꧓. ꦑꦷꦟꦴꦱꦮꦱꦠꦶꦱꦩ꧀ꦩꦺꦴꦱꦥꦚ꧀ꦲꦺꦴ

꧓. ‘‘ꦨꦤ꧀ꦠꦺ ꦤꦴꦒꦱꦺꦤ, ꦄꦠ꧀ꦡꦶ ꦄꦫꦲꦠꦺꦴ ꦱꦠꦶꦱꦩ꧀ꦩꦺꦴꦱꦺꦴ’’ꦠꦶ? ‘‘ꦮꦶꦒꦠꦱꦠꦶꦱꦩ꧀ꦩꦺꦴꦱꦴ ꦑꦺꦴ, ꦩꦲꦴꦫꦴꦗ, ꦄꦫꦲꦤ꧀ꦠꦺꦴ, ꦤꦠ꧀ꦡꦶ ꦄꦫꦲꦤ꧀ꦠꦴꦤꦁ ꦱꦠꦶꦱꦩ꧀ꦩꦺꦴꦱꦺꦴ’’ꦠꦶ. ‘‘ꦄꦴꦥꦗ꧀ꦗꦺꦪ꧀ꦪ ꦥꦤ, ꦨꦤ꧀ꦠꦺ, ꦄꦫꦲꦴ ꦄꦴꦥꦠ꧀ꦠꦶ’’ꦤ꧀ꦠꦶ? ‘‘ꦄꦴꦩ, ꦩꦲꦴꦫꦴꦗꦴ’’ꦠꦶ. ‘‘ꦏꦶꦱ꧀ꦩꦶꦁ ꦮꦠ꧀ꦡꦸꦱ꧀ꦩꦶ’’ꦤ꧀ꦠꦶ? ‘‘ꦏꦸꦛꦶꦏꦴꦫꦺ, ꦩꦲꦴꦫꦴꦗ, ꦱꦚ꧀ꦕꦫꦶꦠ꧀ꦠꦺ, ꦮꦶꦏꦴꦭꦺ ꦏꦴꦭꦱꦚ꧀ꦚꦴꦪ, ꦥꦮꦴꦫꦶꦠꦺ ꦄꦥ꧀ꦥꦮꦴꦫꦶꦠꦱꦚ꧀ꦚꦴꦪ, ꦄꦤꦠꦶꦫꦶꦠ꧀ꦠꦺ ꦄꦠꦶꦫꦶꦠ꧀ꦠꦱꦚ꧀ꦚꦴꦪꦴ’’ꦠꦶ.

‘‘ꦨꦤ꧀ꦠꦺ ꦤꦴꦒꦱꦺꦤ, ꦠꦸꦩ꧀ꦲꦺ ꦨꦟꦡ ‘ꦪꦺ ꦄꦴꦥꦠ꧀ꦠꦶꦁ ꦄꦴꦥꦗ꧀ꦗꦤ꧀ꦠꦶ, ꦠꦺ ꦢ꧀ꦮꦷꦲꦶ ꦏꦴꦫꦟꦺꦲꦶ ꦄꦴꦥꦗ꧀ꦗꦤ꧀ꦠꦶ ꦄꦤꦴꦢꦫꦶꦪꦺꦤ ꦮꦴ ꦄꦗꦴꦤꦤꦺꦤ ꦮꦴ’ꦠꦶ. ꦄꦥꦶ ꦤꦸ ꦑꦺꦴ, ꦨꦤ꧀ꦠꦺ, ꦄꦫꦲꦠꦺꦴ ꦄꦤꦴꦢꦫꦶꦪꦁ ꦲꦺꦴꦠꦶ, ꦪꦁ ꦄꦫꦲꦴ ꦄꦴꦥꦠ꧀ꦠꦶꦁ ꦄꦴꦥꦗ꧀ꦗꦠꦷ’’ꦠꦶ? ‘‘ꦤ ꦲꦶ, ꦩꦲꦴꦫꦴꦗꦴ’’ꦠꦶ.

