꧗. ꦒꦸꦠ꧀ꦠꦴꦡꦺꦫꦷꦒꦴꦡꦴ

꧑꧖꧓. ‘‘ꦒꦸꦠ꧀ꦠꦺ ꦪꦢꦠ꧀ꦡꦁ ꦥꦧ꧀ꦧꦗ꧀ꦗꦴ, ꦲꦶꦠ꧀ꦮꦴ ꦥꦸꦠ꧀ꦠꦁ ꦮꦱꦸꦁ ꦥꦶꦪꦁ;

ꦠꦩꦺꦮ ꦄꦤꦸꦧ꧀ꦫꦹꦲꦺꦲꦶ, ꦩꦴ ꦕꦶꦠ꧀ꦠꦱ꧀ꦱ ꦮꦱꦁ ꦒꦩꦶ.

꧑꧖꧔. ‘‘ꦕꦶꦠ꧀ꦠꦺꦤ ꦮꦚ꧀ꦕꦶꦠꦴ ꦱꦠ꧀ꦠꦴ, ꦩꦴꦫꦱ꧀ꦱ ꦮꦶꦱꦪꦺ ꦫꦠꦴ;

ꦄꦤꦺꦏꦗꦴꦠꦶꦱꦁꦱꦴꦫꦁ, ꦱꦤ꧀ꦣꦴꦮꦤ꧀ꦠꦶ ꦄꦮꦶꦢ꧀ꦢꦱꦹ.

꧑꧖꧕. ‘‘ꦏꦴꦩꦕ꧀ꦖꦤ꧀ꦢꦚ꧀ꦕ ꦧ꧀ꦪꦴꦥꦴꦢꦁ, ꦱꦏ꧀ꦏꦴꦪꦢꦶꦛ꧀ꦜꦶꦩꦺꦮ ꦕ;

ꦱꦷꦭꦧ꧀ꦧꦠꦥꦫꦴꦩꦴꦱꦁ, ꦮꦶꦕꦶꦏꦶꦕ꧀ꦖꦚ꧀ꦕ ꦥꦚ꧀ꦕꦩꦁ.

꧑꧖꧖. ‘‘ꦱꦁꦪꦺꦴꦗꦤꦴꦤꦶ ꦌꦠꦴꦤꦶ, ꦥꦗꦲꦶꦠ꧀ꦮꦴꦤ ꦨꦶꦏ꧀ꦑꦸꦤꦷ;

ꦎꦫꦩ꧀ꦨꦴꦒꦩꦤꦷꦪꦴꦤꦶ, ꦤꦪꦶꦢꦁ ꦥꦸꦤꦫꦺꦲꦶꦱꦶ.

꧑꧖꧗. ‘‘ꦫꦴꦒꦁ ꦩꦴꦤꦁ ꦄꦮꦶꦗ꧀ꦗꦚ꧀ꦕ, ꦈꦢ꧀ꦣꦕ꧀ꦕꦚ꧀ꦕ ꦮꦶꦮꦗ꧀ꦗꦶꦪ;

ꦱꦁꦪꦺꦴꦗꦤꦴꦤꦶ ꦖꦺꦠ꧀ꦮꦴꦤ, ꦢꦸꦏ꧀ꦑꦱ꧀ꦱꦤ꧀ꦠꦁ ꦏꦫꦶꦱ꧀ꦱꦱꦶ.

꧑꧖꧘. ‘‘ꦑꦺꦥꦺꦠ꧀ꦮꦴ ꦗꦴꦠꦶꦱꦁꦱꦴꦫꦁ, ꦥꦫꦶꦚ꧀ꦚꦴꦪ ꦥꦸꦤꦧ꧀ꦨꦮꦁ;

ꦢꦶꦛ꧀ꦜꦺꦮ ꦣꦩ꧀ꦩꦺ ꦤꦶꦕ꧀ꦖꦴꦠꦴ, ꦈꦥꦱꦤ꧀ꦠꦴ ꦕꦫꦶꦱ꧀ꦱꦠꦷ’’ꦠꦶ.

… ꦒꦸꦠ꧀ꦠꦴ ꦡꦺꦫꦷ….