꧕. ꦩꦴꦓꦱꦸꦠ꧀ꦠꦁ

ꦌꦮꦁ ꦩꦺ ꦱꦸꦠꦁ – ꦌꦏ ꦱꦩꦪꦁ ꦨꦒꦮꦴ ꦫꦴꦗꦒꦲꦺ ꦮꦶꦲꦫꦠꦶ ꦒꦶꦗ꧀ꦙꦏꦹꦛꦺ ꦥꦧ꧀ꦧꦠꦺ. ꦄꦡ ꦑꦺꦴ ꦩꦴꦓꦺꦴ ꦩꦴꦟꦮꦺꦴ ꦪꦺꦤ ꦨꦒꦮꦴ ꦠꦺꦤꦸꦥꦱꦔ꧀ꦏꦩꦶ; ꦈꦥꦱꦔ꧀ꦏꦩꦶꦠ꧀ꦮꦴ ꦨꦒꦮꦠꦴ ꦱꦢ꧀ꦣꦶꦁ ꦱꦩ꧀ꦩꦺꦴꦢꦶ. ꦱꦩ꧀ꦩꦺꦴꦢꦤꦷꦪꦁ ꦏꦡꦁ ꦱꦴꦫꦟꦷꦪꦁ ꦮꦷꦠꦶꦱꦴꦫꦺꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦷꦢꦶ. ꦌꦏꦩꦤ꧀ꦠꦁ ꦤꦶꦱꦶꦤ꧀ꦤꦺꦴ ꦑꦺꦴ ꦩꦴꦓꦺꦴ ꦩꦴꦟꦮꦺꦴ ꦨꦒꦮꦤ꧀ꦠꦁ ꦌꦠꦢꦮꦺꦴꦕ –

‘‘ꦄꦲꦚ꧀ꦲꦶ, ꦨꦺꦴ ꦒꦺꦴꦠꦩ, ꦢꦴꦪꦏꦺꦴ ꦢꦴꦤꦥꦠꦶ ꦮꦢꦚ꧀ꦚꦹ ꦪꦴꦕꦪꦺꦴꦒꦺꦴ; ꦣꦩ꧀ꦩꦺꦤ ꦨꦺꦴꦒꦺ ꦥꦫꦶꦪꦺꦱꦴꦩꦶ; ꦣꦩ꧀ꦩꦺꦤ ꦨꦺꦴꦒꦺ ꦥꦫꦶꦪꦺꦱꦶꦠ꧀ꦮꦴ ꦣꦩ꧀ꦩꦭꦢ꧀ꦣꦺꦲꦶ ꦨꦺꦴꦒꦺꦲꦶ ꦣꦩ꧀ꦩꦴꦣꦶꦒꦠꦺꦲꦶ ꦌꦏꦱ꧀ꦱꦥꦶ ꦢꦢꦴꦩꦶ ꦢ꧀ꦮꦶꦤ꧀ꦤꦩ꧀ꦥꦶ ꦠꦶꦟ꧀ꦟꦩ꧀ꦥꦶ ꦕꦠꦸꦤ꧀ꦤꦩ꧀ꦥꦶ ꦥꦚ꧀ꦕꦤ꧀ꦤꦩ꧀ꦥꦶ ꦖꦤ꧀ꦤꦩ꧀ꦥꦶ ꦱꦠ꧀ꦠꦤ꧀ꦤꦩ꧀ꦥꦶ ꦄꦛ꧀ꦜꦤ꧀ꦤꦩ꧀ꦥꦶ ꦤꦮꦤ꧀ꦤꦩ꧀ꦥꦶ ꦢꦱꦤ꧀ꦤꦩ꧀ꦥꦶ ꦢꦢꦴꦩꦶ, ꦮꦷꦱꦴꦪꦥꦶ ꦠꦶꦁꦱꦴꦪꦥꦶ ꦕꦠ꧀ꦠꦴꦭꦷꦱꦴꦪꦥꦶ ꦥꦚ꧀ꦚꦴꦱꦴꦪꦥꦶ ꦢꦢꦴꦩꦶ, ꦱꦠꦱ꧀ꦱꦥꦶ ꦢꦢꦴꦩꦶ, ꦨꦶꦪ꧀ꦪꦺꦴꦥꦶ ꦢꦢꦴꦩꦶ. ꦏꦕ꧀ꦕꦴꦲꦁ, ꦨꦺꦴ ꦒꦺꦴꦠꦩ, ꦌꦮꦁ ꦢꦢꦤ꧀ꦠꦺꦴ ꦌꦮꦁ ꦪꦗꦤ꧀ꦠꦺꦴ ꦧꦲꦸꦁ ꦥꦸꦚ꧀ꦚꦁ ꦥꦱꦮꦴꦩꦷ’’ꦠꦶ?

