀ꦮꦴ, ‘ꦄꦱ꧀ꦩꦷ’ꦠꦶ ꦢꦶꦛ꧀ꦜꦶꦩꦴꦤꦴꦤꦸꦱꦪꦁ ꦱꦩꦹꦲꦤꦶꦠ꧀ꦮꦴ, ꦄꦮꦶꦗ꧀ꦗꦁ ꦥꦲꦴꦪ ꦮꦶꦗ꧀ꦗꦁ ꦈꦥ꧀ꦥꦴꦢꦺꦠ꧀ꦮꦴ, ꦢꦶꦛ꧀ꦜꦺꦮꦣꦩ꧀ꦩꦺ ꦢꦸꦏ꧀ꦑꦱ꧀ꦱꦤ꧀ꦠꦏꦫꦺꦴ ꦲꦺꦴꦠꦶ – ꦌꦠ꧀ꦠꦴꦮꦠꦴꦥꦶ ꦑꦺꦴ, ꦄꦴꦮꦸꦱꦺꦴ, ꦄꦫꦶꦪꦱꦴꦮꦏꦺꦴ ꦱꦩ꧀ꦩꦴꦢꦶꦛ꧀ꦜꦶ ꦲꦺꦴꦠꦶ, ꦈꦗꦸꦒꦠꦴꦱ꧀ꦱ ꦢꦶꦛ꧀ꦜꦶ, ꦣꦩ꧀ꦩꦺ ꦄꦮꦺꦕ꧀ꦕꦥ꧀ꦥꦱꦴꦢꦺꦤ ꦱꦩꦤ꧀ꦤꦴꦒꦠꦺꦴ, ꦄꦴꦒꦠꦺꦴ ꦆꦩꦁ ꦱꦢ꧀ꦣꦩ꧀ꦩ’’ꦤ꧀ꦠꦶ.

꧙꧑. ‘‘ꦱꦴꦣꦴꦮꦸꦱꦺꦴ’’ꦠꦶ ꦑꦺꦴ ꦠꦺ ꦨꦶꦏ꧀ꦑꦹ ꦄꦴꦪꦱ꧀ꦩꦠꦺꦴ ꦱꦴꦫꦶꦥꦸꦠ꧀ꦠꦱ꧀ꦱ ꦨꦴꦱꦶꦠꦁ ꦄꦨꦶꦤꦤ꧀ꦢꦶꦠ꧀ꦮꦴ ꦄꦤꦸꦩꦺꦴꦢꦶꦠ꧀ꦮꦴ ꦄꦴꦪꦱ꧀ꦩꦤ꧀ꦠꦁ ꦱꦴꦫꦶꦥꦸꦠ꧀ꦠꦁ ꦈꦠ꧀ꦠꦫꦶ ꦥꦚ꧀ꦲꦁ ꦄꦥꦸꦕ꧀ꦖꦸꦁ – ‘‘ꦱꦶꦪꦴ ꦥꦤꦴꦮꦸꦱꦺꦴ, ꦄꦚ꧀ꦚꦺꦴꦥꦶ ꦥꦫꦶꦪꦴꦪꦺꦴ ꦪꦡꦴ ꦄꦫꦶꦪꦱꦴꦮꦏꦺꦴ ꦱꦩ꧀ꦩꦴꦢꦶꦛ꧀ꦜꦶ ꦲꦺꦴꦠꦶ, ꦈꦗꦸꦒꦠꦴꦱ꧀ꦱ ꦢꦶꦛ꧀ꦜꦶ, ꦣꦩ꧀ꦩꦺ ꦄꦮꦺꦕ꧀ꦕꦥ꧀ꦥꦱꦴꦢꦺꦤ ꦱꦩꦤ꧀ꦤꦴꦒꦠꦺꦴ, ꦄꦴꦒꦠꦺꦴ ꦆꦩꦁ ꦱꦢ꧀ꦣꦩ꧀ꦩ’’ꦤ꧀ꦠꦶ?

‘‘ꦱꦶꦪꦴ, ꦄꦴꦮꦸꦱꦺꦴ. ꦪꦠꦺꦴ ꦑꦺꦴ, ꦄꦴꦮꦸꦱꦺꦴ, ꦄꦫꦶꦪꦱꦴꦮꦏꦺꦴ ꦢꦸꦏ꧀ꦑꦚ꧀ꦕ ꦥꦗꦴꦤꦴꦠꦶ, ꦢꦸꦏ꧀ꦑꦱꦩꦸꦢꦪꦚ꧀ꦕ ꦥꦗꦴꦤꦴꦠꦶ, ꦢꦸꦏ꧀ꦑꦤꦶꦫꦺꦴꦣꦚ꧀ꦕ ꦥꦗꦴꦤꦴꦠꦶ, ꦢꦸꦏ꧀ꦑꦤꦶꦫꦺꦴꦣꦒꦴꦩꦶꦤꦶꦁ ꦥꦛꦶꦥꦢꦚ꧀ꦕ ꦥꦗꦴꦤꦴꦠꦶ – ꦌꦠ꧀ꦠꦴꦮꦠꦴꦥꦶ ꦑꦺꦴ, ꦄꦴꦮꦸꦱꦺꦴ, ꦄꦫꦶꦪꦱꦴꦮꦏꦺꦴ ꦱꦩ꧀ꦩꦴꦢꦶꦛ꧀ꦜꦶ ꦲꦺꦴꦠꦶ, ꦈꦗꦸꦒꦠꦴꦱ꧀ꦱ ꦢꦶꦛ꧀ꦜꦶ, ꦣꦩ꧀ꦩꦺ ꦄꦮꦺꦕ꧀ꦕꦥ꧀ꦥꦱꦴꦢꦺꦤ ꦱꦩꦤ꧀ꦤꦴꦒꦠꦺꦴ, ꦄꦴꦒꦠꦺꦴ ꦆꦩꦁ ꦱꦢ꧀ꦣꦩ꧀ꦩꦁ. ꦏꦠꦩꦁ ꦥꦤꦴꦮꦸꦱꦺꦴ, ꦢꦸꦏ꧀ꦑꦁ, ꦏꦠꦩꦺꦴ ꦢꦸꦏ꧀ꦑꦱꦩꦸꦢꦪꦺꦴ, ꦏꦠꦩꦺꦴ ꦢꦸꦏ꧀ꦑꦤꦶꦫꦺꦴꦣꦺꦴ, ꦏꦠꦩꦴ ꦢꦸꦏ꧀ꦑꦤꦶꦫꦺꦴꦣꦒꦴꦩꦶꦤꦷ ꦥꦛꦶꦥꦢꦴ? ꦗꦴꦠꦶꦥꦶ ꦢꦸꦏ꧀ꦑꦴ, ꦗꦫꦴꦥꦶ ꦢꦸꦏ꧀ꦑꦴ, ꦩꦫꦟꦩ꧀ꦥꦶ ꦢꦸꦏ꧀ꦑꦁ, ꦱꦺꦴꦏꦥꦫꦶꦢꦺꦮꦢꦸꦏ꧀ꦑꦢꦺꦴꦩꦤꦱ꧀ꦱꦸꦥꦴꦪꦴꦱꦴꦥꦶ ꦢꦸꦏ꧀ꦑꦴ, ꦄꦥ꧀ꦥꦶꦪꦺꦲꦶ ꦱꦩ꧀ꦥꦪꦺꦴꦒꦺꦴꦥꦶ ꦢꦸꦏ꧀ꦑꦺꦴ, ꦥꦶꦪꦺꦲꦶ ꦮꦶꦥ꧀ꦥꦪꦺꦴꦒꦺꦴꦥꦶ ꦢꦸꦏ꧀ꦑꦺꦴ, ꦪꦩ꧀ꦥꦶꦕ꧀ꦖꦁ ꦤ ꦭꦨꦠꦶ ꦠꦩ꧀ꦥꦶ ꦢꦸꦏ꧀ꦑꦁ, ꦱꦁꦑꦶꦠ꧀ꦠꦺꦤ ꦥꦚ꧀ꦕꦸꦥꦴꦢꦴꦤꦏ꧀ꦑꦤ꧀ꦣꦴ [ꦥꦚ꧀ꦕꦸꦥꦴꦢꦴꦤꦏ꧀ꦑꦤ꧀ꦣꦴꦥꦶ (ꦏ.)] ꦢꦸꦏ꧀ꦑꦴ – ꦆꦢꦁ ꦮꦸꦕ꧀ꦕꦠꦴꦮꦸꦱꦺꦴ, ꦢꦸꦏ꧀ꦑꦁ. ꦏꦠꦩꦺꦴ ꦕꦴꦮꦸꦱꦺꦴ, ꦢꦸꦏ꧀ꦑꦱꦩꦸꦢꦪꦺꦴ? ꦪꦴꦪꦁ ꦠꦟ꧀ꦲꦴ ꦥꦺꦴꦤꦺꦴꦧ꧀ꦨꦮꦶꦏꦴ ꦤꦤ꧀ꦢꦷꦫꦴꦒꦱꦲꦒꦠꦴ [ꦥꦺꦴꦤꦺꦴꦨꦮꦶꦏꦴ (ꦱꦷ. ꦥꦷ.)] ꦠꦠ꧀ꦫꦠꦠ꧀ꦫꦴꦨꦶꦤꦤ꧀ꦢꦶꦤꦷ [ꦤꦤ꧀ꦢꦶꦫꦴꦒꦱꦲꦒꦠꦴ (ꦱꦷ. ꦥꦷ.)], ꦱꦺꦪ꧀ꦪꦡꦶꦢꦁ, ꦏꦴꦩꦠꦟ꧀ꦲꦴ ꦨꦮꦠꦟ꧀ꦲꦴ ꦮꦶꦨꦮꦠꦟ꧀ꦲꦴ – ꦄꦪꦁ ꦮꦸꦕ꧀ꦕꦠꦴꦮꦸꦱꦺꦴ, ꦢꦸꦏ꧀ꦑꦱꦩꦸꦢꦪꦺꦴ. ꦏꦠꦩꦺꦴ ꦕꦴꦮꦸꦱꦺꦴ, ꦢꦸꦏ꧀ꦑꦤꦶꦫꦺꦴꦣꦺꦴ? ꦪꦺꦴ ꦠꦱ꧀ꦱꦴꦪꦺꦮ ꦠꦟ꧀ꦲꦴꦪ ꦄꦱꦺꦱꦮꦶꦫꦴꦒꦤꦶꦫꦺꦴꦣꦺꦴ ꦕꦴꦒꦺꦴ ꦥꦛꦶꦤꦶꦱ꧀ꦱꦒ꧀ꦒꦺꦴ ꦩꦸꦠ꧀ꦠꦶ ꦄꦤꦴꦭꦪꦺꦴ – ꦄꦪꦁ ꦮꦸꦕ꧀ꦕꦠꦴꦮꦸꦱꦺꦴ, ꦢꦸꦏ꧀ꦑꦤꦶꦫꦺꦴꦣꦺꦴ. ꦏꦠꦩꦴ ꦕꦴꦮꦸꦱꦺꦴ, ꦢꦸꦏ꧀ꦑꦤꦶꦫꦺꦴꦣꦒꦴꦩꦶꦤꦷ ꦥꦛꦶꦥꦢꦴ? ꦄꦪꦩꦺꦮ ꦄꦫꦶꦪꦺꦴ ꦄꦛ꧀ꦜꦔ꧀ꦒꦶꦏꦺꦴ ꦩꦒ꧀ꦒꦺꦴ, ꦱꦺꦪ꧀ꦪꦡꦶꦢꦁ, ꦱꦩ꧀ꦩꦴꦢꦶꦛ꧀ꦜꦶ…ꦥꦺ… ꦱꦩ꧀ꦩꦴꦱꦩꦴꦣꦶ – ꦄꦪꦁ ꦮꦸꦕ꧀ꦕꦠꦴꦮꦸꦱꦺꦴ, ꦢꦸꦏ꧀ꦑꦤꦶꦫꦺꦴꦣꦒꦴꦩꦶꦤꦷ ꦥꦛꦶꦥꦢꦴ.

‘‘ꦪꦠꦺꦴ ꦑꦺꦴ, ꦄꦴꦮꦸꦱꦺꦴ, ꦄꦫꦶꦪꦱꦴꦮꦏꦺꦴ ꦌꦮꦁ ꦢꦸꦏ꧀ꦑꦁ ꦥꦗꦴꦤꦴꦠꦶ, ꦌꦮꦁ ꦢꦸꦏ꧀ꦑꦱꦩꦸꦢꦪꦁ ꦥꦗꦴꦤꦴꦠꦶ, ꦌꦮꦁ ꦢꦸꦏ꧀ꦑꦤꦶꦫꦺꦴꦣꦁ ꦥꦗꦴꦤꦴꦠꦶ, ꦌꦮꦁ ꦢꦸꦏ꧀ꦑꦤꦶꦫꦺꦴꦣꦒꦴꦩꦶꦤꦶꦁ ꦥꦛꦶꦥꦢꦁ ꦥꦗꦴꦤꦴꦠꦶ, ꦱꦺꦴ ꦱꦧ꧀ꦧꦱꦺꦴ ꦫꦴꦒꦴꦤꦸꦱꦪꦁ ꦥꦲꦴꦪ, ꦥꦛꦶꦓꦴꦤꦸꦱꦪꦁ ꦥꦛꦶꦮꦶꦤꦺꦴꦢꦺꦠ꧀ꦮꦴ, ‘ꦄꦱ꧀ꦩꦷ’ꦠꦶ ꦢꦶꦛ꧀ꦜꦶꦩꦴꦤꦴꦤꦸꦱꦪꦁ ꦱꦩꦹꦲꦤꦶꦠ꧀ꦮꦴ, ꦄꦮꦶꦗ꧀ꦗꦁ ꦥꦲꦴꦪ ꦮꦶꦗ꧀ꦗꦁ ꦈꦥ꧀ꦥꦴꦢꦺꦠ꧀ꦮꦴ, ꦢꦶꦛ꧀ꦜꦺꦮꦣꦩ꧀ꦩꦺ ꦢꦸꦏ꧀ꦑꦱ꧀ꦱꦤ꧀ꦠꦏꦫꦺꦴ ꦲꦺꦴꦠꦶ – ꦌꦠ꧀ꦠꦴꦮꦠꦴꦥꦶ ꦑꦺꦴ, ꦄꦴꦮꦸꦱꦺꦴ, ꦄꦫꦶꦪꦱꦴꦮꦏꦺꦴ ꦱꦩ꧀ꦩꦴꦢꦶꦛ꧀ꦜꦶ ꦲꦺꦴꦠꦶ, ꦈꦗꦸꦒꦠꦴꦱ꧀ꦱ ꦢꦶꦛ꧀ꦜꦶ, ꦣꦩ꧀ꦩꦺ ꦄꦮꦺꦕ꧀ꦕꦥ꧀ꦥꦱꦴꦢꦺꦤ ꦱꦩꦤ꧀ꦤꦴꦒꦠꦺꦴ, ꦄꦴꦒꦠꦺꦴ ꦆꦩꦁ ꦱꦢ꧀ꦣꦩ꧀ꦩ’’ꦤ꧀ꦠꦶ.

