꧕. ꦥꦧ꧀ꦧꦠꦔ꧀ꦒꦥꦚ꧀ꦲꦺꦴ

꧕. ‘‘ꦨꦤ꧀ꦠꦺ ꦤꦴꦒꦱꦺꦤ, ‘ꦥꦧ꧀ꦧꦠꦱ꧀ꦱ ꦥꦚ꧀ꦕ ꦄꦔ꧀ꦒꦴꦤꦶ ꦒꦲꦺꦠꦧ꧀ꦧꦴꦤꦷ’ꦠꦶ ꦪꦁ ꦮꦢꦺꦱꦶ, ꦏꦠꦩꦴꦤꦶ ꦠꦴꦤꦶ ꦥꦚ꧀ꦕ ꦄꦔ꧀ꦒꦴꦤꦶ ꦒꦲꦺꦠꦧ꧀ꦧꦴꦤꦷ’’ꦠꦶ? ‘‘ꦪꦡꦴ, ꦩꦲꦴꦫꦴꦗ, ꦥꦧ꧀ꦧꦠꦺꦴ ꦄꦕꦭꦺꦴ ꦄꦏꦩ꧀ꦥꦶꦠꦺꦴ [ꦄꦏꦩ꧀ꦥꦶꦪꦺꦴ (ꦱꦷ. ꦥꦷ.)] ꦄꦱꦩ꧀ꦥꦮꦺꦣꦷ, ꦌꦮꦩꦺꦮ ꦑꦺꦴ, ꦩꦲꦴꦫꦴꦗ, ꦪꦺꦴꦒꦶꦤꦴ ꦪꦺꦴꦒꦴꦮꦕꦫꦺꦤ ꦱꦩ꧀ꦩꦴꦤꦤꦺ ꦮꦶꦩꦴꦤꦤꦺ ꦱꦏ꧀ꦏꦴꦫꦺ ꦄꦱꦏ꧀ꦏꦴꦫꦺ ꦒꦫꦸꦏꦴꦫꦺ ꦄꦒꦫꦸꦏꦴꦫꦺ ꦪꦱꦺ ꦄꦪꦱꦺ ꦤꦶꦤ꧀ꦢꦴꦪ ꦥꦱꦁꦱꦴꦪ ꦱꦸꦑꦺ ꦢꦸꦏ꧀ꦑꦺ ꦆꦛ꧀ꦜꦴꦤꦶꦛ꧀ꦜꦺꦱꦸ ꦱꦧ꧀ꦧꦠ꧀ꦡ ꦫꦹꦥꦱꦢ꧀ꦢꦒꦤ꧀ꦣꦫꦱꦦꦺꦴꦛ꧀ꦜꦧ꧀ꦧꦣꦩ꧀ꦩꦺꦱꦸ ꦫꦗꦤꦷꦪꦺꦱꦸ ꦤ ꦫꦗ꧀ꦗꦶꦠꦧ꧀ꦧꦁ, ꦢꦸꦱ꧀ꦱꦤꦷꦪꦺꦱꦸ ꦤ ꦢꦸꦱ꧀ꦱꦶꦠꦧ꧀ꦧꦁ, ꦩꦸꦪ꧀ꦲꦤꦷꦪꦺꦱꦸ ꦤ ꦩꦸꦪ꧀ꦲꦶꦠꦧ꧀ꦧꦁ, ꦤ ꦏꦩ꧀ꦥꦶꦠꦧ꧀ꦧꦁ ꦤ ꦕꦭꦶꦠꦧ꧀ꦧꦁ, ꦥꦧ꧀ꦧꦠꦺꦤ ꦮꦶꦪ ꦄꦕꦭꦺꦤ ꦨꦮꦶꦠꦧ꧀ꦧꦁ. ꦆꦢꦁ, ꦩꦲꦴꦫꦴꦗ, ꦥꦧ꧀ꦧꦠꦱ꧀ꦱ ꦥꦜꦩꦁ ꦄꦔ꧀ꦒꦁ ꦒꦲꦺꦠꦧ꧀ꦧꦁ. ꦨꦴꦱꦶꦠꦩ꧀ꦥꦺꦠꦁ, ꦩꦲꦴꦫꦴꦗ, ꦨꦒꦮꦠꦴ ꦢꦺꦮꦴꦠꦶꦢꦺꦮꦺꦤ –

