꧖. ꦱꦺꦴꦟꦱꦸꦠ꧀ꦠꦁ

꧔꧖. ꦌꦮꦁ ꦩꦺ ꦱꦸꦠꦁ – ꦌꦏꦁ ꦱꦩꦪꦁ ꦨꦒꦮꦴ ꦱꦴꦮꦠ꧀ꦡꦶꦪꦁ ꦮꦶꦲꦫꦠꦶ ꦗꦺꦠꦮꦤꦺ ꦄꦤꦴꦡꦥꦶꦟ꧀ꦝꦶꦏꦱ꧀ꦱ ꦄꦴꦫꦴꦩꦺ. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦄꦴꦪꦱ꧀ꦩꦴ ꦩꦲꦴꦏꦕ꧀ꦕꦴꦤꦺꦴ ꦄꦮꦤ꧀ꦠꦷꦱꦸ ꦮꦶꦲꦫꦠꦶ ꦏꦸꦫꦫꦓꦫꦺ [ꦏꦸꦫꦸꦫꦓꦫꦺ (ꦱ꧀ꦪꦴ. ꦩꦲꦴꦮ. ꧒꧕꧗), ꦏꦸꦭꦓꦫꦺ (ꦏ.)] ꦥꦮꦠ꧀ꦠꦺ ꦥꦧ꧀ꦧꦠꦺ. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦱꦺꦴꦟꦺꦴ ꦈꦥꦴꦱꦏꦺꦴ ꦏꦸꦛꦶꦏꦟ꧀ꦟꦺꦴ ꦄꦴꦪꦱ꧀ꦩꦠꦺꦴ ꦩꦲꦴꦏꦕ꧀ꦕꦴꦤꦱ꧀ꦱ ꦈꦥꦛ꧀ꦜꦴꦏꦺꦴ ꦲꦺꦴꦠꦶ.

ꦄꦡ ꦑꦺꦴ ꦱꦺꦴꦟꦱ꧀ꦱ ꦈꦥꦴꦱꦏꦱ꧀ꦱ ꦏꦸꦛꦶꦏꦟ꧀ꦟꦱ꧀ꦱ ꦫꦲꦺꦴꦒꦠꦱ꧀ꦱ ꦥꦛꦶꦱꦭ꧀ꦭꦷꦤꦱ꧀ꦱ ꦌꦮꦁ ꦕꦺꦠꦱꦺꦴ ꦥꦫꦶꦮꦶꦠꦏ꧀ꦏꦺꦴ ꦈꦢꦥꦴꦢꦶ – ‘‘ꦪꦡꦴ ꦪꦡꦴ ꦑꦺꦴ ꦄꦪ꧀ꦪꦺꦴ ꦩꦲꦴꦏꦕ꧀ꦕꦴꦤꦺꦴ ꦣꦩ꧀ꦩꦁ ꦢꦺꦱꦺꦠꦶ ꦤꦪꦶꦢꦁ ꦱꦸꦏꦫꦁ ꦄꦒꦴꦫꦁ ꦄꦗ꧀ꦙꦴꦮꦱꦠꦴ ꦌꦏꦤ꧀ꦠꦥꦫꦶꦥꦸꦟ꧀ꦟꦁ ꦌꦏꦤ꧀ꦠꦥꦫꦶꦱꦸꦢ꧀ꦣꦁ ꦱꦔ꧀ꦑꦭꦶꦑꦶꦠꦁ ꦧ꧀ꦫꦲ꧀ꦩꦕꦫꦶꦪꦁ ꦕꦫꦶꦠꦸꦁ. ꦪꦁꦤꦹꦤꦴꦲꦁ ꦏꦺꦱꦩꦱ꧀ꦱꦸꦁ ꦎꦲꦴꦫꦺꦠ꧀ꦮꦴ ꦏꦴꦱꦴꦪꦴꦤꦶ ꦮꦠ꧀ꦡꦴꦤꦶ ꦄꦕ꧀ꦖꦴꦢꦺꦠ꧀ꦮꦴ ꦄꦒꦴꦫꦱ꧀ꦩꦴ ꦄꦤꦒꦴꦫꦶꦪꦁ ꦥꦧ꧀ꦧꦗꦺꦪ꧀ꦪ’’ꦤ꧀ꦠꦶ.

ꦄꦡ ꦑꦺꦴ ꦱꦺꦴꦟꦺꦴ ꦈꦥꦴꦱꦏꦺꦴ ꦏꦸꦛꦶꦏꦟ꧀ꦟꦺꦴ ꦪꦺꦤꦴꦪꦱ꧀ꦩꦴ ꦩꦲꦴꦏꦕ꧀ꦕꦴꦤꦺꦴ ꦠꦺꦤꦸꦥꦱꦔ꧀ꦏꦩꦶ; ꦈꦥꦱꦔ꧀ꦏꦩꦶꦠ꧀ꦮꦴ ꦄꦴꦪꦱ꧀ꦩꦤ꧀ꦠꦁ ꦩꦲꦴꦏꦕ꧀ꦕꦴꦤꦁ ꦄꦨꦶꦮꦴꦢꦺꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦷꦢꦶ. ꦌꦏꦩꦤ꧀ꦠꦁ ꦤꦶꦱꦶꦤ꧀ꦤꦺꦴ ꦑꦺꦴ ꦱꦺꦴꦟꦺꦴ ꦈꦥꦴꦱꦏꦺꦴ ꦏꦸꦛꦶꦏꦟ꧀ꦟꦺꦴ ꦄꦴꦪꦱ꧀ꦩꦤ꧀ꦠꦁ ꦩꦲꦴꦏꦕ꧀ꦕꦴꦤꦁ ꦌꦠꦢꦮꦺꦴꦕ –

