꧙. ꦄꦒ꧀ꦒꦒ꧀ꦒꦱꦩꦟꦥꦚ꧀ꦲꦺꦴ

꧙. ‘‘ꦨꦤ꧀ꦠꦺ ꦤꦴꦒꦱꦺꦤ, ꦨꦴꦱꦶꦠꦩ꧀ꦥꦺꦠꦁ ꦨꦒꦮꦠꦴ ‘ꦄꦴꦱꦮꦴꦤꦁ ꦑꦪꦴ ꦱꦩꦟꦺꦴ ꦲꦺꦴꦠꦷ’ꦠꦶ. ꦥꦸꦤ ꦕ ꦨꦟꦶꦠꦁ –

‘‘‘ꦕꦠꦸꦧ꧀ꦨꦶ ꦣꦩ꧀ꦩꦺꦲꦶ ꦱꦩꦔ꧀ꦒꦶꦨꦹꦠꦁ, ꦠꦁ ꦮꦺ ꦤꦫꦁ ꦱꦩꦟꦁ ꦄꦴꦲꦸ ꦭꦺꦴꦏꦺ’ꦠꦶ.

ꦠꦠ꧀ꦫꦶꦩꦺ ꦕꦠ꧀ꦠꦴꦫꦺꦴ ꦣꦩ꧀ꦩꦴ ꦑꦤ꧀ꦠꦶ ꦄꦥ꧀ꦥꦴꦲꦴꦫꦠꦴ ꦫꦠꦶꦮꦶꦥ꧀ꦥꦲꦴꦤꦁ ꦄꦴꦏꦶꦚ꧀ꦕꦚ꧀ꦚꦁ. ꦱꦧ꧀ꦧꦴꦤꦶ ꦥꦤꦺꦠꦴꦤꦶ ꦄꦥꦫꦶꦏ꧀ꦑꦷꦟꦴꦱꦮꦱ꧀ꦱ ꦱꦏꦶꦭꦺꦱꦱ꧀ꦱꦺꦮ ꦲꦺꦴꦤ꧀ꦠꦶ. ꦪꦢꦶ, ꦨꦤ꧀ꦠꦺ ꦤꦴꦒꦱꦺꦤ, ꦄꦴꦱꦮꦴꦤꦁ ꦑꦪꦴ ꦱꦩꦟꦺꦴ ꦲꦺꦴꦠꦶ, ꦠꦺꦤ ꦲꦶ ‘ꦕꦠꦸꦧ꧀ꦨꦶ ꦣꦩ꧀ꦩꦺꦲꦶ ꦱꦩꦔ꧀ꦒꦶꦨꦹꦠꦁ, ꦠꦁ ꦮꦺ ꦤꦫꦁ ꦱꦩꦟꦁ ꦄꦴꦲꦸ ꦭꦺꦴꦏꦺ’ꦠꦶ ꦪꦁ ꦮꦕꦤꦁ, ꦠꦁ ꦩꦶꦕ꧀ꦖꦴ. ꦪꦢꦶ ꦕꦠꦸꦧ꧀ꦨꦶ ꦣꦩ꧀ꦩꦺꦲꦶ ꦱꦩꦔ꧀ꦒꦶꦨꦹꦠꦺꦴ ꦱꦩꦟꦺꦴ ꦲꦺꦴꦠꦶ, ꦠꦺꦤ ꦲꦶ ‘ꦄꦴꦱꦮꦴꦤꦁ ꦑꦪꦴ ꦱꦩꦟꦺꦴ ꦲꦺꦴꦠꦷ’ꦠꦶ ꦠꦩ꧀ꦥꦶ ꦮꦕꦤꦁ ꦩꦶꦕ꧀ꦖꦴ, ꦄꦪꦩ꧀ꦥꦶ ꦈꦨꦠꦺꦴ ꦏꦺꦴꦛꦶꦏꦺꦴ ꦥꦚ꧀ꦲꦺꦴ ꦠꦮꦴꦤꦸꦥ꧀ꦥꦠ꧀ꦠꦺꦴ, ꦱꦺꦴ ꦠꦪꦴ ꦤꦶꦧ꧀ꦧꦴꦲꦶꦠꦧ꧀ꦧꦺꦴ’’ꦠꦶ.

