꧕꧐꧘. ꦥꦚ꧀ꦕꦥꦟ꧀ꦝꦶꦠꦗꦴꦠꦏꦁ (꧑꧒)

꧓꧑꧕. ꦥꦚ꧀ꦕ ꦥꦟ꧀ꦝꦶꦠꦴ ꦱꦩꦴꦒꦠꦴꦠ꧀ꦡ, ꦥꦚ꧀ꦲꦴ ꦩꦺ ꦥꦛꦶꦨꦴꦠꦶ ꦠꦁ ꦱꦸꦟꦴꦡ;

ꦤꦶꦤ꧀ꦢꦶꦪꦩꦠ꧀ꦡꦁ ꦥꦱꦁꦱꦶꦪꦁ ꦮꦴ, ꦏꦱ꧀ꦱꦺꦮꦴꦮꦶꦏꦫꦺꦪ꧀ꦪ [ꦏꦱ꧀ꦱ ꦮꦴꦮꦷꦏꦫꦺꦪ꧀ꦪ (ꦏ.)] ꦒꦸꦪ꧀ꦲꦩꦠ꧀ꦡꦁ.

꧓꧑꧖. ꦠ꧀ꦮꦁ ꦄꦴꦮꦶꦏꦫꦺꦴꦲꦶ ꦨꦹꦩꦶꦥꦴꦭ, ꦨꦠ꧀ꦠꦴ ꦨꦴꦫꦱꦲꦺꦴ ꦠꦸꦮꦁ ꦮꦢꦺ ꦠꦁ;

ꦠꦮ ꦖꦤ꧀ꦢꦫꦸꦕꦷꦤꦶ [ꦖꦤ꧀ꦢꦚ꧀ꦕ ꦫꦸꦕꦶꦚ꧀ꦕ (ꦱꦷ. ꦥꦷ.)] ꦱꦩ꧀ꦩꦱꦶꦠ꧀ꦮꦴ, ꦄꦡ ꦮꦏ꧀ꦑꦤ꧀ꦠꦶ ꦗꦤꦶꦤ꧀ꦢ ꦥꦚ꧀ꦕ ꦣꦷꦫꦴ.

꧓꧑꧗. ꦪꦴ ꦱꦷꦭꦮꦠꦷ ꦄꦤꦚ꧀ꦚꦡꦺꦪ꧀ꦪꦴ [ꦄꦤꦚ꧀ꦚꦣꦺꦪ꧀ꦪꦴ (ꦱꦷ. ꦥꦷ.)], ꦨꦠ꧀ꦠꦸꦕ꧀ꦖꦤ꧀ꦢꦮꦱꦴꦤꦸꦒꦴ (ꦥꦶꦪꦴ) [( ) ꦤꦠ꧀ꦡꦶ ꦱꦷ. ꦥꦷ. ꦥꦺꦴꦠ꧀ꦡꦏꦺꦱꦸ] ꦩꦤꦴꦥꦴ;

ꦤꦶꦤ꧀ꦢꦶꦪꦩꦠ꧀ꦡꦁ ꦥꦱꦁꦱꦶꦪꦁ ꦮꦴ, ꦨꦫꦶꦪꦴꦪꦴꦮꦶꦏꦫꦺꦪ꧀ꦪ [ꦨꦫꦶꦪꦴꦪ ꦮꦴꦮꦷꦏꦫꦺꦪ꧀ꦪ (ꦏ.)] ꦒꦸꦪ꧀ꦲꦩꦠ꧀ꦡꦁ.

꧓꧑꧘. ꦪꦺꦴ ꦏꦶꦕ꧀ꦖꦒꦠꦱ꧀ꦱ ꦄꦴꦠꦸꦫꦱ꧀ꦱ, ꦱꦫꦟꦁ ꦲꦺꦴꦠꦶ ꦒꦠꦷ ꦥꦫꦴꦪꦤꦚ꧀ꦕ;

ꦤꦶꦤ꧀ꦢꦶꦪꦩꦠ꧀ꦡꦁ ꦥꦱꦁꦱꦶꦪꦁ ꦮꦴ, ꦱꦑꦶꦤꦺꦴ ꦮꦴꦮꦶꦏꦫꦺꦪ꧀ꦪ ꦒꦸꦪ꧀ꦲꦩꦠ꧀ꦡꦁ.

