꧔꧘꧓. ꦱꦫꦨꦩꦶꦒꦗꦴꦠꦏꦁ (꧑꧐)

꧑꧓꧔. ꦄꦴꦱꦷꦱꦺꦡꦺꦮ [ꦄꦴꦱꦶꦁꦱꦺꦡꦺꦮ (ꦱꦷ. ꦱ꧀ꦪꦴ. ꦥꦷ.)] ꦥꦸꦫꦶꦱꦺꦴ, ꦤ ꦤꦶꦧ꧀ꦧꦶꦤ꧀ꦢꦺꦪ꧀ꦪ ꦥꦟ꧀ꦝꦶꦠꦺꦴ;

ꦥꦱ꧀ꦱꦴꦩꦶ ꦮꦺꦴꦲꦁ ꦄꦠ꧀ꦠꦴꦤꦁ, ꦪꦡꦴ ꦆꦕ꧀ꦖꦶꦁ ꦠꦡꦴ ꦄꦲꦸ.

꧑꧓꧕. ꦄꦴꦱꦷꦱꦺꦡꦺꦮ ꦥꦸꦫꦶꦱꦺꦴ, ꦤ ꦤꦶꦧ꧀ꦧꦶꦤ꧀ꦢꦺꦪ꧀ꦪ ꦥꦟ꧀ꦝꦶꦠꦺꦴ;

ꦥꦱ꧀ꦱꦴꦩꦶ ꦮꦺꦴꦲꦁ ꦄꦠ꧀ꦠꦴꦤꦁ, ꦈꦢꦏꦴ ꦡꦭꦩꦸꦧ꧀ꦨꦠꦁ.

꧑꧓꧖. ꦮꦴꦪꦩꦺꦡꦺꦮ ꦥꦸꦫꦶꦱꦺꦴ, ꦤ ꦤꦶꦧ꧀ꦧꦶꦤ꧀ꦢꦺꦪ꧀ꦪ ꦥꦟ꧀ꦝꦶꦠꦺꦴ;

ꦥꦱ꧀ꦱꦴꦩꦶ ꦮꦺꦴꦲꦁ ꦄꦠ꧀ꦠꦴꦤꦁ, ꦪꦡꦴ ꦆꦕ꧀ꦖꦶꦁ ꦠꦡꦴ ꦄꦲꦸ.

꧑꧓꧗. ꦮꦴꦪꦩꦺꦡꦺꦮ ꦥꦸꦫꦶꦱꦺꦴ, ꦤ ꦤꦶꦧ꧀ꦧꦶꦤ꧀ꦢꦺꦪ꧀ꦪ ꦥꦟ꧀ꦝꦶꦠꦺꦴ;

ꦥꦱ꧀ꦱꦴꦩꦶ ꦮꦺꦴꦲꦁ ꦄꦠ꧀ꦠꦴꦤꦁ, ꦈꦢꦏꦴ ꦡꦭꦩꦸꦧ꧀ꦨꦠꦁ.

꧑꧓꧘. ꦢꦸꦏ꧀ꦑꦹꦥꦤꦷꦠꦺꦴꦥꦶ ꦤꦫꦺꦴ ꦱꦥꦚ꧀ꦚꦺꦴ, ꦄꦴꦱꦁ ꦤ ꦖꦶꦤ꧀ꦢꦺꦪ꧀ꦪ ꦱꦸꦑꦴꦒꦩꦴꦪ;

ꦧꦲꦹ ꦲꦶ ꦦꦱ꧀ꦱꦴ ꦄꦲꦶꦠꦴ ꦲꦶꦠꦴ ꦕ, ꦄꦮꦶꦠꦏ꧀ꦏꦶꦠꦴ ꦩꦕ꧀ꦕꦩꦸꦥꦧ꧀ꦧꦗꦤ꧀ꦠꦶ [ꦩꦕ꧀ꦕꦸꦩꦸꦥꦧ꧀ꦧꦗꦤ꧀ꦠꦶ (ꦏ. ꦱꦷ. ꦥꦷ.), ꦩꦕ꧀ꦕꦸꦩꦸꦥꦥꦗ꧀ꦗꦤ꧀ꦠꦶ (ꦱ꧀ꦪꦴ. ꦏ.) ꦌꦠ꧀ꦡ ‘‘ꦄꦮꦶꦠꦏ꧀ꦏꦶꦠꦴꦥꦶ ꦦꦱ꧀ꦱꦺꦴ ꦩꦕ꧀ꦕꦁ ꦗꦤꦁ ꦈꦥꦒꦕ꧀ꦖꦤ꧀ꦠꦷ’’ꦠꦶ ꦄꦠ꧀ꦡꦺꦴ].

