꧑꧑. ꦤꦶꦧ꧀ꦧꦴꦤꦱꦕ꧀ꦖꦶꦏꦫꦟꦥꦚ꧀ꦲꦺꦴ

꧑꧑. ‘‘ꦨꦤ꧀ꦠꦺ ꦤꦴꦒꦱꦺꦤ, ꦠꦸꦩ꧀ꦲꦺ ꦨꦟꦡ ‘ꦤꦶꦧ꧀ꦧꦴꦤꦁ ꦤ ꦄꦠꦷꦠꦁ, ꦤ ꦄꦤꦴꦒꦠꦁ, ꦤ ꦥꦕ꧀ꦕꦸꦥ꧀ꦥꦤ꧀ꦤꦁ, ꦤ ꦈꦥ꧀ꦥꦤ꧀ꦤꦁ ꦤ ꦄꦤꦸꦥ꧀ꦥꦤ꧀ꦤꦁ ꦤ ꦈꦥ꧀ꦥꦴꦢꦤꦷꦪ’ꦤ꧀ꦠꦶ. ꦆꦣ, ꦨꦤ꧀ꦠꦺ ꦤꦴꦒꦱꦺꦤ, ꦪꦺꦴ ꦏꦺꦴꦕꦶ ꦱꦩ꧀ꦩꦴꦥꦛꦶꦥꦤ꧀ꦤꦺꦴ ꦤꦶꦧ꧀ꦧꦴꦤꦁ ꦱꦕ꧀ꦖꦶꦏꦫꦺꦴꦠꦶ, ꦱꦺꦴ ꦈꦥ꧀ꦥꦤ꧀ꦤꦁ ꦱꦕ꧀ꦖꦶꦏꦫꦺꦴꦠꦶ, ꦈꦢꦴꦲꦸ ꦈꦥ꧀ꦥꦴꦢꦺꦠ꧀ꦮꦴ ꦱꦕ꧀ꦖꦶꦏꦫꦺꦴꦠꦷ’’ꦠꦶ? ‘‘ꦪꦺꦴ ꦏꦺꦴꦕꦶ, ꦩꦲꦴꦫꦴꦗ, ꦱꦩ꧀ꦩꦴꦥꦛꦶꦥꦤ꧀ꦤꦺꦴ ꦤꦶꦧ꧀ꦧꦴꦤꦁ ꦱꦕ꧀ꦖꦶꦏꦫꦺꦴꦠꦶ, ꦱꦺꦴ ꦤ ꦈꦥ꧀ꦥꦤ꧀ꦤꦁ ꦱꦕ꧀ꦖꦶꦏꦫꦺꦴꦠꦶ, ꦤ ꦈꦥ꧀ꦥꦴꦢꦺꦠ꧀ꦮꦴ ꦱꦕ꧀ꦖꦶꦏꦫꦺꦴꦠꦶ, ꦄꦥꦶ ꦕ, ꦩꦲꦴꦫꦴꦗ, ꦄꦠ꧀ꦡꦺꦱꦴ ꦤꦶꦧ꧀ꦧꦴꦤꦣꦴꦠꦸ, ꦪꦁ ꦱꦺꦴ ꦱꦩ꧀ꦩꦴꦥꦛꦶꦥꦤ꧀ꦤꦺꦴ ꦱꦕ꧀ꦖꦶꦏꦫꦺꦴꦠꦷ’’ꦠꦶ.

