꧓꧔. ꦤꦶꦫꦺꦴꦣꦱꦩꦴꦥꦠ꧀ꦠꦶꦚꦴꦟꦤꦶꦢ꧀ꦢꦺꦱꦺꦴ

꧘꧓. ꦏꦡꦁ ꦢ꧀ꦮꦷꦲꦶ ꦧꦭꦺꦲꦶ ꦱꦩꦤ꧀ꦤꦴꦒꦠꦠ꧀ꦠꦴ ꦠꦪꦺꦴ ꦕ ꦱꦔ꧀ꦑꦴꦫꦴꦤꦁ ꦥꦛꦶꦥ꧀ꦥꦱ꧀ꦱꦢ꧀ꦣꦶꦪꦴ ꦱꦺꦴꦭ꦳ꦱꦲꦶ ꦚꦴꦟꦕꦫꦶꦪꦴꦲꦶ ꦤꦮꦲꦶ ꦱꦩꦴꦣꦶꦕꦫꦶꦪꦴꦲꦶ ꦮꦱꦶꦨꦴꦮꦠꦴ ꦥꦚ꧀ꦚꦴ ꦤꦶꦫꦺꦴꦣꦱꦩꦴꦥꦠ꧀ꦠꦶꦪꦴ ꦚꦴꦟꦁ?

ꦢ꧀ꦮꦷꦲꦶ ꦧꦭꦺꦲꦷꦠꦶ ꦢ꧀ꦮꦺ ꦧꦭꦴꦤꦶ – ꦱꦩꦡꦧꦭꦁ, ꦮꦶꦥꦱ꧀ꦱꦤꦴꦧꦭꦁ. ꦏꦠꦩꦁ ꦱꦩꦡꦧꦭꦁ? ꦤꦺꦏ꧀ꦑꦩ꧀ꦩꦮꦱꦺꦤ ꦕꦶꦠ꧀ꦠꦱ꧀ꦱꦺꦏꦒ꧀ꦒꦠꦴ ꦄꦮꦶꦏ꧀ꦑꦺꦥꦺꦴ ꦱꦩꦡꦧꦭꦁ. ꦄꦧ꧀ꦪꦴꦥꦴꦢꦮꦱꦺꦤ ꦕꦶꦠ꧀ꦠꦱ꧀ꦱꦺꦏꦒ꧀ꦒꦠꦴ ꦄꦮꦶꦏ꧀ꦑꦺꦥꦺꦴ ꦱꦩꦡꦧꦭꦁ. ꦄꦴꦭꦺꦴꦏꦱꦚ꧀ꦚꦴꦮꦱꦺꦤ ꦕꦶꦠ꧀ꦠꦱ꧀ꦱꦺꦏꦒ꧀ꦒꦠꦴ ꦄꦮꦶꦏ꧀ꦑꦺꦥꦺꦴ ꦱꦩꦡꦧꦭꦁ. ꦄꦮꦶꦏ꧀ꦑꦺꦥꦮꦱꦺꦤ ꦕꦶꦠ꧀ꦠꦱ꧀ꦱꦺꦏꦒ꧀ꦒꦠꦴ ꦄꦮꦶꦏ꧀ꦑꦺꦥꦺꦴ ꦱꦩꦡꦧꦭꦁ…ꦥꦺ… ꦥꦛꦶꦤꦶꦱ꧀ꦱꦒ꧀ꦒꦴꦤꦸꦥꦱ꧀ꦱꦷ ꦄꦱ꧀ꦱꦴꦱꦮꦱꦺꦤ ꦕꦶꦠ꧀ꦠꦱ꧀ꦱꦺꦏꦒ꧀ꦒꦠꦴ ꦄꦮꦶꦏ꧀ꦑꦺꦥꦺꦴ ꦱꦩꦡꦧꦭꦁ. ꦥꦛꦶꦤꦶꦱ꧀ꦱꦒ꧀ꦒꦴꦤꦸꦥꦱ꧀ꦱꦷ ꦥꦱ꧀ꦱꦴꦱꦮꦱꦺꦤ ꦕꦶꦠ꧀ꦠꦱ꧀ꦱꦺꦏꦒ꧀ꦒꦠꦴ ꦄꦮꦶꦏ꧀ꦑꦺꦥꦺꦴ ꦱꦩꦡꦧꦭꦁ.