꧑꧓꧙. ꦄꦕꦶꦤ꧀ꦠꦶꦠꦩ꧀ꦥꦶ ꦨꦮꦠꦶ, ꦕꦶꦤ꧀ꦠꦶꦠꦩ꧀ꦥꦶ ꦮꦶꦤꦱ꧀ꦱꦠꦶ;

ꦤ ꦲꦶ ꦕꦶꦤ꧀ꦠꦴꦩꦪꦴ ꦨꦺꦴꦒꦴ, ꦆꦠ꧀ꦡꦶꦪꦴ ꦥꦸꦫꦶꦱꦱ꧀ꦱ ꦮꦴ.

꧑꧔꧐. ꦱꦫꦨꦁ ꦒꦶꦫꦶꦢꦸꦒ꧀ꦒꦱ꧀ꦩꦶꦁ, ꦪꦁ ꦠ꧀ꦮꦁ ꦄꦤꦸꦱꦫꦷ ꦥꦸꦫꦺ;

ꦄꦭꦷꦤꦕꦶꦠ꧀ꦠꦱ꧀ꦱ ꦠꦸꦮꦁ, ꦮꦶꦏ꧀ꦏꦤ꧀ꦠꦩꦤꦸꦗꦷꦮꦱꦶ [ꦠꦮ, ꦮꦶꦏ꧀ꦏꦤ꧀ꦠꦁ ꦗꦷꦮꦶꦠꦁ ꦭꦨꦶ (ꦏ.)].

꧑꧔꧑. ꦪꦺꦴ ꦠꦁ ꦮꦶꦢꦸꦒ꧀ꦒꦴ ꦤꦫꦏꦴ ꦱꦩꦸꦢ꧀ꦣꦫꦶ, ꦱꦶꦭꦴꦪ ꦪꦺꦴꦒ꧀ꦒꦁ ꦱꦫꦨꦺꦴ ꦏꦫꦶꦠ꧀ꦮꦴ;

ꦢꦸꦏ꧀ꦑꦹꦥꦤꦷꦠꦁ ꦩꦕ꧀ꦕꦸꦩꦸꦑꦴ ꦥꦩꦺꦴꦕꦪꦶ, ꦄꦭꦷꦤꦕꦶꦠ꧀ꦠꦁ ꦠꦁ ꦩꦶꦒꦁ [ꦠꦩꦺꦮ (ꦱ꧀ꦪꦴ. ꦏ.)] ꦮꦢꦺꦱꦶ.

꧑꧔꧒. ꦏꦶꦁ ꦠ꧀ꦮꦁ ꦤꦸ [ꦠꦸꦮꦤ꧀ꦤꦸ (ꦱꦷ. ꦥꦷ.)] ꦠꦠ꧀ꦡꦺꦮ ꦠꦢꦴ ꦄꦲꦺꦴꦱꦶ, ꦈꦢꦴꦲꦸ ꦠꦺ ꦏꦺꦴꦕꦶ ꦤꦁ [ꦠꦁ (ꦏ.)] ꦌꦠꦢꦏ꧀ꦑꦴ;

ꦮꦶꦮꦛ꧀ꦛꦕ꧀ꦖꦢ꧀ꦢꦺꦴ ꦤꦸꦱꦶ ꦱꦧ꧀ꦧꦢꦱ꧀ꦱꦷ, ꦚꦴꦟꦁ ꦤꦸ ꦠꦺ ꦧ꧀ꦫꦴꦲ꧀ꦩꦟ ꦨꦶꦁꦱꦫꦹꦥꦁ.

꧑꧔꧓. ꦤ ꦕꦺꦮꦲꦁ ꦠꦠ꧀ꦡ ꦠꦢꦴ ꦄꦲꦺꦴꦱꦶꦁ, ꦤ ꦕꦴꦥꦶ ꦩꦺ ꦏꦺꦴꦕꦶ ꦤꦁ [ꦠꦁ (ꦏ.)] ꦌꦠꦢꦏ꧀ꦑꦴ;

ꦒꦴꦡꦴꦥꦢꦴꦤꦚ꧀ꦕ ꦱꦸꦨꦴꦱꦶꦠꦴꦤꦁ, ꦄꦠ꧀ꦡꦁ ꦠꦢꦴꦤꦺꦤ꧀ꦠꦶ ꦗꦤꦶꦤ꧀ꦢ ꦣꦷꦫꦴ.