‘‘ꦆꦣ ꦩꦪ꧀ꦲꦁ, ꦨꦤ꧀ꦠꦺ, ꦫꦲꦺꦴꦒꦠꦱ꧀ꦱ ꦥꦛꦶꦱꦭ꧀ꦭꦷꦤꦱ꧀ꦱ ꦌꦮꦁ ꦕꦺꦠꦱꦺꦴ ꦥꦫꦶꦮꦶꦠꦏ꧀ꦏꦺꦴ ꦈꦢꦥꦴꦢꦶ – ‘ꦪꦡꦴ ꦪꦡꦴ ꦑꦺꦴ ꦄꦪ꧀ꦪꦺꦴ ꦩꦲꦴꦏꦕ꧀ꦕꦴꦤꦺꦴ ꦣꦩ꧀ꦩꦁ ꦢꦺꦱꦺꦠꦶ ꦤꦪꦶꦢꦁ ꦱꦸꦏꦫꦁ ꦄꦒꦴꦫꦁ ꦄꦗ꧀ꦙꦴꦮꦱꦠꦴ ꦌꦏꦤ꧀ꦠꦥꦫꦶꦥꦸꦟ꧀ꦟꦁ ꦌꦏꦤ꧀ꦠꦥꦫꦶꦱꦸꦢ꧀ꦣꦁ ꦱꦔ꧀ꦑꦭꦶꦑꦶꦠꦁ ꦧ꧀ꦫꦲ꧀ꦩꦕꦫꦶꦪꦁ ꦕꦫꦶꦠꦸꦁ. ꦪꦁꦤꦹꦤꦴꦲꦁ ꦏꦺꦱꦩꦱ꧀ꦱꦸꦁ ꦎꦲꦴꦫꦺꦠ꧀ꦮꦴ ꦏꦴꦱꦴꦪꦴꦤꦶ ꦮꦠ꧀ꦡꦴꦤꦶ ꦄꦕ꧀ꦖꦴꦢꦺꦠ꧀ꦮꦴ ꦄꦒꦴꦫꦱ꧀ꦩꦴ ꦄꦤꦒꦴꦫꦶꦪꦁ ꦥꦧ꧀ꦧꦗꦺꦪ꧀ꦪ’ꦤ꧀ꦠꦶ. ꦥꦧ꧀ꦧꦴꦗꦺꦠꦸ ꦩꦁ, ꦨꦤ꧀ꦠꦺ, ꦄꦪ꧀ꦪꦺꦴ ꦩꦲꦴꦏꦕ꧀ꦕꦴꦤꦺꦴ’’ꦠꦶ.

ꦌꦮꦁ ꦮꦸꦠ꧀ꦠꦺ, ꦄꦴꦪꦱ꧀ꦩꦴ ꦩꦲꦴꦏꦕ꧀ꦕꦴꦤꦺꦴ ꦱꦺꦴꦟꦁ ꦈꦥꦴꦱꦏꦁ ꦏꦸꦛꦶꦏꦟ꧀ꦟꦁ ꦌꦠꦢꦮꦺꦴꦕ – ‘‘ꦢꦸꦏ꧀ꦏꦫꦁ ꦑꦺꦴ, ꦱꦺꦴꦟ, ꦪꦴꦮꦗꦷꦮꦁ ꦌꦏꦨꦠ꧀ꦠꦁ ꦌꦏꦱꦺꦪ꧀ꦪꦁ ꦧ꧀ꦫꦲ꧀ꦩꦕꦫꦶꦪꦁ. ꦆꦔ꧀ꦓ ꦠ꧀ꦮꦁ, ꦱꦺꦴꦟ, ꦠꦠ꧀ꦡꦺꦮ ꦄꦴꦒꦴꦫꦶꦏꦨꦹꦠꦺꦴ ꦱꦩꦴꦤꦺꦴ ꦧꦸꦢ꧀ꦣꦴꦤꦁ ꦱꦴꦱꦤꦁ ꦄꦤꦸꦪꦸꦚ꧀ꦗ ꦏꦴꦭꦪꦸꦠ꧀ꦠꦁ ꦌꦏꦨꦠ꧀ꦠꦁ ꦌꦏꦱꦺꦪ꧀ꦪꦁ ꦧ꧀ꦫꦲ꧀ꦩꦕꦫꦶꦪ’’ꦤ꧀ꦠꦶ. ꦄꦡ ꦑꦺꦴ ꦱꦺꦴꦟꦱ꧀ꦱ ꦈꦥꦴꦱꦏꦱ꧀ꦱ ꦏꦸꦛꦶꦏꦟ꧀ꦟꦱ꧀ꦱ ꦪꦺꦴ ꦄꦲꦺꦴꦱꦶ ꦥꦧ꧀ꦧꦗ꧀ꦗꦴꦨꦶꦱꦔ꧀ꦑꦴꦫꦺꦴ ꦱꦺꦴ ꦥꦛꦶꦥꦱ꧀ꦱꦩ꧀ꦨꦶ.

