꧑. ꦦꦱ꧀ꦱꦴꦢꦶꦮꦶꦤꦶꦧ꧀ꦨꦸꦗꦤꦥꦚ꧀ꦲꦺꦴ

꧑. ꦫꦴꦗꦴ ꦄꦴꦲ ‘‘ꦨꦤ꧀ꦠꦺ ꦤꦴꦒꦱꦺꦤ, ꦱꦏ꧀ꦏꦴ ꦆꦩꦺꦱꦁ ꦣꦩ꧀ꦩꦴꦤꦁ ꦌꦏꦠꦺꦴꦨꦴꦮꦒꦠꦴꦤꦁ ꦮꦶꦤꦶꦧ꧀ꦨꦸꦗꦶꦠ꧀ꦮꦴ ꦮꦶꦤꦶꦧ꧀ꦨꦸꦗꦶꦠ꧀ꦮꦴ ꦤꦴꦤꦴꦏꦫꦟꦁ ꦥꦚ꧀ꦚꦴꦥꦺꦠꦸꦁ ‘ꦄꦪꦁ ꦦꦱ꧀ꦱꦺꦴ, ꦄꦪꦁ ꦮꦺꦢꦤꦴ, ꦄꦪꦁ ꦱꦚ꧀ꦚꦴ, ꦄꦪꦁ ꦕꦺꦠꦤꦴ, ꦆꦢꦁ ꦮꦶꦚ꧀ꦚꦴꦟꦁ, ꦄꦪꦁ ꦮꦶꦠꦏ꧀ꦏꦺꦴ, ꦄꦪꦁ ꦮꦶꦕꦴꦫꦺꦴ’ꦠꦶ’’? ‘‘ꦤ ꦱꦏ꧀ꦏꦴ, ꦩꦲꦴꦫꦴꦗ, ꦆꦩꦺꦱꦁ ꦣꦩ꧀ꦩꦴꦤꦁ ꦌꦏꦠꦺꦴꦨꦴꦮꦒꦠꦴꦤꦁ ꦮꦶꦤꦶꦧ꧀ꦨꦸꦗꦶꦠ꧀ꦮꦴ ꦮꦶꦤꦶꦧ꧀ꦨꦸꦗꦶꦠ꧀ꦮꦴ ꦤꦴꦤꦴꦏꦫꦟꦁ ꦥꦚ꧀ꦚꦴꦥꦺꦠꦸꦁ ‘ꦄꦪꦁ ꦦꦱ꧀ꦱꦺꦴ, ꦄꦪꦁ ꦮꦺꦢꦤꦴ, ꦄꦪꦁ ꦱꦚ꧀ꦚꦴ, ꦄꦪꦁ ꦕꦺꦠꦤꦴ, ꦆꦢꦁ ꦮꦶꦚ꧀ꦚꦴꦟꦁ, ꦄꦪꦁ ꦮꦶꦠꦏ꧀ꦏꦺꦴ, ꦄꦪꦁ ꦮꦶꦕꦴꦫꦺꦴ’’’ꦠꦶ.