꧙꧒. ‘‘ꦱꦴꦣꦴꦮꦸꦱꦺꦴ’’ꦠꦶ ꦑꦺꦴ ꦠꦺ ꦨꦶꦏ꧀ꦑꦹ ꦄꦴꦪꦱ꧀ꦩꦠꦺꦴ ꦱꦴꦫꦶꦥꦸꦠ꧀ꦠꦱ꧀ꦱ ꦨꦴꦱꦶꦠꦁ ꦄꦨꦶꦤꦤ꧀ꦢꦶꦠ꧀ꦮꦴ ꦄꦤꦸꦩꦺꦴꦢꦶꦠ꧀ꦮꦴ ꦄꦴꦪꦱ꧀ꦩꦤ꧀ꦠꦁ ꦱꦴꦫꦶꦥꦸꦠ꧀ꦠꦁ ꦈꦠ꧀ꦠꦫꦶ ꦥꦚ꧀ꦲꦁ ꦄꦥꦸꦕ꧀ꦖꦸꦁ – ‘‘ꦱꦶꦪꦴ ꦥꦤꦴꦮꦸꦱꦺꦴ, ꦄꦚ꧀ꦚꦺꦴꦥꦶ ꦥꦫꦶꦪꦴꦪꦺꦴ ꦪꦡꦴ ꦄꦫꦶꦪꦱꦴꦮꦏꦺꦴ ꦱꦩ꧀ꦩꦴꦢꦶꦛ꧀ꦜꦶ ꦲꦺꦴꦠꦶ, ꦈꦗꦸꦒꦠꦴꦱ꧀ꦱ ꦢꦶꦛ꧀ꦜꦶ, ꦣꦩ꧀ꦩꦺ ꦄꦮꦺꦕ꧀ꦕꦥ꧀ꦥꦱꦴꦢꦺꦤ ꦱꦩꦤ꧀ꦤꦴꦒꦠꦺꦴ, ꦄꦴꦒꦠꦺꦴ ꦆꦩꦁ ꦱꦢ꧀ꦣꦩ꧀ꦩ’’ꦤ꧀ꦠꦶ?

‘‘ꦱꦶꦪꦴ, ꦄꦴꦮꦸꦱꦺꦴ. ꦪꦠꦺꦴ ꦑꦺꦴ, ꦄꦴꦮꦸꦱꦺꦴ, ꦄꦫꦶꦪꦱꦴꦮꦏꦺꦴ ꦗꦫꦴꦩꦫꦟꦚ꧀ꦕ ꦥꦗꦴꦤꦴꦠꦶ, ꦗꦫꦴꦩꦫꦟꦱꦩꦸꦢꦪꦚ꧀ꦕ ꦥꦗꦴꦤꦴꦠꦶ, ꦗꦫꦴꦩꦫꦟꦤꦶꦫꦺꦴꦣꦚ꧀ꦕ ꦥꦗꦴꦤꦴꦠꦶ, ꦗꦫꦴꦩꦫꦟꦤꦶꦫꦺꦴꦣꦒꦴꦩꦶꦤꦶꦁ ꦥꦛꦶꦥꦢꦚ꧀ꦕ ꦥꦗꦴꦤꦴꦠꦶ – ꦌꦠ꧀ꦠꦴꦮꦠꦴꦥꦶ ꦑꦺꦴ, ꦄꦴꦮꦸꦱꦺꦴ, ꦄꦫꦶꦪꦱꦴꦮꦏꦺꦴ ꦱꦩ꧀ꦩꦴꦢꦶꦛ꧀ꦜꦶ ꦲꦺꦴꦠꦶ, ꦈꦗꦸꦒꦠꦴꦱ꧀ꦱ ꦢꦶꦛ꧀ꦜꦶ, ꦣꦩ꧀ꦩꦺ ꦄꦮꦺꦕ꧀ꦕꦥ꧀ꦥꦱꦴꦢꦺꦤ ꦱꦩꦤ꧀ꦤꦴꦒꦠꦺꦴ, ꦄꦴꦒꦠꦺꦴ ꦆꦩꦁ ꦱꦢ꧀ꦣꦩ꧀ꦩꦁ. ꦏꦠꦩꦁ ꦥꦤꦴꦮꦸꦱꦺꦴ, ꦗꦫꦴꦩꦫꦟꦁ, ꦏꦠꦩꦺꦴ ꦗꦫꦴꦩꦫꦟꦱꦩꦸꦢꦪꦺꦴ, ꦏꦠꦩꦺꦴ ꦗꦫꦴꦩꦫꦟꦤꦶꦫꦺꦴꦣꦺꦴ, ꦏꦠꦩꦴ ꦗꦫꦴꦩꦫꦟꦤꦶꦫꦺꦴꦣꦒꦴꦩꦶꦤꦷ ꦥꦛꦶꦥꦢꦴ? ꦪꦴ ꦠꦺꦱꦁ ꦠꦺꦱꦁ ꦱꦠ꧀ꦠꦴꦤꦁ ꦠꦩ꧀ꦲꦶ ꦠꦩ꧀ꦲꦶ ꦱꦠ꧀ꦠꦤꦶꦏꦴꦪꦺ ꦗꦫꦴ ꦗꦷꦫꦟꦠꦴ ꦑꦟ꧀ꦝꦶꦕ꧀ꦕꦁ ꦥꦴꦭꦶꦕ꧀ꦕꦁ ꦮꦭꦶꦠ꧀ꦠꦕꦠꦴ ꦄꦴꦪꦸꦤꦺꦴ ꦱꦁꦲꦴꦤꦶ ꦆꦤ꧀ꦢ꧀ꦫꦶꦪꦴꦤꦁ ꦥꦫꦶꦥꦴꦏꦺꦴ – ꦄꦪꦁ ꦮꦸꦕ꧀ꦕꦠꦴꦮꦸꦱꦺꦴ, ꦗꦫꦴ. ꦏꦠꦩꦚ꧀ꦕꦴꦮꦸꦱꦺꦴ, ꦩꦫꦟꦁ? ꦪꦴ [ꦪꦁ (ꦥꦷ. ꦏ.), ꦱꦠꦶꦥꦛ꧀ꦜꦴꦤꦱꦸꦠ꧀ꦠꦺꦥꦶ] ꦠꦺꦱꦁ ꦠꦺꦱꦁ ꦱꦠ꧀ꦠꦴꦤꦁ ꦠꦩ꧀ꦲꦴ ꦠꦩ꧀ꦲꦴ ꦱꦠ꧀ꦠꦤꦶꦏꦴꦪꦴ ꦕꦸꦠꦶ ꦕꦮꦤꦠꦴ ꦨꦺꦢꦺꦴ ꦄꦤ꧀ꦠꦫꦣꦴꦤꦁ ꦩꦕ꧀ꦕꦸ ꦩꦫꦟꦁ ꦏꦴꦭꦁꦏꦶꦫꦶꦪꦴ ꦑꦤ꧀ꦣꦴꦤꦁ ꦨꦺꦢꦺꦴ, ꦏꦭ꦳ꦺꦮꦫꦱ꧀ꦱ ꦤꦶꦏ꧀ꦑꦺꦥꦺꦴ, ꦗꦷꦮꦶꦠꦶꦤ꧀ꦢ꧀ꦫꦶꦪꦱ꧀ꦱꦸꦥꦕ꧀ꦖꦺꦢꦺꦴ – ꦆꦢꦁ ꦮꦸꦕ꧀ꦕꦠꦴꦮꦸꦱꦺꦴ, ꦩꦫꦟꦁ. ꦆꦠꦶ ꦄꦪꦚ꧀ꦕ ꦗꦫꦴ ꦆꦢꦚ꧀ꦕ ꦩꦫꦟꦁ – ꦆꦢꦁ ꦮꦸꦕ꧀ꦕꦠꦴꦮꦸꦱꦺꦴ, ꦗꦫꦴꦩꦫꦟꦁ. ꦗꦴꦠꦶꦱꦩꦸꦢꦪꦴ ꦗꦫꦴꦩꦫꦟꦱꦩꦸꦢꦪꦺꦴ, ꦗꦴꦠꦶꦤꦶꦫꦺꦴꦣꦴ ꦗꦫꦴꦩꦫꦟꦤꦶꦫꦺꦴꦣꦺꦴ, ꦄꦪꦩꦺꦮ ꦄꦫꦶꦪꦺꦴ ꦄꦛ꧀ꦜꦔ꧀ꦒꦶꦏꦺꦴ ꦩꦒ꧀ꦒꦺꦴ ꦗꦫꦴꦩꦫꦟꦤꦶꦫꦺꦴꦣꦒꦴꦩꦶꦤꦷ ꦥꦛꦶꦥꦢꦴ, ꦱꦺꦪ꧀ꦪꦡꦶꦢꦁ – ꦱꦩ꧀ꦩꦴꦢꦶꦛ꧀ꦜꦶ…ꦥꦺ… ꦱꦩ꧀ꦩꦴꦱꦩꦴꦣꦶ.

‘‘ꦪꦠꦺꦴ ꦑꦺꦴ, ꦄꦴꦮꦸꦱꦺꦴ, ꦄꦫꦶꦪꦱꦴꦮꦏꦺꦴ ꦌꦮꦁ ꦗꦫꦴꦩꦫꦟꦁ ꦥꦗꦴꦤꦴꦠꦶ, ꦌꦮꦁ ꦗꦫꦴꦩꦫꦟꦱꦩꦸꦢꦁ ꦥꦗꦴꦤꦴꦠꦶ, ꦌꦮꦁ ꦗꦫꦴꦩꦫꦟꦤꦶꦫꦺꦴꦣꦁ ꦥꦗꦴꦤꦴꦠꦶ, ꦌꦮꦁ ꦗꦫꦴꦩꦫꦟꦤꦶꦫꦺꦴꦣꦒꦴꦩꦶꦤꦶꦁ ꦥꦛꦶꦥꦢꦁ ꦥꦗꦴꦤꦴꦠꦶ, ꦱꦺꦴ ꦱꦧ꧀ꦧꦱꦺꦴ ꦫꦴꦒꦴꦤꦸꦱꦪꦁ ꦥꦲꦴꦪ…ꦥꦺ… ꦢꦸꦏ꧀ꦑꦱ꧀ꦱꦤ꧀ꦠꦏꦫꦺꦴ ꦲꦺꦴꦠꦶ – ꦌꦠ꧀ꦠꦴꦮꦠꦴꦥꦶ ꦑꦺꦴ, ꦄꦴꦮꦸꦱꦺꦴ, ꦄꦫꦶꦪꦱꦴꦮꦏꦺꦴ ꦱꦩ꧀ꦩꦴꦢꦶꦛ꧀ꦜꦶ ꦲꦺꦴꦠꦶ, ꦈꦗꦸꦒꦠꦴꦱ꧀ꦱ ꦢꦶꦛ꧀ꦜꦶ, ꦣꦩ꧀ꦩꦺ ꦄꦮꦺꦕ꧀ꦕꦥ꧀ꦥꦱꦴꦢꦺꦤ ꦱꦩꦤ꧀ꦤꦴꦒꦠꦺꦴ, ꦄꦴꦒꦠꦺꦴ ꦆꦩꦁ ꦱꦢ꧀ꦣꦩ꧀ꦩ’’ꦤ꧀ꦠꦶ.

꧙꧓. ‘‘ꦱꦴꦣꦴꦮꦸꦱꦺꦴ’’ꦠꦶ ꦑꦺꦴ…ꦥꦺ… ꦄꦥꦸꦕ꧀ꦖꦸꦁ – ꦱꦶꦪꦴ ꦥꦤꦴꦮꦸꦱꦺꦴ…ꦥꦺ… ‘‘ꦱꦶꦪꦴ, ꦄꦴꦮꦸꦱꦺꦴ. ꦪꦠꦺꦴ ꦑꦺꦴ, ꦄꦴꦮꦸꦱꦺꦴ, ꦄꦫꦶꦪꦱꦴꦮꦏꦺꦴ ꦗꦴꦠꦶꦚ꧀ꦕ ꦥꦗꦴꦤꦴꦠꦶ, ꦗꦴꦠꦶꦱꦩꦸꦢꦪꦚ꧀ꦕ ꦥꦗꦴꦤꦴꦠꦶ, ꦗꦴꦠꦶꦤꦶꦫꦺꦴꦣꦚ꧀ꦕ ꦥꦗꦴꦤꦴꦠꦶ, ꦗꦴꦠꦶꦤꦶꦫꦺꦴꦣꦒꦴꦩꦶꦤꦶꦁ ꦥꦛꦶꦥꦢꦚ꧀ꦕ ꦥꦗꦴꦤꦴꦠꦶ – ꦌꦠ꧀ꦠꦴꦮꦠꦴꦥꦶ ꦑꦺꦴ, ꦄꦴꦮꦸꦱꦺꦴ, ꦄꦫꦶꦪꦱꦴꦮꦏꦺꦴ ꦱꦩ꧀ꦩꦴꦢꦶꦛ꧀ꦜꦶ ꦲꦺꦴꦠꦶ, ꦈꦗꦸꦒꦠꦴꦱ꧀ꦱ ꦢꦶꦛ꧀ꦜꦶ, ꦣꦩ꧀ꦩꦺ ꦄꦮꦺꦕ꧀ꦕꦥ꧀ꦥꦱꦴꦢꦺꦤ ꦱꦩꦤ꧀ꦤꦴꦒꦠꦺꦴ, ꦄꦴꦒꦠꦺꦴ ꦆꦩꦁ ꦱꦢ꧀ꦣꦩ꧀ꦩꦁ. ꦏꦠꦩꦴ ꦥꦤꦴꦮꦸꦱꦺꦴ, ꦗꦴꦠꦶ, ꦏꦠꦩꦺꦴ ꦗꦴꦠꦶꦱꦩꦸꦢꦪꦺꦴ, ꦏꦠꦩꦺꦴ ꦗꦴꦠꦶꦤꦶꦫꦺꦴꦣꦺꦴ, ꦏꦠꦩꦴ ꦗꦴꦠꦶꦤꦶꦫꦺꦴꦣꦒꦴꦩꦶꦤꦷ ꦥꦛꦶꦥꦢꦴ? ꦪꦴ ꦠꦺꦱꦁ ꦠꦺꦱꦁ ꦱꦠ꧀ꦠꦴꦤꦁ ꦠꦩ꧀ꦲꦶ ꦠꦩ꧀ꦲꦶ ꦱꦠ꧀ꦠꦤꦶꦏꦴꦪꦺ ꦗꦴꦠꦶ ꦱꦚ꧀ꦗꦴꦠꦶ ꦎꦏ꧀ꦏꦤ꧀ꦠꦶ ꦄꦨꦶꦤꦶꦧ꧀ꦧꦠ꧀ꦠꦶ ꦑꦤ꧀ꦣꦴꦤꦁ ꦥꦴꦠꦸꦨꦴꦮꦺꦴ, ꦄꦴꦪꦠꦤꦴꦤꦁ ꦥꦛꦶꦭꦴꦨꦺꦴ – ꦄꦪꦁ ꦮꦸꦕ꧀ꦕꦠꦴꦮꦸꦱꦺꦴ, ꦗꦴꦠꦶ. ꦨꦮꦱꦩꦸꦢꦪꦴ ꦗꦴꦠꦶꦱꦩꦸꦢꦪꦺꦴ, ꦨꦮꦤꦶꦫꦺꦴꦣꦴ ꦗꦴꦠꦶꦤꦶꦫꦺꦴꦣꦺꦴ, ꦄꦪꦩꦺꦮ ꦄꦫꦶꦪꦺꦴ ꦄꦛ꧀ꦜꦔ꧀ꦒꦶꦏꦺꦴ ꦩꦒ꧀ꦒꦺꦴ ꦗꦴꦠꦶꦤꦶꦫꦺꦴꦣꦒꦴꦩꦶꦤꦷ ꦥꦛꦶꦥꦢꦴ, ꦱꦺꦪ꧀ꦪꦡꦶꦢꦁ – ꦱꦩ꧀ꦩꦴꦢꦶꦛ꧀ꦜꦶ…ꦥꦺ… ꦱꦩ꧀ꦩꦴꦱꦩꦴꦣꦶ.