ꦱꦩꦡꦧꦭꦤ꧀ꦠꦶ ꦏꦺꦤꦛ꧀ꦜꦺꦤ ꦱꦩꦡꦧꦭꦁ? ꦥꦜꦩꦺꦤ ꦙꦴꦤꦺꦤ ꦤꦷꦮꦫꦟꦺ ꦤ ꦏꦩ꧀ꦥꦠꦷꦠꦶ – ꦱꦩꦡꦧꦭꦁ. ꦢꦸꦠꦶꦪꦺꦤ ꦙꦴꦤꦺꦤ ꦮꦶꦠꦏ꧀ꦏꦮꦶꦕꦴꦫꦺ ꦤ ꦏꦩ꧀ꦥꦠꦷꦠꦶ – ꦱꦩꦡꦧꦭꦁ. ꦠꦠꦶꦪꦺꦤ ꦙꦴꦤꦺꦤ ꦥꦷꦠꦶꦪꦴ ꦤ ꦏꦩ꧀ꦥꦠꦷꦠꦶ – ꦱꦩꦡꦧꦭꦁ. ꦕꦠꦸꦠ꧀ꦡꦺꦤ ꦙꦴꦤꦺꦤ ꦱꦸꦑꦢꦸꦏ꧀ꦑꦺ ꦤ ꦏꦩ꧀ꦥꦠꦷꦠꦶ – ꦱꦩꦡꦧꦭꦁ. ꦄꦴꦏꦴꦱꦴꦤꦚ꧀ꦕꦴꦪꦠꦤꦱꦩꦴꦥꦠ꧀ꦠꦶꦪꦴ ꦫꦹꦥꦱꦚ꧀ꦚꦴꦪ ꦥꦛꦶꦓꦱꦚ꧀ꦚꦴꦪ ꦤꦴꦤꦠ꧀ꦠꦱꦚ꧀ꦚꦴꦪ ꦤ ꦏꦩ꧀ꦥꦠꦷꦠꦶ – ꦱꦩꦡꦧꦭꦁ. ꦮꦶꦚ꧀ꦚꦴꦟꦚ꧀ꦕꦴꦪꦠꦤꦱꦩꦴꦥꦠ꧀ꦠꦶꦪꦴ ꦄꦴꦏꦴꦱꦴꦤꦚ꧀ꦕꦴꦪꦠꦤꦱꦚ꧀ꦚꦴꦪ ꦤ ꦏꦩ꧀ꦥꦠꦷꦠꦶ – ꦱꦩꦡꦧꦭꦁ. ꦄꦴꦏꦶꦚ꧀ꦕꦚ꧀ꦚꦴꦪꦠꦤꦱꦩꦴꦥꦠ꧀ꦠꦶꦪꦴ ꦮꦶꦚ꧀ꦚꦴꦟꦚ꧀ꦕꦴꦪꦠꦤꦱꦚ꧀ꦚꦴꦪ ꦤ ꦏꦩ꧀ꦥꦠꦷꦠꦶ – ꦱꦩꦡꦧꦭꦁ. ꦤꦺꦮꦱꦚ꧀ꦚꦴꦤꦴꦱꦚ꧀ꦚꦴꦪꦠꦤꦱꦩꦴꦥꦠ꧀ꦠꦶꦪꦴ ꦄꦴꦏꦶꦚ꧀ꦕꦚ꧀ꦚꦴꦪꦠꦤꦱꦚ꧀ꦚꦴꦪ ꦤ ꦏꦩ꧀ꦥꦠꦷꦠꦶ – ꦱꦩꦡꦧꦭꦁ. ꦈꦢ꧀ꦣꦕ꧀ꦕꦺ ꦕ ꦈꦢ꧀ꦣꦕ꧀ꦕꦱꦲꦒꦠꦏꦶꦭꦺꦱꦺ ꦕ ꦑꦤ꧀ꦣꦺ ꦕ ꦤ ꦏꦩ꧀ꦥꦠꦶ ꦤ ꦕꦭꦠꦶ ꦤ ꦮꦺꦣꦠꦷꦠꦶ – ꦱꦩꦡꦧꦭꦁ. ꦆꦢꦁ ꦱꦩꦡꦧꦭꦁ.

