꧔. ꦏꦩ꧀ꦩꦤꦴꦤꦴꦏꦫꦟꦥꦚ꧀ꦲꦺꦴ

꧔. ꦫꦴꦗꦴ ꦄꦴꦲ ‘‘ꦨꦤ꧀ꦠꦺ ꦤꦴꦒꦱꦺꦤ, ꦏꦺꦤ ꦏꦴꦫꦟꦺꦤ ꦩꦤꦸꦱ꧀ꦱꦴ ꦤ ꦱꦧ꧀ꦧꦺ ꦱꦩꦏꦴ, ꦄꦚ꧀ꦚꦺ ꦄꦥ꧀ꦥꦴꦪꦸꦏꦴ, ꦄꦚ꧀ꦚꦺ ꦢꦷꦓꦴꦪꦸꦏꦴ, ꦄꦚ꧀ꦚꦺ ꦧꦲ꧀ꦮꦴꦧꦴꦣꦴ ꦄꦚ꧀ꦚꦺ ꦄꦥ꧀ꦥꦴꦧꦴꦣꦴ, ꦄꦚ꧀ꦚꦺ ꦢꦸꦧ꧀ꦧꦟ꧀ꦟꦴ, ꦄꦚ꧀ꦚꦺ ꦮꦟ꧀ꦟꦮꦤ꧀ꦠꦺꦴ, ꦄꦚ꧀ꦚꦺ ꦄꦥ꧀ꦥꦺꦱꦏ꧀ꦑꦴ, ꦄꦚ꧀ꦚꦺ ꦩꦲꦺꦱꦏ꧀ꦑꦴ, ꦄꦚ꧀ꦚꦺ ꦄꦥ꧀ꦥꦨꦺꦴꦒꦴ, ꦄꦚ꧀ꦚꦺ ꦩꦲꦴꦨꦺꦴꦒꦴ, ꦄꦚ꧀ꦚꦺ ꦤꦷꦕꦏꦸꦭꦷꦤꦴ, ꦄꦚ꧀ꦚꦺ ꦩꦲꦴꦏꦸꦭꦷꦤꦴ, ꦄꦚ꧀ꦚꦺ ꦢꦸꦥ꧀ꦥꦚ꧀ꦚꦴ, ꦄꦚ꧀ꦚꦺ ꦥꦚ꧀ꦚꦮꦤ꧀ꦠꦺꦴ’’ꦠꦶ?

ꦡꦺꦫꦺꦴ ꦄꦴꦲ ‘‘ꦏꦶꦱ꧀ꦱ ꦥꦤ, ꦩꦲꦴꦫꦴꦗ, ꦫꦸꦏ꧀ꦑꦴ ꦤ ꦱꦧ꧀ꦧꦺ ꦱꦩꦏꦴ, ꦄꦚ꧀ꦚꦺ ꦄꦩ꧀ꦧꦶꦭꦴ, ꦄꦚ꧀ꦚꦺ ꦭꦮꦟꦴ, ꦄꦚ꧀ꦚꦺ ꦠꦶꦠ꧀ꦠꦏꦴ, ꦄꦚ꧀ꦚꦺ ꦏꦛꦸꦏꦴ, ꦄꦚ꧀ꦚꦺ ꦏꦱꦴꦮꦴ, ꦄꦚ꧀ꦚꦺ ꦩꦣꦸꦫꦴ’’ꦠꦶ? ‘‘ꦩꦚ꧀ꦚꦴꦩꦶ, ꦨꦤ꧀ꦠꦺ, ꦧꦷꦗꦴꦤꦁ ꦤꦴꦤꦴꦏꦫꦟꦺꦤꦴ’’ꦠꦶ. ‘‘ꦌꦮꦩꦺꦮ ꦑꦺꦴ, ꦩꦲꦴꦫꦴꦗ, ꦏꦩ꧀ꦩꦴꦤꦁ ꦤꦴꦤꦴꦏꦫꦟꦺꦤ ꦩꦤꦸꦱ꧀ꦱꦴ ꦤ ꦱꦧ꧀ꦧꦺ ꦱꦩꦏꦴ, ꦄꦚ꧀ꦚꦺ ꦄꦥ꧀ꦥꦴꦪꦸꦏꦴ, ꦄꦚ꧀ꦚꦺ ꦢꦷꦓꦴꦪꦸꦏꦴ, ꦄꦚ꧀ꦚꦺ ꦧꦲ꧀ꦮꦴꦧꦴꦣꦴ, ꦄꦚ꧀ꦚꦺ ꦄꦥ꧀ꦥꦴꦧꦴꦣꦴ, ꦄꦚ꧀ꦚꦺ ꦢꦸꦧ꧀ꦧꦟ꧀ꦟꦴ, ꦄꦚ꧀ꦚꦺ ꦮꦟ꧀ꦟꦮꦤ꧀ꦠꦺꦴ, ꦄꦚ꧀ꦚꦺ ꦄꦥ꧀ꦥꦺꦱꦏ꧀ꦑꦴ, ꦄꦚ꧀ꦚꦺ ꦩꦲꦺꦱꦏ꧀ꦑꦴ, ꦄꦚ꧀ꦚꦺ ꦄꦥ꧀ꦥꦨꦺꦴꦒꦴ, ꦄꦚ꧀ꦚꦺ ꦩꦲꦴꦨꦺꦴꦒꦴ, ꦄꦚ꧀ꦚꦺ ꦤꦷꦕꦏꦸꦭꦷꦤꦴ, ꦄꦚ꧀ꦚꦺ ꦩꦲꦴꦏꦸꦭꦷꦤꦴ, ꦄꦚ꧀ꦚꦺ ꦢꦸꦥ꧀ꦥꦚ꧀ꦚꦴ, ꦄꦚ꧀ꦚꦺ ꦥꦚ꧀ꦚꦮꦤ꧀ꦠꦺꦴ. ꦨꦴꦱꦶꦠꦩ꧀ꦥꦺꦠꦁ ꦩꦲꦴꦫꦴꦗ ꦨꦒꦮꦠꦴ – ‘ꦏꦩ꧀ꦩꦱ꧀ꦱꦏꦴ, ꦩꦴꦟꦮ, ꦱꦠ꧀ꦠꦴ ꦏꦩ꧀ꦩꦢꦴꦪꦴꦢꦴ ꦏꦩ꧀ꦩꦪꦺꦴꦤꦷ ꦏꦩ꧀ꦩꦧꦤ꧀ꦣꦹ ꦏꦩ꧀ꦩꦥ꧀ꦥꦛꦶꦱꦫꦟꦴ, ꦏꦩ꧀ꦩꦁ ꦱꦠ꧀ꦠꦺ ꦮꦶꦨꦗꦠꦶ ꦪꦢꦶꦢꦁ ꦲꦷꦤꦥ꧀ꦥꦟꦷꦠꦠꦴꦪꦴ’’’ꦠꦶ.

‘‘ꦏꦭ꧀ꦭꦺꦴꦱꦶ, ꦨꦤ꧀ꦠꦺ ꦤꦴꦒꦱꦺꦤꦴ’’ꦠꦶ.

ꦏꦩ꧀ꦩꦤꦴꦤꦴꦏꦫꦟꦥꦚ꧀ꦲꦺꦴ ꦕꦠꦸꦠ꧀ꦡꦺꦴ.