‘‘ꦪꦠꦺꦴ ꦑꦺꦴ, ꦄꦴꦮꦸꦱꦺꦴ, ꦄꦫꦶꦪꦱꦴꦮꦏꦺꦴ ꦌꦮꦁ ꦗꦴꦠꦶꦁ ꦥꦗꦴꦤꦴꦠꦶ, ꦌꦮꦁ ꦗꦴꦠꦶꦱꦩꦸꦢꦪꦁ ꦥꦗꦴꦤꦴꦠꦶ, ꦌꦮꦁ ꦗꦴꦠꦶꦤꦶꦫꦺꦴꦣꦁ ꦥꦗꦴꦤꦴꦠꦶ, ꦌꦮꦁ ꦗꦴꦠꦶꦤꦶꦫꦺꦴꦣꦒꦴꦩꦶꦤꦶꦁ ꦥꦛꦶꦥꦢꦁ ꦥꦗꦴꦤꦴꦠꦶ, ꦱꦺꦴ ꦱꦧ꧀ꦧꦱꦺꦴ ꦫꦴꦒꦴꦤꦸꦱꦪꦁ ꦥꦲꦴꦪ…ꦥꦺ… ꦢꦸꦏ꧀ꦑꦱ꧀ꦱꦤ꧀ꦠꦏꦫꦺꦴ ꦲꦺꦴꦠꦶ – ꦌꦠ꧀ꦠꦴꦮꦠꦴꦥꦶ ꦑꦺꦴ, ꦄꦴꦮꦸꦱꦺꦴ, ꦄꦫꦶꦪꦱꦴꦮꦏꦺꦴ ꦱꦩ꧀ꦩꦴꦢꦶꦛ꧀ꦜꦶ ꦲꦺꦴꦠꦶ, ꦈꦗꦸꦒꦠꦴꦱ꧀ꦱ ꦢꦶꦛ꧀ꦜꦶ, ꦣꦩ꧀ꦩꦺ ꦄꦮꦺꦕ꧀ꦕꦥ꧀ꦥꦱꦴꦢꦺꦤ ꦱꦩꦤ꧀ꦤꦴꦒꦠꦺꦴ, ꦄꦴꦒꦠꦺꦴ ꦆꦩꦁ ꦱꦢ꧀ꦣꦩ꧀ꦩ’’ꦤ꧀ꦠꦶ.

꧙꧔. ‘‘ꦱꦴꦣꦴꦮꦸꦱꦺꦴ’’ꦠꦶ ꦑꦺꦴ…ꦥꦺ… ꦄꦥꦸꦕ꧀ꦖꦸꦁ – ꦱꦶꦪꦴ ꦥꦤꦴꦮꦸꦱꦺꦴ…ꦥꦺ… ‘‘ꦱꦶꦪꦴ, ꦄꦴꦮꦸꦱꦺꦴ. ꦪꦠꦺꦴ ꦑꦺꦴ, ꦄꦴꦮꦸꦱꦺꦴ, ꦄꦫꦶꦪꦱꦴꦮꦏꦺꦴ ꦨꦮꦚ꧀ꦕ ꦥꦗꦴꦤꦴꦠꦶ, ꦨꦮꦱꦩꦸꦢꦪꦚ꧀ꦕ ꦥꦗꦴꦤꦴꦠꦶ, ꦨꦮꦤꦶꦫꦺꦴꦣꦚ꧀ꦕ ꦥꦗꦴꦤꦴꦠꦶ, ꦨꦮꦤꦶꦫꦺꦴꦣꦒꦴꦩꦶꦤꦶꦁ ꦥꦛꦶꦥꦢꦚ꧀ꦕ ꦥꦗꦴꦤꦴꦠꦶ – ꦌꦠ꧀ꦠꦴꦮꦠꦴꦥꦶ ꦑꦺꦴ, ꦄꦴꦮꦸꦱꦺꦴ, ꦄꦫꦶꦪꦱꦴꦮꦏꦺꦴ ꦱꦩ꧀ꦩꦴꦢꦶꦛ꧀ꦜꦶ ꦲꦺꦴꦠꦶ, ꦈꦗꦸꦒꦠꦴꦱ꧀ꦱ ꦢꦶꦛ꧀ꦜꦶ, ꦣꦩ꧀ꦩꦺ ꦄꦮꦺꦕ꧀ꦕꦥ꧀ꦥꦱꦴꦢꦺꦤ ꦱꦩꦤ꧀ꦤꦴꦒꦠꦺꦴ, ꦄꦴꦒꦠꦺꦴ ꦆꦩꦁ ꦱꦢ꧀ꦣꦩ꧀ꦩꦁ. ꦏꦠꦩꦺꦴ ꦥꦤꦴꦮꦸꦱꦺꦴ, ꦨꦮꦺꦴ, ꦏꦠꦩꦺꦴ ꦨꦮꦱꦩꦸꦢꦪꦺꦴ, ꦏꦠꦩꦺꦴ ꦨꦮꦤꦶꦫꦺꦴꦣꦺꦴ, ꦏꦠꦩꦴ ꦨꦮꦤꦶꦫꦺꦴꦣꦒꦴꦩꦶꦤꦷ ꦥꦛꦶꦥꦢꦴ? ꦠꦪꦺꦴꦩꦺ, ꦄꦴꦮꦸꦱꦺꦴ, ꦨꦮꦴ – ꦏꦴꦩꦨꦮꦺꦴ, ꦫꦹꦥꦨꦮꦺꦴ, ꦄꦫꦹꦥꦨꦮꦺꦴ. ꦈꦥꦴꦢꦴꦤꦱꦩꦸꦢꦪꦴ ꦨꦮꦱꦩꦸꦢꦪꦺꦴ, ꦈꦥꦴꦢꦴꦤꦤꦶꦫꦺꦴꦣꦴ ꦨꦮꦤꦶꦫꦺꦴꦣꦺꦴ, ꦄꦪꦩꦺꦮ ꦄꦫꦶꦪꦺꦴ ꦄꦛ꧀ꦜꦔ꧀ꦒꦶꦏꦺꦴ ꦩꦒ꧀ꦒꦺꦴ ꦨꦮꦤꦶꦫꦺꦴꦣꦒꦴꦩꦶꦤꦷ ꦥꦛꦶꦥꦢꦴ, ꦱꦺꦪ꧀ꦪꦡꦶꦢꦁ – ꦱꦩ꧀ꦩꦴꦢꦶꦛ꧀ꦜꦶ…ꦥꦺ… ꦱꦩ꧀ꦩꦴꦱꦩꦴꦣꦶ.

‘‘ꦪꦠꦺꦴ ꦑꦺꦴ, ꦄꦴꦮꦸꦱꦺꦴ, ꦄꦫꦶꦪꦱꦴꦮꦏꦺꦴ ꦌꦮꦁ ꦨꦮꦁ ꦥꦗꦴꦤꦴꦠꦶ, ꦌꦮꦁ ꦨꦮꦱꦩꦸꦢꦪꦁ ꦥꦗꦴꦤꦴꦠꦶ, ꦌꦮꦁ ꦨꦮꦤꦶꦫꦺꦴꦣꦁ ꦥꦗꦴꦤꦴꦠꦶ, ꦌꦮꦁ ꦨꦮꦤꦶꦫꦺꦴꦣꦒꦴꦩꦶꦤꦶꦁ ꦥꦛꦶꦥꦢꦁ ꦥꦗꦴꦤꦴꦠꦶ, ꦱꦺꦴ ꦱꦧ꧀ꦧꦱꦺꦴ ꦫꦴꦒꦴꦤꦸꦱꦪꦁ ꦥꦲꦴꦪ…ꦥꦺ… ꦢꦸꦏ꧀ꦑꦱ꧀ꦱꦤ꧀ꦠꦏꦫꦺꦴ ꦲꦺꦴꦠꦶ. ꦌꦠ꧀ꦠꦴꦮꦠꦴꦥꦶ ꦑꦺꦴ, ꦄꦴꦮꦸꦱꦺꦴ, ꦄꦫꦶꦪꦱꦴꦮꦏꦺꦴ ꦱꦩ꧀ꦩꦴꦢꦶꦛ꧀ꦜꦶ ꦲꦺꦴꦠꦶ, ꦈꦗꦸꦒꦠꦴꦱ꧀ꦱ ꦢꦶꦛ꧀ꦜꦶ, ꦣꦩ꧀ꦩꦺ ꦄꦮꦺꦕ꧀ꦕꦥ꧀ꦥꦱꦴꦢꦺꦤ ꦱꦩꦤ꧀ꦤꦴꦒꦠꦺꦴ, ꦄꦴꦒꦠꦺꦴ ꦆꦩꦁ ꦱꦢ꧀ꦣꦩ꧀ꦩ’’ꦤ꧀ꦠꦶ.

꧙꧕. ‘‘ꦱꦴꦣꦴꦮꦸꦱꦺꦴ’’ꦠꦶ ꦑꦺꦴ…ꦥꦺ… ꦄꦥꦸꦕ꧀ꦖꦸꦁ – ꦱꦶꦪꦴ ꦥꦤꦴꦮꦸꦱꦺꦴ…ꦥꦺ… ‘‘ꦱꦶꦪꦴ, ꦄꦴꦮꦸꦱꦺꦴ. ꦪꦠꦺꦴ ꦑꦺꦴ, ꦄꦴꦮꦸꦱꦺꦴ, ꦄꦫꦶꦪꦱꦴꦮꦏꦺꦴ ꦈꦥꦴꦢꦴꦤꦚ꧀ꦕ ꦥꦗꦴꦤꦴꦠꦶ, ꦈꦥꦴꦢꦴꦤꦱꦩꦸꦢꦪꦚ꧀ꦕ ꦥꦗꦴꦤꦴꦠꦶ, ꦈꦥꦴꦢꦴꦤꦤꦶꦫꦺꦴꦣꦚ꧀ꦕ ꦥꦗꦴꦤꦴꦠꦶ, ꦈꦥꦴꦢꦴꦤꦤꦶꦫꦺꦴꦣꦒꦴꦩꦶꦤꦶꦁ ꦥꦛꦶꦥꦢꦚ꧀ꦕ ꦥꦗꦴꦤꦴꦠꦶ – ꦌꦠ꧀ꦠꦴꦮꦠꦴꦥꦶ ꦑꦺꦴ, ꦄꦴꦮꦸꦱꦺꦴ, ꦄꦫꦶꦪꦱꦴꦮꦏꦺꦴ ꦱꦩ꧀ꦩꦴꦢꦶꦛ꧀ꦜꦶ ꦲꦺꦴꦠꦶ, ꦈꦗꦸꦒꦠꦴꦱ꧀ꦱ ꦢꦶꦛ꧀ꦜꦶ, ꦣꦩ꧀ꦩꦺ ꦄꦮꦺꦕ꧀ꦕꦥ꧀ꦥꦱꦴꦢꦺꦤ ꦱꦩꦤ꧀ꦤꦴꦒꦠꦺꦴ, ꦄꦴꦒꦠꦺꦴ ꦆꦩꦁ ꦱꦢ꧀ꦣꦩ꧀ꦩꦁ. ꦏꦠꦩꦁ ꦥꦤꦴꦮꦸꦱꦺꦴ, ꦈꦥꦴꦢꦴꦤꦁ, ꦏꦠꦩꦺꦴ ꦈꦥꦴꦢꦴꦤꦱꦩꦸꦢꦪꦺꦴ, ꦏꦠꦩꦺꦴ ꦈꦥꦴꦢꦴꦤꦤꦶꦫꦺꦴꦣꦺꦴ, ꦏꦠꦩꦴ ꦈꦥꦴꦢꦴꦤꦤꦶꦫꦺꦴꦣꦒꦴꦩꦶꦤꦷ ꦥꦛꦶꦥꦢꦴ? ꦕꦠ꧀ꦠꦴꦫꦶꦩꦴꦤꦶ, ꦄꦴꦮꦸꦱꦺꦴ, ꦈꦥꦴꦢꦴꦤꦴꦤꦶ – ꦏꦴꦩꦸꦥꦴꦢꦴꦤꦁ, ꦢꦶꦛ꧀ꦜꦸꦥꦴꦢꦴꦤꦁ, ꦱꦷꦭꦧ꧀ꦧꦠꦸꦥꦴꦢꦴꦤꦁ, ꦄꦠ꧀ꦠꦮꦴꦢꦸꦥꦴꦢꦴꦤꦁ. ꦠꦟ꧀ꦲꦴꦱꦩꦸꦢꦪꦴ ꦈꦥꦴꦢꦴꦤꦱꦩꦸꦢꦪꦺꦴ, ꦠꦟ꧀ꦲꦴꦤꦶꦫꦺꦴꦣꦴ ꦈꦥꦴꦢꦴꦤꦤꦶꦫꦺꦴꦣꦺꦴ, ꦄꦪꦩꦺꦮ ꦄꦫꦶꦪꦺꦴ ꦄꦛ꧀ꦜꦔ꧀ꦒꦶꦏꦺꦴ ꦩꦒ꧀ꦒꦺꦴ ꦈꦥꦴꦢꦴꦤꦤꦶꦫꦺꦴꦣꦒꦴꦩꦶꦤꦷ ꦥꦛꦶꦥꦢꦴ, ꦱꦺꦪ꧀ꦪꦡꦶꦢꦁ – ꦱꦩ꧀ꦩꦴꦢꦶꦛ꧀ꦜꦶ…ꦥꦺ… ꦱꦩ꧀ꦩꦴꦱꦩꦴꦣꦶ.