‘‘ꦩꦴ, ꦨꦤ꧀ꦠꦺ ꦤꦴꦒꦱꦺꦤ, ꦆꦩꦁ ꦥꦚ꧀ꦲꦁ ꦥꦛꦶꦕ꧀ꦖꦤ꧀ꦤꦁ ꦏꦠ꧀ꦮꦴ ꦢꦷꦥꦺꦲꦶ, ꦮꦶꦮꦛꦁ ꦥꦴꦏꦛꦁ ꦏꦠ꧀ꦮꦴ ꦢꦷꦥꦺꦲꦶ ꦖꦤ꧀ꦢꦗꦴꦠꦺꦴ ꦈꦱ꧀ꦱꦴꦲꦗꦴꦠꦺꦴ, ꦪꦁ ꦠꦺ ꦱꦶꦏ꧀ꦑꦶꦠꦁ, ꦠꦁ ꦱꦧ꧀ꦧꦁ ꦌꦠ꧀ꦡꦺꦮꦴꦏꦶꦫꦴꦲꦶ, ꦌꦠ꧀ꦡꦴꦪꦁ ꦗꦤꦺꦴ ꦱꦩ꧀ꦩꦹꦭ꦳꧀ꦲꦺꦴ ꦮꦶꦩꦠꦶꦗꦴꦠꦺꦴ ꦱꦁꦱꦪꦥꦏ꧀ꦑꦤ꧀ꦢꦺꦴ, ꦨꦶꦤ꧀ꦢꦺꦠꦁ ꦄꦤ꧀ꦠꦺꦴꦢꦺꦴꦱꦱꦭ꧀ꦭ’’ꦤ꧀ꦠꦶ. ‘‘ꦄꦠ꧀ꦡꦺꦱꦴ, ꦩꦲꦴꦫꦴꦗ, ꦤꦶꦧ꧀ꦧꦴꦤꦣꦴꦠꦸ ꦱꦤ꧀ꦠꦴ ꦱꦸꦑꦴ ꦥꦟꦷꦠꦴ, ꦠꦁ ꦱꦩ꧀ꦩꦴꦥꦛꦶꦥꦤ꧀ꦤꦺꦴ ꦗꦶꦤꦴꦤꦸꦱꦶꦛ꧀ꦜꦶꦪꦴ ꦱꦔ꧀ꦑꦴꦫꦺ ꦱꦩ꧀ꦩꦱꦤ꧀ꦠꦺꦴ ꦥꦚ꧀ꦚꦴꦪ ꦱꦕ꧀ꦖꦶꦏꦫꦺꦴꦠꦶ. ꦪꦡꦴ, ꦩꦲꦴꦫꦴꦗ, ꦄꦤ꧀ꦠꦺꦮꦴꦱꦶꦏꦺꦴ ꦄꦴꦕꦫꦶꦪꦴꦤꦸꦱꦶꦛ꧀ꦜꦶꦪꦴ ꦮꦶꦗ꧀ꦗꦁ ꦥꦚ꧀ꦚꦴꦪ ꦱꦕ꧀ꦖꦶꦏꦫꦺꦴꦠꦶ, ꦌꦮꦩꦺꦮ ꦑꦺꦴ, ꦩꦲꦴꦫꦴꦗ, ꦱꦩ꧀ꦩꦴꦥꦛꦶꦥꦤ꧀ꦤꦺꦴ ꦗꦶꦤꦴꦤꦸꦱꦶꦛ꧀ꦜꦶꦪꦴ ꦥꦚ꧀ꦚꦴꦪ ꦤꦶꦧ꧀ꦧꦴꦤꦁ ꦱꦕ꧀ꦖꦶꦏꦫꦺꦴꦠꦶ.

‘‘ꦏꦡꦁ ꦥꦤ ꦠꦁ ꦤꦶꦧ꧀ꦧꦴꦤꦁ ꦢꦛ꧀ꦜꦧ꧀ꦧꦤ꧀ꦠꦶ? ꦄꦤꦷꦠꦶꦠꦺꦴ ꦤꦶꦫꦸꦥꦢ꧀ꦢꦮꦠꦺꦴ ꦄꦨꦪꦠꦺꦴ ꦑꦺꦩꦠꦺꦴ ꦱꦤ꧀ꦠꦠꦺꦴ ꦱꦸꦑꦠꦺꦴ ꦱꦴꦠꦠꦺꦴ ꦥꦟꦷꦠꦠꦺꦴ ꦱꦸꦕꦶꦠꦺꦴ ꦱꦷꦠꦭꦠꦺꦴ ꦢꦛ꧀ꦜꦧ꧀ꦧꦁ.