‘‘ꦨꦴꦱꦶꦠꦩ꧀ꦥꦺꦠꦁ, ꦩꦲꦴꦫꦴꦗ, ꦨꦒꦮꦠꦴ ‘ꦄꦴꦱꦮꦴꦤꦁ ꦑꦪꦴ ꦱꦩꦟꦺꦴ ꦲꦺꦴꦠꦷ’ꦠꦶ. ꦥꦸꦤ ꦕ ꦨꦟꦶꦠꦁ ‘ꦕꦠꦸꦧ꧀ꦨꦶ ꦣꦩ꧀ꦩꦺꦲꦶ ꦱꦩꦔ꧀ꦒꦶꦨꦹꦠꦁ, ꦠꦁ ꦮꦺ ꦤꦫꦁ ꦱꦩꦟꦁ ꦄꦴꦲꦸ ꦭꦺꦴꦏꦺ’ꦠꦶ. ꦠꦢꦶꦢꦁ, ꦩꦲꦴꦫꦴꦗ, ꦮꦕꦤꦁ ꦠꦺꦱꦁ ꦠꦺꦱꦁ ꦥꦸꦒ꧀ꦒꦭꦴꦤꦁ ꦒꦸꦟꦮꦱꦺꦤ ꦨꦟꦶꦠꦁ ‘ꦕꦠꦸꦧ꧀ꦨꦶ ꦣꦩ꧀ꦩꦺꦲꦶ ꦱꦩꦔ꧀ꦒꦶꦨꦹꦠꦁ, ꦠꦁ ꦮꦺ ꦤꦫꦁ ꦱꦩꦟꦁ ꦄꦴꦲꦸ ꦭꦺꦴꦏꦺ’ꦠꦶ, ꦆꦢꦁ ꦥꦤ ꦤꦶꦫꦮꦱꦺꦱꦮꦕꦤꦁ ‘ꦄꦴꦱꦮꦴꦤꦁ ꦑꦪꦴ ꦱꦩꦟꦺꦴ ꦲꦺꦴꦠꦷ’ꦠꦶ.

‘‘ꦄꦥꦶ ꦕ, ꦩꦲꦴꦫꦴꦗ, ꦪꦺ ꦏꦺꦕꦶ ꦏꦶꦭꦺꦱꦹꦥꦱꦩꦴꦪ ꦥꦛꦶꦥꦤ꧀ꦤꦴ, ꦠꦺ ꦱꦧ꧀ꦧꦺ ꦈꦥꦴꦢꦴꦪꦸꦥꦴꦢꦴꦪ ꦱꦩꦟꦺꦴ ꦑꦷꦟꦴꦱꦮꦺꦴ ꦄꦒ꧀ꦒꦩꦏ꧀ꦑꦴꦪꦠꦶ. ꦪꦡꦴ, ꦩꦲꦴꦫꦴꦗ, ꦪꦴꦤꦶ ꦏꦴꦤꦶꦕꦶ ꦗꦭꦗꦡꦭꦗꦥꦸꦥ꧀ꦦꦴꦤꦶ, ꦮꦱ꧀ꦱꦶꦏꦁ ꦠꦺꦱꦁ ꦄꦒ꧀ꦒꦩꦏ꧀ꦑꦴꦪꦠꦶ, ꦄꦮꦱꦺꦱꦴꦤꦶ ꦪꦴꦤꦶ ꦏꦴꦤꦶꦕꦶ ꦮꦶꦮꦶꦣꦴꦤꦶ ꦥꦸꦥ꧀ꦦꦗꦴꦠꦴꦤꦶ, ꦱꦧ꧀ꦧꦴꦤꦶ ꦠꦴꦤꦶ ꦥꦸꦥ꧀ꦦꦴꦤꦶ ꦪꦺꦮ, ꦈꦥꦴꦢꦴꦪꦸꦥꦴꦢꦴꦪ ꦥꦤ ꦮꦱ꧀ꦱꦶꦏꦁ ꦪꦺꦮ ꦥꦸꦥ꧀ꦦꦁ ꦗꦤꦱ꧀ꦱ ꦥꦠ꧀ꦡꦶꦠꦁ ꦥꦶꦲꦪꦶꦠꦁ. ꦌꦮꦩꦺꦮ ꦑꦺꦴ, ꦩꦲꦴꦫꦴꦗ, ꦪꦺ ꦏꦺꦕꦶ ꦏꦶꦭꦺꦱꦹꦥꦱꦩꦴꦪ ꦥꦛꦶꦥꦤ꧀ꦤꦴ, ꦠꦺ ꦱꦧ꧀ꦧꦺ ꦈꦥꦴꦢꦴꦪꦸꦥꦴꦢꦴꦪ ꦱꦩꦟꦺꦴ ꦑꦷꦟꦴꦱꦮꦺꦴ ꦄꦒ꧀ꦒꦩꦏ꧀ꦑꦴꦪꦠꦶ.