꧓꧑꧙. ꦗꦺꦛ꧀ꦜꦺꦴ [ꦪꦺꦴ ꦗꦺꦛ꧀ꦜꦺꦴ (ꦱ꧀ꦪꦴ.)] ꦄꦡ ꦩꦗ꧀ꦙꦶꦩꦺꦴ ꦏꦤꦶꦛ꧀ꦜꦺꦴ, ꦪꦺꦴ [ꦱꦺꦴ (ꦱꦷ. ꦱ꧀ꦪꦴ. ꦥꦷ.)] ꦕꦺ ꦱꦷꦭꦱꦩꦴꦲꦶꦠꦺꦴ ꦜꦶꦠꦠ꧀ꦠꦺꦴ;

ꦤꦶꦤ꧀ꦢꦶꦪꦩꦠ꧀ꦡꦁ ꦥꦱꦁꦱꦶꦪꦁ ꦮꦴ, ꦨꦴꦠꦸ ꦮꦴꦮꦷꦏꦫꦺꦪ꧀ꦪ ꦒꦸꦪ꧀ꦲꦩꦠ꧀ꦡꦁ.

꧓꧒꧐. ꦪꦺꦴ ꦮꦺ ꦥꦶꦠꦸꦲꦢꦪꦱ꧀ꦱ ꦥꦢ꧀ꦣꦒꦹ [ꦥꦠ꧀ꦡꦒꦹ (ꦱ꧀ꦪꦴ.), ꦥꦠ꧀ꦠꦒꦹ (ꦏ.)], ꦄꦤꦸꦗꦴꦠꦺꦴ ꦥꦶꦠꦫꦁ ꦄꦤꦺꦴꦩꦥꦚ꧀ꦚꦺꦴ;

ꦤꦶꦤ꧀ꦢꦶꦪꦩꦠ꧀ꦡꦁ ꦥꦱꦁꦱꦶꦪꦁ ꦮꦴ, ꦥꦸꦠ꧀ꦠꦱ꧀ꦱꦴꦮꦶꦏꦫꦺꦪ꧀ꦪ [ꦥꦸꦠ꧀ꦠꦱ꧀ꦱ ꦮꦴꦮꦷꦏꦫꦺꦪ꧀ꦪ (ꦏ.)] ꦒꦸꦪ꧀ꦲꦩꦠ꧀ꦡꦁ.

꧓꧒꧑. ꦩꦴꦠꦴ ꦢ꧀ꦮꦶꦥꦢꦴꦗꦤꦶꦤ꧀ꦢꦱꦺꦛ꧀ꦜ, ꦪꦴ ꦤꦁ [ꦪꦺꦴ ꦠꦁ (ꦱꦷ. ꦥꦷ.)] ꦥꦺꦴꦱꦺꦠꦶ ꦖꦤ꧀ꦢꦱꦴ ꦥꦶꦪꦺꦤ;

ꦤꦶꦤ꧀ꦢꦶꦪꦩꦠ꧀ꦡꦁ ꦥꦱꦁꦱꦶꦪꦁ ꦮꦴ, ꦩꦴꦠꦸꦪꦴꦮꦷꦏꦫꦺꦪ꧀ꦪ [ꦩꦴꦠꦸꦪꦴ ꦮꦴꦮꦷꦏꦫꦺꦪ꧀ꦪ (ꦏ.)] ꦒꦸꦪ꧀ꦲꦩꦠ꧀ꦡꦁ.

꧓꧒꧒. ꦒꦸꦪ꧀ꦲꦱ꧀ꦱ ꦲꦶ ꦒꦸꦪ꧀ꦲꦩꦺꦮ ꦱꦴꦣꦸ, ꦤ ꦲꦶ ꦒꦸꦪ꧀ꦲꦱ꧀ꦱ ꦥꦱꦠ꧀ꦡꦩꦴꦮꦶꦏꦩ꧀ꦩꦁ;

ꦄꦤꦶꦥ꧀ꦦꦤ꧀ꦤꦠꦴ [ꦄꦤꦶꦥ꧀ꦦꦴꦢꦴꦪ (ꦱꦷ. ꦥꦷ.), ꦄꦤꦶꦥ꧀ꦦꦤ꧀ꦤꦠꦴꦪ (ꦱ꧀ꦪꦴ.), ꦄꦴ ꦤꦶꦥ꧀ꦦꦴꦢꦴ (?)] ꦱꦲꦺꦪ꧀ꦪ ꦣꦷꦫꦺꦴ, ꦤꦶꦥ꧀ꦦꦤ꧀ꦤꦺꦴꦮ [ꦤꦶꦥ꧀ꦦꦤ꧀ꦤꦠ꧀ꦡꦺꦴ (ꦱꦷ. ꦥꦷ.), ꦤꦶꦥ꧀ꦦꦤ꧀ꦤꦠ꧀ꦡꦺꦴꦮ (ꦱ꧀ꦪꦴ.)] ꦪꦡꦴꦱꦸꦑꦁ ꦨꦟꦺꦪ꧀ꦪ.

