꧒. ꦥꦸꦒ꧀ꦒꦭꦮꦶꦱꦺꦱꦤꦶꦢ꧀ꦢꦺꦱꦺꦴ

꧘. ꦢ꧀ꦮꦺ ꦥꦸꦒ꧀ꦒꦭꦴ ꦥꦛꦶꦱꦩ꧀ꦨꦶꦢꦥ꧀ꦥꦠ꧀ꦠꦴ – ꦌꦏꦺꦴ ꦥꦸꦧ꧀ꦧꦪꦺꦴꦒꦱꦩ꧀ꦥꦤ꧀ꦤꦺꦴ, ꦌꦏꦺꦴ ꦤ ꦥꦸꦧ꧀ꦧꦪꦺꦴꦒꦱꦩ꧀ꦥꦤ꧀ꦤꦺꦴ. ꦪꦺꦴ ꦥꦸꦧ꧀ꦧꦪꦺꦴꦒꦱꦩ꧀ꦥꦤ꧀ꦤꦺꦴ ꦱꦺꦴ ꦠꦺꦤ ꦄꦠꦶꦫꦺꦏꦺꦴ ꦲꦺꦴꦠꦶ, ꦄꦣꦶꦏꦺꦴ ꦲꦺꦴꦠꦶ, ꦮꦶꦱꦺꦱꦺꦴ ꦲꦺꦴꦠꦶ. ꦠꦱ꧀ꦱ ꦚꦴꦟꦁ ꦥꦨꦶꦗ꧀ꦗꦠꦶ.

ꦢ꧀ꦮꦺ ꦥꦸꦒ꧀ꦒꦭꦴ ꦥꦛꦶꦱꦩ꧀ꦨꦶꦢꦥ꧀ꦥꦠ꧀ꦠꦴ, ꦢ꧀ꦮꦺꦥꦶ ꦥꦸꦧ꧀ꦧꦪꦺꦴꦒꦱꦩ꧀ꦥꦤ꧀ꦤꦴ – ꦌꦏꦺꦴ ꦧꦲꦸꦱ꧀ꦱꦸꦠꦺꦴ, ꦌꦏꦺꦴ ꦤ ꦧꦲꦸꦱ꧀ꦱꦸꦠꦺꦴ. ꦪꦺꦴ ꦧꦲꦸꦱ꧀ꦱꦸꦠꦺꦴ, ꦱꦺꦴ ꦠꦺꦤ ꦄꦠꦶꦫꦺꦏꦺꦴ ꦲꦺꦴꦠꦶ, ꦄꦣꦶꦏꦺꦴ ꦲꦺꦴꦠꦶ, ꦮꦶꦱꦺꦱꦺꦴ ꦲꦺꦴꦠꦶ. ꦠꦱ꧀ꦱ ꦚꦴꦟꦁ ꦥꦨꦶꦗ꧀ꦗꦠꦶ.

ꦢ꧀ꦮꦺ ꦥꦸꦒ꧀ꦒꦭꦴ ꦥꦛꦶꦱꦩ꧀ꦨꦶꦢꦥ꧀ꦥꦠ꧀ꦠꦴ, ꦢ꧀ꦮꦺꦥꦶ ꦥꦸꦧ꧀ꦧꦪꦺꦴꦒꦱꦩ꧀ꦥꦤ꧀ꦤꦴ, ꦢ꧀ꦮꦺꦥꦶ ꦧꦲꦸꦱ꧀ꦱꦸꦠꦴ – ꦌꦏꦺꦴ ꦢꦺꦱꦤꦴꦧꦲꦸꦭꦺꦴ, ꦌꦏꦺꦴ ꦤ ꦢꦺꦱꦤꦴꦧꦲꦸꦭꦺꦴ. ꦪꦺꦴ ꦢꦺꦱꦤꦴꦧꦲꦸꦭꦺꦴ, ꦱꦺꦴ ꦠꦺꦤ ꦄꦠꦶꦫꦺꦏꦺꦴ ꦲꦺꦴꦠꦶ, ꦄꦣꦶꦏꦺꦴ ꦲꦺꦴꦠꦶ, ꦮꦶꦱꦺꦱꦺꦴ ꦲꦺꦴꦠꦶ. ꦠꦱ꧀ꦱ ꦚꦴꦟꦁ ꦥꦨꦶꦗ꧀ꦗꦠꦶ.

