꧘. ꦱꦹꦫꦶꦪꦔ꧀ꦒꦥꦚ꧀ꦲꦺꦴ

꧘. ‘‘ꦨꦤ꧀ꦠꦺ ꦤꦴꦒꦱꦺꦤ, ‘ꦱꦹꦫꦶꦪꦱ꧀ꦱ [ꦱꦸꦫꦶꦪꦱ꧀ꦱ (ꦱꦷ. ꦱ꧀ꦪꦴ. ꦥꦷ.)] ꦱꦠ꧀ꦠ ꦄꦔ꧀ꦒꦴꦤꦶ ꦒꦲꦺꦠꦧ꧀ꦧꦴꦤꦷ’ꦠꦶ ꦪꦁ ꦮꦢꦺꦱꦶ, ꦏꦠꦩꦴꦤꦶ ꦠꦴꦤꦶ ꦱꦠ꧀ꦠ ꦄꦔ꧀ꦒꦴꦤꦶ ꦒꦲꦺꦠꦧ꧀ꦧꦴꦤꦷ’’ꦠꦶ? ‘‘ꦪꦡꦴ, ꦩꦲꦴꦫꦴꦗ, ꦱꦹꦫꦶꦪꦺꦴ ꦱꦧ꧀ꦧꦁ ꦈꦢꦏꦁ ꦥꦫꦶꦱꦺꦴꦱꦺꦠꦶ, ꦌꦮꦩꦺꦮ ꦑꦺꦴ, ꦩꦲꦴꦫꦴꦗ, ꦪꦺꦴꦒꦶꦤꦴ ꦪꦺꦴꦒꦴꦮꦕꦫꦺꦤ ꦱꦧ꧀ꦧꦏꦶꦭꦺꦱꦴ ꦄꦤꦮꦱꦺꦱꦁ ꦥꦫꦶꦱꦺꦴꦱꦺꦠꦧ꧀ꦧꦴ. ꦆꦢꦁ, ꦩꦲꦴꦫꦴꦗ, ꦱꦹꦫꦶꦪꦱ꧀ꦱ ꦥꦜꦩꦁ ꦄꦔ꧀ꦒꦁ ꦒꦲꦺꦠꦧ꧀ꦧꦁ.

‘‘ꦥꦸꦤ ꦕꦥꦫꦁ, ꦩꦲꦴꦫꦴꦗ, ꦱꦹꦫꦶꦪꦺꦴ ꦠꦩꦤ꧀ꦣꦏꦴꦫꦁ ꦮꦶꦣꦩꦠꦶ, ꦌꦮꦩꦺꦮ ꦑꦺꦴ, ꦩꦲꦴꦫꦴꦗ, ꦪꦺꦴꦒꦶꦤꦴ ꦪꦺꦴꦒꦴꦮꦕꦫꦺꦤ ꦱꦧ꧀ꦧꦁ ꦫꦴꦒꦠꦩꦁ ꦢꦺꦴꦱꦠꦩꦁ ꦩꦺꦴꦲꦠꦩꦁ ꦩꦴꦤꦠꦩꦁ ꦢꦶꦛ꧀ꦜꦶꦠꦩꦁ ꦏꦶꦭꦺꦱꦠꦩꦁ ꦱꦧ꧀ꦧꦁ ꦢꦸꦕ꧀ꦕꦫꦶꦠꦠꦩꦁ ꦮꦶꦣꦩꦪꦶꦠꦧ꧀ꦧꦁ. ꦆꦢꦁ, ꦩꦲꦴꦫꦴꦗ, ꦱꦹꦫꦶꦪꦱ꧀ꦱ ꦢꦸꦠꦶꦪꦁ ꦄꦔ꧀ꦒꦁ ꦒꦲꦺꦠꦧ꧀ꦧꦁ.

‘‘ꦥꦸꦤ ꦕꦥꦫꦁ, ꦩꦲꦴꦫꦴꦗ, ꦱꦹꦫꦶꦪꦺꦴ ꦄꦨꦶꦏ꧀ꦑꦟꦁ ꦕꦫꦠꦶ, ꦌꦮꦩꦺꦮ ꦑꦺꦴ, ꦩꦲꦴꦫꦴꦗ, ꦪꦺꦴꦒꦶꦤꦴ ꦪꦺꦴꦒꦴꦮꦕꦫꦺꦤ ꦄꦨꦶꦏ꧀ꦑꦟꦁ ꦪꦺꦴꦤꦶꦱꦺꦴ ꦩꦤꦱꦶꦏꦴꦫꦺꦴ ꦏꦴꦠꦧ꧀ꦧꦺꦴ. ꦆꦢꦁ, ꦩꦲꦴꦫꦴꦗ, ꦱꦹꦫꦶꦪꦱ꧀ꦱ ꦠꦠꦶꦪꦁ ꦄꦔ꧀ꦒꦁ ꦒꦲꦺꦠꦧ꧀ꦧꦁ.