‘‘ꦠꦒ꧀ꦓ ꦠ꧀ꦮꦁ, ꦩꦴꦟꦮ, ꦌꦮꦁ ꦢꦢꦤ꧀ꦠꦺꦴ ꦌꦮꦁ ꦪꦗꦤ꧀ꦠꦺꦴ ꦧꦲꦸꦁ ꦥꦸꦚ꧀ꦚꦁ ꦥꦱꦮꦱꦶ. ꦪꦺꦴ ꦑꦺꦴ, ꦩꦴꦟꦮ, ꦢꦴꦪꦏꦺꦴ ꦢꦴꦤꦥꦠꦶ ꦮꦢꦚ꧀ꦚꦹ ꦪꦴꦕꦪꦺꦴꦒꦺꦴ; ꦣꦩ꧀ꦩꦺꦤ ꦨꦺꦴꦒꦺ ꦥꦫꦶꦪꦺꦱꦠꦶ; ꦣꦩ꧀ꦩꦺꦤ ꦨꦺꦴꦒꦺ ꦥꦫꦶꦪꦺꦱꦶꦠ꧀ꦮꦴ ꦣꦩ꧀ꦩꦭꦢ꧀ꦣꦺꦲꦶ ꦨꦺꦴꦒꦺꦲꦶ ꦣꦩ꧀ꦩꦴꦣꦶꦒꦠꦺꦲꦶ ꦌꦏꦱ꧀ꦱꦥꦶ ꦢꦢꦴꦠꦶ…ꦥꦺ… ꦱꦠꦱ꧀ꦱꦥꦶ ꦢꦢꦴꦠꦶ, ꦨꦶꦪ꧀ꦪꦺꦴꦥꦶ ꦢꦢꦴꦠꦶ, ꦧꦲꦸꦁ ꦱꦺꦴ ꦥꦸꦚ꧀ꦚꦁ ꦥꦱꦮꦠꦷ’’ꦠꦶ. ꦄꦡ ꦑꦺꦴ ꦩꦴꦓꦺꦴ ꦩꦴꦟꦮꦺꦴ ꦨꦒꦮꦤ꧀ꦠꦁ ꦒꦴꦡꦴꦪ ꦄꦗ꧀ꦙꦨꦴꦱꦶ –

꧔꧙꧑. ‘‘ꦥꦸꦕ꧀ꦖꦴꦩꦲꦁ ꦒꦺꦴꦠꦩꦁ ꦮꦢꦚ꧀ꦚꦸꦁ, (ꦆꦠꦶ ꦩꦴꦓꦺꦴ ꦩꦴꦟꦮꦺꦴ)

ꦏꦴꦱꦴꦪꦮꦴꦱꦶꦁ ꦄꦒꦲꦁ [ꦄꦒꦶꦲꦁ (ꦱꦷ.), ꦄꦒꦺꦲꦁ (ꦥꦷ.)] ꦕꦫꦤ꧀ꦠꦁ;

