꧕. ꦠꦶꦫꦺꦴꦏꦸꦛ꧀ꦛꦥꦺꦠꦮꦠ꧀ꦡꦸ

꧑꧔. [ꦑꦸ. ꦥꦴ. ꧗.꧑ ꦑꦸꦢ꧀ꦢꦏꦥꦴꦜꦺ] ‘‘ꦠꦶꦫꦺꦴꦏꦸꦛ꧀ꦛꦺꦱꦸ [ꦠꦶꦫꦺꦴꦏꦸꦝ꧀ꦝꦺꦱꦸ (ꦱꦷ. ꦱ꧀ꦪꦴ. ꦥꦷ.)] ꦠꦶꦛ꧀ꦜꦤ꧀ꦠꦶ, ꦱꦤ꧀ꦣꦶꦱꦶꦔ꧀ꦓꦴꦛꦏꦺꦱꦸ ꦕ;

ꦢ꧀ꦮꦴꦫꦧꦴꦲꦴꦱꦸ ꦠꦶꦛ꧀ꦜꦤ꧀ꦠꦶ, ꦄꦴꦒꦤ꧀ꦠ꧀ꦮꦴꦤ ꦱꦏꦁ ꦓꦫꦁ.

꧑꧕. ‘‘ꦥꦲꦹꦠꦺ ꦄꦤ꧀ꦤꦥꦴꦤꦩ꧀ꦲꦶ, ꦑꦗ꧀ꦗꦨꦺꦴꦗ꧀ꦗꦺ ꦈꦥꦛ꧀ꦜꦶꦠꦺ;

ꦤ ꦠꦺꦱꦁ ꦏꦺꦴꦕꦶ ꦱꦫꦠꦶ, ꦱꦠ꧀ꦠꦴꦤꦁ ꦏꦩ꧀ꦩꦥꦕ꧀ꦕꦪꦴ.

꧑꧖. ‘‘ꦌꦮꦁ ꦢꦢꦤ꧀ꦠꦶ ꦚꦴꦠꦷꦤꦁ, ꦪꦺ ꦲꦺꦴꦤ꧀ꦠꦶ ꦄꦤꦸꦏꦩ꧀ꦥꦏꦴ;

ꦱꦸꦕꦶꦁ ꦥꦟꦷꦠꦁ ꦏꦴꦭꦺꦤ, ꦏꦥ꧀ꦥꦶꦪꦁ ꦥꦴꦤꦨꦺꦴꦗꦤꦁ;

‘ꦆꦢꦁ ꦮꦺꦴ ꦚꦴꦠꦷꦤꦁ ꦲꦺꦴꦠꦸ, ꦱꦸꦑꦶꦠꦴ ꦲꦺꦴꦤ꧀ꦠꦸ ꦚꦴꦠꦪꦺꦴ’.

꧑꧗. ‘‘ꦠꦺ ꦕ ꦠꦠ꧀ꦡ ꦱꦩꦴꦒꦤ꧀ꦠ꧀ꦮꦴ, ꦚꦴꦠꦶꦥꦺꦠꦴ ꦱꦩꦴꦒꦠꦴ;

ꦥꦲꦹꦠꦺ ꦄꦤ꧀ꦤꦥꦴꦤꦩ꧀ꦲꦶ, ꦱꦏ꧀ꦏꦕ꧀ꦕꦁ ꦄꦤꦸꦩꦺꦴꦢꦫꦺ.

꧑꧘. ‘‘‘ꦕꦶꦫꦁ ꦗꦷꦮꦤ꧀ꦠꦸ ꦤꦺꦴ ꦚꦴꦠꦷ, ꦪꦺꦱꦁ ꦲꦺꦠꦸ ꦭꦨꦴꦩꦱꦺ;

ꦄꦩ꧀ꦲꦴꦏꦚ꧀ꦕ ꦏꦠꦴ ꦥꦹꦗꦴ, ꦢꦴꦪꦏꦴ ꦕ ꦄꦤꦶꦥ꧀ꦦꦭꦴ’.

꧑꧙. ‘‘‘ꦤ ꦲꦶ ꦠꦠ꧀ꦡ ꦏꦱꦶ ꦄꦠ꧀ꦡꦶ, ꦒꦺꦴꦫꦏ꧀ꦑꦺꦠ꧀ꦡ ꦤ ꦮꦶꦗ꧀ꦗꦠꦶ;

ꦮꦟꦶꦗ꧀ꦗꦴ ꦠꦴꦢꦶꦱꦷ ꦤꦠ꧀ꦡꦶ, ꦲꦶꦫꦚ꧀ꦚꦺꦤ ꦏꦪꦴꦏꦪꦁ [ꦏꦪꦺꦴꦏ꧀ꦏꦪꦁ (ꦱꦷ. ꦏ.) ꦏꦪꦺꦴꦏꦪꦁ (ꦑꦸ. ꦥꦴ. ꧗.꧖)];

ꦆꦠꦺꦴ ꦢꦶꦤ꧀ꦤꦺꦤ ꦪꦴꦥꦺꦤ꧀ꦠꦶ, ꦥꦺꦠꦴ ꦏꦴꦭꦒꦠꦴ [ꦏꦴꦭꦏꦠꦴ (ꦱꦷ. ꦱ꧀ꦪꦴ. ꦥꦷ.)] ꦠꦲꦶꦁ’.

