꧑꧐. ꦧꦴꦲꦶꦪꦱꦸꦠ꧀ꦠꦁ

꧑꧐. ꦌꦮꦁ ꦩꦺ ꦱꦸꦠꦁ – ꦌꦏꦁ ꦱꦩꦪꦁ ꦨꦒꦮꦴ ꦱꦴꦮꦠ꧀ꦡꦶꦪꦁ ꦮꦶꦲꦫꦠꦶ ꦗꦺꦠꦮꦤꦺ ꦄꦤꦴꦡꦥꦶꦟ꧀ꦝꦶꦏꦱ꧀ꦱ ꦄꦴꦫꦴꦩꦺ. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦧꦴꦲꦶꦪꦺꦴ ꦢꦴꦫꦸꦕꦷꦫꦶꦪꦺꦴ ꦱꦸꦥ꧀ꦥꦴꦫꦏꦺ ꦥꦛꦶꦮꦱꦠꦶ ꦱꦩꦸꦢ꧀ꦢꦠꦷꦫꦺ ꦱꦏ꧀ꦏꦠꦺꦴ ꦒꦫꦸꦏꦠꦺꦴ ꦩꦴꦤꦶꦠꦺꦴ ꦥꦹꦗꦶꦠꦺꦴ ꦄꦥꦕꦶꦠꦺꦴ ꦭꦴꦨꦷ ꦕꦷꦮꦫꦥꦶꦟ꧀ꦝꦥꦴꦠꦱꦺꦤꦴꦱꦤꦒꦶꦭꦴꦤꦥꦕ꧀ꦕꦪꦨꦺꦱꦗ꧀ꦗꦥꦫꦶꦏ꧀ꦑꦴꦫꦴꦤꦁ. ꦄꦡ ꦑꦺꦴ ꦧꦴꦲꦶꦪꦱ꧀ꦱ ꦢꦴꦫꦸꦕꦷꦫꦶꦪꦱ꧀ꦱ ꦫꦲꦺꦴꦒꦠꦱ꧀ꦱ ꦥꦛꦶꦱꦭ꧀ꦭꦷꦤꦱ꧀ꦱ ꦌꦮꦁ ꦕꦺꦠꦱꦺꦴ ꦥꦫꦶꦮꦶꦠꦏ꧀ꦏꦺꦴ ꦈꦢꦥꦴꦢꦶ – ‘‘ꦪꦺ ꦑꦺꦴ ꦏꦺꦕꦶ ꦭꦺꦴꦏꦺ ꦄꦫꦲꦤ꧀ꦠꦺꦴ ꦮꦴ ꦄꦫꦲꦠ꧀ꦠꦩꦒ꧀ꦒꦁ ꦮꦴ ꦱꦩꦴꦥꦤ꧀ꦤꦴ, ꦄꦲꦁ ꦠꦺꦱꦁ ꦄꦚ꧀ꦚꦠꦫꦺꦴ’’ꦠꦶ.