꧓꧒꧓. ꦏꦶꦁ ꦠ꧀ꦮꦁ ꦮꦶꦩꦤꦺꦴꦱꦶ ꦫꦴꦗꦱꦺꦛ꧀ꦜ, ꦢ꧀ꦮꦶꦥꦢꦗꦤꦶꦤ꧀ꦢ [ꦢꦶꦥꦢꦶꦤ꧀ꦢ (ꦱꦷ. ꦱ꧀ꦪꦴ. ꦥꦷ.)] ꦮꦕꦤꦁ ꦱꦸꦟꦺꦴꦩ ꦩꦺꦠꦁ [ꦤꦺꦠꦁ (ꦱꦷ. ꦥꦷ.), ꦠꦺꦠꦁ (ꦱ꧀ꦪꦴ.)];

ꦏꦶꦁ ꦕꦶꦤ꧀ꦠꦪꦩꦴꦤꦺꦴ ꦢꦸꦩ꧀ꦩꦤꦺꦴꦱꦶ, ꦤꦹꦤ ꦢꦺꦮ ꦄꦥꦫꦴꦣꦺꦴ ꦄꦠ꧀ꦡꦶ ꦩꦪ꧀ꦲꦁ.

꧓꧒꧔. ‘‘ꦥꦟ꧀ꦲꦺ [ꦥꦚ꧀ꦚꦺꦴ (ꦱꦷ. ꦥꦷ.), ꦥꦚ꧀ꦲꦺ (ꦱ꧀ꦪꦴ.), ꦥꦤ꧀ꦲꦺ (ꦏ.)] ꦮꦗ꧀ꦙꦺꦴ ꦩꦲꦺꦴꦱꦣꦺꦴ’’ꦠꦶ, ꦄꦴꦟꦠ꧀ꦠꦺꦴ ꦩꦺ ꦮꦣꦴꦪ ꦨꦹꦫꦶꦥꦚ꧀ꦚꦺꦴ;

ꦠꦁ ꦕꦶꦤ꧀ꦠꦪꦩꦴꦤꦺꦴ ꦢꦸꦩ꧀ꦩꦤꦺꦴꦱ꧀ꦩꦶ, ꦤ ꦲꦶ ꦢꦺꦮꦷ ꦄꦥꦫꦴꦣꦺꦴ ꦄꦠ꧀ꦡꦶ ꦠꦸꦪ꧀ꦲꦁ.

꧓꧒꧕. ꦄꦨꦶꦢꦺꦴꦱꦒꦠꦺꦴ ꦢꦴꦤꦶ ꦌꦲꦶꦱꦶ, ꦏꦶꦁ ꦱꦸꦠ꧀ꦮꦴ ꦏꦶꦁ ꦱꦔ꧀ꦏꦠꦺ ꦩꦤꦺꦴ ꦠꦺ;

ꦏꦺꦴ ꦠꦺ ꦏꦶꦩꦮꦺꦴꦕ ꦨꦹꦫꦶꦥꦚ꧀ꦚ, ꦆꦔ꧀ꦓ ꦮꦕꦤꦁ ꦱꦸꦟꦺꦴꦩ ꦧ꧀ꦫꦹꦲꦶ ꦩꦺꦠꦁ.

꧓꧒꧖. ‘‘ꦥꦟ꧀ꦲꦺ ꦮꦗ꧀ꦙꦺꦴ ꦩꦲꦺꦴꦱꦣꦺꦴ’’ꦠꦶ, ꦪꦢꦶ ꦠꦺ ꦩꦤ꧀ꦠꦪꦶꦠꦁ ꦗꦤꦶꦤ꧀ꦢ ꦢꦺꦴꦱꦁ;

ꦨꦫꦶꦪꦴꦪ ꦫꦲꦺꦴꦒꦠꦺꦴ ꦄꦱꦁꦱꦶ, ꦒꦸꦪ꧀ꦲꦁ ꦥꦴꦠꦸꦏꦠꦁ ꦱꦸꦠꦁ ꦩꦩꦺꦠꦁ.