‘‘ꦪꦡꦴ, ꦩꦲꦴꦫꦴꦗ, ꦥꦸꦫꦶꦱꦺꦴ ꦧꦲꦸꦏꦛ꧀ꦜꦥꦸꦚ꧀ꦗꦺꦤ ꦗꦭꦶꦠꦏꦛ꧀ꦜꦶꦠꦺꦤ ꦄꦒ꧀ꦒꦶꦤꦴ ꦢꦪ꧀ꦲꦩꦴꦤꦺꦴ ꦮꦴꦪꦴꦩꦺꦤ ꦠꦠꦺꦴ ꦩꦸꦚ꧀ꦕꦶꦠ꧀ꦮꦴ ꦤꦶꦫꦒ꧀ꦒꦶꦏꦺꦴꦏꦴꦱꦁ ꦥꦮꦶꦱꦶꦠ꧀ꦮꦴ ꦠꦠ꧀ꦡ ꦥꦫꦩꦱꦸꦑꦁ ꦭꦨꦺꦪ꧀ꦪ, ꦌꦮꦩꦺꦮ ꦑꦺꦴ, ꦩꦲꦴꦫꦴꦗ, ꦪꦺꦴ ꦱꦩ꧀ꦩꦴꦥꦛꦶꦥꦤ꧀ꦤꦺꦴ, ꦱꦺꦴ ꦪꦺꦴꦤꦶꦱꦺꦴ ꦩꦤꦱꦶꦏꦴꦫꦺꦤ ꦧ꧀ꦪꦥꦒꦠꦠꦶꦮꦶꦣꦒ꧀ꦒꦶꦱꦤ꧀ꦠꦴꦥꦁ ꦥꦫꦩꦱꦸꦑꦁ ꦤꦶꦧ꧀ꦧꦴꦤꦁ ꦱꦕ꧀ꦖꦶꦏꦫꦺꦴꦠꦶ. ꦪꦡꦴ, ꦩꦲꦴꦫꦴꦗ, ꦄꦒ꧀ꦒꦶ, ꦌꦮꦁ ꦠꦶꦮꦶꦣꦒ꧀ꦒꦶ ꦢꦛ꧀ꦜꦧ꧀ꦧꦺꦴ; ꦪꦡꦴ ꦄꦒ꧀ꦒꦶꦒꦠꦺꦴ ꦥꦸꦫꦶꦱꦺꦴ, ꦌꦮꦁ ꦱꦩ꧀ꦩꦴꦥꦛꦶꦥꦤ꧀ꦤꦺꦴ ꦢꦛ꧀ꦜꦧ꧀ꦧꦺꦴ; ꦪꦡꦴ ꦤꦶꦫꦒ꧀ꦒꦶꦏꦺꦴꦏꦴꦱꦺꦴ, ꦌꦮꦁ ꦤꦶꦧ꧀ꦧꦴꦤꦁ ꦢꦛ꧀ꦜꦧ꧀ꦧꦁ.

‘‘ꦪꦡꦴ ꦮꦴ ꦥꦤ, ꦩꦲꦴꦫꦴꦗ, ꦥꦸꦫꦶꦱꦺꦴ ꦄꦲꦶꦏꦸꦏ꧀ꦏꦸꦫꦩꦤꦸꦱ꧀ꦱꦏꦸꦟꦥꦱꦫꦷꦫꦮꦭ꦳ꦚ꧀ꦗꦏꦺꦴꦛ꧀ꦜꦴꦱꦫꦴꦱꦶꦒꦠꦺꦴ ꦏꦸꦟꦥꦗꦛꦴꦗꦛꦶꦠꦤ꧀ꦠꦫꦩꦤꦸꦥꦮꦶꦛ꧀ꦜꦺꦴ ꦮꦴꦪꦴꦩꦺꦤ ꦠꦠꦺꦴ ꦩꦸꦚ꧀ꦕꦶꦠ꧀ꦮꦴ ꦤꦶꦏ꧀ꦏꦸꦟꦥꦺꦴꦏꦴꦱꦁ ꦥꦮꦶꦱꦶꦠ꧀ꦮꦴ ꦠꦠ꧀ꦡ ꦥꦫꦩꦱꦸꦑꦁ ꦭꦨꦺꦪ꧀ꦪ, ꦌꦮꦩꦺꦮ ꦑꦺꦴ, ꦩꦲꦴꦫꦴꦗ, ꦪꦺꦴ ꦱꦩ꧀ꦩꦴꦥꦛꦶꦥꦤ꧀ꦤꦺꦴ, ꦱꦺꦴ ꦪꦺꦴꦤꦶꦱꦺꦴ ꦩꦤꦱꦶꦏꦴꦫꦺꦤ ꦧ꧀ꦪꦥꦒꦠꦏꦶꦭꦺꦱꦏꦸꦟꦥꦁ ꦥꦫꦩꦱꦸꦑꦁ ꦤꦶꦧ꧀ꦧꦴꦤꦁ ꦱꦕ꧀ꦖꦶꦏꦫꦺꦴꦠꦶ. ꦪꦡꦴ, ꦩꦲꦴꦫꦴꦗ, ꦏꦸꦟꦥꦁ, ꦌꦮꦁ ꦥꦚ꧀ꦕ ꦏꦴꦩꦒꦸꦟꦴ ꦢꦛ꧀ꦜꦧ꧀ꦧꦴ; ꦪꦡꦴ ꦏꦸꦟꦥꦒꦠꦺꦴ ꦥꦸꦫꦶꦱꦺꦴ, ꦌꦮꦁ ꦱꦩ꧀ꦩꦴꦥꦛꦶꦥꦤ꧀ꦤꦺꦴ ꦢꦛ꧀ꦜꦧ꧀ꦧꦺꦴ; ꦪꦡꦴ ꦤꦶꦏ꧀ꦏꦸꦟꦥꦺꦴꦏꦴꦱꦺꦴ, ꦌꦮꦁ ꦤꦶꦧ꧀ꦧꦴꦤꦁ ꦢꦛ꧀ꦜꦧ꧀ꦧꦁ.