ꦪꦺꦴ ꦪꦴꦕꦪꦺꦴꦒꦺꦴ ꦢꦴꦤꦥꦠꦶ [ꦢꦴꦤꦥꦠꦷ (ꦱꦷ. ꦱ꧀ꦪꦴ. ꦥꦷ.)] ꦒꦲꦛ꧀ꦜꦺꦴ, ꦥꦸꦚ꧀ꦚꦠ꧀ꦡꦶꦏꦺꦴ [ꦥꦸꦚ꧀ꦚꦥꦺꦑꦺꦴ (ꦱꦷ. ꦥꦷ. ꦏ.)] ꦪꦗꦠꦶ ꦥꦸꦚ꧀ꦚꦥꦺꦏ꧀ꦑꦺꦴ;

ꦢꦢꦁ ꦥꦫꦺꦱꦁ ꦆꦣ ꦄꦤ꧀ꦤꦥꦴꦤꦁ, ꦏꦡꦁ ꦲꦸꦠꦁ ꦪꦗꦩꦴꦤꦱ꧀ꦱ ꦱꦸꦗ꧀ꦙꦺ’’.

꧔꧙꧒. ‘‘ꦪꦺꦴ ꦪꦴꦕꦪꦺꦴꦒꦺꦴ ꦢꦴꦤꦥꦠꦶ ꦒꦲꦛ꧀ꦜꦺꦴ, (ꦩꦴꦓꦴꦠꦶ ꦨꦒꦮꦴ)

ꦥꦸꦚ꧀ꦚꦠ꧀ꦡꦶꦏꦺꦴ ꦪꦗꦠꦶ ꦥꦸꦚ꧀ꦚꦥꦺꦏ꧀ꦑꦺꦴ;

ꦢꦢꦁ ꦥꦫꦺꦱꦁ ꦆꦣ ꦄꦤ꧀ꦤꦥꦴꦤꦁ, ꦄꦴꦫꦴꦣꦪꦺ ꦢꦏ꧀ꦑꦶꦟꦺꦪ꧀ꦪꦺꦨꦶ ꦠꦴꦢꦶ’’.

꧔꧙꧓. ‘‘ꦪꦺꦴ ꦪꦴꦕꦪꦺꦴꦒꦺꦴ ꦢꦴꦤꦥꦠꦶ ꦒꦲꦛ꧀ꦜꦺꦴ, (ꦆꦠꦶ ꦩꦴꦓꦺꦴ ꦩꦴꦟꦮꦺꦴ)

ꦥꦸꦚ꧀ꦚꦠ꧀ꦡꦶꦏꦺꦴ ꦪꦗꦠꦶ ꦥꦸꦚ꧀ꦚꦥꦺꦏ꧀ꦑꦺꦴ;

ꦢꦢꦁ ꦥꦫꦺꦱꦁ ꦆꦣ ꦄꦤ꧀ꦤꦥꦴꦤꦁ, ꦄꦏ꧀ꦑꦴꦲꦶ ꦩꦺ ꦨꦒꦮꦴ ꦢꦏ꧀ꦑꦶꦟꦺꦪ꧀ꦪꦺ’’.

꧔꧙꧔. ‘‘ꦪꦺ ꦮꦺ ꦄꦱꦠ꧀ꦠꦴ [ꦄꦭꦒ꧀ꦒꦴ (ꦱ꧀ꦪꦴ.)] ꦮꦶꦕꦫꦤ꧀ꦠꦶ ꦭꦺꦴꦏꦺ, ꦄꦏꦶꦚ꧀ꦕꦤꦴ ꦏꦺꦮꦭꦶꦤꦺꦴ ꦪꦠꦠ꧀ꦠꦴ;

ꦏꦴꦭꦺꦤ ꦠꦺꦱꦸ ꦲꦧ꧀ꦪꦁ ꦥꦮꦺꦕ꧀ꦖꦺ, ꦪꦺꦴ ꦧ꧀ꦫꦴꦲ꧀ꦩꦟꦺꦴ ꦥꦸꦚ꧀ꦚꦥꦺꦏ꧀ꦑꦺꦴ ꦪꦗꦺꦡ.