‘‘‘ꦱꦺꦭꦺꦴ ꦪꦡꦴ ꦌꦏꦓꦤꦺꦴ [ꦌꦏꦒ꧀ꦓꦤꦺꦴ (ꦏ.) ꦣ. ꦥ. ꧘꧑ ꦣꦩ꧀ꦩꦥꦢꦺ], ꦮꦴꦠꦺꦤ ꦤ ꦱꦩꦷꦫꦠꦶ;

ꦌꦮꦁ ꦤꦶꦤ꧀ꦢꦴꦥꦱꦁꦱꦴꦱꦸ, ꦤ ꦱꦩꦶꦚ꧀ꦗꦤ꧀ꦠꦶ ꦥꦟ꧀ꦝꦶꦠꦴ’ꦠꦶ.

‘‘ꦥꦸꦤ ꦕꦥꦫꦁ, ꦩꦲꦴꦫꦴꦗ, ꦥꦧ꧀ꦧꦠꦺꦴ ꦡꦢ꧀ꦣꦺꦴ ꦤ ꦏꦺꦤꦕꦶ ꦱꦁꦱꦛ꧀ꦜꦺꦴ, ꦌꦮꦩꦺꦮ ꦑꦺꦴ, ꦩꦲꦴꦫꦴꦗ, ꦪꦺꦴꦒꦶꦤꦴ ꦪꦺꦴꦒꦴꦮꦕꦫꦺꦤ ꦡꦢ꧀ꦣꦺꦤ ꦄꦱꦁꦱꦛ꧀ꦜꦺꦤ ꦨꦮꦶꦠꦧ꧀ꦧꦁ, ꦤ ꦏꦺꦤꦕꦶ ꦱꦁꦱꦒ꧀ꦒꦺꦴ ꦏꦫꦟꦷꦪꦺꦴ. ꦆꦢꦁ, ꦩꦲꦴꦫꦴꦗ, ꦥꦧ꧀ꦧꦠꦱ꧀ꦱ ꦢꦸꦠꦶꦪꦁ ꦄꦔ꧀ꦒꦁ ꦒꦲꦺꦠꦧ꧀ꦧꦁ. ꦨꦴꦱꦶꦠꦩ꧀ꦥꦺꦠꦁ, ꦩꦲꦴꦫꦴꦗ, ꦨꦒꦮꦠꦴ ꦢꦺꦮꦴꦠꦶꦢꦺꦮꦺꦤ –

‘‘‘ꦄꦱꦁꦱꦛ꧀ꦜꦁ ꦒꦲꦛ꧀ꦜꦺꦲꦶ, ꦄꦤꦴꦒꦴꦫꦺꦲꦶ ꦕꦹꦨꦪꦁ;

ꦄꦤꦺꦴꦏꦱꦴꦫꦶꦩꦥ꧀ꦥꦶꦕ꧀ꦖꦁ, ꦠꦩꦲꦁ ꦧ꧀ꦫꦹꦩꦶ ꦧ꧀ꦫꦴꦲ꧀ꦩꦟ’ꦤ꧀ꦠꦶ.