ꦢꦸꦠꦶꦪꦩ꧀ꦥꦶ ꦑꦺꦴ…ꦥꦺ… ꦢꦸꦠꦶꦪꦩ꧀ꦥꦶ ꦑꦺꦴ ꦄꦴꦪꦱ꧀ꦩꦴ ꦩꦲꦴꦏꦕ꧀ꦕꦴꦤꦺꦴ ꦱꦺꦴꦟꦁ ꦈꦥꦴꦱꦏꦁ ꦏꦸꦛꦶꦏꦟ꧀ꦟꦁ ꦌꦠꦢꦮꦺꦴꦕ – ‘‘ꦢꦸꦏ꧀ꦏꦫꦁ ꦑꦺꦴ, ꦱꦺꦴꦟ, ꦪꦴꦮꦗꦷꦮꦁ ꦌꦏꦨꦠ꧀ꦠꦁ ꦌꦏꦱꦺꦪ꧀ꦪꦁ ꦧ꧀ꦫꦲ꧀ꦩꦕꦫꦶꦪꦁ. ꦆꦔ꧀ꦓ ꦠ꧀ꦮꦁ, ꦱꦺꦴꦟ, ꦠꦠ꧀ꦡꦺꦮ ꦄꦴꦒꦴꦫꦶꦏꦨꦹꦠꦺꦴ ꦱꦩꦴꦤꦺꦴ ꦧꦸꦢ꧀ꦣꦴꦤꦁ ꦱꦴꦱꦤꦁ ꦄꦤꦸꦪꦸꦚ꧀ꦗ ꦏꦴꦭꦪꦸꦠ꧀ꦠꦁ ꦌꦏꦨꦠ꧀ꦠꦁ ꦌꦏꦱꦺꦪ꧀ꦪꦁ ꦧ꧀ꦫꦲ꧀ꦩꦕꦫꦶꦪ’’ꦤ꧀ꦠꦶ. ꦢꦸꦠꦶꦪꦩ꧀ꦥꦶ ꦑꦺꦴ ꦱꦺꦴꦟꦱ꧀ꦱ ꦈꦥꦴꦱꦏꦱ꧀ꦱ ꦏꦸꦛꦶꦏꦟ꧀ꦟꦱ꧀ꦱ ꦪꦺꦴ ꦄꦲꦺꦴꦱꦶ ꦥꦧ꧀ꦧꦗ꧀ꦗꦴꦨꦶꦱꦔ꧀ꦑꦴꦫꦺꦴ ꦱꦺꦴ ꦥꦛꦶꦥꦱ꧀ꦱꦩ꧀ꦨꦶ.

ꦠꦠꦶꦪꦩ꧀ꦥꦶ ꦑꦺꦴ ꦱꦺꦴꦟꦱ꧀ꦱ ꦈꦥꦴꦱꦏꦱ꧀ꦱ ꦏꦸꦛꦶꦏꦟ꧀ꦟꦱ꧀ꦱ ꦫꦲꦺꦴꦒꦠꦱ꧀ꦱ ꦥꦛꦶꦱꦭ꧀ꦭꦷꦤꦱ꧀ꦱ ꦌꦮꦁ ꦕꦺꦠꦱꦺꦴ ꦥꦫꦶꦮꦶꦠꦏ꧀ꦏꦺꦴ ꦈꦢꦥꦴꦢꦶ – ‘‘ꦪꦡꦴ ꦪꦡꦴ ꦑꦺꦴ ꦄꦪ꧀ꦪꦺꦴ ꦩꦲꦴꦏꦕ꧀ꦕꦴꦤꦺꦴ ꦣꦩ꧀ꦩꦁ ꦢꦺꦱꦺꦠꦶ ꦤꦪꦶꦢꦁ ꦱꦸꦏꦫꦁ ꦄꦒꦴꦫꦁ ꦄꦗ꧀ꦙꦴꦮꦱꦠꦴ ꦌꦏꦤ꧀ꦠꦥꦫꦶꦥꦸꦟ꧀ꦟꦁ ꦌꦏꦤ꧀ꦠꦥꦫꦶꦱꦸꦢ꧀ꦣꦁ ꦱꦔ꧀ꦑꦭꦶꦑꦶꦠꦁ ꦧ꧀ꦫꦲ꧀ꦩꦕꦫꦶꦪꦁ ꦕꦫꦶꦠꦸꦁ. ꦪꦁꦤꦹꦤꦴꦲꦁ ꦏꦺꦱꦩꦱ꧀ꦱꦸꦁ ꦎꦲꦴꦫꦺꦠ꧀ꦮꦴ ꦏꦴꦱꦴꦪꦴꦤꦶ ꦮꦠ꧀ꦡꦴꦤꦶ ꦄꦕ꧀ꦖꦴꦢꦺꦠ꧀ꦮꦴ ꦄꦒꦴꦫꦱ꧀ꦩꦴ ꦄꦤꦒꦴꦫꦶꦪꦁ ꦥꦧ꧀ꦧꦗꦺꦪ꧀ꦪ’’ꦤ꧀ꦠꦶ. ꦠꦠꦶꦪꦩ꧀ꦥꦶ ꦑꦺꦴ ꦱꦺꦴꦟꦺꦴ ꦈꦥꦴꦱꦏꦺꦴ ꦏꦸꦛꦶꦏꦟ꧀ꦟꦺꦴ ꦪꦺꦤꦴꦪꦱ꧀ꦩꦴ ꦩꦲꦴꦏꦕ꧀ꦕꦴꦤꦺꦴ ꦠꦺꦤꦸꦥꦱꦔ꧀ꦏꦩꦶ; ꦈꦥꦱꦔ꧀ꦏꦩꦶꦠ꧀ꦮꦴ ꦄꦴꦪꦱ꧀ꦩꦤ꧀ꦠꦁ ꦩꦲꦴꦏꦕ꧀ꦕꦴꦤꦁ ꦄꦨꦶꦮꦴꦢꦺꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦷꦢꦶ. ꦌꦏꦩꦤ꧀ꦠꦁ ꦤꦶꦱꦶꦤ꧀ꦤꦺꦴ ꦑꦺꦴ ꦱꦺꦴꦟꦺꦴ ꦈꦥꦴꦱꦏꦺꦴ ꦏꦸꦛꦶꦏꦟ꧀ꦟꦺꦴ ꦄꦴꦪꦱ꧀ꦩꦤ꧀ꦠꦁ ꦩꦲꦴꦏꦕ꧀ꦕꦴꦤꦁ ꦌꦠꦢꦮꦺꦴꦕ –

