꧑꧐. ꦭꦶꦠ꧀ꦠꦮꦒ꧀ꦒꦺꦴ

꧙꧑. ꦭꦶꦠ꧀ꦠꦁ ꦥꦫꦩꦺꦤ ꦠꦺꦗꦱꦴ, ꦒꦶꦭꦩꦏ꧀ꦑꦁ ꦥꦸꦫꦶꦱꦺꦴ ꦤ ꦧꦸꦗ꧀ꦙꦠꦶ;

ꦒꦶꦭ ꦫꦺ ꦒꦶꦭ ꦥꦴꦥꦣꦸꦠ꧀ꦠꦏ, ꦥꦕ꧀ꦖꦴ ꦠꦺ ꦏꦛꦸꦏꦁ ꦨꦮꦶꦱ꧀ꦱꦠꦷꦠꦶ.

ꦭꦶꦠ꧀ꦠꦗꦴꦠꦏꦁ ꦥꦜꦩꦁ.

꧙꧒. ꦈꦏ꧀ꦏꦛ꧀ꦜꦺ ꦱꦹꦫꦩꦶꦕ꧀ꦖꦤ꧀ꦠꦶ, ꦩꦤ꧀ꦠꦷꦱꦸ ꦄꦏꦸꦠꦹꦲꦭꦁ;

ꦥꦶꦪꦚ꧀ꦕ ꦄꦤ꧀ꦤꦥꦴꦤꦩ꧀ꦲꦶ, ꦄꦠ꧀ꦡꦺ ꦗꦴꦠꦺ ꦕ ꦥꦟ꧀ꦝꦶꦠꦤ꧀ꦠꦶ.

ꦩꦲꦴꦱꦴꦫꦗꦴꦠꦏꦁ ꦢꦸꦠꦶꦪꦁ.

꧙꧓. ꦤ ꦮꦶꦱ꧀ꦱꦱꦺ ꦄꦮꦶꦱ꧀ꦱꦠ꧀ꦡꦺ, ꦮꦶꦱ꧀ꦱꦠ꧀ꦡꦺꦥꦶ ꦤ ꦮꦶꦱ꧀ꦱꦱꦺ;

ꦮꦶꦱ꧀ꦱꦴꦱꦴ ꦨꦪꦩꦤ꧀ꦮꦺꦠꦶ, ꦱꦷꦲꦁꦮ ꦩꦶꦒꦩꦴꦠꦸꦏꦴꦠꦶ [ꦩꦶꦒꦩꦴꦠꦸꦪꦴ (ꦏ.)].

ꦮꦶꦱꦴꦱꦨꦺꦴꦗꦤꦗꦴꦠꦏꦁ ꦠꦠꦶꦪꦁ.

꧙꧔. ꦱꦺꦴꦠꦠ꧀ꦠꦺꦴ ꦱꦺꦴꦱꦶꦤ꧀ꦢꦺꦴ [ꦱꦺꦴꦱꦷꦠꦺꦴ (ꦱꦷ. ꦱ꧀ꦪꦴ. ꦥꦷ.), ꦱꦺꦴꦱꦶꦤꦺꦴ (ꦏ.)] ꦕꦺꦮ, ꦌꦏꦺꦴ ꦨꦶꦁꦱꦤꦏꦺ ꦮꦤꦺ;

ꦤꦒ꧀ꦒꦺꦴ ꦤ ꦕꦒ꧀ꦒꦶꦩꦴꦱꦷꦤꦺꦴ, ꦌꦱꦤꦴꦥꦱꦸꦠꦺꦴ ꦩꦸꦤꦷꦠꦶ.

ꦭꦺꦴꦩꦲꦁꦱꦗꦴꦠꦏꦁ ꦕꦠꦸꦠ꧀ꦡꦁ.

꧙꧕. ꦄꦤꦶꦕ꧀ꦕꦴ ꦮꦠ ꦱꦔ꧀ꦑꦴꦫꦴ, ꦈꦥ꧀ꦥꦴꦢꦮꦪꦣꦩ꧀ꦩꦶꦤꦺꦴ;

ꦈꦥ꧀ꦥꦗ꧀ꦗꦶꦠ꧀ꦮꦴ ꦤꦶꦫꦸꦗ꧀ꦙꦤ꧀ꦠꦶ, ꦠꦺꦱꦁ ꦮꦹꦥꦱꦩꦺꦴ ꦱꦸꦑꦺꦴꦠꦶ.

ꦩꦲꦴꦱꦸꦢꦱ꧀ꦱꦤꦗꦴꦠꦏꦁ ꦥꦚ꧀ꦕꦩꦁ.

꧙꧖. ꦱꦩꦠꦶꦠ꧀ꦠꦶꦏꦁ ꦄꦤꦮꦱꦺꦏꦁ, ꦠꦺꦭꦥꦠ꧀ꦠꦁ ꦪꦡꦴ ꦥꦫꦶꦲꦫꦺꦪ꧀ꦪ;

ꦌꦮꦁ ꦱꦕꦶꦠ꧀ꦠꦩꦤꦸꦫꦏ꧀ꦑꦺ, ꦥꦠ꧀ꦡꦪꦴꦤꦺꦴ ꦢꦶꦱꦁ ꦄꦒꦠꦥꦸꦧ꧀ꦧꦤ꧀ꦠꦶ.