‘‘ꦪꦠꦺꦴ ꦑꦺꦴ, ꦄꦴꦮꦸꦱꦺꦴ, ꦄꦫꦶꦪꦱꦴꦮꦏꦺꦴ ꦌꦮꦁ ꦈꦥꦴꦢꦴꦤꦁ ꦥꦗꦴꦤꦴꦠꦶ, ꦌꦮꦁ ꦈꦥꦴꦢꦴꦤꦱꦩꦸꦢꦪꦁ ꦥꦗꦴꦤꦴꦠꦶ, ꦌꦮꦁ ꦈꦥꦴꦢꦴꦤꦤꦶꦫꦺꦴꦣꦁ ꦥꦗꦴꦤꦴꦠꦶ, ꦌꦮꦁ ꦈꦥꦴꦢꦴꦤꦤꦶꦫꦺꦴꦣꦒꦴꦩꦶꦤꦶꦁ ꦥꦛꦶꦥꦢꦁ ꦥꦗꦴꦤꦴꦠꦶ, ꦱꦺꦴ ꦱꦧ꧀ꦧꦱꦺꦴ ꦫꦴꦒꦴꦤꦸꦱꦪꦁ ꦥꦲꦴꦪ…ꦥꦺ… ꦢꦸꦏ꧀ꦑꦱ꧀ꦱꦤ꧀ꦠꦏꦫꦺꦴ ꦲꦺꦴꦠꦶ – ꦌꦠ꧀ꦠꦴꦮꦠꦴꦥꦶ ꦑꦺꦴ, ꦄꦴꦮꦸꦱꦺꦴ, ꦄꦫꦶꦪꦱꦴꦮꦏꦺꦴ ꦱꦩ꧀ꦩꦴꦢꦶꦛ꧀ꦜꦶ ꦲꦺꦴꦠꦶ, ꦈꦗꦸꦒꦠꦴꦱ꧀ꦱ ꦢꦶꦛ꧀ꦜꦶ, ꦣꦩ꧀ꦩꦺ ꦄꦮꦺꦕ꧀ꦕꦥ꧀ꦥꦱꦴꦢꦺꦤ ꦱꦩꦤ꧀ꦤꦴꦒꦠꦺꦴ, ꦄꦴꦒꦠꦺꦴ ꦆꦩꦁ ꦱꦢ꧀ꦣꦩ꧀ꦩ’’ꦤ꧀ꦠꦶ.

꧙꧖. ‘‘ꦱꦴꦣꦴꦮꦸꦱꦺꦴ’’ꦠꦶ ꦑꦺꦴ…ꦥꦺ… ꦄꦥꦸꦕ꧀ꦖꦸꦁ – ꦱꦶꦪꦴ ꦥꦤꦴꦮꦸꦱꦺꦴ…ꦥꦺ… ‘‘ꦱꦶꦪꦴ, ꦄꦴꦮꦸꦱꦺꦴ. ꦪꦠꦺꦴ ꦑꦺꦴ, ꦄꦴꦮꦸꦱꦺꦴ, ꦄꦫꦶꦪꦱꦴꦮꦏꦺꦴ ꦠꦟ꧀ꦲꦚ꧀ꦕ ꦥꦗꦴꦤꦴꦠꦶ, ꦠꦟ꧀ꦲꦴꦱꦩꦸꦢꦪꦚ꧀ꦕ ꦥꦗꦴꦤꦴꦠꦶ, ꦠꦟ꧀ꦲꦴꦤꦶꦫꦺꦴꦣꦚ꧀ꦕ ꦥꦗꦴꦤꦴꦠꦶ, ꦠꦟ꧀ꦲꦴꦤꦶꦫꦺꦴꦣꦒꦴꦩꦶꦤꦶꦁ ꦥꦛꦶꦥꦢꦚ꧀ꦕ ꦥꦗꦴꦤꦴꦠꦶ – ꦌꦠ꧀ꦠꦴꦮꦠꦴꦥꦶ ꦑꦺꦴ, ꦄꦴꦮꦸꦱꦺꦴ, ꦄꦫꦶꦪꦱꦴꦮꦏꦺꦴ ꦱꦩ꧀ꦩꦴꦢꦶꦛ꧀ꦜꦶ ꦲꦺꦴꦠꦶ, ꦈꦗꦸꦒꦠꦴꦱ꧀ꦱ ꦢꦶꦛ꧀ꦜꦶ, ꦣꦩ꧀ꦩꦺ ꦄꦮꦺꦕ꧀ꦕꦥ꧀ꦥꦱꦴꦢꦺꦤ ꦱꦩꦤ꧀ꦤꦴꦒꦠꦺꦴ, ꦄꦴꦒꦠꦺꦴ ꦆꦩꦁ ꦱꦢ꧀ꦣꦩ꧀ꦩꦁ. ꦏꦠꦩꦴ ꦥꦤꦴꦮꦸꦱꦺꦴ, ꦠꦟ꧀ꦲꦴ, ꦏꦠꦩꦺꦴ ꦠꦟ꧀ꦲꦴꦱꦩꦸꦢꦪꦺꦴ, ꦏꦠꦩꦺꦴ ꦠꦟ꧀ꦲꦴꦤꦶꦫꦺꦴꦣꦺꦴ, ꦏꦠꦩꦴ ꦠꦟ꧀ꦲꦴꦤꦶꦫꦺꦴꦣꦒꦴꦩꦶꦤꦷ ꦥꦛꦶꦥꦢꦴ? ꦖꦪꦶꦩꦺ, ꦄꦴꦮꦸꦱꦺꦴ, ꦠꦟ꧀ꦲꦴꦏꦴꦪꦴ – ꦫꦹꦥꦠꦟ꧀ꦲꦴ, ꦱꦢ꧀ꦢꦠꦟ꧀ꦲꦴ, ꦒꦤ꧀ꦣꦠꦟ꧀ꦲꦴ, ꦫꦱꦠꦟ꧀ꦲꦴ, ꦦꦺꦴꦛ꧀ꦜꦧ꧀ꦧꦠꦟ꧀ꦲꦴ, ꦣꦩ꧀ꦩꦠꦟ꧀ꦲꦴ. ꦮꦺꦢꦤꦴꦱꦩꦸꦢꦪꦴ ꦠꦟ꧀ꦲꦴꦱꦩꦸꦢꦪꦺꦴ, ꦮꦺꦢꦤꦴꦤꦶꦫꦺꦴꦣꦴ ꦠꦟ꧀ꦲꦴꦤꦶꦫꦺꦴꦣꦺꦴ, ꦄꦪꦩꦺꦮ ꦄꦫꦶꦪꦺꦴ ꦄꦛ꧀ꦜꦔ꧀ꦒꦶꦏꦺꦴ ꦩꦒ꧀ꦒꦺꦴ ꦠꦟ꧀ꦲꦴꦤꦶꦫꦺꦴꦣꦒꦴꦩꦶꦤꦷ ꦥꦛꦶꦥꦢꦴ, ꦱꦺꦪ꧀ꦪꦡꦶꦢꦁ – ꦱꦩ꧀ꦩꦴꦢꦶꦛ꧀ꦜꦶ…ꦥꦺ… ꦱꦩ꧀ꦩꦴꦱꦩꦴꦣꦶ.

‘‘ꦪꦠꦺꦴ ꦑꦺꦴ, ꦄꦴꦮꦸꦱꦺꦴ, ꦄꦫꦶꦪꦱꦴꦮꦏꦺꦴ ꦌꦮꦁ ꦠꦟ꧀ꦲꦁ ꦥꦗꦴꦤꦴꦠꦶ, ꦌꦮꦁ ꦠꦟ꧀ꦲꦴꦱꦩꦸꦢꦪꦁ ꦥꦗꦴꦤꦴꦠꦶ, ꦌꦮꦁ ꦠꦟ꧀ꦲꦴꦤꦶꦫꦺꦴꦣꦁ ꦥꦗꦴꦤꦴꦠꦶ, ꦌꦮꦁ ꦠꦟ꧀ꦲꦴꦤꦶꦫꦺꦴꦣꦒꦴꦩꦶꦤꦶꦁ ꦥꦛꦶꦥꦢꦁ ꦥꦗꦴꦤꦴꦠꦶ, ꦱꦺꦴ ꦱꦧ꧀ꦧꦱꦺꦴ ꦫꦴꦒꦴꦤꦸꦱꦪꦁ ꦥꦲꦴꦪ…ꦥꦺ… ꦢꦸꦏ꧀ꦑꦱ꧀ꦱꦤ꧀ꦠꦏꦫꦺꦴ ꦲꦺꦴꦠꦶ – ꦌꦠ꧀ꦠꦴꦮꦠꦴꦥꦶ ꦑꦺꦴ, ꦄꦴꦮꦸꦱꦺꦴ, ꦄꦫꦶꦪꦱꦴꦮꦏꦺꦴ ꦱꦩ꧀ꦩꦴꦢꦶꦛ꧀ꦜꦶ ꦲꦺꦴꦠꦶ, ꦈꦗꦸꦒꦠꦴꦱ꧀ꦱ ꦢꦶꦛ꧀ꦜꦶ, ꦣꦩ꧀ꦩꦺ ꦄꦮꦺꦕ꧀ꦕꦥ꧀ꦥꦱꦴꦢꦺꦤ ꦱꦩꦤ꧀ꦤꦴꦒꦠꦺꦴ, ꦄꦴꦒꦠꦺꦴ ꦆꦩꦁ ꦱꦢ꧀ꦣꦩ꧀ꦩ’’ꦤ꧀ꦠꦶ.

꧙꧗. ‘‘ꦱꦴꦣꦴꦮꦸꦱꦺꦴ’’ꦠꦶ ꦑꦺꦴ…ꦥꦺ… ꦄꦥꦸꦕ꧀ꦖꦸꦁ – ꦱꦶꦪꦴ ꦥꦤꦴꦮꦸꦱꦺꦴ…ꦥꦺ… ‘‘ꦱꦶꦪꦴ, ꦄꦴꦮꦸꦱꦺꦴ. ꦪꦠꦺꦴ ꦑꦺꦴ, ꦄꦴꦮꦸꦱꦺꦴ, ꦄꦫꦶꦪꦱꦴꦮꦏꦺꦴ ꦮꦺꦢꦤꦚ꧀ꦕ ꦥꦗꦴꦤꦴꦠꦶ, ꦮꦺꦢꦤꦴꦱꦩꦸꦢꦪꦚ꧀ꦕ ꦥꦗꦴꦤꦴꦠꦶ, ꦮꦺꦢꦤꦴꦤꦶꦫꦺꦴꦣꦚ꧀ꦕ ꦥꦗꦴꦤꦴꦠꦶ, ꦮꦺꦢꦤꦴꦤꦶꦫꦺꦴꦣꦒꦴꦩꦶꦤꦶꦁ ꦥꦛꦶꦥꦢꦚ꧀ꦕ ꦥꦗꦴꦤꦴꦠꦶ – ꦌꦠ꧀ꦠꦴꦮꦠꦴꦥꦶ ꦑꦺꦴ, ꦄꦴꦮꦸꦱꦺꦴ, ꦄꦫꦶꦪꦱꦴꦮꦏꦺꦴ ꦱꦩ꧀ꦩꦴꦢꦶꦛ꧀ꦜꦶ ꦲꦺꦴꦠꦶ, ꦈꦗꦸꦒꦠꦴꦱ꧀ꦱ ꦢꦶꦛ꧀ꦜꦶ, ꦣꦩ꧀ꦩꦺ ꦄꦮꦺꦕ꧀ꦕꦥ꧀ꦥꦱꦴꦢꦺꦤ ꦱꦩꦤ꧀ꦤꦴꦒꦠꦺꦴ, ꦄꦴꦒꦠꦺꦴ ꦆꦩꦁ ꦱꦢ꧀ꦣꦩ꧀ꦩꦁ. ꦏꦠꦩꦴ ꦥꦤꦴꦮꦸꦱꦺꦴ, ꦮꦺꦢꦤꦴ, ꦏꦠꦩꦺꦴ ꦮꦺꦢꦤꦴꦱꦩꦸꦢꦪꦺꦴ, ꦏꦠꦩꦺꦴ ꦮꦺꦢꦤꦴꦤꦶꦫꦺꦴꦣꦺꦴ, ꦏꦠꦩꦴ ꦮꦺꦢꦤꦴꦤꦶꦫꦺꦴꦣꦒꦴꦩꦶꦤꦷ ꦥꦛꦶꦥꦢꦴ? ꦖꦪꦶꦩꦺ, ꦄꦴꦮꦸꦱꦺꦴ, ꦮꦺꦢꦤꦴꦏꦴꦪꦴ – ꦕꦏ꧀ꦑꦸꦱꦩ꧀ꦦꦱ꧀ꦱꦗꦴ ꦮꦺꦢꦤꦴ, ꦱꦺꦴꦠꦱꦩ꧀ꦦꦱ꧀ꦱꦗꦴ ꦮꦺꦢꦤꦴ, ꦓꦴꦤꦱꦩ꧀ꦦꦱ꧀ꦱꦗꦴ ꦮꦺꦢꦤꦴ, ꦗꦶꦮ꧀ꦲꦴꦱꦩ꧀ꦦꦱ꧀ꦱꦗꦴ ꦮꦺꦢꦤꦴ, ꦏꦴꦪꦱꦩ꧀ꦦꦱ꧀ꦱꦗꦴ ꦮꦺꦢꦤꦴ, ꦩꦤꦺꦴꦱꦩ꧀ꦦꦱ꧀ꦱꦗꦴ ꦮꦺꦢꦤꦴ. ꦦꦱ꧀ꦱꦱꦩꦸꦢꦪꦴ ꦮꦺꦢꦤꦴꦱꦩꦸꦢꦪꦺꦴ, ꦦꦱ꧀ꦱꦤꦶꦫꦺꦴꦣꦴ ꦮꦺꦢꦤꦴꦤꦶꦫꦺꦴꦣꦺꦴ, ꦄꦪꦩꦺꦮ ꦄꦫꦶꦪꦺꦴ ꦄꦛ꧀ꦜꦔ꧀ꦒꦶꦏꦺꦴ ꦩꦒ꧀ꦒꦺꦴ ꦮꦺꦢꦤꦴꦤꦶꦫꦺꦴꦣꦒꦴꦩꦶꦤꦷ ꦥꦛꦶꦥꦢꦴ, ꦱꦺꦪ꧀ꦪꦡꦶꦢꦁ – ꦱꦩ꧀ꦩꦴꦢꦶꦛ꧀ꦜꦶ…ꦥꦺ… ꦱꦩ꧀ꦩꦴꦱꦩꦴꦣꦶ.

