꧔. ꦨꦪꦨꦺꦫꦮꦱꦸꦠ꧀ꦠꦁ

꧓꧔. ꦌꦮꦁ ꦩꦺ ꦱꦸꦠꦁ – ꦌꦏꦁ ꦱꦩꦪꦁ ꦨꦒꦮꦴ ꦱꦴꦮꦠ꧀ꦡꦶꦪꦁ ꦮꦶꦲꦫꦠꦶ ꦗꦺꦠꦮꦤꦺ ꦄꦤꦴꦡꦥꦶꦟ꧀ꦝꦶꦏꦱ꧀ꦱ ꦄꦴꦫꦴꦩꦺ. ꦄꦡ ꦑꦺꦴ ꦗꦴꦟꦸꦱ꧀ꦱꦺꦴꦟꦶ ꦧ꧀ꦫꦴꦲ꧀ꦩꦟꦺꦴ ꦪꦺꦤ ꦨꦒꦮꦴ ꦠꦺꦤꦸꦥꦱꦔ꧀ꦏꦩꦶ; ꦈꦥꦱꦔ꧀ꦏꦩꦶꦠ꧀ꦮꦴ ꦨꦒꦮꦠꦴ ꦱꦢ꧀ꦣꦶꦁ ꦱꦩ꧀ꦩꦺꦴꦢꦶ. ꦱꦩ꧀ꦩꦺꦴꦢꦤꦷꦪꦁ ꦏꦡꦁ ꦱꦴꦫꦟꦷꦪꦁ [ꦱꦴꦫꦴꦟꦷꦪꦁ (ꦱꦷ. ꦱ꧀ꦪꦴ. ꦥꦷ.)] ꦮꦷꦠꦶꦱꦴꦫꦺꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦷꦢꦶ. ꦌꦏꦩꦤ꧀ꦠꦁ ꦤꦶꦱꦶꦤ꧀ꦤꦺꦴ ꦑꦺꦴ ꦗꦴꦟꦸꦱ꧀ꦱꦺꦴꦟꦶ ꦧ꧀ꦫꦴꦲ꧀ꦩꦟꦺꦴ ꦨꦒꦮꦤ꧀ꦠꦁ ꦌꦠꦢꦮꦺꦴꦕ – ‘‘ꦪꦺꦩꦺ, ꦨꦺꦴ ꦒꦺꦴꦠꦩ, ꦏꦸꦭꦥꦸꦠ꧀ꦠꦴ ꦨꦮꦤ꧀ꦠꦁ ꦒꦺꦴꦠꦩꦁ ꦈꦢ꧀ꦢꦶꦱ꧀ꦱ ꦱꦢ꧀ꦣꦴ ꦄꦒꦴꦫꦱ꧀ꦩꦴ ꦄꦤꦒꦴꦫꦶꦪꦁ ꦥꦧ꧀ꦧꦗꦶꦠꦴ, ꦨꦮꦁ ꦠꦺꦱꦁ ꦒꦺꦴꦠꦩꦺꦴ ꦥꦸꦧ꧀ꦧꦔ꧀ꦒꦩꦺꦴ, ꦨꦮꦁ ꦠꦺꦱꦁ ꦒꦺꦴꦠꦩꦺꦴ ꦧꦲꦸꦏꦴꦫꦺꦴ, ꦨꦮꦁ ꦠꦺꦱꦁ ꦒꦺꦴꦠꦩꦺꦴ ꦱꦩꦴꦢꦥꦺꦠꦴ [ꦱꦩꦴꦢꦴꦥꦺꦠꦴ (?)]; ꦨꦺꦴꦠꦺꦴ ꦕ ꦥꦤ ꦒꦺꦴꦠꦩꦱ꧀ꦱ ꦱꦴ ꦗꦤꦠꦴ ꦢꦶꦛ꧀ꦜꦴꦤꦸꦒꦠꦶꦁ ꦄꦴꦥꦗ꧀ꦗꦠꦷ’’ꦠꦶ. ‘‘ꦌꦮꦩꦺꦠꦁ, ꦧ꧀ꦫꦴꦲ꧀ꦩꦟ, ꦌꦮꦩꦺꦠꦁ, ꦧ꧀ꦫꦴꦲ꧀ꦩꦟ! ꦪꦺ ꦠꦺ, ꦧ꧀ꦫꦴꦲ꧀ꦩꦟ, ꦏꦸꦭꦥꦸꦠ꧀ꦠꦴ ꦩꦩꦁ ꦈꦢ꧀ꦢꦶꦱ꧀ꦱ ꦱꦢ꧀ꦣꦴ ꦄꦒꦴꦫꦱ꧀ꦩꦴ ꦄꦤꦒꦴꦫꦶꦪꦁ ꦥꦧ꧀ꦧꦗꦶꦠꦴ, ꦄꦲꦁ ꦠꦺꦱꦁ ꦥꦸꦧ꧀ꦧꦔ꧀ꦒꦩꦺꦴ, ꦄꦲꦁ ꦠꦺꦱꦁ ꦧꦲꦸꦏꦴꦫꦺꦴ, ꦄꦲꦁ ꦠꦺꦱꦁ ꦱꦩꦴꦢꦥꦺꦠꦴ; ꦩꦩ ꦕ ꦥꦤ ꦱꦴ ꦗꦤꦠꦴ ꦢꦶꦛ꧀ꦜꦴꦤꦸꦒꦠꦶꦁ ꦄꦴꦥꦗ꧀ꦗꦠꦷ’’ꦠꦶ. ‘‘ꦢꦸꦫꦨꦶꦱꦩ꧀ꦨꦮꦴꦤꦶ ꦲꦶ ꦑꦺꦴ, ꦨꦺꦴ ꦒꦺꦴꦠꦩ, ꦄꦫꦚ꧀ꦚꦮꦤꦥꦠ꧀ꦡꦴꦤꦶ ꦥꦤ꧀ꦠꦴꦤꦶ ꦱꦺꦤꦴꦱꦤꦴꦤꦶ, ꦢꦸꦏ꧀ꦏꦫꦁ ꦥꦮꦶꦮꦺꦏꦁ, ꦢꦸꦫꦨꦶꦫꦩꦁ ꦌꦏꦠ꧀ꦠꦺ, ꦲꦫꦤ꧀ꦠꦶ ꦩꦚ꧀ꦚꦺ ꦩꦤꦺꦴ ꦮꦤꦴꦤꦶ ꦱꦩꦴꦣꦶꦁ ꦄꦭꦨꦩꦴꦤꦱ꧀ꦱ ꦨꦶꦏ꧀ꦑꦸꦤꦺꦴ’’ꦠꦶ. ‘‘ꦌꦮꦩꦺꦠꦁ, ꦧ꧀ꦫꦴꦲ꧀ꦩꦟ, ꦌꦮꦩꦺꦠꦁ, ꦧ꧀ꦫꦴꦲ꧀ꦩꦟ! ꦢꦸꦫꦨꦶꦱꦩ꧀ꦨꦮꦴꦤꦶ ꦲꦶ ꦑꦺꦴ, ꦧ꧀ꦫꦴꦲ꧀ꦩꦟ, ꦄꦫꦚ꧀ꦚꦮꦤꦥꦠ꧀ꦡꦴꦤꦶ ꦥꦤ꧀ꦠꦴꦤꦶ ꦱꦺꦤꦴꦱꦤꦴꦤꦶ, ꦢꦸꦏ꧀ꦏꦫꦁ ꦥꦮꦶꦮꦺꦏꦁ, ꦢꦸꦫꦨꦶꦫꦩꦁ ꦌꦏꦠ꧀ꦠꦺ, ꦲꦫꦤ꧀ꦠꦶ ꦩꦚ꧀ꦚꦺ ꦩꦤꦺꦴ ꦮꦤꦴꦤꦶ ꦱꦩꦴꦣꦶꦁ ꦄꦭꦨꦩꦴꦤꦱ꧀ꦱ ꦨꦶꦏ꧀ꦑꦸꦤꦺꦴ’’ꦠꦶ.

꧓꧕. ‘‘ꦩꦪ꧀ꦲꦩ꧀ꦥꦶ ꦑꦺꦴ, ꦧ꧀ꦫꦴꦲ꧀ꦩꦟ, ꦥꦸꦧ꧀ꦧꦺꦮ ꦱꦩ꧀ꦧꦺꦴꦣꦴ ꦄꦤꦨꦶꦱꦩ꧀ꦧꦸꦢ꧀ꦣꦱ꧀ꦱ ꦧꦺꦴꦣꦶꦱꦠ꧀ꦠꦱ꧀ꦱꦺꦮ ꦱꦠꦺꦴ ꦌꦠꦢꦲꦺꦴꦱꦶ – ‘ꦢꦸꦫꦨꦶꦱꦩ꧀ꦨꦮꦴꦤꦶ ꦲꦶ ꦑꦺꦴ ꦄꦫꦚ꧀ꦚꦮꦤꦥꦠ꧀ꦡꦴꦤꦶ ꦥꦤ꧀ꦠꦴꦤꦶ ꦱꦺꦤꦴꦱꦤꦴꦤꦶ, ꦢꦸꦏ꧀ꦏꦫꦁ ꦥꦮꦶꦮꦺꦏꦁ, ꦢꦸꦫꦨꦶꦫꦩꦁ ꦌꦏꦠ꧀ꦠꦺ, ꦲꦫꦤ꧀ꦠꦶ ꦩꦚ꧀ꦚꦺ ꦩꦤꦺꦴ ꦮꦤꦴꦤꦶ ꦱꦩꦴꦣꦶꦁ ꦄꦭꦨꦩꦴꦤꦱ꧀ꦱ ꦨꦶꦏ꧀ꦑꦸꦤꦺꦴ’ꦠꦶ. ꦠꦱ꧀ꦱ ꦩꦪ꧀ꦲꦁ ꦧ꧀ꦫꦴꦲ꧀ꦩꦟ, ꦌꦠꦢꦲꦺꦴꦱꦶ – ‘ꦪꦺ ꦑꦺꦴ ꦏꦺꦕꦶ ꦱꦩꦟꦴ ꦮꦴ ꦧ꧀ꦫꦴꦲ꧀ꦩꦟꦴ ꦮꦴ ꦄꦥꦫꦶꦱꦸꦢ꧀ꦣꦏꦴꦪꦏꦩ꧀ꦩꦤ꧀ꦠꦴ ꦄꦫꦚ꧀ꦚꦮꦤꦥꦠ꧀ꦡꦴꦤꦶ ꦥꦤ꧀ꦠꦴꦤꦶ ꦱꦺꦤꦴꦱꦤꦴꦤꦶ ꦥꦛꦶꦱꦺꦮꦤ꧀ꦠꦶ, ꦄꦥꦫꦶꦱꦸꦢ꧀ꦣꦏꦴꦪꦏꦩ꧀ꦩꦤ꧀ꦠꦱꦤ꧀ꦢꦺꦴꦱꦲꦺꦠꦸ ꦲꦮꦺ ꦠꦺ ꦨꦺꦴꦤ꧀ꦠꦺꦴ ꦱꦩꦟꦧ꧀ꦫꦴꦲ꧀ꦩꦟꦴ ꦄꦏꦸꦱꦭꦁ ꦨꦪꦨꦺꦫꦮꦁ ꦄꦮ꧀ꦲꦴꦪꦤ꧀ꦠꦶ. ꦤ ꦑꦺꦴ ꦥꦤꦴꦲꦁ ꦄꦥꦫꦶꦱꦸꦢ꧀ꦣꦏꦴꦪꦏꦩ꧀ꦩꦤ꧀ꦠꦺꦴ ꦄꦫꦚ꧀ꦚꦮꦤꦥꦠ꧀ꦡꦴꦤꦶ ꦥꦤ꧀ꦠꦴꦤꦶ ꦱꦺꦤꦴꦱꦤꦴꦤꦶ ꦥꦛꦶꦱꦺꦮꦴꦩꦶ; ꦥꦫꦶꦱꦸꦢ꧀ꦣꦏꦴꦪꦏꦩ꧀ꦩꦤ꧀ꦠꦺꦴꦲꦩꦱ꧀ꦩꦶ. ꦪꦺ ꦲꦶ ꦮꦺꦴ ꦄꦫꦶꦪꦴ ꦥꦫꦶꦱꦸꦢ꧀ꦣꦏꦴꦪꦏꦩ꧀ꦩꦤ꧀ꦠꦴ ꦄꦫꦚ꧀ꦚꦮꦤꦥꦠ꧀ꦡꦴꦤꦶ ꦥꦤ꧀ꦠꦴꦤꦶ ꦱꦺꦤꦴꦱꦤꦴꦤꦶ ꦥꦛꦶꦱꦺꦮꦤ꧀ꦠꦶ ꦠꦺꦱꦩꦲꦁ ꦄꦚ꧀ꦚꦠꦫꦺꦴ’ꦠꦶ. ꦌꦠꦩꦲꦁ, ꦧ꧀ꦫꦴꦲ꧀ꦩꦟ, ꦥꦫꦶꦱꦸꦢ꧀ꦣꦏꦴꦪꦏꦩ꧀ꦩꦠꦁ ꦄꦠ꧀ꦠꦤꦶ ꦱꦩ꧀ꦥꦱ꧀ꦱꦩꦴꦤꦺꦴ ꦨꦶꦪ꧀ꦪꦺꦴ ꦥꦭ꧀ꦭꦺꦴꦩꦩꦴꦥꦴꦢꦶꦁ ꦄꦫꦚ꧀ꦚꦺ ꦮꦶꦲꦴꦫꦴꦪ.