ꦢ꧀ꦮꦺ ꦥꦸꦒ꧀ꦒꦭꦴ ꦥꦛꦶꦱꦩ꧀ꦨꦶꦢꦥ꧀ꦥꦠ꧀ꦠꦴ, ꦢ꧀ꦮꦺꦥꦶ ꦥꦸꦧ꧀ꦧꦪꦺꦴꦒꦱꦩ꧀ꦥꦤ꧀ꦤꦴ, ꦢ꧀ꦮꦺꦥꦶ ꦧꦲꦸꦱ꧀ꦱꦸꦠꦴ, ꦢ꧀ꦮꦺꦥꦶ ꦢꦺꦱꦤꦴꦧꦲꦸꦭꦴ – ꦌꦏꦺꦴ ꦒꦫꦹꦥꦤꦶꦱ꧀ꦱꦶꦠꦺꦴ, ꦌꦏꦺꦴ ꦤ ꦒꦫꦹꦥꦤꦶꦱ꧀ꦱꦶꦠꦺꦴ. ꦪꦺꦴ ꦒꦫꦹꦥꦤꦶꦱ꧀ꦱꦶꦠꦺꦴ, ꦱꦺꦴ ꦠꦺꦤ ꦄꦠꦶꦫꦺꦏꦺꦴ ꦲꦺꦴꦠꦶ, ꦄꦣꦶꦏꦺꦴ ꦲꦺꦴꦠꦶ, ꦮꦶꦱꦺꦱꦺꦴ ꦲꦺꦴꦠꦶ. ꦠꦱ꧀ꦱ ꦚꦴꦟꦁ ꦥꦨꦶꦗ꧀ꦗꦠꦶ.

ꦢ꧀ꦮꦺ ꦥꦸꦒ꧀ꦒꦭꦴ ꦥꦛꦶꦱꦩ꧀ꦨꦶꦢꦥ꧀ꦥꦠ꧀ꦠꦴ, ꦢ꧀ꦮꦺꦥꦶ ꦥꦸꦧ꧀ꦧꦪꦺꦴꦒꦱꦩ꧀ꦥꦤ꧀ꦤꦴ, ꦢ꧀ꦮꦺꦥꦶ ꦧꦲꦸꦱ꧀ꦱꦸꦠꦴ, ꦢ꧀ꦮꦺꦥꦶ ꦢꦺꦱꦤꦴꦧꦲꦸꦭꦴ, ꦢ꧀ꦮꦺꦥꦶ ꦒꦫꦹꦥꦤꦶꦱ꧀ꦱꦶꦠꦴ – ꦌꦏꦺꦴ ꦮꦶꦲꦴꦫꦧꦲꦸꦭꦺꦴ, ꦌꦏꦺꦴ ꦤ ꦮꦶꦲꦴꦫꦧꦲꦸꦭꦺꦴ. ꦪꦺꦴ ꦮꦶꦲꦴꦫꦧꦲꦸꦭꦺꦴ, ꦱꦺꦴ ꦠꦺꦤ ꦄꦠꦶꦫꦺꦏꦺꦴ ꦲꦺꦴꦠꦶ, ꦄꦣꦶꦏꦺꦴ ꦲꦺꦴꦠꦶ, ꦮꦶꦱꦺꦱꦺꦴ ꦲꦺꦴꦠꦶ. ꦠꦱ꧀ꦱ ꦚꦴꦟꦁ ꦥꦨꦶꦗ꧀ꦗꦠꦶ.