‘‘ꦥꦸꦤ ꦕꦥꦫꦁ, ꦩꦲꦴꦫꦴꦗ, ꦥꦧ꧀ꦧꦠꦺ ꦧꦷꦗꦁ ꦤ ꦮꦶꦫꦹꦲꦠꦶ, ꦌꦮꦩꦺꦮ ꦑꦺꦴ, ꦩꦲꦴꦫꦴꦗ, ꦪꦺꦴꦒꦶꦤꦴ ꦪꦺꦴꦒꦴꦮꦕꦫꦺꦤ ꦱꦏꦩꦴꦤꦱꦺ ꦏꦶꦭꦺꦱꦴ ꦤ ꦮꦶꦫꦹꦲꦴꦥꦺꦠꦧ꧀ꦧꦴ. ꦆꦢꦁ, ꦩꦲꦴꦫꦴꦗ, ꦥꦧ꧀ꦧꦠꦱ꧀ꦱ ꦠꦠꦶꦪꦁ ꦄꦔ꧀ꦒꦁ ꦒꦲꦺꦠꦧ꧀ꦧꦁ. ꦨꦴꦱꦶꦠꦩ꧀ꦥꦺꦠꦁ, ꦩꦲꦴꦫꦴꦗ, ꦡꦺꦫꦺꦤ ꦱꦸꦨꦹꦠꦶꦤꦴ –

‘‘‘ꦫꦴꦒꦹꦥꦱꦁꦲꦶꦠꦁ ꦕꦶꦠ꧀ꦠꦁ, ꦪꦢꦴ ꦈꦥ꧀ꦥꦗ꧀ꦗꦠꦺ ꦩꦩ;

ꦱꦪꦁꦮ ꦥꦕ꧀ꦕꦮꦺꦏ꧀ꦑꦴꦩꦶ [ꦥꦕ꧀ꦕꦮꦺꦏ꧀ꦑꦶꦠ꧀ꦮꦴ (ꦱꦧ꧀ꦧꦠ꧀ꦡ)], ꦌꦏꦒ꧀ꦒꦺꦴ [ꦌꦏꦏꦺꦴ (ꦱꦧ꧀ꦧꦠ꧀ꦡ)] ꦠꦁ ꦢꦩꦺꦩꦲꦁ.

‘‘‘ꦫꦗ꧀ꦗꦱꦺ [ꦫꦗ꧀ꦗꦱꦶ (ꦱꦷ.), ꦫꦚ꧀ꦗꦱꦶ (ꦥꦷ.)] ꦫꦗꦤꦷꦪꦺ ꦕ, ꦢꦸꦱ꧀ꦱꦤꦷꦪꦺ ꦕ ꦢꦸꦱ꧀ꦱꦱꦺ;

ꦩꦸꦪ꧀ꦲꦱꦺ [ꦩꦸꦪ꧀ꦲꦱꦶ (ꦱꦷ.)] ꦩꦺꦴꦲꦤꦷꦪꦺ ꦕ, ꦤꦶꦏ꧀ꦑꦩꦱ꧀ꦱꦸ ꦮꦤꦴ ꦠꦸꦮꦁ.

‘‘‘ꦮꦶꦱꦸꦢ꧀ꦣꦴꦤꦁ ꦄꦪꦁ ꦮꦴꦱꦺꦴ, ꦤꦶꦩ꧀ꦩꦭꦴꦤꦁ ꦠꦥꦱ꧀ꦱꦶꦤꦁ;

ꦩꦴ ꦑꦺꦴ ꦮꦶꦱꦸꦢ꧀ꦣꦁ ꦢꦹꦱꦺꦱꦶ, ꦤꦶꦏ꧀ꦑꦩꦱ꧀ꦱꦸ ꦮꦤꦴ ꦠꦸꦮ’ꦤ꧀ꦠꦶ.

‘‘ꦥꦸꦤ ꦕꦥꦫꦁ, ꦩꦲꦴꦫꦴꦗ, ꦥꦧ꧀ꦧꦠꦺꦴ ꦄꦕ꧀ꦕꦸꦒ꧀ꦒꦠꦺꦴ, ꦌꦮꦩꦺꦮ ꦑꦺꦴ, ꦩꦲꦴꦫꦴꦗ, ꦪꦺꦴꦒꦶꦤꦴ ꦪꦺꦴꦒꦴꦮꦕꦫꦺꦤ ꦚꦴꦟꦕ꧀ꦕꦸꦒ꧀ꦒꦠꦺꦤ ꦨꦮꦶꦠꦧ꧀ꦧꦁ. ꦆꦢꦁ, ꦩꦲꦴꦫꦴꦗ, ꦥꦧ꧀ꦧꦠꦱ꧀ꦱ ꦕꦠꦸꦠ꧀ꦡꦁ ꦄꦔ꧀ꦒꦁ ꦒꦲꦺꦠꦧ꧀ꦧꦁ. ꦨꦴꦱꦶꦠꦩ꧀ꦥꦺꦠꦁ, ꦩꦲꦴꦫꦴꦗ, ꦨꦒꦮꦠꦴ ꦢꦺꦮꦴꦠꦶꦢꦺꦮꦺꦤ –