꧓꧖. ‘‘ꦠꦱ꧀ꦱ ꦩꦪ꧀ꦲꦁ, ꦧ꧀ꦫꦴꦲ꧀ꦩꦟ, ꦌꦠꦢꦲꦺꦴꦱꦶ – ‘ꦪꦺ ꦑꦺꦴ ꦏꦺꦕꦶ ꦱꦩꦟꦴ ꦮꦴ ꦧ꧀ꦫꦴꦲ꧀ꦩꦟꦴ ꦮꦴ ꦄꦥꦫꦶꦱꦸꦢ꧀ꦣꦮꦕꦷꦏꦩ꧀ꦩꦤ꧀ꦠꦴ…ꦥꦺ… ꦄꦥꦫꦶꦱꦸꦢ꧀ꦣꦩꦤꦺꦴꦏꦩ꧀ꦩꦤ꧀ꦠꦴ …ꦥꦺ… ꦄꦥꦫꦶꦱꦸꦢ꧀ꦣꦴꦗꦷꦮꦴ ꦄꦫꦚ꧀ꦚꦮꦤꦥꦠ꧀ꦡꦴꦤꦶ ꦥꦤ꧀ꦠꦴꦤꦶ ꦱꦺꦤꦴꦱꦤꦴꦤꦶ ꦥꦛꦶꦱꦺꦮꦤ꧀ꦠꦶ, ꦄꦥꦫꦶꦱꦸꦢ꧀ꦣꦴꦗꦷꦮꦱꦤ꧀ꦢꦺꦴꦱꦲꦺꦠꦸ ꦲꦮꦺ ꦠꦺ ꦨꦺꦴꦤ꧀ꦠꦺꦴ ꦱꦩꦟꦧ꧀ꦫꦴꦲ꧀ꦩꦟꦴ ꦄꦏꦸꦱꦭꦁ ꦨꦪꦨꦺꦫꦮꦁ ꦄꦮ꧀ꦲꦴꦪꦤ꧀ꦠꦶ. ꦤ ꦑꦺꦴ ꦥꦤꦴꦲꦁ ꦄꦥꦫꦶꦱꦸꦢ꧀ꦣꦴꦗꦷꦮꦺꦴ ꦄꦫꦚ꧀ꦚꦮꦤꦥꦠ꧀ꦡꦴꦤꦶ ꦥꦤ꧀ꦠꦴꦤꦶ ꦱꦺꦤꦴꦱꦤꦴꦤꦶ ꦥꦛꦶꦱꦺꦮꦴꦩꦶ; ꦥꦫꦶꦱꦸꦢ꧀ꦣꦴꦗꦷꦮꦺꦴꦲꦩꦱ꧀ꦩꦶ. ꦪꦺ ꦲꦶ ꦮꦺꦴ ꦄꦫꦶꦪꦴ ꦥꦫꦶꦱꦸꦢ꧀ꦣꦴꦗꦷꦮꦴ ꦄꦫꦚ꧀ꦚꦮꦤꦥꦠ꧀ꦡꦴꦤꦶ ꦥꦤ꧀ꦠꦴꦤꦶ ꦱꦺꦤꦴꦱꦤꦴꦤꦶ ꦥꦛꦶꦱꦺꦮꦤ꧀ꦠꦶ ꦠꦺꦱꦩꦲꦁ ꦄꦚ꧀ꦚꦠꦫꦺꦴ’ꦠꦶ. ꦌꦠꦩꦲꦁ, ꦧ꧀ꦫꦴꦲ꧀ꦩꦟ, ꦥꦫꦶꦱꦸꦢ꧀ꦣꦴꦗꦷꦮꦠꦁ ꦄꦠ꧀ꦠꦤꦶ ꦱꦩ꧀ꦥꦱ꧀ꦱꦩꦴꦤꦺꦴ ꦨꦶꦪ꧀ꦪꦺꦴ ꦥꦭ꧀ꦭꦺꦴꦩꦩꦴꦥꦴꦢꦶꦁ ꦄꦫꦚ꧀ꦚꦺ ꦮꦶꦲꦴꦫꦴꦪ.

꧓꧗. ‘‘ꦠꦱ꧀ꦱ ꦩꦪ꧀ꦲꦁ, ꦧ꧀ꦫꦴꦲ꧀ꦩꦟ, ꦌꦠꦢꦲꦺꦴꦱꦶ – ‘ꦪꦺ ꦑꦺꦴ ꦏꦺꦕꦶ ꦱꦩꦟꦴ ꦮꦴ ꦧ꧀ꦫꦴꦲ꧀ꦩꦟꦴ ꦮꦴ ꦄꦨꦶꦗ꧀ꦙꦴꦭꦹ ꦏꦴꦩꦺꦱꦸ ꦠꦶꦧ꧀ꦧꦱꦴꦫꦴꦒꦴ ꦄꦫꦚ꧀ꦚꦮꦤꦥꦠ꧀ꦡꦴꦤꦶ ꦥꦤ꧀ꦠꦴꦤꦶ ꦱꦺꦤꦴꦱꦤꦴꦤꦶ ꦥꦛꦶꦱꦺꦮꦤ꧀ꦠꦶ, ꦄꦨꦶꦗ꧀ꦙꦴꦭꦸꦏꦴꦩꦺꦱꦸꦠꦶꦧ꧀ꦧꦱꦴꦫꦴꦒꦱꦤ꧀ꦢꦺꦴꦱꦲꦺꦠꦸ ꦲꦮꦺ ꦠꦺ ꦨꦺꦴꦤ꧀ꦠꦺꦴ ꦱꦩꦟꦧ꧀ꦫꦴꦲ꧀ꦩꦟꦴ ꦄꦏꦸꦱꦭꦁ ꦨꦪꦨꦺꦫꦮꦁ ꦄꦮ꧀ꦲꦴꦪꦤ꧀ꦠꦶ. ꦤ ꦑꦺꦴ ꦥꦤꦴꦲꦁ ꦄꦨꦶꦗ꧀ꦙꦴꦭꦸ ꦏꦴꦩꦺꦱꦸ ꦠꦶꦧ꧀ꦧꦱꦴꦫꦴꦒꦺꦴ ꦄꦫꦚ꧀ꦚꦮꦤꦥꦠ꧀ꦡꦴꦤꦶ ꦥꦤ꧀ꦠꦴꦤꦶ ꦱꦺꦤꦴꦱꦤꦴꦤꦶ ꦥꦛꦶꦱꦺꦮꦴꦩꦶ; ꦄꦤꦨꦶꦗ꧀ꦙꦴꦭꦹꦲꦩꦱ꧀ꦩꦶ. ꦪꦺ ꦲꦶ ꦮꦺꦴ ꦄꦫꦶꦪꦴ ꦄꦤꦨꦶꦗ꧀ꦙꦴꦭꦹ ꦄꦫꦚ꧀ꦚꦮꦤꦥꦠ꧀ꦡꦴꦤꦶ ꦥꦤ꧀ꦠꦴꦤꦶ ꦱꦺꦤꦴꦱꦤꦴꦤꦶ ꦥꦛꦶꦱꦺꦮꦤ꧀ꦠꦶ, ꦠꦺꦱꦩꦲꦁ ꦄꦚ꧀ꦚꦠꦫꦺꦴ’ꦠꦶ. ꦌꦠꦩꦲꦁ, ꦧ꧀ꦫꦴꦲ꧀ꦩꦟ, ꦄꦤꦨꦶꦗ꧀ꦙꦴꦭꦸꦠꦁ ꦄꦠ꧀ꦠꦤꦶ ꦱꦩ꧀ꦥꦱ꧀ꦱꦩꦴꦤꦺꦴ ꦨꦶꦪ꧀ꦪꦺꦴ ꦥꦭ꧀ꦭꦺꦴꦩꦩꦴꦥꦴꦢꦶꦁ ꦄꦫꦚ꧀ꦚꦺ ꦮꦶꦲꦴꦫꦴꦪ.

꧓꧘. ‘‘ꦠꦱ꧀ꦱ ꦩꦪ꧀ꦲꦁ, ꦧ꧀ꦫꦴꦲ꧀ꦩꦟ, ꦌꦠꦢꦲꦺꦴꦱꦶ – ‘ꦪꦺ ꦑꦺꦴ ꦏꦺꦕꦶ ꦱꦩꦟꦴ ꦮꦴ ꦧ꧀ꦫꦴꦲ꧀ꦩꦟꦴ ꦮꦴ ꦧ꧀ꦪꦴꦥꦤ꧀ꦤꦕꦶꦠ꧀ꦠꦴ ꦥꦢꦸꦛ꧀ꦜꦩꦤꦱꦔ꧀ꦏꦥ꧀ꦥꦴ ꦄꦫꦚ꧀ꦚꦮꦤꦥꦠ꧀ꦡꦴꦤꦶ ꦥꦤ꧀ꦠꦴꦤꦶ ꦱꦺꦤꦴꦱꦤꦴꦤꦶ ꦥꦛꦶꦱꦺꦮꦤ꧀ꦠꦶ, ꦧ꧀ꦪꦴꦥꦤ꧀ꦤꦕꦶꦠ꧀ꦠꦥꦢꦸꦛ꧀ꦜꦩꦤꦱꦔ꧀ꦏꦥ꧀ꦥꦱꦤ꧀ꦢꦺꦴꦱꦲꦺꦠꦸ ꦲꦮꦺ ꦠꦺ ꦨꦺꦴꦤ꧀ꦠꦺꦴ ꦱꦩꦟꦧ꧀ꦫꦴꦲ꧀ꦩꦟꦴ ꦄꦏꦸꦱꦭꦁ ꦨꦪꦨꦺꦫꦮꦁ ꦄꦮ꧀ꦲꦴꦪꦤ꧀ꦠꦶ. ꦤ ꦑꦺꦴ ꦥꦤꦴꦲꦁ ꦧ꧀ꦪꦴꦥꦤ꧀ꦤꦕꦶꦠ꧀ꦠꦺꦴ ꦥꦢꦸꦛ꧀ꦜꦩꦤꦱꦔ꧀ꦏꦥ꧀ꦥꦺꦴ ꦄꦫꦚ꧀ꦚꦮꦤꦥꦠ꧀ꦡꦴꦤꦶ ꦥꦤ꧀ꦠꦴꦤꦶ ꦱꦺꦤꦴꦱꦤꦴꦤꦶ ꦥꦛꦶꦱꦺꦮꦴꦩꦶ; ꦩꦺꦠ꧀ꦠꦕꦶꦠ꧀ꦠꦺꦴꦲꦩꦱ꧀ꦩꦶ. ꦪꦺ ꦲꦶ ꦮꦺꦴ ꦄꦫꦶꦪꦴ ꦩꦺꦠ꧀ꦠꦕꦶꦠ꧀ꦠꦴ ꦄꦫꦚ꧀ꦚꦮꦤꦥꦠ꧀ꦡꦴꦤꦶ ꦥꦤ꧀ꦠꦴꦤꦶ ꦱꦺꦤꦴꦱꦤꦴꦤꦶ ꦥꦛꦶꦱꦺꦮꦤ꧀ꦠꦶ ꦠꦺꦱꦩꦲꦁ ꦄꦚ꧀ꦚꦠꦫꦺꦴ’ꦠꦶ. ꦌꦠꦩꦲꦁ, ꦧ꧀ꦫꦴꦲ꧀ꦩꦟ, ꦩꦺꦠ꧀ꦠꦕꦶꦠ꧀ꦠꦠꦁ ꦄꦠ꧀ꦠꦤꦶ ꦱꦩ꧀ꦥꦱ꧀ꦱꦩꦴꦤꦺꦴ ꦨꦶꦪ꧀ꦪꦺꦴ ꦥꦭ꧀ꦭꦺꦴꦩꦩꦴꦥꦴꦢꦶꦁ ꦄꦫꦚ꧀ꦚꦺ ꦮꦶꦲꦴꦫꦴꦪ.

꧓꧙. ‘‘ꦠꦱ꧀ꦱ ꦩꦪ꧀ꦲꦁ, ꦧ꧀ꦫꦴꦲ꧀ꦩꦟ, ꦌꦠꦢꦲꦺꦴꦱꦶ – ‘ꦪꦺ ꦑꦺꦴ ꦏꦺꦕꦶ ꦱꦩꦟꦴ ꦮꦴ ꦧ꧀ꦫꦴꦲ꧀ꦩꦟꦴ ꦮꦴ ꦡꦷꦤꦩꦶꦢ꧀ꦣꦥꦫꦶꦪꦸꦛ꧀ꦜꦶꦠꦴ ꦄꦫꦚ꧀ꦚꦮꦤꦥꦠ꧀ꦡꦴꦤꦶ ꦥꦤ꧀ꦠꦴꦤꦶ ꦱꦺꦤꦴꦱꦤꦴꦤꦶ ꦥꦛꦶꦱꦺꦮꦤ꧀ꦠꦶ, ꦡꦷꦤꦩꦶꦢ꧀ꦣꦥꦫꦶꦪꦸꦛ꧀ꦜꦴꦤꦱꦤ꧀ꦢꦺꦴꦱꦲꦺꦠꦸ ꦲꦮꦺ ꦠꦺ ꦨꦺꦴꦤ꧀ꦠꦺꦴ ꦱꦩꦟꦧ꧀ꦫꦴꦲ꧀ꦩꦟꦴ ꦄꦏꦸꦱꦭꦁ ꦨꦪꦨꦺꦫꦮꦁ ꦄꦮ꧀ꦲꦴꦪꦤ꧀ꦠꦶ. ꦤ ꦑꦺꦴ ꦥꦤꦴꦲꦁ ꦡꦷꦤꦩꦶꦢ꧀ꦣꦥꦫꦶꦪꦸꦛ꧀ꦜꦶꦠꦺꦴ ꦄꦫꦚ꧀ꦚꦮꦤꦥꦠ꧀ꦡꦴꦤꦶ ꦥꦤ꧀ꦠꦴꦤꦶ ꦱꦺꦤꦴꦱꦤꦴꦤꦶ ꦥꦛꦶꦱꦺꦮꦴꦩꦶ; ꦮꦶꦒꦠꦡꦷꦤꦩꦶꦢ꧀ꦣꦺꦴꦲꦩꦱ꧀ꦩꦶ. ꦪꦺ ꦲꦶ ꦮꦺꦴ ꦄꦫꦶꦪꦴ ꦮꦶꦒꦠꦡꦷꦤꦩꦶꦢ꧀ꦣꦴ ꦄꦫꦚ꧀ꦚꦮꦤꦥꦠ꧀ꦡꦴꦤꦶ ꦥꦤ꧀ꦠꦴꦤꦶ ꦱꦺꦤꦴꦱꦤꦴꦤꦶ ꦥꦛꦶꦱꦺꦮꦤ꧀ꦠꦶ ꦠꦺꦱꦩꦲꦁ ꦄꦚ꧀ꦚꦠꦫꦺꦴ’ꦠꦶ. ꦌꦠꦩꦲꦁ, ꦧ꧀ꦫꦴꦲ꧀ꦩꦟ, ꦮꦶꦒꦠꦡꦷꦤꦩꦶꦢ꧀ꦣꦠꦁ ꦄꦠ꧀ꦠꦤꦶ ꦱꦩ꧀ꦥꦱ꧀ꦱꦩꦴꦤꦺꦴ ꦨꦶꦪ꧀ꦪꦺꦴ ꦥꦭ꧀ꦭꦺꦴꦩꦩꦴꦥꦴꦢꦶꦁ ꦄꦫꦚ꧀ꦚꦺ ꦮꦶꦲꦴꦫꦴꦪ.