ꦄꦡ ꦑꦺꦴ ꦧꦴꦲꦶꦪꦱ꧀ꦱ ꦢꦴꦫꦸꦕꦷꦫꦶꦪꦱ꧀ꦱ ꦥꦸꦫꦴꦟꦱꦴꦭꦺꦴꦲꦶꦠꦴ ꦢꦺꦮꦠꦴ ꦄꦤꦸꦏꦩ꧀ꦥꦶꦏꦴ ꦄꦠ꧀ꦡꦏꦴꦩꦴ ꦧꦴꦲꦶꦪꦱ꧀ꦱ ꦢꦴꦫꦸꦕꦷꦫꦶꦪꦱ꧀ꦱ ꦕꦺꦠꦱꦴ ꦕꦺꦠꦺꦴꦥꦫꦶꦮꦶꦠꦏ꧀ꦏꦩꦚ꧀ꦚꦴꦪ ꦪꦺꦤ ꦧꦴꦲꦶꦪꦺꦴ ꦢꦴꦫꦸꦕꦷꦫꦶꦪꦺꦴ ꦠꦺꦤꦸꦥꦱꦔ꧀ꦏꦩꦶ; ꦈꦥꦱꦔ꧀ꦏꦩꦶꦠ꧀ꦮꦴ ꦧꦴꦲꦶꦪꦁ ꦢꦴꦫꦸꦕꦷꦫꦶꦪꦁ ꦌꦠꦢꦮꦺꦴꦕ – ‘‘ꦤꦺꦮ ꦑꦺꦴ ꦠ꧀ꦮꦁ, ꦧꦴꦲꦶꦪ, ꦄꦫꦲꦴ, ꦤꦴꦥꦶ ꦄꦫꦲꦠ꧀ꦠꦩꦒ꧀ꦒꦁ ꦮꦴ ꦱꦩꦴꦥꦤ꧀ꦤꦺꦴ. ꦱꦴꦥꦶ ꦠꦺ ꦥꦛꦶꦥꦢꦴ ꦤꦠ꧀ꦡꦶ ꦪꦴꦪ ꦠ꧀ꦮꦁ ꦄꦫꦲꦴ ꦮꦴ ꦄꦱ꧀ꦱ [ꦄꦱ꧀ꦱꦱꦶ (ꦱ꧀ꦪꦴ. ꦏ.)] ꦄꦫꦲꦠ꧀ꦠꦩꦒ꧀ꦒꦁ ꦮꦴ ꦱꦩꦴꦥꦤ꧀ꦤꦺꦴ’’ꦠꦶ.

‘‘ꦄꦡ ꦏꦺ ꦕꦫꦲꦶ ꦱꦢꦺꦮꦏꦺ ꦭꦺꦴꦏꦺ ꦄꦫꦲꦤ꧀ꦠꦺꦴ ꦮꦴ ꦄꦫꦲꦠ꧀ꦠꦩꦒ꧀ꦒꦁ ꦮꦴ ꦱꦩꦴꦥꦤ꧀ꦤꦺꦴ’’ꦠꦶ? ‘‘ꦄꦠ꧀ꦡꦶ, ꦧꦴꦲꦶꦪ, ꦈꦠ꧀ꦠꦫꦺꦱꦸ ꦗꦤꦥꦢꦺꦱꦸ [ꦗꦤꦥꦢꦺ (ꦱꦷ.)] ꦱꦴꦮꦠ꧀ꦡꦶ ꦤꦴꦩ ꦤꦒꦫꦁ. ꦠꦠ꧀ꦡ ꦱꦺꦴ ꦨꦒꦮꦴ ꦌꦠꦫꦲꦶ ꦮꦶꦲꦫꦠꦶ ꦄꦫꦲꦁ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦴ. ꦱꦺꦴ ꦲꦶ, ꦧꦴꦲꦶꦪ, ꦨꦒꦮꦴ ꦄꦫꦲꦴ ꦕꦺꦮ ꦄꦫꦲꦠ꧀ꦠꦴꦪ ꦕ ꦣꦩ꧀ꦩꦁ ꦢꦺꦱꦺꦠꦷ’’ꦠꦶ.