꧑꧔꧔. ꦄꦴꦢꦴꦪ ꦥꦠ꧀ꦠꦶꦁ [ꦥꦠ꧀ꦠꦁ (ꦱ꧀ꦪꦴ.), ꦥꦛ꧀ꦛꦶꦁ (ꦏ.)] ꦥꦫꦮꦶꦫꦶꦪꦓꦴꦠꦶꦁ, ꦕꦴꦥꦺ ꦱꦫꦁ ꦏꦶꦁ ꦮꦶꦕꦶꦏꦶꦕ꧀ꦖꦱꦺ ꦠꦸꦮꦁ;

ꦤꦸꦤ꧀ꦤꦺꦴ [ꦤꦸꦟ꧀ꦟꦺꦴ (ꦏ. ꦱꦷ. ꦱ꧀ꦪꦴ.), ꦠꦸꦟ꧀ꦟꦺꦴ (ꦏ.)] ꦱꦫꦺꦴ ꦱꦫꦨꦁ ꦲꦤ꧀ꦠꦸ ꦑꦶꦥ꧀ꦥꦁ, ꦄꦤ꧀ꦤꦚ꧀ꦲꦶ ꦌꦠꦁ ꦮꦫꦥꦚ꧀ꦚ ꦫꦚ꧀ꦚꦺꦴ.

꧑꧔꧕. ꦄꦢ꧀ꦣꦴ ꦥꦗꦴꦤꦴꦩꦶ ꦄꦲꦩ꧀ꦥꦶ ꦌꦠꦁ, ꦄꦤ꧀ꦤꦁ ꦩꦶꦒꦺꦴ ꦧ꧀ꦫꦴꦲ꧀ꦩꦟ ꦑꦠ꧀ꦠꦶꦪꦱ꧀ꦱ;

ꦥꦸꦧ꧀ꦧꦺ ꦏꦠꦚ꧀ꦕ [ꦥꦸꦧ꧀ꦧꦺ ꦕ ꦏꦠꦁ (ꦏ.)] ꦄꦥꦕꦴꦪꦩꦴꦤꦺꦴ, ꦠꦱ꧀ꦩꦴ ꦩꦶꦒꦁ ꦱꦫꦨꦁ ꦤꦺꦴ ꦲꦤꦴꦩꦶ.

꧑꧔꧖. ꦤꦺꦱꦺꦴ ꦩꦶꦒꦺꦴ ꦩꦲꦴꦫꦴꦗ, ꦄꦱꦸꦫꦺꦱꦺꦴ ꦢꦶꦱꦩ꧀ꦥꦠꦶ;

ꦌꦠꦁ ꦲꦤ꧀ꦠ꧀ꦮꦴ ꦩꦤꦸꦱ꧀ꦱꦶꦤ꧀ꦢ, ꦨꦮꦱ꧀ꦱꦸ ꦄꦩꦫꦴꦣꦶꦥꦺꦴ.

꧑꧔꧗. ꦱꦕꦺ ꦕ ꦫꦴꦗꦴ [ꦫꦴꦗ (ꦱꦷ. ꦱ꧀ꦪꦴ. ꦥꦷ.)] ꦮꦶꦕꦶꦏꦶꦕ꧀ꦖꦱꦺ ꦠꦸꦮꦁ, ꦲꦤ꧀ꦠꦸꦁ ꦩꦶꦒꦁ ꦱꦫꦨꦁ ꦱꦲꦴꦪꦏꦁ [ꦱꦲꦴꦪꦏꦁ ꦩꦺ (ꦱꦷ. ꦥꦷ.)];

ꦱꦥꦸꦠ꧀ꦠꦢꦴꦫꦺꦴ ꦤꦫꦮꦷꦫꦱꦺꦛ꧀ꦜ [ꦤꦫꦮꦶꦫꦶꦪꦱꦺꦛ꧀ꦜ (ꦱꦷ. ꦥꦷ.)], ꦒꦤ꧀ꦠ꧀ꦮꦴ [ꦒꦤ꧀ꦠꦴ (ꦱꦷ. ꦥꦷ. ꦄꦛ꧀ꦜ.)] ꦠꦸꦮꦁ ꦮꦺꦠꦫꦟꦶꦁ ꦪꦩꦱ꧀ꦱ.