ꦢ꧀ꦮꦺ ꦥꦸꦒ꧀ꦒꦭꦴ ꦥꦛꦶꦱꦩ꧀ꦨꦶꦢꦥ꧀ꦥꦠ꧀ꦠꦴ, ꦢ꧀ꦮꦺꦥꦶ ꦥꦸꦧ꧀ꦧꦪꦺꦴꦒꦱꦩ꧀ꦥꦤ꧀ꦤꦴ, ꦢ꧀ꦮꦺꦥꦶ ꦧꦲꦸꦱ꧀ꦱꦸꦠꦴ, ꦢ꧀ꦮꦺꦥꦶ ꦢꦺꦱꦤꦴꦧꦲꦸꦭꦴ, ꦢ꧀ꦮꦺꦥꦶ ꦒꦫꦹꦥꦤꦶꦱ꧀ꦱꦶꦠꦴ, ꦢ꧀ꦮꦺꦥꦶ ꦮꦶꦲꦴꦫꦧꦲꦸꦭꦴ – ꦌꦏꦺꦴ ꦥꦕ꧀ꦕꦮꦺꦏ꧀ꦑꦟꦴꦧꦲꦸꦭꦺꦴ, ꦌꦏꦺꦴ ꦤ ꦥꦕ꧀ꦕꦮꦺꦏ꧀ꦑꦟꦴꦧꦲꦸꦭꦺꦴ. ꦪꦺꦴ ꦥꦕ꧀ꦕꦮꦺꦏ꧀ꦑꦟꦴꦧꦲꦸꦭꦺꦴ, ꦱꦺꦴ ꦠꦺꦤ ꦄꦠꦶꦫꦺꦏꦺꦴ ꦲꦺꦴꦠꦶ, ꦄꦣꦶꦏꦺꦴ ꦲꦺꦴꦠꦶ, ꦮꦶꦱꦺꦱꦺꦴ ꦲꦺꦴꦠꦶ. ꦠꦱ꧀ꦱ ꦚꦴꦟꦁ ꦥꦨꦶꦗ꧀ꦗꦠꦶ.

ꦢ꧀ꦮꦺ ꦥꦸꦒ꧀ꦒꦭꦴ ꦥꦛꦶꦱꦩ꧀ꦨꦶꦢꦥ꧀ꦥꦠ꧀ꦠꦴ, ꦢ꧀ꦮꦺꦥꦶ ꦥꦸꦧ꧀ꦧꦪꦺꦴꦒꦱꦩ꧀ꦥꦤ꧀ꦤꦴ, ꦢ꧀ꦮꦺꦥꦶ ꦧꦲꦸꦱ꧀ꦱꦸꦠꦴ, ꦢ꧀ꦮꦺꦥꦶ ꦢꦺꦱꦤꦴꦧꦲꦸꦭꦴ, ꦢ꧀ꦮꦺꦥꦶ ꦒꦫꦹꦥꦤꦶꦱ꧀ꦱꦶꦠꦴ, ꦢ꧀ꦮꦺꦥꦶ ꦮꦶꦲꦴꦫꦧꦲꦸꦭꦴ, ꦢ꧀ꦮꦺꦥꦶ ꦥꦕ꧀ꦕꦮꦺꦏ꧀ꦑꦟꦴꦧꦲꦸꦭꦴ – ꦌꦏꦺꦴ ꦱꦺꦑꦥꦛꦶꦱꦩ꧀ꦨꦶꦢꦥ꧀ꦥꦠ꧀ꦠꦺꦴ, ꦌꦏꦺꦴ ꦄꦱꦺꦑꦥꦛꦶꦱꦩ꧀ꦨꦶꦢꦥ꧀ꦥꦠ꧀ꦠꦺꦴ. ꦪꦺꦴ ꦄꦱꦺꦑꦥꦛꦶꦱꦩ꧀ꦨꦶꦢꦥ꧀ꦥꦠ꧀ꦠꦺꦴ, ꦱꦺꦴ ꦠꦺꦤ ꦄꦠꦶꦫꦺꦏꦺꦴ ꦲꦺꦴꦠꦶ, ꦄꦣꦶꦏꦺꦴ ꦲꦺꦴꦠꦶ, ꦮꦶꦱꦺꦱꦺꦴ ꦲꦺꦴꦠꦶ. ꦠꦱ꧀ꦱ ꦚꦴꦟꦁ ꦥꦨꦶꦗ꧀ꦗꦠꦶ.