ꦄꦡ ꦑꦺꦴ ꦧꦴꦲꦶꦪꦺꦴ ꦢꦴꦫꦸꦕꦷꦫꦶꦪꦺꦴ ꦠꦴꦪ ꦢꦺꦮꦠꦴꦪ ꦱꦁꦮꦺꦗꦶꦠꦺꦴ ꦠꦴꦮꦢꦺꦮ ꦱꦸꦥ꧀ꦥꦴꦫꦏꦩ꧀ꦲꦴ ꦥꦏ꧀ꦏꦴꦩꦶ. ꦱꦧ꧀ꦧꦠ꧀ꦡ ꦌꦏꦫꦠ꧀ꦠꦶꦥꦫꦶꦮꦴꦱꦺꦤ ꦪꦺꦤ ꦱꦴꦮꦠ꧀ꦡꦶ ꦗꦺꦠꦮꦤꦁ ꦄꦤꦴꦡꦥꦶꦟ꧀ꦝꦶꦏꦱ꧀ꦱ ꦄꦴꦫꦴꦩꦺꦴ ꦠꦺꦤꦸꦥꦱꦔ꧀ꦏꦩꦶ. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦱꦩ꧀ꦧꦲꦸꦭꦴ ꦨꦶꦏ꧀ꦑꦹ ꦄꦧ꧀ꦨꦺꦴꦏꦴꦱꦺ ꦕꦔ꧀ꦏꦩꦤ꧀ꦠꦶ. ꦄꦡ ꦑꦺꦴ ꦧꦴꦲꦶꦪꦺꦴ ꦢꦴꦫꦸꦕꦷꦫꦶꦪꦺꦴ ꦪꦺꦤ ꦠꦺ ꦨꦶꦏ꧀ꦑꦹ ꦠꦺꦤꦸꦥꦱꦔ꧀ꦏꦩꦶ; ꦈꦥꦱꦔ꧀ꦏꦩꦶꦠ꧀ꦮꦴ ꦠꦺ ꦨꦶꦏ꧀ꦑꦹ ꦌꦠꦢꦮꦺꦴꦕ – ‘‘ꦏꦲꦁ ꦤꦸ ꦑꦺꦴ, ꦨꦤ꧀ꦠꦺ, ꦌꦠꦫꦲꦶ ꦨꦒꦮꦴ ꦮꦶꦲꦫꦠꦶ ꦄꦫꦲꦁ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦴ? ꦢꦱ꧀ꦱꦤꦏꦴꦩꦩ꧀ꦲꦴ ꦩꦪꦁ ꦠꦁ ꦨꦒꦮꦤ꧀ꦠꦁ ꦄꦫꦲꦤ꧀ꦠꦁ ꦱꦩ꧀ꦩꦴꦱꦩ꧀ꦧꦸꦢ꧀ꦣ’’ꦤ꧀ꦠꦶ. ‘‘ꦄꦤ꧀ꦠꦫꦓꦫꦁ ꦥꦮꦶꦛ꧀ꦜꦺꦴ ꦑꦺꦴ, ꦧꦴꦲꦶꦪ, ꦨꦒꦮꦴ ꦥꦶꦟ꧀ꦝꦴꦪꦴ’’ꦠꦶ.

ꦄꦡ ꦑꦺꦴ ꦧꦴꦲꦶꦪꦺꦴ ꦢꦴꦫꦸꦕꦷꦫꦶꦪꦺꦴ ꦠꦫꦩꦴꦤꦫꦹꦥꦺꦴ ꦗꦺꦠꦮꦤꦴ ꦤꦶꦏ꧀ꦑꦩꦶꦠ꧀ꦮꦴ ꦱꦴꦮꦠ꧀ꦡꦶꦁ ꦥꦮꦶꦱꦶꦠ꧀ꦮꦴ ꦄꦢ꧀ꦢꦱ ꦨꦒꦮꦤ꧀ꦠꦁ ꦱꦴꦮꦠ꧀ꦡꦶꦪꦁ ꦥꦶꦟ꧀ꦝꦴꦪ ꦕꦫꦤ꧀ꦠꦁ ꦥꦴꦱꦴꦢꦶꦏꦁ ꦥꦱꦴꦢꦤꦷꦪꦁ ꦱꦤ꧀ꦠꦶꦤ꧀ꦢ꧀ꦫꦶꦪꦁ ꦱꦤ꧀ꦠꦩꦴꦤꦱꦁ ꦈꦠ꧀ꦠꦩꦢꦩꦡꦱꦩꦡꦩꦤꦸꦥ꧀ꦥꦠ꧀ꦠꦁ ꦢꦤ꧀ꦠꦁ ꦒꦸꦠ꧀ꦠꦁ ꦪꦠꦶꦤ꧀ꦢ꧀ꦫꦶꦪꦁ ꦤꦴꦒꦁ. ꦢꦶꦱ꧀ꦮꦴꦤ ꦪꦺꦤ ꦨꦒꦮꦴ ꦠꦺꦤꦸꦥꦱꦔ꧀ꦏꦩꦶ; ꦈꦥꦱꦔ꧀ꦏꦩꦶꦠ꧀ꦮꦴ ꦨꦒꦮꦠꦺꦴ ꦥꦴꦢꦺ ꦱꦶꦫꦱꦴ ꦤꦶꦥꦠꦶꦠ꧀ꦮꦴ ꦨꦒꦮꦤ꧀ꦠꦁ ꦌꦠꦢꦮꦺꦴꦕ – ‘‘ꦢꦺꦱꦺꦠꦸ ꦩꦺ, ꦨꦤ꧀ꦠꦺ ꦨꦒꦮꦴ, ꦣꦩ꧀ꦩꦁ; ꦢꦺꦱꦺꦠꦸ, ꦱꦸꦒꦠꦺꦴ, ꦣꦩ꧀ꦩꦁ, ꦪꦁ ꦩꦩꦱ꧀ꦱ ꦢꦷꦓꦫꦠ꧀ꦠꦁ ꦲꦶꦠꦴꦪ ꦱꦸꦑꦴꦪꦴ’’ꦠꦶ. ꦌꦮꦁ ꦮꦸꦠ꧀ꦠꦺ, ꦨꦒꦮꦴ ꦧꦴꦲꦶꦪꦁ ꦢꦴꦫꦸꦕꦷꦫꦶꦪꦁ ꦌꦠꦢꦮꦺꦴꦕ – ‘‘ꦄꦏꦴꦭꦺꦴ ꦑꦺꦴ ꦠꦴꦮ, ꦧꦴꦲꦶꦪ, ꦄꦤ꧀ꦠꦫꦓꦫꦁ ꦥꦮꦶꦛ꧀ꦜꦩ꧀ꦲꦴ ꦥꦶꦟ꧀ꦝꦴꦪꦴ’’ꦠꦶ.