꧔꧙꧕. ‘‘ꦪꦺ ꦱꦧ꧀ꦧꦱꦁꦪꦺꦴꦗꦤꦧꦤ꧀ꦣꦤꦕ꧀ꦖꦶꦢꦴ, ꦢꦤ꧀ꦠꦴ ꦮꦶꦩꦸꦠ꧀ꦠꦴ ꦄꦤꦷꦓꦴ ꦤꦶꦫꦴꦱꦴ;

ꦏꦴꦭꦺꦤ ꦠꦺꦱꦸ ꦲꦧ꧀ꦪꦁ ꦥꦮꦺꦕ꧀ꦖꦺ, ꦪꦺꦴ ꦧ꧀ꦫꦴꦲ꧀ꦩꦟꦺꦴ ꦥꦸꦚ꧀ꦚꦥꦺꦏ꧀ꦑꦺꦴ ꦪꦗꦺꦡ.

꧔꧙꧖. ‘‘ꦪꦺ ꦱꦧ꧀ꦧꦱꦁꦪꦺꦴꦗꦤꦮꦶꦥ꧀ꦥꦩꦸꦠ꧀ꦠꦴ, ꦢꦤ꧀ꦠꦴ ꦮꦶꦩꦸꦠ꧀ꦠꦴ ꦄꦤꦷꦓꦴ ꦤꦶꦫꦴꦱꦴ;

ꦏꦴꦭꦺꦤ ꦠꦺꦱꦸ ꦲꦧ꧀ꦪꦁ ꦥꦮꦺꦕ꧀ꦖꦺ, ꦪꦺꦴ ꦧ꧀ꦫꦴꦲ꧀ꦩꦟꦺꦴ ꦥꦸꦚ꧀ꦚꦥꦺꦏ꧀ꦑꦺꦴ ꦪꦗꦺꦡ.

꧔꧙꧗. ‘‘ꦫꦴꦒꦚ꧀ꦕ ꦢꦺꦴꦱꦚ꧀ꦕ ꦥꦲꦴꦪ ꦩꦺꦴꦲꦁ, ꦑꦷꦟꦴꦱꦮꦴ ꦮꦹꦱꦶꦠꦧ꧀ꦫꦲ꧀ꦩꦕꦫꦶꦪꦴ;

ꦏꦴꦭꦺꦤ ꦠꦺꦱꦸ ꦲꦧ꧀ꦪꦁ ꦥꦮꦺꦕ꧀ꦖꦺ, ꦪꦺꦴ ꦧ꧀ꦫꦴꦲ꧀ꦩꦟꦺꦴ ꦥꦸꦚ꧀ꦚꦥꦺꦏ꧀ꦑꦺꦴ ꦪꦗꦺꦡ.

꧔꧙꧘. ‘‘ꦪꦺꦱꦸ ꦤ ꦩꦴꦪꦴ ꦮꦱꦠꦶ ꦤ ꦩꦴꦤꦺꦴ, ꦑꦷꦟꦴꦱꦮꦴ ꦮꦹꦱꦶꦠꦧ꧀ꦫꦲ꧀ꦩꦕꦫꦶꦪꦴ;

ꦏꦴꦭꦺꦤ ꦠꦺꦱꦸ ꦲꦧ꧀ꦪꦁ ꦥꦮꦺꦕ꧀ꦖꦺ, ꦪꦺꦴ ꦧ꧀ꦫꦴꦲ꧀ꦩꦟꦺꦴ ꦥꦸꦚ꧀ꦚꦥꦺꦏ꧀ꦑꦺꦴ ꦪꦗꦺꦡ.