‘‘ꦥꦸꦤ ꦕꦥꦫꦁ, ꦩꦲꦴꦫꦴꦗ, ꦱꦹꦫꦶꦪꦺꦴ ꦫꦁꦱꦶꦩꦴꦭꦷ, ꦌꦮꦩꦺꦮ ꦑꦺꦴ, ꦩꦲꦴꦫꦴꦗ, ꦪꦺꦴꦒꦶꦤꦴ ꦪꦺꦴꦒꦴꦮꦕꦫꦺꦤ ꦄꦴꦫꦩ꧀ꦩꦟꦩꦴꦭꦶꦤꦴ ꦨꦮꦶꦠꦧ꧀ꦧꦁ. ꦆꦢꦁ, ꦩꦲꦴꦫꦴꦗ, ꦱꦹꦫꦶꦪꦱ꧀ꦱ ꦕꦠꦸꦠ꧀ꦡꦁ ꦄꦔ꧀ꦒꦁ ꦒꦲꦺꦠꦧ꧀ꦧꦁ.

‘‘ꦥꦸꦤ ꦕꦥꦫꦁ, ꦩꦲꦴꦫꦴꦗ, ꦱꦹꦫꦶꦪꦺꦴ ꦩꦲꦴꦗꦤꦏꦴꦪꦁ ꦱꦤ꧀ꦠꦴꦥꦺꦤ꧀ꦠꦺꦴ ꦕꦫꦠꦶ, ꦌꦮꦩꦺꦮ ꦑꦺꦴ, ꦩꦲꦴꦫꦴꦗ, ꦪꦺꦴꦒꦶꦤꦴ ꦪꦺꦴꦒꦴꦮꦕꦫꦺꦤ ꦄꦴꦕꦴꦫꦱꦷꦭꦒꦸꦟꦮꦠ꧀ꦠꦥ꧀ꦥꦛꦶꦥꦠ꧀ꦠꦶꦪꦴ ꦙꦴꦤꦮꦶꦩꦺꦴꦏ꧀ꦑꦱꦩꦴꦣꦶꦱꦩꦴꦥꦠ꧀ꦠꦶꦆꦤ꧀ꦢ꧀ꦫꦶꦪꦧꦭꦧꦺꦴꦗ꧀ꦙꦔ꧀ꦒꦱꦠꦶꦥꦛ꧀ꦜꦴꦤꦱꦩ꧀ꦩꦥ꧀ꦥꦣꦴꦤꦆꦢ꧀ꦣꦶꦥꦴꦢꦺꦲꦶ ꦱꦢꦺꦮꦏꦺꦴ ꦭꦺꦴꦏꦺꦴ ꦱꦤ꧀ꦠꦴꦥꦪꦶꦠꦧ꧀ꦧꦺꦴ. ꦆꦢꦁ, ꦩꦲꦴꦫꦴꦗ, ꦱꦹꦫꦶꦪꦱ꧀ꦱ ꦥꦚ꧀ꦕꦩꦁ ꦄꦔ꧀ꦒꦁ ꦒꦲꦺꦠꦧ꧀ꦧꦁ.

