꧑. ꦥꦡꦮꦷꦄꦔ꧀ꦒꦥꦚ꧀ꦲꦺꦴ

꧑. ‘‘ꦨꦤ꧀ꦠꦺ ꦤꦴꦒꦱꦺꦤ, ‘ꦥꦡꦮꦶꦪꦴ ꦥꦚ꧀ꦕ ꦄꦔ꧀ꦒꦴꦤꦶ ꦒꦲꦺꦠꦧ꧀ꦧꦴꦤꦷ’ꦠꦶ ꦪꦁ ꦮꦢꦺꦱꦶ, ꦏꦠꦩꦴꦤꦶ ꦠꦴꦤꦶ ꦥꦚ꧀ꦕ ꦄꦔ꧀ꦒꦴꦤꦶ ꦒꦲꦺꦠꦧ꧀ꦧꦴꦤꦷ’’ꦠꦶ? ‘‘ꦪꦡꦴ, ꦩꦲꦴꦫꦴꦗ, ꦥꦡꦮꦷ ꦆꦛ꧀ꦜꦴꦤꦶꦛ꧀ꦜꦴꦤꦶ ꦏꦥ꧀ꦥꦹꦫꦴꦒꦫꦸꦠꦒꦫꦕꦤ꧀ꦢꦤꦏꦸꦔ꧀ꦏꦸꦩꦴꦢꦷꦤꦶ ꦄꦴꦏꦶꦫꦤ꧀ꦠꦺꦥꦶ ꦥꦶꦠ꧀ꦠꦱꦺꦩ꧀ꦲꦥꦸꦧ꧀ꦧꦫꦸꦲꦶꦫꦱꦺꦢꦩꦺꦢꦑꦺꦭ꦳ꦱꦶꦔ꧀ꦓꦴꦟꦶꦏꦭꦱꦶꦏ- ꦩꦸꦠ꧀ꦠꦏꦫꦷꦱꦴꦢꦷꦤꦶ ꦄꦴꦏꦶꦫꦤ꧀ꦠꦺꦥꦶ ꦠꦴꦢꦶꦱꦴ ꦪꦺꦮ, ꦌꦮꦩꦺꦮ ꦑꦺꦴ, ꦩꦲꦴꦫꦴꦗ, ꦪꦺꦴꦒꦶꦤꦴ ꦪꦺꦴꦒꦴꦮꦕꦫꦺꦤ ꦆꦛ꧀ꦜꦴꦤꦶꦛ꧀ꦜꦺ ꦭꦴꦨꦴꦭꦴꦨꦺ ꦪꦱꦴꦪꦱꦺ ꦤꦶꦤ꧀ꦢꦴꦥꦱꦁꦱꦴꦪ ꦱꦸꦑꦢꦸꦏ꧀ꦑꦺ ꦱꦧ꧀ꦧꦠ꧀ꦡ ꦠꦴꦢꦶꦤꦴ ꦪꦺꦮ ꦨꦮꦶꦠꦧ꧀ꦧꦁ. ꦆꦢꦁ, ꦩꦲꦴꦫꦴꦗ, ꦥꦡꦮꦶꦪꦴ ꦥꦜꦩꦁ ꦄꦔ꧀ꦒꦁ ꦒꦲꦺꦠꦧ꧀ꦧꦁ.

‘‘ꦥꦸꦤ ꦕꦥꦫꦁ, ꦩꦲꦴꦫꦴꦗ, ꦥꦡꦮꦷ ꦩꦟ꧀ꦝꦤꦮꦶꦨꦹꦱꦤꦴꦥꦒꦠꦴ ꦱꦏꦒꦤ꧀ꦣꦥꦫꦶꦨꦴꦮꦶꦠꦴ, ꦌꦮꦩꦺꦮ ꦑꦺꦴ, ꦩꦲꦴꦫꦴꦗ, ꦪꦺꦴꦒꦶꦤꦴ ꦪꦺꦴꦒꦴꦮꦕꦫꦺꦤ ꦮꦶꦨꦹꦱꦤꦴꦥꦒꦠꦺꦤ ꦱꦏꦱꦷꦭꦒꦤ꧀ꦣꦥꦫꦶꦨꦴꦮꦶꦠꦺꦤ ꦨꦮꦶꦠꦧ꧀ꦧꦁ. ꦆꦢꦁ, ꦩꦲꦴꦫꦴꦗ, ꦥꦡꦮꦶꦪꦴ ꦢꦸꦠꦶꦪꦁ ꦄꦔ꧀ꦒꦁ ꦒꦲꦺꦠꦧ꧀ꦧꦁ.