‘‘ꦪꦢꦶ, ꦨꦤ꧀ꦠꦺ ꦤꦴꦒꦱꦺꦤ, ꦄꦫꦲꦴ ꦄꦴꦥꦠ꧀ꦠꦶꦁ ꦄꦴꦥꦗ꧀ꦗꦠꦶ, ꦤꦠ꧀ꦡꦶ ꦕ ꦄꦫꦲꦠꦺꦴ ꦄꦤꦴꦢꦫꦶꦪꦁ, ꦠꦺꦤ ꦲꦶ ꦄꦠ꧀ꦡꦶ ꦄꦫꦲꦠꦺꦴ ꦱꦠꦶꦱꦩ꧀ꦩꦺꦴꦱꦺꦴ’’ꦠꦶ? ‘‘ꦤꦠ꧀ꦡꦶ, ꦩꦲꦴꦫꦴꦗ, ꦄꦫꦲꦠꦺꦴ ꦱꦠꦶꦱꦩ꧀ꦩꦺꦴꦱꦺꦴ, ꦄꦴꦥꦠ꧀ꦠꦶꦚ꧀ꦕ ꦄꦫꦲꦴ ꦄꦴꦥꦗ꧀ꦗꦠꦷ’’ꦠꦶ.

‘‘ꦠꦺꦤ ꦲꦶ, ꦨꦤ꧀ꦠꦺ, ꦏꦴꦫꦟꦺꦤ ꦩꦁ ꦱꦚ꧀ꦚꦴꦥꦺꦲꦶ, ꦏꦶꦁ ꦠꦠ꧀ꦡ ꦏꦴꦫꦟ’’ꦤ꧀ꦠꦶ? ‘‘ꦢ꧀ꦮꦺꦩꦺ, ꦩꦲꦴꦫꦴꦗ, ꦏꦶꦭꦺꦱꦴ ꦭꦺꦴꦏꦮꦗ꧀ꦗꦁ ꦥꦟ꧀ꦟꦠ꧀ꦠꦶꦮꦗ꧀ꦗꦚ꧀ꦕꦴꦠꦶ. ꦏꦠꦩꦁ, ꦩꦲꦴꦫꦴꦗ, ꦭꦺꦴꦏꦮꦗ꧀ꦗꦁ? ꦢꦱ ꦄꦏꦸꦱꦭꦏꦩ꧀ꦩꦥꦡꦴ, ꦆꦢꦁ ꦮꦸꦕ꧀ꦕꦠꦶ ꦭꦺꦴꦏꦮꦗ꧀ꦗꦁ. ꦏꦠꦩꦁ ꦥꦟ꧀ꦟꦠ꧀ꦠꦶꦮꦗ꧀ꦗꦁ? ꦪꦁ ꦭꦺꦴꦏꦺ ꦄꦠ꧀ꦡꦶ ꦱꦩꦟꦴꦤꦁ ꦄꦤꦤꦸꦕ꧀ꦖꦮꦶꦏꦁ ꦄꦤꦤꦸꦭꦺꦴꦩꦶꦏꦁ, ꦒꦶꦲꦷꦤꦁ ꦄꦤꦮꦗ꧀ꦗꦁ. ꦠꦠ꧀ꦡ ꦨꦒꦮꦴ ꦱꦴꦮꦏꦴꦤꦁ ꦱꦶꦏ꧀ꦑꦴꦥꦢꦁ ꦥꦚ꧀ꦚꦥꦺꦠꦶ ‘ꦪꦴꦮꦗꦷꦮꦁ ꦄꦤꦠꦶꦏ꧀ꦏꦩꦤꦷꦪ’ꦤ꧀ꦠꦶ. ꦮꦶꦏꦴꦭꦨꦺꦴꦗꦤꦁ, ꦩꦲꦴꦫꦴꦗ, ꦭꦺꦴꦏꦱ꧀ꦱ ꦄꦤꦮꦗ꧀ꦗꦁ, ꦠꦁ ꦗꦶꦤꦱꦴꦱꦤꦺ ꦮꦗ꧀ꦗꦁ. ꦨꦹꦠꦒꦴꦩꦮꦶꦏꦺꦴꦥꦤꦁ, ꦩꦲꦴꦫꦴꦗ, ꦭꦺꦴꦏꦱ꧀ꦱ ꦄꦤꦮꦗ꧀ꦗꦁ, ꦠꦁ ꦗꦶꦤꦱꦴꦱꦤꦺ ꦮꦗ꧀ꦗꦁ. ꦈꦢꦏꦺ ꦲꦱ꧀ꦱꦣꦩ꧀ꦩꦁ, ꦩꦲꦴꦫꦴꦗ, ꦭꦺꦴꦏꦱ꧀ꦱ ꦄꦤꦮꦗ꧀ꦗꦁ, ꦠꦁ ꦗꦶꦤꦱꦴꦱꦤꦺ ꦮꦗ꧀ꦗꦁ. ꦆꦠꦶ ꦌꦮꦫꦹꦥꦴꦤꦶ ꦌꦮꦫꦹꦥꦴꦤꦶ, ꦩꦲꦴꦫꦴꦗ, ꦗꦶꦤꦱꦴꦱꦤꦺ ꦮꦗ꧀ꦗꦴꦤꦶ, ꦆꦢꦁ ꦮꦸꦕ꧀ꦕꦠꦶ ꦥꦟ꧀ꦟꦠ꧀ꦠꦶꦮꦗ꧀ꦗꦁ.