‘‘ꦥꦸꦤ ꦕꦥꦫꦁ, ꦩꦲꦴꦫꦴꦗ, ꦱꦹꦫꦶꦪꦺꦴ ꦫꦴꦲꦸꦨꦪꦴ ꦨꦷꦠꦺꦴ ꦕꦫꦠꦶ, ꦌꦮꦩꦺꦮ ꦑꦺꦴ, ꦩꦲꦴꦫꦴꦗ, ꦪꦺꦴꦒꦶꦤꦴ ꦪꦺꦴꦒꦴꦮꦕꦫꦺꦤ ꦢꦸꦕ꧀ꦕꦫꦶꦠꦢꦸꦒ꧀ꦒꦠꦶꦮꦶꦱꦩꦏꦤ꧀ꦠꦴꦫꦮꦶꦥꦴꦏꦮꦶꦤꦶꦥꦴꦠꦏꦶꦭꦺꦱꦗꦴꦭꦗꦛꦶꦠꦺ ꦢꦶꦛ꧀ꦜꦶꦱꦔ꧀ꦓꦴꦛꦥꦛꦶꦩꦸꦏ꧀ꦏꦺ ꦏꦸꦥꦡꦥꦏ꧀ꦑꦤ꧀ꦢꦺ ꦏꦸꦩ꧀ꦩꦒ꧀ꦒꦥꦛꦶꦥꦤ꧀ꦤꦺ [ꦏꦸꦩꦒ꧀ꦒꦥꦛꦶꦥꦤ꧀ꦤꦺ (ꦱ꧀ꦪꦴ. ꦏ.)] ꦱꦠ꧀ꦠꦺ ꦢꦶꦱ꧀ꦮꦴ ꦩꦲꦠꦴ ꦱꦁꦮꦺꦒꦨꦪꦺꦤ ꦩꦴꦤꦱꦁ ꦱꦁꦮꦺꦗꦺꦠꦧ꧀ꦧꦁ. ꦆꦢꦁ, ꦩꦲꦴꦫꦴꦗ, ꦱꦹꦫꦶꦪꦱ꧀ꦱ ꦖꦛ꧀ꦜꦁ ꦄꦔ꧀ꦒꦁ ꦒꦲꦺꦠꦧ꧀ꦧꦁ.

‘‘ꦥꦸꦤ ꦕꦥꦫꦁ, ꦩꦲꦴꦫꦴꦗ, ꦱꦹꦫꦶꦪꦺꦴ ꦏꦭ꧀ꦪꦴꦟꦥꦴꦥꦏꦺ ꦢꦱ꧀ꦱꦺꦠꦶ, ꦌꦮꦩꦺꦮ ꦑꦺꦴ, ꦩꦲꦴꦫꦴꦗ, ꦪꦺꦴꦒꦶꦤꦴ ꦪꦺꦴꦒꦴꦮꦕꦫꦺꦤ ꦆꦤ꧀ꦢ꧀ꦫꦶꦪꦧꦭꦧꦺꦴꦗ꧀ꦙꦔ꧀ꦒꦱꦠꦶꦥꦛ꧀ꦜꦴꦤꦱꦩ꧀ꦩꦥ꧀ꦥꦣꦴꦤꦆꦢ꧀ꦣꦶꦥꦴꦢꦭꦺꦴꦏꦶꦪꦭꦺꦴꦏꦸꦠ꧀ꦠꦫꦣꦩ꧀ꦩꦴ ꦢꦱ꧀ꦱꦺꦠꦧ꧀ꦧꦴ. ꦆꦢꦁ, ꦩꦲꦴꦫꦴꦗ, ꦱꦹꦫꦶꦪꦱ꧀ꦱ ꦱꦠ꧀ꦠꦩꦁ ꦄꦔ꧀ꦒꦁ ꦒꦲꦺꦠꦧ꧀ꦧꦁ. ꦨꦴꦱꦶꦠꦩ꧀ꦥꦺꦠꦁ, ꦩꦲꦴꦫꦴꦗ, ꦡꦺꦫꦺꦤ ꦮꦔ꧀ꦒꦷꦱꦺꦤ –

‘‘‘ꦪꦡꦴꦥꦶ ꦱꦹꦫꦶꦪꦺꦴ ꦈꦢꦪꦤ꧀ꦠꦺꦴ, ꦫꦹꦥꦁ ꦢꦱ꧀ꦱꦺꦠꦶ ꦥꦴꦟꦶꦤꦁ;

ꦱꦸꦕꦶꦚ꧀ꦕ ꦄꦱꦸꦕꦶꦚ꧀ꦕꦴꦥꦶ, ꦏꦭ꧀ꦪꦴꦟꦚ꧀ꦕꦴꦥꦶ ꦥꦴꦥꦏꦁ.

‘‘‘ꦠꦡꦴ ꦨꦶꦏ꧀ꦑꦸ ꦣꦩ꧀ꦩꦣꦫꦺꦴ, ꦄꦮꦶꦗ꧀ꦗꦴꦥꦶꦲꦶꦠꦁ ꦗꦤꦁ;

ꦥꦡꦁ ꦢꦱ꧀ꦱꦺꦠꦶ ꦮꦶꦮꦶꦣꦁ, ꦄꦴꦢꦶꦕ꧀ꦕꦺꦴꦮꦸꦢꦪꦁ ꦪꦡꦴ’’’ꦠꦶ.

ꦱꦹꦫꦶꦪꦔ꧀ꦒꦥꦚ꧀ꦲꦺꦴ ꦄꦛ꧀ꦜꦩꦺꦴ.