꧔꧐. ‘‘ꦠꦱ꧀ꦱ ꦩꦪ꧀ꦲꦁ, ꦧ꧀ꦫꦴꦲ꧀ꦩꦟ, ꦌꦠꦢꦲꦺꦴꦱꦶ – ‘ꦪꦺ ꦑꦺꦴ ꦏꦺꦕꦶ ꦱꦩꦟꦴ ꦮꦴ ꦧ꧀ꦫꦴꦲ꧀ꦩꦟꦴ ꦮꦴ ꦈꦢ꧀ꦣꦠꦴ ꦄꦮꦹꦥꦱꦤ꧀ꦠꦕꦶꦠ꧀ꦠꦴ ꦄꦫꦚ꧀ꦚꦮꦤꦥꦠ꧀ꦡꦴꦤꦶ ꦥꦤ꧀ꦠꦴꦤꦶ ꦱꦺꦤꦴꦱꦤꦴꦤꦶ ꦥꦛꦶꦱꦺꦮꦤ꧀ꦠꦶ, ꦈꦢ꧀ꦣꦠꦄꦮꦹꦥꦱꦤ꧀ꦠꦕꦶꦠ꧀ꦠꦱꦤ꧀ꦢꦺꦴꦱꦲꦺꦠꦸ ꦲꦮꦺ ꦠꦺ ꦨꦺꦴꦤ꧀ꦠꦺꦴ ꦱꦩꦟꦧ꧀ꦫꦴꦲ꧀ꦩꦟꦴ ꦄꦏꦸꦱꦭꦁ ꦨꦪꦨꦺꦫꦮꦁ ꦄꦮ꧀ꦲꦴꦪꦤ꧀ꦠꦶ. ꦤ ꦑꦺꦴ ꦥꦤꦴꦲꦁ ꦈꦢ꧀ꦣꦠꦺꦴ ꦄꦮꦹꦥꦱꦤ꧀ꦠꦕꦶꦠ꧀ꦠꦺꦴ ꦄꦫꦚ꧀ꦚꦮꦤꦥꦠ꧀ꦡꦴꦤꦶ ꦥꦤ꧀ꦠꦴꦤꦶ ꦱꦺꦤꦴꦱꦤꦴꦤꦶ ꦥꦛꦶꦱꦺꦮꦴꦩꦶ; ꦮꦹꦥꦱꦤ꧀ꦠꦕꦶꦠ꧀ꦠꦺꦴꦲꦩꦱ꧀ꦩꦶ. ꦪꦺ ꦲꦶ ꦮꦺꦴ ꦄꦫꦶꦪꦴ ꦮꦹꦥꦱꦤ꧀ꦠꦕꦶꦠ꧀ꦠꦴ ꦄꦫꦚ꧀ꦚꦮꦤꦥꦠ꧀ꦡꦴꦤꦶ ꦥꦤ꧀ꦠꦴꦤꦶ ꦱꦺꦤꦴꦱꦤꦴꦤꦶ ꦥꦛꦶꦱꦺꦮꦤ꧀ꦠꦶ, ꦠꦺꦱꦩꦲꦁ ꦄꦚ꧀ꦚꦠꦫꦺꦴ’ꦠꦶ. ꦌꦠꦩꦲꦁ, ꦧ꧀ꦫꦴꦲ꧀ꦩꦟ, ꦮꦹꦥꦱꦤ꧀ꦠꦕꦶꦠ꧀ꦠꦠꦁ ꦄꦠ꧀ꦠꦤꦶ ꦱꦩ꧀ꦥꦱ꧀ꦱꦩꦴꦤꦺꦴ ꦨꦶꦪ꧀ꦪꦺꦴ ꦥꦭ꧀ꦭꦺꦴꦩꦩꦴꦥꦴꦢꦶꦁ ꦄꦫꦚ꧀ꦚꦺ ꦮꦶꦲꦴꦫꦴꦪ.

꧔꧑. ‘‘ꦠꦱ꧀ꦱ ꦩꦪ꧀ꦲꦁ, ꦧ꧀ꦫꦴꦲ꧀ꦩꦟ, ꦌꦠꦢꦲꦺꦴꦱꦶ – ‘ꦪꦺ ꦑꦺꦴ ꦏꦺꦕꦶ ꦱꦩꦟꦴ ꦮꦴ ꦧ꧀ꦫꦴꦲ꧀ꦩꦟꦴ ꦮꦴ ꦏꦔ꧀ꦑꦷ ꦮꦶꦕꦶꦏꦶꦕ꧀ꦖꦷ ꦄꦫꦚ꧀ꦚꦮꦤꦥꦠ꧀ꦡꦴꦤꦶ ꦥꦤ꧀ꦠꦴꦤꦶ ꦱꦺꦤꦴꦱꦤꦴꦤꦶ ꦥꦛꦶꦱꦺꦮꦤ꧀ꦠꦶ, ꦏꦔ꧀ꦑꦶꦮꦶꦕꦶꦏꦶꦕ꧀ꦖꦶꦱꦤ꧀ꦢꦺꦴꦱꦲꦺꦠꦸ ꦲꦮꦺ ꦠꦺ ꦨꦺꦴꦤ꧀ꦠꦺꦴ ꦱꦩꦟꦧ꧀ꦫꦴꦲ꧀ꦩꦟꦴ ꦄꦏꦸꦱꦭꦁ ꦨꦪꦨꦺꦫꦮꦁ ꦄꦮ꧀ꦲꦴꦪꦤ꧀ꦠꦶ. ꦤ ꦑꦺꦴ ꦥꦤꦴꦲꦁ ꦏꦔ꧀ꦑꦷ ꦮꦶꦕꦶꦏꦶꦕ꧀ꦖꦷ ꦄꦫꦚ꧀ꦚꦮꦤꦥꦠ꧀ꦡꦴꦤꦶ ꦥꦤ꧀ꦠꦴꦤꦶ ꦱꦺꦤꦴꦱꦤꦴꦤꦶ ꦥꦛꦶꦱꦺꦮꦴꦩꦶ; ꦠꦶꦟ꧀ꦟꦮꦶꦕꦶꦏꦶꦕ꧀ꦖꦺꦴꦲꦩꦱ꧀ꦩꦶ. ꦪꦺ ꦲꦶ ꦮꦺꦴ ꦄꦫꦶꦪꦴ ꦠꦶꦟ꧀ꦟꦮꦶꦕꦶꦏꦶꦕ꧀ꦖꦴ ꦄꦫꦚ꧀ꦚꦮꦤꦥꦠ꧀ꦡꦴꦤꦶ ꦥꦤ꧀ꦠꦴꦤꦶ ꦱꦺꦤꦴꦱꦤꦴꦤꦶ ꦥꦛꦶꦱꦺꦮꦤ꧀ꦠꦶ ꦠꦺꦱꦩꦲꦁ ꦄꦚ꧀ꦚꦠꦫꦺꦴ’ꦠꦶ. ꦌꦠꦩꦲꦁ, ꦧ꧀ꦫꦴꦲ꧀ꦩꦟ, ꦠꦶꦟ꧀ꦟꦮꦶꦕꦶꦏꦶꦕ꧀ꦖꦠꦁ ꦄꦠ꧀ꦠꦤꦶ ꦱꦩ꧀ꦥꦱ꧀ꦱꦩꦴꦤꦺꦴ ꦨꦶꦪ꧀ꦪꦺꦴ ꦥꦭ꧀ꦭꦺꦴꦩꦩꦴꦥꦴꦢꦶꦁ ꦄꦫꦚ꧀ꦚꦺ ꦮꦶꦲꦴꦫꦴꦪ.

꧔꧒. ‘‘ꦠꦱ꧀ꦱ ꦩꦪ꧀ꦲꦁ, ꦧ꧀ꦫꦴꦲ꧀ꦩꦟ, ꦌꦠꦢꦲꦺꦴꦱꦶ – ‘ꦪꦺ ꦑꦺꦴ ꦏꦺꦕꦶ ꦱꦩꦟꦴ ꦮꦴ ꦧ꧀ꦫꦴꦲ꧀ꦩꦟꦴ ꦮꦴ ꦄꦠ꧀ꦠꦸꦏ꧀ꦏꦁꦱꦏꦴ ꦥꦫꦮꦩ꧀ꦨꦷ ꦄꦫꦚ꧀ꦚꦮꦤꦥꦠ꧀ꦡꦴꦤꦶ ꦥꦤ꧀ꦠꦴꦤꦶ ꦱꦺꦤꦴꦱꦤꦴꦤꦶ ꦥꦛꦶꦱꦺꦮꦤ꧀ꦠꦶ, ꦄꦠ꧀ꦠꦸꦏ꧀ꦏꦁꦱꦤꦥꦫꦮꦩ꧀ꦨꦤꦱꦤ꧀ꦢꦺꦴꦱꦲꦺꦠꦸ ꦲꦮꦺ ꦠꦺ ꦨꦺꦴꦤ꧀ꦠꦺꦴ ꦱꦩꦟꦧ꧀ꦫꦴꦲ꧀ꦩꦟꦴ ꦄꦏꦸꦱꦭꦁ ꦨꦪꦨꦺꦫꦮꦁ ꦄꦮ꧀ꦲꦴꦪꦤ꧀ꦠꦶ. ꦤ ꦑꦺꦴ ꦥꦤꦴꦲꦁ ꦄꦠ꧀ꦠꦸꦏ꧀ꦏꦁꦱꦏꦺꦴ ꦥꦫꦮꦩ꧀ꦨꦷ ꦄꦫꦚ꧀ꦚꦮꦤꦥꦠ꧀ꦡꦴꦤꦶ ꦥꦤ꧀ꦠꦴꦤꦶ ꦱꦺꦤꦴꦱꦤꦴꦤꦶ ꦥꦛꦶꦱꦺꦮꦴꦩꦶ; ꦄꦤꦠ꧀ꦠꦸꦏ꧀ꦏꦁꦱꦏꦺꦴ ꦄꦥꦫꦮꦩ꧀ꦨꦷꦲꦩꦱ꧀ꦩꦶ. ꦪꦺ ꦲꦶ ꦮꦺꦴ ꦄꦫꦶꦪꦴ ꦄꦤꦠ꧀ꦠꦸꦏ꧀ꦏꦁꦱꦏꦴ ꦄꦥꦫꦮꦩ꧀ꦨꦷ ꦄꦫꦚ꧀ꦚꦮꦤꦥꦠ꧀ꦡꦴꦤꦶ ꦥꦤ꧀ꦠꦴꦤꦶ ꦱꦺꦤꦴꦱꦤꦴꦤꦶ ꦥꦛꦶꦱꦺꦮꦤ꧀ꦠꦶ ꦠꦺꦱꦩꦲꦁ ꦄꦚ꧀ꦚꦠꦫꦺꦴ’ꦠꦶ. ꦌꦠꦩꦲꦁ, ꦧ꧀ꦫꦴꦲ꧀ꦩꦟ, ꦄꦤꦠ꧀ꦠꦸꦏ꧀ꦏꦁꦱꦏꦠꦁ ꦄꦥꦫꦮꦩ꧀ꦨꦶꦠꦁ ꦄꦠ꧀ꦠꦤꦶ ꦱꦩ꧀ꦥꦱ꧀ꦱꦩꦴꦤꦺꦴ ꦨꦶꦪ꧀ꦪꦺꦴ ꦥꦭ꧀ꦭꦺꦴꦩꦩꦴꦥꦴꦢꦶꦁ ꦄꦫꦚ꧀ꦚꦺ ꦮꦶꦲꦴꦫꦴꦪ.