ꦢ꧀ꦮꦺ ꦥꦸꦒ꧀ꦒꦭꦴ ꦥꦛꦶꦱꦩ꧀ꦨꦶꦢꦥ꧀ꦥꦠ꧀ꦠꦴ, ꦢ꧀ꦮꦺꦥꦶ ꦥꦸꦧ꧀ꦧꦪꦺꦴꦒꦱꦩ꧀ꦥꦤ꧀ꦤꦴ, ꦢ꧀ꦮꦺꦥꦶ ꦧꦲꦸꦱ꧀ꦱꦸꦠꦴ, ꦢ꧀ꦮꦺꦥꦶ ꦢꦺꦱꦤꦴꦧꦲꦸꦭꦴ, ꦢ꧀ꦮꦺꦥꦶ ꦒꦫꦹꦥꦤꦶꦱ꧀ꦱꦶꦠꦴ, ꦢ꧀ꦮꦺꦥꦶ ꦮꦶꦲꦴꦫꦧꦲꦸꦭꦴ, ꦢ꧀ꦮꦺꦥꦶ ꦥꦕ꧀ꦕꦮꦺꦏ꧀ꦑꦟꦴꦧꦲꦸꦭꦴ, ꦢ꧀ꦮꦺꦥꦶ ꦄꦱꦺꦑꦥꦛꦶꦱꦩ꧀ꦨꦶꦢꦥ꧀ꦥꦠ꧀ꦠꦴ – ꦌꦏꦺꦴ ꦱꦴꦮꦏꦥꦴꦫꦩꦶꦥ꧀ꦥꦠ꧀ꦠꦺꦴ, ꦌꦏꦺꦴ ꦤ ꦱꦴꦮꦏꦥꦴꦫꦩꦶꦥ꧀ꦥꦠ꧀ꦠꦺꦴ. ꦪꦺꦴ ꦱꦴꦮꦏꦥꦴꦫꦩꦶꦥ꧀ꦥꦠ꧀ꦠꦺꦴ, ꦱꦺꦴ ꦠꦺꦤ ꦄꦠꦶꦫꦺꦏꦺꦴ ꦲꦺꦴꦠꦶ, ꦄꦣꦶꦏꦺꦴ ꦲꦺꦴꦠꦶ, ꦮꦶꦱꦺꦱꦺꦴ ꦲꦺꦴꦠꦶ. ꦠꦱ꧀ꦱ ꦚꦴꦟꦁ ꦥꦨꦶꦗ꧀ꦗꦠꦶ.

ꦢ꧀ꦮꦺ ꦥꦸꦒ꧀ꦒꦭꦴ ꦥꦛꦶꦱꦩ꧀ꦨꦶꦢꦥ꧀ꦥꦠ꧀ꦠꦴ, ꦢ꧀ꦮꦺꦥꦶ ꦥꦸꦧ꧀ꦧꦪꦺꦴꦒꦱꦩ꧀ꦥꦤ꧀ꦤꦴ, ꦢ꧀ꦮꦺꦥꦶ ꦧꦲꦸꦱ꧀ꦱꦸꦠꦴ, ꦢ꧀ꦮꦺꦥꦶ ꦢꦺꦱꦤꦴꦧꦲꦸꦭꦴ, ꦢ꧀ꦮꦺꦥꦶ ꦒꦫꦹꦥꦤꦶꦱ꧀ꦱꦶꦠꦴ, ꦢ꧀ꦮꦺꦥꦶ ꦮꦶꦲꦴꦫꦧꦲꦸꦭꦴ, ꦢ꧀ꦮꦺꦥꦶ ꦥꦕ꧀ꦕꦮꦺꦏ꧀ꦑꦟꦴꦧꦲꦸꦭꦴ, ꦢ꧀ꦮꦺꦥꦶ ꦄꦱꦺꦑꦥꦛꦶꦱꦩ꧀ꦨꦶꦢꦥ꧀ꦥꦠ꧀ꦠꦴ – ꦌꦏꦺꦴ ꦱꦴꦮꦏꦥꦴꦫꦩꦶꦥ꧀ꦥꦠ꧀ꦠꦺꦴ, ꦌꦏꦺꦴ ꦥꦕ꧀ꦕꦺꦏꦱꦩ꧀ꦧꦸꦢ꧀ꦣꦺꦴ. ꦪꦺꦴ ꦥꦕ꧀ꦕꦺꦏꦱꦩ꧀ꦧꦸꦢ꧀ꦣꦺꦴ, ꦱꦺꦴ ꦠꦺꦤ ꦄꦠꦶꦫꦺꦏꦺꦴ ꦲꦺꦴꦠꦶ, ꦄꦣꦶꦏꦺꦴ ꦲꦺꦴꦠꦶ, ꦮꦶꦱꦺꦱꦺꦴ ꦲꦺꦴꦠꦶ. ꦠꦱ꧀ꦱ ꦚꦴꦟꦁ ꦥꦨꦶꦗ꧀ꦗꦠꦶ.