‘‘ꦪꦡꦴ ꦮꦴ ꦥꦤ, ꦩꦲꦴꦫꦴꦗ, ꦥꦸꦫꦶꦱꦺꦴ ꦨꦷꦠꦺꦴ ꦠꦱꦶꦠꦺꦴ ꦏꦩ꧀ꦥꦶꦠꦺꦴ ꦮꦶꦥꦫꦷꦠꦮꦶꦧ꧀ꦨꦤ꧀ꦠꦕꦶꦠ꧀ꦠꦺꦴ ꦮꦴꦪꦴꦩꦺꦤ ꦠꦠꦺꦴ ꦩꦸꦚ꧀ꦕꦶꦠ꧀ꦮꦴ ꦢꦭ꦳꧀ꦲꦁ ꦡꦶꦫꦁ ꦄꦕꦭꦁ ꦄꦨꦪꦛ꧀ꦜꦴꦤꦁ ꦥꦮꦶꦱꦶꦠ꧀ꦮꦴ ꦠꦠ꧀ꦡ ꦥꦫꦩꦱꦸꦑꦁ ꦭꦨꦺꦪ꧀ꦪ, ꦌꦮꦩꦺꦮ ꦑꦺꦴ, ꦩꦲꦴꦫꦴꦗ, ꦪꦺꦴ ꦱꦩ꧀ꦩꦴꦥꦛꦶꦥꦤ꧀ꦤꦺꦴ, ꦱꦺꦴ ꦪꦺꦴꦤꦶꦱꦺꦴ ꦩꦤꦱꦶꦏꦴꦫꦺꦤ ꦧ꧀ꦪꦥꦒꦠꦨꦪꦱꦤ꧀ꦠꦴꦱꦁ ꦥꦫꦩꦱꦸꦑꦁ ꦤꦶꦧ꧀ꦧꦴꦤꦁ ꦱꦕ꧀ꦖꦶꦏꦫꦺꦴꦠꦶ. ꦪꦡꦴ, ꦩꦲꦴꦫꦴꦗ, ꦨꦪꦁ, ꦌꦮꦁ ꦗꦴꦠꦶꦗꦫꦴꦧ꧀ꦪꦴꦣꦶꦩꦫꦟꦁ ꦥꦛꦶꦕ꧀ꦕ ꦄꦥꦫꦴꦥꦫꦁ ꦥꦮꦠ꧀ꦠꦨꦪꦁ ꦢꦛ꧀ꦜꦧ꧀ꦧꦁ; ꦪꦡꦴ ꦨꦷꦠꦺꦴ ꦥꦸꦫꦶꦱꦺꦴ, ꦌꦮꦁ ꦱꦩ꧀ꦩꦴꦥꦛꦶꦥꦤ꧀ꦤꦺꦴ ꦢꦛ꧀ꦜꦧ꧀ꦧꦺꦴ; ꦪꦡꦴ ꦄꦨꦪꦛ꧀ꦜꦴꦤꦁ, ꦌꦮꦁ ꦤꦶꦧ꧀ꦧꦴꦤꦁ ꦢꦛ꧀ꦜꦧ꧀ꦧꦁ.