꧔꧓. ‘‘ꦠꦱ꧀ꦱ ꦩꦪ꧀ꦲꦁ, ꦧ꧀ꦫꦴꦲ꧀ꦩꦟ, ꦌꦠꦢꦲꦺꦴꦱꦶ – ‘ꦪꦺ ꦑꦺꦴ ꦏꦺꦕꦶ ꦱꦩꦟꦴ ꦮꦴ ꦧ꧀ꦫꦴꦲ꧀ꦩꦟꦴ ꦮꦴ ꦖꦩ꧀ꦨꦷ ꦨꦷꦫꦸꦏꦗꦴꦠꦶꦏꦴ ꦄꦫꦚ꧀ꦚꦮꦤꦥꦠ꧀ꦡꦴꦤꦶ ꦥꦤ꧀ꦠꦴꦤꦶ ꦱꦺꦤꦴꦱꦤꦴꦤꦶ ꦥꦛꦶꦱꦺꦮꦤ꧀ꦠꦶ, ꦖꦩ꧀ꦨꦶꦨꦷꦫꦸꦏꦗꦴꦠꦶꦏꦱꦤ꧀ꦢꦺꦴꦱꦲꦺꦠꦸ ꦲꦮꦺ ꦠꦺ ꦨꦺꦴꦤ꧀ꦠꦺꦴ ꦱꦩꦟꦧ꧀ꦫꦴꦲ꧀ꦩꦟꦴ ꦄꦏꦸꦱꦭꦁ ꦨꦪꦨꦺꦫꦮꦁ ꦄꦮ꧀ꦲꦴꦪꦤ꧀ꦠꦶ. ꦤ ꦑꦺꦴ ꦥꦤꦴꦲꦁ ꦖꦩ꧀ꦨꦷ ꦨꦷꦫꦸꦏꦗꦴꦠꦶꦏꦺꦴ ꦄꦫꦚ꧀ꦚꦮꦤꦥꦠ꧀ꦡꦴꦤꦶ ꦥꦤ꧀ꦠꦴꦤꦶ ꦱꦺꦤꦴꦱꦤꦴꦤꦶ ꦥꦛꦶꦱꦺꦮꦴꦩꦶ; ꦮꦶꦒꦠꦭꦺꦴꦩꦲꦁꦱꦺꦴꦲꦩꦱ꧀ꦩꦶ. ꦪꦺ ꦲꦶ ꦮꦺꦴ ꦄꦫꦶꦪꦴ ꦮꦶꦒꦠꦭꦺꦴꦩꦲꦁꦱꦴ ꦄꦫꦚ꧀ꦚꦮꦤꦥꦠ꧀ꦡꦴꦤꦶ ꦥꦤ꧀ꦠꦴꦤꦶ ꦱꦺꦤꦴꦱꦤꦴꦤꦶ ꦥꦛꦶꦱꦺꦮꦤ꧀ꦠꦶ ꦠꦺꦱꦩꦲꦁ ꦄꦚ꧀ꦚꦠꦫꦺꦴ’ꦠꦶ. ꦌꦠꦩꦲꦁ, ꦧ꧀ꦫꦴꦲ꧀ꦩꦟ, ꦮꦶꦒꦠꦭꦺꦴꦩꦲꦁꦱꦠꦁ ꦄꦠ꧀ꦠꦤꦶ ꦱꦩ꧀ꦥꦱ꧀ꦱꦩꦴꦤꦺꦴ ꦨꦶꦪ꧀ꦪꦺꦴ ꦥꦭ꧀ꦭꦺꦴꦩꦩꦴꦥꦴꦢꦶꦁ ꦄꦫꦚ꧀ꦚꦺ ꦮꦶꦲꦴꦫꦴꦪ.

꧔꧔. ‘‘ꦠꦱ꧀ꦱ ꦩꦪ꧀ꦲꦁ, ꦧ꧀ꦫꦴꦲ꧀ꦩꦟ, ꦌꦠꦢꦲꦺꦴꦱꦶ – ‘ꦪꦺ ꦑꦺꦴ ꦏꦺꦕꦶ ꦱꦩꦟꦴ ꦮꦴ ꦧ꧀ꦫꦴꦲ꧀ꦩꦟꦴ ꦮꦴ ꦭꦴꦨꦱꦏ꧀ꦏꦴꦫꦱꦶꦭꦺꦴꦏꦁ ꦤꦶꦏꦴꦩꦪꦩꦴꦤꦴ ꦄꦫꦚ꧀ꦚꦮꦤꦥꦠ꧀ꦡꦴꦤꦶ ꦥꦤ꧀ꦠꦴꦤꦶ ꦱꦺꦤꦴꦱꦤꦴꦤꦶ ꦥꦛꦶꦱꦺꦮꦤ꧀ꦠꦶ, ꦭꦴꦨꦱꦏ꧀ꦏꦴꦫꦱꦶꦭꦺꦴꦏꦤꦶꦏꦴꦩꦤ [ꦤꦶꦏꦴꦩꦪꦩꦴꦤ (ꦱꦷ. ꦱ꧀ꦪꦴ.)] ꦱꦤ꧀ꦢꦺꦴꦱꦲꦺꦠꦸ ꦲꦮꦺ ꦠꦺ ꦨꦺꦴꦤ꧀ꦠꦺꦴ ꦱꦩꦟꦧ꧀ꦫꦴꦲ꧀ꦩꦟꦴ ꦄꦏꦸꦱꦭꦁ ꦨꦪꦨꦺꦫꦮꦁ ꦄꦮ꧀ꦲꦴꦪꦤ꧀ꦠꦶ. ꦤ ꦑꦺꦴ ꦥꦤꦴꦲꦁ ꦭꦴꦨꦱꦏ꧀ꦏꦴꦫꦱꦶꦭꦺꦴꦏꦁ ꦤꦶꦏꦴꦩꦪꦩꦴꦤꦺꦴ ꦄꦫꦚ꧀ꦚꦮꦤꦥꦠ꧀ꦡꦴꦤꦶ ꦥꦤ꧀ꦠꦴꦤꦶ ꦱꦺꦤꦴꦱꦤꦴꦤꦶ ꦥꦛꦶꦱꦺꦮꦴꦩꦶ; ꦄꦥ꧀ꦥꦶꦕ꧀ꦖꦺꦴꦲꦩꦱ꧀ꦩꦶ. ꦪꦺ ꦲꦶ ꦮꦺꦴ ꦄꦫꦶꦪꦴ ꦄꦥ꧀ꦥꦶꦕ꧀ꦖꦴ ꦄꦫꦚ꧀ꦚꦮꦤꦥꦠ꧀ꦡꦴꦤꦶ ꦥꦤ꧀ꦠꦴꦤꦶ ꦱꦺꦤꦴꦱꦤꦴꦤꦶ ꦥꦛꦶꦱꦺꦮꦤ꧀ꦠꦶ ꦠꦺꦱꦩꦲꦁ ꦄꦚ꧀ꦚꦠꦫꦺꦴ’ꦠꦶ. ꦌꦠꦩꦲꦁ, ꦧ꧀ꦫꦴꦲ꧀ꦩꦟ, ꦄꦥ꧀ꦥꦶꦕ꧀ꦖꦠꦁ ꦄꦠ꧀ꦠꦤꦶ ꦱꦩ꧀ꦥꦱ꧀ꦱꦩꦴꦤꦺꦴ ꦨꦶꦪ꧀ꦪꦺꦴ ꦥꦭ꧀ꦭꦺꦴꦩꦩꦴꦥꦴꦢꦶꦁ ꦄꦫꦚ꧀ꦚꦺ ꦮꦶꦲꦴꦫꦴꦪ.

꧔꧕. ‘‘ꦠꦱ꧀ꦱ ꦩꦪ꧀ꦲꦁ, ꦧ꧀ꦫꦴꦲ꧀ꦩꦟ, ꦌꦠꦢꦲꦺꦴꦱꦶ – ‘ꦪꦺ ꦑꦺꦴ ꦏꦺꦕꦶ ꦱꦩꦟꦴ ꦮꦴ ꦧ꧀ꦫꦴꦲ꧀ꦩꦟꦴ ꦮꦴ ꦏꦸꦱꦷꦠꦴ ꦲꦷꦤꦮꦷꦫꦶꦪꦴ ꦄꦫꦚ꧀ꦚꦮꦤꦥꦠ꧀ꦡꦴꦤꦶ ꦥꦤ꧀ꦠꦴꦤꦶ ꦱꦺꦤꦴꦱꦤꦴꦤꦶ ꦥꦛꦶꦱꦺꦮꦤ꧀ꦠꦶ, ꦏꦸꦱꦷꦠꦲꦷꦤꦮꦷꦫꦶꦪꦱꦤ꧀ꦢꦺꦴꦱꦲꦺꦠꦸ ꦲꦮꦺ ꦠꦺ ꦨꦺꦴꦤ꧀ꦠꦺꦴ ꦱꦩꦟꦧ꧀ꦫꦴꦲ꧀ꦩꦟꦴ ꦄꦏꦸꦱꦭꦁ ꦨꦪꦨꦺꦫꦮꦁ ꦄꦮ꧀ꦲꦴꦪꦤ꧀ꦠꦶ. ꦤ ꦑꦺꦴ ꦥꦤꦴꦲꦁ ꦏꦸꦱꦷꦠꦺꦴ ꦲꦷꦤꦮꦷꦫꦶꦪꦺꦴ ꦄꦫꦚ꧀ꦚꦮꦤꦥꦠ꧀ꦡꦴꦤꦶ ꦥꦤ꧀ꦠꦴꦤꦶ ꦱꦺꦤꦴꦱꦤꦴꦤꦶ ꦥꦛꦶꦱꦺꦮꦴꦩꦶ; ꦄꦴꦫꦢ꧀ꦣꦮꦷꦫꦶꦪꦺꦴꦲꦩꦱ꧀ꦩꦶ. ꦪꦺ ꦲꦶ ꦮꦺꦴ ꦄꦫꦶꦪꦴ ꦄꦴꦫꦢ꧀ꦣꦮꦷꦫꦶꦪꦴ ꦄꦫꦚ꧀ꦚꦮꦤꦥꦠ꧀ꦡꦴꦤꦶ ꦥꦤ꧀ꦠꦴꦤꦶ ꦱꦺꦤꦴꦱꦤꦴꦤꦶ ꦥꦛꦶꦱꦺꦮꦤ꧀ꦠꦶ ꦠꦺꦱꦩꦲꦁ ꦄꦚ꧀ꦚꦠꦫꦺꦴ’ꦠꦶ. ꦌꦠꦩꦲꦁ, ꦧ꧀ꦫꦴꦲ꧀ꦩꦟ, ꦄꦴꦫꦢ꧀ꦣꦮꦷꦫꦶꦪꦠꦁ ꦄꦠ꧀ꦠꦤꦶ ꦱꦩ꧀ꦥꦱ꧀ꦱꦩꦴꦤꦺꦴ ꦨꦶꦪ꧀ꦪꦺꦴ ꦥꦭ꧀ꦭꦺꦴꦩꦩꦴꦥꦴꦢꦶꦁ ꦄꦫꦚ꧀ꦚꦺ ꦮꦶꦲꦴꦫꦴꦪ.

꧔꧖. ‘‘ꦠꦱ꧀ꦱ ꦩꦪ꧀ꦲꦁ, ꦧ꧀ꦫꦴꦲ꧀ꦩꦟ, ꦌꦠꦢꦲꦺꦴꦱꦶ – ‘ꦪꦺ ꦑꦺꦴ ꦏꦺꦕꦶ ꦱꦩꦟꦴ ꦮꦴ ꦧ꧀ꦫꦴꦲ꧀ꦩꦟꦴ ꦮꦴ ꦩꦸꦛ꧀ꦜꦱ꧀ꦱꦠꦷ ꦄꦱꦩ꧀ꦥꦗꦴꦤꦴ ꦄꦫꦚ꧀ꦚꦮꦤꦥꦠ꧀ꦡꦴꦤꦶ ꦥꦤ꧀ꦠꦴꦤꦶ ꦱꦺꦤꦴꦱꦤꦴꦤꦶ ꦥꦛꦶꦱꦺꦮꦤ꧀ꦠꦶ, ꦩꦸꦛ꧀ꦜꦱ꧀ꦱꦠꦶꦄꦱꦩ꧀ꦥꦗꦴꦤꦱꦤ꧀ꦢꦺꦴꦱꦲꦺꦠꦸ ꦲꦮꦺ ꦠꦺ ꦨꦺꦴꦤ꧀ꦠꦺꦴ ꦱꦩꦟꦧ꧀ꦫꦴꦲ꧀ꦩꦟꦴ ꦄꦏꦸꦱꦭꦁ ꦨꦪꦨꦺꦫꦮꦁ ꦄꦮ꧀ꦲꦴꦪꦤ꧀ꦠꦶ. ꦤ ꦑꦺꦴ ꦥꦤꦴꦲꦁ ꦩꦸꦛ꧀ꦜꦱ꧀ꦱꦠꦶ ꦄꦱꦩ꧀ꦥꦗꦴꦤꦺꦴ ꦄꦫꦚ꧀ꦚꦮꦤꦥꦠ꧀ꦡꦴꦤꦶ ꦥꦤ꧀ꦠꦴꦤꦶ ꦱꦺꦤꦴꦱꦤꦴꦤꦶ ꦥꦛꦶꦱꦺꦮꦴꦩꦶ; ꦈꦥꦛ꧀ꦜꦶꦠꦱ꧀ꦱꦠꦶꦲꦩꦱ꧀ꦩꦶ. ꦪꦺ ꦲꦶ ꦮꦺꦴ ꦄꦫꦶꦪꦴ ꦈꦥꦛ꧀ꦜꦶꦠꦱ꧀ꦱꦠꦷ ꦄꦫꦚ꧀ꦚꦮꦤꦥꦠ꧀ꦡꦴꦤꦶ ꦥꦤ꧀ꦠꦴꦤꦶ ꦱꦺꦤꦴꦱꦤꦴꦤꦶ ꦥꦛꦶꦱꦺꦮꦤ꧀ꦠꦶ ꦠꦺꦱꦩꦲꦁ ꦄꦚ꧀ꦚꦠꦫꦺꦴ’ꦠꦶ. ꦌꦠꦩꦲꦁ, ꦧ꧀ꦫꦴꦲ꧀ꦩꦟ, ꦈꦥꦛ꧀ꦜꦶꦠꦱ꧀ꦱꦠꦶꦠꦁ ꦄꦠ꧀ꦠꦤꦶ ꦱꦩ꧀ꦥꦱ꧀ꦱꦩꦴꦤꦺꦴ ꦨꦶꦪ꧀ꦪꦺꦴ ꦥꦭ꧀ꦭꦺꦴꦩꦩꦴꦥꦴꦢꦶꦁ ꦄꦫꦚ꧀ꦚꦺ ꦮꦶꦲꦴꦫꦴꦪ.

꧔꧗. ‘‘ꦠꦱ꧀ꦱ ꦩꦪ꧀ꦲꦁ, ꦧ꧀ꦫꦴꦲ꧀ꦩꦟ, ꦌꦠꦢꦲꦺꦴꦱꦶ – ‘ꦪꦺ ꦑꦺꦴ ꦏꦺꦕꦶ ꦱꦩꦟꦴ ꦮꦴ ꦧ꧀ꦫꦴꦲ꧀ꦩꦟꦴ ꦮꦴ ꦄꦱꦩꦴꦲꦶꦠꦴ ꦮꦶꦧ꧀ꦨꦤ꧀ꦠꦕꦶꦠ꧀ꦠꦴ ꦄꦫꦚ꧀ꦚꦮꦤꦥꦠ꧀ꦡꦴꦤꦶ ꦥꦤ꧀ꦠꦴꦤꦶ ꦱꦺꦤꦴꦱꦤꦴꦤꦶ ꦥꦛꦶꦱꦺꦮꦤ꧀ꦠꦶ, ꦄꦱꦩꦴꦲꦶꦠꦮꦶꦧ꧀ꦨꦤ꧀ꦠꦕꦶꦠ꧀ꦠꦱꦤ꧀ꦢꦺꦴꦱꦲꦺꦠꦸ ꦲꦮꦺ ꦠꦺ ꦨꦺꦴꦤ꧀ꦠꦺꦴ ꦱꦩꦟꦧ꧀ꦫꦴꦲ꧀ꦩꦟꦴ ꦄꦏꦸꦱꦭꦁ ꦨꦪꦨꦺꦫꦮꦁ ꦄꦮ꧀ꦲꦴꦪꦤ꧀ꦠꦶ. ꦤ ꦑꦺꦴ ꦥꦤꦴꦲꦁ ꦄꦱꦩꦴꦲꦶꦠꦺꦴ ꦮꦶꦧ꧀ꦨꦤ꧀ꦠꦕꦶꦠ꧀ꦠꦺꦴ ꦄꦫꦚ꧀ꦚꦮꦤꦥꦠ꧀ꦡꦴꦤꦶ ꦥꦤ꧀ꦠꦴꦤꦶ ꦱꦺꦤꦴꦱꦤꦴꦤꦶ ꦥꦛꦶꦱꦺꦮꦴꦩꦶ; ꦱꦩꦴꦣꦶꦱꦩ꧀ꦥꦤ꧀ꦤꦺꦴꦲꦩꦱ꧀ꦩꦶ. ꦪꦺ ꦲꦶ ꦮꦺꦴ ꦄꦫꦶꦪꦴ ꦱꦩꦴꦣꦶꦱꦩ꧀ꦥꦤ꧀ꦤꦴ ꦄꦫꦚ꧀ꦚꦮꦤꦥꦠ꧀ꦡꦴꦤꦶ ꦥꦤ꧀ꦠꦴꦤꦶ ꦱꦺꦤꦴꦱꦤꦴꦤꦶ ꦥꦛꦶꦱꦺꦮꦤ꧀ꦠꦶ ꦠꦺꦱꦩꦲꦁ ꦄꦚ꧀ꦚꦠꦫꦺꦴ’ꦠꦶ. ꦌꦠꦩꦲꦁ, ꦧ꧀ꦫꦴꦲ꧀ꦩꦟ, ꦱꦩꦴꦣꦶꦱꦩ꧀ꦥꦢꦁ ꦄꦠ꧀ꦠꦤꦶ ꦱꦩ꧀ꦥꦱ꧀ꦱꦩꦴꦤꦺꦴ ꦨꦶꦪ꧀ꦪꦺꦴ ꦥꦭ꧀ꦭꦺꦴꦩꦩꦴꦥꦴꦢꦶꦁ ꦄꦫꦚ꧀ꦚꦺ ꦮꦶꦲꦴꦫꦴꦪ.

꧔꧘. ‘‘ꦠꦱ꧀ꦱ ꦩꦪ꧀ꦲꦁ, ꦧ꧀ꦫꦴꦲ꧀ꦩꦟ, ꦌꦠꦢꦲꦺꦴꦱꦶ – ‘ꦪꦺ ꦑꦺꦴ ꦏꦺꦕꦶ ꦱꦩꦟꦴ ꦮꦴ ꦧ꧀ꦫꦴꦲ꧀ꦩꦟꦴ ꦮꦴ ꦢꦸꦥ꧀ꦥꦚ꧀ꦚꦴ ꦌꦭ꦳ꦩꦹꦒꦴ ꦄꦫꦚ꧀ꦚꦮꦤꦥꦠ꧀ꦡꦴꦤꦶ ꦥꦤ꧀ꦠꦴꦤꦶ ꦱꦺꦤꦴꦱꦤꦴꦤꦶ ꦥꦛꦶꦱꦺꦮꦤ꧀ꦠꦶ, ꦢꦸꦥ꧀ꦥꦚ꧀ꦚꦌꦭ꦳ꦩꦹꦒꦱꦤ꧀ꦢꦺꦴꦱꦲꦺꦠꦸ ꦲꦮꦺ ꦠꦺ ꦨꦺꦴꦤ꧀ꦠꦺꦴ ꦱꦩꦟꦧ꧀ꦫꦴꦲ꧀ꦩꦟꦴ ꦄꦏꦸꦱꦭꦁ ꦨꦪꦨꦺꦫꦮꦁ ꦄꦮ꧀ꦲꦴꦪꦤ꧀ꦠꦶ. ꦤ ꦑꦺꦴ ꦥꦤꦴꦲꦁ ꦢꦸꦥ꧀ꦥꦚ꧀ꦚꦺꦴ ꦌꦭ꦳ꦩꦹꦒꦺꦴ ꦄꦫꦚ꧀ꦚꦮꦤꦥꦠ꧀ꦡꦴꦤꦶ ꦥꦤ꧀ꦠꦴꦤꦶ ꦱꦺꦤꦴꦱꦤꦴꦤꦶ ꦥꦛꦶꦱꦺꦮꦴꦩꦶ; ꦥꦚ꧀ꦚꦴꦱꦩ꧀ꦥꦤ꧀ꦤꦺꦴꦲꦩꦱ꧀ꦩꦶ. ꦪꦺ ꦲꦶ ꦮꦺꦴ ꦄꦫꦶꦪꦴ ꦥꦚ꧀ꦚꦴꦱꦩ꧀ꦥꦤ꧀ꦤꦴ ꦄꦫꦚ꧀ꦚꦮꦤꦥꦠ꧀ꦡꦴꦤꦶ ꦥꦤ꧀ꦠꦴꦤꦶ ꦱꦺꦤꦴꦱꦤꦴꦤꦶ ꦥꦛꦶꦱꦺꦮꦤ꧀ꦠꦶ ꦠꦺꦱꦩꦲꦁ ꦄꦚ꧀ꦚꦠꦫꦺꦴ’ꦠꦶ. ꦌꦠꦩꦲꦁ, ꦧ꧀ꦫꦴꦲ꧀ꦩꦟ, ꦥꦚ꧀ꦚꦴꦱꦩ꧀ꦥꦢꦁ ꦄꦠ꧀ꦠꦤꦶ ꦱꦩ꧀ꦥꦱ꧀ꦱꦩꦴꦤꦺꦴ ꦨꦶꦪ꧀ꦪꦺꦴ ꦥꦭ꧀ꦭꦺꦴꦩꦩꦴꦥꦴꦢꦶꦁ ꦄꦫꦚ꧀ꦚꦺ ꦮꦶꦲꦴꦫꦴꦪ.

ꦱꦺꦴꦭ꦳ꦱꦥꦫꦶꦪꦴꦪꦁ ꦤꦶꦛ꧀ꦜꦶꦠꦁ.

꧔꧙. ‘‘ꦠꦱ꧀ꦱ ꦩꦪ꧀ꦲꦁ, ꦧ꧀ꦫꦴꦲ꧀ꦩꦟ, ꦌꦠꦢꦲꦺꦴꦱꦶ – ‘ꦪꦁꦤꦹꦤꦴꦲꦁ ꦪꦴ ꦠꦴ ꦫꦠ꧀ꦠꦶꦪꦺꦴ ꦄꦨꦶꦚ꧀ꦚꦴꦠꦴ ꦄꦨꦶꦭꦏ꧀ꦑꦶꦠꦴ – ꦕꦴꦠꦸꦢ꧀ꦢꦱꦷ ꦥꦚ꧀ꦕꦢꦱꦷ ꦄꦛ꧀ꦜꦩꦷ ꦕ ꦥꦏ꧀ꦑꦱ꧀ꦱ – ꦠꦡꦴꦫꦹꦥꦴꦱꦸ ꦫꦠ꧀ꦠꦷꦱꦸ ꦪꦴꦤꦶ ꦠꦴꦤꦶ ꦄꦴꦫꦴꦩꦕꦺꦠꦶꦪꦴꦤꦶ ꦮꦤꦕꦺꦠꦶꦪꦴꦤꦶ ꦫꦸꦏ꧀ꦑꦕꦺꦠꦶꦪꦴꦤꦶ ꦨꦶꦁꦱꦤꦏꦴꦤꦶ ꦱꦭꦺꦴꦩꦲꦁꦱꦴꦤꦶ ꦠꦡꦴꦫꦹꦥꦺꦱꦸ ꦱꦺꦤꦴꦱꦤꦺꦱꦸ ꦮꦶꦲꦫꦺꦪ꧀ꦪꦁ ꦄꦥ꧀ꦥꦺꦮ ꦤꦴꦩꦴꦲꦁ ꦨꦪꦨꦺꦫꦮꦁ ꦥꦱ꧀ꦱꦺꦪ꧀ꦪ’ꦤ꧀ꦠꦶ. ꦱꦺꦴ ꦑꦺꦴ ꦄꦲꦁ, ꦧ꧀ꦫꦴꦲ꧀ꦩꦟ, ꦄꦥꦫꦺꦤ ꦱꦩꦪꦺꦤ ꦪꦴ ꦠꦴ ꦫꦠ꧀ꦠꦶꦪꦺꦴ ꦄꦨꦶꦚ꧀ꦚꦴꦠꦴ ꦄꦨꦶꦭꦏ꧀ꦑꦶꦠꦴ – ꦕꦴꦠꦸꦢ꧀ꦢꦱꦷ ꦥꦚ꧀ꦕꦢꦱꦷ ꦄꦛ꧀ꦜꦩꦷ ꦕ ꦥꦏ꧀ꦑꦱ꧀ꦱ – ꦠꦡꦴꦫꦹꦥꦴꦱꦸ ꦫꦠ꧀ꦠꦷꦱꦸ ꦪꦴꦤꦶ ꦠꦴꦤꦶ ꦄꦴꦫꦴꦩꦕꦺꦠꦶꦪꦴꦤꦶ ꦮꦤꦕꦺꦠꦶꦪꦴꦤꦶ ꦫꦸꦏ꧀ꦑꦕꦺꦠꦶꦪꦴꦤꦶ ꦨꦶꦁꦱꦤꦏꦴꦤꦶ ꦱꦭꦺꦴꦩꦲꦁꦱꦴꦤꦶ ꦠꦡꦴꦫꦹꦥꦺꦱꦸ ꦱꦺꦤꦴꦱꦤꦺꦱꦸ ꦮꦶꦲꦫꦴꦩꦶ. ꦠꦠ꧀ꦡ ꦕ ꦩꦺ, ꦧ꧀ꦫꦴꦲ꧀ꦩꦟ, ꦮꦶꦲꦫꦠꦺꦴ ꦩꦒꦺꦴ ꦮꦴ ꦄꦴꦒꦕ꧀ꦖꦠꦶ, ꦩꦺꦴꦫꦺꦴ ꦮꦴ ꦏꦛ꧀ꦜꦁ ꦥꦴꦠꦺꦠꦶ, ꦮꦴꦠꦺꦴ ꦮꦴ ꦥꦟ꧀ꦟꦏꦱꦛꦁ [ꦥꦟ꧀ꦟꦱꦛꦁ (ꦱꦷ. ꦥꦷ.)] ꦌꦫꦺꦠꦶ; ꦠꦱ꧀ꦱ ꦩꦪ꧀ꦲꦁ ꦧ꧀ꦫꦴꦲ꧀ꦩꦟ ꦌꦠꦢꦲꦺꦴꦱꦶ [ꦠꦱ꧀ꦱ ꦩꦪ꧀ꦲꦁ ꦌꦮꦁ ꦲꦺꦴꦠꦶ (ꦱꦷ. ꦱ꧀ꦪꦴ.)] – ‘ꦌꦠꦁ ꦤꦹꦤ ꦠꦁ ꦨꦪꦨꦺꦫꦮꦁ ꦄꦴꦒꦕ꧀ꦖꦠꦷ’ꦠꦶ. ꦠꦱ꧀ꦱ ꦩꦪ꧀ꦲꦁ, ꦧ꧀ꦫꦴꦲ꧀ꦩꦟ, ꦌꦠꦢꦲꦺꦴꦱꦶ – ‘ꦏꦶꦁ ꦤꦸ ꦑꦺꦴ ꦄꦲꦁ ꦄꦚ꧀ꦚꦢꦠ꧀ꦡꦸ ꦨꦪꦥꦛꦶꦏꦔ꧀ꦑꦷ [ꦨꦪꦥꦴꦛꦶꦏꦔ꧀ꦑꦷ (ꦱꦷ.)] ꦮꦶꦲꦫꦴꦩꦶ? ꦪꦁꦤꦹꦤꦴꦲꦁ ꦪꦡꦴꦨꦹꦠꦁ ꦪꦡꦴꦨꦹꦠꦱ꧀ꦱ [ꦪꦡꦴꦨꦹꦠꦱ꧀ꦱ ꦪꦡꦴꦨꦹꦠꦱ꧀ꦱ (ꦱꦷ. ꦱ꧀ꦪꦴ.)] ꦩꦺ ꦠꦁ ꦨꦪꦨꦺꦫꦮꦁ ꦄꦴꦒꦕ꧀ꦖꦠꦶ, ꦠꦡꦴꦨꦹꦠꦁ ꦠꦡꦴꦨꦹꦠꦺꦴꦮ [ꦪꦡꦴꦨꦹꦠꦺꦴ ꦪꦡꦴꦨꦹꦠꦺꦴꦮ (ꦱꦷ. ꦱ꧀ꦪꦴ.)] ꦠꦁ ꦨꦪꦨꦺꦫꦮꦁ ꦥꦛꦶꦮꦶꦤꦺꦪ꧀ꦪ’ꦤ꧀ꦠꦶ. ꦠꦱ꧀ꦱ ꦩꦪ꧀ꦲꦁ, ꦧ꧀ꦫꦴꦲ꧀ꦩꦟ, ꦕꦔ꧀ꦏꦩꦤ꧀ꦠꦱ꧀ꦱ ꦠꦁ ꦨꦪꦨꦺꦫꦮꦁ ꦄꦴꦒꦕ꧀ꦖꦠꦶ. ꦱꦺꦴ ꦑꦺꦴ ꦄꦲꦁ, ꦧ꧀ꦫꦴꦲ꧀ꦩꦟ, ꦤꦺꦮ ꦠꦴꦮ ꦠꦶꦛ꧀ꦜꦴꦩꦶ ꦤ ꦤꦶꦱꦷꦢꦴꦩꦶ ꦤ ꦤꦶꦥꦗ꧀ꦗꦴꦩꦶ, ꦪꦴꦮ ꦕꦔ꧀ꦏꦩꦤ꧀ꦠꦺꦴꦮ ꦠꦁ ꦨꦪꦨꦺꦫꦮꦁ ꦥꦛꦶꦮꦶꦤꦺꦩꦶ. ꦠꦱ꧀ꦱ ꦩꦪ꧀ꦲꦁ, ꦧ꧀ꦫꦴꦲ꧀ꦩꦟ, ꦜꦶꦠꦱ꧀ꦱ ꦠꦁ ꦨꦪꦨꦺꦫꦮꦁ ꦄꦴꦒꦕ꧀ꦖꦠꦶ. ꦱꦺꦴ ꦑꦺꦴ ꦄꦲꦁ, ꦧ꧀ꦫꦴꦲ꧀ꦩꦟ, ꦤꦺꦮ ꦠꦴꦮ ꦕꦔ꧀ꦏꦩꦴꦩꦶ ꦤ ꦤꦶꦱꦷꦢꦴꦩꦶ ꦤ ꦤꦶꦥꦗ꧀ꦗꦴꦩꦶ. ꦪꦴꦮ ꦜꦶꦠꦺꦴꦮ ꦠꦁ ꦨꦪꦨꦺꦫꦮꦁ ꦥꦛꦶꦮꦶꦤꦺꦩꦶ. ꦠꦱ꧀ꦱ ꦩꦪ꧀ꦲꦁ, ꦧ꧀ꦫꦴꦲ꧀ꦩꦟ, ꦤꦶꦱꦶꦤ꧀ꦤꦱ꧀ꦱ ꦠꦁ ꦨꦪꦨꦺꦫꦮꦁ ꦄꦴꦒꦕ꧀ꦖꦠꦶ. ꦱꦺꦴ ꦑꦺꦴ ꦄꦲꦁ, ꦧ꧀ꦫꦴꦲ꧀ꦩꦟ, ꦤꦺꦮ ꦠꦴꦮ ꦤꦶꦥꦗ꧀ꦗꦴꦩꦶ ꦤ ꦠꦶꦛ꧀ꦜꦴꦩꦶ ꦤ ꦕꦔ꧀ꦏꦩꦴꦩꦶ, ꦪꦴꦮ ꦤꦶꦱꦶꦤ꧀ꦤꦺꦴꦮ ꦠꦁ ꦨꦪꦨꦺꦫꦮꦁ ꦥꦛꦶꦮꦶꦤꦺꦩꦶ. ꦠꦱ꧀ꦱ ꦩꦪ꧀ꦲꦁ, ꦧ꧀ꦫꦴꦲ꧀ꦩꦟ, ꦤꦶꦥꦤ꧀ꦤꦱ꧀ꦱ ꦠꦁ ꦨꦪꦨꦺꦫꦮꦁ ꦄꦴꦒꦕ꧀ꦖꦠꦶ. ꦱꦺꦴ ꦑꦺꦴ ꦄꦲꦁ, ꦧ꧀ꦫꦴꦲ꧀ꦩꦟ, ꦤꦺꦮ ꦠꦴꦮ ꦤꦶꦱꦷꦢꦴꦩꦶ ꦤ ꦠꦶꦛ꧀ꦜꦴꦩꦶ ꦤ ꦕꦔ꧀ꦏꦩꦴꦩꦶ, ꦪꦴꦮ ꦤꦶꦥꦤ꧀ꦤꦺꦴꦮ ꦠꦁ ꦨꦪꦨꦺꦫꦮꦁ ꦥꦛꦶꦮꦶꦤꦺꦩꦶ.