꧓꧒꧗. ꦪꦁ ꦱꦴꦭꦮꦤꦱ꧀ꦩꦶꦁ ꦱꦺꦤꦏꦺꦴ, ꦥꦴꦥꦏꦩ꧀ꦩꦁ ꦄꦏꦴꦱꦶ ꦄꦱꦧ꧀ꦨꦶꦫꦹꦥꦁ;

ꦱꦑꦶꦤꦺꦴꦮ ꦫꦲꦺꦴꦒꦠꦺꦴ ꦄꦱꦁꦱꦶ, ꦒꦸꦪ꧀ꦲꦁ ꦥꦴꦠꦸꦏꦠꦁ ꦱꦸꦠꦁ ꦩꦩꦺꦠꦁ.

꧓꧒꧘. ꦥꦸꦏ꧀ꦏꦸꦱ [ꦥꦏ꧀ꦏꦸꦱ (ꦏ.) ꦗꦴ. ꧑.꧗.꧔꧑ ꦥꦟ꧀ꦟꦗꦴꦠꦏꦺ ꦥꦱ꧀ꦱꦶꦠꦧ꧀ꦧꦁ] ꦥꦸꦫꦶꦱꦱ꧀ꦱ ꦠꦺ ꦗꦤꦶꦤ꧀ꦢ, ꦈꦥ꧀ꦥꦤ꧀ꦤꦺꦴ ꦫꦺꦴꦒꦺꦴ ꦄꦫꦴꦗꦪꦸꦠ꧀ꦠꦺꦴ;

ꦨꦴꦠꦸꦚ꧀ꦕ [ꦨꦴꦠꦸꦕ꧀ꦕ (ꦱꦷ. ꦥꦷ.), ꦨꦴꦠꦸꦮ (ꦱ꧀ꦪꦴ.)] ꦫꦲꦺꦴꦒꦠꦺꦴ ꦄꦱꦁꦱꦶ, ꦒꦸꦪ꧀ꦲꦁ ꦥꦴꦠꦸꦏꦠꦁ ꦱꦸꦠꦁ ꦩꦩꦺꦠꦁ.

꧓꧒꧙. ꦄꦴꦧꦴꦣꦺꦴꦪꦁ ꦄꦱꦧ꧀ꦨꦶꦫꦹꦥꦺꦴ, ꦏꦴꦩꦶꦤ꧀ꦢꦺꦴ [ꦏꦴꦮꦶꦤ꧀ꦢꦺꦴ (ꦱꦷ. ꦥꦷ.)] ꦤꦫꦢꦺꦮꦺꦤ ꦦꦸꦛ꧀ꦜꦺꦴ;

ꦥꦸꦠ꧀ꦠꦱ꧀ꦱ ꦫꦲꦺꦴꦒꦠꦺꦴ ꦄꦱꦁꦱꦶ, ꦒꦸꦪ꧀ꦲꦁ ꦥꦴꦠꦸꦏꦠꦁ ꦱꦸꦠꦁ ꦩꦩꦺꦠꦁ.

꧓꧓꧐. ꦄꦛ꧀ꦜꦮꦔ꧀ꦏꦁ ꦩꦟꦶꦫꦠꦤꦁ ꦈꦭ꦳ꦴꦫꦁ, ꦱꦏ꧀ꦏꦺꦴ ꦠꦺ ꦄꦢꦢꦴ ꦥꦶꦠꦴꦩꦲꦱ꧀ꦱ;

ꦢꦺꦮꦶꦤ꧀ꦢꦱ꧀ꦱ ꦒꦠꦁ ꦠꦢꦗ꧀ꦗ ꦲꦠ꧀ꦡꦁ [ꦢꦺꦮꦶꦤ꧀ꦢꦱ꧀ꦱ ꦠꦢꦗ꧀ꦗ ꦲꦠ꧀ꦡꦒꦠꦁ (ꦏ.)], ꦩꦴꦠꦸꦚ꧀ꦕ ꦫꦲꦺꦴꦒꦠꦺꦴ ꦄꦱꦁꦱꦶ;

ꦒꦸꦪ꧀ꦲꦁ ꦥꦴꦠꦸꦏꦠꦁ ꦱꦸꦠꦁ ꦩꦩꦺꦠꦁ.