꧑꧔꧘. ꦏꦴꦩꦁ ꦄꦲꦁ ꦗꦴꦤꦥꦢꦴ ꦕ ꦱꦧ꧀ꦧꦺ, ꦥꦸꦠ꧀ꦠꦴ ꦕ ꦢꦴꦫꦴ ꦕ ꦱꦲꦴꦪꦱꦔ꧀ꦓꦴ;

ꦒꦕ꧀ꦖꦺꦩꦸ ꦠꦁ ꦮꦺꦠꦫꦟꦶꦁ ꦪꦩꦱ꧀ꦱ, ꦤ ꦠ꧀ꦮꦺꦮ ꦲꦚ꧀ꦚꦺꦴ ꦩꦩ ꦥꦴꦟꦢꦺꦴ ꦪꦺꦴ [ꦥꦴꦟꦢ’ꦱ꧀ꦱ (ꦱꦷ. ꦱ꧀ꦪꦴ. ꦥꦷ.)].

꧑꧔꧙. ꦄꦪꦁ ꦩꦶꦒꦺꦴ ꦏꦶꦕ꧀ꦖꦒꦠꦱ꧀ꦱ ꦩꦪ꧀ꦲꦁ, ꦌꦏꦱ꧀ꦱ ꦏꦠ꧀ꦠꦴ ꦮꦶꦮꦤꦱ꧀ꦩꦶ ꦓꦺꦴꦫꦺ;

ꦠꦁ ꦠꦴꦢꦶꦱꦁ ꦥꦸꦧ꧀ꦧꦏꦶꦕ꧀ꦕꦁ ꦱꦫꦤ꧀ꦠꦺꦴ, ꦗꦴꦤꦁ ꦩꦲꦴꦧ꧀ꦫꦲ꧀ꦩꦺ ꦏꦡꦁ ꦲꦤꦺꦪ꧀ꦪꦁ.

꧑꧕꧐. ꦩꦶꦠ꧀ꦠꦴꦨꦶꦫꦴꦣꦷ ꦕꦶꦫꦩꦺꦮ ꦗꦷꦮ, ꦫꦗ꧀ꦗꦁ ꦆꦩꦁ ꦣꦩ꧀ꦩꦒꦸꦟꦺ [ꦫꦗ꧀ꦗꦩ꧀ꦥꦶꦩꦁ ꦕꦱ꧀ꦱ ꦒꦟꦺ (ꦏ.)] ꦥꦱꦴꦱ;

ꦤꦴꦫꦷꦒꦟꦺꦲꦶ ꦥꦫꦶꦕꦴꦫꦶꦪꦤ꧀ꦠꦺꦴ, ꦩꦺꦴꦢꦱ꧀ꦱꦸ ꦫꦛ꧀ꦜꦺ ꦠꦶꦢꦶꦮꦺꦮ ꦮꦴꦱꦮꦺꦴ.

꧑꧕꧑. ꦄꦏ꧀ꦏꦺꦴꦣꦤꦺꦴ ꦤꦶꦕ꧀ꦕꦥꦱꦤ꧀ꦤꦕꦶꦠ꧀ꦠꦺꦴ, ꦱꦧ꧀ꦧꦴꦠꦶꦡꦷ ꦪꦴꦕꦪꦺꦴꦒꦺꦴ ꦨꦮꦶꦠ꧀ꦮꦴ [ꦥꦴꦲꦸꦤꦏꦺ ꦏꦫꦶꦠ꧀ꦮꦴ (ꦱ꧀ꦪꦴ.), ꦪꦴꦕꦪꦺꦴꦒꦺꦴ ꦮꦶꦢꦶꦠ꧀ꦮꦴ (ꦏ.)];

ꦢꦠ꧀ꦮꦴ ꦕ ꦨꦸꦠ꧀ꦮꦴ ꦕ ꦪꦡꦴꦤꦸꦨꦴꦮꦁ, ꦄꦤꦶꦤ꧀ꦢꦶꦠꦺꦴ ꦱꦒ꧀ꦒꦩꦸꦥꦺꦲꦶ ꦜꦴꦤꦤ꧀ꦠꦶ.

ꦱꦫꦨꦩꦶꦒꦗꦴꦠꦏꦁ ꦢꦱꦩꦁ.

ꦠꦺꦫꦱꦏꦤꦶꦥꦴꦠꦁ ꦤꦶꦛ꧀ꦜꦶꦠꦁ.