꧕꧐. ‘‘ꦱꦤ꧀ꦠꦶ ꦑꦺꦴ ꦥꦤ, ꦧ꧀ꦫꦴꦲ꧀ꦩꦟ, ꦌꦏꦺ ꦱꦩꦟꦧ꧀ꦫꦴꦲ꧀ꦩꦟꦴ ꦫꦠ꧀ꦠꦶꦁꦪꦺꦮ ꦱꦩꦴꦤꦁ ꦢꦶꦮꦴꦠꦶ ꦱꦚ꧀ꦗꦴꦤꦤ꧀ꦠꦶ, ꦢꦶꦮꦴꦪꦺꦮ ꦱꦩꦴꦤꦁ ꦫꦠ꧀ꦠꦷꦠꦶ ꦱꦚ꧀ꦗꦴꦤꦤ꧀ꦠꦶ. ꦆꦢꦩꦲꦁ ꦠꦺꦱꦁ ꦱꦩꦟꦧ꧀ꦫꦴꦲ꧀ꦩꦟꦴꦤꦁ ꦱꦩ꧀ꦩꦺꦴꦲꦮꦶꦲꦴꦫꦱ꧀ꦩꦶꦁ ꦮꦢꦴꦩꦶ. ꦄꦲꦁ ꦑꦺꦴ ꦥꦤ, ꦧ꧀ꦫꦴꦲ꧀ꦩꦟ, ꦫꦠ꧀ꦠꦶꦁꦪꦺꦮ ꦱꦩꦴꦤꦁ ꦫꦠ꧀ꦠꦷꦠꦶ ꦱꦚ꧀ꦗꦴꦤꦴꦩꦶ, ꦢꦶꦮꦴꦪꦺꦮ ꦱꦩꦴꦤꦁ ꦢꦶꦮꦴꦠꦶ ꦱꦚ꧀ꦗꦴꦤꦴꦩꦶ. ꦪꦁ ꦑꦺꦴ ꦠꦁ, ꦧ꧀ꦫꦴꦲ꧀ꦩꦟ, ꦱꦩ꧀ꦩꦴ ꦮꦢꦩꦴꦤꦺꦴ ꦮꦢꦺꦪ꧀ꦪ – ‘ꦄꦱꦩ꧀ꦩꦺꦴꦲꦣꦩ꧀ꦩꦺꦴ ꦱꦠ꧀ꦠꦺꦴ ꦭꦺꦴꦏꦺ ꦈꦥ꧀ꦥꦤ꧀ꦤꦺꦴ ꦧꦲꦸꦗꦤꦲꦶꦠꦴꦪ ꦧꦲꦸꦗꦤꦱꦸꦑꦴꦪ ꦭꦺꦴꦏꦴꦤꦸꦏꦩ꧀ꦥꦴꦪ ꦄꦠ꧀ꦡꦴꦪ ꦲꦶꦠꦴꦪ ꦱꦸꦑꦴꦪ ꦢꦺꦮꦩꦤꦸꦱ꧀ꦱꦴꦤ’ꦤ꧀ꦠꦶ, ꦩꦩꦺꦮ ꦠꦁ ꦱꦩ꧀ꦩꦴ ꦮꦢꦩꦴꦤꦺꦴ ꦮꦢꦺꦪ꧀ꦪ – ‘ꦄꦱꦩ꧀ꦩꦺꦴꦲꦣꦩ꧀ꦩꦺꦴ ꦱꦠ꧀ꦠꦺꦴ ꦭꦺꦴꦏꦺ ꦈꦥ꧀ꦥꦤ꧀ꦤꦺꦴ ꦧꦲꦸꦗꦤꦲꦶꦠꦴꦪ ꦧꦲꦸꦗꦤꦱꦸꦑꦴꦪ ꦭꦺꦴꦏꦴꦤꦸꦏꦩ꧀ꦥꦴꦪ ꦄꦠ꧀ꦡꦴꦪ ꦲꦶꦠꦴꦪ ꦱꦸꦑꦴꦪ ꦢꦺꦮꦩꦤꦸꦱ꧀ꦱꦴꦤ’ꦤ꧀ꦠꦶ.

꧕꧑. ‘‘ꦄꦴꦫꦢ꧀ꦣꦁ ꦑꦺꦴ ꦥꦤ ꦩꦺ, ꦧ꧀ꦫꦴꦲ꧀ꦩꦟ, ꦮꦷꦫꦶꦪꦁ ꦄꦲꦺꦴꦱꦶ ꦄꦱꦭ꧀ꦭꦷꦤꦁ, ꦈꦥꦛ꧀ꦜꦶꦠꦴ ꦱꦠꦶ ꦄꦱꦩ꧀ꦩꦸꦛ꧀ꦜꦴ [ꦄꦥ꧀ꦥꦩ꧀ꦩꦸꦛ꧀ꦜꦴ (ꦱ꧀ꦪꦴ.)], ꦥꦱ꧀ꦱꦢ꧀ꦣꦺꦴ ꦏꦴꦪꦺꦴ ꦄꦱꦴꦫꦢ꧀ꦣꦺꦴ, ꦱꦩꦴꦲꦶꦠꦁ ꦕꦶꦠ꧀ꦠꦁ ꦌꦏꦒ꧀ꦒꦁ. ꦱꦺꦴ ꦑꦺꦴ ꦄꦲꦁ, ꦧ꧀ꦫꦴꦲ꧀ꦩꦟ, ꦮꦶꦮꦶꦕ꧀ꦕꦺꦮ ꦏꦴꦩꦺꦲꦶ ꦮꦶꦮꦶꦕ꧀ꦕ ꦄꦏꦸꦱꦭꦺꦲꦶ ꦣꦩ꧀ꦩꦺꦲꦶ ꦱꦮꦶꦠꦏ꧀ꦏꦁ ꦱꦮꦶꦕꦴꦫꦁ ꦮꦶꦮꦺꦏꦗꦁ ꦥꦷꦠꦶꦱꦸꦑꦁ ꦥꦜꦩꦁ ꦙꦴꦤꦁ ꦈꦥꦱꦩ꧀ꦥꦗ꧀ꦗ ꦮꦶꦲꦴꦱꦶꦁ. ꦮꦶꦠꦏ꧀ꦏꦮꦶꦕꦴꦫꦴꦤꦁ ꦮꦹꦥꦱꦩꦴ ꦄꦗ꧀ꦙꦠ꧀ꦠꦁ ꦱꦩ꧀ꦥꦱꦴꦢꦤꦁ ꦕꦺꦠꦱꦺꦴ ꦌꦏꦺꦴꦢꦶꦨꦴꦮꦁ ꦄꦮꦶꦠꦏ꧀ꦏꦁ ꦄꦮꦶꦕꦴꦫꦁ ꦱꦩꦴꦣꦶꦗꦁ ꦥꦷꦠꦶꦱꦸꦑꦁ ꦢꦸꦠꦶꦪꦁ ꦙꦴꦤꦁ ꦈꦥꦱꦩ꧀ꦥꦗ꧀ꦗ ꦮꦶꦲꦴꦱꦶꦁ. ꦥꦷꦠꦶꦪꦴ ꦕ ꦮꦶꦫꦴꦒꦴ ꦈꦥꦺꦏ꧀ꦑꦏꦺꦴ ꦕ ꦮꦶꦲꦴꦱꦶꦁ, ꦱꦠꦺꦴ ꦕ ꦱꦩ꧀ꦥꦗꦴꦤꦺꦴ ꦱꦸꦑꦚ꧀ꦕ ꦏꦴꦪꦺꦤ ꦥꦛꦶꦱꦁꦮꦺꦢꦺꦱꦶꦁ; ꦪꦁ ꦠꦁ ꦄꦫꦶꦪꦴ ꦄꦴꦕꦶꦏ꧀ꦑꦤ꧀ꦠꦶ – ‘ꦈꦥꦺꦏ꧀ꦑꦏꦺꦴ ꦱꦠꦶꦩꦴ ꦱꦸꦑꦮꦶꦲꦴꦫꦷ’ꦠꦶ ꦠꦠꦶꦪꦁ ꦙꦴꦤꦁ ꦈꦥꦱꦩ꧀ꦥꦗ꧀ꦗ ꦮꦶꦲꦴꦱꦶꦁ. ꦱꦸꦑꦱ꧀ꦱ ꦕ ꦥꦲꦴꦤꦴ ꦢꦸꦏ꧀ꦑꦱ꧀ꦱ ꦕ ꦥꦲꦴꦤꦴ ꦥꦸꦧ꧀ꦧꦺꦮ ꦱꦺꦴꦩꦤꦱ꧀ꦱꦢꦺꦴꦩꦤꦱ꧀ꦱꦴꦤꦁ ꦄꦠ꧀ꦡꦔ꧀ꦒꦩꦴ ꦄꦢꦸꦏ꧀ꦑꦩꦱꦸꦑꦁ ꦈꦥꦺꦏ꧀ꦑꦴꦱꦠꦶꦥꦴꦫꦶꦱꦸꦢ꧀ꦣꦶꦁ ꦕꦠꦸꦠ꧀ꦡꦁ ꦙꦴꦤꦁ ꦈꦥꦱꦩ꧀ꦥꦗ꧀ꦗ ꦮꦶꦲꦴꦱꦶꦁ.