꧔꧙꧙. ‘‘ꦪꦺ ꦮꦷꦠꦭꦺꦴꦨꦴ ꦄꦩꦩꦴ ꦤꦶꦫꦴꦱꦴ, ꦑꦷꦟꦴꦱꦮꦴ ꦮꦹꦱꦶꦠꦧ꧀ꦫꦲ꧀ꦩꦕꦫꦶꦪꦴ;

ꦏꦴꦭꦺꦤ ꦠꦺꦱꦸ ꦲꦧ꧀ꦪꦁ ꦥꦮꦺꦕ꧀ꦖꦺ, ꦪꦺꦴ ꦧ꧀ꦫꦴꦲ꧀ꦩꦟꦺꦴ ꦥꦸꦚ꧀ꦚꦥꦺꦏ꧀ꦑꦺꦴ ꦪꦗꦺꦡ.

꧕꧐꧐. ‘‘ꦪꦺ ꦮꦺ ꦤ ꦠꦟ꧀ꦲꦴꦱꦸ ꦈꦥꦴꦠꦶꦥꦤ꧀ꦤꦴ, ꦮꦶꦠꦫꦺꦪ꧀ꦪ ꦎꦓꦁ ꦄꦩꦩꦴ ꦕꦫꦤ꧀ꦠꦶ;

ꦏꦴꦭꦺꦤ ꦠꦺꦱꦸ ꦲꦧ꧀ꦪꦁ ꦥꦮꦺꦕ꧀ꦖꦺ, ꦪꦺꦴ ꦧ꧀ꦫꦴꦲ꧀ꦩꦟꦺꦴ ꦥꦸꦚ꧀ꦚꦥꦺꦏ꧀ꦑꦺꦴ ꦪꦗꦺꦡ.

꧕꧐꧑. ‘‘ꦪꦺꦱꦁ ꦠꦟ꧀ꦲꦴ ꦤꦠ꧀ꦡꦶ ꦏꦸꦲꦶꦚ꧀ꦕꦶ ꦭꦺꦴꦏꦺ, ꦨꦮꦴꦨꦮꦴꦪ ꦆꦣ ꦮꦴ ꦲꦸꦫꦁ ꦮꦴ;

ꦏꦴꦭꦺꦤ ꦠꦺꦱꦸ ꦲꦧ꧀ꦪꦁ ꦥꦮꦺꦕ꧀ꦖꦺ, ꦪꦺꦴ ꦧ꧀ꦫꦴꦲ꧀ꦩꦟꦺꦴ ꦥꦸꦚ꧀ꦚꦥꦺꦏ꧀ꦑꦺꦴ ꦪꦗꦺꦡ.

꧕꧐꧒. ‘‘ꦪꦺ ꦏꦴꦩꦺ ꦲꦶꦠ꧀ꦮꦴ ꦄꦒꦲꦴ ꦕꦫꦤ꧀ꦠꦶ, ꦱꦸꦱꦚ꧀ꦚꦠꦠ꧀ꦠꦴ ꦠꦱꦫꦁꦮ ꦈꦗ꧀ꦗꦸꦁ;

ꦏꦴꦭꦺꦤ ꦠꦺꦱꦸ ꦲꦧ꧀ꦪꦁ ꦥꦮꦺꦕ꧀ꦖꦺ, ꦪꦺꦴ ꦧ꧀ꦫꦴꦲ꧀ꦩꦟꦺꦴ ꦥꦸꦚ꧀ꦚꦥꦺꦏ꧀ꦑꦺꦴ ꦪꦗꦺꦡ.

꧕꧐꧓. ‘‘ꦪꦺ ꦮꦷꦠꦫꦴꦒꦴ ꦱꦸꦱꦩꦴꦲꦶꦠꦶꦤ꧀ꦢ꧀ꦫꦶꦪꦴ, ꦕꦤ꧀ꦢꦺꦴꦮ ꦫꦴꦲꦸꦒ꧀ꦒꦲꦟꦴ ꦥꦩꦸꦠ꧀ꦠꦴ;

ꦏꦴꦭꦺꦤ ꦠꦺꦱꦸ ꦲꦧ꧀ꦪꦁ ꦥꦮꦺꦕ꧀ꦖꦺ, ꦪꦺꦴ ꦧ꧀ꦫꦴꦲ꧀ꦩꦟꦺꦴ ꦥꦸꦚ꧀ꦚꦥꦺꦏ꧀ꦑꦺꦴ ꦪꦗꦺꦡ.