‘‘ꦪꦠꦺꦴ ꦑꦺꦴ, ꦄꦴꦮꦸꦱꦺꦴ, ꦄꦫꦶꦪꦱꦴꦮꦏꦺꦴ ꦌꦮꦁ ꦮꦺꦢꦤꦁ ꦥꦗꦴꦤꦴꦠꦶ, ꦌꦮꦁ ꦮꦺꦢꦤꦴꦱꦩꦸꦢꦪꦁ ꦥꦗꦴꦤꦴꦠꦶ, ꦌꦮꦁ ꦮꦺꦢꦤꦴꦤꦶꦫꦺꦴꦣꦁ ꦥꦗꦴꦤꦴꦠꦶ, ꦌꦮꦁ ꦮꦺꦢꦤꦴꦤꦶꦫꦺꦴꦣꦒꦴꦩꦶꦤꦶꦁ ꦥꦛꦶꦥꦢꦁ ꦥꦗꦴꦤꦴꦠꦶ, ꦱꦺꦴ ꦱꦧ꧀ꦧꦱꦺꦴ ꦫꦴꦒꦴꦤꦸꦱꦪꦁ ꦥꦲꦴꦪ…ꦥꦺ… ꦢꦸꦏ꧀ꦑꦱ꧀ꦱꦤ꧀ꦠꦏꦫꦺꦴ ꦲꦺꦴꦠꦶ – ꦌꦠ꧀ꦠꦴꦮꦠꦴꦥꦶ ꦑꦺꦴ, ꦄꦴꦮꦸꦱꦺꦴ, ꦄꦫꦶꦪꦱꦴꦮꦏꦺꦴ ꦱꦩ꧀ꦩꦴꦢꦶꦛ꧀ꦜꦶ ꦲꦺꦴꦠꦶ, ꦈꦗꦸꦒꦠꦴꦱ꧀ꦱ ꦢꦶꦛ꧀ꦜꦶ, ꦣꦩ꧀ꦩꦺ ꦄꦮꦺꦕ꧀ꦕꦥ꧀ꦥꦱꦴꦢꦺꦤ ꦱꦩꦤ꧀ꦤꦴꦒꦠꦺꦴ, ꦄꦴꦒꦠꦺꦴ ꦆꦩꦁ ꦱꦢ꧀ꦣꦩ꧀ꦩ’’ꦤ꧀ꦠꦶ.

꧙꧘. ‘‘ꦱꦴꦣꦴꦮꦸꦱꦺꦴ’’ꦠꦶ ꦑꦺꦴ…ꦥꦺ… ꦄꦥꦸꦕ꧀ꦖꦸꦁ – ꦱꦶꦪꦴ ꦥꦤꦴꦮꦸꦱꦺꦴ…ꦥꦺ… ‘‘ꦱꦶꦪꦴ, ꦄꦴꦮꦸꦱꦺꦴ. ꦪꦠꦺꦴ ꦑꦺꦴ, ꦄꦴꦮꦸꦱꦺꦴ, ꦄꦫꦶꦪꦱꦴꦮꦏꦺꦴ ꦦꦱ꧀ꦱꦚ꧀ꦕ ꦥꦗꦴꦤꦴꦠꦶ, ꦦꦱ꧀ꦱꦱꦩꦸꦢꦪꦚ꧀ꦕ ꦥꦗꦴꦤꦴꦠꦶ, ꦦꦱ꧀ꦱꦤꦶꦫꦺꦴꦣꦚ꧀ꦕ ꦥꦗꦴꦤꦴꦠꦶ, ꦦꦱ꧀ꦱꦤꦶꦫꦺꦴꦣꦒꦴꦩꦶꦤꦶꦁ ꦥꦛꦶꦥꦢꦚ꧀ꦕ ꦥꦗꦴꦤꦴꦠꦶ – ꦌꦠ꧀ꦠꦴꦮꦠꦴꦥꦶ ꦑꦺꦴ, ꦄꦴꦮꦸꦱꦺꦴ, ꦄꦫꦶꦪꦱꦴꦮꦏꦺꦴ ꦱꦩ꧀ꦩꦴꦢꦶꦛ꧀ꦜꦶ ꦲꦺꦴꦠꦶ, ꦈꦗꦸꦒꦠꦴꦱ꧀ꦱ ꦢꦶꦛ꧀ꦜꦶ, ꦣꦩ꧀ꦩꦺ ꦄꦮꦺꦕ꧀ꦕꦥ꧀ꦥꦱꦴꦢꦺꦤ ꦱꦩꦤ꧀ꦤꦴꦒꦠꦺꦴ, ꦄꦴꦒꦠꦺꦴ ꦆꦩꦁ ꦱꦢ꧀ꦣꦩ꧀ꦩꦁ. ꦏꦠꦩꦺꦴ ꦥꦤꦴꦮꦸꦱꦺꦴ, ꦦꦱ꧀ꦱꦺꦴ, ꦏꦠꦩꦺꦴ ꦦꦱ꧀ꦱꦱꦩꦸꦢꦪꦺꦴ, ꦏꦠꦩꦺꦴ ꦦꦱ꧀ꦱꦤꦶꦫꦺꦴꦣꦺꦴ, ꦏꦠꦩꦴ ꦦꦱ꧀ꦱꦤꦶꦫꦺꦴꦣꦒꦴꦩꦶꦤꦷ ꦥꦛꦶꦥꦢꦴ? ꦖꦪꦶꦩꦺ, ꦄꦴꦮꦸꦱꦺꦴ, ꦦꦱ꧀ꦱꦏꦴꦪꦴ – ꦕꦏ꧀ꦑꦸꦱꦩ꧀ꦦꦱ꧀ꦱꦺꦴ, ꦱꦺꦴꦠꦱꦩ꧀ꦦꦱ꧀ꦱꦺꦴ, ꦓꦴꦤꦱꦩ꧀ꦦꦱ꧀ꦱꦺꦴ, ꦗꦶꦮ꧀ꦲꦴꦱꦩ꧀ꦦꦱ꧀ꦱꦺꦴ, ꦏꦴꦪꦱꦩ꧀ꦦꦱ꧀ꦱꦺꦴ, ꦩꦤꦺꦴꦱꦩ꧀ꦦꦱ꧀ꦱꦺꦴ. ꦱꦭ꦳ꦴꦪꦠꦤꦱꦩꦸꦢꦪꦴ ꦦꦱ꧀ꦱꦱꦩꦸꦢꦪꦺꦴ, ꦱꦭ꦳ꦴꦪꦠꦤꦤꦶꦫꦺꦴꦣꦴ ꦦꦱ꧀ꦱꦤꦶꦫꦺꦴꦣꦺꦴ, ꦄꦪꦩꦺꦮ ꦄꦫꦶꦪꦺꦴ ꦄꦛ꧀ꦜꦔ꧀ꦒꦶꦏꦺꦴ ꦩꦒ꧀ꦒꦺꦴ ꦦꦱ꧀ꦱꦤꦶꦫꦺꦴꦣꦒꦴꦩꦶꦤꦷ ꦥꦛꦶꦥꦢꦴ, ꦱꦺꦪ꧀ꦪꦡꦶꦢꦁ – ꦱꦩ꧀ꦩꦴꦢꦶꦛ꧀ꦜꦶ…ꦥꦺ… ꦱꦩ꧀ꦩꦴꦱꦩꦴꦣꦶ.

‘‘ꦪꦠꦺꦴ ꦑꦺꦴ, ꦄꦴꦮꦸꦱꦺꦴ, ꦄꦫꦶꦪꦱꦴꦮꦏꦺꦴ ꦌꦮꦁ ꦦꦱ꧀ꦱꦁ ꦥꦗꦴꦤꦴꦠꦶ, ꦌꦮꦁ ꦦꦱ꧀ꦱꦱꦩꦸꦢꦪꦁ ꦥꦗꦴꦤꦴꦠꦶ, ꦌꦮꦁ ꦦꦱ꧀ꦱꦤꦶꦫꦺꦴꦣꦁ ꦥꦗꦴꦤꦴꦠꦶ, ꦌꦮꦁ ꦦꦱ꧀ꦱꦤꦶꦫꦺꦴꦣꦒꦴꦩꦶꦤꦶꦁ ꦥꦛꦶꦥꦢꦁ ꦥꦗꦴꦤꦴꦠꦶ, ꦱꦺꦴ ꦱꦧ꧀ꦧꦱꦺꦴ ꦫꦴꦒꦴꦤꦸꦱꦪꦁ ꦥꦲꦴꦪ…ꦥꦺ… ꦢꦸꦏ꧀ꦑꦱ꧀ꦱꦤ꧀ꦠꦏꦫꦺꦴ ꦲꦺꦴꦠꦶ – ꦌꦠ꧀ꦠꦴꦮꦠꦴꦥꦶ ꦑꦺꦴ, ꦄꦴꦮꦸꦱꦺꦴ, ꦄꦫꦶꦪꦱꦴꦮꦏꦺꦴ ꦱꦩ꧀ꦩꦴꦢꦶꦛ꧀ꦜꦶ ꦲꦺꦴꦠꦶ, ꦈꦗꦸꦒꦠꦴꦱ꧀ꦱ ꦢꦶꦛ꧀ꦜꦶ, ꦣꦩ꧀ꦩꦺ ꦄꦮꦺꦕ꧀ꦕꦥ꧀ꦥꦱꦴꦢꦺꦤ ꦱꦩꦤ꧀ꦤꦴꦒꦠꦺꦴ, ꦄꦴꦒꦠꦺꦴ ꦆꦩꦁ ꦱꦢ꧀ꦣꦩ꧀ꦩ’’ꦤ꧀ꦠꦶ.

꧙꧙. ‘‘ꦱꦴꦣꦴꦮꦸꦱꦺꦴ’’ꦠꦶ ꦑꦺꦴ…ꦥꦺ… ꦄꦥꦸꦕ꧀ꦖꦸꦁ – ꦱꦶꦪꦴ ꦥꦤꦴꦮꦸꦱꦺꦴ…ꦥꦺ… ‘‘ꦱꦶꦪꦴ, ꦄꦴꦮꦸꦱꦺꦴ. ꦪꦠꦺꦴ ꦑꦺꦴ, ꦄꦴꦮꦸꦱꦺꦴ, ꦄꦫꦶꦪꦱꦴꦮꦏꦺꦴ ꦱꦭ꦳ꦴꦪꦠꦤꦚ꧀ꦕ ꦥꦗꦴꦤꦴꦠꦶ, ꦱꦭ꦳ꦴꦪꦠꦤꦱꦩꦸꦢꦪꦚ꧀ꦕ ꦥꦗꦴꦤꦴꦠꦶ, ꦱꦭ꦳ꦴꦪꦠꦤꦤꦶꦫꦺꦴꦣꦚ꧀ꦕ ꦥꦗꦴꦤꦴꦠꦶ, ꦱꦭ꦳ꦴꦪꦠꦤꦤꦶꦫꦺꦴꦣꦒꦴꦩꦶꦤꦶꦁ ꦥꦛꦶꦥꦢꦚ꧀ꦕ ꦥꦗꦴꦤꦴꦠꦶ – ꦌꦠ꧀ꦠꦴꦮꦠꦴꦥꦶ ꦑꦺꦴ, ꦄꦴꦮꦸꦱꦺꦴ, ꦄꦫꦶꦪꦱꦴꦮꦏꦺꦴ ꦱꦩ꧀ꦩꦴꦢꦶꦛ꧀ꦜꦶ ꦲꦺꦴꦠꦶ, ꦈꦗꦸꦒꦠꦴꦱ꧀ꦱ ꦢꦶꦛ꧀ꦜꦶ, ꦣꦩ꧀ꦩꦺ ꦄꦮꦺꦕ꧀ꦕꦥ꧀ꦥꦱꦴꦢꦺꦤ ꦱꦩꦤ꧀ꦤꦴꦒꦠꦺꦴ, ꦄꦴꦒꦠꦺꦴ ꦆꦩꦁ ꦱꦢ꧀ꦣꦩ꧀ꦩꦁ. ꦏꦠꦩꦁ ꦥꦤꦴꦮꦸꦱꦺꦴ, ꦱꦭ꦳ꦴꦪꦠꦤꦁ, ꦏꦠꦩꦺꦴ ꦱꦭ꦳ꦴꦪꦠꦤꦱꦩꦸꦢꦪꦺꦴ, ꦏꦠꦩꦺꦴ ꦱꦭ꦳ꦴꦪꦠꦤꦤꦶꦫꦺꦴꦣꦺꦴ, ꦏꦠꦩꦴ ꦱꦭ꦳ꦴꦪꦠꦤꦤꦶꦫꦺꦴꦣꦒꦴꦩꦶꦤꦷ ꦥꦛꦶꦥꦢꦴ? ꦖꦪꦶꦩꦴꦤꦶ, ꦄꦴꦮꦸꦱꦺꦴ, ꦄꦴꦪꦠꦤꦴꦤꦶ – ꦕꦏ꧀ꦑꦴꦪꦠꦤꦁ, ꦱꦺꦴꦠꦴꦪꦠꦤꦁ, ꦓꦴꦤꦴꦪꦠꦤꦁ, ꦗꦶꦮ꧀ꦲꦴꦪꦠꦤꦁ, ꦏꦴꦪꦴꦪꦠꦤꦁ, ꦩꦤꦴꦪꦠꦤꦁ. ꦤꦴꦩꦫꦹꦥꦱꦩꦸꦢꦪꦴ ꦱꦭ꦳ꦴꦪꦠꦤꦱꦩꦸꦢꦪꦺꦴ, ꦤꦴꦩꦫꦹꦥꦤꦶꦫꦺꦴꦣꦴ ꦱꦭ꦳ꦴꦪꦠꦤꦤꦶꦫꦺꦴꦣꦺꦴ, ꦄꦪꦩꦺꦮ ꦄꦫꦶꦪꦺꦴ ꦄꦛ꧀ꦜꦔ꧀ꦒꦶꦏꦺꦴ ꦩꦒ꧀ꦒꦺꦴ ꦱꦭ꦳ꦴꦪꦠꦤꦤꦶꦫꦺꦴꦣꦒꦴꦩꦶꦤꦷ ꦥꦛꦶꦥꦢꦴ, ꦱꦺꦪ꧀ꦪꦡꦶꦢꦁ – ꦱꦩ꧀ꦩꦴꦢꦶꦛ꧀ꦜꦶ…ꦥꦺ… ꦱꦩ꧀ꦩꦴꦱꦩꦴꦣꦶ.

‘‘ꦪꦠꦺꦴ ꦑꦺꦴ, ꦄꦴꦮꦸꦱꦺꦴ, ꦄꦫꦶꦪꦱꦴꦮꦏꦺꦴ ꦌꦮꦁ ꦱꦭ꦳ꦴꦪꦠꦤꦁ ꦥꦗꦴꦤꦴꦠꦶ, ꦌꦮꦁ ꦱꦭ꦳ꦴꦪꦠꦤꦱꦩꦸꦢꦪꦁ ꦥꦗꦴꦤꦴꦠꦶ, ꦌꦮꦁ ꦱꦭ꦳ꦴꦪꦠꦤꦤꦶꦫꦺꦴꦣꦁ ꦥꦗꦴꦤꦴꦠꦶ, ꦌꦮꦁ ꦱꦭ꦳ꦴꦪꦠꦤꦤꦶꦫꦺꦴꦣꦒꦴꦩꦶꦤꦶꦁ ꦥꦛꦶꦥꦢꦁ ꦥꦗꦴꦤꦴꦠꦶ, ꦱꦺꦴ ꦱꦧ꧀ꦧꦱꦺꦴ ꦫꦴꦒꦴꦤꦸꦱꦪꦁ ꦥꦲꦴꦪ…ꦥꦺ… ꦢꦸꦏ꧀ꦑꦱ꧀ꦱꦤ꧀ꦠꦏꦫꦺꦴ ꦲꦺꦴꦠꦶ – ꦌꦠ꧀ꦠꦴꦮꦠꦴꦥꦶ ꦑꦺꦴ, ꦄꦴꦮꦸꦱꦺꦴ, ꦄꦫꦶꦪꦱꦴꦮꦏꦺꦴ ꦱꦩ꧀ꦩꦴꦢꦶꦛ꧀ꦜꦶ ꦲꦺꦴꦠꦶ, ꦈꦗꦸꦒꦠꦴꦱ꧀ꦱ ꦢꦶꦛ꧀ꦜꦶ, ꦣꦩ꧀ꦩꦺ ꦄꦮꦺꦕ꧀ꦕꦥ꧀ꦥꦱꦴꦢꦺꦤ ꦱꦩꦤ꧀ꦤꦴꦒꦠꦺꦴ, ꦄꦴꦒꦠꦺꦴ ꦆꦩꦁ ꦱꦢ꧀ꦣꦩ꧀ꦩ’’ꦤ꧀ꦠꦶ.