ꦢꦸꦠꦶꦪꦩ꧀ꦥꦶ ꦑꦺꦴ ꦧꦴꦲꦶꦪꦺꦴ ꦢꦴꦫꦸꦕꦷꦫꦶꦪꦺꦴ ꦨꦒꦮꦤ꧀ꦠꦁ ꦌꦠꦢꦮꦺꦴꦕ – ‘‘ꦢꦸꦗ꧀ꦗꦴꦤꦁ ꦑꦺꦴ ꦥꦤꦺꦠꦁ, ꦨꦤ꧀ꦠꦺ, ꦨꦒꦮꦠꦺꦴ ꦮꦴ ꦗꦷꦮꦶꦠꦤ꧀ꦠꦫꦴꦪꦴꦤꦁ, ꦩꦪ꧀ꦲꦁ ꦮꦴ ꦗꦷꦮꦶꦠꦤ꧀ꦠꦫꦴꦪꦴꦤꦁ. ꦢꦺꦱꦺꦠꦸ ꦩꦺ, ꦨꦤ꧀ꦠꦺ ꦨꦒꦮꦴ, ꦣꦩ꧀ꦩꦁ; ꦢꦺꦱꦺꦠꦸ, ꦱꦸꦒꦠꦺꦴ, ꦣꦩ꧀ꦩꦁ, ꦪꦁ ꦩꦩꦱ꧀ꦱ ꦢꦷꦓꦫꦠ꧀ꦠꦁ ꦲꦶꦠꦴꦪ ꦱꦸꦑꦴꦪꦴ’’ꦠꦶ. ꦢꦸꦠꦶꦪꦩ꧀ꦥꦶ ꦑꦺꦴ ꦨꦒꦮꦴ ꦧꦴꦲꦶꦪꦁ ꦢꦴꦫꦸꦕꦷꦫꦶꦪꦁ ꦌꦠꦢꦮꦺꦴꦕ – ‘‘ꦄꦏꦴꦭꦺꦴ ꦑꦺꦴ ꦠꦴꦮ, ꦧꦴꦲꦶꦪ, ꦄꦤ꧀ꦠꦫꦓꦫꦁ ꦥꦮꦶꦛ꧀ꦜꦩ꧀ꦲꦴ ꦥꦶꦟ꧀ꦝꦴꦪꦴ’’ꦠꦶ.