꧕꧐꧔. ‘‘ꦱꦩꦶꦠꦴꦮꦶꦤꦺꦴ ꦮꦷꦠꦫꦴꦒꦴ ꦄꦏꦺꦴꦥꦴ, ꦪꦺꦱꦁ ꦒꦠꦷ ꦤꦠ꧀ꦡꦶꦣ ꦮꦶꦥ꧀ꦥꦲꦴꦪ;

ꦏꦴꦭꦺꦤ ꦠꦺꦱꦸ ꦲꦧ꧀ꦪꦁ ꦥꦮꦺꦕ꧀ꦖꦺ, ꦪꦺꦴ ꦧ꧀ꦫꦴꦲ꧀ꦩꦟꦺꦴ ꦥꦸꦚ꧀ꦚꦥꦺꦏ꧀ꦑꦺꦴ ꦪꦗꦺꦡ.

꧕꧐꧕. ‘‘ꦗꦲꦶꦠ꧀ꦮꦴ ꦗꦴꦠꦶꦩꦫꦟꦁ ꦄꦱꦺꦱꦁ, ꦏꦡꦁꦏꦡꦶꦁ ꦱꦧ꧀ꦧꦩꦸꦥꦴꦠꦶꦮꦠ꧀ꦠꦴ;

ꦏꦴꦭꦺꦤ ꦠꦺꦱꦸ ꦲꦧ꧀ꦪꦁ ꦥꦮꦺꦕ꧀ꦖꦺ, ꦪꦺꦴ ꦧ꧀ꦫꦴꦲ꧀ꦩꦟꦺꦴ ꦥꦸꦚ꧀ꦚꦥꦺꦏ꧀ꦑꦺꦴ ꦪꦗꦺꦡ.

꧕꧐꧖. ‘‘ꦪꦺ ꦄꦠ꧀ꦠꦢꦷꦥꦴ ꦮꦶꦕꦫꦤ꧀ꦠꦶ ꦭꦺꦴꦏꦺ, ꦄꦏꦶꦚ꧀ꦕꦤꦴ ꦱꦧ꧀ꦧꦣꦶ ꦮꦶꦥ꧀ꦥꦩꦸꦠ꧀ꦠꦴ;

ꦏꦴꦭꦺꦤ ꦠꦺꦱꦸ ꦲꦧ꧀ꦪꦁ ꦥꦮꦺꦕ꧀ꦖꦺ, ꦪꦺꦴ ꦧ꧀ꦫꦴꦲ꧀ꦩꦟꦺꦴ ꦥꦸꦚ꧀ꦚꦥꦺꦏ꧀ꦑꦺꦴ ꦪꦗꦺꦡ.

꧕꧐꧗. ‘‘ꦪꦺ ꦲꦺꦠ꧀ꦡ ꦗꦴꦤꦤ꧀ꦠꦶ ꦪꦡꦴ ꦠꦡꦴ ꦆꦢꦁ, ꦄꦪꦩꦤ꧀ꦠꦶꦩꦴ ꦤꦠ꧀ꦡꦶ ꦥꦸꦤꦧ꧀ꦨꦮꦺꦴꦠꦶ;

ꦏꦴꦭꦺꦤ ꦠꦺꦱꦸ ꦲꦧ꧀ꦪꦁ ꦥꦮꦺꦕ꧀ꦖꦺ, ꦪꦺꦴ ꦧ꧀ꦫꦴꦲ꧀ꦩꦟꦺꦴ ꦥꦸꦚ꧀ꦚꦥꦺꦏ꧀ꦑꦺꦴ ꦪꦗꦺꦡ.