‘‘ꦪꦡꦴ ꦮꦴ ꦥꦤ, ꦩꦲꦴꦫꦴꦗ, ꦥꦸꦫꦶꦱꦺꦴ ꦏꦶꦭꦶꦛ꧀ꦜꦩꦭꦶꦤꦏꦭꦭꦏꦢ꧀ꦢꦩꦢꦺꦱꦺ ꦥꦠꦶꦠꦺꦴ ꦮꦴꦪꦴꦩꦺꦤ ꦠꦁ ꦏꦭꦭꦏꦢ꧀ꦢꦩꦁ ꦄꦥꦮꦴꦲꦺꦠ꧀ꦮꦴ ꦥꦫꦶꦱꦸꦢ꧀ꦣꦮꦶꦩꦭꦢꦺꦱꦩꦸꦥꦒꦤ꧀ꦠ꧀ꦮꦴ ꦠꦠ꧀ꦡ ꦥꦫꦩꦱꦸꦑꦁ ꦭꦨꦺꦪ꧀ꦪ, ꦌꦮꦩꦺꦮ ꦑꦺꦴ, ꦩꦲꦴꦫꦴꦗ, ꦪꦺꦴ ꦱꦩ꧀ꦩꦴꦥꦛꦶꦥꦤ꧀ꦤꦺꦴ, ꦱꦺꦴ ꦪꦺꦴꦤꦶꦱꦺꦴ ꦩꦤꦱꦶꦏꦴꦫꦺꦤ ꦧ꧀ꦪꦥꦒꦠꦏꦶꦭꦺꦱꦩꦭꦏꦢ꧀ꦢꦩꦁ ꦥꦫꦩꦱꦸꦑꦁ ꦤꦶꦧ꧀ꦧꦴꦤꦁ ꦱꦕ꧀ꦖꦶꦏꦫꦺꦴꦠꦶ. ꦪꦡꦴ, ꦩꦲꦴꦫꦴꦗ, ꦏꦭꦭꦁ, ꦌꦮꦁ ꦭꦴꦨꦱꦏ꧀ꦏꦴꦫꦱꦶꦭꦺꦴꦏꦺꦴ ꦢꦛ꧀ꦜꦧ꧀ꦧꦺꦴ; ꦪꦡꦴ ꦏꦭꦭꦒꦠꦺꦴ ꦥꦸꦫꦶꦱꦺꦴ, ꦌꦮꦁ ꦱꦩ꧀ꦩꦴꦥꦛꦶꦥꦤ꧀ꦤꦺꦴ ꦢꦛ꧀ꦜꦧ꧀ꦧꦺꦴ; ꦪꦡꦴ ꦥꦫꦶꦱꦸꦢ꧀ꦣꦮꦶꦩꦭꦢꦺꦱꦺꦴ, ꦌꦮꦁ ꦤꦶꦧ꧀ꦧꦴꦤꦁ ꦢꦛ꧀ꦜꦧ꧀ꦧꦁ.

‘‘ꦠꦚ꧀ꦕ ꦥꦤ ꦤꦶꦧ꧀ꦧꦴꦤꦁ ꦱꦩ꧀ꦩꦴꦥꦛꦶꦥꦤ꧀ꦤꦺꦴ ꦏꦶꦤ꧀ꦠꦶ ꦱꦕ꧀ꦖꦶꦏꦫꦺꦴꦠꦶ? ꦪꦺꦴ ꦱꦺꦴ, ꦩꦲꦴꦫꦴꦗ, ꦱꦩ꧀ꦩꦴꦥꦛꦶꦥꦤ꧀ꦤꦺꦴ, ꦱꦺꦴ ꦱꦔ꧀ꦑꦴꦫꦴꦤꦁ ꦥꦮꦠ꧀ꦠꦁ ꦱꦩ꧀ꦩꦱꦠꦶ. ꦥꦮꦠ꧀ꦠꦁ ꦱꦩ꧀ꦩꦱꦩꦴꦤꦺꦴ ꦠꦠ꧀ꦡ ꦗꦴꦠꦶꦁ ꦥꦱ꧀ꦱꦠꦶ ꦗꦫꦁ ꦥꦱ꧀ꦱꦠꦶ ꦧ꧀ꦪꦴꦣꦶꦁ ꦥꦱ꧀ꦱꦠꦶ ꦩꦫꦟꦁ ꦥꦱ꧀ꦱꦠꦶ, ꦤ ꦠꦠ꧀ꦡ ꦏꦶꦚ꧀ꦕꦶ ꦱꦸꦑꦁ ꦱꦴꦠꦁ ꦥꦱ꧀ꦱꦠꦶ ꦄꦴꦢꦶꦠꦺꦴꦥꦶ ꦩꦗ꧀ꦙꦠꦺꦴꦥꦶ ꦥꦫꦶꦪꦺꦴꦱꦴꦤꦠꦺꦴꦥꦶ. ꦱꦺꦴ ꦠꦠ꧀ꦡ ꦏꦶꦚ꧀ꦕꦶ ꦤ ꦒꦪ꧀ꦲꦹꦥꦒꦁ ꦥꦱ꧀ꦱꦠꦶ. ꦪꦡꦴ, ꦩꦲꦴꦫꦴꦗ, ꦥꦸꦫꦶꦱꦺꦴ ꦢꦶꦮꦱꦱꦤ꧀ꦠꦠ꧀ꦠꦺ ꦄꦪꦺꦴꦒꦸꦭ꦳ꦺ ꦗꦭꦶꦠꦺ ꦠꦠ꧀ꦠꦺ ꦏꦜꦶꦠꦺ ꦄꦴꦢꦶꦠꦺꦴꦥꦶ ꦩꦗ꧀ꦙꦠꦺꦴꦥꦶ ꦥꦫꦶꦪꦺꦴꦱꦴꦤꦠꦺꦴꦥꦶ ꦤ ꦏꦶꦚ꧀ꦕꦶ ꦒꦪ꧀ꦲꦹꦥꦒꦁ ꦥꦢꦺꦱꦁ ꦥꦱ꧀ꦱꦠꦶ, ꦌꦮꦩꦺꦮ ꦑꦺꦴ, ꦩꦲꦴꦫꦴꦗ, ꦪꦺꦴ ꦱꦔ꧀ꦑꦴꦫꦴꦤꦁ ꦥꦮꦠ꧀ꦠꦁ ꦱꦩ꧀ꦩꦱꦠꦶ, ꦱꦺꦴ ꦥꦮꦠ꧀ꦠꦁ ꦱꦩ꧀ꦩꦱꦩꦴꦤꦺꦴ ꦠꦠ꧀ꦡ ꦗꦴꦠꦶꦁ ꦥꦱ꧀ꦱꦠꦶ ꦗꦫꦁ ꦥꦱ꧀ꦱꦠꦶ ꦧ꧀ꦪꦴꦣꦶꦁ ꦥꦱ꧀ꦱꦠꦶ ꦩꦫꦟꦁ ꦥꦱ꧀ꦱꦠꦶ, ꦤ ꦠꦠ꧀ꦡ ꦏꦶꦚ꧀ꦕꦶ ꦱꦸꦑꦁ ꦱꦴꦠꦁ ꦥꦱ꧀ꦱꦠꦶ ꦄꦴꦢꦶꦠꦺꦴꦥꦶ ꦩꦗ꧀ꦙꦠꦺꦴꦥꦶ ꦥꦫꦶꦪꦺꦴꦱꦴꦤꦠꦺꦴꦥꦶ. ꦱꦺꦴ ꦠꦠ꧀ꦡ [ꦆꦢꦁ ꦥꦢꦢ꧀ꦮꦪꦁ ꦱꦷ. ꦥꦷ. ꦥꦺꦴꦠ꧀ꦡꦏꦺꦱꦸ ꦤꦠ꧀ꦡꦶ] ꦤ ꦏꦶꦚ꧀ꦕꦶ ꦒꦪ꧀ꦲꦹꦥꦒꦁ ꦥꦱ꧀ꦱꦠꦶ, ꦠꦱ꧀ꦱ ꦒꦪ꧀ꦲꦹꦥꦒꦁ ꦄꦥꦱ꧀ꦱꦤ꧀ꦠꦱ꧀ꦱ ꦕꦶꦠ꧀ꦠꦺ ꦄꦫꦠꦶ ꦱꦟ꧀ꦜꦴꦠꦶ, ꦏꦴꦪꦱ꧀ꦩꦶꦁ ꦝꦴꦲꦺꦴ ꦎꦏ꧀ꦏꦩꦠꦶ, ꦱꦺꦴ ꦄꦠꦴꦟꦺꦴ ꦄꦱꦫꦟꦺꦴ ꦄꦱꦫꦟꦷꦨꦹꦠꦺꦴ ꦨꦮꦺꦱꦸ ꦤꦶꦧ꧀ꦧꦶꦤ꧀ꦢꦠꦶ.