ꦠꦠꦶꦪꦩ꧀ꦥꦶ ꦑꦺꦴ ꦧꦴꦲꦶꦪꦺꦴ ꦢꦴꦫꦸꦕꦷꦫꦶꦪꦺꦴ ꦨꦒꦮꦤ꧀ꦠꦁ ꦌꦠꦢꦮꦺꦴꦕ – ‘‘ꦢꦸꦗ꧀ꦗꦴꦤꦁ ꦑꦺꦴ ꦥꦤꦺꦠꦁ, ꦨꦤ꧀ꦠꦺ, ꦨꦒꦮꦠꦺꦴ ꦮꦴ ꦗꦷꦮꦶꦠꦤ꧀ꦠꦫꦴꦪꦴꦤꦁ, ꦩꦪ꧀ꦲꦁ ꦮꦴ ꦗꦷꦮꦶꦠꦤ꧀ꦠꦫꦴꦪꦴꦤꦁ. ꦢꦺꦱꦺꦠꦸ ꦩꦺ ꦨꦤ꧀ꦠꦺ ꦨꦒꦮꦴ, ꦣꦩ꧀ꦩꦁ; ꦢꦺꦱꦺꦠꦸ, ꦱꦸꦒꦠꦺꦴ, ꦣꦩ꧀ꦩꦁ, ꦪꦁ ꦩꦩꦱ꧀ꦱ ꦢꦷꦓꦫꦠ꧀ꦠꦁ ꦲꦶꦠꦴꦪ ꦱꦸꦑꦴꦪꦴ’’ꦠꦶ.

‘‘ꦠꦱ꧀ꦩꦴꦠꦶꦲ ꦠꦺ, ꦧꦴꦲꦶꦪ, ꦌꦮꦁ ꦱꦶꦏ꧀ꦑꦶꦠꦧ꧀ꦧꦁ – ‘ꦢꦶꦛ꧀ꦜꦺ ꦢꦶꦛ꧀ꦜꦩꦠ꧀ꦠꦁ ꦨꦮꦶꦱ꧀ꦱꦠꦶ, ꦱꦸꦠꦺ ꦱꦸꦠꦩꦠ꧀ꦠꦁ ꦨꦮꦶꦱ꧀ꦱꦠꦶ, ꦩꦸꦠꦺ ꦩꦸꦠꦩꦠ꧀ꦠꦁ ꦨꦮꦶꦱ꧀ꦱꦠꦶ, ꦮꦶꦚ꧀ꦚꦴꦠꦺ ꦮꦶꦚ꧀ꦚꦴꦠꦩꦠ꧀ꦠꦁ ꦨꦮꦶꦱ꧀ꦱꦠꦷ’ꦠꦶ. ꦌꦮꦚ꧀ꦲꦶ ꦠꦺ, ꦧꦴꦲꦶꦪ, ꦱꦶꦏ꧀ꦑꦶꦠꦧ꧀ꦧꦁ. ꦪꦠꦺꦴ ꦑꦺꦴ ꦠꦺ, ꦧꦴꦲꦶꦪ, ꦢꦶꦛ꧀ꦜꦺ ꦢꦶꦛ꧀ꦜꦩꦠ꧀ꦠꦁ ꦨꦮꦶꦱ꧀ꦱꦠꦶ, ꦱꦸꦠꦺ ꦱꦸꦠꦩꦠ꧀ꦠꦁ ꦨꦮꦶꦱ꧀ꦱꦠꦶ, ꦩꦸꦠꦺ ꦩꦸꦠꦩꦠ꧀ꦠꦁ ꦨꦮꦶꦱ꧀ꦱꦠꦶ, ꦮꦶꦚ꧀ꦚꦴꦠꦺ ꦮꦶꦚ꧀ꦚꦴꦠꦩꦠ꧀ꦠꦁ ꦨꦮꦶꦱ꧀ꦱꦠꦶ, ꦠꦠꦺꦴ ꦠ꧀ꦮꦁ, ꦧꦴꦲꦶꦪ, ꦤ ꦠꦺꦤ; ꦪꦠꦺꦴ ꦠ꧀ꦮꦁ, ꦧꦴꦲꦶꦪ, ꦤ ꦠꦺꦤ ꦠꦠꦺꦴ ꦠ꧀ꦮꦁ, ꦧꦴꦲꦶꦪ, ꦤ ꦠꦠ꧀ꦡ; ꦪꦠꦺꦴ ꦠ꧀ꦮꦁ, ꦧꦴꦲꦶꦪ, ꦤ ꦠꦠ꧀ꦡ, ꦠꦠꦺꦴ ꦠ꧀ꦮꦁ, ꦧꦴꦲꦶꦪ, ꦤꦺꦮꦶꦣ ꦤ ꦲꦸꦫꦁ ꦤ ꦈꦨꦪꦩꦤ꧀ꦠꦫꦺꦤ. ꦌꦱꦺꦮꦤ꧀ꦠꦺꦴ ꦢꦸꦏ꧀ꦑꦱ꧀ꦱꦴ’’ꦠꦶ.

ꦄꦡ ꦑꦺꦴ ꦧꦴꦲꦶꦪꦱ꧀ꦱ ꦢꦴꦫꦸꦕꦷꦫꦶꦪꦱ꧀ꦱ ꦨꦒꦮꦠꦺꦴ ꦆꦩꦴꦪ ꦱꦁꦑꦶꦠ꧀ꦠꦴꦪ ꦣꦩ꧀ꦩꦢꦺꦱꦤꦴꦪ ꦠꦴꦮꦢꦺꦮ ꦄꦤꦸꦥꦴꦢꦴꦪ ꦄꦴꦱꦮꦺꦲꦶ ꦕꦶꦠ꧀ꦠꦁ ꦮꦶꦩꦸꦕ꧀ꦕꦶ.

ꦄꦡ ꦑꦺꦴ ꦨꦒꦮꦴ ꦧꦴꦲꦶꦪꦁ ꦢꦴꦫꦸꦕꦷꦫꦶꦪꦁ ꦆꦩꦶꦤꦴ ꦱꦁꦑꦶꦠ꧀ꦠꦺꦤ ꦎꦮꦴꦢꦺꦤ ꦎꦮꦢꦶꦠ꧀ꦮꦴ ꦥꦏ꧀ꦏꦴꦩꦶ. ꦄꦡ ꦑꦺꦴ ꦄꦕꦶꦫꦥꦏ꧀ꦏꦤ꧀ꦠꦱ꧀ꦱ ꦨꦒꦮꦠꦺꦴ ꦧꦴꦲꦶꦪꦁ ꦢꦴꦫꦸꦕꦷꦫꦶꦪꦁ ꦒꦴꦮꦷ ꦠꦫꦸꦟꦮꦕ꧀ꦖꦴ ꦄꦣꦶꦥꦠꦶꦠ꧀ꦮꦴ [ꦄꦣꦶꦥꦴꦠꦺꦠ꧀ꦮꦴ (ꦱꦷ. ꦱ꧀ꦪꦴ. ꦥꦷ.), ꦄꦣꦶꦥꦴꦠꦶꦠ꧀ꦮꦴ (ꦏ.)] ꦗꦷꦮꦶꦠꦴ ꦮꦺꦴꦫꦺꦴꦥꦺꦱꦶ.