꧑꧐꧐. ‘‘ꦱꦴꦣꦴꦮꦸꦱꦺꦴ’’ꦠꦶ ꦑꦺꦴ…ꦥꦺ… ꦄꦥꦸꦕ꧀ꦖꦸꦁ – ꦱꦶꦪꦴ ꦥꦤꦴꦮꦸꦱꦺꦴ…ꦥꦺ… ‘‘ꦱꦶꦪꦴ, ꦄꦴꦮꦸꦱꦺꦴ. ꦪꦠꦺꦴ ꦑꦺꦴ, ꦄꦴꦮꦸꦱꦺꦴ, ꦄꦫꦶꦪꦱꦴꦮꦏꦺꦴ ꦤꦴꦩꦫꦹꦥꦚ꧀ꦕ ꦥꦗꦴꦤꦴꦠꦶ, ꦤꦴꦩꦫꦹꦥꦱꦩꦸꦢꦪꦚ꧀ꦕ ꦥꦗꦴꦤꦴꦠꦶ, ꦤꦴꦩꦫꦹꦥꦤꦶꦫꦺꦴꦣꦚ꧀ꦕ ꦥꦗꦴꦤꦴꦠꦶ, ꦤꦴꦩꦫꦹꦥꦤꦶꦫꦺꦴꦣꦒꦴꦩꦶꦤꦶꦁ ꦥꦛꦶꦥꦢꦚ꧀ꦕ ꦥꦗꦴꦤꦴꦠꦶ – ꦌꦠ꧀ꦠꦴꦮꦠꦴꦥꦶ ꦑꦺꦴ, ꦄꦴꦮꦸꦱꦺꦴ, ꦄꦫꦶꦪꦱꦴꦮꦏꦺꦴ ꦱꦩ꧀ꦩꦴꦢꦶꦛ꧀ꦜꦶ ꦲꦺꦴꦠꦶ, ꦈꦗꦸꦒꦠꦴꦱ꧀ꦱ ꦢꦶꦛ꧀ꦜꦶ, ꦣꦩ꧀ꦩꦺ ꦄꦮꦺꦕ꧀ꦕꦥ꧀ꦥꦱꦴꦢꦺꦤ ꦱꦩꦤ꧀ꦤꦴꦒꦠꦺꦴ, ꦄꦴꦒꦠꦺꦴ ꦆꦩꦁ ꦱꦢ꧀ꦣꦩ꧀ꦩꦁ. ꦏꦠꦩꦁ ꦥꦤꦴꦮꦸꦱꦺꦴ, ꦤꦴꦩꦫꦹꦥꦁ, ꦏꦠꦩꦺꦴ ꦤꦴꦩꦫꦹꦥꦱꦩꦸꦢꦪꦺꦴ, ꦏꦠꦩꦺꦴ ꦤꦴꦩꦫꦹꦥꦤꦶꦫꦺꦴꦣꦺꦴ, ꦏꦠꦩꦴ ꦤꦴꦩꦫꦹꦥꦤꦶꦫꦺꦴꦣꦒꦴꦩꦶꦤꦷ ꦥꦛꦶꦥꦢꦴ? ꦮꦺꦢꦤꦴ, ꦱꦚ꧀ꦚꦴ, ꦕꦺꦠꦤꦴ, ꦦꦱ꧀ꦱꦺꦴ, ꦩꦤꦱꦶꦏꦴꦫꦺꦴ – ꦆꦢꦁ ꦮꦸꦕ꧀ꦕꦠꦴꦮꦸꦱꦺꦴ, ꦤꦴꦩꦁ; ꦕꦠ꧀ꦠꦴꦫꦶ ꦕ ꦩꦲꦴꦨꦹꦠꦴꦤꦶ, ꦕꦠꦸꦤ꧀ꦤꦚ꧀ꦕ ꦩꦲꦴꦨꦹꦠꦴꦤꦁ ꦈꦥꦴꦢꦴꦪꦫꦹꦥꦁ – ꦆꦢꦁ ꦮꦸꦕ꧀ꦕꦠꦴꦮꦸꦱꦺꦴ, ꦫꦹꦥꦁ. ꦆꦠꦶ ꦆꦢꦚ꧀ꦕ ꦤꦴꦩꦁ ꦆꦢꦚ꧀ꦕ ꦫꦹꦥꦁ – ꦆꦢꦁ ꦮꦸꦕ꧀ꦕꦠꦴꦮꦸꦱꦺꦴ, ꦤꦴꦩꦫꦹꦥꦁ. ꦮꦶꦚ꧀ꦚꦴꦟꦱꦩꦸꦢꦪꦴ ꦤꦴꦩꦫꦹꦥꦱꦩꦸꦢꦪꦺꦴ, ꦮꦶꦚ꧀ꦚꦴꦟꦤꦶꦫꦺꦴꦣꦴ ꦤꦴꦩꦫꦹꦥꦤꦶꦫꦺꦴꦣꦺꦴ, ꦄꦪꦩꦺꦮ ꦄꦫꦶꦪꦺꦴ ꦄꦛ꧀ꦜꦔ꧀ꦒꦶꦏꦺꦴ ꦩꦒ꧀ꦒꦺꦴ ꦤꦴꦩꦫꦹꦥꦤꦶꦫꦺꦴꦣꦒꦴꦩꦶꦤꦷ ꦥꦛꦶꦥꦢꦴ, ꦱꦺꦪ꧀ꦪꦡꦶꦢꦁ – ꦱꦩ꧀ꦩꦴꦢꦶꦛ꧀ꦜꦶ…ꦥꦺ… ꦱꦩ꧀ꦩꦴꦱꦩꦴꦣꦶ.

‘‘ꦪꦠꦺꦴ ꦑꦺꦴ, ꦄꦴꦮꦸꦱꦺꦴ, ꦄꦫꦶꦪꦱꦴꦮꦏꦺꦴ ꦌꦮꦁ ꦤꦴꦩꦫꦹꦥꦁ ꦥꦗꦴꦤꦴꦠꦶ, ꦌꦮꦁ ꦤꦴꦩꦫꦹꦥꦱꦩꦸꦢꦪꦁ ꦥꦗꦴꦤꦴꦠꦶ, ꦌꦮꦁ ꦤꦴꦩꦫꦹꦥꦤꦶꦫꦺꦴꦣꦁ ꦥꦗꦴꦤꦴꦠꦶ, ꦌꦮꦁ ꦤꦴꦩꦫꦹꦥꦤꦶꦫꦺꦴꦣꦒꦴꦩꦶꦤꦶꦁ ꦥꦛꦶꦥꦢꦁ ꦥꦗꦴꦤꦴꦠꦶ, ꦱꦺꦴ ꦱꦧ꧀ꦧꦱꦺꦴ ꦫꦴꦒꦴꦤꦸꦱꦪꦁ ꦥꦲꦴꦪ…ꦥꦺ… ꦢꦸꦏ꧀ꦑꦱ꧀ꦱꦤ꧀ꦠꦏꦫꦺꦴ ꦲꦺꦴꦠꦶ – ꦌꦠ꧀ꦠꦴꦮꦠꦴꦥꦶ ꦑꦺꦴ, ꦄꦴꦮꦸꦱꦺꦴ, ꦄꦫꦶꦪꦱꦴꦮꦏꦺꦴ ꦱꦩ꧀ꦩꦴꦢꦶꦛ꧀ꦜꦶ ꦲꦺꦴꦠꦶ, ꦈꦗꦸꦒꦠꦴꦱ꧀ꦱ ꦢꦶꦛ꧀ꦜꦶ, ꦣꦩ꧀ꦩꦺ ꦄꦮꦺꦕ꧀ꦕꦥ꧀ꦥꦱꦴꦢꦺꦤ ꦱꦩꦤ꧀ꦤꦴꦒꦠꦺꦴ, ꦄꦴꦒꦠꦺꦴ ꦆꦩꦁ ꦱꦢ꧀ꦣꦩ꧀ꦩ’’ꦤ꧀ꦠꦶ.

꧑꧐꧑. ‘‘ꦱꦴꦣꦴꦮꦸꦱꦺꦴ’’ꦠꦶ ꦑꦺꦴ…ꦥꦺ… ꦄꦥꦸꦕ꧀ꦖꦸꦁ – ꦱꦶꦪꦴ ꦥꦤꦴꦮꦸꦱꦺꦴ…ꦥꦺ… ‘‘ꦱꦶꦪꦴ, ꦄꦴꦮꦸꦱꦺꦴ. ꦪꦠꦺꦴ ꦑꦺꦴ, ꦄꦴꦮꦸꦱꦺꦴ, ꦄꦫꦶꦪꦱꦴꦮꦏꦺꦴ ꦮꦶꦚ꧀ꦚꦴꦟꦚ꧀ꦕ ꦥꦗꦴꦤꦴꦠꦶ, ꦮꦶꦚ꧀ꦚꦴꦟꦱꦩꦸꦢꦪꦚ꧀ꦕ ꦥꦗꦴꦤꦴꦠꦶ, ꦮꦶꦚ꧀ꦚꦴꦟꦤꦶꦫꦺꦴꦣꦚ꧀ꦕ ꦥꦗꦴꦤꦴꦠꦶ, ꦮꦶꦚ꧀ꦚꦴꦟꦤꦶꦫꦺꦴꦣꦒꦴꦩꦶꦤꦶꦁ ꦥꦛꦶꦥꦢꦚ꧀ꦕ ꦥꦗꦴꦤꦴꦠꦶ – ꦌꦠ꧀ꦠꦴꦮꦠꦴꦥꦶ ꦑꦺꦴ, ꦄꦴꦮꦸꦱꦺꦴ, ꦄꦫꦶꦪꦱꦴꦮꦏꦺꦴ ꦱꦩ꧀ꦩꦴꦢꦶꦛ꧀ꦜꦶ ꦲꦺꦴꦠꦶ, ꦈꦗꦸꦒꦠꦴꦱ꧀ꦱ ꦢꦶꦛ꧀ꦜꦶ, ꦣꦩ꧀ꦩꦺ ꦄꦮꦺꦕ꧀ꦕꦥ꧀ꦥꦱꦴꦢꦺꦤ ꦱꦩꦤ꧀ꦤꦴꦒꦠꦺꦴ, ꦄꦴꦒꦠꦺꦴ ꦆꦩꦁ ꦱꦢ꧀ꦣꦩ꧀ꦩꦁ. ꦏꦠꦩꦁ ꦥꦤꦴꦮꦸꦱꦺꦴ, ꦮꦶꦚ꧀ꦚꦴꦟꦁ, ꦏꦠꦩꦺꦴ ꦮꦶꦚ꧀ꦚꦴꦟꦱꦩꦸꦢꦪꦺꦴ, ꦏꦠꦩꦺꦴ ꦮꦶꦚ꧀ꦚꦴꦟꦤꦶꦫꦺꦴꦣꦺꦴ, ꦏꦠꦩꦴ ꦮꦶꦚ꧀ꦚꦴꦟꦤꦶꦫꦺꦴꦣꦒꦴꦩꦶꦤꦷ ꦥꦛꦶꦥꦢꦴ? ꦖꦪꦶꦩꦺ, ꦄꦴꦮꦸꦱꦺꦴ, ꦮꦶꦚ꧀ꦚꦴꦟꦏꦴꦪꦴ – ꦕꦏ꧀ꦑꦸꦮꦶꦚ꧀ꦚꦴꦟꦁ, ꦱꦺꦴꦠꦮꦶꦚ꧀ꦚꦴꦟꦁ, ꦓꦴꦤꦮꦶꦚ꧀ꦚꦴꦟꦁ, ꦗꦶꦮ꧀ꦲꦴꦮꦶꦚ꧀ꦚꦴꦟꦁ, ꦏꦴꦪꦮꦶꦚ꧀ꦚꦴꦟꦁ, ꦩꦤꦺꦴꦮꦶꦚ꧀ꦚꦴꦟꦁ. ꦱꦔ꧀ꦑꦴꦫꦱꦩꦸꦢꦪꦴ ꦮꦶꦚ꧀ꦚꦴꦟꦱꦩꦸꦢꦪꦺꦴ, ꦱꦔ꧀ꦑꦴꦫꦤꦶꦫꦺꦴꦣꦴ ꦮꦶꦚ꧀ꦚꦴꦟꦤꦶꦫꦺꦴꦣꦺꦴ, ꦄꦪꦩꦺꦮ ꦄꦫꦶꦪꦺꦴ ꦄꦛ꧀ꦜꦔ꧀ꦒꦶꦏꦺꦴ ꦩꦒ꧀ꦒꦺꦴ ꦮꦶꦚ꧀ꦚꦴꦟꦤꦶꦫꦺꦴꦣꦒꦴꦩꦶꦤꦷ ꦥꦛꦶꦥꦢꦴ, ꦱꦺꦪ꧀ꦪꦡꦶꦢꦁ – ꦱꦩ꧀ꦩꦴꦢꦶꦛ꧀ꦜꦶ…ꦥꦺ… ꦱꦩ꧀ꦩꦴꦱꦩꦴꦣꦶ.

‘‘ꦪꦠꦺꦴ ꦑꦺꦴ, ꦄꦴꦮꦸꦱꦺꦴ, ꦄꦫꦶꦪꦱꦴꦮꦏꦺꦴ ꦌꦮꦁ ꦮꦶꦚ꧀ꦚꦴꦟꦁ ꦥꦗꦴꦤꦴꦠꦶ, ꦌꦮꦁ ꦮꦶꦚ꧀ꦚꦴꦟꦱꦩꦸꦢꦪꦁ ꦥꦗꦴꦤꦴꦠꦶ, ꦌꦮꦁ ꦮꦶꦚ꧀ꦚꦴꦟꦤꦶꦫꦺꦴꦣꦁ ꦥꦗꦴꦤꦴꦠꦶ, ꦌꦮꦁ ꦮꦶꦚ꧀ꦚꦴꦟꦤꦶꦫꦺꦴꦣꦒꦴꦩꦶꦤꦶꦁ ꦥꦛꦶꦥꦢꦁ ꦥꦗꦴꦤꦴꦠꦶ, ꦱꦺꦴ ꦱꦧ꧀ꦧꦱꦺꦴ ꦫꦴꦒꦴꦤꦸꦱꦪꦁ ꦥꦲꦴꦪ…ꦥꦺ… ꦢꦸꦏ꧀ꦑꦱ꧀ꦱꦤ꧀ꦠꦏꦫꦺꦴ ꦲꦺꦴꦠꦶ – ꦌꦠ꧀ꦠꦴꦮꦠꦴꦥꦶ ꦑꦺꦴ, ꦄꦴꦮꦸꦱꦺꦴ, ꦄꦫꦶꦪꦱꦴꦮꦏꦺꦴ ꦱꦩ꧀ꦩꦴꦢꦶꦛ꧀ꦜꦶ ꦲꦺꦴꦠꦶ, ꦈꦗꦸꦒꦠꦴꦱ꧀ꦱ ꦢꦶꦛ꧀ꦜꦶ, ꦣꦩ꧀ꦩꦺ ꦄꦮꦺꦕ꧀ꦕꦥ꧀ꦥꦱꦴꦢꦺꦤ ꦱꦩꦤ꧀ꦤꦴꦒꦠꦺꦴ, ꦄꦴꦒꦠꦺꦴ ꦆꦩꦁ ꦱꦢ꧀ꦣꦩ꧀ꦩ’’ꦤ꧀ꦠꦶ.