꧕꧒. ‘‘ꦱꦺꦴ ꦌꦮꦁ ꦱꦩꦴꦲꦶꦠꦺ ꦕꦶꦠ꧀ꦠꦺ ꦥꦫꦶꦱꦸꦢ꧀ꦣꦺ ꦥꦫꦶꦪꦺꦴꦢꦴꦠꦺ ꦄꦤꦔ꧀ꦒꦟꦺ ꦮꦶꦒꦠꦹꦥꦏ꧀ꦏꦶꦭꦺꦱꦺ ꦩꦸꦢꦸꦨꦹꦠꦺ ꦏꦩ꧀ꦩꦤꦶꦪꦺ ꦜꦶꦠꦺ ꦄꦴꦤꦺꦚ꧀ꦗꦥ꧀ꦥꦠ꧀ꦠꦺ ꦥꦸꦧ꧀ꦧꦺꦤꦶꦮꦴꦱꦴꦤꦸꦱ꧀ꦱꦠꦶꦚꦴꦟꦴꦪ ꦕꦶꦠ꧀ꦠꦁ ꦄꦨꦶꦤꦶꦤ꧀ꦤꦴꦩꦺꦱꦶꦁ. ꦱꦺꦴ ꦄꦤꦺꦏꦮꦶꦲꦶꦠꦁ ꦥꦸꦧ꧀ꦧꦺꦤꦶꦮꦴꦱꦁ ꦄꦤꦸꦱ꧀ꦱꦫꦴꦩꦶ, ꦱꦺꦪ꧀ꦪꦡꦶꦢꦁ – ꦌꦏꦩ꧀ꦥꦶ ꦗꦴꦠꦶꦁ ꦢ꧀ꦮꦺꦥꦶ ꦗꦴꦠꦶꦪꦺꦴ ꦠꦶꦱ꧀ꦱꦺꦴꦥꦶ ꦗꦴꦠꦶꦪꦺꦴ ꦕꦠꦱ꧀ꦱꦺꦴꦥꦶ ꦗꦴꦠꦶꦪꦺꦴ ꦥꦚ꧀ꦕꦥꦶ ꦗꦴꦠꦶꦪꦺꦴ ꦢꦱꦥꦶ ꦗꦴꦠꦶꦪꦺꦴ ꦮꦷꦱꦩ꧀ꦥꦶ ꦗꦴꦠꦶꦪꦺꦴ ꦠꦶꦁꦱꦩ꧀ꦥꦶ ꦗꦴꦠꦶꦪꦺꦴ ꦕꦠ꧀ꦠꦴꦭꦷꦱꦩ꧀ꦥꦶ ꦗꦴꦠꦶꦪꦺꦴ ꦥꦚ꧀ꦚꦴꦱꦩ꧀ꦥꦶ ꦗꦴꦠꦶꦪꦺꦴ ꦗꦴꦠꦶꦱꦠꦩ꧀ꦥꦶ ꦗꦴꦠꦶꦱꦲꦱ꧀ꦱꦩ꧀ꦥꦶ ꦗꦴꦠꦶꦱꦠꦱꦲꦱ꧀ꦱꦩ꧀ꦥꦶ ꦄꦤꦺꦏꦺꦥꦶ ꦱꦁꦮꦛ꧀ꦛꦏꦥ꧀ꦥꦺ ꦄꦤꦺꦏꦺꦥꦶ ꦮꦶꦮꦛ꧀ꦛꦏꦥ꧀ꦥꦺ ꦄꦤꦺꦏꦺꦥꦶ ꦱꦁꦮꦛ꧀ꦛꦮꦶꦮꦛ꧀ꦛꦏꦥ꧀ꦥꦺ – ‘ꦄꦩꦸꦠ꧀ꦫꦴꦱꦶꦁ ꦌꦮꦁꦤꦴꦩꦺꦴ ꦌꦮꦁꦒꦺꦴꦠ꧀ꦠꦺꦴ ꦌꦮꦁꦮꦟ꧀ꦟꦺꦴ ꦌꦮꦩꦴꦲꦴꦫꦺꦴ ꦌꦮꦁꦱꦸꦑꦢꦸꦏ꧀ꦑꦥ꧀ꦥꦛꦶꦱꦁꦮꦺꦢꦷ ꦌꦮꦩꦴꦪꦸꦥꦫꦶꦪꦤ꧀ꦠꦺꦴ, ꦱꦺꦴ ꦠꦠꦺꦴ ꦕꦸꦠꦺꦴ ꦄꦩꦸꦠ꧀ꦫ ꦈꦢꦥꦴꦢꦶꦁ; ꦠꦠ꧀ꦫꦴꦥꦴꦱꦶꦁ ꦌꦮꦁꦤꦴꦩꦺꦴ ꦌꦮꦁꦒꦺꦴꦠ꧀ꦠꦺꦴ ꦌꦮꦁꦮꦟ꧀ꦟꦺꦴ ꦌꦮꦩꦴꦲꦴꦫꦺꦴ ꦌꦮꦁꦱꦸꦑꦢꦸꦏ꧀ꦑꦥ꧀ꦥꦛꦶꦱꦁꦮꦺꦢꦷ ꦌꦮꦩꦴꦪꦸꦥꦫꦶꦪꦤ꧀ꦠꦺꦴ, ꦱꦺꦴ ꦠꦠꦺꦴ ꦕꦸꦠꦺꦴ ꦆꦣꦹꦥꦥꦤ꧀ꦤꦺꦴ’ꦠꦶ. ꦆꦠꦶ ꦱꦴꦏꦴꦫꦁ ꦱꦈꦢ꧀ꦢꦺꦱꦁ ꦄꦤꦺꦏꦮꦶꦲꦶꦠꦁ ꦥꦸꦧ꧀ꦧꦺꦤꦶꦮꦴꦱꦁ ꦄꦤꦸꦱ꧀ꦱꦫꦴꦩꦶ. ꦄꦪꦁ ꦑꦺꦴ ꦩꦺ, ꦧ꧀ꦫꦴꦲ꧀ꦩꦟ, ꦫꦠ꧀ꦠꦶꦪꦴ ꦥꦜꦩꦺ ꦪꦴꦩꦺ ꦥꦜꦩꦴ ꦮꦶꦗ꧀ꦗꦴ ꦄꦣꦶꦒꦠꦴ, ꦄꦮꦶꦗ꧀ꦗꦴ ꦮꦶꦲꦠꦴ ꦮꦶꦗ꧀ꦗꦴ ꦈꦥ꧀ꦥꦤ꧀ꦤꦴ, ꦠꦩꦺꦴ ꦮꦶꦲꦠꦺꦴ ꦄꦴꦭꦺꦴꦏꦺꦴ ꦈꦥ꧀ꦥꦤ꧀ꦤꦺꦴ, ꦪꦡꦴ ꦠꦁ ꦄꦥ꧀ꦥꦩꦠ꧀ꦠꦱ꧀ꦱ ꦄꦴꦠꦴꦥꦶꦤꦺꦴ ꦥꦲꦶꦠꦠ꧀ꦠꦱ꧀ꦱ ꦮꦶꦲꦫꦠꦺꦴ.

꧕꧓. ‘‘ꦱꦺꦴ ꦌꦮꦁ ꦱꦩꦴꦲꦶꦠꦺ ꦕꦶꦠ꧀ꦠꦺ ꦥꦫꦶꦱꦸꦢ꧀ꦣꦺ ꦥꦫꦶꦪꦺꦴꦢꦴꦠꦺ ꦄꦤꦔ꧀ꦒꦟꦺ ꦮꦶꦒꦠꦹꦥꦏ꧀ꦏꦶꦭꦺꦱꦺ ꦩꦸꦢꦸꦨꦹꦠꦺ ꦏꦩ꧀ꦩꦤꦶꦪꦺ ꦜꦶꦠꦺ ꦄꦴꦤꦺꦚ꧀ꦗꦥ꧀ꦥꦠ꧀ꦠꦺ ꦱꦠ꧀ꦠꦴꦤꦁ ꦕꦸꦠꦹꦥꦥꦴꦠꦚꦴꦟꦴꦪ ꦕꦶꦠ꧀ꦠꦁ ꦄꦨꦶꦤꦶꦤ꧀ꦤꦴꦩꦺꦱꦶꦁ. ꦱꦺꦴ ꦢꦶꦧ꧀ꦧꦺꦤ ꦕꦏ꧀ꦑꦸꦤꦴ ꦮꦶꦱꦸꦢ꧀ꦣꦺꦤ ꦄꦠꦶꦏ꧀ꦏꦤ꧀ꦠꦩꦴꦤꦸꦱꦏꦺꦤ ꦱꦠ꧀ꦠꦺ ꦥꦱ꧀ꦱꦴꦩꦶ ꦕꦮꦩꦴꦤꦺ ꦈꦥꦥꦗ꧀ꦗꦩꦴꦤꦺ ꦲꦷꦤꦺ ꦥꦟꦷꦠꦺ ꦱꦸꦮꦟ꧀ꦟꦺ ꦢꦸꦧ꧀ꦧꦟ꧀ꦟꦺ ꦱꦸꦒꦠꦺ ꦢꦸꦒ꧀ꦒꦠꦺ ꦪꦡꦴꦏꦩ꧀ꦩꦹꦥꦒꦺ ꦱꦠ꧀ꦠꦺ ꦥꦗꦴꦤꦴꦩꦶ – ‘ꦆꦩꦺ ꦮꦠ ꦨꦺꦴꦤ꧀ꦠꦺꦴ ꦱꦠ꧀ꦠꦴ ꦏꦴꦪꦢꦸꦕ꧀ꦕꦫꦶꦠꦺꦤ ꦱꦩꦤ꧀ꦤꦴꦒꦠꦴ ꦮꦕꦷꦢꦸꦕ꧀ꦕꦫꦶꦠꦺꦤ ꦱꦩꦤ꧀ꦤꦴꦒꦠꦴ ꦩꦤꦺꦴꦢꦸꦕ꧀ꦕꦫꦶꦠꦺꦤ ꦱꦩꦤ꧀ꦤꦴꦒꦠꦴ ꦄꦫꦶꦪꦴꦤꦁ ꦈꦥꦮꦴꦢꦏꦴ ꦩꦶꦕ꧀ꦖꦴꦢꦶꦛ꧀ꦜꦶꦏꦴ ꦩꦶꦕ꧀ꦖꦴꦢꦶꦛ꧀ꦜꦶꦏꦩ꧀ꦩꦱꦩꦴꦢꦴꦤꦴ; ꦠꦺ ꦏꦴꦪꦱ꧀ꦱ ꦨꦺꦢꦴ ꦥꦫꦁ ꦩꦫꦟꦴ ꦄꦥꦴꦪꦁ ꦢꦸꦒ꧀ꦒꦠꦶꦁ ꦮꦶꦤꦶꦥꦴꦠꦁ ꦤꦶꦫꦪꦁ ꦈꦥꦥꦤ꧀ꦤꦴ. ꦆꦩꦺ ꦮꦴ ꦥꦤ ꦨꦺꦴꦤ꧀ꦠꦺꦴ ꦱꦠ꧀ꦠꦴ ꦏꦴꦪꦱꦸꦕꦫꦶꦠꦺꦤ ꦱꦩꦤ꧀ꦤꦴꦒꦠꦴ ꦮꦕꦷꦱꦸꦕꦫꦶꦠꦺꦤ ꦱꦩꦤ꧀ꦤꦴꦒꦠꦴ ꦩꦤꦺꦴꦱꦸꦕꦫꦶꦠꦺꦤ ꦱꦩꦤ꧀ꦤꦴꦒꦠꦴ ꦄꦫꦶꦪꦴꦤꦁ ꦄꦤꦸꦥꦮꦴꦢꦏꦴ ꦱꦩ꧀ꦩꦴꦢꦶꦛ꧀ꦜꦶꦏꦴ ꦱꦩ꧀ꦩꦴꦢꦶꦛ꧀ꦜꦶꦏꦩ꧀ꦩꦱꦩꦴꦢꦴꦤꦴ; ꦠꦺ ꦏꦴꦪꦱ꧀ꦱ ꦨꦺꦢꦴ ꦥꦫꦁ ꦩꦫꦟꦴ ꦱꦸꦒꦠꦶꦁ ꦱꦒ꧀ꦒꦁ ꦭꦺꦴꦏꦁ ꦈꦥꦥꦤ꧀ꦤꦴ’ꦠꦶ. ꦆꦠꦶ ꦢꦶꦧ꧀ꦧꦺꦤ ꦕꦏ꧀ꦑꦸꦤꦴ ꦮꦶꦱꦸꦢ꧀ꦣꦺꦤ ꦄꦠꦶꦏ꧀ꦏꦤ꧀ꦠꦩꦴꦤꦸꦱꦏꦺꦤ ꦱꦠ꧀ꦠꦺ ꦥꦱ꧀ꦱꦴꦩꦶ ꦕꦮꦩꦴꦤꦺ ꦈꦥꦥꦗ꧀ꦗꦩꦴꦤꦺ ꦲꦷꦤꦺ ꦥꦟꦷꦠꦺ ꦱꦸꦮꦟ꧀ꦟꦺ ꦢꦸꦧ꧀ꦧꦟ꧀ꦟꦺ ꦱꦸꦒꦠꦺ ꦢꦸꦒ꧀ꦒꦠꦺ ꦪꦡꦴꦏꦩ꧀ꦩꦹꦥꦒꦺ ꦱꦠ꧀ꦠꦺ ꦥꦗꦴꦤꦴꦩꦶ. ꦄꦪꦁ ꦑꦺꦴ ꦩꦺ, ꦧ꧀ꦫꦴꦲ꧀ꦩꦟ, ꦫꦠ꧀ꦠꦶꦪꦴ ꦩꦗ꧀ꦙꦶꦩꦺ ꦪꦴꦩꦺ ꦢꦸꦠꦶꦪꦴ ꦮꦶꦗ꧀ꦗꦴ ꦄꦣꦶꦒꦠꦴ, ꦄꦮꦶꦗ꧀ꦗꦴ ꦮꦶꦲꦠꦴ ꦮꦶꦗ꧀ꦗꦴ ꦈꦥ꧀ꦥꦤ꧀ꦤꦴ, ꦠꦩꦺꦴ ꦮꦶꦲꦠꦺꦴ ꦄꦴꦭꦺꦴꦏꦺꦴ ꦈꦥ꧀ꦥꦤ꧀ꦤꦺꦴ, ꦪꦡꦴ ꦠꦁ ꦄꦥ꧀ꦥꦩꦠ꧀ꦠꦱ꧀ꦱ ꦄꦴꦠꦴꦥꦶꦤꦺꦴ ꦥꦲꦶꦠꦠ꧀ꦠꦱ꧀ꦱ ꦮꦶꦲꦫꦠꦺꦴ.