‘‘ꦪꦡꦴ ꦮꦴ ꦥꦤ, ꦩꦲꦴꦫꦴꦗ, ꦱꦧ꧀ꦧꦣꦚ꧀ꦚꦴꦤꦁ ꦱꦴꦭꦶ ꦄꦒ꧀ꦒꦩꦏ꧀ꦑꦴꦪꦠꦶ, ꦪꦴ ꦏꦴꦕꦶ ꦄꦮꦱꦺꦱꦴ ꦮꦶꦮꦶꦣꦴ ꦣꦚ꧀ꦚꦗꦴꦠꦶꦪꦺꦴ, ꦠꦴ ꦱꦧ꧀ꦧꦴ ꦈꦥꦴꦢꦴꦪꦸꦥꦴꦢꦴꦪ ꦨꦺꦴꦗꦤꦴꦤꦶ ꦱꦫꦷꦫꦪꦴꦥꦤꦴꦪ, ꦱꦴꦭꦶ ꦪꦺꦮ ꦠꦺꦱꦁ ꦄꦒ꧀ꦒꦩꦏ꧀ꦑꦴꦪꦠꦶ. ꦌꦮꦩꦺꦮ ꦑꦺꦴ, ꦩꦲꦴꦫꦴꦗ, ꦪꦺ ꦏꦺꦕꦶ ꦏꦶꦭꦺꦱꦹꦥꦱꦩꦴꦪ ꦥꦛꦶꦥꦤ꧀ꦤꦴ, ꦠꦺ ꦱꦧ꧀ꦧꦺ ꦈꦥꦴꦢꦴꦪꦸꦥꦴꦢꦴꦪ ꦱꦩꦟꦺꦴ ꦑꦷꦟꦴꦱꦮꦺꦴ ꦄꦒ꧀ꦒꦩꦏ꧀ꦑꦴꦪꦠꦷ’’ꦠꦶ. ‘‘ꦱꦴꦣꦸ, ꦨꦤ꧀ꦠꦺ ꦤꦴꦒꦱꦺꦤ, ꦌꦮꦩꦺꦠꦁ ꦠꦡꦴ ꦱꦩ꧀ꦥꦛꦶꦕ꧀ꦖꦴꦩꦷ’’ꦠꦶ.

ꦄꦒ꧀ꦒꦒ꧀ꦒꦱꦩꦟꦥꦚ꧀ꦲꦺꦴ ꦤꦮꦩꦺꦴ.