ꦠꦺꦭꦥꦠ꧀ꦠꦗꦴꦠꦏꦁ ꦖꦛ꧀ꦜꦁ.

꧙꧗. ꦗꦷꦮꦏꦚ꧀ꦕ ꦩꦠꦁ ꦢꦶꦱ꧀ꦮꦴ, ꦣꦤꦥꦴꦭꦶꦚ꧀ꦕ ꦢꦸꦒ꧀ꦒꦠꦁ;

ꦥꦤ꧀ꦡꦏꦚ꧀ꦕ ꦮꦤꦺ ꦩꦹꦭ꦳꧀ꦲꦁ, ꦥꦴꦥꦏꦺꦴ ꦥꦸꦤꦫꦴꦒꦠꦺꦴꦠꦶ.

ꦤꦴꦩꦱꦶꦢ꧀ꦣꦶꦗꦴꦠꦏꦁ ꦱꦠ꧀ꦠꦩꦁ.

꧙꧘. ꦱꦴꦣꦸ ꦑꦺꦴ ꦥꦟ꧀ꦝꦶꦠꦺꦴ ꦤꦴꦩ, ꦤ ꦠ꧀ꦮꦺꦮ ꦄꦠꦶꦥꦟ꧀ꦝꦶꦠꦺꦴ;

ꦄꦠꦶꦥꦟ꧀ꦝꦶꦠꦺꦤ ꦥꦸꦠ꧀ꦠꦺꦤ, ꦩꦤꦩ꧀ꦲꦶ ꦈꦥꦏꦹꦭ꦳ꦶꦠꦺꦴꦠꦶ [ꦈꦥꦏꦹꦭꦶꦠꦺꦴꦠꦶ (ꦱꦷ.), ꦈꦥꦏꦸꦛ꧀ꦜꦶꦠꦺꦴꦠꦶ (ꦱ꧀ꦪꦴ.), ꦈꦥꦏꦸꦛꦶꦠꦺꦴ (ꦏ.)].

ꦏꦹꦛꦮꦴꦟꦶꦗꦗꦴꦠꦏꦁ ꦄꦛ꧀ꦜꦩꦁ.

꧙꧙. ꦥꦫꦺꦴꦱꦲꦱ꧀ꦱꦩ꧀ꦥꦶ ꦱꦩꦴꦒꦠꦴꦤꦁ, ꦏꦤ꧀ꦢꦺꦪ꧀ꦪꦸꦁ ꦠꦺ ꦮꦱ꧀ꦱꦱꦠꦁ ꦄꦥꦚ꧀ꦚꦴ;

ꦌꦏꦺꦴꦮ ꦱꦺꦪ꧀ꦪꦺꦴ ꦥꦸꦫꦶꦱꦺꦴ ꦱꦥꦚ꧀ꦚꦺꦴ, ꦪꦺꦴ ꦨꦴꦱꦶꦠꦱ꧀ꦱ ꦮꦶꦗꦴꦤꦴꦠꦶ ꦄꦠ꧀ꦡꦤ꧀ꦠꦶ.

ꦥꦫꦺꦴꦱꦲꦱ꧀ꦱꦗꦴꦠꦏꦁ ꦤꦮꦩꦁ.

꧑꧐꧐. ꦄꦱꦴꦠꦁ ꦱꦴꦠꦫꦹꦥꦺꦤ, ꦥꦶꦪꦫꦹꦥꦺꦤ ꦄꦥ꧀ꦥꦶꦪꦁ;

ꦢꦸꦏ꧀ꦑꦁ ꦱꦸꦑꦱ꧀ꦱ ꦫꦹꦥꦺꦤ, ꦥꦩꦠ꧀ꦠꦩꦠꦶꦮꦠ꧀ꦠꦠꦷꦠꦶ.

ꦄꦱꦴꦠꦫꦹꦥꦗꦴꦠꦏꦁ ꦢꦱꦩꦁ.

ꦭꦶꦠ꧀ꦠꦮꦒ꧀ꦒꦺꦴ ꦢꦱꦩꦺꦴ.

ꦠꦱ꧀ꦱꦸꦢ꧀ꦢꦴꦤꦁ –

ꦒꦶꦭꦩꦏ꧀ꦑꦏꦸꦠꦹꦲꦭ ꦩꦴꦠꦸꦏꦱ꧀ꦱꦴ, ꦩꦸꦤꦶꦤꦴ ꦕ ꦄꦤꦶꦕ꧀ꦕꦠ ꦥꦠ꧀ꦠꦮꦫꦁ;

ꦣꦤꦥꦴꦭꦶꦮꦫꦺꦴ ꦄꦠꦶꦥꦟ꧀ꦝꦶꦠꦏꦺꦴ, ꦱꦥꦫꦺꦴꦱꦲꦱ꧀ꦱꦄꦱꦴꦠꦢꦱꦴꦠꦶ.

ꦩꦗ꧀ꦙꦶꦩꦺꦴ ꦥꦟ꧀ꦟꦴꦱꦏꦺꦴ.