꧕. ꦱꦱ꧀ꦱꦠꦢꦶꦛ꧀ꦜꦶꦤꦶꦢ꧀ꦢꦺꦱꦺꦴ

꧑꧓꧘. ꦱꦏ꧀ꦏꦴꦪꦮꦠ꧀ꦡꦸꦏꦴꦪ ꦱꦱ꧀ꦱꦠꦢꦶꦛ꧀ꦜꦶꦪꦴ ꦏꦠꦩꦺꦲꦶ ꦥꦤ꧀ꦤꦫꦱꦲꦶ ꦄꦴꦏꦴꦫꦺꦲꦶ ꦄꦨꦶꦤꦶꦮꦺꦱꦺꦴ ꦲꦺꦴꦠꦶ? ꦆꦣ ꦄꦱ꧀ꦱꦸꦠꦮꦴ ꦥꦸꦡꦸꦗ꧀ꦗꦤꦺꦴ ꦄꦫꦶꦪꦴꦤꦁ ꦄꦢꦱ꧀ꦱꦴꦮꦷ ꦄꦫꦶꦪꦣꦩ꧀ꦩꦱ꧀ꦱ ꦄꦏꦺꦴꦮꦶꦢꦺꦴ ꦄꦫꦶꦪꦣꦩ꧀ꦩꦺ ꦄꦮꦶꦤꦷꦠꦺꦴ ꦱꦥ꧀ꦥꦸꦫꦶꦱꦴꦤꦁ ꦄꦢꦱ꧀ꦱꦴꦮꦷ ꦱꦥ꧀ꦥꦸꦫꦶꦱꦣꦩ꧀ꦩꦱ꧀ꦱ ꦄꦏꦺꦴꦮꦶꦢꦺꦴ ꦱꦥ꧀ꦥꦸꦫꦶꦱꦣꦩ꧀ꦩꦺ ꦄꦮꦶꦤꦷꦠꦺꦴ ꦫꦹꦥꦮꦤ꧀ꦠꦁ ꦮꦴ ꦄꦠ꧀ꦠꦴꦤꦁ ꦄꦠ꧀ꦠꦤꦶ ꦮꦴ ꦫꦹꦥꦁ ꦫꦹꦥꦱ꧀ꦩꦶꦁ ꦮꦴ ꦄꦠ꧀ꦠꦴꦤꦁ. ꦮꦺꦢꦤꦴꦮꦤ꧀ꦠꦁ ꦮꦴ ꦄꦠ꧀ꦠꦴꦤꦁ…ꦥꦺ… ꦱꦚ꧀ꦚꦴꦮꦤ꧀ꦠꦁ ꦮꦴ ꦄꦠ꧀ꦠꦴꦤꦁ… ꦱꦔ꧀ꦑꦴꦫꦮꦤ꧀ꦠꦁ ꦮꦴ ꦄꦠ꧀ꦠꦴꦤꦁ… ꦮꦶꦚ꧀ꦚꦴꦟꦮꦤ꧀ꦠꦁ ꦮꦴ ꦄꦠ꧀ꦠꦴꦤꦁ ꦄꦠ꧀ꦠꦤꦶ ꦮꦴ ꦮꦶꦚ꧀ꦚꦴꦟꦁ ꦮꦶꦚ꧀ꦚꦴꦟꦱ꧀ꦩꦶꦁ ꦮꦴ ꦄꦠ꧀ꦠꦴꦤꦁ.

