꧑꧒. ꦮꦷꦫꦶꦪꦭꦏ꧀ꦑꦟꦥꦚ꧀ꦲꦺꦴ

꧑꧒. ꦫꦴꦗꦴ ꦄꦴꦲ ‘‘ꦨꦤ꧀ꦠꦺ ꦤꦴꦒꦱꦺꦤ, ꦏꦶꦁꦭꦏ꧀ꦑꦟꦁ ꦮꦷꦫꦶꦪ’’ꦤ꧀ꦠꦶ? ‘‘ꦈꦥꦠ꧀ꦡꦩ꧀ꦨꦤꦭꦏ꧀ꦑꦟꦁ, ꦩꦲꦴꦫꦴꦗ, ꦮꦷꦫꦶꦪꦁ, ꦮꦷꦫꦶꦪꦹꦥꦠ꧀ꦡꦩ꧀ꦨꦶꦠꦴ ꦱꦧ꧀ꦧꦺ ꦏꦸꦱꦭꦴ ꦣꦩ꧀ꦩꦴ ꦤ ꦥꦫꦶꦲꦴꦪꦤ꧀ꦠꦷ’’ꦠꦶ.

‘‘ꦎꦥꦩ꧀ꦩꦁ ꦏꦫꦺꦴꦲꦷ’’ꦠꦶ. ‘‘ꦪꦡꦴ, ꦩꦲꦴꦫꦴꦗ, ꦥꦸꦫꦶꦱꦺꦴ ꦒꦺꦲꦺ ꦥꦠꦤ꧀ꦠꦺ ꦄꦚ꧀ꦚꦺꦤ ꦢꦴꦫꦸꦤꦴ ꦈꦥꦠ꧀ꦡꦩ꧀ꦨꦺꦪ꧀ꦪ, ꦈꦥꦠ꧀ꦡꦩ꧀ꦨꦶꦠꦁ ꦱꦤ꧀ꦠꦁ ꦌꦮꦁ ꦠꦁ ꦒꦺꦲꦁ ꦤ ꦥꦠꦺꦪ꧀ꦪ. ꦌꦮꦩꦺꦮ ꦑꦺꦴ, ꦩꦲꦴꦫꦴꦗ, ꦈꦥꦠ꧀ꦡꦩ꧀ꦨꦤꦭꦏ꧀ꦑꦟꦁ ꦮꦷꦫꦶꦪꦁ, ꦮꦷꦫꦶꦪꦹꦥꦠ꧀ꦡꦩ꧀ꦨꦶꦠꦴ ꦱꦧ꧀ꦧꦺ ꦏꦸꦱꦭꦴ ꦣꦩ꧀ꦩꦴ ꦤ ꦥꦫꦶꦲꦴꦪꦤ꧀ꦠꦷ’’ꦠꦶ.

‘‘ꦨꦶꦪ꧀ꦪꦺꦴ ꦎꦥꦩ꧀ꦩꦁ ꦏꦫꦺꦴꦲꦷ’’ꦠꦶ. ‘‘ꦪꦡꦴ, ꦩꦲꦴꦫꦴꦗ, ꦥꦫꦶꦠ꧀ꦠꦏꦁ ꦱꦺꦤꦁ ꦩꦲꦠꦷ ꦱꦺꦤꦴ ꦨꦚ꧀ꦗꦺꦪ꧀ꦪ, ꦠꦠꦺꦴ ꦫꦴꦗꦴ ꦄꦚ꧀ꦚꦩꦚ꧀ꦚꦁ ꦄꦤꦸꦱ꧀ꦱꦴꦫꦺꦪ꧀ꦪ ꦄꦤꦸꦥꦺꦱꦺꦪ꧀ꦪ ꦄꦠ꧀ꦠꦤꦺꦴ ꦥꦫꦶꦠ꧀ꦠꦏꦴꦪ ꦱꦺꦤꦴꦪ ꦧꦭꦁ ꦄꦤꦸꦥꦢꦁ ꦢꦢꦺꦪ꧀ꦪ, ꦠꦴꦪ ꦱꦢ꧀ꦣꦶꦁ ꦥꦫꦶꦠ꧀ꦠꦏꦴ ꦱꦺꦤꦴ ꦩꦲꦠꦶꦁ ꦱꦺꦤꦁ ꦨꦚ꧀ꦗꦺꦪ꧀ꦪ. ꦌꦮꦩꦺꦮ ꦑꦺꦴ, ꦩꦲꦴꦫꦴꦗ, ꦈꦥꦠ꧀ꦡꦩ꧀ꦨꦤꦭꦏ꧀ꦑꦟꦁ ꦮꦷꦫꦶꦪꦁ, ꦮꦷꦫꦶꦪꦹꦥꦠ꧀ꦡꦩ꧀ꦨꦶꦠꦴ ꦱꦧ꧀ꦧꦺ ꦏꦸꦱꦭꦴ ꦣꦩ꧀ꦩꦴ ꦤ ꦥꦫꦶꦲꦴꦪꦤ꧀ꦠꦶ. ꦨꦴꦱꦶꦠꦩ꧀ꦥꦺꦠꦁ, ꦩꦲꦴꦫꦴꦗ, ꦨꦒꦮꦠꦴ – ‘ꦮꦷꦫꦶꦪꦮꦴ ꦑꦺꦴ, ꦨꦶꦏ꧀ꦑꦮꦺ, ꦄꦫꦶꦪꦱꦴꦮꦏꦺꦴ ꦄꦏꦸꦱꦭꦁ ꦥꦗꦲꦠꦶ, ꦏꦸꦱꦭꦁ ꦨꦴꦮꦺꦠꦶ. ꦱꦴꦮꦗ꧀ꦗꦁ ꦥꦗꦲꦠꦶ, ꦄꦤꦮꦗ꧀ꦗꦁ ꦨꦴꦮꦺꦠꦶ. ꦱꦸꦢ꧀ꦣꦩꦠ꧀ꦠꦴꦤꦁ ꦥꦫꦶꦲꦫꦠꦷ’’’ꦠꦶ.

‘‘ꦏꦭ꧀ꦭꦺꦴꦱꦶ, ꦨꦤ꧀ꦠꦺ ꦤꦴꦒꦱꦺꦤꦴ’’ꦠꦶ.

ꦮꦷꦫꦶꦪꦭꦏ꧀ꦑꦟꦥꦚ꧀ꦲꦺꦴ ꦢ꧀ꦮꦴꦢꦱꦩꦺꦴ.