꧒꧐. ‘‘‘ꦈꦤ꧀ꦤꦩꦺ ꦈꦢꦏꦁ ꦮꦸꦛ꧀ꦜꦁ, ꦪꦡꦴ ꦤꦶꦤ꧀ꦤꦁ ꦥꦮꦠ꧀ꦠꦠꦶ;

ꦌꦮꦩꦺꦮ ꦆꦠꦺꦴ ꦢꦶꦤ꧀ꦤꦁ, ꦥꦺꦠꦴꦤꦁ ꦈꦥꦏꦥ꧀ꦥꦠꦶ’.

꧒꧑. ‘‘‘ꦪꦡꦴ ꦮꦴꦫꦶꦮꦲꦴ ꦥꦹꦫꦴ, ꦥꦫꦶꦥꦹꦫꦺꦤ꧀ꦠꦶ ꦱꦴꦒꦫꦁ;

ꦌꦮꦩꦺꦮ ꦆꦠꦺꦴ ꦢꦶꦤ꧀ꦤꦁ, ꦥꦺꦠꦴꦤꦁ ꦈꦥꦏꦥ꧀ꦥꦠꦶ’.

꧒꧒. ‘‘‘ꦄꦢꦴꦱꦶ ꦩꦺ ꦄꦏꦴꦱꦶ ꦩꦺ, ꦚꦴꦠꦶ ꦩꦶꦠ꧀ꦠꦴ [ꦚꦴꦠꦶ ꦩꦶꦠ꧀ꦠꦺꦴ (?)] ꦱꦑꦴ ꦕ ꦩꦺ;

ꦥꦺꦠꦴꦤꦁ ꦢꦏ꧀ꦑꦶꦟꦁ ꦢꦗ꧀ꦗꦴ, ꦥꦸꦧ꧀ꦧꦺ ꦏꦠꦩꦤꦸꦱ꧀ꦱꦫꦁ’.

꧒꧓. ‘‘‘ꦤ ꦲꦶ ꦫꦸꦟ꧀ꦟꦁ ꦮꦴ ꦱꦺꦴꦏꦺꦴ ꦮꦴ, ꦪꦴ ꦕꦚ꧀ꦚꦴ ꦥꦫꦶꦢꦺꦮꦤꦴ;

ꦤ ꦠꦁ ꦥꦺꦠꦴꦤꦩꦠ꧀ꦡꦴꦪ, ꦌꦮꦁ ꦠꦶꦛ꧀ꦜꦤ꧀ꦠꦶ ꦚꦴꦠꦪꦺꦴ’.

꧒꧔. ‘‘‘ꦄꦪꦚ꧀ꦕ ꦑꦺꦴ ꦢꦏ꧀ꦑꦶꦟꦴ ꦢꦶꦤ꧀ꦤꦴ, ꦱꦔ꧀ꦓꦩ꧀ꦲꦶ ꦱꦸꦥ꧀ꦥꦠꦶꦛ꧀ꦜꦶꦠꦴ;

ꦢꦷꦓꦫꦠ꧀ꦠꦁ ꦲꦶꦠꦴꦪꦱ꧀ꦱ, ꦜꦴꦤꦱꦺꦴ ꦈꦥꦏꦥ꧀ꦥꦠꦶ’.

꧒꧕. ‘‘ꦱꦺꦴ ꦚꦴꦠꦶꦣꦩ꧀ꦩꦺꦴ ꦕ ꦄꦪꦁ ꦤꦶꦢꦱ꧀ꦱꦶꦠꦺꦴ, ꦥꦺꦠꦴꦤ ꦥꦹꦗꦴ ꦕ ꦏꦠꦴ ꦈꦭ꦳ꦴꦫꦴ;

ꦧꦭꦚ꧀ꦕ ꦨꦶꦏ꧀ꦑꦹꦤꦩꦤꦸꦥ꧀ꦥꦢꦶꦤ꧀ꦤꦁ, ꦠꦸꦩ꧀ꦲꦺꦲꦶ ꦥꦸꦚ꧀ꦚꦁ ꦥꦱꦸꦠꦁ ꦄꦤꦥ꧀ꦥꦏ’’ꦤ꧀ꦠꦶ.

ꦠꦶꦫꦺꦴꦏꦸꦛ꧀ꦛꦥꦺꦠꦮꦠ꧀ꦡꦸ ꦥꦚ꧀ꦕꦩꦁ.