ꦏꦡꦁ ꦫꦹꦥꦮꦤ꧀ꦠꦁ ꦄꦠ꧀ꦠꦴꦤꦁ ꦱꦩꦤꦸꦥꦱ꧀ꦱꦠꦶ? ꦆꦣꦺꦏꦕ꧀ꦕꦺꦴ ꦮꦺꦢꦤꦁ… ꦱꦚ꧀ꦚꦁ… ꦱꦔ꧀ꦑꦴꦫꦺ… ꦮꦶꦚ꧀ꦚꦴꦟꦁ ꦄꦠ꧀ꦠꦠꦺꦴ ꦱꦩꦤꦸꦥꦱ꧀ꦱꦠꦶ. ꦠꦱ꧀ꦱ ꦌꦮꦁ ꦲꦺꦴꦠꦶ – ‘‘ꦄꦪꦁ ꦑꦺꦴ ꦩꦺ ꦄꦠ꧀ꦠꦴ. ꦱꦺꦴ ꦑꦺꦴ ꦥꦤ ꦩꦺ ꦄꦪꦁ ꦄꦠ꧀ꦠꦴ ꦆꦩꦶꦤꦴ ꦫꦹꦥꦺꦤ ꦫꦹꦥꦮꦴ’’ꦠꦶ. ꦫꦹꦥꦮꦤ꧀ꦠꦁ ꦄꦠ꧀ꦠꦴꦤꦁ ꦱꦩꦤꦸꦥꦱ꧀ꦱꦠꦶ. ꦱꦺꦪ꧀ꦪꦡꦴꦥꦶ ꦫꦸꦏ꧀ꦑꦺꦴ ꦖꦴꦪꦴꦱꦩ꧀ꦥꦤ꧀ꦤꦺꦴ ꦄꦱ꧀ꦱ. ꦠꦩꦺꦤꦁ ꦥꦸꦫꦶꦱꦺꦴ ꦌꦮꦁ ꦮꦢꦺꦪ꧀ꦪ – ‘‘ꦄꦪꦁ ꦫꦸꦏ꧀ꦑꦺꦴ, ꦄꦪꦁ ꦖꦴꦪꦴ; ꦄꦚ꧀ꦚꦺꦴ ꦫꦸꦏ꧀ꦑꦺꦴ, ꦄꦚ꧀ꦚꦴ ꦖꦴꦪꦴ. ꦱꦺꦴ ꦑꦺꦴ ꦥꦤꦴꦪꦁ ꦫꦸꦏ꧀ꦑꦺꦴ ꦆꦩꦴꦪ ꦖꦴꦪꦴꦪ ꦖꦴꦪꦴꦮꦴ’’ꦠꦶ. ꦖꦴꦪꦴꦮꦤ꧀ꦠꦁ ꦫꦸꦏ꧀ꦑꦁ ꦱꦩꦤꦸꦥꦱ꧀ꦱꦠꦶ. ꦌꦮꦩꦺꦮꦁ ꦆꦣꦺꦏꦕ꧀ꦕꦺꦴ ꦮꦺꦢꦤꦁ…ꦥꦺ… ꦄꦪꦁ ꦥꦜꦩꦴ ꦱꦏ꧀ꦏꦴꦪꦮꦠ꧀ꦡꦸꦏꦴ ꦱꦱ꧀ꦱꦠꦢꦶꦛ꧀ꦜꦶ. ꦱꦱ꧀ꦱꦠꦢꦶꦛ꧀ꦜꦶ ꦩꦶꦕ꧀ꦖꦴꦢꦶꦛ꧀ꦜꦶ…ꦥꦺ… ꦆꦩꦴꦤꦶ ꦱꦚ꧀ꦚꦺꦴꦗꦤꦴꦤꦶ, ꦤ ꦕ ꦢꦶꦛ꧀ꦜꦶꦪꦺꦴ. ꦌꦮꦁ ꦫꦹꦥꦮꦤ꧀ꦠꦁ ꦄꦠ꧀ꦠꦴꦤꦁ ꦱꦩꦤꦸꦥꦱ꧀ꦱꦠꦶ…ꦥꦺ… ꦱꦏ꧀ꦏꦴꦪꦮꦠ꧀ꦡꦸꦏꦴꦪ ꦱꦱ꧀ꦱꦠꦢꦶꦛ꧀ꦜꦶꦪꦴ ꦆꦩꦺꦲꦶ ꦥꦤ꧀ꦤꦫꦱꦲꦶ ꦄꦴꦏꦴꦫꦺꦲꦶ ꦄꦨꦶꦤꦶꦮꦺꦱꦺꦴ ꦲꦺꦴꦠꦶ.

ꦱꦱ꧀ꦱꦠꦢꦶꦛ꧀ꦜꦶꦤꦶꦢ꧀ꦢꦺꦱꦺꦴ ꦥꦚ꧀ꦕꦩꦺꦴ.