꧕꧐꧘. ‘‘ꦪꦺꦴ ꦮꦺꦢꦒꦹ ꦙꦴꦤꦫꦠꦺꦴ ꦱꦠꦷꦩꦴ, ꦱꦩ꧀ꦧꦺꦴꦣꦶꦥꦠ꧀ꦠꦺꦴ ꦱꦫꦟꦁ ꦧꦲꦹꦤꦁ;

ꦏꦴꦭꦺꦤ ꦠꦩ꧀ꦲꦶ ꦲꦧ꧀ꦪꦁ ꦥꦮꦺꦕ꧀ꦖꦺ, ꦪꦺꦴ ꦧ꧀ꦫꦴꦲ꧀ꦩꦟꦺꦴ ꦥꦸꦚ꧀ꦚꦥꦺꦏ꧀ꦑꦺꦴ ꦪꦗꦺꦡ’’.

꧕꧐꧙. ‘‘ꦄꦢ꧀ꦣꦴ ꦄꦩꦺꦴꦓꦴ ꦩꦩ ꦥꦸꦕ꧀ꦖꦤꦴ ꦄꦲꦸ, ꦄꦏ꧀ꦑꦴꦱꦶ ꦩꦺ ꦨꦒꦮꦴ ꦢꦏ꧀ꦑꦶꦟꦺꦪ꧀ꦪꦺ;

ꦠ꧀ꦮꦚ꧀ꦲꦺꦠ꧀ꦡ ꦗꦴꦤꦴꦱꦶ ꦪꦡꦴ ꦠꦡꦴ ꦆꦢꦁ, ꦠꦡꦴ ꦲꦶ ꦠꦺ ꦮꦶꦢꦶꦠꦺꦴ ꦌꦱ ꦣꦩ꧀ꦩꦺꦴ.

꧕꧑꧐. ‘‘ꦪꦺꦴ ꦪꦴꦕꦪꦺꦴꦒꦺꦴ ꦢꦴꦤꦥꦠꦶ ꦒꦲꦛ꧀ꦜꦺꦴ, (ꦆꦠꦶ ꦩꦴꦓꦺꦴ ꦩꦴꦟꦮꦺꦴ)

ꦥꦸꦚ꧀ꦚꦠ꧀ꦡꦶꦏꦺꦴ ꦪꦗꦠꦶ ꦥꦸꦚ꧀ꦚꦥꦺꦏ꧀ꦑꦺꦴ;

ꦢꦢꦁ ꦥꦫꦺꦱꦁ ꦆꦣ ꦄꦤ꧀ꦤꦥꦴꦤꦁ,

ꦄꦏ꧀ꦑꦴꦲꦶ ꦩꦺ ꦨꦒꦮꦴ ꦪꦚ꧀ꦚꦱꦩ꧀ꦥꦢꦁ’’.

꧕꧑꧑. ‘‘ꦪꦗꦱ꧀ꦱꦸ ꦪꦗꦩꦴꦤꦺꦴ ꦩꦴꦓꦴꦠꦶ ꦨꦒꦮꦴ, ꦱꦧ꧀ꦧꦠ꧀ꦡ ꦕ ꦮꦶꦥ꧀ꦥꦱꦴꦢꦺꦲꦶ ꦕꦶꦠ꧀ꦠꦁ;

ꦄꦴꦫꦩ꧀ꦩꦟꦁ ꦪꦗꦩꦴꦤꦱ꧀ꦱ ꦪꦚ꧀ꦚꦺꦴ, ꦌꦠ꧀ꦡꦥ꧀ꦥꦠꦶꦛ꧀ꦜꦴꦪ ꦗꦲꦴꦠꦶ ꦢꦺꦴꦱꦁ.

꧕꧑꧒. ‘‘ꦱꦺꦴ ꦮꦷꦠꦫꦴꦒꦺꦴ ꦥꦮꦶꦤꦺꦪ꧀ꦪ ꦢꦺꦴꦱꦁ, ꦩꦺꦠ꧀ꦠꦁ ꦕꦶꦠ꧀ꦠꦁ ꦨꦴꦮꦪꦩꦥ꧀ꦥꦩꦴꦟꦁ;

ꦫꦠ꧀ꦠꦶꦤ꧀ꦢꦶꦮꦁ ꦱꦠꦠꦩꦥ꧀ꦥꦩꦠ꧀ꦠꦺꦴ, ꦱꦧ꧀ꦧꦴ ꦢꦶꦱꦴ ꦦꦫꦠꦶ ꦄꦥ꧀ꦥꦩꦚ꧀ꦚꦁ’’.