꧑꧐꧒. ‘‘ꦱꦴꦣꦴꦮꦸꦱꦺꦴ’’ꦠꦶ ꦑꦺꦴ…ꦥꦺ… ꦄꦥꦸꦕ꧀ꦖꦸꦁ – ꦱꦶꦪꦴ ꦥꦤꦴꦮꦸꦱꦺꦴ…ꦥꦺ… ‘‘ꦱꦶꦪꦴ, ꦄꦴꦮꦸꦱꦺꦴ. ꦪꦠꦺꦴ ꦑꦺꦴ, ꦄꦴꦮꦸꦱꦺꦴ, ꦄꦫꦶꦪꦱꦴꦮꦏꦺꦴ ꦱꦔ꧀ꦑꦴꦫꦺ ꦕ ꦥꦗꦴꦤꦴꦠꦶ, ꦱꦔ꧀ꦑꦴꦫꦱꦩꦸꦢꦪꦚ꧀ꦕ ꦥꦗꦴꦤꦴꦠꦶ, ꦱꦔ꧀ꦑꦴꦫꦤꦶꦫꦺꦴꦣꦚ꧀ꦕ ꦥꦗꦴꦤꦴꦠꦶ, ꦱꦔ꧀ꦑꦴꦫꦤꦶꦫꦺꦴꦣꦒꦴꦩꦶꦤꦶꦁ ꦥꦛꦶꦥꦢꦚ꧀ꦕ ꦥꦗꦴꦤꦴꦠꦶ – ꦌꦠ꧀ꦠꦴꦮꦠꦴꦥꦶ ꦑꦺꦴ, ꦄꦴꦮꦸꦱꦺꦴ, ꦄꦫꦶꦪꦱꦴꦮꦏꦺꦴ ꦱꦩ꧀ꦩꦴꦢꦶꦛ꧀ꦜꦶ ꦲꦺꦴꦠꦶ, ꦈꦗꦸꦒꦠꦴꦱ꧀ꦱ ꦢꦶꦛ꧀ꦜꦶ, ꦣꦩ꧀ꦩꦺ ꦄꦮꦺꦕ꧀ꦕꦥ꧀ꦥꦱꦴꦢꦺꦤ ꦱꦩꦤ꧀ꦤꦴꦒꦠꦺꦴ, ꦄꦴꦒꦠꦺꦴ ꦆꦩꦁ ꦱꦢ꧀ꦣꦩ꧀ꦩꦁ. ꦏꦠꦩꦺ ꦥꦤꦴꦮꦸꦱꦺꦴ, ꦱꦔ꧀ꦑꦴꦫꦴ, ꦏꦠꦩꦺꦴ ꦱꦔ꧀ꦑꦴꦫꦱꦩꦸꦢꦪꦺꦴ, ꦏꦠꦩꦺꦴ ꦱꦔ꧀ꦑꦴꦫꦤꦶꦫꦺꦴꦣꦺꦴ, ꦏꦠꦩꦴ ꦱꦔ꧀ꦑꦴꦫꦤꦶꦫꦺꦴꦣꦒꦴꦩꦶꦤꦷ ꦥꦛꦶꦥꦢꦴ? ꦠꦪꦺꦴꦩꦺ, ꦄꦴꦮꦸꦱꦺꦴ, ꦱꦔ꧀ꦑꦴꦫꦴ – ꦏꦴꦪꦱꦔ꧀ꦑꦴꦫꦺꦴ, ꦮꦕꦷꦱꦔ꧀ꦑꦴꦫꦺꦴ, ꦕꦶꦠ꧀ꦠꦱꦔ꧀ꦑꦴꦫꦺꦴ. ꦄꦮꦶꦗ꧀ꦗꦴꦱꦩꦸꦢꦪꦴ ꦱꦔ꧀ꦑꦴꦫꦱꦩꦸꦢꦪꦺꦴ, ꦄꦮꦶꦗ꧀ꦗꦴꦤꦶꦫꦺꦴꦣꦴ ꦱꦔ꧀ꦑꦴꦫꦤꦶꦫꦺꦴꦣꦺꦴ, ꦄꦪꦩꦺꦮ ꦄꦫꦶꦪꦺꦴ ꦄꦛ꧀ꦜꦔ꧀ꦒꦶꦏꦺꦴ ꦩꦒ꧀ꦒꦺꦴ ꦱꦔ꧀ꦑꦴꦫꦤꦶꦫꦺꦴꦣꦒꦴꦩꦶꦤꦷ ꦥꦛꦶꦥꦢꦴ, ꦱꦺꦪ꧀ꦪꦡꦶꦢꦁ – ꦱꦩ꧀ꦩꦴꦢꦶꦛ꧀ꦜꦶ…ꦥꦺ… ꦱꦩ꧀ꦩꦴꦱꦩꦴꦣꦶ.

‘‘ꦪꦠꦺꦴ ꦑꦺꦴ, ꦄꦴꦮꦸꦱꦺꦴ, ꦄꦫꦶꦪꦱꦴꦮꦏꦺꦴ ꦌꦮꦁ ꦱꦔ꧀ꦑꦴꦫꦺ ꦥꦗꦴꦤꦴꦠꦶ, ꦌꦮꦁ ꦱꦔ꧀ꦑꦴꦫꦱꦩꦸꦢꦪꦁ ꦥꦗꦴꦤꦴꦠꦶ, ꦌꦮꦁ ꦱꦔ꧀ꦑꦴꦫꦤꦶꦫꦺꦴꦣꦁ ꦥꦗꦴꦤꦴꦠꦶ, ꦌꦮꦁ ꦱꦔ꧀ꦑꦴꦫꦤꦶꦫꦺꦴꦣꦒꦴꦩꦶꦤꦶꦁ ꦥꦛꦶꦥꦢꦁ ꦥꦗꦴꦤꦴꦠꦶ, ꦱꦺꦴ ꦱꦧ꧀ꦧꦱꦺꦴ ꦫꦴꦒꦴꦤꦸꦱꦪꦁ ꦥꦲꦴꦪ, ꦥꦛꦶꦓꦴꦤꦸꦱꦪꦁ ꦥꦛꦶꦮꦶꦤꦺꦴꦢꦺꦠ꧀ꦮꦴ, ‘ꦄꦱ꧀ꦩꦷ’ꦠꦶ ꦢꦶꦛ꧀ꦜꦶꦩꦴꦤꦴꦤꦸꦱꦪꦁ ꦱꦩꦹꦲꦤꦶꦠ꧀ꦮꦴ, ꦄꦮꦶꦗ꧀ꦗꦁ ꦥꦲꦴꦪ ꦮꦶꦗ꧀ꦗꦁ ꦈꦥ꧀ꦥꦴꦢꦺꦠ꧀ꦮꦴ, ꦢꦶꦛ꧀ꦜꦺꦮ ꦣꦩ꧀ꦩꦺ ꦢꦸꦏ꧀ꦑꦱ꧀ꦱꦤ꧀ꦠꦏꦫꦺꦴ ꦲꦺꦴꦠꦶ – ꦌꦠ꧀ꦠꦴꦮꦠꦴꦥꦶ ꦑꦺꦴ, ꦄꦴꦮꦸꦱꦺꦴ, ꦄꦫꦶꦪꦱꦴꦮꦏꦺꦴ ꦱꦩ꧀ꦩꦴꦢꦶꦛ꧀ꦜꦶ ꦲꦺꦴꦠꦶ, ꦈꦗꦸꦒꦠꦴꦱ꧀ꦱ ꦢꦶꦛ꧀ꦜꦶ, ꦣꦩ꧀ꦩꦺ ꦄꦮꦺꦕ꧀ꦕꦥ꧀ꦥꦱꦴꦢꦺꦤ ꦱꦩꦤ꧀ꦤꦴꦒꦠꦺꦴ, ꦄꦴꦒꦠꦺꦴ ꦆꦩꦁ ꦱꦢ꧀ꦣꦩ꧀ꦩ’’ꦤ꧀ꦠꦶ.

꧑꧐꧓. ‘‘ꦱꦴꦣꦴꦮꦸꦱꦺꦴ’’ꦠꦶ ꦑꦺꦴ…ꦥꦺ… ꦄꦥꦸꦕ꧀ꦖꦸꦁ – ꦱꦶꦪꦴ ꦥꦤꦴꦮꦸꦱꦺꦴ…ꦥꦺ… ‘‘ꦱꦶꦪꦴ, ꦄꦴꦮꦸꦱꦺꦴ. ꦪꦠꦺꦴ ꦑꦺꦴ, ꦄꦴꦮꦸꦱꦺꦴ, ꦄꦫꦶꦪꦱꦴꦮꦏꦺꦴ ꦄꦮꦶꦗ꧀ꦗꦚ꧀ꦕ ꦥꦗꦴꦤꦴꦠꦶ, ꦄꦮꦶꦗ꧀ꦗꦴꦱꦩꦸꦢꦪꦚ꧀ꦕ ꦥꦗꦴꦤꦴꦠꦶ, ꦄꦮꦶꦗ꧀ꦗꦴꦤꦶꦫꦺꦴꦣꦚ꧀ꦕ ꦥꦗꦴꦤꦴꦠꦶ, ꦄꦮꦶꦗ꧀ꦗꦴꦤꦶꦫꦺꦴꦣꦒꦴꦩꦶꦤꦶꦁ ꦥꦛꦶꦥꦢꦚ꧀ꦕ ꦥꦗꦴꦤꦴꦠꦶ – ꦌꦠ꧀ꦠꦴꦮꦠꦴꦥꦶ ꦑꦺꦴ, ꦄꦴꦮꦸꦱꦺꦴ, ꦄꦫꦶꦪꦱꦴꦮꦏꦺꦴ ꦱꦩ꧀ꦩꦴꦢꦶꦛ꧀ꦜꦶ ꦲꦺꦴꦠꦶ, ꦈꦗꦸꦒꦠꦴꦱ꧀ꦱ ꦢꦶꦛ꧀ꦜꦶ, ꦣꦩ꧀ꦩꦺ ꦄꦮꦺꦕ꧀ꦕꦥ꧀ꦥꦱꦴꦢꦺꦤ ꦱꦩꦤ꧀ꦤꦴꦒꦠꦺꦴ, ꦄꦴꦒꦠꦺꦴ ꦆꦩꦁ ꦱꦢ꧀ꦣꦩ꧀ꦩꦁ. ꦏꦠꦩꦴ ꦥꦤꦴꦮꦸꦱꦺꦴ, ꦄꦮꦶꦗ꧀ꦗꦴ, ꦏꦠꦩꦺꦴ ꦄꦮꦶꦗ꧀ꦗꦴꦱꦩꦸꦢꦪꦺꦴ, ꦏꦠꦩꦺꦴ ꦄꦮꦶꦗ꧀ꦗꦴꦤꦶꦫꦺꦴꦣꦺꦴ, ꦏꦠꦩꦴ ꦄꦮꦶꦗ꧀ꦗꦴꦤꦶꦫꦺꦴꦣꦒꦴꦩꦶꦤꦷ ꦥꦛꦶꦥꦢꦴ? ꦪꦁ ꦑꦺꦴ, ꦄꦴꦮꦸꦱꦺꦴ, ꦢꦸꦏ꧀ꦑꦺ ꦄꦚ꧀ꦚꦴꦟꦁ, ꦢꦸꦏ꧀ꦑꦱꦩꦸꦢꦪꦺ ꦄꦚ꧀ꦚꦴꦟꦁ, ꦢꦸꦏ꧀ꦑꦤꦶꦫꦺꦴꦣꦺ ꦄꦚ꧀ꦚꦴꦟꦁ, ꦢꦸꦏ꧀ꦑꦤꦶꦫꦺꦴꦣꦒꦴꦩꦶꦤꦶꦪꦴ ꦥꦛꦶꦥꦢꦴꦪ ꦄꦚ꧀ꦚꦴꦟꦁ – ꦄꦪꦁ ꦮꦸꦕ꧀ꦕꦠꦴꦮꦸꦱꦺꦴ, ꦄꦮꦶꦗ꧀ꦗꦴ. ꦄꦴꦱꦮꦱꦩꦸꦢꦪꦴ ꦄꦮꦶꦗ꧀ꦗꦴꦱꦩꦸꦢꦪꦺꦴ, ꦄꦴꦱꦮꦤꦶꦫꦺꦴꦣꦴ ꦄꦮꦶꦗ꧀ꦗꦴꦤꦶꦫꦺꦴꦣꦺꦴ, ꦄꦪꦩꦺꦮ ꦄꦫꦶꦪꦺꦴ ꦄꦛ꧀ꦜꦔ꧀ꦒꦶꦏꦺꦴ ꦩꦒ꧀ꦒꦺꦴ ꦄꦮꦶꦗ꧀ꦗꦴꦤꦶꦫꦺꦴꦣꦒꦴꦩꦶꦤꦷ ꦥꦛꦶꦥꦢꦴ, ꦱꦺꦪ꧀ꦪꦡꦶꦢꦁ – ꦱꦩ꧀ꦩꦴꦢꦶꦛ꧀ꦜꦶ…ꦥꦺ… ꦱꦩ꧀ꦩꦴꦱꦩꦴꦣꦶ.