꧓꧓꧑. ꦒꦸꦪ꧀ꦲꦱ꧀ꦱ ꦲꦶ ꦒꦸꦪ꧀ꦲꦩꦺꦮ ꦱꦴꦣꦸ, ꦤ ꦲꦶ ꦒꦸꦪ꧀ꦲꦱ꧀ꦱ ꦥꦱꦠ꧀ꦡꦩꦴꦮꦶꦏꦩ꧀ꦩꦁ;

ꦄꦤꦶꦥ꧀ꦦꦤ꧀ꦤꦠꦴ ꦱꦲꦺꦪ꧀ꦪ ꦣꦷꦫꦺꦴ, ꦤꦶꦥ꧀ꦦꦤ꧀ꦤꦺꦴꦮ ꦪꦡꦴꦱꦸꦑꦁ ꦨꦟꦺꦪ꧀ꦪ.

꧓꧓꧒. ꦤ ꦒꦸꦪ꧀ꦲꦩꦠ꧀ꦡꦁ ꦮꦶꦮꦫꦺꦪ꧀ꦪ, ꦫꦏ꧀ꦑꦺꦪ꧀ꦪ ꦤꦁ ꦪꦡꦴ ꦤꦶꦣꦶꦁ;

ꦤ ꦲꦶ ꦥꦴꦠꦸꦏꦠꦺꦴ ꦱꦴꦣꦸ, ꦒꦸꦪ꧀ꦲꦺꦴ ꦄꦠ꧀ꦡꦺꦴ ꦥꦗꦴꦤꦠꦴ.

꧓꧓꧓. ꦡꦶꦪꦴ ꦒꦸꦪ꧀ꦲꦁ ꦤ ꦱꦁꦱꦺꦪ꧀ꦪ, ꦄꦩꦶꦠ꧀ꦠꦱ꧀ꦱ ꦕ ꦥꦟ꧀ꦝꦶꦠꦺꦴ;

ꦪꦺꦴ ꦕꦴꦩꦶꦱꦺꦤ ꦱꦁꦲꦷꦫꦺꦴ, ꦲꦢꦪꦠ꧀ꦡꦺꦤꦺꦴ ꦕ ꦪꦺꦴ ꦤꦫꦺꦴ.

꧓꧓꧔. ꦒꦸꦪ꧀ꦲꦩꦠ꧀ꦡꦁ ꦄꦱꦩ꧀ꦧꦸꦢ꧀ꦣꦁ, ꦱꦩ꧀ꦧꦺꦴꦣꦪꦠꦶ ꦪꦺꦴ ꦤꦫꦺꦴ;

ꦩꦤ꧀ꦠꦨꦺꦢꦨꦪꦴ ꦠꦱ꧀ꦱ, ꦢꦴꦱꦨꦹꦠꦺꦴ ꦠꦶꦠꦶꦏ꧀ꦑꦠꦶ.

꧓꧓꧕. ꦪꦴꦮꦤ꧀ꦠꦺꦴ ꦥꦸꦫꦶꦱꦱ꧀ꦱꦠ꧀ꦡꦁ, ꦒꦸꦪ꧀ꦲꦁ ꦗꦴꦤꦤ꧀ꦠꦶ ꦩꦤ꧀ꦠꦶꦤꦁ;

ꦠꦴꦮꦤ꧀ꦠꦺꦴ ꦠꦱ꧀ꦱ ꦈꦧ꧀ꦧꦺꦒꦴ, ꦠꦱ꧀ꦩꦴ ꦒꦸꦪ꧀ꦲꦁ ꦤ ꦮꦶꦱ꧀ꦱꦗꦺ.

꧓꧓꧖. ꦮꦶꦮꦶꦕ꧀ꦕ ꦨꦴꦱꦺꦪ꧀ꦪ ꦢꦶꦮꦴ ꦫꦲꦱ꧀ꦱꦁ, ꦫꦠ꧀ꦠꦶꦁ ꦒꦶꦫꦁ ꦤꦴꦠꦶꦮꦺꦭꦁ ꦥꦩꦸꦚ꧀ꦕꦺ;

ꦈꦥꦱ꧀ꦱꦸꦠꦶꦏꦴ ꦲꦶ ꦱꦸꦟꦤ꧀ꦠꦶ ꦩꦤ꧀ꦠꦁ, ꦠꦱ꧀ꦩꦴ ꦩꦤ꧀ꦠꦺꦴ ꦑꦶꦥ꧀ꦥꦩꦸꦥꦺꦠꦶ ꦨꦺꦢꦤ꧀ꦠꦶ.

ꦥꦚ꧀ꦕꦥꦟ꧀ꦝꦶꦠꦗꦴꦠꦏꦁ ꦢ꧀ꦮꦴꦢꦱꦩꦁ.