ꦄꦡ ꦑꦺꦴ ꦨꦒꦮꦴ ꦱꦴꦮꦠ꧀ꦡꦶꦪꦁ ꦥꦶꦟ꧀ꦝꦴꦪ ꦕꦫꦶꦠ꧀ꦮꦴ ꦥꦕ꧀ꦖꦴꦨꦠ꧀ꦠꦁ ꦥꦶꦟ꧀ꦝꦥꦴꦠꦥꦛꦶꦏ꧀ꦏꦤ꧀ꦠꦺꦴ ꦱꦩ꧀ꦧꦲꦸꦭꦺꦲꦶ ꦨꦶꦏ꧀ꦑꦹꦲꦶ ꦱꦢ꧀ꦣꦶꦁ ꦤꦒꦫꦩ꧀ꦲꦴ ꦤꦶꦏ꧀ꦑꦩꦶꦠ꧀ꦮꦴ ꦄꦢ꧀ꦢꦱ ꦧꦴꦲꦶꦪꦁ ꦢꦴꦫꦸꦕꦷꦫꦶꦪꦁ ꦏꦴꦭꦔ꧀ꦏꦠꦁ [ꦏꦴꦭꦏꦠꦁ (ꦱꦷ. ꦱ꧀ꦪꦴ. ꦏꦁ.)]; ꦢꦶꦱ꧀ꦮꦴꦤ ꦨꦶꦏ꧀ꦑꦹ ꦄꦴꦩꦤ꧀ꦠꦺꦱꦶ – ‘‘ꦒꦟ꧀ꦲꦡ, ꦨꦶꦏ꧀ꦑꦮꦺ, ꦧꦴꦲꦶꦪꦱ꧀ꦱ ꦢꦴꦫꦸꦕꦷꦫꦶꦪꦱ꧀ꦱ ꦱꦫꦷꦫꦏꦁ; ꦩꦚ꧀ꦕꦏꦁ ꦄꦴꦫꦺꦴꦥꦺꦠ꧀ꦮꦴ ꦤꦷꦲꦫꦶꦠ꧀ꦮꦴ ꦙꦴꦥꦺꦡ; ꦡꦹꦥꦚ꧀ꦕꦱ꧀ꦱ ꦏꦫꦺꦴꦡ. ꦱꦧ꧀ꦫꦲ꧀ꦩꦕꦴꦫꦷ ꦮꦺꦴ, ꦨꦶꦏ꧀ꦑꦮꦺ, ꦏꦴꦭꦔ꧀ꦏꦠꦺꦴ’’ꦠꦶ.

‘‘ꦌꦮꦁ, ꦨꦤ꧀ꦠꦺ’’ꦠꦶ ꦑꦺꦴ ꦠꦺ ꦨꦶꦏ꧀ꦑꦹ ꦨꦒꦮꦠꦺꦴ ꦥꦛꦶꦱ꧀ꦱꦸꦠ꧀ꦮꦴ ꦧꦴꦲꦶꦪꦱ꧀ꦱ ꦢꦴꦫꦸꦕꦷꦫꦶꦪꦱ꧀ꦱ ꦱꦫꦷꦫꦏꦁ ꦩꦚ꧀ꦕꦏꦁ ꦄꦴꦫꦺꦴꦥꦺꦠ꧀ꦮꦴ ꦤꦷꦲꦫꦶꦠ꧀ꦮꦴ ꦙꦴꦥꦺꦠ꧀ꦮꦴ ꦡꦹꦥꦚ꧀ꦕꦱ꧀ꦱ ꦏꦠ꧀ꦮꦴ ꦪꦺꦤ ꦨꦒꦮꦴ ꦠꦺꦤꦸꦥꦱꦔ꧀ꦏꦩꦶꦁꦱꦸ; ꦈꦥꦱꦔ꧀ꦏꦩꦶꦠ꧀ꦮꦴ ꦨꦒꦮꦤ꧀ꦠꦁ ꦄꦨꦶꦮꦴꦢꦺꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦷꦢꦶꦁꦱꦸ. ꦌꦏꦩꦤ꧀ꦠꦁ ꦤꦶꦱꦶꦤ꧀ꦤꦴ ꦑꦺꦴ ꦠꦺ ꦨꦶꦏ꧀ꦑꦹ ꦨꦒꦮꦤ꧀ꦠꦁ ꦌꦠꦢꦮꦺꦴꦕꦸꦁ – ‘‘ꦢꦝ꧀ꦞꦁ, ꦨꦤ꧀ꦠꦺ, ꦧꦴꦲꦶꦪꦱ꧀ꦱ ꦢꦴꦫꦸꦕꦷꦫꦶꦪꦱ꧀ꦱ ꦱꦫꦷꦫꦁ, ꦡꦹꦥꦺꦴ ꦕꦱ꧀ꦱ ꦏꦠꦺꦴ. ꦠꦱ꧀ꦱ ꦏꦴ ꦒꦠꦶ, ꦏꦺꦴ ꦄꦨꦶꦱꦩ꧀ꦥꦫꦴꦪꦺꦴ’’ꦠꦶ? ‘‘ꦥꦟ꧀ꦝꦶꦠꦺꦴ, ꦨꦶꦏ꧀ꦑꦮꦺ, ꦧꦴꦲꦶꦪꦺꦴ ꦢꦴꦫꦸꦕꦷꦫꦶꦪꦺꦴ ꦥꦕ꧀ꦕꦥꦴꦢꦶ ꦣꦩ꧀ꦩꦱ꧀ꦱꦴꦤꦸꦣꦩ꧀ꦩꦁ; ꦤ ꦕ ꦩꦁ ꦣꦩ꧀ꦩꦴꦣꦶꦏꦫꦟꦁ ꦮꦶꦲꦺꦱꦺꦱꦶ. ꦥꦫꦶꦤꦶꦧ꧀ꦧꦸꦠꦺꦴ, ꦨꦶꦏ꧀ꦑꦮꦺ, ꦧꦴꦲꦶꦪꦺꦴ ꦢꦴꦫꦸꦕꦷꦫꦶꦪꦺꦴ’’ꦠꦶ.