ꦏꦠꦩꦁ ꦮꦶꦥꦱ꧀ꦱꦤꦴꦧꦭꦁ? ꦄꦤꦶꦕ꧀ꦕꦴꦤꦸꦥꦱ꧀ꦱꦤꦴ ꦮꦶꦥꦱ꧀ꦱꦤꦴꦧꦭꦁ. ꦢꦸꦏ꧀ꦑꦴꦤꦸꦥꦱ꧀ꦱꦤꦴ ꦮꦶꦥꦱ꧀ꦱꦤꦴꦧꦭꦁ. ꦄꦤꦠ꧀ꦠꦴꦤꦸꦥꦱ꧀ꦱꦤꦴ ꦮꦶꦥꦱ꧀ꦱꦤꦴꦧꦭꦁ. ꦤꦶꦧ꧀ꦧꦶꦢꦴꦤꦸꦥꦱ꧀ꦱꦤꦴ ꦮꦶꦥꦱ꧀ꦱꦤꦴꦧꦭꦁ. ꦮꦶꦫꦴꦒꦴꦤꦸꦥꦱ꧀ꦱꦤꦴ ꦮꦶꦥꦱ꧀ꦱꦤꦴꦧꦭꦁ. ꦤꦶꦫꦺꦴꦣꦴꦤꦸꦥꦱ꧀ꦱꦤꦴ ꦮꦶꦥꦱ꧀ꦱꦤꦴꦧꦭꦁ. ꦥꦛꦶꦤꦶꦱ꧀ꦱꦒ꧀ꦒꦴꦤꦸꦥꦱ꧀ꦱꦤꦴ ꦮꦶꦥꦱ꧀ꦱꦤꦴꦧꦭꦁ. ꦫꦹꦥꦺ ꦄꦤꦶꦕ꧀ꦕꦴꦤꦸꦥꦱ꧀ꦱꦤꦴ ꦮꦶꦥꦱ꧀ꦱꦤꦴꦧꦭꦁ …ꦥꦺ… ꦫꦹꦥꦺ ꦥꦛꦶꦤꦶꦱ꧀ꦱꦒ꧀ꦒꦴꦤꦸꦥꦱ꧀ꦱꦤꦴ ꦮꦶꦥꦱ꧀ꦱꦤꦴꦧꦭꦁ. ꦮꦺꦢꦤꦴꦪ…ꦥꦺ… ꦱꦚ꧀ꦚꦴꦪ… ꦱꦔ꧀ꦑꦴꦫꦺꦱꦸ… ꦮꦶꦚ꧀ꦚꦴꦟꦺ… ꦕꦏ꧀ꦑꦸꦱ꧀ꦩꦶꦁ…ꦥꦺ… ꦗꦫꦴꦩꦫꦟꦺ ꦄꦤꦶꦕ꧀ꦕꦴꦤꦸꦥꦱ꧀ꦱꦤꦴ ꦮꦶꦥꦱ꧀ꦱꦤꦴꦧꦭꦁ…ꦥꦺ… ꦗꦫꦴꦩꦫꦟꦺ ꦥꦛꦶꦤꦶꦱ꧀ꦱꦒ꧀ꦒꦴꦤꦸꦥꦱ꧀ꦱꦤꦴ ꦮꦶꦥꦱ꧀ꦱꦤꦴꦧꦭꦁ.