‘‘ꦪꦡꦴ, ꦩꦲꦴꦫꦴꦗ, ꦥꦸꦫꦶꦱꦺꦴ ꦗꦭꦶꦠꦗꦴꦭꦁ ꦩꦲꦤ꧀ꦠꦁ ꦄꦒ꧀ꦒꦶꦏ꧀ꦑꦤ꧀ꦣꦁ ꦥꦮꦶꦱꦺꦪ꧀ꦪ, ꦱꦺꦴ ꦠꦠ꧀ꦡ ꦄꦠꦴꦟꦺꦴ ꦄꦱꦫꦟꦺꦴ ꦄꦱꦫꦟꦷꦨꦹꦠꦺꦴ ꦄꦒ꧀ꦒꦶꦩ꧀ꦲꦶ ꦤꦶꦧ꧀ꦧꦶꦤ꧀ꦢꦺꦪ꧀ꦪ, ꦌꦮꦩꦺꦮ ꦑꦺꦴ, ꦩꦲꦴꦫꦴꦗ, ꦠꦱ꧀ꦱ ꦒꦪ꧀ꦲꦹꦥꦒꦁ ꦄꦥꦱ꧀ꦱꦤ꧀ꦠꦱ꧀ꦱ ꦕꦶꦠ꧀ꦠꦺ ꦄꦫꦠꦶ ꦱꦟ꧀ꦜꦴꦠꦶ, ꦏꦴꦪꦱ꧀ꦩꦶꦁ ꦝꦴꦲꦺꦴ ꦎꦏ꧀ꦏꦩꦠꦶ, ꦱꦺꦴ ꦄꦠꦴꦟꦺꦴ ꦄꦱꦫꦟꦺꦴ ꦄꦱꦫꦟꦷꦨꦹꦠꦺꦴ ꦨꦮꦺꦱꦸ ꦤꦶꦧ꧀ꦧꦶꦤ꧀ꦢꦠꦶ.

‘‘ꦠꦱ꧀ꦱ ꦥꦮꦠ꧀ꦠꦺ ꦨꦪꦢꦱ꧀ꦱꦴꦮꦶꦱ꧀ꦱ ꦌꦮꦁ ꦕꦶꦠ꧀ꦠꦁ ꦈꦥ꧀ꦥꦗ꧀ꦗꦠꦶ ‘ꦱꦤ꧀ꦠꦠ꧀ꦠꦁ ꦑꦺꦴ ꦥꦤꦺꦠꦁ ꦥꦮꦠ꧀ꦠꦁ ꦱꦩ꧀ꦥꦗ꧀ꦗꦭꦶꦠꦁ ꦧꦲꦸꦢꦸꦏ꧀ꦑꦁ ꦧꦲꦹꦥꦴꦪꦴꦱꦁ, ꦪꦢꦶ ꦏꦺꦴꦕꦶ ꦭꦨꦺꦡ ꦄꦥ꧀ꦥꦮꦠ꧀ꦠꦁ ꦌꦠꦁ ꦱꦤ꧀ꦠꦁ ꦌꦠꦁ ꦥꦟꦷꦠꦁ, ꦪꦢꦶꦢꦁ ꦱꦧ꧀ꦧꦱꦔ꧀ꦑꦴꦫꦱꦩꦡꦺꦴ ꦱꦧ꧀ꦧꦹꦥꦣꦶꦥꦛꦶꦤꦶꦱ꧀ꦱꦒ꧀ꦒꦺꦴ ꦠꦟ꧀ꦲꦏ꧀ꦑꦪꦺꦴ ꦮꦶꦫꦴꦒꦺꦴ ꦤꦶꦫꦺꦴꦣꦺꦴ ꦤꦶꦧ꧀ꦧꦴꦤ’ꦤ꧀ꦠꦶ. ꦆꦠꦶ ꦲꦺꦠꦁ [ꦲꦶꦠꦁ (ꦱꦷ.), ꦲꦶ ꦆꦢꦁ (ꦥꦷ.)] ꦠꦱ꧀ꦱ ꦄꦥ꧀ꦥꦮꦠ꧀ꦠꦺ ꦕꦶꦠ꧀ꦠꦁ ꦥꦏ꧀ꦑꦤ꧀ꦢꦠꦶ ꦥꦱꦷꦢꦠꦶ ꦥꦲꦁꦱꦪꦠꦶ ꦠꦸꦱꦪꦠꦶ [ꦥꦲꦁꦱꦷꦪꦠꦶ ꦏꦸꦲꦷꦪꦠꦶ (ꦱꦷ. ꦥꦷ.)]‘ꦥꦛꦶꦭꦢ꧀ꦣꦁ ꦑꦺꦴ ꦩꦺ ꦤꦶꦱ꧀ꦱꦫꦟ’ꦤ꧀ꦠꦶ.