‘‘ꦎꦥꦩ꧀ꦩꦁ ꦏꦫꦺꦴꦲꦷ’’ꦠꦶ. ‘‘ꦪꦡꦴ, ꦩꦲꦴꦫꦴꦗ, ꦫꦚ꧀ꦚꦺꦴ ꦱꦹꦢꦺꦴ ꦄꦫꦱꦁ ꦮꦴ ꦫꦱꦁ ꦮꦴ [ꦪꦹꦱꦁ ꦮꦴ ꦫꦱꦁ ꦮꦴ (ꦱꦷ. ꦱ꧀ꦪꦴ. ꦥꦷ.)] ꦏꦫꦺꦪ꧀ꦪ, ꦱꦺꦴ ꦠꦠ꧀ꦡ ꦢꦣꦶꦩ꧀ꦥꦶ ꦥꦏ꧀ꦑꦶꦥꦺꦪ꧀ꦪ, ꦭꦺꦴꦟꦩ꧀ꦥꦶ ꦥꦏ꧀ꦑꦶꦥꦺꦪ꧀ꦪ, ꦱꦶꦔ꧀ꦒꦶꦮꦺꦫꦩ꧀ꦥꦶ ꦥꦏ꧀ꦑꦶꦥꦺꦪ꧀ꦪ, ꦗꦷꦫꦏꦩ꧀ꦥꦶ ꦥꦏ꧀ꦑꦶꦥꦺꦪ꧀ꦪ, ꦩꦫꦶꦕꦩ꧀ꦥꦶ ꦥꦏ꧀ꦑꦶꦥꦺꦪ꧀ꦪ, ꦄꦚ꧀ꦚꦴꦤꦶꦥꦶ ꦥꦏꦴꦫꦴꦤꦶ ꦥꦏ꧀ꦑꦶꦥꦺꦪ꧀ꦪ, ꦠꦩꦺꦤꦁ ꦫꦴꦗꦴ ꦌꦮꦁ ꦮꦢꦺꦪ꧀ꦪ, ‘ꦢꦣꦶꦱ꧀ꦱ ꦩꦺ ꦫꦱꦁ ꦄꦴꦲꦫ, ꦭꦺꦴꦟꦱ꧀ꦱ ꦩꦺ ꦫꦱꦁ ꦄꦴꦲꦫ, ꦱꦶꦔ꧀ꦒꦶꦮꦺꦫꦱ꧀ꦱ ꦩꦺ ꦫꦱꦁ ꦄꦴꦲꦫ, ꦗꦷꦫꦏꦱ꧀ꦱ ꦩꦺ ꦫꦱꦁ ꦄꦴꦲꦫ, ꦩꦫꦶꦕꦱ꧀ꦱ ꦩꦺ ꦫꦱꦁ ꦄꦴꦲꦫ, ꦱꦧ꧀ꦧꦺꦱꦁ ꦩꦺ ꦥꦏ꧀ꦑꦶꦠ꧀ꦠꦴꦤꦁ ꦫꦱꦁ ꦄꦴꦲꦫꦴ’ꦠꦶ. ꦱꦏ꧀ꦏꦴ ꦤꦸ ꦑꦺꦴ, ꦩꦲꦴꦫꦴꦗ, ꦠꦺꦱꦁ ꦫꦱꦴꦤꦁ ꦌꦏꦠꦺꦴꦨꦴꦮꦒꦠꦴꦤꦁ ꦮꦶꦤꦶꦧ꧀ꦨꦸꦗꦶꦠ꧀ꦮꦴ ꦮꦶꦤꦶꦧ꧀ꦨꦸꦗꦶꦠ꧀ꦮꦴ ꦫꦱꦁ ꦄꦴꦲꦫꦶꦠꦸꦁ ꦄꦩ꧀ꦧꦶꦭꦠ꧀ꦠꦁ ꦮꦴ ꦭꦮꦟꦠ꧀ꦠꦁ ꦮꦴ ꦠꦶꦠ꧀ꦠꦏꦠ꧀ꦠꦁ ꦮꦴ ꦏꦛꦸꦏꦠ꧀ꦠꦁ ꦮꦴ ꦏꦱꦴꦪꦠ꧀ꦠꦁ ꦮꦴ ꦩꦣꦸꦫꦠ꧀ꦠꦁ ꦮꦴ’’ꦠꦶ? ‘‘ꦤ ꦲꦶ, ꦨꦤ꧀ꦠꦺ, ꦱꦏ꧀ꦏꦴ ꦠꦺꦱꦁ ꦫꦱꦴꦤꦁ ꦌꦏꦠꦺꦴꦨꦴꦮꦒꦠꦴꦤꦁ ꦮꦶꦤꦶꦧ꧀ꦨꦸꦗꦶꦠ꧀ꦮꦴ ꦮꦶꦤꦶꦧ꧀ꦨꦸꦗꦶꦠ꧀ꦮꦴ ꦫꦱꦁ ꦄꦴꦲꦫꦶꦠꦸꦁ ꦄꦩ꧀ꦧꦶꦭꦠ꧀ꦠꦁ ꦮꦴ ꦭꦮꦟꦠ꧀ꦠꦁ ꦮꦴ ꦠꦶꦠ꧀ꦠꦏꦠ꧀ꦠꦁ ꦮꦴ ꦏꦛꦸꦏꦠ꧀ꦠꦁ ꦮꦴ ꦏꦱꦴꦪꦠ꧀ꦠꦁ ꦮꦴ ꦩꦣꦸꦫꦠ꧀ꦠꦁ ꦮꦴ, ꦄꦥꦶ ꦕ ꦑꦺꦴ ꦥꦤ ꦱꦏꦺꦤ ꦱꦏꦺꦤ ꦭꦏ꧀ꦑꦟꦺꦤ ꦈꦥꦛ꧀ꦜꦲꦤ꧀ꦠꦷ’’ꦠꦶ. ‘‘ꦌꦮꦩꦺꦮ ꦑꦺꦴ, ꦩꦲꦴꦫꦴꦗ, ꦤ ꦱꦏ꧀ꦏꦴ ꦆꦩꦺꦱꦁ ꦣꦩ꧀ꦩꦴꦤꦁ ꦌꦏꦠꦺꦴꦨꦴꦮꦒꦠꦴꦤꦁ ꦮꦶꦤꦶꦧ꧀ꦨꦸꦗꦶꦠ꧀ꦮꦴ ꦮꦶꦤꦶꦧ꧀ꦨꦸꦗꦶꦠ꧀ꦮꦴ ꦤꦴꦤꦴꦏꦫꦟꦁ ꦥꦚ꧀ꦚꦴꦥꦺꦠꦸꦁ ‘ꦄꦪꦁ ꦦꦱ꧀ꦱꦺꦴ, ꦄꦪꦁ ꦮꦺꦢꦤꦴ, ꦄꦪꦁ ꦱꦚ꧀ꦚꦴ, ꦄꦪꦁ ꦕꦺꦠꦤꦴ, ꦆꦢꦁ ꦮꦶꦚ꧀ꦚꦴꦟꦁ, ꦄꦪꦁ ꦮꦶꦠꦏ꧀ꦏꦺꦴ, ꦄꦪꦁ ꦮꦶꦕꦴꦫꦺꦴ’ꦠꦶ, ꦄꦥꦶ ꦕ ꦑꦺꦴ ꦥꦤ ꦱꦏꦺꦤ ꦱꦏꦺꦤ ꦭꦏ꧀ꦑꦟꦺꦤ ꦈꦥꦛ꧀ꦜꦲꦤ꧀ꦠꦷ’’ꦠꦶ.

‘‘ꦏꦭ꧀ꦭꦺꦴꦱꦶ, ꦨꦤ꧀ꦠꦺ ꦤꦴꦒꦱꦺꦤꦴ’’ꦠꦶ.

ꦦꦱ꧀ꦱꦴꦢꦶꦮꦶꦤꦶꦧ꧀ꦨꦸꦗꦤꦥꦚ꧀ꦲꦺꦴ ꦥꦜꦩꦺꦴ.