ꦄꦡ ꦑꦺꦴ ꦄꦴꦪꦱ꧀ꦩꦴ ꦩꦲꦴꦏꦕ꧀ꦕꦴꦤꦺꦴ ꦱꦺꦴꦟꦁ ꦈꦥꦴꦱꦏꦁ ꦏꦸꦛꦶꦏꦟ꧀ꦟꦁ ꦥꦧ꧀ꦧꦴꦗꦺꦱꦶ. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦄꦮꦤ꧀ꦠꦶꦢꦏ꧀ꦑꦶꦟꦴꦥꦡꦺꦴ [ꦄꦮꦤ꧀ꦠꦶ ꦢꦏ꧀ꦑꦶꦟꦥꦡꦺꦴ (ꦱꦷ.)] ꦄꦥ꧀ꦥꦨꦶꦏ꧀ꦑꦸꦏꦺꦴ ꦲꦺꦴꦠꦶ. ꦄꦡ ꦑꦺꦴ ꦄꦴꦪꦱ꧀ꦩꦴ ꦩꦲꦴꦏꦕ꧀ꦕꦴꦤꦺꦴ ꦠꦶꦟ꧀ꦟꦁ ꦮꦱ꧀ꦱꦴꦤꦁ ꦄꦕ꧀ꦕꦪꦺꦤ ꦏꦶꦕ꧀ꦖꦺꦤ ꦏꦱꦶꦫꦺꦤ ꦠꦠꦺꦴ ꦠꦠꦺꦴ ꦢꦱꦮꦒ꧀ꦒꦁ ꦨꦶꦏ꧀ꦑꦸꦱꦔ꧀ꦓꦁ ꦱꦤ꧀ꦤꦶꦥꦴꦠꦺꦠ꧀ꦮꦴ ꦄꦴꦪꦱ꧀ꦩꦤ꧀ꦠꦁ ꦱꦺꦴꦟꦁ ꦈꦥꦱꦩ꧀ꦥꦴꦢꦺꦱꦶ.

ꦄꦡ ꦑꦺꦴ ꦄꦴꦪꦱ꧀ꦩꦠꦺꦴ ꦱꦺꦴꦟꦱ꧀ꦱ ꦮꦱ꧀ꦱꦁꦮꦸꦛ꧀ꦜꦱ꧀ꦱ [ꦮꦱ꧀ꦱꦁꦮꦸꦠ꧀ꦡꦱ꧀ꦱ (ꦱꦷ. ꦱ꧀ꦪꦴ. ꦏꦁ. ꦥꦷ.)] ꦫꦲꦺꦴꦒꦠꦱ꧀ꦱ ꦥꦛꦶꦱꦭ꧀ꦭꦷꦤꦱ꧀ꦱ ꦌꦮꦁ ꦕꦺꦠꦱꦺꦴ ꦥꦫꦶꦮꦶꦠꦏ꧀ꦏꦺꦴ ꦈꦢꦥꦴꦢꦶ – ‘‘ꦤ ꦑꦺꦴ ꦩꦺ ꦱꦺꦴ ꦨꦒꦮꦴ ꦱꦩ꧀ꦩꦸꦑꦴ ꦢꦶꦛ꧀ꦜꦺꦴ, ꦄꦥꦶ ꦕ ꦱꦸꦠꦺꦴꦪꦺꦮ ꦩꦺ ꦱꦺꦴ ꦨꦒꦮꦴ – ‘ꦇꦢꦶꦱꦺꦴ ꦕ ꦇꦢꦶꦱꦺꦴ ꦕꦴ’ꦠꦶ. ꦱꦕꦺ ꦩꦁ ꦈꦥꦗ꧀ꦙꦴꦪꦺꦴ ꦄꦤꦸꦗꦴꦤꦺꦪ꧀ꦪ, ꦒꦕ꧀ꦖꦺꦪ꧀ꦪꦴꦲꦁ ꦠꦁ ꦨꦒꦮꦤ꧀ꦠꦁ ꦢꦱ꧀ꦱꦤꦴꦪ ꦄꦫꦲꦤ꧀ꦠꦁ ꦱꦩ꧀ꦩꦴꦱꦩ꧀ꦧꦸꦢ꧀ꦣ’’ꦤ꧀ꦠꦶ.

ꦄꦡ ꦑꦺꦴ ꦄꦴꦪꦱ꧀ꦩꦴ ꦱꦺꦴꦟꦺꦴ ꦱꦴꦪꦤ꧀ꦲꦱꦩꦪꦁ ꦥꦛꦶꦱꦭ꧀ꦭꦴꦤꦴ ꦮꦸꦛ꧀ꦜꦶꦠꦺꦴ ꦪꦺꦤꦴꦪꦱ꧀ꦩꦴ ꦩꦲꦴꦏꦕ꧀ꦕꦴꦤꦺꦴ ꦠꦺꦤꦸꦥꦱꦔ꧀ꦏꦩꦶ; ꦈꦥꦱꦔ꧀ꦏꦩꦶꦠ꧀ꦮꦴ ꦄꦴꦪꦱ꧀ꦩꦤ꧀ꦠꦁ ꦩꦲꦴꦏꦕ꧀ꦕꦴꦤꦁ ꦄꦨꦶꦮꦴꦢꦺꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦷꦢꦶ. ꦌꦏꦩꦤ꧀ꦠꦁ ꦤꦶꦱꦶꦤ꧀ꦤꦺꦴ ꦑꦺꦴ ꦄꦴꦪꦱ꧀ꦩꦴ ꦱꦺꦴꦟꦺꦴ ꦄꦴꦪꦱ꧀ꦩꦤ꧀ꦠꦁ ꦩꦲꦴꦏꦕ꧀ꦕꦴꦤꦁ ꦌꦠꦢꦮꦺꦴꦕ –