ꦄꦡ ꦑꦺꦴ ꦨꦒꦮꦴ ꦌꦠꦩꦠ꧀ꦡꦁ ꦮꦶꦢꦶꦠ꧀ꦮꦴ ꦠꦴꦪꦁ ꦮꦺꦭꦴꦪꦁ ꦆꦩꦁ ꦈꦢꦴꦤꦁ ꦈꦢꦴꦤꦺꦱꦶ –

‘‘ꦪꦠ꧀ꦡ ꦄꦴꦥꦺꦴ ꦕ ꦥꦡꦮꦷ, ꦠꦺꦗꦺꦴ ꦮꦴꦪꦺꦴ ꦤ ꦒꦴꦣꦠꦶ;

ꦤ ꦠꦠ꧀ꦡ ꦱꦸꦏ꧀ꦏꦴ ꦗꦺꦴꦠꦤ꧀ꦠꦶ, ꦄꦴꦢꦶꦕ꧀ꦕꦺꦴ ꦤꦥ꧀ꦥꦏꦴꦱꦠꦶ;

ꦤ ꦠꦠ꧀ꦡ ꦕꦤ꧀ꦢꦶꦩꦴ ꦨꦴꦠꦶ, ꦠꦩꦺꦴ ꦠꦠ꧀ꦡ ꦤ ꦮꦶꦗ꧀ꦗꦠꦶ.

‘‘ꦪꦢꦴ ꦕ ꦄꦠ꧀ꦠꦤꦴꦮꦺꦢꦶ [ꦮꦺꦣꦷ (ꦏ.)], ꦩꦸꦤꦶ ꦩꦺꦴꦤꦺꦤ ꦧ꧀ꦫꦴꦲ꧀ꦩꦟꦺꦴ;

ꦄꦡ ꦫꦹꦥꦴ ꦄꦫꦹꦥꦴ ꦕ, ꦱꦸꦑꦢꦸꦏ꧀ꦑꦴ ꦥꦩꦸꦕ꧀ꦕꦠꦷ’’ꦠꦶ. ꦢꦱꦩꦁ;

(ꦄꦪꦩ꧀ꦥꦶ ꦈꦢꦴꦤꦺꦴ ꦮꦸꦠ꧀ꦠꦺꦴ ꦨꦒꦮꦠꦴ ꦆꦠꦶ ꦩꦺ ꦱꦸꦠꦤ꧀ꦠꦶ.) [( ) ꦱ꧀ꦪꦴꦩꦥꦺꦴꦠ꧀ꦡꦏꦺ ꦤꦠ꧀ꦡꦶ]

ꦧꦺꦴꦣꦶꦮꦒ꧀ꦒꦺꦴ ꦥꦜꦩꦺꦴ ꦤꦶꦛ꧀ꦜꦶꦠꦺꦴ.