꧕꧑꧓. ‘‘ꦏꦺꦴ ꦱꦸꦗ꧀ꦙꦠꦶ ꦩꦸꦕ꧀ꦕꦠꦶ ꦧꦗ꧀ꦙꦠꦷ ꦕ, ꦏꦺꦤꦠ꧀ꦠꦤꦴ ꦒꦕ꧀ꦖꦠꦶ [ꦏꦺꦤꦠ꧀ꦡꦺꦤꦴ ꦒꦕ꧀ꦖꦠꦶ (ꦏ.)] ꦧ꧀ꦫꦲ꧀ꦩꦭꦺꦴꦏꦁ;

ꦄꦗꦴꦤꦠꦺꦴ ꦩꦺ ꦩꦸꦤꦶ ꦧ꧀ꦫꦹꦲꦶ ꦥꦸꦛ꧀ꦜꦺꦴ, ꦨꦒꦮꦴ ꦲꦶ ꦩꦺ ꦱꦏ꧀ꦑꦶ ꦧ꧀ꦫꦲ꧀ꦩꦗ꧀ꦗꦢꦶꦛ꧀ꦜꦺꦴ;

ꦠꦸꦮꦚ꧀ꦲꦶ ꦤꦺꦴ ꦧ꧀ꦫꦲ꧀ꦩꦱꦩꦺꦴꦱꦶ ꦱꦕ꧀ꦕꦁ, ꦏꦡꦁ ꦈꦥꦥꦗ꧀ꦗꦠꦶ ꦧ꧀ꦫꦲ꧀ꦩꦭꦺꦴꦏꦁ ꦗꦸꦠꦶꦩ’’.

꧕꧑꧔. ‘‘ꦪꦺꦴ ꦪꦗꦠꦶ ꦠꦶꦮꦶꦣꦁ ꦪꦚ꧀ꦚꦱꦩ꧀ꦥꦢꦁ, (ꦩꦴꦓꦴꦠꦶ ꦨꦒꦮꦴ)

ꦄꦴꦫꦴꦣꦪꦺ ꦢꦏ꧀ꦑꦶꦟꦺꦪ꧀ꦪꦺꦨꦶ ꦠꦴꦢꦶ;

ꦌꦮꦁ ꦪꦗꦶꦠ꧀ꦮꦴ ꦱꦩ꧀ꦩꦴ ꦪꦴꦕꦪꦺꦴꦒꦺꦴ,

ꦈꦥꦥꦗ꧀ꦗꦠꦶ ꦧ꧀ꦫꦲ꧀ꦩꦭꦺꦴꦏꦤ꧀ꦠꦶ ꦧ꧀ꦫꦹꦩꦷ’’ꦠꦶ.

ꦌꦮꦁ ꦮꦸꦠ꧀ꦠꦺ, ꦩꦴꦓꦺꦴ ꦩꦴꦟꦮꦺꦴ ꦨꦒꦮꦤ꧀ꦠꦁ ꦌꦠꦢꦮꦺꦴꦕ – ‘‘ꦄꦨꦶꦏ꧀ꦏꦤ꧀ꦠꦁ, ꦨꦺꦴ ꦒꦺꦴꦠꦩ…ꦥꦺ… ꦄꦗ꧀ꦗꦠꦒ꧀ꦒꦺ ꦥꦴꦟꦸꦥꦺꦠꦁ ꦱꦫꦟꦁ ꦒꦠ’’ꦤ꧀ꦠꦶ.

ꦩꦴꦓꦱꦸꦠ꧀ꦠꦁ ꦥꦚ꧀ꦕꦩꦁ ꦤꦶꦛ꧀ꦜꦶꦠꦁ.