‘‘ꦪꦡꦴ, ꦩꦲꦴꦫꦴꦗ, ꦥꦸꦫꦶꦱꦺꦴ ꦮꦶꦥ꧀ꦥꦤꦛ꧀ꦜꦺꦴ ꦮꦶꦢꦺꦱꦥꦏ꧀ꦑꦤ꧀ꦢꦺꦴ ꦤꦶꦧ꧀ꦧꦴꦲꦤꦩꦒ꧀ꦒꦁ ꦢꦶꦱ꧀ꦮꦴ ꦠꦠ꧀ꦡ ꦥꦏ꧀ꦑꦤ꧀ꦢꦠꦶ ꦥꦱꦷꦢꦠꦶ ꦥꦲꦁꦱꦪꦠꦶ ꦠꦸꦱꦪꦠꦶ [ꦥꦲꦁꦱꦷꦪꦠꦶ ꦏꦸꦲꦷꦪꦠꦶ (ꦱꦷ. ꦥꦷ.)] ‘ꦥꦛꦶꦭꦢ꧀ꦣꦺꦴ ꦩꦺ ꦤꦶꦧ꧀ꦧꦴꦲꦤꦩꦒ꧀ꦒꦺꦴ’ꦠꦶ, ꦌꦮꦩꦺꦮ ꦑꦺꦴ, ꦩꦲꦴꦫꦴꦗ, ꦥꦮꦠ꧀ꦠꦺ ꦨꦪꦢꦱ꧀ꦱꦴꦮꦶꦱ꧀ꦱ ꦄꦥ꧀ꦥꦮꦠ꧀ꦠꦺ ꦕꦶꦠ꧀ꦠꦁ ꦥꦏ꧀ꦑꦤ꧀ꦢꦠꦶ ꦥꦱꦷꦢꦠꦶ ꦥꦲꦁꦱꦪꦠꦶ ꦠꦸꦱꦪꦠꦶ [ꦥꦲꦁꦱꦷꦪꦠꦶ ꦏꦸꦲꦷꦪꦠꦶ (ꦱꦷ. ꦥꦷ.)] ‘ꦥꦛꦶꦭꦢ꧀ꦣꦁ ꦑꦺꦴ ꦩꦺ ꦤꦶꦱ꧀ꦱꦫꦟ’ꦤ꧀ꦠꦶ.

‘‘ꦱꦺꦴ ꦄꦥ꧀ꦥꦮꦠ꧀ꦠꦠ꧀ꦡꦴꦪ ꦩꦒ꧀ꦒꦁ ꦄꦴꦪꦹꦲꦠꦶ ꦒꦮꦺꦱꦠꦶ ꦨꦴꦮꦺꦠꦶ ꦧꦲꦸꦭꦷꦏꦫꦺꦴꦠꦶ, ꦠꦱ꧀ꦱ ꦠꦢꦠ꧀ꦡꦁ ꦱꦠꦶ ꦱꦤ꧀ꦠꦶꦛ꧀ꦜꦠꦶ, ꦠꦢꦠ꧀ꦡꦁ ꦮꦷꦫꦶꦪꦁ ꦱꦤ꧀ꦠꦶꦛ꧀ꦜꦠꦶ, ꦠꦢꦠ꧀ꦡꦁ ꦥꦷꦠꦶ ꦱꦤ꧀ꦠꦶꦛ꧀ꦜꦠꦶ, ꦠꦱ꧀ꦱ ꦠꦁ ꦕꦶꦠ꧀ꦠꦁ ꦄꦥꦫꦴꦥꦫꦁ ꦩꦤꦱꦶꦏꦫꦺꦴꦠꦺꦴ ꦥꦮꦠ꧀ꦠꦁ ꦱꦩꦠꦶꦏ꧀ꦏꦩꦶꦠ꧀ꦮꦴ ꦄꦥ꧀ꦥꦮꦠ꧀ꦠꦁ ꦎꦏ꧀ꦏꦩꦠꦶ, ꦄꦥ꧀ꦥꦮꦠ꧀ꦠꦩꦤꦸꦥ꧀ꦥꦠ꧀ꦠꦺꦴ, ꦩꦲꦴꦫꦴꦗ, ꦱꦩ꧀ꦩꦴꦥꦛꦶꦥꦤ꧀ꦤꦺꦴ ‘ꦤꦶꦧ꧀ꦧꦴꦤꦁ ꦱꦕ꧀ꦖꦶꦏꦫꦺꦴꦠꦷ’ꦠꦶ ꦮꦸꦕ꧀ꦕꦠꦷ’’ꦠꦶ. ‘‘ꦱꦴꦣꦸ, ꦨꦤ꧀ꦠꦺ ꦤꦴꦒꦱꦺꦤ, ꦌꦮꦩꦺꦠꦁ ꦠꦡꦴ ꦱꦩ꧀ꦥꦛꦶꦕ꧀ꦖꦴꦩꦷ’’ꦠꦶ.

ꦤꦶꦧ꧀ꦧꦴꦤꦱꦕ꧀ꦖꦶꦏꦫꦟꦥꦚ꧀ꦲꦺꦴ ꦌꦏꦴꦢꦱꦩꦺꦴ.