ꦮꦶꦥꦱ꧀ꦱꦤꦴꦧꦭꦤ꧀ꦠꦶ ꦏꦺꦤꦛ꧀ꦜꦺꦤ ꦮꦶꦥꦱ꧀ꦱꦤꦴꦧꦭꦁ? ꦄꦤꦶꦕ꧀ꦕꦴꦤꦸꦥꦱ꧀ꦱꦤꦴꦪ ꦤꦶꦕ꧀ꦕꦱꦚ꧀ꦚꦴꦪ ꦤ ꦏꦩ꧀ꦥꦠꦷꦠꦶ – ꦮꦶꦥꦱ꧀ꦱꦤꦴꦧꦭꦁ. ꦢꦸꦏ꧀ꦑꦴꦤꦸꦥꦱ꧀ꦱꦤꦴꦪ ꦱꦸꦑꦱꦚ꧀ꦚꦴꦪ ꦤ ꦏꦩ꧀ꦥꦠꦷꦠꦶ – ꦮꦶꦥꦱ꧀ꦱꦤꦴꦧꦭꦁ. ꦄꦤꦠ꧀ꦠꦴꦤꦸꦥꦱ꧀ꦱꦤꦴꦪ ꦄꦠ꧀ꦠꦱꦚ꧀ꦚꦴꦪ ꦤ ꦏꦩ꧀ꦥꦠꦷꦠꦶ – ꦮꦶꦥꦱ꧀ꦱꦤꦴꦧꦭꦁ. ꦤꦶꦧ꧀ꦧꦶꦢꦴꦤꦸꦥꦱ꧀ꦱꦤꦴꦪ ꦤꦤ꧀ꦢꦶꦪꦴ ꦤ ꦏꦩ꧀ꦥꦠꦷꦠꦶ – ꦮꦶꦥꦱ꧀ꦱꦤꦴꦧꦭꦁ. ꦮꦶꦫꦴꦒꦴꦤꦸꦥꦱ꧀ꦱꦤꦴꦪ ꦫꦴꦒꦺ ꦤ ꦏꦩ꧀ꦥꦠꦷꦠꦶ – ꦮꦶꦥꦱ꧀ꦱꦤꦴꦧꦭꦁ. ꦤꦶꦫꦺꦴꦣꦴꦤꦸꦥꦱ꧀ꦱꦤꦴꦪ ꦱꦩꦸꦢꦪꦺ ꦤ ꦏꦩ꧀ꦥꦠꦷꦠꦶ – ꦮꦶꦥꦱ꧀ꦱꦤꦴꦧꦭꦁ. ꦥꦛꦶꦤꦶꦱ꧀ꦱꦒ꧀ꦒꦴꦤꦸꦥꦱ꧀ꦱꦤꦴꦪ ꦄꦴꦢꦴꦤꦺ ꦤ ꦏꦩ꧀ꦥꦠꦷꦠꦶ – ꦮꦶꦥꦱ꧀ꦱꦤꦴꦧꦭꦁ. ꦄꦮꦶꦗ꧀ꦗꦴꦪ ꦕ ꦄꦮꦶꦗ꧀ꦗꦴ ꦱꦲꦒꦠꦏꦶꦭꦺꦱꦺ ꦕ ꦑꦤ꧀ꦣꦺ ꦕ ꦤ ꦏꦩ꧀ꦥꦠꦶ ꦤ ꦕꦭꦠꦶ ꦤ ꦮꦺꦣꦠꦷꦠꦶ – ꦮꦶꦥꦱ꧀ꦱꦤꦴꦧꦭꦁ. ꦆꦢꦁ ꦮꦶꦥꦱ꧀ꦱꦤꦴꦧꦭꦁ.

ꦠꦪꦺꦴ ꦕ ꦱꦔ꧀ꦑꦴꦫꦴꦤꦁ ꦥꦛꦶꦥ꧀ꦥꦱ꧀ꦱꦢ꧀ꦣꦶꦪꦴꦠꦶ ꦏꦠꦩꦺꦱꦁ ꦠꦶꦟ꧀ꦟꦤ꧀ꦤꦁ ꦱꦔ꧀ꦑꦴꦫꦴꦤꦁ ꦥꦛꦶꦥ꧀ꦥꦱ꧀ꦱꦢ꧀ꦣꦶꦪꦴ? ꦢꦸꦠꦶꦪꦁ ꦙꦴꦤꦁ ꦱꦩꦴꦥꦤ꧀ꦤꦱ꧀ꦱ ꦮꦶꦠꦏ꧀ꦏꦮꦶꦕꦴꦫꦴ ꦮꦕꦷꦱꦔ꧀ꦑꦴꦫꦴ ꦥꦛꦶꦥ꧀ꦥꦱ꧀ꦱꦢ꧀ꦣꦴ ꦲꦺꦴꦤ꧀ꦠꦶ. ꦕꦠꦸꦠ꧀ꦡꦁ ꦙꦴꦤꦁ ꦱꦩꦴꦥꦤ꧀ꦤꦱ꧀ꦱ ꦄꦱ꧀ꦱꦴꦱꦥꦱ꧀ꦱꦴꦱꦴ ꦏꦴꦪꦱꦔ꧀ꦑꦴꦫꦴ ꦥꦛꦶꦥ꧀ꦥꦱ꧀ꦱꦢ꧀ꦣꦴ ꦲꦺꦴꦤ꧀ꦠꦶ. ꦱꦚ꧀ꦚꦴꦮꦺꦢꦪꦶꦠꦤꦶꦫꦺꦴꦣꦁ ꦱꦩꦴꦥꦤ꧀ꦤꦱ꧀ꦱ ꦱꦚ꧀ꦚꦴ ꦕ ꦮꦺꦢꦤꦴ ꦕ ꦕꦶꦠ꧀ꦠꦱꦔ꧀ꦑꦴꦫꦴ ꦥꦛꦶꦥ꧀ꦥꦱ꧀ꦱꦢ꧀ꦣꦴ ꦲꦺꦴꦤ꧀ꦠꦶ. ꦆꦩꦺꦱꦁ ꦠꦶꦟ꧀ꦟꦤ꧀ꦤꦁ ꦱꦔ꧀ꦑꦴꦫꦴꦤꦁ ꦥꦛꦶꦥ꧀ꦥꦱ꧀ꦱꦢ꧀ꦣꦶꦪꦴ.

꧘꧔. ꦱꦺꦴꦭ꦳ꦱꦲꦶ ꦚꦴꦟꦕꦫꦶꦪꦴꦲꦷꦠꦶ ꦏꦠꦩꦴꦲꦶ ꦱꦺꦴꦭ꦳ꦱꦲꦶ ꦚꦴꦟꦕꦫꦶꦪꦴꦲꦶ? ꦄꦤꦶꦕ꧀ꦕꦴꦤꦸꦥꦱ꧀ꦱꦤꦴ ꦚꦴꦟꦕꦫꦶꦪꦴ, ꦢꦸꦏ꧀ꦑꦴꦤꦸꦥꦱ꧀ꦱꦤꦴ ꦚꦴꦟꦕꦫꦶꦪꦴ, ꦄꦤꦠ꧀ꦠꦴꦤꦸꦥꦱ꧀ꦱꦤꦴ ꦚꦴꦟꦕꦫꦶꦪꦴ, ꦤꦶꦧ꧀ꦧꦶꦢꦴꦤꦸꦥꦱ꧀ꦱꦤꦴ ꦚꦴꦟꦕꦫꦶꦪꦴ, ꦮꦶꦫꦴꦒꦴꦤꦸꦥꦱ꧀ꦱꦤꦴ ꦚꦴꦟꦕꦫꦶꦪꦴ, ꦤꦶꦫꦺꦴꦣꦴꦤꦸꦥꦱ꧀ꦱꦤꦴ ꦚꦴꦟꦕꦫꦶꦪꦴ, ꦥꦛꦶꦤꦶꦱ꧀ꦱꦒ꧀ꦒꦴꦤꦸꦥꦱ꧀ꦱꦤꦴ ꦚꦴꦟꦕꦫꦶꦪꦴ, ꦮꦶꦮꦛ꧀ꦛꦤꦴꦤꦸꦥꦱ꧀ꦱꦤꦴ ꦚꦴꦟꦕꦫꦶꦪꦴ, ꦱꦺꦴꦠꦴꦥꦠ꧀ꦠꦶꦩꦒ꧀ꦒꦺꦴ ꦚꦴꦟꦕꦫꦶꦪꦴ, ꦱꦺꦴꦠꦴꦥꦠ꧀ꦠꦶꦦꦭꦱꦩꦴꦥꦠ꧀ꦠꦶ ꦚꦴꦟꦕꦫꦶꦪꦴ, ꦱꦏꦢꦴꦒꦴꦩꦶꦩꦒ꧀ꦒꦺꦴ ꦚꦴꦟꦕꦫꦶꦪꦴ, ꦱꦏꦢꦴꦒꦴꦩꦶꦦꦭꦱꦩꦴꦥꦠ꧀ꦠꦶ ꦚꦴꦟꦕꦫꦶꦪꦴ, ꦄꦤꦴꦒꦴꦩꦶꦩꦒ꧀ꦒꦺꦴ ꦚꦴꦟꦕꦫꦶꦪꦴ, ꦄꦤꦴꦒꦴꦩꦶꦦꦭꦱꦩꦴꦥꦠ꧀ꦠꦶ ꦚꦴꦟꦕꦫꦶꦪꦴ, ꦄꦫꦲꦠ꧀ꦠꦩꦒ꧀ꦒꦺꦴ ꦚꦴꦟꦕꦫꦶꦪꦴ, ꦄꦫꦲꦠ꧀ꦠꦦꦭꦱꦩꦴꦥꦠ꧀ꦠꦶ ꦚꦴꦟꦕꦫꦶꦪꦴ – ꦆꦩꦴꦲꦶ ꦱꦺꦴꦭ꦳ꦱꦲꦶ ꦚꦴꦟꦕꦫꦶꦪꦴꦲꦶ.