꧕꧔. ‘‘ꦱꦺꦴ ꦌꦮꦁ ꦱꦩꦴꦲꦶꦠꦺ ꦕꦶꦠ꧀ꦠꦺ ꦥꦫꦶꦱꦸꦢ꧀ꦣꦺ ꦥꦫꦶꦪꦺꦴꦢꦴꦠꦺ ꦄꦤꦔ꧀ꦒꦟꦺ ꦮꦶꦒꦠꦹꦥꦏ꧀ꦏꦶꦭꦺꦱꦺ ꦩꦸꦢꦸꦨꦹꦠꦺ ꦏꦩ꧀ꦩꦤꦶꦪꦺ ꦜꦶꦠꦺ ꦄꦴꦤꦺꦚ꧀ꦗꦥ꧀ꦥꦠ꧀ꦠꦺ ꦄꦴꦱꦮꦴꦤꦁ ꦑꦪꦚꦴꦟꦴꦪ ꦕꦶꦠ꧀ꦠꦁ ꦄꦨꦶꦤꦶꦤ꧀ꦤꦴꦩꦺꦱꦶꦁ. ꦱꦺꦴ ‘ꦆꦢꦁ ꦢꦸꦏ꧀ꦑ’ꦤ꧀ꦠꦶ ꦪꦡꦴꦨꦹꦠꦁ ꦄꦧ꧀ꦨꦚ꧀ꦚꦴꦱꦶꦁ, ‘ꦄꦪꦁ ꦢꦸꦏ꧀ꦑꦱꦩꦸꦢꦪꦺꦴ’ꦠꦶ ꦪꦡꦴꦨꦹꦠꦁ ꦄꦧ꧀ꦨꦚ꧀ꦚꦴꦱꦶꦁ, ‘ꦄꦪꦁ ꦢꦸꦏ꧀ꦑꦤꦶꦫꦺꦴꦣꦺꦴ’ꦠꦶ ꦪꦡꦴꦨꦹꦠꦁ ꦄꦧ꧀ꦨꦚ꧀ꦚꦴꦱꦶꦁ, ‘ꦄꦪꦁ ꦢꦸꦏ꧀ꦑꦤꦶꦫꦺꦴꦣꦒꦴꦩꦶꦤꦷ ꦥꦛꦶꦥꦢꦴ’ꦠꦶ ꦪꦡꦴꦨꦹꦠꦁ ꦄꦧ꧀ꦨꦚ꧀ꦚꦴꦱꦶꦁ. ‘ꦆꦩꦺ ꦄꦴꦱꦮꦴ’ꦠꦶ ꦪꦡꦴꦨꦹꦠꦁ ꦄꦧ꧀ꦨꦚ꧀ꦚꦴꦱꦶꦁ, ‘ꦄꦪꦁ ꦄꦴꦱꦮꦱꦩꦸꦢꦪꦺꦴ’ꦠꦶ ꦪꦡꦴꦨꦹꦠꦁ ꦄꦧ꧀ꦨꦚ꧀ꦚꦴꦱꦶꦁ, ‘ꦄꦪꦁ ꦄꦴꦱꦮꦤꦶꦫꦺꦴꦣꦺꦴ’ꦠꦶ ꦪꦡꦴꦨꦹꦠꦁ ꦄꦧ꧀ꦨꦚ꧀ꦚꦴꦱꦶꦁ, ‘ꦄꦪꦁ ꦄꦴꦱꦮꦤꦶꦫꦺꦴꦣꦒꦴꦩꦶꦤꦷ ꦥꦛꦶꦥꦢꦴ’ꦠꦶ ꦪꦡꦴꦨꦹꦠꦁ ꦄꦧ꧀ꦨꦚ꧀ꦚꦴꦱꦶꦁ. ꦠꦱ꧀ꦱ ꦩꦺ ꦌꦮꦁ ꦗꦴꦤꦠꦺꦴ ꦌꦮꦁ ꦥꦱ꧀ꦱꦠꦺꦴ ꦏꦴꦩꦴꦱꦮꦴꦥꦶ ꦕꦶꦠ꧀ꦠꦁ ꦮꦶꦩꦸꦕ꧀ꦕꦶꦠ꧀ꦡ, ꦨꦮꦴꦱꦮꦴꦥꦶ ꦕꦶꦠ꧀ꦠꦁ ꦮꦶꦩꦸꦕ꧀ꦕꦶꦠ꧀ꦡ, ꦄꦮꦶꦗ꧀ꦗꦴꦱꦮꦴꦥꦶ ꦕꦶꦠ꧀ꦠꦁ ꦮꦶꦩꦸꦕ꧀ꦕꦶꦠ꧀ꦡ. ꦮꦶꦩꦸꦠ꧀ꦠꦱ꧀ꦩꦶꦁ ꦮꦶꦩꦸꦠ꧀ꦠꦩꦶꦠꦶ ꦚꦴꦟꦁ ꦄꦲꦺꦴꦱꦶ. ‘ꦑꦷꦟꦴ ꦗꦴꦠꦶ, ꦮꦸꦱꦶꦠꦁ ꦧ꧀ꦫꦲ꧀ꦩꦕꦫꦶꦪꦁ, ꦏꦠꦁ ꦏꦫꦟꦷꦪꦁ, ꦤꦴꦥꦫꦁ ꦆꦠ꧀ꦡꦠ꧀ꦠꦴꦪꦴ’ꦠꦶ ꦄꦧ꧀ꦨꦚ꧀ꦚꦴꦱꦶꦁ. ꦄꦪꦁ ꦑꦺꦴ ꦩꦺ, ꦧ꧀ꦫꦴꦲ꧀ꦩꦟ, ꦫꦠ꧀ꦠꦶꦪꦴ ꦥꦕ꧀ꦖꦶꦩꦺ ꦪꦴꦩꦺ ꦠꦠꦶꦪꦴ ꦮꦶꦗ꧀ꦗꦴ ꦄꦣꦶꦒꦠꦴ, ꦄꦮꦶꦗ꧀ꦗꦴ ꦮꦶꦲꦠꦴ ꦮꦶꦗ꧀ꦗꦴ ꦈꦥ꧀ꦥꦤ꧀ꦤꦴ, ꦠꦩꦺꦴ ꦮꦶꦲꦠꦺꦴ ꦄꦴꦭꦺꦴꦏꦺꦴ ꦈꦥ꧀ꦥꦤ꧀ꦤꦺꦴ, ꦪꦡꦴ ꦠꦁ ꦄꦥ꧀ꦥꦩꦠ꧀ꦠꦱ꧀ꦱ ꦄꦴꦠꦴꦥꦶꦤꦺꦴ ꦥꦲꦶꦠꦠ꧀ꦠꦱ꧀ꦱ ꦮꦶꦲꦫꦠꦺꦴ.

꧕꧕. ‘‘ꦱꦶꦪꦴ ꦑꦺꦴ ꦥꦤ ꦠꦺ, ꦧ꧀ꦫꦴꦲ꧀ꦩꦟ, ꦌꦮꦩꦱ꧀ꦱ – ‘ꦄꦗ꧀ꦗꦴꦥꦶ ꦤꦹꦤ ꦱꦩꦟꦺꦴ ꦒꦺꦴꦠꦩꦺꦴ ꦄꦮꦷꦠꦫꦴꦒꦺꦴ ꦄꦮꦷꦠꦢꦺꦴꦱꦺꦴ ꦄꦮꦷꦠꦩꦺꦴꦲꦺꦴ, ꦠꦱ꧀ꦩꦴ ꦄꦫꦚ꧀ꦚꦮꦤꦥꦠ꧀ꦡꦴꦤꦶ ꦥꦤ꧀ꦠꦴꦤꦶ ꦱꦺꦤꦴꦱꦤꦴꦤꦶ ꦥꦛꦶꦱꦺꦮꦠꦷ’ꦠꦶ. ꦤ ꦑꦺꦴ ꦥꦤꦺꦠꦁ, ꦧ꧀ꦫꦴꦲ꧀ꦩꦟ, ꦌꦮꦁ ꦢꦛ꧀ꦜꦧ꧀ꦧꦁ. ꦢ꧀ꦮꦺ ꦑꦺꦴ ꦄꦲꦁ, ꦧ꧀ꦫꦴꦲ꧀ꦩꦟ, ꦄꦠ꧀ꦡꦮꦱꦺ ꦱꦩ꧀ꦥꦱ꧀ꦱꦩꦴꦤꦺꦴ ꦄꦫꦚ꧀ꦚꦮꦤꦥꦠ꧀ꦡꦴꦤꦶ ꦥꦤ꧀ꦠꦴꦤꦶ ꦱꦺꦤꦴꦱꦤꦴꦤꦶ ꦥꦛꦶꦱꦺꦮꦴꦩꦶ – ꦄꦠ꧀ꦠꦤꦺꦴ ꦕ ꦢꦶꦛ꧀ꦜꦣꦩ꧀ꦩꦱꦸꦑꦮꦶꦲꦴꦫꦁ ꦱꦩ꧀ꦥꦱ꧀ꦱꦩꦴꦤꦺꦴ, ꦥꦕ꧀ꦖꦶꦩꦚ꧀ꦕ ꦗꦤꦠꦁ ꦄꦤꦸꦏꦩ꧀ꦥꦩꦴꦤꦺꦴ’’ꦠꦶ.

꧕꧖. ‘‘ꦄꦤꦸꦏꦩ꧀ꦥꦶꦠꦫꦹꦥꦴ ꦮꦠꦴꦪꦁ ꦨꦺꦴꦠꦴ ꦒꦺꦴꦠꦩꦺꦤ ꦥꦕ꧀ꦖꦶꦩꦴ ꦗꦤꦠꦴ, ꦪꦡꦴ ꦠꦁ ꦄꦫꦲꦠꦴ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦤ. ꦄꦨꦶꦏ꧀ꦏꦤ꧀ꦠꦁ, ꦨꦺꦴ ꦒꦺꦴꦠꦩ! ꦄꦨꦶꦏ꧀ꦏꦤ꧀ꦠꦁ, ꦨꦺꦴ ꦒꦺꦴꦠꦩ! ꦱꦺꦪ꧀ꦪꦡꦴꦥꦶ, ꦨꦺꦴ ꦒꦺꦴꦠꦩ, ꦤꦶꦏ꧀ꦏꦸꦗ꧀ꦗꦶꦠꦁ ꦮꦴ ꦈꦏ꧀ꦏꦸꦗ꧀ꦗꦺꦪ꧀ꦪ, ꦥꦛꦶꦕ꧀ꦖꦤ꧀ꦤꦁ ꦮꦴ ꦮꦶꦮꦫꦺꦪ꧀ꦪ, ꦩꦹꦭ꦳꧀ꦲꦱ꧀ꦱ ꦮꦴ ꦩꦒ꧀ꦒꦁ ꦄꦴꦕꦶꦏ꧀ꦑꦺꦪ꧀ꦪ, ꦄꦤ꧀ꦣꦏꦴꦫꦺ ꦮꦴ ꦠꦺꦭꦥꦗ꧀ꦗꦺꦴꦠꦁ ꦣꦴꦫꦺꦪ꧀ꦪ – ‘ꦕꦏ꧀ꦑꦸꦩꦤ꧀ꦠꦺꦴ ꦫꦹꦥꦴꦤꦶ ꦢꦏ꧀ꦑꦤ꧀ꦠꦷ’ꦠꦶ; ꦌꦮꦩꦺꦮꦁ ꦨꦺꦴꦠꦴ ꦒꦺꦴꦠꦩꦺꦤ ꦄꦤꦺꦏꦥꦫꦶꦪꦴꦪꦺꦤ ꦣꦩ꧀ꦩꦺꦴ ꦥꦏꦴꦱꦶꦠꦺꦴ. ꦌꦱꦴꦲꦁ ꦨꦮꦤ꧀ꦠꦁ ꦒꦺꦴꦠꦩꦁ ꦱꦫꦟꦁ ꦒꦕ꧀ꦖꦴꦩꦶ ꦣꦩ꧀ꦩꦚ꧀ꦕ ꦨꦶꦏ꧀ꦑꦸꦱꦔ꧀ꦓꦚ꧀ꦕ. ꦈꦥꦴꦱꦏꦁ ꦩꦁ ꦨꦮꦁ ꦒꦺꦴꦠꦩꦺꦴ ꦣꦴꦫꦺꦠꦸ ꦄꦗ꧀ꦗꦠꦒ꧀ꦒꦺ ꦥꦴꦟꦸꦥꦺꦠꦁ ꦱꦫꦟꦁ ꦒꦠ’’ꦤ꧀ꦠꦶ.

ꦨꦪꦨꦺꦫꦮꦱꦸꦠ꧀ꦠꦁ ꦤꦶꦛ꧀ꦜꦶꦠꦁ ꦕꦠꦸꦠ꧀ꦡꦁ.