‘‘‘ꦥꦩꦴꦢꦁ ꦄꦥ꧀ꦥꦩꦴꦢꦺꦤ, ꦪꦢꦴ ꦤꦸꦢꦠꦶ ꦥꦟ꧀ꦝꦶꦠꦺꦴ;

ꦥꦚ꧀ꦚꦴꦥꦴꦱꦴꦢꦩꦴꦫꦸꦪ꧀ꦲ, ꦄꦱꦺꦴꦏꦺꦴ ꦱꦺꦴꦏꦶꦤꦶꦁ ꦥꦗꦁ;

ꦥꦧ꧀ꦧꦠꦛ꧀ꦜꦺꦴꦮ ꦨꦹꦩꦛ꧀ꦜꦺ [ꦨꦸꦩ꧀ꦩꦛ꧀ꦜꦺ (ꦱꦷ. ꦥꦷ.)], ꦣꦷꦫꦺꦴ ꦧꦴꦭꦺ ꦄꦮꦺꦏ꧀ꦑꦠꦷ’ꦠꦶ.

‘‘ꦥꦸꦤ ꦕꦥꦫꦁ, ꦩꦲꦴꦫꦴꦗ, ꦥꦧ꧀ꦧꦠꦺꦴ ꦄꦤꦸꦤ꧀ꦤꦠꦺꦴ ꦄꦤꦺꦴꦤꦠꦺꦴ, ꦌꦮꦩꦺꦮ ꦑꦺꦴ, ꦩꦲꦴꦫꦴꦗ, ꦪꦺꦴꦒꦶꦤꦴ ꦪꦺꦴꦒꦴꦮꦕꦫꦺꦤ ꦈꦤ꧀ꦤꦠꦴꦮꦤꦠꦶ ꦤ ꦏꦫꦟꦷꦪꦴ. ꦆꦢꦁ, ꦩꦲꦴꦫꦴꦗ, ꦥꦧ꧀ꦧꦠꦱ꧀ꦱ ꦥꦚ꧀ꦕꦩꦁ ꦄꦔ꧀ꦒꦁ ꦒꦲꦺꦠꦧ꧀ꦧꦁ. ꦨꦴꦱꦶꦠꦩ꧀ꦥꦺꦠꦁ, ꦩꦲꦴꦫꦴꦗ, ꦈꦥꦴꦱꦶꦏꦴꦪ ꦕꦹꦭ꦳ꦱꦸꦨꦢ꧀ꦢꦴꦪ ꦱꦏꦱꦩꦟꦺ ꦥꦫꦶꦏꦶꦠ꧀ꦠꦪꦩꦴꦤꦴꦪ –

‘‘‘ꦭꦴꦨꦺꦤ ꦈꦤ꧀ꦤꦠꦺꦴ ꦭꦺꦴꦏꦺꦴ, ꦄꦭꦴꦨꦺꦤ ꦕ ꦎꦤꦠꦺꦴ;

ꦭꦴꦨꦴꦭꦴꦨꦺꦤ ꦌꦏꦠ꧀ꦡꦴ [ꦌꦏꦛ꧀ꦜꦴ (ꦱꦷ. ꦥꦷ.)], ꦠꦴꦢꦶꦱꦴ ꦱꦩꦟꦴ ꦩꦩꦴ’’’ꦠꦶ.

ꦥꦧ꧀ꦧꦠꦔ꧀ꦒꦥꦚ꧀ꦲꦺꦴ ꦥꦚ꧀ꦕꦩꦺꦴ.