‘‘ꦥꦸꦤ ꦕꦥꦫꦁ, ꦩꦲꦴꦫꦴꦗ, ꦥꦡꦮꦷ ꦤꦶꦫꦤ꧀ꦠꦫꦴ ꦄꦑꦟ꧀ꦝꦕ꧀ꦖꦶꦢ꧀ꦢꦴ ꦄꦱꦸꦱꦶꦫꦴ ꦧꦲꦭꦴ ꦓꦤꦴ ꦮꦶꦠ꧀ꦡꦶꦟ꧀ꦟꦴ, ꦌꦮꦩꦺꦮ ꦑꦺꦴ, ꦩꦲꦴꦫꦴꦗ, ꦪꦺꦴꦒꦶꦤꦴ ꦪꦺꦴꦒꦴꦮꦕꦫꦺꦤ ꦤꦶꦫꦤ꧀ꦠꦫꦩꦑꦟ꧀ꦝꦕ꧀ꦖꦶꦢ꧀ꦢꦩꦱꦸꦱꦶꦫꦧꦲꦭꦓꦤꦮꦶꦠ꧀ꦡꦶꦟ꧀ꦟꦱꦷꦭꦺꦤ ꦨꦮꦶꦠꦧ꧀ꦧꦁ. ꦆꦢꦁ, ꦩꦲꦴꦫꦴꦗ, ꦥꦡꦮꦶꦪꦴ ꦠꦠꦶꦪꦁ ꦄꦔ꧀ꦒꦁ ꦒꦲꦺꦠꦧ꧀ꦧꦁ.

‘‘ꦥꦸꦤ ꦕꦥꦫꦁ, ꦩꦲꦴꦫꦴꦗ, ꦥꦡꦮꦷ ꦒꦴꦩꦤꦶꦒꦩꦤꦒꦫꦗꦤꦥꦢꦫꦸꦏ꧀ꦑꦥꦧ꧀ꦧꦠꦤꦢꦷꦠꦭ꦳ꦴꦏꦥꦺꦴꦏ꧀ꦑꦫꦟꦷꦩꦶꦒꦥꦏ꧀ꦑꦶꦩꦤꦸꦗꦤꦫꦤꦴꦫꦶꦒꦟꦁ ꦣꦴꦫꦺꦤ꧀ꦠꦷꦥꦶ ꦄꦏꦶꦭꦴꦱꦸ ꦲꦺꦴꦠꦶ, ꦌꦮꦩꦺꦮ ꦑꦺꦴ, ꦩꦲꦴꦫꦴꦗ, ꦪꦺꦴꦒꦶꦤꦴ ꦪꦺꦴꦒꦴꦮꦕꦫꦺꦤ ꦎꦮꦢꦤ꧀ꦠꦺꦤꦥꦶ ꦄꦤꦸꦱꦴꦱꦤ꧀ꦠꦺꦤꦥꦶ ꦮꦶꦚ꧀ꦚꦴꦥꦺꦤ꧀ꦠꦺꦤꦥꦶ ꦱꦤ꧀ꦢꦱ꧀ꦱꦺꦤ꧀ꦠꦺꦤꦥꦶ ꦱꦩꦴꦢꦥꦺꦤ꧀ꦠꦺꦤꦥꦶ ꦱꦩꦸꦠ꧀ꦠꦺꦗꦺꦤ꧀ꦠꦺꦤꦥꦶ ꦱꦩ꧀ꦥꦲꦁꦱꦺꦤ꧀ꦠꦺꦤꦥꦶ ꦣꦩ꧀ꦩꦢꦺꦱꦤꦴꦱꦸ ꦄꦏꦶꦭꦴꦱꦸꦤꦴ ꦨꦮꦶꦠꦧ꧀ꦧꦁ. ꦆꦢꦁ, ꦩꦲꦴꦫꦴꦗ, ꦥꦡꦮꦶꦪꦴ ꦕꦠꦸꦠ꧀ꦡꦁ ꦄꦔ꧀ꦒꦁ ꦒꦲꦺꦠꦧ꧀ꦧꦁ.