ꦥꦕ꧀ꦕꦺꦏꦧꦸꦢ꧀ꦣꦚ꧀ꦕ ꦱꦢꦺꦮꦏꦚ꧀ꦕ ꦭꦺꦴꦏꦁ ꦈꦥꦴꦢꦴꦪ ꦠꦡꦴꦒꦠꦺꦴ ꦄꦫꦲꦁ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦴ ꦄꦒ꧀ꦒꦺꦴ ꦥꦛꦶꦱꦩ꧀ꦨꦶꦢꦥ꧀ꦥꦠ꧀ꦠꦺꦴ ꦥꦚ꧀ꦚꦴꦥꦨꦺꦢꦏꦸꦱꦭꦺꦴ ꦥꦨꦶꦤ꧀ꦤꦚꦴꦟꦺꦴ ꦄꦣꦶꦒꦠꦥꦛꦶꦱꦩ꧀ꦨꦶꦢꦺꦴ ꦕꦠꦸꦮꦺꦱꦴꦫꦗ꧀ꦗꦥ꧀ꦥꦠ꧀ꦠꦺꦴ ꦢꦱꦧꦭꦣꦴꦫꦷ ꦥꦸꦫꦶꦱꦴꦱꦨꦺꦴ ꦥꦸꦫꦶꦱꦱꦷꦲꦺꦴ…ꦥꦺ… ꦪꦺꦥꦶ ꦠꦺ ꦑꦠ꧀ꦠꦶꦪꦥꦟ꧀ꦝꦶꦠꦴ ꦧ꧀ꦫꦴꦲ꧀ꦩꦟꦥꦟ꧀ꦝꦶꦠꦴ ꦒꦲꦥꦠꦶꦥꦟ꧀ꦝꦶꦠꦴ ꦱꦩꦟꦥꦟ꧀ꦝꦶꦠꦴ ꦤꦶꦥꦸꦟꦴ ꦏꦠꦥꦫꦥ꧀ꦥꦮꦴꦢꦴ ꦮꦴꦭꦮꦺꦣꦶꦫꦹꦥꦴ ꦮꦺꦴꦨꦶꦤ꧀ꦢꦤ꧀ꦠꦴ ꦩꦚ꧀ꦚꦺ ꦕꦫꦤ꧀ꦠꦶ ꦥꦚ꧀ꦚꦴꦒꦠꦺꦤ ꦢꦶꦛ꧀ꦜꦶꦒꦠꦴꦤꦶ, ꦠꦺ ꦥꦚ꧀ꦲꦁ ꦄꦨꦶꦱꦔ꧀ꦑꦫꦶꦠ꧀ꦮꦴ ꦄꦨꦶꦱꦔ꧀ꦑꦫꦶꦠ꧀ꦮꦴ ꦠꦡꦴꦒꦠꦁ ꦈꦥꦱꦔ꧀ꦏꦩꦶꦠ꧀ꦮꦴ ꦥꦸꦕ꧀ꦖꦤ꧀ꦠꦶ ꦒꦹꦭ꦳꧀ꦲꦴꦤꦶ ꦕ ꦥꦛꦶꦕ꧀ꦖꦤ꧀ꦤꦴꦤꦶ ꦕ. ꦏꦡꦶꦠꦴ ꦮꦶꦱꦗ꧀ꦗꦶꦠꦴ ꦕ ꦠꦺ ꦥꦚ꧀ꦲꦴ ꦨꦒꦮꦠꦴ ꦲꦺꦴꦤ꧀ꦠꦶ ꦤꦶꦢ꧀ꦢꦶꦛ꧀ꦜꦏꦴꦫꦟꦴ, ꦈꦥꦏ꧀ꦑꦶꦠ꧀ꦠꦏꦴ ꦕ ꦠꦺ ꦨꦒꦮꦠꦺꦴ ꦱꦩ꧀ꦥꦗ꧀ꦗꦤ꧀ꦠꦶ. ꦄꦡ ꦑꦺꦴ ꦨꦒꦮꦴ ꦠꦠ꧀ꦡ ꦄꦠꦶꦫꦺꦴꦕꦠꦶ, ꦪꦢꦶꦢꦁ ꦥꦚ꧀ꦚꦴꦪꦴꦠꦶ ꦄꦒ꧀ꦒꦺꦴ ꦥꦛꦶꦱꦩ꧀ꦨꦶꦢꦥ꧀ꦥꦠ꧀ꦠꦺꦴꦠꦶ.

ꦩꦲꦴꦥꦚ꧀ꦚꦴꦏꦡꦴ ꦤꦶꦛ꧀ꦜꦶꦠꦴ.