‘‘ꦆꦣ ꦩꦪ꧀ꦲꦁ, ꦨꦤ꧀ꦠꦺ, ꦫꦲꦺꦴꦒꦠꦱ꧀ꦱ ꦥꦛꦶꦱꦭ꧀ꦭꦷꦤꦱ꧀ꦱ ꦌꦮꦁ ꦕꦺꦠꦱꦺꦴ ꦥꦫꦶꦮꦶꦠꦏ꧀ꦏꦺꦴ ꦈꦢꦥꦴꦢꦶ – ‘ꦤ ꦑꦺꦴ ꦩꦺ ꦱꦺꦴ ꦨꦒꦮꦴ ꦱꦩ꧀ꦩꦸꦑꦴ ꦢꦶꦛ꧀ꦜꦺꦴ, ꦄꦥꦶ ꦕ ꦱꦸꦠꦺꦴꦪꦺꦮ ꦩꦺ ꦱꦺꦴ ꦨꦒꦮꦴ – ꦇꦢꦶꦱꦺꦴ ꦕ ꦇꦢꦶꦱꦺꦴ ꦕꦴ’ꦠꦶ. ꦱꦕꦺ ꦩꦁ ꦈꦥꦗ꧀ꦙꦴꦪꦺꦴ ꦄꦤꦸꦗꦴꦤꦺꦪ꧀ꦪ, ꦒꦕ꧀ꦖꦺꦪ꧀ꦪꦴꦲꦁ ꦠꦁ ꦨꦒꦮꦤ꧀ꦠꦁ ꦢꦱ꧀ꦱꦤꦴꦪ ꦄꦫꦲꦤ꧀ꦠꦁ ꦱꦩ꧀ꦩꦴꦱꦩ꧀ꦧꦸꦢ꧀ꦣ’’ꦤ꧀ꦠꦶ ( ) [(ꦒꦕ꧀ꦖꦺꦪ꧀ꦪꦴꦲꦁ ꦨꦤ꧀ꦠꦺ ꦠꦁ ꦨꦒꦮꦤ꧀ꦠꦁ ꦢꦱ꧀ꦱꦤꦴꦪ ꦄꦫꦲꦤ꧀ꦠꦁ ꦱꦩ꧀ꦩꦴꦱꦩ꧀ꦧꦸꦢ꧀ꦣꦁ, ꦱꦕꦺ ꦩꦁ ꦈꦥꦗ꧀ꦙꦴꦪꦺꦴ ꦄꦤꦸꦗꦴꦤꦴꦠꦷꦠꦶ (ꦩꦲꦴꦮ. ꧒꧕꧗)].

‘‘ꦱꦴꦣꦸ ꦱꦴꦣꦸ, ꦱꦺꦴꦟ; ꦒꦕ꧀ꦖ ꦠ꧀ꦮꦁ, ꦱꦺꦴꦟ, ꦠꦁ ꦨꦒꦮꦤ꧀ꦠꦁ ꦢꦱ꧀ꦱꦤꦴꦪ ꦄꦫꦲꦤ꧀ꦠꦁ ꦱꦩ꧀ꦩꦴꦱꦩ꧀ꦧꦸꦢ꧀ꦣꦁ [ꦱꦩꦴꦱꦩ꧀ꦧꦸꦢ꧀ꦣꦤ꧀ꦠꦶ (ꦱꦧ꧀ꦧꦠ꧀ꦡ)]. ꦢꦏ꧀ꦑꦶꦱ꧀ꦱꦱꦶ ꦠ꧀ꦮꦁ, ꦱꦺꦴꦟ, ꦠꦁ ꦨꦒꦮꦤ꧀ꦠꦁ ꦥꦴꦱꦴꦢꦶꦏꦁ ꦥꦱꦴꦢꦤꦷꦪꦁ ꦱꦤ꧀ꦠꦶꦤ꧀ꦢ꧀ꦫꦶꦪꦁ ꦱꦤ꧀ꦠꦩꦴꦤꦱꦁ ꦈꦠ꧀ꦠꦩꦢꦩꦡꦱꦩꦡꦩꦤꦸꦥ꧀ꦥꦠ꧀ꦠꦁ ꦢꦤ꧀ꦠꦁ ꦒꦸꦠ꧀ꦠꦁ ꦪꦠꦶꦤ꧀ꦢ꧀ꦫꦶꦪꦁ ꦤꦴꦒꦁ. ꦢꦶꦱ꧀ꦮꦴꦤ ꦩꦩ ꦮꦕꦤꦺꦤ ꦨꦒꦮꦠꦺꦴ ꦥꦴꦢꦺ ꦱꦶꦫꦱꦴ ꦮꦤ꧀ꦢꦴꦲꦶ, ꦄꦥ꧀ꦥꦴꦧꦴꦣꦁ ꦄꦥ꧀ꦥꦴꦠꦔ꧀ꦏꦁ ꦭꦲꦸꦛ꧀ꦜꦴꦤꦁ ꦧꦭꦁ ꦦꦴꦱꦸꦮꦶꦲꦴꦫꦁ [ꦦꦴꦱꦸꦮꦶꦲꦴꦫꦚ꧀ꦕ (ꦱꦷ.)] ꦥꦸꦕ꧀ꦖ – ‘ꦈꦥꦗ꧀ꦙꦴꦪꦺꦴ ꦩꦺ, ꦨꦤ꧀ꦠꦺ, ꦄꦴꦪꦱ꧀ꦩꦴ ꦩꦲꦴꦏꦕ꧀ꦕꦴꦤꦺꦴ ꦨꦒꦮꦠꦺꦴ ꦥꦴꦢꦺ ꦱꦶꦫꦱꦴ ꦮꦤ꧀ꦢꦠꦶ, ꦄꦥ꧀ꦥꦴꦧꦴꦣꦁ ꦄꦥ꧀ꦥꦴꦠꦔ꧀ꦏꦁ ꦭꦲꦸꦛ꧀ꦜꦴꦤꦁ ꦧꦭꦁ ꦦꦴꦱꦸꦮꦶꦲꦴꦫꦁ [ꦦꦴꦱꦸꦮꦶꦲꦴꦫꦚ꧀ꦕ (ꦱꦷ.)] ꦥꦸꦕ꧀ꦖꦠꦷ’’’ꦠꦶ.