‘‘ꦥꦸꦤ ꦕꦥꦫꦁ, ꦩꦲꦴꦫꦴꦗ, ꦥꦡꦮꦷ ꦄꦤꦸꦤꦪꦥ꧀ꦥꦛꦶꦓꦮꦶꦥ꧀ꦥꦩꦸꦠ꧀ꦠꦴ, ꦌꦮꦩꦺꦮ ꦑꦺꦴ, ꦩꦲꦴꦫꦴꦗ, ꦪꦺꦴꦒꦶꦤꦴ ꦪꦺꦴꦒꦴꦮꦕꦫꦺꦤ ꦄꦤꦸꦤꦪꦥ꧀ꦥꦛꦶꦓꦮꦶꦥ꧀ꦥꦩꦸꦠ꧀ꦠꦺꦤ ꦥꦡꦮꦶꦱꦩꦺꦤ ꦕꦺꦠꦱꦴ ꦮꦶꦲꦫꦶꦠꦧ꧀ꦧꦁ. ꦆꦢꦁ, ꦩꦲꦴꦫꦴꦗ, ꦥꦡꦮꦶꦪꦴ ꦥꦚ꧀ꦕꦩꦁ ꦄꦔ꧀ꦒꦁ ꦒꦲꦺꦠꦧ꧀ꦧꦁ. ꦨꦴꦱꦶꦠꦩ꧀ꦥꦺꦠꦁ, ꦩꦲꦴꦫꦴꦗ, ꦈꦥꦴꦱꦶꦏꦴꦪ ꦕꦹꦭ꦳ꦱꦸꦨꦢ꧀ꦢꦴꦪ ꦱꦏꦱꦩꦟꦺ ꦥꦫꦶꦏꦶꦠ꧀ꦠꦪꦩꦴꦤꦴꦪ –

‘‘‘ꦌꦏꦚ꧀ꦕꦺ ꦧꦴꦲꦁ ꦮꦴꦱꦶꦪꦴ, ꦠꦕ꧀ꦖꦺ ꦏꦸꦥꦶꦠꦩꦴꦤꦱꦴ [ꦏꦸꦥꦶꦠꦩꦴꦤꦱꦺꦴ (ꦏ.)];

ꦌꦏꦚ꧀ꦕꦺꦧꦴꦲꦁ ꦒꦤ꧀ꦣꦺꦤ, ꦄꦴꦭꦶꦩ꧀ꦥꦺꦪ꧀ꦪ ꦥꦩꦺꦴꦢꦶꦠꦴ [ꦥꦩꦺꦴꦢꦶꦠꦺꦴ (ꦏ.)].

‘‘‘ꦄꦩꦸꦱ꧀ꦩꦶꦁ ꦥꦛꦶꦓꦺꦴ ꦤꦠ꧀ꦡꦶ, ꦫꦴꦒꦺꦴ ꦄꦱ꧀ꦩꦶꦁ ꦤ ꦮꦶꦗ꧀ꦗꦠꦶ;

ꦥꦡꦮꦷꦱꦩꦕꦶꦠ꧀ꦠꦴ ꦠꦺ, ꦠꦴꦢꦶꦱꦴ ꦱꦩꦟꦴ ꦩꦩꦴ’’’ꦠꦶ.

ꦥꦡꦮꦷꦄꦔ꧀ꦒꦥꦚ꧀ꦲꦺꦴ ꦥꦜꦩꦺꦴ.