‘‘ꦪꦠꦺꦴ ꦑꦺꦴ, ꦄꦴꦮꦸꦱꦺꦴ, ꦄꦫꦶꦪꦱꦴꦮꦏꦺꦴ ꦌꦮꦁ ꦄꦮꦶꦗ꧀ꦗꦁ ꦥꦗꦴꦤꦴꦠꦶ, ꦌꦮꦁ ꦄꦮꦶꦗ꧀ꦗꦴꦱꦩꦸꦢꦪꦁ ꦥꦗꦴꦤꦴꦠꦶ, ꦌꦮꦁ ꦄꦮꦶꦗ꧀ꦗꦴꦤꦶꦫꦺꦴꦣꦁ ꦥꦗꦴꦤꦴꦠꦶ, ꦌꦮꦁ ꦄꦮꦶꦗ꧀ꦗꦴꦤꦶꦫꦺꦴꦣꦒꦴꦩꦶꦤꦶꦁ ꦥꦛꦶꦥꦢꦁ ꦥꦗꦴꦤꦴꦠꦶ, ꦱꦺꦴ ꦱꦧ꧀ꦧꦱꦺꦴ ꦫꦴꦒꦴꦤꦸꦱꦪꦁ ꦥꦲꦴꦪ, ꦥꦛꦶꦓꦴꦤꦸꦱꦪꦁ ꦥꦛꦶꦮꦶꦤꦺꦴꦢꦺꦠ꧀ꦮꦴ, ‘ꦄꦱ꧀ꦩꦷ’ꦠꦶ ꦢꦶꦛ꧀ꦜꦶꦩꦴꦤꦴꦤꦸꦱꦪꦁ ꦱꦩꦹꦲꦤꦶꦠ꧀ꦮꦴ, ꦄꦮꦶꦗ꧀ꦗꦁ ꦥꦲꦴꦪ ꦮꦶꦗ꧀ꦗꦁ ꦈꦥ꧀ꦥꦴꦢꦺꦠ꧀ꦮꦴ, ꦢꦶꦛ꧀ꦜꦺꦮ ꦣꦩ꧀ꦩꦺ ꦢꦸꦏ꧀ꦑꦱ꧀ꦱꦤ꧀ꦠꦏꦫꦺꦴ ꦲꦺꦴꦠꦶ – ꦌꦠ꧀ꦠꦴꦮꦠꦴꦥꦶ ꦑꦺꦴ, ꦄꦴꦮꦸꦱꦺꦴ, ꦄꦫꦶꦪꦱꦴꦮꦏꦺꦴ ꦱꦩ꧀ꦩꦴꦢꦶꦛ꧀ꦜꦶ ꦲꦺꦴꦠꦶ, ꦈꦗꦸꦒꦠꦴꦱ꧀ꦱ ꦢꦶꦛ꧀ꦜꦶ, ꦣꦩ꧀ꦩꦺ ꦄꦮꦺꦕ꧀ꦕꦥ꧀ꦥꦱꦴꦢꦺꦤ ꦱꦩꦤ꧀ꦤꦴꦒꦠꦺꦴ, ꦄꦴꦒꦠꦺꦴ ꦆꦩꦁ ꦱꦢ꧀ꦣꦩ꧀ꦩ’’ꦤ꧀ꦠꦶ.

꧑꧐꧔. ‘‘ꦱꦴꦣꦴꦮꦸꦱꦺꦴ’’ꦠꦶ ꦑꦺꦴ ꦠꦺ ꦨꦶꦏ꧀ꦑꦹ ꦄꦴꦪꦱ꧀ꦩꦠꦺꦴ ꦱꦴꦫꦶꦥꦸꦠ꧀ꦠꦱ꧀ꦱ ꦨꦴꦱꦶꦠꦁ ꦄꦨꦶꦤꦤ꧀ꦢꦶꦠ꧀ꦮꦴ ꦄꦤꦸꦩꦺꦴꦢꦶꦠ꧀ꦮꦴ ꦄꦴꦪꦱ꧀ꦩꦤ꧀ꦠꦁ ꦱꦴꦫꦶꦥꦸꦠ꧀ꦠꦁ ꦈꦠ꧀ꦠꦫꦶ ꦥꦚ꧀ꦲꦁ ꦄꦥꦸꦕ꧀ꦖꦸꦁ – ‘‘ꦱꦶꦪꦴ ꦥꦤꦴꦮꦸꦱꦺꦴ, ꦄꦚ꧀ꦚꦺꦴꦥꦶ ꦥꦫꦶꦪꦴꦪꦺꦴ ꦪꦡꦴ ꦄꦫꦶꦪꦱꦴꦮꦏꦺꦴ ꦱꦩ꧀ꦩꦴꦢꦶꦛ꧀ꦜꦶ ꦲꦺꦴꦠꦶ, ꦈꦗꦸꦒꦠꦴꦱ꧀ꦱ ꦢꦶꦛ꧀ꦜꦶ, ꦣꦩ꧀ꦩꦺ ꦄꦮꦺꦕ꧀ꦕꦥ꧀ꦥꦱꦴꦢꦺꦤ ꦱꦩꦤ꧀ꦤꦴꦒꦠꦺꦴ, ꦄꦴꦒꦠꦺꦴ ꦆꦩꦁ ꦱꦢ꧀ꦣꦩ꧀ꦩ’’ꦤ꧀ꦠꦶ?

‘‘ꦱꦶꦪꦴ, ꦄꦴꦮꦸꦱꦺꦴ. ꦪꦠꦺꦴ ꦑꦺꦴ, ꦄꦴꦮꦸꦱꦺꦴ, ꦄꦫꦶꦪꦱꦴꦮꦏꦺꦴ ꦄꦴꦱꦮꦚ꧀ꦕ ꦥꦗꦴꦤꦴꦠꦶ, ꦄꦴꦱꦮꦱꦩꦸꦢꦪꦚ꧀ꦕ ꦥꦗꦴꦤꦴꦠꦶ, ꦄꦴꦱꦮꦤꦶꦫꦺꦴꦣꦚ꧀ꦕ ꦥꦗꦴꦤꦴꦠꦶ, ꦄꦴꦱꦮꦤꦶꦫꦺꦴꦣꦒꦴꦩꦶꦤꦶꦁ ꦥꦛꦶꦥꦢꦚ꧀ꦕ ꦥꦗꦴꦤꦴꦠꦶ – ꦌꦠ꧀ꦠꦴꦮꦠꦴꦥꦶ ꦑꦺꦴ, ꦄꦴꦮꦸꦱꦺꦴ, ꦄꦫꦶꦪꦱꦴꦮꦏꦺꦴ ꦱꦩ꧀ꦩꦴꦢꦶꦛ꧀ꦜꦶ ꦲꦺꦴꦠꦶ, ꦈꦗꦸꦒꦠꦴꦱ꧀ꦱ ꦢꦶꦛ꧀ꦜꦶ, ꦣꦩ꧀ꦩꦺ ꦄꦮꦺꦕ꧀ꦕꦥ꧀ꦥꦱꦴꦢꦺꦤ ꦱꦩꦤ꧀ꦤꦴꦒꦠꦺꦴ, ꦄꦴꦒꦠꦺꦴ ꦆꦩꦁ ꦱꦢ꧀ꦣꦩ꧀ꦩꦁ. ꦏꦠꦩꦺꦴ ꦥꦤꦴꦮꦸꦱꦺꦴ, ꦄꦴꦱꦮꦺꦴ, ꦏꦠꦩꦺꦴ ꦄꦴꦱꦮꦱꦩꦸꦢꦪꦺꦴ, ꦏꦠꦩꦺꦴ ꦄꦴꦱꦮꦤꦶꦫꦺꦴꦣꦺꦴ, ꦏꦠꦩꦴ ꦄꦴꦱꦮꦤꦶꦫꦺꦴꦣꦒꦴꦩꦶꦤꦷ ꦥꦛꦶꦥꦢꦴꦠꦶ? ꦠꦪꦺꦴꦩꦺ, ꦄꦴꦮꦸꦱꦺꦴ, ꦄꦴꦱꦮꦴ – ꦏꦴꦩꦴꦱꦮꦺꦴ, ꦨꦮꦴꦱꦮꦺꦴ, ꦄꦮꦶꦗ꧀ꦗꦴꦱꦮꦺꦴ. ꦄꦮꦶꦗ꧀ꦗꦴꦱꦩꦸꦢꦪꦴ ꦄꦴꦱꦮꦱꦩꦸꦢꦪꦺꦴ, ꦄꦮꦶꦗ꧀ꦗꦴꦤꦶꦫꦺꦴꦣꦴ ꦄꦴꦱꦮꦤꦶꦫꦺꦴꦣꦺꦴ, ꦄꦪꦩꦺꦮ ꦄꦫꦶꦪꦺꦴ ꦄꦛ꧀ꦜꦔ꧀ꦒꦶꦏꦺꦴ ꦩꦒ꧀ꦒꦺꦴ ꦄꦴꦱꦮꦤꦶꦫꦺꦴꦣꦒꦴꦩꦶꦤꦷ ꦥꦛꦶꦥꦢꦴ, ꦱꦺꦪ꧀ꦪꦡꦶꦢꦁ – ꦱꦩ꧀ꦩꦴꦢꦶꦛ꧀ꦜꦶ…ꦥꦺ… ꦱꦩ꧀ꦩꦴꦱꦩꦴꦣꦶ.

‘‘ꦪꦠꦺꦴ ꦑꦺꦴ, ꦄꦴꦮꦸꦱꦺꦴ, ꦄꦫꦶꦪꦱꦴꦮꦏꦺꦴ ꦌꦮꦁ ꦄꦴꦱꦮꦁ ꦥꦗꦴꦤꦴꦠꦶ, ꦌꦮꦁ ꦄꦴꦱꦮꦱꦩꦸꦢꦪꦁ ꦥꦗꦴꦤꦴꦠꦶ, ꦌꦮꦁ ꦄꦴꦱꦮꦤꦶꦫꦺꦴꦣꦁ ꦥꦗꦴꦤꦴꦠꦶ, ꦌꦮꦁ ꦄꦴꦱꦮꦤꦶꦫꦺꦴꦣꦒꦴꦩꦶꦤꦶꦁ ꦥꦛꦶꦥꦢꦁ ꦥꦗꦴꦤꦴꦠꦶ, ꦱꦺꦴ ꦱꦧ꧀ꦧꦱꦺꦴ ꦫꦴꦒꦴꦤꦸꦱꦪꦁ ꦥꦲꦴꦪ, ꦥꦛꦶꦓꦴꦤꦸꦱꦪꦁ ꦥꦛꦶꦮꦶꦤꦺꦴꦢꦺꦠ꧀ꦮꦴ, ‘ꦄꦱ꧀ꦩꦷ’ꦠꦶ ꦢꦶꦛ꧀ꦜꦶꦩꦴꦤꦴꦤꦸꦱꦪꦁ ꦱꦩꦹꦲꦤꦶꦠ꧀ꦮꦴ, ꦄꦮꦶꦗ꧀ꦗꦁ ꦥꦲꦴꦪ ꦮꦶꦗ꧀ꦗꦁ ꦈꦥ꧀ꦥꦴꦢꦺꦠ꧀ꦮꦴ, ꦢꦶꦛ꧀ꦜꦺꦮ ꦣꦩ꧀ꦩꦺ ꦢꦸꦏ꧀ꦑꦱ꧀ꦱꦤ꧀ꦠꦏꦫꦺꦴ ꦲꦺꦴꦠꦶ – ꦌꦠ꧀ꦠꦴꦮꦠꦴꦥꦶ ꦑꦺꦴ, ꦄꦴꦮꦸꦱꦺꦴ, ꦄꦫꦶꦪꦱꦴꦮꦏꦺꦴ ꦱꦩ꧀ꦩꦴꦢꦶꦛ꧀ꦜꦶ ꦲꦺꦴꦠꦶ, ꦈꦗꦸꦒꦠꦴꦱ꧀ꦱ ꦢꦶꦛ꧀ꦜꦶ, ꦣꦩ꧀ꦩꦺ ꦄꦮꦺꦕ꧀ꦕꦥ꧀ꦥꦱꦴꦢꦺꦤ ꦱꦩꦤ꧀ꦤꦴꦒꦠꦺꦴ, ꦄꦴꦒꦠꦺꦴ ꦆꦩꦁ ꦱꦢ꧀ꦣꦩ꧀ꦩ’’ꦤ꧀ꦠꦶ.

ꦆꦢꦩꦮꦺꦴꦕꦴꦪꦱ꧀ꦩꦴ ꦱꦴꦫꦶꦥꦸꦠ꧀ꦠꦺꦴ. ꦄꦠ꧀ꦠꦩꦤꦴ ꦠꦺ ꦨꦶꦏ꧀ꦑꦹ ꦄꦴꦪꦱ꧀ꦩꦠꦺꦴ ꦱꦴꦫꦶꦥꦸꦠ꧀ꦠꦱ꧀ꦱ ꦨꦴꦱꦶꦠꦁ ꦄꦨꦶꦤꦤ꧀ꦢꦸꦤ꧀ꦠꦶ.

ꦱꦩ꧀ꦩꦴꦢꦶꦛ꧀ꦜꦶꦱꦸꦠ꧀ꦠꦁ ꦤꦶꦛ꧀ꦜꦶꦠꦁ ꦤꦮꦩꦁ. [ꦆꦠꦺꦴ ꦥꦫꦁ ꦏꦺꦱꦸꦕꦶ ꦥꦺꦴꦠ꧀ꦡꦏꦺꦱꦸ ꦆꦩꦴꦥꦶ ꦒꦴꦡꦴꦪꦺꦴ§ꦌꦮꦁ ꦢꦶꦱ꧀ꦱꦤ꧀ꦠꦶ –§ꦢꦸꦏ꧀ꦑꦁ ꦗꦫꦴꦩꦫꦟꦁ ꦈꦥꦴꦢꦴꦤꦁ, ꦱꦭ꦳ꦴꦪꦠꦤꦁ ꦤꦴꦩꦫꦹꦥꦁ. ꦮꦶꦚ꧀ꦚꦴꦟꦁ ꦪꦴ ꦱꦴ ꦥꦫꦺ, ꦏꦠꦩꦴ ꦥꦤꦴꦮꦸꦱꦺꦴ ꦥꦢꦴꦤꦁ§ꦏꦶꦁ ꦗꦴꦠꦶ ꦠꦟ꧀ꦲꦴ ꦕ ꦮꦺꦢꦤꦴ, ꦄꦮꦶꦗ꧀ꦗꦴꦪ ꦕꦠꦸꦏ꧀ꦏꦤꦪꦺꦴ. ꦕꦠ꧀ꦠꦴꦫꦶ ꦥꦫꦺ ꦏꦠꦩꦴ, ꦥꦤꦴꦮꦸꦱꦺꦴ ꦥꦢꦴꦤꦁ ꦏꦺꦮꦭꦁ§ꦄꦴꦲꦴꦫꦺꦴ ꦕ ꦨꦮꦺꦴ ꦦꦱ꧀ꦱꦺꦴ, ꦱꦔ꧀ꦑꦴꦫꦺꦴ ꦄꦴꦱꦮꦥꦚ꧀ꦕꦩꦺꦴ. ꦪꦴꦮ ꦥꦚ꧀ꦕ ꦥꦫꦺ ꦏꦠꦩꦴ, ꦥꦤꦴꦮꦸꦱꦺꦴ ꦥꦢꦴꦤꦁ ꦏꦶꦁ§ꦏꦠꦩꦤ꧀ꦠꦶ ꦖꦧ꧀ꦧꦶꦣꦴ ꦮꦸꦠ꧀ꦠꦁ, ꦏꦠꦩꦴꦤꦶ ꦕꦠꦸꦧ꧀ꦧꦶꦣꦴꦤꦶ. ꦏꦠꦩꦺꦴ ꦥꦚ꧀ꦕꦮꦶꦣꦺꦴ ꦮꦸꦠ꧀ꦠꦺꦴ, ꦱꦧ꧀ꦧꦺꦱꦁ ꦌꦏꦱꦔ꧀ꦑꦴꦤꦁ ꦥꦚ꧀ꦕꦤꦪꦥꦢꦴꦤꦶ ꦕꦴꦠꦶ]