‘‘ꦌꦮꦁ, ꦨꦤ꧀ꦠꦺ’’ꦠꦶ ꦑꦺꦴ ꦄꦴꦪꦱ꧀ꦩꦴ ꦱꦺꦴꦟꦺꦴ ꦄꦴꦪꦱ꧀ꦩꦠꦺꦴ ꦩꦲꦴꦏꦕ꧀ꦕꦴꦤꦱ꧀ꦱ ꦨꦴꦱꦶꦠꦁ ꦄꦨꦶꦤꦤ꧀ꦢꦶꦠ꧀ꦮꦴ ꦄꦤꦸꦩꦺꦴꦢꦶꦠ꧀ꦮꦴ ꦈꦛ꧀ꦜꦴꦪꦴꦱꦤꦴ ꦄꦴꦪꦱ꧀ꦩꦤ꧀ꦠꦁ ꦩꦲꦴꦏꦕ꧀ꦕꦴꦤꦁ ꦄꦨꦶꦮꦴꦢꦺꦠ꧀ꦮꦴ ꦥꦢꦏ꧀ꦑꦶꦟꦁ ꦏꦠ꧀ꦮꦴ ꦱꦺꦤꦴꦱꦤꦁ ꦱꦁꦱꦴꦩꦺꦠ꧀ꦮꦴ ꦥꦠ꧀ꦠꦕꦷꦮꦫꦩꦴꦢꦴꦪ ꦪꦺꦤ ꦱꦴꦮꦠ꧀ꦡꦶ ꦠꦺꦤ ꦕꦴꦫꦶꦏꦁ ꦥꦏ꧀ꦏꦴꦩꦶ. ꦄꦤꦸꦥꦸꦧ꧀ꦧꦺꦤ ꦕꦴꦫꦶꦏꦁ ꦕꦫꦩꦴꦤꦺꦴ ꦪꦺꦤ ꦱꦴꦮꦠ꧀ꦡꦶ ꦗꦺꦠꦮꦤꦁ ꦄꦤꦴꦡꦥꦶꦟ꧀ꦝꦶꦏꦱ꧀ꦱ ꦄꦴꦫꦴꦩꦺꦴ, ꦪꦺꦤ ꦨꦒꦮꦴ ꦠꦺꦤꦸꦥꦱꦔ꧀ꦏꦩꦶ, ꦈꦥꦱꦔ꧀ꦏꦩꦶꦠ꧀ꦮꦴ ꦨꦒꦮꦤ꧀ꦠꦁ ꦄꦨꦶꦮꦴꦢꦺꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦷꦢꦶ. ꦌꦏꦩꦤ꧀ꦠꦁ ꦤꦶꦱꦶꦤ꧀ꦤꦺꦴ ꦑꦺꦴ ꦄꦴꦪꦱ꧀ꦩꦴ ꦱꦺꦴꦟꦺꦴ ꦨꦒꦮꦤ꧀ꦠꦁ ꦌꦠꦢꦮꦺꦴꦕ – ‘‘ꦈꦥꦗ꧀ꦙꦴꦪꦺꦴ ꦩꦺ, ꦨꦤ꧀ꦠꦺ, ꦄꦴꦪꦱ꧀ꦩꦴ ꦩꦲꦴꦏꦕ꧀ꦕꦴꦤꦺꦴ ꦨꦒꦮꦠꦺꦴ ꦥꦴꦢꦺ ꦱꦶꦫꦱꦴ ꦮꦤ꧀ꦢꦠꦶ, ꦄꦥ꧀ꦥꦴꦧꦴꦣꦁ ꦄꦥ꧀ꦥꦴꦠꦔ꧀ꦏꦁ ꦭꦲꦸꦛ꧀ꦜꦴꦤꦁ ꦧꦭꦁ ꦦꦴꦱꦸꦮꦶꦲꦴꦫꦁ [ꦦꦴꦱꦸꦮꦶꦲꦴꦫꦚ꧀ꦕ (ꦱꦷ.)] ꦥꦸꦕ꧀ꦖꦠꦷ’’ꦠꦶ.