꧘꧕. ꦤꦮꦲꦶ ꦱꦩꦴꦣꦶꦕꦫꦶꦪꦴꦲꦷꦠꦶ ꦏꦠꦩꦴꦲꦶ ꦤꦮꦲꦶ ꦱꦩꦴꦣꦶꦕꦫꦶꦪꦴꦲꦶ? ꦥꦜꦩꦁ ꦙꦴꦤꦁ ꦱꦩꦴꦣꦶꦕꦫꦶꦪꦴ, ꦢꦸꦠꦶꦪꦁ ꦙꦴꦤꦁ ꦱꦩꦴꦣꦶꦕꦫꦶꦪꦴ, ꦠꦠꦶꦪꦁ ꦙꦴꦤꦁ ꦱꦩꦴꦣꦶꦕꦫꦶꦪꦴ, ꦕꦠꦸꦠ꧀ꦡꦁ ꦙꦴꦤꦁ ꦱꦩꦴꦣꦶꦕꦫꦶꦪꦴ, ꦄꦴꦏꦴꦱꦴꦤꦚ꧀ꦕꦴꦪꦠꦤꦱꦩꦴꦥꦠ꧀ꦠꦶ…ꦥꦺ… ꦮꦶꦚ꧀ꦚꦴꦟꦚ꧀ꦕꦴꦪꦠꦤꦱꦩꦴꦥꦠ꧀ꦠꦶ… ꦄꦴꦏꦶꦚ꧀ꦕꦚ꧀ꦚꦴꦪꦠꦤꦱꦩꦴꦥꦠ꧀ꦠꦶ… ꦤꦺꦮꦱꦚ꧀ꦚꦴꦤꦴꦱꦚ꧀ꦚꦴꦪꦠꦤꦱꦩꦴꦥꦠ꧀ꦠꦶ ꦱꦩꦴꦣꦶꦕꦫꦶꦪꦴ. ꦥꦜꦩꦁ ꦙꦴꦤꦁ ꦥꦛꦶꦭꦴꦨꦠ꧀ꦡꦴꦪ ꦮꦶꦠꦏ꧀ꦏꦺꦴ ꦕ ꦮꦶꦕꦴꦫꦺꦴ ꦕ ꦥꦷꦠꦶ ꦕ ꦱꦸꦑꦚ꧀ꦕ ꦕꦶꦠ꧀ꦠꦺꦏꦒ꧀ꦒꦠꦴ ꦕ…ꦥꦺ… ꦤꦺꦮꦱꦚ꧀ꦚꦴꦤꦴꦱꦚ꧀ꦚꦴꦪꦠꦤꦱꦩꦴꦥꦠ꧀ꦠꦶꦁ ꦥꦛꦶꦭꦴꦨꦠ꧀ꦡꦴꦪ ꦮꦶꦠꦏ꧀ꦏꦺꦴ ꦕ ꦮꦶꦕꦴꦫꦺꦴ ꦕ ꦥꦷꦠꦶ ꦕ ꦱꦸꦑꦚ꧀ꦕ ꦕꦶꦠ꧀ꦠꦺꦏꦒ꧀ꦒꦠꦴ ꦕ – ꦆꦩꦴꦲꦶ ꦤꦮꦲꦶ ꦱꦩꦴꦣꦶꦕꦫꦶꦪꦴꦲꦶ.