‘‘ꦭꦺꦴꦏꦮꦗ꧀ꦗꦁ ꦄꦨꦧ꧀ꦧꦺꦴ ꦑꦷꦟꦴꦱꦮꦺꦴ ꦠꦁ ꦄꦗ꧀ꦙꦴꦕꦫꦶꦠꦸꦁ, ꦪꦁ ꦏꦶꦭꦺꦱꦁ ꦥꦟ꧀ꦟꦠ꧀ꦠꦶꦮꦗ꧀ꦗꦁ, ꦠꦁ ꦄꦗꦴꦤꦤ꧀ꦠꦺꦴ ꦄꦴꦥꦗ꧀ꦗꦺꦪ꧀ꦪ. ꦄꦮꦶꦱꦪꦺꦴ, ꦩꦲꦴꦫꦴꦗ, ꦌꦏꦕ꧀ꦕꦱ꧀ꦱ ꦄꦫꦲꦠꦺꦴ ꦱꦧ꧀ꦧꦁ ꦗꦴꦤꦶꦠꦸꦁ, ꦤ ꦲꦶ ꦠꦱ꧀ꦱ ꦧꦭꦁ ꦄꦠ꧀ꦡꦶ ꦱꦧ꧀ꦧꦁ ꦗꦴꦤꦶꦠꦸꦁ. ꦄꦤꦚ꧀ꦚꦴꦠꦁ, ꦩꦲꦴꦫꦴꦗ, ꦄꦫꦲꦠꦺꦴ ꦆꦠ꧀ꦡꦶꦥꦸꦫꦶꦱꦴꦤꦁ ꦤꦴꦩꦩ꧀ꦥꦶ ꦒꦺꦴꦠ꧀ꦠꦩ꧀ꦥꦶ, ꦩꦒ꧀ꦒꦺꦴꦥꦶ ꦠꦱ꧀ꦱ ꦩꦲꦶꦪꦴ ꦄꦤꦚ꧀ꦚꦴꦠꦺꦴ; ꦮꦶꦩꦸꦠ꧀ꦠꦶꦁ ꦪꦺꦮ, ꦩꦲꦴꦫꦴꦗ, ꦌꦏꦕ꧀ꦕꦺꦴ ꦄꦫꦲꦴ ꦗꦴꦤꦺꦪ꧀ꦪ; ꦖꦭ꦳ꦨꦶꦚ꧀ꦚꦺꦴ ꦄꦫꦲꦴ ꦱꦏꦮꦶꦱꦪꦁ ꦗꦴꦤꦺꦪ꧀ꦪ; ꦱꦧ꧀ꦧꦚ꧀ꦚꦹ, ꦩꦲꦴꦫꦴꦗ, ꦠꦡꦴꦒꦠꦺꦴꦮ ꦱꦧ꧀ꦧꦁ ꦗꦴꦤꦴꦠꦷ’’ꦠꦶ. ‘‘ꦱꦴꦣꦸ, ꦨꦤ꧀ꦠꦺ ꦤꦴꦒꦱꦺꦤ, ꦌꦮꦩꦺꦠꦁ ꦠꦡꦴ ꦱꦩ꧀ꦥꦛꦶꦕ꧀ꦖꦴꦩꦷ’’ꦠꦶ.

ꦑꦷꦟꦴꦱꦮꦱꦠꦶꦱꦩ꧀ꦩꦺꦴꦱꦥꦚ꧀ꦲꦺꦴ ꦠꦠꦶꦪꦺꦴ.