‘‘ꦏꦕ꧀ꦕꦶ, ꦨꦶꦏ꧀ꦑꦸ, ꦑꦩꦤꦷꦪꦁ, ꦏꦕ꧀ꦕꦶ ꦪꦴꦥꦤꦷꦪꦁ, ꦏꦕ꧀ꦕꦶꦱꦶ ꦄꦥ꧀ꦥꦏꦶꦭꦩꦡꦺꦤ ꦄꦢ꧀ꦣꦴꦤꦁ ꦄꦴꦒꦠꦺꦴ, ꦤ ꦕ ꦥꦶꦟ꧀ꦝꦏꦺꦤ ꦏꦶꦭꦤ꧀ꦠꦺꦴꦱꦷ’’ꦠꦶ? ‘‘ꦑꦩꦤꦷꦪꦁ ꦨꦒꦮꦴ, ꦪꦴꦥꦤꦷꦪꦁ ꦨꦒꦮꦴ, ꦄꦥ꧀ꦥꦏꦶꦭꦩꦡꦺꦤ ꦕꦴꦲꦁ, ꦨꦤ꧀ꦠꦺ, ꦄꦢ꧀ꦣꦴꦤꦁ ꦄꦴꦒꦠꦺꦴ, ꦤ ꦥꦶꦟ꧀ꦝꦏꦺꦤ ꦏꦶꦭꦤ꧀ꦠꦺꦴꦩ꧀ꦲꦷ’’ꦠꦶ.

ꦄꦡ ꦑꦺꦴ ꦨꦒꦮꦴ ꦄꦴꦪꦱ꧀ꦩꦤ꧀ꦠꦁ ꦄꦴꦤꦤ꧀ꦢꦁ ꦄꦴꦩꦤ꧀ꦠꦺꦱꦶ – ‘‘ꦆꦩꦱ꧀ꦱꦴꦤꦤ꧀ꦢ, ꦄꦴꦒꦤ꧀ꦠꦸꦏꦱ꧀ꦱ ꦨꦶꦏ꧀ꦑꦸꦤꦺꦴ ꦱꦺꦤꦴꦱꦤꦁ ꦥꦚ꧀ꦚꦴꦥꦺꦲꦷ’’ꦠꦶ. ꦄꦡ ꦑꦺꦴ ꦄꦴꦪꦱ꧀ꦩꦠꦺꦴ ꦄꦴꦤꦤ꧀ꦢꦱ꧀ꦱ ꦌꦠꦢꦲꦺꦴꦱꦶ – ‘‘ꦪꦱ꧀ꦱ ꦑꦺꦴ ꦩꦁ ꦨꦒꦮꦴ ꦄꦴꦟꦴꦥꦺꦠꦶ – ‘ꦆꦩꦱ꧀ꦱꦴꦤꦤ꧀ꦢ, ꦄꦴꦒꦤ꧀ꦠꦸꦏꦱ꧀ꦱ ꦨꦶꦏ꧀ꦑꦸꦤꦺꦴ ꦱꦺꦤꦴꦱꦤꦁ ꦥꦚ꧀ꦚꦴꦥꦺꦲꦷ’ꦠꦶ, ꦆꦕ꧀ꦖꦠꦶ ꦨꦒꦮꦴ ꦠꦺꦤ ꦨꦶꦏ꧀ꦑꦸꦤꦴ ꦱꦢ꧀ꦣꦶꦁ ꦌꦏꦮꦶꦲꦴꦫꦺ ꦮꦠ꧀ꦡꦸꦁ, ꦆꦕ꧀ꦖꦠꦶ ꦨꦒꦮꦴ ꦄꦴꦪꦱ꧀ꦩꦠꦴ ꦱꦺꦴꦟꦺꦤ ꦱꦢ꧀ꦣꦶꦁ ꦌꦏꦮꦶꦲꦴꦫꦺ ꦮꦠ꧀ꦡꦸ’’ꦤ꧀ꦠꦶ. ꦪꦱ꧀ꦩꦶꦁ ꦮꦶꦲꦴꦫꦺ ꦨꦒꦮꦴ ꦮꦶꦲꦫꦠꦶ, ꦠꦱ꧀ꦩꦶꦁ ꦮꦶꦲꦴꦫꦺ ꦄꦴꦪꦱ꧀ꦩꦠꦺꦴ ꦱꦺꦴꦟꦱ꧀ꦱ ꦱꦺꦤꦴꦱꦤꦁ ꦥꦚ꧀ꦚꦴꦥꦺꦱꦶ.

ꦄꦡ ꦑꦺꦴ ꦨꦒꦮꦴ ꦧꦲꦸꦢꦺꦮ ꦫꦠ꧀ꦠꦶꦁ ꦄꦧ꧀ꦨꦺꦴꦏꦴꦱꦺ ꦤꦶꦱꦗ꧀ꦗꦴꦪ ꦮꦷꦠꦶꦤꦴꦩꦺꦠ꧀ꦮꦴ ꦥꦴꦢꦺ ꦥꦏ꧀ꦑꦴꦭꦺꦠ꧀ꦮꦴ ꦮꦶꦲꦴꦫꦁ ꦥꦴꦮꦶꦱꦶ. ꦄꦴꦪꦱ꧀ꦩꦴꦥꦶ ꦑꦺꦴ ꦱꦺꦴꦟꦺꦴ ꦧꦲꦸꦢꦺꦮ ꦫꦠ꧀ꦠꦶꦁ ꦄꦧ꧀ꦨꦺꦴꦏꦴꦱꦺ ꦤꦶꦱꦗ꧀ꦗꦴꦪ ꦮꦷꦠꦶꦤꦴꦩꦺꦠ꧀ꦮꦴ ꦥꦴꦢꦺ ꦥꦏ꧀ꦑꦴꦭꦺꦠ꧀ꦮꦴ ꦮꦶꦲꦴꦫꦁ ꦥꦴꦮꦶꦱꦶ. ꦄꦡ ꦑꦺꦴ ꦨꦒꦮꦴ ꦫꦠ꧀ꦠꦶꦪꦴ ꦥꦕ꧀ꦕꦹꦱꦱꦩꦪꦁ ꦥꦕ꧀ꦕꦸꦛ꧀ꦜꦴꦪ ꦄꦴꦪꦱ꧀ꦩꦤ꧀ꦠꦁ ꦱꦺꦴꦟꦁ ꦄꦗ꧀ꦙꦺꦱꦶ – ‘‘ꦥꦛꦶꦨꦴꦠꦸ ꦠꦁ ꦨꦶꦏ꧀ꦑꦸ ꦣꦩ꧀ꦩꦺꦴ ꦨꦴꦱꦶꦠꦸ’’ꦤ꧀ꦠꦶ.