ꦮꦱꦷꦠꦶ ꦥꦚ꧀ꦕ ꦮꦱꦶꦪꦺꦴ. ꦄꦴꦮꦗ꧀ꦗꦤꦮꦱꦷ, ꦱꦩꦴꦥꦗ꧀ꦗꦤꦮꦱꦷ, ꦄꦣꦶꦛ꧀ꦜꦴꦤꦮꦱꦷ, ꦮꦸꦛ꧀ꦜꦴꦤꦮꦱꦷ, ꦥꦕ꧀ꦕꦮꦺꦏ꧀ꦑꦟꦴꦮꦱꦷ. ꦥꦜꦩꦁ ꦙꦴꦤꦁ ꦪꦠ꧀ꦡꦶꦕ꧀ꦖꦏꦁ ꦪꦢꦶꦕ꧀ꦖꦏꦁ ꦪꦴꦮꦠꦶꦕ꧀ꦖꦏꦁ ꦄꦴꦮꦗ꧀ꦗꦠꦶ; ꦄꦴꦮꦗ꧀ꦗꦤꦴꦪ ꦢꦤ꧀ꦣꦴꦪꦶꦠꦠ꧀ꦠꦁ ꦤꦠ꧀ꦡꦷꦠꦶ – ꦄꦴꦮꦗ꧀ꦗꦤꦮꦱꦷ. ꦥꦜꦩꦁ ꦙꦴꦤꦁ ꦪꦠ꧀ꦡꦶꦕ꧀ꦖꦏꦁ ꦪꦢꦶꦕ꧀ꦖꦏꦁ ꦪꦴꦮꦠꦶꦕ꧀ꦖꦏꦁ ꦱꦩꦴꦥꦗ꧀ꦗꦠꦶ; ꦱꦩꦴꦥꦗ꧀ꦗꦤꦴꦪ ꦢꦤ꧀ꦣꦴꦪꦶꦠꦠ꧀ꦠꦁ ꦤꦠ꧀ꦡꦷꦠꦶ – ꦱꦩꦴꦥꦗ꧀ꦗꦤꦮꦱꦷ. ꦥꦜꦩꦁ ꦙꦴꦤꦁ ꦪꦠ꧀ꦡꦶꦕ꧀ꦖꦏꦁ ꦪꦢꦶꦕ꧀ꦖꦏꦁ ꦪꦴꦮꦠꦶꦕ꧀ꦖꦏꦁ ꦄꦣꦶꦛ꧀ꦜꦴꦠꦶ; ꦄꦣꦶꦛ꧀ꦜꦴꦤꦺ ꦢꦤ꧀ꦣꦴꦪꦶꦠꦠ꧀ꦠꦁ ꦤꦠ꧀ꦡꦷꦠꦶ – ꦄꦣꦶꦛ꧀ꦜꦴꦤꦮꦱꦷ. ꦥꦜꦩꦁ ꦙꦴꦤꦁ ꦪꦠ꧀ꦡꦶꦕ꧀ꦖꦏꦁ ꦪꦢꦶꦕ꧀ꦖꦏꦁ ꦪꦴꦮꦠꦶꦕ꧀ꦖꦏꦁ ꦮꦸꦛ꧀ꦜꦴꦠꦶ; ꦮꦸꦛ꧀ꦜꦴꦤꦺ ꦢꦤ꧀ꦣꦴꦪꦶꦠꦠ꧀ꦠꦁ ꦤꦠ꧀ꦡꦷꦠꦶ – ꦮꦸꦛ꧀ꦜꦴꦤꦮꦱꦷ. ꦥꦜꦩꦁ ꦙꦴꦤꦁ ꦪꦠ꧀ꦡꦶꦕ꧀ꦖꦏꦁ ꦪꦢꦶꦕ꧀ꦖꦏꦁ ꦪꦴꦮꦠꦶꦕ꧀ꦖꦏꦁ ꦥꦕ꧀ꦕꦮꦺꦏ꧀ꦑꦠꦶ; ꦥꦕ꧀ꦕꦮꦺꦏ꧀ꦑꦟꦴꦪ ꦢꦤ꧀ꦣꦴꦪꦶꦠꦠ꧀ꦠꦁ ꦤꦠ꧀ꦡꦷꦠꦶ – ꦥꦕ꧀ꦕꦮꦺꦏ꧀ꦑꦟꦴꦮꦱꦷ.