‘‘ꦌꦮꦁ, ꦨꦤ꧀ꦠꦺ’’ꦠꦶ ꦑꦺꦴ ꦄꦴꦪꦱ꧀ꦩꦴ ꦱꦺꦴꦟꦺꦴ ꦨꦒꦮꦠꦺꦴ ꦥꦛꦶꦱ꧀ꦱꦸꦠ꧀ꦮꦴ ꦱꦺꦴꦭ꦳ꦱ ꦄꦛ꧀ꦜꦏꦮꦒ꧀ꦒꦶꦏꦴꦤꦶ ꦱꦧ꧀ꦧꦴꦤꦺꦮ ꦱꦫꦺꦤ ꦄꦨꦟꦶ. ꦄꦡ ꦑꦺꦴ ꦨꦒꦮꦴ ꦄꦴꦪꦱ꧀ꦩꦠꦺꦴ ꦱꦺꦴꦟꦱ꧀ꦱ ꦱꦫꦨꦚ꧀ꦚꦥꦫꦶꦪꦺꦴꦱꦴꦤꦺ ꦄꦧ꧀ꦨꦤꦸꦩꦺꦴꦢꦶ – ‘‘ꦱꦴꦣꦸ ꦱꦴꦣꦸ, ꦨꦶꦏ꧀ꦑꦸ, ꦱꦸꦒ꧀ꦒꦲꦶꦠꦴꦤꦶ ꦠꦺ, ꦨꦶꦏ꧀ꦑꦸ, ꦱꦺꦴꦭ꦳ꦱ ꦄꦛ꧀ꦜꦏꦮꦒ꧀ꦒꦶꦏꦴꦤꦶ ꦱꦸꦩꦤꦱꦶꦏꦠꦴꦤꦶ ꦱꦹꦥꦣꦴꦫꦶꦠꦴꦤꦶ, ꦏꦭ꧀ꦪꦴꦟꦶꦪꦴꦱꦶ [ꦏꦭ꧀ꦪꦴꦟꦶꦪꦴ ꦕ (ꦏ.), ꦏꦭ꧀ꦪꦴꦟꦶꦪꦴ ꦕꦴꦱꦶ (?)] ꦮꦴꦕꦴꦪ ꦱꦩꦤ꧀ꦤꦴꦒꦠꦺꦴ ꦮꦶꦱ꧀ꦱꦛ꧀ꦜꦴꦪ ꦄꦤꦺꦭꦒꦭ꦳ꦴꦪ ꦄꦠ꧀ꦡꦱ꧀ꦱ ꦮꦶꦚ꧀ꦚꦴꦥꦤꦶꦪꦴ. ꦏꦠꦶ ꦮꦱ꧀ꦱꦺꦴꦱꦶ ꦠ꧀ꦮꦁ, ꦨꦶꦏ꧀ꦑꦹ’’ꦠꦶ? ‘‘ꦌꦏꦮꦱ꧀ꦱꦺꦴ ꦄꦲꦁ ꦨꦒꦮꦴ’’ꦠꦶ. ‘‘ꦏꦶꦱ꧀ꦱ ꦥꦤ ꦠ꧀ꦮꦁ, ꦨꦶꦏ꧀ꦑꦸ, ꦌꦮꦁ ꦕꦶꦫꦁ ꦄꦏꦴꦱꦷ’’ꦠꦶ? ‘‘ꦕꦶꦫꦁ ꦢꦶꦛ꧀ꦜꦺꦴ [ꦕꦶꦫꦢꦶꦛ꧀ꦜꦺꦴ (ꦱꦷ.)] ꦩꦺ, ꦨꦤ꧀ꦠꦺ, ꦏꦴꦩꦺꦱꦸ ꦄꦴꦢꦷꦤꦮꦺꦴ; ꦄꦥꦶ ꦕ ꦱꦩ꧀ꦧꦴꦣꦺꦴ ꦓꦫꦴꦮꦴꦱꦺꦴ ꦧꦲꦸꦏꦶꦕ꧀ꦕꦺꦴ ꦧꦲꦸꦏꦫꦟꦷꦪꦺꦴ’’ꦠꦶ.

ꦄꦡ ꦑꦺꦴ ꦨꦒꦮꦴ ꦌꦠꦩꦠ꧀ꦡꦁ ꦮꦶꦢꦶꦠ꧀ꦮꦴ ꦠꦴꦪꦁ ꦮꦺꦭꦴꦪꦁ ꦆꦩꦁ ꦈꦢꦴꦤꦁ ꦈꦢꦴꦤꦺꦱꦶ –

‘‘ꦢꦶꦱ꧀ꦮꦴ ꦄꦴꦢꦷꦤꦮꦁ ꦭꦺꦴꦏꦺ, ꦚꦠ꧀ꦮꦴ ꦣꦩ꧀ꦩꦁ ꦤꦶꦫꦹꦥꦣꦶꦁ;

ꦄꦫꦶꦪꦺꦴ ꦤ ꦫꦩꦠꦷ ꦥꦴꦥꦺ, ꦥꦴꦥꦺ ꦤ ꦫꦩꦠꦷ ꦱꦸꦕꦷ’’ꦠꦶ. ꦖꦛ꧀ꦜꦁ;