ꦢꦸꦠꦶꦪꦁ ꦙꦴꦤꦁ…ꦥꦺ… ꦤꦺꦮꦱꦚ꧀ꦚꦴꦤꦴꦱꦚ꧀ꦚꦴꦪꦠꦤꦱꦩꦴꦥꦠ꧀ꦠꦶꦁ ꦪꦠ꧀ꦡꦶꦕ꧀ꦖꦏꦁ ꦪꦢꦶꦕ꧀ꦖꦏꦁ ꦪꦴꦮꦠꦶꦕ꧀ꦖꦏꦁ ꦄꦴꦮꦗ꧀ꦗꦠꦶ; ꦄꦴꦮꦗ꧀ꦗꦤꦴꦪ ꦢꦤ꧀ꦣꦴꦪꦶꦠꦠ꧀ꦠꦁ ꦤꦠ꧀ꦡꦷꦠꦶ – ꦄꦴꦮꦗ꧀ꦗꦤꦮꦱꦷ. ꦤꦺꦮꦱꦚ꧀ꦚꦴꦤꦴꦱꦚ꧀ꦚꦴꦪꦠꦤꦱꦩꦴꦥꦠ꧀ꦠꦶꦁ ꦪꦠ꧀ꦡꦶꦕ꧀ꦖꦏꦁ ꦪꦢꦶꦕ꧀ꦖꦏꦁ ꦪꦴꦮꦠꦶꦕ꧀ꦖꦏꦁ ꦱꦩꦴꦥꦗ꧀ꦗꦠꦶ…ꦥꦺ… ꦄꦣꦶꦛ꧀ꦜꦴꦠꦶ… ꦮꦸꦛ꧀ꦜꦴꦠꦶ… ꦥꦕ꧀ꦕꦮꦺꦏ꧀ꦑꦠꦶ; ꦥꦕ꧀ꦕꦮꦺꦏ꧀ꦑꦟꦴꦪ ꦢꦤ꧀ꦣꦴꦪꦶꦠꦠ꧀ꦠꦁ ꦤꦠ꧀ꦡꦷꦠꦶ – ꦥꦕ꧀ꦕꦮꦺꦏ꧀ꦑꦟꦴꦮꦱꦷ. ꦆꦩꦴ ꦥꦚ꧀ꦕ ꦮꦱꦶꦪꦺꦴ. ꦠꦁ ꦚꦴꦠꦛ꧀ꦜꦺꦤ ꦚꦴꦟꦁ, ꦥꦗꦴꦤꦤꦛ꧀ꦜꦺꦤ ꦥꦚ꧀ꦚꦴ. ꦠꦺꦤ ꦮꦸꦕ꧀ꦕꦠꦶ – ‘‘ꦢ꧀ꦮꦷꦲꦶ ꦧꦭꦺꦲꦶ ꦱꦩꦤ꧀ꦤꦴꦒꦠꦠ꧀ꦠꦴ ꦠꦪꦺꦴ ꦕ ꦱꦔ꧀ꦑꦴꦫꦴꦤꦁ ꦥꦛꦶꦥꦱ꧀ꦱꦢ꧀ꦣꦶꦪꦴ ꦱꦺꦴꦭ꦳ꦱꦲꦶ ꦚꦴꦟꦕꦫꦶꦪꦴꦲꦶ ꦤꦮꦲꦶ ꦱꦩꦴꦣꦶꦕꦫꦶꦪꦴꦲꦶ ꦮꦱꦷꦨꦴꦮꦠꦴ ꦥꦚ꧀ꦚꦴ ꦤꦶꦫꦺꦴꦣꦱꦩꦴꦥꦠ꧀ꦠꦶꦪꦴ ꦚꦴꦟꦁ’’.

ꦤꦶꦫꦺꦴꦣꦱꦩꦴꦥꦠ꧀ꦠꦶꦚꦴꦟꦤꦶꦢ꧀ꦢꦺꦱꦺꦴ ꦕꦠꦸꦠ꧀ꦠꦶꦁꦱꦠꦶꦩꦺꦴ.